Category: សុខភាព

4 រឿងគួរចៀសវាងក្នុងការញ៉ាំផ្លែឈើ ព្រោះនឹងផ្តល់នូវគុណវិបត្តិ…
មនុស្សភាគច្រើនមើលឃើញថា ផ្លែឈើដែលយើងនាំគ្នាទទួលទាននោះសុទ្ធផ្តល់តែប្រយោជន៍ ព្រោះមានវីតាមីនផ្សេងៗដែលជួយបង្កើនឱ្យរាងកាយរឹងមាំ និងយល់ថា ញ៉ាំផ្លែឈើហើយនឹងធ្វើឱ្យយើងមិនធាត់ និងមានសុខភាពល្អ។
តែនៅក្នុងការពិតវិញ អ្នកដឹងឬទេថា ផ្លែឈើក៏អាចផ្តល់គុណវិបត្តិដល់រាងកាយរបស់មនុស្សយើងបានដូចគ្នា។ យើងគួរបែងចែកប្រភេទរបស់ផ្លែឈើ ព្រោះផ្លែឈើប្រភេទខ្លះក៏មិនស័ក្តិសមសម្រាប់អ្នកជំងឺដែលកើតរោគផ្សេងៗដែរ ដូចជា ៈ
– អ្នកកើតជំងឺទឹកនោមផ្អែម គួរចៀសវាងផ្លែឈើដែលមានរសជាតិផ្អែម ឬផ្លែឈើដែលមានរសជាតិជូរអែម ឬអាចទទួលទានបានត្រឹមតែបន្តិចបន្តួចប៉ុណ្ណោះ។
– ស្រ្តីកំពុងមានគភ៌ គួរចៀសវាងការទទួលទានផ្លែឈើដែលផ្លែខុសរដូវកាល ព្រោះថាមានភាពប្រថុយប្រថានខ្ពស់ណាស់ក្នុងការបានទទួលសារធាតុគីមី ការប្រើអ័រម៉ូន ជី ឬថ្នាំសម្លាប់សត្វល្អិតក្នុងកម្រិតដែលខ្លាំងជាងប្រក្រតី រហូតអាចហុចផលអាក្រក់ដល់កូននៅក្នុងផ្ទៃបាន។ ក្រៅពីនេះ នៅគួរចៀសវាងការទទួលទានផ្លែឈើខ្ចី និងផ្លែឈើដែលឆ្លងកាត់ការកែច្នៃផងដែរ។
– ក្នុងរដូវក្តៅ គួរចៀសវាងការទទួលទានផ្លែឈើណាដែលមានឬទ្ធិក្តៅ ជាពិសេសជាមួយមនុស្សចាស់ ព្រោះនឹងធ្វើឱ្យសីតុណ្ហភាពក្នុងរាងកាយឡើងខ្លាំងជ្រុល ដូចជា ផ្លែមៀន ធុរេន រួមទាំងម្ហូបអាហារដែលមានរសជាតិហឹរផងដែរ។
– អ្នកដែលកំពុងទទួលការព្យាបាលពាក់ព័ន្ធរោគក្រលៀន គួរចៀសវាងការទទួលទានផ្លែស្ពឺ ព្រោះអាចកើតមានការជ្រៀតជ្រែកពីអាការដទៃបាន ព្រោះក្នុងផ្លែស្ពឺមានសារធាតុមួយប្រភេទដែលហៅថា អុកសាលេត ដែលអាចធ្វើឱ្យកើតសភាវគាំងក្រលៀនទាន់ហន់ បណ្តាលឱ្យមានគ្រោះថ្នាក់ដល់ជីវិតបាន។
ទោះជាក្នុងផ្លែឈើប្រភេទនីមួយៗមានវីតាមីនដែលផ្សេងពីគ្នា ទាំងវីតាមីន A . C . E . B1 B2 B6 បេតាឃែរ៉ូទីន កាល់ស្យូម ផូស្វ័រ និងសារធាតុដែកមែន តែប្រភេទខ្លះក៏មានបរិមាណជាតិស្ករ និងម្សៅខ្ពស់ រួមទាំងរសជាតិដែលខុសប្លែកពីគ្នាដែរ។ អ្វីទាំងអស់នេះអាចជាបច្ច័យធ្វើឱ្យកើតរោគផ្សេងៗកើតឡើងបាន បើទទួលទានមិនបានល្មមសមរម្យ។
ផ្លែឈើផ្តល់ឱ្យទាំងគុណប្រយោជន៍ និងគុណវិបត្តិ ដូច្នេះមុននឹងអ្នកញ៉ាំអ្វីគួរនឹកដល់សុខភាពខ្លួនឯងជាមុន និងដែលសំខាន់គឺការទទួលទានក្នុងបរិមាណដែលសមល្មមនឹងតម្រូវការរាងកាយ៕
August 6, 2020
“គ្រឿងបន្ថែមរសជាតិអាហារ”…ប្រយោជន៍ និងគុណវិបត្តិដែលគួរដឹង
ស្រ្តីមេផ្ទះដែលធ្វើម្ហូបអាហារប្រហែលជាស្គាល់គ្រឿងបន្ថែមរសជាតិអាហារយ៉ាងច្បាស់មិនខាន តើបងៗស្រ្តីមេផ្ទះដឹងដែរឬទេថា គ្រឿងបន្ថែមរសជាតិអាហារដែលយើងប្រើក្នុងពេលបច្ចុប្បន្ននេះផ្តល់នូវប្រយោជន៍ និងគុណវិបត្តិអ្វីខ្លះដល់រាងកាយយើង?
