Category: សុខភាព

ញ៉ាំរបស់ផុតកំណត់(ហួសដេឡេ)ញឹកញាប់ នឹងធ្វើឱ្យខូចសុខភាព ឬឈឺថ្កាត់ដែរឬទេ? បើលោកអ្នកធ្លាប់ធ្វើបែបហ្នឹងញឹកញាប់ ឡា រ៉ែន មានចម្លើយពីលោកវេជ្ជបណ្ឌិត អ្នកជំនាញខាងផ្នែកអាហារ និងសុខភាពមកជម្រាបជូនដូចក្រោម។

ការទទួលទានអាហារដែលផុតកំណត់អាយុញឹកញាប់ មិនមែនជារឿងល្អទេ ហើយតើវានឹងហុចផលធ្វើឱ្យឈឺថ្កាត់ឬក៏អត់? និងតើទទួលបានគុណប្រយោជន៍ខាងភោជនាហារ ឬក៏អត់នោះ? ចំណុចនេះប្រហែលជាត្រូវពិចារណាមើលបន្តិចសិន ។

ផលប៉ះពាល់ចំពោះសុខភាព ពេលបរិភោគអាហារដែលផុតកំណត់ហើយនោះ អាចជួបប្រទះតាំងពី “គ្មានផលប៉ះពាល់ដល់រាងកាយ” រហូតទៅដល់ “មានផលប៉ះពាល់ដល់រាងកាយយ៉ាងធ្ងន់ធ្ងរ” អាស្រ័យលើប្រភេទរបស់អាហារដែលយើងទទួលទានចូលទៅនោះ។

លើកឧទាហរណ៍ងាយៗ ដូចជា បើយើងបរិភោគដំណាប់ផ្លែឈើដែលទើបតែផុតកំណត់កាលពីម្សិលមិញ ឬយកដុំប៊័រដែលទើបតែផុតកំណត់កាលពី 2ថ្ងៃមុនមកធ្វើជាអាហារ ករណី 2នេះស្ទើរតែគ្មានហុចផលប៉ះពាល់អ្វីដល់សុខភាព ឬធ្វើឱ្យមានការឈឺថ្កាត់អ្វីឡើយ។

តែបើយកសាច់ត្រីខកំប៉ុងក្លាស្សេត្រជាក់ដែលផុតកំណត់ 2សប្តាហ៍មកហើយ មកចម្អិនជាអាហារ ឬក៏ទឹកដោះគោឆៅដែលផុតកំណត់កាលពី 1សប្តាហ៍មុនមកបរិភោគ អាចនឹងធ្វើឱ្យកើតអាការរាករូស ក្អួតចង្អោ ចុកពោះ ដោយសារតែអាហារទាំងនោះមានជាតិពុល ដល់ថ្នាក់ត្រូវនាំចូលទៅដេកព្យាបាលក្នុងមន្ទីពេទ្យក៏អាចថាបានដែរ។ ដូច្នេះមុននឹងទិញអាហារ ឬយកអាហារមកចម្អិនពិសា ត្រូវពិនិត្យមើលថ្ងៃផុតកំណត់ឱ្យបានច្បាស់លាស់ជាមុនសិន។

ការសរសេរបញ្ជាក់ថ្ងៃផុតកំណត់នៅលើស្លាកផលិតផលមានរូបភាពខុសប្លែកពីគ្នា ដូចជានៅក្នុងប្រទេសយើង ដែលជួបប្រទះញឹកញាប់នោះមាន 2បែបគឺ “គួរបរិភោគមុនថ្ងៃទី…ឬ Best Befor…ឬ BB…” ហើយនិង “ថ្ងៃផុតកំណត់ ឬ Expire…” ។

ជាទូទៅ បើនៅលើស្លាកផលិតផលបញ្ជាក់ថា “គួរបរិភោគមុនថ្ងៃទី…” នោះ មានន័យថា អាហារនឹងនៅមានរសជាតិល្អ នៅមានគុណប្រយោជន៍ខាងភោជនាហារគ្រប់ចំនួន ដូចដែលមានបញ្ជាក់នៅលើស្លាកផលិតផលរហូតដល់ថ្ងៃនោះ។ ក្រោយពីថ្ងៃនោះទៅ រសជាតិ គុណភាព និងគុណប្រយោជន៍ខាងអាហារនឹងចុះថយ តែគ្មានបញ្ហាចំពោះសុខភាពឡើយ ទើបអាចបរិភោគបានដោយគ្មានគ្រោះថ្នាក់ គ្រាន់តែអាចមិនបានទទួលគុណប្រយោជន៍ដូចដែលបានសរសេរបញ្ជាក់នៅលើស្លាកផលិតផលប៉ុណ្ណោះ តែក៏មានកំណត់ថ្ងៃទុកជាមុនមួយរយ:ដែរ មុននឹងអាហារនោះផុតកំណត់ ឬខូចគុណភាព។

