Category: សុខភាព

ទីក្រុងប៉េកាំងរឹតបន្តឹងការធ្វើដំណើរឡើងវិញ នៅមុនចូលឆ្នាំថ្មី ដោយសារតែមានករណីឆ្លង Covid-19 ដែលមិនមានរោគសញ្ញា
អាជ្ញាធរនៃរដ្ឋធានីប៉េកាំងបានចាប់ផ្ដើមរឹតបន្តឹងលើការដើរហើរឡើងវិញ ដោយការស្នើ និងអំពាវនាវឱ្យពលរដ្ឋគ្រប់រូប មិនត្រូវចាកចេញពីរដ្ឋធានី បន្ទាប់ពីមានករណីឆ្លង Covid-19 មុនឆ្នាំថ្មី និងពិធីបុណ្យរដូវផ្ការីកមកដល់។
យុទ្ធនាការប្រយុទ្ធប្រឆាំងនឹងវីរុសរាតត្បាត Covid-19 របស់ទីក្រុងប៉េកាំង កំពុងប្រឈមនឹងឧបសគ្គធំមួយទៀត នៅពេលមានករណីវិជ្ជមាននឹង Covid-19 ដែលត្រូវបានរកឃើញយូរៗមួយ និងការឈប់សម្រាកចូលឆ្នាំថ្មី រួមនឹងពិធីបុណ្យរដូវផ្ការីកកំពុងតែខិតជិតមកដល់។ នេះបើតាមការឱ្យដឹងពីអាជ្ញាធរនៃទីក្រុងប៉េកាំង នៅក្នុងសន្និសីទសារព័ត៌មានមួយកាលពីថ្ងៃទី 25 ខែធ្នូ។
ទីក្រុងប៉េកាំង លើកទឹកចិត្តឱ្យប្រជាជន បន្តស្នាក់នៅក្នុងរដ្ឋធានី នៅក្នុងរដូវបុណ្យនាពេលខាងមុខ ដោយមិនត្រូវធ្វើដំណើរទៅកាន់ទីក្រុង ឬតំបន់ដែលមានហានិភ័យខ្ពស់ ឬមធ្យម ក្នុងការឆ្លងវីរុស Covid-19។ អាជ្ញាធរក៏អំពាវនាវឱ្យបណ្ដាក្រុមហ៊ុន ផ្អាកការបំពេញបេសកកម្មទៅកាន់តំបន់ក្រៅរដ្ឋធានី និងបរទេសផងដែរ ទន្លឹមនឹងការស្នើឱ្យសាលារៀន និងក្រុមហ៊ុន រៀបចំការឈប់សម្រាកឱ្យបានខុសពេលគ្នា។
Chen Bei ដែលជាអនុលេខាធិការនៃអាជ្ញាធរទីក្រុងប៉េកាំង បានឱ្យដឹងថា ក្រុមមន្ត្រីបក្ស និងអាជ្ញាធរ គួរតែធ្វើជាគំរូក្នុងការមិនចាកចេញពីប៉េកាំងនៅក្នុងរដូវបុណ្យ ហើយត្រូវតែមានការពិនិត្យម៉ត់ចត់ ឬត្រូវតែសុំការអនុញ្ញាត បើសិនចង់ធ្វើដំណើរចេញពីរដ្ឋធានី។
លោកស្រី Chen Bei បញ្ជាក់បន្ថែមថា រោងភាពយន្ត បណ្ណាល័យ សារមន្ទីរ និងទីតាំងកម្សាន្តនានា ត្រូវតែធ្វើសកម្មភាពមិនឱ្យលើសពី 75% នៃលទ្ធភាពដែលមាន។
វិធានការខាងលើនេះ ត្រូវបានដាក់ចេញបន្ទាប់ពីរដ្ឋធានីរបស់ចិនបានរាយការណ៍ថា បានរកឃើញករណីវិជ្ជមាននឹង Covid-19 ថ្មី នៅក្នុងសប្ដាហ៍នេះ។ ករណីឆ្លងថ្មីដែលត្រូវបានរកឃើញកាលពីថ្ងៃទី 25 ខែធ្នូនេះគឺជាបុគ្គលិកនៃក្រុមហ៊ុនអាកាសចរណ៍ Asiana ដែលធ្វើដំណើរត្រលប់មកពីកូរ៉េខាងត្បូង។ អាជ្ញាធរចិនបញ្ជាក់ថា នេះគឺជាករណីឆ្លងដែលមិនមានរោគសញ្ញា៕
ប្រភព៖ Global Times
December 26, 2020
បន្លែ ផ្លែឈើ គួរញ៉ាំឱ្យបានគ្រប់ពណ៌ដើម្បីសុខភាពល្អ
បន្លែ និងផ្លែឈើដែលមានពណ៌ផ្សេងៗពីគ្នានីមួយៗ សុទ្ធតែមានគុណប្រយោជន៍ខាងសារធាតុអាហារខុសប្លែកពីគ្នា ដូច្នេះបើចង់ទទួលទានអាហារឱ្យក្លាយជាថ្នាំ ត្រឹមតែ 5ប្រភេទក្រុម មិនគ្រប់គ្រាន់ទេ ត្រូវឱ្យគ្រប់ទាំង 5ពណ៌ទៀតផង។
ទី1.បន្លែ និងផ្លែឈើពណ៌ក្រហម
- មុខម្ហូបសុខភាព៖ ទឹកជ្រលក់ប៉េងប៉ោះដុត និងឆាប៉េងប៉ោះ។
- មានអ្វីល្អខ្លះ?៖ ឡៃខូពីន ឃែរ៉ូធីណយដ៍ ដែលឱ្យពណ៌ក្រហមដល់ផ្លែប៉េងប៉ោះទុំ និងផ្លែឪឡឹក គឺជាសារធាតុប្រឆាំងនឹងរ៉ាឌីកាល់សេរីមួយដ៏ល្អបំផុត កាត់បន្ថយការត្រូវបានបំផ្លាញរបស់ប្រូតេអ៊ីន កាត់បន្ថយភាពប្រថុយនឹងការកើតជំងឺបេះដូង និងការពារមហារីក បានយ៉ាងល្អទៀតផង។
Tip៖ ឡៃខូពីន នឹងបញ្ចេញឥទ្ធិពលបានពេញទំហឹង នៅពេលឆ្លងកាត់ការចម្អិនដោយប្រើកម្ដៅ។
ទី2.បន្លែ និងផ្លែឈើពណ៌ស្វាយ
- មុខម្ហូបសុខភាព៖ ត្រប់វែងពណ៌ស្វាយជ្រលក់ពងមាន់ចៀន និងស្ងោរស៊ុបស្ពៃក្តោបពណ៌ស្វាយ។
- មានអ្វីល្អខ្លះ?៖ ពណ៌ស្វាយដែលយើងឃើញនោះ កើតឡើងពីការរួមគ្នារបស់សារធាតុប្រឆាំងរ៉ាឌីកាល់សេរី ក្រុមអ៊ែនថូសាយ៉ានីន មានឥទ្ធិពលក្នុងការពន្យារការកើតរោគជាតិខ្លាញ់ញ៉ុកណែនក្នុងសរសៃឈាម និងរោគសរសៃឈាមបេះដូងឡើងរឹង និងថែមទាំងជួយបង្កើនលំហូរវិលនៅក្នុងសរសៃឈាមតូចៗ និងជួយពន្យារការចុះខ្សោយរបស់កែវភ្នែក។ បន្លែ ផ្លែឈើក្នុងក្រុមពណ៌ស្វាយនេះ មានដូចជា ផ្លែស្រកានាគសាច់ពណ៌ស្វាយ ស្ពៃក្តោបពណ៌ស្វាយ ដំឡូងពណ៌ស្វាយ ផ្លែទំពាំងបាយជូរ បាយតំណើបខ្មៅ ផ្លែពោតពណ៌ស្វាយជាដើម។
