ធ្មេញ គឺជាអវយវៈដែលមនុស្សជាច្រើនមិនសូវផ្តល់នូវការចាប់អារម្មណ៍ប៉ុន្មានឡើយ ដឹងតែថា យើងមានតួនាទីដុសៗវាឱ្យបានស្អាតតែប៉ុណ្ណោះ លុះដល់ពេលនឹកឃើញពីវាម្តងទៀត ធ្មេញយើងក៏ពុកបាត់ទៅហើយ។ ថ្ងៃនេះ ឡា រ៉ែន សូមនាំមិត្តអ្នកអានទាំងអស់មកដឹងពីរឿងរ៉ាវរបស់ធ្មេញឱ្យបានច្រើនឡើង ព្រោះនៅមានជំនឿជាច្រើនរឿងទៀតដែលយើងយល់ខុសអំពីធ្មេញមករហូត។ តើជំនឿទាំងនោះមានអ្វីខ្លះ សូមអានជាបន្ត…។
1 . ស្ករជាសត្រូវដ៏កំណាចរបស់ធ្មេញ
មិនមែនជាការពិតទេ យើងគួរតែបន្ទោសមេរោគ “បាក់តេរីចង្រៃ” ដែលផលិតអាស៊ីតធ្វើឱ្យធ្មេញយើងពុកវិញទើបត្រូវ។ សំណល់ខាបូហាយដ្រេតដែលនៅសេសសល់នៅលើធ្មេញរបស់យើង គឺជាអាហារដ៏ល្អសម្រាប់មេរោគបាក់តេរីទាំងនោះ។ ប្រាកដណាស់ ស្ករគឺខាបូហាយដ្រេត តែអាហារផ្សេងទៀតជាច្រើន ឬសូម្បីតែផ្លែឈើ ឬអាហារស៊ីរៀលក៏ស្ថិតក្នុងពពួកដែលធ្វើឱ្យលោកអ្នកពុកធ្មេញបានដែរ។
2 . ស្រ្តីមានគភ៌មិនគួរទៅជួបទន្តបណ្ឌិតទេ
មានជំនឿមួយថា ស្រ្តីដែលកំពុងតាំងគភ៌ មិនគួរទៅជួបលោកគ្រូពេទ្យធ្មេញទេ ព្រោះថ្នាំបំបាត់ការឈឺចាប់ និងថ្នាំស្ពឹកអាចធ្វើឱ្យមានផលប៉ះពាល់ដល់ទារកក្នុងផ្ទៃ តែនៅក្នុងការពិតវិញ ប្រសិនបើស្រ្តីមានគភ៌កើតមានអាការចម្លែក ឬមិនស្រួលណាមួយនៅក្នុងប្រអប់មាត់ គួរតែប្រញាប់ទៅជួបគ្រូពេទ្យធ្មេញជាបន្ទាន់ ព្រោះក្នុងការព្យាបាលសម័យថ្មីនេះ ពេទ្យធ្មេញនឹងមានថ្នាំធ្វើឱ្យស្ពឹកមិនឈឺចំពោះកន្លែងដែលឈឺតែប៉ុណ្ណោះ មិនបង្កគ្រោះថ្នាក់ដល់ទារកក្នុងផ្ទៃទេ (តែអ្វីដែលសំខាន់ សូមកុំភ្លេចប្រាប់ពេទ្យធ្មេញផងថា អ្នកកំពុងមានផ្ទៃពោះ)។
3 . ធ្មេញទឹកដោះ(ធ្មេញកំណើត) មិនចាំបាច់ទៅចាប់អារម្មណ៍វាទេ បន្តិចទៅនឹងជ្រុះដោយឯកឯង
ធ្មេញទឹកដោះច្រើនតែមានស្រទាប់ធ្មេញស្តើងជាងធ្មេញពិត ទើបវាជាហេតុធ្វើឱ្យសមត្ថភាពក្នុងការការពារមេរោគបាក់តេរីថយចុះ និងងាយធ្វើឱ្យធ្មេញពុក។ មនុស្សជាច្រើនគិតថា មិនមែនជាបញ្ហាធំនោះទេ ព្រោះបន្តិចទៅធ្មេញទឹកដោះនឹងរបូតជ្រុះមកដោយឯកឯង តែការពិតវិញ វាអាចធ្វើឱ្យបរិវេណដែលមានធ្មេញពុកនោះកើតមានការរលាក និងក្លាយជាខ្ទុះ និងហុចផលអាក្រក់ជាបន្តបន្ទាប់ទៅដល់ធ្មេញមែនទែនដែលកំពុងតែជិតដុះឡើងមកជានិរន្តរ៍នោះទៀតផង។
4 . សរសៃច្រាសដុសធ្មេញរឹងៗ នឹងជួយសម្អាតធ្មេញបានល្អ
