Category: សុខភាព

នៅពេលនិយាយអំពីវីតាមីន មនុស្សភាគច្រើនតែងតែនឹកដល់ថ្នាំគ្រាប់ និងច្រើនតែយល់ខុសថា វីតាមីនគឺជាថ្នាំសម្រាប់ព្យាបាលជំងឺ។ ទោះជាវីតាមីននឹងបំពេញតួនាទីបានដូចថ្នាំក៏ដោយ តែក៏វីតាមីនមិនមែនជាថ្នាំព្យាបាលរោគដែេ។ វិតាមីន គឺជា​សារធាតុសរីរាង្គដែលចាំបាច់ចំពោះជីវិត ព្រោះវាជួយឱ្យរាងកាយបំពេញតួនាទីបានតាមប្រក្រតី តែទាំងអស់នេះរាងកាយមិនអាចសាងវីតាមីនឡើងមកដោយខ្លួនឯងបានទេ។

បើរាងកាយគឺជាគ្រឿងយន្ត វីតាមីនគឺជាប៊ូហ្ស៊ី ដោយវាជាផ្នែកមួយក្នុងប្រព័ន្ធអង់ហ្ស៊ីមដែលធ្វើការស្រដៀងនឹងប៊ូហ្ស៊ីរបស់គ្រឿងយន្តដែរ វាផ្តល់ថាមពល និងគ្រប់គ្រងទហនកម្ម(ការបញ្ឆេះ)ខាងក្នុងរាងកាយ ធ្វើឱ្យយើងមានថាមពល មានកម្លាំងកំហែងក្នុងការធ្វើការងារ។ បើប្រៀបធៀបជាមួយ ប្រូតេអ៊ីន ខ្លាញ់ កាបូហាយដ្រេតវិញ បរិមាណការទទួលបានរបស់វីតាមីនអាចរាប់បានថា តិចខ្លាំងណាស់ តែកុំភ្លេចថា បើសិនជាខ្វះវីតាមីនមួយណាដែលចាំបាច់ចំពោះរាងកាយ ក៏អាចនឹងធ្វើឱ្យកើតមានគ្រោះថ្នាក់ដល់រាងកាយគ្រប់ផ្នែកបានទាំងអស់។

វិតាមីនមានចំណែកជួយក្នុងការចម្រើនធំធាត់ និងការមានសុខភាពរឹងប៉ឹង ប៉ុន្តែវីតាមីននឹងមាននៅក្នុងអាហារតាមធម្មជាតិត្រឹមតែបន្តិចបន្តួចប៉ុណ្ណោះ ដែលនេះហើយជាហេតុផលថា ហេតុអីបានយើងត្រូវទទួលទានអាហារបំប៉ននោះ។ វីតាមីនដែលស្ថិតនៅក្នុងរូបភាពជាផលិតផលអាហារបំប៉នមានច្រើនបែប ដូចជា បែបគ្រាប់ ទឹក ចាហួយ ម្សៅ ឬបែបចាក់ និងទោះវាជាសាធាតុដែលច្នៃចម្រាញ់ឡើងក៏ដោយ តែក៏បានមកពីរុក្ខជាតិ ឬសត្វក្នុងធម្មជាតិដែរ។

“រាងកាយមនុស្សយើងប្រហែលជាមិនអាចរស់នៅបានទេ បើខ្វះវីតាមីនដែលចាំបាច់គ្រប់ប្រភេទ”

ជំនឿខុសៗពាក់ព័ន្ធនឹងវីតាមីន

– វីតាមីនមិនអាចជំនួសអាហារបានទេ

– វីតាមីនមិនអាចបឺតជ្រាបទៅក្នុងរាងកាយបានទេ បើមិនបានទទួលទានរួមជាមួយអាហារ

– អ្នកមិនអាចទទួលទានតែវីតាមីន ហើយឈប់ទទួលទានអាហារផ្សេងទៀត ដោយសង្ឃឹមថា នឹងមានសុខភាពល្អបានទេ

– វីតាមីនមិនមែនជាផ្នែកប្រកបរបស់គ្រោងសាងក្នុងរាងកាយមនុស្សទេ

– វីតាមីនមិនអាចជំនួសដោយប្រូតេអ៊ីន អំបិលរ៉ែ ទឹក កាបូហាយដ្រេត ឬសូម្បីតែជំនួសគ្នាឯងក៏ដោយ!

