សង្គម និងសេដ្ឋកិច្ច - La Reine Media

Lewandowski ចង់ចាកចេញពីក្លិប Bayern

ខ្សែប្រយុទ្ធដ៏ឆ្នើម Robert Lewandowski របស់ក្លិប Bayern Munich ចង់ចាកចេញពីក្លិបក្នុងក្របខ័ណ្ឌ Bundesliga មួយនេះ នៅរដូវក្តៅនេះ ដើម្បីស្វែងរកការប្រជែងថ្មីៗ។ នេះបើយោងទៅតាមការបញ្ជាក់របស់ភ្នាក់ងារតំណាងរបស់គេដែលប្រាប់ទៅកាន់កាសែត Sport Bild កាលពីថ្ងៃពុធ។

លោក PiniZahavi បានប្រាប់កាសែតប្រចាំសប្តាហ៍មួយនេះថា៖ «Robert មានអារម្មណ៍ថា រូបគេត្រូវការផ្លាស់ប្តូរ និងស្វែងរកការប្រជែងថ្មីមួយក្នុងអាជីពរបស់គេ។ អ្នកចាត់ការទូទៅរបស់ក្រុម Bayern បានដឹងពីបំណងនេះហើយ»។ Lewandowski វ័យ 29ឆ្នាំ ដែលកិច្ចសន្យារបស់គេក្នុងក្លិប Bayern មានសុពលភាពរហូតដល់ឆ្នាំ2021នោះ ត្រូវបានទាក់ទងជាមួយនឹងក្លិប Real Madrid ស្របពេលដែលក្លិប Paris Saint-Germain និងក្លិប Chelsea និង Manchester United របស់ក្របខ័ណ្ឌ Premier League ក៏ត្រូវបានគេគិតថាមានការចាប់អារម្មណ៍ផងដែរ។ រូបគេគឺជាអ្នករកបានគ្រាប់បាល់ច្រើនជាងរបស់ក្របខ័ណ្ឌ Bundesliga ក្នុងរដូវកាលដែលទើបតែបញ្ចប់នាពេលថ្មីៗនេះ ដោយរកបាន 29គ្រាប់ ដោយបានឈ្នះពានលីកជាលើកទី3 ក្រោយពីទទួលជ័យជម្នះក្នុងរដូវកាលឆ្នាំ2015-2016 ជាមួយនឹង Bayern និង 2013-2014 ជាមួយនឹងអតីតក្លិប Borussia Dortmund។

កាលពីចុងខែកុម្ភៈ ខ្សែប្រយុទ្ធអន្តរជាតិប៉ូឡូញរូបនេះ បានចែកផ្លូវជាមួយភ្នាក់ងារតំណាងចាស់កាលពីមុនរបស់គេគឺលោក Cezary Kucharski និងបានចុះហត្ថលេខាជាមួយនឹងលោក Zahavi ដែលជាភ្នាក់ងារតំណាងដ៏មានឥទ្ធិពលម្នាក់ក្នុងកីឡាបាល់ទាត់ពិភពលោក៕

ប្រភពពី៖ Channel News Asia

May 31, 2018

Pickford ៖ ក្រុមអង់គ្លេស ហ្វឹកហាត់បច្ចេកទេសប៉េណាល់ទី មុន World Cup ចាប់ផ្ដើម

ក្រុមបាល់ទាត់ជម្រើសជាតិអង់គ្លេស កំពុងតែត្រៀមលក្ខណៈសម្រាប់ការស៊ុតបាល់ប៉េណាល់ទី ក្នុងព្រឹត្តិការណ៍ World Cup នៅខែក្រោយនេះ ខណៈដែលពួកគេសម្លឹងរកការគេចឱ្យផុតពីជោគវាសនាដូចគ្នាមួយនៃការធ្លាក់ចេញពីយុទ្ធនាការដ៏ធំមួយនេះ ដោយសារតែបាល់ប៉េណាល់ទីកាត់សេចក្តី។ នេះបើយោងតាមការបញ្ជាក់របស់អ្នកចាំទី Jordan Pickford។

ក្រុមជម្រើសជាតិអង់គ្លេស មានកំណត់ត្រាដ៏គួរឱ្យសោកសៅក្នុងស្ថានភាពកាត់សេចក្តី ក្រោយពីបានរងបរាជ័យ 6លើកក្នុងចំណោមការស៊ុតបាល់ប៉េណាល់ទី 7លើក ក្នុងព្រឹត្តិការណ៍ធំៗ។ ការទទួលជ័យជម្នះតែ 1លើកគត់របស់ពួកគេនោះបានកើតឡើងនៅពេលប្រកួតជាមួយនឹងក្រុមជម្រើសជាតិអេស្ប៉ាញ ក្នុងការប្រកួតវគ្គ 8ក្រុមចុងក្រោយនៃយុទ្ធនាការ Euro ឆ្នាំ1996។ Pickford បានប្រាប់បណ្តាញសារព័ត៌មានរបស់អង់គ្លេសថា៖ «ក្នុងពេលហ្វឹកហាត់ យើងកំពុងតែធ្វើការងារជាច្រើនទាក់ទងនឹងការត្រៀមលក្ខណៈផ្សេងៗសម្រាប់របៀបដែលយើងចង់បាន»។ អ្នកចាំទីអន្តរជាតិអង់គ្លេសវ័យ 24ឆ្នាំរូបនេះ ដែលបានបង្ហាញខ្លួនជាអន្តរជាតិសម្រាប់ក្រុមជម្រើសជាតិអង់គ្លេសចំនួន 2លើកនោះ បានបន្ថែមទៀតថា៖ «មានអ្នកស៊ុតបាល់ប៉េណាល់ទីខ្លាំងៗជាច្រើន ហើយយើងបានធ្វើការហ្វឹកហាត់យ៉ាងខ្លាំងក្នុងរយៈពេលប៉ុន្មានថ្ងៃចុងក្រោយនេះ។ វាពិតជាលំបាកណាស់ក្នុងការសង្គ្រោះពួកគេ»។

Pickford គឺជាអ្នកចាំទីម្នាក់ក្នុងចំណោមអ្នកចាំទី 3នាក់ក្នុងក្រុមរបស់លោក Gareth Southgate ខណៈដែលអ្នកចាត់ការទូទៅរូបនេះ បានលុបចោលអ្នកចាំទីពោរពេញដោយបទពិសោធ ប៉ុន្តែធ្លាក់ចុះទម្រង់លេង Joe Hart សម្រាប់យុទ្ធនាការចាប់ពីថ្ងៃទី14 ខែមិថុនា ដល់ថ្ងៃទី15 ខែកក្កដា ក្នុងប្រទេសរុស្ស៊ី៕

