Category: សុខភាព

អគារកាណាឌីយ៉ា ត្រូវបានក្រសួងសុខាភិបាលបិទបណ្ដោះអាសន្ន ក្រោយពីរកឃើញបុគ្គលិកធនាគារម្នាក់វិជ្ជមាននឹង Covid-19
ក្រសួងសុខាភិបាលកម្ពុជា បានប្រកាសបិទធនាគារកាណាឌីយ៉ាដែលមានទីតាំងជិតផ្លូវភ្លោះវត្តភ្នំ ក្នុងសង្កាត់ស្រះចក ខណ្ឌដូនពេញជាបណ្ដោះអាសន្ន ក្រោយពីបានរកឃើញបុរសជនជាតិខ្មែរម្នាក់ជាបុគ្គលិកធនាគារចិន វិជ្ជមាននឹង Covid-19។
កាលពីយប់មិញ ក្រសួងសុខាភិបាលរកឃើញអ្នកផ្ទុកវីរុស Covid-19 ម្នាក់ ដែលជាបុរសជនជាតិខ្មែរ និងជាបុគ្គលិកធនាគារចិន (Bank of China) ដែលមានការិយាល័យនៅក្នុងអគារកាណាឌីយ៉ាខាងលើ ដូច្នេះ ក្រសួងសុខាភិបាលក៏សម្រាប់បិទអគារនេះជាបណ្ដោះអាសន្នដើម្បីស្រាវជ្រាវអ្នកដែលជាប់ពាក់ព័ន្ធ។ បុគ្គលិកធនាគារចិនខាងលើនេះ មានទីលំនៅនៅក្នុងសង្កាត់វាលស្បូប ខណ្ឌច្បារអំពៅ រាជធានីភ្នំពេញ។ នេះបើតាមសារព័ត៌មាន FN ដែលបានដកស្រង់សម្ដីលោកស្រី យក់ សម្បត្តិ រដ្ឋលេខាធិការក្រសួងសុខាភិបាល។
ដូច្នេះ គិតមកដល់បច្ចុប្បន្ន កម្ពុជាបានរកឃើញអ្នកឆ្លងីវីរុស Covid-19 សរុបចំនួន 331នាក់ ក្នុងនោះមានអ្នកកំពុងសម្រាកព្យាបាលចំនួន 27នាក់ និងជាសះស្បើយចំនួន 304នាក់៕
December 3, 2020
កម្ពុជារកឃើញអ្នកឆ្លង Covid-19 ថ្មីចំនួន 2 ករណីបន្ថែមទៀត ក្នុងនោះមានបុគ្គលិកធនាគារផងដែរ
នៅព្រឹកថ្ងៃទី 3 ខែធ្នូនេះ ក្រសួងសុខាភិបាលកម្ពុជា បានប្រកាសឱ្យដឹងថា បានរកឃើញករណីវិជ្ជមាននឹង Covid—19 ថ្មី ចំនួន 2នាក់បន្ថែមទៀត ដែលនេះមានជាប់ទាក់ទងនឹងករណីផ្ទុកវីរុសរបស់ភរិយាលោកអគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ។
ករណីឆ្លងខាងលើរួមមាន៖ ទីមួយ៖ ស្ត្រីជនជាតិខ្មែរ អាយុ 23ឆ្នាំ នៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ដែលមានស្វាមីជាអនុប្រធាននាយកដ្ឋានពន្ធនាគារនៃក្រសួងមហាផ្ទៃ។ ទីពីរ៖ ស្ត្រីជនជាតិខ្មែរ អាយុ 21ឆ្នាំ នៅសង្កាត់វាលស្បូវ ខណ្ឌច្បារអំពៅ ទីក្រុងភ្នំពេញ ដែលជាប្អូនបង្កើតរបស់ស្ត្រីខាងលើ និងជាបុគ្គលិករបស់ធនាគារកាធេយូណាយធីត នៅភ្នំពេញ។
គិតត្រឹមព្រឹកថ្ងៃទី 3ធ្នូនេះ កម្ពុជាបានរកឃើញអ្នកឆ្លងីវីរុស Covid-19 សរុបចំនួន 331នាក់ ក្នុងនោះមានអ្នកកំពុងទទួលការព្យាបាលចំនួន 27នាក់ និងជាសះស្បើយចំនួន 304នាក់៕

December 3, 2020
ការចិញ្ចឹមកូនក្នុងសតវត្សរ៍ទី21 តើត្រូវត្រៀមរួចជាស្រេចសម្រាប់កូនប៉ុនណាទើបគ្រប់គ្រាន់?
ត្រូវតែទទួលស្គាល់ថា ពិភពលោកសព្វថ្ងៃនេះវិលលឿនមែនទែន មិនដូចសម័យយើងកាលពីអតីតឡើយ។ ក្មេងដែលកើត និងធំធាត់ឡើងក្នុងយុគសតវត្សរ៍ទី21 នេះ កំពុងជួបនឹងយុគសម័យដែលមានការផ្លាស់ប្ដូរលឿនបំផុតក្នុងប្រវត្តិសាស្ត្ររបស់មនុស្សជាតិ។ លោកឪពុក អ្នកម្ដាយខ្លួនឯងក៏កំពុងប្រឈមនឹងភាពសាកល្បងដែលមិនធ្លាប់កើតមានពីមុនមកដូចគ្នាដែរ ឧទាហរណ៍ដូចជា មុខរបរអាជីពជាច្រើនក្នុងអតីតកាល ត្រូវបានរលាយបាត់ ខណៈពេលជាមួយគ្នា ក៏មានមុខរបរអាជីពថ្មីៗដែលមិននឹកស្មានដល់បានកើតឡើងដែរ ដូចជា Youtuber ឬ Caster ការសរសេរកូដ ឬ Coding របស់លេង ឬវិធីការរៀនយល់ដឹងបែបថ្មីៗ ដែលធ្វើឱ្យពេលខ្លះបទពិសោធកាលពីអតីតកាលរបស់ឪពុកម្ដាយ លែងអាចជួយក្នុងការចិញ្ចឹមមើលថែកូនបានតទៅទៀត។ល។
រឿងតែមួយគត់ដែលឪពុកម្ដាយក្នុងយុគសតវត្សរ៍ទី21 នេះធ្វើបានល្អបំផុត គឺការត្រៀមរួចជាស្រេចសម្រាប់កូនជាមួយការរៀនយល់ដឹង និងប្រឈមជាមួយបញ្ហាគ្រប់ស្ថានការណ៍ដែលកើតឡើង ដើម្បីអ្វីដែលថា ទោះជាគេ(កូនៗ)នឹងជួបរឿងអ្វីនាពេលអនាគត ក៏អាចទប់ទល់បានយ៉ាងទាន់ពេលវេលា និងត្រៀមជាស្រេចក្នុងការរៀនយល់ដឹងពីរឿងរ៉ាវផ្សេងៗដែលកើតឡើង បានយ៉ាងមានប្រសិទ្ធភាពបំផុត។
តើឪពុកម្ដាយអាចត្រៀមភាពប្រុងប្រៀបរួចជាស្រេចឱ្យកូនយ៉ាងណា?
