សុខភាព - La Reine Media

ជំងឺចង្រៃ 4 អាចព្យាបាលបានដោយ ផ្លែ “ត្រប់ពុតលំញង”

ត្រប់ពុតលំញងនៅគូគ្នាជាមួយជនជាតិខ្មែរយើងយូរមកហើយ ប្រើធ្វើជាគ្រឿងផ្សំរបស់ម្ហូបអាហារបានជាច្រើនមុខ ដូចជា សម្លកកូរ បុកលាយជាមួយទឹកគ្រឿង ស្រុះធ្វើជាអន្លក់ក៏បាន ដែលក្រៅពីភាពឆ្ញាញ់ហើយនោះ នៅមានគុណសម្បត្តិអាចប្រឆាំងនឹងជំងឺផ្សេងៗបានទៀតផង បើមិត្តអ្នកអានចង់ដឹងថា តើមានអ្វីខ្លះនោះ សូមតាមឡារ៉ែនមកចុះ។

1 . ជំងឺទឹកនោមផ្អែម

ការស្រាវជ្រាវវិភាគបានរកឃើញថា ទឹកភេសជ្ជៈផ្លែត្រប់ពុតលំញងអាចកាត់បន្ថយកម្រឹតអនុមូលឥស្សរៈនៅក្នុងឈាមរបស់សត្វកណ្តុរសាកល្បងដែលកើតជំងឺទឹកនោមផ្អែមបាន ធ្វើឱ្យជាតិខ្លាញ់មិនល្អ និងកម្រឹតជាតិស្ករនៅក្នុងឈាមថយចុះ ដូច្នេះការឱ្យអ្នកជំងឺទឹកនោមផ្អែមទទួលទានផ្លែត្រប់ពុតញងក្នុងអំឡុងពេលព្យាបាលនឹងជួយឱ្យឆាប់ធូរស្រាលបានច្រើនណាស់។

2 . ជំងឺលើសឈាម និងបញ្ហាគ្រាប់ឈាម

ការងារស្រាវជ្រាវមួយនៅក្នុងប្រទេស កាមេរូនបានរកឃើញថា ពេលយកផ្លែត្រប់ពុតលំញងមកចម្រាញ់លាយជាមួយអាល់កុលមកសាកល្បងជាមួយសត្វកណ្តុរ គេសង្កេតឃើញថា អត្រាការលោតរបស់បេះដូង និងសម្ពាធឈាមថយចុះ ព្រមទាំងនៅអាចបញ្ឈប់ការផ្តុំខ្លួនរបស់គ្រាប់ឈាមទៀតផង ដូច្នេះទើបវាជួយឱ្យអ្នកជំងឺលើសឈាម និងបញ្ហាគ្រាប់ឈាមមានអាការល្អប្រសើរឡើងបាន។

3 . សម្បូរទៅដោយសារធាតុប្រឆាំងអនុមូលឥស្សរៈ

នៅឆ្នាំ 2007 មានការងារស្រាវជ្រាវវិភាគមួយបាននាំផ្លែត្រប់ 11 ប្រភេទក្នុងប្រទេសថៃទៅចម្រាញ់រកសារធាតុប្រឆាំងអនុមូលឥស្សរៈ លទ្ធផលបានបង្ហាញថា ផ្លែត្រប់ពុតលំញងមានសារធាតុប្រឆាំងអនុមូលឥស្សរៈច្រើនជាងគេបំផុតក្នុងបណ្តាផ្លែត្រប់គ្រប់ប្រភេទ។

4 . ដំបៅក្នុងក្រពះ

នៅឆ្នាំ 2007 ដដែលនោះ ក្រុមអ្នកស្រាវជ្រាវក្នុងប្រទេស កាមេរូនបានរកឃើញថា ផ្លែត្រប់ពុតលំញងអាចប្រឆាំងនឹងកាកើតដំបៅក្នុងក្រពះបាន ព្រោះនៅក្នុងផ្លែត្រប់ពុតលំញងមានសារធាតុពពួកហ្ល្វាវ៉ូណយដ៍ និងថ្រៃធើរ៍ភីន ដែលមានឬទ្ធិប្រឆាំងការកើតដំបៅក្នុងក្រពះបាយដែលបណ្តាលមកពីជាតិអាល់កុល ឬភាពតានតឹងធុញថប់បាន។

ឱសថបុរាណរបស់ខ្មែរយើងនេះមានសុទ្ធតែរបស់ល្អៗទាំងអស់ និងថែមទាំងមានតម្លៃមិនថ្លៃទៀតផង ឯគុណសម្បត្តិវិញក៏លើសលុបដែរ តែគួរឱ្យសោកស្តាយខ្លាំងណាស់ បើសិនជាយើងកៀរផ្លែត្រប់ពុតលំញងតូចៗនេះចេញពីចានបាយនោះ ដូច្នេះអ្នកណាដែលមិនធ្លាប់ញ៉ាំ ឬមិនចូលចិត្តនោះ គួរតែងាកមកសាកល្បងញ៉ាំសាកលមើលបន្តិចទៅមើល ជាពិសេសស្រុះជ្រលក់ជាមួយទឹកគ្រឿង ឬបុកលាយក្នុងទឹកគ្រឿងតែម្តង ធានាថាបានទាំងឆ្ងាញ់មាត់ និងទទួលបានគុណប្រយោជន៍ខាងសុខភាពទៀតផង៕

July 6, 2020

ស្រាយចម្ងល់៖ តើ “មូស-រុយ” អាចចម្លងវីរុស កូវីដ-19 បានឬទេ?

ក្នុងពេលដែលជំងឺឆ្លងមេរោគវីរុសកូរ៉ូណាប្រភេទថ្មី ឬកូវីដ-19 នៅតែវាយប្រហារយ៉ាងឥតឈប់ឈរទូទាំងពិភពលោក ព្រមជាមួយការមកដល់នៃរដូវក្ដៅនៅឯតំបន់ប៉ូលផែនដីប៉ែកខាងជើង បានធ្វើឱ្យកើតមានចរន្តវិតក្កកង្វល់ដ៏ធំមួយឡើងថា “មូស និងរុយ” អាចជាភ្នាក់ងារចម្លងមេរោគវីរុសកូរ៉ូណាចូលមកមនុស្សបាន…។

លោក វ៉ាង លីភឹង អ្នកស្រាវជ្រាវនៅមជ្ឈមណ្ឌលគ្រប់គ្រង និងការពាររោគក្រុងប៉េកាំង បានថ្លែងកាលពីថ្ងៃទី30 មិថុនាថា ក្ដីភ័យខ្លាចទាំងនោះ មិនមែនកើតឡើងដោយគ្មានហេតុផលនោះទេ ដោយសារតែមូស និងរុយ អាចជាភ្នាក់ងារចម្លងមេរោគឆ្លងមួយចំនួន ដូចជាគ្រុនចាញ់ និងគ្រុនឈាម ជាដើម។