ប្រភពពី៖ Channel News Asia

May 31, 2018

ដើរលេង ដើរញ៉ាំ ដើរទិញឥវ៉ាន់ នៅ China Town ល្បីៗទូទាំងពិភពលោក

តំបន់ ឆៃណា ថោន ជាធម្មតាច្រើនតែស្ថិតនៅតាមទីក្រុងធំៗក្នុងប្រទេសជាច្រើននៅទូទាំងពិភពលោក ដែលពោរពេញទៅដោយបរិយាកាស និងវប្បធម៌បែបចិន។ លេខនេះ ឡារ៉ែន សូមនាំមិត្តអ្នកអានទៅស្គាល់តំបន់ ឆៃណាថោន 8កន្លែង ដែលអ្នកចូលចិត្តធ្វើដំណើរកម្សាន្តទាំងឡាយគួរតែបានទៅដើរលេង ដើរញ៉ាំអាហារចិនឆ្ងាញ់ៗនៅទូទាំងពិភពលោកដូចតទៅ។

1. China Town នៅក្នុងទីក្រុងឡាហាវ៉ាន ប្រទេសគុយបា
China Town នៅទីនេះមានឈ្មោះថា Barrio Chino de la Habana (បារីអូ ឈិណូ ឌើ ឡាហាបាណា) ជា ឆៃណា ថោន ដ៏ចំណាស់ និងធំបំផុតក្នុងភូមិភាគឡាទីនអាមេរិកា។ បង្កើតឡើងដោយជនជាតិចិនក្វាងទុង ដែលភៀសខ្លួនចូលទៅធ្វើការនៅក្នុងប្រទេសគុយបាក្នុងអំឡុងសតវត្សរ៍ទី19។

2. China Town នៅក្នុងទីក្រុង Kolkata ប្រទេសឥណ្ឌា
ម្ហូបអាហារចិនលាយឡំនឹងក្លិនអាហារឥណ្ឌាបញ្ចេញក្លិនក្រអូបឈ្ងុយទូទាំងតំបន់ ឆៃណាថោន ក្នុងទីក្រុងកុលកាតា ដោយបែងចែកជា2ផ្នែកផ្សេងគ្នា គឺផ្នែកទីក្រុងចាស់ ហៅថា “ទិរេត តា បាហ្សារ៍” និងផ្នែកទីក្រុងថ្មី ហៅថា “តាន់ក្រា”។ បច្ចុប្បន្នមានការរៀបចំជាពិធីបុណ្យប្រចាំឆ្នាំធំៗចំនួន3លើក គឺបុណ្យចូលឆ្នាំចិន សំពះព្រះខែ និងឆេងម៉េង។

3. China Town នៅក្នុងទីក្រុងបាងកក ប្រទេសថៃ
មិនចាំបាច់ប្រាប់ ក៏អ្នកទេសចរខ្មែរយើងភាគច្រើនបានដឹងដែរថា ឆៃណា ថោន ឬ “យ៉ៅវរ៉ាត” ក្នុងទីក្រុងបាងកក មានមន្តស្នេហ៍ទាក់ទាញភ្ញៀវទេសចរខ្លាំងប៉ុនណានោះ ជាពិសេសនៅពេលព្រលប់ៗអូសបន្លាយរហូតទៅដល់កណ្ដាលអធ្រាត្រ បរិយាកាសនឹងអ៊ូអរខ្លាំងបំផុត។ សងខាងថ្នល់នឹងពោរពេញទៅដោយតូបលក់ម្ហូបអាហារ និងគ្រឿងក្លែមដ៏ច្រើន ដែលអាចហៅបានថា ជាស្ថានសួគ៌សម្រាប់អ្នកផឹកតែម្ដង។

4. China Town ប្រទេសសាំងហ្គាពួរ
មិនគួរខកខានឡើយសម្រាប់ភាពប្លែកភ្នែកក្នុងពិធីបុណ្យចូលឆ្នាំចិនក្នុងតំបន់ ឆៃណា ថោនកណ្ដាលទីក្រុងសាំងហ្គាពួរ និងគោមភ្លើងស្អាតៗដែលតុបតែងទៅតាមដងផ្លូវ និងដើរជ្រើសរើសទិញវត្ថុអនុស្សាវរីយ៍ពីហាងលក់ទំនិញផ្សេងៗដ៏ច្រើនរាប់មិនអស់។ ក្រៅពីនេះនៅសម្បូរហូរហៀរទៅដោយ រង្គសាល ភោជនីយដ្ឋាន សណ្ឋាគារ ផ្ទះសំណាក់ ដែលភ្ញៀវទេសចរអាចជ្រើសរើសចូលគេងសម្រាកតាមកម្លាំងសាច់ប្រាក់របស់ខ្លួន។ ក្រៅពីនេះនៅមានមណ្ឌលទេសចរណ៍ល្បីៗជាច្រើនទៀត ដូចជា វត្តក្លឹង Sri Mariamman និង Chinese Heritage Centre ជាដើម។

5. China Town ក្នុងទីក្រុង Incheon
ប្រទេសកូរ៉េ ខាងត្បូងគឺជា ឆៃណា ថោន តែមួយគត់នៅក្នុងប្រទេសកូរ៉េ ខាងត្បូង ចាប់កំណើតឡើងដំណាលៗគ្នានឹងការសាងសង់កំពង់ផែអីុនឆន់ ដែរ ដើម្បីប្រគល់ទីកន្លែងឱ្យជនជាតិចិនបានចូលមករកស៊ីលក់ដូរ។ កាលពីអតីតកាលធ្លាប់អ៊ូអរកកកុញទៅដោយតូបលក់ទំនិញដ៏ច្រើន តែបច្ចុប្បន្នក្លាយជាភោជនីយដ្ឋានស្ទើរតែទាំងអស់ ដែលគ្រប់អំឡុងពេលបុណ្យចូលឆ្នាំចិន អ្នកលក់ដូរនឹងនាំគ្នាមករៀបចំតូបលក់ទំនិញយ៉ាងព្រម-ព្រៀងគ្នា និងមានការរៀបចំតុបតែងក្រដាសពណ៌ និងគោមភ្លើងពណ៌ក្រហមគ្រប់ច្រកល្ហក ស្រស់ស្អាត និងភ្លឺចិញ្ចាចតែម្តង។