1.បង្ហាត់កូនឱ្យចេះជួយខ្លួនឯង
អាចបង្ហាត់បង្រៀនបានតាំងពីកូននៅតូច ដូចជាញ៉ាំបាយ ងូតទឹក ដុសសម្អាតធ្មេញ…ធ្វើឱ្យកូនមានអារម្មណ៍ថា ខ្លួនគេអាចទៅរួច ធ្វើអ្វីក៏បាន ស្រឡាញ់ និងមានមោទនភាពលើខ្លួនឯង ឬដែលហៅថា Self-esteem ដែលជាដំណាក់កាលដំបូងរបស់ការអភិវឌ្ឍខួរក្បាល។
2.បណ្ដោយឱ្យកូនលេង ព្រោះការលេង គឺជាការងាររបស់ក្មេង
ក្នុងអំឡុងពេលដែលកូនលេង នឹងកើតមានការតាំងគោលដៅរយៈពេលខ្លីម្ដងម្កាលដោយធម្មជាតិ។ មានការប្រើម្រាមដៃទាំង10 និងប្រព័ន្ធប្រសាទប៉ះពាល់ទាំង5 ធ្វើឱ្យខួរក្បាលផ្នែកខាងមុខបានទទួលការអភិវឌ្ឍ។ ឧទាហរណ៍ការលេងដែលជួយជំរុញខួរក្បាលរបស់កូន ដូចជាការផាត់ពណ៌ សូនរូបជាមួយដីឥដ្ឋ លេងតម្រៀបដុំឈើ និងលេងតោងឡើង ជាដើម។
3.សាងសម្ព័ន្ធភាពដ៏ល្អដោយការចិញ្ចឹមមើលថែកូនបែបវិជ្ជមាន
ដោយការបង្ហាត់បង្រៀនកូនដោយហេតុផល បើកឱកាសឱ្យកូនចេះគិតវិភាគ យល់ដឹង ដោះស្រាយកែខៃបញ្ហាដោយខ្លួនឯង ដែលទាំងអស់នេះនឹងជួយអភិវឌ្ឍ “ខួរក្បាលផ្នែកខាងគិត” បន្តឆ្ពោះទៅរកការរៀនយល់ដឹង។ ការសម្លុត ការទិតៀន ការបញ្ជួសបន្សោក ឬការដាក់ទោសឱ្យរាងចាល នឹងធ្វើឱ្យកូនមានអារម្មណ៍ថា គ្មានសុវត្ថិភាព និងខួរក្បាលមិនបានទទួលការអភិវឌ្ឍ។
4.យកចិត្តទុកដាក់រឿងភោជនាហារ
ជាពិសេសបំផុតសារធាតុអាហារដែលប្រើក្នុងការអភិវឌ្ឍខួរក្បាលកូន មានដូចជា ប្រូតេអ៊ីន អាស៊ីតខ្លាញ់ចាំបាច់ DHA និងARA សារធាតុដែក អ៊ីយ៉ូដ វីតាមីនA និងវីតាមីនB12 ដែលអ្នកម្ដាយអាចធ្វើបានតាំងពីកើតដំបូងតាមរយៈការចិញ្ចឹមកូនដោយទឹកដោះម្ដាយរយៈពេលយ៉ាងតិច 6ខែ តាមដោយការមើលថែទាំកូនឱ្យបានទទួលសារធាតុអាហារទៅតាមវ័យដែលស័ក្តិសម ដូចជា ស៊ុត ត្រីសមុទ្រ បន្លែល្ពៅ ការ់ុត បន្លែស្លឹកបៃតង និងទឹកស៊ុបដែលមានប្រយោជន៍ជាដើម។

ជាសរុបទៅក៏គឺ បើសួរថា តើការចិញ្ចឹមកូនក្នុងសម័យនេះ មានអ្វីដែលខុសប្លែកពីមុនខ្លះនោះ?…ចម្លើយគឺ គោលការណ៍គ្រឹះមិនខុសគ្នាទេ តែនឹងខុសគ្នាក៏ត្រង់រឿងតិចណូឡូជី ដូច្នេះយើងត្រូវត្រៀមឱ្យកូនឱ្យរួចជាស្រេចក្នុងការរៀនយល់ដឹងគ្រប់ពេលវេលា។ សង្គត់ធ្ងន់លើការអភិវឌ្ឍជំនាញគ្រប់ផ្នែក ទាំងជំនាញការដោះស្រាយបញ្ហាឱ្យបាន និងជំនាញការរស់នៅ រួមទាំងយកចិត្តទុកដាក់រឿងភោជនាហារដែលមានផលប្រយោជន៍ដល់ខួរក្បាល ដើម្បីឱ្យកូនអាចរស់នៅក្នុងសង្គមបានយ៉ាងមានសេចក្ដីសុខ និងក្លាយជាបុគ្គលដែលទទួលបានជោគជ័យក្នុងសតវត្សរ៍ទី21 នេះ៕
December 3, 2020
វិធីដាស់កូនឱ្យភ្ញាក់ពីគេង ដែលអាណាព្យាបាលសម័យថ្មីមិនគួរធ្វើ និងគួរធ្វើ…
ឪពុកម្តាយតែងតែចង់ឱ្យកូនតូចភ្ញាក់ពីគេងភ្លាមៗបន្ទាប់ពីបានឮសំឡេងដាស់លើកដំបូងរបស់ខ្លួន តែបើសិនជាកូននៅតែគេងតទៅទៀតនោះ វិធីការដាស់ជាបន្តទៅទៀតនឹងច្រើនតែមានអានុភាពខ្លាំងក្លាឡើងជារឿយៗ ដែលទាំងអស់នេះ ឡារ៉ែនចង់ប្រាប់ថា វិធីការដាស់កូនឱ្យភ្ញាក់គេងបែបនេះ អាចនឹងមានផលអាក្រក់ចំពោះសុខភាពរបស់កុមារ។
ព្រោះការដាស់ឱ្យភ្ញាក់ពីគេងដោយការធ្វើឱ្យភ្ញាក់ផ្អើល វានឹងទៅបំផ្លាញកម្មវិធីការចាប់ផ្តើមធ្វើការរបស់ប្រព័ន្ធខាងក្នុងយ៉ាងត្រឹមត្រូវរបស់រាងកាយ និងនៅពេលៗវេលាកន្លងទៅ ការដាស់ដោយវិធីខ្លាំងក្លាផ្សេងៗនេះ នឹងមានសញ្ញាដែលនឹងនាំឆ្ពោះទៅរកភាពមិននឹងនរខាងអារម្មណ៍ ហើយនិងធ្វើឱ្យកុមារកើតមានការតបស្នងយឺតយ៉ាវ អាចរាប់បានថា ជាការដាស់ឱ្យភ្ញាក់ពីគេងបែបលស់ព្រលឹងក៏អាចថាបានដែរ។
វិធីការដាស់កូនឱ្យភ្ញាក់ពីគេង តទៅនេះ អាចហៅបានថា ជាគំរូនៃការដាស់ដែលកាត់បន្ថយជីវិតរបស់កូនលោកអ្នក គឺៈ
- ចូលទៅស្រែកដាស់ខ្លាំងៗ បែបមួម៉ៅក្តៅក្រហាយនៅក្នុងបន្ទប់គេងៈ អាចហៅបានថា ជាការដាស់តាមតួនាទីដោយអារម្មណ៍មួម៉ៅ និងសម្លេងខ្លាំងៗមាំៗ នឹងធ្វើឱ្យអ្នកដែលកំពុងគេងលក់ស្រួលនោះមានអារម្មណ៍ថា ខ្វះសុវត្ថិភាព។
