សង្គម និងសេដ្ឋកិច្ច - La Reine Media

Iniesta ចុះហត្ថលេខាជាមួយក្លិបជប៉ុន Vissel Kobe ក្រោយចាកចេញពី Barcelona

Andres Iniesta បានចុះហត្ថលេខាជាមួយក្លិបជប៉ុន Vissel Kobe ក្រោយពីបានបញ្ចប់កិច្ចសន្យារបស់គេជាមួយនឹងក្លិប Barcelona។

ខ្សែបម្រើវ័យ 34ឆ្នាំរូបនេះ បានបង្ហាញខ្លួននៅក្នុងសន្និសីទសារព័ត៌មានមួយនៅឯសណ្ឋាគារមួយក្នុងទីក្រុងតូក្យូ កាលពីថ្ងៃព្រហស្បតិ៍ រួមជាមួយនឹងលោក Hiroshi Mikitani ដែលជាម្ចាស់ក្លិប Kobe។ លោក Mikitani បានឱ្យដឹងថា៖ «ខ្ញុំពិតជារីករាយណាស់ក្នុងការប្រកាសថា Andres Iniesta នឹងចុះហត្ថលេខាលេងជាមួយនឹងក្លិប Vissel Kobe ក្រោយពីការបញ្ចប់អាជីពជាប្រវត្តិសាស្ត្ររបស់គេនៅឯក្លិប Barcelona។ Iniesta បានចុះហត្ថលេខាលើកិច្ចសន្យារបស់គេ ហើយបាននិយាយតាមរយៈអ្នកបកប្រែម្នាក់។ លក្ខខណ្ឌផ្សេងៗនៃកិច្ចសន្យានេះ ត្រូវបានបិទជិត ប៉ុន្តែ បណ្តាញសារព័ត៌មានរបស់ជប៉ុន បានចេញផ្សាយថា រូបគេនឹងទទួលបានចំណូល 30លានដុល្លារអាមេរិក ក្នុងរយៈពេល 1ឆ្នាំពីកិច្ចសន្យារយៈពេល3ឆ្នាំរបស់គេ។ Iniesta បានឱ្យដឹងថា៖ «ខ្ញុំទទួលបានសំណើជាច្រើន ក្លិបផ្សេងទៀតបានបង្ហាញពីការចាប់អារម្មណ៍លើខ្ញុំ»។

ខ្សែបម្រើរូបនេះបានបន្ថែមទៀតថា៖ «ប៉ុន្តែ ខ្ញុំបានជ្រើសរើសយក Vissel Kobe ដោយសារតែវាជាគម្រោងដ៏គួរឱ្យចាប់អារម្មណ៍មួយ។ ពួកគេក៏មានការជឿជាក់ជាច្រើនផងដែរលើខ្ញុំក្នុងនាមជាមនុស្ស និងជាកីឡាករម្នាក់ ដែលនោះគឺជាហេតុផលដ៏ធំមួយ»។ សូមជម្រាបថា លោក Mikitani ក៏ជានាយកប្រតិបត្តិរបស់ក្រុមហ៊ុនលក់ផលិតផលតាមអនឡាញ Rakuten ដែលជាម្ចាស់ឧបត្ថម្ភធំរបស់ក្លិប Barcelona ផងដែរ៕

ប្រភពព័ត៌មាន៖ The Guardian

May 25, 2018

ចេះស្រឡាញ់ និងចេះជួយកូនយ៉ាងត្រឹមត្រូវ តើត្រូវធ្វើបែបណា?

ឪពុកម្ដាយ ជាមនុស្សដែលមានឥទ្ធិពលខ្លាំងបំផុតក្នុងការអប់រំបណ្ដុះគំនិតនិស្ស័យ និងបុគ្គលិកលក្ខណៈដល់កូន ជាពិសេសក្នុងអំឡុងបឋមវ័យដែលក្មេងនឹងជ្រួតជ្រាបយកអ្វីៗគ្រប់យ៉ាង ទាំងពាក្យសម្ដី ទង្វើ រួមទាំងអ្វីៗដែលឪពុក និងម្ដាយ ឬអ្នកចិញ្ចឹមថែទាំបានធ្វើចំពោះរូបគេ។ នៅពេលកូនធំធាត់ឡើង បទពិសោធក្នុងវ័យកុមារ ក៏នឹងហុចផលដល់ទស្សនគតិ និងទង្វើរបស់គេនៅពេលធំឡើង ដូច្នេះហើយទើបអ្នកត្រូវដឹងថា តើអ្នកគួរស្រឡាញ់កូន និងនៅរង់ចាំជួយគេដោយរបៀបយ៉ាងណានោះ។

ការចិញ្ចឹមកូន និងស្រឡាញ់កូនដែលត្រឹមត្រូវនេះ ត្រូវចាប់ផ្ដើមពីចិត្តគំនិតរបស់ឪពុកម្ដាយជាមុន។ ឪពុកម្ដាយដែលល្អគួរធ្វើខ្លួនឱ្យដូចជាមិត្តភក្ដិដ៏ល្អរបស់កូន ស្ថិតនៅក្បែររូបគេជានិច្ច។ ឪពុកម្ដាយជាច្រើនស្រឡាញ់កូនខ្លាំង រហូតពេលខ្លះខ្លាចកូនលំបាក ខ្លាចកូនហត់ ខ្លាចកូនឈឺរហូតដល់គិត ឬធ្វើជំនួសកូនគ្រប់សព្វបែបយ៉ាងក្លាយជាថា នៅពេលកូនធំឡើងកូនក៏ក្លាយជាក្មេងដែលអាត្មានិយម ប្រើតែអារម្មណ៍(មិនចេះគិត) ឬជាក្មេងដែលឌឺរឹង ដែលអ្វីទាំងអស់នេះមិនមែនជារឿងល្អប៉ុន្មានឡើយ។ ឪពុកម្ដាយគួរតែដឹងពីតម្រូវការរបស់កូនថា ក្នុងអំឡុងវ័យនីមួយៗរបស់កូនហ្នឹង ធម្មជាតិរបស់ក្មេងនឹងត្រូវការអ្វីខ្លះ?

ខាងក្រោមនេះគឺជាតម្រូវការរបស់ក្មេងតាមអំឡុងវ័យ
អំឡុងអាយុ និងអ្វីដែលកូនត្រូវការ និងអ្វីខ្លះដែលឪពុកម្ដាយគួរតែប្រតិបត្តិចំពោះកូន ៖

វ័យទើបកើតដំបូង: កូនត្រូវការការមើលថែទាំយកចិត្តទុកដាក់ និងសេចក្ដីស្រឡាញ់ថ្នាក់ថ្នម ក្ដីបារម្ភ ដូច្នេះហើយទើបឪពុកម្ដាយគួរតែចេះនិយាយ ឬលេងជាមួយកូន ដើម្បីឱ្យកូនមានអារម្មណ៍ថា មានសុវត្ថិភាព និងបានទទួលសេចក្ដីស្រឡាញ់។

អំឡុងវ័យចេះលូនវារ: កូនកំពុងហ្វឹកហាត់អភិវឌ្ឍរាងកាយ អាចនឹងមានរពឹសនៅមិនស្ងៀមខ្លះដែរ ដូចជា ចូលចិត្តវារទៅនេះទៅនោះ។ ឪពុកម្ដាយគួរឱ្យកូនសាកល្បងធ្វើ សាកល្បងលូនវារ និងផ្ដល់ពេលវេលាឱ្យកូន លេងជាមួយកូន ផ្ដល់កម្លាំងចិត្តដល់កូនក្នុងការអភិវឌ្ឍរាងកាយ។

អំឡុងវ័យហាត់ឈរ: ក្នុងវ័យនេះ កូនត្រូវការចង់ហាត់ក្រោកឈរដោយខ្លួនឯង ចូលចិត្តតោងរបស់នេះរបស់នោះ ដើម្បីលើកខ្លួនឯងឡើង(ព្យាយាមឈរឱ្យបាន)។ ឪពុកម្ដាយគួរយកចិត្តទុកដាក់ថែទាំ និងនៅចាំជួយជិតៗឱ្យកូនបានហាត់ឈរ និងអភិវឌ្ឍសាច់ដុំផ្សេងៗ។