6. China Town ក្នុងទីក្រុង Vancouver ប្រទេសកាណាដា
ជាប់លំដាប់ជួរមុខគេរបស់ទីប្រជុំជនជនជាតិចិនដែលធំលេខ3 របស់តំបន់អាមេរិកខាងជើង។ ការរីកធំធាត់របស់តំបន់ ឆៃណា ថោន នេះ កើតឡើងនៅពេលដែលលោក ទឹង សៀវ ភិងប្រកាសប្រគល់ឯករាជ្យដល់កោះហុងកុងឱ្យត្រឡប់ចូលមកក្នុងរង្វង់ដៃរបស់ប្រទេសចិនវិញ។ ដោយក្ដីបារម្ភព្រួយខ្លាចជីវិតខ្លួនឯងមិនមានសុវត្ថិភាព ជនជាតិចិនចំនួនដ៏ច្រើនក៏បានភៀសខ្លួនចូលមករស់នៅក្នុងទីក្រុងវេនឃូវើរ ហើយបច្ចុប្បន្ន គេឃើញមានហាងលក់ទំនិញស្ទីលបែបចិនជាច្រើន។

7. China Town ក្នុងរដ្ឋ Sanfransicso សហរដ្ឋអាមេរិក
បើសិនទៅថតរូបស្ពាន Golden Gate កុំភ្លេចឆៀងចូលទៅលេង ឆៃណា ថោន ផងណា៎ នៅទីនោះមានប្រជាជនចិនចូលមករស់នៅជាង160ឆ្នាំមកហើយ ទើបអាចរាប់បានថា ជា China Town ដែលចំណាស់បំផុតក្នុងតំបន់អាមេរិកខាងជើង។ ទីកន្លែងដែលគួរឱ្យចាប់អារម្មណ៍នោះគឺ Golden Gate Fortune Cookie Factory ជារោងចក្រដែលស្ថិតក្នុងអគារតូចមួយក្នុងច្រកផ្លូវ Ross Alley។ នៅពេលលោកអ្នកដើរចូលទៅជិត នឹងបានធំុក្លិនក្រអូបឈ្ងុយរបស់នំឃុកគី ដែលត្រៀមជាស្រេចសម្រាប់ឱ្យលោកអ្នកទទួលទានបែបថ្មីក្ដៅៗទើបចេញពីឡដុត។

8. China Town ក្នុងទីក្រុង London ចក្រភពអង់គ្លេស
តំបន់ ឆៃណា ថោន ក្នុងទីក្រុងឡុនដុន ឬដែលអ្នកទេសចរនាំគ្នាហៅថា តំបន់ សូហូ (Soho) អាចចាត់ទុកថាជា ឆៃណា ថោន ធំជាងគេបំផុតក្នុងទ្វីបអឺរ៉ុប។ ពេញទៅដោយហាងលក់ទំនិញ ហាងលក់ថ្នាំចិនសែ ភោជនីយដ្ឋានគ្រប់ជាតិសាសន៍ ស៊ុបភើរម៉ាឃេត ដែលមានទំនិញនាំចូលត្រូវចិត្តជនជាតិអាស៊ីច្រើនបំផុត។ ចំណែកឯការប្រារព្ធពិធីបុណ្យចូលឆ្នាំចិននៅទីនេះវិញ អាចនិយាយបានថា មិនចាញ់ទីណាៗទាំងអស់ មានទាំងការលោតម៉ុងសាយ ព្យុហយាត្រាសម្ដែងកាយវប្បកម្ម និងក្បាច់គុនដាវចិន និងអុចផាវលាន់ខ្ទរខ្ទារតែម្តង សប្បាយខ្លាំងណាស់៕

May 30, 2018

នាយ ឆើត ថ្ងូរថា ជិតបាត់បង់ការងារសិល្បៈហើយ បើទោះខំតស៊ូជិត 30ឆ្នាំហើយក្ដី

ប៉ុន្មាននាទីមុននេះ នៅក្នុងគណនីហ្វេសប៊ុករបស់តារាកំប្លែងជើងចាស់ លោកពៅ គីសាន់ ហៅនាយ ឆើត បានបង្ហោះរូបភាពជាច្រើនសន្លឹកដែលបង្ហាញឱ្យដឹងថា លោកកំពុងតែគ្មានការងារធ្វើបន្ដិចម្ដងៗហើយ។ មហាជនអ្នកគាំទ្រពិតជាមានការភ្ញាក់ផ្អើលជាខ្លាំង ខណៈដែលតារាប្រុសរូបនេះបានប្រាប់អ្នកគាំទ្រគ្រប់រូបថា សូមឱ្យនៅចងចាំរូបលោកផង ខណៈពេលនេះការងារសិល្បៈរបស់លោកបានធ្លាក់ចុះ។ ដំណឹងនេះបានធ្វើឱ្យអ្នកគាំទ្រជាច្រើនពិតជាមានអារម្មណ៍ថា ក្តុកក្តួលជាខ្លាំង ព្រោះតារារូបនេះបានបម្រើការងារសិល្បៈអស់រយៈពេលជាង 30ឆ្នាំមកហើយ។

ជាមួយគ្នានេះ តារាប្រុសដែលធ្លាប់សម្ដែងជាតួប្រុសចរិតកោងកាច ឬក៏ជាតួប្រុសដែលមានចរិតបងធំ(តួចិត្តអាក្រក់) បានបញ្ចាក់នៅលើហ្វេសប៊ុករបស់ខ្លួនថា «ឱកាសកាងារសិល្ប:របស់ខ្ញុំបានបាត់បង់ម្ដងបន្តិចៗហើយ ខ្ញុំគ្មានអ្វីក្រៅពីសុំឱ្យបងប្អូនទាំងអស់គ្នាចងចាំរូបខ្ញុំបាទម្នាក់នេះដែលបានបម្រើអារម្មណ៍បងប្អូនទស្សនិកជនអស់រយ:ពេលជាង 30ឆ្នាំមកហើយនេះទេ រហូតមកដល់ពេលនេះសង្ឃឹមថា បងប្អូននឹងជួយចែករំលែកឱ្យអ្នកដែលស្រឡាញ់ និងគាំទ្រខ្ញុំបាទបានឃើញផង សូមអគុណបងប្អូនជាទីស្រឡាញ់»។

