Category: សង្គម និងសេដ្ឋកិច្ច

លឹម ជាឡាយ ចេញសារប្រកាស ដាច់់ខាតមិនសម្ដែងជាមួយតួណាមានចរិតកូរ
ពិតជាបង្កភាពភ្ញាក់ផ្អើលខ្លាំងមែន នៅពេលដែលតារាសម្ដែង និងខាងផលិតកម្ម LD បានចេញសេចក្ដីប្រកាសរបស់ខ្លួន ដោយសារតែតារាសម្ដែងនៅក្នុងរឿង «គូសេ្នហ៍បម្រុង» ដែលកំពុងដំណើរការថត និងគ្រោងចាក់បញ្ចាំងនៅលើកញ្ចក់ស្ថានីយទូរទស្សន៍ CTN និងដែលមិនត្រូវបានបញ្ចេញឈ្មោះចំៗនោះ បានបោកគ្រាប់បែករត់បាត់ មិនព្រមចូលខ្លួនមកសម្ដែងតាមពេលវេលាកំណត់របស់ខាងផលិតកម្ម។
លោក លឹម ជាឡាយ ដែលជាតួសម្ដែងឯកប្រុសនៅក្នុងរឿងខាងលើនេះ បានចេញសារនៅក្នុងបណ្ដាញសង្គមហ្វេសប៊ុករបស់ខ្លួននៅពេលថ្មីៗពាក់ព័ន្ធជាមួយបញ្ហានេះថា «ខ្ញុំបាទ លឹម ជាទ្បាយ ដែលមានឱកាសបានសម្តែងក្នុងរឿង គូសេ្នហ៍បម្រុង ដែលនឹងចាក់នៅ CTN TV ក្នុងពេលឆាប់ៗនេះ។ រូបខ្ញុំបាទមានមតិយោបល់ខ្លះៗ សម្រាប់តួមួយចំនួនតូចដែលមិនគោរពការងារ មិនមានការទទួលខុសត្រូវលើការងារខ្លួនឯង លទ្ធផលទៅថៃ្ងក្រោយនឹងបាត់បង់អី្វៗគ្រប់យ៉ាង និងមនុស្សជុំវិញខ្លួនទៀតផង»។ លោកបានបន្ដរៀបរាប់ប្រាប់ដល់មហាជនអ្នកគាំទ្ររូបលោកទៀតថា កិត្តិយស សំខាន់ណាស់សម្រាប់មនុស្សម្នាក់ៗ បើសិនជាអ្នកធ្វើបែបនេះ តើកិត្តិយសរបស់អ្នកទុកនៅឯណា…។ លោកថា ក្នុងនាមលោកជាសិល្បករម្នាក់ លោកសូមមិនបញ្ចេញឈ្មោះតួដែលមានបញ្ហានោះនៅពេលនេះទេ តែថា បើដឹងខ្លួន សូមចូលខ្លួនមកដោះស្រាយបញ្ហាទាំងអស់ឱ្យចប់សព្វគ្រប់សិនទៅ…មិនដូច្នោះទេ លោកនឹងបង្ហាញឈ្មោះតួម្នាក់នោះនៅពេលក្រោយ។
គួរបញ្ជាក់ផងដែរថា លោក លឹម ជាឡាយ ជាតារាសម្ដែងម្នាក់មានប្រជាប្រិយភាពខ្លាំងសម្រាប់ទស្សនិកជនមិត្តៗយុវវ័យ តាមរយៈការសម្ដែងរឿងភាគជាច្រើនឱ្យស្ថានីយទូរទស្សន៍ធំៗក្នុងស្រុក និងធ្លាប់បានសម្ដែងភាពយន្តខ្នាតធំជាច្រើនរឿងទៀត ដែលភាគច្រើនលោកសម្ដែងជាតួឯកតែម្ដង។ លោកបានប្រកាសក្ដែងៗទៀតថា «ខ្ញុំបាទ លឹម ជាឡាយ LCL មិនចង់ថតជាមួយតួណាដែលកូរគេអ៊ីចឹងទេ វាហត់ណាស់ កុំប្រើពាក្យថា មិនចង់អី គឺអត់ម៉ង…ប្រកាសទុកមុន មិនចូលចិត្តទេ ធ្វើអ៊ីចឹងបានអីមកវិញ» បានសេចក្ដីថា លោកនឹងមិនសម្ដែងជាមួយតួអង្គចរិតកូរក្រុមកាងារបែបនេះទៀតទេ សំខាន់លោកជាមនុស្សគោរពពេលវេលា៕
June 5, 2018