តែយ៉ាងណាក៏ដោយ លោកវ៉ាង បានចង្អុលបង្ហាញថា មូស និងរុយ មិនមានគ្រឹះខាងជីវវិទ្យារបស់ការចម្លងមេរោគវីរុសកូរ៉ូណាឡើយ ដោយសារទូទាំងពិភពលោកមិនបានរកឃើញភ័ស្តុតាងថា ពួកវា ជាដើមកំណើតនៃការឆ្លងមេរោគកូវីដ-19នោះទេ តែ សូមណែនាំប្រជាជន ឱ្យការពារខ្លួនពីការត្រូវមូសខាំ និងរក្សាទុកដាក់ចំណីអាហារឱ្យផុតពីសត្វរុយនៅក្នុងរដូវក្ដៅ។

ក្រៅពីនោះ អង្គការសុខភាពពិភពលោក(WHO) បានជូនដំណឹងថា វីរុសកូរ៉ូណាប្រភេទថ្មី មិនអាចចម្លងសាយភាយតាមរយៈការខាំរបស់សត្វមូសបានទេ ដោយបច្ចុប្បន្នមិនមានទិន្នន័យ ឬភ័ស្តុតាងបង្ហាញថា វីរុសកូរ៉ូណាប្រភេទថ្មីសាយភាយតាមរយៈសត្វមូសទេ។

អង្គការនេះ បានបញ្ជាក់ទៀតថា វីរុសកូរ៉ូណាប្រភេទថ្មី ជាវីរុសប្រព័ន្ធដង្ហើម ដែលចម្លងសាយភាយតាមរយៈ “លម្អងទឹកល្អិតៗដែលកើតចេញពីអ្នកឆ្លងមេរោគពេលកណ្ដាស់ ឬក្អក ឬល្អងទឹកសំបោរ” ជាចម្បង។

លោក អាចេ ម៉ុនហ្គោមេរី នាយកផ្នែកគ្រប់គ្រងការកម្ចាត់សត្វមូសនៅក្នុងទីក្រុង ហ៊ីលបូរ៉ូ រដ្ឋហ្វ្លរីដា បានប្រាប់ទៅសារព័ត៌មានប្រចាំតំបន់ថា “រាប់មកដល់ថ្ងៃនេះ មិនមានភ័ស្តុតាងខាងវិទ្យាសាស្ត្រណាមួយបញ្ជាក់ថា សត្វមូសអាចចម្លងសាយភាយមេរោគកូវីដ-19 ពីសត្វមូស ទៅសត្វមូសផ្សេងទៀតបានឡើយ”

លោកម៉ុនហ្គោមេរី បានថ្លែងប្រាប់ស្ថានីយទូរទស្សន៍ WTSP ថា សត្វមូស “គឺជាភ្នាក់ងារនាំអតិសុខុមប្រាណបង្កជំងឺយ៉ាងច្រើន តែតាមរយៈអ្វីដែលយើងដឹងក្នុងថ្ងៃនេះគឺ កូវីដ-19 មិនមែនជាអតិសុខុមប្រាណដែលមូសនឹងធ្វើជាភ្នាក់ងារចម្លងសាយភាយមកមនុស្សបានទេ”

WHO បានណែនាំថា គួរលាងសម្អាតដៃដោយជេលអាល់កុល ឬលាងដៃដោយសាប៊ូ និងទឹកជាប្រចាំ រហូតដល់ចៀសវាងការទំនាក់ទំនងជិតស្និទ្ធជាមួយបុគ្គលដែលកំពុងក្អក ឬកណ្ដាស់ ដើម្បីការពារខ្លួនឯងពីរោគរាតត្បាត៕

ប្រភព៖ សារព័ត៌មានបរទេស

July 6, 2020

ជាង11.5លាននាក់ឆ្លងCOVID-19 នៅទូទាំងពិភពលោក! WHO ព្រមានអំពីការកើនឡើងយ៉ាងឆាប់រហ័សនៃវីរុសនេះ

ពិភពលោកបានរកឃើញអ្នកផ្ទុកវីរុសCOVID-19 ជាង11.5លាននាក់ ក្នុងនោះមានជាង536,000នាក់បានបាត់បង់ជីវិត។

ប្រទេសនិងដែនដីចំនួន 221ក្នុងពិភពលោកបានរាយការណ៍ថា មានមនុស្សចំនួន 11,537,453នាក់បានឆ្លងវីរុសCOVID-19 និង 536,324នាក់បានស្លាប់ដោយសារវីរុសនេះ។ អ្នកជំងឺថ្មីនិងអ្នកស្លាប់ថ្មីត្រូវបានរកឃើញក្នុងរយៈពេល24ម៉ោងចុងក្រោយនេះមានចំនួន172,228នាក់ និង3,631នាក់ ខណៈដែល6,526,361នាក់បានជាសះស្បើយ។

នៅទ្វីបអាមេរិក អ្នកជំងឺបានកើនដល់ 4,726,407នាក់ ខណៈនៅអឺរ៉ុបមាន2,354,391នាក់ អាស៊ីមាន2,025,200នាក់ និងអាហ្វ្រិកមាន330,003នាក់។

សហរដ្ឋអាមេរិក និងប្រេស៊ីលមានអ្នកជំងឺច្រើនជាងគេក្នុងពិភពលោក ក្នុងនោះសហរដ្ឋអាមេរិកមានអ្នកជំងឺសរុប 2,447,441នាក់ អ្នកស្លាប់សរុប123,934នាក់ ចំណែកប្រេស៊ីលមានអ្នកជំងឺសរុប1,157,451នាក់ និងអ្នកស្លាប់សរុបមាន52,951នាក់។

នៅអាស៊ីអាគ្នេយ៍ ឥណ្ឌូនេស៊ីគឺជាសម្បុកមេរោគធំជាងគេបង្អស់ ដោយមានអ្នកជំងឺសរុប63,749នាក់ និងអ្នកស្លាប់សរុប3,171នាក់។ ចំណែកកម្ពុជា វៀតណាម ឡាវ និងទីម័រខាងកើតគឺជាបណ្ដាប្រទេសក្នុងតំបន់ដែលមិនទាន់មានករណីស្លាប់ដោយសារCOVID-19នៅឡើយ។

អង្គការសុខភាពពិភពលោក (WHO) បានព្រមានថា មហារោគរាតត្បាតកំពុងតែមានការឆ្លងរាលដាលកាន់តែខ្លាំងជាងមុន ដោយចំនួនជាងពាក់កណ្ដាលនៃអ្នកជំងឺសរុបនៅទូទាំងពិភពលោក ត្រូវបានរកឃើញក្នុងរយៈពេលត្រឹមតែ6ខែចុងក្រោយនេះប៉ុណ្ណោះ៕

ប្រភព៖ សារព័ត៌មានបរទេស

July 6, 2020

ប្រទេសដែលមានអ្នកជំងឺCOVID-19 ច្រើនជាង100,000នាក់ បានកើនដល់19ប្រទេស

ពិភពលោកបានរកឃើញអ្នកផ្ទុកវីរុសCOVID-19 ចំនួនជិត11លាននាក់ ក្នុងនោះមានអ្នកជំងឺជិត523,000នាក់បានបាត់បង់ជីវិត។ ក្នុងចំណោមមនុស្ស1លាននាក់គឺមាន1,212នាក់បានឆ្លងវីរុសCOVID-19នេះ។

