Category: សុខភាព

ប្រទេសណាមួយដែលមានអត្រានៃការស្លាប់ដោយសារ COVID-19 ខ្ពស់ជាងគេក្នុងពិភពលោក?
បើទោះជាមានប្រជាជនសរុបប្រមាណជា12លាននាក់ ប៉ុន្តែ បែលហ្សិកមានអ្នកស្លាប់ដោយសារវីរុសCOVID-19 ដល់ទៅជាង9,000នាក់ ជិតស្មើនឹង2ដងបើធៀបនឹងតួលេខអ្នកស្លាប់នៅប្រទេសចិន ដែលជាប្រភពនៃមេរោគកូរ៉ូណាថ្មីនេះ។
អត្រានៃការស្លាប់ដោយសារវីរុសCOVID-19 នៅប្រទេសបែលហ្សិកគឺ 16.4% ពោលគឺខ្ពស់ជាងគេបង្អស់ក្នុងពិភព លោក។ ប្រទេសនេះឈរលំដាប់លេខ1 បើគិតអំពីអត្រានៃការស្លាប់ធៀបជាមួយនឹងចំនួនប្រជាជន ដោយមានអត្រានៃការស្លាប់ស្មើនឹង78នាក់/100,000នាក់(ក្នុង100,000នាក់គឺមាន78នាក់់បានស្លាប់ដោយសារ COVID-19)។ នេះបើតាមស្ថិតិរបស់សាកលវិទ្យាល័យ Johns Hopkins នៃសហរដ្ឋអាមេរិក។ ចំណែកអត្រានេះនៅសហរដ្ឋអាមេរិកគឺត្រឹម26/100,000 ខណៈអាស្ប៉ាញមាន58/100,000 និងអ៊ីតាលីមាន52/100,000។
ក្រុមមន្ត្រីរដ្ឋាភិបាលបែលហ្សិកបានឱ្យដឹងថា មូលហេតុដែលនាំឱ្យអត្រានៃការស្លាប់ដ៏ខ្ពស់គួរឱ្យខ្លាចបែបនេះ គឺមិនមែនដោយសារប្រព័ន្ធសុខាភិបាលត្រូវធ្វើការលើសកម្លាំង ឬខ្សោយនោះទេ តែវាជាលទ្ធផលនៃរបៀបស្រង់ស្ថិតិ។ ខុសពីបណ្ដាប្រទេសដទៃ បែលហ្សិកបូកបញ្ចូលអ្នកស្លាប់នៅក្នុងមជ្ឈមណ្ឌលចាស់ជរាទៅក្នុងតួលេខអ្នកស្លាប់ដោយសារវីរុសCOVID-19ផងដែរ សូម្បីតែអ្នកស្លាប់ទាំងនោះមិនទាន់ត្រូវបានបញ្ជាក់ជាផ្លូវការថាបានឆ្លងវីរុសកូរ៉ូណាក៏ដោយ។
Steven Van Gucht ដែលជាអ្នកដឹកនាំស្ថាប័នគ្រប់គ្រងជំងឺឆ្លងប្រចាំវិទ្យាស្ថានសុខាភិបាលសាធារណៈ Sciensano របស់ប្រទេសបែលហ្សិក បានឱ្យដឹងថា “យើងតែងត្រូវបានគេរិះគន់ដោយសារបានធ្វើឱ្យបែលហ្សិកមើលទៅហាក់ដូចជាអាក្រក់ខ្លាំងណាស់ ប៉ុន្តែយើងគិតផ្ទុយពីនេះ។ បើសិនជាចង់ប្រៀបធៀបតួលេខរបស់ប្រទេសយើងខ្ញុំ ជាមួយនឹងប្រទេសដទៃ ជាមូលដ្ឋានអ្នកត្រូវតែបន្ថយតួលេខចុះពាក់កណ្ដាល”។
តួលេខនៃអ្នកស្លាប់ដោយសារវីរុសកូរ៉ូណានៅក្នុងមជ្ឈមណ្ឌលចាស់ជរានានាប្រមាណជា95% មិនទាន់ទទួលបានលទ្ធផលនៃការធ្វើតេស្តរកវីរុសCOVID-19 ប៉ុន្តែបែលហ្សិកបានរាប់តួលេខនេះចូលទៅក្នុងតួលេខនៃអ្នកស្លាប់ដោយសារវីរុសកូរ៉ូណារបស់ខ្លួន ដោយគ្រាន់តែយោងទៅលើអាការរោគ និងប្រវត្តិទំនាក់ទំនងរបស់អ្នកស្លាប់តែប៉ុណ្ណោះ ក្នុងបំណងធ្វើឱ្យមានភាពជាក់លាក់ក្នុងការគណនាអំពីឥទ្ធិពលរបស់មេរោគ ក៏ដូចជាដើម្បីអាចរកឃើញសម្បុកមេរោគបានឆាប់ជាងធម្មតា។ តួលេខនៃអ្នកស្លាប់ដោយសារវីរុសកូរ៉ូណានៅខាងក្រៅមន្ទីរពេទ្យនៅប្រទេសនេះ គឺមានប្រមាណជាពាក់កណ្ដាលនៃតួលេខសរុបអំពីអ្នកស្លាប់ដោយសារវីរុសCOVID-19។
លោក Yves Van Laethem ដែលជាអ្នកឯកទេសខាងវីរុស និងជាអ្នកនាំពាក្យរបស់រដ្ឋាភិបាលបែលហ្សិក បានប្រាប់អ្នកសារព័ត៌មានកាលពីថ្ងៃទី15ឧសភាកន្លងទៅថា “វិធិសាស្ត្រស្រង់ស្ថិតិរបស់យើងគឺពិតជាសុក្រឹត និងស្មោះត្រង់បើគិតអំពីវិទ្យាសាស្ត្រ”។
យោងតាមទស្សនាវដ្ដី Economist បែលហ្សិកគឺជាប្រទេសដែលទទួលរងផលប៉ះពាល់ធ្ងន់ធ្ងរបំផុតលំដាប់ទី3ក្នុងពិភពលោក បន្ទាប់ពីអង់គ្លេស និងអេស្ប៉ាញ។ ទស្សនាវដ្ដីនេះមិនបានយកតួលេខនៅសហរដ្ឋអាមេរិកមកប្រៀបធៀបនោះទេ ប៉ុន្តែបានគន់គូរឃើញថា អត្រានៃការស្លាប់ហួសកម្រិតនៅទីក្រុងនីវយ៉ក ខ្ពស់ជាងនៅអង់គ្លេស។
មន្ត្រីបែលហ្សិកក៏បានទទួលស្គាល់ថា COVID-19 បានវាយប្រហារខ្លាំងក្លាមកលើប្រទេសនេះ។ “យើងស្រង់ស្ថិតិបានត្រឹមត្រូវល្អណាស់ ប៉ុន្តែប្រការនេះមិនបានជួយកាត់បន្ថយភាពធ្ងន់ធ្ងរដែលប្រទេសយើសខ្ញុំបានរងគ្រោះនោះទេ” នេះបើតាមសម្ដីលោក Van Gucht។
