Category: សុខភាព

ប្រទេសចំនួន3រកឃើញអ្នកផ្ទុកCOVID-19 លើសពី1លាននាក់ ខណៈពិភពលោករកឃើញជិត14លាននាក់
ពិភពលោកទាំងមូលបានរកឃើញអ្នកផ្ទុកCOVID-19 ជិត14លាននាក់ និងអ្នកស្លាប់ដោយសារវីរុសនេះបានកើនដល់ជាង591,000នាក់។
ប្រទេសនិងដែនដីចំនួន221ក្នុងពិភពលោក ត្រូវបានរាយកាណ៍ថា បានរកឃើញផ្ទុកCOVID-19 សរុបចំនួន13,916,980នាក់ និងអ្នកស្លាប់សរុប591,556នាក់ ក្នុងនោះមានអ្នកជំងឺថ្មីចំនួន259,546នាក់ និងអ្នកស្លាប់ថ្មីចំនួន6,025នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។ ចំណែកអ្នកដែលបានជាសះស្បើយបានកើនដល់8,263,929នាក់។
ទ្វីបអាមេរិកបានរកឃើញអ្នកជំងឺសរុប7,439,963នាក់ ខណៈទ្វីបអាស៊ីរកឃើញ3,194,470នាក់ អឺរ៉ុបរកឃើញ2,628,873នាក់ និងអាហ្វ្រិករកឃើញ667,302នាក់។
ប្រទេសដែលបានរកឃើញអ្នកជំងឺCOVID-19 លើសពី1លាននាក់ រួមមាន សហរដ្ឋអាមេរិក (3,695,025នាក់) ប្រេស៊ីល (2,014,738នាក់) និងប្រទេសឥណ្ឌា (1,005,637នាក់)។
July 17, 2020
“បើមិនពាក់ម៉ាស់ការពារទេ” មានការព្យាករថា កូវីដ-19 នឹងសម្លាប់ជីវិតជនជាតិអាមេរិក លើស 224,000នាក់ នាដើមខែវិច្ឆិកា
មហាវិទ្យាល័យវ៉ាស៊ីនតោន បានផ្សព្វផ្សាយរបាយការណ៍ដាស់តឿនថ្មីចុងក្រោយបំផុតមួយ ដោយបានប៉ាន់ប្រមាណថា ចំនួនអ្នកស្លាប់ដោយសារកូវីដ-19 នៅសហរដ្ឋអាមេរិក នឹងហក់ឡើងលើស 224,000នាក់ នៅថ្ងៃទី1 វិច្ឆិកា ជាកែសម្រួលពីការព្យាករកាលពីលើកមុន 16,000នាក់ ដោយសារតែចំនួនអ្នកឆ្លងមេរោគ និងអ្នកចូលព្យាបាលនៅក្នុងមន្ទីរពេទ្យបានកើនឡើងនៅក្នុងរដ្ឋជាច្រើនទូទាំងសហរដ្ឋអាមេរិក។
យ៉ាងណាក៏ដោយ ក្នុងការព្យាករចុងក្រោយបំផុត ស្ថាប័នវាស់វែង និងវាយតម្លៃផ្នែកសុខភាព នៃមហាវិទ្យាល័យវ៉ាស៊ីនតោន(IHME) ដែលបានផ្សព្វផ្សាយកាលពីពេលព្រលប់ថ្ងៃអង្គារ(ទី14កក្កដា) បានប៉ាន់ប្រមាណថា ចំនួនអ្នកស្លាប់អាចនឹងថយចុះ 40,000នាក់ បើសិនជាប្រជាជនអាមេរិកគ្រប់រូប រួមចិត្តរួមកាយគ្នា ពាក់ម៉ាស់ការពារក្នុងទីសាធារណៈ។
ស្ថាប័នវាស់វែង និងវាយតម្លៃផ្នែកសុខភាព នៃមហាវិទ្យាល័យវ៉ាស៊ីនតោន បានបញ្ជាក់នៅក្នុងសេចក្ដីថ្លែងការណ៍ថា “មានការនាំគ្នាពាក់ម៉ាស់អនាម័យការពារច្រើនជាងមុន តែក៏មិនច្រើនគ្រប់គ្រាន់ឡើយ។ បើសិន 95% នៃប្រជាជនអាមេរិក នាំគ្នាពាក់ម៉ាស់ការពារគ្រប់គ្រា ពេលដែលចេញទៅក្រៅផ្ទះ អត្រាការឆ្លងមេរោគ នឹងថយចុះ ចំនួនអ្នកចូលព្យាបាលនៅតាមមន្ទីរពេទ្យ នឹងថយចុះ និងរំពឹងថា ចំនួនអ្នកស្លាប់ ក៏នឹងថយចុះទៅតាមនោះដែរ”។