Ake ជួយឱ្យហូឡង់ បញ្ចប់ក្នុងលទ្ធផលស្មើជាមួយនឹងអ៊ីតាលី
ខ្សែការពារ Nathan Ake បានតែតបាល់បញ្ចូលទីនៅពេលជិតបញ្ចប់ការប្រកួត ខណៈដែលក្រុមបាល់ទាត់ជម្រើសជាតិហូឡង់ បានបញ្ចប់ក្នុងលទ្ធផលស្មើ 1-1 ជាមួយនឹងក្រុម អ៊ីតាលីដែលនៅសល់សមាជិកត្រឹមតែ 10នាក់ក្នុងការប្រកួតមិត្តភាពអន្តរជាតិកាលពីថ្ងៃចន្ទ ក្នុងទីក្រុង Turin រវាងក្រុមល្បី 2 ដែលសុទ្ធសឹងមិនបានឈ្នះកៅអីទៅលេងក្នុងយុទ្ធនាការ World Cup ដូចគ្នា។
កីឡាករ Simone Zaza បានជួយឱ្យក្រុមជម្រើសជាតិអ៊ីតាលី មានគ្រាប់បាល់នាំមុខមុននៅនាទីទី67 នាកីឡដ្ឋាន Allianz របស់ក្លិប Juventus ប៉ុន្តែក្រុមម្ចាស់ផ្ទះបានជួបបញ្ហាវិញក្នុងរយៈពេល 2នាទីក្រោយមក នៅពេលដែលខ្សែការពារ Domenico Criscito បានរងពិន័យកាតក្រហមបណ្តេញចេញសម្រាប់ការប្រព្រឹត្តកំហុសទៅលើកីឡាករ Ryan Babel។ ខ្សែការពារ Ake របស់ក្លិប Bournemouth បានរកគ្រាប់បាល់តាមស្មើវិញក្នុងរយៈពេល 2នាទីចុងក្រោយនៃការប្រកួតដែលប៊ិះនឹងចូលដល់វគ្គបន្ថែមម៉ោងទៅហើយ។
ក្រុមទាំង2 សុទ្ធសឹងស្ថិតក្នុងដំណាក់កាលនៃការស្រោចស្រង់ដូចគ្នា ក្រោយពីខកខានក្នុងការឈ្នះកៅអីទៅលេងក្នុងព្រឹត្តិការណ៍ World Cup ជុំផ្តាច់ព្រ័ត្រ ក្នុងប្រទេសរុស្ស៊ី។ ការប្រកួត 3លើកដំបូងរបស់គ្រូបង្វឹកថ្មីនៃក្រុមជម្រើសជាតិអ៊ីតាលីលោក Roberto Mancini បានបញ្ចប់ដោយការយកឈ្នះលើក្រុមជម្រើសជាតិអារ៉ាប៊ីសាអ៊ូឌីត 2-1 ចាញ់ក្រុមជម្រើសជាតិបារាំង 3-1 និងស្មើ 1-1 ជាមួយនឹងក្រុមជម្រើសជាតិហូឡង់។ លោក Mancini បានឱ្យដឹងថា៖ «វាជាការប្រកួតមិត្តភាពមួយ ហើយខ្ញុំមិនដឹងថា វាពិតជាត្រូវពិន័យដោយកាតក្រហម ឬយ៉ាងណាឡើយ»៕
ប្រភពពី៖ Channel News Asia
June 5, 2018
លោក Zidane ចាកចេញ ដោយសារតែឈ្លោះជាមួយលោក Perez រឿង Hazard និង De Gea
លោក Zinedine Zidane បានលាលែងពីតំណែងអ្នកចាត់ការទូទៅរបស់ក្រុម Real Madrid ក្រោយពីមានជម្លោះជាមួយនឹងលោក Florentino Perez ជុំវិញគោលនយោបាយដោះដូរកីឡាកររបស់ក្លិប ពាក់ព័ន្ធនឹងតារាឆ្នើម Eden Hazard និងអ្នកចាំទី David De Gea។ នេះបើយោងតាមប្រភពព័ត៌មាននានា។
