Category: សុខភាព

នរណាដែលមិនធ្លាប់សោកសៅខ្លះ? ប្រហែលជាគ្មានទេ ព្រោះអារម្មណ៍សោកសៅជាអារម្មណ៍ដែលមាននៅក្នុងខ្លួនមនុស្សគ្រប់រូប និងក្នុងមួយថ្ងៃៗកម្រិតរបស់អារម្មណ៍ក៏មានឡើង មានចុះ និងមានច្រើនបែប ផ្លាស់ប្ដូរគ្រប់ពេលវេលាតាមរឿងរ៉ាវដែលចូលមកប៉ះពាល់អារម្មណ៍ និងការដឹងឮរបស់មនុស្សម្នាក់ៗ។

សោកសៅគឺជាអ្វី?

“សោកសៅ” ខាងវេជ្ជសាស្រ្តហៅថា Clinical Depression មានន័យពីសភាវសោកសៅដែលមានខ្លាំងជាងអារម្មណ៍កម្សត់ ជាសភាវម្យ៉ាងដែលប្រទះឃើញនៅក្នុងជំងឺផ្លូវចិត្តជាច្រើន ជាពិសេសជំងឺខាងអារម្មណ៍ ជំងឺសោកសៅ ជំងឺ Bipolar Disorder និងសារធាតុថ្នាំមួយចំនួនក៏អាចធ្វើឱ្យកើតអាការសោកសៅយ៉ាងធ្ងន់ធ្ងរបានដែរ។

មូលហេតុនៃជំងឺសោកសៅ

ជំងឺសោកសៅ អាចរាប់បានថាជាជំងឺខាងផ្នែកផ្លូវចិត្តដែលប្រទះឃើញច្រើនក្នុងលំដាប់មុខៗគេរបស់ពិភពលោក បណ្ដាលមកពីមូលហេតុចម្បងៗ 2យ៉ាងគឺ បច្ច័យខាងសរីរៈ ឬពូជអម្បូរ និងបច្ច័យផ្នែកផ្លូវចិត្ត ឬបរិស្ថានជុំវិញ។

បច្ច័យខាងសរីរៈ ឬពូជអម្បូរ ដោយសារតែមានការប្រែប្រួលរបស់សារធាតុទំនាក់ទំនងប្រព័ន្ធប្រសាទក្នុងខួរក្បាល ឬភាពច្រឡំបល់របស់កម្រិតអ័រម៉ូនដែលសំខាន់។

ចំណែកបច្ច័យផ្នែកផ្លូវចិត្ត ឬបរិស្ថានជុំវិញដែលហៅថាបច្ច័យខាងអារម្មណ៍ ជាលទ្ធផលបណ្ដាលមកពីស្ថានការណ៍ភាពតានតឹងខាងអារម្មណ៍ ដូចជា បើជាសភាវសោកសៅក្នុងវ័យកុមារ អាចមានមូលហេតុពីភាពតានតឹងក្នុងគ្រួសារ ហេតុការណ៍រំជួលចិត្តយ៉ាងធ្ងន់ធ្ងរ សភាវសោកសៅក្នុងជំងឺសរសៃប្រសាទ ដែលអាចរកឃើញតម្រុយថា ត្រូវបានកៀបសង្កត់យ៉ាងខ្លាំងក្លាកាលនៅក្មេង ហើយផ្ទុះចេញមកក្នុងអំឡុងជីវិតនៅពេលក្រោយៗ។ សភាវសោកសៅព្រោះតែភាពចាស់ជរា មានជីវិតឯកោ និងសភាវរំជួលចិត្តក្រោយចូលនិវត្តន៍(បាត់បង់គុណតម្លៃលើខ្លួនឯង អត់ការងារធ្វើ មានអារម្មណ៍ថា គ្មានសមត្ថភាព)ជាដើម។

សង្កេតអាការ

នៅពេលមនុស្សក្នុងក្រុមគ្រួសារ ឬអ្នកជិតដិតណាម្នាក់ហាក់ដូចជាសោកសៅ គោលការណ៍សង្កេតងាយៗ គឺសង្កេតមើលទង្វើដូចតទៅនេះ៖

