Category: សុខភាព

ប្រទេសចំនួន11ដែលមានអ្នកស្លាប់ដោយសារCOVID-19 ច្រើនជាង1ម៉ឺននាក់
ពិភពលោកបានរកឃើញអ្នកផ្ទុកវីរុសCOVID-19 ចំនួនជាង17.4លាននាក់ និងអ្នកស្លាប់ចំនួនជាង675,000នាក់ នៅពេល WHO ស្នើឱ្យបណ្ដាប្រទេសបន្ធូរបន្ថយការរឹតត្បិតលើការដើរហើរជាអន្តរជាតិ។
ប្រទេសនិងដែនដីចំនួនជាង200នៅទូទាំងពិភពលោកត្រូវបានរាយការណ៍ថា បានរកឃើញអ្នកឆ្លងវីរុសCOVID-19 ចំនួន17,433,441នាក់ និងអ្នកស្លាប់ដោយសារវីរុសនេះបានកើនដល់675,178នាក់ ក្នុងនោះមានអ្នកជំងឺថ្មី297,674នាក់ និងអ្នកស្លាប់ថ្មី6,832នាក់ត្រូវបានរកឃើញក្នុងរយៈពេល24ម៉ោងចុងក្រោយនេះ។ ចំណែកអ្នកជំងឺបានជាសះស្បើយ មានចំនួន10,917,809នាក់ នេះបើតាមស្ថិតិរបស់ Worldometers។
សហរដ្ឋអាមេរិក ប្រេស៊ីល និងឥណ្ឌា គឺជាបណ្ដាប្រទេសដែលមានអ្នកជំងឺCOVID-19 ច្រើនជាងគេក្នុងពិភពលោក ក្នុងនោះសហរដ្ឋអាមេរិកមានអ្នកជំងឺសរុប4,634,985នាក់ ប្រេស៊ីលមាន2,613,789នាក់ និងឥណ្ឌាមាន1,639,350នាក់។
ប្រទេសចំនួន11ដែលមានអ្នកស្លាប់លើសពី1ម៉ឺននាក់ រួមមាន សហរដ្ឋអាមេរិក (155,285) ប្រេស៊ីល (91,377នាក់) ម៉ិកស៊ិក (46,000នាក់) អង់គ្លេស (45,999នាក់) ឥណ្ឌា (35,786នាក់) អ៊ីតាលី (35,132នាក់) បារាំង (30,254នាក់) អេស្ប៉ាញ (28,443នាក់) ប៉េរូ (18,816នាក់) អ៊ីរ៉ង់ (16,569នាក់) និងរុស្ស៊ី (13,802នាក់)។
អង្គការសុខភាពពិភពលោក កាលពីថ្ងៃទី30កក្កដា យល់ថា បណ្ដាប្រទេសគួរតែដកវិធានការរឹតត្បិតការដើរហើរទៅមកក្នុងពិភពលោកបន្ទាប់ពីបានវាយតម្លៃហានិភ័យដោយខ្លួនឯង។ ទន្ទឹមនឹងនេះគួរតែផ្ដល់អាទិភាពដល់សកម្មភាពផ្ដល់សេវាកម្មបន្ទាន់ សកម្មភាពមនុស្សធម៌ និងអនុញ្ញាតឱ្យពលរដ្ឋរបស់ខ្លួនត្រលប់ចូលប្រទេសរបស់ពួកគេវិញ៕
July 31, 2020
វេជ្ជបណ្ឌិត លី សូវ៉ាន់ ថារលកទី2 នៃ Covid-19 អាចកើតឡើងគ្រប់ពេល
ក្រោយស្ថានភាពស្ងប់ស្ងាត់បន្តិច សម្រាប់ជំងឺ Covid-19 នៅកម្ពុជា ប៉ុន្មានថ្ងៃចុងក្រោយនេះ យើងឃើញមានករណីនាំចូលមួយចំនួននៅតែកើតមានឡើងជាបន្ទាប់។
លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធប្រឆាំងជំងឺឆ្លង និងជាអ្នកនាំពាក្យក្រសួងសុខាភិបាល បានលើកឡើងថា យើងបានទប់ស្កាត់យ៉ាងជោគជ័យនូវហានិភ័យនៃមេរោគ Covid-19 មិនឱ្យចូលទៅក្នុងសហគមន៍ តែយើងក៏មិនអាចធ្វេសប្រហែសបានដែរ ព្រោះរលកទី2 អាចនឹងកើតឡើងគ្រប់ពេល។
លោកវេជ្ជបណ្ឌិតបានបញ្ជាក់ផងដែរថា ការទប់ស្កាត់ជំងឺ Covid-19 មិនអាចខ្វះការចូលរួមពីប្រជាជន និងភាគីពាក់ព័ន្ធបាននោះទេ ព្រោះបច្ចុប្បន្ននេះ ស្ថានភាពនៅផុយស្រួយនៅឡើយ ដោយសារតែប្រទេសជិតខាងយើង និងពិភពលោកទាំងមូលពុំទាន់មានសញ្ញាថមថយនៅឡើយ។ ថ្មីៗនេះដើម្បីទប់ស្កាត់ករណីប្រឈមខ្លាំង យើងបានបិទជើងហោះហើរពីម៉េឡេស៊ី និងឥណ្ឌូនេស៊ី ហើយបន្តតាមដានសុខភាពគ្រប់អ្នកដំណើរទាំងអស់ដែលចូលមកកម្ពុជាទាំងផ្លូវគោក ផ្លូវអាកាស និងផ្លូវទឹកជាដើម។