ប្រទេសនិងដែនដីចំនួន221ក្នុងពិភពលោក ត្រូវបានរាយការណ៍ថា បានរកឃើញអ្នកផ្ទុកវីរុសCOVID-19 សរុប 10,960,668នាក់ និងអ្នកស្លាប់ដោយសារវីរុសនេះមានចំនួន522,979នាក់ ក្នុងនោះមានអ្នកជំងឺថ្មី182,899នាក់ និងអ្នកស្លាប់ថ្មីចំនួន5,169នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។ ចំនួនអ្នកជំងឺដែលបានជាសះស្បើយ បានកើនឡើងដល់ 6,127,637នាក់។

ប្រទេសដែលមានអ្នកជំងឺច្រើនជាង1លាននាក់មានចំនួន2ប្រទេស គឺសហរដ្ឋអាមេរិក (អ្នកជំងឺសរុប 2,830,523នាក់ អ្នកស្លាប់សរុប 131,490នាក់) និងប្រទេសប្រេស៊ីល (អ្នកជំងឺសរុប 1,157,451នាក់ និងអ្នកស្លាប់សរុប 52,951
នាក់)។

ចំណែកប្រទេសដែលមានអ្នកជំងឺCOVID-19ចាប់ពី100,000នាក់ឡើងទៅ បានកើនដល់19ប្រទេស រួមមាន សហរដ្ឋអាមេរិក ប្រេស៊ីល រុស្ស៊ី ឥណ្ឌា អង់គ្លេស អេស្ប៉ាញ ប៉េរូ ឈីលី អ៊ីតាលី អ៊ីរ៉ង់ អាល្លឺម៉ង់ ទួរគី ម៉ិកស៊ិក ប៉ាគីស្ថាន អារ៉ាប់ប៊ីសាអូឌីត បារាំង បង់ក្លាដែស ប្រទេសអាហ្វ្រិកខាងត្បូង និងប្រទេសកាណាដា។

បើគិតទៅតាមចំនួនប្រជាជនសរុបនៅទូទាំងពិភពលោក គេរកឃើញថា ក្នុងចំណោមមនុស្ស1លាននាក់គឺមាន1,212នាក់បានឆ្លងCOVID-19 និង61.9នាក់ត្រូវបាត់បង់ជីវិតដោយសារវីរុសនេះ៕

ប្រភព៖ សារព័ត៌មានបរទេស

July 3, 2020

Covid-19 បានធ្វើឱ្យអាជីវកម្មទេសចរណ៍ត្រូវបិទទ្វាប្រមាណជិត 3,000កន្លែង ប៉ះពាល់ដល់មនុស្សជាង 4ម៉ឺននាក់

កម្ពុជាជាប្រទេសដែលមានសក្តានុពលខ្លាំង និងទទួលចំណូលពីវិស័យទេសចរណ៍ជាច្រើនលានដុល្លាររៀងរាល់ឆ្នាំ តែសម្រាប់ឆមាសទី1 ឆ្នាំ2020 នេះ ដោយសារតែវិបត្តិនៃការរីករាលដាលជំងឺ Covid-19 ក៏បានធ្វើឱ្យកម្ពុជាបាត់បង់ចំណូលច្រើនលានដុល្លារទៅវិញ។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថាវិបត្តិនៃជំងឺ Covid-19 បានធ្វើឱ្យភ្ញៀវទេសចរធ្លាក់ចុះយ៉ាងគំហុក ដែលបង្ករផលប៉ះពាល់ជាច្រើនដល់ប្រតិបត្តិករទេសចរណ៍។ គិតត្រឹមដើមខែឧសភា ឆ្នាំ2020 មានអាជីវកម្មទេសចណ៍បិទទ្វា និងបិទបណ្តោះអាសន្នចំនួន 2,956ទីតាំង និងមានបុគ្គលិកបម្រើការងារផ្ទាល់សរុប 45,405នាក់រងផលប៉ះពាល់។

ការបាត់បង់ការងារនេះ បានធ្វើឱ្យមានការជះឥទ្ធិពលយ៉ាងខ្លាំងដល់វិស័យសេដ្ឋកិច្ច និងសង្គមជារួមតាមរយៈឥទ្ធិពលដែលលើសពីឥទ្ធិពលអវិជ្ជមាននៅក្នុងវិស័យធ្វើដំណើរ និងទេសចរណ៍ជាសកល។ ទោះជាយ៉ាងនេះក្តី រដ្ឋមន្ត្រីក្រសួងទេសចរណ៍ បញ្ជាក់ថា ភ្ញៀវទេសចរជាតិបានចាប់ផ្តើមដំណើរកម្សាន្តឡើងវិញហើយក្នុងខែនេះ តែភ្ញៀវទេសចរបរទេសនៅមានចំនួនតិចតួចនៅឡើយដោយសារតែការរឹតបន្តឹងការធ្វើដំណើរក្នុងអំឡុងពេល Covid-19រាតត្បាតពិភពលោកនេះ៕

July 2, 2020

កូនកំលោះម្នាក់បានចម្លងCOVID-19 ទៅភ្ញៀវការជាង100នាក់ ព្រោះតែមិនចង់ខាត…

កូនកំលោះម្នាក់នៅទីក្រុង Paliganj បានបាត់ជីវិតក្រោយពីបានចម្លងវីរុសCOVID-19 ទៅមនុស្សជាង100នាក់ដែលបានចូលរួមពិធីរៀបអាពាហ៍ពិពាហ៍របស់ខ្លួនកាលពីថ្ងៃទី15មីថុនាកន្លងទៅ។

បុរសជាវិស្វករផ្នែកទន់ម្នាក់ អាយុ30ឆ្នាំ មានអាការរាកនិងក្ដៅខ្លួនខ្លាំងនៅមុនថ្ងៃចូលរោងការ ក៏ប៉ុន្តែក្រុមគ្រួសារមិនបានអើពើដល់ការណែនាំរបស់ក្រុមគ្រូពេទ្យនោះឡើយ ដោយកូនកំលោះគ្រាន់តែលេបថ្នាំបន្ថយការឈឺចាប់និងបន្ថយកម្ដៅ និងបានប្រារព្ធពិធីរៀបមង្គលការដ៏ធំ ដែលមានមនុស្សចូលរួមចំនួនជាង360នាក់។

ពីរថ្ងៃបន្ទាប់ពីពិធីរៀបអាពាហ៍ពិពាហ៍នៅទីក្រុង Paliganj រដ្ឋ Bibar ភាគឦសានប្រទេសឥណ្ឌា ស្ថានភាពសុខភាពរបស់កូនកំលោះក៏កាន់តែធ្ងន់ធ្ងរជាងមុន។ មិនយូរប៉ុន្មាន កូនកំលោះនេះក៏បានស្លាប់នៅតាមផ្លូវបញ្ជូនទៅកាន់មន្ទីរពេទ្យ។ សាកសពត្រូវបានបូជាយ៉ាងឆាប់រហ័សដោយមិនទាន់មានការធ្វើតេស្តរកវីរុសCOVID-19។

