សុខភាព - La Reine Media

តួលេខវិជ្ជមាននឹង Covid-19 ថ្មីនៅកម្ពុជា សម្រាប់ព្រឹកថ្ងៃទី 15មីនា បានថយចុះច្រើនធៀបនឹងម្សិលមិញ

កម្ពុជារកឃើញអ្នកវិជ្ជមាននឹង Covid-19 ថ្មី ចំនួន 20 នាក់ទៀត គិតត្រឹមព្រឹកថ្ងៃទី 15 មីនា 2021 ទន្ទឹមនឹងនេះក៏មានអ្នកជាសះស្បើយថ្មីចំនួន 83 នាក់ផងដែរ។

អ្នកវិជ្ជមានថ្មីខាងលើ រួមមាន 1 នាក់ជាករណីនាំចូលដែលមិនមែនជាពលករខ្មែរត្រលប់មកពីប្រទេសថៃ និង 1 ករណីជាពលករខ្មែរមកពីប្រទេសថៃ ខណៈ 18 នាក់ជាករណីពាក់ព័ន្ធនឹង «ព្រឹត្តិការណ៍សហគម 20កុម្ភៈ»។

ចំណែកករណីជាសះស្បើយទាំង 83 នាក់ រួមមាន 11 ករណីជាអ្នកដំណើរមកពីបរទេស មិនមែនជាពលករខ្មែរមកពីថៃ, 72 នាក់ ជាករណីពាក់ព័ន្ធនឹងព្រឹត្តិការណ៍ 20កុម្ភៈ។

គិតមកដល់ព្រឹកថ្ងៃទី 15 មីនា 2021 នេះ កម្ពុជាមានអ្នកវិជ្ជមាននឹង Covid-19 សរុបចំនួន 1,325 នាក់ ក្នុងនោះមានអ្នកជាសះស្បើយចំនួន 730 នាក់ និងអ្នកកំពុងព្យាបាលចំនួន 592 នាក់៕

ប្រភព៖ ក្រសួងសុខាភិបាល
ដកស្រង់៖ បុត្រា

March 15, 2021

Covid-19 នៅ ASEAN គិតត្រឹមដំណាច់ថ្ងៃទី 14/មីនា៖ អ្នកឆ្លងថ្មីនៅហ្វីលីពីន កើនលើសឥណ្ឌូនេស៊ី

កាលពីថ្ងៃទី 14 មីនា បណ្ដាប្រទេសនៅក្នុងសមាគម ASEAN រកឃើញករណីវិជ្ជមានថ្មីជាង 11,200 នាក់ នាំឱ្យតួលេខអ្នកវិជ្ជមានសរុបឡើងជិតដល់ 2.6 លាននាក់ ក្នុងនោះ អ្នកវិជ្ជមានថ្មីនៅប្រទេសហ្វីលីពីន បានកើនលើសឥណ្ឌូនេស៊ី។

យោងតាមទំព័រ Worldometers គិតត្រឹមម៉ោង 23 និង 59 នាទី នៃថ្ងៃទី 14 មីនា បណ្ដាប្រទេសនៅក្នុងសមាគមប្រជាជាតិអាស៊ីអាគ្នេយ៍ (ASEAN) បានរកឃើញអ្នកវិជ្ជមាននឹង Covid-19 ថ្មី ចំនួន 11,203 ករណី និងអ្នកស្លាប់ចំនួន 164 ករណី។

ដូច្នេះ បណ្ដាប្រទេសក្នុងសមាគម ASEAN បច្ចុប្បន្ន មានអ្នកវិ្ជមាននឹង Covid-19 សរុបចំនួន 2,598,168 នាក់ ក្នុងនោះមាន 55,821 នាក់ បានស្លាប់ និង 2,330,813 នាក់បានជាសះស្បើយ។