Note៖ ក្លិន និងពណ៌ អាចខុសពីផ្លែត្រប់វែង ឬស្ពៃក្តោបធម្មតា តែរសជាតិឆ្ងាញ់មិនខុសគ្នាទេ។
ទី3.បន្លែ និងផ្លែឈើពណ៌ស
- មុខម្ហូបសុខភាព៖ ញាំផ្សេងៗ(មានមើមខ្ទឹម-សស្រស់)ដែលមានដាក់ខ្ទឹមបារាំង។
- មានអ្វីល្អខ្លះ?៖ សារធាតុសំខាន់នៅក្នុងបន្លែ ផ្លែឈើពណ៌ស គឺអាល់លិស៊ីន ដែលជួយគ្រប់គ្រងបរិមាណជាតិខ្លាញ់នៅក្នុងឈាម កាត់បន្ថយកូលេស្តេរ៉ូល និងអឹលឌីអឹល(ជាតិខ្លាញ់អាក្រក់)។ មាននៅក្នុងមើមខ្ទឹម-ស និងមើមខ្ទឹមបារាំង ក្រៅពីនេះនៅមានពណ៌របស់ផេកធីន ដែលជាជាតិកាកសរសៃរលាយក្នុងទឹក (ឃើញមាននៅក្នុងសាច់ផ្លែប៉ោម ផ្លែត្របែក និងផ្លែស្រកានាគសាច់ពណ៌ស)ដែលជួយធ្វើឱ្យបរិមាណជាតិស្ករនៅក្នុងឈាមនៅនឹងស្មើ កាត់បន្ថយភាពឃ្លានអាហារ ល្អសម្រាប់អ្នកដែលកំពុងគ្រប់គ្រងទម្ងន់ខ្លួន។
ទី4.បន្លែ និងផ្លែឈើពណ៌បៃតង
- មុខម្ហូបសុខភាព៖ ឆាត្រកួនប្រេងខ្យង ឆាបន្លែប្រូខូលីជាមួយបង្គា ស្ងោរស្លឹកបាស់សាច់ជ្រូកចិញ្ច្រាំ។
- មានអ្វីល្អខ្លះ?៖ បន្លែពណ៌បៃតង សម្បូរទៅដោយ លូធីន និងស៊ីស៊ែនធីន ដែលជួយបញ្ចុះអត្រាការចុះខ្សោយរបស់ផ្ទាំងអេក្រង់សរសៃប្រសាទភ្នែក ដែលជាមូលហេតុសំខាន់អាចធ្វើឱ្យភ្នែកខ្វាក់នៅពេលអាយុច្រើនឡើង។
Tip៖ បើធ្វើម្ហូបអាហារបរិភោគខ្លួនឯង គួរប្រើពេលវេលាកុំឱ្យលើស 5នាទីក្នុងការចម្អិនបន្លែពណ៌បៃតង
មិនដូច្នោះទេ សារធាតុអាហារល្អៗ នឹងបាត់បង់អស់ដោយសារកម្ដៅ ដែលអាចសង្កេតឃើញបានតាមរយ:បន្លែដែលចាប់ផ្តើមប្តូរទៅជាពណ៌លឿង លែងបៃតងស្រស់ដូចមុន។
ទី5 .បន្លែ និងផ្លែឈើពណ៌លឿង/ទឹកក្រូច
- មុខម្ហូបសុខភាព៖ ល្ពៅឆាសាច់ជ្រូកចិញ្រ្ចាំ ញាំការ៉ុត។
- មានអ្វីល្អខ្លះ?៖ បន្លែផ្លែឈើដែលមានពណ៌លឿង និងពណ៌លឿងទុំ ដូចជា ផ្លែល្ពៅ មើមការ៉ុត ផ្លែត្រសក់ស្រូវ និងល្ហុងទុំ ដែលសម្បូរទៅដោយសារធាតុប្រឆាំងរ៉ាឌីកាល់សេរី ជាពិសេសប៉ផុត អាល់ហ្វា និងបេតាឃែរ៉ូធីន ដែលជួយបំប៉នខ្សែភ្នែក ឆ្អឹង និងប្រព័ន្ធការពារជំងឺរឹងមាំ និងជួយជំរុញការកំចាត់កោសិកាមហារីករបស់រាងកាយបានទៀតផង៕
December 25, 2020
រោគកំណាច 5ប្រភេទដែលអាចនឹងកើតលើមនុស្សចាស់ និងការការពារ
ដូចដែលយើងបានដឹងហើយថា ដោយអាយុរបស់លោកឪពុកអ្នកម្តាយរបស់យើងដែលចេះតែកើនឡើង សុខភាពរាងកាយរបស់លោកទាំង2 ក៏មានតែរុះរោយទៅតាមពេលវេលានោះ តួនាទីជាកូនៗរបស់យើង គឺគួរតែយកចិត្តទុកដាក់រឿងសុខភាពរបស់លោក ដោយការមើលថែទាំ និងពិនិត្យមើលថា តើលោកមានភាពប្រថុយប្រថាននឹងការកើតជម្ងឺក្នុងវ័យចំណាស់ឬក៏អត់?។
1.ជំងឺទឹកនោមផ្អែម
រោគដែលកើតចេញពីភាពខុសប្រក្រតីខាងរាងកាយដែលផលិតអ័រម៉ូនអ៊ីនស៊ូលីនមិនគ្រប់គ្រាន់ បណ្តាលឱ្យកម្រិតជាតិស្ករនៅក្នុងឈាមឡើងខ្ពស់ ភាគច្រើនតែងជួបប្រទះលើអ្នកដែលមានទម្ងន់ខ្លួនលើសមាត្រដ្ឋានចំពោះមនុស្សចាស់ដែលក្រុមគ្រួសារកើតជំងឺនេះ។ អាការរបស់ជំងឺនេះ នឹងធ្វើឱ្យបត់ជើងតូច និងស្រេកទឹកញឹកញាប់ ល្វើយ ទម្ងន់ខ្លួនធ្លាក់ចុះ រហូតកើតមានការជ្រៀតចូលរបស់ជំងឺផ្សេងៗ ដូចជា ជំងឺភ្នែក ជំងឺក្រលៀន ជំងឺបេះដូង ជំងឺសរសៃឈាមខួរក្បាល។
2.ជំងឺលើសឈាម
ជាជំងឺរ៉ាំរ៉ៃ ដោយនៅក្នុងសភាពប្រក្រតីមនុស្សធម្មតាយើងមានកម្រិតសម្ពាធលោហិត 2បែប គឺតួលេខសម្ពាធឈាមខាងលើត្រូវស្ថិតនៅកម្រិតមិនលើស 140មិល្លីម៉ែត្របារ៉ត តួលេខសម្ពាធឈាមខាងក្រោមមិនលើស 90មិល្លីម៉ែត្របារ៉ត បើខ្ពស់ជាងនោះ នឹងចាត់ចូលក្នុងសភាវសម្ពាធឈាម។ ជារោគដែលកើតញឹកញាប់នៅលើមនុស្សចាស់ តែងកើតក្នុងខណះដែលមានភាពធុញថប់តានតឹង ដែលភាគច្រើនគ្មានអាការស្តែងចេញទេ តែពេលខ្លះមានអាការញ័រដើមទ្រូង ឈឺក្បាល វិលមុខ ស្រវាំងភ្នែក ជំងឺនេះឆាប់ពិនិត្យរកឃើញ និងមិនពិបាកព្យាបាលទេ តែបើបណ្តែតបណ្តោយ នឹងធ្វើឱ្យកើតរោគស្ពឹកពិការ អាចដល់ថ្នាក់គាំងបេះដូងបានទៀតផង។
3.ជំងឺខាងខួរក្បាល