ការសន្និដ្ឋានជាថ្មី របស់ស្ថាប័នវាស់វែង និងវាយតម្លៃផ្នែកសុខភាព នៃមហាវិទ្យាល័យវ៉ាស៊ីនតោននេះ បានធ្វើឡើង ក្រោយពីរដ្ឋអាឡាបាម៉ា, ហ្វ្លរីដា និងណូស ខារ៉ូឡៃណា កាលពីថ្ងៃអង្គារ(ទី14កក្កដា) ដោយបានរាយការណ៍ពីការរកឃើញអ្នកស្លាប់ដោយសារកូវីដ-19 ប្រចាំថ្ងៃខ្ពស់បំផុត ចាប់តាំងពីមានការឆ្លងរាលដាល ក្លាយជាភាពជោគជ័យដ៏សែនសោកសៅ នៃការឆ្លងរាតត្បាតរលកទី2 ដែលកំពុងវាយលុកទីតាំងផ្សេងៗស្ទើរតែទូទាំងសហរដ្ឋអាមេរិក។
ក្នុងតួលេខព្យាករជាថ្មីនេះ ស្ថាប័នវាស់វែង និងវាយតម្លៃផ្នែកសុខភាព នៃមហាវិទ្យាល័យវ៉ាស៊ីនតោន បានសន្និដ្ឋានថា នឹងមានប្រជាជនអាមេរិកស្លាប់ដោយសារកូវីដ-19 កើនឡើងដល់ 224,089នាក់ នៅថ្ងៃទី1 ខែវិច្ឆិកា ពីចំនួនដើម 208,254នាក់ ដូចដែលធ្លាប់បានព្យាករទុកកាលពីថ្ងៃទី7 កក្កដា។
តាមរយៈការរាប់របស់ទីភ្នាក់ងារព័ត៌មានរ៉យទ័រ បានឱ្យដឹងថា រហូតមកដល់ពេលនេះ មានពលរដ្ឋអាមេរិកាំងយ៉ាងតិច 136,052នាក់រួចហើយ បានស្លាប់ដោយសារកូវីដ-19 ពីចំនួនអ្នកឆ្លងមេរោគនេះប្រមាណជា 3.4លាននាក់។
ទាំងអស់នេះ កាលពីពេលកន្លងមក តួលេខព្យាកររបស់ស្ថាប័នវាស់វែង និងវាយតម្លៃផ្នែកសុខភាព នៃមហាវិទ្យាល័យវ៉ាស៊ីនតោន ធ្លាប់ត្រូវបានមន្ទីរសេតវិមាន យកទៅអះអាងរួចមកហើយ និងបានទទួលការតាមសង្កេតមើលយ៉ាងជិតដិត ពីបណ្ដាក្រុមមន្ត្រីសុខភាពសាធារណៈ៕
ប្រភព៖ សារព័ត៌មានបរទេស
July 16, 2020
វៀតណាមវះកាត់ទារិកាភ្លោះជាប់គ្នាបានដោយជោគជ័យ! វេជ្ជបណ្ឌិតនិងជំនួយការ93នាក់ចូលរួមក្នុងករណីវះកាត់នេះ
ក្រុមវេជ្ជបណ្ឌិតនិងគ្រូពេទ្យចំនួន93នាក់ បានចូលរួមក្នុងការវះកាត់ផ្ដាច់រាងកាយជាប់គ្នារបស់ទារិកាភ្លោះមួយគូដោយជោគជ័យ បន្ទាប់ពីបានចំណាយពេល13ម៉ោងនិង40នាទីប្រកបដោយភាពតានតឹង និងសប្បាយរីករាយ។
កាលពីម្សិលមិញ (15កក្កដា) ទារិកា Dieu Nhi និង Truc Nhi អាយុ13ខែ ដែលមានរាងកាយជាប់គ្នានៅត្រង់ពោះ ទទួលបានការវះកាត់ផ្ដាច់រាងកាយចេញពីគ្នា នៅឯមន្ទីរពេទ្យកុមារក្រុងហូជីមិញ។ នៅទីនេះ ក្រុមវេជ្ជបណ្ឌិតនិងជំនួយការចំនួន93នាក់ មកពីមន្ទីរពេទ្យនានាក្នុងតំបន់ភាគខាងត្បូងប្រទេសវៀតណាម បានបែងចែកការវះកាត់នេះជា11វគ្គ ដើម្បីត្រៀមសម្រាប់ការវះកាត់នេះ។
ទារិកាភ្លោះជាប់គ្នានេះគឺជាប្រភេទ ischiopagus tetrapus ជាករណីកម្របំផុត ដោយមានប្រមាណជា6%ប៉ុណ្ណោះ ក្នុងចំណោមទារកមានរាងកាយជាប់គ្នានៅទូទាំងពិភពលោក។ អំពីប្រព័ន្ធរំលាយអាហារ ទារិកាភ្លោះនេះ មានពោះវៀនជាមួយគ្នា និងមានរន្ធគូទតែមួយគត់។ អំពីតម្រងនោមវិញ ទារិកាទាំងនេះមានក្រពះនោម (ប្លោកនោម) ចំនួន2 ស្ថិតនៅចំហៀងខាងឆ្វេងនិងខាងស្ដាំនៃពោះវៀនរួមរបស់ពួកគេ។ ក្រពះនោមនីមួយៗ ទទួលទឹកនោមពីបំពង់បង្ហូរទឹកនោមផ្សេងៗគ្នា។ ទារិកាភ្លោះនេះមានឆ្អឹងល្អាងត្រគាកតម្រៀបគ្នាជារង្វង់មូល។