អំឡុងពេលចាប់ផ្ដើមដើរ: នៅពេលកូនអាចដើរដោយខ្លួនឯងបាន ឪពុកម្ដាយគួរឱ្យកូនហាត់ដើរដោយខ្លួនឯង អាចនឹងដឹកដៃកូនដើរលេងនៅលើវាលស្មៅខាងមុខផ្ទះ ឬតាមសួនច្បារសាធារណៈ។ កុំសូវបី ឬពកូនទៀត តែឱបថើបកូនឱ្យច្រើនឡើង។

ពេលចាប់ផ្ដើមចូលរៀនសាលាមត្តេយ្យ: កូននឹងចាប់ផ្ដើមចង់ធ្វើអ្វីៗដោយខ្លួនឯង ដូចជា ដួសបាយញ៉ាំខ្លួនឯង ញ៉ាំទឹកខ្លួនឯងជាដើម។ ឪពុកម្ដាយគួរបណ្ដោយឱ្យកូនបានហាត់ធ្វើដោយខ្លួនឯង ទោះជាប្រឡាក់ប្រឡូសខ្លះ ក៏ត្រូវតែបណ្ដោយដែរ និងបង្ហាត់បង្រៀនជាបណ្ដើរៗថា តើត្រូវធ្វើយ៉ាងណាខ្លះ។ មិនគួរប្រញាប់បង្ខំឱ្យកូនត្រូវតែទៅរៀនយល់ដឹងរឿងនេះរឿងនោះតាមដែលឪពុកម្ដាយចង់ឱ្យកូនចេះនោះឡើយ។

នៅពេលកូនចូលរៀនបឋមសិក្សា: កូននឹងចូលចិត្តលេង មានកិច្ចការងារជាមួយពួកម៉ាកមិត្តភក្តិជាច្រើន។ ឪពុកម្ដាយគួរបណ្ដោយឱ្យកូនលេង និងផ្ដល់កម្លាំងចិត្តក្នុងកិច្ចការងារផ្សេងៗដែលគេមានចំណែករួម។ ឪពុកម្ដាយគួរធ្វើខ្លួនឱ្យដូចពួកម៉ាក បើកូនត្រូវការឱ្យឪពុកម្ដាយចូលរួមក្នុងកិច្ចការងារណាមួយផងដែរនោះ។

នៅពេលកូនចូលអនុវិទ្យាល័យ: សាកល្បងបណ្ដោយឱ្យកូនមានឥស្សរភាពខាងការគិត បង្ហាត់ឱ្យកូនសាកល្បងពិចារណាពីហេតុផល និងឪពុកម្ដាយត្រូវទទួលស្ដាប់នូវអ្វីដែលកូននិយាយ និងរឿងដែលកូនគិតឱ្យបានច្រើន កុំយកគំនិតរបស់ខ្លួនឯងជាគោល។ បើកូនត្រូវការធ្វើកិច្ចការងារ ឬធ្វើអ្វីមួយ បើជារឿងដែលមិនបង្កគ្រោះថ្នាក់ ឪពុកម្ដាយគួរផ្ដល់កម្លាំងចិត្ត និងនៅចាំធ្វើជាទីប្រឹក្សាដល់កូន។

នៅពេលកូនឡើងវិទ្យាល័យ: កូននឹងមានគំនិតជារបស់ខ្លួនឯង ចង់រួមក្រុមជាមួយមិត្តភក្តិ ឬទៅណាមកណាជាមួយមិត្តភក្តិកាន់តែច្រើនឡើង។ បើឪពុកម្ដាយមើលថែទាំកូន ធ្វើខ្លួនជាមិត្តដ៏ល្អរបស់កូនមកតាំងពីដំបូង កូននឹងមិនស្រឡាញ់មិត្តភក្តិរហូតដល់ភ្លេចឪពុកម្ដាយនោះទេ ដូច្នេះឪពុកម្ដាយគួរតែនៅតែធ្វើខ្លួនជាមិត្តល្អ ជាទីប្រឹក្សា នៅចាំគាំទ្រ និងលើកទឹកចិត្តកូនជានិច្ច។ កុំធ្វើខ្លួនជាអ្នកកំណត់ជោគជតាជីវិតរបស់កូន ឬហាមធ្វើរឿងនេះ ហាមធ្វើរឿងនោះ។ ការចិញ្ចឹមមើលថែកូនក្នុងវ័យនេះ ត្រូវប្រើការនិយាយស្ដីដោយហេតុ និងផល កុំប្រើអារម្មណ៍មួម៉ៅខឹងសម្បាឱ្យសោះ។

នៅពេលកូនចូលរបងមហាវិទ្យាល័យ: កូននឹងបានជួបសង្គមដែលកាន់តែធំឡើង បញ្ហាផ្សេងៗក៏នឹងមានច្រើនឡើងដែរ។ ឪពុកម្ដាយគួរខ្លួនធ្វើជាទីប្រឹក្សា ជជែកនិយាយពិភាក្សាគ្រប់រឿងជាមួយកូន។ នៅធ្វើជាកម្លាំងចិត្តដល់កូនកុំឱ្យកូនមានអារម្មណ៍ថា ត្រូវរងសម្ពាធពីសេចក្ដីសង្ឃឹមរបស់ឪពុកម្ដាយ តែគួរធ្វើឱ្យកូនបានដឹងថា ប៉ាម៉ាក់នៅចាំធ្វើជាកម្លាំងចិត្តដល់កូនជានិច្ច។

នៅពេលដែលឪពុកម្ដាយបានដឹងពីតម្រូវការគោលៗរបស់កូនក្នុងវ័យនីមួយៗហើយ ឪពុកម្ដាយក៏អាចត្រៀមខ្លួនឯងឱ្យព្រមរួចជាស្រេចបានយ៉ាងត្រឹមត្រូវដែរ ហើយកូនរបស់យើងក៏នឹងធំធាត់ឡើងក្លាយជាមនុស្សល្អ មានសភាវអារម្មណ៍ និងចិត្តគំនិតដែលល្អ ដែលទាំងអស់នោះប្រហែលជាអ្វីដែលឪពុកម្ដាយគ្រប់រូបរំពឹងសង្ឃឹមចង់ឱ្យកូនរបស់ខ្លួនក្លាយជាបែបហ្នឹងដូចគ្នា៕

May 24, 2018

គង់ ចាន់ស្រីមុំ សម្ញែងគភ៌ទៀតហើយ រង់ចាំថ្ងៃប្រសូត…

តាមរយៈបណ្ដាញសង្គមហ្វេសប៊ុករបស់តារាស្រី គង់ ចាន់ស្រីមុំ ប៉ុន្មានម៉ោងមុននេះបន្ដិច បានបង្ហោះរូបភាពបញ្ចេញសាច់ក្បាលពោះដ៏ស្រស់ស្អាត ខណៈដែលគភ៌របស់អ្នកនាងកាន់តែជិតគ្រប់ខែហើយ។

ជាទូទៅ ដូចដែលប្រិយមិត្តទាំងអស់គ្នាបានដឹងហើយថា តារាស្រីរូបនេះកាលពីមិនទាន់មានស្វាមី នាងពិតជាមានរូបសម្ផស្សស្រស់ស្អាតខ្លាំងណាស់ និងបានទាក់ទាញចិត្តបុរសៗជាច្រើននាក់ឱ្យលង់ក្នុងសម្រស់របស់អ្នកនាងទៀតផង ហើយបើទោះជាពេលនេះ អ្នកនាងមានស្វាមីហើយក្ដី ក៏អ្នកនាងនៅតែថែរក្សាសម្រស់បានស្អាតដដែល។ ដោយឡែក ខណៈនេះ អ្នកនាង គង់ ចាន់ស្រីមុំ បានបង្ហោះរូបភាពដែលបង្ហាញពីគភ៌របស់អ្នកនាងម្ដងទៀតហើយ ដែលមកទល់ពេលនេះ គេមើលឃើញថា កាន់តែធំទៅៗ និងត្រៀមខ្លួនប្រសូតនាពេលឆាប់ៗនេះហើយ។