- ទាញកញ្ឆក់ភួយចេញពីកូនខ្លាំងៗៈ ធ្វើឱ្យសីតុណ្ហភាពប្រែប្រួលយ៉ាងទាន់ហន់ អាចមានផលប៉ះពាល់ដល់ការបំផ្លាញប្រព័ន្ធប្រសាទបាន។
- វាយខ្នង ឬគូទដើម្បីឱ្យកូនភ្ញាក់ដឹងខ្លួនៈ ស្ថិតក្រោមសតិសម្បជញ្ញៈខណៈកំពុងគេងលក់នោះ នឹងធ្វើឱ្យកើតមានទង្វើតបស្នងឡើងដោយសារការត្រូវវាយទាំងនោះយ៉ាងរហ័ស និងពេលយូរៗទៅ កុមារអាចនឹងមានការតបស្នងក្នុងការធ្វើកិច្ចការងារផ្សេងៗយឺតយ៉ាវបាន។
- រអ៊ូមិនឈប់រហូតទាល់តែកូនភ្ញាក់ៈ មនុស្សគ្រប់គ្នាត្រូវការពេលវេលាខុសប្លែកពីគ្នាក្នុងការត្រៀមរាងកាយដើម្បីធ្វើការងារ ដូច្នេះការរអ៊ូ ឬការនិយាយមិនឈប់ វានឹងទៅបំផ្លាញដំណាក់កាលការត្រៀមរាងកាយ និងបែរជាធ្វើឱ្យការដាស់បែបនោះកាន់តែពិបាកជាងមុនទៅវិញទេ។
- ដាស់ដោយសំឡេងដែលឮខ្លាំងៗ និងរំខានៈ ដូចជាការដើរក្ឌុងក្ឌាំង សំឡេងនាឡិការោទ៍ឮខ្លាំងៗ ឬសំឡេងនិយាយគ្នា ជាដើម។ សំឡេងទាំងអស់នេះធ្វើឱ្យមនុស្សមានអារម្មណ៍ធុញទ្រាន់ និងពេលភ្ញាក់ឡើងមកហើយនោះ នឹងមានអារម្មណ៍ឆាប់មួម៉ៅ។
វិធីការដាស់កូនឱ្យភ្ញាក់គេងដែលឡារ៉ែនចង់ណែនាំ ៈ
1. ប្រាប់ទុកមុនឱ្យហើយៈ អាណាព្យាបាលគួរប្រាប់មុនពេលកូនចូលគេងឱ្យហើយថា ស្អែកនេះ ម៉ាក់ចង់ឱ្យកូនសម្លាញ់ភ្ញាក់ម៉ោងប៉ុន្មាន…។
2. ភ្ញាក់ដោយពន្លឺដែលចាំងចូលមកៈ សម្រួលពន្លឺភ្លើងឱ្យភ្លឺសន្សឹមៗឡើង ឬបើកមាត់បង្អួចឱ្យពន្លឺចាំងចូលមកយ៉ាងស្ងាត់ៗ ស្រទន់ៗ ដែលពន្លឺបែបនោះនឹងធ្វើឱ្យកុមារអាចដឹងខ្លួនឡើងដោយឯកឯង។
3. ឱ្យក្លិនក្រអូបឈ្ងុយឆ្ងាញ់របស់អាហារពេលព្រឹកដាស់កូនឱ្យភ្ញាក់ឡើង។
4. បើកបទភ្លេងឱ្យឮរងំៗៈ ដែលនឹងធ្វើឱ្យមានអារម្មណ៍ធូរស្រាលជំនួសសំឡេងដាស់ដែលគួរឱ្យរំខាន។
5. ប៉ះ ឬអង្អែលខ្លួនប្រាណកូនយ៉ាងថ្នមៗឱ្យដឹងខ្លួនឡើង។
ពេលរកឃើញវិធីដែលស័ក្តិសមល្អសម្រាប់ការដាស់កូនឱ្យភ្ញាក់ពីគេងបានហើយនោះ ចូរប្រើវិធីដដែលនោះដាស់ជាប្រចាំ ដើម្បីឱ្យកូនស៊ាំធ្លាប់ និងមិនគួរផ្លាស់ប្តូរវិធីដាស់ញឹកញាប់ពេកឡើយ…តែសរុបទៅ ការដាស់កូនឱ្យភ្ញាក់ពីគេងដែលល្អបំផុតនោះគឺ ការដាស់ដែលទន់ភ្លន់ និងត្រូវមានភាពអត់ទ្រាំ និងចិត្តត្រជាក់ជានិច្ច៕
December 2, 2020
មូលបត្រក្រុមហ៊ុនផលិតថ្នាំបាញ់ច្រមុះប្រឆាំង Covid-19 កើនឡើងជិត 500% ក្នុងរយៈពេលតែមួយថ្ងៃ
មូលបត្ររបស់ Auris Medical ដែលជាក្រុមហ៊ុនមួយមានទីស្នាក់ការកណ្ដាលនៅលើទឹកដី Bermuda បានកើនឡើងយ៉ាងលឿនពីតម្លៃ 1.1 ដុល្លារអាមេរិកក្នុងការជួញដូរកាលពីថ្ងៃទី 30 វិច្ឆិកា ឡើងដល់ជាង 5 ដុល្លារ/ហ៊ុន នៅក្នុងការជួញដូរកាលពីម្សិលមិញ។ល។
ក្នុងការជួញដូរកាលពីថ្ងៃទី 1 ខែធ្នូ តម្លៃមូលបត្ររបស់ Auris Medical បានកើនឡើងដល់ 480% បន្ទាប់ពីមានព័ត៌មានថា ថ្នាំបាញ់ច្រមុះ AM-301 ដែលក្រុមហ៊ុននេះបានផលិតឡើង មានប្រសិទ្ធភាពខ្ពស់ក្នុងការការពារការឆ្លងវីរុស Covid-19។
មុននោះ Auris Medical បានធ្វើការពិសោធដោយប្រើប្រាស់ថ្នាំ AM-301 នេះ បាញ់ទៅលើកោសិកាក្នុងច្រមុះរបស់មនុស្សសិប្បនិម្មិតដែលត្រូវបានគេបង្កើតឡើងដើម្បីជាតំណាងមនុស្សនៅក្នុងបន្ទប់ពិសោធន៍។ លទ្ធផលបានបង្ហាញថា កោសិកាដែលត្រូវបានបាញ់ថ្នាំ AM-301 មានផ្ទុកវីរុស Covid-19 តិចជាង 90% បើធៀបនឹងកោសិកាដែលមិនបានបាញ់ថ្នាំនេះក្រោយរយៈពេល 48 ម៉ោង។ ប្រសិទ្ធភាពនេះបានកើនឡើង 99.2% បន្ទាប់ពីបានបាញ់ថ្នាំនេះរយៈពេល 72 ម៉ោង។ ប្រការនេះបង្ហាញថា ថ្នាំប្រភេទបាញ់ AM-301 មានប្រសិទ្ធភាពខ្ពស់ក្នុងការទប់ទល់នឹងការឆ្លងវីរុស Covid-19។
ស្ថាបនិក និងជា CEO របស់ Auris Medical លោក Thomas Meyer បានឱ្យដឹងថា៖ «យើងពិតជាមានការសប្បាយចិត្តជាមួយនឹងប្រសិទ្ធភាពរបស់ AM-301 នៅក្នុងការប្រឆាំងនឹងវីរុស Covid-19 ក្រោយពីថ្នាំនេះត្រូវបានពិសោធនៅក្នុងបរិស្ថានសិប្បនិម្មិតស្រដៀងទៅនឹងច្រមុះមនុស្សពិត»។