លោកវេជ្ជបណ្ឌិតបានបន្ថែមទៀតថា ករណីជំងឺឆ្លងCovid-19នេះ ទាំងនៅក្នុងព្រះរាជាណាចក្រកម្ពុជាក្តី ទាំងក្នុងពិភពលោកក្តី គឺស្ថានភាពជំងឺនេះនៅមានពេលវេលាវែងឆ្ងាយណាស់ ដោយតម្រូវឱ្យមានការរងចាំឱ្យមានវ៉ាក់សាំងការពារ ឬក៏ថ្នាំព្យាបាលសិន ទើបអាចសន្មត់ថា ជំងឺនេះអស់ឥទ្ធិពលនៅពេលណា? ប៉ុន្តែរហូតមកទល់ពេលនេះ ពុំទាន់មានការប្រកាសទទួលស្គាល់ជាផ្លូវការណាមួយ ពីអង្គការសុខភាពពិភពលោកនោះទេ ទាក់ទិនទៅនឹងវ៉ាក់សាំង ក៏ដូចជាថ្នាំព្យាបាលជាដើម។ ម្យ៉ាងវិញទៀត អង្គការសុខភាពពិភពលោក ក៏បានឱ្យនិយមន័យរួចហើយដែរថា ជំងឺCovid-19 ជាជំងឺដែលរាតត្បាតជាសកល មិនថានៅប្រទេសណា តំបន់ណានោះទេ គឺជំងឺនេះបានវាយលុកទៅដល់រួចទៅហើយ ខណៈអ្វីដែលគ្រប់គ្នាត្រូវធ្វើនៅពេលនេះ គឺការទប់ស្កាត់ការរីករាលដាលទៅក្នុងសហគមន៍៕
July 30, 2020
ស្ថានភាព Covid-19 នៅកម្ពុជាកំពុងស្ថិតក្នុងកម្រិតប្រុងប្រយ័ត្នខ្ពស់ (Alarming)
ប៉ុន្មានថ្ងៃចុងក្រោយនេះ បញ្ហាជំងឺ Covid-19 នៅកម្ពុជា ហាក់ចាប់ផ្តើមបង្ហាញសញ្ញាគួរឱ្យព្រួយបារម្ភឡើងវិញ បន្ទាប់ពីមានករណីនាំចូលជាបន្តបន្ទាប់តាមជើងហោះហើរអន្តរជាតិ រហូតដល់រដ្ឋាភិបាលប្រកាសបិទជើងហោះហើរបណ្តោះអាសន្នពីប្រទេសម៉ាលេស៊ី និងឥណ្ឌូណេស៊ី។
ជុំវិញបញ្ហានេះដែរ លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល បានលើកឡើងថា ស្ថានភាពជំងឺ Covid-19 នៅកម្ពុជាបច្ចុប្បន្ននេះកំពុងស្ថិតក្នុងស្ថានភាព Alarming មានន័យថាវាជាស្ថានភាពមួយដែលត្រូវតែប្រុងប្រយ័ត្នឱ្យបានជាប់ជានិច្ច។ បញ្ហានេះបណ្តាលមកពីការរកឃើញករណីវិជ្ជមានវីរុស Covid-19 ជាបន្តបន្ទាប់ក្នុងចំណោមអ្នកដំណើរដែលបានចូលមកប្រទេសកម្ពុជា ដោយកំណើននេះមានចំនួនច្រើន ដែលតម្រូវឱ្យយើងទាំងអស់គ្នាត្រូវមានការប្រុងប្រយ័ត្នខ្ពស់ និងបន្តយកចិត្តទុកដាក់លើអនាម័យ។
បន្ថែមពីលើនេះលោកជំទាវបានក្រើនរំឮកកុំឱ្យប្រជាជនភ្លេចពីលទ្ធភាពនៃការចម្លងវីរុសនេះដែលអាចកើតមានគ្រប់ពេលវេលា និងគ្រប់ទីកន្លែង។ វីរុស Covid-19 គឺភាគច្រើនកើតឡើងនៅពេលដែលបុគ្គលណាមួយចល័ត ឬធ្វើដំណើរ ដូច្នេះហើយរាល់ពេលដែលធ្វើដំណើរ ឬចល័ត គឺត្រូវប្រុងប្រយ័ត្នបំផុត។ បន្ថែមពីលើនេះ បន្ទាប់ពីមានការសម្រេចបិទការហោះហើរជាបណ្តោះអាសន្ននៃជើងហោះហើរពីប្រទេស ម៉ាឡេស៊ី និងឥណ្ឌូណេស៊ី នោះមក ជើងហោះហើរដទៃទៀត ក៏កំពុងស្ថិតក្នុងការតាមដានយ៉ាងយកចិត្តទុកដាក់បំផុតផងដែរ ដោយពិនិត្យមើលពីស្ថានភាពជាក់ស្តែង នៃវីរុសCovid-19៕
July 30, 2020
សហរដ្ឋអាមេរិកលេចចេញចំណុចខ្សោយ បន្ទាប់ពីទីប្រឹក្សាសន្តិសុខជាតិឆ្លងCOVID-19
