Category: សុខភាព

នៅស្ងៀមៗ ហូរឈាមច្រមុះ អាចមានន័យពីសញ្ញាអាក្រក់របស់ជំងឺដែលបង្កប់នៅខាងក្នុង
ហូរឈាមច្រមុះបណ្តាលមកពីអ្វី? បើអ្នកណានៅរកមូលហេតុដែលឈាមហូរចេញពីច្រមុះមិនទាន់ឃើញ សូមកុំធ្វើព្រងើយឱ្យសោះ ព្រោះអាការហូរឈាមច្រមុះដោយគ្មានមូលហេតុនេះអាចប្រាប់ពីសភាវរបស់ជំងឺ ឬភាពខុសប្រក្រតីរបស់រាងកាយក៏អាចថាបានដែរ បើអ៊ីចឹងយើងនាំគ្នាមកមើលថា ការពិតទៅការនៅសុខៗហូរឈាមច្រមុុះហ្នឹងបណ្តាលមកពីអ្វីខ្លះ?។
1. គ្រុនផ្តាសាយ អាការប្រតិកម្ម ឬអាការរលាកផ្សេងៗ
អាការនេះអាចបណ្តាលមកពីការបែកសរសៃឈាមតូចៗនៅក្នុងច្រមុះ ដោយការញើសសំបោខ្លាំងជ្រុលពេក ឬអាការរលាកផ្សេងៗនៅខាងក្នុងច្រមុះ ដែលពេលព្យាបាលអាការទាំងនោះឱ្យជាសះទៅវិញហើយនោះ ឈាមក៏នឹងលែងហូរចេញមកទៀតដែរ។
2. បញ្ហាសុខភាព
American Heart Association បានបង្ហើបឱ្យដឹងថា បើសិនអាការហូរឈាមតាមច្រមុះរបស់លោកអ្នកចេញមកព្រមជាមួយអាការឈឺក្បាល ធ្ងន់ក្បាលយ៉ាងខ្លាំង ដកដង្ហើមញាប់ និងមានអាការញ័រដើមទ្រូងនោះ អាចបង្ហាញអំពីសភាវជំងឺបេះដូង ជំងឺថ្លើម រោគក្រលៀន រោគពិសសុរារ៉ាំរ៉ៃ ឬជំងឺដែលពាក់ព័ន្ធនឹងប្រព័ន្ធឈាមផ្សេងៗ ដូចជា ជំងឺលើសឈាម និងជំងឺបេះដូង ព្រោះសភាវរបស់ជំងឺទាំងនេះអាចធ្វើឱ្យកើតសម្ពាធឈាមឡើងខ្ពស់លើសពីប្រក្រតី រហូតដល់ឈាមត្រូវតែហូរចេញមកតាមរន្ធច្រមុះដើម្បីបញ្ចុះសម្ពាធឈាមទាំងនោះ។ អាការហូរឈាមច្រមុះបែបនេះ មិនគួរឱ្យទុកចិត្តជាទីបំផុត ព្រោះមានន័យពីអាការរបស់ជំងឺដែលកំពុងកើតចាប់ផ្តើមកម្រើកឡើងហើយ។
3. ធាតុអាកាសដែលស្ងួតជ្រុលខ្លាំងពេក
ធាតុអាកាសដែលស្ងួតរហូតជ្រុលពេកអាចធ្វើឱ្យសរសៃឈាមតូចៗនៅក្នុងច្រមុះឡើងស្រួយ និងបែក នាំមកនូវឈាមដែលហូរចេញមកក្រៅឱ្យឃើញ ដែលយើងអាចការពារបានដោយការបន្ថែមសំណើមនៅក្នុងអាកាស ដោយនៅពេលគេងចូរយកទឹកមួយផ្តឹលមកដាក់នៅលើតុក្បាលដំណេកជិតក្បាល ឬទទួលទានផ្លែឈើដែលមានវីតាមីន C ខ្ពស់ ដូចជា ផ្លែក្រូច ត្របែក ប៉េងប៉ោះ ឬម្នាស់ជាប្រចាំ វាអាចជួយការពារការហូរឈាមច្រមុះបាន។
4. ថ្នាំប្រភេទខ្លះ
ជាពិសេសថ្នាំបន្ថយការបង្កកខ្លួនរបស់ឈាម ឬថ្នាំប្រឆាំងការលាកដែលអាចជាមូលហេតុរបស់អាការហូរឈាមច្រមុះបាន។
5. ការក្រហាយផ្សារ ឬអាការរងរបួសក្នុងបរិវេណសាច់ភ្នាសច្រមុះ
មិនថាតែការខ្វេះច្រមុះ ញីច្រមុះខ្លាំងៗ ការញើសសំបោ ឬការប្រែប្រួលរបស់អាកាសធាតុយ៉ាងឆាប់រហ័ស ដូចជា ខណៈពេលជិះយន្តហោះ ឬកប៉ាល់មុជទឹក ជាដើម។ លក្ខណៈបែបនេះអាចធ្វើឱ្យកើតអាការហូរឈាមច្រមុះបានងាយជាងប្រក្រតី។
ការបថមព្យាបាលចំពោះអ្នកដែលហូរឈាមច្រមុះ
1 . ឱ្យអ្នកជំងឺងើយមុខឡើង ឬឱនមុខចុះខ្លាំង ហើយយកដៃច្របាច់ច្រមុះឱ្យយូរប្រមាណជា 5 – 10 នាទី ក្នុងអំឡុងពេលនោះឱ្យអ្នកជំងឺដកដង្ហើមវែងៗតាមមាត់ជំនួសសិន និងអាចដាក់កន្សែងត្រជាក់ ឬថង់ទឹកកកនៅលើក្តោងច្រមុះផងក៏បាន។
2 . ក្រោយពីមានហូរឈាមច្រមុះក្នុងរយៈពេល 24 – 48 ម៉ោងដំបូង គួរចៀសវាងការញើសសំបោខ្លាំងៗ ការកេះ ឬខ្វេះរន្ធច្រមុះ ការបញ្ចេញកម្លាំងខ្លាំងៗ ការហាត់ប្រាណខ្លាំងៗធ្ងន់ៗ ឬធ្វើកិច្ចការងារណាដែលអាចកើតផលប៉ះពាល់ដល់បរិវេណច្រមុះគ្រប់ប្រភេទ។
3 . នៅពេលឈាមឈប់ហូរហើយ គួរតែគេងសម្រាក ដោយដាក់ក្បាលឱ្យខ្ពស់ បន្ទាប់ពីនោះយកទឹកកកមកដាក់ស្អំនៅលើថ្ងាស់ ឬបំពង់ក ឬមិនទេក៏អាចបៀមទឹកកក ដើម្បីឱ្យឈាមឈប់ហូរក៏បាន តែការស្អំ ឬបៀមទឹកកកនេះគួរប្រើពេលវេលាត្រឹមតែ ម្តងៗ 10 នាទីបានហើយ ដោយសម្រាក 10 នាទី បន្ទាប់មកសឹមដាក់ស្អំ ឬបៀមទឹកកកជាថ្មីម្តងទៀត។