ក្រោយពីបានដឹកនាំឱ្យក្រុម Real Madrid លើកពាន Champions League ចំនួន 3លើកជាប់ៗគ្នា តាមរយៈការយកឈ្នះក្នុងលទ្ធផល 3-1 លើក្រុម Liverpool រួចមកលោក Zidane បានលាលែងពីតំណែងជាគ្រូបង្វឹកដ៏មិននឹកស្មានដល់កាលពីចុងសប្តាហ៍មុន។ លោក Perez ប្រធានក្លិប Real បានទទួលស្គាល់ថា ការសម្រេចចិត្តនេះត្រូវបានធ្វើឡើងដោយមិននឹកស្មានដល់ ស្របពេលដែលលោក Zidane បានធ្វើការបដិសេធក្នុងការប្រកាសពីមូលហេតុដែលនាំឱ្យលោកសម្រេចចិត្តលាលែងពីតំណែងនាពេលនោះ។ បើយោងតាមបណ្តាញសារព័ត៌មាន The Sun បានឱ្យដឹងថា លោក Zidane និងលោក Perez បានប៉ះទង្គិចពាក្យសម្តីគ្នា នៅពេលល្ងាចថ្ងៃព្រហស្បតិ៍មុនពេលការចាកចេញរបស់អតីតខ្សែប្រយុទ្ធអន្តរជាតិបារាំងរូបនេះ។
កាសែតដដែលបានចេញផ្សាយថា លោក Zidane បានស្នើសុំឱ្យលោក Perez ចុះហត្ថលេខាជាមួយនឹង Hazard ប៉ុន្តែ ប្រធានក្លិបរបស់ Real Madrid បានបដិសេធក្នុងការផ្ទេរតារាឆ្នើមរបស់ក្លិប Chelsea រូបនេះ ដោយលោក Perez បានបញ្ជាក់ប្រាប់ទៅលោក Zidane វិញថា លោកចង់ធ្វើការព្យាយាមមួយផ្សេងទៀតដើម្បីចុះហត្ថលេខាជាមួយនឹងអ្នកចាំទី De Gea ប៉ុន្តែគ្រូបង្វឹកសញ្ជាតិបារាំងរូបនេះ ចង់រក្សាទុក KeylorNavas។
បើយោងតាមការចេញផ្សាយរបស់ The Sun បានបញ្ចប់សេចក្ដីថា លោក Zidane បានបញ្ចប់ជម្លោះនោះតាមរយៈការប្រាប់ទៅលោក Perez ថា៖ «ខ្ញុំនិយាយចប់ហើយ…លោកមើលថែក្រុមនេះដោយខ្លួនឯងចុះ»៕
ប្រភពពី៖ Metro
June 5, 2018
ឈ្ងុយឆ្ងាញ់ជាប់ចិត្តជាមួយ Passion Smoothy ពី Katari
Passion Smoothie គឺជាប្រភេទផ្លែឈើដែលមានប្រភពដើមមកពីតំបន់ព្រៃត្រូពិច នៃទ្វីបអាមេរិកខាងត្បូង និងមានសារធាតុចិញ្ចឹមយ៉ាងសម្បូរបែប ជាពិសេសវីតាមីន C និងវីតាមីន A ដែលមានសារប្រយោជន៍លើសលប់ចំពោះសុខភាពរាងកាយ។ ដោយឡែកពេលនេះ ផ្លែ Passion ត្រូវបានអ្នកជំនាញផ្នែកភេសជ្ជៈប្រចាំនៅភោជនីយដ្ឋាន Katari ដែលស្ថិតក្នុងសណ្ឋាគារ Katari កម្ពស់13ជាន់ មានទីតាំងនៅអគារលេខ61 ផ្លូវ294 សង្កាត់បឹងកេងកង1 ខណ្ឌចំការមន រាជធានីភ្នំពេញ យកមកច្នៃចេញជាភេសជ្ជៈមួយប្រភេទដែលមានក្លិនក្រអូបឈ្ងុយ ត្រជាក់ រសជាតិឆ្ងាញ់ជាប់ចិត្ត នោះគឺ “Passion Smoothy”។
គ្រឿងផ្សំ
• ផ្លែ Passion
• ម្សៅទឹកដោះគោ
• ទឹកដោះគោស្រស់
• ទឹកកក
វិធីធ្វើ