កាលពីថ្ងៃទី19មិថុនា មនុស្សដែលមានទំនាក់ទំនងជិតស្និទ្ធជាមួយនឹងកូនកំលោះ សុទ្ធតែត្រូវបានពិនិត្យសុខភាព ក្នុងនោះមានមនុស្សចំនួន16នាក់ ទទួលបានលទ្ធផលវិជ្ជមានជាមួយនឹងCOVID-19។ ការធ្វើតេស្តលើភ្ញៀវទាំងអស់ដែលបានចូលរួមពិធីមង្គលការខាងលើនៅតែបន្ត ហើយបានរកឃើញអ្នកផ្ទុកវីរុសចំនួន86នាក់បន្ថែមទៀត នាំឱ្យតួលេខសរុបកើនឡើងលើសពី100នាក់ ខណៈដែលកូនក្រមុំទទួលបានលទ្ធផលអវិជ្ជមាន។

សាច់ញាតិម្នាក់របស់កូនកំលោះ និយាយថា “កាលពីថ្ងៃទី14មិថុនា បើទោះជាគាត់បានប្រាប់ថា មិនស្រួលខ្លួន ហើយចង់ពន្យារពេលរៀបការ ប៉ុន្តែមេបាទាំងសងខាងបានផ្ដល់យោបល់ថា មិនគួរធ្វើបែបនេះ ព្រោះថា នឹងខាតបង់ប្រាក់យ៉ាងច្រើន បើសិនជាលុបចោលពិធីរៀបការនេះ”។

សាច់ញាតិម្នាក់ផ្សេងទៀតឱ្យដឹងថា គ្មានអ្នកណាម្នាក់គិតថា កូនកំលោះមានផ្ទុកវីរុសCOVID-19នោះឡើយ។ “នៅតំបន់ជនបទដែលហាក់មិនមានស្រមោលរបស់COVID-19 យើងមានភាពងាយស្រួលក្នុងការដើរហើរ”។

ប្រភពព័ត៌មានបានឱ្យដឹងថា នៅក្នុងថ្ងៃរៀបការ កូនកំលោះមានអាការក្ដៅខ្លួនខ្លាំង ធ្វើឱ្យសាច់ញាតិក្នុងគ្រួសារមានការព្រួយបារម្ភ ព្រមទាំងបាន “បួងសួងសូមឱ្យCOVID-19 បរវាសចៀសឆ្ងាយ”។ ញាតិម្នាក់បាននិយាយថា “គាត់នៅតែធ្វើកិច្ចទាំងអស់ក្នុងពិធីអាពាហ៍ពិពាហ៍ ក្រោយពីបានលេបថ្នាំប៉ារ៉ា”។

Chiranjeev Pandey ដែលជាមន្ត្រីម្នាក់នៅមូលដ្ឋានបានឱ្យដឹងថា អាជ្ញាធរបានដាក់បម្រាមគោចរតំបន់មួយចំនួននៅ Paliganj, Meetha Kuan និង Khagari។

គិតមកដល់បច្ចុប្បន្ន ពិភពលោកទាំងមូលមានអ្នកឆ្លងវីរុសCOVID-19 សរុប 10,777,769នាក់ ខណៈដែលអ្នកស្លាប់ដោយសារវីរុសនេះបានកើនឡើងដល់517,810នាក់។ ឥណ្ឌាគឺជាសម្បុកមេរោគCOVID-19 ធំជាងគេលំដាប់ទី4ក្នុងពិភពលោក និងធំជាងគេបង្អស់នៅទ្វីបអាស៊ី ដោយមានអ្នកជំងឺជាង600,000នាក់ និងអ្នកស្លាប់ដោយសារវីរុសនេះ មានចំនួនជាង 17,800នាក់៕

ប្រភព៖ សារព័ត៌មានបរទេស

July 2, 2020

លោក Trump ជឿថា COVID-19 នឹងបាត់ខ្លួនទៅវិញ ខណៈដែលមនុស្សជាង130,000នាក់ស្លាប់នៅសហរដ្ឋអាមេរិក!

ប្រធានាធិបតីសហរដ្ឋអាមេរិកជឿថា វីរុសCOVID-19 ចុងក្រោយនឹងបាត់ខ្លួនទៅវិញ ខណៈដែលតួលេខអ្នកឆ្លងវីរុសនេះនៅតែបន្តកើនឡើងនៅក្នុងរដ្ឋជាច្រើននៅសហរដ្ឋអាមេរិកនាសប្ដាហ៍នេះ។

ក្នុងកិច្ចសម្ភាសមួយជាមួយ Fox Business កាលពីថ្ងៃទី1កក្កដា ប្រធានាធិបតី Donald Trump ថ្លែងថា លោកមានសុទិដ្ឋិនិយមចំពោះក្ដីសង្ឃឹមដែលថាសេដ្ឋកិច្ចនឹងងើបឡើងវិញក្រោយពីបានបទទ្វារអស់មួយរយៈពេលដោយសារតែCOVID-19។ ម្ចាស់សេតវិមានបានលើកឡើងអំពីទិន្នន័យដ៏ល្អប្រសើរនាពេលថ្មីៗនេះទាក់ទិននឹងចំនួនការងារ និងប្រាក់ចំណូលនៃការលក់រាយ។

លោក Trump បានថ្លែងថា “ខ្ញុំគិតថា យើងកំពុងតែវិលត្រលប់មកវិញទៅតាមវិធីដ៏ខ្លាំងក្លា។ ហើយខ្ញុំក៏គិតថា យើងនៅតែទប់ទល់ទៅនឹងវីរុសCOVID-19 បានយ៉ាងល្អ។

នៅពេលត្រូវបានសួរអំពីថា តើលោកជឿទេថា COVID-19 នឹងបាត់ខ្លួន លោក Trump អះអាងថា “ខ្ញុំយល់ថា នៅក្នុងអំឡុងពេលណាមួយនោះ វីរុសនឹងបាត់ខ្លួន។ ខ្ញុំសង្ឃឹមបែបនេះ។ ខ្ញុំជឿថា ប្រាកដជាបែបនេះ។ ដល់ពេលកំណត់ណាមួយនោះ វានឹងទៅជាយ៉ាងនេះ ហើយយើងនឹងមានវ៉ាក់សាំងក្នុងពេលឆាប់ៗខាងមុខ”។

ក្នុងរយៈពេលប៉ុន្មានខែចុងក្រោយនេះ លោក Trump ធ្លាប់បានអះអាងជាច្រើនលើកថា លោកជឿថា វីរុសCOVID-19 នឹង “បាត់ខ្លួន” ខណៈដែលរដ្ឋជាច្រើននៅសហរដ្ឋអាមេរិកនៅតែបន្តរកឃើញអ្នកផ្ទុកវីរុសកាន់តែច្រើនឡើងៗ។

កាលពីចុងខែកុម្ភៈ លោក Trump ប្រកាសថា COVID-19 នឹងបាត់ខ្លួន “ដូចជាប្រការដ៏អស្ចារ្យមួយ”។ កាលពីខែឧសភា លោកក៏ធ្លាប់បានថ្លែងថា វីរុសCOVID-19 នឹងបាត់ខ្លួនទៅវិញ ដោយ “មិនចាំបាច់មានវ៉ាក់សាំង” ផងដែរ។