អ្នកនាង គង់ ចាន់ស្រីមុំ ថែមទាំងបានរៀបរាប់នៅលើបណ្ដាញសង្គមហ្វេសប៊ុកទៀតផងថា «ទារកគឺជាក្មេងតូចមួយដែលអ្នកបានថែរក្សានៅក្នុងផ្ទៃអស់រយៈពេល 9ខែ…។ អ្នកនឹងថ្នមនៅក្នុងដៃរបស់អ្នករយៈពេល 3 ឆ្នាំ…។ ហើយស្ថិតនៅក្នុងដួងចិត្តរបស់អ្នករហូតដល់ថ្ងៃដែលអ្នកស្លាប់…។ ពេលឆ្លងកាត់ទើបយល់កាន់តែច្បាស់ពីទឹកចិត្តម្តាយ។ គុណម្តាយគឺធំធេងណាស់ចំពោះកូនគ្រប់រូប…ថតដោយប្តីសម្លាញ់ Seyha Kem…រូបភាពអនុស្សាវរីយ៍ ដ៏មានតម្លៃ »។ គួរបញ្ជាក់ផងដែរថា បុត្រនៅក្នុងផ្ទៃអ្នកនាង គង់ ចាន់ស្រីមុំ នៅសល់តែប៉ុន្មានថ្ងៃទៀតប៉ុណ្ណោះ នឹងបានឃើញមុខប៉ាប៉ា និងម៉ាក់ៗរបស់គេហើយ…ពិតជាគួរឱ្យរំភើបចិត្តមែន៕

May 24, 2018

ជំនាញឌីជីថល 8យ៉ាងដែលអាណាព្យាបាលគួរបង្រៀនកូនឱ្យចេះ

នៅពេលបច្ចុប្បន្ននេះ យើងបានផ្លាស់ប្តូរពីយុគសម័យឧស្សាហកម្ម ទៅកាន់យុគសម័យបច្ចេកវិទ្យាដែលបច្ចេកវិទ្យា នេះមានចំណុចជាប់ទាក់ទងស្ទើរតែទាំងស្រុងទៅនឹងសង្គម និងសេដ្ឋកិច្ច។ បណ្តាញបច្ចេកវិទ្យាបានរីកចម្រើនយ៉ាងឆាប់រហ័ស រហូតដល់អ្នកជំនាញបានប៉ាន់ស្មានទុកថា 90% នៃមនុស្សទាំងអស់លើពិភពលោកនឹងប្រើប្រាស់ប្រព័ន្ធអីុនធើណិត ក្នុងរយៈពេល 10ឆ្នាំខាងមុខ។

ជាមួយនឹងបណ្តាញបច្ចេកវិទ្យាដ៏ឆ្លាតវៃនេះ យើងឃើញថាមនុស្សទាំងអស់នៅលើពិភពលោកនឹងកាន់តែភ្ជាប់ទំនាក់ទំនងបានងាយស្រួលឡើងហើយអ្វីគ្រប់យ៉ាងនឹងអាចផ្លាស់ប្តូរកាន់តែប្រសើរឡើង។ តែទោះបីជាយ៉ាងនេះក៏ដោយ ក៏យើងមើលឃើញថា វាក៏បានផ្តល់ផលប៉ះពាល់មិនតិចដែរដល់មនុស្សលើពិភពលោក ជាពិសេសកុមារដែលកំពុងតែស្រូបយកព័ត៌មានគ្រប់យ៉ាងជារៀងរាល់ថ្ងៃ។

កុមារត្រូវបានគេរកឃើញថា បានប្រើប្រាស់បណ្តាញបច្ចេកវិទ្យា និងប្រព័ន្ធផ្សព្វផ្សាយច្រើនឡើងៗពីមួយថ្ងៃទៅមួយថ្ងៃ ហើយចរន្តនេះយើងឃើញថា កុមារមានរយៈពេលវែងខ្លាំងក្នុងការប្រើប្រាស់បណ្តាញបច្ចេកវិទ្យា។ យោងតាមការស្រាវជ្រាវរបស់ស្ថាប័នស្រាវជ្រាវ (AAP: American Academy of Pediatrics) បាន បញ្ជាក់ថាកុមារបានចំណាយពេលវេលាជាមធ្យម 7ម៉ោងក្នុងមួយថ្ងៃ នៅពីមុខអេក្រង់កុំព្យូទ័រ និងឧបករណ៍អេឡិចត្រូនិកដែលគេប្រើប្រាស់ ដោយក្នុងនោះរួមទាំងទូរទស្សន៍ផងដែរ។

រយៈពេលនេះ គឺវែងជាងរយៈពេលដែលពួកគេចំណាយពេលវេលានៅក្នុងសាលា និងរស់នៅជាមួយអាណាព្យាបាលទៅទៀត ដែលចំណុចនេះអាចជាកត្តាប្រឈមសំខាន់មួយដែលអាណាព្យាបាលទាំងអស់លើពិភពលោកគួរយកចិត្តទុកដាក់។

ពិភពលោកនៅក្នុងសម័យឌីជីថលនេះ ត្រូវបានគេរកឃើញថា មនុស្សមានពេលវេលាក្នុងការរៀន និងកម្សាន្តច្រើន តែទោះបីជាយ៉ាងនេះក៏ដោយ ក៏កុមារនៅក្នុងពិភពលោកមានហានិភ័យច្រើនដែលត្រូវប្រឈម ដូចជាការសម្លុតគំរាមតាមអីុនធើណិត (cyberbullying) ការញៀនជាមួយនឹងបច្ចេកវិទ្យា (technology addiction) រឿងអាសអាភាស (obscene) រូបភាពហិង្សា ការលួចទិន្នន័យ និងគម្រោងការឧក្រិដ្ឋកម្មជាដើម។ បញ្ហាមួយទៀត គឺរឿងរ៉ាវកុហក ឬព័ត៌មានមិនពិតក៏បានកើនឡើង ហើយវាបានក្លាយទៅជារឿងធម្មតានៃពិភពលោកក្នុងសម័យឌីជីថល ស្របពេលដែលអភិបាលកិច្ចអីុនធើណិត ឬប្រព័ន្ធការគ្រប់គ្រងហានិភ័យលើបណ្តាញអីុនធើណិតចំពោះកុមារមានសភាពទន់ខ្សោយ និងមានប្រសិទ្ធភាពទាប។

ការស្រាវជ្រាវដដែលបានរកឃើញថា បច្ចេកវិទ្យាក៏បានបង្កើតគម្លាតយ៉ាងធំរវាងអាណាព្យាបាល អ្នកអប់រំ និងមនុស្សវ័យកណ្តាល ជាមួយកុមារ ព្រោះពួកគេរស់នៅក្នុងពិភពនៃបច្ចេកវិទ្យាមិនដូចគ្នា។ ទាំងនេះអាចនឹងក្លាយជាហានិភ័យមួយក្នុងការអប់រំ ខណៈកុមារជំនាន់ថ្មីទាំងអស់នោះទទួលគំនិតច្រើនពីប្រភពចម្រុះទាំងវិជ្ជមាន និងអវិជ្ជមាន ដែលមនុស្សធំមិនដឹង។ ហេតុនេះដើម្បីធានាពីសុវត្ថិភាពរបស់កូនៗជាទីស្រឡាញ់ ឪពុកម្តាយគួរបង្រៀនកូនពីមេរៀនសំខាន់ៗមួយចំនួនដើម្បីជាប្រភពចំណេះដឹងសម្រាប់គេ ក្នុងការការពារខ្លួនពីគុណវិបត្តិនៃពិភពបច្ចេកវិទ្យា។

កំណត់អត្តសញ្ញាណឌីជីថល (Digital identity)

ចំណុចនេះគឺចង់សំដៅលើសមត្ថភាពក្នុងការបង្កើត និងគ្រប់គ្រងអត្តសញ្ញាណនៅលើអនឡាញផ្ទាល់ខ្លួន និងពិនិត្យមើលពីអត្តសញ្ញាណរបស់អ្នកដទៃ។ ចំណុចនេះជួយឱ្យយើងគ្រប់គ្រងបាននូវសុវត្ថិភាពផ្ទាល់ខ្លួន និងទប់ស្កាត់ផលប៉ះពាល់បានព្រោះយើងអាចពិចារណាពីប្រភពនៃបុគ្គលដែលចែកចាយព័ត៌មាន រួមទាំងគោលបំណងរបស់គេបានល្អ។

ការប្រើប្រាស់ឌីជីថល (Digital Use)

