Category: សុខភាព

“អាហារពេលព្រឹកដែលសម្បូរទៅដោយប្រូតេអ៊ីនដែលល្អ ជួយកាត់បន្ថយភាពឃ្លានអាហារនៅចន្លោះពេលថ្ងៃបាន” សម្រង់ពីរបាយកាណ៍ការសិក្សាស្រាវជ្រាវរបស់ Journal of Diary Science កាលពីខែតុលា ឆ្នាំ2018កន្លងទៅ។

ក្រុមអ្នកស្រាវជ្រាវបានឱ្យមនុស្សធំរាងកាយរឹងមាំប្រក្រតីទទួលទានអាហារពេលព្រឹក 2ចំណែក។ ចំណែកដំបូង ជាអាហារស៊ីរៀលដែលមានកាបូហាយដ្រេតខ្ពស់ មួយចំណែកទៀតជាទឹកដោះគោ 1កែវដែលមានប្រូតេអ៊ីន 12.4ក្រាម រួចហើយពិនិត្យកម្រិតជាតិស្ករនៅក្នុងឈាមម្ដង។ បន្ទាប់ពីអាហារពេលព្រឹក 2 – 3ម៉ោង គ្រប់គ្នាបានទទួលទានអាហារថ្ងៃត្រង់ដែលមានកាបូហាយដ្រេតខ្ពស់ និងពិនិត្យកម្រិតជាតិស្ករក្នុងឈាមម្ដងទៀត បន្ទាប់ពីនោះអ្នកស្រាវជ្រាវនឹងចាប់ផ្ដើមសួរនាំអំពីកម្រិតភាពឃ្លានអាហារយ៉ាងលម្អិត។

អ្នកស្រាវជ្រាវរកឃើញថា អ្នកដែលទទួលទានប្រូតេអ៊ីនច្រើនជាងអ្នកឯទៀតក្នុងអាហារពេលព្រឹក មានកម្រិតជាតិស្ករក្នុងឈាមទាបចុះ និងកម្រិតភាពឃ្លានអាហារថយចុះផងដែរក្នុងថ្ងៃតែមួយ។

មូលហេតុព្រោះ ប្រូតេអ៊ីនប្រើពេលរំលាយយូរជាងកាបូហាយដ្រេត ទើបវាជាប្រភពកំណើតនៃភាពឃ្លានអាហារដែលថយចុះទៅដែរ តែការស្រាវជ្រាវនេះបានណែនាំថា រឹតតែទទួលទានប្រូតេអ៊ីនច្រើនឡើង ពេលវេលានៃការរំលាយអាហារក៏រឹតតែយូរឡើងដែរ ដូច្នេះហើយទើបការទទួលទានប្រូតេអ៊ីនឱ្យច្រើនឡើងហុចផលល្អដល់អ្នកដែលត្រូវធ្វើកិច្ចការងារជាប់ ឬធ្វើការក្នុងអំឡុងពេលថ្ងៃយូរដែលមានពេលទទួលទានអាហារតិច ឬតែមួយដង រួមទាំងអ្នកដែលត្រូវការសម្រកទម្ងន់ទៀតផង តែកុំទទួលទានប្រូតេអ៊ីនច្រើនជ្រុលពេកក្នុងអំឡុងពេលមុនចូលគេង ព្រោះអាចហុចផលឱ្យរាងកាយធ្វើការខ្លាំងដើម្បីរំលាយអាហារក្នុងអំឡុងពេលដែលរាងកាយត្រូវគេងសម្រាក រហូតធ្វើឱ្យយើងគេងមិនលក់។

ទោះជាប្រូតេអ៊ីនដែលប្រើក្នុងការស្រាវជ្រាវនេះជាទឹកដោះគោដែលមានប្រូតេអ៊ីនច្រើន ហើយអ្នកស្រាវជ្រាវប្រាប់ថា ប្រូតេអ៊ីនដែលយើងគួរទទួលទានបន្ថែមនៅពេលព្រឹកជាប្រូតេអ៊ីនប្រភេទណាក៏បានក្ដី តែសុំឱ្យជាប្រូតេអ៊ីនដែលល្អ មានជាតិខ្លាញ់តិចក៏គ្រប់គ្រាន់ហើយ ដែលអាចមានដូចជា សាច់មាន់ ត្រី សណ្ដែកលឿង ឬស៊ុតក៏បាន៕