4 . ក្នុងករណីដែលធ្វើការបថមព្យាបាលហើយ តែឈាមនៅតែមិនឈប់ហូរ គួរតែប្រញាប់នាំអ្នកជំងឺទៅមន្ទីពេទ្យភ្លាមតែម្តង ភាពខុសប្រក្រតីខាងរាងកាយ ដូចជាការហូរឈាមច្រមុះនេះជាដើម អាចបញ្ជាក់អំពីសភាវជំងឺដង្កាត់របស់រាងកាយបានច្រើនយ៉ាងណាស់ ដូច្នេះគួរតែនាំគ្នាយកចិត្តទុកដាក់មើលថែទាំសុខភាព កុំភ្លេចភ្លាំងឱ្យសោះ ទាំងអស់នេះគឺដើម្បីសុខភាពដ៏ល្អ និងរាងកាយដ៏រឹងប៉ឹងមាំមួន ប្រាសចាករោគភ័យរបស់យើងទាំងអស់គ្នា៕
July 20, 2020
ថៅកែមន្ទីរពេទ្យ លក់លិខិតបញ្ជាក់ “លទ្ធផលអវិជ្ជមាននឹងCOVID-19 ក្លែងក្លាយ” ចំណេញប្រាក់រាប់សែនដុល្លារ
សារព័ត៌មាន New York Times កាលពីថ្ងៃទី16កក្កដា បានចេញផ្សាយថា អាជ្ញាធរប្រទេសបង់ក្លាដែស ទើបតែបានចាប់ខ្លួនម្ចាស់មន្ទីរពេទ្យម្នាក់ ទាក់ទិននឹងការលក់លទ្ធផលអវិជ្ជមាននឹង COVID-19 ក្លែងក្លាយរាប់ពាន់សន្លឹកទៅឱ្យអ្នកដែលមានតម្រូវការ។
ថៅកែម្នាក់របស់មន្ទីរពេទ្យមួយនៅប្រទេសបង់ក្លាដែស ត្រូវបានចាប់ខ្លួនពីបទបន្លំអតិថិជន ដោយសារបានចេញលទ្ធផលអវិជ្ជមាននៃការធ្វើតេស្តCOVID-19 ដើម្បីបោកប្រាស់អ្នកជំងឺ និងទទួលប្រាក់ចំណេញប្រមាណជា350,000ដុល្លារអាមេរិក។ ករណីនេះបានធ្វើឱ្យប៉ះពាល់យ៉ាងធ្ងន់ធ្ងរចំពោះទំនុកចិត្តរបស់ប្រជាជនទៅលើវិស័យសុខាភិបាលនៃប្រទេសនេះ។
Ashique Billah ដែលជាអ្នកនាំពាក្យនៃប៉ូលិសបង់ក្លាដែស បានឱ្យដឹងថា Mohammad Shahed គឺជាម្ចាស់បណ្ដាញមន្ទីរពេទ្យ Regent នៅក្នុងរដ្ឋធានី Dhaka។ ថៅកែមន្ទីរពេទ្យរូបនេះត្រូវបានចាប់ខ្លួននៅពេលកំពុងព្យាយាមរកវិធីឆ្លងទន្លេគេចខ្លួនទៅកាន់ប្រទេសឥណ្ឌា។
អ្នកនាំពាក្យខាងលើបានបញ្ជាក់ថា “មន្ទីរពេទ្យរបស់គាត់នោះបានធ្វើតេស្តរកវីរុសCOVID-19 ចំនួន10,500លើក ក្នុងនោះមានលទ្ធផលចំនួន4,200គឺត្រឹមត្រូវ ចំណែកលទ្ធផលចំនួន6,300ផ្សេងទៀតត្រូវបានប្រគល់ឱ្យអតិថិជន ប៉ុន្តែមិនបានធ្វើតេស្តនោះទេ”។
យោងតាម New York Times លិខិតបញ្ជាក់លទ្ធផលអវិជ្ជមានក្លែងក្លាយនេះ ត្រូវបានលក់ក្នុងតម្លៃ59ដុល្លារក្នុងមួយច្បាប់។
ម្ចាស់មន្ទីរពេទ្យនេះក៏ត្រូវបានចោទប្រកាន់ដែរថា បានយកថ្លៃសេវាធ្វើតេស្ត និងព្យាបាលអ្នកជំងឺCOVID-19 បើទោះលោកធ្លាប់បានយល់ព្រមជាមួយរដ្ឋាភិបាលថា មន្ទីរពេទ្យនានារបស់លោកនៅក្នុងទីក្រុង Dhaka នឹងព្យាបាលដោយមិនគិតថ្លៃ។
សូមបញ្ជាក់ថា Shahed មិនមែនជាមនុស្សដំបូងគេដែលត្រូវបានចាប់ខ្លួននៅបង់ក្លាដែស ដោយសារសកម្មភាពបន្លំផ្នែកសុខាភិបាលនៅក្នុងវិបត្តិសុខភាពនេះឡើយ។ កាលពីសប្ដាហ៍មុន ម្ចាស់គ្លីនិកឯកជនដែលផ្ដល់សេវាកម្មធ្វើតេស្តរកវីរុសCOVID-19 មួយកន្លែងផ្សេងទៀត ក៏ត្រូវបានចាប់ខ្លួនពីបទចេញលិខិតបញ្ជាក់ការធ្វើតេស្តCOVID-19 ដោយមិនបានធ្វើតេស្តអ្វីសោះ។
ក្រុមអ្នកជំនាញការមានការព្រួយបារម្ភថា អំពើបោកប្រាស់នេះអាចធ្វើឱ្យប្រជាជនបង់ក្លាដែសមិនបានទទួលការធ្វើតេស្តរកវីរុសCOVID-19 ដោយត្រឹមត្រូវ ដែលនេះនឹងនាំឱ្យមានហានិភ័យខ្ពស់ចំពោះការឆ្លងវីរុសដែលពួកគេនឹកស្មានមិនដល់។
រាប់ចាប់ពីខែមីនារហូតមកដល់បច្ចុប្បន្ន រដ្ឋាភិបាលបង់ក្លាដែស បានធ្វើតេស្តរកវីរុសCOVID-19 ជាមធ្យមចាប់ពី13,000ដល់17,000នាក់ក្នុង1ថ្ងៃៗ ប៉ុន្តែតួលេខនេះនៅមានកម្រិតទាបនៅឡើយសម្រាប់ប្រទេសដែលមានប្រជាជនជាង168លាននាក់មួយនេះ។
យោងតាមស្ថិតិរបស់សាកលវិទ្យា Johns Hopkins មនុស្សចំនួនជាង193,500នាក់នៅបង់ក្លាដែស បានឆ្លងCOVID-19 ក្នុងនោះមានជាង2,400នាក់បានស្លាប់ដោយសារវីរុសនេះ។ ប៉ុន្តែមានការសង្ស័យថា តួលេខពិតប្រាកដ អាចខ្ពស់ជាងនេះ ដោយសារសមត្ថភាពនៃការធ្វើតេស្តរបស់ប្រទេសនេះ នៅមានកម្រិតនៅឡើយ៕
ប្រភព៖ New York Times
July 20, 2020
ដឹងឬទេ បន្លែ និង ផ្លែឈើអ្វីខ្លះ រឹតតែញ៉ាំ រឹតតែក្តៅ?