អ្នកនាំពាក្យរបស់រដ្ឋាភិបាលបែលហ្សិកបានឱ្យដឹងថា មូលហេតុមួយក្នុងចំណោមមូលហេតុផ្សេងទៀតដែលនាំឱ្យអត្រានៃការស្លាប់ដោយសារវីរុសកូរ៉ូណានៅប្រទេសនេះមានលក្ខណៈខ្ពស់ នោះគឺដង់ស៊ីតេប្រជាជនមានកម្រិតខ្ពស់ជាងបណ្ដាប្រទេសនៅក្បែរខាង។ អាកាសយានដ្ឋាន Brussels អាចជាកន្លែងចម្លងវីរុសឱ្យរាលដាលពាសពេញរដ្ឋធានីដែលមានប្រជាជនយ៉ាងច្រើនកំពុងរស់នៅ។ ពលរដ្ឋបែលហ្សិកជាច្រើន ថែមទាំងបានទៅលេងស្គីទឹកកកនៅភាគខាងជើងប្រទេសអ៊ីតាលី ដែលជាសម្បុកមេរោគរបស់ប្រទេសនេះ នៅក្នុងរដូវឈប់សម្រាកកាលពីខែកុម្ភៈកន្លងទៅ។
មជ្ឈមណ្ឌលថែទាំចាស់ជរារបស់បែលហ្សិក មានអ្នកស្លាប់ស្មើនឹងជាងពាក់កណ្ដាលនៃអ្នកស្លាប់ដោយសារវីរុសCOVID-19 ដោយមួយផ្នែកគឺដោយសារមនុស្សចាស់នៅប្រទេសនេះ ចូលចិត្តរស់នៅក្នុងមជ្ឈមណ្ឌលចាស់ជរាច្រើនជាងបណ្ដាប្រទេសផ្សេងៗនៅអឺរ៉ុប។ មន្ត្រីសុខាភិបាលបានទទួលស្គាល់ថា ពួកគេមានការយឺតយ៉ាវក្នុងការរកឃើញហានិភ័យនៃការឆ្លងរាលដាលវីរុសកូរ៉ូណានៅតាមមជ្ឈមណ្ឌលចាស់ជរាទាំងនេះ៕
ប្រភព៖ សារព័ត៌មានបរទេស
May 19, 2020
ទង្វើ 5 យ៉ាងដែលប្រថុយនឹងជំងឺបេះដូង
ជំងឺបេះដូងមិនមែនមានតែនៅក្នុងខ្សែភាពយន្តដែលយើងតែងឃើញតារាសម្តែងចំណាស់ៗវ័យឪពុកម្តាយលើកដៃឡើងក្តោបដើមទ្រូងជាសញ្ញាថាឈឺបេះដូង ហើយទីបំផុតក៏ស្លាប់បាត់បង់ជីវិតនោះ មិនមែនជារឿងខុសប្រក្រតីឡើយ ព្រោះនរណាៗក៏មានសិទ្ធិកើតជំងឺបេះដូងបានទាំងអស់ ថែមទាំងមិនមែនកើតតែចំពោះមនុស្សចាស់អាយុច្រើនប៉ុណ្ណោះទេ យើងគ្រប់គ្នា គ្រប់ភេទ គ្រប់វ័យ សុទ្ធតែអាចកើតជំងឺបេះដូងបានទាំងអស់ បើមិនព្រមបញ្ឈប់ទង្វើដូចខាងក្រោមនេះទេ។
1 – បរិភោគអាហារដែលមានខ្លាញ់ច្រើន
ដូចជា ជើងជ្រូក សាច់ជ្រូកបីជាន់ ស្បែកមាន់បំពង សម្លរខ្ទិះខ្លាញ់ៗផ្សេងៗ បើសិនបរិភោគច្រើនជ្រុលពេក អាចនឹងធ្វើឱ្យកើតសភាវជាតិខ្លាញ់ញ៉ុកណែននៅក្នុងសរសៃឈាម ធ្វើឱ្យឈាមបាញ់ចេញទៅចិញ្ចឹមរាងកាយមិនគ្រប់គ្រាន់ រហូតធ្វើឱ្យកើតសភាវបេះដូងខ្វះឈាម និងអាចនាំឆ្ពោះទៅរកសភាវគាំងបេះដូងបាន។
2 – ជក់បារី
មនុស្សជាច្រើនអាចនឹងគិតថា ការជក់បារីនឹងធ្វើឱ្យកើតមហារីកសួតតែប៉ុណ្ណោះ តែការពិតវិញ បារីគឺជាមូលហេតុដែលសំខាន់មួយរបស់ជំងឺបេះដូងដូចគ្នាដែរ ព្រោះបារីធ្វើឱ្យបេះដូងខ្សោះឈាម និងកើតជំងឺសរសៃឈាមបេះដូង។
3 – ធុញថប់តានតឹង
ដែលយើងធ្លាប់ឃើញនៅក្នុងខ្សែភាពយន្តថា មហាសេដ្ឋីទាំងឡាយធ្វើការច្រើន មានអារម្មណ៍តានតឹងធុញថប់ ត្រូវលីសែងបន្ទុកធ្ងន់ និងមានសម្ពាធផ្លូវចិត្តគ្រប់ពេលវេលារហូតកើតជំងឺបេះដូង នោះគឺជារឿងពិត ព្រោះពេលណាដែលយើងមានអារម្មណ៍ធុញថប់តានតឹង បេះដូងយើងនឹងធ្វើការកាន់តែខ្លាំងឡើង បេះដូងដើរញាប់ឡើង សម្ពាធឈាមខ្ពស់ឡើង រហូតអាចកើតសភាវបេះដូងដើរខុសចង្វាក់រហូតជំរុញអាការរបស់ជំងឺបេះដូងឱ្យកាន់តែធ្ងន់ធ្ងរឡើងបាន(ក្នុងករណីដែលអ្នកជំងឺកំពុងមានភាពប្រថុយប្រថានស្រាប់ហើយ)។
4 – មិនដែលហាត់ប្រាណ
ការរត់ រាំអ៊ែរ៉ូប៊ិកឌែនស៍ ឬហាត់ប្រាណបែបខាឌីអូផ្សេងៗប្រៀបដូចជានាំគ្នាជួយឱ្យបេះដូងបានហាត់ប្រាណ បង្កើនភាពរឹងមាំដល់បេះដូងដូច្នោះដែរ បើបេះដូងមិនដែលបានហ្វឹកហាត់ ក៏ទ្រាំនឹងការធ្វើការធ្ងន់មិនរួច នៅពេលដែលយើងស្ថិតក្នុងសភាវបេះដូងត្រូវធ្វើការធ្ងន់តែបេះដូងទទួលមិនរួច អាចនឹងធ្វើឱ្យបេះដូងគាំងបាន។
5 – កើតជំងឺទឹកនោមផ្អែម រោគធាត់
បើអ្នកកើតជំងឺទឹកនោមផ្អែម ឬធាត់ស្រាប់ហើយនោះ អ្នកនឹងប្រថុយប្រថាននឹងការកើតជំងឺបេះដូងខ្លាំងឡើងដែរ ព្រោះមានឱកាសខ្ពស់ណាស់ដែលអ្នកនឹងមានជាតិខ្លាញ់នៅក្នុងឈាមខ្ពស់ ធ្វើឱ្យឈាមខាប់ ញ៉ុកណែនសរសៃឈាមដែលចាត់បញ្ជូនឈាមទៅចិញ្ចឹមបេះដូង ធ្វើឱ្យបេះដូងធ្វើការកាន់តែខ្លាំងឡើង រហូតទៅលែងរួច និងគាំងនៅទីបំផុត។
បានដឹងបែបនេះហើយ គួរឧស្សាហ៍ហាត់ប្រាណ តមជក់បារី កាត់បន្ថយអាហារដែលមានជាតិខ្លាញ់ច្រើន និងរក្សាសុខភាពឱ្យរឹងមាំជាប់ជានិច្ច តែប៉ុនហ្នឹងអ្នកអាចកាត់បន្ថយភាពប្រថុយប្រថានក្នុងការកើតជំងឺបេះដូងបានច្រើនទៅហើយ៕
May 19, 2020
ការសាកល្បងវ៉ាក់សាំងប្រឆាំងកូវីដ-19 បង្ហាញលទ្ធផលហើយ!!