គ្រឿងបន្ថែមរសជាតិអាហារដែលប្រើប្រាស់នាពេលបច្ចុប្បន្ន មិនថាតែទឹកត្រី ទឹកស៊ីអ៊ីវម្សៅស៊ុប (ប៊ីចេង) ឬដុំស៊ុបផ្សេងៗនោះឡើយ សុទ្ធតែមានប្រយោជន៍ និងគុណវិបត្តិអាស្រ័យលើវិធី បរិមាណការប្រើប្រាស់ និងការជ្រើសរើសទិញរបស់ស្រ្តីមេផ្ទះ ដែលអាហារនាពេលបច្ចុប្បន្ននេះភាគច្រើនពេញទៅដោយរសជាតិរបស់ទឹកត្រី ទឹកស៊ីអ៊ីវ ម្សៅស៊ុប និងដុំស៊ុប ធ្វើឱ្យបាត់បង់រសជាតិដើមអស់ និងបើញ៉ាំម្ហូបអាហារដែលដាក់គ្រឿងច្រើនៗ នឹងធ្វើឱ្យសុខភាពរាងកាយចុះទ្រុឌទ្រោមទៀតផង។
ប្រយោជន៍របស់គ្រឿងបន្ថែមរសជាតិអាហារ
ទោះជាមនុស្សភាគច្រើនអាចនឹងមើលឃើញតែគុណវិបត្តិរបស់វាក៏ដោយ តែនៅក្នុងការពិតវិញ វាក៏នៅមានប្រយោជន៍ខ្លះដែរដូចជា ជួយតុបតែងបង្កើនរសជាតិអាហារឱ្យល្អឡើង ឆ្ងាញ់ឡើង និងមានក្លិនឈ្ងុយ ក្រៅពីនេះទឹកត្រី ទឹកស៊ីអ៊ីវសុទ្ធតែប្រកបទៅដោយប្រូតេអ៊ីន ឬអាស៊ីតអៈមីណូដែលជាប្រយោជន៍ចំពោះរាងកាយទៀតផង។
គុណវិបត្តិរបស់គ្រឿងបន្ថែមរសជាតិអាហារ
នៅក្នុងចំណែកនៃគុណវិបត្តិវិញ អ្នកខ្លះអាចមានអាការប្រតិកម្មចាញ់ម្សៅស៊ុប គឺមានអាការវិលមុខ ដកដង្ហើមមិនស្រួល មានអាការស្ពឹកៗនៅលើផ្ទៃមុខ និងកញ្ចឹងក ចុកដើមទ្រូង ក្អួតចង្អោរ ដែលបើសិនជាមានអាការទាំងនេះកើតឡើង គួរប្រញាប់ទៅជួបគ្រូពេទ្យ និងបើទទួលទានច្រើនៗ ឬទទួលទានញឹកញាប់ក៏អាចធ្វើឱ្យកើតសភាវធាត់ឡើងបានដែរ។
គ្រឿងបន្ថែមរសជាតិឱ្យអាហារកាន់តែឆ្ងាញ់ឡើងក៏ពិតមែន តែក៏គួរតែដឹងដែរថា នៅក្នុងគ្រឿងបន្ថែមរសជាតិអាហារនោះមានគ្រឿងផ្សំផ្សេងៗដែលអាចបណ្តាលគ្រោះថ្នាក់ដល់យើងបាន បើទទួលទានក្នុងបរិមាណដែលច្រើនជ្រុលពេក ដូច្នេះបើចៀសបាន ក៏គួរតែធ្វើ ឬបន្ថែមរសជាតិក្នុងបរិមាណដែលសមរម្យក៏អាចជួយបានដែរ ដើម្បីប្រយោជន៍របស់សុខភាពអ្នកខ្លួនឯង មិនដូច្នោះទេរោគានឹងសួររកមុខអ្នកមិនខាន៕
August 6, 2020
សត្វល្អិតចូលត្រចៀក គួរធ្វើយ៉ាងណា?
ត្រចៀកជាអវយវៈដែលមានតួនាទីច្រើនយ៉ាងក្នុងពេលតែមួយ ទាំងទទួលរលកសំឡេងដែលមកពីខាងក្រៅ និងបំប្លែងជាសញ្ញាបញ្ជូនតឆ្ពោះទៅខួរក្បាល និងថែមទាំងនៅជួយគ្រប់គ្រងការទប់លំនឹងខ្លួនខណៈរាងកាយធ្វើចលនាទៀតផង ដែលបើសិនជាមានអ្វីប្លែកចម្លែកចូលទៅក្នុងត្រចៀក យើងអាចប្រថុយប្រថាននឹងការឈឺចាប់ និងកើតការធ្វើការខុសប្រក្រតី ដូចជា បាត់បង់លំនឹងខ្លួន ឬហ៊ឹងត្រចៀកជាដើម ជាពិសេសសត្វល្អិតដែលចូលទៅទាំងនោះអាចនឹងនាំមេរោគចូលទៅជាមួយផងដែរ។ ថ្ងៃនេះយើងមករៀនយល់ដឹងពីធ្វើបឋមព្យាបាលក្នុងករណីដែលមានសត្វល្អិតចូលត្រចៀក ដើម្បីនឹងបានទប់ទល់ជាមួយវាយ៉ាងត្រឹមត្រូវនៅពេលកើតហេតុបន្ទាន់ឡើង៕
សត្វល្អិតចូលត្រចៀក គ្រោះថ្នាក់ដែរឬទេ?
ការដែលមានអ្វីប្លែកចម្លែកចូលទៅក្នុងត្រចៀកអាចធ្វើឱ្យកើតគ្រោះថ្នាក់បាន ជាពិសេសសត្វល្អិត ព្រោះសត្វល្អិតអាចនឹងនាំមេរោគដែលបង្កឱ្យកើតរោគរលាក ឬមេរោគផ្សឹតនៅក្នុងរន្ធត្រចៀកបាន រឹតតែបើសិនជាសត្វចៃឆ្កែផងនោះ រឹតតែមានគ្រោះថ្នាក់ខ្លាំងទៅទៀត ព្រោះទឹកមាត់របស់សត្វចៃនឹងបង្កឱ្យកើតអាការរមាស់យ៉ាងខ្លាំង និងថែមទាំងមានមេរោគបាក់តេរីដែលពេលចូលទៅក្នុងក្រសែឈាមហើយ អាចធ្វើឱ្យកើតការឆ្លងមេរោគនៅក្នុងប្រព័ន្ធឈាមដែលជាគ្រោះថ្នាក់ខ្លាំងបំផុតចំពោះសុខភាព។
សត្វល្អិតចូលត្រចៀក មានអាការយ៉ាងណា និងមានអារម្មណ៍យ៉ាងណា?