ចំណែក “ថ្ងៃផុតកំណត់” នោះ មានន័យថា ថ្ងៃដែលអាហារនោះផុតអាយុកំណត់ ដែលក្រោយពីថ្ងៃនោះមក អាហារនឹងផ្អូមស្អុយ ឬខូច ហាមទទួលទាន និងគួរតែយកទៅបោះចោល។ អាហារដែលផុតអាយុកំណត់ហើយ នឹងមានផលប៉ះពាល់ដល់រាងកាយដូចជា អាហារមានជាតិពុល ធ្វើឱ្យចុកពោះ ក្អួត គ្រុនក្តៅខ្លួន វិលមុខ រាកខ្លាំង អាការអាចធ្ងន់ធ្ងររហូតកើតសភាវខ្វះជាតិទឹក និងដល់ថ្នាក់ត្រូវនាំទៅមន្ទីពេទ្យក៏មាន។

ដូច្នេះការពិនិត្យមើលស្លាកទំនិញបញ្ជាក់ពី “ថ្ងៃផុតកំណត់” ឬ “គួរបរិភោគមុនថ្ងៃ…” ដើម្បីឱ្យប្រាកដក្នុងចិត្តថា អាហារដែលយើងទទួលទាននោះមិនខូចគុណភាព មិនធ្វើឱ្យប៉ះពាល់ដល់សុខភាព និងរាងកាយនោះ គឺជាវិធីមួយដ៏ល្អបំផុត៕

យើងនាំគ្នាមកមើលថា តើក្រុមអ្នកស្រាវជ្រាវក្នុងសហរដ្ឋអាមេរិក គេរកឃើញអ្វីខ្លះ ពាក់ព័ន្ធនឹងការអភិវឌ្ឍសក្តានុពលរបស់យុវវ័យ ដើម្បីឱ្យយុវជន-យុវនារីទាំងអស់នោះ មានគុណភាពជីវិតដ៏ល្អប្រសើនាពេលអនាគត...។

ប្រហែលជាគ្មានយុវវ័យណាម្នាក់ដែលមិនចង់ស្អាតបាត និងមិនចង់ឱ្យអ្នកនៅជុំវិញស្រឡាញ់រាប់អានខ្លួននោះឡើយ តែគន្លឹះពិសេសទាំងអស់នេះ ការពិតទៅសុទ្ធអាចធ្វើបានដោយខ្លួនឯងទាំងអស់ ដូច្នេះយើងនាំគ្នាមកមើលថា តើការមើលថែទាំខ្លួនឯងទាំងខាងរាង និងចិត្តគំនិតរបស់យុវជន-យុវនារីនាយុគបច្ចេកវិទ្យាទំនើបនេះ ត្រូវធ្វើយ៉ាងណាខ្លះ?

1.ហាត់ប្រាណ : ការដើរលេង ការដើរក្នុងផ្សារទំនើប ធាក់កង់ រត់ ហែលទឹក លេងស្កេតបត(ក្ដារបន្ទះរំអិល) ឬធ្វើកិច្ចការងារផ្សេងៗជាមួយ​មិត្តភក្តិដែលធ្វើឱ្យរាងកាយមិននៅស្ងៀមមួយកន្លែងនោះ គឺជាការធ្វើលំហាត់ប្រាណមួយល្អណាស់សម្រាប់យុវតីៗ។ ដោយសារតែយុវ​វ័យ ​​ជាវ័យដែលត្រូវការមិត្តភក្តិ និងការទទួលស្គាល់ពីអ្នកដែលនៅជុំវិញខ្លួននោះ ការបានធ្វើកិច្ចការងារផ្សេងៗជាមួយមិត្តភក្តិរបស់​ពួក​គេ នឹង​ជួយឱ្យទាំងរាងកាយ និងផ្លូវចិត្តល្អប្រសើរឡើងយ៉ាងគួរឱ្យចម្លែកចិត្ត។