អ្នកវិទ្យាសាស្ត្រអាមេរិកាំង នាំគ្នាស្វាគមន៍យ៉ាងរីករាយ សម្រាប់វិវឌ្ឍនាការជាវិជ្ជមាន ពាក់ព័ន្ធនឹងការសាកល្បងខាងគ្លីនិកព្យាបាលកូវីដ-19 របស់ក្រុមហ៊ុននានា ក្រោមក្ដីកង្វល់ព្រួយចំពោះការឆ្លងរាលដាលរលកទី2 ដែលបណ្ដាលមកពីការបន្ធូរបន្ថយវិធានការបិទទីក្រុង។
តម្លៃភាគហ៊ុនរបស់ក្រុមហ៊ុនModerna Inc ដែលជាក្រុមហ៊ុនក្នុងធុរកិច្ច Biotech របស់សហរដ្ឋអាមេរិក បានស្ទុះហក់ឡើងខ្លាំង បន្ទាប់ពីមានការថ្លែងការណ៍ថា លទ្ធផលនៃការសាកល្បងខាងគ្លីនិក(ខាងការព្យាបាល)ក្នុងការចាក់វ៉ាក់សាំងប្រឆាំងវីរុសកូវីដ-19 របស់ក្រុមហ៊ុនមួយនេះ បានធ្វើឱ្យរាងកាយរបស់ក្រុមអ្នកស្ម័គ្រចិត្តចូលរួមសាកល្បង បានផលិតអង្គបដិបក្ខប្រាណ(Antibody) ដែលអាចកម្ចាត់មេរោគវីរុសនៅក្នុងខ្លួនអ្នកជំងឺកូវីដ-19បាន។
លទ្ធផលនៃការសិក្សាស្រាវជ្រាវដែលដំណើរការដោយស្ថាប័នសុខភាពនៃសហរដ្ឋអាមេរិក(NIH) បានរកឃើញថា កម្រិតរបស់អង្គបដិបក្ខប្រាណទាំងនោះ មានចំនួនស្មើ នៅក្នុងគំរូឈាមរបស់អ្នកជំងឺដែលបានជាសះស្បើយពីវីរុសកូរ៉ូណាប្រភេទថ្មី។
Moderna បានបញ្ជាក់ថា វ៉ាក់សាំងដែលមានឈ្មោះថា mRNA-1273 នេះ មានសុវត្ថិភាព និងតបស្នងបានល្អ ក្នុងការសាកល្បងក្នុងអំឡុងពេលដំបូង ហើយយើងនឹងចាប់ផ្ដើមការសាកល្បងក្នុងដំណាក់កាលបន្តទៀតក្នុងខែកក្កដាខាងមុខ។
ដុកទ័រ ថាល ហ្ស៊ែកស៍ ប្រធានក្រុមមន្ត្រីពេទ្យរបស់ក្រុមហ៊ុនតិចណូឡូជីសរីរាង្គ “Moderna” បានបញ្ជាក់ថា លទ្ធផលនៃការសាកល្បងវ៉ាក់សាំងកូវីដ-19 ដែល Moderna អភិវឌ្ឍរួមជាមួយស្ថាប័នសុខភាពនៃសហរដ្ឋអាមេរិកនេះ ក្នុងរយៈដំបូង បានបង្ហាញថា អ្នកដែលបានទទួលវ៉ាក់សាំងនេះ បានបង្កើតប្រព័ន្ធប្រឆាំងជំងឺ ឬអង់ទីគ័រ សម្រាប់ប្រឆាំងវីរុសប្រភេទនេះឡើង។
លោកដុកទ័រ ហ្ស៊ែកស៍ ថ្លែងថា “នេះជាដំណឹងល្អខ្លាំងណាស់ និងជាដំណឹងដែលយើងគិតថា មានមនុស្សជាច្រើនកំពុងរង់ចាំមកយូរហើយ” លោកបានបង្ហើបឱ្យដឹងថា បើការសិក្សាសាកល្បងនាពេលអនាគតដំណើរការទៅយ៉ាងល្អនោះ វ៉ាក់សាំងរបស់ក្រុមហ៊ុននេះ អាចនឹងត្រៀមរួចរាល់សម្រាប់ការចែកចាយនៅក្នុងសង្គម យ៉ាងលឿនបំផុតក្នុងខែមករា ឆ្នាំ2021។
ព័ត៌មាននេះ ចេញមកពីការសាកល្បងខាងគ្លីនិក ហ្វេសទី1 ដែលបានធ្វើការសិក្សាស្រាវជ្រាវនៅក្នុងក្រុមមនុស្សចំនួនតិច និងតម្រង់ឆ្ពោះទៅរកការស្វែងរកលទ្ធផលថា តើវ៉ាក់សាំងមានសុវត្ថិភាព និងធ្វើឱ្យប្រព័ន្ធការពារជំងឺតបស្នងឬទេ? ដោយសារតែលទ្ធផលនៃការវិភាគក្នុងរយៈដំបូង នៅមិនទាន់ឆ្លងផុតការពិចារណាជាផ្លូវការ ឬបានផ្សព្វផ្សាយក្នុងព្រឹត្តិបត្រវេជ្ជសាស្ត្រណាមួយនៅឡើយ។
ក្នុងការសាកល្បងលើកនេះគឺ Moderna បានចាក់វ៉ាក់សាំងទៅលើអ្នកស្ម័គ្រចិត្តចូលរួមការសាកល្បងចំនួនរាប់សិបនាក់ និងបានវាស់បរិមាណសារធាតុប្រឆាំងជំងឺក្នុងរាងកាយរបស់អ្នកចូលរួម 8នាក់ ហើយរកឃើញថា ទាំងអស់គ្នាបានផលិតសារធាតុប្រឆាំងជំងឺប្រភេទ “Neutralizing antibody ឬ NA” សម្រាប់ស្ទាក់ចាប់វីរុសមួយនេះក្នុងកម្រិតស្មើ ឬច្រើនជាងកម្រិតដែលរកឃើញនៅក្នុងអ្នកដែលជាសះស្បើយពីការឆ្លងមេរោគកូវីដ-19 តាមធម្មជាតិ។
លោកដុកទ័រ ហ្ស៊ែកស៍ ថ្លែងថា “យើងបានបង្ហាញឱ្យឃើញហើយថា Antibodyនេះ ការតបស្នងខាងប្រព័ន្ធប្រឆាំងជំងឺនេះ ពិតជាអាចការពារវីរុសមួយនេះបានមែន ខ្ញុំគិតថា នេះជាជំហានដំបូងដែលសំខាន់ខ្លាំងណាស់ ក្នុងការដំណើរការផលិតវ៉ាក់សាំងរបស់យើង”
វ៉ាក់សាំងរបស់ Moderna គឺជាវ៉ាក់សាំង1 ក្នុងចំណោមជាង 100វ៉ាក់សាំងទៀត ដែលកំពុងស្ថិតក្នុងអំឡុងពេលអភិវឌ្ឍ ដែលមានចេតនាផលិតចេញមក ដើម្បីការពារមនុស្សជាតិ ពីមេរោគវីរុសកូរ៉ូណាប្រភេទថ្មី ក្នុងខណៈដែលមេរោគដ៏សាហាវនេះ បានចម្លងចូលទៅក្នុងខ្លួនមនុស្សរួចហើយច្រើនជាង 4.7លាននាក់ និងបានសម្លាប់ជីវិតមនុស្សអស់ជាង 315.500នាក់រួចទៅហើយ៕
ប្រភព៖ សារព័ត៌មានបរទេស
May 19, 2020
វីវរហើយបារាំង!! មានអ្នកឆ្លងមេរោគកូវីដ-19 ពីសាលារៀន 70នាក់ ក្រោយពីបើកបានតែ 1សប្ដាហ៍
បារាំង បានរកឃើញអ្នកឆ្លងមេរោគកូវីដ-19ថ្មី 70នាក់ ដែលពាក់ព័ន្ធនឹងសាលារៀននានា ត្រឹមតែ 1សប្ដាហ៍ប៉ុណ្ណោះ ក្រោយពីពួកគេបន្ធូរបន្ថយវិធានការបិទទីក្រុង និងអនុញ្ញាតឱ្យសាលារៀនបើកឡើងវិញខ្លះៗ។