ពេលមានសត្វល្អិតចូលទៅក្នុងត្រចៀកហើយ អាការដែលយើងសង្កេតឃើញបានច្បាស់នោះគឺ នឹងកើតអាការឈឺត្រចៀកយ៉ាងទាន់ហន់ និងមានអារម្មណ៍ថាដូចមានអ្វីម្យ៉ាងនៅក្នុងត្រចៀក បើសត្វល្អិតនោះនៅមិនទាន់ងាប់ផង នឹងមានអារម្មណ៍ថាដូចមានអ្វីដើរ ឬហោះនៅក្នុងត្រចៀក ធ្វើឱ្យកើតក្តីរំខានយ៉ាងខ្លាំង និងបើសិនជាសត្វល្អិតនោះរាងធំផង អាចនឹងមានអារម្មណ៍ថាណែនៗក្នុងត្រចៀក ឬធ្វើឱ្យហ៊ឺងត្រចៀកអស់មួយរយៈ។
សត្វល្អិតចូលត្រចៀក តើត្រូវធ្វើបឋមសង្រ្គោះយ៉ាងណា?
សត្វល្អិតដែលអាចចូលទៅក្នុងត្រចៀកបាននោះ មានច្រើនប្រភេទ មិនថាតែសត្វល្អិតខ្លួនតូចៗ ដូចជា ស្រមោច មមង់ ចៃឆ្កែ ឬសូម្បីតែសត្វល្អិតខ្លួនធំ ដូចជា រុយ កូនកន្លាតជាដើម ហើយវិធីធ្វើបឋមសង្រ្គោះមានដូចតទៅ ៈ
បើមានសត្វល្អិតចូលត្រចៀក គួរប្រញាប់ផ្អៀងក្បាលឱ្យត្រចៀកខាងដែលសត្វល្អិតចូលនោះនៅខាងលើ ហើយយកបេប៊ីអយល៍ ( Baby oil ) ឬប្រេងច័ន្ទ ឬប្រេងម្កាក់ ឬថ្នាំដាក់ត្រចៀក បន្តក់ចូលទៅក្នុងត្រចៀក ដោយទាញស្លឹកត្រចៀកទៅក្រោយដើម្បីឱ្យរន្ធត្រចៀកត្រង់ចុះទៅក្រោម ងាយស្រួលឱ្យសត្វល្អិតអាចវារឡើង ឬអណ្តែតឡើងមកបាន។ បន្ទាប់ពីនោះត្រូវស្ថិតនៅក្នុងឥរិយាបថបែបនោះប្រមាណជា 15 – 30 នាទីដើម្បីឱ្យសត្វល្អិតនោះអណ្តែតឡើងមក តែបើសិនមានសត្វល្អិតចូលត្រចៀកហើយមានអាការឈឺចាប់ក្នុងត្រចៀក មិនគួរបន្តក់ប្រេងអ្វីចូលត្រចៀកទាំងអស់ ព្រោះអាចនឹងធ្វើឱ្យអាការកាន់តែធ្ងន់ធ្ងរឡើង និងថែមទាំងមិនត្រូវយកម្រាមដៃ ឬរបស់អ្វីខ្វេះ ឬខ្វាត្រចៀកឡើយ ព្រោះអាចនឹងធ្វើឱ្យសត្វល្អិតកាន់តែធ្លាក់ទៅជ្រៅជាងមុន និងអាចបណ្តាលឱ្យមានបញ្ហាដល់ក្រដាសត្រចៀកទៀតផង។
យ៉ាងណាក៏ដោយ បើសត្វដែលចូលត្រចៀកនោះជាសត្វល្អិតតូច ដូចជា ស្រមោច មមង់ ឬមូស និងបើនៅមិនទាន់ស្លាប់ ក៏អាចប្រើវិធីជន្លវាឱ្យចេញមកវិញបានដោយការបញ្ចាំងភ្លើងពិលចូលទៅក្នុងរន្ធត្រចៀកមួយស្របក់ តែវិធីនេះត្រូវស្ថិតនៅក្នុងទីកន្លែងដែលងងឹតគ្មានពន្លឺអ្វីទាំងអស់ទើបមានប្រសិទ្ធភាព។
តែទាំងអស់នេះ បើធ្វើតាមវិធីខាងលើហើយសត្វល្អិតនៅតែមិនចេញមកទៀត ឬមានអាការផ្សេងទៀតជ្រៀតជ្រែកដូចជា ឈឺត្រចៀកធ្ងន់ធ្ងរ មានឈាម ឬទឹកហូរចេញមកពីត្រចៀក ហ៊ឹងរហូតស្តាប់អ្វីមិនឮនោះ គួរប្រញាប់ទៅជួបគ្រូពេទ្យជំនាញជាបន្ទាន់ កុំបណ្តែតបណ្តោយយូរ ព្រោះអាចកើតការឆ្លងមេរោគរហូតបណ្តាលឱ្យមានអាការធ្ងន់ធ្ងរបាន៕
August 5, 2020
ការចេះជ្រើសរើសទទួលទានអាហារតាមវ័យ នឹងធ្វើឱ្យមានសុខភាពល្អ
មានឈ្មោះថាអាហារ មិនថាតែអាហារពេលចម្បង ឬបង្អែមនោះឡើយ ឡារ៉ែនជឿថានរណាៗក៏ត្រូវតែបរិភោគដែរ តែតើមានប៉ុន្មានអ្នកទៅដែលចេះជ្រើសរើសអាហារដែលលោកអ្នកត្រូវទទួលទាននោះសក្តិសមនឹងវ័យ និងមានប្រយោជន៍ មានគុណតម្លៃដល់រាងកាយរបស់ខ្លួនឯង? ។ យើងគួរតែយកចិត្តទុកដាក់ក្នុងការជ្រើសរើសទទួលទានអាហារតាមអំឡុងពេលរបស់អាយុ ឬវ័យ ព្រោះក្នុងអំឡុងពេលនៃវ័យនីមួយៗ មានភាពខុសផ្លែកពីគ្នាខាងការវិវឌ្ឍន៍របស់រាងកាយ និងលក្ខណះការរស់នៅ ។
ក្នុងអំឡុងអាយុចាប់ពី 20 ឆ្នាំឡើងទៅ