– វីតាមីនមិនមែនជាថ្នាំរម្ងាប់សរសៃប្រសាទទេ និងមិនបានផ្ដល់កម្លាំងថាមពល ឬកាឡូរីដល់រាងកាយឡើយ៕

មនុស្សយើងគ្រប់រូប ម្នាក់ៗសុទ្ធតែមានសម្ព័ន្ធភាពយ៉ាងស៊ីជម្រៅជាមួយទឹកភ្នែកពេញមួយជីវិត សាកល្បងគិតទៅមើល៍ នៅពេលកើតមកភ្លាម រឿងដំបូងគេដែលយើងធ្វើមុននឹងបើកភ្នែកមើលពិភពលោក គឺការហាមាត់ស្រែកយំ លុះដល់ធំឡើង យើងក៏ប្រើទឹកភ្នែកបង្ហាញពីអារម្មណ៍សោកស្ដាយខូចចិត្ត(ឬត្រេកអរនៅពេលខ្លះ) និងច្រើនដងណាស់ដែលវាហូរចេញមកប្រៀបដូចទឹកបាក់ទំនប់ ដោយសារគ្រាន់តែយើងហាន់មើមខ្ទឹមបារាំង!។

មើលទៅវាហាក់ដូចជាថា តំណក់ទឹកថ្លាៗដែលហូរចុះមកលើថ្ពាល់របស់យើងនេះ មានរឿងរ៉ាវអាថ៌កំបាំងច្រើនគួរសម…

ដូច្នេះថ្ងៃនេះយើងនាំគ្នាមកមើលពីរឿង 7 យ៉ាងដែលយើងមិនធ្លាប់ដឹងពាក់ព័ន្ធនឹងទឹកភ្នែកនេះ ធានាថា លោកអ្នកច្បាស់ជានឹកចម្លែកចិត្តមិនខាន។

1 . ហៅថា “ទឹកភ្នែក” តែមិនមែនជា ទឹក ទេ

ទឹកដែលហូរចេញមកពីកែវភ្នែក វាត្រូវតែជាទឹកហ្នឹងហើយ!។ មិនខុសទេ! តែក៏មិនបានត្រឹមត្រូវទាំងអស់ដែរ។ ការពិតទៅ ទឹកភ្នែករបស់យើងមានលក្ខណៈដូចជាបន្ទះហ្វ៊ីលម៍ដែលដាក់ពីលើគ្នា 3 ជាន់។

ជាន់ក្រៅបំផុត ឬ “ស្រទាប់ខ្លាញ់” ( Lipid layer ) មានខ្លាញ់ជាផ្នែកផ្សំចម្បង មានតួនាទីការពារការហើរស្ងួតរបស់ទឹកភ្នែក បញ្ចៀសពន្លឺ និងជួយក្នុងការមើលឃើញ។

ជាន់ទីពីរ ហៅថា “ស្រទាប់សារធាតុទឹក” ( Aqueous layer ) ប្រាកដណាស់! មានទឹកជាចំណែកផ្សំចម្បង និងនៅមានផ្សំដោយសារធាតុសំខាន់ផ្សេងៗដូចជា អំបិលរ៉ែ ប្រូតេអ៊ីន និងសារធាតុការពារជំងឺផ្សេងៗទៀតផង។ មុខនាទីរបស់ស្រទាប់សារធាតុទឹកភ្នែកដែលសំខាន់បំផុតគឺ ផ្ដល់អុកស៊ីហ្ស៊ែនដល់កែវភ្នែក និងជាប្រភពអាហារសំខាន់របស់កែវភ្នែក។

ជាន់ក្នុងបំផុត ជា “ស្រទាប់រំអិល” ( Mucous layer ) ប្រកបដោយរំអិល ប្រូតេអ៊ីន និងអំបិលរ៉ែ មានតួនាទីធ្វើឱ្យស្រទាប់កញ្ចក់ភ្នែករាប ជួយឱ្យសម្លឹងមើលឃើញច្បាស់ ជួយរំអិលស្រទាប់ផ្នែកខាងមុខកែវភ្នែក និងស្ទាក់ចាប់វត្ថុប្លែកចម្លែក ជួយការពារមិនឱ្យភ្នែកជាប់មេរោគ។

2 . ច្រើនជាង 1 តែមានដល់ទៅ 3

ប្រយោគនេះមិនមែនជាការផ្សាយពាណិជ្ជកម្មលក់ទំនិញទេ តែជាប្រភេទ “ទឹកភ្នែក” របស់មនុស្សយើងហ្នឹងឯង។ ទោះជាមានសភាព និងរូបរាងទ្រង់ទ្រាយដូចគ្នាទាំងអស់មែន តែការពិតវិញ ទឹកភ្នែកមានដល់ទៅ 3 ប្រភេទឯណោះ។

– Basal Tear ទឹកភ្នែកដែលហូរចេញមកគ្រប់ពេលវេលា ដើម្បីផ្ដល់សំណើមដល់កែវភ្នែក និងការពារធូលីដី។

– Reflex Tear បើត្រឹមតែមានធូលីដីហើរចូលភ្នែក ហើយចេញទឹកភ្នែកនោះ ហ្នឹងហើយគឺ Reflex Tear។ ជាទឹកភ្នែកដែលហូរចេញមកក្នុងបរិមាណច្រើននៅពេលមានកម្ទេចអ្វីម្យ៉ាងចូលភ្នែក ឬនៅពេលមានអារម្មណ៍ថា ក្ដៅក្រហាយភ្នែក ដូចជា ពេលហាន់មើមខ្ទឹមបារាំង ឬប៉ះនឹងពន្លឺចាំងខ្លាំងៗជាដើម។