ជាជំងឺដែលកើតដោយសារសមត្ថភាពខាងសតិបញ្ញាថមថយចុះ គិត និងចាំមិនសូវបាន ធ្វើឱ្យមានអាការភ្លេចភ្លាំង ដោយជំងឺខាងខួរក្បាលដែលជួបញឹកញាប់នោះគឺ រោគអាល់ហ្សៃមើរ៍ និងរោគផារ៍គិនសុន។ ច្រើនជួបនៅលើមនុស្សដែលមានអាយុច្រើនចាប់ពី 65ឆ្នាំឡើងទៅ។ អាការចាប់ផ្តើមដំបូង គឺច្រើនតែភ្លេចរឿងដែលទើបនឹងកើតឡើងថ្មីៗ ដូចជារករបស់មិនឃើញ ទាំងទុកដាក់នៅកន្លែងដដែលជាប្រចាំ ជាដើម។ វិធីការពារតាំងពីដើមទីរបស់ជំងឺនេះ គឺគួរព្យាយាមហ្វឹកហាត់ឱ្យខួរក្បាលបានគិតញឹកញាប់ និងព្យាយាមកុំគិតច្រើន មិនធុញថប់តឹងតែងច្រើនក្នុងអារម្មណ៍។
4.ជំងឺបេះដូងខ្វះឈាម
កើតឡើងដោយសារសរសៃឈាមដែលទៅចិញ្ចឹមសាច់ដុំបេះដូងកើតអាការត្បៀតតូច ធ្វើឱ្យឈាមហូរទៅចិញ្ចឹមសាច់ដុំបេះដូងមិនរួច ធ្វើឱ្យសាច់ដុំបេះដូងខ្វះអុកស៊ីហ្ស៊ែនមួយខណៈពេល ជាមូលហេតុធ្វើឱ្យកើតអាការឈឺដើមទ្រូង តែនឹងធូរស្រាលឡើងវិញនៅពេលបានសម្រាក ហើយបើសរសៃឈាមដែលត្បៀតតូចនោះស្ទះបែបទាន់ហន់វិញនោះ នឹងធ្វើឱ្យសាច់ដុំបេះដូងស្លាប់ នាំឱ្យកើតអាការចុកក្នុងដើមទ្រូងយ៉ាងធ្ងន់ធ្ងរ អាចមានអាការបេះដូងដើរខុសចង្វាក់ ឬឈប់ដើរ ហើយបាត់បង់ជីវិតភ្លាមមុននឹងដល់មន្ទីពេទ្យទៀតផង។
5.រោគឆ្អឹង
ឆ្អឹងរបស់មនុស្សយើងនឹងចាប់ផ្តើមចុះខ្សោយ និងស្តើងនៅពេលយើងមានអាយុ 45ឆ្នាំឡើងទៅ ហើយមនុស្សស្រីនឹងមានសភាពបែបនេះខ្លាំងជាងបុរស ជាពិសេសស្រ្តីដែលស្ថិតក្នុងវ័យអស់រដូវ។ មូលហេតុបណ្ដាលមកពីសារធាតុអំបិលរ៉ែ ដែលមានកាល់ស្យូម និងផូស្វ័រត្រូវបានបណ្តេញចេញពីរាងកាយ។ អាការដែលអាចដឹងបាននោះគឺ ពុកធ្មេញ ឈឺឆ្អឹង កម្ពស់ធ្លាក់ចុះ ខ្នងកោង ជើងកោង។ល។ អ្នកជំងឺដែលមិនបានទទួលការមើលថែទាំពីគ្រូពេទ្យ នឹងប្រថុយប្រថានក្នុងការបែកបាក់ឆ្អឹងក្នុងកន្លែងផ្សេងៗនៃរាងកាយ ជាពិសេសឆ្អឹងដៃ ក្នុងចន្លោះពីកែងដៃដល់កដៃ។
វិធីមើលថែទាំ និងការពារការកើតជំងឺលើមនុស្សចាស់
- គ្រប់គ្រងអាហារការហូបចុកសក្តិសមនឹងរាងកាយ ចៀសវាងអាហារដែលមានជាតិខ្លាញ់ខ្ពស់ រសជាតិផ្អែម និងប្រៃខ្លាំង ។
- កាត់បន្ថយ លែង ឬឈប់សេពវត្ថុគ្រោះថ្នាក់ ដូចជា បារី សុរា។ល។
- ញ៉ាំទឹកស្អាតឱ្យបានគ្រប់គ្រាន់តាមតម្រូវការរបស់រាងកាយ។
- មនុស្សចាស់គួរហាត់ប្រាណក្នុង 1សប្តាហ៍ពី 3 – 4ដង។
- គ្រប់គ្រងទម្ងន់ខ្លួនឱ្យស្ថិតក្នុងកម្រិតសមរម្យ មិនឱ្យធាត់ជ្រុលពេក។
- ធ្វើចិត្តឱ្យស្រស់ថ្លា មិនធុញថប់តឹងតែង សម្រាកឱ្យបានគ្រប់គ្រាន់។
- ឧស្សាហ៍សង្កេតមើលអាការខុសប្រក្រតីផ្សេងៗរបស់រាងកាយ បើមានអ្វីប្លែកគួរប្រញាប់ទៅប្រឹក្សាគ្រូពេទ្យ។
- ត្រួតពិនិត្យសុខភាពជាប្រចាំ រៀងរាល់ 6 – 12ខែម្តង៕
December 25, 2020
ស្រ្តីមានគភ៌ គួរត្រៀមខ្លួនឱ្យបានស្រេច 1ខែមុនដល់ពេលប្រសូត…
នៅសល់ 1ខែទៀតមុនដល់ពេលឆ្លងទន្លេ គឺជាអំឡុងពេលនៃការទន្ទឹងរង់ចាំរបស់ស្ត្រីមានគភ៌គ្រប់ៗរូប ព្រោះទាំងរំភើបចិត្តផង ទាំងត្រេកអរផង ដែលជិតបានឃើញមុខកូនសម្លាញ់ ខណះពេលជាមួយគ្នា ក៏មានអារម្មណ៍នឹកខ្លាចចំពោះក្តីឈឺចាប់ដែលនឹងកើតមានឡើង ហើយនិងរឿងផ្សេងៗជាច្រើនទៀតដែរ។ ថ្ងៃនេះ ទស្សនាវដ្តី ឡារ៉ែន មានដំបូន្មានល្អៗ ពីគ្រូពេទ្យជំនាញមកជម្រាបអ្នកមានគភ៌លើកដំបូង ដែលនៅមិនទាន់មានបទពិសោធក្នុងរឿងនេះថា តើត្រូវត្រៀមខ្លួនយ៉ាងណាខ្លះមុនដល់ពេលប្រសូត ដូចតទៅ៖
ឈានចូលដល់ខែទី 9
ក្នុងរយ:ពេលនេះ គ្រូពេទ្យនឹងណាត់ឱ្យទៅពិនិត្យគភ៌កាន់តែញឹកញាប់ឡើងរៀងរាល់សប្តាហ៍ ដើម្បីពិនិត្យមើលភាពត្រៀមខ្លួនជាស្រេច និងអាការផ្សេងៗដែលកើតមានឡើងថា តើប្រក្រតី ឬក៏អត់?។ ក្នុងអំឡុងពេលនេះ ស្ត្រីមានគភ៌ជិតគ្រប់ខែនឹងមានអាការឈឺរាងធ្ងន់ៗនៅម្តុំក្រោមផ្ចិតនៅពេលដើរ ជើងនឹងហើម មានអារម្មណ៍ឈឺផ្សាៗនៅត្រង់ចុងដង្ហើម ដោយសារតែអាស៊ីតរំលាយអាហារហូរបញ្រ្ចាស់ឡើង ព្រោះទំហំក្បាលពោះដែលធំឡើង ធ្វើឱ្យក្រពះត្រូវបានរុញឡើងមកលើ អាហារមិនសូវរំលាយ ឆ្អល់ណែនពោះ និងជួនកាលអាចត្រូវភ្ញាក់ឡើងកណ្តាលយប់ ព្រោះតែប្រគ្រីវកាច់ជើង រហូតដល់ត្រូវដាស់លោកប្តីឱ្យជួយរឺតជើងឱ្យទៀតផង។