បច្ចុប្បន្ននេះនៅឯប្រទេសជប៉ុន “ជីវ៉ាន់ស៊ុយ” បានក្លាយជាបន្លែដែលមនុស្សជាច្រើននាំគ្នានិយមចូលចិត្តទទួលទានយ៉ាងខ្លាំង នាំគ្នាញ៉ាំទាំងក្ដាប់ៗ(ទាំងតម្លៃជីវ៉ាន់ស៊ុយនៅប្រទេសគេមិនមែនថោកៗដូចស្រុកយើងផង) ដល់ថ្នាក់មានអ្នកចម្រៀងប៊យប៊ែនដ៍របស់ជប៉ុនតែងបទចម្រៀងច្រៀងដែលមានឈ្មោះថា “ជីវ៉ាន់ស៊ុយ ហេវិន”(ជីវ៉ាន់ស៊ុយស្ថានសួគ៌)ដែលបង្ហាញអំពីការនិយមចូលចិត្តញ៉ាំជីវ៉ាន់ស៊ុយដ៏ខ្លាំងក្លារបស់ជនជាតិជប៉ុនទៀតផង។

តាមរយៈការចូលចិត្តញ៉ាំជីវ៉ាន់ស៊ុយដ៏ខ្លាំងក្លានេះ ទើបធ្វើឱ្យនៅប្រទេសជប៉ុនមានភោជនីយដ្ឋានដែលល្បីល្បាញរឿងមុខម្ហូបដែលមានបន្លែជីវ៉ាន់ស៊ុយជាចំណែកផ្សំចម្បង មិនមែនគ្រាន់តែហាន់តូចៗរោយពីលើម្ហូបអាហារដូចនៅស្រុកយើងនោះទេ។ ពួកគេនាំគ្នាញ៉ាំជីវ៉ាន់ស៊ុយទាំងបាច់ៗតែម្ដង និងថែមទាំងមានភោជនីយដ្ឋានដែលលក់តែមុខម្ហូបដែលផ្សំតែពីបន្លែជីវ៉ាន់ស៊ុយសុទ្ធទៀតផង។ ក្រៅពីនេះ មុខម្ហូបជីវ៉ាន់ស៊ុយ ថែមទាំងជាមុខម្ហូបប្រចាំឆ្នាំរបស់ប្រទេសជប៉ុន(ឆ្នាំ2016)ដែលបញ្ជាក់ច្បាស់ពីការនិយមចូលចិត្តញ៉ាំជីវ៉ាន់ស៊ុយរបស់ជនជាតិជប៉ុនយ៉ាងច្បាស់ទៀតផង។

បើនិយាយអំពីរសជាតិ ប្រហែលជារឿងពិសេសដោយឡែកពិតៗមិនខាន ព្រោះអ្នកខ្លះអាចនឹងចូលចិត្ត អ្នកខ្លះទៀតអាចនឹងមិនចូលចិត្ត ដូចគ្នានឹងផ្លែទុរេននៅប្រទេសយើងដែរ ដែលអ្នកណាចូលចិត្ត ក៏ចូលចិត្តខ្លាំង តែអ្នកដែលមិនចូលចិត្ត ក៏ស្អប់តែម្ដង ព្រោះរសជាតិ និងក្លិនរបស់វាដែលខ្លាំងក្លា និងជាឯកលក្ខណៈពិសេសដោយឡែកពិតៗហ្នឹងឯង។ តែបើនិយាយអំពីប្រយោជន៍របស់ជីវ៉ាន់ស៊ុយវិញនោះ សូមជម្រាបថា មានច្រើនណាស់ រហូតដល់មិត្តអ្នកអានអាចនឹងត្រូវងាកមកនិយមចូលចិត្តញ៉ាំជីវ៉ាន់ស៊ុយខ្លាំងដូចជនជាតិជប៉ុនដែរមិនខាន។

សារធាតុអាហារនៅក្នុងបន្លែជីវ៉ាន់ស៊ុយ

• វីតាមីន A
• វីតាមីន B
• វីតាមីន C
• សារធាតុដែក
• បេតាឃែរ៉ូធីន
• កាល់ស្យូម និងផ្សេងៗទៀតជាច្រើន។

ប្រយោជន៍ល្អៗរបស់ “ជីវ៉ាន់ស៊ុយ”