ក្នុងថ្ងៃទី 14 មីនា តំបន់អាស៊ីអាគ្នេយ៍មានប្រទេសចំនួន 3 ដែលមានអ្នកស្លាប់ដោយសារ Covid-19 ក្នុងនោះ ឥណ្ឌូនេស៊ីមានរហូតដល់ 97 នាក់ ខណៈហ្វីលីពីន មាន 63 នាក់ និងម៉ាឡេស៊ីមាន 4 នាក់។

ឥណ្ឌូនេស៊ីបន្តជាសម្បុកវីរុស Covid-19 ធំជាងគេក្នុងតំបន់ ASEAN ដោយមានអ្នកជំងឺសរុប 1,419,455 នាក់ ក្នុងនោះមានអ្នកជំងឺថ្មីចំនួន 4,714 នាក់ និងអ្នកស្លាប់សរុប 38,426 នាក់។

ហ្វីលីពីនកំពុងដោះស្រាយបញ្ហាឆ្លងរាលដាលថ្មី ដោយមានករណីឆ្លងថ្មីច្រើនជាងឥណ្ឌូនេស៊ីទៅទៀត ដោយមានអ្នកវិជ្ជមានថ្មីចំនួន 4,899 នាក់ ក្នុងចំណោមអ្នកវិជ្ជមានសរុបចំនួន 621,498 នាក់ និងអ្នកស្លាប់សរុប 12,829 នាក់។ ចំណែកស្ថានការណ៍នៅប្រទេសម៉ាឡេស៊ី កំពុងប្រសើរឡើងជាងមុនបន្តិច ដោយមានអ្នកវិជ្ជមានថ្មីក្នុងថ្ងៃទី 14 មីនា ចំនួន 1,354 នាក់ នាំឱ្យតួលេខសរុបនៃអ្នកវិជ្ជមាន ឡើងដល់ 621,498 និងស្លាប់សរុប 12,829 នាក់៕

ប្រភព៖ Worldometers/THX
ប្រែសម្រួល៖ បុត្រា

March 15, 2021

បន្ទាន់! ជនជាតិចិនម្នាក់បានស្លាប់នាថ្ងៃទី14មីនានេះ នៅពេលកំពុងធ្វើចត្តាឡីស័ក! រដ្ឋបាលខេត្តព្រះសីហនុថា ដោយសារបញ្ហាសួត លំពែង និងឡើងជាតិស្ករ

«នៅថ្ងៃទី 14 មីនា 2021 វេលាម៉ោង 13:43នាទីរសៀល មានជនជាតិចិនម្នាក់បានបាត់បង់ជីវិតនៅមន្ទីរពេទ្យបង្អែកខេត្តព្រះសីហនុ» នេះបើតាមប្រកាសរបស់រដ្ឋបាលខេត្តព្រះសីហនុ។

សេចក្ដីប្រកាសបានឱ្យដឹងថា ជនជាតិចិនខាងលើមានឈ្មោះថា RAO SHAOXING ភេទប្រុស អាយុ 27 ឆ្នាំ បានមកដល់កម្ពុជានៅថ្ងៃទី 30 ធ្នូ 2020។ បុរសនេះបានផ្ដើមធ្វើចត្តាឡីស័កក្នុងកាស៊ីណូមួយកន្លែងនៅក្នុងខេត្តព្រះសីហនុ ចាប់ពីថ្ងៃទី 26 កុម្ភៈ 2021។ បុរសនេះបានស្លាប់នៅក្នុងអំឡុងពេល និងទីកន្លែងដូចដែលបានរៀបរាប់ខាងលើ។

តាមការពិនិត្យវាយតម្លៃរបស់ក្រុមវេជ្ជបណ្ឌិត បុរសនេះមានជំងឺរលាកលំពែង និងសួតរ៉ាំរ៉ៃ និងមានបញ្ហាឡើងជាតិស្ករខ្លាំងផងដែរ។ ព័ត៌មានលម្អិត សូមបន្តអានសេចក្ដីប្រកាសរបស់រដ្ឋបាលខេត្តព្រះសីហនុ ដែលមានដូចខាងក្រោម។