លោក Thomas Meyer បន្ថែមថា៖ «ជាមួយនឹងរូបមន្តប្រភេទបាញ់ថ្មី យើងមានភ័ស្ដុតាងផ្ទាល់បង្ហាញថា AM-301 អាចជួយកាត់បន្ថយហានិភ័យនៃការឆ្លងវីរុសតាមរយៈភ្នាសក្នុងរន្ធច្រមុះ។
លោក Meyer ក៏បាននិយាយថា Auris Medical នឹងធ្វើការពិសោធបន្ថែមទៅលើថ្នាំបាញ់ច្រមុះ AM-301 ហើយតាមផែនការ ក្រុមហ៊ុននេះនឹងដាក់ពាក្យសុំចុះបញ្ជិកានៅឆ្នាំ2021។ AM-301 កំពុងត្រូវបានអភិវឌ្ឍដោយ Altamira Medica ដែលជាក្រុមហ៊ុនបុត្រសម្ព័ន្ធរបស់ Auris Medical។
ក្រុមហ៊ុន Auris Medical ត្រូវបានបង្កើតឡើងកាលពីឆ្នាំ 2003 និងមានទីស្នាក់ការកណ្ដាលនៅទីក្រុង Hamilton នៃកោះ Bermuda ដែលជាទឹកដីមួយរបស់ចក្រភពអង់គ្លេស នៅកណ្ដាលមហាសមុទ្រអាត្លន់ទិកខាងជើង។ មូលបត្ររបស់ Auris Medical Holding Ltd បច្ចុប្បន្នត្រូវបានដាក់ឱ្យជួញដូរនៅលើផ្សារហ៊ុន Nasdaq ដោយប្រើឈ្មោះ «EARS»៕
December 2, 2020
នៅពេលរាងកាយខ្វះ “វីតាមីន” នឹងហុចផលអាក្រក់ដល់សុខភាពរបស់យើង
វីតាមីន និងសារធាតុរ៉ែ ជាសារធាតុអាហារដែលចាំបាច់ខ្លាំងណាស់ចំពោះការធ្វើការងាររបស់ប្រព័ន្ធផ្សេងៗក្នុងរាងកាយមនុស្សយើង ហើយបើទោះជារាងកាយនឹងត្រូវការវីតាមីន និងសារធាតុរ៉ែត្រឹមតែបន្តិចបន្តួចក៏ដោយ ក៏នៅតែមិនអាចខ្វះបានជាដាច់ខាត ព្រោះបើសិនរាងកាយរបស់អ្នកមិនបានទទួលវីតាមីន និងសារធាតុរ៉ែគ្រប់គ្រាន់នោះ វាអាចធ្វើឱ្យរូបអ្នកឈឺថ្កាត់បានភ្លាមៗតែម្ដង ហើយខាងក្រោមនេះ គឺអាការដែលបង្ហាញថា រាងកាយរបស់អ្នកខ្វះវីតាមីនហើយ…។
1.ស្បែកស្ងួត រឹងគ្រើម
ស្បែកស្ងួត រឹងគ្រើម អាចបញ្ជាក់បានថា រាងកាយខ្វះវីតាមីន និងសារធាតុរ៉ែច្រើនប្រភេទ ដូចជាវីតាមីនA វីតាមីនC វីតាមីនE និងអាស៊ីដហ្វូលិក ដោយវីតាមីនA នឹងមានតួនាទីសំខាន់សម្រាប់ការពង្រឹងភាពរឹងមាំរបស់កោសិកាស្បែក ជួយព្យាបាលសភាពសាច់ភ្នាសស្បែកដែលជួយការពារអាការស្បែកស្ងួត រឹង គ្រើមបាន។ ចំណែកវីតាមីន C និង E ក៏មានចំណែកជួយក្នុងការសាងខលឡាជេន ថែបំប៉នសាច់ស្បែក និងជួយព្យាបាលមុខរបួសនៅលើសាច់ទៀតផង។
2.គេងមិនលក់
បើលោកអ្នកត្រូវការគេងសម្រាក តែមិនអាចលង់លក់បាន ឬលក់បែបមិនស្និទ្ធនោះ វានឹងធ្វើឱ្យមានអារម្មណ៍ថាទន់ល្វើយអស់កម្លាំង ឆាប់ខឹងមួម៉ៅ ឈឺក្បាល គ្មានសមាធិ(អារម្មណ៍មិននឹងនរ)។ ទាំងអស់នេះ គឺបណ្ដាលមកពីការដែលរាងកាយមានកម្រិតម៉ាញេស្យូមទាប ព្រោះម៉ាញេស្យូមមានតួនាទីសំខាន់ក្នុងការជួយបន្ធូរភាពធុញថប់តានតឹង ជួយឱ្យសាច់ដុំបានធូរស្រាល ដែលនឹងធ្វើឱ្យលោកអ្នកអាចគេងលក់បានកាន់តែងាយស្រួលឡើង។
3.នឿយល្វើយ សាច់ដុំគ្មានកម្លាំង និងឈឺតាមសន្លាក់
អាការនឿយល្វើយ សាច់ដុំគ្មានកម្លាំង និងឈឺតាមសន្លាក់ គឺជាសញ្ញាបង្ហាញថា រាងកាយខ្វះវីតាមីនC។ ដោយសារតែ វីតាមីនC មានភាពពាក់ព័ន្ធនឹងការកសាងសារធាតុខូឡាជេន ដែលជាចំណែកប្រកបរបស់សាច់ភ្នាសភ្ជាប់នៅក្នុងរាងកាយបរិវេណឆ្អឹងខ្ចី សាច់ដុំ សរសៃឈាម និងស្បែក ដែលការពិតទៅ អាការទាំងអស់នេះគឺជាអាការសម្គាល់របស់សភាវរោគដែលបណ្ដាលមកពីការខ្វះវីតាមីនC ដោយនៅលើអ្នកដែលមានអាការធ្ងន់ធ្ងរ នឹងមានចេញឈាមមកតាមជើងធ្មេញ មានស្នាមអុចៗពណ៌ឈាមនៅតាមស្បែក សឹកសាច់អញ្ចាញ និងជ្រុះធ្មេញរួមជាមួយទៀតផង។
4.សាច់ដុំរួញតឹង ញាក់ជើង និងរមួលក្រពើញឹកញាប់
រាងកាយត្រូវការប៉ូតាស្យូមដើម្បីសាងសាច់ដុំ និងប្រូតេអ៊ីន ការដេលមានប៉ូតាស្យូមទាប អាចធ្វើឱ្យកើតរមួលក្រពើបានជាពិសេសនៅម្ដុំកំភួនជើង និងថែមទាំងអាចបញ្ជាក់ប្រាប់អំពីសភាវដែលរាងកាយមានកម្រិតជាតិកាល់ស្យូមដែលថយចុះទាបទៀតផង។ ដោយសារតែកាល់ស្យូមមានតួនាទីក្នុងការព្យាបាល ការតបស្នងរបស់កោសិកាប្រសាទ និងសាច់ដុំ នៅពេលកាល់ស្យូមថយចុះ នឹងធ្វើឱ្យកោសិកាទាំងនោះត្រូវបានជំរុញយ៉ាងងាយ ធ្វើឱ្យកើតការបង្រួញខ្លួន ឡើងរឹង និងកើតរមួលក្រពើ។
