សង្គម និងសេដ្ឋកិច្ច - La Reine Media

Balotelli រកបានគ្រាប់បាល់ ខណៈលោក Mancini ឈ្នះថ្ងៃបើកឆាកជាមួយអ៊ីតាលី

ខ្សែប្រយុទ្ធ Mario Balotelli បានធ្វើឱ្យគ្រូបង្វឹកថ្មីរបស់ក្រុមជម្រើសជាតិអ៊ីតាលីលោក Roberto Mancini ចាប់ផ្តើមជាមួយនឹងជ័យជម្នះតាមរយៈការរកគ្រាប់បាល់បើកឆាកក្នុងពេលពួកគេទទួលជ័យជម្នះ 2-1 លើក្រុមបាល់ទាត់ជម្រើសជាតិអារ៉ាប៊ីសាអ៊ូឌីត ក្នុងការប្រកួតមិត្តភាពមុនយុទ្ធនាការ World Cup ក្នុងទីក្រុង Saint Gallen កាលពីថ្ងៃចន្ទ។

ក្រុមបាល់ទាត់ជម្រើសជាតិអារ៉ាប៊ីសាអ៊ូឌីត នឹងត្រូវប៉ះក្រុមម្ចាស់ផ្ទះរុស្ស៊ី ក្នុងការប្រកួតបើកឆាកនៃយុទ្ធនាការ World Cup នៅថ្ងៃទី14 ខែមិថុនា ស្របពេលដែលម្ចាស់ជើងឯកពិភពលោក 4សម័យកាល អ៊ីតាលី ត្រូវនៅផ្ទះ ក្រោយពីការបរាជ័យរបស់ពួកគេក្នុងការប្រកួតជម្រុះជាលើកទី1 ក្នុងរយៈពេល 60ឆ្នាំ។ ក្រោយពីបានបង្ហាញខ្លួនជាលើកចុងក្រោយសម្រាប់អ៊ីតាលី ក្នុងពេលពួកគេធ្លាក់ចេញត្រឹមជុំទី1 នៃយុទ្ធនាការ World Cup ឆ្នាំ2014 ការអវត្តមានរយៈពេល 4ឆ្នាំរបស់ Balotelli ពីក្រុមជម្រើសជាតិអ៊ីតាលី នៅពេលដែលរូបគេទទួលបានការកោះហៅពីលោក Mancini ដែលត្រូវបានតែងតាំងក្នុងរយៈពេល 6ខែ ក្រោយពីការធ្លាក់ចេញពីការប្រកួតជម្រុះដើម្បីទៅប្រទេសរុស្ស៊ី ដោយសារបរាជ័យក្នុងវគ្គ Playoff ក្រោមស្នាដៃក្រុមជម្រើសជាតិស៊ុយអែត។

វាបានធ្វើឱ្យខ្សែប្រយុទ្ធវ័យ 27ឆ្នាំរបស់ក្លិប Nice រូបនេះចូលលេងត្រឹមតែរយៈពេល 21នាទីប៉ុណ្ណោះ ដើម្បីរកគ្រាប់បាល់បញ្ចូលទីជាមួយនឹងគ្រាប់បាល់ទី1 របស់គេ សម្រាប់ក្រុមជម្រើសជាតិអ៊ីតាលី ចាប់តាំងពីរកគ្រាប់បាល់ឈ្នះនៅពេលប្រកួតជាមួយនឹងក្រុមជម្រើសជាតិអង់គ្លេស ក្នុងព្រឹត្តិការណ៍ World Cup ឆ្នាំ2014។ ក្រុមជម្រើសជាតិអ៊ីតាលី បានធ្លាក់ទៅកាន់ចំណាត់ថ្នាក់ដ៏ទាបបំផុតរបស់ខ្លួននៅលើតារាងពិភពលោក ដោយឈរលេខរៀងទី20 ប៉ុន្តែបានធ្វើការគ្រប់គ្រងទាំងស្រុងលើក្រុមអារ៉ាប៊ីសាអ៊ូឌីត ដែលស្ថិតក្នុងចំណាត់ថ្នាក់លេខ67៕

ប្រភពពី៖ Channel News Asia

May 29, 2018

Liverpool ប្រកាសពីការផ្ទេរ និងចុះហត្ថលេខាយក Fabinho ពី Monaco

ក្លិបហង្សក្រហម Liverpool បានប្រកាសពីការចុះហត្ថលេខាជាមួយនឹងខ្សែបម្រើអន្តរជាតិប្រេស៊ីល Fabinho ពីក្លិប Monaco ក្នុងតម្លៃខ្លួន 40លានផោន (ស្មើនឹង 53លានដុល្លារអាមេរិក) ដើម្បីជំនួសកន្លែងរបស់ Emre Can ខណៈដែលលោក Jurgen Klopp ចាប់ផ្តើមពង្រឹងក្រុមរបស់ខ្លួននៅរដូវក្តៅនេះ។

ការចរចាផ្សេងៗជាមួយនឹងក្លិបរបស់ក្របខ័ណ្ឌបារាំង Ligue 1 លើតម្លៃខ្លួន 40លានអឺរ៉ូ (ស្មើនឹង 53លានដុល្លារ) រួមទាំងប្រាក់ឧបត្ថម្ភបន្ថែមចំនួនទៀត 5លានអឺរ៉ូ បានបន្តដំណើរការអស់រយៈពេលជាច្រើនថ្ងៃមកហើយ ខណៈដែលសេចក្តីប្រកាសមួយពីក្លិប Liverpool កាលពីរាត្រីថ្ងៃចន្ទ បានអះអាងថា ខ្សែបម្រើដ៏មានឥទ្ធិពលវ័យ 24ឆ្នាំរូបនេះនឹងផ្ទេរទៅកាន់កីឡដ្ឋាន Anfield នៅថ្ងៃទី1 ខែកក្កដា ក្រោយពីរូបគេបានបំពេញការត្រួតពិនិត្យសុខភាពមួយនៅលើទីលានហ្វឹកហាត់របស់ក្លិប។ Fabinhoបានប្រាប់គេហទំព័ររបស់ Liverpool ថា៖ «ខ្ញុំពិតជារំភើបណាស់ចំពោះការផ្ទេរមួយនេះ។ នេះគឺជាអ្វីដែលខ្ញុំតែងតែចង់បាន។

នេះគឺជាក្រុមដ៏ធំមួយ។ ហេដ្ឋារចនាសម្ព័ន្ធរបស់ក្លិបនេះ ពិតជាអស្ចារ្យណាស់។ បើមានក្លិបបាល់ទាត់មួយក្នុងទំហំនេះ មកចង់បានសេវាកម្មរបស់ខ្ញុំ ខ្ញុំមិនចាំបាច់ត្រូវគិតច្រើនឡើយ។ ខ្ញុំនឹងព្យាយាមបង្កើតប្រវត្តិសាស្ត្រខ្លួនខ្ញុំផ្ទាល់ក្នុងក្លិបកីឡាបាល់ទាត់នេះ។ ជាការរំពឹងទុក ក្នុងកម្រិតឯកជន ខ្ញុំអាចឈ្នះពានជាច្រើនជាមួយនឹងក្លិបនេះ»៕