1. ទង្វើដែលកើតពីការផ្លាស់ប្ដូរខាងការគិត គឺច្រើនតែមានការគិតទៅខាង Negative Thinking ឬការគិតដែលអវិជ្ជមានគ្រប់ពេលវេលា។ ច្រើនតែមានអារម្មណ៍អស់សង្ឃឹម មើលឃើញជុំវិញខ្លួនសុទ្ធរឿងអាក្រក់ មានអារម្មណ៍ថាខុស ថាខ្លួនឯងគ្មានតម្លៃ គ្មានន័យ និងគិតថាគ្មានថ្នាំព្យាបាលឱ្យជា ទីបំផុតក៏គិតចង់បំផ្លាញខ្លួនឯង នឹកឃើញតែរឿងស្លាប់ និងព្យាយាមសម្លាប់ខ្លួន។
2. ទង្វើដែលកើតចេញពីការប្រែប្រួលខាងការរៀនយល់ដឹង ឬការធ្វើការងារ មិនខ្វល់នឹងអ្វីៗជុំវិញខ្លួន មានអារម្មណ៍នឿយល្វើយ ធ្វើការងារយឺតយ៉ាវ ការងារចុះខ្សោយ គ្មានសមាធិ ការចងចាំចុះខ្សោយ ការសម្រេចចិត្តក៏យ៉ាប់យ៉ឺន។
3. ទង្វើដែលកើតចេញពីផ្លាស់ប្ដូរខាងអារម្មណ៍ គឺច្រើនតែមានអារម្មណ៍សោកសៅ កង្វល់គ្រប់ពេលវេលា ច្រើនតែមួម៉ៅឆេវឆាវ ឆាប់ខឹង នៅមិនសុខ រសាប់រសល់ ជាដើម។
4. ទង្វើដែលប្រែប្រួលយ៉ាងមើលឃើញច្បាស់ ដូចជា គេងមិនលក់ ឆាប់ភ្ញាក់ ឬអ្នកខ្លះគេងលក់ខ្លាំងជ្រុលពេក អ្នកខ្លះធុញទ្រាន់ចំណីអាហារ ធ្វើឱ្យស្រកទម្ងន់។ មានអាការខាងរាងកាយ ព្យាបាលដោយថ្នាំធម្មតាមិនបាត់ ដូចជា អាការឈឺក្បាល ណែនក្នុងពោះ ឈឺរ៉ាំរ៉ៃ សម្ព័ន្ធភាពជាមួយអ្នកដទៃកាន់តែមិនល្អ។

ការមើលថែទាំខ្លួនឯងពេលកើតជំងឺសោកសៅ

1. កុំតាំងគោលដៅក្នុងការធ្វើការងារ កុំប្រតិបត្តិខ្លួនដែលធ្វើឱ្យលំបាកខ្លាំងជ្រុល ឬទទួលខុសត្រូវច្រើនជ្រុល។
2. ញែកបំបែកបញ្ហាធំៗឱ្យទៅជាផ្នែកតូចៗ ព្រមទាំងចាត់រៀងតាមលំដាប់ភាពសំខាន់មុនក្រោយ និងចាប់ផ្ដើមធ្វើតាមដែលអាចធ្វើទៅបាន។
3. ព្យាយាមធ្វើកិច្ចការងារផ្សេងៗរួមជាមួយបុគ្គលដទៃ ប្រសើរជាងនៅតែម្នាក់ឯង។
4. ជ្រើសរើសធ្វើកិច្ចការងារណាដែលសាងនូវអារម្មណ៍ល្អៗ ឬជក់ចិត្ត និងមិនធ្ងន់ធ្ងរខ្លាំងពេក ដូចជា មើលកុន ហាត់ប្រាណស្រាលៗ និងការចូលរួមធ្វើកិច្ចការងារក្នុងសង្គម ជាដើម។
5. កុំសម្រេចចិត្តក្នុងរឿងដែលសំខាន់ចំពោះជីវិតច្រើនពេក ដូចជា ការសុំឈប់ពីការងារ ការរៀបការ ឬការលែងលះ ដោយមិនបានប្រឹក្សាជាមួយជិតដិតដែលស្គាល់គ្នាច្បាស់ និងត្រូវតែបុគ្គលដែលអាចពិចារណាហេតុការណ៍នោះយ៉ាងទៀងត្រង់ មានភាពជាកណ្ដាល និងប្រាសចាកការអគតិដែលកើតពីអារម្មណ៍មកបិទបាំង។ បើអាចទៅរួច និងល្អបំផុតនោះគឺ លើកពេលសម្រេចចិត្តទៅថ្ងៃក្រោយ រហូតទាល់តែសភាវសោកសៅរលាយបាត់ ឬល្អប្រសើរឡើងច្រើនហើយ។
6. មិនគួរទិតៀន ឬដាក់ទោសខ្លួនឯងដែលមិនអាចធ្វើបានដូចដែលត្រូវការ ព្រោះមិនមែនជាកំហុសរបស់ខ្លួនឯងទេ និងគួរធ្វើតាមដែលខ្លួនឯងអាចធ្វើបាន។