ក៏ប៉ុន្តែ ក្រុមអ្នកវិទ្យាសាស្ត្រ និងមន្ត្រីសុខាភិបាលរបស់លោក Trump បានព្យាករថា ពលរដ្ឋអាមេរិកាំងនឹងត្រូវរស់នៅជាមួយវីរុសនេះក្នុងរយៈពេលវែងតទៅមុខទៀត ដែលយ៉ាងហោចណាស់ក៏រហូតដល់មានវ៉ាក់សាំងដែលត្រូវបានប្រើប្រាស់ជាទូលំទូលាយ។

ចំនួនករណីឆ្លងវីរុសនៅបណ្ដារដ្ឋដូចជា Texas, Arizona, Florida, California និងរដ្ឋផ្សេងៗជាច្រើនទៀតនៅសហរដ្ឋអាមេរិក គឺជាសញ្ញាដែលបង្ហាញថា COVID-19 នៅតែឆ្លងរាលដាលខ្លាំងនៅទឹកដីនេះ។

គិតមកដល់បច្ចុប្បន្ន ពិភពលោកទាំងមូលមានអ្នកឆ្លងវីរុសCOVID-19 សរុប 10,777,769នាក់ ខណៈដែលអ្នកស្លាប់ដោយសារវីរុសនេះបានកើនឡើងដល់517,810នាក់ ក្នុងនោះសហរដ្ឋអាមេរិកមានអ្នកស្លាប់130,746 នាក់ និងអ្នកជំងឺសរុបមានចំនួន 2.773.269នាក់៕

ប្រភព៖ Guardian

July 2, 2020

“អូមេហ្កា 6” សំខាន់មិនចាញ់ “អូមេហ្កា 3” ឡើយ

គ្រប់គ្នាប្រហែលជាស្គាល់អូមេហ្កា 3 ច្បាស់ហើយ ព្រោះប្រយោជន៍របស់វាមានច្រើនមែនទែន ទាំងក្នុងរឿងរបស់ការបំប៉នសរសៃប្រសាទ និងខួរក្បាល ខ្សែភ្នែក ប្រព័ន្ធប្រឆាំងជំងឺ រហូតទៅដល់បំប៉នសាច់ស្បែកឱ្យស្រស់ស្អាតភ្លឺថ្លា ទើបមនុស្សនិយមទទួលទានអាហារដែលសម្បូរទៅដោយអូមេហ្កា 3 ដូចជា សាច់ត្រីផ្សេងៗ និងដល់ថ្នាក់ទទួលទានវីតាមីនគ្រាប់ទៀតផង តែមានមនុស្សតិចណាស់ដែលស្គាល់ “អូមេហ្កា 6” ដែលមានប្រយោជន៍ និងមានភាពសំខាន់ចំពោះរាងកាយមិនចាញ់អូមេហ្កា 3 ដូចគ្នា។

អូមេហ្កា 6 គឺអ្វី?

អូមេហ្កា 6 គឺអាស៊ីតខ្លាញ់បែបមិនបង្កកខ្លួនដូចអាស៊ីត លិណូឡេអ៊ិក និងអាស៊ីតអៈរ៉ាឃិដូនិក ដែលរាងកាយមិនអាចសាងដោយខ្លួនឯងបានឡើយ ទើបយើងត្រូវទទួលទានចូលទៅដូចអូមេហ្កា 3 ដែរ ដោយភាពសំខាន់របស់អូមេហ្កា 6 គឺជាអ្នកថែរក្សាតុល្យភាពរបស់អូមេហ្កា 3 មួយជាន់ទៀត ដូច្នេះបើលោកអ្នកទទួលទានអូមេហ្កា 3 ចូលទៅនោះ ក៏ត្រូវទទួលទានអូមេហ្កា 6 ដើម្បីឱ្យជួយរក្សាតុល្យភាពក្នុងរាងកាយផងដែរ ដូចជា គុណសម្បត្តិរបស់អូមេហ្កា 3 គឺជួយឱ្យប្រព័ន្ធឈាមរត់ហូរវឹលបានល្អឡើង តែបើសិនទទួលទានច្រើនជ្រុលពេក នឹងមានបញ្ហាដូចជានៅពេលត្រូវវះកាត់ ដកធ្មេញ ជាដើម ដូច្នេះគួរទទួលទានអូមេហ្កា 6 គួបទៅជាមួយផងព្រោះនឹងជួយឱ្យឈាមបង្កកខ្លួនបានល្អឡើង ដើម្បីការពារបញ្ហាឈាមក្រឈប់ហូរក្រោយពេលវះកាត់ ឬដកធ្មេញហ្នឹងឯង។

តើអូមេហ្កា 6 សំខាន់យ៉ាងណា?

ដូចដែលបានប្រាប់ទៅហើយថា អូមេហ្កា 6 នឹងជួយរក្សាតុល្យភាពការធ្វើការងាររបស់អូមេហ្កា 3។ អូមេហ្កា 3 ជួយឱ្យប្រព័ន្ធឈាមរត់ហូរវឹលងាយស្រួលឡើង ខណៈដែលអូមេហ្កា 6 នឹងជួយឱ្យឈាមបង្កកខ្លួនបានលឿនឡើង ទើបធ្វើឱ្យរាងកាយមានប្រព័ន្ធឈាមរត់ដែលល្អឥតខ្ចោះបាន ដូច្នេះបើអ្នកណាកំពុងទទួលទានអូមេហ្កា 3 ក៏ត្រូវទទួលទានអូមេហ្កា 6 រួមជាមួយផង ទើបធ្វើឱ្យរាងកាយរឹងមាំឥតខ្ចោះពិតៗ។

ប្រយោជន៍របស់អូមេហ្កា 6

1 . ជួយកាត់បន្ថយខូលេស្តេរ៉ូលក្នុងរាងកាយ កាត់បន្ថយខ្លាញ់ញ៉ុកណែនក្នុងសរសៃឈាម ហុចផលល្អដល់សរសៃឈាម និងបេះដូង។

2 . ជួយកាត់បន្ថយអាការរលាក និងអាការឈឺចុកចាប់ផ្សេងៗតាមរាងកាយ។

3 . ថែរក្សាភាពស្រស់ស្រាយឱ្យស្បែក បន្ថយបញ្ហាស្បែកស្ងួត ប្រេះបែក ក្រឹន របក រួមទាំងអង្គេនៅលើស្បែកក្បាល ជ្រុះសក់ ឬជំងឺស្បែកប្រភេទខ្លះបានទៀតផង។

4 . ប្រឆាំងអនុមូលឥស្សរៈ ជួយពន្យាភាពចុះខ្សោយរបស់កោសិកាផ្សេងៗក្នុងរាងកាយ និងកាត់បន្ថយភាពប្រថុយប្រថានក្នុងការកើតមហារីកទៀតផង។

5 . បន្ថយអាការជ្រៀតជ្រែកពីសភាវផ្សេងៗនៅលើអ្នកជំងឺទឹកនោមផ្អែម ដូចជា អាការស្ពឹកតាមចុងម្រាមដៃ ម្រាមជើង។

6 . គ្រប់គ្រងកម្រឹតអ័រម៉ូនក្នុងរាងកាយឱ្យប្រក្រតី។

តើអូមេហ្កា 6 រកបានពីអាហារប្រភេទណាខ្លះ?