គឺជាអំឡុងពេលដែលរាងកាយមានការវិវឌ្ឍន៍ និងចំរើនធំធាត់ពេញទំហឹង មិនថាតែរឿងការរៀនសូត្រ ការធ្វើការងារឡើយ ហើយក៏ជាវ័យដែលសកម្ម មិនចេះនឿយហត់ និងរឹតតែសកម្មក្នុងជីវិតប្រចាំថ្ងៃច្រើនប៉ុនណា រាងកាយក៏រឹតតែដុតបំផ្លាញ និងប្រើប្រាស់កម្លាំងថាមពលច្រើនប៉ុននោះដែរ ដូច្នេះគួរជ្រើសរើសទទួលទានអាហារឲ្យបានសក្តិសមនឹងតម្រូវការរបស់រាងកាយ ។
ចូរជ្រើសរើសទទួលទានពពួកសាច់សត្វ និងសណ្តែកផ្សេងៗ រួមទាំងបាយ និងម្សៅជាលំដាប់ទីមួយ តាមដោយបន្លែ ផ្លែឈើជាលំដាប់ទីពីរ ចំណែកឯទឹកដោះគោ និងអាហារជំនួសជាតិកាល់ស្យូមផ្សេងៗដូចជា តៅហ៊ូ ទឹកសណ្តែកលឿងបង្កើនកាល់ស្យូមជាលំដាប់ទីបី និងផ្តល់ភាពសំខាន់ចំពោះជាតិខ្លាញ់ជាលំដាប់ក្រោយគេបង្អស់ ។
សាច់ត្រីជាអាហារជំនួយខួរក្បាលដែលជួយរក្សាព្យាបាលជញ្ជាំងកោសិកាប្រសាទក្នុងខួរក្បាលឲ្យរឹងមាំ មិនឆាប់ភ្លេច ។ បន្លែពណ៌បៃតងដូចជា ត្រកួន កញ្ឆែត ខាត់ណា សណ្តែកកួរ ជួយបំប៉នខ្សែភ្នែក សាងឆ្អឹង និងធ្មេញឲ្យរឹងមាំ ។
វ័យដែលចាប់ផ្តើមដោយលេខ 3
អាយុឡើងដល់លេខ 3 មនុស្សជាច្រើនចាប់ផ្តើមភ័យ តែការចេះជ្រើសរើសទទួលទាន នឹងធ្វើឲ្យអ្នកឯទៀតមិនអាចស្មានដឹងពីអាយុរបស់អ្នកតាមរយះរូបរាងមុខមាត់បានឡើយ ។ ក្នុងអំឡុងវ័យចាប់ផ្តើមជាមនុស្សចាស់ តម្រូវការផ្នែកថាមពលនៅតែមាន ព្រោះជាចន្លោះជីវិតនៃការធ្វើការងារ តែត្រូវបន្ថែមការប្រុងប្រយ័ត្នក្នុងរឿងជាតិខ្លាញ់ និងកូលេស្តេរ៉ូល ព្រោះអាចមានផលប៉ះពាល់ដល់រូបរាងមុខមាត់សំបកក្រៅដែលមើលឃើញមានការប្រែប្រួលបានយ៉ាងច្បាស់ ដូច្នេះគួរចៀសវាងអាហារដែលមានជាតិខ្លាញ់ និងកូលេស្តេរ៉ូលខ្ពស់ដូចជា សាច់ជ្រូកបីជាន់ ប៊័រដុំ ខ្ទិះ ជាដើម ។
លោកអ្នកអាចជ្រើសរើសទទួលទានអាហារដែលជួយកាត់បន្ថយជាតិខ្លាញ់ និងកូលេស្តេរ៉ូលបានដូចជា ត្រីសមុទ្ទជួយកាត់បន្ថយសម្ពាធឈាម ពួកគ្រាប់សណ្តែកស្ងួតដូចជា សណ្តែកក្រហម សណ្តែកខៀវ សណ្តែកលឿង ជួយកាត់បន្ថយភាពប្រថុយពីជម្ងឺបេះដូង និងមានប្រូតេអ៊ីនខ្ពស់ និងអាហារដែលមានកាកសសៃខ្ពស់ដែលជួយឲ្យឆ្អែតពោះបានយូរ និងមានផលល្អដល់ប្រព័ន្ធពោះវៀនទៀតផង ។
វ័យដែលចាប់ផ្តើមដោយលេខ 4
ដោយសារតែសភាពរាងកាយចាប់ផ្តើមប្រែប្រួល ជាពិសេសចំពោះស្រ្តី ឯបុរសក្នុងវ័យនេះវិញក៏ចាប់ផ្តើមមានរោគផ្សេងៗកើតឡើងដែរ តែទាំងអស់នេះការពន្យាវ័យ ឬការការពាររោគផ្សេងៗដែលមកជាមួយវ័យ មិនបានលំបាកលំបឹនហួសពីយើងអាចធ្វើបាននោះឡើយ ។
សំរាប់ចន្លោះវ័យនេះតម្រូវការខាងថាមពលនឹងថយចុះ តែតម្រូវការកាល់ស្យូម និងវិតាមីនផ្សេងៗកើនឡើង ដែលរាងកាយអាចនឹងទទួលបានពីបន្លែផ្លែឈើដែលមានកាកសសៃអាហារខ្ពស់ ហើយថែមទាំងមានសារធាតុប្រឆាំងអនុមូលឥស្សរះទៀតផង ។ ឯវិតាមីន C ពីចំណីអាហារដែលងាយរកទទួលទានបាននោះ មានដូចជា ផ្លែក្រូច ត្របែក ប៉េងប៉ោះ ត្រសក់ស្រូវជាដើម ចំណែកអាហារដែលមានវិតាមីន E គឺ ប្រេងសណ្តែក ប៊័រសណ្តែក សណ្តែកដី និងគ្រាប់អាល់ម៉ុន ។ ក្រៅពីនេះគួរទទួលទានតៅហ៊ូ ប្រូតេអ៊ីនដែលមានជាតិខ្លាញ់ទាបដែលផ្តល់កាល់ស្យូមច្រើនជាងសាច់សត្វផ្សេងៗ និងគួរចៀសវាងភេស្ជជះដែលមានជាតិអាល់កុល និងកាហ្វេអ៊ីនផង ។
វ័យដែលចាប់ផ្តើមដោយលេខ 5