ការមើលថែទាំអ្នកកើតជំងឺសោកសៅ

1. យល់ចិត្ត ៈ ការយល់ដឹងពីជំងឺដែលអ្នកជំងឺកំពុងជួបប្រទះ អាចជួយឱ្យសាច់ញាតិកាត់បន្ថយសេចក្ដីរំពឹង ភាពមួម៉ៅក្ដៅក្រហាយ និងភាពទើសទាល់ក្នុងចិត្តចំពោះអ្នកជំងឺបាន។
2. ទទួលស្ដាប់ ៈ ការស្ដាប់អ្នកជំងឺដោយការយល់ចិត្ត យកចិត្តទុកដាក់ និងមិនប្រកាន់ នឹងជួយឱ្យអារម្មណ៍របស់អ្នកជំងឺល្អប្រសើរឡើង។
3. ទម្លាយអារម្មណ៍ ៈ នៅពេលអ្នកជំងឺបានទម្លាយគំនិត និងអារម្មណ៍ដែលមិនល្អផ្សេងៗចេញមក ជាពិសេសគំនិតចង់ធ្វើអត្ថឃាតនោះ នឹងជួយបន្ធូរបន្ថយភាពធុញថប់តានតឹងនៅក្នុងចិត្តបាន។
4. ហាត់ប្រាណ ៈ ការហាត់ប្រាណ ជួយឱ្យរាងកាយរបស់អ្នកជំងឺរឹងមាំ ចិត្តគំនិតស្រស់ថ្លា។ បើសិនបានហាត់ប្រាណរួមជាមួយអ្នកដទៃផងនោះ នឹងរឹតតែជួយបង្កើនការចូលក្នុងសង្គមមនុស្ស និងមិនមានអារម្មណ៍ថាឯកោ។
5. ផ្លាស់ប្ដូរបរិយាកាស ៈ គួរនាំអ្នកជំងឺទៅដើរកម្សាន្តដើម្បីផ្លាស់ប្ដូរបរិយាកាស នឹងជួយឱ្យចិត្តគំនិតរបស់អ្នកជំងឺស្រស់ថ្លាឡើងមួយកម្រិតដែរ។
6. ការពារការធ្វើបាបខ្លួនឯង ៈ សាច់ញាតិត្រូវប្រយ័ត្នអ្នកជំងឺធ្វើបាបខ្លួនឯង ដោយត្រូវប្រមូលទុកដាក់ឧបករណ៍ដែលអ្នកជំងឺអាចយកមកធ្វើបាបខ្លួនឯងឱ្យនៅឆ្ងាយពីអ្នកជំងឺ។
7. សង្កេតមើលអាការ ៈ ឧស្សាហ៍សង្កេតមើលអាការអ្នកជំងឺថា តើមានរឿងសោកសៅ ធុញថប់ ឬគិតប្រុងធ្វើបាបខ្លួនឯងដែរឬទេ? បើនិយាយណែនាំហើយមិនល្អប្រសើរឡើងនោះ គួរប្រញាប់នាំទៅជួបគ្រូពេទ្យដើម្បីប្រឹក្សាពីអាការ។
8. មើលថែទាំកិច្ចការងារប្រចាំថ្ងៃ តាមដានការញ៉ាំថ្នាំ ៈ សាច់ញាតិគួរជួយមើលថែទាំកិច្ចការងារប្រចាំថ្ងៃរបស់អ្នកជំងឺ ដូចជា ញ៉ាំអាហារឱ្យបានសមរម្យ ភ្ញាក់ និងគេងឱ្យបានទៀងពេល រួមទាំងតាមដានការញ៉ាំថ្នាំឱ្យត្រឹមត្រូវតាមវេជ្ជបញ្ជា និងស៊ូទ្រាំ ព្រោះការព្យាបាលឱ្យទទួលបានលទ្ធផលល្អ ត្រូវប្រើពេលវេលាយូរ៕

ធ្លាប់នឹកឆ្ងល់ដែរឬទេថា ហេតុអីបានពេលយើងប៉ះខ្លួនឯង មានអារម្មណ៍មិនដូចអ្នកផ្សេងគេប៉ះយើង? នេះជាមូលហេតុមួយដែលធ្វើឱ្យយើងមានអារម្មណ៍សប្បាយស្រួលខ្លួននៅពេលមានអ្នកមកធ្វើម៉ាស្សាច្របាច់ឱ្យយើង និងជាមូលហេតុដែលធ្វើឱ្យយើងមិនអាចរសើបដោយខ្លួនឯងបាន។

Rebecca Bohme អ្នកប្រព័ន្ធប្រសាទវិទ្យានៃមហាវិទ្យាល័យ Linkoping ក្នុងប្រទេសស៊ុយអែដ បានបញ្ជាក់ថា “នៅពេលយើងប៉ះពាល់ខ្លួនឯង អវយវៈជាច្រើនផ្នែករបស់រាងកាយយើងនឹងបន្ថយកិច្ចការងារផ្សេងៗដែលកំពុងធ្វើ”

ខណៈពេលជាមួយគ្នា ការប៉ះពាល់ពីអ្នកដទៃ ជាការធ្វើឱ្យខួរក្បាលរបស់យើងជំរុញប្រព័ន្ធប្រសាទប៉ះពាល់របស់យើងខ្លាំងជាង។

ការប៉ះពាល់ពីអ្នកដទៃ ប្រៀបដូចជាការទំនាក់ទំនងគ្នារវាងយើងជាមួយអ្នកម្ខាងទៀត មិនថាការទាមទារចំណាប់អារម្មណ៍ ផ្ដល់ការគាំទ្រ ឬជាការបង្ហាញសេចក្ដីស្រឡាញ់នោះទេ ការប៉ះពាល់នីមួយៗសុទ្ធតែមានភាពពិសេស ដែលប្រព័ន្ធប្រសាទប៉ះពាល់របស់យើងអាចញែកបានយ៉ាងលម្អិត ដូច្នេះហើយទើបខួរក្បាលរបស់យើងអាចកាត់បន្ថយការផ្ដល់ភាពសំខាន់ជាមួយការប៉ះពាល់ពីយើងខ្លួនឯងបាននោះ។