សំដៅលើសមត្ថភាពក្នុងការប្រើប្រាស់ឧបករណ៍ឌីជីថល និងប្រព័ន្ធផ្សព្វផ្សាយ ដោយរាប់បញ្ចូលទាំងចំណេះដឹងក្នុងការរក្សាតុល្យភាពដើម្បីរក្សាផាសុកភាពនៃការប្រើប្រាស់បណ្តាញអនឡាញ និងជីវិតជាក់ស្តែង (offline)។ ចំណេះដឹងដែលគួរចេះមានដូចជា ការគ្រប់គ្រងពេលវេលានៅមុខស្គ្រីនសុខភាពឌីជីថល (digital health) និងការចូលរួមក្នុងសហគមន៍ (community participation)។

សុវត្ថិភាពឌីជីថល (Digital Safety)

ជាសមត្ថភាពក្នុងការគ្រប់គ្រងហានិភ័យអនឡាញដូចជា ការបញ្ចៀសខ្លួនពីរូបភាពអាសអាភាស រូបភាពអំពើហិង្សា ក្រុមផ្សព្វផ្សាយការចាប់ជំរិត ឬអ្វីដែលអាចប៉ះពាល់ដល់ស្មារតីជាដើម។

សន្តិសុខឌីជីថល (Digital Security)

ជាសមត្ថភាពក្នុងការការពារខ្លួនពីការលួចទិន្នន័យពីអ្នកដទៃ។ អាណាព្យាបាលគួរព្យាយាមស្វែងយល់ និងបង្រៀនកូនពីការអនុវត្តនានាដើម្បីទប់ស្កាត់ការលួចចូលគណនីផ្ទាល់ខ្លួន (hacking) និងការយល់ដឹងពីវិធីសាស្ត្រនានាលើមុខងារសុវត្ថិភាពនៃបណ្តាញសង្គមដែលខ្លួនកំពុងប្រើប្រាស់ដើម្បីរក្សាទិន្នន័យសម្ងាត់មួយចំនួន។

ភាពវៃឆ្លាតនៃការប្រើប្រាស់ឌីជីថល (Digital Emotional Intelligence)

ជាសមត្ថភាពក្នុងការស្វែងរកសេចក្តីសុខ ឬភាពរីកចម្រើន និងបង្កើនគុណភាពជីវិតតាមរយៈបណ្តាញអនឡាញ។

ការទំនាក់ទំនងដោយប្រើប្រាស់បណ្តាញឌីជីថល (Digital Literacy)

ជាសមត្ថភាពក្នុងការទាក់ទង និងរាប់អានមនុស្សដែលមានសមត្ថភាពដទៃទៀតតាមបណ្តាញឌីជីថល និងតាមរយៈប្រព័ន្ធផ្សព្វផ្សាយទំនើប។

អក្ខរកម្មឌីជីថល (Digital Literacy)

ជាសមត្ថភាពក្នុងការស្វែងរក វាយតម្លៃ ការទាញប្រយោជន៍ពីអត្ថបទល្អៗ និងចែករំលែកអត្ថបទ ឬចំណេះដឹងសំខាន់ៗដើម្បីបង្កើនសមត្ថភាពក្នុងការគិតដល់មនុស្សទូទៅដែលមានទំនាក់ទំនងល្អជា-មួយយើង។

សិទ្ធិឌីជីថល (Digital Rights)

ជាសមត្ថភាពក្នុងការយល់ដឹងពី សិទ្ធិ និងច្បាប់ទូទៅរបស់មនុស្ស ដូចជាសិទ្ធិបុគ្គល (សិទ្ធិក្នុងការរក្សាភាពសម្ងាត់ និងសេចក្តីថ្លៃថ្នូររបស់បុគ្គល) សិទ្ធិកម្មសិទ្ធិបញ្ញា សិទ្ធិក្នុងការបញ្ចេញមតិ និងការការពារខ្លួនពីសកម្មភាពមួយចំនួនដែលបណ្តាលឱ្យមានភាពស្អប់ខ្ពើមពីសង្គម៕

May 24, 2018

ញ៉ាំត្រី ជួយដល់រឿង IQ និងការគេងលក់របស់កុមារ

លទ្ធផលនៃការសិក្សាស្រាវជ្រាវមួយបានរកឃើញថា ក្មេងដែលបានញ៉ាំត្រីយ៉ាងតិចមួយអាទិត្យ 1ដង ឬច្រើនជាងនេះ នឹងធ្វើឱ្យការគេងល្អប្រសើរឡើង ហើយលទ្ធផលសាកល្បងកម្រិតប្រាជ្ញាស្ថិតក្នុងលំដាប់ដែលល្អជាងក្មេងដែលមិនបានញ៉ាំត្រី ឬញ៉ាំតិចជាងមួយសប្ដាហ៍មួយដង។

គេហទំព័រ CNN បាននាំយករបាយការណ៍មួយដែលបានទទួលការបោះពុម្ពផ្សាយនៅក្នុង The Journal Scientific Report ពាក់ព័ន្ធនឹងលទ្ធផលនៃការសិក្សាស្រាវជ្រាវដែលបានបង្ហាញឱ្យឃើញថា អាស៊ីតខ្លាញ់អូមេហ្កា3ដែលគេឃើញមាននៅក្នុងសាច់ត្រីជាច្រើនប្រភេទ ដូចជា ត្រីសាល់ម៉ុន ត្រីសារឌីន និងត្រីប្លាធូ មានចំណែកជួយធ្វើឱ្យកម្រិតភាពឆ្លាតវៃ និងការគេងលក់របស់កុមារល្អប្រសើរឡើង។

តាមរយៈការសិក្សាស្រាវជ្រាវទៅលើកុមារជនជាតិចិនច្រើនជាង 500នាក់ដែលមានអាយុអំឡុងពី 9-11ឆ្នាំជាមួយនឹងសំណួរថា តើពួកគេញ៉ាំត្រីចំនួនប៉ុន្មានដងក្នុងមួយខែកន្លងមក ជាមួយនឹងចម្លើយឱ្យជ្រើសរើសគឺ “មិនដែលសោះ” និង “យ៉ាងតិចមួយអាទិត្យ 1ដង”។

ក្នុងក្រុមកុមារដែលឆ្លើយថា ញ៉ាំត្រីរៀងរាល់សប្ដាហ៍មានពិន្ទុវាស់ IQ 4.8 ខ្ពស់ជាងកុមារដែលឆ្លើយថា មិនញ៉ាំត្រីសោះ ឬញ៉ាំដែរ តែញ៉ាំតិច។ ដោយក្រុមអ្នកស្រាវជ្រាវមិនបានសួរក្មេងៗថា តើត្រីប្រភេទណាដែលពួកគេបានញ៉ាំនោះឡើយ ក្នុងខណៈក្រុមដែលឆ្លើយថា ញ៉ាំត្រីដែរ តែញ៉ាំមិនញឹកញាប់មានពិន្ទុ IQ 3.3។

ចំណែកចម្លើយពីក្រុមគ្រួសារក្មេងៗពាក់ព័ន្ធនឹងគុណភាពការគេងវិញ បានរកឃើញថា ក្មេងដែលបានញ៉ាំត្រីជាប្រចាំ ច្រើនមានគុណភាពនៃការគេងល្អប្រសើរជាង ព្រោះគ្មានរឿងមករុកកួនរំខានក្នុងអំឡុងពេលគេងលក់ឡើយ។ ក្នុងចំណុចល្អដែលកើតឡើងនេះ ធ្វើឱ្យក្រុមអ្នកវិភាគណែនាំទៅឪពុកម្ដាយ អ្នកអាណាព្យាបាលឱ្យបន្ថែមសាច់ត្រីចូលទៅក្នុងមុខម្ហូបរបស់កុមារ និងបង្ហាត់ឱ្យកុមារចេះញ៉ាំត្រីតាំងពីអាយុ2ឆ្នាំឡើងទៅ។

ត្រីជាសត្វដែលមានគុណតម្លៃខាងភោជនាហារខ្ពស់ និងជាអាហារមួយក្នុងចំណោមអាហារដ៏ពេញនិយម ព្រោះនៅក្នុងសាច់ត្រីមានប្រូតេអុីនដែលល្អ និងសម្បូរទៅដោយខ្លាញ់ល្អ ស័ក្តិសមសម្រាប់អ្នកដែលកំពុងស្ថិតក្នុងអំឡុងពេលបញ្ចុះទម្ងន់ ហើយត្រីប្រភេទខ្លះថែមទាំងមានអូមេហ្កា3 ដែលជាអាស៊ីតខ្លាញ់ល្អដែលជួយបង្កើនសុខភាពបេះដូង និងសរសៃឈាម ដែលគេប្រទះឃើញមានច្រើននៅក្នុងត្រីសាល់-ម៉ុន ជាពិសេសត្រីសាល់ម៉ុនដែលរស់នៅតាមធម្មជាតិនឹងមានវីតាមីន និងសារធាតុរ៉ែខ្ពស់ណាស់៕