ចំពោះភេសជ្ជៈប្រភេទនេះ ហាក់មិនមានភាពលំបាកក្នុងការធ្វើនោះទេ ពោលគឺគ្រាន់តែស្វែងរកវត្ថុធាតុដើម និងគ្រឿងផ្សំដូចបានរៀបរាប់ជូនខាងលើនេះ ហើយយកមកក្រឡុកបញ្ជូលគ្នានៅក្នុងម៉ាស៊ីនក្រឡុកទឹកផ្លែឈើជាការស្រេច ហើយចុងក្រោយចាក់ដាក់ក្នុងកែវសថ្លា និងបន្ថែមគ្រាប់ផ្លែ Passion ពីលើដើម្បីបង្កើនសោភ័ណភាពជាការស្រេច។
បញ្ជាក់ ៖ ចំពោះអ្នកដែលមិនមានចំណូលចិត្តជាមួយគ្រាប់ផ្លែ Passion អ្នកអាចមានជម្រើស ដោយមុនពេលធ្វើការក្រឡុក ត្រូវច្រោះយកគ្រាប់ចេញ យកតែទឹក ទើបដាក់ចូលម៉ាស៊ីនក្រឡុក៕
June 4, 2018
5យ៉ាងសម្រាប់ស្ត្រីមានគភ៌ ឆ្ពោះទៅរកសុខភាពល្អបរិបូរណ៍
រឿងនៃការមានសុខភាពល្អនេះ គឺពិតជារឿងមួយចាំបាច់ណាស់សម្រាប់ស្រ្តីមានគភ៌ ព្រោះមានន័យថា នៅពេលអ្នកម្តាយមានសុខភាពល្អ រឹងមាំហើយនោះ ជីវិតតូចមួយនៅក្នុងផ្ទៃ ក៏នឹងមានការវិវឌ្ឍចម្រើនធំធាត់ល្អតាមអាយុរបស់គភ៌ផងដែរ។ ដូច្នេះហើយទើបយើងតែងសង្កេតឃើញថា លោកវេជ្ជបណ្ឌិតតែងតែណែនាំឱ្យអនាគតអ្នកម្តាយដែលកំពុងតាំងគភ៌ទាំងឡាយ ឱ្យឧស្សាហ៍ព្យយាមមើលថែទាំខ្លួនឯង ទាំងក្នុងរឿងសុខភាព ទាំងរឿងផ្លូវចិត្ត និងការរស់នៅទៀតផង។ ឥឡូវនេះ យើងនាំគ្នាមកមើល ថាតើវិធីឆ្ពោះទៅរកការមានសុខភាពល្អនោះ តើយើងអាចធ្វើបានតាមវិធីណាខ្លះ?
1. អ្នកម្តាយគួរទទួលទានបន្លែ ផ្លែឈើអាហារស៊ីរៀល (Cereal) បាយអង្ករស្រូវសាលី គ្រាប់ធញ្ញជាតិ និងអាហារកាកសរសៃឱ្យបានច្រើន ដើម្បីចៀសវាងពីអាការទល់លាមក ព្រោះអ័រម៉ូនដែលប្រែប្រួល នឹងមានផលប៉ះពាល់ដល់ពោះវៀនធំរបស់អ្នកម្តាយ តែអាហារដែលមានជាតិកាកសរសៃអាចជួយក្នុងរឿងនេះបានច្រើន។
2. អ្នកម្តាយត្រូវទទួលបានសារធាតុដែក ពីសាច់សត្វយ៉ាងហោចណាស់ក្នុងមួយសប្តាហ៍3ដង ដែលមិនចាំបាច់ទទួលទានច្រើនពេកទេ តែឱ្យគ្រប់គ្រាន់នឹងតម្រូវការរបស់រាងកាយ និងសារធាតុដែកដែលមាននៅក្នុងបន្លែ ជាប្រភេទដែលមិនមែនជាអេម៉ូគ្លោប៊ីនដែលធ្វើឱ្យរាងកាយពិបាកបឺតជ្រាប។
3. អ្នកម្តាយត្រូវទទួលបានជាតិភ្លូអរ៉ាយដ៍ឱ្យបានគ្រប់គ្រាន់ ព្រោះវាសំខាន់ដល់ការដុះលូតលាស់នៃធ្មេញរបស់ទារក។
4. ដើម្បីជួយបង្កើនដល់ខួរក្បាលរបស់ទារក អ្នកម្តាយត្រូវទទួលទានជាតិអា-ស៊ីតខ្លាញ់ អូមេហ្កា 3 តែចូរចៀសវាងសត្វក្នុងទឹកដែលមានសម្បក ដូចជាប្រភេទគ្រំ និងងាវជាដើម ព្រោះវានឹងបង្កឱ្យកើតមានគ្រោះថ្នាក់ដល់ទាំងអ្នកម្តាយ និងកូនតូចនៅក្នុងផ្ទៃ ដែលអាចនឹងឆ្លងមេរោគ បាត់តេរី លីស្តេរីបាន។