5.ងាយនឹងឈាមច្រមុះ និងឈាមមិនងាយឈប់ហូរ
ដោយសារតែវីតាមីនK មានចំណែកសំខាន់ក្នុងកម្មវិធីការបង្កកខ្លួនរបស់ឈាមក្នុងរាងកាយ ដូច្នេះហើយការដែលរាងកាយខ្វះវីតាមីនK នឹងធ្វើឱ្យឈាមមិនងាយឈប់ហូរ រួមទាំងអាចនឹងមានអាការចេញឈាមខុសប្រក្រតី ដូចជាមានចេញឈាមតាមច្រមុះ មានចេញឈាមនៅក្នុងប្រព័ន្ធរំលាយអាហារ និងមានស្នាមអុចៗក្រហមៗដូចឈាមនៅលើស្បែកទៀតផង។
6.មុន
មុន គឺជាជំងឺស្បែកម្យ៉ាងដែលសាងក្ដីរំខានចិត្តដល់មនុស្សជាច្រើន ជាពិសេសនារីៗ ដោយមនុស្សភាគច្រើនយល់ថា មុន កើតឡើងដោយសារការមិនចេះសម្អាតស្បែកមុខ ញ៉ាំអាហារចៀនបំពងច្រើន រួមទាំងសភាវកខ្វក់ក្នុងខ្យល់អាកាស តែការពិតវិញ ការខ្វះវីតាមីន A ឬវីតាមីន D ក៏អាចបណ្ដាលឱ្យកើតពងបែកតូចៗស្រដៀងនឹងមុនបានដូចគ្នាដែរ ព្រោះការខ្វះវីតាមីន A មានចំណែកជួយក្នុងការការពារការកើតមុន លុបបំបាត់ស្នាមអុចខ្មៅលើស្បែកមុខ និងកាត់បន្ថយការរលាកក្លាយរបស់មុនបាន ដូច្នេះនៅពេលរាងកាយមានកម្រិតវីតាមីន A ធ្លាក់ចុះទាប នឹងធ្វើឱ្យមានពាក់ព័ន្ធនឹងការកើតមុន។
7.ជ្រុះសក់
សភាវការខ្វះសារធាតុដែកស័ង្កសី អាចជាមូលហេតុមួយដែលធ្វើឱ្យកើតអាការជ្រុះសក់ សក់ស្ដើង ដោយសារតែស័ង្កសី ជាសារធាតុរ៉ែដែលមានភាពសំខាន់ដល់ការចម្រើនធំធាត់ ការសាងសាច់ភ្នាស រួមទាំងការបំបែកខ្លួនរបស់កោសិកាឫសសក់ទៀតផង។
(នៅមានត)
December 2, 2020
កែនិស្ស័យកូនចូលចិត្តប្រកែក…
ខាងក្រោមនេះ គឺជាសំណួររបស់អ្នកម្តាយម្នាក់ដែលកំពុងតែព្រួយបារម្ភអំពីនិស្ស័យមិនល្អរបស់កូនប្រុស ដែលបានសួរទៅអ្នកជំនាញខាងចិត្តវិទ្យាកុមារ ព្រោះតែខ្លាចវាក្លាយទៅជាទម្លាប់អាក្រក់នៅពេលដែលគេធំឡើង នាពេលអនាគត។ សូមប្រីយមិត្តអ្នកអាន ជាពិសេសមាតា-បិតា និងអាណាព្យាបាលដែលមានកូនតូចទាំងឡាយ តាមដាន និងយកធ្វើជាចំណេះដឹងក្នុងការមើលថែទាំ និងអប់រំកូនៗដូចតទៅ ៖
ខាងក្រោមនេះគឺជាបញ្ហា និងសំណួរដែលអ្នកម្ដាយរបស់កូនប្រុសអាយុ 4ឆ្នាំម្នាក់បានសួរទៅគ្រូពេទ្យជំនាញ…
«-នាងខ្ញុំសុំការណែនាំអំពីវិធីកែនិស្ស័យកូនដែលចូលចិត្តប្រកែក និងរឹងឌឺ ព្រោះនាងខ្ញុំខ្លាចកូនធ្លាប់ខ្លួន យកនិស្ស័យមិនល្អនេះទៅប្រើនៅឯសាលារៀន។
សំណួរ : កូនប្រុសនាងខ្ញុំ អាយុ 4ឆ្នាំហើយ ជាក្មេងប៉ឹនសម្ដីណាស់(ពូកែនិយាយ) តែចូលចិត្តលួចរឹង និងឌឺស្ងាត់ៗ។ ពេលប្រាប់គេឱ្យទៅធ្វើអ្វីមួយ គេចូលចិត្តតែប្រកែកជានិច្ច។ នាងខ្ញុំខ្លាចពេលចូលសាលារៀនហើយ ខ្លាចគេទៅប្រកែកជាមួយអ្នកគ្រូ និងមិត្តភ័ក្តិ និងខ្លាចក្រែងគេចូលមិនចុះជាមួយអ្នកឯទៀត។ សួរថា តើនាងខ្ញុំត្រូវកែសម្រួល ឬកែនិស្ស័យនេះយ៉ាងណាស្រួលទៅ?
ពីអ្នកម្តាយ អូន ប៊យ / នៅភ្នំពេញ»
ចម្លើយ : ក្មេងប៉ឹនសម្ដី គឺជាមនុស្សដែលមានមន្តស្នេហ៍ មនុស្សចាស់ដែលបាននិយាយលេងជាមួយកុមារបែបនេះ នឹងកើតមានអារម្មណ៍ស្រឡាញ់ និងអាណិត ជាពិសេសសម្រាប់មនុស្សចាស់ បើមានកូនចៅប៉ឹនសម្ដី ចេះនិយាយលេងនៅជាមួយផងនោះ នឹងមានសេចក្តីសុខខ្លាំងណាស់។ រឿងប៉ឹនសម្ដីនេះ ភាគច្រើន ជាលក្ខណ:ចរិតរបស់ក្មេងស្រីច្រើនជាងក្មេងប្រុស តែក៏មិនមែនជារឿងប្លែកអ្វីដែរ ដែលក្មេងប្រុសខ្លះមាននិស្ស័យប៉ឹនសម្ដីបែបនោះ ព្រោះមួយចំណែកនៃការក្លាយជាក្មេងប៉ឹនសម្ដីនោះ គឺកើតចេញពីស្ថានភាពជុំវិញខ្លួន និងបុគ្គលដែលនៅជុំវិញខ្លួនកុមារនោះ។