ត្រៀមខ្លួនជាស្រេច…មុនពេលឆ្លងទន្លេ
ការត្រៀមជាស្រេចទាំងរាងកាយ ផ្លូវចិត្ត និងរបស់របរប្រើប្រាស់ផ្សេងៗ នឹងជួយឱ្យស្ត្រីមានគភ៌ទៅប្រសូតបុត្របានយ៉ាងជឿជាក់ក្នុងចិត្ត និងមានអារម្មណ៍ធូរស្រាល តែ…តើត្រូវត្រៀមរឿងអ្វីខ្លះនោះ សូមតាមដានជាបន្ត។
1.មន្ទីពេទ្យ
- ត្រូវប្រឹក្សាជាមួយគ្រូពេទ្យជានិច្ច បើសិនមានបញ្ហាអ្វីគួរសង្ស័យពាក់ព័ន្ធនឹងគភ៌។
- អាចនឹងត្រូវសាកល្បងជិះរថយន្ត ដើម្បីប៉ាន់ស្មានរយ:ពេលធ្វើដំណើរពីផ្ទះទៅមន្ទីរពេទ្យ ឬរកមើលផ្លូវណាផ្សេងដែលងាយស្រួល និងលឿនជាង ទុកបម្រុងនៅថ្ងៃឈឺពោះប្រសូតជាស្រេច។
2.ត្រៀមរាងកាយ
- ត្រៀមរឿងអាហារការហូបចុក ៈ គួរបរិភោគអាហារណាដែលមានប្រូតេអ៊ីនច្រើន តែបន្ថយអាហារដែលមានរសជាតិខ្លាំងៗ ដូចជាប្រៃខ្លាំង ជូរខ្លាំង ជាពិសេសរសជាតិហឹរ ព្រោះវានឹងធ្វើឱ្យអ្នកមានគភ៌ហើមខ្លួន។ គួរទទួលបន្លែផ្លែឈើរួមជាមួយផង ដើម្បីកាត់បន្ថយអាការណែនឆ្អល់ពោះ។
- គួរញ៉ាំថ្នាំបំប៉នតាមដែលលោកគ្រូពេទ្យឱ្យមកឱ្យបានគ្រប់ ដូចជាថ្នាំបំប៉នលោហិត វិតាមីនរួម និងកាល់ស្យូម ព្រោះក្នុងអំឡុងពេលប្រសូត ស្ត្រីមានគភ៌អាចនឹងត្រូវបាត់បង់ឈាមច្រើន ហើយការញ៉ាំថ្នាំបំប៉ននឹងជួយធ្វើឱ្យអ្នកម្តាយថ្មោងថ្មី ឆាប់ស្រួលខ្លួនឡើងវិញផង។
- រកទិញរបស់របរប្រើប្រាស់ចាំបាច់ៗ ទាំងរបស់អ្នកម្តាយ និងរបស់កូនតូច ទុកជាស្រេច ព្រោះក្រោយពេលប្រសូតរួច អ្នកម្តាយថ្មោងថ្មីមិនអាចមានពេលទៅដើររកទិញបានទេ។
3.ត្រៀមប្រសូត
- ក្នុងករណីដែលស្ត្រីមានគភ៌ មិនមានលក្ខណៈខុសប្រក្រតីខាងរាងកាយ ឬខាងវេជ្ជសាស្រ្តណាដែលតម្រូវឱ្យប្រសូតដោយការវះកាត់ទេនោះ អ្នកគួរតែប្រសូតតាមវិធីធម្មជាតិ។
- កំណត់ផែនការក្រោយពេលប្រសូតរួចជាស្រេចថា តើត្រូវពន្យារកំណើត(គ្រាវ)ឬយ៉ាងណា? បើត្រូវពន្យារកំណើត(គ្រាវ) គួរតែប្រាប់គ្រូពេទ្យឱ្យបានដឹងជាមុន ដើម្បីភាពងាយស្រួលក្នុងការត្រៀមខ្លួនរបស់គ្រូពេទ្យ។
4.ត្រៀមចិត្ត ត្រៀមថ្លើម
- អ្នកមានគភ៌គ្រប់ខែ ត្រូវត្រៀមខ្លួនទប់ទល់នឹងសភាវសោកសៅក្នុងចិត្ត ដែលអាចកើតឡើងក្រោយពេលប្រសូតរួច ដែលមានដូចជា យំខ្សឹកខ្សួលពេញ 1ថ្ងៃ ភ័យខ្លាចប្តីលែងស្រឡាញ់ និងត្រូវបោះបង់ចោល ខ្លាចខ្លួនលែងស្អាតដូចកាលពីពេលមុន ជាដើម និងកុំភ្លេចសួរពីវិធីកែបញ្ហានេះជាមួយគ្រូពេទ្យដើម្បីទុកប្រត្តិបត្តិតាមផង។
អាការប្រាប់ឱ្យដឹងខ្លួន មុនពេលប្រសូត
1. ឈឺពោះយ៉ាងខ្លាំងជាប់ជានិច្ច រៀងរាល់ 3នាទី និងឈឺម្តងៗប្រហែលជា 40វិនាទី។
2. មានឈាមចេញមកតាមរន្ធស្បូន (បញ្ជាក់ ៈ អាការនេះទោះមិនឈឺពោះក៏ដោយ ក៏ត្រូវទៅមន្ទីរពេទ្យដែរ)។
3. មានទឹកភ្លោះហូរចេញមកតាមរន្ធស្បូន អាការនេះទោះមិនឈឺពោះក៏ដោយ ក៏ត្រូវប្រញាប់ទៅមន្ទីរពេទ្យដែរ ព្រោះថង់ទឹកភ្លោះអាចបែកទៅហើយ បើទុកចោលយូរអាចនឹងធ្វើឱ្យឆ្លងមេរោគបាន។
សភាវជ្រៀតជ្រែកពីរោគផ្សេងៗដែលអាចកើតឡើង
1. មានធ្លាក់ឈាម ជាសភាវដែលសុកធ្លាក់ចុះមកទាប ដោយសុកនឹងរំកិលមកតោងនៅម្តុំមាត់ស្បូន ឬផ្នែកក្រោមរបស់មាត់ស្បូន ធ្វើឱ្យមាត់ស្បូនដាច់រហែក ហើយមានឈាមហូរជ្រាបចេញមក។
2. សម្ពាធឈាមឡើងខ្ពស់ ជាដើមហេតុរបស់សភាវគភ៌មានជាតិពុល នឹងធ្វើឱ្យស្ត្រីមានគភ៌ហើមជើង ហើមមុខ អ្នកខ្លះមានឈឺក្បាលទៀតផង ដែលជាហេតុអាចធ្វើឱ្យស្ត្រីមានគភ៌ប្រកាច់ ឬបែកសរសៃឈាមក្នុងខួរក្បាលបាន។
3. ទារកលែងសូវរើ ដែលអាចមានមូលហេតុមកពីសុកចាប់ផ្តើមធ្វើការខ្សោយ ឬខ្សែទងសុកទៅរុំ-កទារក ដែលករណីនេះ ជាគ្រោះថ្នាក់ចំពោះទារកខ្លាំងណាស់។ ពេលស្ត្រីមានគភ៌ជួបអាការដូចដែលបានរៀបរាប់មកខាងលើនេះ ចូរប្រញាប់ទៅជួបគ្រូពេទ្យភ្លាមជាបន្ទាន់។
នៅពេលរាងកាយត្រៀមរួចរាល់ ចិត្តត្រៀមរួចរាល់…ពេលនេះស្ត្រីមានគភ៌គ្រប់ខែ អាចទៅប្រសូតបុត្រដោយភាពជឿជាក់បានហើយ។ ក្តីឈឺចាប់ដែលកើតឡើងក្នុងពេលប្រសូត នឹងរលាយបាត់អស់ នៅពេលដែលអ្នកម្តាយថ្មោងថ្មីបានឃើញមុខកូនសម្លាញ់ និងក្លាយទៅជាក្តីរំភើបសោមនស្សរីករាយពេញក្នុងចិត្តវិញមិនខាន។