ប្រភពពី៖ The Guardian

May 29, 2018

នាយ ចឺម ប្រកាសជំហរមិនចាកចោលសាន់ដេឡើយ

បន្ទាប់ពីតារាធំៗនៅផលិតកម្មសាន់ដេ បានស្ពាយបង្វេចរបស់ខ្លួនទៅជ្រកនៅក្នុងទ្រនំធំដទៃទៀតហើយនោះ ស្រាប់តែថ្មីៗនេះ មានផ្ទុះដំណឹងមកថ្មីទៀតហើយថា នាយ ចឺម ដែលជាតារាល្បីមួយដួងនៅក្នុងផលិតកម្មសាន់ដេ កំពុងរៀបចំបង្វេចប្រុងចាកចេញពីទ្រនំមួយនេះម្នាក់ទៀតហើយ។ យ៉ាងណាក៏ដោយ ដំណឹងខ្សឹបខ្សៀវមួយនេះ នៅមិនទាន់ច្បាស់ជាផ្លូវការនៅឡើយទេ ខណៈដែលតារាចម្រៀងប្រុសរូបនេះ កំពុងតែចាក់គ្រឹះយ៉ាងមាំនៅក្នុងផលិតកម្មសាន់ដេ ហើយក៏កំពុងតែទទួលបានប្រជាប្រិយភាពយ៉ាងខ្លាំងផងដែរ។

ជាក់ស្ដែងម្ចាស់បទ «ជយោៗសង្សារខ្ញុំសុំបែកគ្នាហើយ» រូបនេះ បានប្រកាសជំហរប្រាប់អ្នកសារព័ត៌មានកាលពីពេលថ្មីនេះថា លោកគ្មានបំណង ឬគម្រោងចាកចេញពីសាន់ដេនោះទេ។ នាយចឺម បន្ដប្រាប់អ្នកសារព័ត៌មានថា លោកនៅជាប់កុងត្រាជាមួយសាន់ដេចំនួន 3ឆ្នាំទៀតជាតារាចម្រៀងពេញសិទ្ធិ ប៉ុន្តែបើទោះជាគ្មានកុងត្រាក៏លោកមិនចោលសាន់ដេនោះដែរ គឺមិនខ្វល់ពីការឆ្លេឆ្លាហក់ចូលផលិតកម្មណាមួយជាដាច់ខាត។

នាយចឺម បញ្ជាក់បន្ថែមទៀតថា «សម្រាប់អ្នកណាយល់យ៉ាងម៉េច ខ្ញុំអត់ខ្វល់ តែសម្រាប់ខ្ញុំនៅសាន់ដេគឺគ្រប់គ្រាន់ ដោយសារសាន់ដេគាត់ផ្ដល់ភាពកក់ក្ដៅឱ្យរហូត»។មកទល់ពេលនេះនាយចឺម នៅតែមិនមានអ្នកនិពន្ធប្រចាំខ្លួនឡើយ ដោយរង់ចាំតែច្រៀងតាមការទម្លាក់ឱ្យរបស់ផលិតកម្មតែប៉ុណ្ណោះ ប៉ុន្តែលោកថា ផលិតកម្មទាំងមូលនៅតែទម្លាក់បទចម្រៀងឱ្យលោកបានច្រើនដដែល ទើបលោកកក់ក្ដៅ ហើយប្រកាសជំហរនេះ ទោះមិនជាប់កុងត្រាក៏មិនរត់ទៅណាដែរ។ នាយចឺមត្រូវបានគេកត់សម្គាល់ថា នៅតែឡើងកូដខ្លាំងជាមួយនឹងបទចម្រៀងចាស់-ថ្មី ដោយសារតែមានអ្នកគាំទ្រច្រើនមកស្វាគមន៍ដល់ឆាកតែម្ដង៕

May 29, 2018

យុវជនខ្មែរបង្កើតកង្ហារឆ្លាតវៃ ល្បីជាអន្តរជាតិ

នៅសម័យបច្ចេកវិទ្យានេះ ការអប់រំ គឺជាកូនសោគន្លឹះក្នុងការដោះស្រាយបញ្ហារបស់មនុស្ស និងជំរុញឱ្យមានការអភិវឌ្ឍប្រកបដោយភាពឆ្លាតវៃ។ ស្របតាមចរន្តនេះ ប្រទេសនីមួយៗបានធ្វើការបង្កើនល្បឿនក្នុងវិស័យអប់រំរបស់ខ្លួនដោយប្ដូរពីការបណ្តុះបណ្តាលយុវជនជំនាន់ថ្មីដែលរៀនសម្រាប់តែអនុវត្តការងារប្រចាំថ្ងៃ មកជារៀនដើម្បីស្រាវជ្រាវ និងបង្កើតជាសមិទ្ធផលថ្មីៗទាំងផ្នែកវិទ្យាសាស្ត្រពិត និងវិទ្យាសាស្ត្រសង្គម។

នៅកម្ពុជា មានយុវជនមិនច្រើនទេដែលមានសមត្ថភាពក្នុងការបង្កើតសមិទ្ធផលថ្មីៗ ជាពិសេសនវានុវត្តន៍ផ្នែកវិទ្យាសាស្ត្រដែលអាចបម្រើដល់ផលប្រយោជន៍មនុស្សទូទៅជាលក្ខណៈអន្តរជាតិ តែថ្មីៗនេះយុវជនមួយក្រុមរបស់កម្ពុជាបានបង្កើតស្នាដៃយ៉ាងអស្ចារ្យមួយដែលធ្វើឱ្យមានភាពល្បីល្បាញ និងទទួលបានពានរង្វាន់ដល់ទៅ2 ពីកម្មវិធី International Engineering Invention and Innovation Exhibition 2018 (I-Envex) ដែលជាកម្មវិធីប្រកួតប្រជែងផ្នែករបកគំហើញវិទ្យាសាស្ត្រថ្មីនៅប្រទសម៉ាឡេស៊ី។

កញ្ញា ហេង សុវណ្ណមុនីនុត និស្សិតផ្នែកបច្ចេកវិទ្យាព័ត៌មាននៃសាកលវិទ្យាល័យន័រតុន និងជាម្ចាស់ជ័យលាភីយ៉ាងសំខាន់ខាងលើនេះបានបញ្ជាក់ថា ក្រុមរបស់គាត់ដណ្តើមបានពានរង្វាន់ចំនួន2ពីកម្មវិធី International Engineering Invention and Innovation Exhibition 2018 (I-Envex) ដោយពានរង្វាន់ទី1 គឺ Double Gold award និងទី2 គឺ Best Award Classes E (I.C.T, Multimedia, Telecommunications, Electricity & Electronic)។

កម្មវិធីនេះមានការចូលរួមពីសំណាក់ក្រុមយុវជនដែលមានគម្រោងផ្ទាល់ខ្លួនមកពី 16ប្រទេសក្នុងតំបន់អាស៊ី អាមេរិក និងបណ្តាប្រទេសអភិវឌ្ឍន៍មួយចំនួនទៀត ដោយក្នុងនោះគម្រោងដែលបានដាក់ពាក្យសរុបមានចំនួនប្រមាណ 410គម្រោង។

កញ្ញា ហេង សុវណ្ណមុនីនុត បាននិយាយថា៖ សម្រាប់ក្រុមរបស់ខ្ញុំគឺយើងបង្កើតកង្ហារឆ្លាតវៃដែលមានឈ្មោះថា NU Eco Smart Fan ឬ Mr.360។ កង្ហារនេះមានមុខងារសំខាន់ៗជាច្រើនដែលអាចសម្រួលដល់មនុស្សគ្រប់ប្រភេទរួមទាំងជនពិការ និងមនុស្សចាស់ជរាផង ឱ្យអាចប្រើប្រាស់បានយ៉ាងស្រួល ហើយសន្សំសំចៃអគ្គិសនីបានច្រើនទៀតផង។