ការពិតទៅ សរសៃច្រាសដែលទន់ៗក៏អាចសម្អាតធ្មេញបានល្អដូចគ្នាដែរ ទន្តបណ្ឌិតមួយចំនួនបានណែនាំឱ្យប្រើច្រាសដែលមានសរសៃទន់ៗដើម្បីមិនធ្វើឱ្យសាច់អញ្ចាញ និងស្រទាប់ធ្មេញរងការខូចខាត ឯច្បាប់របស់ការដុសធ្មេញវិញគឺ ងាយបំផុត ដុសធ្មេញមួយថ្ងៃ 2 ដង និងប្តូរច្រាសដុសធ្មេញរៀងរាល់ 3 – 4 ខែម្តង។
5 . លោកអ្នកត្រូវតែប្រើឈើចាក់ធ្មេញក្រោយពេលទទួលទានអាហាររួច
ឈើចាក់ធ្មេញគឺជាវត្ថុដែលបំផ្លាញអញ្ចាញធ្មេញរបស់លោកអ្នកខ្លាំងបំផុត អ្វីដែលលោកអ្នកគួរតែប្រើខ្លាំងបំផុតនោះគឺ ខ្សែអំបោះខាត់ធ្មេញ ដែលវាអាចសម្អាតធ្មេញរបស់លោកអ្នកបានយ៉ាងសព្វទីកន្លែង។
6 . ដុសធ្មេញញឹកញាប់ នឹងធ្វើឱ្យធ្មេញស្អាតរឹងមាំ
ជំនឿនេះគឺជារឿងមួយដែលខុស ព្រោះការដុសធ្មេញញឹកញាប់អាចធ្វើឱ្យកើតការសឹករេចរិលស្រទាប់ធ្មេញ ដែលជាលទ្ធផលបណ្តាលមកពីថ្នាំដុសធ្មេញដែលលោកអ្នកប្រើ។ ការប្រើទឹកថ្នាំខ្ពុរមាត់ជួយក្នុងអំឡុងពេលដុសធ្មេញក្នុងពេលព្រឹក និងមុនពេលចូលគេងនឹងជួយកម្ចាត់មេរោគបាក់តេរីក្នុងប្រអប់មាត់បាន។
7 . ឈឺធ្មេញ មានន័យថា ធ្មេញពុក
មានបច្ច័យជាច្រើនដែលធ្វើឱ្យលោកអ្នកមានអាការឈឺធ្មេញ ដូចជា អាការស្រៀវធ្មេញ រលាកសាច់អញ្ចាញ និងធ្មេញ ឬជួនកាលបញ្ហាក៏មិនបានស្ថិតនៅក្នុងប្រអប់មាត់ដែរ ដូចជា រលាកសៃណឹស ជាដើម ដូច្នេះបើលោកអ្នកត្រូវការដឹងអំពីមូលហេតុនៃបញ្ហាពិតប្រាកដនោះ គួរតែទៅជួបទន្តបណ្ឌិតទើបជាការប្រសើរបំផុត។
8 . លោកអ្នកត្រូវតែដកធ្មេញថ្គាមដែលនៅខាងក្នុងបំផុតចេញ
មានជំនឿមួយថា លោកអ្នកត្រូវតែដកធ្មេញថ្គាមគ្រាប់ទី 3 ដែលស្ថិតនៅខាងក្នុងបំផុតនោះចេញ ព្រោះវាអាចសាងបញ្ហាដល់ខ្លួនអ្នកនាពេលអនាគតបាន តែការពិតវិញបើសិនជាវាដុះឡើងមកបែបល្អប្រក្រតីធម្មតានោះ ក៏គ្មានភាពចាំបាច់អីត្រូវទៅដកវាចេញដែរ លើកលែងតែវាដុះឡើងមកមិនល្អ ឬកំពុងសាងបញ្ហាដល់អ្នកនៅពេលនោះ។
9 . គួរដុសធ្មេញក្រោយពេលញ៉ាំអាហាររួចគ្រប់ពេល
ជាជំនឿមួយដែលខុសយ៉ាងស្រឡះ ព្រោះក្នុងអំឡុងពេលទទួលទានអាហារ មានឱកាសច្រើនណាស់ដែលធ្មេញរបស់លោកអ្នកនឹងប៉ះជាមួយ “អាស៊ីត” ដែលមាននៅក្នុងអាហារ ដែលនឹងធ្វើឱ្យស្រទាប់ស្រោបធ្មេញទន់ជ្រាយ ដូច្នេះការដុសធ្មេញក្រោយពេលញ៉ាំអាហារហើយភ្លាមគឺជាការបង្កើនឱកាសក្នុងការធ្វើឱ្យធ្មេញកាន់តែឆាប់សឹករេចរិលអស់ទៅទៀត។ វិធីដែលល្អបំផុត គឺការខ្ពុរមាត់ឱ្យស្អាតក្រោយពេលញ៉ាំអាហាររួច ឬបើចង់ដុសធ្មេញ ក៏គួររង់ចាំ 30 នាទីបន្ទាប់មកទើបជាការប្រសើរ៕