ការត្រៀមសម្ភារសម្រាប់ចូលមន្ទីសម្ភព
.សម្រាប់អ្នកម្តាយ
1. ប័ណ្ណពិនិត្យសុខភាពគភ៌ និងអត្តសញ្ញាណប័ណ្ណ
2. សំឡីអនាម័យ និងអាវក្នុងសម្រាប់ពាក់បំបៅដោះកូន
3. សម្លៀកបំពាក់អ្នកម្តាយ សម្រាប់ស្លៀកពេលចេញពីមន្ទីរពេទ្យ
4. អាហារ និងភេស្ជជៈ (ព្រោះក្រោយពេលឆ្លងទន្លេរួច អ្នកម្តាយនឹងឃ្លានខ្លាំងណាស់)
5. កូនកាបូបតូចមួយ សម្រាប់ដាក់គ្រឿងសម្អាង
6. កន្សែងជូតមុខ និងកន្សែងពោះគោសម្រាប់ជូតខ្លួន
7. កាមេរ៉ាថតរូប ក្នុងករណីដែលខាងមន្ទីរពេទ្យអាចអនុញ្ញាតឱ្យថតរូបបាន
.សម្រាប់ទារក
1. ក្រណាត់កន្ទប សម្រាប់រុំខ្លួនទារក
2. ខោអាវកូនតូច (សម្រាប់ទារកទើបកើត)
3. ទឹកសាប៊ូសម្រាប់បោកជម្រះផ្សេងៗ
4. កូនខ្នើយសម្រាប់ទ្រាប់ក្បាលកូនពេលបីបំបៅដោះ
5. ក្រណាត់ ឬកន្សែងសម្រាប់រុំខ្លួនកូនពេលត្រឡប់ទៅផ្ទះវិញ៕
December 25, 2020
ទង្វើដ៏សែនងាយៗ 12យ៉ាង ដើម្បីសុខភាពចិត្ត-កាយដ៏ល្អ
មិត្តអ្នកអានប្រហែលជាធ្លាប់បានឮពាក្យដែលគេនិយាយថា សុខភាពល្អមិនអាចរកទិញនៅទីណាបានឡើយ បើចង់បានទាល់តែអនុវត្តដោយខ្លួនឯង ។ ទោះជាដឹង និងយល់ច្បាស់ពីប្រយោគនេះហើយក៏ដោយ តែមានជាច្រើនដងណាស់ ដែលយើងធ្វេសប្រហែស និងព្រងើយកន្តើយចំពោះរឿងងាយៗ ដើម្បីទៅប្រឈមមុខនឹងរឿងលំបាកៗ និងបញ្ហាជាច្រើនដែលនឹង
កើតឡើងក្នុងពេលអនាគត នោះគឺមានន័យថា យើងរស់នៅពីមួយថ្ងៃទៅមួយថ្ងៃដោយគ្មានយកចិត្តទុកដាក់ពីរឿងមើលថែទាំសុខភាព ទាំងវាជារឿងដ៏ងាយសែនងាយ រហូតបណ្តោយឲ្យសុខភាពចុះទ្រុឌទ្រោម យ៉ាប់យ៉ឺន និងត្រូវព្យាបាលយ៉ាងសកម្ម ដែលជាចុងក្រោយទៅអាចនឹងគ្មានផ្លូវព្យាបាលឲ្យជាបានផងក៏មិនដឹង ។
តទៅនេះគឺជាពាក្យណែនាំក្នុងការមើលថែទាំសុខភាពបែបងាយៗ ដែលធ្វើហើយនឹងបានទទួលលទ្ធផលល្អ ដែលមានចំណុចខ្លះ មនុស្សជាច្រើនអាចធ្លាប់ដឹងរួចមកហើយ តែភ្លេច ឬក៏មិនទាន់បានចាប់ផ្តើមធ្វើយ៉ាងពិតប្រាកដនៅឡើយ ។
1.ចេញទៅទទួលយកពន្លឺថ្ងៃនាពេលព្រលឹម
ការភ្ញាក់ពីព្រឹក ហើយចេញទៅទទួលយកពន្លឺថ្ងៃស្រទន់ៗ មុនម៉ោង 9:00 រៀងរាល់ថ្ងៃ 1ថ្ងៃ 10 -15នាទីនោះ នឹងជួយឱ្យរាងកាយបានទទួលវិតាមីន D យ៉ាងគ្រប់គ្រាន់ ខណ:ពេលជាមួយគ្នា ក៏នឹងធ្វើឱ្យលោកអ្នកមានអារម្មណ៍ស្រស់ស្រាយ ភ្លឺថ្លា និងមានជីវិតរស់រវើកផងដែរ។
2.ក្រេបទឹកតែ អ៊ូលង់ ក្តៅៗ
ក្រេបទឹកតែ អ៊ូលង់ មួយថ្ងៃឱ្យបាន 3ពេល នឹងមានចំណែកជួយកាត់បន្ថយបរិមាណជាតិខ្លាញ់រាវនៅក្នុងសរសៃឈាម និងកាត់បន្ថយកម្រិតកូលេស្តេរ៉ូលបានយ៉ាងល្អ ព្រោះសារធាតុនៅក្នុងស្លឹកតែ ឈ្មោះថា Catechin Polyphenol នឹងជួយកាត់បន្ថយបញ្ហាក្លិនមាត់ និងបាក់តេរីក្នុងប្រអប់មាត់ ហើយការពារធ្មេញមិនឱ្យពុកបានទៀតផង។
3.ញ៉ាំទឹកលាយទឹកឃ្មុំ
បើកើតអាការគេងមិនលក់ សូមកុំអាលនឹកដល់ថ្នាំគេងលក់ដែលមានឥទ្ធិពលខ្លាំងៗអី ចូរសាកល្បងទទួលទានទឹកឃ្មុំ 1ស្លាបព្រាបាយ លាយជាមួយទឹកក្តៅឧណ្ហៗ នៅពេលបាយល្ងាចរៀងរាល់ថ្ងៃ វានឹងជួយឱ្យយើងគេងលក់បានស្កប់ ភ្ញាក់ព្រឹកឡើងនឹងមានអារម្មណ៍ថា ធូរស្រាល និងស្រស់ស្រាយក្នុងពេលជាមួយគ្នា ហើយទឹកឃ្មុំនៅមានគុណសម្បត្តិជួយកាត់បន្ថយអាការលោហិតស្លេក ដោយសារតែទឹកឃ្មុំមានសារធាតុដែកដែលជាអង្គប្រកបមួយរបស់ហេម៉ូគ្លោប៊ីន ទើបវាអាចជួយបង្កើនគ្រាប់ឈាមក្រហមបាន។
4.រកមើលឱសថបុរាណក្បែរៗខ្លួន
មិនបាច់ស្វែងរកអ្វីដែលពិបាកៗនោះទេ ព្រោះឱសថបុរាណ គឺជារឿងក្បែរខ្លួនយើង និងមានគុណប្រយោជន៍ជាច្រើន លើកឧទាហរណ៍ងាយៗ ដូចជា ស្លឹកម្រះព្រៅមានឥទ្ធិពលក្នុងការបណ្តេញជាតិខ្លាញ់ និងជាតិស្ករដែលលើសចេញពីរាងកាយ ហើយស្លឹកម្រះព្រៅ ថែមទាំងជួយក្នុងការបញ្ចេញទឹកប្រមាត់ក្នុងថ្លើមឱ្យមកជួយរំលាយជាតិខ្លាញ់បានកាន់តែល្អឡើងទៀតផង ។
5.ធ្វើម៉ាស្សាបន្ធូរអារម្មណ៍ និងរាងកាយ
ឈ្លីសៀតផ្កាដោយប្រេង ភេផើរ៍មិនត៍ ឬទឹកប្រេងក្រអូបហើរតាមខ្យល់ផ្សេងទៀត នឹងជួយធ្វើឱ្យមានអារម្មណ៍ធូរស្រាលរួចផុតពីភាពតានតឹងធុញថប់អារម្មណ៍បាន។