កញ្ញា ហេង សុវណ្ណមុនីនុត បានលើកឡើងថា NU Eco Smart Fan ជាគម្រោងដែលយើងបង្កើតឡើងជាមួយនឹងមុខងារជាច្រើន ហើយដោះស្រាយបញ្ហាបានច្រើនសម្រាប់មនុស្សក្នុងប្រទេសកំពុងអភិវឌ្ឍន៍។ លក្ខណៈពិសេសរបស់វាមានចំនួន 9ចំណុចគឺទី1. Normal control វាអាចបញ្ជាបានតាមរយៈកម្មវិធីក្នុងទូរស័ព្ទដៃ ដោយមិនចាំបាច់ដើរទៅចុចដោយផ្ទាល់នោះទេ។ ទី2. solar energy mode គឺការសាកភ្លើងរបស់វាអាចប្រើប្រាស់បាន 2របៀប គឺសាកដោយពន្លឺព្រះអាទិត្យក៏បាន និងអគ្គិសនីក៏បាន ហើយកម្មវិធីនេះយើងសង្ឃឹមថា វានឹងអាចជួយថែរក្សាបរិស្ថានបានមួយចំណែក។

ក្រៅពីនេះ មុខងារទី3. speed mode របស់វាគឺ វាមានល្បឿន 3កម្រិត ហើយទី4 គឺ temperature mode កង្ហារនេះអាចផ្លាស់ប្តូរល្បឿនវាទៅតាមកម្រិតសីតុណ្ហភាព។ ក្នុងករណីដែលមេឃក្តៅខ្លាំងកង្ហារនេះនឹងបក់លឿនខ្លាំង ហើយវានឹងបន្ថយនៅពេលដែលសីតុណ្ហភាពថយចុះដូចគ្នា។ មុខងារទី5. sleep mode គឺយើងអាចកំណត់នាទីឱ្យវាឈប់ដោយខ្លួនឯងបាន។ មុខងារនេះមានភាពងាយស្រួលសម្រាប់មនុស្សចាស់ ឬអ្នករវល់ខ្លាំងដែលពេលយប់មិនចាំបាច់ដើរទៅបិទវានោះទេ ព្រោះដល់ម៉ោងដែលយើងកំណត់ឱ្យវាបិទ វានឹងបញ្ចប់ដំណើរការដោយខ្លួនឯង។ មុខងារទី6. speechmode យើងអាចបញ្ជាវាឱ្យដំណើរការដោយមិនចាំបាច់ចុចអ្វីទាំងអស់ គឺគ្រាន់តែប្រាប់វាដោយសំឡេង វានឹងដំណើរការ។

ចំពោះមុខងារទី7. camera security mode គឺកង្ហារនេះមានប្រើប្រាស់ប្រព័ន្ធសេនស័រ (Sensor) ដោយមានភ្ជាប់ជាមួយនឹងកាមេរ៉ាសុវត្ថិភាពសម្រាប់ប្រាប់ពីព័ត៌មានសំខាន់ៗមួយចំនួន។ សម្រាប់មុខងារកាមេរ៉ានេះ មិនមែនសម្រាប់មើលពីសុវត្ថិភាពដូចកាមេរ៉ាទូទៅនោះទេ តែវាមានមុខងារបញ្ជូនព័ត៌មាន ឬប្រាប់ហេតុការណ៍តាមទូរស័ព្ទដៃនៅពេលដែលមានមនុស្សចាស់ដួល ឬមានរឿងអ្វីមួយកើតឡើងនៅក្នុងផ្ទះ។

មុខងារទី8. smart energy mode កង្ហារនេះមានមុខងារបែរទៅរកតែកន្លែងណាដែលមានមនុស្សតែប៉ុណ្ណោះ ប្រសិនបើកន្លែងណាគ្មានមនុស្ស គឺវានឹងឈប់វិលដោយឯកឯង។ ហើយមុខងារទី9. angle mode គឺជាមុខងារដែលកំណត់អំពីកន្លែងដែលវាត្រូវវិល បើទោះបីជាមានមនុស្សនៅជុំវិញវាក៏ដោយ ព្រោះពេលខ្លះយើងចង់ឱ្យវាវិលត្រឹមកម្រិតណាមួយ គឺយើងអាចកំណត់បានយ៉ាងងាយ។ ទាំងអស់នេះគឺជាលក្ខណសម្បត្តិរបស់កង្ហារឆ្លាតវៃ។

ម្ចាស់ជយលាភីអន្តរជាតិខាងលើបានលើកឡើងផងដែរថា ការបង្កើតសមិទ្ធផលនេះ គឺក្នុងគោលបំណងជួយដល់មនុស្សទូទៅនៅក្នុងប្រទេសកំពុងអភិវឌ្ឍន៍ឱ្យមានភាពងាយស្រួល ព្រោះតម្លៃរបស់វា គឺធូរថ្លៃខ្លាំង ដែលយើងអាចចំណាយប្រមាណត្រឹមតែជាង 30ដុល្លារតែប៉ុណ្ណោះដើម្បីទទួលបានឧបករណ៍អេឡិចត្រូនិកដែលមានភាពឆ្លាតវៃមួយនេះ។ ហើយម្យ៉ាងវិញទៀត គោលបំណងសំខាន់មួយទៀត គឺចង់ឱ្យមនុស្សចាស់ជរា អាចប្រើប្រាស់វាបានដោយងាយស្រួល ព្រោះប៊ូតុងឆ្លាតវៃរបស់វាមិនមានការលំបាកចុច ឬត្រូវប្រើកម្លាំងនោះទេ ស្របពេលដែលវាក៏មានមុខងារបញ្ជាតាមទូរស័ព្ទដែលធ្វើឱ្យគាត់កាន់តែងាយស្រួលឡើង។ ចំណែកឯជនពិការវិញ ក៏អាចប្រើប្រាស់បានយ៉ាងងាយស្រួលដែរតាមរយៈការបញ្ជាដោយសំឡេង មិនចាំបាច់ត្រូវដើរទៅបើកនោះទេ។

សមាជិកមួយរូបទៀតនៃគម្រោងកង្ហារ NU EcoSmart Fan នេះ លោក សៀន ផាលីនហួរ បានលើកឡើងថាលក្ខណៈពិសេសដែលអាចធ្វើឱ្យគម្រោងនេះទទួលបានចំណាប់អារម្មណ៍ពីគណៈកម្មការដាក់ពិន្ទុនៅក្នុងកម្មវិធី International Engineering Invention and Innovation Exhibition 2018 (I-Envex) គឺកង្ហារនេះមានមុខងារច្រើនជាងគម្រោងដទៃទៀត ព្រោះវាមានមុខងារដល់ទៅ9 ខណៈពេលដែលគេមានត្រឹមតែ 4 ឬ5មុខងារតែប៉ុណ្ណោះ។

ម្យ៉ាងវិញទៀត បើគិតពីតម្លៃ គឺវាធ្វើឡើងក្នុងតម្លៃទាប ដែលជាហេតុធ្វើឱ្យប្រជាជនក្នុងប្រទេសក្រីក្រ ឬប្រទេសកំពុងអភិវឌ្ឍន៍អាចមានលទ្ធភាពក្នុងការប្រើប្រាស់បានយ៉ាងទូលំទូលាយ។