អាយុ 3-4ឆ្នាំ គឺជាវ័យដែលចាប់ផ្តើមចេះមានការគិត និងមានហេតុផលរបស់ខ្លួនឯងហើយ ក្មេងៗច្រើនតែនិយាយ និងធ្វើផ្ទុយពីអ្វីដែលមនុស្សធំប្រាប់។ ចាប់ផ្តើមដោយពាក្យបដិសេធខាងដើមថា “ទេ” “កូនមិនធ្វើទេ” “កូនអត់ងូតទឹកទេ” ឬ “កូនមិនចង់ញ៉ាំទេ” ជាដើម។ល។ បន្ទាប់ពីពាក្យថា “ទេ” ភាសារបស់កុមារនឹងវិវឌ្ឍ ហើយចាប់ផ្តើមរៀនយល់ដឹងកាន់តែច្រើនឡើង បូកជាមួយនឹងហេតុផលដែលខ្លួនមានច្រើនឡើងផងដែរនោះ ទើបកុមារចេះបញ្ចេញគំនិត តម្រូវការ និងអារម្មណ៍មកជាភាសានិយាយ។ មកដល់ពេលនេះការប៉ឹននិយាយមាន 2រូបបែប គឺការនិយាយបែបមានមន្តស្នេហ៍ និងការនិយាយដែលមនុស្សធំហៅថា “ប្រកែក”។ កូនអ្នកស្រីមិនមែនជាក្មេងរឹងឌឺទេ តែអ្នកជំនាញយល់ថា កូនកំពុងតែមានការចេះគិត មានហេតុផល ដូច្នេះអ្នកម្តាយត្រូវធ្វើចិត្តត្រជាក់ៗ បើកូនប្រកែកពេលអ្នកម្តាយប្រាប់ឱ្យធ្វើអ្វីមួយនោះ ចូរកុំបន្ទោស ឬដាក់ទោសកូនដោយការវាយឱ្យសោះ ព្រោះកូននៅមិនទាន់យល់ដឹងថា ការនិយាយតមាត់ ការនិយាយប្រកែកនឹងម្តាយនេះ ហេតុអីបានជាគេមិនអាចធ្វើបាន? ផ្ទុយទៅវិញ បើកូនប្រកែកហើយ អ្នកម្តាយសើច ហើយនិយាយប្រកែកទៅវិញនោះ កូនអាចនឹងគិតថា គេអាចធ្វើបែបនេះជាមួយម្តាយបាន ដូច្នេះការកែសម្រួល ឬកែនិស្ស័យបែបនេះ អ្នកជំនាញខាងចិត្តវិទ្យារបស់កុមារសូមណែនាំដូចតទៅ ៖
-កូនជាក្មេងប៉ឹនសម្ដី អ្នកម្តាយគួរបង្កើន និងរិះរកកិច្ចការណាដែលពាក់ព័ន្ធនឹងការនិយាយឱ្យកូនបានធ្វើញឹកញាប់ ដូចជាឱ្យកូនបាននិយាយរៀបរាប់រឿងរ៉ាវផ្សេងៗ ឬនិយាយរឿងនិទានឱ្យអ្នកដែលនៅជាមួយជិតដិតបានស្តាប់ ដើម្បីឱ្យកូនមានឱកាសបានស្គាល់ពាក្យស័ព្ទថ្មីៗដែលគេចង់ប្រើ ព្រមទាំងឆ្លៀតឱកាសបង្រៀនកូនអំពីសុជីវធម៌ក្នុងការនិយាយ និងប្រាប់ឱ្យកូនបានដឹងថា សម្ដីណាខ្លះដែលមិនគួរប្រើជាមួយមនុស្សចាស់ ការប្រើសំឡេងនិយាយជាមួយអ្នកដទៃយ៉ាងណា ទើបគួរឱ្យចង់ស្តាប់ជាដើម។ល។
ពេលដែលកូនប្រកែក អ្នកម្តាយគួរឈប់ ដើម្បីស្តាប់សិន ដោយធ្វើទឹកមុខ និងអាកប្បកិរិយាធម្មតា កុំតមាត់ ទាំងអស់នេះ គឺដើម្បីឱ្យកូនបានដឹងថា ទង្វើដែលគេកំពុងធ្វើនេះមិនសមគួរទេ។ នៅពេលកូនឈប់ប្រកែក សឹមអ្នកម្ដាយប្រាប់ពីវិធីថា កូនគួរតែនិយាយយ៉ាងម៉េចវិញ ទើបជាការប្រសើរជាង។
នៅពេលណាដែលគំនិតរបស់អ្នកម្តាយ និងកូនមិនត្រូវគ្នា យើងគួរប្រើវិធីនិយាយជជែកពិភាក្សាគ្នា ដើម្បីឱ្យកូនបានបង្ហាញពីអារម្មណ៍ និងគំនិតរបស់គេចេញមកយ៉ាងសេរី ហើយអ្នកម្តាយក៏គួរនិយាយប្រាប់កូនអំពីគំនិត និងអារម្មណ៍របស់ខ្លួនឱ្យកូនបានដឹងដែរ ដើម្បីឱ្យកូនបានរៀនយល់ដឹងពីវិធីកែបញ្ហាដែលត្រឹមត្រូវ៕
December 2, 2020
អាការឈឺខ្នង 5យ៉ាង អាចប្រាប់យើងពីជំងឺគ្រោះថ្នាក់ផ្សេងៗបាន
មនុស្សវ័យកំលោះ ក្រមុំជាច្រើននាក់មានអាការឈឺខ្នង ដែលអ្នកខ្លះគិតថា អាចបណ្ដាលពីមូលហេតុដែលអង្គុយយូរជ្រុលពេក ឬក៏ទៅធ្វើអ្វីមួយខុសឥរិយាបថ ជាដើម តែទាំងអស់គ្នាមិនបានដឹងឡើយថា អាការឈឺខ្នងមិនមែនមានន័យត្រឹមតែអាការខុសប្រក្រតីរបស់ឆ្អឹងប៉ុណ្ណោះទេ។
អាការឈឺខ្នង ជាទូទៅអាចជាអាការឈឺខ្នងដែលបណ្តាលមកពីការអង្គុយច្រើនពេក លើករបស់របរធ្ងន់ពេក ឬហាត់ប្រាណខ្លាំងជ្រុលពេក ដោយអាការដែលយើងអាចដឹងបាននោះគឺ ការឈឺចុករួយ ឬសាច់ដុំឡើងតឹង ជាដើម-ល- តែជួនកាលអាការឈឺដែលយើងគិតថា ឈឺខ្នងនោះ វាអាចមិនមែនបណ្តាលមកពីសាច់ដុំ ឬឆ្អឹងរហូតនោះទេ។ មានលក្ខណៈរបស់អាការឈឺខ្នងខ្លះជាសញ្ញាប្រកាសអាសន្នពីជំងឺដែលកើតនៅលើអវយវៈខាងក្នុង និងចាំបាច់ត្រូវតែប្រញាប់ទៅទទួលការព្យាបាលពីគ្រូពេទ្យជាបន្ទាន់ទៀតផង។
1.អាការឈឺខ្នងរួមជាមួយអាការដៃជើង ស្ពឹកគ្មានកម្លាំង
ទ្រាំទប់បត់ជើងតូច និងទ្រាំទប់លាមកមិនបាន…លក្ខណៈរបស់អាការទាំងនោះអាចបណ្តាលមកពីខួរឆ្អឹងខ្នងទទួលរងរបួស។ វិធីដែលល្អបំផុត គឺត្រូវប្រញាប់ទៅប្រឹក្សាជាមួយគ្រូពេទ្យជាបន្ទាន់ ដើម្បីធ្វើការថតអេកស៍រេយ៍(X-RAY)ពិនិត្យមើលឆ្អឹងកងខ្នង និងរកមើលចំណុចដែលរងរបួស។ អ្នកខ្លះត្រឹមតែគេងសម្រាកព្យាបាលខ្លួនក៏អាចជាសះស្បើយពីអាការនេះដែរ តែសម្រាប់អ្នកខ្លះទៀតអាចចាំបាច់ត្រូវតែចូលទទួលការវះកាត់។
2.ឈឺខ្នងត្រង់ម្តុំចង្កេះ និងមានគ្រុនក្តៅរងា