ដើម្បីចៀសវាងការភាន់ច្រឡំសម្រាប់ក្រុមវេជ្ជបណ្ឌិត និងឧបករណ៍វះកាត់ ក្រុមជំនួយការបានបិទក្រដាសសម្គាល់ពណ៌ក្រហមលើទារិកាឈ្មោះ Truc Nhi (ឆ្វេង) និងក្រដាសពណ៌ខៀវទៅលើ Dieu Nhi។ ដំណាក់កាលនៃការសណ្ដំ បានអូសបន្លាយពេលជិត3ម៉ោង រាប់ចាប់ពីម៉ោង6និង30នាទីព្រឹក។
វេជ្ជបណ្ឌិត Truong Quang Dinh នាយកមន្ទីរពេទ្យកុមារក្រុង បានដឹកនាំការវះកាត់នេះ។ ម៉ោង7និង30នាទី ក្រុមវេជ្ជបណ្ឌិតបានពិគ្រោះគ្នាជាលើកចុងក្រោយដើម្បីកំណត់ឱ្យបានច្បាស់ឡើងវិញអំពីវិធីសាស្ត្រ និងដំណាក់កាលសហការគ្នាជាមួយនឹងក្រុមផ្សេងៗ មុននឹងចាប់ផ្ដើមវះកាត់។
ក្រុមវេជ្ជបណ្ឌិតមានការប្រុងប្រយ័ត្នខ្ពស់បំផុត នៅពេលដែលទារិកាឈ្មោះ Truc Nhi ជួបបញ្ហាបន្តិចបន្តួចក្នុងពេលសណ្ដំ។ សំណាងល្អ ក្នុងរយៈពេលជាង13ម៉ោងនៃការវះកាត់ ទារិកាភ្លោះនេះមិនមានបញ្ហាអ្វីនោះឡើយ ហើយសញ្ញានៃការរស់រានមានជីវិតគឺស្ថិតនៅក្នុង “តំបន់សុវត្ថិភាព”។
វេជ្ជបណ្ឌិតដែលទទួលភារកិច្ចជាអ្នកវះកាត់ផ្ទាល់ ត្រូវពាក់កែវពង្រីក ដើម្បីមើលឱ្យឃើញច្បាស់បំផុត និងដើម្បីធានាសុវត្ថិភាពដល់ទារិកាទាំងនេះ។
ការវះកាត់ដែលនឹងប្ដូរផ្លាស់វាសនារបស់ទារិកាភ្លោះនេះ ត្រូវបានចាប់ផ្ដើមដោយវេជ្ជបណ្ឌិត Truong Quang Dinh នៅវេលាម៉ោង9និង51នាទី។ ក្រោយមក វេជ្ជបណ្ឌិត Tran Van Duong មកពីមន្ទីរពេទ្យ Cho Ray ចាប់ផ្ដើមបើកពោះនិងផ្ដាច់រាងកាយចេញពីគ្នា។ ក្រុមវេជ្ជបណ្ឌិតជំនាញខាងវះកាត់ទូទៅបានចូលមកពិនិត្យគ្រឿងក្នុង និងចាប់ផ្ដើមវះកាត់ចែកពោះវៀនដែលជាប់គ្នាជា2ចំណែកទៅតាមការកំណត់មុននេះ។
នៅវេលាម៉ោង14និង07នាទី ក្រុមវេជ្ជបណ្ឌិតបានទទួលជោគជ័យក្នុងការវះកាត់ផ្ដាច់រាងកាយចេញពីគ្នា។ ទារិកាទាំងក៏ត្រូវបានដាក់នៅក្នុងគ្រែវះកាត់ផ្សេងៗគ្នា ហើយជីវិតដោយឡែក និងប្រកបដោយភាពធម្មតា បានចាប់ផ្ដើមជាផ្លូវការចាប់ពីវិនាទីនេះតទៅ។
ម៉ោង18និង45នាទី ករណីវះកាត់ជាប្រវត្តិសាស្ត្រនេះត្រូវបានបញ្ចប់ជាស្ថាពរ។ ក្រុមវេជ្ជបណ្ឌិតបានវះកាត់ផ្ដាច់រាងកាយ និងបង្កើតអវយវះខាងក្នុងថ្មីមួយចំនួន រួមនឹងការតម្រៀបគ្រឿងក្នុងឡើងវិញ និងដេរភ្ជាប់រាងកាយទាំងស្រុងដោយជោគជ័យ។
ប៉ុន្តែ “រយៈពេលនៃការព្យាបាល និងថែទាំ គឺត្រូវប្រើពេលយូរទៅមុខទៀត” នេះបើតាមវេជ្ជបណ្ឌិត Dinh។ សាស្ត្រាចារ្យ វេជ្ជបណ្ឌិត Tran Dong A ដែលធ្លាប់ធ្វើជាប្រធាននៃការវះកាត់ទារកភ្លោះជាប់គ្នាជាច្រើនករណីនៅវៀតណាម បានវាយតម្លៃខ្ពស់ទៅលើជោគជ័យនៃការវះកាត់លើកនេះផងដែរ៕
ប្រភព៖ សារព័ត៌មានបរទេស
July 16, 2020
កម្ពុជារកឃើញអ្នកផ្ទុកCOVID-19 មួយករណីទៀតហើយនៅព្រឹកនេះ