លោក សៀន ផាលីនហួរ បាននិយាយថា៖ គម្រោងកង្ហារឆ្លាតវៃនេះ ធ្វើឡើងដោយចំណាយពេលវេលា 3ខែកន្លះដោយក្នុងនោះរយៈពេល 3ខែចំណាយលើការបង្កើត Hardware និង 2សប្តាហ៍ទៀតជាពេលសម្រាប់ដំឡើងកម្មវិធី software។ ហើយគម្រោងនេះអាចជោគជ័យទៅបានក៏ដោយមានការប្រឹក្សាយោបល់ច្រើនពីលោកគ្រូដឹកនាំគម្រោងដែលបានផ្តល់គំនិត និងចូលរួមដោះស្រាយបញ្ហាជាច្រើន ជាពិសេសគឺផ្នែក Hardware។

លោក ផាលីនហួរ បាននិយាយថា នៅក្នុងការអនុវត្តគម្រោងយើងបានជួបឧបសគ្គមួយចំនួនដូចជាកត្តាពេលវេលា កត្តាបច្ចេកវិទ្យា និងការសរសេរកូដជាដើម។ ចំពោះពេលវេលា គឺដោយសារតែសមាជិកក្រុមទាំង 2នាក់រៀនវេនផ្សេងគ្នា ហេតុនេះយើងចាំបាច់ត្រូវកាត់ពេលវេលានៃការរៀនសូត្រខ្លះដើម្បីជួយគ្នាឱ្យសម្រេចបានជោគជ័យ។ ហើយចំពោះកត្តាបច្ចេកវិទ្យាវិញយើងក៏ជួបប្រទះនូវបញ្ហាច្រើនដែរ ព្រោះពួកយើងជាអ្នកបច្ចេកវិទ្យាព័ត៌មានដែលផ្តោតខ្លាំងលើការសរសេរកូដ ហេតុនេះនៅពេលដែលយើងចង់ឱ្យកង្ហារវិល 360ដឺក្រេ វាមានបញ្ហា ហើយខ្សែភ្លើងទាក់ជាប់គ្នារកផ្លូវចេញមិនឃើញ។

កត្តាមួយទៀត គឺការស្វែងរកវត្ថុធាតុដើមមួយចំនួនដើម្បីយកមកកែច្នៃដំឡើងឱ្យក្លាយជាទ្រង់ទ្រាយ និងកំណត់ទីតាំងនៃឧបករណ៍គាំទ្រមួយចំនួនដូចជាទីតាំងនៃ Sensor ឬប៊ូតុងជាដើម។ តែទោះជាយ៉ាងនេះក្តី ក៏យើងសំណាងល្អដែរ ដែលមានគ្រូណែនាំជាអ្នកមានជំនាញ និងបទពិសោធច្រើន ដែលតែងតែផ្តល់យោបល់ និងជួយជាដំណោះស្រាយខ្លះៗសម្រាប់សាកល្បង រហូតធ្វើឱ្យយើងអាចផលិតឧបករណ៍ឆ្លាតវៃនេះបានដោយជោគជ័យ៕

May 28, 2018

កត្តាអ្វីខ្លះដែលនាំឱ្យមនុស្សធ្វើការងារបានល្អ?

មនុស្សម្នាក់ៗតែងតែចង់ក្លាយជាមនុស្សដែលធ្វើការងារប្រកបដោយប្រសិទ្ធភាពខ្ពស់ ហើយចង់អភិវឌ្ឍខ្លួនឱ្យបានល្អនៅក្នុងកន្លែងការងារ ព្រោះចំណុចទាំងអស់នេះជាគន្លឹះយ៉ាងសំខាន់ក្នុងការកសាងភាពថ្កុំថ្កើង តែពេលខ្លះមានកត្តារាំងស្ទះមួយចំនួនដែលបង្អាក់ដល់ដំណើរការនៃការអភិវឌ្ឍខ្លួននេះ។

លោកសាស្ត្រាចារ្យ ព្រើន សុវង្ស ព្រឹទ្ធបុរសរងនៃពុទ្ធិកមហាវិទ្យាល័យ វិទ្យាសាស្ត្រអប់រំ និងព័ត៌មានវិទ្យាទទួលបន្ទុកដេប៉ាតឺម៉ង់ ថ្នាក់ឆ្នាំសិក្សាមូលដ្ឋាននៃពុទ្ធិកសាកលវិទ្យាល័យព្រះសីហនុរាជបានលើកឡើងថាដើម្បីឱ្យមនុស្សម្នាក់ៗអាចអភិវឌ្ឍសមត្ថភាពបានល្អប្រកបដោយប្រសិទ្ធភាពខ្ពស់ គឺអាស្រ័យលើចំណុច 3យ៉ាងសំខាន់ៗគឺ កត្តាជំនាញ កត្តាចិត្តសាស្ត្រផ្ទាល់ខ្លួន និងកត្តាស្ថាប័ន។ ជាចំណុចចាប់ផ្តើម មុននឹងអាចធ្វើការងារបានល្អ មនុស្សម្នាក់ៗចាំបាច់ត្រូវតែមានជំនាញគោលមួយឱ្យបានច្បាស់លាស់ ហើយកត្តាជំនាញហាក់បីដូចជាចំណុចស្នូលមួយ ដែលធ្វើឱ្យយើងអាចមានលទ្ធភាពបំពេញការងារមួយបានល្អ និងគោរពលក្ខខណ្ឌគោលរបស់ស្ថាប័ន ឬអាចជួយឱ្យយើងក្លាយជាអ្នកជំនាញលើផ្នែកណាមួយបាន។

ចំណែកឯកត្តាចិត្តសាស្ត្រផ្ទាល់ខ្លួនវិញគឺផ្តោតលើចំណុចអភិវឌ្ឍន៍ ឬសមត្ថភាពក្នុងការអភិវឌ្ឍជំនាញនោះប្រកបដោយភាពឆ្លាតវៃដើម្បីឱ្យក្លាយ ជាមនុស្សលេចធ្លោក្នុងស្ថាប័ន។ លោកសាស្ត្រាចារ្យ ព្រើន សុវង្សបាននិយាយថា៖ “គ្មានផ្នែកណាអាចកាត់ផ្តាច់ពីគ្នាបាននោះទេ រវាងជំនាញ និងកត្តាចិត្តសាស្ត្រផ្ទាល់ខ្លួន។

វាហាក់បីដូចជាលីបកង់ និងច្រវាក់ដែលសុទ្ធតែសំខាន់សម្រាប់ឱ្យកង់រត់ទៅមុខបាន។ ទោះបីជាផ្នែកណាធំជាង ឬតូចជាងក៏ដោយ ក៏ត្រូវតែមានទាំងពីរដើម្បីជំរុញសកម្មភាពជាក់ស្តែងឱ្យដំណើរការបានរលូន និងមានប្រសិទ្ធភាព។

លោកសាស្ត្រាចារ្យក៏បានលើកឡើងផងដែរថា កត្តាសំខាន់មួយទៀតដែលអាចនាំមនុស្សឱ្យទទួលបានជោគជ័យក្នុងការងារគឺ កត្តាស្ថាប័ន ឬប្រព័ន្ធការងារ។ ពាក្យខ្មែរយើងតែងនិយាយថា “មាន់ពងលើស្រួវ តែងតែស៊ីស្រូវ” ឬមានន័យថា មនុស្សធ្វើការងារជាមួយលុយកាក់តែងតែឆ្លៀតយកប្រយោជន៍ពីលុយកាក់នោះ តែបើយើងមើលទៅអ្នកធ្វើការងារក្នុងធនាគារយើងនឹងដឹងថា វាមិនមែនបែបនោះទាំងអស់ទេ។