ពលរដ្ឋអាមេរិកាំងហាក់បានដឹងថា មិនមាននរណាម្នាក់មានសុវត្ថិភាពនៅចំពោះមុខ COVID-19 ឡើយ សូម្បីតែ Robert O’Brien ដែលជាអ្នកគ្រប់គ្រងកិច្ចការសន្តិសុខជាតិ។
សេតវិមានបានឱ្យដឹងថា O’Brien គឺជាមន្ត្រីជាន់ខ្ពស់បំផុតដែលត្រូវបានបញ្ជាក់ថា វិជ្ជមានជាមួយនឹងវីរុសCOVID-19 រាប់ចាប់តាំងពីវីរុសនេះចាប់ផ្ដើមរាតត្បាតនៅសហរដ្ឋអាមេរិក។ នេះក៏ជាករណីថ្មីបំផុតដែលមន្ត្រីធ្វើការនៅក្បែរប្រធានាធិបតី Donald Trump ត្រូវបានគេរកឃើញថាមានផ្ទុកវីរុសCOVID-19។
ព័ត៌មានដែលបញ្ជាក់ថា O’Brien បានឆ្លង COVID-19 នេះ បានបង្ហាញថា ការគំរាមកំហែងពីវីរុសនេះកំពុងតែស្ថិតនៅក្នុងសេតវិមាន និងមានការព្រួយបារម្ភអំពីវិធានការដោះស្រាយបញ្ហាវិបត្តិសុខភាពដ៏ធ្ងន់ធ្ងររបស់រដ្ឋអំណាច។ នេះបើតាម Samantha Vinograd ដែលជាអ្នកវិភាគមកពី CNN។
អ្នកស្រី Samantha Vinograd សង្កត់ធ្ងន់ថា “បើសិនជារដ្ឋាភិបាលមិនអាចការពារសុខភាពរបស់មន្ត្រីជាន់ខ្ពស់ដូចជា O’Brien ជាដើមបែបនេះ គឺពិតជាពិបាកក្នុងការជឿជាក់ថា ពួកគេពិតជាអាចការពារសុខភាពរបស់ពលរដ្ឋអាមេរិកាំងបាន”។
Samantha Vinograd ថ្លែងថា ការដែលលោក Robert O’Brien បានឆ្លងវីរុសនេះ គឺវាស្ទើរដូចទៅនឹង “ស្ថានភាពអាសន្ន” អំពីសុខភាពយ៉ាងដូច្នោះដែរ។ បើទោះជាសេតវិមានធ្លាប់បានប្រកាសអំពីករណីបុគ្គលិកនៅទីនេះឆ្លងវីរុសCOVID-19ក៏ដោយ ប៉ុន្តែករណីរបស់លោក O’Brien គឺពិតគួរឱ្យប្រកាសអាសន្នជាង ព្រោះតែជាបុគ្គលដែលមានទំនាក់ទំនងទូលំទូលាយ និងមានឥទ្ធិពល។
ជាធម្មតា ទីប្រឹក្សាសន្តិសុខជាតិតែងតែស្ថិតនៅក្បែរប្រធានាធិបតី អនុប្រធានាធិបតី ប្រធានការិយាល័យសេតវិមាន រួមជាមួយនឹងរដ្ឋមន្ត្រីជាច្រើនផ្សេងទៀតជាញឹកញាប់នៅក្នុងសន្និសីទសារព័ត៌មាន ឬកិច្ចប្រជុំនានារបស់ក្រុមប្រឹក្សាសន្តិសុខជាតិ។
លោក Robert O’Brien និងលោក Donald Trump
ទីប្រឹក្សាសន្តិសុខជាតិម្នាក់ ក៏តែងតែមានទំនាក់ទំនងផ្ទាល់ជាមួយនឹងបុគ្គលិកជាន់ខ្ពស់ផ្នែកសន្តិសុខរាប់សិបនាក់ នៅពេលបំពេញភារកិច្ចសំខាន់ៗជារៀងរាល់ថ្ងៃ ព្រោះតែត្រូវទទួលរបាយការណ៍ផ្ទាល់ពីទីភ្នាក់ងារសន្តិសុខជាតិ NSA (National Security Agency) បុគ្គលិកនៃក្រុមប្រឹក្សាសន្តិសុខជាតិ NSC ( National Safety Council) រួមនឹងមន្ត្រីផ្សេងៗទៀត។
ក៏ប៉ុន្តែ សេតវិមានបានបញ្ជាក់ថា លោក O’Brien មានអាការរោគស្រាលៗប៉ុណ្ណោះ ព្រមទាំងបានអះអាងថា ប្រធានាធិបតី Donald Trump និងអនុប្រធានាធិបតី Mike Pence មិនមានហានិភ័យនៃការឆ្លងវីរុសនេះទេ។ លោក O’Brien មិនបានបង្ហាញវត្តមាននៅកន្លែងធ្វើការរបស់លោកតាំងតែពីសប្ដាហ៍មុន ហើយលោកក៏នៅតេគ្រប់គ្រងក្រុមប្រឹក្សាសន្តិសុខជាតិ តាមរយៈទូរស័ព្ទ។ នេះបើតាម Bloomberg។