ក្រសួងសុខាភិបាលកម្ពុជា នាព្រឹកថ្ងៃទី16នេះបានប្រកាសឱ្យដឹងថា បានរកឃើញអ្នកផ្ទុកវីរុសCOVID-19 ចំនួន1នាក់ទៀត ដែលជាករណីនាំចូល។
ករណីថ្មី1នេះគឺជាពលរដ្ឋត្រលប់មកពីប្រទេសអារ៉ាប់ប៊ីសាអូឌីត និងត្រូវបានរកឃើញក្នុងថ្ងៃទី15កក្កដាកន្លងទៅ។ គិតមកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCOVID-19 សរុប166នាក់ ក្នុងនោះអ្នកជំងឺដែលបានជាសះស្បើយមានចំនួន133នាក់់ និងអ្នកកំពុងសម្រាកព្យាបាលនៅមន្ទីរពេទ្យមានចំនួន 33នាក់។

July 16, 2020
រឿងគ្រាប់សណ្តែក និងសុខភាព
អ្នកណាចូលចិត្តញ៉ាំសណ្តែកខ្លះ លើកដៃឡើង! ថ្ងៃនេះយើងមកនាំគ្នានិយាយអំពីរឿងសណ្តែកៗម្តង សរុបថា យើងមកនាំគ្នាស្គាល់អំពីគុណប្រយោជន៍របស់គ្រាប់សណ្តែកដែលយើងញ៉ាំលេងវិញម្តងប្រសើរជាងថា តើវាមានផលដល់រាងកាយយើងយ៉ាងណាខ្លះ?។
សណ្តែកលឿង
ជាធញ្ញជាតិដែលមានសារធាតុអាហារខ្ពស់បំផុតក្នុងចំណោមគ្រាប់ធញ្ញជាតិទាំងអស់ និងអាចយកមកទទួលទានបានច្រើនរូបបែប មិនថាតែជាសណ្តែកបណ្តុះ តៅហ៊ូ យ៉ាអួ ម្សៅ ទឹកសណ្តែក និងទឹកស៊ីអ៊ីវឡើយ។ សណ្តែកលឿងជួយគ្រប់គ្រងអាការដែលពាក់ព័ន្ធនឹងការអស់វដ្តរដូវ ថែមទាំងនៅជួយការពារមហារីកទៀតផង។ នៅក្នុងសណ្តែកលឿងសម្បូរទៅដោយវីតាមីន E ដែលនៅចាំប្រឆាំងអនុមូលឥស្សរៈ និងវីតាមីន B មានតួនាទីក្នុងការថែបំប៉នប្រព័ន្ធប្រសាទ និងជួយរាងកាយតស៊ូនឹងភាពតានតឹងក្នុងអារម្មណ៍។
សណ្តែកហោឡាន់តៅ
ជាសណ្តែកដែលមានច្រើនដោយបរិមាណវីតាមីន B ជួយរក្សាកម្រឹតថាមពល និងសាងសាច់ភ្នាសប្រសាទ និងសាច់ដុំ មានសសៃអាហារខ្ពស់ជួយបញ្ចុះកម្រឹតកូលេស្តេរ៉ូល និងការរំលាយមានប្រសិទ្ធភាព និងថែមទាំងមានវីតាមីន B5 ដែលជួយជំរុញប្រព័ន្ធការពារជំងឺ និងវីតាមីន C ប្រឆាំងអនុមូលឥស្សរៈទៀតផង។
គ្រាប់ស្វាយចន្ទី
ជាប្រភពរបស់វីតាមីន B ដែលជួយព្យាបាលសរសៃប្រសាទ និងសាច់ភ្នាសសាច់ដុំរបស់រាងកាយ រហូតដល់បង្កើនភាពប្រឆាំងនឹងភាពតានតឹងធុញថប់ និងនៅមានសារធាតុរ៉ែសំខាន់សម្រាប់សុខភាពការពារជំងឺ រួមទាំងសារធាតុប្រឆាំងអនុមូលឥស្សរៈស៊ី លីនៀមដែលចាំបាច់ចំពោះការផលិតអ៊ែនទី បឌី និងសង្កសីដែលប្រើសម្រាប់តស៊ូជាមួយវីរុស ទប់ស្កាត់កោសិកាមហារីក ថែមទាំងនៅជួយកាត់បន្ថយកូលេស្តេរ៉ូលបានទៀត។
សណ្តែកអាល់ម៉ន់ដ៍
អាល់ម៉ន់ដ៍ជាប្រភពដែលមានសារធាតុប្រឆាំងអនុមូលឥស្សរៈខ្ពស់ ជួយការពារមហារីក។ នៅក្នុងសណ្តែកអាល់ម៉ន់ដ៍ 100 ក្រាមមានវីតាមីន E 24មីល្លីក្រាម និងថែមទាំងជាប្រភពរបស់សារធាតុរ៉ែកាល់ស្យូមដែលការពារមេរោគវីរុសបានទៀតផង។ សណ្តែកអាល់ម៉ន់ដ៍នៅមាន លេធ្រីល ដែលជឿថាជាសារធាតុផ្សំដែលប្រឆាំងសាច់ដុះបានយ៉ាងមានប្រសិទ្ធភាព ក្រៅពីនេះនៅមានជាតិសង្កសីខ្ពស់ ជួយសាងភាពរឹងមាំដល់ប្រព័ន្ធប្រឆាំងជំងឺ និងធ្វើឱ្យមុខរបួស ឬដំបៅឆាប់ជាសះ។ សណ្តែកអាល់ម៉ន់ដ៍ពេញទៅដោយជាតិខ្លាញ់មិនបង្កកខ្លួនដែលផ្តល់នូវគុណតម្លៃខាងអាហារ និងជួយបញ្ចុះកូលេស្តេរ៉ូលបាន។