2.ការទទួលទាន : ការញ៉ាំអាហាររបស់យុវវ័យ ជាទូទៅអាចញ៉ាំបានគ្រប់រូបបែប តែគួរញ៉ាំអាហារឱ្យគ្រប់ 5ប្រភេទក្រុម និងគួរចៀសវាង Junk food (Hamburger , sandwich-ល-) និងអាហារដែលមានជាតិខ្លាញ់ច្រើន។ ការជួបជុំគ្នាញ៉ាំ​អា​ហារជាមួយមិត្តភក្តិ និងក្រុមគ្រួសារ អាចរាប់បានថាជារឿងល្អមួយសម្រាប់យុវវ័យ និងគួរញ៉ាំបន្លែ និងផ្លែឈើស្រស់ជាប្រចាំផង។

ការតមអាហារដើម្បីគ្រប់គ្រងទម្ងន់ខ្លួន គឺជារឿងដែលមិនគួរធ្វើសោះឡើយសំរាប់យុវតីវ័យជំទង់ ព្រោះជាអំឡុងពេលដែលរាងកាយកំពុងចម្រើនធំធាត់។ ការសាងកោសិកាស្បែកដែលល្អ ក៏អាចជួយឱ្យក្រមុំៗមើលទៅឃើញស្រស់ស្អាតបានដូចគ្នាដែរ និងគួរជ្រើសរើសញ៉ាំអាហារដែលមានកាឡូរីទាប ព្រមទាំងហាត់ប្រាណឱ្យបានជាប់ជាប្រចាំផង។

3.ចេះចាត់ការចំពោះបញ្ហា : យុវវ័យ គឺជាវ័យដែលអ្វីៗក៏មើលទៅរាងរញ៉េរញ៉ៃច្របូកច្របល់ទាំងអស់ ការចាត់ការចំពោះបញ្ហាយ៉ាងត្រូវវិធី ក៏ជារឿងសំខាន់មួយដែរ។ ការមានអារម្មណ៍តានតឹងធុញថប់រហូតដល់គេងមិនលក់ ឬរហូតដល់ត្រូវពឹងលើគ្រឿងស្រវឹង និងថ្នាំញៀននោះ គឺជារឿងមួយដែលខុសឆ្គងយ៉ាងធ្ងន់ធ្ងរជាទីបំផុត គួរតែចេះប្រឹក្សាបញ្ហាអ្វីមួយជាមួយនឹងមនុស្សច្រើនជាង 1នាក់ឡើងទៅ និងត្រូវចេះបែងចែកមើលថា តើច្រកចេញណាមួយដែលស័ក្តិសមបំផុតនឹងខ្លួនយើង និងអនាគតរបស់ខ្លួនឯង។

4.ចេះគិត និងមានក្តីស្រមៃ : ការរិះគិតបែបចម្រើន និងការស្រមៃ គឺជារឿងមួយចាំបាច់ ការបំពេញកិច្ចការងារផ្សេងៗ គឺជាការជួយអភិវឌ្ឍវិធីការរិះគិតក្នុងផ្នែកនេះ មិនថាតែការលេងតន្រ្តី លេងកីឡា ច្រៀង ប្រកួតរាំ និពន្ធបទចម្រៀង រួមទាំងការចិញ្ចឹមសត្វដែលនាំមកនូវការសើចសប្បាយ និងការបានធ្វើកិច្ចការងារជាក្រុម រួមជាមួយមិត្តភក្តិជាដើម។ ទាំងអស់នេះ សុទ្ធតែជាការអភិវឌ្ឍខួរក្បាលប៉ែកខាងស្តាំទាំងអស់ ។

5.ហ្វឹកហាត់នូវអ្វីដែលខ្លួនចូលចិត្ត : ជីវិតយុវវ័យ គឺជាអំឡុងជីវិតដែលពោរពេញទៅដោយថាមពល ការហ្វឹកហាត់នូវអ្វី​ដែលខ្លួនស្រឡាញ់ចូលចិត្ត និងថ្នឹកនោះ គឺជារឿងល្អមួយ។ ការបណ្តោយទុកឱ្យជីវិតកន្លងផុតពី 1ថ្ងៃទៅ 1ថ្ងៃដោយក្តីខ្ជឹល​ច្រអូស​​ស្ពឹកស្រពន់ គឺជារឿងដែលមិនត្រូវធ្វើជាដាច់ខាតសម្រាប់យុវវ័យ ហើយការដែលមិនដឹងថា តើខ្លួនឯងចូលចិត្តអ្វី ឬធ្វើអ្វីពូកែ​នោះ​ នឹងមានផល​ប៉ះពាល់ដល់ការជ្រើសរើសប្រកបមុខរបរនៅពេលអនាគត។