ប្រភព៖ ក្រសួងព័ត៌មាន
ដកស្រង់៖ បុត្រា

March 14, 2021

តួលេខអ្នកឆ្លង Covid-19 នៅកម្ពុជា គិតត្រឹមព្រឹកថ្ងៃទី 14មីនា 2021

កម្ពុជារកឃើញករណីវិជ្ជមាននឹង Covid-19 ថ្មីចំនួន 41 នាក់ទៀត នៅក្នុងរយៈពេល 24 ម៉ោងនៃថ្ងៃទី 13 មីនា 2021។

អ្នកឆ្លងវីរុស Covid-19 ទាំង 41 នាក់ខាងលើ សុទ្ធតែជាអ្នកពាក់ព័ន្ធនឹងព្រឹត្តិការណ៍ 20មីនា ក្នុងចំណោមនេះដែរ មានជនជាតិខ្មែរ 12 នាក់, ជនជាតិវៀតណាម 4 នាក់, ជនជាតិថៃ 2 នាក់។ ក្រៅពីនេះគឺសុទ្ធតែជាជនជាតិចិន។ ទន្ទឹមនឹងនេះ កម្ពុជាក៏មានអ្នកជាសះស្បើយថ្មីចំនួន 24 នាក់ផងដែរ។

គិតមកដល់ព្រឹកថ្ងៃទី 14 មីនា ឆ្នាំ 2021 នេះ កម្ពុជាមានអ្នកឆ្លង Covid-19 សរុបចំនួន 3,305 នាក់ ក្នុងនោះមាន 647 នាក់ បានជាសះស្បើយ ខណៈ 656 នាក់កំពុងសម្រាកព្យាបាល និង 1 នាក់បានស្លាប់៕

March 14, 2021

កម្ពុជារកឃើញអ្នកវិជ្ជមាននឹង Covid-19 ថ្មី ចំនួន 39នាក់ទៀត ក្នុងអំឡុង 24ម៉ោងនៃថ្ងៃទី12មីនា

ជាមួយនឹង 39 នាក់ថ្មីនេះ កម្ពុជា បច្ចុប្បន្នមានអ្នកឆ្លងវីរុស Covid-19 សរុបចំនួន 1,264 នាក់ ក្នុងនោះមាន 623 នាក់បានជាសះស្បើយ និង 1 នាក់បានស្លាប់ ខណៈ 639 នាក់ កំពុងព្យាបាលនៅមន្ទីរពេទ្យ។

39 នាក់ដែលទើបត្រូវបានរកឃើញថាមានផ្ទុក Covid-19 នេះដែរ ក៏សុទ្ធតែជាករណីពាក់ព័ន្ធនឹងព្រឹត្តិការណ៍ 20មីនា។ ព័ត៌មានបន្ថែម សូមអានរបាយការណ៍លម្អិតរបស់ក្រសួងសុខាភិបាលដែលមានដូចខាងក្រោម។ ទន្ទឹមនឹងអ្នកឆ្លង កម្ពុជា កាលពីថ្ងៃទី 12 មីនា ក៏មានអ្នកជាសះស្បើយចំនួន 4 នាក់ផងដែរ។

ដោយឡែក នៅទូទាំងពិភពលោក តួលេខអ្នកស្លាប់ដោយសារវីរុសនេះ បានកើនដល់ 2,651,640 នាក់, អ្នកជាសះស្បើយចំនួន 96,253,618 នាក់ និងអ្នកកំពុងព្យាបាលចំនួន 20,700,323 នាក់ ក្នុងចំណោមអ្នកវិជ្ជមានសរុបចំនួន 119,605,581 នាក់៕

March 13, 2021

WHO ៖ ពុំមានមូលហេតុដែលត្រូវផ្អាកចាក់វ៉ាក់សាំង AstraZeneca

អង្គការសុខភាពពិភពលោក (WHO) បានអះអាងថា មិនមានមូលហេតុអ្វីដែលនាំឱ្យពិភពលោកត្រូវផ្អាកការចាក់វ៉ាក់សាំងបង្ការវីរុស Covid-19 របស់ក្រុមហ៊ុន AstraZeneca (អង់គ្លេស-ស៊ុយអែដ) នោះទេ ក្រោយពីមានប្រទេសមួយចំនួនបានផ្អាកប្រើប្រាស់វ៉ាក់សាំងនេះ។