សណ្តែក និងជំងឺធាត់
ទោះជាសណ្តែកមានចំណែកប្រកបដែលសំខាន់គឺ ប្រេងក៏ដោយ តែការបរិភោគសណ្តែកដោយប្រកាន់ខ្ជាប់គោលការណ៍ញ៉ាំអាហារឱ្យគ្រប់ 5 ប្រភេទក្រុម និងកំណត់មិនឱ្យបានទទួលថាមពលលើសតម្រូវការនោះ បរិមាណជាតិខ្លាញ់ដែលមាននៅក្នុងសណ្តែក និង fiber ដែលនៅក្នុងសណ្តែកនឹងធ្វើឱ្យអ្នកដែលទទួលទានអាហារឆ្អែត លែងចង់ទទួលទានអាហារផ្សេង។ មានការស្រាវជ្រាវអំពីលទ្ធផលនៃការទទួលទានសណ្តែកអាល់ម៉ន់ដ៍មួយ បានរកឃើញថា ការទទួលទានសណ្តែកនេះមិនធ្វើឱ្យទម្ងន់ ឬកម្រឹតកូលេស្តេរ៉ូលក្នុងឈាមកើនឡើងនោះទេ ដោយសារតែជាតិខ្លាញ់មួយផ្នែកមិនត្រូវបានបឺតជ្រាបយកឡើយ។
តើយើងនឹងបង្កើនការបរិភោគសណ្តែកយ៉ាងណាបាន?
ការបរិភោគសណ្តែកច្រើនល្មមគ្រប់គ្រាន់នឹងជួយការពារមិនឱ្យកើតជំងឺធាត់ និងជំងឺបេះដូង ដូច្នេះការរៀបចំផែនការទទួលទានអាហារពពួកសណ្តែកនេះមានភាពចាំបាច់ ទាំងអស់នេះគឺដើម្បីការពារមិនឱ្យធាត់ ដោយយើងអាចញ៉ាំសណ្តែកជាអាហារពេលទំនេរ។ យើងចាត់ទុកសណ្តែកជាអាហារដែលផ្តល់ប្រូតេអ៊ីន ដូច្នេះបើទទួលទានអាហារពពួកសណ្តែក ត្រូវតែបន្ថយអាហារពពួកសាច់សត្វ បន្ថយជាតិខ្លាញ់ដែលមិនចាំបាច់ ចៀសវាងអាហារចៀនបំពង និងអាហារដែលមានខ្ទិះ។
នោះគឺមានន័យថា ការទទួលទានសណ្តែក ឬសូម្បីតែការទទួលទានអ្វីគ្រប់យ៉ាងក៏ដោយ គួរតែស្ថិតនៅក្នុងភាពសមល្មម ញ៉ាំក្នុងបរិមាណដែលសមរម្យ វានឹងផ្តល់ប្រយោជន៍ខ្ពស់បំផុត តែបើទទួលទានច្រើនជ្រុលពេកនិងធ្វើឱ្យមានគុណវិបត្តិហ្នឹងឯង៕
July 15, 2020
អឺរ៉ុបឱ្យលុយទៅប្រជាជនដែលជិះកង់ ដើម្បីកាត់បន្ថយផលប៉ះពាល់នៃ Covid-19 និងបរិស្ថាន
ប្រទេសជាច្រើននៅអឺរ៉ុប បានចំណាយលុយឱ្យប្រជាជនដែលជិះកង់ទៅធ្វើការ ឬប្រើប្រាស់ក្នុងជីវភាពប្រចាំថ្ងៃដើម្បីកាត់បន្ថយផលប៉ះពាល់នៃបរិស្ថាន និងកាត់បន្ថយការរីករាលដាលនៃជំងឺ Covid-19។
វេទិកាសេដ្ឋកិច្ចពិភពលោកបានបញ្ជាក់ថា នៅទីក្រុងប៉ារីស រដ្ឋបានផ្តល់លុយឱ្យប្រជាជនណាដែលជិះកង់ ដោយសារតែការធ្វើបែបនេះ នឹងអាចកាត់បន្ថយការបំពុលខ្យល់ដែលកើតចេញពីឥន្ធនៈ និងអាចកាត់បន្ថយការប្រើប្រាស់មធ្យោបាយធ្វើដំណើររួម ដូចជាការជិះរថយន្តក្រុង និងជិះរថភ្លើងជាដើម។ ការធ្វើបែបនេះត្រូវបានគេជឿថាអាចជួយបានមួយផ្នែកធំក្នុងយុទ្ធនាការទប់ស្កាត់ការឆ្លងរលកទី2 នៃជំងឺ Covid-19 ព្រោះមនុស្សម្នាក់ៗចាប់ផ្តើមប្រើប្រាស់មធ្យោបាយផ្ទាល់ខ្លួន ហើយកាត់បន្ថយការជួបជុំតាមរយៈមធ្យោបាយធ្វើដំណើររួម។