ទីភ្នាក់ងារព័ត៌មានអន្តរជាតិបានរាយការណ៍ថា រដ្ឋាភិបាលបារាំងបានបង្ហើបឱ្យដឹងកាលពីថ្ងៃចន្ទ ទី18 ឧសភាថា រកឃើញអ្នកឆ្លងមេរោគកូវីដ-19យ៉ាងតិច 70នាក់នៅក្នុងក្រុមកូនសិស្សតូចៗពីសាលាមត្តេយ្យ និងសាលារៀនបឋមសិក្សាជាច្រើនកន្លែង ចាប់តាំងពីថ្ងៃទី11 ឧសភាមក បន្ទាប់ពីពួកគេបានបន្ធូរបន្ថយវិធានការបិទទីក្រុង និងបើកសាលារៀនឡើងវិញជាង 40,000កន្លែង អនុញ្ញាតឱ្យសិស្សជាង 1.4លាននាក់បានចូលរៀនឡើងវិញជាថ្មី។
ការរកឃើញអ្នកឆ្លងមេរោគថ្មីទាំងនោះ បានធ្វើឱ្យសាលាមត្តេយ្យ និងសាលាបឋមសិក្សាជាច្រើន ត្រូវបិទទ្វារជាថ្មី ខណៈដែលសិស្សកម្រិតមធ្យមសិក្សាប្រមាណជា 1.5សែននាក់ បានវិលត្រឡប់ទៅសាលារៀនហើយ នៅថ្ងៃទី18 ឧសភាម្សិលមិញ។
លោក ហ្សង់ មីសេល ប្លង់ រដ្ឋមន្ត្រីក្រសួង អប់រំ និងសិក្សាធិការរបស់ប្រទេសបារាំង បានថ្លែងថា “វាជារឿងដែលមិនអាចចៀសវាងបានឡើយ ដែលមានហេតុការណ៍បែបនេះកើតឡើង តែវាកើតក្នុងចំណែកតូចមួយ ហើយអ្នកឆ្លងមេរោគភាគច្រើន ឆ្លងមកពីខាងក្រៅសាលារៀន” តែយ៉ាងណាក៏ដោយ លោកមិនបានបញ្ជាក់ថា អ្នកឆ្លងមេរោគនោះជាកូនសិស្ស ឬគ្រូនោះទេ។
លោកប្លង់ បានបញ្ជាក់ថា ការដែលកុមារមិនបានទៅសាលារៀន គឺជារឿងដែលគួរឱ្យកង្វល់ ខ្លាំងជាងមេរោគវីរុសកូវីដ-19ទៅទៀត ព្រោះទោះជាកូនសិស្សប្រមាណជា 70% នៅរៀនពីចម្ងាយនៅតាមផ្ទះក៏ដោយ តែមានកុមារប្រមាណជា 500,000នាក់កំពុងប្រថុយប្រថានក្នុងការបោះបង់ចោលការរៀនសូត្រ ជាពិសេសក្រុមកុមារដែលខ្វះឱកាស៕
ប្រភព៖ សារព័ត៌មានបរទេស
May 19, 2020
តំណាងរាស្ត្ររួមនឹងមន្ត្រីជាន់ខ្ពស់ជាច្រើនរូបរបស់រុស្ស៊ី បានឆ្លងCOVID-19 ខណៈអ្នកជំងឺសរុបក្នុងប្រទេសនេះកើនលើស290,000នាក់
តំណាងរាស្ត្រជាច្រើនរូបរបស់សហព័ន្ធរុស្ស៊ី ត្រូវបានធ្វើតេស្តរកឃើញថា មានផ្ទុកមេរោគCOVID-19 នៅពេលប្រទេសនេះបានក្លាយជាសម្បុកមេរោគធំជាងគេលំដាប់ទី2ក្នុងពិភពលោក បន្ទាប់ពីសហរដ្ឋអាមេរិក។
ជំនួយការផ្ទាល់របស់ប្រធានសភាជាន់ទាប(State Duma) របស់រុស្ស៊ី កាលពីថ្ងៃទី18ឧសភាបានបញ្ជាក់ថា ក្នុងចំណោមតំណាងរាស្ត្រទាំង450រូបរបស់សភាជាន់ទាប មាន6រូបត្រូវបានរកឃើញថាមានផ្ទុកវីរុសកូរ៉ូណា។
នាយករដ្ឋមន្ត្រីរុស្ស៊ី លោក Mikhail Mishustin
Anastasia Kashevarova ដែលជាជំនួយការរបស់ប្រធានសភាជាន់ទាបរុស្ស៊ី ថ្លែងថា “គិតមកដល់បច្ចុប្បន្ន តំណាងរាស្ត្រ6រូបរបស់សភាជាន់ទាប ទទួលបានលទ្ធផលវិជ្ជមានជាមួយនឹងវីរុសCOVID-19។ តំណាង2រូបត្រូវបានអនុញ្ញាតឱ្យចេញពីមន្ទីរពេទ្យ ចំណែក2រូបកំពុងទទួលការព្យាបាលក្នុងមន្ទីរពេទ្យ និង2រូបផ្សេងទៀតកំពុងបង្ខាំងខ្លួននិងទទួលការព្យាបាលនៅឯផ្ទះរៀងៗខ្លួន”។
អ្នកនាំពាក្យរបស់វិមានក្រឹមឡាំង លោក Dmitry Peskov
មន្ត្រីជាន់ខ្ពស់ជាច្រើនរូបរបស់រដ្ឋាភិបាលរុស្ស៊ី ក៏បានឆ្លងវីរុសកូរ៉ូណាក្នុងអំឡុងពេលចុងក្រោយនេះ ក្នុងនោះក៏មាននាយករដ្ឋមន្ត្រី (Mikhail Mishustin) អ្នកនាំពាក្យរបស់វិមានក្រឹមឡាំង (លោក Dmitry Peskov) រដ្ឋមន្ត្រីក្រសួងវប្បធម៌ (លោកស្រី Olga Lyubimova) រដ្ឋមន្ត្រីក្រសួងវិទ្យាសាស្ត្រនិងអប់រំជាន់ខ្ពស់ (លោក Valery Falkov) រដ្ឋមន្ត្រីក្រសួងសំណង់និងលំនៅដ្ឋាន (លោក Vladimir Yakushev) និងអនុរដ្ឋមន្ត្រីក្រសួងសំណង់និងលំនៅដ្ឋាន (លោក Dmitry Volkov)។
រដ្ឋមន្ត្រីក្រសួងវប្បធម៌ លោកស្រី Olga Lyubimova
រដ្ឋមន្ត្រីក្រសួងវិទ្យាសាស្ត្រនិងអប់រំជាន់ខ្ពស់ លោក Valery Falkov
រដ្ឋមន្ត្រីក្រសួងសំណង់និងលំនៅដ្ឋាន លោក Vladimir Yakushev
អនុរដ្ឋមន្ត្រីក្រសួងសំណង់និងលំនៅដ្ឋាន លោក Dmitry Volkov
ក្នុងសប្ដាហ៍កន្លង រុស្ស៊ីបានលោតរំលងអេស្ប៉ាញ និងអ៊ីតាលី ក្លាយជាសម្បុកមេរោគធំជាងគេទី2នៅក្នុងពិភពលោក ដោយមានអ្នកជំងឺCOVID-19 សរុប 290,678នាក់ ក្នុងនោះមានអ្នកស្លាប់សរុប2,722នាក់។ កាលពីម្សិលមិញ ប្រទេសនេះក៏បានរកឃើញអ្នកជំងឺថ្មីចំនួន8,926នាក់ផងដែរ៕
ប្រភព៖សារព័ត៌មានបរទេស
May 19, 2020
ជិត4.9លាននាក់ឆ្លងវីរុសCOVID-19 នៅទូទាំងពិភពលោក
ពិភពលោកទាំងមូលបានរកឃើញអ្នកជំងឺCOVID-19 ជិត4.9លាននាក់ ក្នុងនោះមានអ្នកស្លាប់ជិត320,000នាក់។
ប្រទេសនិងដែនដីចំនួន213ក្នុងពិភពលោក ត្រូវបានរាយការណ៍ថា មានអ្នកជំងឺCOVID-19 ចំនួន4,885,038នាក់ និងអ្នកស្លាប់319,779នាក់ ក្នុងនោះមានអ្នកជំងឺថ្មីចំនួន 86,893នាក់ និងអ្នកស្លាប់ថ្មីមាន3,272នាក់ ខណៈដែលអ្នកជំងឺ1,902,554នាក់បានជាសះស្បើយ។ នេះបើតាមស្ថិតិរបស់ Worldometer។