ប្រធានបទសន្ទនានៅក្នុងក្រុមមិត្តភ័ក្តិមួយរយៈនេះ យ៉ាងណាៗក៏ចៀសមិនផុតពីរឿងធាតុអាកាសក្តៅហប់នៅក្នុងប្រទេសយើងឡើយ ជាពិសេសក្នុងអំឡុងពេលសម្រាកថ្ងៃត្រង់ ដែលយើងគ្រប់គ្នាត្រូវដើរទៅរកកន្លែងលក់បាយ អ្នកខ្លះចៀសវាងពីការប្រយុទ្ធជាមួយកម្តៅថ្ងៃដ៏ក្តៅចង់ឆេះដោយការដាក់បាយពីផ្ទះមកញ៉ាំ ឬទិញអាហារត្រៀមសម្រាប់ពេលថ្ងៃត្រង់ទុកតាំងពីព្រឹក តែសម្រាប់អ្នកដែលគ្មានជម្រើស ឬត្រៀមមិនទាន់ ក៏ត្រូវតែញើសជោកខ្លួន ក្តៅហប់រហូតមុខឡើងក្រហម រឹតតែញ៉ាំអាហារក្តៅចូលទៅទៀតផងនោះសឹងតែនិយាយមកចេញអណ្តាតភ្លើងឯណោះ។
ហើយនឹងរឹតតែយ៉ាប់ខ្លាំងទៅទៀតបើសិនជាធាតុអាកាសខាងក្រៅក្តៅស្រាប់ហើយ យើងថែមទាំងទទួលទានអាហារដែលប្រកបដោយបន្លែផ្លែឈើដែលមានឬទ្ធិក្តៅចូលទៅទៀតផងនោះ ដល់អ៊ីចឹងវានឹងរឹតតែក្តៅទាំងខាងក្នុង និងខាងក្រៅតែម្តង។ តើមានបន្លែ និងផ្លែឈើប្រភេទណាខ្លះដែលក្នុងអំឡុងពេលធាតុអាកាសក្តៅៗបែបនេះ យើងគួរតែផ្អាកញ៉ាំសឹន?
បន្លែដែលមានឬទ្ធិក្តៅ
មើមខ្ជាយ ស្លឹកម្រះព្រៅ ស្លឹកគុយឆាយ ខ្ទឹមស ខ្ញី ម្តេង រមៀត ស្លឹកជីនាងវង ម្ទេស ម្រេច គ្រឿងទេស។
ផ្លែឈើដែលមានឬទ្ធិក្តៅ
ផ្លែចេក ផ្លែប៉ាស្យុង ផ្លែខ្នុរទុំ សាវម៉ាវ ត្របែក ធុរេន ទទឹម ទៀប ព្នៅ មៀន ឡុងកុង ម៉ាក់ប្រាង ស្វាយទុំ។
មូលហេតុដែលត្រូវទទួលទានបន្លែផ្លែឈើទាំងអស់នេះឱ្យតិចជាងមុន
ដោយសារតែបន្លែផ្លែឈើទាំងនោះ ពេលខ្លះអាចធ្វើឱ្យយើងញ៉ាំហើយមានអារម្មណ៍ថាហឹរ រស់ជាត់ផ្អែមខ្លាំង រហូតធ្វើឱ្យយើងរឹតតែស្រេកទឹកខ្លាំងឡើង ក្រៅពីនេះបើទទួលទានអាហារហឹរ ប៉ះធាតុអាកាសក្តៅ អាចធ្វើឱ្យរាងកាយបាត់បង់ញើសច្រើនជាងប្រក្រតី បើសិនមិនញ៉ាំទឹកឱ្យគ្រប់គ្រងទេនោះ អាចនឹងធ្វើឱ្យរាងកាយខ្វះជាតិទឹកបាន។
រដូវក្តៅ ញ៉ាំអាហារដែលមានឬទ្ធិត្រជាក់
បើចង់សម្រួលតុល្យភាពរបស់រាងកាយមិនឱ្យក្តៅតាមធាតុអាកាសខ្លាំងពេក គួរទទួលទានអាហារដែលមានឬទ្ធិត្រជាក់ក្នុងបរិមាណដែលសមរម្យ។
បន្លែដែលមានឬទ្ធិត្រជាក់
ផ្កាខាត់ណា ស្ពៃចង្កឹះ ស្ពៃបូកគោ សាលាដ ស្នៀតពោត ស្លឹកតើយ សណ្តែកបណ្តុះ ព្រលឹត ប្រខូលី ត្រប់ ម្រុំ ត្រឡាច។
ផ្លែឈើដែលមានឬទ្ធិត្រជាក់
ស្រកានាគ បំពេញរាជ ត្រសក់ស្រូវបារាំង ជម្ពូ ឈើរី ឥឡឹក ត្រសក់ស្រូវ មង្ឃុត កន្ទួត ដូងខ្ចី ទឹកក្រូចឆ្មារ ម្នាស់ សារី ផ្លែប៉ោម។
ទាំងអស់នេះមិនមែនមានន័យថា ហាមទទួលទានបន្លែផ្លែឈើដែលមានឬទ្ធិក្តៅយ៉ាងដាច់ខាតនោះទេ ចំណុចសំខាន់គឺ ការទទួលទានអាហារដែលសម្បូរបែប ដើម្បីសាងតុល្យការក្នុងរាងកាយ និងឱ្យរាងកាយបានទទួលគុណតម្លៃខាងសារធាតុអាហារដែលសម្បូរបែបដែរ។ សម្រាប់ពេលណាដែលធាតុអាកាសក្តៅនេះ កុំភ្លេចញ៉ាំទឹកឱ្យបានច្រើនៗ ចៀសវាងពីកម្តៅថ្ងៃខ្លាំងៗ ទីកន្លែងដែលធាតុអាកាសក្តៅខ្លាំង និងខ្យល់អាកាសមិនបក់ចេញចូល៕
July 20, 2020
ជាង143,000នាក់ស្លាប់ដោយសារCOVID-19 នៅសហរដ្ឋអាមេរិក លោក Trump ចេញមុខទទួលខុសត្រូវ
ប្រធានាធិបតីសហរដ្ឋអាមេរិក លោក Donald Trump បានចេញមុខទទួលខុសត្រូវចំពោះផលវិបាកដែលកើតឡើងដោយសារ COVID-19 នៅសហរដ្ឋអាមេរិក ប៉ុន្តែលោកក៏នៅតែជឿជាក់ថា វីរុសរាតត្បាតនេះនឹងបាត់ខ្លួនទៅវិញដោយឯកឯង។
យោងតាមស្ថិតិរបស់ Worldometers គិតដល់ដំណាច់ថ្ងៃទី19កក្កដា ចំនួនអ្នកស្លាប់ដោយសារ COVID-19 នៅសហរដ្ឋអាមេរិកបានកើនដល់ជាង143,000នាក់ ខណៈដែលចំនួនករណីឆ្លងវីរុសនេះក៏បានកើនដល់ជិត4លាននាក់ផងដែរ។ ជាមធ្យម ក្នុង1សប្ដាហ៍ គឺមានមនុស្សប្រមាណជា5,000នាក់បានស្លាប់ដោយសារCOVID-19 នៅសហរដ្ឋអាមេរិក។