– Emotional Tear ជាទឹកភ្នែកដែលមានតែមនុស្សប៉ុណ្ណោះដែលអាចបង្ហូរចេញមកបាន។ វានឹងហូរចេញមកនៅពេលកើតមានអារម្មណ៍ផ្សេងៗ ដូចជា សោកសៅ ខូចចិត្ត អផ្សុក ខកបំណងស្នេហ៍ ត្រេកអរខ្លាំង ជាដើម តែភាគច្រើន…ប្រាកដណាស់!…ជាទឹកភ្នែកនៃក្ដីសោកស្ដាយខូចចិត្ត។

3 . មិនយំ មិនមែនមានន័យថា មិនមានទឹកភ្នែកនោះទេ

កុំអាលភ្ញាក់ផ្អើលអី! ព្រោះអាចនឹងស្ដាប់មើលទៅរាងកម្សត់ តែវាជាសភាវប្រក្រតីរបស់រាងកាយមនុស្សយើង។ ទឹកភ្នែកប្រភេទ Basal Tear របស់យើងនឹងហូរចេញមកដើម្បីថែរក្សាកែវភ្នែកឱ្យមានសំណើមគ្រប់ពេលវេលា តែហូរចេញមកក្នុងបរិមាណតិចបំផុត មួយថ្ងៃត្រឹមតែ 5 – 10 អនស៍ប៉ុណ្ណោះ ហើយនឹងហើរស្ងួតទៅវិញប្រមាណជា 10 – 20%គ្រប់ពេលដែលយើងបើកភ្នែក ទើបយើងស្ទើរតែមិនដឹងឡើយថា មានទឹកភ្នែកកំពុងថែទាំយើង។

4 . ទឹកភ្នែក និងទឹកសមុទ្រ…ដូចគ្នាទេ?

ហេតុអីបានជាទឹកភ្នែកមានរសជាតិប្រៃដូចទឹកសមុទ្រដែរ? ជាទឹកតែមួយដូចគ្នាឬយ៉ាងណា?

ទេ…ខុសគ្នាស្រឡះ! ព្រោះនៅក្នុងទឹកភ្នែក និងទឹកសមុទ្រមានចំណែកផ្សំរបស់ “អំបិល” ឬសូដ្យូមខ្លូរ៉ាយដ៍ដូចគ្នាមែន តែកម្រិតជាតិប្រៃរបស់ទឹកភ្នែកខុសប្លែកពីគ្នាអាស្រ័យលើបច្ច័យជាច្រើន ដូចជា ការយំ និងការត្រេកអរ ឬរំភើបចិត្តជាដើម។

5 . គ្មានទឹកភ្នែក…អាចនឹងមើលឃើញមិនច្បាស់

អ្នកណាទៅដឹងថា វត្ថុសំខាន់មួយដែលធ្វើឱ្យមនុស្សយើងមើលឃើញបានច្បាស់នោះគឺ “ទឹកភ្នែក”?។ ក្រៅពីនឹងជួយឱ្យមានសំណើមដល់កែវភ្នែកហើយ ទឹកភ្នែកនៅជួយសម្អាតកញ្ចក់ភ្នែក ធ្វើឱ្យយើងមើលឃើញបានច្បាស់ល្អឡើង។ ដូច្នេះ យើងគួរមើលថែទាំសុខភាពកែវភ្នែកឱ្យមានទឹកភ្នែកចេញមកចិញ្ចឹមកែវភ្នែកជាប់ជានិច្ចដោយការឧស្សាហ៍ប៉ប្រិចភ្នែកឱ្យបានញឹកញាប់ ចៀសវាងពីបរិស្ថាន និងទង្វើដែលធ្វើឱ្យទឹកភ្នែកងាយហើរស្ងួត ដូចជាការប្រើខ្សែភ្នែកយូរៗជាដើម។

6 . មានអារម្មណ៍តានតឹងពិបាកចិត្ត ក៏យំចេញមក!

ផ្នែកមួយពីការសិក្សាស្រាវជ្រាវរឿងទឹកភ្នែករបស់លោក William Frey អ្នកជីវគីមីនៃមជ្ឈមណ្ឌលវិភាគកែវភ្នែកបានប្រាប់ថា គ្រប់ពេលដែលយើងទួញយំ សារធាតុអេនដូហ្វ៊ីននឹងហូរចេញមក ជួយកាត់បន្ថយកម្រិតអ័រម៉ូននៃភាពតានតឹងពិបាកចិត្តបាន។ ដោយលទ្ធផលនៃការសិក្សាស្រាវជ្រាវរបស់ Frey ក៏បានរកឃើញទៀតថា មនុស្សប្រុសជាង 73% និងស្រ្តីជាង 75% និយាយថា មានអារម្មណ៍ធូរស្រាល និងសប្បាយចិត្តឡើងវិញនៅពេលបានយំរួច។

7 . តើមនុស្សប្រុស និងមនុស្សស្រីយំដូចគ្នាឬទេ?