បន្ថែមពីលើនេះដើម្បីលើកទឹកចិត្តឱ្យប្រជាជនចាប់ផ្តើមជិះកង់សារជាថ្មី រដ្ឋាភិបាលលើកទឹកចិត្តដោយផ្តល់ថវិកាប្រមាណ 50អឺរ៉ូ ដល់អ្នកទាំងឡាយណាដែលយកកង់ទៅជួសជុលសម្រាប់ប្រើប្រាស់ឡើងវិញ។ ទន្ទឹមនឹងនេះដែរ តាមដងផ្លូវសាធារណៈក៏មានការតម្លើងចំណតសម្រាប់កង់កាន់តែច្រើនឡើងៗ ដើម្បីបង្កើនភាពងាយស្រួលសម្រាប់ប្រជាជនក្នុងទីក្រុងផងដែរ៕
July 15, 2020
រដ្ឋាភិបាលកំណត់ថ្ងៃឈប់សម្រាកច្បាស់ហើយសម្រាប់សងបុណ្យចូលឆ្នាំថ្មី
ដោយសារតែការរីករាលដាលនៃជំងឺ Covid-19 រដ្ឋាភិបាលកម្ពុជបានសម្រេចផ្អាកមិនឱ្យប្រារព្ធពិធីបុណ្យចូលឆ្នាំថ្មីដោយឱ្យបុគ្គលិកទាំងរដ្ឋ និងឯកជនធ្វើការជាធម្មតា រង់ចាំស្ថានភាពធូរស្រាលទើបសងវិញចំនួន 5ថ្ងៃ។
រហូតមកដល់ពេលនេះ សម្តេចនាយករដ្ឋមន្ត្រី ហ៊ុន សែន បានប្រកាសជាផ្លូវការហើយថាយើងកំណត់ថ្ងៃឈប់សម្រាកសងបុណ្យចូលឆ្នាំ ចំនួន5ថ្ងៃ គឺចាប់ពីថ្ងៃទី17 ខែសីហា រហូតដល់ថ្ងៃទី21 ខែសីហា ឆ្នាំ2020។ តែទោះបីជាយ៉ាងនេះក៏ដោយ រដ្ឋាភិបាលបានស្នើឱ្យក្រសួងសុខាភិបាល ក្រសួងទេសចរណ៍ ក្រសួងសាធារណការ និងដឹកជញ្ជូន អាជ្ញាធរដែនដី ព្រមទាំងក្រសួង-ស្ថាប័នពាក់ព័ន្ធសំខាន់ៗ សហការ និងពង្រឹងការអនុវត្តវិធានការការពារសុវត្ថិភាព វិធានការសុខាភិបាល និងអនាម័យ ព្រមទាំងធ្វើការផ្សព្វផ្សាយ អប់រំ និងណែនាំប្រជាជន ក៏ដូចជា ម្ចាស់អាជីវកម្ម ដោយតម្រូវឱ្យអនុវត្តដាច់ខាតតាមគោលការណ៍របស់ក្រសួងសុខាភិបាលដើម្បីកាត់បន្ថយហានិភ័យ នៃការឆ្លងរាលលជំងឺ Covid-19 នៅក្នុងអំឡុងពេលនៃថ្ងៃឈប់សម្រាក។
សម្តេចតេជោ នាយករដ្ឋមន្ត្រីក៏បានបញ្ជាក់ផងដែរថា ការជ្រើសរើសពេលវេលាឈប់សម្រាក នៅចុងខែក្រោយបែបនេះ គឺទុកពេលវេលាឱ្យក្រសួងសុខាភិបាល និងម្ចាស់សណ្ឋាគារ ផ្ទះសំណាក់ជាដើម រៀបចំរចនាសម្ព័ន្ធ និងប្រព័ន្ធការពារសុវត្ថិភាពសុខាភិបាលទុកជាមុន៕
July 14, 2020
កម្ពុជារកឃើញអ្នកផ្ទុកវីរុសCOVID-19ចំនួន9នាក់បន្ថែមទៀតនៅថ្ងៃនេះ
ក្រសួងសុខាភិបាលកម្ពុជាបានប្រកាសនៅព្រឹកនេះ (14កក្កដា) ថា បានរកឃើញអ្នកផ្ទុកវីរុសCOVID-19 ចំនួន9នាក់បន្ថែមទៀត ដែលនេះនាំឱ្យតួលេខអ្នកឆ្លងវីរុសCOVID-19 ដែលបានរកឃើញនៅកម្ពុជា បានកើនឡើងដល់165នាក់។
ក្រសួងសុខាភិបាលបានបញ្ជាក់ថា អ្នកផ្ទុកវីរុសទាំង9នាក់នេះគឺសុទ្ធតែជាករណីនាំចូល និងបានធ្វើដំណើរពីប្រទេសអារ៉ាប់ ដោយឆ្លងកាត់តាមប្រទេសម៉ាឡេស៊ី។
ក្រុមអ្នកជំងឺទាំង9នាក់នេះ មានជាប់ទាក់ទិននឹងករណីអ្នកជំងឺCOVID-19 ចំនួន15នាក់ដែលត្រូវបានរកឃើញកាលពីប៉ុន្មានថ្ងៃមុន ដែលពួកគេធ្វើដំណើរតាមជើងយន្តហោះជាមួយគ្នា។ ដូច្នេះ អ្នកផ្ទុកវីរុសដែលត្រូវបានរកឃើញក្នុងជើងហោះហើរមកពីអារ៉ាប់ បានកើនដល់24នាក់។