យ៉ាងណាក៏ដោយ Samantha Vinograd យល់ថា ការដែលលោក O’Brien បានឆ្លងវីរុសនេះ ក៏មានន័យថា COVID-19 មានវត្តមាននៅទីតាំងនានានៅស្លាបខាងលិចនៃសេតវិមាន (West Wing of the White House) អស់មួយរយៈពេលមកហើយដែរ។ បញ្ហានេះអាចធ្ងន់ធ្ងរជាងអ្វីដែលយើងបានដឹង ដោយសារតែកាលពីពាក់កណ្ដាលខែកក្កដា លោក O’Brien និងក្រុមការងារបានធ្វើដំណើរទៅអឺរ៉ុបដើម្បីជួបពិភាក្សាជាមួយសមភាគីអង់គ្លេស បារាំង អាល្លឺម៉ង់ និងអ៊ីតាលី។ រូបថតដែល NSC បានចែករំលែក បានបង្ហាញថា ពួកគេឈរក្បែរគ្នាដោយមិនបានពាក់ម៉ាស់ការពារទេ។
អ្នកស្រី Vinograd ឱ្យដឹងថា លោក O’Brien ប្រហែលជាបានចម្លងវីរុសទៅអ្នកដទៃជាច្រើននាក់ បើសិនជាលោកបានឆ្លងវីរុសនេះនៅមុនពេលធ្វើដំណើរទៅកាន់អឺរ៉ុប។ អ្នកស្រី Vinograd យល់ថា “ការដែលសេតវិមានមិនអាចធានាសុវត្ថិភាពដល់ទីប្រឹក្សាសន្តិសុខជាតិរបស់ខ្លួនបានបែបនេះ គឺជាសារមួយដ៏គួរឱ្យព្រួយបារម្ភ ដែលបង្ហាញឱ្យឃើញនូវសមត្ថភាពនៃការទប់ទល់ COVID-19 របស់រដ្ឋាភិបាល”៕
ប្រភព៖ សារព័ត៌មានបរទេស
July 30, 2020
កម្ពុជារកឃើញអ្នកផ្ទុកCOVID-19 ចំនួន1ករណីក្នុងថ្ងៃនេះ ខណៈដែលពិភពលោកទាំងមូលរកឃើញជាង17,184,000នាក់
ក្រសួងសុខាភិបាលកម្ពុជានាព្រឹកនេះ (30កក្កដា) បានប្រកាសឱ្យដឹងថា បានរកឃើញអ្នកផ្ទុកវីរុសCOVID-19ថ្មី ចំនួន1នាក់បន្ថែមទៀតកាលពីថ្ងៃទី29កក្កដា ខណៈដែលអ្នកជំងឺបានជាសះស្បើយក្នុងថ្ងៃនេះ មានចំនួន8នាក់។
គិតមកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCOVID-19 សរុបចំនួន 234នាក់ ក្នុងនោះមានអ្នកជំងឺដែលបានជាសះស្បើយចំនួន162នាក់ និងកំពុងសម្រាកព្យាបាលចំនួន72នាក់។ កម្ពុជាមិនទាន់មានករណីស្លាប់ដោយសារវីរុសនេះនៅឡើយ។
នៅក្នុងតំបន់អាស៊ីអាគ្នេយ៍ ប្រទេសឥណ្ឌូនេស៊ី នៅតែជាសម្បុកវីរុសធំជាងគេ ដោយមានអ្នកជំងឺសរុប104,432នាក់ និងអ្នកស្លាប់ដោយសារវីរុសនេះ សរុប4,975នាក់។
ឈរលំដាប់ទី2គឺប្រទេសហ្វីលីពីន ដោយមានអ្នកជំងឺ 85,486នាក់ និងអ្នកស្លាប់ដោយសារCOVID-19 ចំនួន1,962នាក់។
សិង្ហបុរីឈរលំដាប់ទី3 ជាមួយនឹងតួលេខអ្នកជំងឺសរុប51,531នាក់ និងអ្នកស្លាប់សរុប27នាក់។
គិតមកដល់ពេលនេះ ពិភពលោកទាំងមូលបានរកឃើញអ្នកផ្ទុកCOVID-19 សរុប17,184,770នាក់ អ្នកជំងឺដែលបានបាត់បង់ជីវិតមានចំនួន670,152នាក់ ខណៈអ្នកបានជាសះស្បើយមានចំនួន10,696,604នាក់។ សហរដ្ឋអាមេរិក ប្រេស៊ីល និងឥណ្ឌា គឺជាបណ្ដាប្រទេសដែលមានអ្នកជំងឺច្រើនជាង1,000,000នាក់ ក្នុងនោះសហរដ្ឋអាមេរិកមាន4,568,037នាក់ ប្រេស៊ីលមាន2,555,518នាក់ និងឥណ្ឌាមាន1,584,384នាក់៕

July 30, 2020
ស្ពឹកដៃ…បញ្ហាដែលជួបប្រទះញឹកញាប់ (អាការ មូលហេតុ ការការពារ និងការព្យាបាល)