យើងអាចសង្កេតឃើញថា ការអភិវឌ្ឍគុណភាពជីវិតរបស់យុវវ័យនេះ គឺការធ្វើកិច្ចការងារផ្សេងៗ គួរធ្វើជាក្រុម ជាមួយមិត្ត​ភក្តិខ្លះ ជាមួយក្រុមគ្រួសារខ្លះ។ ការធ្វើឱ្យស្គាល់ពីជីវិតនៅរួមគ្នាជាសង្គមមួយ នឹងហុចផលល្អចំពោះយុវវ័យខ្លួនឯង និងសង្គមរួមនា​ពេលអនាគត…៕

មិនថាតែនៅក្នុងអតីតកាល ឬបច្ចុប្បន្នកាលឡើយ យើងនៅតែមើលឃើញថា នៅតែឃើញនារីៗញ៉ាំស្រា ឬភេសជ្ជៈ មានជាតិអាល់កុល ដូចជាស្រាបៀរ វ៉ាញ ឬសូម្បីតែស្រាថ្នាំផ្សេងៗដដែល និងថែមទាំងមានសញ្ញាថា នារីៗចាប់ផ្តើមចេះញ៉ាំស្រា​តាំងពី​អាយុនៅតិចជាងកាលពីអតីតកាលទៀតផង ដោយអ្នកខ្លះចេះញ៉ាំតាំងពីវ័យនៅរៀនម្ល៉េះ។

មូលហេតុដែលធ្វើឱ្យនារីៗញ៉ាំស្រា(ឬភេសជ្ជៈមានជាតិស្រវឹង)

• នារីៗញ៉ាំស្រា ព្រោះតែត្រូវការចូលរួមក្នុងសង្គម ចង់ឱ្យគេទទួលស្គាល់នៅក្នុងសង្គម ក្នុងក្រុមមិត្តភក្តិ ឬក្នុង​ក្រុមអ្នកធ្វើការជាមួយគ្នា ជាដើម។
• នារីៗញ៉ាំស្រា ព្រោះចង់បង្កើនភាពសប្បាយរីករាយ ដោយសារស្រានឹងជួយធ្វើឱ្យមានអារម្មណ៍ក្លាហាន កាត់​បន្ថយ​​​​​​​​អារម្មណ៍ដឹងខុស-ត្រូវ ល្អ-អាក្រក់ និងភាពដឹងខ្លួនតាមប្រក្រតីបានមួយរយ:ពេល។
• នារីៗញ៉ាំស្រា ព្រោះតែត្រូវមិត្តភក្តិបបួល និងព្រោះចង់ដឹង និងចង់សាក។
• នារីៗញ៉ាំស្រា ដោយសារតែមានជំនឿខុសៗថា នឹងធ្វើឱ្យស្បែកភ្លឺស្រស់ថ្លា រលោង។
• នារីៗញ៉ាំស្រា ព្រោះជឿថា វានឹងធ្វើឱ្យខួរក្បាលស្រឡះ និងមានអារម្មណ៍ធូរស្រាល។
• នារីៗញ៉ាំស្រា ព្រោះតែជឿថា នឹងជួយទាក់ទាញចំណាប់អារម្មណ៍ពីបុរសៗ