គួរបញ្ជាក់ផងដែរថា នៅពេលដែលបានអានសារមួយនេះហើយ អ្នកគាំទ្រជាច្រើននាក់ណាស់បានសម្ដែងអារម្មណ៍ អាណិតអាសូរដល់រូបលោកខ្លាំងមែនទែន ហើយអ្នកទាំងអស់គ្នាបានបញ្ចេញមតិយោបល់ដោយប្រើពាក្យលើកទឹកចិត្តព្រមទាំងផ្ដល់ក្ដីសង្ឃឹមថា តារារូបនេះនឹងមានការងារសិល្បៈធ្វើច្រើនដូចកាលពីមុនឡើងវិញមិនខានក្នុងពេលឆាប់ៗនេះ៕

May 30, 2018

អ៊ើ!!! ពេជ្រ ថៃ ច្រៀងភ្លេចប៉ារ៉ូលម្ដង រងការរិះគន់ដូចព្យុះ

(រកច្រកគេចមិនឃើញទៀតហើយ ពេជ្រ ថៃ អ៊ើយ!) គ្រាន់តែច្រៀងភ្លេចប៉ារ៉ូលម្ដងសោះ រងការរិះគន់ពីគ្រប់មជ្ឈដ្ឋានតែម្ដង និងមានមតិខ្លះថែមទាំងបានលាន់មាត់ថា យកមុខម្ចាស់ពាន The Voice Kids ទៅបោះចោលលើឆាកប្រគំតន្ត្រី អ៊ីឈីតាន់ ដែលធ្វើឱ្យអ្នកគាំទ្រខ្មាសគេជំនួសទៀតផង។

តាមរយៈវីដេអូដែលបានបង្ហោះ និងស៊ែរពេញបណ្ដាញសង្គមហ្វេសប៊ុកនោះ គេបានមើលឃើញថា ខណៈដែលតារាវ័យក្មេងរូបនេះកំពុងច្រៀងបទ «រដឺនមានស្នេហ៍» សុខៗ ក៏ស្រាប់តែភ្លេចប៉ារ៉ូលស្ទើរតែទាំងស្រុង និងមិនត្រឹមតែប៉ុណ្ណឹងទេថែមទាំងធ្វើហាក់ដូចជាមិនខ្វល់ពីការច្រៀងខុសនោះទៀត(អូហូ ពេជ្រ ថៃ អ៊ើយ)។

គួរកត់សម្គាល់ផងដែរថា ការសម្ដែងលើឆាកតន្ត្រីធំលើកនេះ ពេជ្រ ថៃ ហាក់បីដូចជាច្រៀងភ្លេងទៅដោយភ្លេង ហើយអ្នកច្រៀងក៏មិនព្រមច្រៀង ឯភ្លេងគិតតែពីលេងចោលរហូតដល់ចប់តែម្ដង ព្រោះថា ខ្លាចកាន់តែអាម៉ាស់ជាងហ្នឹង។ មជ្ឈដ្ឋានមួយចំនួនបានលើកឡើងថា «ប្អូនទន្ទេញប៉ារ៉ូលមិនទាន់ចាំផង ម៉េចប្រញាប់មកច្រៀងម្ល៉េះ» ហើយណាមួយប្អូនអាចនៅក្មេងខ្ចី កំហុសឆ្គងតិចតួច មិនអាចរំលងបានទេ មានតែការខន្ដីអភ័យទោសឱ្យតែប៉ុណ្ណោះ។ តែអ្វីដែលសំខាន់ជាងនេះទៅទៀតនោះគឺ កុមារារូបនេះច្បាស់ជាគេចមិនផុតពីការរិះគន់របស់តារាចម្រៀងកំពូលទើស ម៉ៃ សុគន្ធ បានឡើយ ដោយតារាមហាកំពូលទើសរូបនោះបានពន្លះយ៉ាងចាស់ដៃថា «សំឡេងក៏មនុស្សក្រិន រូបរាងក៏មនុស្សក្រិន ស្តាយក្មេងសំឡេងល្អៗណាស់ដែលមិនបានលើកពានពិត ឈប់!ឈប់ អ្នកណាខ្លះដែលបោកទូរទស្សន៍ចោល»។

ដើម្បីឱ្យកាន់តែជាក់ច្បាស់ សូមទស្សនាវីដេអូខាងក្រោម៖

https://www.youtube.com/watch?v=ilmJO8VGrB4

May 30, 2018

បង្កងតង្កៀបក្រហម កំពុងពេញនិយមនៅលើទីផ្សារកម្ពុជា

បង្កងតង្កៀបក្រហម ជាប្រភេទអាហារមានរសជាតិឆ្ងាញ់មិនចាញ់បង្កងទន្លេ ដែលត្រូវបានគេនាំពូជចូលពីប្រទេសថៃយកមកចិញ្ចឹមក្នុងកសិដ្ឋានមួយកន្លែងនៅក្នុងប្រទេសកម្ពុជា និងទទួលបានការគាំទ្រខ្លាំងនៅលើទីផ្សាររហូតចិញ្ចឹមលក់ឱ្យអតិថិជនសឹងតែមិនទាន់ទៀតផង។

លោក ផល រដ្ឋា ម្ចាស់កសិដ្ឋានចិញ្ចឹមបង្កងតង្កៀបក្រហមដែលមានទីតាំងនៅភូមិពាមឯក ឃុំពាមឯក ស្រុកឯកភ្នំ ខេត្តបាត់ដំបងបានមានប្រសាសន៍ថា មុននឹងចាប់ផ្តើមចិញ្ចឹមបង្កងនេះ លោកបានទៅរៀនជាមួយប្រជាជនថៃនៅឯប្រទេសថៃកាលពីអំឡុងឆ្នាំ2005 ខណៈពេលដែលព្រះមហាក្សត្រថៃកំពុងបំផុសឱ្យប្រជាកសិករថៃចិញ្ចឹមបង្កងប្រភេទនេះដើម្បីរកចំណូលបន្ថែមសម្រាប់ផ្គត់ផ្គង់ជីវភាពក្នុងគ្រួសារ។

លោកថា ក្រោយពីរៀនរួច លោកមិនបានចិញ្ចឹមបង្កងនេះភ្លាមៗទេ ព្រោះដោយសារតែកាលនោះបង្កងប្រភេទនេះកំពុងល្បីល្បាញ តែមិនសូវមានអ្នកចិញ្ចឹមសម្រាប់បង្កាត់កូនលក់ទេ និងមានការពេញនិយមចិញ្ចឹមខ្លាំងនៅក្នុងប្រទេសថៃផងនោះ ទើបធ្វើឱ្យពូជរបស់វាត្រូវបានគេលក់ក្នុងតម្លៃខ្ពស់ខ្លាំងណាស់គឺបង្កងពូជ 2ក្បាលតម្លៃដល់ទៅ 100ដុល្លារឯណោះ។