ទ្វីបអាមេរិកមានអ្នកជំងឺCOVID-19 សរុប 2,172,013នាក់ ក្នុងនោះអាមេរិកខាងជើងមាន1,710,816នាក់ អាមេរិកខាងត្បូងមាន461,197នាក់ ខណៈដែលទ្វីបអឺរ៉ុបមាន1,797,528នាក់ អាស៊ីមាន818,935នាក់ និងអាហ្វ្រិកមាន90,074នាក់។
អ្នកជំងឺCOVID-19 សរុបនៅសហរដ្ឋអាមេរិក បានឡើងដល់1,548,830នាក់ និងអ្នកស្លាប់សរុបកើនដលើ 91,873នាក់ បន្ទាប់ពីរកឃើញអ្នកជំងឺថ្មី22,004នាក់ និងអ្នកស្លាប់ថ្មី 900នាក់ នៅក្នុងរយៈពេល24ម៉ោងចុងក្រោយនេះ។
ប្រទេសរុស្ស៊ីមានអ្នកជំងឺកូរ៉ូណាសរុប 290,678នាក់ ឈរលំដាប់លេខ2ក្នុងពិភពលោក ក្នុងនោះមានអ្នកស្លាប់ដោយសារវីរុសនេះសរុប2,722នាក់។ កាលពីម្សិលមិញ ប្រទេសនេះក៏បានរកឃើញអ្នកជំងឺថ្មីចំនួន8,926នាក់ផងដែរ។
ចំណែកអេស្ប៉ាញវិញ បានរាយការណ៍ថា បានរកឃើញអ្នកជំងឺថ្មី469នាក់ និងអ្នកស្លាប់ថ្មី59នាក់ ធ្វើឱ្យអ្នកជំងឺសរុបឡើងដល់278,188នាក់ និងអ្នកស្លាប់សរុប27,709នាក់៕
ប្រភព៖ សារព័ត៌មានបរទេស
May 19, 2020
លោក Trump លេបថ្នាំគ្រុនចាញ់រាល់ថ្ងៃដើម្បីទប់ស្កាត់ COVID-19 ដោយមិនខ្វល់ពីការព្រមាន
ប្រធានាធិបតីសហរដ្ឋអាមេរិក Donald Trump បានបង្ហើបឱ្យដឹងថា ក្នុងមួយថ្ងៃលោកលេបថ្នាំគ្រុនចាញ់ hydroxychloroquine 1ដងដើម្បីទប់ស្កាត់ការឆ្លង COVID-19 ដោយលោកមិនខ្ចីអើពើដល់ការព្រមមានពីក្រុមអ្នកវេជ្ជសាស្ត្រ។
“ខ្ញុំកំពុងប្រើប្រាស់ថ្នាំ hydroxychloroquine។ ខ្ញុំលេបថ្នាំនេះអស់រយៈពេលប្រហែល1សប្ដាហ៍កន្លះមកហើយ។ ក្នុង1ថ្ងៃ 1គ្រាប់” លោក Trump បានថ្លែងប្រាប់អ្នកសារព័ត៌មានបែបនេះ កាលពីថ្ងៃទី18ឧសភាកន្លងទៅ។
ម្ចាស់សេតវិមានបានបន្ថែមថា លោកបានសួរយោបល់ពីវេជ្ជបណ្ឌិតរបស់សេតវិមានអំពីការប្រើប្រាស់ថ្នាំ hydroxychloroquine ហើយវេជ្ជបណ្ឌិតនិយាយថា “បាន បើសិនជាលោកចង់”។
លោក Trump ឱ្យដឹងទៀតថា ក្រៅពីការលេបថ្នាំ hydroxychloroquine លោកក៏លេបថ្នាំផ្សះអង់ទីប៊ីយ៉ូទិក និងថ្នាំដែលមានសមាសធាតុស័ង្កសីច្រើន 1ដងក្នុង1ថ្ងៃផងដែរ។ លោក Trump ថា “ជាសរុបមក ខ្ញុំអាចនិយាយបានថា រហូតមកដល់ពេលនេះ ខ្ញុំនៅតែមានសុខភាពល្អ”។
ប្រធានាធិបតី Trump ដែលមានវ័យ73ឆ្នាំ បច្ចុប្បន្នត្រូវបានធ្វើតេស្តរកវីរុសCOVID-19 ជារៀងរាល់ថ្ងៃដើម្បីគ្រប់គ្រងស្ថានភាពឱ្យបានឆាប់រហ័សជាទីបំផុតបើសិនជាបានឆ្លងវីរុសនេះ បន្ទាប់ពីបុគ្គលិកជាច្រើនរូបនៅសេតវិមានវិជ្ជមាននឹង COVID-19។ ក៏ប៉ុន្តែ រហូតមកដល់ពេលនេះ លោក Trump នៅតែបដិសេធមិនពាក់ម៉ាស់ដដែល។
លោក Trump កន្លងមកក៏ធ្លាប់បានលើកទឹកចិត្តឱ្យប្រើប្រាស់ថ្នាំ hydroxychloroquine ដើម្បីព្យាបាល COVID-19 បន្ទាប់ពីមានរបាយការណ៍និយាយអំពីការប្រើប្រាស់ថ្នាំនេះក្នុងការព្យាបាល COVID-19។ ប៉ុន្តែ ក្រោយមក មានការពិសោធជាច្រើនបានបង្ហាញថា hydroxychloroquine មិនមានប្រសិទ្ធភាពក្នុងការព្យាបាល COVID-19 នោះឡើយ។
នាយកដ្ឋានគ្រប់គ្រងឱសថនិងអាហាររបស់សហរដ្ឋអាមេរិក ដែលហៅថា Food and Drug Administration(FDA) បានចេញសេចក្ដីព្រមានអំពីការប្រើប្រាស់ថ្នាំ hydroxychloroquine។ ក្នុងរបាយការណ៍1កាលពីថ្ងៃទី24មេសា FDA ឱ្យដឹងថា ខ្លួនក្ដាប់បានព័ត៌មានទាក់ទងនឹងបញ្ហាចង្វាក់បេះដូងដែលកើតឡើងនៅលើអ្នកជំងឺ COVID-19 ដែលបានលេបថ្នាំ hydroxychloroquine ឬ chloroquine។
ការលើកឡើងរបស់លោក Trump ខាងលើនេះ ត្រូវបានធ្វើឡើងក្នុងគ្រាដែលចំនួនអ្នកស្លាប់ដោយសារ COVID-19 នៅសហរដ្ឋអាមេរិកឡើងដល់ក្បែរ 92,000នាក់ ខណៈដែលអ្នកឆ្លងវីរុសនេះបានកើនដល់ជាង1.5លាននាក់៕
ប្រភព៖ សារព័ត៌មានបរទេស
May 19, 2020
វិធីសាស្ត្រជួយបង្រៀនក្មេងឱ្យមានការចងចាំល្អពេលមានវិបត្តិ Covid-19
ក្នុងពេលសិក្សាតាមរយៈបច្ចេកវិទ្យានេះ អាណាព្យាបាលជាច្រើនបានបង្ហាញការព្រួយបារម្ភចំពោះកូនៗព្រោះពួកគាត់បារម្ភក្រែងកូនមិនចងចាំបានល្អ មិនទាន់ទម្លាប់រៀនជាមួយបច្ចេកវិទ្យា ឬជក់ជាមួយនឹងបច្ចេកវិទ្យាជ្រុលលើសពីការសិក្សាជាដើម។