5. បើអ្នកម្តាយលំបាកវេទនាជាមួយអាការក្អួតចង្អោ ចូរទទួលទានមើមខ្ញី ព្រោះខ្ញីអាចជួយកែបញ្ហាក្អួតចង្អោរបានប្រសើរណាស់ដោយហាន់មើមខ្ញីស្រស់បែបស្តើងៗ រួចដាក់ចូលទៅក្នុងទឹកក្តៅឧណ្ហៗ ហើយយកមកពិសា៕
June 4, 2018
កែវ ស្រីនាង ប្រឹងប្រឡូកជាថ្មីក្នុងអាជីពចាស
ខុសប្លែកគ្នាស្រឡះពីមិត្តរួមជំនាន់ ដែលម្នាក់ៗបានសម្រេចលាចេញពីអាជីពជាតារាសម្ដែងជាង10ឆ្នាំ ខណៈដែលដឹងយ៉ាងច្បាស់ថា វ័យរបស់ខ្លួនកាន់តែជ្រេរទៅហើយនោះ សម្រាប់ កែវ ស្រីនាង បែរជាព្យាយាមសារជាថ្មី ហើយថែមទាំងបង្ហាញពីឆន្ទៈថា នឹងប្រឹងឱ្យខ្លាំង លូកឱ្យជ្រៅដើម្បីទាញយកប្រជាប្រិយភាពម្ដងទៀត។
អស់រយៈពេលជាច្រើនឆ្នាំកន្លងមកដែលអតីតកំពូលតារាសម្ដែងរូបស្រស់ កែវ ស្រីនាង បានដកខ្លួនចេញពីពិភពសិល្បៈ ហើយងាកទៅក្រសោមមុខជំនួញរួមជាមួយស្វាមី ដែលជាជនបរទេសនោះតាំងពីក្រោយពេលរៀបអាពាហ៍ពិពាហ៍រួចមកម៉្លេះ ខណៈដែលសុខភាពរបស់ខ្លួនចាប់ផ្តើមថមថយដោយសារមានជំងឺប្រចាំកាយ ឈាមសស៊ីឈាមក្រហម។ ប៉ុន្តែអ្វីដែលជាព្រឹត្តិការណ៍ថ្មី និងគួរឱ្យភ្ញាក់ផ្អើលនោះ គឺនៅពេលថ្មីៗនេះ អតីតតារាសម្ដែងដែលធ្លាប់មានកេរ្តិ៍ឈ្មោះល្បីល្បាញខ្លាំងកាលពីអំឡុងឆ្នាំ2010នោះ បានសម្រេចវិលមកចូលប្រឡូកនៅក្នុងអាជីពចាស់របស់ខ្លួនទាំងទឹកមុខស្លេកស្លាំងជាមួយនឹងការផ្លាស់ប្ដូរស្ទីលតុបតែងខ្លួនពីការរក្សាទុកសក់ដ៏វែងអន្លាយ ក្លាយមកជាម៉ូដសក់ខ្លី បែបមនុស្សវ័យចំណាស់ទៅវិញ។
ជាមួយនឹងការបង្ហាញវត្តមានសាជាថ្មីតាមរយៈខ្សែភាពយន្តភាគខ្សែរបស់ផលិតកម្ម មហាហង្ស ដែលត្រៀមចាក់បញ្ចាំងនៅលើកញ្ចក់ទូរទស្សន៍ PNN ក្នុងពេលដ៏ខ្លីឆាប់ៗខាងមុខនេះ កែវ ស្រីនាង បានប្រាប់ឱ្យដឹងថា តាំងពីដើមរៀងមក នាងមិនធ្លាប់គិតនោះទេថា នឹងបោះបង់អាជីពជាតារាសម្ដែងចោលទាំងស្រុងនោះព្រោះអាជីពមួយនេះ គឺជាចំណូលចិត្តរបស់នាងពីតូចមកម៉្លេះ ដែលសូម្បីតែស្វាមីរបស់ខ្លួនដែលជាអ្នកជំនួញមិនជាប់ពាក់ព័ន្ធនឹងសិល្បៈក៏មិនបានហាមប្រាមនាងនោះឡើយ។ កាលដែលនាងអវត្តមានពីវិស័យនេះអស់មួយរយៈធំកាលពីពេលកន្លងទៅនោះ មិនមែនមានន័យថានាងបញ្ចប់អាជីព