រហូតមកដល់ឆ្នាំកន្លងទៅ ពោលគឺឆ្នាំ 2017 បង្កងនេះរាងធ្លាក់ថ្លៃបន្តិចនៅលើទីផ្សារប្រទេសថៃ ដោយសារមានអ្នកចិញ្ចឹម និងបង្កាត់កូនលក់ច្រើនឡើង ទើបលោកសម្រេចទិញកូនបង្កងតូចៗដឹកយកមកចិញ្ចឹមនៅប្រទេសកម្ពុជាក្នុងតម្លៃ 1ដុល្លារសម្រាប់កូនបង្កងមួយក្បាល។

ពូជបង្កងនេះងាយស្រួលដឹកជញ្ជូនណាស់ គ្រាន់តែដាក់កូនវានៅក្នុងធុងស្នោ ហើយដាក់ទឹកកកដុំពីលើឱ្យត្រជាក់ប៉ុណ្ណោះ គេអាចដាក់តាមឡានតាក់ស៊ីយកមកដល់ស្រុកខ្មែរដោយមិនមានងាប់ ឬប៉ះពាល់ដល់សុខភាពបង្កងឡើយ។ ប៉ុន្តែមុននឹងដឹកមក កសិករត្រូវរៀបចំស្រះទុកជាមុនឱ្យហើយ អាចជាស្រះ ឬត្រពាំងធម្មជាតិក៏បាន ឬក៏ស្រះសិប្បនិម្មិតធ្វើពីស៊ីម៉ង់ត៍ក៏បាន តែត្រូវធ្វើដំបូលប្រក់ពីលើ និងធ្វើយ៉ាងណាឱ្យស្រះនោះមានខ្យល់អុកស៊ីហ្ស៊ែន ទើបបង្កងអាចរស់បាន។

អ្នកជំនាញវ័យក្មេងរូបនេះបានបញ្ជាក់បន្ថែមថា ជាទូទៅគេមិនចាំបាច់កំណត់ទំហំស្រះនោះទេ ប៉ុន្តែដើម្បីឱ្យងាយស្រួលប្រមូលផល ក៏ដូចជាការថែទាំផងនោះ គេអាចធ្វើស្រះទំហំ 16 x 26ម៉ែត្រ ហើយបើសិនជាស្រះធ្វើពីស៊ីម៉ង់ត៍ គេត្រូវដាក់ទឹកជម្រៅ 30សង់ទីម៉ែត្រ និងស្រះត្រពាំងគេត្រូវបញ្ចូលទឹក 1.2ម៉ែត្រដើម្បីឱ្យត្រូវតាមស្តង់ដារដែលគេបានបង្រៀន និងធ្វើយ៉ាងណាឱ្យទឹកក្លាយជាទឹកល្អក់ ចៀសវាងទឹកថ្លាថ្ងៃចាំងចូលនាំឱ្យទឹកក្នុងអាងក្តៅ។

ចំពោះការរៀបចំស្រះនេះដែរ មុនដំបូងគេត្រូវជីកដីហាលចោល និងបាចកំបោរសទុកចោលមួយរយៈ ដើម្បីសម្លាប់មេរោគ ក៏ដួចជាដើម្បីបង្កើតអុកស៊ីហ្ស៊ែន ឬបង្កើតជាទឹកអាល់កាឡាំង(80-120)និងត្រូវឱ្យមានសារធាតុ PH យ៉ាងហោច 7.5 នៅក្នុងស្រះ។ បើសិនជាស្រះមិនមានសារធាតុទាំងអស់នេះទេ គេមិនអាចចិញ្ចឹមបង្កងបានឡើយ ដោយសារពពួកសត្វប្រភេទនេះវាត្រូវការអុកស៊ីហ្ស៊ែនជាចាំបាច់ទើបអាចរស់បាន។ យ៉ាងណាក៏ដោយ បើសិនជាស្រះមិនមានសារធាតុខាងលើទាំងអស់នោះទេ គេអាចទិញថ្នាំដែលមានតម្លៃទាបមកដាក់ក្នុងស្រះដើម្បីបង្កើតឱ្យមានអុកស៊ីហ្ស៊ែន និងសារធាតុទាំងពីរខាងលើបានដោយងាយ។

ក្រោយពីរៀបចំស្រះរួច និងគេនឹងពិនិត្យឃើញថា ក្នុងទឹកមានសារធាតុអុកស៊ីែហ្ស៊ន និងសារធាតុរ៉ែទាំងនោះហើយ គេអាចដាក់កូនបង្កងចូលទៅបាននិងដាក់ចំណីឱ្យស៊ីតាមធម្មតា។ ជាទូទៅបង្កងប្រភេទនេះមិនរើសចំណីទេ វាស៊ីទាំងបន្លែធម្មជាតិ ដូចជា ចក ត្រកួន ពោត សណ្តែក និងផ្លែឈើមួយចំនួនទៀត ឬអាចដាក់កូនត្រី ឬសាច់ឱ្យវាស៊ីក៏បាន ហើយវាមិនស៊ីចំណីច្រើនដូចត្រីរ៉ស់ ត្រីឆ្តោ ឬត្រីប្រានោះឡើយ។ បើសិនខ្វះចំណីកសិករអាចទិញចំណីដែលគេផលិតពីសាច់ត្រីស្រេចដើម្បីយកមកកូនបង្កងស៊ីក៏បាន ប៉ុន្តែធ្វើយ៉ាងណាចៀសវាងកុំឱ្យទឹកស្អុយហើយត្រូវរក្សាទឹកឱ្យល្អក់ជាប្រចាំ។

ក្រោយពីថែទាំ និងដាក់ចំណីឱ្យស៊ីជាប្រចាំបានប្រមាណជា3 ទៅ4ខែមក គេអាចប្រមូលផលបង្កងបានហើយ ដែលនៅពេលនោះក្នុងមួយក្បាលមានទម្ងន់ប្រហែលជា 1ខាំ ឬ8 ទៅ10ក្បាលមានទម្ងន់ 1គីឡូក្រាមហើយ។ បង្កងប្រភេទថ្មីនេះមិនខ្វះទីផ្សារនោះទេ មានទាំងទីផ្សារខ្មែរ និងទីផ្សារចិន ជាពិសេសអតិថិជនក្នុងក្រុងភ្នំពេញដែលក្នុងមួយគីឡូក្រាមគេអាចលក់បោះដុំបានចន្លោះពី20 ទៅ25ដុល្លារ ប៉ុន្តែសំខាន់គឺមិនមានបង្កងលក់គ្រប់គ្រាន់ឱ្យម៉ូយ។ ហើយបច្ចុប្បន្ននេះអ្នកចិញ្ចឹមបង្កងតង្កៀបក្រហមខាងលើ ឈប់ចិញ្ចឹមដើម្បីចាប់លក់ជាអាហារទៀតហើយ តែងាកមកចិញ្ចឹមយកពូជ (កូនបង្កង)ទុកលក់ឱ្យកសិករទិញយកទៅចិញ្ចឹមបន្តដែលឥឡូវកំពុងមានត្រូវការខ្លាំងនៅតាមបណ្តាខេត្តផ្សេងៗវិញម្ដង៕