May 24, 2018

ធ្លាយដំណឹង ភរិយាលោក ឆាយ វិរៈយុទ្ធ កំពុងតាំងគភ៌

មួយរយៈចុងក្រោយនេះ គេសង្កេតឃើញកំពូលតារាចម្រៀងឯកប្រុសនៅក្នុងផលិតកម្មសាន់ដេ លោក ឆាយ វិរៈយុទ្ធ បង្ហាញពីភាពស្និទ្ធស្នាលផ្អែមល្ហែម យកចិត្តទុកដាក់ចំពោះភរិយាលោកជាខ្លាំង ជាពិសេសជាងនេះទៅទៀត លោកបានដកឃ្លាពីសិល្បៈមួយរយៈ ដោយកាលពីវិស្សមកាលចុងឆ្នាំកន្លងទៅ លោកបាននាំភរិយាសំណព្វចិត្តធ្វើដំណើរកម្សាន្ដទៅកាន់ប្រទេសជប៉ុន ហើយបានបង្ហោះរូបភាពជាច្រើនសន្លឹកឱ្យមហាជនបានមើលឃើញពីសកម្មភាពស្វ៊ីតៗ ថែមទៀតផង ( សង្ស័យទៅ Honey Moon ហើយមើលទៅ កាលហ្នុង..)។

ប្រភពស្និទស្នាលនឹងគ្រួសាររបស់តារាចម្រៀងប្រុសរូបនេះ បានបង្ហើបដំណឹងល្អមួយប្រាប់អ្នកសារព័ត៌មាន ឡារ៉ែនថា ភរិយាបណ្ដូលចិត្តរបស់លោក ឆាយ វិរៈយុទ្ធពេលនេះកំពុងឃ្លានម្ជូរណាស់ ពោលគឺកំពុងតែតាំងគភ៌ហ្នឹងឯង។ ការទម្លាយដំណឹងល្អនេះ ពិតជាធ្វើឱ្យមហាជនអ្នកគាំទ្រមានក្ដីរំភើបជំនួសលោកពិតមែន ព្រោះកន្លងមកលោកធ្លាប់បង្ហើបប្រាប់ថា លោកចង់បានបុត្រស្នងត្រកូល ហើយកាន់តែឆាប់ គឺកាន់តែល្អ តែពេលនេះឆាយ វិរៈយុទ្ធ ពិតបានសមដូចក្ដីប្រាថ្នាហើយ នៅតែមិនទាន់ដឹងថាជាប្រុស ឬក៏ស្រីតែប៉ុណ្ណឹងឯង។

គួរបញ្ជាក់ផងដែរថា បន្ទាប់ពីបានសាងស្ពានរួមមេត្រីជាមួយភរិយាអស់រយៈពេលមួយឆ្នាំរួចមក តារាប្រុសសំឡេងខ្លាំងរូបនេះបានតាំងក្ដីរំពឹងទុកថា លោកចង់បានបុត្រច្រើន ហើយបើពិតជាមានដំណឹងល្អសម្រាប់លោកមែននោះ លោកពិតជាប្រាថ្នាចង់បានបុត្រភ្លោះខ្លាំងណាស់ ។

មើលទៅ ឆាយ វិរៈយុទ្ធ ហាក់ដូចជាស្រឡាញ់ក្មេងៗខ្លាំងណាស់ ដូច្នេះអ្នកគាំទ្រទាំងឡាយសូមជូនពរឱ្យលោក បានបុត្រភ្លោះសមដូចប្រាថ្នាតែម្ដងទៅចុះ…(សាធុ!)៕

May 24, 2018

អ្នកនាង កែវ ស្រីនាង ស្លេកស្លាំងដោយសារជំងឺឈាមស ស៊ីឈាមក្រហម

មួយរយៈចុងក្រោយនេះ អ្នកគាំទ្រកត់សម្គាល់ឃើញថា តារាសម្ដែងជើងចាស់ អ្នកនាង កែវ ស្រីនាង បានប្រែប្រួលរូបសម្រស់ខុសប្លែកជាងមុន ដោយសារតែមើលទៅឃើញមានទឹកមុខស្លេកស្លាំង ហើយថែមទាំងធ្លាក់សម្រស់ជាងមុន និងមិនសូវមានកម្លាំងកំហែងដូចមុនឡើយ។ អ្នកនាងធ្លាប់បានបង្ហើបប្រាប់អ្នកសិល្បៈដូចគ្នាថា ហេតុផលដែលអ្នកនាងកាត់សក់ខ្លី និងមានទឹកមុខស្លេកស្លាំងជាងមុននេះ គឺបណ្ដាលមកពីអ្នកនាងឈឺច្រើនពេក ព្រោះតែជំងឺឈាមស ស៊ីឈាមក្រហមវាធ្វើទុក្ខហ្នឹងឯង។ អ្នកនាងថែមទាំងបានបង្ហើបប្រាប់ទៀតថា ចំណាយអស់រាប់ម៉ឺនដុល្លារ ទៅព្យាបាលនៅក្រៅប្រទេស តែមិនមានលទ្ធផលល្អឡើងសោះ។

គួររំឭកផងដែរថា កាលពីថ្ងៃសម្ពោធរឿង «កាំបិតមុខ២» ដែលអ្នកនាងបានសម្ដែងជាតួឯកស្រី ជាមួយលោក អូន ឧស្សាហ៍ ជារឿងភាគរបស់ស្ថានីយទូរទស្សន៍ PNN កន្លងទៅ អ្នកនាងបានប្រាប់អ្នកសារព័ត៌មានថា ជំងឺឈាមស ស៊ីឈាមក្រហមរបស់អ្នកនាង ពិតជាធ្វើទុក្ខខ្លាំងមែន ប៉ុន្តែមិនដល់ថ្នាក់ធ្វើឱ្យអ្នកនាងពិបាកទ្រាំនោះទេ គឺធ្វើទុក្ខដោយសារតែអ្នកនាងប្រឹងប្រែងធ្វើការលើសកម្រិត ហើយសម្រាកមិនបានប៉ុណ្ណោះ។ អ្នកនាងបញ្ជាក់ថា ជំងឺមួយនេះ ពិតជារុករានសេចក្ដីសុខរបស់អ្នកនាងមែន គឺឱ្យតែពេលណាដែលអ្នកនាងធ្វើការលើសកម្រិត ឬលេបថ្នាំមិនទៀងទាត់ គឺវាធ្វើឱ្យអ្នកនាងទទួលរងការធ្វើទុក្ខខ្លាំងតែម្ដង។

អ្នកនាង បានបញ្ជាក់ដែរថា គ្រូពេទ្យហាមមិនឱ្យអ្នកនាងធ្វើការលើសពីកម្លាំងដែលខ្លួនឯងមាននោះទេ និងត្រូវសម្រាកឱ្យបានច្រើន ក៏ប៉ុន្ដែអ្នកនាងមិនចង់បាត់បង់ឱកាសសម្ដែងរឿងភាគឱ្យ PNN ទើបបានជាអ្នកនាងសម្រេចយកជំនួយការតាមខ្លួន ដើម្បីដាស់តឿនអ្នកនាងឱ្យពិសាថ្នាំតាមការកំណត់។ អ្នកនាងបានបង្ហាញពីការត្អូញត្អែរ ជុំវិញជំងឺរបស់ខ្លួនដែលមើលមិនជានេះ ដោយបង្ហើបប្រាប់ថា បានចេញទៅព្យាបាលនៅក្រៅប្រទេសច្រើនលើកច្រើនសា និងចំណាយអស់ប្រាក់ច្រើនសន្ធឹកមកហើយ ប៉ុន្តែលទ្ធផលនៅតែបានត្រឹមតែលេបថ្នាំជាប្រចាំ ដើម្បីទប់សភាពជំងឺកុំឱ្យទ្រុឌទ្រោមទៅវិញតែប៉ុណ្ណោះ៕