ស្ពឹកដៃ ឬដៃស្ពឹក បញ្ហាដែលជួបប្រទះញឹកញាប់នៅលើមនុស្សវ័យកណ្តាល ដោយច្រើនតែកើតនៅលើភេទស្រីច្រើនជាប្រុស បណ្តាលមកពីការប្រើការងារដោយដៃក្នុងលក្ខណៈដែលត្រូវមានការកន្រ្តាក់កដៃ ឬក្តាប់ម្រាមដៃពេញមួយថ្ងៃៗ ដោយក្រុមដែលជួបប្រទះគឺ ស្រ្តីមេផ្ទះ ជាងធ្វើសក់ អ្នកធ្វើអនាម័យ(បោសសម្អាត) ឬអ្នកធ្វើការក្នុងការិយាល័យដែលត្រូវទទួលទូរស័ព្ទ ប្រើកុំព្យូទ័រយូរៗ និងក្នុងក្រុមអ្នកជំងឺទឹកនោមផ្អែម ជំងឺរលាកសន្លាក់ឆ្អឹង រូម៉ាតយដ៍ ស្រ្តីមានគភ៌ អ្នកជំងឺក្រលៀនរ៉ាំរ៉ៃ រួមទាំងការខ្វះវីតាមីន B ដែលមានបច្ច័យជំរុញឱ្យកើតអាការស្ពឹកស្រពន់ដៃបានផងដែរ។
អាការ ៈ នឹងចាប់ផ្តើមស្ពឹកនៅលើបាតដៃ និងម្រាមដៃ ក្នុងខណៈដែលប្រើដៃធ្វើការងារជាបន្តបន្ទាប់ ហើយបើកើតខ្លាំង អាចមានអាការស្ពឹករហូតឡើងឈឺស្រពន់ក្នុងខណៈដែលមិនបានប្រើការដៃ និងមានអាការឈឺនៅពេលយប់ រហូតដល់ត្រូវភ្ញាក់នៅពេលយប់ដើម្បីកម្រើកដៃ ឬធ្វើម៉ាស្សាច្របាច់បាតដៃទៀតផង ហើយបើបណ្តោយទុកយូរនឹងកើតអាការទន់ចុះខ្សោយកម្លាំងដៃ ចាប់កាន់វត្ថុអ្វីមួយនឹងរបូតជ្រុះ រហូតឈានទៅដល់មានការរួញស្វិតរបស់សាច់ដុំដៃនៅទីបំផុត។
មូលហេតុរបស់អាការស្ពឹកដៃ ៈ ភាគច្រើនបណ្តាលមកពីការពង្រីកខ្លួនរបស់សរសៃវៀវតោងឆ្អឹងម្តុំកដៃ ឬបរិវេណសន្លាក់ឆ្អឹងបាតដៃ សរសៃវៀវនេះនឹងទៅសង្កត់រឹតសរសៃប្រសាទដែលទៅចិញ្ចឹមសាច់ដុំលើបាតដៃ និងសរសៃប្រសាទដែលបំពេញតួនាទីទទួលអារម្មណ៍ដឹងនៅលើបាតដៃ ទើបធ្វើឱ្យការធ្វើចលនារបស់កដៃច្រើនៗដងញឹកញាប់ នឹងធ្វើឱ្យកើតការផ្សារក្រហាយខ្លាំងឡើង។
ការមើលថែទាំ និងការពារ ៈ ត្រូវចាប់ផ្តើមពីការកាត់បន្ថយការប្រើការកដៃដែលធ្វើការធ្ងន់ៗ កែសម្រួលឥរិយាបថធ្វើការងាររបស់ដៃឱ្យស័ក្តិសម។ ក្នុងអំឡុងការធ្វើការ កដៃមិនត្រូវបត់-ងខ្លាំងជ្រុលពេក និងប្រើឧបករណ៍ជួយប្រគងកដៃសម្រាប់អ្នកដែលប្រើកុំព្យូទ័រ ដើម្បីឱ្យកដៃមានកន្លែងសម្រាក។ ម៉ៅស៍ដែលប្រើក៏ត្រូវមានទំហំល្មមប៉ុននឹងបាតដៃ មិនតូចជ្រុលពេក ព្រោះនឹងធ្វើឱ្យប្រឹងកដៃខ្លាំងឡើង។
ការរក្សាព្យាបាល ៈ បើអ្នកកើតអការនេះមិនសូវជាធ្ងន់ធ្ងរប៉ុន្មាន អាចប្រើថ្នាំប្រឆាំងការរលាករបស់សរសៃវៀវ និងសរសៃប្រសាទ ការញ៉ាំវីតាមីន B រហូតទៅដល់ដំណាក់កាលចុងក្រោយគឺ ការវះកាត់សរសៃវៀវដែលទៅសង្កត់រឹតសរសៃប្រសាទនោះ ដូច្នេះការមើលថែទាំ ការពារ និងថ្នមកដៃ ដើម្បីឱ្យយើងបានប្រើការបានយូរៗ គឺជារឿងដែលគួរតែប្រតិបត្តិ ព្រោះការប្រើការកដៃដែលខុសឥរិយាបទ ខុសវិធី អាចនាំឆ្ពោះទៅរកការព្យាបាលដែលស្មុគ្រស្មាញខ្លាំងឡើង៕
July 29, 2020
ធ្លាប់ដែរឬទេ? គ្រាន់តែភ្ញាក់ឡើង ក៏នឿយបាត់ទៅហើយ…ជាជំងឺ ឬគ្រាន់តែជាអាការខ្ជិល?
តើមិត្តអ្នកអានធ្លាប់ដែរឬទេ? មិនទាន់ទាំងបានធ្វើអ្វីផង គ្រាន់តែបើកភ្នែកឡើងពីកន្លែងគេង ក៏មានអារម្មណ៍ថា ហត់នឿយបាត់ទៅហើយ។ បើអ្នកមានអាការបែបនេះ ចូរនាំគ្នាមកមើលថា តើមូលហេតុដែលពិតប្រាកដនោះបណ្តាលមកពីអ្វីខ្លះ និងតើយើងអាចកម្ចាត់អាការទាំងនេះចេញពីរាងកាយយើងយ៉ាងម៉េចបាន?