ការឈានចូលដល់វ័យ 50 នោះ មិនមែនមានផលប៉ះពាល់ចំពោះតែរាងកាយម៉្យាងប៉ុណ្ណោះទេ តែនៅមានផលដល់សភាពផ្លូវចិត្តផងដែរ ដើម្បីត្រៀមខ្លួនទប់ទល់ជាមួយនឹងវ័យនេះ លោកអ្នកគួរយល់ដឹងពីការធ្វើការងាររបស់រាងកាយដែលមានប្រសិទ្ធភាពថយចុះ ជាពិសេសប្រព័ន្ធការរំលាយ ការបឺតយកសារធាតុអាហារ ធ្វើឲ្យរាងកាយខ្វះសារធាតុអាហារប្រភេទខ្លះ ។
ក្នុងអំឡុងវ័យនេះអ្នកអាចមិនសូវមានអារម្មណ៍ស្រេកទឹកប៉ុន្មានទេ តែគួរទទួលទានទឹកឲ្យបានទៀងទាត់ យ៉ាងតិចមួយថ្ងៃ 8 – 12 កែវ ដើម្បីការពារការខ្វះជាតិទឹកដោយមិនដឹងខ្លួន គួរទទួលទានខាបូហាយដ្រេតឲ្យតិច សង្កត់ធ្ងន់លើអាហារពួកសាច់ត្រីដើម្បីកុំឲ្យខ្វះជាតិប្រូតេអ៊ីន និងពួកសាច់សត្វណាដែលងាយរំលាយ ។ គួរទទួលបានកាល់ស្យូមឲ្យគ្រប់គ្រាន់ ហើយអាហារដែលមានកាល់ស្យូមខ្ពស់គឺនៅក្នុងទឹកដោះ យ៉ាអួប្រភេទក្រែម និងប៊័រដុំជាដើម ។
រឿងដែលសំខាន់នោះ គឺមិនថាលោកអ្នកស្ថឹតនៅក្នុងវ័យណាក៏ដោយ គួរយកចិត្តទុកដាក់រឿងការហូបចុកឲ្យបានគ្រប៉ពេលទោះជាមានជម្ងឺ ឬគ្មានក៏ដោយ ក្រៅពីនេះគួរបង្កើនការធ្វើចលនាក្នុងមួយថ្ងៃៗឲ្យបានច្រើន និងញឹកញាប់ នឹងធ្វើឲ្យមានសុខភាពកាន់តែល្អឡើង និងកាត់បន្ថយភាពធុញថប់ តឹងតែងបានទៀតផង៕
August 5, 2020
លោក Trump ៖ សហរដ្ឋអាមេរិកនឹងអាចមានវ៉ាក់សាំងCOVID-19 នៅចុងឆ្នាំនេះ
ប្រធានាធិបតី Donald Trump បានប្រកាសថា សហរដ្ឋអាមេរិកអាចអភិវឌ្ឍវ៉ាក់សាំងCOVID-19 ដោយជោគជ័យនៅមុនកាលកំណត់ នៅចុងឆ្នាំនេះ ឬដើមឆ្នាំ2021។
“យើងកំពុងធ្វើឱ្យមានតុល្យភាពរវាងល្បឿននិងសុវត្ថិភាព។ យើងកំពុងតែ “ដុតដៃដុតជើង” ដើម្បីមានវ៉ាក់សាំងនៅក្នុងឆ្នាំនេះ ហើយវាអាចនឹងឆាប់ជាងចុងឆ្នាំ” លោក Trump ថ្លែងដូច្នេះនៅក្នុងសន្និសីទសារព័ត៌មានមួយកាលពីម្សិលមិញ (3សីហា)នៅសេតវិមាន។
លោក Trump បន្ថែមថា “យើងក៏កំពុងតែផលិតវ៉ាក់សាំងជាច្រើនដែលនឹងនាំមកនូវក្ដីសង្ឃឹមបំផុត ដើម្បីត្រៀមខ្លួនសម្រាប់ប្រើប្រាស់ភ្លាមៗបន្ទាប់ពីបានអនុម័ត។ កម្លាំងភស្តុភារនៃកងទ័ពក៏បានត្រៀមខ្លួនរួចជាស្រេចហើយដែរ”។
មេដឹកនាំសហរដ្ឋអាមេរិក បានថ្លែងដល់ប្រភេទវ៉ាក់សាំងដែលមានសក្កានុពលដែលត្រូវបានអភិវឌ្ឍដោយក្រុមហ៊ុន Pfizer និង Moderna។ ក្រុមមន្ត្រីជាន់ខ្ពស់អាមេរិកាំងបានឱ្យដឹងថា ក្រុមហ៊ុនទាំង2នេះ បានធ្វើការសាកល្បងដំណាក់កាលចុងក្រោយនៅលើមនុស្សតាំងតែពីសប្ដាហ៍មុន។ លោក Trump អះអាងថា “ទាំងនេះមិនត្រឹមតែជាក្រុមហ៊ុនល្បីឈ្មោះប៉ុណ្ណោះទេ តែថែមទាំងត្រូវបានវាយតម្លៃខ្ពស់ទៀតផង”។
ម្ចាស់សេតវិមានសង្ឃឹមថា ក្រោយពីមានវ៉ាក់សាំង សហរដ្ឋអាមេរិកអាចលុបបំបាត់COVID-19 បានយ៉ាងឆាប់រហ័សបំផុត។
បច្ចុប្បន្ន សហរដ្ឋអាមេរិកគឺជាសម្បុកវីរុសCOVID-19 ធំជាងគេបង្អស់ក្នុងពិភពលោក ដោយបានរកឃើញអ្នកផ្ទុកវីរុសចំនួន 4,862,285នាក់ និងអ្នកស្លាប់ដោយសារវីរុសនេះមានចំនួនជាង158,000នាក់។
នៅទូទាំងពិភពលោក គិតមកដល់ពេលនេះ មានអ្នកជំងឺCOVID-19 សរុប18,467,839នាក់ អ្នកស្លាប់សរុប697,876នាក់ និងអ្នកជំងឺបានជាសះស្បើយមានចំនួន11,695,336នាក់៕
ប្រភព៖ CNBC
August 4, 2020
WHO ៖ នឹងមិនមាន “ឱសថទិព្វ” សម្រាប់ប្រឆាំងនឹងCOVID-19ឡើយ