ឬដកខ្លួននោះទេ ប៉ុន្តែគឺដោយសារតែកត្តាសុខភាពមិនអំណោយផលដ្បិតសភាពនៃជំងឺឈាមសស៊ីឈាមក្រហម ប្រចាំកាយរបស់នាងធ្វើទុក្ខខ្លាំងមិនអាចទទួលការសម្ដែងបានតែប៉ុណ្ណោះ។ ប៉ុន្តែនៅពេលបច្ចុប្បន្ននេះ អាការជំងឺមានភាពធូរស្រាលច្រើន ហើយណាមួយមុខជំនួញផ្ទាល់ខ្លួន ហាងសាឡន ក៏ដូចជាហាងអាហារដ្ឋានមានអ្នកជួយមើលខុសត្រូវជំនួសគ្រប់គ្រាន់នោះ ទើបនាងសម្រេចទទួលការងារសម្ដែងសាជាថ្មីវិញ។
ថ្លែងប្រាប់អ្នកសារព័ត៌មានកាលពីពេលកន្លងទៅនៅក្នុងឱកាសនៃការប្រារព្វពិធីគ្រងពាលីផ្ដើមថតរឿង “កាំបិតមុខពីរ” សម្រាប់ត្រៀមចាក់បញ្ចាំងនៅលើកញ្ចក់ទូរទស្សន៍ PNN នាពេលខាងមុខនេះ កែវ ស្រីនាង បានប្រាប់យ៉ាងដូច្នេះថា “តាមការពិតជំងឺរបស់ខ្ញុំមិនទាន់ជាដាច់នោះទេ គ្រាន់តែមានភាពធូរស្រាលជាងពេលមុនច្រើន ហើយណាមួយគាប់ជូននឹងការអញ្ជើញពីសំណាក់អ្នកដឹកនាំរឿង ក៏ដូចជាផលិតករ មហាហង្ស ផងដែរនោះ ខ្ញុំក៏សាកល្បងចូលមកប្រឡូកសាជាថ្មី។ កាលពីប៉ុន្មានឆ្នាំមុន ឬឆ្នាំកន្លងទៅនេះ មិនមែនខ្ញុំមិនទទួលការសម្ដែងទាំងអស់នោះទេ ខ្ញុំសម្ដែងដដែល គ្រាន់តែតិចតួច និងមិនទទួលសម្ដែងរឿងភាគតែប៉ុណ្ណោះដោយឡែក ការសម្ដែងកាយវិការ ឬថតស៉្បតផ្សេងៗ ដែលចំណាយពេលថតខ្លីៗ ខ្ញុំនៅទទួលដដែល”៕

June 4, 2018
ទស្សនាការធ្វើស្នាមរបួសក្លែងក្លាយលើសាច់គូទលោកពូ សាន ម៉ៅ ក្នុងរឿង «ចិញ្ចៀនខ្មោច»
ខ្សែភាពយន្តរឿង«ចិញ្ចៀនខ្មោច»របស់ផលិតកម្មLD ទើបតែដាក់បញ្ចាំងសោះ តែមានអ្នកទស្សនាយ៉ាងណែនៗរោងតែម្ដង ដោយប្រិយមិត្តអ្នកគាំទ្រភាគច្រើនបាននិយាយថា ភាពយន្តមួយនេះល្អមើលណាស់ និងនិយាយថា ឈុតឆាកនៅក្នុងសាច់រឿងមិនសូវគួរឱ្យខ្លាចខ្មោចប៉ុន្មានទេ ប៉ុន្តែគេខ្លាចទឹកមុខកូនស្រីលោក ពែកមី ខ្លាំងជាង ដោយសារតែគ្រប់ឈុតដែលនាងបានសម្ដែងជាតួខ្មោចចូល គឺសមមែនទែន មិនខុសពីមនុស្សខ្មោចចូលពិតៗឡើយ។ ម៉្យាងទៀតនៅមានឈុតឆាកសំខាន់មួយទៀត ដែលអ្នកទស្សនាសរសើរថា គួរឱ្យខ្លាចជាងគេនោះគឺ ឈុតដែលលោកពូ សាន ម៉ៅ ធ្លាក់ពីលើចានបង្គន់នៅក្នុងបន្ទប់ ហើយរយះសាច់គូទ ព្រោះមុតនឹងបំណែកចានបង្គន់នោះតែម្ដង ដោយអ្នកដឹកនាំរឿងបានបង្ហាញឈុតនេះស្ដែងៗតែម្ដងនៅក្នុងសាច់រឿង។