ខាងលើនេះគឺជាការលើកឡើងរបស់លោកស្រី Margaret Harris អ្នកនាំពាក្យនៃអង្គការសុខភាពពិភពលោក ដែលបានថ្លែងកាលពីថ្ងៃទី 12 មីនា 2021។

ការលើកឡើងរបស់ WHO ត្រូវបានធ្វើឡើង ក្រោយពីប្រទេសមួយចំនួនក្នុងពិភពលោក ដូចជា ដាណឺម៉ាក, ន័រវែស, អ៊ីស្លង់ ជាដើម បានប្រកាសផ្អាកការចាក់វ៉ាក់សាំងរបស់ក្រុមហ៊ុន AstraZeneca ដោយសារតែមានបញ្ហាកកឈាមលើមនុស្សមួយចំនួនបន្ទាប់ពីបានចាក់វ៉ាក់សាំងនេះ។ ប្រទេសថៃ កាលពីម្សិលមិញក៏បានក្លាយជាប្រទេសដំបូងគេនៅអាស៊ីអាគ្នេយ៍ដែលផ្អាកការចាក់វ៉ាក់សាំងនេះដែរ។

ក៏ប៉ុន្តែ រដ្ឋាភិបាលនៃប្រទេសជាច្រើន នៅតែបន្តប្រើប្រាស់វ៉ាក់សាំង AstraZeneca ដោយយល់ថា ផលប្រយោជន៍ដែលវ៉ាក់សាំងនេះនាំមកគឺធំធេងជាងឆ្ងាយ បើធៀបនឹងហានិភ័យ។

យោងតាមស្ថិតិពីអង្គភាពចាក់វ៉ាក់សាំងនានានៅអឺរ៉ុប នៅក្នុងចំណោមមនុស្សប្រមាណជា 5 លាននាក់ដែលបានចាក់វ៉ាក់សាំង AstraZeneca មានមនុស្សប្រហែល 30 នាក់ប៉ុណ្ណោះដែលជួបបញ្ហាកកឈាម។ អត្រានេះមិនស្ថិតនៅក្រៅការព្យាករអំពីហានិភ័យនោះទេ។

វ៉ាក់សាំងបង្ការ Covid-19 ដែលត្រូវបានក្រុមហ៊ុន AstraZeneca សហការអភិវឌ្ឍជាមួយនឹងសាកលវិទ្យាល័យ Oxford ត្រូវបានអនុម័តឱ្យប្រើប្រាស់ជាបន្ទាន់ និងប្រើប្រាស់នៅក្នុងប្រទេសជាង 50 ក្នុងនោះមានទាំងអង់គ្លេស និងសហភាពអឺរ៉ុប (EU) ផងដែរ៕

ប្រភព៖ AFP
ប្រែសម្រួល៖ បុត្រា

March 13, 2021

ព្រះមហាក្សត្រកម្ពុជា ប្រោសព្រះរាជទាន 200,000ដុល្លារអាមេរិក សម្រាប់សកម្មភាពទប់ស្កាត់ Covid-19

ព្រះករុណាព្រះបាទសម្ដេចព្រះបរមនាថ នរោត្តម សីហមុនី បានសព្វព្រះរាជហឫទ័យប្រោសព្រះរាជទាន ព្រះរាជទ្រព្យ ចំនួន 200,000 ដុល្លារអាមេរិក ជូនរាជរដ្ឋាភិបាលកម្ពុជា សម្រាប់ចូលរួមសកម្មភាពទប់ស្កាត់ការឆ្លងរាលដាល់នៃវីរុស Covid-19 នៅកម្ពុជា។

ព័ត៌មានខាងលើនេះ ត្រូវបានចុះផ្សាយដោយក្រសួងព័ត៌មាននៃព្រះរាជាណាចក្រកម្ពុជា នារសៀលថ្ងៃទី 12 ខែមីនា ឆ្នាំ 2021។