1. ជួយបញ្ចុះជាតិស្ករនៅក្នុងឈាម ត្រូវនឹងអ្នកជំងឺទឹកនោមផ្អែម និងអ្នកដែលកំពុងសម្រកទម្ងន់
2. ការពារជំងឺផ្ដាសាយ
3. បំបាត់អាការស្រេកទឹក
4. តតាំង ប្រឆាំងមេរោគផ្សេងៗនៅក្នុងពោះវៀន
5. ជួយបណ្ដេញខ្យល់នៅក្នុងក្រពះអាហារ
6. មានសារធាតុប្រឆាំងរ៉ាឌីកាល់សេរី ជួយកាត់បន្ថយភាពប្រថុយប្រថានក្នុងការកើតជំងឺមហារីក
7. ជាឱសថបន្ទន់លាមក ជួយឱ្យបន្ទោបង់ស្រួល
8. បំបាត់អាការវិលមុខ
9. ថែបំប៉នភ្នែក
10. ជួយជំរុញការធ្វើការងាររបស់ឈាម និងសាច់ដុំ

ទោះជាបន្លែជីវ៉ាន់ស៊ុយមានក្លិនហាក់ដូចជាឈួលខ្លាំង តែក៏មិនចាំបាច់ទៅកង្វល់អ្វីដែរ ព្រោះក្លិនរបស់បន្លែជីវ៉ាន់ស៊ុយនេះនឹងត្រូវបញ្ចេញចោលមកតាមទឹកមូត្រ និងបើមិនទទួលទានក្នុងបរិមាណច្រើនជ្រុលពេកទេនោះ វានឹងមិនធ្វើឱ្យធំក្លិនខ្លួនដូចដែលមនុស្សជាច្រើនអាចធ្លាប់បានឮនោះទេ តែទោះជាយ៉ាងណាក៏ដោយ ការនឹងនាំគ្នាងាកមកទទួលទានបន្លែជីវ៉ាន់ស៊ុយដើម្បីឱ្យទទួលបានប្រយោជន៍ល្អៗដល់រាងកាយនោះ ក៏មិនគួរទទួលទានច្រើនជ្រុលពេកដែរ ព្រោះមិនថាអាហារប្រភេទណាដែលថាល្អៗនោះទេ បើយើងទទួលទានច្រើនជ្រុលពេក ក៏វាហុចគុណវិបត្តិដល់យើងដែរ៕

ក្រសួងសុខាភិបាលកម្ពុជា បានប្រកាសនាព្រឹកថ្ងៃទី20តុលានេះថា កម្ពុជាបានរកឃើញអ្នកវិជ្ជមានជាមួយនឹង Covid-19 ចំនួន2ករណីបន្ថែមទៀត នេះឱ្យតួលេខនៃអ្នកជំងឺ Covid-19 ដែលត្រូវបានរកឃើញនៅកម្ពុជា កើនឡើងដល់285នាក់។

ករណីថ្មីនេះត្រូវបានរកឃើញកាលពីម្សិលមិញ (19តុលា) ដោយវិទ្យាស្ថានប៉ាស្ទ័រកម្ពុជានៅរាជធានីភ្នំពេញ។ អ្នកជំងឺថ្មីទាំង2ករណីនេះគឺជាប្ដីប្រពន្ធនឹងគ្នា និងមានអាសយដ្ឋាននៅភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ។ ពួកគេបានធ្វើដំណើរពីប្រទេសអ៊ីរ៉ាក់ ឆ្លងកាត់ទីក្រុងដូហា បន្តជើងហោះហើរនៅកូរ៉េខាងត្បូង មុននឹងមកដល់កម្ពុជានៅថ្ងៃទី18តុលា2020។

អ្នកដំណើរចំនួន106នាក់ផ្សេងទៀតដែលធ្វើដំណើរតាមយន្តហោះជាមួយនឹងអ្នកជំងឺខាងលើ ក៏កំពុងត្រូវបានដាក់ឱ្យធ្វើចត្តាឡីស័កនៅក្នុងសណ្ឋាគារមួយចំនួននៅរាជធានីភ្នំពេញ។

គិតមកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCovid-19 សរុប ចំនួន285នាក់ ក្នុងនោះមាន280នាក់បានជាសះស្បើយ និង5នាក់កំពុងទទួលការព្យាបាល។ ក្នុងចំណោមអ្នកជំងឺទាំង5នាក់ដែលកំពុងសម្រាកព្យាបាលនេះ មានជនជាតិខ្មែរ3នាក់ និងជនបរទេសចំនួន2នាក់។

នៅ​ទូទាំង​ពិភពលោក ក្នុង​រយៈ​ពេល​24​ម៉ោង​ចុង​ក្រោយ​នេះ ​បាន​រកឃើញ​អ្នក​ផ្ទុក​វីរុស​ថ្មី​ចំនួន​12,266​នាក់ ដែល​នេះ​ឱ្យ​​អ្នក​បាន​ឆ្លង​វីរុស​Covid-19 កើន​ឡើង​ដល់​​​40,647,566​នាក់​ ក្នុង​នោះ​មាន​1,122,984​នាក់​បាន​ស្លាប់​ និង​30,352,918​​នាក់​បាន​ជា​សះស្បើយ​​៕

ប្រភព៖ ក្រសួង​ព័ត៌មាន​, Worldometers

ឡារ៉ែនគិតថា វិនាទីនេះប្រហែលជាគ្មាននរណាម្នាក់មិនស្គាល់ជំងឺអេដស៍នោះទេ។ វាជាជំងឺឆ្លងតាមរយៈការរួមភេទដែលនៅមិនទាន់មានថ្នាំព្យាបាលយ៉ាងពិតប្រាកដនៅឡើយ មានត្រឹមតែថ្នាំដែលជួយទប់ទល់អាការរបស់អ្នកជំងឺឱ្យអាចនៅមានជីវិតរស់នៅបានយ៉ាងរឹងមាំបានជាច្រើន(សិប)ឆ្នាំទៀតប៉ុណ្ណោះ តែអ្នកជំងឺត្រូវមានវិន័យក្នុងការទទួលទានថ្នាំ និងទៅជួបគ្រូពេទ្យតាមពេលវេលាកំណត់។ ក្រៅពីឈ្មោះជំងឺថា “អេដស៍” ហើយ នៅមានឈ្មោះដែលយើងហៅថា “អេច អៃ វី” មួយទៀតដែរ។ តើពាក្យ2នេះ ខុសគ្នាដូចម្ដេច? ថ្ងៃនេះ ឡារ៉ែនមានចម្លើយមកអធិប្បាយជម្រាបជូនមិត្តអ្នកអានទាំងអស់គ្នា។

អត្ថន័យរបស់ “អេច អៃ វី”(HIV)

មេរោគ HIV (Human Immunodeficiency Virus) គឺ មេរោគវីរុសដែលនឹងចូលទៅខាំស៊ីបំផ្លាញកោសិកាគ្រាប់ឈាមស ធ្វើឱ្យប្រព័ន្ធប្រឆាំងជំងឺមិនសមប្រកប។

អត្ថន័យរបស់ “AIDS”

AIDS (Acquied Immunodeficiency Syndrome) គឺក្រុមអាការរបស់ការឆ្លងមេរោគជ្រៀតជ្រែកផ្សេងៗនៅពេលប្រព័ន្ធប្រឆាំងជំងឺរបស់រាងកាយត្រូវមេរោគអេច អៃ វីបំផ្លាញរហូតមិនអាចតតាំងមេរោគដែលចូលមកក្នុងរាងកាយទាំងអស់នោះបាន។

ឆ្លងមេរោគ អេច អៃ វី # ជំងឺអេដស៍

បើអ្នកជំងឺឆ្លងមេរោគអេច អៃ វី មិនមែនសុទ្ធតែត្រូវកើតជំងឺអេដស៍ជានិច្ចនោះទេ ព្រោះបើសិនឆាប់ពិនិត្យរកឃើញថាឆ្លងមេរោគតាមរយៈការពិនិត្យឈាមភ្លាមៗហើយ គេអាចព្យាបាលបានដោយការលេបថ្នាំប្រឆាំងមេរោគវីរុស។ នៅពេលធ្វើការព្យាបាលហើយ អាចនឹងពិនិត្យមិនឃើញមានមេរោគអេច អៃ វីនៅក្នុងឈាមទៀតទេ ហើយនៅពេលដែលពិនិត្យមិនឃើញមានមេរោគ នោះគឺមានន័យថា មិនមានមេរោគចម្លងទៅអ្នកដទៃទេ។