ទាក់ទិននឹងបញ្ហាCOVID-19 កាលពីថ្ងៃទី17កក្កដា លោក Trump បានប្រកាសទទួលខុសត្រូវចំពោះផលវិបាកដែលកើតឡើងដោយសារ COVID-19 នៅប្រទេសរបស់លោក។ “ខ្ញុំតែងតែទទួលខុសត្រូវគ្រប់យ៉ាង ព្រោះថា ជាចុងក្រោយ វានៅតែជាការទទួលខុសត្រូវរបស់ខ្ញុំ” លោក Trump ឆ្លើយតបដូច្នេះនៅក្នុងកិច្ចសម្ភាសមួយជាមួយ Fox News។
ប៉ុន្តែ លោកក៏យល់ថា អភិបាលរដ្ឋនានាក៏ត្រូវតែទទួលខុសត្រូវចំពោះការរក្សាទុកសម្ភារៈសុខាភិបាល និងការចេញបទបញ្ជារក្សាគម្លាតសង្គម ដូចជាបង្ខំឱ្យពាក់ម៉ាស់ជាដើម។ ម្ចាស់សេតវិមានឱ្យដឹងថា លោកមិនគាំទ្រចំពោះបទបញ្ជាឱ្យពាក់ម៉ាស់នៅទូទាំងសហរដ្ឋអាមេរិកនោះឡើយ ព្រោះថា លោកចង់ឱ្យប្រជាជន “មានសេរីភាពក្នុងព្រំដែនកំណត់ណាមួយ”។ ជាងនេះទៀត លោក Trump នៅតែយល់ថា តួលេខនៃការឆ្លងវីរុសដែលកើនឡើងយ៉ាងឆាប់រហ័សនេះក៏ដោយសារអាជ្ញាធរសហរដ្ឋអាមេរិក បានបង្កើនការធ្វើតេស្តរកវីរុស។ លោក Trump ថែមទាំងអះអាងថា “ជាចុងក្រោយ COVID-19 នឹងបាត់ខ្លួនទៅវិញដោយឯកឯងមិនខាន”។
គិតមកដល់បច្ចុប្បន្ន ប្រទេសនិងដែនដីចំនួន221ក្នុងពិភពលោក ត្រូវបានរាយការណ៍ថា បានរកឃើញអ្នកផ្ទុកវីរុសCOVID-19 ចំនួន14,622,597នាក់ និងអ្នកស្លាប់សរុបចំនួន608,403នាក់ ក្នុងនោះមានអ្នកឆ្លងវីរុសថ្មីចំនួន238,295នាក់ និងអ្នកស្លាប់5,161នាក់ ត្រូវបានរកឃើញក្នុងរយៈពេល24ម៉ោងចុងក្រោយនេះ ខណៈដែលអ្នកជំងឺបានជាសះស្បើយមានចំនួន 8,726,028នាក់៕
ប្រភព៖ Reuters
July 20, 2020
អ៊ីស្ត្រាអែល ឱ្យប្រជាជនឱបដើមឈើដើម្បីកាត់បន្ថយអារម្មណ៍ឯកកាដោយសារគម្លាតសង្គម
ដោយសារតែមេរោគ Covid-19 បានធ្វើឱ្យមនុស្សលើពិភពលោកចាប់ផ្តើមមានអារម្មណ៍កាន់តែឯកកាខ្លាំងឡើងៗពីមួយថ្ងៃទៅមួយថ្ងៃ។
ដើម្បីដោះស្រាយបញ្ហានេះ ប្រទេសអ៊ីស្ត្រាអែល បានអនុញ្ញាតឱ្យប្រជាជនឱបដើមឈើដើម្បីកាត់បន្ថយភាពឯកកាដោយសារតែការរក្សាគម្លាតសង្គម។ តាមការបញ្ជាក់របស់អាជ្ញាធរធម្មជាតិ និងសួនសាធារណៈនៃប្រទេសនេះបានបង្ហាញលើបណ្តាញសង្គមថា មនុស្សម្នាក់ៗគួរចំណាយពេលវេលាលើធម្មជាតិឱ្យបានកាន់តែច្រើនដើម្បីកាត់បន្ថយអារម្មណ៍ស្មុគស្មាញនានា។
តាមអ្នកចិត្តសាស្ត្របានឱ្យដឹងថា ការរក្សាគម្លាតសង្គមនេះបានធ្វើឱ្យមនុស្សមិនដែលប៉ះគ្នាសោះ ដែលកត្តានេះធ្វើឱ្យមនុស្សមួយចំនួនធំកាន់តែមានភាពឯកកា ហើយត្រូវការការថ្នាក់ថ្នម។ ភាគច្រើននៃអ្នកដែលមានអារម្មណ៍មិនល្អក្នុងរយៈពេលដែលត្រូវធ្វើគម្លាតសង្គម គឺមនុស្សចាស់។ អ្នកជំនាញថា វ័យនេះជាវ័យដែលមានអារម្មណ៍ប្រែប្រួលច្រើន ត្រូវការថ្នាក់ថ្នម និងត្រូវការក្តីស្រឡាញ់ពីមនុស្សជុំវិញខ្លួន។
តាមការបង្ហាញរបស់វេទិកាសេដ្ឋកិច្ចពិភពលោកបានឱ្យដឹងថា មនុស្សចាស់ជាច្រើនបង្ហាញអារម្មណ៍ថា គាត់ត្រូវនៅឆ្ងាយពីមនុស្សដែលគាត់ស្រឡាញ់ មិនបានឱបកូនរបស់គាត់ និងចៅជាដើម។ ហេតុនេះការនៅជាមួយធម្មជាតិដ៏ស្រស់ស្អាត អាចរំសាយអារម្មណ៍បានមួយចំណែក។ មនុស្សវ័យចំណាស់ជាច្រើនបានបង្ហាញអារម្មណ៍ថា ការឱបដើមឈើ និងដាក់ក្តីស្រឡាញ់លើធម្មជាតិ អាចធ្វើឱ្យអារម្មណ៍ពួកគាត់ប្រសើរឡើង៕

July 18, 2020
ករណីឆ្លងCOVID-19 នៅទូទាំងពិភពលោក បានកើន1លាននាក់ក្នុងរយៈពេល100ម៉ោងចុងក្រោយនេះ
សារព័ត៌មាន Reuters បានរកឃើញជាលើកដំបូងថា ករណីឆ្លងវីរុសCOVID-19 នៅទូទាំងពិភពលោក បានកើន1លាននាក់ក្នុងរយៈពេលត្រឹមតែ100ម៉ោងប៉ុណ្ណោះ នៅពេលដែលតួលេខសរុបបានកើនលើសពី14លាននាក់ កាលពីថ្ងៃទី17កក្កដាកន្លងទៅ។
