Category: សុខភាព

“នំប៉័ងទើបតែទិញមកសោះ ឥលូវដុះផ្សឹតបាត់ទៅហើយ” រឿងបែបនេះអាចកើតឡើងចំពោះមនុស្សគ្រប់គ្នាបាន ជាពិសេសបំផុតក្នុងអំឡុងពេលដែលធាតុអាកាសទាំងក្តៅផង សើមផងបែបនេះ។ បើមើលឃើញមុនហើយថា នំមួយដុំនោះមានដុះផ្សឹត ហើយបោះវាចោលនោះ មិនអីទេ តែបើញ៉ាំវាចូលទៅក្នុងពោះអស់ទៅហើយ ទើបមើលឃើញជាក្រោយថាមានដុះផ្សឹតនោះ តើនឹងត្រូវធ្វើយ៉ាងណា?។

អ្នកជំនាញការខាងផ្នែកចំណីអាហាររបស់មហាវិទ្យាល័យ វើម៉ន់ត៍ បានណែនាំថា យើងត្រូវតែចៀសវាងពីការទទួលទាននំប៉័ង និង​អាហារដែលមានលក្ខណៈដូចជាមានដុះផ្សឹត ទោះជាយើងស្ថិតនៅក្នុងយុគសម័យរបស់គ្រប់ចំណីអាហារដែលសុទ្ធតែឆ្លងកាត់កម្មវិធីសម្លាប់​​​មេរោគមកយ៉ាងច្រើនហើយមែនក៏ដោយ តែក៏នៅតែមានឱកាសដែលយើងនឹងជួបមេរោគផ្សឹតនៅក្នុងចំណីអាហារបានដែរ។ បើសង្កេតឃើញថា នៅលើនំប៉័ងមានចំណុចតូចៗដែលអាចជាមេរោគផ្សឹតនោះ ចូរបោះវាចោលទាំងអស់តែម្តងទៅ។

ព្រោះមេរោគផ្សឹតមានលក្ខណៈជាសរសៃៗដូចសរសៃសក់តូចៗ និងស្តើងខ្លាំងណាស់ វាមានឬស និងរីករាលដាលចេញទៅសូម្បីតែក្នុងស្រទាប់ដែលយើងមើលមិនឃើញទៀតផង ដូច្នេះ បើឃើញមានមេរោគផ្សឹតត្រឹមតែចំណុចតូចមួយនៅលើដុំនំប៉័ង ចូរបោះវាចោលទាំងអស់ទៅ ហើយការចៀសវាងពីការញ៉ាំមេរោគផ្សឹតចូលទៅនោះ មានតែវិធីមួយគត់គឺ ពិនិត្យមើលឱ្យបានច្បាស់។

តែចុះបើសិនយើងច្រឡំញ៉ាំចំណីអាហារដែលមានមេរោគផ្សឹតចូលទៅបាត់ហើយនោះ តើត្រូវធ្វើយ៉ាងម៉េចស្រួលទៅ?

មេរោគផ្សឹតនៅលើនំប៉័ងបន្តិចបន្តួច មិនជាគ្រោះថ្នាក់ធ្ងន់ធ្ងរអ្វីឡើយ អ្នកខ្លះមានកង្វល់ខ្លាំងណាស់ថា មេរោគផ្សឹតគឺជាសារធាតុពុល និងនៅអាចបង្កឱ្យកើតអាការប្រតិកម្មចាញ់ទៀតផង តែមិត្តអ្នកអានជឿដែរទេថា មេរោគផ្សឹតធម្មតាៗមួយប្រភេទដែលហៅថា ផេនីស៊ីលៀម ដែលជាផ្សឹតពណ៌បៃតងៗនៅលើនំប៉័ងនោះ យើងយកវាមកធ្វើជាវត្ថុធាតុដើមរបស់ថ្នាំបដិបក្ខប្រាណដែលមានឈ្មោះថា “ផេនីស៊ីលីន” បានទៀតផង តែសម្រាប់អ្នកដែលមានប្រតិកម្មចាញ់មេរោគផ្សឹត ហើយចៃដន្យច្រឡំញ៉ាំចូលទៅវិញនោះ អាចនឹងមានគ្រោះថ្នាក់បាន អាការប្រតិកម្មចាញ់អាចធ្ងន់ធ្ងរដល់ថ្នាក់សម្ពាធឈាមធ្លាក់ចុះ ពិបាកដកដង្ហើម រហូតទៅដល់គាំងបេះដូងបានទៀតផង។