អូមេហ្កា 6 មាននៅក្នុងប្រេងរុក្ខជាតិផ្សេងៗ ដូចជា ប្រេងសណ្តែកលឿង គ្រាប់ផ្កាឈូករ័ត្ន កន្ទក់ ពោត ឬអាចជាប្រេងរុក្ខជាតិពិសេស ដូចជា ប្រេងភ្រីមរ៉ូស ប្រេងម្កាក់មានអូមេហ្កា 6 ក៏មានអូមេហ្កា 6 ដូចគ្នាដែរ តែតិចជាងប្រេងដែលមកពីរុក្ខជាតិផ្សេងៗ និងល្អសម្រាប់ទទួលទានស្រស់ៗ លាយនៅក្នុងញាំ ឬឆ្លងកាត់កំដៅតិចៗដូចជាឆាជាដើម។

តើរក្សាតុល្យភាពរបស់អូមេហ្កា 3 និង 6 យ៉ាងណាបាន?

1 . ក្នុងករណីដែលទទួលទានអូមេហ្កា 3 ពីសាច់ត្រី គួរតែទទួលទានត្រីទឹកសាប និងត្រីសមុទ្រក្នុងបរិមាណប៉ុនៗគ្នា កុំទទួលទានត្រីតែណាមួយឱ្យសោះ ដើម្បីឱ្យបានសារធាតុអាហារដែលសម្បូរបែប។

2 . គួរទទួលទានត្រីឱ្យបានជាប់លាប់ ទទួលទានឱ្យបានយ៉ាងតិចរៀងរាល់សប្តាហ៍ តែមិនចាំបាច់ទទួលទានគ្រប់ពេលក៏បានដែរ។

3 . ជ្រើសរើសទទួលទានទាំងប្រេងរុក្ខជាតិសម្រាប់ឆា ឬចៀន និងប្រេងម្កាក់សម្រាប់ទទួលទានជាមួយញាំ ឬឆាបែបឆាប់រហ័ស។

4 . កុំភ្លេចហាត់ប្រាណឱ្យបានជាប់លាប់ គ្រប់គ្រងទម្ងន់ខ្លួនឱ្យស្ថិតក្នុងកម្រឹតម្រក្រតី។

គោលការណ៍សំខាន់គឺ ជ្រើសរើសទទួលទានអាហារឱ្យបានសម្បូរបែប មិនមែនអ្វីដែលថាល្អ ក៏គិតតែពីទទួលទានតែមួយមុខនោះទេ ដើម្បីឱ្យយើងបានទទួលទានសារធាតុអាហារគ្រប់ចំនួន មិនខ្វះសារធាតុអាហារប្រភេទណាមួយ ព្រោះរាងកាយរបស់យើងនឹងមានតុល្យភាពបាន ក៏ចាំបាច់ត្រូវតែចាប់ផ្តើមពីការទទួលទានអាហារ និងទង្វើរបស់យើងហ្នឹងឯង៕

July 1, 2020

5 សំណួរ-ចម្លើយ អំពីទីក្រុងប៉េកាំង និងកូវីដ-19 រលកទី2

ក្រុងប៉េកាំង បានរាយការណ៍ថា មានអ្នកបានទទួលការអះអាងរួចហើយថា បានឆ្លងមេរោគកូវីដ-19 ចំនួន 106នាក់ គិតត្រឹមពេលមុនអធ្រាត្រនៃថ្ងៃចន្ទ(ទី29 មិថុនា)…សួរថា តើហេតុអ្វីបានជាការឆ្លងរាលដាលរបស់មេរោគ កើតឡើងនៅក្នុងក្រុងប៉េកាំង និងថា តើទីក្រុងនេះ បានធ្វើអ្វីខ្លះ ក្រោយពីការឆ្លងរាលដាលចាប់ផ្ដើមឡើង?

សំណួរទី1៖ តើនរណាជាអ្នកឆ្លងមេរោគដំបូងគេ?

ក្រោយពីក្រុងប៉េកាំងស្ងប់ស្ងាត់ពីវិបត្តិការឆ្លងរាតត្បាត កន្លងផុតទៅ 56ថ្ងៃ ក្រុងប៉េកាំងបានរាយការណ៍ថា រកឃើញអ្នកឆ្លងមេរោគថ្មី នៅក្នុងតំបន់ ជាមនុស្សប្រុស អាយុ 52ឆ្នាំ ឈ្មោះ ថាំង ជាអ្នករស់នៅក្នុងតំបន់ស៊ីឈឹង កាលពីថ្ងៃព្រហស្បតិ៍ ទី11 មិថុនា។

លោកថាំង បានចូលទៅទទួលការពិនិត្យនៅក្នុងមន្ទីរពេទ្យក្នុងតំបន់ នៅថ្ងៃទី10 មិថុនា ដោយសារតែមានអាការគ្រុនក្ដៅជាបន្តបន្ទាប់ ដោយគាត់មិនបានធ្វើដំណើរចេញក្រៅក្រុងប៉េកាំងឡើយ ក្នុងអំឡុងពេល 2សប្ដាហ៍មុនហ្នឹង។

ក្រោយពីនោះតែ 1ថ្ងៃគត់ ក្រុងប៉េកាំង បានរកឃើញអ្នកឆ្លងមេរោគថ្មីថែមទៀត 6នាក់ ក្នុងចំណោមពួកគេ មាន 2នាក់រស់នៅក្នុងតំបន់ហ្វឹងថៃ ជាមិត្តភក្តិរួមការងារនៅក្នុងស្ថាប័នត្រួតពិនិត្យផលិតផលសាច់សត្វ ហើយលោកលីវ ម្នាក់ក្នុងចំណោម 2នាក់នោះ បានរៀបរាប់ថា គាត់បានធ្វើដំណើរទៅស៊ីងតៅ ក្នុងមណ្ឌលសានតុងរបស់ចិន ក្នុងអំឡុងពេល 2សប្ដាហ៍កន្លងទៅ។

ការសាកសួរខាងជំងឺឆ្លងវិទ្យា បានរកឃើញថា លោកលីវ និងលោកថាំង ធ្លាប់ទៅស៊ីនហ្វាទី ផ្សារលក់បោះដុំទំនិញកសិកម្ម ដ៏សំខាន់មួយនៅក្នុងតំបន់ហ្វឹងថៃ ដោយលោកថាំង បានទៅទីនោះនៅថ្ងៃទី3 មិថុនា និងលោកលីវ បានទៅទីនោះ នៅថ្ងៃទី5 មិថុនា។

លោក អ៊ូ ជុនយ៉ូវ៍ ប្រធានផ្នែកជំងឺឆ្លងវិទ្យានៃមជ្ឈមណ្ឌលគ្រប់គ្រង និងការពាររោគ នៃប្រទេសចិន បានថ្លែងកាលពីថ្ងៃចន្ទ(ទី29មិថុនា)ថា លោកថាំង ចាប់ផ្ដើមមានអាការ នៅថ្ងៃទី6 មិថុនា។

ដោយសារតែនៅមិនទាន់ប្រាកដច្បាស់ថា រកឃើញអ្នកក្រុងប៉េកាំងមួយណាដែលមានអាការមុនលោកថាំងនោះ ទើបអះអាងតាមរយៈទិន្នន័យដែលមាននៅពេលនេះបានថា លោកថាំង គឺជាអ្នកឆ្លងមេរោគមុនគេ។

សំណួរទី2៖ តើត្រីសាល់ម៉ុន ជាភ្នាក់ងារចម្លងមេរោគវីរុសកូរ៉ូណាប្រភេទថ្មី មែនឬយ៉ាងណា?