តាមការពិតទៅ ឈុតនៅក្នុងរឿងនីមួយៗ សុទ្ធតែមានការគ្រោងទុក និងបច្ចេកទេសផ្សេងៗនៅក្នុងការសម្ដែង ដោយថ្មីៗនេះខាងអ្នកបច្ចេកទេសរបស់ផលិតកម្ម LD បានទម្លាយវីដេអូខ្លីមួយឈុតចេញមក ដែលបង្ហាញឱ្យឃើញបច្ចេកទេសទាំងមូលក្នុងការធ្វើស្នាមរបួសក្លែងក្លាយលើសាច់គូទលោកពូ សាន ម៉ៅ ដែលមើលទៅមានសភាពដាច់រយះដូចមែនទែន មើលទៅគួរឱ្យស្រៀវស្រាវព្រឺព្រួចជាមួយនឹងឈាមក្រហមឆ្អៅពិតៗមែនទែន។ មតិមហាជនជាច្រើនដែលនឹកស្មានមិនដល់ថាជាការថត និងជាការធ្វើសាច់របួសក្លែងក្លាយនេះ បាននិយាយថា «ខណៈដែលមើលរឿងនេះនៅក្នុងរោងកុនហើយ គឺពិតជាស្រៀវជំនួសលោក សាន ម៉ៅ ខ្លាំងណាស់ ។ ធ្លាក់មែនទែន និងឈាមមែនទែន»។
ដើម្បីស្រាយចម្ងល់ពីបច្ចេកទេសពិសេសមួយនេះ សូមទស្សនាវីដេអូខាងក្រោមនេះ៖
June 4, 2018
ស្អាតម្លឹងហើយ កញ្ញា បាន មុន្នីល័ក្ខ នៅវះកាត់ក្ដោងច្រមុះបន្ថែមទៀត?
អតីតបេក្ខនារី ក្នុងកម្មវិធីលំដាប់ពិភពលោក The Voice Cambodia រដូវកាលទី1 ដ៏ស្រស់សោភា កញ្ញា បាន មុន្នីល័ក្ខ បានធ្វើឱ្យមហាជនជាច្រើនមានការភ្ញាក់ផ្អើលជាខ្លាំង ក្រោយបានឃើញរូបភាពនាងពីកន្លែងកែសម្ផស្សដ៏ធំមួយនៅក្នុងស្រុក។ ជាក់ស្ដែង ដោយយោងតាមការបង្ហោះរូបភាពជាច្រើនរបស់កន្លែងកែសម្ផស្សនោះដែរ បានបញ្ជាក់ប្រាប់ឱ្យដឹងថា តារាចម្រៀងសំឡេងស្រទន់ មានមន្តស្នេហ៍រូបនេះ បានទៅទទួលសេវាកម្មវះកាត់ លើកខ្ទង់ច្រមុះឱ្យស្រួចស្អាត ដើម្បីឱ្យរូបសម្រស់របស់នាង កាន់តែមានភាពទាក់ទាញថែមឡើងមួយកម្រិតទៀត។
គួរបញ្ជាក់ផងដែរថា សម្រាប់អាជីពជាសិល្បករ-សិល្បការិនី រូបសម្រស់ គឺជាផ្នែកមួយដ៏សំខាន់បំផុតក្នុងការអាចទាញយកប្រជាប្រិយភាព និងការចាប់អារម្មណ៍ច្រើន ពីក្រសែភ្នែកមហាជន។ ប្រសិនបើរូបសម្រស់ មិនសូវស្រស់ស្អាត ពួកគេនឹងខិតខំរិះរកវិធីសាស្រ្ត ដើម្បីធ្វើការកែខៃឱ្យមានលក្ខណៈល្អប្រសើរ ដើម្បីឱ្យកាន់តែមានទំនុកចិត្តលើខ្លួនឯង គ្រប់ពេលឈរចំពោះមុខមនុស្សទាំងឡាយដែលនៅជុំវិញខ្លួន។ ដូចគ្នានោះដែរ គេសម្គាល់ឃើញថា ចំពោះសិល្បករ-សិល្បការិនី ជាច្រើននាក់បានសម្រេចជ្រើសរើសយកវិធីសាស្រ្តកែច្រមុះ ចាក់ចង្កាឱ្យស្រួច កែទម្រង់មុខអក្ស V ជាដើម ដើម្បីឱ្យមានផ្ទៃមុខស្រស់ស្អាត បើទោះបីជាពួកគេមានសម្រស់ស្រស់ស្អាតពីធម្មជាតិ រួចទៅហើយក៏ដោយ។