គិតមកដល់ពេលនេះ កម្ពុជាបានរកឃើញអ្នកផ្ទុកវីរុសCOVID-19 សរុបចំនួន165នាក់ និងជាសះស្បើយចំនួន133នាក់ ខណៈ32នាក់កំពុងសម្រាកព្យាបាលនៅមន្ទីរពេទ្យ៕
July 14, 2020
ជិះជណ្ដើរប្រអប់តែ1នាទីសោះ ចម្លងCOVID-19 ទៅអ្នកផ្សេងបាន71នាក់
ស្ត្រីជនជាតិចិនម្នាក់នៅសហរដ្ឋអាមេរិកមានផ្ទុកវីរុសCOVID-19 ប៉ុន្តែមិនមានរោគសញ្ញា បានចម្លងវីរុសនេះទៅមនុស្សចំនួន71នាក់នៅក្នុងរយៈពេលត្រឹមតែ60វិនាទីនៃការជិះជណ្ដើរប្រអប់។
សេចក្ដីលម្អិតអំពីរឿងរ៉ាវដ៏គួរភ្ញាក់ផ្អើលនេះ ត្រូវបានបង្ហើបឱ្យដឹងនៅក្នុងសេចក្ដីប្រកាសអំពីលទ្ធផលនៃការសិក្សាស្រាវជ្រាវមួយដែលធ្វើឡើងដោយមជ្ឈមណ្ឌលគ្រប់គ្រងរោគឆ្លងនៃសហរដ្ឋអាមេរិក (CDC)។ បញ្ហានេះបាននាំឱ្យមានការព្រួយបារម្ភជាខ្លាំងទាក់ទិននឹងអ្នកផ្ទុកវីរុសប៉ុន្តែគ្មានរោគសញ្ញា រួមនឹងការជិះជណ្ដើរប្រអប់។
ស្ត្រីម្នាក់ខាងលើនេះបានចេញពីសហរដ្ឋអាមេរិក ត្រលប់ទៅផ្ទះរបស់ខ្លួននៅឯខេត្ត Heilongjiang ប្រទេសចិនកាលពីថ្ងៃទី19មីនា។ បើទោះជាមិនមានរោគសញ្ញា ប៉ុន្តែស្ត្រីម្នាក់នេះនៅតែនៅដាច់ដោយឡែកពីគេឯង។
ការធ្វើតេស្តបន្ទាប់នោះក៏បានរកឃើញថា នាងមានផ្ទុកវីរុសCOVID-19។ 3សប្ដាហ៍ក្រោយមក មនុស្សម្នាក់ក្នុងចំណោមអ្នកជិតខាង និងមនុស្សចំនួន4នាក់ផ្សេងទៀតដែលបានទាក់ទងផ្ទាល់ជាមួយនឹងអ្នកជិតខាង ក៏បានឆ្លងវីរុស។
ស្ត្រីម្នាក់ដែលទើបមកពីសហរដ្ឋអាមេរិកនោះ និងអ្នកជិតខាងទាំងនោះ មិនបានទាក់ទងផ្ទាល់នឹងគ្នានោះទេ ប៉ុន្តែពួកគេប្រើប្រាស់ជណ្ដើរប្រអប់តែមួយនៅក្នុងអំឡុងពេលខុសៗគ្នា។ ស្ត្រីមកពីសហរដ្ឋអាមេរិកជិះជណ្ដើរប្រអប់តែម្នាក់ឯងក្នុងរយៈពេលប្រហែល60វិនាទី ប៉ុន្តែមិនបានជួបអ្នកណាម្នាក់នោះទេ។
យោងតាមការស្រាវជ្រាវរបស់ CDC (អាមេរិក) អ្នកជិតខាងរបស់ស្ត្រីមកពីអាមេរិក ប្រហែលជាបានឆ្លងវីរុសនៅពេលប្រើប្រាស់ជណ្ដើរប្រអប់ក្នុងអគារដែលពួកគេនៅជាមួយគ្នា ក្រោយពីស្ត្រីមកពីអាមេរិកបានប្រើប្រាស់ជណ្ដើរនោះ។ CDC របស់សហរដ្ឋអាមេរិកយល់ថា ការឆ្លងរាលដាលនេះអាចកើតឡើងនៅពេលអ្នកជិតខាងបានប៉ះទៅលើផ្ទៃអ្វីមួយនៅក្នុងជណ្ដើរប្រអប់ ដូចជាជញ្ជាំង ឬគ្រាប់ចុចលេខរបស់ជណ្ដើរជាដើម។
ជណ្ដើរប្រអប់គឺជាទីកន្លែងដ៏សុខសាន្តសម្រាប់ COVID-19 រស់នៅ និងចម្លងទៅអ្នកផ្សេង
ក្រៅពីអ្នកដែលបានរៀបរាប់ខាងលើ មិនមានអ្នកណាម្នាក់ផ្សេងទៀតក្នុងអគារនោះបានឆ្លងវីរុសនោះទេ ប៉ុន្តែ ការស្រាវជ្រាវបន្ទាប់មក ក៏បានបង្ហាញថា អ្នកជិតខាងរបស់ស្ត្រីមកពីអាមេរិក គឺជាអ្នកជំងឺទី0នៅក្នុងក្រុមមនុស្ស71នាក់ដែលបានឆ្លងវីរុស។