ការពិនិត្យរកវីរុសកូរ៉ូណាប្រភេទថ្មី ត្រូវបានរកឃើញ នៅលើជ្រញ់ពន្លះត្រីសាល់ម៉ុននាំចូល នៅក្នុងផ្សារលក់ផលិតផលបោះដុំស៊ីនហ្វាទី ក្រុងប៉េកាំង ហើយតាំងពីពេលនោះមក ផ្សារជាច្រើនទៀត បានឈប់លក់ផលិតផលសត្វ។

លោក អ៊ូ ជុនយ៉ូវ៍ ប្រធានផ្នែកជំងឺឆ្លងវិទ្យា នៃមជ្ឈមណ្ឌលគ្រប់គ្រង និងការពាររោគ នៃប្រទេសចិន បានថ្លែងថា មិនអាចសរុបបានថា ត្រីសាល់ម៉ុន គឺជាដើមហេតុនៃការចម្លងមេរោគ ដោយគ្រាន់តែពិនិត្យឃើញវីរុសនៅលើជ្រញ់នោះទេ។ លោកប្រាប់ថា ត្រីដែលរស់នៅតាមធម្មជាតិ គ្មានផ្លូវឆ្លងមេរោគវីរុសកូរ៉ូណាបានទេ តែយ៉ាងណាក៏ដោយ ត្រីអាចប្រឡាក់ប្រឡូសមេរោគ តាមរយៈដំណាក់កាលផ្សេងៗ ក្នុងអំឡុងពេលចាប់ ឬដឹកជញ្ជូន។

លោកអ៊ូ បានបន្តប្រាប់ទៀតថា ការឆ្លងរាលដាលជាថ្មីនេះ អាចមានការអធិប្បាយ ដែលអាចទៅរួច 2ប្រការ។ ប្រការដំបូង អាចជាការនាំចូលសាច់ និងអាហារសមុទ្រទៅក្នុងផ្សារ ពីគ្រប់ប្រទេសទូទាំងពិភពលោក។ មួយចំណែក អាចមានការប្រឡាក់ប្រឡូសពីក្រុមកម្មករ ក្នុងអំឡុងពេលការកែច្នៃសាច់សត្វ និងការដឹកជញ្ជូន ហើយបន្ទាប់ពីនោះ វីរុសក៏ត្រូវបានបញ្ជូនបន្តពីផលិតផល ឆ្ពោះមកមនុស្ស។

ភាពអាចទៅរួចទី2 គឺការបញ្ជូនបន្ត រវាងបុគ្គល។ លោកថ្លែងថា “អ្នកឆ្លងមេរោគ ដែលនាំមេរោគវីរុសចូលទៅក្នុងផ្សារ អាចមិនមានអាការ ឬមានអាការមិនធ្ងន់ធ្ងរ ហើយភាពប្រញាប់ប្រញាល់ និងច្របូកច្របល់នៅក្នុងផ្សារ បាននាំឆ្ពោះទៅរកការចម្លងជាក្រុម នៃការឆ្លងមេរោគជាថ្មី។

តាមរយៈការរកឃើញរបស់ក្រុមអ្នកស្រាវជ្រាវរបស់ University College Lodon បានរកឃើញថា វីរុសកូរ៉ូណាប្រភេទថ្មី ចម្លងមេរោគតែនៅក្នុងសត្វចិញ្ចឹមកូនដោយទឹកដោះប៉ុណ្ណោះ និងមានភ័ស្តុតាងបង្ហាញថា អាចឆ្លងទៅសត្វឆ្មា និងឆ្កែបាន តែមិនមែនត្រី សត្វស្លាប ឬឧរង្គសត្វឡើយ។

សំណួរទី3៖ តើវីរុស មកពីអឺរ៉ុប មែនឬទេ?

លោក ស៊ឹង កួង អ្នកស្រាវជ្រាវជើងចាស់ នៅមជ្ឈមណ្ឌលគ្រប់គ្រង និងការពាររោគ នៃប្រទេសចិន បានថ្លែងថា ប្រភេទវីរុសក្នុងការចម្លងរាលដាលថ្មីចុងក្រោយបំផុតនេះ ខុសប្លែកពីវីរុសដែលរកឃើញនៅក្នុងប្រទេសចិនកាលពីពេលមុន ហើយទិន្នន័យដំបូង បានបញ្ជាក់ថា ជាប្រភេទដែលក្លាយពូជមកពីអឺរ៉ុប។ តែយ៉ាងណាក៏ដោយ លោកស៊ឹង បានសង្កត់ធ្ងន់ថា នៅត្រូវពិនិត្យមើលបន្ថែមទៀត ដើម្បីអះអាងពីប្រភពរបស់វីរុសនេះ។

លោកស្រី យ៉ាង ភឹង អ្នកជំនាញមកពីមជ្ឈមណ្ឌលគ្រប់គ្រង និងការពាររោគ នៃទីក្រុងប៉េកាំង ថ្លែងថា “ការវិភាគបឋម តាមរយៈការរកកម្រិតជីណូម បានបង្ហាញឱ្យឃើញថា វីរុសត្រូវបាននាំចូល មិនមែនជាវីរុសក្នុងតំបន់ទេ”

ប្រភពកំណើតរបស់វីរុស នៅតែស្ថិតក្នុងអំឡុងការត្រួតពិនិត្យ និងមិនដឹងថា តើវីរុសនេះ ហេតុម៉េចបានមកដល់ទីក្រុងប៉េកាំងបាន?

ទាំងអស់នេះ ការរកកម្រិតជីណូមទាំងអស់ នឹងជួយឱ្យអ្នកស្រាវជ្រាវ រៀនយល់ដឹងពាក់ព័ន្ធនឹងការក្លាយពូជរបស់វីរុសនៅក្នុងកន្លែងផ្សេងៗ និងបញ្ជាក់បានពីដំណើរផ្លូវនៃការចម្លងសាយភាយ ឧទាហរណ៍ដូចជា នៅឯប្រ៊ីធីសខូឡាំបៀ ប្រទេសកាណាដា បានប្រកាសកាលពីពេលថ្មីៗនេះថា វីរុសដែលចម្លងសាយភាយនៅក្នុងប្រទេស ជាវីរុសមកពីសហរដ្ឋអាមេរិក និងអឺរ៉ុប ជាដើម។

វីរុសក្នុងក្រុងប៉េកាំង ជាប្រភេទក្លាយពូជមកពីអឺរ៉ុប តែមិនបានពិសោធច្បាស់ថា មកពីប្រទេសក្នុងទ្វីបអឺរ៉ុបដោយផ្ទាល់នោះទេ ព្រោះនៅត្រូវការទិន្នន័យបន្ថែមទៀត ដោយសារតែគ្មានកម្រិត RNA ដែលដូចគ្នានៅក្នុងប្រភពទិន្នន័យវីរុសក្នុងតំបន់របស់ចិន។

សំណួរទី4៖ តើត្រូវបិទទីក្រុង ដើម្បីការពារការឆ្លងរាលដាល ឬទេ?