“ទោះបីជាមានការប៉ះពាល់ពីអ្នកដទៃនៅក្នុងចំណុចតែមួយ ក្នុងលក្ខណៈដូចគ្នា តែខួរក្បាលអាចញែកដាច់បានយ៉ាងលម្អិតថា ការប៉ះពាល់នីមួយៗខុសប្លែកពីគ្នា ឬការប៉ះពាល់ណាសំខាន់ជាង ដោយខួរក្បាលនឹងផ្ដល់ភាពសំខាន់ជាមួយការប៉ះពាល់ពីអ្នកដទៃខ្លាំងជាងការប៉ះពាល់ពីខ្លួនឯង”

ខួរក្បាល នឹងការចាក់ក្រឡេកខ្លួនឯង

ខណៈពេលជាមួយគ្នា នៅពេលខួរក្បាលជាអ្នកបញ្ជាថា ការប៉ះពាល់ណាដែលសំខាន់តិច សំខាន់ខ្លាំងនោះ តើពេលខួរក្បាលមិនប្រក្រតី ដូចជាអ្នកកើតជំងឺវិកលចរិត(ឆ្កួត) តើគេអាចចាក់ក្រឡេកខ្លួនឯងឱ្យរសើបបានសម្រេចឬទេ?។ តាមរយៈរបាយការណ៍សិក្សាស្រាវជ្រាវជាច្រើនបានរកឃើញថា អ្នកជំងឺដែលមានបញ្ហាខាងការធ្វើការងាររបស់ខួរក្បាល(ឆ្កួត ឬឡប់ស្មារតី) អាចចាក់ក្រឡេកខ្លួនឯងឱ្យរសើបបាន ព្រោះខួរក្បាលមិនអាចញែកភាពសំខាន់របស់ការប៉ះពាល់ម្ដងៗនោះបានឡើយ រួមទាំងរូបភាពស្រមើស្រមៃផ្សេងៗដែលអ្នកជំងឺវិកលចរិតបានឃើញ បានដឹង រហូតដល់មិនអាចញែកដាច់រវាងរឿងដែលនឹកឡើងដោយឯកឯង និងរឿងដែលកើតឡើងពិតបានទៀតផង។

ទោះជាយើងមិនអាចចាក់ក្រឡេកខ្លួនឯងឱ្យរសើបបានក៏ដោយ តែយើងអាចបានទទួលការប៉ះពាល់ពីអ្នកដទៃបាន និងមានអារម្មណ៍ពិសេសខ្លាំងជាងការប៉ះពាល់ខ្លួនឯងទៅទៀត មិនថាតែការចាប់ដៃ ឱប អង្អែលក្បាលឡើយ…ដូច្នេះ កុំភ្លេចផ្ដល់ការប៉ះពាល់ដ៏សែនពិសេសទាំងនេះទៅមនុស្សដែលអ្នកស្រឡាញ់ផងណា៎៕

នៅលើទំព័រ​បណ្ដាញ​សង្គម ​សម្ដេច​តេជោ បាន​ធ្វើ​ការ​បដិសេធ​ទៅនឹង​ការ​លើក​ឡើង​ដែល​ថា កម្ពុជា​នឹង​មាន​ការ​បិទ​ប្រទេស​ ឬ​ខេត្ត​ក្រុង​ និង​តំបន់​ណា​មួយ​។

“ក្នុងឋានៈជាប្រមុខរាជរដ្ឋាភិបាល ខ្ញុំសូមបញ្ជាក់ថានឹងមិនមានការបិទប្រទេស ឬរាជធានីខេត្ត ឬតំបន់ណាមួយនោះទេ” សម្ដេចតេជោ​ ហ៊ុន​សែន​ បានសរសេរលើទំព័រ​បណ្តាញសង្គមរបស់សម្តេចនាព្រឹកថ្ងៃទី12 វិច្ឆិកាយ៉ាង​ដូច្នេះ​។

សម្តេចបន្ថែមថា “ការឃោសនាអកុសលរបស់ពួកអាក្រ​ក់ទាំងនេះ សំដៅធ្វើឱ្យប្រទេសមានចលាចល ទំនិញឡើងថ្លៃ ប្រជាជនរស់នៅមិនបានស្ងប់ចិត្ត ដើម្បីពួកគេគេងចំណេញខាងនយោបាយតែប៉ុណ្ណោះ”។

សម្ដេច​តេជោ បាន​បន្ថែម​ថា ពលរដ្ឋ​គ្រប់​រូប​គួរ​តែ​ការពារ​ខ្លួន​ ដោយការ​ពាក់​ម៉ាស់ ការ​លាង​ដៃ​ ​ការ​រក្សា​គម្លាត​ពី​គ្នា​ និង​មិន​ត្រូវ​មាន​ការ​​ជួប​ជុំ ទៅ​តាម​ការ​ណែនាំ​របស់​ក្រសួង​សុខាភិបាល​។

ទាក់​ទង​នឹង​ការ​ទប់​ស្កាត់​វីរុស​Covid-19 ដោយ​ការ​ពាក់​ម៉ាស់ សម្ដេច​តេជោ បាន​បញ្ជាក់​ថា “នគរបាលចរាចរណ៍ក៏នឹងជូនម៉ាស់សម្រាប់អ្នកជិះកង់ ជិះម៉ូតូដែលមិនបានពាក់ម៉ាស់” ផងដែរ ដោយ​កាល​ពី​ថ្ងៃ​ទី​11​វិច្ឆិកាកន្លង​ទៅ​ សម្ដេច​ បាន​បញ្ជា​ឱ្យ​បញ្ចេញ​ម៉ាស់​ចំនួន​2លាន​បន្ទះ​​ពី​ឃ្លាំង​យុទ្ធ​សាស្ត្រ​ ដើម្បី​យក​ទៅ​ចែក​ជូន​ពលរដ្ឋ​ក្រីក្រ​។