ការសិក្សាស្រាវជ្រាវពីស្ថាប័នជាច្រើនបានរកឃើញថា “ស្រ្តីមានសញ្ញាថានឹងយំញឹកញាប់ជាបុរស” ដោយអ្នកគីមីវិទ្យា William Frey ប្រធានក្រុមអ្នកស្រាវជ្រាវដែលបានប្រើពេលវេលាសិក្សាអំពីទឹកភ្នែកជាពិសេសអស់រយៈពេលដល់ទៅ 15 ឆ្នាំបានរាយក្ារណ៍ថា ក្នុង 1 ខែស្រ្តីយំ 5.3 ដង ចំណែកបុរសវិញយំប្រមាណតែ 1.4 ប៉ុណ្ណោះ។ ភាពញឹកញាប់នៃការយំដែលខុសប្លែកពីគ្នានេះ មួយផ្នែកកើតឡើងពី “អ័រម៉ូនប្រូលែកទីន” ដែលរាងកាយនឹងផលិតចេញមកនៅពេលដែលយើង “មានអារម្មណ៍ខ្លាំងដល់ទីបំផុត” ដូចជា ត្រេកអរបំផុត រំភើបចិត្តបំផុត ខូចចិត្ត ឬសោកស្ដាយបំផុត រហូតទៅដល់មួម៉ៅ តានតឹងតែនិយាយមិនចេញ និងពិបាកចិត្តបំផុត ជាដើម។ ក្នុងអំឡុងអារម្មណ៍បែបនេះ រាងកាយនឹងទម្លាយចេញមកជាដំណក់ទឹកភ្នែក ដើម្បីបញ្ចុះកម្រិតភាពតានតឹង ដោយស្រ្តីនឹងផលិតអ័រម៉ូននេះបានច្រើនជាងបុរសដល់ទៅ 4 ដង ទើបវាជាដើមហេតុឱ្យមនុស្សស្រីមានសញ្ញា និងទំនោរក្នុងការឆាប់ទួញយំ និងរំអួយជាងបុរស តែទាំងអស់នេះ វាអាស្រ័យលើហ្ស៊ែន ខ្នាតរបស់បំពង់បង្ហូរទឹកភ្នែករបស់មនុស្សម្នាក់ៗ និងការចិញ្ចឹមមើលថែរបស់គ្រួសារផងដែរ។​

ឃើញទេថា ទឹកភ្នែកដែលជាចំណែកតូចមួយរបស់រាងកាយយើង មានអ្វីដែលគួរឱ្យចាប់អារម្មណ៍ច្រើនណាស់ និងថែមទាំងបំពេញតួនាទីចម្បងៗ ជួយឱ្យយើងមើលឃើញបានយ៉ាងមានប្រសិទ្ធភាពទៀតផង។ បានដឹងបែបនេះហើយ ចូរកុំភ្លេចងាកមកយកចិត្តទុកដាក់មើលថែទាំទឹកភ្នែក ដោយឧស្សាហ៍ទៅជួបគ្រូពេទ្យជំនាញខាងភ្នែកដើម្បីទទួលយកការណែនាំក្នុងការមើលថែទាំសុខភាពកែវភ្នែក រួមទាំងពិនិត្យរកមើលអាការខុសប្រក្រតីផ្សេងៗ ដូចជា សភាវភ្នែកឡើងស្ងួត ជាដើម។ល។ ទាំងអស់នេះគឺដើម្បីប្រសិទ្ធភាពក្នុងការមើលឃើញដែលល្អបំផុត៕

សហព័ន្ធការពារ និងប្រឆាំងជំងឺទឹកនោមផ្អែមអន្តរជាតិបានបង្ហើបឱ្យដឹងពីស្ថិតិអ្នកជំងឺទឹកនោមផ្អែមថា នៅឆ្នាំ 2014 នៅទូទាំងពិភពលោកមានអ្នកជំងឺទឹកនោមផ្អែម 415 លាននាក់ និងរៀងរាល់ 6 វិនាទីនឹងមានអ្នកស្លាប់ដោយសារជំងឺនេះ 1 នាក់ និងបានប៉ាន់ប្រមាណថា នៅក្នុងឆ្នាំ 2050 ចំនួនកើតអ្នកជំងឺទឹកនោមផ្អែមនឹងកើនឡើងដល់ទៅ 642 លាននាក់ ហើយអ្នកកើតជំងឺនេះមួយផ្នែកគឺបណ្ដាលមកពីទង្វើនៅក្នុងជីវិតប្រចាំថ្ងៃ ជាពិសេសក្រុមមនុស្សក្នុងវ័យធ្វើការ អាយុ 35 ឡើងទៅ តែលោកអ្នកអាចកែសម្រួលទង្វើនានារបស់ខ្លួនដើម្បីកាត់បន្ថយភាពប្រថុយប្រថាននេះបាន។