នៅក្នុងដំណាក់កាលនេះ អាណាព្យាបាលគួរព្យាយាមចូលរួមឱ្យបានកាន់តែច្រើនដើម្បីធ្វើយ៉ាងណាឱ្យការសិក្សារបស់កូនៗអាចប្រព្រឹត្តទៅបានរលូន។ នៅពេលនេះអ្នកជំនាញនានាបានណែនាំមនុស្សឱ្យធ្វើការផ្លាស់ប្តូររបៀបនៃការរស់នៅក្នុងជីវិតរបស់យើង (new normal life) ដើម្បីការពារសុខភាព តែលើសពីការបង្ការកុំឱ្យឆ្លងមេរោគ មនុស្សក៏គួរតែគិតគូរពីការផ្លាស់ប្តូរទម្លាប់ក្នុងការប្រាស្រ័យទាក់ទងជាមួយកូន និងការបង្រៀនកូនៗផងដែរ។
ខាងក្រោមនេះជាវិធីសាស្ត្រមួយចំនួនក្នុងការបង្រៀនកូនៗឱ្យមានការចងចាំល្អ បន្ថែមពីការរៀនតាមបច្ចេកវិទ្យា៖
1. និទានរឿង
ការនិទានរឿង ត្រូវបានគេមើលឃើញថាជាផ្នែកយ៉ាងសំខាន់មួយដែលធ្វើឱ្យកុមារមានការចងចាំបានល្អ ព្រោះធម្មជាតិរបស់កុមារគឺចូលចិត្តស្តាប់ មើល និងដាក់អារម្មណ៍រីករាយជាមួយនឹងដំណើររឿងដែលមនុស្សធំបង្ហាញ។ ហេតុនេះអាណាព្យាបាលគួរស្វែងរយល់ពីតម្លៃអប់រំនៃមេរៀនរបស់កូន បន្ទាប់មកស្វែងរករឿងនិទានខ្លីៗណាដែលត្រូវនឹងផ្នត់គំនិតអប់រំនោះដើម្បីនិយាយប្រាប់គេបន្ថែមពីលើអ្វីដែលគ្រូបង្រៀនតាមអនឡាញ។
វាក៏ជាវិធីសាស្រ្តល្អផងដែរក្នុងការរក្សាទំនាក់ទំនងល្អជាមួយកូន និងជាវិធីដើម្បីជំរុញឱ្យកុមារមានភាពរីករាយក្នុងពេលសិក្សានៅផ្ទះថែមទៀតផង។
2. ល្បែងកម្សាន្តល្បងប្រាជ្ញា
កុមារតូចជាវ័យដែលចូលចិត្តលេងបំផុត ហេតុនេះប្រសិនបើអាណាព្យាបាលគ្មានពេលគ្រប់គ្រាន់ដើម្បីលេងជាមួយពួកគេ ឬមិនបានយកចិត្តទុកដាក់ក្នុងការគ្រប់គ្រងការលេងរបស់ក្មេងឱ្យបានល្អ នោះកុមារនឹងនឹងអាចក្លាយជាមនុស្សម្នាក់ដែលងាកទៅរកភាពញៀនឧបករណ៍អេឡិចត្រូនិក។
ហេតុនេះអាណាព្យាបាលគួរស្វែងរក Mobile App ឬសៀវភៅទាំងឡាយណាដែលមានល្បែងកម្សាន្តបង្កើនភាពឆ្លាតវៃ (IQ) ដើម្បីនាំពួកគេលេង។ បន្ថែមពីលើនេះ បើមានពេលអាណាព្យាបាលក៏អាចបង្កើតកម្មវិធីធ្វើតេសងាយៗពាក់ព័ន្ធនឹងមេរៀន ឬចំណេះដឹងទូទៅដើម្បីឱ្យពួកគេប្រឡងយករង្វាន់ផងដែរ។ វិធីនេះជាវិធីមួយដែលអ្នកអប់រំជាច្រើនណែនាំអាណាព្យាបាលជំរុញកូនឱ្យខំរៀនដោយមិនបាច់បង្ខំ និងមិនប្រើអំពើហិង្សា។
3. Mind Map
អ្នកជំនាញចិត្តសាស្ត្រអប់រំ បានមើលឃើញថា នៅក្នុងចំណោមវិធីសាស្រ្តនានាដើម្បីឱ្យមានការចងចាំបានល្អ ការគូសតារាងសង្ខេបមេរៀន ឬការធ្វើ Mind map ដោយប្រើប្រាស់ពណ៌ ឬរូបសត្វដែលកុមារចូលចិត្ត អាចធ្វើឱ្យគេងាយចងចាំបានល្អ។
ជាធម្មតាក្មេងចូលចិត្តសង្កេត និងចូលចិត្តរូបភាពដែលមានភាពទាក់ទាញ ហេតុនេះប្រសិនបើអាណាព្យាបាលអាចឆ្លៀតពេលគូររូប ឬប្រើប្រាស់រូបភាពស្អាតៗដើម្បីបង្កើតជាតារាងប្រភេទមេរៀនរបស់កូន នោះក្មេងៗនឹងឧស្សាហ៍មើល ហើយចងចាំដោយងាយនៅគ្រប់ទីកន្លែងក្នុងផ្ទះ៕

May 18, 2020
វីរបុរសវេជ្ជបណ្ឌិត សម័យមេរោគSARS អះអាងថា បើគ្មានវ៉ាក់សាំងការពារ ចិនមិនអាចនៅសុខបានទេ…
កាលពីថ្ងៃទី17 ឧសភា លោកវេជ្ជបណ្ឌិត ចុង ណានសាន អគ្គទីប្រឹក្សាផ្នែកវេជ្ជសាស្ត្ររបស់រដ្ឋាភិបាលចិន អ្នកដែលត្រូវបានទទួលស្គាល់ថាជាវីរបុរសកាលពីសម័យមេរោគសារស៍ រាតត្បាតនៅឆ្នាំ2003 បានផ្ដល់បទសម្ភាសជាមួយ CNN ទីភ្នាក់ងារព័ត៌មានធំបំផុតរបស់សហរដ្ឋអាមេរិក ដោយបានព្រមានថា ការខ្វះប្រព័ន្ធការពារមេរោគ នឹងធ្វើឱ្យចិនប្រថុយប្រថាននឹងការឆ្លងរាតត្បាតរបស់មេរោគកូវីដ-19 ជាថ្មីម្ដងទៀត ដែលនេះជាក្ដីព្រួយបារម្ភដ៏ធំមួយ។
“ការខ្វះប្រព័ន្ធការពារមេរោគកូវីដ-19 គឺជាបញ្ហាធ្ងន់ធ្ងរ ចិនត្រូវតែប្រញាប់អភិវឌ្ឍវ៉ាក់សាំងការពារមេរោគនេះតទៅទៀត ដោយមានវ៉ាក់សាំង 3ប្រភេទនៅក្នុងប្រទេសចិននាពេលបច្ចុប្បន្ននេះ កំពុងស្ថិតក្នុងដំណាក់កាលសាកខុស សាកត្រូវនៅឡើយ។ ចំណែកវ៉ាក់សាំងដែលល្អឥតខ្ចោះ ទំនងជាត្រូវប្រើពេលវេលាច្រើនឆ្នាំទៀត”
Dr. Zhongnan San / CGTN
សម្រាប់តួលេខ អ្នកឆ្លងមេរោគវីរុសកូរ៉ូណាប្រភេទថ្មីរបស់ប្រទេសចិនមានជាង 82,000នាក់ ស្លាប់យ៉ាងតិច 4,633នាក់។ ការរស់នៅរបស់ប្រជាជាននៅក្នុងប្រទេសចិនបានវិលត្រឡប់ទៅរកសភាពប្រក្រតីវិញជាបណ្ដើរៗ បន្ធូរបន្ថយការបិទទីក្រុង ហើយសាលារៀន និងរោងចក្រមួយចំនួនត្រូវបានបើកឡើងវិញ តែយ៉ាងណាក្ដី នៅឯមណ្ឌលជីលីន រដ្ឋបាលក្នុងតំបន់ នៅត្រូវបង្ខាំងប្រជាជនយ៉ាងតិច 8,000នាក់ ឱ្យនៅដាច់ដោយឡែក ដើម្បីពិនិត្យមើលមេរោគនៅឡើយ។