May 30, 2018

នាយ គ្រឿន លើកទឹកចិត្តឱ្យអ្នកគាំទ្រស្រឡាញ់ និងកុំវាយតម្លៃបងៗដែលជាសន្ដិសុខ ( អ្នកយាម )

តារាកំប្លែងដែលមានឈ្មោះបោះសំឡេងនៅក្នុងប្រទេសកម្ពុជា នាយ គ្រឿន បានចូលរួមសម្ដែងក្នុងរឿង «ចិញ្ចៀនខ្មោច» ដែលជាវណ្ណកម្មថ្មីរបស់ផលិតកម្ម LD Picture ដែលបានតម្រូវឱ្យលោកសម្ដែងជាតួអង្គសន្ដិសុខ (អ្នកយាមផ្ទះ) មានភាពកំប្លុកកំប្លែង មិនសូវគ្រប់ទឹក ដើម្បីឱ្យមហាជនបានទស្សនារឿងនេះហើយ ផ្ទុះសំណើចតាំងពីដើមរឿង រហូតដល់ចប់តែម្ដង។

លោកថា ទន្ទឹមនឹងការបានសម្ដែងជាតួអង្គសន្តិសុខបែបនេះ ធ្វើឱ្យលោកបានមើលឃើញពីតថភាពនៃជិវិតរបស់បងៗអ្នកសន្ដិសុខយាមកាម ពីការងាររបស់ពួកគាត់ និងពីការតាំងចិត្តធ្វើការងារយ៉ាងហ្មត់ចត់របស់ពួកគាត់។ ដោយឡែកតាមរយៈសាច់រឿងវិញ គឺមានភាពខុសគ្នាស្រឡះតែម្ដង ព្រោះអ្នកដឹកនាំរឿងបានតម្រូវឱ្យខ្លួនសម្ដែងជាតួអង្គកំប្លែង ដែលខ្លួនគ្មានបំណងបន្តុះបង្អាប់ ឬមើលងាយដល់មុខរបរសន្តិសុខអ្នកយាមកាម និងអ្នកមានមុខរបរជាអ្នកយាមនៅតាមបុរី តាមផ្សារ ឬក្នុងក្រុមហ៊ុននានានោះឡើយ ពោលគឺសកម្មភាពក្នុងរឿងនេះគ្រាន់តែជាការសម្ដែង ដើម្បីឱ្យមហាជនបានចូលរួមសើចសប្បាយរីករាយជាមួយនឹងរូបលោកតែប៉ុណ្ណោះ។

នាយបានបញ្ជាក់ប្រាប់អ្នកសារព័ត៌មានថា «បាទបង! ចំពោះនៅក្នុងខ្សែភាពយន្តនេះ ខ្ញុំសម្ដែងជាតួអង្គសន្តិសុខ ដោយធ្វើកាយវិការឡិកឡក់ និយាយបែបកំប្លែង ដើម្បីឱ្យអ្នកទស្សនាបានសើចក្អាកក្អាយជាមួយនឹងសកម្មភាពរបស់ខ្ញុំតែប៉ុណ្ណោះ ដោយឡែកនៅក្នុងអាជីពមួយនេះ បើឆ្លុះបញ្ចាំងមកទិដ្ឋភាពខាងក្រៅ វាហាក់បីដូចជាប៉ះពាល់ដល់កិត្តិយស របស់ពួកគាត់បន្តិចហើយ។ ប៉ុន្តែតាមពិតមិនមែនអ៊ឹចឹងនោះទេ ខ្ញុំឃើញបងៗសន្តិសុខនៅតាមបុរី គឺមានភាពហ្មត់ចត់ គោរពការងារបានល្អ ហើយយាមដល់យប់ជ្រៅទៀតផង។ ទោះបីជាមុខរបរមួយនេះ មិនសូវមានអ្នកចាប់អារម្មណ៍ក្ដី ប៉ុន្តែបើងាកមកជីវិតនាពេលបច្ចុប្បន្ននេះវិញ សន្តិសុខនៅក្នុងបុរីនីមួយៗ គឺត្រូវបានយកចិត្តទុកដាក់ ពីសំណាក់ម្ចាស់បុរី»។

ជាចុងក្រោយ លោកបានអំពាវឱ្យបងប្អូនប្រិយមិត្តទាំងអស់ ស្រឡាញ់ និងឱ្យតម្លៃចំពោះអាជីពជាសន្ដិសុខនេះ សូមមេត្តាកុំរើសអើង ឬវាយតម្លៃតាមរយៈកែវភ្នែកអី ព្រោះថា នោះក៏ជាអាជីពសុចរិត និងមានតម្លៃនៅក្នុងជីវិតប្រចាំថ្ងៃផងដែរ។ ម៉្យាងទៀត សូមប្រិយមិត្តទាំងអស់គ្នា កុំភ្លេចទៅទស្សនារឿង «ចិញ្ចៀនខ្មោច» នៅថ្ងៃទី31 នេះ ដែលកំពុងតែដាក់បញ្ចាំងហើយនៅគ្រប់រោងកុនទាំងអស់៕

May 30, 2018

លំនៅឋានគ្រប់ប្រភេទនៅតែមានតម្រូវការរហូតដល់ឆ្នាំ2030

ចំនួនប្រជាជនកម្ពុជាត្រូវបានរំពឹងថានឹងកើនឡើងដល់15 ទៅ19លាននាក់នៅត្រឹមឆ្នាំ2030ខាងមុខ ដោយឡែកនៅក្នុងទីក្រុងភ្នំពេញ និងនៅតាមទីប្រជុំជនជិតខាងនឹងមានប្រជាជនកើនឡើងក្នុងចំនួនប្រមាណជា4 ទៅ7លាននាក់ដែលកត្តានេះនឹងជំរុញឱ្យមានតម្រូវការលំនៅឋានថ្មីប្រមាណជា 800.000ខ្នងផ្ទះទៀតបន្ថែមពីលើលំនៅឋានដែលមានស្រាប់នាពេលបច្ចុប្បន្ន។