អង្គការសុខភាពពិភពលោក (WHO) យល់ថា ដំណោះស្រាយក្នុងការកម្ចាត់COVID-19 មិនមែនគ្រាន់តែប្រើប្រាស់វ៉ាក់សាំងដ៏ល្អឥតខ្ជោះណាមួយនោះឡើយ។
នៅក្នុងសន្និសីទសារព័ត៌មានមួយកាលពីថ្ងៃទី3សីហា មេដឹកនាំ WHO បានអះអាងថា ផ្លូវសម្រាប់ការប្រយុទ្ធប្រឆាំងនឹងCOVID-19 នៅវែងអន្លាយទៅមុខទៀត ហើយប្រទេសជាច្រើននឹងត្រូវបង្កើតយុទ្ធសាស្ត្រថ្មីដើម្បីទប់ស្កាត់វីរុសនេះ។
ប្រធានាអង្គការសុខភាពពិភពលោក លោក Tedros Adhanom Ghebreyesus និងប្រធានកម្មវិធីបន្ទាន់របស់ WHO លោក Mike Ryan បានផ្ដល់អនុសាសន៍ ក៏ដូចជាជំរុញឱ្យរដ្ឋាភិបាលនានា អនុវត្តវិធានការទប់ស្កាត់ការឆ្លងវីរុសនេះ ដូចជាការពាក់ម៉ាស់ រក្សាគម្លាតសង្គម លាងដៃជាញឹកញាប់ តាមដានករណីសង្ស័យ និងការធ្វើតេស្តរកមេរោគឱ្យបានច្រើនជាងមុន។ល។
លោក Tedros បានសង្កត់ធ្ងន់ថា “វ៉ាក់សាំងមួយចំនួន កំពុងស្ថិតក្នុងការសាកល្បងដំណាក់កាលទី3។ ទាំងអស់នេះសុទ្ធតែត្រូវបានរំពឹងថានឹងមានប្រសិទ្ធភាព។ ប៉ុន្តែ មិនមានដំណោះស្រាយងាយស្រួលណាមួយដើម្បីកម្ចាត់វីរុសនេះបានទាំងស្រុងនោះឡើយ ហើយលទ្ធភាពនេះក៏នឹងមិនអាចកើតមាននោះដែរ”។
នៅក្នុងគ្រាដែលពិភពលោកកំពុងតែរត់ប្រណាំងក្នុងការអភិវឌ្ឍវ៉ាក់សាំង លោក Tedros ថ្លែងថា មិនទាន់មានប្រការណាមួយប្រាកដប្រជានោះទេ។ លោកសង្កត់ធ្ងន់ថា “មានការព្រួយបារម្ភមួយចំនួនថា យើងមិនអាចផលិតបានវ៉ាក់សាំងដែលមានប្រសិទ្ធភាព ឬថាការការពាររបស់វ៉ាក់សាំងនឹងមានរយៈពេលត្រឹមតែប៉ុន្មានខែប៉ុណ្ណោះ។ នៅពេលការសាកល្បងព្យាបាលមិនទាន់ទទួលបានជោគជ័យ នោះយើងមិនអាចសន្និដ្ឋានអ្វីទាំងអស់”។
ប្រធានកម្មវិធីបន្ទាន់របស់ WHO លោក Mike Ryan បានថ្លែងថា “ប្រទេសមួយចំនួនក្នុងពិភពលោក គួរតែថយក្រោយមួយជំហាន និងពិនិត្យឡើងវិញនូវយុទ្ធសាស្ត្រក្នុងការដោះស្រាយបញ្ហាទាក់ទិននឹងជំងឺរាតត្បាតនៅតាមបន្ទាត់ព្រំដែនរបស់ពួកគេ”៕
ប្រភព៖ SCMP
August 4, 2020
អ្នកជំងឺCOVID-19 ម្នាក់ទៀតបានបាត់បង់ជីវិតនៅប្រទេសវៀតណាម
ស្ត្រីវ័យ62ឆ្នាំម្នាក់នៅទីក្រុង Da Nang ភាគកណ្ដាលនៃប្រទេសវៀតណាម បានបាត់បង់ជីវិតកាលពីព្រឹកមិញនេះ ដោយសារផលវិបាករបស់COVID-19 បូករួមជាមួយនឹងជំងឺប្រចាំកាយ។
ក្រសួងសុខាភិបាលវៀតណាមបានប្រកាសថា នេះគឺជាករណីស្លាប់ទី7 ដែលទាក់ទិននឹងការឆ្លងវីរុសCOVID-19 នៅវៀតណាម។ ក្រសួងក៏បានបញ្ជាក់ថា ទន្ទឹមនឹងវីរុសCOVID-19 អ្នកជំងឺដែលបានស្លាប់នេះ ក៏មានរោគខ្សោយតម្រងនោមដំណាក់កាលចុងក្រោយផងដែរ។
អាជ្ញាធរវៀតណាមឱ្យដឹងថា បច្ចុប្បន្ន នៅមានអ្នកជំងឺជាច្រើននាក់ទៀតកំពុងប្រឈមនឹងការស្លាប់ដោយសារCOVID-19 រួមនឹងជំងឺប្រចាំកាយ និងវ័យចំណាស់េរបស់ពួកគេ។ កន្លងមក អ្នកជំងឺCOVID-19 ចំនួន6នាក់ដែលបានបាត់បង់ជីវិត មានអាយុចាប់ពី53ដល់86ឆ្នាំ ក្នុងនោះមានករណីស្លាប់ចំនួន5ជាប់ទាកទិននឹងមន្ទីរពេទ្យក្រុង Na Nang និង2ករណីទៀតនៅខេត្ត Quang Nam ដែលមានទីតាំងនៅជាប់នឹងទីក្រុង Na Nang។
គិតមកដល់ព្រឹកនេះ តួលេខអ្នកជំងឺសរុបនៅប្រទេសវៀតណាមបានកើនដល់ 652នាក់ ក្នុងនោះមាន374បានជាសះស្បើយ 7នាក់បានស្លាប់ និង271នាក់កំពុងទទួលការព្យាបាល៕