ចំណែក​​ពលរដ្ឋ​ដែល​កំពុង​ធ្វើ​ចត្តាឡីស័ក​នៅតាម​ផ្ទះ​ សម្ដេច​ក៏​បាន​ណែនាំ​ឱ្យ​អាជ្ញាធរ​មូលដ្ឋាន​ ធ្វើ​ការ​តាម​ដាន​ និង​ជួយ​ដោះ​ស្រាយ​ជីវ​ភាព​របស់​គ្រួសារ​ក្រី​ក្រផងដែរ​៕

ក្រសួងសុខាភិបាលកម្ពុជានាព្រឹកថ្ងៃទី12វិច្ឆិកានេះ បានឱ្យដឹងថា កម្ពុជាមិនបានរកឃើញអ្នកផ្ទុកវីរុសCovid-19 ទេ នៅក្នុងថ្ងៃទី11វិច្ឆិកា ប៉ុន្តែក្រសួងបានបញ្ជាក់ថា បានរកឃើញអ្នកវិជ្ជមានចំនួន4ករណីនៅក្នុងរយៈពេល7ថ្ងៃកន្លងទៅនេះ។

គិតចាប់ពីថ្ងៃទី4ដល់ទៅ11វិច្ឆិកា កម្ពុជាធ្វើតេស្តបាន2,497ករណី ក្នុងនោះមាន817ករណីបានធ្វើតេស្តលើកទីពីរ ហើយការធ្វើតេស្តនេះបានរកឃើញអ្នកវិជ្ជមានចំនួន4នាក់ ដែលអ្នកទាំងនេះកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។

គិតមកដល់បច្ចុប្បន្ន (12វិច្ឆកា) កម្ពុជាបានរកឃើញអ្នកឆ្លងវីរុសសរុប 301នាក់ ក្នុងនោះមាន288នាក់បានជាសះស្បើយ និង13នាក់កំពុងទទួលការព្យាបាលនៅមន្ទីរពេទ្យមិត្តភាពខ្មែរ-សូវៀត។

ក្រសួងសុខាភិបាលកម្ពុជានាល្ងាចថ្ងៃទី11វិច្ឆិកានេះ បានប្រកាសឱ្យដឹងថា ក្រសួងនឹងបញ្ចេញម៉ាសចំនួន2លានបន្ទះពីឃ្លាំងយុទ្ធសាស្ត្ររបស់ខ្លួន ដើម្បីប្រគល់ជូនឯកឧត្តមអភិបាលក្រុងភ្នំពេញ សម្រាប់យកទៅចែកជូនពលរដ្ឋដែលមានជីវភាពខ្វះខាត ក្នុងបំណងការពារការឆ្លងរាលដាលនៃវីរុសCovid-19។

ការបញ្ចេញម៉ាសពីឃ្លាំងយុទ្ធសាស្ត្រនេះ ត្រូវបានធ្វើឡើងដោយឯកឧត្តមវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល ដោយអនុវត្តទៅតាមប្រសាសន៍របស់សម្ដេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានចេញបទបញ្ជានារសៀលថ្ងៃទី11វិច្ឆិកានេះ។

សូមបញ្ជាក់ថា មកដល់បច្ចុប្បន្ន កម្ពុជាបានរកឃើញអ្នកផ្ទុកវីរុសCovid-19 ចំនួន301នាក់ ក្នុងនោះមាន288នាក់បានជាសះស្បើយ និង13នាក់កំពុងទទួលការព្យាបាល។ កម្ពុជាមិនទាន់មានករណីបាត់បង់ជីវិតដោយសារជំងឺរលាកសួតដែលបង្កឡើងដោយវីរុសCovid-19 នេះនៅឡើយ។

ខួរក្បាល ជាអវយវៈមួយផ្នែកដែលសំខាន់ចំពោះរាងកាយខ្លាំងណាស់ ព្រោះក្រៅពីពេញទៅដោយខ្សែសរសៃប្រសាទដែលមានភាពស្មុគស្មាញរាប់លានសរសៃហើយនោះ បើខួរក្បាលធ្វើការខុសប្រក្រតី នឹងហុចផលប៉ះពាល់ទៅដល់អវយវៈផ្នែកផ្សេងៗក្នុងរាងកាយ និងមិនអាចរកខួរក្បាលថ្មីមកផ្លាស់ប្ដូរ ឬដូរដោះបានឡើយ។