តែបើសិនគ្មានប្រតិកម្មចាញ់ និងច្រឡំញ៉ាំមេរោគផ្សឹតចូលទៅហើយនោះ ក៏មិនចាំបាច់ភ្ញាក់ផ្អើលអ្វីដែរ ព្រោះមេរោគផ្សឹតនឹងធ្វើឱ្យមានគ្រោះថ្នាក់ដល់រាងកាយយើងបាន លុះត្រាណាតែក្នុងករណីដែលញ៉ាំជាបន្តបន្ទាប់រយៈពេលយូរតែប៉ុណ្ណោះ។

តើយើងនឹងចៀសវាងពីមេរោគផ្សឹតយ៉ាងណាបាន?

1 . ការឧស្សាហ៍សង្កេតមើលចំណីអាហារដែលប្រុងទិញ និងមុនពេលទទួលទាន ការហឹតមិនអាចជួយអ្វីបានឡើយ ព្រោះមេរោគផ្សឹតគ្មានក្លិនទេ និងសាកល្បងសង្កេតមើលខ្លួនឯងថា តើមានកើតអាការប្រតិកម្មចាញ់ផ្សេងៗដូចជា តឹងច្រមុះ រមាស់ ហូរទឹកភ្នែក ហៀរសំបោរ រមាស់ផ្ទៃមុខដោយសារការញ៉ាំអាហារដែរឬទេ?។

2 . គួររក្សាអនាម័យខាងក្នុងផ្ទះឱ្យបានល្អ ព្រោះវាជារឿងដំបូងគេដែលត្រូវធ្វើដើម្បីការពារមេរោគផ្សឹត ក្រៅពីនេះមេរោគផ្សឹតនៅអាចរីកធំធាត់ និងបន្សាយស័្ពរចេញទៅលើរបស់របរផ្សេងៗដែលស្ថិតនៅក្នុងបរិវេណនោះទៀតផង ដូច្នេះនៅក្នុងទូទឹកកក ក្រណាត់ជូតចាន ភាជនៈដាក់ចំណីអាហារ ឬសូម្បីតែតុត្រៀមម្ហូបអាហារនៅក្នុងផ្ទះបាយ ក៏អាចនឹងមានស័្ពររបស់មេរោគផ្សឹតតោងជាប់ដែរ ទើបគួរតែលាងជូតសម្អាតឱ្យបានញឹកញាប់។

3 . មេរោគផ្សឹតរីកធំធាត់បានល្អណាស់នៅក្នុងកន្លែងដែលសើម បើសិនជាអាចទៅរួច គួរតែគ្រប់គ្រងកម្រឹតភាពសើមខាងក្នុងផ្ទះកុំឱ្យលើស 40 %។

4 . គួរលាងជូតសម្អាតខាងក្នុងទូទឹកកកឱ្យបានញឹកញាប់ យ៉ាងហោចណាស់ក៏មួយខែ ឬពីរខែម្តងដែរ ដោយការយកម្សៅបេកឃីងសូដា មករលាយជាមួយទឹក ហើយជូតសម្អាត និងចំណុចណាដែលគួរឱ្យសង្ស័យថាមានមេរោគផ្សឹតនោះ ចូរយកទឹកខ្មេះលាយជាមួយទឹក មកដុសខាត់ចេញ។ ចំណែកក្រណាត់ជូតចាន បើចាប់ផ្តើមមានក្លិនហើយ ចូរយកទៅបោះចោលតែម្តងទៅល្អជាងយកមកបោកគក់ហើយប្រើម្តងទៀត ព្រោះវាអាចជាការបើកឱកាសឱ្យមេរោគផ្សឹតរីករាលដាលក្នុងផ្ទះបាន៕