មនុស្សធ្វើការងារជាមួយលុយកាក់ក៏ដោយ តែប្រសិនបើយើងមានប្រព័ន្ធគ្រប់គ្រងត្រឹមត្រូវ នោះភាពច្បាស់លាស់នៅតែមាន។ ងាកមកអ្នកធ្វើការងារដទៃទៀតវិញក៏ដូចគ្នាដែរ ការដែលស្វែងរកកន្លែងដែលអាចអនុញ្ញាតឱ្យយើងបញ្ចេញអស់សក្តានុពល និងមានសេរីភាពគ្រប់គ្រាន់ក្នុងការអភិវឌ្ឍខ្លួនឯង គឺជារឿងសំខាន់ដែលអាចធ្វើឱ្យយើងក្លាយជាមនុស្សដែលប្រើប្រាស់អស់បញ្ញាស្មារតី ដើម្បីធ្វើការងារប្រកបដោយប្រសិទ្ធភាពខ្ពស់។

អ្នកអប់រំខាងលើបានលើកឡើងផងដែរថា លក្ខខណ្ឌនៃការងារល្អមានច្រើនប្រភេទ។ ពេលខ្លះមនុស្សអន់ធ្វើការងារក្នុងស្ថាប័នខ្លាំង អាចធ្វើឱ្យគាត់ក្លាយជាមនុស្សតស៊ូ ហើយខ្លាំងទៅតាមនោះដែរ។ ចំណែកឯអ្នកខ្លះទៀតគាត់ខ្លាំង តែស្ថាប័នខ្សោយ ត្រង់នេះមានន័យថា គាត់អាចក្លាយជាបុគ្គលស្នូលក្នុងការលើកស្ទួយស្ថាប័នឱ្យមានថាមពល។ ហើយអ្នកខ្លះទៀត គាត់មានសមត្ថភាពខ្លាំងស្រាប់ ហើយធ្វើការងារក្នុងស្ថាប័នល្អថែមទៀត គាត់នឹងកាន់តែខ្លាំង។ ហេតុនេះការអភិវឌ្ឍសមត្ថភាពជំនាញ សមត្ថភាពចិត្តសាស្ត្រក្នុងការអភិវឌ្ឍផ្ទាល់ខ្លួន និងការជ្រើសរើសស្ថាប័នត្រឹមត្រូវ គឺជាកត្តាសំខាន់ខ្លាំងណាស់ដែលអ្នកធ្វើការងារត្រូវគិតគូរ។

លោក លី សុភារិទ្ធ អ្នកគ្រប់គ្រងលើក្រុមវិស្វករនៃក្រុមហ៊ុនឯកជនមួយ បានលើកឡើងថា កត្តាសំខាន់ដែលធ្វើឱ្យមនុស្សខ្លាំងក្នុងការធ្វើការងារគឺភាពវៃឆ្លាត និងគំនិតវិជ្ជមានក្នុងការធ្វើការងារលំបាក។ ការងារទាំងអស់សុទ្ធតែត្រូវការជំនាញដូចៗគ្នា ហើយបើគ្រាន់តែធ្វើការងារដដែលៗ អ្នកណាក៏អាចធ្វើបានដែរ ហេតុនេះបុគ្គលិកដែលលេចធ្លោ គឺជាអ្នកដែលមានភាពវៃឆ្លាតក្នុងការច្នៃប្រឌិតវិធីដែលខ្លួនធ្វើនោះឱ្យខ្លី ឬឱ្យងាយ ហើយចំណេញពេលវេលាច្រើនក្នុងការបង្កើនគុណភាព ឬបរិមាណនៃសមិទ្ធផលសម្រាប់ការងារប្រចាំថ្ងៃ។

ការធ្វើការងារបែបនេះ គឺគេហៅថា ធ្វើការងារប្រកបដោយវិធីឆ្លាត (work smart) មិនមែនធ្វើការងារចំណាយពេលច្រើន តែមិនទទួលបានលទ្ធផលនោះទេ។ ម្យ៉ាងវិញទៀត នៅពេលដែលយើងមានសមត្ថភាពខ្ពស់ក្នុងការច្នៃប្រឌិត យើងក៏អាចក្លាយជាផ្នែកមួយយ៉ាងសំខាន់ក្នុងការចូលរួមចំណែកអភិវឌ្ឍក្រុមហ៊ុន ឬស្ថាប័នឱ្យមានលទ្ធភាពក្នុងការប្រកួតប្រជែងជាមួយនឹងដៃគូនៅក្នុងទីផ្សារ។

លោក លី សុភារិទ្ធ បាននិយាយថា៖ “ការធ្វើការងារប្រកបដោយភាពវិជ្ជមាន ក៏ជាចំណុចខ្លាំងមួយដែលជំរុញអ្នកធ្វើការងារឱ្យមានថាមពល និងអាចទទួលបានលទ្ធផលខ្ពស់ផងដែរ។ បញ្ហាដែលជាចំណុចប្រឈមរបស់មនុស្សជាច្រើន គឺមើលឃើញតែពីបញ្ហា ឬមានគំនិតអវិជ្ជមានច្រើនជាងរីករាយជាមួយនឹងការផ្លាស់ប្តូរដែលវិជ្ជមាន។ ហេតុនេះប្រសិនបើយើងមានគំនិតវិជ្ជមានក្នុងការងារ យើងនឹងព្យាយាមស្វែងរកចម្លើយគ្រប់លទ្ធភាពដើម្បីសម្រេចគោលដៅ បើទោះបីជាការងារទាំងនោះមិនមែនជារឿងងាយស្រួលក៏ដោយ។

លោក សុភារិទ្ធ បានលើកឡើងផងដែរថា អ្នកណាក៏អាចអភិវឌ្ឍសមត្ថភាពឱ្យខ្លាំងបានដែរ ប្រសិនបើយើងចាប់ផ្តើមបង្កើតទម្លាប់ល្អក្នុងការធ្វើការងារ ឬដកឃ្លាបន្តិចដើម្បីគិតពីការអភិវឌ្ឍសមត្ថភាពខ្លួនឯងឱ្យកាន់តែខ្លាំង បើទោះបីជាពេលវេលារាល់ថ្ងៃធ្វើឱ្យយើងនឿយហត់ក៏ដោយ ព្រោះថា នៅពេលដែលយើងដកឃ្លាស្វែងរកពេលគិតប្រកបដោយសេរីភាព និងភាពច្នៃប្រឌិត យើងនឹងអាចធ្វើការងារដដែលនោះដោយភាពងាយស្រួល និងចំណេញពេលវេលាច្រើន៕

May 28, 2018

មិនទាន់ចប់ទេ! ម៉ៃ សុគន្ធ នៅតែបន្ដរិះគន់តារាចម្រៀង ថេណា

កាលពីពេលកន្លងទៅថ្មីៗនេះ តារាចម្រៀង និងមហាជនបានដាក់រហស្សនាមឱ្យថា «កំពូសទើស» លោក ម៉ៃ សុគន្ធ បានចេញមករិះគន់តារាចម្រៀង Original Song លោក ថេណា ថា ច្រៀងមិនច្បាស់ រកតែស្ដាប់មិនយល់ ដោយបានសង្កត់ធ្ងន់ទៅលើបទចម្រៀងដែលមានចំណងជើងថា «ភពឯកា»។