ក្រៅពីនេះ បើអ្នកជំងឺឆ្លងមេរោគអេច អៃ វីបានធ្វើការព្យាបាលដោយថ្នាំប្រឆាំងមេរោគយ៉ាងត្រឹមត្រូវ និងជាប់លាប់ នឹងមានសុខភាពរាងកាយរឹងមាំល្អ មានអាយុយ៉ឺនយូរដូចអ្នកដែលគ្មានមេរោគដូច្នោះដែរ និងអាចមិនចាំបាច់ត្រូវលេបថ្នាំប្រឆាំងមេរោគជាប់រហូតទៀតផង ព្រោះបើពិនិត្យលែងឃើញមានមេរោគទៀតហើយនោះ ក៏អាចឈប់ញ៉ាំថ្នាំបានតែម្ដង តែគ្រូពេទ្យអាចនឹងណាត់ជួបដើម្បីពិនិត្យរាងកាយជាដំណាក់ៗនៅពេលក្រោយ។

“អេច អៃ វី ឆាប់ដឹង អាចព្យាបាលជា”

ការចម្លងរបស់មេរោគ អេច អៃ វី ពីមនុស្សទៅមនុស្ស មេរោគ អេច អៃ វី អាចចម្លងពីមនុស្សម្នាក់ទៅមនុស្សម្នាក់តាមរយៈឈាមរបស់អ្នកកើតជំងឺដែលចូលទៅក្នុងរាងកាយមនុស្សម្នាក់ទៀតតាមរយៈការប្រើម្ជុលចាក់ថ្នាំរួមគ្នា ជ្រៀតចូលក្នុងស្នាមរបួសថ្មីៗ ការបំបៅដោះកូនពីម្ដាយដែលមានមេរោគទៅកូន ជាដើម តែឱកាសក្នុងការឆ្លងមេរោគក៏មិន 100%ជានិច្ចនោះដែរ។

ចំណែកឯការឱបថើប(ក្នុងករណីគ្មានស្នាមរបួស ឬដំបៅនៅក្នុងមាត់ ឬជាការថើបជញ្ជក់មាត់ប្ដូរទឹកមាត់គ្នា) ញ៉ាំបាយរួមគ្នាក្នុងចានតែមួយ ប្រើសមស្លាបព្រា កែវទឹករួមគ្នា ប្រើសាប៊ូដុសខ្លួន សាប៊ូកក់សក់ ថ្នាំដុសធ្មេញរួមគ្នា ឬការមានភេទសម្ព័ន្ធដោយប្រើស្រោមអនាម័យ(ដែលនៅថ្មីល្អ)មិនធ្វើឱ្យកើតការឆ្លងមេរោគ អេច អៃ វី ឡើយ។

វិធីការពារការឆ្លងមេរោគ អេច អៃ វី

1 . ពាក់ស្រោមអនាម័យរាល់ពេលមានភេទសម្ព័ន្ធ។

2 . បើចង់បានបុត្រ គួរមានភេទសម្ព័ន្ធតែជាមួយគូស្នេហ៍របស់ខ្លួនតែម្នាក់ប៉ុណ្ណោះ និងកុំភ្លេចពិនិត្យរាងកាយដើម្បីការរៀបផែនការគ្រួសារជាមុន។

3 . មិនផ្លាស់ប្ដូរដៃគូដំណេកញឹកញាប់ និងគួរស្នេហាស្មោះស្ម័គ្រមួយទល់នឹងមួយ។

4 . មិនប្រើម្ជុលចាក់ថ្នាំរួមជាមួយអ្នកដទៃ។

5 . បើសិនរកឃើញថា រាងកាយឆ្លងមេរោគ អេច អៃ វីហើយ គួរប្រញាប់ទៅប្រឹក្សាគ្រូពេទ្យដើម្បីធ្វើការព្យាបាលឱ្យបានលឿនបំផុត…រឹតតែលឿន រឹតតែងាយព្យាបាល។

6 . បើជាអ្នកដែលឆ្លងមេរោគពីម្ដាយ គួរចូលទៅទទួលការព្យាបាលជាមួយគ្រូពេទ្យតាំងពីក្មេង និងមានវិន័យក្នុងការព្យាបាលយ៉ាងម៉ឺងម៉ាត់។