ខួរក្បាល អាចរាប់បានថាជាអវយវៈដ៏សំខាន់របស់រាងកាយ ដោយមានតួនាទីជាមជ្ឈមណ្ឌលកណ្ដាលគ្រប់គ្រងកម្មវិធីផ្សេងៗដែលកើតឡើងក្នុងរាងកាយមនុស្ស មិនថាតែការលោតរបស់បេះដូង ការធ្វើចលនាផ្សេងៗ ឬការដកដង្ហើមជាដើម ដោយខួរក្បាលនឹងគ្រប់គ្រង និងបញ្ជារាងកាយឱ្យធ្វើការតាមការគិត ដើម្បីឱ្យមនុស្សអាចបំពេញការងារក្នុងជីវិតប្រចាំថ្ងៃបានយ៉ាងប្រក្រតី។ ខួរក្បាលធ្វើការងារគ្រប់ពេលវេលា ដូច្នេះហើយទើបការយកចិត្តទុកដាក់លើទង្វើដែលគួរប្រតិបត្តិ ដើម្បីឱ្យខួរក្បាលធ្វើការបានល្អ គឺជារឿងដែលមនុស្សគ្រប់គ្នាគួរផ្ដល់ភាពសំខាន់ ដើម្បីសុខភាពដ៏ល្អរបស់ខួរក្បាល និងចៀសវាងពីទង្វើអាក្រក់ៗដែលអាចបំផ្លាញខួរក្បាលបាន។

4ទង្វើបំផ្លាញខួរក្បាល

1. ភាពធុញថប់តានតឹង ៈ ជាផលអាក្រក់ដល់ស្ថានភាពផ្លូវចិត្ត និងហុចផលប៉ះពាល់ដល់ខួរក្បាល ធ្វើឱ្យខូចសមាធិ ឬអ្នកខ្លះអាចឈានទៅរកសភាវសោកសៅ និងមានបញ្ហាផ្លូវចិត្តបានទៀតផង។
2. បរិស្ថានដែលមានខ្យល់អាកាសមិនល្អ ៈ ការស្ថិតនៅក្នុងខ្យល់អាកាសដែលល្អ នឹងធ្វើឱ្យខួរក្បាលបានទទួលអុកស៊ីហ្ស៊ែនគ្រប់គ្រាន់ ដូច្នេះគួរចៀសវាងការស្នាក់អាស្រ័យនៅក្នុងទីកន្លែងដែលខ្យល់អាកាសមិនបរិសុទ្ធ ឬពេញទៅដោយពិសពុលខាងអាកាសគ្រប់ពេលវេលា។
3. ជក់បារី ៈ អ្នកដែលជក់បារីជាប់ជាប្រចាំ ក្រៅពីធ្វើឱ្យកើតរោគមហារីកសួតហើយ នៅធ្វើឱ្យរាងកាយ និងខួរក្បាលបានទទួលអុកស៊ីហ្ស៊ែនកាន់តែតិច និងជាមូលហេតុរបស់ជំងឺសរសៃឈាមខួរក្បាល។
4. ជំងឺប្រចាំកាយប្រភេទខ្លះ ដូចជា ៈ ទឹកនោមផ្អែម លើសឈាម ខ្លាញ់ក្នុងឈាមខ្ពស់ ជាបច្ច័យប្រថុយប្រថានរបស់ជំងឺខួរក្បាលជាច្រើន ដូច្នេះ បើរកឃើញថាខ្លួនឯងមានជំងឺប្រចាំកាយ គួរព្យាបាលតាំងពីដំបូងៗ ដើម្បីការពារមិនឱ្យកើតផលអាក្រក់ ព្រោះការព្យាបាលនៅពេលកើតការបំផ្លាញខួរក្បាលហើយ នឹងមិនអាចធ្វើឱ្យខួរក្បាលត្រឡប់មកធ្វើការបានពេញលេញដូចប្រក្រតីបានឡើយ ហើយផ្លូវចិត្តក៏នឹងធ្វើការខុសប្រក្រតីដែរ។

5វិធីបំប៉នខួរក្បាល

វេជ្ជបណ្ឌិតជំនាញខាងប្រព័ន្ធប្រសាទវិទ្យាបាននិយាយថា ខួរក្បាលមានភាពពាក់ព័ន្ធជាមួយអារម្មណ៍ និងការរៀនយល់ដឹង ដូច្នេះហើយទើបទាំងអស់នេះ មនុស្សគួរបែរមកយកចិត្តទុកដាក់លើទង្វើអភិវឌ្ឍខួរក្បាល ដែលមានទង្វើល្អៗ 5យ៉ាងដូចខាងក្រោម ៈ

1. បរិភោគល្អ គឺទទួលទានអាហារដែលមានប្រយោជន៍គ្រប់ទាំង 5ប្រភេទក្រុម កាត់បន្ថយចំណីអាហារប្រភេទខ្លះ ជាពិសេសអាហារដែលមានស្ករច្រើនដែលអាចនឹងប្រថុយប្រថានក្នុងការកើតជំងឺទឹកនោមផ្អែម និងជំងឺសរសៃឈាមខួរក្បាល។
2. ហាត់ប្រាណល្អ ការហាត់ប្រាណនឹងធ្វើឱ្យរាងកាយជារួម និងសរសៃឈាមរឹងមាំ គ្មានសភាវលើសទម្ងន់។
3. គេងសម្រាកល្អ ការគេងសម្រាកឱ្យបានគ្រប់គ្រាន់នឹងជួយឱ្យរាងកាយមានពេលសម្រាកដើម្បីជួសជុលខ្លួនឯង ដូច្នេះគួរមានពេលវេលាសម្រាក គេងលក់ឱ្យបានយ៉ាងតិច 6-8ម៉ោងក្នុងមួយថ្ងៃ។
4. គិតល្អ ការហ្វឹកហាត់គិត ហ្វឹកហាត់ចាប់ផ្ដើមធ្វើ នឹងជួយឱ្យខួរក្បាលកើតការរៀនយល់ដឹង និងអភិវឌ្ឍកម្មវិធីការគិតឱ្យកាន់តែលឿនឡើង។
5. សន្ទនាល្អ ការហ្វឹកហាត់សន្ទនា ជជែកនិយាយជាមួយអ្នកដទៃជាប្រចាំ និងជាប់លាប់ នឹងជួយឱ្យខួរក្បាលមានការហ្វឹកហាត់ក្នុងការចេះកែបញ្ហាល្អ។ ចំណែកឯអ្នកដែលសម្ងំនៅតែឯង មិនចូលចិត្តជួបមនុស្សម្នា គេរកឃើញថា ខួរក្បាលមានកម្មវិធីការធ្វើការលើការកែបញ្ហាផ្សេងៗយឺតយ៉ាវ៕