6.ជ្រើសរើសពាក់ស្បែកជើងបាតាល្អៗមួយគូ
ការជ្រើសរើសពាក់ស្បែកជើងបាតាក្រណាត់ល្អៗ 1គូ វានឹងជួយឱ្យការហាត់ប្រាណតាមរយ:ការដើររបស់អ្នក ប្រព្រឹត្តទៅយ៉ាងរលូន និងក្រៅពីបានបញ្ចេញញើសហើយនោះ នៅបានជួយថ្នមសុខភាពប្រអប់ជើងទៀតផង។
(នៅមានត)
December 25, 2020
អ្នកម្ដាយថ្មោងថ្មី និងជំនឿខុសៗ 4យ៉ាងក្នុងការបំបៅដោះកូន
ពេលនិយាយពីការបំបៅដោះកូន មានជំនឿជាច្រើន និងការនិយាយប្រាប់តៗគ្នាមក រហូតអាចធ្វើឱ្យអ្នកម្ដាយជាច្រើននាក់យល់ច្រឡំ និងវិលវល់មិនប្រាកដក្នុងចិត្តថា តើជំនឿទាំងនោះត្រឹមត្រូវឬទេ? ដូច្នេះថ្ងៃនេះ យើងនឹងនាំយកចំណេះដឹងល្អៗមកជម្រាបជូនអ្នកម្ដាយថ្មោងថ្មី ដើម្បីបានកែខៃជំនឿខុសៗក្នុងការបំបៅទឹកដោះកូន ដូចតទៅ…។
1.យកចិត្តទុកដាក់បំបៅដោះកូន រហូតភ្លេចមើលថែទាំសុខភាពខ្លួនឯង

អ្នកម្ដាយភាគច្រើនតែងកើតមានបញ្ហាលើការមិនមើលថែទាំសុខភាពខ្លួនឯង ព្រោះគិតថា ការបំបៅទឹកដោះកូន គឺជារឿងបន្ទាន់ និងសំខាន់បំផុតដែលត្រូវធ្វើមុនគេបង្អស់ តែបែរជាភ្លេចនឹកគិតថា ទឹកដោះសុទ្ធតែប្រកបទៅដោយសារធាតុអាហារចេញពីរាងកាយរបស់ស្ត្រីជាម្ដាយទាំងអស់។ បើម្ដាយមានសុខភាពមិនល្អ ទឹកដោះក៏មិនមានសារធាតុអាហារគ្រប់ចំនួនដែរ ដូច្នេះស្ត្រីជាម្ដាយត្រូវយកចិត្តទុកដាក់លើរឿងសុខភាព ញ៉ាំអាហារ និងសម្រាកឱ្យបានគ្រប់គ្រាន់ និងគួរញ៉ាំអាហារបំប៉ន មិនថាតែវីតាមីន សារធាតុរ៉ែ កាល់ស្យូម ស័ង្កសី-ល-ដើម្បីឱ្យរាងកាយរឹងប៉ឹងមាំមួនល្អ និងផលិតទឹកដោះដែលមានគុណភាពឱ្យកូនកូចបាន។
2.កូនគេងលក់ពេលបៅដោះ បញ្ជាក់ថា កូនឆ្អែតហើយ
អ្នកម្ដាយថ្មីថ្មោងជាច្រើន លួចនឹកសប្បាយនៅក្នុងចិត្ត ពេលបំបៅដោះកូនហើយកូនគេងលក់ទៅ យល់ថាកូនបៅទឹកដោះឆ្អែតរហូតដល់គេងលក់ តែការពិតវិញ កូនតូចអាចគេងលក់នៅក្នុងរង្វង់ដៃបីឱ្យបៅលើទ្រូងម្ដាយបានដោយមិនចាំបាច់មឹមឆ្អែតបាន ព្រោះស្រួលខ្លួន មានអារម្មណ៍កក់ក្ដៅ និងមានសុវត្ថិភាព ដូច្នេះការឧស្សាហ៍សង្កេតមើលកូន និងជួនកាលអាចប្ដូរឥរិយាបទកូនឱ្យបែរមកបៅដោះម្ខាងទៀត ឬឱ្យសម្រាកបៅមួយភ្លែតៗ ដើម្បីជំរុញឱ្យកូនមិនភ្លេចខ្លួនគេងលក់ បៅឱ្យបានឆ្អែតពេញលេញ ដើម្បីការចម្រើនធំធាត់ និងវិវឌ្ឍនាការរបស់កូនតូចយើងហ្នឹងឯង។
3.ស្ដាប់តាមអ្នកដទៃពីការបំបៅទឹកដោះកូន
ការបំបៅទឹកដោះ គ្មានច្បាប់ទម្លាប់កំណត់ច្បាស់នោះទេ អ្នកម្ដាយត្រូវចេះសង្កេតមើលកូន និងកែសម្រួលការឱ្យកូនបៅទឹកដោះឱ្យត្រឹមត្រូវ។ កូនខ្លះ បៅដោះ 5-10នាទី ឬ 20នាទីទើបឆ្អែត។ អ្នកម្ដាយខ្លះ ក៏ឱ្យកូនបៅដោះត្រឹមតែ 6ខែប៉ុណ្ណោះ អ្នកខ្លះ 1ឆ្នាំ ដល់ 2ឆ្នាំ ទើបលែងឱ្យបៅ…ទាំងអស់នេះ គ្មានខុស ឬត្រូវទេ។ អ្នកម្ដាយគួរសិក្សាព័ត៌មានពីប្រភពដែលគួរឱ្យជឿទុកចិត្តបាន ហើយយកមកកែសម្រួលធ្វើតាមឱ្យបានស័ក្តិសមបំផុត។
4.យល់ថា ការឈឺដោះបណ្ដាលមកពីការបំបៅកូន ជារឿងប្រក្រតី
អ្នកម្ដាយជាច្រើនយល់ខុសថា ការឈឺដោះ គឺជារឿងប្រក្រតីរបស់ការបំបៅដោះកូន តែការពិតវិញ វាអាចបណ្ដាលមកពីបញ្ហាបង្កប់មួយចំនួន ដូចជា ដោះតឹងណែនខះដោយសារតែកូនបៅទឹកដោះតិចពេក ឬអ្នកម្ដាយប្រើវិធីបឺតយកទឹកដោះទុកឱ្យកូនបៅ ខុសវិធី ជាដើម។ អាការទាំងនេះ បើទុកចោលរយៈពេលយូរ នឹងកើតការតឹងណែនខះក្នុងដោះជាបន្តបន្ទាប់ រហូតនាំឆ្ពោះទៅរកការរលាកក្លាយខាងក្នុងដោះ ឬករណីខ្លះ ក៏ជាមូលហេតុមកពីកូនកើតសភាវជាប់អណ្ដាត ធ្វើឱ្យបៅដោះយូរ តែមិនឆ្អែត ដែលអ្នកម្ដាយត្រូវទៅជួបគ្រូពេទ្យដើម្បីពិនិត្យ និងកែបញ្ហានេះ។
ជំនឿទាំង 4ខាងលើនេះ សុទ្ធតែត្រូវបានប្រាប់តៗគ្នាមក រហូតដល់អាចនឹងធ្វើឱ្យវិលវល់យល់ច្រឡំបាន ដូច្នេះពេលអ្នកម្ដាយបានដឹងពីការពិតហើយ ក៏សូមឱ្យនាំយកទៅប្រើ និងប្រតិបត្តិខ្លួនយ៉ាងត្រឹមត្រូវតាមវិធី ដើម្បីកូនតូចរបស់អ្នក៕
December 25, 2020
អាមេរិកឡាទីនចាប់ផ្ដើមចាក់វ៉ាក់សាំង ខណៈករណីឆ្លង Covid-19 ទូទាំងពិភពលោក កើនលើស 79 លាននាក់!