លោកវេជ្ជបណ្ឌិតជំនាញនៃមន្ទីរពេទ្យល្បីល្បាញមួយបានរៀបរាប់ឱ្យស្ដាប់ថា ជំងឺទឹកនោមផ្អែម គឺជាជំងឺដែលរាងកាយមិនអាចគ្រប់គ្រងកម្រិតជាតិស្ករបាន ធ្វើឱ្យកម្រិតជាតិស្ករក្នុងឈាមឡើងខ្ពស់គ្រប់ពេលវេលា។

ជំងឺទឹកនោមផ្អែមចែកចេញជា 4 ប្រភេទ

– ប្រភេទទី 1 ជួបប្រទះនៅលើកុមារ និងមនុស្សវ័យជំទង់ ឃើញច្រើននៅលើជនជាតិលោកខាងលិច ដោយក្រុមនេះរាងកាយខ្វះសារធាតុអ៊ីនស៊ូលីនជាប្រចាំ ត្រូវពឹងលើការចាក់អ៊ីនស៊ូលីនរហូតមួយជីវិត និងរាងកាយហាក់ដូចជារាងស្គម។

– ប្រភេទទី 2 ជួបប្រទះនៅលើមនុស្សធំ ជារោគទឹកនោមផ្អែមដែលប្រទះឃើញទូទៅ ដោយអ្នកជំងឺនៅក្នុងប្រទេសយើងភាគច្រើនស្ថិតក្នុងប្រភេទនេះ កើតដោយសាររាងកាយឌឺនឹងសារធាតុអ៊ីនស៊ូលីន អ្នកជំងឺច្រើនតែធាត់។

– ប្រភេទទី 3 រោគទឹកនោមផ្អែមដែលជួបប្រទះក្នុងអំឡុងពេលតាំងគភ៌។ ជាលទ្ធផលមកពីអ័រម៉ូនរបស់ការតាំងគភ៌ សភាវរបស់រោគនេះនឹងល្អប្រសើរឡើងវិញក្រោយការប្រសូត តែស្រ្តីជាម្ដាយនឹងមានភាពប្រថុយប្រថានក្នុងការកើតរោគទឹកនោមផ្អែមនេះទៀត។

– ប្រភេទទី 4 បណ្ដាលមកពីរោគក្រពេញគ្មានទបង្ហូរ។ រាងកាយផលិតស្ទៀរ៉យដ៍ច្រើនជ្រុល ឬការប្រើប្រាស់ថ្នាំប្រភេទខ្លះដែលមានស្ទៀរ៉យដ៍ តែអាការនេះនឹងជាបាត់ទៅវិញនៅពេលបានព្យាបាល ឬឈប់ប្រើថ្នាំទាំងនោះ។

តើធ្វើម៉េចទើបដឹងថា រាងកាយចូលដល់ដំណាក់កាលប្រថុយក្នុងការកើតរោគទឹកនោមផ្អែម?

សាកល្បងសង្កេតមើលថា តើខ្លួនឯងមានអាការទាំងអស់នេះឬទេ? ដូចជា ស្រេកទឹកញឹកញាប់ បត់ជើងតូចញឹកញាប់ និងទឹកមូត្រមានចំនួនច្រើន ធ្វើឱ្យរាងកាយបាត់បង់ជាតិទឹក និងអំបិលរ៉ែ បណ្ដាលឱ្យទន់ល្វើយគ្មានកម្លាំង និងទម្ងន់ខ្លួនថយចុះ។ អ្នកខ្លះដល់ថ្នាក់គាំងក្រលៀន និងស្លាប់ទៀតផង។ អ្នកខ្លះទៀតនឹងមានឡើងកន្ទាលត្រអាកដែលបណ្ដាលមកពីមេរោគផ្សិតនៅតាមសន្លាក់ដៃជើង មានធ្លាក់ស ភ្នែកស្រវាំង និងស្ពឹកនៅលើចុងដៃចុងជើង។

រោគដែលនឹងជ្រៀតជ្រែកចូលមកគួរឱ្យកង្វល់

រឿងដែលគួរវិតក្កកង្វល់ និងជាមូលហេតុនៃការបាត់បង់ជីវិតរបស់អ្នកជំងឺទឹកនោមផ្អែមគឺ រោគជ្រៀតជ្រែករ៉ាំរ៉ៃ ដែលជួបប្រទះញឹកញាប់គឺ ៖

– រោគជ្រៀតជ្រែករ៉ាំរ៉ៃរបស់ទឹកនោមផ្អែមក្នុងផ្ទាំងកញ្ចក់ប្រសាទភ្នែក ធ្វើឱ្យកញ្ចក់ប្រសាទភ្នែកចុះខ្សោយ មានឈាមចេញនៅក្នុងកែវភ្នែក ហុចផលឱ្យភ្នែកខ្វាក់ ដែលបើសិនមានការពិនិត្យលម្អិតឃើញសភាវទឹកនោមផ្អែម នឹងជួយការពារសភាវខ្វាក់ភ្នែកបាន។