ក្រោយរយៈពេល3ខែ បន្ទាប់ពីករណីឆ្លងវីរុសCOVID-19 ត្រូវបានប្រកាសឱ្យដឹងជាលើកដំបូងនៅប្រទេសចិនកាលពីដើមខែមករា ពិភពលោកពេលនោះបានរកឃើញអ្នកផ្ទុកវីរុសត្រឹមតែ1លាននាក់ប៉ុណ្ណោះ។ ក៏ប៉ុន្តែ គិតចាប់ពីថ្ងៃទី13កក្កដាដល់ថ្ងៃទី17កក្កដា ពោលគឺរយៈពេល4ថ្ងៃ ពិភពលោកបានរកឃើញករណីផ្ទុកវីរុសថ្មីដល់ទៅ1លាននាក់ ដោយកើនពី13លាននាក់ ឡើងដល់14លាននាក់។
យោងតាមការស្រង់ស្ថិតិរបស់ Reuters ដែលបានដកស្រង់ពីរបាយការណ៍របស់រដ្ឋាភិបាលនានា បានបង្ហាញថា ការឆ្លងរាលដាលនៃវីរុសនេះ កំពុងតែកើនឡើងយ៉ាងឆាប់រហ័សនៅទ្វីបអាមេរិក ដោយមានករណីឆ្លងច្រើនជាងពាក់កណ្ដាលបើធៀបនឹងពិភពលោកទាំងមូល។
គិតមកដល់បច្ចុប្បន្ន សហរដ្ឋអាមេរិកបានរកឃើញអ្នកផ្ទុកវីរុសCOVID-19 សរុប3,770,012នាក់ និងអ្នកស្លាប់ដោយសារវីរុសនេះមានចំនួន142,064នាក់។
ប្រទេសប្រេស៊ីលឈរលំដាប់ទី2 បន្ទាប់ពីសហរដ្ឋអាមេរិក ដោយមានអ្នកជំងឺជាង2,048,600នាក់ ក្នុងនោះក៏មានប្រធានាធិបតី Jair Bolsonaro ផងដែរ។ ចំណែកតួលេខអ្នកស្លាប់ដោយសារCOVID-19 របស់ប្រទេសនេះ មានជាង78,000នាក់។
ឥណ្ឌាដែលជាសម្បុកវីរុសCOVID-19 ធំជាងគេលំដាប់ទី3ក្នុងពិភពលោក បានរកឃើញអ្នកផ្ទុកវីរុសចំនួន1,040,457នាក់ ក្នុងនោះមានអ្នកស្លាប់26,285នាក់។ ក្នុងរយៈពេល1សប្ដាហ៍កន្លងទៅ កំណើននៃអ្នកឆ្លងវីរុសបានកើនជាមធ្យម30,000នាក់ក្នុង1ថ្ងៃៗ នៅប្រទេសនេះ៕
ប្រភព៖ Reuters
July 18, 2020
លោកជំទាវ ឱ វណ្ណឌីន ថាហានិភ័យឆ្លងអាចនឹងខ្ពស់បើការឈប់សម្រាក 5ថ្ងៃខាងមុខប្រជាជនធ្វេសប្រហែស
មិនយូរទៀតទេ ប្រជាជនទាំងអស់នៅក្នុងប្រទេសកម្ពុជានឹងត្រូវដល់ថ្ងៃឈប់សម្រាកដែលរាជរដ្ឋាភិបាលប្រកាសឱ្យឈប់រហូតដល់ទៅ 5ថ្ងៃ ដើម្បីសងថ្ងៃឈប់សម្រាកកាលពីបុណ្យចូលឆ្នាំថ្មី។
ពាក់ព័ន្ធនឹងបញ្ហានេះ មន្ត្រីជាន់ខ្ពស់ក្រសួងសុខាភិបាល បានព្រមានថា ប្រសិនបើប្រជាជនយើងទាំងអស់គ្នាមិនប្រុងប្រយ័ត្នក្នុងការការពារខ្លួនឱ្យបានខ្ពស់នោះទេ អត្រាឆ្លងមេរោគ Covid-19 អាចនៅតែមានខ្ពស់។ លោកជំទាវថា នៅថ្ងៃទី 17 ខែកក្កដា ឆ្នាំ2020នេះ ក្រសួងសុខាភិបាល បានរកឃើញអ្នកឆ្លងជំងឺ Covid-19 ចំនួន 5នាក់បន្ថែមទៀត។ ការរកឃើញចំនួនអ្នកឆ្លងថ្មីនេះ បង្ហាញថាកម្ពុជាមិនទាន់ឆ្លងផុតហានិភ័យដែលកើតឡើងដោយសារតែជំងឺ Covid-19 នៅឡើយទេ។
លោកជំទាវរដ្ឋលេខាធិការក្រើនរំឮកថា ថ្វីត្បិតតែកន្លងមកអ្នកដែលរកឃើញថ្មីថាមានផ្ទុកជំងឺ Covid-19 សុទ្ធតែជាករណីនាំចូល តែប្រជាជនគ្រប់គ្នាមិនគួរធ្វេសប្រហែសនោះទេ។ ហានិភ័យនៃការឆ្លងជំងឺនេះនៅតែខ្ពស់ ព្រោះយើងមិនអាចមើលនឹងភ្នែកទទេដឹងថាបុគ្គលណាមានផ្ទុកមេរោគ Covid-19 ឬមិនមាននោះទេ។ ហេតុនេះសម្រាប់ប្រជាជនទាំងអស់ដែលទៅស្រុកកំណើតនៅថ្ងៃឈប់សម្រាកនាពេលខាងមុខនេះ ចាំបាច់ត្រូវតែអនុវត្តនូវវិធានការពារខ្លួនតាមការណែនាំរបស់ក្រសួងសុខាភិបាល និងប្រុងប្រយ័ត្នឱ្យបានខ្ពស់ចំពោះរាល់ការជួបជុំនានា៕
July 17, 2020
ប្រយ័ត្នទុកជាមុន…ជំងឺដែលនឹងមកជាមួយរដូវភ្លៀង
មួយរយៈនេះធាតុអាកាសនៅក្នុងប្រទេសយើង តិចក្តៅ តិចរងា ថ្ងៃខ្លះភ្លៀងក៏បង្អុរចុះមកធ្វើឱ្យទទឹកសើមគ្រប់ៗគ្នា តែអ្វីដែលគួរឱ្យបារម្ភនោះ ក៏ប្រហែលជាចៀសមិនផុតពីរឿងជំងឺដង្កាត់ដែលនឹងមកជាមួយទឹកភ្លៀងនោះឡើយ។ ថ្ងៃនេះទំព័រសុខភាព ឡារ៉ែនសូមនាំមិត្តអ្នកអានទាំងអស់គ្នាមកត្រៀមខ្លួនចាំទប់ទល់នឹងរោគាដែលនឹងមកជាមួយទឹកភ្លៀងដូចខាងក្រោមនេះ ៖
1. ក្រុមជំងឺខាងប្រព័ន្ធដកដង្ហើម