អាច​និយាយបានថា នរណាៗក៏​មិន​ចង់​ឈឺ​ថ្កាត់​ដែរ រឹតតែ​អាយុ​ច្រើន រោគាព្យាធិ​រឹតតែ​សួររក​មុខ ដោយសារតែ​រាងកាយ​យើង​ចុះខ្សោយ។ តែ…តើ​វា​នឹង​ប្រសើរ​ជាង​ទេ បើសិនជា​យើង​អាច​ផ្លាស់ប្ដូរ​ទង្វើ​មួយចំនួន​ដើម្បីឱ្យ​វា​មាន​តុល្យភាព​ជាមួយនឹង​តម្រូវការ​របស់​រាងកាយ និង​កាត់បន្ថយ​បញ្ហា​ការឈឺ​ថ្កាត់​នោះ? ដូច្នេះហើយ​ទើប​ថ្ងៃនេះ ឡា​រ៉ែ​ន​សូម​នាំយក 22ចំណុច ដែល​មនុស្ស​អាយុ​ច្រើន​គួរតែ​ធ្វើ ដើម្បី​ថ្នម​រាងកាយ​ខ្លួនឯង មក​ជម្រាប​មិត្ត​អ្នកអាន(ជាពិសេស​មនុស្ស​ចាស់)ដើម្បី​មាន​សុខភាព​ល្អ និង​អាយុ​យឺនយូរ។