ជីវិតក្នុងទីក្រុងច្រើនតែប្រញាប់ប្រញាល់រហូតធ្វើឱ្យយើងខកខានញ៉ាំអាហារពេលសំខាន់បំផុតនៃថ្ងៃនីមួយៗគឺ អាហារពេលព្រឹក ហ្នឹងឯង។ អ្នកខ្លះជ្រើសរើសក្នុងការញ៉ាំអាហារពេលព្រឹកបែបងាយៗ លឿនរហ័ស និងមិនបានយកចិត្តទុកដាក់លើគុណប្រយោជន៍ខាងអាហារដែលបានទទួលនោះប៉ុន្មានឡើយ ដោយនឹកសង្ឃឹមថាញ៉ាំឱ្យតែឆ្អែតៗប៉ុណ្ណោះ។

តែការពិតវិញ អាហារពេលព្រឹកសំខាន់ខ្លាំងណាស់ និងគួរតែជាពេលញ៉ាំអាហារមួយដែលសង្កត់ធ្ងន់លើសារធាតុអាហារដែលមានប្រយោជន៍បំផុតទៀតផង ព្រោះយើងត្រូវនាំកម្លាំងថាមពលនេះទៅរៀន ធ្វើការ ធ្វើកិច្ចការងារផ្សេងៗពេញមួយថ្ងៃ តែអាហារពេលព្រឹកដែលមនុស្សជាច្រើនជ្រើសរើសទទួលទាននោះ មិនបានផ្តល់ប្រយោជន៍ដល់រាងកាយតាមដែលរាងកាយត្រូវបានទទួលឡើយ ដូច្នេះយើងនាំគ្នាមកមើលវិញល្អជាងថា នៅក្នុងអាហារពេលព្រឹកទាំងនោះ តើមានអាហារមួយណាដែលអ្នកទទួលទានជាប្រចាំខ្លះដែរទេ? បើមានគួរតែផ្លាស់ប្តូរជាបន្ទាន់ហើយ។

ទឹកដោះគោ

អ្នកខ្លះអាចនឹងធ្លាប់បានឮថា ទឹកដោះគោមិនគួរទទួលទានពេលពោះទំនេរឡើយ ហ្នឹងគឺជារឿងមួយដែលត្រឹមត្រូវហើយ ព្រោះបើយើងញ៉ាំទឹកដោះគោពេលពោះទំនេរ អាចធ្វើឱ្យឆ្អល់ពោះបាន ឬអ្នកខ្លះអាចទាំងធ្វើឱ្យមានអាការចុកពោះ កូរពោះ និងរាកបានទៀតផង។ វិធីកែបញ្ហានេះ គឺងាយបំផុត គ្រាន់តែកុំញ៉ាំទឹកដោះគោសុទ្ធតែម្យ៉ាង ត្រូវញ៉ាំគូគ្នាជាមួយអាហារដទៃទៀត ដោយញ៉ាំអាហារពេលព្រឹកចូលទៅមុនសឹន ហើយសឹមញ៉ាំទឹកដោះគោទៅតាមក្រោយ តែប៉ុណ្ណឹងក៏ជួយបានច្រើនទៅហើយ តែបើសឹនអ្នកណាដែលមានបញ្ហាជាមួយការញ៉ាំទឹកដោះគោមែនទែន អាចមានន័យថា ទឹករំលាយអាហារក្នុងក្រពះរបស់អ្នកមិនអាចរំលាយទឹកដោះគោបាននោះ គួរតែសាកល្បងទៅជួបគ្រូពេទ្យដើម្បីវិនិច្ឆ័យរោគយ៉ាងលម្អឹត។