1 . ញ៉ាំទឹកមិនគ្រប់គ្រាន់ ៈ វិធីកែ យកទឹកមកញ៉ាំភ្លាមទៅ!
2 . មានរឿងពិបាកចិត្ត ឬមានរឿងធុញថប់តានតឹងប្រមូលសន្សំក្នុងខួរក្បាលមកគ្រប់ពេលវេលា ៈ ដល់ពេលដែលអ្នកត្រូវបោះវាចោលហើយ។
3 . មិនញ៉ាំអាហារពេលព្រឹក ៈ ជាអាហារពេលសំខាន់ចំពោះការធ្វើការងាររបស់ប្រព័ន្ធរាងកាយ យ៉ាងហោចណាស់ទឹកដោះគោមួយកែវក៏គ្រាន់ដែរ តែបើឱ្យល្អបំផុត គួរញ៉ាំអាហារឱ្យឆ្អែត។
4 . ធ្វើការក្នុងថ្ងៃឈប់សម្រាក ៈ មិនបាច់សង្ស័យឡើយថា ហេតុអីបានរាងកាយនឿយហត់ខ្លាំងម្ល៉េះ? ដល់ព្រឹកថ្ងៃធ្វើការបែរជានៅស្ទឹកមួយកន្លែង។
5 . លេងប្រព័ន្ធសង្គមអនឡាញមុនពេលគេងច្រើនពេក ៈ ធ្វើឱ្យខួរក្បាលសម្រាកមិនបានគ្រប់គ្រាន់ វិធីដែលល្អបំផុតគឺ មុនគេងគួរបណ្តោយឱ្យខួរក្បាលបានសម្រាកឱ្យធូរស្រាល ដើម្បីឱ្យបានធ្វើការគេងសម្រាកយ៉ាងល្អឥតខ្ចោះ។
6 . រាងកាយខ្វះសារធាតុដែក ៈ សាកល្បងញ៉ាំអាហារពពួក ស្លឹកបាស់ ផ្ទី សណ្តែកក្រហម សណ្តែកខ្មៅ ឱ្យបានច្រើនឡើង។
7 . នឿយហត់ពីការធ្វើការងារ ទើបមិនហាត់ប្រាណ ៈ ជាការសម្រេចចិត្តដែលខុសយ៉ាងស្រឡះ ការហាត់ប្រាណហើយហត់ចេញញើស សារធាតុអេនដូហ្វ៊ីន ឬសារធាតុនៃសេចក្តីសុខហូរចេញមក នឹងជួយឱ្យគេងលក់ស្រួល និងថែមទាំងជួយជំរុញប្រព័ន្ធការធ្វើការងារក្នុងរាងកាយឱ្យល្អឡើងទៀតផង។
8 . កន្លែងធ្វើការរញេរញ៉ៃគ្មានសណ្តាប់ធ្នាប់ តុធ្វើការអត់របៀប ៈ វាហុចផលប៉ះពាល់ខាងចិត្តវិទ្យា ដោយអ្នកមិនបានដឹងខ្លួនឡើយ។ វាប្រៀបដូចជាថា គ្រាន់តែនឹកដល់កន្លែង និងតុធ្វើការ ចិត្ត និងអារម្មណ៍ក៏នឿយហត់ និងគិតរួចស្រេចទៅហើយថា ការងាររវល់វីវក់អ្វីម្ល៉េះហ្ន៎។
តែបើធ្វើ និងកែបញ្ហាគ្រប់ចំណុចដូចខាងលើនេះហើយ នៅតែមានអារម្មណ៍ថានឿយហត់ទៀតនោះ អាចទៅរួចហើយថា អ្នកកើតអាការខ្ជិលច្រអូសហើយ ដូច្នេះកុំទៅបន្ទោសអ្នកណា៕
July 29, 2020
ថ្នាំ Paracetamol លេបប៉ុន្មានគ្រាប់ទើបមិនមានគ្រោះថ្នាក់ដល់រាងកាយ?