ពិភពលោកមានអ្នកជំងឺ Covid-19 ជាង 1.7 លាននាក់បានបាត់បង់ជីវិត ខណៈដែលប្រទេសចំនួន 3 ដំបូងគេនៅតំបន់អាមេរិកឡាទីន ចាប់ផ្ដើមចាក់វ៉ាក់សាំង។
គិតមកដល់ព្រឹកនៃថ្ងៃទី 25 ខែធ្នូនេះ ពិភពលោកបានរកឃើញអ្នកវិជ្ជមាននឹង Covid-19 សរុបចំនួន 79,690,271 នាក់ ក្នុងនោះមាន 1,748,183
នាក់បានស្លាប់ និង 56,085,204 នាក់ បានជាសះស្បើយ។ ក្នុងចំណោម 21,856,884 នាក់ដែលកំពុងព្យាបាល មាន 106,201 នាក់ កំពុងប្រឈមនឹងការបាត់បង់ជីវិត ដោយសារមានអាការធ្ងន់ធ្ងរ។
នៅអាមេរិកឡាទីន ក្រុមបុគ្គលិកសុខាភិបាលជួរមុខនៃប្រទេសម៉ិកស៊ិក និងឈីលី កាលពីថ្ងៃទី 24 ខែធ្នូ គឺជាក្រុមមនុស្សមួយក្នុងចំណោមក្រុមមនុស្សដំបូងគេដែលទទួលបានការចាក់វ៉ាក់សាំង នៅពេលដែលបណ្ដាប្រទេសក្នុងតំបន់អាមេរិកឡាទីនដែលរងផលប៉ះពាល់ធ្ងន់ធ្ងរ ចាប់ផ្ដើមយុទ្ធនាការចាក់វ៉ាក់សាំងជាបន្តបន្ទាប់។
ការចាក់វ៉ាក់សាំង Covid-19 ដោយមានផ្សាយផ្ទាល់តាមទូរទស្សន៍របស់ម៉ិកស៊ីក ត្រូវបានធ្វើឡើងក្រោយរយៈពេលមួយថ្ងៃដែលវ៉ាក់សាំងចំនួន 3,000 ដូសដំបូងរបស់ Pfizer-BioNTech ត្រូវបានដឹកមកដល់។ ម៉ិកស៊ិក បច្ចុប្បន្នមានអ្នកឆ្លងវីរុស 1,350,079 នាក់ និងស្លាប់ 120,311 នាក់ គឺជាប្រទេសដែលមានអ្នកស្លាប់ច្រើនជាងគេលំដាប់ទីបួនក្នុងពិភពលោក បន្ទាប់ពីសហរដ្ឋអាមេរិក ប្រេស៊ីល និងឥណ្ឌា។
នៅប្រទេសឈីលីវិញ ជំនួយការផ្នែកថែទាំសុខភាពម្នាក់ ឈ្មោះ Zulema Riquelme អាយុ 46 ឆ្នាំ គឺជាមនុស្សដំបូងគេដែលទទួលបានការចាក់វ៉ាក់សាំង Covid-19 ក្រោយរយៈពេលតែប៉ុន្មានម៉ោងប៉ុណ្ណោះដែលវ៉ាក់សាំង Pfizer-BioNTech 10,000 ដូសដំបូងត្រូវបានបញ្ជូនមកដល់ប្រទេសនេះ។
ម៉ិកស៊ិកគឺជាប្រទេសដំបូងគេនៅអាមេរិកឡាទីនដែលទទួលបានវ៉ាក់សាំង Pfizer-BioNTech បន្ទាប់មកទៀតគឺប្រទេស ឈីលី និងកូស្តារីកា។ ប្រធានាធិបតីរបស់កូស្តារីកា លោក Carlos Alvarado ថ្លែងថា៖ «វាអាចជាការចាប់ផ្ដើមសម្រាប់ការបញ្ចប់មហារោគរាតត្បាតនេះ»។
ក្នុងខណៈនោះដែរ អាហ្សង់ទីន ក៏បានទទួលវ៉ាក់សាំង Sputnik V ចំនួន 300,000 ដូសដំបូងពីប្រទេសរុស្ស៊ី កាលពីថ្ងៃទី 24 ខែធ្នូ។ នេះជាប្រទេសតែមួយគត់នៅតំបន់អាមេរិកឡាទីនដែលបានអនុម័តប្រើប្រាស់វ៉ាក់សាំងរបស់រុស្ស៊ី៕
ប្រភព៖ BBC, Reuters
December 25, 2020
ថៃបានចាប់ផ្ដើមដាក់បម្រាមគោចរ បន្ទាប់ពីរកឃើញករណីវិជ្ជមាននឹង Covid-19 ក្នុងសហគមន៍
សម្បុកវីរុសក្នុងខេត្ត Samut Sakhon នៃប្រទេសថៃ នៅតែបន្តវិវត្តន៍ពិបាកស្មាន ដោយមានអ្នកឆ្លងវីរុស Covid-19 រាប់សិបនាក់ជារៀងរាល់ថ្ងៃ ធ្វើឱ្យរដ្ឋាភិបាលថៃ ត្រូវចាប់ផ្ដើមដាក់បម្រាមគោចរដោយកន្លែងដើម្បីកាត់បន្ថយការឆ្លងរាលដាល។
យោងតាម Bangkok Post ប្រទេសថៃបានរកឃើញអ្នកវិជ្ជមាននឹង Covid-19 សរុបចំនួន 67 នាក់ នៅក្នុងថ្ងៃទី 24 ខែធ្នូ ក្នុងនោះមាន 58 នាក់ជាករណីឆ្លងក្នុងសហគមន៍។
វេជ្ជបណ្ឌិត Taweesilp Visanuyothin អ្នកនាំពាក្យរបស់មជ្ឈមណ្ឌលគ្រប់គ្រងស្ថានការណ៍ Covid-19 បានឱ្យដឹងថា ក្នុងចំណោមអ្នកជំងឺ 58 នាក់ដែលឆ្លងក្នុងសហគមន៍គឺ មាន 55 នាក់ជាប់ទាក់ទងនឹងសម្បុកវីរុសនៅក្នុងខេត្ត Samut Sakhon។
ភាគច្រើននៃករណីឆ្លងក្នុងសហគមន៍នេះគឺជាអ្នកលក់ដូរ និងពលករថៃ ក្នុងនោះមាន 20 នាក់គឺជាបុគ្គលិកក្រុមហ៊ុន និងមេផ្ទះ។
គិតមកដល់បច្ចុប្បន្ន ប្រទេសថៃបានរកឃើញអ្នកវិជ្ជមាននឹង Covid-19 សរុបចំនួន 5,829 នាក់ ក្នុងនោះមាន 4,116 នាក់បានជាសះស្បើយ និង 1,653 នាក់ កំពុងព្យាបាលនៅមន្ទីរពេទ្យ។ ចំណែកតួលេខអ្នកស្លាប់ដោយសារវីរុសនេះ នៅតែ 60 ដដែល។
ពលករបរទេសដែលកំពុងធ្វើការនៅប្រទេសថៃ ចំនួន 1,273 នាក់ត្រូវបានរកឃើញថា មានផ្ទុក Covid-19 នេះបើតាមបណ្ឌិត Taweesilp។ អាជ្ញាធរថៃបានឱ្យដឹងថា នឹងមិនមានការដាក់បម្រាមគោចរទូទាំងប្រទេសនោះទេ ប៉ុន្តែ ប្រទេសនេះនឹងត្រូវបានបែងចែកជាតំបន់ទៅតាមពណ៌ចំនួន 4 រួមមាន ពណ៌ក្រហម ពណ៌ទឹកក្រូច ពណ៌លឿង និងពណ៌បៃតង ដែលស្មើនឹងកម្រិតទាំង 4 ដែលត្រូវប្រើប្រាស់ក្នុងការដាក់បម្រាមគោចរ ឬកាត់បន្ថយការធ្វើដំណើរ។