សាចក្រក សាច់ហ៊ែម សាច់បេកខន

យើងតែងតែឃើញអាហារទាំងនោះនៅលើតុអាហារបែបអាមេរិកាំង ប្រេកហ្វាស់ត៍ ឬអាហារពេលព្រឹកបែបអាមេរិកាំងហ្នឹងឯង។ ដូចដែលមនុស្សជាច្រើនបានដឹងហើយថា អាហារពពួកនេះមិនបានមានសារធាតុអាហារដែលល្អដល់រាងកាយប៉ុន្មានឡើយ បើយូរៗញ៉ាំម្តង មិនអីទេ តែបើសឹនជាញ៉ាំបែបដដែលៗញឹកញាប់ និងគ្មានអាហារផ្សេងទៀតគួបផ្សំជាមួយផង នោះមានន័យថា យើងបានទទួលសារធាតុអាហារនៅពេលព្រឹកត្រឹមតែម្សៅ ប្រូតេអ៊ីនដែលគ្មានគុណភាព និងខ្លាញ់ប៉ុណ្ណោះ ដូច្នេះទើបមិនគួរទទួលទានញឹកញាប់ ឬនៅពេលណាដែលទទួលទានសាច់ក្រក សាច់ហ៊ែម ឬសាច់បេកខន គួរតែទទួលទានគួបផ្សំជាមួយខាបូហាយដ្រេត ប្រូតេអ៊ីន និងសារធាតុរ៉ែពីបន្លែស្រស់ៗផង។

នំប៉័ងលាបស្ករសូកូឡា

ផ្ទះអ្នកណាដែលមានក្មេងតូច ក្មេងជំទង់ ឬជាគ្រួសារដែលចូលចិត្តញ៉ាំស្ករសូកូឡា ប្រហែលជាមានសូកូឡាស្ពេ្រដនៅក្នុងផ្ទះមួយដបធំ ទុកលាបនំប៉័ង ហើយញ៉ាំ ឆ្ងាញ់ឆ្អែតត្រូវចិត្តក្មេងតូចមិនខាន តែសារធាតុអាហារដែលទទួលបានវិញនោះ មានត្រឹមតែម្សៅ និងស្ករប៉ុណ្ណោះ ដូច្នេះ ឡារ៉ែនសូមណែនាំឱ្យយូរៗសឹមញ៉ាំម្តង ឬញ៉ាំគួបផ្សំជាមួយស្ទេកសាច់គោ ស៊ុតចៀនជ័រព្នៅ ឬញាំបន្លែផងទើបជាការប្រសើរ។

អាហារស៊ីរៀល

ជាអាហារពេលព្រឹកងាយៗ ស្ទីលបរទេសដែលអាចញ៉ាំបានឆ្អែតក្នុងរយៈពេលតែមិនប៉ុន្មាននាទីប៉ុណ្ណោះ តែពេទ្យបែរជារកឃើញថា នៅក្នុងអាហារស៊ីរៀល ជាពិសេសអាហាររបស់កុមារ មានតែម្សៅ និងស្ករ សារធាតុអាហារបែបហូលហ្ក្រេន ឬធញ្ញជាតិផ្សេងនោះមានបរិមាណតិចខ្លាំងណាស់ និងក្រៅពីនោះថែមទាំងមិនគ្រប់ 5 ប្រភេទក្រុមទៀតផង ដូច្នេះ ឡារ៉ែនសុំឱ្យស៊ីរៀលក្លាយជាអាហារជម្រើសក្រោយៗគេក្នុងថ្ងៃដែលប្រញាប់ប្រញាល់បំផុតទៅចុះ។

នំចាខ្វៃ ជ្រលក់ទឹកដោះគោខាប់

មនុស្សធំជាច្រើននាក់ជ្រើសរើសទទួលទាននំចាខ្វៃជាមួយទឹកសណ្តែក ព្រោះទឹកសណ្តែកជាអាហារពេលព្រឹកដែលល្អ និងគួរទទួលទានគូគ្នាជាមួយអាហារផ្សេងៗដែលធ្វើពីម្សៅ តែនំចាខ្វៃជាម្សៅដែលជ្រលក់ខ្លាញ់(ដែលមិនល្អ បើសិនជាខ្លាញ់ជ្រូកដែលចៀនបំពងច្រើនដង ហើយមិនបានផ្លាស់ប្តូរ) និងថែមទាំងបំផ្លាញខ្លួនឯងធ្ងន់ធ្ងរទៅទៀតដោយការញ៉ាំជាមួយទឹកដោះគោខាប់ដែលគ្មានអ្វីច្រើនក្រៅពីស្ករនោះឡើយ ដែលវានឹងធ្វើឱ្យយើងកាន់តែឆាប់ហេវខ្លាំងឡើង ក្រៅពីនេះ អ្វីដែលបាត់បង់ទៅនោះគឺ សារធាតុរ៉ែ និងវីតាមីនពីបន្លែផ្លែឈើហ្នឹងឯង ដូច្នេះយូរៗញ៉ាំម្តងប្រសើរជាង។