May 24, 2018

បរិយាប័ន្នហិរញ្ញវត្ថុនឹងធ្វើឱ្យប្រជាពលរដ្ឋក្រីក្រទទួលបានសេវាហិរញ្ញវត្ថុតម្លៃសមរម្យ និងត្រឹមត្រូវ

ក្នុងគោលបំណងលើកកម្ពស់បរិយាប័ន្នហិរញ្ញវត្ថុនៅកម្ពុជា ធនាគារជាតិនៃកម្ពុជា (NBC) និងសហព័ន្ធបរិយាប័ន្នហិរញ្ញវត្ថុ ហៅកាត់ថា (AFI) បានរៀបចំកិច្ចពិភាក្សាមួយឡើងដើម្បីរៀបចំគោលនយោបាយ និងដាក់ចេញនូវវិធីសាស្ត្រធ្វើយ៉ាងណាឱ្យពលរដ្ឋក្រីក្រអាចទទួលបានសេវាហិរញ្ញវត្ថុមានតម្លៃសមរម្យឱ្យបានគ្រប់គ្នាដោយមានកិច្ចការពារពីគ្រឹះស្ថានមីក្រូហិរញ្ញវត្ថុដែលមានអាជ្ញាប័ណ្ណត្រឹមត្រូវ។

លោក រ័ត្ន សុវណ្ណនរៈ អគ្គនាយកត្រួតពិនិត្យនៃធនាគារជាតិនៃកម្ពុជាបានឱ្យដឹងថា កិច្ចពិភាក្សានេះធ្វើឡើងក្នុងគោលបំណងដាក់ចេញវិធីសាស្ត្រដើម្បីបែងចែកសេវាកម្មហិរញ្ញវត្ថុឱ្យដល់ដៃប្រជាពលរដ្ឋគ្រប់មជ្ឈដ្ឋាន និងបានប្រើប្រាស់សេវាហិរញ្ញវត្ថុផ្លូវការដែលមានតម្លៃសមរម្យដែលមានកិច្ចការពារពីគ្រឹះស្ថានមីក្រូហិរញ្ញវត្ថុដែលមានអាជ្ញាប័ណ្ណត្រឹមត្រូវ។

លោកថ្លែងថា៖ “ការផ្ដល់សេវាហិរញ្ញវត្ថុតម្លៃសមរម្យនេះ គឺមានអាទិភាពច្រើនសម្រាប់បងប្អូនប្រជាពលរដ្ឋក្រីក្រ ព្រោះអត្រាការប្រាក់ និងថ្លៃសេវារដ្ឋបាលនានាទាបបំផុត ព្រមទាំងមានការគាំពារពីគ្រឹះស្ថានមីក្រូហិរញ្ញវត្ថុដែលមានអាជ្ញាប័ណ្ណត្រឹមត្រូវពី NBC ទៀតផង។ ជាទិសដៅ នៅពេលបច្ចុប្បន្ននេះ យើងកំពុងរៀបចំយុទ្ធសាស្ត្របរិយាប័ន្នហិរញ្ញវត្ថុនេះ ដែលក្នុងនោះយើងមានជាគោលនយោបាយ និងវិធីសាស្ត្រផ្សេងៗដើម្បីជំរុញឱ្យកម្រិតនៃបរិយាប័ន្នហិរញ្ញវត្ថុដែលនៅពេលយើងដាក់ចេញទៅមានភាពល្អប្រសើរឡើងថែមទៀតនាពេលខាងមុខ។

លោកអគ្គនាយកបន្ដថា៖ “កន្លងមក ធនាគារជាតិនៃកម្ពុជាបានសហការជាមួយអង្គការដៃគូធ្វើការសិក្សាលើកាប្រើប្រាស់សេវាហិរញ្ញវត្ថុរបស់ប្រជាពលរដ្ឋ ហើយទទួលបានលទ្ធផលថា 71%នៃចំនួនពលរដ្ឋពេញវ័យសរុប ទទួលបានការប្រើប្រាស់សេវាហិរញ្ញវត្ថុ។ អ៊ីចឹង ពីមុនមកកម្រិតបរិយាប័ន្នហិរញ្ញវត្ថុយើងនៅទាប តែមកដល់ឆ្នាំ2015 ឃើញថាមានការកើនឡើង។ លោកបញ្ជាក់ថា “បរិយាប័ន្នហិរញ្ញវត្ថុ មានន័យថា ធ្វើយ៉ាងណាជួយឱ្យប្រជាពលរដ្ឋដែលមិនទាន់ទទួលបានសេវាកម្មហិរញ្ញវត្ថុ បានប្រើប្រាស់សេវាហ្នឹង ដូចជាសេវាប្រាក់កម្ចី ការដាក់ប្រាក់បញ្ញើ និងការផ្ទេរប្រាក់ ជាដើម ឱ្យគាត់មានលទ្ធភាពប្រើប្រាស់សេវាទាំងនេះបានគ្រប់គ្នា។

អ្នកជំនាញសេដ្ឋកិច្ចបានពន្យល់ថា បរិយាប័ន្នហិរញ្ញវត្ថុ គឺការចូលរួមពីពលរដ្ឋគ្រប់ស្រទាប់វណ្ណៈដោយពួកគាត់ចេះធ្វើផែនការចំណូល-ចំណាយ ចេះធ្វើរបាយការណ៍ ចេះធ្វើបទដ្ឋានស្នើសុំទៅធនាគារ។ល។ ដូច្នេះគេចង់ឱ្យមានការបណ្តុះបណ្តាលប្រជាជនថ្នាក់ក្រោម ថ្នាក់មូលដ្ឋានឱ្យចេះរៀបចំបទដ្ឋាន និងផែនការហិរញ្ញវត្ថុដោយខ្លួនឯង។ គោលបំណងនៃការជំរុញរបស់ NBC និងAFI នៅក្នុងប្រទេសយើង វាអាចស្ថិតនៅត្រង់បញ្ហានៃការយល់ដឹងរបស់ប្រជាពលរដ្ឋនៅមានកម្រិត សូម្បីតែសហគ្រាសធុនតូច និងមធ្យមខ្លះក៏មិនទាន់មានការយល់ដឹងពីបច្ចុប្បន្នភាព និងកាតព្វកិច្ចនៃការធ្វើបញ្ជីស្នាមរបស់ខ្លួនស្រួលបួលនៅឡើយផង។ នៅពេលដែលគេរកឯកសារចំណូល-ចំណាយ គឺពុំមានបញ្ជីជាក់លាក់ ពុំមានគណនេយ្យភាពច្បាស់លាស់ទេ ព្រោះពួកគេធ្លាប់តែរកស៊ីបែបជាលក្ខណៈគ្រួសារ(ការដកហូតយកចំណាយដោយគ្មានការកត់ត្រាទុក)ដែលនេះជាទម្លាប់របស់យើងពីមុនមក។

សូមបញ្ជាក់ថា ដើម្បីរៀបចំគោលនយោបាយនានាពាក់ព័ន្ធនឹងការលើកកម្ពស់បរិយាប័ន្នហិរញ្ញវត្ថុនេះ ត្រូវលើកស្ទួយ និងធ្វើឱ្យប្រជាពលរដ្ឋដែលរស់នៅតាមជនបទយល់ដឹងពីសេវាហិរញ្ញវត្ថុ និងមានលទ្ធភាពអាចទទួលបាន និងប្រើប្រាស់សេវាហិរញ្ញវត្ថុដែលផ្លូវការ។ កិច្ចប្រជុំស្តីពីការរៀបចំគោលនយោបាយ និងក្របខ័ណ្ឌបទប្បញ្ញត្តិពាក់ព័ន្ធនឹងបរិយាប័ន្នហិរញ្ញវត្ថុ ត្រូវបានធ្វើឡើងដោយមានការចូលរួមពីអ្នករៀបចំគោលនយោបាយ បញ្ញត្តិករ មន្ត្រីត្រួតពិនិត្យ និងភាគីពាក់ព័ន្ធ ដូចជាស្ថាប័ននានារបស់អង្គការសហប្រជាជាតិ និងស្ថាប័នស្រាវជ្រាវអន្តរជាតិជាដើម និងមានអ្នកចូលរួមសរុបប្រមាណ 90រូបមកពីធនាគារកណ្តាល ក្រសួងសេដ្ឋកិច្ច និងហិរញ្ញវត្ថុ និងអាជ្ញាធរត្រួតពិនិត្យមកពីប្រទេសចំនួន43 ដែលជាសមាជិករបស់សហព័ន្ធAFI។

ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជាមានប្រសាសន៍ពីគោលនយោបាយនេះថា៖ “ការធ្វើបរិយាប័ន្នហិរញ្ញវត្ថុនេះមានសារៈសំខាន់និងជាទិសដៅមួយ ហើយការលើកកម្ពស់បរិយាប័ន្នហិរញ្ញវត្ថុជាការជំរុញឱ្យប្រជាពលរដ្ឋនៅតាមជនបទអាចទទួលបាន និងប្រើប្រាស់សេវាហិរញ្ញវត្ថុផ្លូវការនេះបានរួមចំណែកយ៉ាងច្រើនដល់ការជំរុញកំណើនសេដ្ឋកិច្ច និងពង្រឹងស្ថិរភាពហិរញ្ញវត្ថុគ្រួសារ។ បច្ចុប្បន្ន បច្ចេកវិទ្យាហិរញ្ញវត្ថុមានការរីកចម្រើនយ៉ាងខ្លាំង និងមានតួនាទីសំខាន់ក្នុងការលើកកម្ពស់ការទទួលបាន និងការប្រើប្រាស់សេវាហិរញ្ញវត្ថុឱ្យប្រកបដោយគុណភាព តម្លៃសមស្រប និងត្រឹមត្រូវផ្លូវការ។

លោកបានបន្តថា ទោះយ៉ាងណា អ្នករៀបចំគោលនយោបាយ និងបញ្ញត្តិករត្រូវមានភាពសកម្មក្នុងការស្វែងយល់ពីហានិភ័យពាក់ព័ន្ធនានា។ ធនាគារជាតិនៃកម្ពុជា សហការជាមួយក្រសួង-ស្ថាប័ននានាកំពុងរៀបចំសេចក្តីព្រាងស្តីពីយុទ្ធសាស្ត្រជាតិសម្រាប់បរិយាប័ន្នហិរញ្ញវត្ថុដោយគ្រោងនឹងបញ្ចប់រួចរាល់ក្នុងឆ្នាំ2018នេះ។

សូមបញ្ជាក់ថា បើតាមរយៈលទ្ធផលនៃការអង្កេតស្រាវជ្រាវរបស់ FinScope កាលពីឆ្នាំ2015 បានបង្ហាញថា 59% នៃចំនួនសរុបរបស់ប្រជាពលរដ្ឋដែលពេញវ័យ មានលទ្ធភាព និងកំពុងប្រើប្រាស់សេវាហិរញ្ញវត្ថុផ្លូវការ ចំណែកឯ 12%ទៀតបានប្រើប្រាស់សេវាហិរញ្ញវត្ថុមិនផ្លូវការ និង29%ទៀតពុំទាន់បានប្រើប្រាស់សេវាហិរញ្ញវត្ថុនៅឡើយទេ។

អ្នកជំនាញសេដ្ឋកិច្ចក៏បានបង្ហាញដែរថា នេះជាគោលការណ៍រដ្ឋាភិបាលខាងផ្នែកហិរញ្ញវត្ថុដែលចង់ឱ្យពលរដ្ឋមានការចាយវាយហិរញ្ញវត្ថុរបស់ខ្លួនយ៉ាងត្រឹមត្រូវទៅតាមច្បាប់ និងឱ្យមានតម្លាភាព។ ទី1 គឺឱ្យក្រុមហ៊ុន ឬពលរដ្ឋអាចខ្ចីប្រាក់ពីធនាគារដោយមានបញ្ជីស្នាមត្រឹមត្រូវ ហើយបើយើងមានចរន្តគណនេយ្យថវិកាច្បាស់លាស់ ពេលយើងត្រូវការពង្រីកទុនថែមតាមរយៈការខ្ចីបុលពីធនាគារ គេងាយស្រួលនឹងឱ្យយើង។ ចំណុចទី1នេះ វាអាចនឹងចំណេញទាំងសងខាង ព្រោះអ្នករកស៊ីគេមើលឃើញពីការចំណេញប្រសិនបើគេបានទុនបន្ថែមមករកស៊ី គេនឹងបានចំណេញច្រើនជាងមុន ទោះបីត្រូវដកការប្រាក់សម្រាប់ទុនបន្ថែមដែលបានខ្ចីមកក៏ដោយ។ ទី2 យើងមានលក្ខណៈល្អប្រសើរក្នុងការពង្រឹងឱ្យមានគណនេយ្យភាពច្បាស់លាស់ ហើយយើងអាចធ្វើការប្រកួតប្រជែងជាមួយក្រុមហ៊ុនបរទេសដែលគេមកបណ្តាក់ទុនរកស៊ីក្នុងនាមជាប្រទេសសមាជិកអាស៊ានបាន និងយើងក៏អាចទៅរកស៊ីនៅប្រទេសគេបានដែរ ព្រោះយើងក៏ជាប្រទេសសមាជិកអាស៊ានដែរ។

ដូច្នេះវាដល់ពេលដែលយើងត្រូវធ្វើឱ្យប្រាកដនូវលិខិតបទដ្ឋានឱ្យមានលក្ខណៈច្បាស់លាស់ដែលត្រូវចាប់ផ្តើមពីថ្នាក់ក្រោមទៅ ហើយការដែលធ្វើគោលនយោបាយជំរុញឱ្យមានបរិយាប័ន្នហិរញ្ញវត្ថុដល់ប្រជាពលរដ្ឋថ្នាក់ក្រោមនេះ អ្នកជំនាញយល់ថា នឹងអាចទៅរួច តែស្ថិតក្នុងជំហានៗជាបណ្តើរៗ តែបើចង់ឱ្យដូចប្រទេសជិតខាងយើងតែម្ដង នឹងមិនទាន់ទៅរួចទេ ពីព្រោះការយល់ដឹងរបស់ពលរដ្ឋថ្នាក់ក្រោមរបស់យើងនៅមានកម្រិត។

ប៉ុន្តែបើតាមការផ្តល់សម្ភាសរបស់លោក ឈុន កុសល ប្រធានផ្នែកផ្សព្វផ្សាយរបស់គ្រឺះស្ថានមីក្រូហិរញ្ញវត្ថុ AMK បានឱ្យដឹងថា យោងតាមគោលនយោបាយនេះយើងបាននិងកំពុងធ្វើការជាមួយប្រជាពលរដ្ឋក្រីក្រនៅក្នុងប្រទេសកម្ពុជាយើងហើយដូច្នេះសង្ឃឹមថាការជំរុញឱ្យពលរដ្ឋក្រីក្រអាចទទួលបានសេវាហិរញ្ញវត្ថុមានតម្លៃសមរម្យ និងប្រើប្រាស់ឱ្យបានគ្រប់គ្នានឺងអាចមានដំណើការទៅមុខដោយរលូន ព្រោះយើងបានធ្វើការបណ្តុះបណ្តាលផងដែរទៅដល់ប្រជាពលរដ្ឋទាំងនោះឱ្យគាត់ពង្រឺងនូវការយល់ដឹងរបស់ពួកគាត់ មានន័យថា ធ្វើយ៉ាងណាជួយឱ្យប្រជាពលរដ្ឋដែលមិនទាន់ទទួលបានសេវាហិរញ្ញវត្ថុបានប្រើប្រាស់សេវានេះ ដូចជាប្រាក់កម្ចី បញ្ញើ និងការផ្ទេរប្រាក់ ជាដើម ឱ្យគាត់មានលទ្ធភាពប្រើប្រាស់សេវានេះបានគ្រប់គ្នាស្របទៅតាមគោលបំណងនៃលើកកម្ពស់បរិយាប័ន្នហិរញ្ញវត្ថុរបស់ធនាគារជាតិនៃកម្ពុជា និងសហព័ន្ធបរិយាប័ន្នហិរញ្ញវត្ថុ (AFI)ដែលបានដាក់ចេញនូវវិធីសាស្ត្រធ្វើយ៉ាងណាឱ្យពលរដ្ឋក្រីក្រអាចទទួលបានសេវាហិរញ្ញវត្ថុមានតម្លៃសមរម្យនោះ៕