– រោគជ្រៀតជ្រែករ៉ាំរ៉ៃរបស់ទឹកនោមផ្អែមនៅក្នុងក្រលៀន ឃើញមានប្រូតេអ៊ីនលាយឡំចេញមកជាមួយទឹកមូត្រ បើសិនជាទុកចោលមិនព្យាបាល ក្រលៀននឹងធ្វើការបានកាន់តែតិច ចុះខ្សោយ និងកើតសភាវគាំងក្រៀននៅទីបំផុត។

– រោគស្ពឹកសរសៃប្រសាទ អ្នកជំងឺនឹងគ្មានអារម្មណ៍ដឹងពីការប៉ះពាល់ នៅពេលកើតការប៉ះទង្គិចខាងរាងកាយនឹងគ្មានអារម្មណ៍ថាឈឺចាប់ ធ្វើឱ្យកើតមានស្នាមរបួសបានយ៉ាងងាយ និងស្នាមរបួសពិបាកព្យាបាល ដោយសារតែការហូរវិលទៅមករបស់ឈាមមិនល្អ។ នៅលើអ្នកខ្លះ ទោះជាគ្មានស្នាមរបួស តែក៏រកឃើញអាការឈាមមិនហូរវិលទៅមកដែរ ទើបធ្វើឱ្យអ្នកជំងឺត្រូវបាត់បង់អវយវៈអស់ជាច្រើន។

ក្រៅពីនេះនៅជួបប្រទះអាការស្ពឹកមួយកំណាត់ខ្លួន និងជំងឺបេះដូងជាញឹកញាប់នៅលើអ្នកជំងឺទឹកនោមផ្អែមទៀតផង ដោយអ្នកជំងឺទឹកនោមផ្អែមដែលកើតរោគបេះដូងនេះ នឹងគ្មានបង្ហាញអាការឈឺចាប់ដាស់តឿនឱ្យដឹងឡើយ ធ្វើឱ្យកើតអាការគាំងបេះដូងទាន់ហន់នាំឱ្យមានគ្រោះថ្នាក់ជីវិតបាន។

ក្រុមមនុស្សដែលមានឱកាសកើតរោគទឹកនោមផ្អែម

អ្នកដែលមានអាយុ 35 ឆ្នាំឡើង មានសភាវធាត់ដុះក្បាលពោះធំ អ្នកដែលមិនហាត់ប្រាណ ឬមិនសូវបានធ្វើចលនា ដែលបុគ្គលិកធ្វើការក្នុងការិយាល័យក៏អាចរាប់បានថា មានសភាវប្រថុយប្រថានដូចគ្នា រួមទាំងអ្នកជំងឺដែលប្រើថ្នាំស្ទៀរ៉យដ៍ អ្នកធ្លាប់មានប្រវត្តិកើតរោគទឹកនោមផ្អែម ឬជាមនុស្សនៅក្នុងគ្រួសារដែលមានប្រវត្តិកើតរោគទឹកនោមផ្អែម ជាដើម។ ទាំងអស់នេះគឺជាក្រុមដែលត្រូវតែត្រួតពិនិត្យលម្អិតទឹកនោមផ្អែម។

តើត្រូវកែសម្រួលទង្វើយ៉ាងណាទើបចៀសពីទឹកនោមផ្អែមបាន?

– ហាត់ប្រាណ ឱ្យសាច់ដុំធ្វើចលនាជាបន្តបន្ទាប់រហូតមានចេញញើស និងបេះដូងលោតញាប់ ក្នុងមួយសប្ដាហ៍ 5 ថ្ងៃ។

– ប្រយ័ត្នប្រយែងលើអាហារកាហូបចុក ជាពិសេសអាហារប្រភេទម្សៅ និងស្ករ ដើម្បីមិនធ្វើឱ្យកើតសភាវធាត់ដុះក្បាលពោះធំ។​

– ចុងក្រោយ លោកគ្រូពេទ្យសូមណែនាំដល់អ្នកដែលស្ថិតក្នុងក្រុមប្រថុយប្រថានទាំងអស់ គួេពិនិត្យលម្អិតទឹកនោមផ្អែម ដែលអាចធ្វើបានតាមរយៈ 3 វិធីនេះគឺ ពិនិត្យជាតិស្ករមុនទទួលទានអាហារពេលព្រឹក ដោយតមពិសាអាហារយ៉ាងតិច 8 ម៉ោងមុនពិនិត្យឈាម ។ ពិនិត្យឈាមនៅទីណាក៏បាន ដោយមិនបាច់ត្រូវតមអាហារ និងពិនិត្យជាតិស្ករនៅក្នុងគ្រាប់ឈាមក្រហម ព្រោះការរកឃើញសភាវរោគទឹកនោមផ្អែមតាំងពីដំបូងៗ នឹងអាចធ្វើការព្យាបាល និងការពាររោគជ្រៀតជ្រែកបានទាន់ពេលវេលាភ្លាមៗ៕