លោកវេជ្ជបណ្ឌិត ចុង ថ្លែងថា អាជ្ញាធរចិន មិនគួរព្រងើយកន្តើយឡើយ ដោយសារតែគ្រោះថ្នាក់ពីការឆ្លងមេរោគរលកទី2 ដែលកំពុងបង្ហាញខ្លួនយ៉ាងទូលំទូលាយជាបណ្ដើរៗហើយ តាមរយៈករណី ក្លាស្ទើរ ឬក្រុមថ្មីនៃអ្នកឆ្លងមេរោគកូវីដ-19 បានបង្ហាញខ្លួនឡើងទូទាំងប្រទេសចិនក្នុងអំឡុង 2-3សប្ដាហ៍កន្លងទៅនេះ ដែលមិនមែនមានតែនៅជីលីនប៉ុណ្ណោះទេ តែរួមទាំងទីក្រុងវូហាន មណ្ឌលហ៊ូពេយ មណ្ឌលកណ្ដាលនៃការឆ្លងរាលដាលដំបូងគេនៅក្នុងប្រទេសចិន និងរួមទាំងមណ្ឌលហ៊ើយ ចៀងលង់ ទៀតផង។
លោកវេជ្ជបណ្ឌិត ចុង បានបន្តថា “ពលរដ្ឋចិនភាគច្រើនក្នុងអំឡុងពេលនេះ នៅតែទន់ជ្រាយចំពោះការឆ្លងមេរោគកូវីដ-19 នៅឡើយ ដោយសារតែខ្វះប្រព័ន្ធការពារមេរោគ…ខ្ញុំគិតថា ពេលនេះយើងកំពុងតែប្រឈមនឹងការសាកល្បងដ៏ធំមួយ ដែលវាមិនបានល្អជាងប្រទេសក្រៅប៉ុន្មានឡើយ”
លោកវេជ្ជបណ្ឌិត ចុង បានទទួលការតែងតាំងជាអ្នកដឹកនាំការតស៊ូប្រឆាំងនឹងមេរោគកូវីដ-19 នៅក្នុងប្រទេសចិន ជាពិសេសនៅក្នុងការឆ្លងរាតត្បាតដំណាក់កាលដំបូងៗ តាំងពីថ្ងៃទី20 មករាមក លោកវេជ្ជបណ្ឌិត បានអះអាងតាមរយៈស្ថានីយទូរទស្សន៍ CCTV ថា វីរុសកូរ៉ូណាប្រភេទថ្មី2019 អាចចម្លងតាមរយៈមនុស្សទៅមនុស្សបាន តែនៅពេលនោះក្រុមមន្ត្រីសាធារណៈសុខាភិបាលក្នុងតំបន់របស់ទីក្រុងវូហាន មិនទាន់បានអះអាងពីការចម្លងពីមនុស្សទៅមនុស្សនៅឡើយ។
ក្នុងឋានៈជាប្រធានក្រុមអ្នកជំនាញការ ដែលតែងតាំងដោយគណៈកម្មាធិការផ្នែកសុខភាពនៃប្រទេសចិន លោកវេជ្ជបណ្ឌិត ចុង បានចុះទៅទីក្រុងវូហាន នៅថ្ងៃទី18 មករា និងបានបញ្ជាក់ថា ក្នុងខណៈនោះ លោកបានទទួលទូរស័ព្ទជាច្រើនខ្សែពីគ្រូពេទ្យ និងកូនសិស្សរបស់លោកជាច្រើននាក់ ដែលបានប្រាប់លោកថា ស្ថានការណ៍អាក្រក់ខ្លាំងជាងខាងរដ្ឋបាលក្នុងតំបន់ រាយការណ៍ទៅទៀត។
លោកថ្លែងថា “អាជ្ញាធរក្នុងតំបន់ ក្នុងអំឡុងពេលនោះ ពួកគេមិនត្រូវការនិយាយការពិតទេ ហើយក្នុងអំឡុងពេលចាប់ផ្ដើមដំបូងៗ ក្រុមអាជ្ញាធរបានសម្ងំនៅស្ងៀម តែខ្ញុំបាននិយាយឡើងថា អ្នកឆ្លងមេរោគអាចមានចំនួនច្រើនជាងក្នុងរបាយការណ៍ ព្រោះតែនឹកសង្ស័យឡើងថា តាមរយៈការសង្កេតមើលតួលេខដែលរដ្ឋបាលតំបន់រាយការណ៍ពីស្ថានការណ៍នៅវូហាន នៅពេលនោះមានអ្នកជំងឺតែ 41នាក់ដដែលៗ រយៈពេល10ថ្ងៃ ទាំងដែលបាតុភូតឆ្លងរាលដាលនៅក្រៅប្រទេស បានកើតឡើងទៅហើយ”
លោកវេជ្ជបណ្ឌិត ចុង បានបន្ថែមថា “ខ្ញុំមិនជឿតួលេខចំនួនអ្នកឆ្លងមេរោគនោះទេ ដូច្នេះទើបខ្ញុំតែងសាកសួរជាប់ជានិច្ចថា អ្នកត្រូវប្រាប់តួលេខអ្នកឈឺពិតប្រាកដមកខ្ញុំ…ខ្ញុំគិតថា ពួកគេនៅស្ទាក់ស្ទើរខ្លាំងណាស់ក្នុងការឆ្លើយនឹងសំណួររបស់ខ្ញុំ”។
2ថ្ងៃ តមក វូហាន រាយការណ៍ថា មានអ្នកឆ្លងមេរោគខណៈពេលនេះចំនួន 198នាក់ ស្លាប់ 3នាក់ និងមន្ត្រីពេទ្យឆ្លងមេរោគ 13នាក់…តមក យើងបានរៀបចំការប្រជុំក្រុមមន្ត្រីរដ្ឋបាលមជ្ឈិមប៉េកាំង រួមទាំងលោក លី ខឺ ឈាង នាយករដ្ឋមន្ត្រីចិនរួមជាមួយផងដែរ ទើបលោកវេជ្ជបណ្ឌិតលើកសំណូមពរឱ្យបិទទីក្រុងវូហាន ដើម្បីទប់ស្កាត់ការឆ្លងរាលដាលរបស់មេរោគវីរុសដ៏សាហាវនេះ។
តមកទៀត ទីក្រុងវូហានត្រូវបានបិទ 100%នៅថ្ងៃទី23 មករា ជាហេតុការណ៍ដែលមិនធ្លាប់កើតមានឡើងពីមុនមក។ រហូតមកដល់ថ្ងៃទី27 មករា ទើបលោកចូ សៀន វ៉ាង អភិបាលក្រុងវូហាន ទទួលស្គាល់ថា រដ្ឋបាលក្នុងតំបន់របស់ខ្លួន បានបិទបាំងព័ត៌មានវីរុសឆ្លងរាលដាលចំពោះប្រជាជន តាមដែលបានធ្វើតាមៗគ្នាមក និងថា រដ្ឋបាលក្នុងតំបន់អាចបង្ហើបប្រាប់ពីព័ត៌មាននេះបាន លុះត្រាតែមានការអនុញ្ញាតជាមុន។
យ៉ាងណាក្ដី សម្រាប់ការសង្ស័យដែលថា ស្ថិតិរបស់រដ្ឋបាលចិន នៅតែមិនគួរឱ្យជឿជាក់ដដែល បើទោះជារដ្ឋបាលមជ្ឈិមប៉េកាំង បានចុះមកគ្រប់គ្រងដោយខ្លួនឯងក្នុងអំឡុងចុងខែមករាក្ដី រួមទាំងការតាំងសំណួរដែលបង្ហាញពីការមិនទុកចិត្តអំពីលោក ដូណាល់ ត្រាំ មេដឹកនាំសហរដ្ឋអាមេរិកផងនោះ លោកវេជ្ជបណ្ឌិត ចុង បានបដិសេធថា មិនមែនដូច្នោះទេ។
លោកវេជ្ជបណ្ឌិតថ្លែងថា “រដ្ឋបាលចិន បានទទួលមេរៀនពីអំឡុងពេលដែលមេរោគសារស៍រាតត្បាតរួចមកហើយ ដែលនៅពេលនោះចិនបានបិទបាំងការឆ្លងរាតត្បាតប្រមាណជា 2 ឬ 3ខែ តែលើកនេះ រដ្ឋបាលចិនបានប្រកាសថា គ្រប់ទីក្រុង គ្រប់សហគមន៍ គួរតែរាយការណ៍ពីតួលេខពិត បើសិនមិនធ្វើតាម នឹងត្រូវដាក់ទោស ដូច្នេះខ្ញុំគិតថា តាំងពីថ្ងៃទី23 មករាមក គ្រប់ព័ត៌មាន សុទ្ធតែត្រឹមត្រូវ”
អ្នកជំនាញការល្បីឈ្មោះរបស់ចិនរូបនេះ ថែមទាំងបានបដិសេធទ្រឹស្ដីដែលលោកដូណាល់ ត្រាំ និងលោកម៉ៃក៍ ប៉ុមប៉េអូ រដ្ឋមន្ត្រីការបរទេសសហរដ្ឋអាមេរិក ព្យាយាមវាយប្រហារចិនថា វីរុសនេះកើតឡើងនៅក្នុងមន្ទីរពិសោធន៍វូហាននោះទៀតផង។