ក្នុងរដូវភ្លៀង ធាតុអាកាសចាប់ផ្តើមត្រជាក់ និងមានសំណើមខ្លាំង ធ្វើឱ្យមេរោគអាចរីករាលដាលបានយ៉ាងឆាប់រហ័ស បើសិនជាមានមេរោគរីករាលដាលនៅក្នុងធាតុអាកាស ហើយយើងដកដង្ហើមស្រូបចូលទៅក្នុងសួត អាចនឹងបង្កឱ្យកើតជំងឺខាងផ្លូវដង្ហើមបានជាច្រើន ដូចជា ជំងឺផ្តាសាយ គ្រុនផ្តាសសាយធំ រលាកបំពង់ដង្ហើម ដូច្នេះគួរចៀសវាងការស្ថិតនៅក្នុងកន្លែងដែលចង្អៀតហប់ ខ្យល់អាកាសពិបាកចេញចូល និងចៀសវាងការនៅជិតអ្នកដែលកើតជំងឺទាំងនោះ ព្រោះមេរោគអាចឆ្លងពីមនុស្សម្នាក់ទៅមនុស្សម្នាក់បានតាមរយៈការដកដង្ហើម ទឹកមាត់ សំបោរ ឬកំហាកស្លេស្មរបស់អ្នកជំងឺ ដោយមេរោគនឹងឆ្លងចូលតាមភ្នែក ច្រមុះ និងមាត់ ឬតាមរយៈការដែលមនុស្សបានប៉ះពាល់វត្ថុដែលលាយឡំជាមួយមេរោគ ដូចជា កន្សែងជូតមុខ ស្លាបព្រា កែវទឹក ការថើប ឬការដែលដៃទៅប៉ះមេរោគ ហើយយកទៅញីភ្នែក ឬយកទៅកាន់អ្វីញ៉ាំជាដើម។
2. ជំងឺគ្រុនឈាម
នៅពេលធ្លាក់ភ្លៀង នឹងតែងតែមានទឹកដក់នៅតាមទីកន្លែងផ្សេងៗ ធ្វើឱ្យកើតមានការរីករាលដាលពូជរបស់មូសខ្លាដែលជាភ្នាក់ងារចម្លងរោគគ្រុនឈាម។ បើកើតជំងឺគ្រុនឈាម អាចនឹងមានកម្តៅខ្លួនឡើងខ្ពស់រយៈពេល 2 – 3 ថ្ងៃ (អាចក្តៅខ្លាំងដល់ 40 អង្សា C ) មិនឃ្លានបាយ ឈឺក្បាល ឈឺចុករួយពេញខ្លួន មុខឡើងក្រហម ចំពោះអ្នកដែលមានគ្រាប់ឈាមទាប អាចមើលឃើញចំណុចឈាមក្រហមៗនៅលើស្បែក បើឃើញមានអាការដូចដែលបានរៀបរាប់មកនេះ ចូរកុំបង្អង់យូរ ត្រូវប្រញាប់ទៅមន្ទីពេទ្យ និងគួរចៀសវាងពីទីកន្លែងដែលមានមូស ព្យាយាមកុំឱ្យមូសខាំ ប្រើថ្នាំបាញ់សម្លាប់មូស បំផ្លាញប្រភពកំណើតរបស់មូស ដូចជា ផ្កាប់វត្ថុដែលធ្វើឱ្យមានទឹកដក់ និងចាក់ដីលុបកន្លែងដែលមានទឹកដក់ជាដើម។
3. រោគប៉េស្ត
ជំងឺប៉េស្ត គឺជាជំងឺឆ្លងដែលកើតចេញពីសត្វកណ្តុរគ្រប់ប្រភេទ ដោយមេរោគនឹងស្ថិតនៅក្នុងទឹកនោមរបស់សត្វកណ្តុរទាំងនោះ ទាំងកណ្តុរស្រែ កណ្តុរព្រៃ កណ្តុរស្រុក កណ្តុរប្រែង និងកណ្តុរប្រមេះ ហើយមេរោគប៉េស្តនេះនឹងចូលមកក្នុងរាងកាយមនុស្សបាន
តាមរយៈស្នាមដំបៅ ឬរបួស និងស្នាមរលាត់ដាច់ផ្សេងៗលើរាងកាយ។ ជំងឺនេះទោះជាមានថ្នាំព្យាបាលឱ្យជាមែន តែក៏អាចធ្វើឱ្យស្លាប់បានដូចគ្នាដែរ បើបានទទួលការព្យាបាលមិនត្រឹមត្រូវ ឬយឺតយ៉ាវ។ អ្នកជំងឺនឹងមានអាការគ្រុនក្តៅខ្លាំងភ្លាមៗ ឈឺក្បាល ច្រើនតែឈឺសាច់ដុំភ្លៅ និងកំភួនជើងយ៉ាងខ្លាំង និងភ្នែកក្រហម។ ប្រមាណជា 5 – 10 ភាគរយរបស់អ្នកកើតជំងឺនេះ អាចនឹងមានអាការធ្ងន់ធ្ងរ ដូចជា ឌីហ្សាន ក្រលៀនលែងដំណើរការ ឬអាចប្រកាច់ទៀតផង ដូច្នេះគួរចៀសវាងការដើរលុយទឹក លុយភក់ដែលប៉ប៉ិកប៉ប៉ាច់។ អ្នកដែលធ្វើការងារប្រថុយប្រថាននឹងជំងឺនេះ គួរតែពាក់ស្រោមដៃជ័រ ពាក់ស្បែកជើងជ័រកវែង ការពារខ្លួនកុំឱ្យកើតមានរបួស ឬដំបៅនៅលើជើង ឧស្សាហ៍លាងសម្អាតដៃឱ្យបានញឹកញាប់ ងូតទឹកសម្អាតរាងកាយក្រោយពេលចប់ពីការងារ កម្ចាត់សំរាមនៅក្នុងផ្ទះ និងកន្លែងធ្វើការចេញឱ្យអស់ ជាពិសេសកាកសំណល់កំទេចចំណីអាហារ ដើម្បីកុំឱ្យក្លាយជាប្រភពអាហាររបស់សត្វកណ្តុរ។
4. ជំងឺឆ្លងខាងប្រព័ន្ធរំលាយអាហារដែលជួបញឹកញាប់
មានដូចជា ជំងឺរាករូសភ្លាមៗ ជំងឺរាកមួល ពុលអាហារ ជាដើម ជំងឺទាំងនេះបណ្តាលមកពីការទទួលទានអាហារដែលមានប្រឡាក់ប្រឡូសមេរោគអតិសុខុមប្រាណដែលបង្កឱ្យកើតរោគនៅក្នុងប្រព័ន្ធរំលាយអាហារនៅក្នុងពោះវៀន ដោយអ្នកជំងឺនឹងមានអាការរាក បន្ទោបង់ចេញមករាវដូចទឹក អាចមានគ្រុនក្តៅខ្លួន ឈឺរមួលនៅក្នុងពោះ និងបើមានឆ្លងមេរោគមួលផងនោះ អាចមានសំបោរ ឬឈាមលាយឡំមកជាមួយលាមកទៀតផង។ ក្រៅពីនេះនៅមានមេរោគវីរុសរលាកថ្លើមប្រភេទ A និង B ដែលអាចឆ្លងបានតាមរយៈការទទួលទានអាហារដែលប្រឡាក់ប្រឡូសមេរោគផងដែរ អ្នកដែលមានអាការរលាកថ្លើមនឹងមានគ្រុនក្តៅខ្លួន ល្វើយអស់កម្លាំង មានអាការខ្លួនឡើងលឿង ភ្នែកលឿង ក្អួតចង្អោរ ដូច្នេះទើបក្នុងរដូវភ្លៀងនេះគួរប្រយ័ត្នប្រយែងរឿងអាហារការហូបចុកជាពិសេស ដោយគួរទទួលទានតែអាហារដែលធ្វើឆ្អឹនថ្មីៗ ស្អាត និងប្រើស្លាបព្រាសម្រាប់ដួសម្ហូបដោយឡែក។