ប្រភព៖ សារព័ត៌មានបរទេស
August 4, 2020
តួលេខអ្នកឆ្លងCOVID-19 នៅកម្ពុជាថ្ងៃនេះ កើនថែម1នាក់ទៀត ខណៈតួលេខនៅទូទាំងពិភពលោកកើនថែម75,039នាក់
ក្រសួងសុខាភិបាលកម្ពុជា នាព្រឹកនេះ (4សីហា) បានប្រកាសឱ្យដឹងថា បានរកឃើញអ្នកផ្ទុកវីរុសCOVID-19 ចំនួន1នាក់ទៀត ដែលករណីនេះត្រូវបានរកឃើញកាលពីម្សិលមិញ (3សីហា)។
ដូច្នេះ គិតមកដល់បច្ចុប្បន្ន កម្ពុជាបានរកឃើញអ្នកឆ្លងវីរុសCOVID-19 សរុបចំនួន240នាក់ ក្នុងនោះអ្នកជំងឺបានជាសះស្បើយមានចំនួន196នាក់ អ្នកជំងឺកំពុងទទួលការព្យាបាលមានចំនួន44នាក់។
នៅទូទាំងពិភពលោក មកដល់ពេលនេះបានរកឃើញអ្នកផ្ទុកវីរុសCOVID-19 សរុបចំនួន18,302,397នាក់ និងអ្នកស្លាប់សរុប694,014នាក់។ ចំណេកអ្នកជំងឺដែលបានជាសះស្បើយមានចំនួន11,508,538នាក់៕

August 4, 2020
អាការខុសប្រក្រតី 3 យ៉ាងដែលមនុស្សយើងមិនគួរហាត់ប្រាណ
ការហាត់ប្រាណមិនមែនសុទ្ធតែជារឿងល្អទាំងអស់នោះទេ យើងគួរតែត្រូវដឹងអំពីស្ថានភាពរបស់រាងកាយ កាលទេសៈ និងវិធីដែលសមស្របសំរាប់ការហាត់ប្រាណ ព្រោះបើមិនដូច្នោះទេ វាអាចហុចលទ្ធផលមិនល្អដល់រាងកាយបាន ដូចជា ធ្វើឲ្យសាច់ដុំរងរបួស ឬភ្លាត់សន្លាក់ឆ្អឹង ជាដើម ដូច្នេះហើយទើបការហាត់ប្រាណមានចំណុចគួរប្រុងប្រយ័ត្ន 3 ចំណុចដូចខាងក្រោម ៖
1 . សីតុណ្ហភាពរបស់រាងកាយ ៖ ចូរសង្កេតមើលខ្លួនឯង បើមានអាការគ្រុនក្តៅខ្លួន មានអាការភាំងៗ និងឈឺក្បាល គួរតែពន្យាពេលក្នុងការហាត់ប្រាណ ព្រោះបើយើងនៅតែចេញទៅហាត់ប្រាណទៀត វាស្មើនឹងការបន្ថែមកំដៅដល់រាងកាយទ្វេដងឡើងទៀត អាចធ្វើឲ្យខួរក្បាលទ្រាំលែងបាន នឹងកើតអាការប្រកាច់ ឬខ្យល់គដួលបាត់ស្មារតីតែម្តងក៏មានដែរ ។
2 . ការបន្ទោបង់ ៖ បើមានការបត់ជើងធំលើសពី 3 ដងឡើងទៅ ថ្ងៃនោះអ្នកគួរតែផ្អាកការហាត់ប្រាណសឹនទៅ ដោយសារតែរាងកាយរបស់យើងបាត់បង់សារធាតុ Dietary mineral ច្រើនពេក អាចមានផលប៉ះពាល់ដល់ការទទួលដឹង និងការបញ្ជារបស់ សាច់ដុំខុសប្រក្រតី ។
3 . ការអត់ងងុយ ៖ អ្នកដែលមានទម្លាប់ជាមួយការចូលគេងពេលយប់ជ្រៅ នៅម៉ោង 3 – 4 ភ្លឺ ឬគេងសំរាកមិនបានគ្រប់គ្រាន់(អត់ងងុយ) ឬសេពគ្រឿងស្រវឹងច្រើន ថ្ងៃនោះគួរតែផ្អាកការហាត់ប្រាណសឹន ។
ប្រការហាមឃាត់ផ្សេងៗទាំងនេះ គឺហាមដើម្បីមិនឲ្យរាងកាយរងរបួសកាន់តែខ្លាំងឡើង ព្រោះផលអាក្រក់ដែលកើតមកពីការហាត់ប្រាណពេលដែលរាងកាយមានសភាពមិនប្រក្រតីនោះ វាអាក្រក់ជាងការនៅស្ងៀមទៅទៀត ហើយទាំងអស់ខាងលើនេះគឺ ជាមូលហេតុមួយទៀតដែលមនុស្សជាច្រើនអាចនឹងជួបប្រទះរួចមកហើយថា ហេតុអ្វីបានជាពេលខ្លះ យើងហាត់ប្រាណរួចហើយក៏នៅតែទន់ល្វើយ គ្មានកម្លាំងកំហែង ឬមានអារម្មណ៏ថាមិនស្រស់ស្រាយសោះហ្នឹងឯង…៕
August 3, 2020
កណ្តាស់ញឹកញាប់ កុំកន្តើយ អាការនេះបង្ហាញពីរោគសញ្ញាច្រើនណាស់