លោកថ្លែងថា “កាលនោះ ខ្ញុំបានសួរបញ្ជាក់លោកស្រី ស៊ឺ ជឹង លី អ្នកជំនាញខាងជំងឺរាតត្បាតនៅឯស្ថាប័នជំងឺរាតត្បាតវិទ្យារបស់វូហាន លោកស្រីជាមិត្តភក្តិដ៏ល្អរបស់ខ្ញុំ។ លោកស្រីប្រាប់ថា ការចោទប្រកាន់ដែលសង្ស័យថា មេរោគវីរុសនេះកើតឡើងនៅក្នុងបន្ទប់ពិសោធន៍ដោយឧប្បត្តិហេតុនោះ គឺជារឿងផ្ដេសផ្ដាស់ វាគ្មានអ្វីបែបនោះទេ និងដោយឧបករណ៍ជំនួយភាពងាយស្រួលទាំងឡាយ និងបុគ្គលិកនៅទីនោះ វាមិនអាចទៅរួចសោះឡើយ ដែលថាមានការសាងវីរុសឡើងបាននៅក្នុងពេលនោះ”
នៅដើមខែកុម្ភៈ មានមន្ត្រីពីក្រុមគ្រប់គ្រងរោគពីផ្នែកមជ្ឈិមរបស់ចិន បានទៅត្រួតពិនិត្យបន្ទប់ពិសោធន៍របស់វូហាន អស់រយៈពេល 2សប្ដាហ៍ តែក៏រកមិនឃើញមានអ្វីខុសប្រក្រតីឡើយ៕
ប្រភព៖ សារព័ត៌មានបរទេស
ប្រែសម្រួលដោយ តាវ៉ែនតា
May 18, 2020
សង្គ្រាមពាក្យសម្ដីរវាង Trump និង Obama កាន់តែ “សាហាវ” ខណៈតួលេខអ្នកស្លាប់ដោយសារCOVID-19 នៅសហរដ្ឋអាមេរិក កើនលើស90,000នាក់
អតីតប្រធានាធិបតីសហរដ្ឋអាមេរិក លោក Barack Obama ថ្មីៗនេះ បានរិះគន់ជាបន្តបន្ទាប់ទៅលើការដឹកនាំរបស់រដ្ឋបាលលោក Donald Trump ទាក់ទងទៅនឹង COVID-19 ដែលនេះបានបណ្ដាលឱ្យប្រធានាធិបតីកំពុងកាន់អំណាច មានប្រតិកម្មតបយ៉ាងខ្លាំងក្លា។
ក្នុងអំឡុង24ម៉ោងចុងក្រោយនេះ សហរដ្ឋអាមេរិកបានរកឃើញអ្នកជំងឺកូរ៉ូណាថ្មីចំនួន19,053នាក់បន្ថែមទៀត ធ្វើឱ្យតួលេខអ្នកជំងឺCOVID-19 នៅប្រទេសនេះឡើងដល់ជាង1,526,800នាក់។ អ្នកស្លាប់ដោយសារវីរុសនេះ មានជាង90,970នាក់ ក្នុងនោះ អ្នកស្លាប់ថ្មីមានចំនួន860នាក់។ សហរដ្ឋអាមេរិកនៅតែជាសម្បុកមេរោគធំជាងគេបង្អស់ក្នុងពិភពលោក។
ទាក់ទងនឹងបញ្ហានៃវិធានការទប់ទល់នឹងវិបត្តិ COVID-19 នៅសហរដ្ឋអាមេរិក ថ្មីៗនេះ អតីតប្រធានាធិបតីសហរដ្ឋអាមេរិក លោក Barack Obama បានបញ្ចេញសំឡេងរិះគន់ទៅលើរដ្ឋបាលលោក Trump ជាបន្តបន្ទាប់ ធ្វើឱ្យលោក Trump ឆ្លើយតបប្រកបដោយភាពខ្លាំងក្លា។
លោក Barack Obama ធ្លាប់បានថ្លែងថា “មេរោគរាតត្បាតនេះ បានកាត់ផ្ដាច់យោបល់ដែលថា ថ្នាក់ដឹកនាំជាច្រើនបានដឹងថា ខ្លួនកំពុងធ្វើអ្វី។ ក្នុងចំណោមពួកគេ មានថ្នាក់ដឹកនាំមិនតិចនោះទេដែលមិនខ្ចីទាំងធ្វើពើថាខ្លួនកំពុងគ្រប់គ្រង (ការងារ)”។ លោកក៏បានសង្កត់ធ្ងន់ថា COVID-19 បានបង្ហាញអំពីភាពមិនស្មើភាពគ្នានៃពូជសាសន៍នៅហសរដ្ឋអាមេរិក។ អតីតប្រធានាធិបតីរូបនេះក៏បានបង្ហាញការខឹងសម្បាខ្លាំងចំពោះករណីបុរសស្បែកខ្មៅវ័យ25ឆ្នាំ ឈ្មោះ Ahmaud Armaud Arbery ត្រូវបានគេបាញ់សម្លាប់នៅពេលកំពុងដើរហាត់ប្រាណនៅឯរដ្ឋ Georgia កាលពីថ្ងៃទី23កុម្ភៈ2020 ដោយសារតែមិនបានឆ្លើយតបនឹងសំណួររបស់ក្រុមមនុស្សដែលចេញមករារាំងគាត់។ កាលពីដើមខែឧសភា លោក Obama បានហៅវិធានការទប់ទល់ COVID-19 របស់សេតវិមានថាជា “គ្រោះមហន្តរាយដ៏ច្របូកច្របល់”ផងដែរ។
ឆ្លើយតបនឹងការរិះគន់ខាងលើ លោក Trump ក៏បានចោទលោក Obama ថា “ពិតជាគ្មានសមត្ថភាព” ក្នុងអំឡុងកាន់អំណាច។ លោក Trump បន្តថា “ចូរគិតឡើងវិញ គាត់ធ្លាប់ជាប្រធានាធិបតីអសមត្ថភាព នោះគឺជាអ្វីដែលខ្ញុំអាចនិយាយបាន។ គាត់ជាមនុស្សអសមត្ថភាពពិតមែន”។
ថ្មីៗនេះ លោក Trump បានចាប់ផ្ដើមបង្ហោះសារជាបន្តបន្ទាប់ដើម្បីរិះគន់អតីតប្រធានាធិបតីអាមេរិកាំង។ លោក Trump បានប្រើប្រាស់ពាក្យ “Obamagate” ជាច្រើនលើក ដោយចោទលោក Obama ថា បានរារាំងលោកក្នុងដំណាក់កាលដំបូងនៃការឡើងកាន់អំណាចដោយការប្រើប្រាស់ FBI ដើម្បី “ដាក់អន្ទាក់” ចាប់ទីប្រឹក្សាផ្នែកនយោបាយមួយចំនួនរបស់លោក ដូចជាអតីតទីប្រឹក្សាសន្តិសុខជាតិ Michael Flynn ជាដើម។ លោក Trump យល់ថា លោក Obama នៅពីក្រោយការស៊ើបអង្កេតទៅលើករណីរុស្ស៊ីលូកដៃក្នុងការបោះឆ្នោតនៅសហរដ្ឋអាមេរិក បណ្ដាលឱ្យលោក Flynn ត្រូវជាប់ទោស។
នៅក្នុងប្រតិកម្មមួយកាលពីម្សិលមិញ (17ឧសភា) លោក Trump បានស្នើឱ្យកាត់ទោសលោក Obama និងលោក Joe Biden (បេក្ខភាពប្រធានាធិបតីមកពីបក្សប្រជាធិបតេយ្យ នាបច្ចុប្បន្ន) ឱ្យជាប់ពន្ធនាគារ50ឆ្នាំ។ ម្ចាស់សេតវិមាន បានចោទលោក Obama និងលោក Biden ថា ជាប់ទាក់ទិននឹងការស៊ើបអង្កេតមួយដែលលោក Trump ហៅថាជា “អំពើអាបធ្មប់” របស់ FBI ប្រឆាំងនឹងលោក Flynn៕
ប្រភព៖ សារព័ត៌មានបរទេស
May 18, 2020