ឯកឧត្តម ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា កាលពីឆ្នាំ2017កន្លងទៅ វិស័យអចលនទ្រព្យមានការកើនឡើងគួរឱ្យកត់សម្គាល់ ជាមួយនឹងគម្រោងអនុម័តចំនួន 3,418គម្រោង ហើយវិស័យសំណង់បានកើនឡើង22% ពីមួយឆ្នាំទៅមួយឆ្នាំ ដែលមានទឹកប្រាក់វិនិយោគរហូតដល់ 6.5ពាន់លានដុល្លារ ក្នុងនោះមាន82%ជាគម្រោងលំនៅឋាន។

លោក ហ៊ឹម សីហា ប្រធាននាយកដ្ឋានស្រាវជ្រាវនៃក្រុមហ៊ុន VTrust Appraisal មានប្រសាសន៍ថា និន្នាការនៃតម្រូវការលំនៅឋានពិតជាកើនឡើងដូចរបាយការណ៍ស្រាវជ្រាវរបស់ក្រសួងដែលបានរកឃើញពិតប្រាកដមែន ពិសេសលំនៅឋាននៅក្នុងរាជធានីភ្នំពេញ និងនៅតាមទៅប្រជុំជនក្នុងបណ្តាខេត្តមួយចំនួន ដោយសារចំនួនប្រជាជនមានការកើនឡើងជាលំដាប់ពីមួយឆ្នាំទៅមួយឆ្នាំ។

លោកបានបន្តថា មិនមែនតែនៅទីក្រុងភ្នំពេញទេសូម្បីនៅតាមបណ្តាខេត្តឆ្ងាយៗដូចក្រុងប៉ោយប៉ែត ខេត្តបន្ទាយមានជ័យ ខេត្តបាត់ដំបង ក្រុងសៀមរាប ខេត្តសៀមរាប និងក្រុងបានលុង ខេត្តរតនគិរី ជាដើម លំនៅឋានលក្ខណៈជាបុរីដែលសាងសង់នៅលើផ្ទៃដីធំៗ និងមានចំនួនច្រើនល្វែងត្រូវបានសាងសង់ឡើងជាបន្តបន្ទាប់ដែលមានទាំងលំនៅឋានមានតម្លៃខ្ពស់ និងសមរម្យសម្រាប់ដាក់លក់ជូនអតិថិជនដែលមានជីវភាពធូរធារ និងមានជីវភាពមធ្យមទៅតាមនោះដែរ។

លោក ស៊ិន សុជាតិ ប្រធានសមាគមស្ថាបត្យករកម្ពុជា (CSA) មានប្រសាសន៍ថា កម្ពុជាបានទទួលនូវកំណើនសេដ្ឋកិច្ចឆាប់រហ័សសម្រាប់ឆ្នាំកន្លងទៅដោយសារវិស័យសំណង់ និងអចលនទ្រព្យ គឺជាឧស្សាហកម្មឈានមុខគេមួយ។ ស្របពេលជាមួយគ្នានេះដែរ សេដ្ឋកិច្ចកម្ពុជាក៏កំពុងរីកចម្រើនខ្លាំងដោយសារវត្តមាននៃការសាងសង់សំណង់សណ្ឋាគារថ្មីៗ អគារការិយាល័យ ផ្សារទំនើប ភោជនីយដ្ឋាននិងអគារលំនៅឋានដែលកំពុងរីកដុះដាលឡើងយ៉ាងខ្លាំងនៅរាជធានីភ្នំពេញ និងបានរីករាលដាលទៅកាន់ទីក្រុងនានានៅតាមបណ្ដាខេត្តក្នុងប្រទេសកម្ពុជា។ បច្ចុប្បន្ននេះប្រជាជនថ្នាក់កណ្តាល (ដែលមានកម្រិតជីវភាពមធ្យម)កំពុងមានការកើនឡើង ហើយរបៀបនៃការរស់នៅរបស់ពួកគេកំពុងមានការផ្លាស់ប្តូរទាំងការងារ ជីវភាព និងបរិស្ថានផ្ទាល់ខ្លួនផងដែរ។

នៅក្នុងទីផ្សារអចលនទ្រព្យ ផ្ទះជាប់ដីត្រូវបានបែងចែកជា 4ប្រភេទ ដូចជាផ្ទះល្វែងជួរមុខ (purpose-build shophouse) ផ្ទះល្វែងធម្មតានៅក្នុងបុរី (residential link-house) ផ្ទះវីឡាភ្លោះ(semi-detached) និងផ្ទះវីឡាទោល(single-deta-ched)។ ចំណែកប្រភេទបន្ទប់ខុនដូមាន 5ប្រភេទ ដូចជាយូនីតខុនដូមានបន្ទប់គេង1(one bed-room or studio) បន្ទប់គេង2(two-bedroom) បន្ទប់គេង3 (three-bedroom) បន្ទប់គេង4(four-bedroom) និងបន្ទប់វីឡាខុនដូ (Penthouse)។

ជាមួយនឹងកំណើនដែលកើនឡើងនៃសំណង់លំនៅឋាននេះបានធ្វើឱ្យតម្រូវការនៃការប្រើប្រាស់គ្រឿងសង្ហារិម សម្ភារតុបតែងបរិវេណខាងក្នុង និងខាងក្រៅលំនៅឋានក៏មានតម្រូវការកាន់តែខ្លាំងឡើងផងដែរ។ លោកស្រី ឃាន ណារី ប្រធានផ្នែកលក់នៃក្រុមហ៊ុន INYHANOU ដែលផ្គត់ផ្គង់ពូកដំណេកនាំចូលពីសហរដ្ឋអាមេរិកមានប្រសាសន៍ថា ដោយយល់ដឹងពីសុខភាពដំណេកក៏ដូចជាតម្រូវការនៃប្រើប្រាស់សម្ភារក្នុងលំនៅឋានផងដែរនោះ ការលក់ពូកនៅក្នុងក្រុមហ៊ុនពិតជាមានការកើនឡើងច្រើន ដោយសារអតិថិជនមកជាវពូកដំណេកមានចំនួនច្រើនឡើងគួរឱ្យកត់សម្គាល់ពិសេសអ្នកមានចំណូលមធ្យម និងខ្ពស់ ខណៈដែលអគារលំនៅឋានក៏មានការកើនឡើងដែរជារៀងរាល់ឆ្នាំ។