កន្លងមកលោក ម៉ៃ សុគន្ធ បានធ្វើការរិះគន់ ថេណា ថា «និយាយពី Original Song សម័យឥឡូវ បើចង់ស្តាប់ទាល់តែបើកត្រចៀកឱ្យធំ ឱនទៅឱ្យជិត Speaker ទើបស្តាប់ដឹងថា វាច្រៀងអំពីស្អី (អក្ខរាវិរុទ្ធស្តាប់មិនបាន មិនដឹងវាច្រៀងភាសាអីឱ្យច្បាស់…) បើថាតាឡាន់ មិនចំតាឡាន់ អានិកជាន់ មិនចំអានិកជាន់ យ៉ាប់ហើយខ្មែរ»។ គួរកត់សម្គាល់ផងដែរថា បន្ទាប់មានការរិះគន់បែបនេះឡើង គេមើលឃើញថា មហាជនមួយចំនួនគាំទ្រសម្ដីរបស់ ម៉ៃ សុគន្ធ តែក៏មានមហាជនអ្នកគាំទ្រមួយចំនួនទៀតបានពន្លះ ម៉ៃ សុគន្ធ វិញដោយមិនប្រណីថ្វីមាត់ដែរ។

យ៉ាងណាក៏ដោយ បន្ទាប់ពីមានការរិះគន់ចំពោះ ថេណា បែបនេះ តារាចម្រៀងប្រុសរូបនេះក៏បានធ្វើការឆ្លើយបញ្ជាក់វិញដែរថា «អត់មានអីខឹង ឬឆ្លើយតបអីទៅគាត់វិញផងបង ព្រោះអាជីពគាត់ល្បីល្បាញដោយសារតែការរិះគន់គេ បើសិនជាខ្ញុំខឹងប្រកាន់គាត់ មានន័យថា ខ្ញុំមិនខុសអីពីគាត់ឡើយ។ ដូច្នេះគាត់ធ្វើអ្វីជារឿងគាត់ តែកុំឱ្យតែជ្រុលហួសហេតុពេក»។ ការតប-ត-បកស្រាយរបស់ ថេណា មិនបានធ្វើឱ្យ ម៉ៃ សុគន្ធ ក្ដៅស្លឹកត្រចៀកឡើយ ផ្ទុយទៅវិញ ថ្មីៗចុងក្រោយនេះ លោក ម៉ៃ សុគន្ធ បានចេញសារតបវិញថា «អូ! “ការរិះគន់តារាតាឡាន់” ពិតជាមានឥទ្ធិពលមែន តារាតាឡាន់ សំនៀងបែបអណិកកាក់ជាន់ ទទួលស្គាល់ការពិតហើយ។ អូ!!! ភ្លេចរកឃើញមូលហេតុដែលតាឡាន់ស្ទាយអនិកាក់ជាន់ហើយ បំពង់កតូចពេក អត់សូវមានកីឡា។ បើចេញបទក្រោយកែណា៎ ខ្ញុំចាំមើល..»៕

May 28, 2018

សភាអឺរ៉ុបនៅតែបន្តចោទប្រកាន់ និងដាក់បន្ទុកលើមេធំ Facebook

ស្ថាបនិកក្រុមហ៊ុន និងជាមេធំរបស់បណ្ដាញសង្គម Facebook លោក Mark Zuckerberg បានបង្ហាញការសូមអភ័យទោសទៅកាន់សភាអឺរ៉ុប ចំពោះផលប៉ះពាល់ ដែលបង្កឡើងដោយការបែកធ្លាយទិន្នន័យផ្ទាល់ខ្លួនរបស់អ្នកប្រើប្រាស់ ។

លោក Mark Zuckerberg បានថ្លែងនៅក្នុងសេចក្ដីថ្លែងការណ៍ជាចំហមួយថា៖ “ក្នុងរយៈពេល 2ឆ្នាំមកនេះ វាបានបង្ហាញយ៉ាងច្បាស់ថា យើងមិនបានធ្វើអ្វីគ្រប់គ្រាន់ឡើយក្នុងការទប់ស្កាត់កុំឱ្យមានផលប៉ះពាល់ដល់អ្នកប្រើប្រាស់ ដោយសារតែព័ត៌មានក្លែងក្លាយ ការលូកដៃរបស់បរទេសនៅក្នុងការបោះឆ្នោត ឬក៏ការបំប៉ោងព័ត៌មានឱ្យប្រជាជនមានការយល់ច្រឡំ។

លោក បានបញ្ជាក់បន្ថែមទៀតថា៖ “យើងមិនបានយកចិត្តទុកដាក់គ្រប់គ្រាន់ លើការទទួលខុសត្រូវរបស់យើង ហើយនេះគឺជាកំហុសមួយដែលខ្ញុំពិតជាត្រូវសូមទោស។

បើទោះបីជា មហាសេដ្ឋីវ័យក្មេងរូបនេះ ចេញមុខសុំទោស និងបង្ហាញការសោកស្ដាយយ៉ាងណាក្ដី ក៏មិនបានធ្វើឱ្យសមាជិកសភាអឺរ៉ុបពេញចិត្តដែរផ្ទុយទៅវិញពួកគេបានចោទប្រកាន់ លោក Mark Zuckerberg ថា បានគេចវេះការឆ្លើយតបនឹងសំណួរ។

គួរបញ្ជាក់ផងដែរថា ក្រោយពីទិន្នន័យឯកជនរបស់អ្នកប្រើប្រាស់រាប់លាននាក់ត្រូវបានបែកធ្លាយ និងរំលោភបំពាននោះ លោក Mark Zuckerberg បានប្រកាសថា នឹងជួលបុគ្គលិកបន្ថែមជាច្រើននាក់ទៀត ដើម្បីត្រួតពិនិត្យទៅលើព័ត៌មានក្លែងក្លាយ និងដើម្បីការងារទិន្នន័យសម្ងាត់របស់ឯកជន៕

May 28, 2018

តម្លៃដីនៅខេត្តកំពង់ស្ពឺកំពុងឡើងថ្លៃខ្លាំង ខណៈរោងចក្រផ្លាស់ទៅទីនោះកាន់តែច្រើន

ស្របពេលដែលវិស័យវាយនភ័ណ្ឌ រោងចក្រកាត់ដេរសម្លៀកបំពាក់ ស្បែកជើង និងរោងចក្រផលិតសម្ភារប្រើប្រាស់ផ្សេងៗបានផ្លាស់ទីតាំងចេញពីក្នុងភូមិសាស្ត្ររាជធានីភ្នំពេញទៅកាន់ខេត្តកំពង់ស្ពឺកាន់តែច្រើនឡើងនោះ នៅប៉ុន្មានឆ្នាំចុងក្រោយនេះបានធ្វើឱ្យតម្លៃដីនៅក្នុងខេត្តជិតរាជធានីភ្នំពេញមួយនេះកាន់តែមានសម្ទុះខ្លាំងឡើង។