នៅពេលមានរបាយការណ៍ អ្នកជំងឺដែលបានទទួលការអះអាងហើយ នៅក្នុងខណ្ឌជាច្រើនក្នុងក្រុងប៉េកាំង និងក្នុងមណ្ឌលហ៊ើពេយ ដែលនៅជិតខាង លោក ចាង វឹនហុង អគ្គនាយកផ្នែកជំងឺឆ្លងរបស់មន្ទីរពេទ្យហួសាន ក្នុងក្រុងស៊ាងហៃ បានថ្លែងថា គ្រប់ករណីដែលបានទទួលការអះអាងក្នុងការឆ្លងរាលដាលថ្មីនេះ មានតភ្ជាប់នឹងផ្សារស៊ីនហ្វាទី ដែលនេះជាទិន្នន័យសំខាន់ ដែលជួយក្នុងការពិចារណាសម្រេច ដោយទិន្នន័យបានបង្ហាញថា ការឆ្លងរាលដាលនោះ កំពុងស្ថិតនៅក្នុងរយៈចាប់ផ្ដើមប៉ុណ្ណោះ។ លោកថ្លែងថា “ដរាបណាដែលមានការរកឃើញទាន់ពេលវេលា ការឆ្លើយតបដែលឆាប់រហ័ស និងការគ្រប់គ្រងដែលជាក់ច្បាស់ចំៗគោលដៅ ការឆ្លងរាលដាលរបស់ជំងឺ នឹងត្រូវគ្រប់គ្រងបានក្នុងពេលដ៏ខ្លី ហើយក្រុងប៉េកាំង នឹងមិនដូចវូហានឡើយ”

សំណួរទី5៖ តើមន្ទីរពេទ្យបន្ទាន់ សៀវថាំងសាន ចាំបាច់ត្រូវបើកជាថ្មី ឬទេ?

មន្ទីរពេទ្យប៉េកាំងសៀវថាំងសាន ត្រូវបានសាងសង់ឡើងក្នុងឆ្នាំ2003 ដើម្បីព្យាបាលអ្នកជំងឺដែលឆ្លងមេរោគសារស៍ និងចាប់ផ្ដើមទទួលអ្នកជំងឺកូវីដ-19 នៅថ្ងៃទី23 ខែមករា ឆ្នាំ2020 មុននឹងបិទទៅវិញ នៅពេលអ្នកជំងឺកូវីដ-19 ចុងក្រោយគេបានទទួលការព្យាបាលជាសះស្បើយ និងចាកចេញពីមន្ទីរពេទ្យនេះកាលពីថ្ងៃទី28 ខែមេសា ឆ្នាំ2020។

លោកអ៊ូ បានថ្លែងថា “ការមើលពិភពលោកក្នុងន័យវិជ្ជមានរបស់យើងនេះ អាស្រ័យលើការត្រៀមការយ៉ាងពេញរូបបែប និងការដំណើរការតាមវិធានការការពារការឆ្លងរាលដាលយ៉ាងពេញរូបបែបដូចគ្នា”

លោក ឡេ ហៃឆៅ ប្រធានគណៈកម្មការសុខភាពជាតិប៉េកាំង បានថ្លែងកាលពីថ្ងៃទី17 ឧសភាថា ក្រុងប៉េកាំង នឹងតែរក្សាទុកប្រព័ន្ធបម្រើសេវាកម្មព្យាបាល “3 + 2” ដែលពាក់ព័ន្ធជាមួយមន្ទីរពេទ្យទីថាន មន្ទីរពេទ្យយ៉ូអាន មន្ទីរពេទ្យទាហាន302 មន្ទីរពេទ្យសៀវថាំងសាន និងមន្ទីរពេទ្យមិត្តភាពចិន-ជប៉ុន ក្នុងអំឡុងការឆ្លងរាលដាលរបស់កូវីដ-19 ឱ្យនៅដដែល៕

ប្រភព៖ សារព័ត៌មានបរទេស

ប្រែសម្រួលដោយ តាវ៉ែនតា

July 1, 2020

មុននេះបន្តិចក្រសួងសុខាភិបាលប្រកាសថាមានអ្នកឆ្លង Covid-19 ថ្មីចំនួន 9នាក់

ក្រសូងសុខាភិបាល នៃកម្ពុជា ទើបតែបានប្រកាសនៅមុននេះបន្តិចថា ប្រទេសយើងបានរកឃើញករណីឆ្លងជំងឺ Covid-19 ថ្មី ចំនួន 9នាក់ ខណៈនៅថ្ងៃដដែលនេះមានអ្នកជាសះស្បើយឡើងវិញម្នាក់។

តាមសេចក្តីជូនព័ត៌មានរបស់ក្រសួងសុខាភិបាល បានបញ្ជាក់ថា គិតត្រឹមម៉ោង 7ព្រឹក ថ្ងៃទី 27 ខែមិថុនា ឆ្នាំ2020 នេះ ស្ថានភាពជំងឹ Covid-19 នៅកម្ពុជា មានចំនួនអ្នកជាសះស្បើយ 129នាក់ និងអ្នកសម្រាកព្យាបាលនៅមន្ទីរពេទ្យមិត្តភាពកម្ពុជា-សូវៀត ចំនួន 10នាក់។ ជារួមអ្នកដែលរកឃើញថាមានផ្ទុកជំងឺ Covid-19 ទាំងអស់ទូទាំងប្រទេសសរុបចំនួន 139នាក់។

ចំពោះករណីអ្នកផ្ទុកថ្មីចំនួន 9នាក់ថ្មីនេះ គឺសុទ្ធតែជាអ្នកដំណើរមកពីប្រទេសឥណ្ឌូណេស៊ី ដោយក្នុងជើងហោះហើរនេះមានអ្នកដំណើរសរុបចំនួន 40នាក់ ដែលក្នុងចំណោមនោះមានអ្នកដំណើរជនជាតិខ្មែរចំនួន 24នាក់ និងអ្នកដំណើរជនជាតិវៀតណាមម្នាក់ រួមទាំងអ្នកដំណើរជនជាតិឥណ្ឌូណេស៊ីចំនួន24នាក់។

អ្នកទាំងអស់នោះកំពុងស្ថិតក្រោមការតាមដានសុខភាពយ៉ាងយកចិត្តទុកដាក់ពីក្រុមគ្រូពេទ្យ៕

June 27, 2020

Category: សុខភាព