មូលហេតុដែលនារីៗមិនគួរញ៉ាំស្រា និងភេស្ជជដែលមានជាតិអាល់កុល ព្រោះ៖

1. នឹងធ្វើឱ្យខូចស្បែក និងបង្កឱ្យមានស្លាកស្នាមមុនវ័យ : ព្រោះការញ៉ាំជាតិអាល់កុល ឬជាតិស្រវឹង នឹងធ្វើឱ្យបត់ជើងតូចញឹកញាប់ បណ្តាលឱ្យស្បែកឡើងស្ងួត រាងកាយបាត់បង់ជាតិទឹកច្រើន ដែលនឹងធ្វើឱ្យស្បែកងាយមានស្លាកស្នាម មុខជ្រួញ និងឆាប់ចាស់។ ក្រៅពីនេះ ជាតិអាល់កុលថែមទាំងបានធ្វើឱ្យរាងកាយខ្វះវិតាមីន B ដែលនឹងធ្វើឱ្យឡើងស្បែកស្ងួត យារ កើតមុន និងមានរមាស់នៅតាមស្បែកទៀត​ផង។
2. ប្រថុយនឹងការកើតជំងឺមហារីកសុដន : តាមរយ:ការស្រាវជ្រាវផ្នែកអាហារ និងសុខភាពរាងកាយ បានរកឃើញថា ស្រ្តីដែលញ៉ាំស្រា 1ថ្ងៃ 1កែវជាប់ជាប្រចាំ នឹងធ្វើឱ្យមានភាពប្រថុយប្រថាននឹងការកើតជំងឺមហារីកសុដន។
3. ធ្វើឱ្យទម្ងន់ខ្លួនកើនឡើង ​: កើតជំងឺធាត់ ដុះក្បាលពោះ កើតជំងឺទឹកនោមផ្អែម សម្ពាធឈាមឡើងខ្ពស់ ជាពិសេសនារីៗដែលចូលចិត្តញ៉ាំស្រា លាយជាមួយទឹកផ្លែឈើ ឬភេសជ្ជៈដែលមានជាតិស្ករខ្ពស់។
4. ខួរក្បាលរបស់ស្រ្តី​ ទទួលរងនូវផលប៉ះពាល់ពីជាតិអាល់កុលខ្លាំងជាងខួរក្បាលរបស់បុរស : មនុស្ស​ស្រីនឹងខូចខាតកោសិកាខួរក្បាលលឿនជាងបុរស ទោះជានារីញ៉ាំស្រាតិចជាងបុរសក៏ដោយ។
5. មានសញ្ញា និងមានភាពប្រថុយប្រថានដែលអាចនឹងត្រូវអ្នកដទៃធ្វើបាបលើរូបរាងកាយ : អាចត្រូវអ្នកដទៃល្មើសបំពានខាងផ្លូវភេទ និងត្រូវទទួលរងការចាប់រំលោភ ជាដើម។
6. ស្ត្រីដែលញ៉ាំស្រា នឹងបង្កឱ្យកើតជំងឺជាច្រើន : ដែលបណ្តាលមកពីការញ៉ាំសុរាច្រើនជាងបុរស ទោះជាក្នុង​​​បរិ​មា​ណប៉ុនគ្នាក៏ដោយ ដូចជាជំងឺរលាកក្រពះ រលាកថ្លើម ជំងឺថ្លើមរឹង មហារីកបំពង់អាហារ។ល​។
7. បំផ្លាញប្រព័ន្ធប្រសាទ​ : ធ្វើឱ្យកើតអាការសោកសៅ វិលវល់ បេះដូងដើរញាប់ ឆេវឆាវឆាប់ខឹង អាច​នឹងកើតអាការរវើរវាយ អ្នកខ្លះទៀតអាចនឹងធ្វើឱ្យកើតអាការឡប់សតិ និងបែកសរសៃឈាមខួរក្បាលទៀតផង។
8. មិនថាបុរស ឬស្ត្រីនោះទេ អ្នកដែលញ៉ាំស្រា រហូតដល់កើតរោគញៀនសុរារ៉ាំរ៉ៃ នឹងធ្វើឱ្យមានផ្ទៃមុខហើមស្ពុរ : មុខក្រហម ភ្នែកក្រហម ស្បែកឡើងខ្មៅ ដៃញ័រ ខ្យល់ដង្ហើមមានក្លិនអាល់កុលជាប់ជានិច្ច លែងឃ្លានបាយ រាងកាយស្គមស្គាំង។
9. បើញ៉ាំក្នុងអំឡុងពេលមានគភ៌ផងនោះ នឹងធ្វើឱ្យកើតមានភាពប្រថុយប្រថានក្នុងការរលូតកូន : ឬទារក​កើតមក មានទម្ងន់ខ្លួនតិច មានបញ្ហាសុខភាព ឆែបមាត់ មានបញ្ហាខាងខួរក្បាល និងពេលធំឡើងអាចនឹងមានសញ្ញាថា នឹង​ញៀនថ្នាំ ឬញៀនសុរាបានដោយងាយទៀតផង។