ក្រុមអ្នកស្រាវជ្រាវបានឱ្យដឹងថា “លទ្ធផលនៃការស្រាវជ្រាវរបស់យើងបានបញ្ជាក់ថា មនុស្សម្នាក់ដែលមានផ្ទុកវីរុស អាចបង្កការឆ្លងរាលដាលនៅក្នុងសង្គម”។ អ្នកស្រាវជ្រាវបន្តថា ជណ្ដើរប្រអប់គឺជាទីកន្លងដ៏ល្អសម្រាប់ការចម្លងវីរុសCOVID-19 ព្រោះថា វាជាកន្លែងតូចចង្អៀត នាំឱ្យវីរុសដែលមាននៅក្នុងកម្ទេចទឹកតូចៗ ងាយស្រួលក្នុងការរក្សាជីវិត និងតោងជាប់ជញ្ជាំងជណ្ដើរប្រអប់ បន្ទាប់ពីអ្នកផ្ទុកវីរុសបានក្អក កណ្ដាស់ ឬនិយាយគ្នា។
ការស្រាវជ្រាវកន្លងមកបានបញ្ជាក់ថា COVID-19 អាចតោងជាប់នឹងផ្ទៃរបស់វត្ថុអ្វីមួយ ហើយរស់បានជាច្រើនថ្ងៃ ពិសេសគឺផ្ទៃរបស់ដែកអ៊ីណុក ឬជ័រជាដើម៕
ប្រភព៖ The Sun
July 14, 2020
ជិត575,000នាក់ស្លាប់ដោយសារCOVID-19! WHO ថាប្រទេសជាច្រើនកំពុងដើរខុសទិសដៅក្នុងការទប់ស្កាត់វីរុស
ពិភពលោកបានរកឃើញអ្នកផ្ទុកវីរុសCOVID-19 ជាង13.2លាននាក់ និងអ្នកស្លាប់ជិត575,000នាក់ ខណៈដែល WHO ព្រមានថា ស្ថានភាពជាក់ស្ដែង អាចអាក្រក់ជាងនេះ។
ក្នុងរយៈពេល24ម៉ោងកន្លងទៅនេះ ពិភពលោកទាំងមូលបានរកឃើញអ្នកផ្ទុកវីរុសCOVID-19 ចំនួន193,793នាក់ និងអ្នកស្លាប់ចំនួន3,754នាក់ ធ្វើឱ្យតួលេខអ្នកជំងឺសរុបកើនដល់13,216,112នាក់ និងអ្នកស្លាប់ក៏កើនដល់574,753នាក់។ អ្នកជំងឺដែលបានជាសះស្បើយ បានកើនដល់7,683,112នាក់។
សហរដ្ឋអាមេរិក គឺជាសម្បុកវីរុសធំជាងគេបង្អស់ក្នុងពិភពលោក ដោយចំនួនអ្នកជំងឺសរុបបានកើនដល់3,474,296នាក់ ខណៈចំនួនអ្នកស្លាប់កើនដល់138,182នាក់។ អ្នកជំងឺថ្មី និងអ្នកស្លាប់ថ្មី មានចំនួនបន្តបន្ទាប់គឺ 62,970នាក់ និង409នាក់។
តាមពីក្រោយសហរដ្ឋអាមេរិក គឺប្រទេសប្រស៊ីល ដោយមានអ្នកជំងឺសរុប1,884,967នាក់ និងអ្នកស្លាប់សរុប72,833នាក់។ ក្នុងរយៈពេល24ម៉ោងចុងក្រោយនេះ ប្រេស៊ីលរកឃើញអ្នកជំងឺ18,791នាក់ និងអ្នកស្លាប់682នាក់។
ចំណែកឥណ្ឌាវិញ គឺជាប្រទេសដែលបានរកឃើញអ្នកផ្ទុកវីរុសច្រើនជាងគេលំដាប់ទី3ក្នុងពិភពលោក។ ប្រទេសនេះមានអ្នកជំងឺសរុប878,254នាក់ និងអ្នកស្លាប់សរុប23,174នាក់។
ប្រធានអង្គការសុខភាពពិភពលោក (WHO) លោក Tedros Adhanom Ghebreyesus កាលពីម្សិលមិញបានព្រមានថា ស្ថានភាពវិបត្តិCOVID-19 នឹងកាន់តែអាក្រក់ឡើងៗ។ លោកថ្លែងថា “ខ្ញុំសូមនិយាយត្រង់ៗថា មានប្រទេសច្រើនណាស់ដែលកំពុងដើរខុសទិសដៅ។ COVID-19 នៅតែជាសត្រូវលំដាប់ទី1របស់ពិភពលោក។ បើសិនជាគោលការណ៍ជាមូលដ្ឋានមិនត្រូវបានគោរពតាម នោះស្ថានភាពមហារោគរាតត្បាតនឹងកាន់តែអាក្រក់ឡើងៗពីមួយថ្ងៃទៅមួយថ្ងៃជាក់ជាមិនខាន”៕
ប្រភព៖ សារព័ត៌មានបរទេស
July 14, 2020