ក្រសួង​សុខាភិបាល​កម្ពុជា​ នា​ព្រឹក​ថ្ងៃទី​31​សីហា​នេះ​ បាន​ឱ្យ​ដឹង​ថា បាន​រកឃើញ​អ្នក​ឆ្លង​វីរុស​COVID-19 ចំនួន​1​ករណី​បន្ថែម​ទៀត ទន្ទឹម​នឹង​អ្នក​ជាសះស្បើយ​ចំនួន​1​ករណី​។

យោង​តាម​ក្រសួង​សុខាភិបាល​កម្ពុជា អ្នក​ជំងឺ​ថ្មី​1​ករណី​ខាង​លើ​នេះ គឺជា​ជនជាតិបារាំង​ វ័យ​30​ឆ្នាំ មាន​ទីលំនៅ​នៅ​ក្នុង​រាជ​ធានី​ភ្នំ​ពេញ​។ អ្នកជំងឺ​នេះបាន​​មកដល់​​កម្ពុជា​នៅ​ថ្ងៃទី​30​កក្កដា ក្រោយ​ពី​​បាន​ធ្វើ​ដំណើរ​ពី​​ប្រទេស​បារាំង​ទៅ​កាន់​កោះ​តៃវ៉ាន់ មុន​នឹង​មក​ដល់​កម្ពុជា​។

គិត​មកដល់​បច្ចុប្បន្ន កម្ពុជា​បាន​រកឃើញ​អ្នក​ឆ្លងវីរុស​COVID-19 សរុប​ចំនួន​274​នាក់ ក្នុង​នោះ​មាន​266​នាក់​បាន​ជាសះស្បើយ និង​8​នាក់កំពុង​ទទួល​ការ​ព្យាបាល​។

នាព្រឹក​ថ្ងៃទី​29​សីហា​នេះ ក្រសួង​សុខាភិបាល​​បាន​ប្រកាស​ថា​ កម្ពុជា​មិន​បាន​​រកឃើញ​ករណី​ឆ្លងវីរុស​COVID-19 ​ថ្មី​ ឬ​ករណី​ជាសះស្បើយ​ថ្មី​ណាមួយ​នោះ​ទេ​ ខណៈ​​ពិភពលោក​ទាំង​មូល​ទើប​រក​ឃើញ​អ្នកឆ្លងCOVID-19​ថ្មី​ ចំនួន​6,169​ករណី និង​អ្នក​ស្លាប់​ថ្មី​មាន​ចំនួន​557​ករណី​។

ពិភពលោក​ទាំង​មូល​បាន​រក​ឃើញ​អ្នកឆ្លងវីរុស​COVID-19​ សរុប​ចំនួន​24,905,128​នាក់ និង​អ្នកជំងឺ​ចំនួន​841,218​នាក់​បាន​បាត់​បង់​ជីវិត​​។ ក្នុង​រយៈ​ពេល​24​ម៉ោង​ចុង​ក្រោយ​នេះ ប្រទេស​និង​ដែនដី​ជាង​200​បាន​រក​​ឃើញ​ករណី​ឆ្លងវីរុស​​ថ្មី​ចំនួន​6,169​នាក់ និង​អ្នក​ស្លាប់​ថ្មី​មាន​ចំនួន​557​នាក់​​។ ក្នុង​ចំណោម​អ្នកដែល​បាន​ឆ្លង​វីរុស​នេះ មាន​17,294,597​នាក់​​បាន​ជាសះស្បើយ​ និង​​6,769,313​នាក់​កំពុង​ព្យាបាល ក្នុង​នោះ​ដែរ​ មាន​​61,191​នាក់​កំពុង​ស្ថិត​ក្នុង​ស្ថាន​ភាព​អាក្រក់​។

នៅកម្ពុជា​ឯណេះ​វិញ ​ក្រសួង​សុខាភិបាល​បាន​ប្រកាស​ថា កម្ពុជា​បច្ចុប្បន្ន​មាន​អ្នកជំងឺ​ចំនួន​8​នាក់​កំពុង​ទទួល​ការ​ព្យាបាល​ និង​265​នាក់​បាន​ជាសះស្បើយ។ កម្ពុជា​មិន​ទាន់​មាន​ករណី​ស្លាប់​ដោយ​សារវីរុស​COVID-19 ដែល​ត្រូវ​បាន​រាយការណ៍​ជាផ្លូវការ​នៅ​ឡើយ​។ គិត​មក​ដល់​បច្ចុប្បន្ន​ កម្ពុជា​បាន​រកឃើញ​អ្នក​ឆ្លង​វីរុស​COVID-19 សរុប​273​នាក់​ ក្នុង​នោះ​មាន​171​នាក់​រកឃើញ​នៅ​ភ្នំ​ពេញ 40​នាក់​នៅ​ក្រុង​ព្រះសីហនុ 16​នាក់​នៅ​កំពង់​ចាម​ រួម​នឹងករណី​ជា​ច្រើនទៀត​នៅ​ខេត្ត​ផ្សេង​ៗ​៕