មូលហេតុរបស់អាការនេះអាចបណ្តាលមកពីការឆ្លងមេរោគរលាកនៅក្នុងក្រលៀន ឬអាចជាជំងឺរលាកតម្រងនោម ដោយមូលហេតុទាំងនេះកើតឡើងបានដោយសារតែការទទួលទានទឹកក្នុង 1ថ្ងៃៗតិចពេក និងការទ្រាំទប់នោម។
ការព្យាបាល គ្រូពេទ្យនឹងប្រើថ្នាំសម្លាប់មេរោគ និងថ្នាំផ្សេងៗទៀតអាស្រ័យលើការវិនិច្ឆ័យរោគ រួមទាំងណែនាំឱ្យទទួលទានទឹកឱ្យបានច្រើន ផ្លាស់ប្តូរទង្វើទ្រាំទប់នោម ហើយនៅពេលព្យបាលក្រលៀនជាប្រក្រតីឡើងវិញហើយ អាការឈឺខ្នងក៏បាត់ទៅវិញដែរ។
3.ឈឺខ្នងផ្នែកខាងលើចង្កេះទាំងសងខាង
បើសិនជាមានអាការឈឺខ្នងផ្នែកខាងលើចង្កេះទាំងសងខាង រួចនៅពេលទៅជួបគ្រូពេទ្យ គ្រូពេទ្យអាចនឹងស្ទាបប៉ះដុំសាច់នៅលើខ្នងត្រង់កន្លែងម្តុំៗក្រលៀន រួមទាំងមានឈាមលាយឡំនៅក្នុងទឹកមូត្រ មានសម្ពាធឈាមឡើងខ្ពស់ និងមានសភាវលោហិតស្លេករួមជាមួយផងនោះ ក្នុងករណីនេះ គឺជាសញ្ញាបញ្ជាក់ពីរោគកើតថង់ទឹកនៅក្នុងក្រលៀន ជាជំងឺដែលអាចចម្លងតំណពូជបាន។
នៅពេលមានថង់ទឹកនៅក្នុងក្រលៀន នឹងធ្វើឱ្យក្រលៀនធ្វើការបានតិច នៅពេលក្រលៀនធ្វើការថយចុះ ហុចផលអាក្រក់ដល់រាងកាយ។ កើតជម្ងឺឡើងឈាម ក្រលៀនអាចនឹងងាយឆ្លងមេរោគ និងលែងធ្វើការរ៉ាំរ៉ៃ រហូតដល់គាំងលែងធ្វើការតែម្តង និងក្រៅពីបញ្ហានៅលើក្រលៀនហើយ នៅអាចធ្វើឱ្យកើតថង់ទឹកនៅក្នុងអវយវៈផ្សេងទៀតបាន ដូចជាថ្លើម ដៃស្បូន ពងស្វាស និងកើតសរសៃឈាមជំងឺរីកប៉ោងទៀតផង។
4.អាការឈឺខ្នងដែលកើតនៅលើស្រ្តីមានគភ៌
អាចជាផលប៉ះពាល់ដែលបណ្ដាលមកពីបច្ច័យច្រើនយ៉ាង ដូចជាអ័រម៉ូនក្នុងរាងកាយកើតការប្រែប្រួលធ្វើឱ្យសរសៃពួរ និងសាច់ដុំដែលយឹតតោងឆ្អឹងយារធូរ។ សម្រាប់ស្រ្តីមានគភ៌មានការទ្រទម្ងន់ដែលចេះតែកើនឡើងរបស់ទារក ឬស្បូនដែលរីកធំឡើងទៅសង្កត់ពីលើសរសៃប្រសាទធ្វើឱ្យឈឺខ្នងរហូតឈឺរាលចុះទៅរកជើងបាន។
5.ឈឺខ្នងរ៉ាំរ៉ៃយូររាប់ខែ និងកាន់តែឈឺខ្លាំងឡើងជារឿយៗ
បើសិនកើតនៅលើមនុស្សធាត់ ឬមនុស្សដែលមានអាយុច្រើនជាង 45ឆ្នាំនោះ អាចកើតឡើងដោយសាររោគរលាកខួរសន្លាក់ ឬឆ្អឹងកងខ្នងសឹករេចរឹល។ ការព្យាបាលក្នុងករណីនេះ គ្រូពេទ្យនឹងឱ្យថ្នាំបំបាត់ការឈឺចាប់មកញ៉ាំ និងធ្វើការព្យាបាលដោយការធ្វើចលនា ហើយគ្រូពេទ្យនឹងណែនាំឱ្យទទួលទានអាហារដែលមានជាតិកាល់ស្យូមខ្ពស់។ បើកើតនៅលើមនុស្សដែលធាត់ខ្លាំង ត្រូវឱ្យធ្វើការបញ្ចុះទម្ងន់។
បើអ្នកណាដែលកំពុងមានអាការឈឺខ្នង ចូរប្រញាប់ពិនិត្យមើលខ្លួនឯងជាបន្ទាន់ ឬបើមិនប្រាកដក្នុងចិត្ត ចូរទៅជួបគ្រូពេទ្យដើម្បីវិនិច្ឆ័យរោគ ព្រោះជួនកាលបើបណ្តោយឱ្យឈឺរ៉ាំរ៉ៃយូរទៅ អាចនឹងហុចផលអាក្រក់ដល់រាងកាយ ធ្វើឱ្យសុខភាពចុះទ្រុឌទ្រោមក៏អាចថាបានដែរ៕
December 2, 2020
កម្ពុជារកឃើញករណីវិជ្ជមាននឹង Covid-19 ចំនួន 3 នាក់បន្ថែមទៀត
ក្រសួងសុខាភិបាលកម្ពុជា នាព្រឹកនេះបានប្រកាសថា បានរកឃើញអ្នកឆ្លងវីរុស Covid-19 ចំនួន 3ករណីបន្ថែមទៀត ដែលនាំឱ្យតួលេខសរុបនៃអ្នកបានឆ្លងវីរុសនេះ ឡើងដល់ 329 នាក់។
ករណីវិជ្ជមាននឹង Covid-19 ដែលទើបត្រូវបានរកឃើញក្នុងរយៈពេល 24 ម៉ោងចុងក្រោយនេះ មានចំនួន 3 ករណី ដែលនេះគឺជាករណីនាំចូល ក្នុងនោះរួមមាន៖ ទីមួយ៖ បុរសជនជាតិខ្មែរ អាយុ 26ឆ្នាំម្នាក់នៅខេត្តកំពត បានធ្វើដំណើរមកពីប្រទេសជប៉ុន ដោយបន្តជើងហោះហើរនៅប្រទេសកូរ៉េខាងត្បូង។ ទីពីរ៖ បុរសជនជាតិខ្មែរ អាយុ 46ឆ្នាំ នៅខេត្តកណ្ដាល ធ្វើដំណើរពីប្រទេសជប៉ុន បន្តជើងហោះហើរនៅកូរ៉េខាងត្បូង។ ទីបី៖ ស្ត្រីជនជាតិខ្មែរ អាយុ 35ឆ្នាំ នៅខេត្តកំពត ធ្វើដំណើរពីប្រទេសចិន។
គិតមកដល់ព្រឹកថ្ងៃទី 2 ខែធ្នូនេះ កម្ពុជារកឃើញអ្នកឆ្លងវីរុស Covid-19 សរុបចំនួន 329 នាក់ ខណៈអ្នកបានជាសះស្បើយមានចំនួន 304 នាក់ និងអ្នកកំពុងសម្រាកព្យាបាលនៅមន្ទីរមានចំនួន 25 នាក់។ នៅក្នុងចំណោមអ្នកកំពុងទទួលការព្យាបាល មាន 20 នាក់នៅមន្ទីរពេទ្យមិត្តភាពខ្មែរ-សូវៀត និង 5 នាក់នៅមណ្ឌលសុខភាពចាក់អង្រែ នារាជធានីភ្នំពេញ៕