យ៉ាម៉េចដែរ? បានដឹងបែបនេះហើយ នារីៗយើងដែលនៅតែចូលចិត្តញ៉ាំស្រា ឬភេសជ្ជៈដែលមានជាតិអាល់កុល ឬជាតិស្រវឹង​ទៀតនោះ ត្រូវតែចាប់ផ្តើមគិតសាជាថ្មីឡើងវិញហើយ ព្រោះសូម្បីតែញ៉ាំបន្តិចបន្តួចនៅក្នុងពិធីចូលរួមក្នុងសង្គមក៏ដោយ ក៏អាចធ្វើឱ្យ​យើងខូចសុខភាព ខូចរូបសម្ផស្ស និងបំផ្លាញខួរក្បាលផងដែរ ហើយដែលមើលឃើញច្បាស់ជាងនោះទៅទៀតគឺ ការញ៉ាំស្រាធ្វើឱ្យ​​នារីៗយើងបាត់បង់បុគ្គលភាពជានារីល្អៗអស់រលីង វាមិនមែនជាការទាក់ទាញអារម្មណ៍មនុស្សភេទផ្ទុយយនោះទេ៕

ក្នុង​រយៈពេល 24ម៉ោង​កន្លងទៅនេះ ក្រសួងសុខាភិបាល​កម្ពុ​ជា​បាន​រកឃើញ​អ្នក​ឆ្លង​វីរុស Covid-19 សរុប​ចំនួន 3ករណី​បន្ថែមទៀត ក្នុងនោះ​មាន​ទាំង​ករណី​នាំចូល និង​ករណី​ពាក់ព័ន្ធ​នឹង​ព្រឹត្តិការណ៍​សហគមន៍28វិច្ឆិកា​ផងដែរ។

ករណី​វិជ្ជមាន​នឹង Covid-19 ដែល​ត្រូវបាន​រកឃើញ​កាលពី​ម្សិលមិញ (14ធ្នូ) រួមមាន៖

ករណី​នាំចូល៖ ទីមួយ៖ ស្ត្រីជន​ជាតិខ្មែរ អាយុ 66ឆ្នាំ ស្នាក់​នៅក្នុង​សណ្ឋាគារ​មួយ​នៅ​ទីក្រុង​ភ្នំពេញ និង​ជា​អ្នកដំណើរ​មកពី​សហរ​ដ្ឋ​អាមេរិក។ ទី​ពីរ៖ ស្ត្រី​ជនជាតិ​ជប៉ុន អាយុ 34ឆ្នាំ ស្នាក់​នៅក្នុង​សណ្ឋាគារ​មួយ​ក្នុង​ទីក្រុង​ភ្នំពេញ ជា​អ្នកដំណើរ​មកពី​ប្រទេស​ជប៉ុន។

ករណី​ពាក់ព័ន្ធ​នឹង «ព្រឹត្តិការណ៍​សហគមន៍28វិច្ឆិកា»៖ កុមារ​ជនជាតិខ្មែរ អាយុ 1ឆ្នាំ ស្នាក់​នៅក្នុង​សង្កាត់​និរោធ ខណ្ឌ​ច្បារអំពៅ រាជធានី​ភ្នំពេញ ជា​កូនប្រុស​របស់​ស្ត្រី​វ័យ 30ឆ្នាំ ដែល​វិជ្ជមាន​នឹង Covid-19 កាលពី​ថ្ងៃទី 29វិច្ឆិកា។

ក្រៅពី​វិជ្ជមាន កម្ពុជា​ក៏មាន​អ្នកជា​សះស្បើយ​ពី Covid-19 ចំនួន 3នាក់​ផងដែរ​ដែល​សុទ្ធតែជា​អ្នកពាក់ព័ន្ធ​​នឹង​​ព្រឹត្តិ​ការណ៍​28​វិច្ឆិកា។

គិត​មកដល់​ព្រឹក​ថ្ងៃទី 15 ខែធ្នូ​នេះ កម្ពុជា​បាន​រកឃើញ​អ្នក​វិជ្ជមាន​នឹង Covid-19 សរុប​ចំនួន 362 នាក់ ក្នុងនោះ​មាន 312 នាក់​បានជា​សះស្បើយ និង 50 នាក់​កំពុង​សម្រាក​ព្យាបាល​នៅ​មន្ទីរពេទ្យ និង​មណ្ឌល​សុខភាព​នា​រាជធានី​ភ្នំពេញ៕