7 . មិនគួរសង្ឃឹមបានពិនិត្យឈាមដោយការបរិច្ចាគឈាមនោះទេ ព្រោះវាជាការរំខានដល់ការធ្វើការរបស់មន្រ្តីទទួលបរិច្ចាគ និងមិនជាប្រយោជន៍ដល់អ្នកដែលរង់ចាំទទួលឈាមដើម្បីការព្យាបាលឡើយ៕

ប្រតិកម្មចាញ់ចំណីអាហារ (Food Allergy) ជាប្រតិកម្មដែលខុសប្រក្រតីរបស់រាងកាយចំពោះចំណីអាហារ ដែលមានមូលហេតុមកពីប្រព័ន្ធការពារជំងឺរបស់រាងកាយ ជាអាការដែលហាក់ដូចជាជួបប្រទះញឹកញាប់ និងជាបន្តទៅនេះ គឺជាអត្ថបទដែលមិត្តអ្នកអានគួរតែដឹងពាក់ព័ន្ធនឹងអាការប្រតិកម្មចាញ់ចំណីអាហារ…។

មូលហេតុរបស់ប្រតិកម្មចាញ់ចំណីអាហារ

ប្រតិកម្មចាញ់ចំណីអាហារកើតឡើងដោយសារតែរាងកាយឆាប់មានប្រតិកម្មជាមួយគុណភាពចំណីអាហារខ្លាំងជ្រុលពេក រហូតដល់រាងកាយសាង Antibody ដែលមានតួនាទីក្នុងការកែខៃ និងតតាំងវត្ថុប្លែកចម្លែកដែលចូលមកក្នុងរាងកាយ។ នៅក្នុងកម្មវិធីនេះ រាងកាយនឹងមានការបញ្ចេញសារធាតុបង្កប្រតិកម្មចាញ់(Histamine)និងសារធាតុផ្សេងទៀតដែលធ្វើឱ្យកើតអាការចាញ់ តែយ៉ាងណាក៏ដោយ កម្មវិធីការពិនិត្យចាប់សារធាតុដែលរាងកាយមិនត្រូវការនេះ មានភាពខុសប្លែកពីគ្នានៅលើបុគ្គលម្នាក់ៗ ដូច្នេះមនុស្សម្នាក់ៗក៏នឹងមានអាការប្រតិកម្មចាញ់សារធាតុខុសៗគ្នា ជាមូលហេតុដែលជួបប្រទះញឹកញាប់របស់ជំងឺដែលកើតពីចំណីអាហារ។

មនុស្សជាច្រើនយល់ខុសថា ប្រតិកម្មចាញ់កើតឡើងនៅពេលដែលចំណីអាហារនោះជាចំណីអាហារចម្លែកៗ តែការពិតគឺថាចំណីអាហារទូទៅក៏អាចជាសារធាតុបង្កប្រតិកម្មចាញ់បានដែរ។ ការកើតប្រតិកម្មចាញ់ចំណីអាហារមានភាពពាក់ព័ន្ធខ្លាំងបំផុតជាមួយប្រូតេអ៊ីនក្នុងទឹកដោះគោ ស៊ុត គ្រាប់សណ្ដែក គ្រាប់ល្ង ម្សៅសាលី សណ្ដែកគ្រាប់រឹង និងអាហារសមុទ្រ-ល- ក្រៅពីនេះ ពណ៌លាយចំណីអាហារ សារធាតុការពារផ្អូមក្នុងចំណីអាហារ និងសារធាតុតុបតែងចំណីអាហារក្នុងអំឡុងពេលកែច្នៃចំណីអាហារ ក៏ជាបច្ច័យដែលធ្វើឱ្យកើតអាការប្រតិកម្មចាញ់ចំណីអាហារបានដែរ។ ប្រតិកម្មចាញ់ចំណីអាហារ អាចមានអាការមិនធ្ងន់ធ្ងរ និងកើតឡើងក្នុងរយៈពេលខ្លី តែក៏អាចធ្វើឱ្យកើតសភាវខាងសុខភាពធ្ងន់ធ្ងរ និងមានគ្រោះថ្នាក់ដល់ជីវិតបានដូចគ្នា។