លោក ភឿង ប៊ន អាជីវកពុះដីឡូត៍លក់នៅជិតផ្សារអង្គមេត្រី ក្នុងឃុំរលាំងគ្រើល ស្រុកសំរោងទង ខេត្តកំពង់ស្ពឺ មានប្រសាសន៍ថា នៅរយៈពេលប្រមាណជា 6ខែចុងក្រោយ តម្លៃដីតំបន់នោះកំពុងឡើងថ្លៃខ្លាំង ដោយសារតែរោងចក្របានផ្លាស់ទៅទីនោះកាន់តែច្រើនឡើង។ លោកបន្តថា កាលពីឆ្នាំមុនដីក្នុងភូមិអង្គមេត្រីនោះតម្លៃប្រហែល 5ដុល្លារប៉ុណ្ណោះក្នុងមួយម៉ែត្រការ៉េ ប៉ុន្តែត្រឹមរយៈពេល 6ខែចុងក្រោយនេះដីឡើងថ្លៃដល់ចន្លោះពី15 ទៅ20ដុល្លារក្នុងមួយម៉ែត្រការ៉េ ឯចំណែកដីនៅជាប់ផ្លូវធំ ផ្លូវលេខ41 វិញ តម្លៃឡើងដល់150 ទៅ200ដុល្លារក្នុងមួយម៉ែត្រការ៉េ ប្រហាក់ប្រហែល និងជាយក្រុងភ្នំពេញដែរ ដែលជាកត្តាធ្វើឱ្យអាជីវកម្មពុះដីឡូត៍លក់កាន់តែមានសកម្មភាពខ្លាំងឡើង។

លោកបានមានប្រសាសន៍ទៀតថា បច្ចុប្បន្នដីនៅតាមបណ្តោយផ្លូវលេខ41 ឆ្លងកាត់ពីផ្លូវជាតិលេខ4 ត្រង់ចំណុចផ្សារថ្នល់ទទឹងឆ្ពោះទៅទីរួមខេត្តកំពតពិតជាមានសក្តានុពលខ្លាំងឡើង មែន ដោយសារតែទីតាំងនោះមានភាពអំណោយផលក្នុងការសាងសង់រោងចក្រ ងាយស្រួលដល់ការដឹកជញ្ជូនទំនិញទៅកំពង់ផែសមុទ្រ។ ចំណែកដីនៅតាមបណ្តោយផ្លូវជាតិលេខ4 ចាប់ពីផ្សារថ្នល់ទទឹងឆ្ពោះទៅខេត្តកំពង់សោមវិញ ក៏កាន់តែឡើងថ្លៃដំណាលៗគ្នានេះដែរ។

អតិថិជនឈ្មោះ ផាន់ ប៉ោទាង ដែលបានទិញដីឡូត៍នៅទីនោះបានបញ្ជាក់ថា កាលមុនដីមួយឡូត៍តម្លៃត្រឹមតែ 2,000ដុល្លារទេ និងមិនសូវមានអ្នកទិញផង ស្រាប់តែមកទល់ពេលនេះដីឡូត៍ឡើងថ្លៃចន្លោះពី 4,000 ទៅ6,000 ក្នុងមួយឡូត៍បែរជាមានមនុស្សនាំគ្នាមកទិញកាន់តែច្រើនឡើងទៅវិញ ដោយអ្នកទិញភាគច្រើនបានសាងសង់ផ្ទះសម្រាប់លក់ម្ហូបអាហារ និងសម្ភារផ្សេងៗនៅក្បែររោងចក្រ ហើយអ្នកខ្លះទិញដើម្បីធ្វើផ្ទះជួលឱ្យអ្នករោងចក្រស្នាក់នៅ និងមួយចំនួនទៀតទិញទុកលក់ទៅវិញយកប្រាក់ចំណេញបន្ត។

អ្នកនាង ស៊ ធីតា អ្នកជំនាញអចលនទ្រព្យនៃក្រុមហ៊ុន Royal 5G បាននិយាយថា ដីនៅខេត្តកំពង់ស្ពឺពិតជាឡើងថ្លៃមែន ប៉ុន្តែមិនឡើងគ្រប់តំបន់នោះទេ មានន័យថា ឡើងទៅតាមតំបន់មួយចំនួនប៉ុណ្ណោះ ពិសេសតំបន់ដែលរោងចក្របានផ្លាស់ប្តូរទៅនៅតាមបណ្តោយផ្លូវ41 (ពីថ្នល់ទទឹងឆ្ពោះទៅទីរួមខេត្តកំពត) និងមួយចំនួនទៀតនៅតាមបណ្តោយផ្លូវជាតិលេខ4។ តែយ៉ាងណាក្ដីអ្នកនាងបានលើកឡើងថា និន្នាការនៃការពង្រីករោងចក្រកំពុងបែរមុខឆ្ពោះទៅខេត្តកំពង់ស្ពឺពិតប្រាកដមែន ដែលអាចធ្វើឱ្យអ្នកជំនួញវិស័យនេះអាចទិញទុកលក់រប្រាក់ចំណេញបាននៅថ្ងៃអនាគត។

លោក វ៉ី សំណាង អភិបាលនៃគណៈអភិបាលខេត្តកំពង់ស្ពឺ បានមានប្រសាសន៍សង្កត់ធ្ងន់ថា បច្ចុប្បន្នបើគេនិយាយពីតំបន់សេដ្ឋកិច្ចពិសេស គេត្រូវសម្លឹងឆ្ពោះទៅកាន់ទឹកដីខេត្តកំពង់ស្ពឺ តាមបណ្តោយផ្លូវជាតិលេខ4 ដែលមានទីតាំងនៅមិនឆ្ងាយពីតំបន់មជ្ឈមណ្ឌលពាណិជ្ជកម្មរាជធានីភ្នំពេញ ដ្បិតនៅទីនោះក្រៅពីមានទីតាំងភូមិសាស្ត្រល្អ និងមានសក្តានុពលលើការដឹកជញ្ជូន ហើយវានៅមានភាពល្អប្រសើរជាច្រើនទៀត ដូចជាមានវិសាលភាពភាពធំទូលាយ តម្លៃអចលនទ្រព្យនៅមានកម្រិតទាប ជាពិសេសភាពសម្បូរបែបនៃកម្លាំងពលកម្មដែលភាគច្រើនជាប្រជាជនដែលកំពុងរស់នៅក្នុងតំបន់នោះស្រាប់។

លោកបន្តថា នៅពេលបច្ចុប្បន្ននេះ ខេត្តកំពង់ស្ពឺបាននិងកំពុងពង្រីកវិសាលភាពផ្នែកសេដ្ឋកិច្ច ឱ្យបានកាន់តែប្រសើរជាងមុន ពោលគឺមានការរីកចម្រើនយ៉ាងខ្លាំងលើការវិនិយោគក្នុងរូបភាពជារោងចក្រ សហគ្រាសធំៗ ដែលសរុបមានចំនួន 130ទីតាំង (រោងចក្រស្បែកជើង និងរោងចក្រកាត់ដេរសម្លៀកបំពាក់)។ ដោយឡែកសម្រាប់សិប្បកម្មខ្នាតមធ្យម និងក្រោមមធ្យមនៅតាមមូលដ្ឋានជាលក្ខណៈគ្រួសារផ្សេងៗ មានរហូតដល់ប្រមាណជា 4,600មូលដ្ឋាន ដែលអាចផ្តល់ការងារជូនប្រជាកម្មករមានក្របខ័ណ្ឌបានប្រមាណ 91,000នាក់ និងក្រៅក្របខ័ណ្ឌបានប្រមាណជិត 40,000នាក់។

ជាមួយគ្នានេះដែរ រាជរដ្ឋាភិបាលក៏បានរៀបចំតំបន់ទាំងអស់នៅតាមបណ្ដោយផ្លូវជាតិលេខ4 ពីរាជធានីភ្នំពេញទៅកាន់ខេត្តព្រះសីហនុឱ្យទៅជាតំបន់ឧស្សាហកម្មនៅឆ្នាំ2025ខាងមុខនេះដែលជាកត្តាសំខាន់ធ្វើឱ្យតម្លៃដីនៅខេត្តមួយនេះកាន់តែឡើងថ្លៃខ្ពស់ឡើង៕