យើងនឹងមើលឃើញថា អាហារពេលព្រឹកដែលងាយៗ ឆាប់រហ័ស ស្រួលរកទទួលទានរបស់មនុស្សជាច្រើននោះ អាចនឹងខ្វះសារធាតុរ៉ែ និងវីតាមីនជានិច្ច ដែលវាជារឿងមួយមិនសូវជាល្អប៉ុន្មានឡើយ ព្រោះធ្វើឱ្យយើងបានទទួលសារធាតុអាហារនៅពេលព្រឹកមិនគ្រប់គ្រាន់ អាចធ្វើឱ្យយើងមានពេលព្រឹកដែលមិនស្រស់ស្រាយ មិនស្វាហាប់បាន ដូច្នេះគួរងាកមកទទួលទានអាហារដែលមានប្រយោជន៍គ្រប់ 5 ប្រភេទក្រុមដូចជា ស៊ុបបន្លែសាច់ជ្រូក បបរសាមចូក បបរ-ស នំស៊ែនវិច(ដាក់បន្លែ)វិញម្តង តែប៉ុណ្ណឹងក៏ឆ្អែតឆ្ងាញ់មិនបំផ្លាញសុខភាពបានបាត់ទៅហើយ៕

ជឿថានៅរៀងរាល់ព្រឹករបស់អ្នកដែលនិយមញ៉ាំកាហ្វេច្បាស់ជាមិនខកខានឱកាសក្នុងការស្វែងរកកាហ្វេអ៊ីនមកបន្ថែមភាពស្រស់ស្រាយឱ្យរាងកាយនោះឡើយ។ ដោយភាពក្រអូបឈ្ងុយ និងរស់ជាតិដែលធ្វើឱ្យមានអារម្មណ៍ថាក្លៀវក្លាស្វាហាប់នោះ ទើបវាមិនមែនជារឿងប្លែកឡើយ ដែលកាហ្វេក្លាយជាភេសជ្ជៈកំពូលពេញនិយមដែលមនុស្សជាច្រើនមិនអាចខ្វះបាន។

តែភេសជ្ជៈដែលមនុស្សមិនអាចខ្វះបាន ដូចជា “កាហ្វេ” នេះ ទោះជាផ្តល់ប្រយោជន៍ក្នុងរឿងភាពស្រស់ស្រាយស្វាហាប់មែន តែបើញ៉ាំច្រើនជ្រុលពេក ក៏ផ្តល់នូវគុណវិបត្តិចំពោះរាងកាយក្នុងរយៈពេលវែងបានដែរ ព្រោះក្រៅពីកាហ្វេមានជាតិ “កាហ្វេអ៊ីន”

ហើយនោះ លោកអ្នកដឹងឬទេថា តើវានៅមានសារធាតុអ្វីដែលផ្តល់ទោសដល់រាងកាយទៀតដែរឬទេ?។

សារធាតុដែលផ្តល់នូវគុណវិបត្តិនៅក្នុងកាហ្វេ

1 . សារធាតុធីអូហ្វ៊ីលលីន ( Theophylline ) ជាសារធាតុនៅក្នុងកាហ្វេអ៊ីនដែលធ្វើឱ្យបំពង់ខ្យល់រីក និងបញ្ចេញឬទ្ធិជំរុញប្រព័ន្ធប្រសាទ។ នៅក្នុងផ្នែកវេជ្ជសាស្រ្តសារធាតុនេះគេប្រើជាមួយអ្នកជំងឺហឺតដង្ហក់ ដើម្បីជំរុញការដកដង្ហើម បើបានទទួលសារធាតុនេះក្នុងបរិមាណច្រើន អាចនឹងហុចផលឱ្យរាងកាយបាត់បង់តុល្យការ ដោយសារតែវាទៅជំរុញប្រព័ន្ធខួរក្បាលផងដែរ ទើបមិនស័ក្តិសមជាមួយអ្នកដែលកើតជំងឺបេះដូងជាទីបំផុត។