5. ជំងឺភ្នែកក្រហម
ជំងឺភ្នែកក្រហម បណ្តាលមកពីមេរោគវីរុសដែលមាននៅក្នុងទឹកកខ្វក់ ខ្ទាតចូលភ្នែក ការប៉ះពាល់ទឹកភ្នែករបស់អ្នកដែលកើតជំងឺភ្នែកក្រហម ហើយយកដៃដែលប្រឡាក់នោះមកប៉ះភ្នែកខ្លួនឯង ឬបានទទួលមេរោគដែលខ្ចាត់ខ្ចាយនៅក្នុងអាកាស ឬក្នុងអាងហែលទឹក។ ជាទូទៅមេរោគនឹងសម្ងំខ្លួន 1 – 2 ថ្ងៃមុននឹងបង្ហាញអាការឡើង។ នៅលើអ្នកដែលកើតជំងឺភ្នែកក្រហមអាចពិនិត្យឃើញមេ
រោគបង្កជំងឺនៅម្តុំបរិវេណភ្នែក និងក្នុងបំពង់កបានតាំងពីថ្ងៃបង្ហាញអាការ រហូតដល់ 14 ថ្ងៃក្រោយពីចាប់ផ្តើមមានអាការ។ វិធីការការពារគឺ កុំយកដៃដែលមិនស្អាតមកប៉ះ ឬញីភ្នែក លាងសម្អាតដៃគ្រប់ពេលមុននឹងប៉ះពាល់ភ្នែក មិនប្រើប្រាស់កន្សែងជូតមុខ ឬជូតខ្លួនរួមជាមួយអ្នកដែលកើតជំងឺភ្នែកក្រហម សំខាន់បំផុតត្រូវការពារមិនឱ្យជំងឺឆ្លងរាលដាលពីខ្លួនឯងទៅអ្នកដទៃ៕
July 17, 2020
អ្នកជំនាញការបារម្ភ៖ ក្នុងរដូវរងាខាងមុខ វីរុសនឹងរាលដាលខ្លាំង ជីវិតបែបប្រក្រតី ស្ថិតនៅឆ្ងាយនៅឡើយ
ទីភ្នាក់ងាព័ត៌មានឆៃណាដេលី បានរាយការណ៍ថា អ្នកជំនាញការបាននិយាយថា វីរុសកូរ៉ូណាប្រភេទថ្មី អាចនឹងរាតត្បាតកាន់តែខ្លាំងឡើងនៅក្នុងរដូវរងាខាងមុខនេះ ធ្វើឱ្យទស្សនៈនៃការវិលត្រឡប់មករកជីវិតបែបប្រក្រតីវិញ កាន់តែពិបាក និងត្រូវបន្ថែមភាពចាំបាច់ក្នុងការត្រៀមខ្លួនឱ្យរួចរាល់សម្រាប់សង្គ្រាមប្រឆាំងមេរោគដ៏អូសបន្លាយមួយនេះ។
អ្នកជំនាញការបានរៀបរាប់ថា “ទោះជាមានភាពប្រថុយប្រថានកើនឡើង តែស្ថានការណ៍ជំងឺរាតត្បាតដែលកើតឡើងនៅក្នុងមណ្ឌលហ៊ូពេយ កាលពីដើមឆ្នាំនេះ នឹងមិនកើតឡើងម្ដងទៀតទេនៅក្នុងប្រទេសចិន ដោយសារតែប្រទេសនេះ បានពិសោធរួចហើយថា ការឆ្លងរាលដាលក្នុងភូមិភាគ អាចបង្ក្រាបបានដោយវិធានការគ្រប់គ្រងដែលឆាប់រហ័ស និងគ្រប់គ្រងចំមុខសញ្ញា”
តាមរយៈរបាយការណ៍របស់អង្គការសុខភាពពិភពលោក ការឆ្លងរាលដាលរបស់មេរោគ កាន់តែធ្ងន់ធ្ងរឡើងទូទាំងពិភពលោក ដោយមានរបាយការណ៍អ្នកជំងឺថ្មី កើនឡើងខ្ពស់ដល់ 230,370នាក់ ក្នុងថ្ងៃអាទិត្យ(ទី12កក្កដា)កន្លងមក។
លោក អ៊ូ ជុនយ៉ូវ៍ ប្រធានក្រុមជំនាញខាងជំងឺរាតត្បាត នៃមជ្ឈមណ្ឌលគ្រប់គ្រង និងការពាររោគ នៃប្រទេសចិន បានថ្លែងថា វីរុសបានចម្លងសាយភាយយ៉ាងឆាប់រហ័ស ទូទាំងពិភពលោកតាំងពីខែមីនាមក ហើយការឆ្លងមេរោគថ្មីចុងក្រោយបំផុតដែលកើនឡើងនៅសហរដ្ឋអាមេរិក ប្រេស៊ីល ឥណ្ឌា និងអាហ្វ្រិកខាងត្បូង មានចំណែកច្រើនជាងពាក់កណ្ដាល នៃចំនួនអ្នកឆ្លងមេរោគថ្មីទូទាំងពិភពលោក។
លោក អ៊ូ បានថ្លែងនៅក្នុងអំឡុងការប្រជុំអនឡាញដែលរៀបចំឡើងដោយទស្សនាវដ្តី ឆៃស៊ីន កាលពីល្ងាចថ្ងៃអាទិត្យ(12កក្កដា)កន្លងទៅថា “ការវិភាគបឋម បានបង្ហាញឱ្យឃើញថា ក្នុងរយៈពេលដ៏ខ្លីនេះ ការឆ្លងរាលដាលរបស់មេរោគវីរុសនៅតែស្ថិតក្នុងកម្រិតខ្លាំង និងថែមទាំងអាចនឹងកាចសាហាវខ្លាំងឡើងទៀត ក្នុងអំឡុងរដូវរងាដែលកំពុងជិតមកដល់នេះ”
“ប្រទេសចិនស្ថិតក្រោមសម្ពាធ 2ប្រការ នៃការទប់ទល់នឹងការឆ្លងរាតត្បាតយ៉ាងរហ័សភ្លាមៗ ដែលបណ្ដាលមកពីប្រភពដែលមិនបង្ហាញភ័ស្តុតាង ដូចជាថ្មីៗ ដែលពាក់ព័ន្ធនឹងផ្សារបោះដុំអាហារដ៏សំខាន់មួយក្នុងក្រុងប៉េកាំង រួមទាំងក្រុមអ្នកឆ្លងមេរោគដែលកើតចេញពីករណីនាំចូល ដូចដែលយើងបានឃើញនៅក្នុងទីក្រុងជាច្រើន ក្នុងមណ្ឌលភាគខាងកើតឆៀងខាងជើង ប៉ុន្មានខែកន្លងមកនេះ”