ថាជាទឹកដោះគោឆៅ ក៏មិនមែន ថាជាទឹក ក៏មិនត្រូវ តែហេតុអីបានជាមានតែអ្នក​ប្រាប់ថា ឱ្យញ៉ាំយ៉ាអួ ឬយ៉ូហ្គ៊ើត ឱ្យបាន 1​ថ្ងៃ 1​ពែង? តើយ៉ាអួ ល្អចំពោះសុខភាពយ៉ាងណាខ្លះទៅ?។ នៅពេលអានអត្ថបទខាងក្រោមនេះច​ប់ហើយ លោកអ្នកអាច​​នឹង​​ចាប់​ផ្តើមញ៉ាំយ៉ាអួ ក៏អាចថាបានដែរ។

តើយ៉ាអួ គឺជាអ្វី?

យ៉ាអួ ឬទឹកដោះគោជូរ គឺជាផលិតផល ដែលផលិតឡើងពីទឹកដោះ ដែលកើតឡើងពីការផ្អាប់ ឬបិតរវាងទឹកដោះ និង ប្រូបៃ​​អូទិក(Probiotics = បាក់តេរីល្អៗដែលមានជីវិត) នៅពេលយើងញ៉ាំចូលទៅ បាក់តេរីទាំងអស់នេះនឹងទៅបង្កើតភាពតុល្យការឱ្យអតិសុខុមប្រាណ(Microorganism) ដែលនៅក្នុងពោះវៀន។ ចំណែកឯលទ្ធផលដែលបានមកនោះគឺ ប្រព័ន្ធបន្ទោបង់ និង​សុខ​​​​ភាពជារួមរបស់យើង នឹងារឹតតែល្អប្រសើឡើងហ្នឹងឯង។

តើយ៉ាអួបែបណា ទើបល្អ?

បច្ចុប្បន្ននេះ យើងឃើញមានយ៉ាអួ 2ប្រភេទ គឺគ្រីកយ៉ាអួ និងយ៉ាអួបែបធម្មតា ហើយយ៉ាអួបែបគ្រីក កំពុង​តែបានទទួលការ​ពេញនិយមឡើងជាបណ្តើរៗហើយ ដូច្នេះតើយើងគួរជ្រើសយកបែបណាទើបល្អ?

គ្រីកយ៉ាអួ ការពិតទៅ វាក៏ជាយ៉ាអួធម្មតាដែលត្រូវបានបឺតយកជាតិទឹក និងវត្ថុរាវដែលប្រកបដោយ លែកថូស(Lactose = ជាតិស្ករដែលភាគច្រើនមាននៅក្នុងទឹកដោះ) ចេញ ដូច្នេះហើយទើបវាក្លាយជាយ៉ាអួដែលមានភាពខាប់ជាង​មុន ធ្វើឱ្យលោកអ្នកទទួលបានសារធាតុអាហារ និងប្រូបៃអូទិកកាន់តែច្រើនឡើងផងដែរ។ ឧទាហរណ៍ គ្រីកយ៉ាអួ 1ពែងមានប្រូតេ​អ៊ីនច្រើនជាងយ៉ាអួធម្មតាទ្វេដង តែមានជាតិស្ករតិចជាង។

តើយ៉ាអួល្អចំពោះសុខភាពយ៉ាងណាខ្លះទៅ?