បច្ចុប្បន្ន តំបន់ពណ៌ក្រហម គឺមាននៅក្នុងខេត្ត Samut Sakhon ដែលនឹងត្រូវគ្រប់គ្រងយ៉ាងតឹងរ៉ឹង ខណៈដែលក្រុមបុគ្គលិកសុខាភិបាលនឹងធ្វើការអស់ពីសមត្ថភាព៕
ប្រភព៖ Bangkok Post
December 25, 2020
ពលរដ្ឋអាមេរិកាំងជាងមួយលាននាក់ បានចាក់វ៉ាក់សាំង Covid-19 លើកទីមួយរួចហើយ
មជ្ឈមណ្ឌលគ្រប់គ្រងនិងទប់ស្កាត់រោគឆ្លងរបស់អាមេរិក បានឱ្យដឹងថា ពលរដ្ឋអាមេរិកាំងជាង 1 លាននាក់ បានចាក់វ៉ាក់សាំង Covid-19 រួចហើយ ក្រោយរយៈពេល 10 ថៃដែលបានចាប់ផ្ដើមយុទ្ធនាការចាក់វ៉ាក់សាំងនៅប្រទេសនេះ។
«សហរដ្ឋអាមេរិកនៅថ្ងៃនេះ បានឈានដល់ដំណាក់កាលសំខាន់មួយ។ តំបន់នានាបានរាយការណ៍ថា ពលរដ្ឋជាង 1 លាននាក់ត្រូវបានចាក់វ៉ាក់សាំង Covid-19 លើកដំបូង រាប់ចាប់តាំងពីរដ្ឋាភិបាលបានចាប់ផ្ដើមយុទ្ធនាការកាលពី 10 ថ្ងៃមុន» នេះបើតាមសម្ដីរបស់ លោក Robert Redfield នាយកមជ្ឈមណ្ឌលគ្រប់គ្រងនិងបង្ការជំងឺឆ្លងរបស់សហរដ្ឋអាមេរិក ដែលបានឱ្យដឹងកាលពីថ្ងៃទី 23 ខែធ្នូ។
ចំណែកលោក Moncef Slaoui ទីប្រឹក្សានៃយុទ្ធនាការរហ័សរបស់រដ្ឋាភិបាលអាមេរិក បានឱ្យដឹងដែរថា គោលដៅចាក់វ៉ាក់សាំងឱ្យបាន 20 លាននាក់ក្នុងខែនេះ ពិតជា «ពិបាកសម្រេចបាន»។ ប៉ុន្តែ លោកបន្ថែមថា សហរដ្ឋអាមេរិកកំពុងមានគោលដៅចាក់វ៉ាក់សាំងឱ្យបាន 100 លាននាក់នៅមុនដំណាច់ត្រីមាសទីមួយនៃឆ្នាំ 2021 និង 100 លាននាក់ទៀត នៅក្នុងត្រីមាសទីពីរ។
សូមរំលឹកថា កាលពីថ្ងៃទី 11 ធ្នូ នាយកដ្ឋានគ្រប់គ្រងអាហារនិងឱសថអាមេរិក (FDA) បានអនុម័តលើវ៉ាក់សាំង Covid-19 ដំបូងនៃប្រទេសនេះ ដែលអភិវឌ្ឍដោយក្រុមហ៊ុន Pfizer និង BioNTech។ កាលពីសប្ដាហ៍កន្លងទៅ វ៉ាក់សាំងនេះចំនួន 3 លានដូស ត្រូវបានចែកចាយនៅពាសពេញទឹកដីអាមេរិក។
សហរដ្ឋអាមេរិកគឺជាប្រទេសដែលមានអ្នកឆ្លងវីរុស Covid-19 ច្រើនជាងគេក្នុងពិភពលោក ដោយមានអ្នកជំងឺជាង 19 លាននាក់ ក្នុងនោះមានជាង 334,000 នាក់បានស្លាប់ដោយសារវីរុសនេះ៕
ប្រភព៖ AFP
December 24, 2020
5វិធី ឆ្ពោះទៅរកការមានសុខភាពល្អ ខណៈមានគភ៌
រឿងរបស់ការមានសុខភាពល្អនេះ គឺពិតជារឿងមួយចាំបាច់ណាស់សម្រាប់ស្រ្តីមានគភ៌ ព្រោះមានន័យថា នៅពេលអ្នកម្តាយមានសុខភាពល្អ រឹងមាំហើយនោះ ជីវិតតូចមួយនៅក្នុងផ្ទៃ ក៏នឹងមានការវិវឌ្ឍចម្រើនធំធាត់ល្អតាមអាយុគភ៌របស់អ្នកម្តាយដែរ។ ដូច្នេះហើយទើបយើងតែងសង្កេតឃើញថា លោកវេជ្ជបណ្ឌិតតែងតែណែនាំឱ្យអនាគតអ្នកម្តាយដែលកំពុងមានផ្ទៃពោះទាំងឡាយ ឱ្យឧស្សាហ៍ព្យយាមមើលថែទាំខ្លួនឯង ទាំងក្នុងរឿងសុខភាពកាយ ទាំងរឿងផ្លូវចិត្ត និងការរស់នៅទៀតផង។ ឥឡូវនេះ យើងនាំគ្នាមកមើលថា តើវិធីឆ្ពោះទៅរកការមានសុខភាពល្អនោះ តើយើងអាចធ្វើបានតាមវិធីណាខ្លះ?។
1. ស្រ្តីមានគភ៌ គួរទទួលទានបន្លែ ផ្លែឈើ អាហារស៊ីរៀល(Cereal) បាយអង្ករស្រូវសាលី គ្រាប់ធញ្ញជាតិ និងអាហារកាកសរសៃឱ្យបានច្រើន ដើម្បីចៀសវាងពីអាការទល់លាមក ព្រោះអ័រម៉ូនដែលប្រែប្រួល នឹងមានផលប៉ះពាល់ដល់ពោះវៀនធំរបស់អ្នកម្តាយ តែអាហារដែលមានជាតិកាកសរសៃច្រើនអាចជួយក្នុងរឿងនេះបានច្រើន។
2. ស្ត្រីមានគភ៌ ត្រូវទទួលបានសារធាតុដែកពីសាច់សត្វ យ៉ាងហោចណាស់ក្នុង 1សប្តាហ៍ 3ដង ដែលមិនចាំបាច់ទទួលទានច្រើនពេកទេ តែឱ្យគ្រប់គ្រាន់នឹងតម្រូវការរបស់រាងកាយ ហើយសារធាតុដែកដែលមាននៅក្នុងបន្លែនេះ ជាប្រភេទដែលមិនមែនជា អេម៉ូគ្លោប៊ីនដែលធ្វើឱ្យរាងកាយពិបាកបឺតជ្រាបទេ។
3. ដើម្បីជួយបង្កើនដល់ខួរក្បាលរបស់ទារក ស្ត្រីមានគភ៌ត្រូវទទួលទានជាតិអាស៊ីតខ្លាញ់ អូមេហ្កា3 តែចូរចៀសវាងសត្វក្នុងទឹកដែលមានសម្បក ប្រភេទ គ្រំ ងាវ ជាដើម ព្រោះវានឹងបង្កឱ្យកើតមានគ្រោះថ្នាក់ដល់ទាំងអ្នកម្តាយ និងកូនតូចនៅក្នុងផ្ទៃ ដែលអាចនឹងឆ្លងមេរោគបាត់តេរី លីស្តេរីបាន។
4. បើស្ត្រីមានគភ៌លំបាកវេទនាជាមួយអាការក្អួតចង្អោរ ចូរទទួលទានមើមខ្ញី ព្រោះខ្ញីអាចជួយកែបញ្ហាក្អួតចង្អោរបានប្រសើរណាស់ ដោយហាន់មើមខ្ញីស្រស់ៗបែបស្តើងៗ រួចដាក់ចូលទៅក្នុងទឹកក្តៅឧណ្ហៗ ហើយយកមកពិសា។
5. ស្ត្រីមានគភ៌ត្រូវទទួលបានជាតិ ភ្លូអរ៉ាយដ៍ឱ្យបានគ្រប់គ្រាន់ ព្រោះវាសំខាន់ដល់ការដុះលូតលាស់នៃធ្មេញរបស់ទារក៕
December 24, 2020