December 2, 2020
ការសរសេរអក្សរ និងបញ្ហារបស់កុមារ…រឿងសំខាន់ដែលឪពុកម្តាយគួរដឹង
រឿងការសរសេរអក្សររបស់កុមារ អាចគ្រាន់តែជារឿងតូចតាចមួយសម្រាប់ឪពុកម្តាយមួយចំនួន ព្រោះគិតថា ភាពខុសផ្លែកពីគ្នារបស់តួអក្សរ គឺជាស្ទីលការសរសេររបស់ក្មេងម្នាក់ៗ អាចស្អាតខ្លះទៅ ឬមិនស្អាតខ្លះទៅ ជារឿងធម្មតា ទើបមិនសូវជាយកចិត្តទុកដាក់ល្អិតល្អន់អ្វីប៉ុន្មានឡើយ។ តែការពិតទៅ រឿងការសរសេរ និងតួអក្សរសរសេរដៃរបស់កូន មានភាពសំខាន់មិនអន់ជាងរឿងដទៃទៀតឡើយ ព្រោះវាជាផ្នែកមួយដែលជួយបង្ហាញឱ្យឃើញថា កុមារកំពុងមានបញ្ហាមួយដែលឪពុកម្តាយគួរតែផ្តល់នូវការជួយណែនាំ មុននឹងបញ្ហាផ្សេងៗទៀតកើតឡើង។ ដូច្នេះថ្ងៃនេះយើងនាំគ្នាមកមើលថា តើអក្សរសរសេរដៃរបស់កូនៗរបស់លោកអ្នកបង្ហាញឱ្យឃើញពីរឿងអ្វី និងមានវិធីកែខៃយ៉ាងណាខ្លះ?។
1. មូលហេតុដែលធ្វើឱ្យកុមារមានបញ្ហាពាក់ព័ន្ធនឹងការសរសេរ
អ្នកស្រីវេជ្ជបណ្ឌិត អេមី បាអេជ អ្នកព្យាបាលដោយការធ្វើចលនា និងជាអ្នកនិពន្ធម្ចាស់ជយលាភីប្រភេទសៀវភៅអក្សរផ្ជង់បានអធិប្បាយថា អារម្មណ៍ និងការវិវឌ្ឍរបស់កុមារអាចនាំឆ្ពោះទៅរកបញ្ហារឿងតួអក្សរសរសេរដៃរបស់កុមារបានដូចគ្នា ដូចជាបើកុមារនោះធ្លាប់មានបទពិសោធដែលមិនល្អពាក់ព័ន្ធនឹងការប៉ះពាល់ រហូតធ្វើឱ្យគេបដិសេធ ឬចៀសពីការប៉ះពាល់វត្ថុផ្សេងៗដែលខុសផ្លែកពីរបស់ដែលគេធ្លាប់បានស្គាល់ជាដើម។ មូលហេតុទាំងនោះហុចផលឱ្យឱកាសក្នុងការវិវឌ្ឍរបស់ម្រាមដៃ និងការសរសេរក្មេង អន់ថយចុះទៅតាមនោះដែរ។
1. វិធីសង្កេតមើលបញ្ហា តាមរយ:អក្សរសរសេរដៃរបស់កុមារ
ការដែលកុមារសរសេរអក្សរមិនស្អាត គឺជាបញ្ហាមួយដែលលោកឪពុកអ្នកម្តាយមិនគួរព្រងើយកន្តើយឡើយ ជាពិសេសអក្សរសរសេរដៃរបស់កុមារដែលពិបាកអាន ឬដែលស្ទើរតែមិនមែនជាតួអក្សរ ព្រោះវាជាសញ្ញាសំខាន់មួយដែលកំពុងតែប្រាប់ដល់ឪពុកម្តាយឱ្យបានដឹងថា កូនរបស់អ្នកកំពុងតែមានបញ្ហាដែលអ្នកត្រូវប្រញាប់កែសម្រួល ដែលឪពុកម្តាយអាចត្រួតពិនិត្យមើលនៅរយ:ដំបូងបាន ដោយសង្កេតមើលតាមរយ:អាការរបស់កុមារដូចតទៅ ៖
- – តួអក្សរមិនច្បាស់លាស់ ពិបាកអាន
- ធ្វើចុងខ្មៅដៃបាក់ញឹកញាប់(សរសេរសង្កត់ខ្លាំង)
- ប្រើដៃចាប់កាន់ខ្មៅដៃម្តងៗមិនដូចគ្នា ដូចជា ម្តងកាន់ដៃខាងឆ្វេង ម្តងកាន់ដៃខាងស្តាំ-ល-
- ចាប់កាន់ខ្មៅដៃខុសទំនង និងមិនព្រមប្តូររបៀបចាប់
- មិនព្រមដាក់កដៃសង្កត់លើក្រដាសសរសេរ
- មានអារម្មណ៍ធុញទ្រាន់ពេលត្រូវសរសេរ
- សរសេរលេខ ឬអក្សរឆ្លាស់គ្នា ទោះជារៀនថ្នាក់បថម ឬថ្នាក់ខ្ពស់ជាងហ្នឹងហើយក៏ដោយ
- ច្រើនតែសរសេររំលង ឬខ្វះពាក្យ ឬតួអក្សរ ទោះជាចម្លងតាមគេក៏ដោយ
1. វិធីការជួយកែបញ្ហា
សម្រាប់ឪពុកម្តាយដែលសង្កេតឃើញភាពខុសប្រក្រតីរបស់កូនដូច 8ចំណុចខាងលើនេះ ឪពុកម្តាយអាចជួយកូនៗរបស់លោកអ្នកបានដោយការនាំពួកគេទៅជួបនឹងគ្រូពេទ្យដែលមានជំនាញក្នុងផ្នែកនេះ ដើម្បីឱ្យគ្រូពេទ្យត្រួតពិនិត្យភាពខុសប្រក្រតី និងប្រាប់ពីលទ្ធផលនៃការពិនិត្យដែលច្បាស់លាស់មកលោកអ្នកវិញ និងគួរឱ្យគ្រូពេទ្យបានទៅពិនិត្យមើលអាការរបស់កូនដល់ផ្ទះផង ដើម្បីឱ្យគ្រូពេទ្យបានបង្ហាត់ក្មេងៗជាមួយនឹងឧបករណ៍សម្រាប់ជួយកែសម្រួលដល់ការសរសេររបស់កូនបានយ៉ាងស័ក្តិសម។
តើលោកអ្នកជឿទេថា អក្សរសរសេរដៃរបស់កុមារមានភាពសំខាន់ចំពោះពួកគេមិនតិចឡើយ ព្រោះវាអាចប្រាប់បានអំពីបញ្ហាដែលបង្កប់នៅក្នុងខ្លួនកុមារ ដូច្នេះបើឪពុកម្តាយរឹតតែឆាប់សង្កេតឃើញភាពខុសប្រក្រតីនៃការសរសេរអក្សររបស់កូនបានលឿនប៉ុនណា នឹងរឹតតែឆាប់បានជួយឱ្យកូនៗរបស់លោកអ្នករួចផុតពីបញ្ហានេះបានលឿនប៉ុននោះដែរ និងថែមទាំងអាចជួយឱ្យកូនៗមានវិវឌ្ឍនាការដ៏ល្អស័ក្តិសមទៅតាមវ័យបានទៀតផង៕
December 2, 2020