May 28, 2018

អស្ចារ្យ!! ល្ខោននិយាយរឿង «តៃកុងហំ ហៅ ថៅកែចិត្តចោរ» ទទួលបានការគាំទ្រយ៉ាងភ្លូកទឹកភ្លូកដី

នៅមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) ក្នុងបរិវេណសាកលវិទ្យាល័យភូមិន្ទភ្នំពេញ នៅថ្ងៃអាទិត្យ ទី27 ខែឧសភា ឆ្នាំ2018 មានការសម្ដែងល្ខោននិយាយរឿង «តៃកុងហំ ហៅ ថៅកែចិត្តចោរ» ដែលមានការចូលរួមសម្ដែងពីសំណាក់លោកគ្រូ-អ្នកគ្រូខាងផ្នែកល្ខោននិយាយនៃសាកលវិទ្យាល័យភូមិន្ទវិចិត្រសិល្បៈ។

អ្វីដែលគួរឱ្យកត់សម្គាល់ខ្លាំងបំផុតនោះគឺ ល្ខោននិយាយមួយនេះបានបំផុសគំនិតឱ្យយុវជនកម្ពុជាដែលជាទំពាំងស្នងឫស្សីទាំងអស់ស្រឡាញ់នូវភាពយុត្តិធម៌ សច្ចធម៌ គុណតម្លៃការងារ ភាពស្មោះត្រង់ និងបញ្ចៀសរាល់ទង្វើគាបសង្កត់កេងចំណេញរកតែផលប្រយោជន៍ផ្ទាល់ខ្លួន។ មិនត្រឹមតែទស្សនាហើយទទួលបានការអប់រំនោះទេ ភ្ញៀវកិត្តិយសដែលភាគច្រើនជាយុវវ័យប្រុសស្រី បានផ្ដល់ការគាំទ្រ និងលើកទឹកចំពោះល្ខោននិយាយដែលជាសិល្បៈខ្មែរទី 6នេះ បាននាំគ្នាមកទស្សនាយ៉ាងភ្លូកទឹកភ្លូកដីរហូតដល់សឹងតែរកកន្លែងអង្គុយគ្មាន។

គួរបញ្ជាក់ផងដែរថា តាមរយៈល្ខោននិយាយរឿង «តៃកុងហំ ហៅ ថៅកែចិត្តចោរ» ដ៏ល្អឯកមួយនេះ ធ្វើឱ្យកូនខ្មែរដែលជាអ្នកថែរក្សា ស្រឡាញ់ និងអភិរក្សសិល្បៈដូនតាខ្មែរ ងាកមកគាំទ្រ និងស្នើសុំឱ្យមានល្ខោននិយាយដែលមានភាពអប់រំ និងបែបផែនទស្សនវិទ្យាបែបនេះឱ្យបានច្រើន និងជាបន្ដបន្ទាប់ទៀត ដើម្បីឱ្យព្រលឹងនៃសិល្បៈដូនតាខ្មែរបានរស់ និងដង្ហើមដកទៅដល់ពេលអនាគតថែមទៀត៕

May 28, 2018

ពែក មី បដិសេធមិនទទួលយកការចរចា និងថ្លៃព្យាបាលរបួសប្អូនប្រុស

កាលពីពេលថ្មីៗនេះ តារាកំប្លែងប្រចាំស្ថានីយទូរទស្សន៍ CTN គឺលោក ពែក មី បានបង្ហោះវីដេអូចេញមុខបដិសេធចំពោះការចរចា និងមិនទទួលយកទឹកប្រាក់ជួយចេញថ្លៃព្យាបាលរបួសរបស់ប្អូនថ្លៃប្រុសរបស់លោក ចំនួន 4,000 ដុល្លារសហរដ្ឋអាមេរិកពីភាគីម្ខាងទៀតឡើយ។

នៅក្នុងវីដេអូដែលមានរយៈពេលជាង 6នាទី លោក ពែក មី បាននិយាយថា ខាងមន្ត្រីអធិការខណ្ឌឫស្សីកែវ បានមកចរចាជាមួយក្រុមគ្រួសាររបស់លោក ដោយបានប្រាប់ថា ខាងភាគីរថយន្ដមានសន្ដានចិត្តបុណ្យជួយចេញថ្លៃព្យាបាលរបួសប្អូនប្រុសរបស់លោកជាថវិកាចំនួន 4,000 ដុល្លារសហរដ្ឋអាមេរិក តែលោកបានបដិសេធ និងមិនទទួលយកការចរចាណាមួយឡើយ។ លោកអះអាងថា «ករណីប្អូនប្រុសខ្ញុំ ជាករណីមនុស្សឃាត តែហេតុអ្វីបានជាខាងអធិការខណ្ឌឫស្សីកែវបានសរសេរថា ខាងភាគីរថយន្ដមានសន្ដានចិត្តបុណ្យជួយចេញថ្លៃព្យាបាល 4,000 ដុល្លារដល់ខាងភាគីជិះម៉ូតូដែលជិះបុកជញ្ជាំងដោយខ្លូនឯងទៅវិញ?។ បងប្អូនអើយ…យើងពិតជាមិនអាចទទួលការចរចានេះបានទេ»។

ទន្ទឹមគ្នានោះដែរ តារាកំប្លែងមានឈ្មោះបោះសំឡេងរូបនេះ បានអះអាងនៅក្នុងវីដេអូរបស់ខ្លួនទៀតថា លោកនឹងបន្ដដាក់ពាក្យបណ្ដឹងទៅខាងសាលារាជធានីបន្ដទៀតដើម្បីទាមទាររកយុត្តិធម៌ជូនប្អូនប្រុសរបស់លោក ដោយលោកបានបញ្ជាក់ និងប្រកាន់ជំហរប្រាប់មហាជនប្រិយមិត្តខ្មែរទាំងអស់ថា ករណីប្អូនថ្លៃប្រុសរបស់លោក គឺជាករណីមនុស្សឃាត មិនមែនជាករណីជិះម៉ូតូទៅបុកជញ្ជាំងរបងដោយខ្លួនឯងនោះទេ ព្រោះរថយន្ដជនល្មើសបានប្រដេញពីក្រោយយ៉ាងប្រកិត រហូតដល់មានគ្រោះថ្នាក់នោះកើតឡើងតែម្ដង។

គួរបញ្ជាក់ផងដែរថា លោក ពែក មី បានអំពាវឱ្យមហាជនបានជ្រាប និងអរគុណចំពោះក្ដីបារម្ភមកកាន់ក្រុមគ្រួសារលោក ដោយបានចំណាយថវិកាទូរស័ព្ទមកសួរនាំលោកអំពីដំណើររឿងទៀតផង។ សូមជម្រាបន្ថែមថា ខណៈនេះប្អូនប្រុសនាយ ពែក មី កំពុងសម្រាកព្យាបាលនៅឯមន្ទីរពេទ្យ ឯប្រទេសវៀតណាម។ ដើម្បីកាន់តែជាក់ច្បាស់បន្ថែមទៀត សូមអញ្ជើញប្រិយមិត្តទាំងអស់ទស្សនាវីដេអូរបស់នាយ ពែកមី ខាងក្រោមនេះ៖

May 28, 2018

Category: សង្គម និងសេដ្ឋកិច្ច