ប្រភព៖ worldometers,cdcmoh

ជំងឺក្រលៀន គឺជំងឺដែលបណ្ដាលមកពីការដែលក្រលៀនធ្វើការខុសប្រក្រតី មានប្រសិទ្ធភាពថយចុះ បង្កឱ្យកើតការដក់ស្ទះនូវវត្ថុកាកសំណល់នៅក្នុងរាងកាយ រហូតហុចផលប៉ះពាល់ដល់ការធ្វើការងារក្នុងប្រព័ន្ធផ្សេងៗទូទាំងរាងកាយ និងអាចហុចផលឱ្យកើតសភាវគាំងក្រលៀនបាន ដែលការពិតទៅវាអាចកើតឡើងបានពីច្រើនមូលហេតុ ទាំងកើតឡើងតាំងពីកំណើត កើតពីការរលាកក្លាយ ឆ្លងមេរោគ ដក់ស្ទះក្នុងតម្រងនោម ឬមានដុះសាច់ជាដើម ដោយវានឹងបង្ហាញអាការចេញមកខុសប្លែកពីគ្នា ដែលយើងអាចសរុបអាការដែលប្រថុយប្រថាននឹងការកើតជំងឺក្រលៀនបានដូចខាងក្រោមនេះ។

1 . ទឹកមូត្រមានលក្ខណៈខុសប្រក្រតី

ទាំងការបន្ទោបង់ទឹកមូត្រចេញមកមានលាយឈាម ទឹកមូត្រមានពពុះច្រើន ឬទឹកមូត្រខាប់ជាដើម អាចសន្និដ្ឋានទុកជាមុនបានតែម្ដងថា អាចនឹងប្រថុយប្រថាននឹងការកើតជំងឺក្រលៀនហើយ គួរតែប្រញាប់ទៅជួបលោកគ្រូពេទ្យជាបន្ទាន់បំផុត ជាពិសេសអ្នកដែលបន្ទោបង់ទឹកមូត្រចេញមកមានឈាមចេញមកជាមួយ ព្រមជាមួយមានសរសៃខាប់ៗ(ដូចស៊ុត-ស) ឬមានប្រូតេអ៊ីនចេញមកលាយឡំជាមួយទឹកមូត្រ ជាដើម។

2 . ឈឺពោះខ្លាំង

អាចកើតឡើងរួមជាមួយការបន្ទោបង់ចេញមកមានឈាម ទឹកមូត្រខាប់ ឬមានគ្រាប់ខ្សាច់តូចៗ ដោយអាការទាំងអស់នេះប្រថុយប្រថានក្នុងការកើតក្រួសក្នុងតម្រងនោម និងជំងឺពាក់ព័ន្ធនឹងប្រព័ន្ធតម្រងនោម។

3 . ឃើញមានដុំអ្វីម្យ៉ាងនៅម្ដុំក្រលៀន

បើសិនជាស្ទាបទៅហើយឃើញមានដុំសាច់អ្វីម្យ៉ាងនៅត្រង់ម្ដុំចង្កេះទាំងសងខាងរបស់អ្នក នេះអាចជាសញ្ញាគ្រោះថ្នាក់មួយរបស់ជំងឺក្រលៀនដែលបណ្តាលមកពីការស្ទះថង់ទឹកមូត្រ ការណែនស្ទះរបស់ក្រលៀន ឬដុះសាច់នៅក្នុងក្រលៀនជាដើម។

4 . សម្ពាធឈាមឡើងខ្ពស់

ដោយសារតែក្រលៀនបំពេញតួនាទីសាងសារធាតុគ្រប់គ្រងសម្ពាធឈាម ប្រកបជាមួយក្រលៀនមានតួនាទីរក្សាតុល្យភាពរបស់ទឹក និងអំបិលរ៉ែក្នុងរាងកាយ ដូច្នេះហើយទើបការដែលសម្ពាធឈាមឡើងខ្ពស់អាចបណ្តាលមកពីជំងឺក្រលៀនដោយត្រង់។

5 . អាការហើម

អ្នកដែលកើតជំងឺក្រលៀននឹងមានអាការហើម ជាពិសេសនៅលើស្បែកភ្នែកនៅពេលព្រឹក ឬហើមមុខតែម្ដង ដែលបើសិនជាធ្ងន់ធ្ងរនឹងមានអាការហើមនេះពេញទាំងដងខ្លួនតែម្ដង។ តែយ៉ាងណាក៏ដោយ អាការហើមនេះក៏អាចបណ្ដាលមកពីជំងឺថ្លើម ជំងឺបេះដូង ការខ្វះសារធាតុអាហារ ឬភាពខុសប្រក្រតីពាក់ព័ន្ធនឹងអ័រម៉ូនបានដែរ ដូច្នេះគួរប្រញាប់ទៅជួបលោកគ្រូពេទ្យដើម្បីឱ្យបានដឹងពីមូលហេតុពិតប្រាកដ និងដើម្បីទទួលការព្យាបាលមុនពេលអ្វីៗហួសពេលនឹងកែកុន៕