ព្រះមហាក្សត្រកម្ពុជា កាលពីឆ្នាំ 2020 ក៏ធ្លាប់បានប្រទានព្រះរាជទ្រព្យចំនួន 100,000 ដុល្លារអាមេរិកម្ដងរួចហើយដែរ ដល់រាជរដ្ឋាភិបាលកម្ពុជា សម្រាប់ធ្វើសកម្មភាពទប់ស្កាត់បញ្ហា Covid-19។ នេះបើតាមសារលិខិតរបស់សម្ដេចតេជោ ហ៊ុន សែន ចុះថ្ងៃទី19 ខែមីនា ឆ្នាំ2020៕

March 12, 2021

ផ្សារវិហារសួគ៌នៃខេត្តកណ្ដាល ត្រូវបានបិទបណ្ដោះអាសន្ន បន្ទាប់ពីអ្នកផ្ទុក Covid-19 ម្នាក់ បានចូលក្នុងផ្សារនេះ

ផ្សារវិហារសួគ៌ដែលមានទីតាំងស្ថិតនៅក្នុងភូមិវិហារសួគ៌ ឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល ត្រូវបានបិទជាបណ្ដោះអាសន្ន ដោយសារអ្នកវិជ្ជមាននឹង Covid-19 ម្នាក់បានចូលមកលេងបងប្អូនក្នុងផ្សារនេះ។

ដំណឹងខាងលើនេះ ត្រូវបានលោក ប៊ុន ផេង អភិបាលនៃគណ:អភិបាលស្រុកខ្សាច់កណ្ដាល ខេត្តកណ្ដាល ឱ្យដឹងនៅថ្ងៃទី 12 មីនា 2021 នេះ។ លោកចៅហ្វាលស្រុករូបនេះក៏បានអំពាវនាវឱ្យពលរដ្ឋដែលពាក់ព័ន្ធនឹងអ្នកជំងឺខាងលើ សហការជាមួយសមត្ថកិច្ចដើម្បីចាត់វិធានការបង្ការបញ្ហាឆ្លងរាលដាលឱ្យទាន់ពេលផងដែរ។

គិតត្រឹមថ្ងៃទី 12 មីនា 2021 នេះ ខេត្តកណ្ដាល មានអ្នកវិជ្ជមាននឹង Covid-19 សរុបចំនួន 73 នាក់ ក្នុងនោះមាន 69 នាក់កំពុងព្យាបាលនៅមន្ទីរពេទ្យ និង 4 នាក់ បានជាសះស្បើយ។

នៅទូទាំងប្រទេស មានអ្នកវិជ្ជមាននឹងវីរុសនេះសរុបចំនួន 1,225 នាក់ ក្នុងនោះមាន 619 នាក់បានជាសះស្បើយ ខណៈ 1 នាក់បានស្លាប់ និង 604 នាក់កំពុងព្យាបាលនៅមន្ទីរពេទ្យ៕

March 12, 2021

អ្នកនាំពាក្យក្រសួងសុខាភិបាលពន្យល់បន្ថែមអំពីករណីស្លាប់ដំបូងដោយសារ Covid-19 នៅកម្ពុជា

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការនៃក្រសួងសុខាភិបាលកម្ពុជា បានថ្លែងថា ករណីស្លាប់ដោយសារ Covid-19 ជាលើកដំបូងនៅកម្ពុជា គឺបណ្ដាលមកពីសួតត្រូវរងការខូចខាតធ្ងន់ធ្ងរ។

រដ្ឋលេខាធិការ និងជាអ្នកនាំពាក្យរបស់ក្រសួងសុខាភិបាលកម្ពុជា លោកជំទាវវេជ្ជបណ្ឌិត ឱ វណ្ណឌីន មានប្រសាសន៍កាលពីថ្ងៃទី 11 មីនាថា អ្នកជំងឺ Covid-19 ខាងលើត្រូវបានក្រុមគ្រូពេទ្យព្យាបាលអស់ពីលទ្ធភាពហើយ មុននឹងបាត់បង់ជីវិត។ ការថតសួតមុនពេលស្លាប់បានបង្ហាញថា សួតទាំងសងខាងរបស់អ្នកជំងឺនេះ ត្រូវខូចខាតធ្ងន់ធ្ងន់ បណ្ដាលឱ្យខ្វះអុកស៊ីហ្សែន ព្រោះតែវីរុសវាយលុកខ្លាំង។