ធនាគារអភិវឌ្ឍន៍អាស៊ី និងមូលនិធិរូបិយវត្ថុអន្តរជាតិក៏ដូចជារដ្ឋាភិបាលដែរបានធ្វើការព្យាករថា សេដ្ឋកិច្ចកម្ពុជានឹងកើនឡើងក្នុងរង្វង់ 7%ថេរនៅឆ្នាំនេះ និងឆ្នាំក្រោយ។ ក្នុងនោះវិស័យសំណង់គឺជាផ្នែកមួយដ៏សំខាន់ក្នុងចំណោមវិស័យដែលជំរុញសេដ្ឋកិច្ចផ្សេងៗទៀត ដូចជាវិស័យកសិកម្ម វិស័យឧស្សាហកម្ម និងវិស័យទេសចរណ៍ដែលធ្វើឱ្យមានកំណើនសេដ្ឋកិច្ចខ្ពស់ ក្នុងរយៈពេលប៉ុន្មានឆ្នាំចុងក្រោយនេះ៕

May 30, 2018

ដំណឹងជ្រើសរើសបុគ្គលិក

ឡារ៉ែន មេឌា ត្រូវការជ្រើសរើសបុគ្គលិកទាំង2ភេទ ផ្នែកកាត់តវីដេអូ (Video Editor) ចំនួន2នាក់

បេក្ខជន ឬបេក្ខនារីដែលមានចំណាប់អារម្មណ៍ សូមផ្ញើរប្រវត្តិរូបសង្ខេប (បើអាចសូមភ្ជាប់មកជាមួយនូវស្នាដៃដែលធ្លាប់ធ្វើ) មកក្រុមហ៊ុនយើងខ្ញុំតាមរយៈ
Email: [email protected] / [email protected]
Phone: 092 610 111 / 015 726 364

May 30, 2018

ចុំយក្ស!? កូនប្រុសទាំង2 របស់លោក ព្រាប សុវត្ថិ តម្លៃខ្លួនឡើងជិតស្មើឪពុក!

ដូចដែលប្រិយមិត្តជាច្រើនបានដឹងហើយថា បន្ទាប់ពីកូនប្រុសរបស់កំពូលតារាចម្រៀងលោក ព្រាប សុវត្ថិ បានឈានជើងចូលជ្រកទ្រនំហង្សមាសជាមួយឪពុកមិនទាន់បានប៉ុន្មានផង មួយរយៈចុងក្រោយនេះ គេកត់សម្គាល់ឃើញថា ប្រជាប្រិយភាពរបស់ពួកគេកាន់តែល្បី និងមានអ្នកស្គាល់ពួកគេកាន់តែច្រើនឡើងហើយ។ ដោយឡែកថ្មីៗនេះ ក៏ស្រាប់តែលេចធ្លាយតម្លៃខ្លួនឡើងឆាករបស់តារាចម្រៀងវ័យក្មេងដែលជាកូនប្រុសរបស់លោក ព្រាប សុវត្ថិ ដោយមួយកម្មវិធីតម្លៃខ្លួនឡើងខ្ពស់ជិតស្មើនឹងតម្លៃខ្លួនរបស់ឪពុកដែរ។

ជាក់ស្តែងកូនប្រុសទាំងពីររបស់លោក ព្រាប សុវត្ថិ សព្វថ្ងៃនេះកំពុងមានភាពមមាញឹកយ៉ាងខ្លាំងក្នុងវិស័យសិល្បៈ ដោយបានចេញច្រៀងនៅលើឆាកប្រគំតន្រ្តីធំៗ តាមបណ្តាខេត្តស្ទើរតែរៀងរាល់ថ្ងៃ។ ហើយអ្វីដែលធ្វើឱ្យគេចាប់អារម្មណ៍កាន់ខ្លាំងនោះ គឺតម្លៃខ្លួនកូនប្រុសរបស់លោក ព្រាប សុវត្ថិ ពិតជាមិនធម្មតាឡើយ ពោលគឺស៊ីថ្លៃមិនចាញ់តារាប្រុស-ស្រីល្បីៗនានាប្រចាំផលិតកម្មរស្មីហង្សមាសប៉ុន្មានឡើយ។

បើតាមប្រភពអ្នករៀបចំកម្មវិធីដែលសុំមិនបញ្ចេញឈ្មោះ បានទម្លាយឱ្យដឹងថា រាល់ពេលឡើងឆាកតន្រ្តីម្តងៗ កូនប្រុសទាំង2 គឺ សុវត្ថិ មុនីវណ្ណ និងសុវត្ថិ មុនីនាគ ត្រូវបានលោក ព្រាប សុវត្ថិ ជាឪពុកទារតម្លៃខ្លួនពីម្ចាស់កម្មវិធី ដល់ទៅជិត 4 ពាន់ដុល្លារអាមេរិកឯណោះ ដោយមិនរាប់បញ្ចូលទាំងកូនពៅរបស់លោកម្នាក់ទៀតនោះផង។ ប្រភពដដែលនោះក៏បានបង្ហើបឱ្យដឹងបន្ថែមទៀតដែរថា ប្រសិនបើមានការអញ្ជើញតែកូនប្រុសម្នាក់ដូចជា សុវត្ថិ មុនីវណ្ណ ឬក៏សុវត្ថិ មុនីនាគ ហើយឱ្យមានការសម្រួលតម្លៃខ្លួននោះ ក៏មិនបានដែរ ដាច់ខាតត្រូវតែអញ្ជើញទាំងពីរនាក់បងប្អូន ដែលមានការកំណត់កញ្ចប់តម្លៃដូចពោលខាងលើ(អ៊ឺហ៊ឺ!)។

សូមជម្រាបឱ្យដឹងថា នេះគឺជាតម្លៃខ្លួនដ៏ខ្ពស់មួយ ដែលមានតែតារាល្បីៗប្រឡូកសិល្បៈយូរឆ្នាំប៉ុណ្ណោះ ទើបអាចទទួលបានតម្លៃខ្លួនក្នុងចំនួននេះបាន ក៏ប៉ុន្តែកូនប្រុសរបស់លោក ព្រាប សុវត្ថិ ទើបតែចូលខ្លួនបានប៉ុន្មានខែប៉ុណ្ណោះក៏មានតម្លៃខ្លួនខ្ពស់បែបនេះទៅហើយ៕

May 30, 2018

Category: សង្គម និងសេដ្ឋកិច្ច