• បង្កើនភាពប្រឆាំងនឹងជំងឺក្នុងរាងកាយ ៈ មានការសិក្សាស្រាវជ្រាវជាច្រើនបានបញ្ជាក់ថា ការញ៉ាំយ៉ាអួរៀងរាល់ថ្ងៃ នឹងជួយការពារការឆ្លងរោគនៅក្នុងរាងកាយបាន ដូច្នេះទើបប្រូបៃអូទិកសំខាន់ខ្លាំងណាស់ ព្រោះវាបានទៅជួយជំរុញប្រព័ន្ធប្រ​ឆាំង​​ជំ​ងឺរហូតទៅដល់កោសិកា ដែលវានឹងជួយឃុំគ្រងការពារខ្លួនអ្នកពីមេរោគវីរុស ប៉ារ៉ាស៊ីត និងមហារីក។ លោកអ្នកនឹងមានជីវិតរស់​​​នៅ​​បានយូរអង្វែង។
• ការពារការកើតដំបៅនៅក្នុងក្រពះ ៈ លែកតូបាស៊ីឡាស់(Lactobacillus)ដែលមាននៅក្នុងយ៉ាអួ ​នឹងជួយ​បញ្ឈប់ការរីកចម្រើនធំធាត់របស់អតិសុខុមប្រាណ H.Pylori ដែលជាមូលហេតុរបស់ដំបៅក្នុងក្រពះបានជាង 90%។
• ផ្តល់នូវវិតាមីន ៈ ជាពិសេស រ៉ៃបូហ្វ្លាវិន ឬវិតាមីន B1 និងវិតាមីន K ដែលទឹកដោះគោជូរ និងយ៉ាអួ​មានសម្រាប់ជួយដល់ពោះវៀន។
• ជួយព្យបាលអាការរាករូស ៈ បើបានពិសាទឹកដោះគោជូរ ឬយ៉ាអួ វានឹងជួយឱ្យអាការរាករូសនោះ កាន់តែឆាប់​បាត់​ឡើងទៀត។
• ជួយឱ្យរាងកាយបឺតយកជាតិកាល់ស្យូមបានកាន់តែងាយឡើង ហើយជាតិអាស៊ីតលែកទិកដែលមាន​នៅ​ក្នុងទឹកដោះគោជូរ និងយ៉ាអួនឹងជួយជំរុញឱ្យការរំលាយកាល់ស្យូមក្នុងទឹកដោះបានកាន់តែល្អឡើងដែរ។
• ជួយការពារជំងឺសរសៃឈាមបេះដូង ៈ ព្រោះលែកតូបាស៊ីឡាស់នៅក្នុងទឹកដោះគោជូរ នឹងជួយគ្រប់គ្រងបរិមាណកូលេស្តេរ៉ូល នៅក្នុងឈាម ដែលជាមូលហេតុធ្វើឱ្យកើតជំងឺសរសៃឈាមបេះដូងបាន។
• ការពារជំងឺមហារីកបានទៀតផង ៈ ព្រោះលែកតូបាស៊ីឡាស់ អាចចាប់សារធាតុបង្កមហារីកបាន និងថែមទាំងជួយបង្អាក់ក្រុមមេរោគបាក់តេរីនៅក្នុងពោះវៀនដែលបង្កើតសារធាតុ ណៃត្រេត ដែលជាសារធាតុបង្កមហារីកទៀតផង។

តើត្រូវញ៉ាំយ៉ាអួយ៉ាងដូចម្តេចទៅ?

• ញ៉ាំធ្វើជាចំណីពេលទំនេរ រាល់ថ្ងៃ​ នឹងជួយឱ្យលោកអ្នកមានអារម្មណ៍ឆ្អែត និងមានថាមពលខ្លាំងជាងការញ៉ាំភេសជ្ជៈដែលមានកាឡូរីប៉ុនគ្នាទៅទៀត។
• ញ៉ាំយ៉ាអួ រសជាតិពីធម្មជាតិ…យ៉ាអួភាគច្រើន ច្រើនតែបញ្ចូលក្លិនរបស់ផ្លែឈើ និងបន្ថែមស្ករ ដូច្នេះគួរជ្រើស​រើស​​ញ៉ាំយ៉ាអួ រសជាតិពីធម្មជាតិវិញប្រសើរជាង។
• បើលោកអ្នកធុញនឹងការញ៉ាំយ៉ាអួ រសជាតិបែបធ្មមជាតិហើយ សូមសាកល្បងបន្ថែមផ្លែឈើស្រស់ ឬធ្វើជាម្ហូបញាំផ្លែឈើដោយប្រើយ៉ាអួធ្វើជាទឹកសម្រាប់ញាំក៏បាន។

Good for Skin

យ៉ាអួធម្មជាតិ មានអាស៊ីត អាល់ហ្វា-ហាយដ្រក់ស៊ី ដែលនឹងជួយសកកោសិកាស្បែក ដោយគេអាចយកយ៉ាអួ​ធម្មជាតិមកលាបនៅលើស្បែកទុកចោលប្រមាណ 15នាទី រួចហើយលាងចេញដោយទឹកត្រជាក់ រួចសឹមលាប ម៉យស៍ជើរ៉ៃហ្ស៊ើរ៍ វានឹងជួយឱ្យស្បែកមានសុខភាពល្អ តឹងណែន និងភ្លឺរលោង៕