2 . សារធាតុ ស៊ែនធីន អាល់ខាលយដ៍ ( Xanthine Alkaloid ) ជាសារធាតុដែលបញ្ចេញឬទ្ធិជំរុញប្រព័ន្ធប្រសាទផ្នែកកណ្តាល ដែលធ្វើឱ្យមានអារម្មណ៍ក្លៀវក្លា រាងកាយស្វាហាប់ បើសិនបានទទួលក្នុងបរិមាណច្រើន អាចធ្វើឱ្យបេះដូងដើរលឿនខុសប្រក្រតីបាន ទើបសារធាតុនេះត្រូវបានប្រើជាចំណែកផ្សំរបស់ភេសជ្ជៈប៉ូវកម្លាំង និងទឹកភេសជ្ជៈកំប៉ុងផ្សេងៗ។ ជាសារធាតុដែលមាននៅក្នុងកាហ្វេអ៊ីន មានរបាយការណ៍ខ្លះបានប្រាប់ថា សារធាតុនេះប្រើលាយផ្សំនៅក្នុងថ្នាំសម្លាប់សត្វល្អិត ព្រោះកាហ្វេអ៊ីនអាចធ្វើឱ្យសត្វល្អិតស្លាប់បាន។ សារធាតុនេះធ្វើឱ្យប្រព័ន្ធប្រឆាំងជំងឺក្នុងរាងកាយធ្លាក់ចុះខ្សោយ។

សភាវពុលកាហ្វេអ៊ីន

សភាវពុលកាហ្វេអ៊ីនកើតនៅលើអ្នកដែលញៀនកាហ្វេអ៊ីនខ្លាំងមែនទែន ដែលហុចផលឱ្យកើតដំបៅនៅក្នុងក្រពះ ទើបធ្វើឱ្យអ្នកដែលមានជំងឺក្រពះស្រាប់ហើយ មានអាការចុកពោះនៅពេលញ៉ាំកាហ្វេពេលពោះទំនេរ។ អ្នកដែលកើតសភាវពុលកាហ្វេអ៊ីន នឹងវឹលមុខ មានអារម្មណ៍រសាប់រសល់ និងហុចផលដល់សុខភាពផ្លូវចិត្ត ធ្វើឱ្យងាយកើតអាការធុញថប់តានតឹង។ អាការបន្ទាប់បន្សំដែលជួបប្រទះញឹកញាប់គឺ ការបត់ជើងតូចញឹកញាប់ខុសប្រក្រតី បេះដូងលោតញាប់ខ្លាំងៗ និងគេលលក់មិនស្រួល គ្រោះថ្នាក់ម្យ៉ាងទៀតដែលអាចកើតឡើងបានចំពោះអ្នកញៀនកាហ្វេអ៊ីននោះគឺ សភាវពុលកាហ្វេអ៊ីននៅក្នុងឈាមខ្ពស់ដែលហុចផលឱ្យកើតសម្ពាធឈាមឡើងខ្ពស់ និងធ្វើឱ្យខ្លាញ់នៅក្នុងឈាមកើនឡើងដែរ ដែលជាលទ្ធផលធ្វើឱ្យក្រពះផលិតអាស៊ីតចេញមកបន្ថែម ធ្វើឱ្យងាយកើតដំបៅក្នុងក្រពះខ្លាំងជាងមនុស្សប្រក្រតី។ ចំណែកផលប៉ះពាល់ដែលកើតនៅលើមនុស្សស្រីវិញ កាហ្វេអ៊ីនក្នុងបរិមាណច្រើននឹងធ្វើឱ្យងាយកើត “ដុំគីស” ជាងមនុស្សប្រក្រតី និងប្រថុយប្រថានក្នុងការកើតមហារីក ឬដុះសាច់នៅក្នុងសុដនទៀតផង។