ទិន្នន័យ ពីទីស្នាក់ការគណៈកម្មការសុខភាព នៃប្រទេសចិនបានបញ្ជាក់ថា ការឆ្លងរាតត្បាតរបស់ជំងឺនៅក្នុងក្រុងប៉េកាំង ដែលបានរកឃើញកាលពីថ្ងៃទី11 មិថុនា ត្រូវបានគ្រប់គ្រប់យ៉ាងពេញលេញ ដោយមិនមានអ្នកជំងឺថ្មី អស់រយៈពេល 8ថ្ងៃ រាប់តាំងពីថ្ងៃចន្ទមក ហើយចំនួនអ្នកជំងឺនៅក្នុងការព្យាបាល ក៏ថយចុះ 297នាក់ដែរ។
លោកអ៊ូ បានថ្លែងទៀតថា “ការបង្ក្រាបមេរោគបានយ៉ាងឆាប់រហ័សនៅក្នុងទីក្រុងចម្បងនេះ ធ្វើឱ្យចិនមានភាពជឿជាក់លើវិធានការចៀសវាងការឆ្លងមេរោគជាថ្មីម្ដងទៀត”
លោកបន្តថា “វិធានការរបស់ទីក្រុងប៉េកាំង គឺជាគំរូ សម្រាប់ផ្នែកដែលនៅសេសសល់របស់ប្រទេសចិន និងអាចជាទិន្នន័យអះអាងសម្រាប់ពិភពលោក ដោយរឿងសំខាន់នោះ គឺការពិនិត្យរកឃើញដ៏ឆាប់រហ័ស ការឆ្លើយតបដោយវិធានការបង្ខាំងដ៏ម៉ឺងម៉ាត់ និងការពិសោធយ៉ាងទូលំទូលាយ”
ការតស៊ូ ដ៏យូរអង្វែងនៅខាងមុខ
លោក ឈឹន ជឹងមិង សាស្ត្រាចារ្យផ្នែកជំងឺរាតត្បាត នៃមហាវិទ្យាល័យ អុកស្វ៊ើត បានព្រមានថា “វីរុស ដូចជាមិនទាន់បាត់ទៅណាទេ”
លោកថា “ចំនួនអ្នកឆ្លងមេរោគទូទាំងពិភពលោកច្រើនដល់ទៅ 12.6លាននាក់ ដែលជាការវាយតម្លៃទាបជាងកម្រិតធ្ងន់ធ្ងរ ដោយសារតែការពិសោធដែលមានកំណត់នៅក្នុងភូមិភាគមួយចំនួនដែលមានអ្នកឆ្លងមេរោគ តែមិនបង្ហាញអាការ ដែលធ្វើឱ្យពិនិត្យរកមិនឃើញ”
“យើងមានការចំណាយខាងសេដ្ឋកិច្ចក្នុងតម្លៃខ្ពស់ខ្លាំងណាស់ សម្រាប់ការផ្លាស់ប្ដូរវិធីរស់នៅរបស់យើង និងការបិទទីក្រុង។ ប្រទេសខ្លះត្រូវសុខចិត្តបន្ធូរបន្ថយវិធានការ ដូចជាប្រទេសជប៉ុន សហរាជអាណាចក្រ និងអ៊ីស្រាអែល ជាដើម…រដូវស្លឹកឈើជ្រុះ និងរដូវរងាខាងមុខនេះ នឹងក្លាយជាការសាកល្បងដ៏សំខាន់”
យ៉ាងណាក្ដី ទោះជានៅក្នុងប្រទេសចិន ដែលមានស្នាដៃក្នុងការគ្រប់គ្រងការឆ្លងរាលដាលបានដាច់ខាតមែន តែក្នុងអំឡុងការប្រជុំដើម្បីឆ្លើយតបនឹងការឆ្លងរាលដាលរបស់ជំងឺ ការត្រឡប់ឆ្ពោះទៅរកជីវិតយ៉ាងពេញរូបបែប កណ្ដាលការឆ្លងរាលដាលដ៏ធំនេះ យើងទទួលស្គាល់ថា សឹងតែមិនអាចទៅរួចឡើយ និងត្រូវត្រៀមការទប់ទល់នឹងការឆ្លងមេរោគជាថ្មី ជាដំណាក់ៗទៀតផង”
កាលពីថ្ងៃចន្ទ(ទី13កក្កដា) កន្លងមក លោក ថេដ្រូស អាត់ហាណូម កេប្រេយេស៊ុស ប្រធានអង្គការសុខភាពពិភពលោក បានថ្លែងថា “…នឹងមិនអាចវិលត្រឡប់ទៅរកសភាវប្រក្រតី ក្នុងពេលអនាគតដ៏ខ្លីខាងមុខនេះបានទេ” ក្នុងខណៈដែលមេរោគវីរុសនៅតែឆ្លងរាលដាលនៅក្នុងប្រទេសភាគច្រើន ហើយវានៅតែជា “សត្រូវលេខ1” របស់ពិភពលោកនៅឡើយ៕
ប្រភព៖ សាព័ត៌មានបរទេស
ប្រែសម្រួលដោយ តាវ៉ែនតា
July 17, 2020
ក្រសួងសុខាភិបាលរកឃេីញអ្នកផ្ទុកវីរុសCOVID-19 ចំនួន5នាក់ទៀតហើយ!
ក្រសួងសុខាភិបាលកម្ពុជា នាព្រឹកថ្ងៃទី17កក្កដានេះ បានប្រកាសឱ្យដឹងថា បានរកឃើញករណីផ្ទុកវីរុសCOVID-19 ចំនួន5នាក់បន្ថែមទៀត ដែលទាំងនេះសុទ្ធតែជាករណីនាំចូល។
នៅលើទំព័រFacebook របស់CDC នៃក្រសួងសុខាភិបាលកម្ពុជា មានបង្ហោះសេចក្ដីប្រកាសមួយឱ្យដឹងថា ក្នុងចំណោមអ្នកផ្ទុកវីរុសCOVID-19 ចំនួន5នាក់ដែលទើបត្រូវបានរកឃើញនេះ មានជនជាតិខ្មែរ3នាក់ និងជនជាតិអាមេរិកាំង2នាក់ ដែលធ្វើដំណើរពីសហរដ្ឋអាមេរិក។
គិតមកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCOVID-19 សរុបចំនួន171នាក់ ក្នុងនោះមាន38នាក់កំពុងសម្រាកព្យាបាលនៅមន្ទីរពេទ្យ និងអ្នកជំងឺបានជាសះស្បើយមានចំនួន133នាក់។ កម្ពុជាមិនទាន់មានករណីបាត់បង់ជីវិតដោយសារCOVID-19នៅឡើយ។
July 17, 2020