អាការរបស់ប្រតិកម្មចាញ់ចំណីអាហារ

អាការប្រតិកម្មចាញ់ចំណីអាហារអាចមានអាការណាមួយ ឬអាការច្រើនរួមគ្នាដូចខាងក្រោម ៈ

. មានឡើងកន្ទាលត្រអាក និងរមាស់

. រមាស់ច្រមុះ និងភ្នែក

. កណ្ដាស់ និងហៀរសំបោរ

. មានអាការរមាស់ និងហើមនៅជុំវិញបបូរមាត់ និងមាត់ ជាពិសេសបំផុតនៅពេលប៉ះពាល់នឹងចំណីអាហារដោយផ្ទាល់

. ក្អួតចង្អោរ

. មានអាការហើមបែបជាប៉គ្រីវកាច់

. រាក និងក្អួត

អាការប្រតិកម្មចាញ់ធ្ងន់ធ្ងរ

អាការប្រតិកម្មចាញ់ធ្ងន់ធ្ងរ( Anaphylaxis is) ជាអាការប្រតិកម្មចាញ់ចំណីអាហារដែលធ្ងន់ធ្ងរបំផុត និងអាចធ្វើឱ្យស្លាប់បាត់បង់ជីវិតបាន។ បច្ច័យប្រថុយប្រថានរបស់អាការប្រតិកម្មចាញ់ធ្ងន់ធ្ងរ មានដូចជា អ្នកជំងឺហឺត ជាពិសេសបំផុតនៅលើអ្នកជំងឺហឺតដែលមិនបានទទួលការព្យាបាល។ ជារឿងគ្រោះថ្នាក់ខ្លាំងណាស់ បើសិនពិនិត្យមិនឃើញមានអាការប្រតិកម្មចាញ់ក្នុងរយៈដំបូងៗ ការយឺតយ៉ាវក្នុងការប្រើប្រាស់ថ្នាំ ឬការមិនប្រើប្រាស់ថ្នាំព្យាបាលអ្នកជំងឺប្រតិកម្មចាញ់ចំណីអាហារបន្ទាន់ឱ្យបានទាន់ពេលវេលា ដែលអាចធ្វើឱ្យកើតអាការដែលធ្ងន់ធ្ងរឡើងបាន។

បើសិនរាងកាយរបស់លោកអ្នកកើតមានអាការប្រតិកម្មចាញ់ទាំងអស់ដូចខាងលើ ចូរឈប់ទទួលទានអាហារណាមួយដែលលោកអ្នកសង្ស័យថា ធ្វើឱ្យកើតអាការប្រតិកម្មចាញ់ចំណីអាហារ ក្រៅពីនេះ លោកអ្នកគួរពិចារណាប្រើថ្នាំបំបាត់អាការប្រតិកម្មចាញ់(Antihistamines)។ មិនថាលោកអ្នកកើតអាការប្រតិកម្មចាញ់ធ្ងន់ធ្ងរ ឬមិនធ្ងន់ធ្ងរក៏ដោយ លោកអ្នកនៅតែត្រូវតែចូលទៅទទួលការព្យាបាល ដើម្បីរកមូលហេតុ និងការព្យាបាលផងដែរ។

បច្ច័យច្រើនប្រការដែលបង្កើនភាពប្រថុយប្រថាន មានដូចជា ៈ

. ការបញ្ជូនបន្តខាងពូជអម្បូរពីកំណើត

. អាយុ ដោយអាការប្រតិកម្មចាញ់ចំណីអាហារតែងជួបប្រទះច្រើនបំផុតនៅលើក្មេងតូច

. ជំងឺហឺត

ដើម្បីការពារ និងកាត់បន្ថយភាពប្រថុយប្រថានក្នុងការកើតប្រតិកម្មចាញ់ចំណីអាហារ លោកអ្នកចាំបាច់ត្រូវមានចំណេះដឹងពាក់ព័ន្ធនឹងប្រតិកម្មចាញ់ចំណីអាហារ និងអាការប្រតិកម្មចាញ់ចំណីអាហារ។ ចូរព្យាយាមចៀសវាងពីអាហារដែលលោកអ្នកកើតប្រតិកម្មចាញ់ ក្រៅពីនេះ លោកអ្នកគួរចៀសវាងការប៉ះពាល់ដែលមានចំពោះស្បែក ឬហិតស្រូបក្លិនចំណីអាហារដែលលោកអ្នកមានប្រតិកម្មចាញ់៕