ញៀនកាហ្វេអ៊ីនខ្លាំងប៉ុនណា…ក៏អាចឈប់បានដោយវិធីខាងក្រោមនេះដែរ

1 . បន្ថយបរិមាណ ៈ សម្រាប់អ្នកដែលញៀនកាហ្វេ ហើយត្រូវការចង់ឈប់ញ៉ាំកាហ្វេយ៉ាងដាច់ខាតតែម្តងនោះ ដំបូងៗអាចមានអាការឈឺក្បាល និងមានអារម្មណ៍ឡេះឡះនៅពេលមិនបានញ៉ាំកាហ្វេ។ ដំណាក់កាលដំបូងសុំឱ្យសាកល្បងប្តូរពីកាហ្វេខ្មៅសុទ្ធៗមកជាកាហ្វេទឹកដោះគោប្រមាណជាមួយអាទិត្យ រួចហើយសឹមបញ្ចុះមកជាការញ៉ាំទឹកដោះគោឆៅក្តៅឧណ្ហៗលាយកាហ្វេស្តើងៗ។ ក្នុងអំឡុងពេលថ្ងៃចូរប្តូរពីកាហ្វេមកជាកូកូក្តៅជំនួសវិញ ព្រោះកូកូក៏មានកាហ្វេអ៊ីនដូចគ្នាដែរ តែតិចជាងកាហ្វេ។

ការឈប់ញ៉ាំកាហ្វេបែបដាច់ខាតភ្លាមៗ នឹងហុចផលអាក្រក់ច្រើនជាងផលល្អ និងអាចធ្វើឱ្យកាន់តែពិបាកបញ្ឈប់ការញ៉ាំកាហ្វេខ្លាំងឡើងទៅវិញទេ ដូច្នេះទើបគួរប្រើវិធីការកាត់បន្ថយបរិមាណ ដែលអាចហៅបានថា ជាការដកខ្លួនថយឆ្ងាយពីគុណវិបត្តិរបស់កាហ្វេបន្តិចម្តងៗទើបជាការប្រសើរ។

2 . ញ៉ាំទឹកតែឱសថបុរាណ និងភេសជ្ជៈក្លិនខារ៉ាមេល ៈ តែប្រភេទខ្លះគ្មានកាហ្វេអ៊ីនឡើយ និងថែមទាំងក្លិនរបស់ទឹកតែឆុងចាស់ៗ នឹងជួយឱ្យមានអារម្មណ៍ស្រស់ថ្លា អាចជំនួសឱ្យការញៀនកាហ្វេបាន។ តែឱសថបុរាណ ដូចជា តែយឹនស៊ឹន តែព្នៅ តែខ្ញី តែបៃតង មានក្លិនក្រអូប និងជួយបំប៉នសុខភាព ជួយសម្រួលតុល្យការឱ្យរាងកាយ។ ការរកអ្វីផ្សេងមកញ៉ាំជំនួសកាហ្វេក៏អាចជួយបានដែរ បើលោកអ្នកមិនចូលចិត្តទឹកតែ ចូរប្តូរមកញ៉ាំទឹកដោះក្រឡុកលាយក្លិនខារ៉ាមេល ឬបាត់ធើរ៍ ស្កត់ ក័ជាភេសជ្ជៈមួយទៀតដែលអាចជំនួសកាហ្វេបានដែរ ព្រោះទាំងខារ៉ាមេល និងបាត់ធើរ៍ ស្កត់នឹងផ្តល់នូវក្លិនស្រដៀងកាហ្វេខ្លាំងបំផុត។

នៅពេលដឹងពីគុណវិបត្តិរបស់កាហ្វេហើយ ក៏គួរតែបន្ថយបរិមាណការញ៉ាំឱ្យមានតុល្យភាពជាមួយការញ៉ាំអាហារផ្សេងៗគួបផ្សំជាមួយការញ៉ាំបន្លែផ្លែឈើដែលមានប្រយោជន៍ដល់រាងកាយ និងញ៉ាំទឹកស្អាតឱ្យបានញឹកញាប់ឡើងដើម្បីលាងជម្រះឬទ្ធិរបស់កាហ្វេអ៊ីនឱ្យថយចុះខ្លះ៕