1. ឆាប់​ចូល​គេង…ការ​គេង​លក់​សម្រាក​យ៉ាងតិច 6 – 8ម៉ោង​ក្នុង 1ថ្ងៃ នឹង​ជួយ​ឱ្យ​រាងកាយ​អាច​ជួសជុល​ផ្នែក​ដែល​សឹករេចរឹល​ក្នុងអំឡុងពេល​យើង​គេង​លក់បាន​យ៉ាង​មាន​ប្រសិទ្ធភាព ហើយ​ក្នុងពេលដែល​យើង​គេង​លក់​នោះ រាងកាយ​នឹង​បញ្ចេញ​សារធាតុ​មេ​ឡា​ថូ​នី​ន ដែល​វា​នឹង​នៅចាំ​គ្រប់គ្រង​ការធ្វើការងារ​របស់​ប្រព័ន្ធផ្សេងៗក្នុង​រាងកាយ ដូចជា ប្រព័ន្ធ​ការបន្ត​ពូជ ប្រព័ន្ធ​ប្រសាទ ប្រព័ន្ធ​ការពារ​ជំងឺ។ល។
2. ធ្វើ​អ្វី​ឱ្យយឺតៗជាង​មុន​បន្តិច…ត្រូវ​ប្រយ័ត្នប្រយែង​ឱ្យ​ខ្លាំង មិនថាតែ​ចង់​អង្គុយ ឈរ ឬ​ដើរ​នោះទេ ព្រោះ​រឹតតែ​ចាស់​ខ្លួន ឧប្បត្តិហេតុ​អាច​កើតឡើង​ចំពោះ​រាងកាយ​តើ​ង​បាន​យ៉ាង​ងាយ។
3. ញ៉ាំ​អាហារ​ឱ្យ​តិចជាង​មុន​បន្តិច…ដើម្បី​ថ្នម​ប្រព័ន្ធ​ការរំលាយ​អាហារ ព្រោះ​រាងកាយ​យើង​នឹង​ចាប់ផ្ដើម​ធ្វើអ្វីៗបាន​កាន់តែ​តិច​ទៅ រួមទាំង​ការរំលាយ​អាហារ​ផងដែរ ដូច្នេះហើយ​ទើប​គួរ​ញ៉ាំ​តែ​ល្មម​ឆ្អែត និង​ទំពារ​ឱ្យ​ល្អិត​ផង។
4. ញ៉ាំ​អាហារ​ឱ្យបាន​ច្រើន​ប្រភេទ​បន្តិច…ទទួលទាន​អាហារ​ឱ្យបាន​ច្រើន​ប្រភេទ ឱ្យ​គ្រប់ 5ប្រភេទ​ក្រុម ដើម្បី​ទទួលបាន​សារធាតុ​អាហារ​ដែល​នឹង​សាង​ប្រយោជន៍​ដល់​រាងកាយ។
5. ញ៉ាំ​អាហារ​ពេល​ល្ងាច ពី​ភ្លឺ​បន្តិច។
6. ញ៉ាំ​អាហារក្ដៅៗឱ្យបាន​ច្រើន​បន្តិច។
7. ញ៉ាំ​ទឹក​ឱ្យបាន​ច្រើន​បន្តិច។
8. ញ៉ាំ​អំបិល​តិចជាង​មុន​បន្តិច។
9. ហាត់ប្រាណ​ឱ្យបាន​ច្រើន​បន្តិច…ក្រៅពី​ភាព​រឹងប៉ឹង​ដែល​ទទួលបាន​ហើយ នៅ​ជួយ​ពង្រឹង​ប្រព័ន្ធ​ការពារ​ជំងឺ​ដល់​រាងកាយ ឱ្យ​ប្រព័ន្ធ​អ៊ិម​មូ​ន​រឹងមាំ​ឡើង និង​ដែល​សំខាន់ គឺ​ធ្វើឱ្យ​យើង​អាច​បណ្ដេញ​ជាតិពុល និង​ខ្លាញ់​លើស​ចេញពី​រាងកាយ​បាន​ទៀតផង។
10. បើក​ចិត្ត​ឱ្យ​ទូលាយ​ឡើង​បន្តិច។
11. មាន​អារម្មណ៍​រ៉ូ​មែន​ទិ​ក​ឱ្យបាន​ច្រើន​បន្តិច។
12. និយាយ​ពី​កេរ្តិ៍ឈ្មោះ​កិត្តិយស និង​ផលប្រយោជន៍​របស់ខ្លួន​ឯង​ឱ្យ​តិចជាង​មុន​បន្តិច។
13. ស្គាល់​ពី​ភាព​ល្មម​គ្រប់គ្រាន់​ឱ្យបាន​ច្រើន​បន្តិច។
14. បំភ្លេច​អាយុ​ខ្លួនឯង​ខ្លះទៅ។
15. រវីរវល់​នឹង​រឿង​កំប៉ិកកំប៉ុក​ឱ្យ​តិចជាង​មុន​បន្តិច។
16. មិន​ថា​រឿង​អ្វី​ក៏ដោយ ទុកចោល​ខ្លះទៅ…កុំទៅ​ប្រកាន់ខ្ជាប់ ឬ​ធុញថប់​តានតឹង​ជាមួយនឹង​រឿង​ណាមួយ​ខ្លាំងពេក ទម្លាក់ចោល​ខ្លះទៅ ដើម្បី​ភាពសប្បាយ​ចិត្ត​របស់ខ្លួន​ឯង។
17. សេពគប់មិត្តភក្តិឱ្យបានច្រើន ព្រោះថា មិត្តភក្តិនេះឯងដែលនឹងជួយបំបាត់ភាពអផ្សុក សាងសំឡេងសើចសប្បាយ និងចែករំលែករឿងរ៉ាវផ្សេងៗរវាងគ្នាទៅវិញទៅមក។
18. ញញឹមឱ្យច្រើនបន្តិច ព្រោះការញញឹមវានឹងជួយឱ្យមើលទៅឃើញនៅក្មេង។ រឹតតែញញឹម រឹតតែក្រចាស់ ធ្វើឱ្យរាងកាយរបស់យើងនៅបានយូរ ឬហៅថា អាយុវែងហ្នឹងឯង។
19. រកការងារផ្សេងៗធ្វើឱ្យបានច្រើនបន្តិច ដើម្បីបន្ធូរបន្ថយភាពធុញទ្រាន់។
20. តែងខ្លួនឱ្យស្អាតៗ ឱ្យមើលទៅឃើញល្អ ព្រោះនៅពេលដែលយើងល្អ និងស្រស់ស្អាតហើយ យើងនឹងមានសេចក្ដីសុខជាមួយការរស់នៅ ធ្វើឱ្យមើលទៅស្រស់ស្រាយមានជីវិតជីវ៉ា។
21. ដើរលេងឱ្យបានច្រើនបន្តិច ព្រោះការចេញទៅដើរលេងធ្វើឱ្យបានជួបនូវអ្វីដែលថ្មីៗ បរិយាកាសថ្មីៗ មិត្តភក្តិថ្មីៗមិនដដែលៗ។
22. បណ្ដោយខ្លួនតាមសប្បាយបន្តិច មិនចាំបាច់ទៅកំណត់ច្បាប់ទម្លាប់អ្វីចំពោះខ្លួនឯងច្រើនពេកទេ បណ្ដោយតាមសប្បាយៗ។

យ៉ាងម៉េចដែរ? 22ចំណុចនេះ មិនពិបាកធ្វើតាមទេ បើអ្នកស្រឡាញ់ខ្លួនឯង។ ធ្វើរហូតទាល់តែក្លាយជាទម្លាប់ដើម្បីរាងកាយរឹងប៉ឹង និងរស់នៅជាមួយកូនចៅបានយូរតទៅទៀត ព្រោះថា ការមិនមានជំងឺឈឺថ្កាត់ គឺជាលាភដ៏ប្រសើរបំផុត ខ្លាំងជាងមានទ្រព្យសម្បត្តិលុយកាក់ធំប៉ុនភ្នំទៅទៀត៕