ក្នុងអំឡុងពេលដែលអាកាសធាតុប្រែប្រួល រដូវកាលផ្លាស់ប្តូរ មនុស្សជាច្រើនតែងមានអាការកណ្តាស់ហាច់ឈីសៗ!ជាញឹកញាប់ ដែលប្រាកដណាស់ ច្បាស់ជានឹកភ្លែតឡើងថា ប្រហែលជាកើតផ្តាសាយមិនខាន។ អា៎…កុំអាលគិតថា អាការកណ្តាស់របស់យើងនេះ វាបញ្ចប់ត្រឹមតែជំងឺផ្តាសាយនោះ ព្រោះការពិតទៅ អ្នកណាដែលកណ្តាស់ញឹកញាប់ ព្រឹកក៏កណ្តាស់ ល្ងាចក៏កណ្តាស់ កណ្តាស់ពេញមួយថ្ងៃនេះ អាចបណ្តាលមកពីរាងកាយរបស់យើងមានលាក់បង្កប់ភាពខុសប្រក្រតីអ្វីម្យ៉ាង ឬច្រើនយ៉ាងក៏អាចថាបានដែរ។
1 . រោគប្រតិកម្មចាញ់អាកាសធាតុ
ក្នុងករណីដែលមិនមែនជាជំងឺផ្តាសាយ គឺមិនបានកណ្តាស់ និងមានទឹកសំបោរខាប់ស្អិត រួមទាំងគ្មានអាការឈឺក្បាលឡើយ ដូច្នេះវាអាចទៅរួចថា អាការកណ្តាស់ញឹកញាប់របស់អ្នកនេះ អាចបណ្តាលមកពីសភាវរបស់រោគប្រតិកម្មចាញ់ធាតុអាកាស រឹតតែនៅលើមនុស្សដែលមានអាការកណ្តាស់ញឹកញាប់ជាប់ៗគ្នា ឬមានអាការរមាស់ក្នុងភ្នែក ហៀរទឹកភ្នែករួមជាមួយផងនោះ ក៏រឹតតែសង្ស័យថាអាចនឹងកើតរោគប្រតិកម្មចាញ់អាកាធាតុ ឬជំងឺច្រមុះបានដែរ ព្រោះរោគនេះជាអាការដែលកើតឡើងនៅលើសាច់ភ្នាសក្នុងច្រមុះ ដែលសាច់ភ្នាសក្នុងច្រមុះរបស់អ្នកកើតរោគនេះនឹងឆាប់រហ័សមានប្រតិកម្មជាមួយនឹងកត្តាជំរុញជាច្រើនដូចជា សភាពអាកាសធាតុ ធូលីដី លំអងទឹកភ្លៀង កេសរបស់ផ្កា មេរោគផ្សិត រោមសត្វ ឬសូម្បីតែក្លិន និងវត្ថុដែលធ្វើឱ្យរលាកក្រហាយផ្សេងៗរហូតបង្កឱ្យកើតជាអាការកណ្តាស់ហាច់ឈីសៗហ្នឹងឯង។
2 . រលាកសាច់ភ្នាសច្រមុះ
សភាវរលាកសាច់ភ្នាសច្រមុះក៏អាចជាមូលហេតុរបស់អាការកណ្តាស់ញឹកញាប់នេះបានដែរ ដោយសាច់ភ្នាសក្នុងច្រមុុះដែលរលាកនោះច្រើនតែបណ្តាលមកពីការឆ្លងមេរោគវីរុសនៅលើប្រព័ន្ធដកដង្ហើម ឬអាចជាការឆ្លងមេរោគបាក់តេរីដែលច្រើនតែកើតនៅលើមនុស្សដែលមានប្រព័ន្ធប្រឆាំងជំងឺទាប ។ ទាំងអស់នេះយើងអាចសង្កេតអាការរលាកសាច់ភ្នាសច្រមុះនេះបានតាមរយៈអាការកណ្តាស់ញឹកញាប់ មិនព្រមបាត់ អ្នកខ្លះអាចមានក្តៅខ្លួនស្ទិញៗរួមជាមួយផង មានទឹកសំបោរពណ៌ប្រផេះ លឿង ដែលបង្ហាញពីអាការឆ្លងមេរោគ ហើយអ្នកខ្លះអាចមានអាការឈឺករួមជាមួយផងដែរ។
3 . ជំងឺឬសដូងច្រមុះ
ឬសដូងច្រមុះគឺ សភាវដែលសាច់ភ្នាសក្នុងច្រមុះមានអាការរលាក និងហើម រហូតមានលក្ខណៈលយពកចេញមកដូចជាខ្នែង ដែលច្រើនតែបណ្តាលមកពីការរលាក ឬការឆ្លងមេរោគនៅលើសាច់ភ្នាសច្រមុះរ៉ាំរ៉ៃ ភាពខុសប្រក្រតីរបស់ការតបស្នងចំពោះប្រព័ន្ធប្រសាទដែលគ្រប់គ្រងការធ្វើការរបស់សរសៃឈាមក្នុងផ្នែកដែលចិញ្ចឹមសាច់ភ្នាសច្រមុះ ដែលជាហេតុធ្វើឱ្យកើតអាការហើមលើសាច់ភ្នាសច្រមុះ។ ភាពខុសប្រក្រតីទាំងនោះអាចបង្ហាញចេញមកដោយអាការតឹងណែនច្រមុះ កណ្តាស់ញឹកញាប់ មានទឹកសំបោរថ្លាៗ ឬសំបោរមានពណ៌ព្រមជាមួយក្លិន រួមទាំងមានអាការឈឺពើតនៅត្រង់ក្តោងច្រមុះ និងថ្ពាល់ ឈឺករ៉ាំរ៉ៃ និងអាការឈឺងឿងក្បាលទៀតផង។
4 . សភាវឌឺថ្នាំ
ការប្រើថ្នាំប្រភេទដដែលៗជាប់ៗគ្នាយូរ អាចបង្កឱ្យកើតប្រតិកម្មអវិជ្ជមានចំពោះរាងកាយបាន ដោយច្រើនប្រទះឃើញថា ថ្នាំដែលអ្នកជំងឺលេបជាប់ៗគ្នារយៈពេលយូរ ជាហេតុនាំឱ្យកើតអាការរលាក ហុចផលឱ្យកើតអាការកណ្តាស់ញឹកញាប់មិនបាត់បានដូចគ្នា ដោយនឹងមានចំណុចសង្កេតបន្តិចថា អ្នកជំងឺនឹងមានអាការកណ្តាស់ក្រោយពីប៉ះពាល់នឹងអ្វីដែលជាកត្តាជំរុញ ដូចជា ផ្សែងបារី ក្លិនឈួលខ្លាំង ឬផ្សេង និងធូលីជាដើម ៕
August 3, 2020