គឺជារឿងសំខាន់ក្បែរខ្លួនដែលយើងគួរតែដឹង ព្រោះពេលឈឺក្បាល ឬមានគ្រុនក្តៅ មិនស្រួលខ្លួនម្តងៗ រឿងដំបូងគេដែលមនុស្សយើងនឹកដល់គឺ ថ្នាំ ប៉ារ៉ាសេតាម៉ុល ថ្នាំសាមញ្ញធម្មតាៗដែលត្រូវតែមាននៅក្នុងផ្ទះគ្រប់ៗគ្នា តែការញ៉ាំថ្នាំគ្រប់ប្រភេទតែងតែមានកម្រិតកំណត់ បើសិនញ៉ាំច្រើនជ្រុលពេកក៏នឹងហុចផលមិនល្អដល់រាងកាយ។
ថ្នាំ ប៉ារ៉ាសេតាម៉ុល ជាថ្នាំបំបាត់ការឈឺចាប់ និងបញ្ចុះកម្តៅដែលល្អបំផុតក្នុងពេលបច្ចុប្បន្ននេះ តែគ្រោះថ្នាក់របស់ការប្រើថ្នាំប៉ារ៉ាសេតាម៉ុលគឺ មានផលប៉ះពាល់ចំពោះថ្លើម ( Hepatotoxicity ) ប៉ះពាល់តាំងពីការធ្វើការងាររបស់ថ្លើម រហូតទៅដល់សភាវថ្លើមគាំងយ៉ាងទាន់ហន់( Acute liver failure ) ដែលនាំឆ្ពោះទៅរកការស្លាប់បាត់បង់ជីវិតបាន។
ប្រើថ្នាំប៉ារ៉ាសេតាម៉ុលឱ្យមានសុវត្ថិភាពត្រូវមើលលើកម្រិតខ្នាត ៖
វេជ្ជបណ្ឌិតជំនាញបានណែនាំថា គួរញ៉ាំតាមទម្ងន់ខ្លួន គុណជាមួយ 10 ឬ 15 ដង នឹងទទួលបានកម្រិតថ្នាំជាមីល្លីក្រាមដែលត្រូវលេបសម្រាប់ខ្លួនយើង(តែមិនត្រូវលើស 1.000 មីល្លីក្រាមក្នុងមួយដងឡើយ) ឧទាហរណ៍ ទម្ងន់ខ្លួន 50 គីឡូក្រាម កម្រិតថ្នាំដែលស័ក្តិសមត្រូវលេបគឺ 500 ឬ 750 មីល្លីក្រាម ដែលស្មើ 1 គ្រាប់ ឬ 1 គ្រាប់កន្លះ (បើមានមាឌធំ គុណនឹងទម្ងន់ខ្លួនហើយលើស 1.000 តែក៏ត្រូវតែលេបបានមិនលើស 2 គ្រាប់ដែរ)។
កម្រិតថ្នាំខ្ពស់បំផុតសម្រាប់មនុស្សធំក្នុងមួយថ្ងៃច័ន្ទ
– កម្រិតស្តង់ដារទូទៅ មិនលើសពី 4.000 មីល្លីក្រាម រួមទាំងជាតិថ្នាំដែលមានផ្សំក្នុងប៉ារ៉ាសេតាម៉ុលផង ដូចជា ថ្នាំបន្ធូរសាច់ដុំ ថ្នាំសម្រាលអាការផ្តាសាយ ជាដើម។ល។
– សម្រាប់អ្នកដែលត្រូវលេបបន្តបន្ទាប់ពីក្រៅប្រទេសរយៈពេលវែង ត្រូវស្ថិតនៅក្រោមការមើលថែទាំរបស់គ្រូពេទ្យ និងញ៉ាំមិនលើសពី 2.500 – 2.600 មីល្លីក្រាមឡើយ។
– អ្នកជំងឺថ្លើម ឬញ៉ាំស្រាជាប្រចាំ ត្រូវលេបមិនលើស 2.000 មីល្លីក្រាម។
កម្រិតថ្នាំខ្ពស់បំផុតក្នុងមួយថ្ងៃសម្រាប់ក្មេងអាយុពី 0 – 12 ឆ្នាំ
– មិនលើស 75 មីល្លីក្រាម / មួយគីឡូក្រាម មានន័យថាជាកម្រិតថ្នាំដែលគុណទម្ងន់ខ្លួនរបស់ក្មេងរួចហើយ និងបញ្ចុកថ្នាំមួយថ្ងៃមិនលើស 5 ដង និងអានស្លាកណែនាំឱ្យយល់ជាមុនផង។
– ការលេបថ្នាំ ប៉ារ់ាសេតាម៉ុល លើសកម្រិត នឹងមិនបង្ហាញអាការឱ្យឃើញឆាប់ៗនោះទេ នឹងបង្ហាញចេញមកក៏នៅពេលដែលដល់រយៈគ្រោះថ្នាក់ ជាអាការរលាកថ្លើម រឹងថ្លើម និងបង្កឱ្យកើតជាមហារីកថ្លើមបាត់ទៅហើយ ដូច្នេះគួរប្រើថ្នាំនេះនៅពេលណាដែលចាំបាច់ប៉ុណ្ណោះ និងបន្ថែមការប្រុងប្រយ័ត្នដោយការអានស្លាកព័ត៌មានឱ្យបានលម្អិតផង៕
July 29, 2020
កម្ពុជារកឃើញអ្នកផ្ទុកCOVID-19 7ករណីទៀតហើយ ខណៈពិភពលោករកឃើញ8,528នាក់បន្ថែមទៀត
ក្រសួងសុខាភិបាលកម្ពុជាបានប្រកាសឱ្យដឹងថា បានរកឃើញអ្នកផ្ទុកវីរុសCOVID-19 ចំនួន7ករណីបន្ថែមទៀតនាព្រឹកថ្ងៃទី29កក្កដា2020 ដែលនេះបានធ្វើឱ្យតួលេខនៃអ្នកផ្ទុកវីរុសCOVID-19 នៅកម្ពុជាកើនឡើងដល់233ករណី។