លោកជំទាវបន្តថា អាការរបស់អ្នកជំងឺនេះ តម្រូវឱ្យក្រុមគ្រូពេទ្យប្រើប្រាស់ម៉ាស៊ីនជំនួយដង្ហើម ជាឧបករណ៍ទំនើបដែលអាចជួយអូសបន្លាយអាយុជីវិតរបស់អ្នកជំងឺ ក្នុងអំឡុងពេលព្យាបាល។ ក៏ប៉ុន្តែ ដោយសារស្ថានភាពជំងឺកាន់តែធ្ងន់ធ្ងរ អ្នកជំងឺក៏បានបាត់បង់ជីវិត។

សូមរំលឹកថា អ្នកស្លាប់ដោយសារវីរុស Covid-19 ដំបូងគេនៅកម្ពុជា គឺជាបុរសម្នាក់ស្នាក់នៅក្នុងសង្កាត់ចាក់អង្រែ ខណ្ឌមានជ័យ រាជធានីភ្នំពេញ ជាអ្នកបើកបររថយន្តឱ្យជនជាតិចិន នៅខេត្តព្រះសីហនុ។ អ្នកជំងឺនេះបានស្លាប់កាលពីថ្ងៃទី 11 មីនា 2021 នៅមន្ទីរពេទ្យមិត្តភាពខ្មែរ-សូវៀត៕

ប្រភព៖ ក្រសួងព័ត៌មាន
ដកស្រង់ដោយ៖ បុត្រា

March 12, 2021

កម្ពុជារកឃើញអ្នកឆ្លង Covid-19 ថ្មី 62នាក់ ក្នុងថ្ងៃទី 11មីនា

ក្រសួងសុខាភិបាលកម្ពុជា បានរកឃើញអ្នកវិជ្ជមាននឹង Covid-19 ចំនួន 62 នាក់ទៀតនៅក្នុងអំឡុង 24 ម៉ោងនៃថ្ងៃទី 11 មីនា 2021 នាំឱ្យតួលេខនៃអ្នកវិជ្ជមានសរុបឡើងដល់ 1,225 នាក់។

ក្នុងចំណោមអ្នកវិជ្ជមានថ្មីខាងលើ មាន 2 នាក់ពាក់ព័ន្ធនឹងករណីនាំចូលដែលមិនមែនជាពលករខ្មែរមកពីប្រទេសថៃ។ ចំណែក 60 នាក់ទៀត ជាករណីពាក់ព័ន្ធនឹងព្រឹត្តិការណ៍ 20កុម្ភៈ។

គិតមកដល់ព្រឹកថ្ងៃទី 12 មីនា 2021 នេះ កម្ពុជាបានរកឃើញអ្នកវិជ្ជមាននឹង Covid-19 សរុបចំនួន 1,225 នាក់ ក្នុងនោះមាន 619 នាក់បានជាសះស្បើយ ខណៈ 1 នាក់បានស្លាប់ និង 604 នាក់កំពុងព្យាបាលនៅមន្ទីរពេទ្យ។

ក្រៅពីអ្នកវិជ្ជមានថ្មី កម្ពុជាថ្ងៃនេះក៏មានករណីជាសះស្បើយចំនួន 2 នាក់ផងដែរ។ ព័ត៌មានលម្អិត សូមបន្តអានរបស់របាយការណ៍របស់ក្រសួងសុខាភិបាលដូចមាននៅខាងក្រោម៕

ប្រភព៖ ក្រសួងសុខាភិបាល
ដកស្រង់៖ បុត្រា

March 12, 2021

Category: សុខភាព