May 24, 2018

សាមុត ស្រីកា ប្រកាសឈប់ច្រៀង ខណៈបទចម្រៀងរបស់នាងកំពុងស្ទុះឡើងខ្លាំង

នៅពេលថ្មីនេះៗ បទចម្រៀងរបស់តារាស្រីនៅក្នុងផលិតកម្ម WE Production កញ្ញា សាមុត ស្រីកា ដែលមានចំណងជើងថា «មនុស្សពិសេសមិនសូវសំខាន់» កំពុងទទួលបានការគាំទ្រយ៉ាងភ្លូកទឹកភ្លូកដី តែជាអកុសលតារាស្រីរូបនេះ បែរជាបង្ហើបប្រាប់មហាជននៅក្នុងលើបណ្ដាញទំនាក់ទំនងសង្គមហ្វេសប៊ុកថា នេះគឺជាបទចម្រៀងចុងក្រោយរបស់នាងទៅវិញ ធ្វើឱ្យអ្នកគាំទ្រទាំងអស់មានអារម្មណ៍សោកស្ដាយយ៉ាងខ្លាំង នៅពេលដឹងពីដំណឹងនេះ។

អ្នកគាំទ្រជាច្រើនបានបញ្ចេញមតិនៅក្រោមវីដេអូរបស់នាងថា ដោយសារតែរូបសម្រស់នាងមិនសូវស្អាតដូចតារាដទៃ ទើបផលិតកម្មមួយនេះទុកនាងចោល មិនសូវបញ្ចេញបទចម្រៀងឱ្យនាងឡើយ ហើយក៏មិនខ្វល់ពីសមត្ថភាពរបស់នាងដែរ។ យ៉ាងណាក៏ដោយ តារាស្រីវ័យក្មេង និងធ្លាប់មានភាពលេចធ្លោជាងគេតាមរយៈកម្មវិធីប្រឡងចម្រៀង The Voice Cambodia រដូវកាលទី 1 រូបនេះ បានបញ្ជាក់នៅលើបណ្ដាញហ្វេសប៊ុកខ្លួនថា នាងស្រឡាញ់បទចម្រៀងថ្មីមួយនេះខ្លាំងណាស់ តែនេះក៏បទចុងក្រោយរបស់នាងផងដែរ។ នាងសរសេរថា «”មនុស្សពិសេសមិនសូវសំខាន់” ស្រលាញ់បទនេះណាស់ ជាការនិពន្ធទំនុកច្រៀងដោយលោកគ្រូ Pechi និពន្ធបទភ្លេង និងសម្រួលតន្រ្តីដោយ លោកគ្រូ សាន់ សុវណ្ណឌីន ហើយក៏ជាបទចុងក្រោយរបស់នាងខ្ញុំផងដែរ»។

គួរកត់សម្គាល់ផងដែរថា ខណៈដែលបទចម្រៀង «មនុស្សពិសេសមិនសូវសំខាន់» បានបញ្ចេញនៅលើទំព័រផ្លូវការរបស់ផលិតកម្មរស្មីហង្សមាស ភ្លាមៗនោះមានបណ្ដាមិត្តភ័ក្ដិរបស់តារាស្រីរូបនេះបានស៊ែរបទចម្រៀងបន្តភ្លាមៗទៅឱ្យនាង តែនាងបានឆ្លើយតបប្រាប់ទៅពួកគេវិញថា «ឥឡូវឈប់ពីទីនោះហើយ» សបញ្ជាក់ឱ្យដឹងថា នាងពិតជាបានបញ្ចប់កុងត្រា 5ឆ្នាំជាមួយផលិតកម្ម WE Production ក៏ដូចជាក្រុមហ៊ុនផលិតកម្មរស្មីហង្សមាសប្រាកដមែន។

គួបញ្ជាក់ផងដែរថា ព័ត៌មានឈប់ច្រៀងរបស់តារាស្រីមួយនេះ ពិតជាធ្វើឱ្យអ្នកគាំទ្រសោកស្ដាយចំពោះរូបនាងយ៉ាងខ្លាំង និងមិនចង់ឱ្យនាងឈានជើងចេញពីវិថីសិល្បៈឡើយ ព្រោះថា នាងពិតជាមានសមត្ថភាពខាងចម្រៀងមិនធម្មតាទេ រហូតដល់គ្រូបង្វឹកម្នាក់នៅក្នុងចំណោមគ្រូបង្វឹក 4 រូប ក្នុងកម្មវិធី The Voice Cambodia រដូវកាលទី 1 បានលាន់មាត់ថា «សម្រាប់ខ្ញុំ ប្អូនស្រីមានសម្លេងធម្មជាតិល្អ ច្រៀងមិនប្រឹង មានទឹកដម មានមនោសញ្ចេតនា»៕

May 24, 2018

Iniesta ត្រូវបានរំពឹងថា នឹងទៅចូលរួមជាមួយក្លិបជប៉ុន Vissel Kobe នៅថ្ងៃនេះ

ខ្សែបម្រើជើងចាស់ Andres Iniesta បានបញ្ជាក់ថា រូបគេនឹងផ្ទេរទៅកាន់ប្រទេសជប៉ុន និងត្រូវបានរំពឹងទុកថា នឹងចុះហត្ថលេខាជាមួយនឹងក្លិប Vissel Kobe នៅថ្ងៃនេះ។

Iniesta វ័យ 34ឆ្នាំ បានលេងក្នុងការប្រកួតលើកទី674 របស់គេ និងជាលើកចុងក្រោយរបស់គេសម្រាប់ក្រុម Barcelona ម្ចាស់ជើងឯកក្របខ័ណ្ឌ La Liga កាលពីថ្ងៃអាទិត្យ ខណៈដែលពួកគេបានផ្តួលក្រុម Real Sociedad ក្នុងលទ្ធផល 1-០ ក្នុងការប្រកួតចុងក្រោយនៅរដូវកាលនេះ។ ខ្សែបម្រើសញ្ជាតិអេស្ប៉ាញរូបនេះ បានលើកពានក្របខ័ណ្ឌ La Liga និងបានថ្លែងសុន្ទរកថាពីមុខអ្នកគាំទ្ររបស់ខ្លួននាកីឡដ្ឋាន Nou Camp ក្រោយពីសំឡេងកញ្ចែបញ្ចប់ការប្រកួត។ Iniesta បានបញ្ជាក់នៅលើបណ្តាញសង្គម Twitter កាលពីល្ងាចថ្ងៃពុធ រួមជាមួយនឹងរូបថតនៅលើយន្តហោះមួយគ្រឿងជាមួយនឹងលោក Hiroshi Mikitani ប្រធានក្លិប Vissel Kobe ដោយសរសេរថា៖ «កំពុងតែធ្វើដំណើរទៅកាន់ផ្ទះថ្មីរបស់ខ្ញុំ ជាមួយនឹងមិត្តភ័ក្តិរបស់ខ្ញុំ»។ ក្លិប Vissel Kobe បានប្រកាសពីការរៀបចំសន្និសីទសារព័ត៌មានមួយនៅថ្ងៃព្រហស្បតិ៍នេះ ខណៈដែលក្លិបរបស់ក្របខ័ណ្ឌ J-League ត្រូវបានរំពឹងទុកថា នឹងប្រកាសពីការចុះហត្ថលេខាជាមួយនឹងខ្សែបម្រើរូបនេះ។ ពួកគេបានចុះហត្ថលេខាជាមួយនឹង Lukas Podolski សមាជិកឈ្នះពាន World Cup របស់អាល្លឺម៉ង់ កាលពីឆ្នាំ2017 ហើយបើយោងទៅតាមរបាយការណ៍ផ្សេងៗ ពីប្រទេសអេស្ប៉ាញ ក្លិប Vissel Kobe បានយកឈ្នះក្នុងការប្រជែងជាមួយនឹងក្របខ័ណ្ឌអូស្ត្រាលី A-League ដើម្បីចុះហត្ថលេខាជាមួយនឹង Iniesta។

អំឡុងរយៈពេល 16ឆ្នាំរបស់គេជាមួយនឹងក្លិប Barcelona ខ្សែបម្រើវ័យ 34ឆ្នាំរូបនេះ បានឈ្នះពាន La Liga 9លើក និងពាន Champions League 4លើក៕

ប្រភពពី៖ Sky Sports

May 24, 2018

Category: សង្គម និងសេដ្ឋកិច្ច