យោងតាមសេចក្តីប្រកាសព័ត៌មានរបស់ក្រសួងសុខាភិបាលដែលចេញផ្សាយនាព្រឹកនេះ ក្នុងចំណោមអ្នកជំងឺថ្មីទាំងនេះក៏មានកងកម្លាំងមួកខៀវកម្ពុជាចំនួន4នាក់ផងដែរ ដែលពួកគេទើបត្រលប់មកពីប្រទេសម៉ាលីកាលពីថ្ងៃទី10 កក្កដា។ ក្រៅពីនេះ គឺជាពលរដ្ឋខ្មែរដែលទើបមកពីប្រទេសឥណ្ឌូនេស៊ីកាលពីថ្ងៃទី23ខែកក្កដា។
គិតមកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCOVID-19 សរុប233នាក់ ក្នុងនោះមាន79នាក់កំពុងទទួលការព្យាបាល និង154នាក់បានជាសះស្បើយ។
នៅទូទាំងពិភពលោក ប្រទេសនិងដែនដីចំនួន221 បានរកឃើញអ្នកផ្ទុកវីរុសCOVID-19 សរុប16,892,319នាក់ ក្នុងនោះមានអ្នកស្លាប់ដល់ទៅ663,408នាក់ និងជាសះស្បើយមានចំនួន10,456,307នាក់៕
July 29, 2020
ប្រយោជន៍របស់ផ្លែមង្ឃុត ដ៏ច្រើនអនេកចំពោះរាងកាយមនុស្ស
មង្ឃុតជាផ្លែឈើក្នុងស្រុកដែលមានគុណប្រយោជន៍ច្រើនណាស់ និងអាចរកទិញញ៉ាំបានតាមរដូវកាលដោយតម្លៃធួរថ្លៃទៀតផង។ ចាស់ៗបុរាណតែងញ៉ាំផ្លែមង្ឃុតដើម្បីបំបាត់អាការស្រេកទឹក និងអាការក្តៅក្នុង ក្រៅពីនេះមង្ឃុតថែមទាំងជាផ្លែឈើដែលជួយសម្រកទម្ងន់ មានសារធាតុអាហារដែលសំខាន់ចំពោះស្បែកទៀតផង ដូច្នេះយើងនាំគ្នាមកមើលពីគុណប្រយោជន៍របស់ផ្លែមង្ឃុតទាំងអស់គ្នាដូចតទៅ ៖
បំបាត់អាការក្តៅក្នុង ៈ ដូចដែលបានរៀបរាប់ពីខាងដើមរួចហើយថា ចាស់ៗបុរាណញ៉ាំផ្លែមង្ឃុតដើម្បីបំបាត់អាការក្តៅក្នុង ព្រោះថាសាច់ផ្លែមង្ឃុតមានជាតិទឹកច្រើន ទើបធ្វើឱ្យរាងកាយអាចបឺតជ្រាបយកជាតិទឹកចេញពីសាច់ផ្លែមង្ឃុតចូលទៅក្នុងរាងកាយបានយ៉ាងមានតុល្យភាព។
សម្រកទម្ងន ់ ៈ អាចបញ្ចុះទម្ងន់បានដោយសារតែមានជាតិកាកសរសៃច្រើន ដោយសារតែយើងញ៉ាំមង្ឃុតចូលទៅនឹងធ្វើឱ្យមានអារម្មណ៍ឆាប់ឆ្អែត និងឆ្អែតបានយូរហ្នឹងឯង និងដោយផ្លែមង្ឃុតគ្មានកូឡេស្តេរ៉ូល ឬមានត្រឹមតែ 0.40 ប៉ុណ្ណោះ ទើបធ្វើឱ្យមង្ឃុតក្លាយជាផ្លែឈើដែលញ៉ាំហើយអាចសម្រកទម្ងន់បានយ៉ាងល្អ។
មានវីតាមីនច្រើន ៈ មិនថាតែវីតាមីន C វីតាមីន B ហ្វូលេត ជួយក្នុងការដុតបំផ្លាញប្រូតេអ៊ីន និងជាតិខ្លាញ់ឱ្យចូលទៅក្នុងរាងកាយបានល្អឡើង និងនៅមានចំណែកជួយក្នុងការបំប៉នប្រព័ន្ធប្រសាទ ធ្វើឱ្យមនុស្សញ៉ាំចូលទៅហើយមានអារម្មណ៍ថា ស្រស់ថ្លា និងកាត់បន្ថយអាការរបស់ជំងឺសោកសៅបានយ៉ាងល្អ។
សារធាតុរ៉ែ មានទង់ដែង ដែក ប៉ូតាស្យូម និងផ្សេងទៀត ៈ ដែលមានតួនាទីសំខាន់ក្នុងការគ្រប់គ្រងសម្ពាធឈាមរបស់រាងកាយ និងថែមទាំងគ្រប់គ្រងអត្រាការលោតរបស់បេះដូងឱ្យនៅប្រក្រតី និងការពារជំងឺពាក់ព័ន្ធនឹងសរសៃឈាមបានទៀតផង។
ប្រឆាំងអនុមូលឥស្សរៈ ៈ អាចនិយាយបានថា ទាំងបន្លែ និងផ្លែឈើផ្សេងៗសុទ្ធតែមានសារធាតុប្រឆាំងអនុមូលឥស្សរៈទាំងអស់ តែផ្តល់នូវលទ្ធផលខុសប្លែកពីគ្នា ឯផ្លែមង្ឃុតវិញក៏ផ្តល់នូវសារធាតុប្រឆាំងអនុមូលឥស្សរៈបានល្អដូចគ្នា និងនៅអាចតតាំងជំងឺផ្សេងទៀតបានដូចជា ជំងឺប្រតិកម្មចាញ់ ជំងឺហឺត ជាដើមទៀតផង៕
July 28, 2020