សូមជម្រាបបន្ថែមថា តាមរយៈរូបភាពដែលបានបង្ហាញនៅលើបណ្ដាញសង្គមហ្វេសប៊ុក គឺយើងនៅមិនទាន់ដឹងបានថាតើលទ្ធផលក្រោយការវះកាត់លើកខ្ទង់ច្រមុះរបស់តារាស្រីរូបនេះយ៉ាងណានៅឡើយទេ តើអាចនឹងមានភាពស្រស់ស្អាតបែបណា ព្រោះថា ពេលនេះសភាពមុខរបួសវះកាត់របស់នាង នៅមិនទាន់ជាសះស្បើយនៅឡើយទេ ៕
June 4, 2018
ឆ្អឹងជំនីជ្រូកដុតពិសេស ពីភោជនីយដ្ឋាន Motor Café
ឆ្អឹងជំនីជ្រូក ត្រូវបានគេយកទៅច្នៃធ្វើជាមុខម្ហូបយ៉ាងសម្បូរបែប ដែលក្នុងនោះរួមមានដូចជា សម្ល, ខ, អាំង, ស្ងោរ ឬចៀនជាដើម។ ប៉ុន្តែពេលនេះ ឆ្អឹងជំនីជ្រូកត្រូវបានអ្នកជំនាញផ្នែកដាំស្លប្រចាំនៅភោជនីយដ្ឋាន Motor Café សាខាទួលគោក ដែលកំពុងទទួលបានការគាំទ្រពីសំណាក់អតិថិជនយ៉ាងច្រើននោះ បានយកមកច្នៃធ្វើជាអាហារមួយមុខផ្សេងទៀត ពោរពេញទៅដោយរសជាតិឆ្លាញ់ប្លែក នោះគឺ “សាច់ឆ្អឹងជំនីជ្រូកដុតពិសេស”។ ចង់ដឹងទេថា មុខម្ហូបថ្មីមួយនេះមានភាពទាក់ទាញដល់កម្រិតណា សូមមកស្វែងយល់ទាំងអស់គ្នា។
ឆ្អឹងជំនីជ្រូក ត្រូវបានគេយកទៅច្នៃធ្វើជាមុខម្ហូបយ៉ាងសម្បូរបែប ដែលក្នុងនោះរួមមានដូចជា សម្ល, ខ, អាំង, ស្ងោរ ឬចៀនជាដើម។ ប៉ុន្តែពេលនេះ ឆ្អឹងជំនីជ្រូកត្រូវបានអ្នកជំនាញផ្នែកដាំស្លប្រចាំនៅភោជនីយដ្ឋាន Motor Café សាខាទួលគោក ដែលកំពុងទទួលបានការគាំទ្រពីសំណាក់អតិថិជនយ៉ាងច្រើននោះ បានយកមកច្នៃធ្វើជាអាហារមួយមុខផ្សេងទៀត ពោរពេញទៅដោយរសជាតិឆ្លាញ់ប្លែក នោះគឺ “សាច់ឆ្អឹងជំនីជ្រូកដុតពិសេស”។ ចង់ដឹងទេថា មុខម្ហូបថ្មីមួយនេះមានភាពទាក់ទាញដល់កម្រិតណា សូមមកស្វែងយល់ទាំងអស់គ្នា។
គ្រឿងផ្សំ
• ឆ្អឹងជំនីជ្រូក
• ហ័រសិន សុស (Hoisin Sauce )
• ប៊ីប៊ីខ្យូ សុស (BBQ Sauce)
• ទឹកឃ្មុំ
• ប្រេងខ្យង
• អំបិល
វិធីធ្វើ
មុនដំបូងយកឆ្អឹងជំនីជ្រូកមកលាងឱ្យស្អាត រួចប្រឡាក់ជាមួយ ហ័រសិន សុស (Hoisin Sauce ) ប៊ីប៊ីខ្យូ សុស ទឹកឃ្មុំប្រេងខ្យង អំបិល រួចយកក្រដាសអាលុយមីញ៉ូមរុំជុំវិញឱ្យជិត ទើបយកទៅដុតក្នុងម៉ាស៊ីនដុត ជាមួយការកំណត់កម្ដៅ 180 oC (សម្រាប់អ្នកដែលមិនមានម៉ាស៊ីតដុត ក៏អាចដាក់ដុតក្នុងឆ្នាំងតាមបែបធម្មតាក៏បាន) ទុករយៈពេលប្រមាណ35នាទី។ បន្ទាប់មកទើបយកចេញមកក្រៅ បកក្រដាសដោយប្រុងប្រយ័ត្ន ដើម្បីត្រងទឹកដែលដក់នៅលើក្រដាសអាលុយមីញ៉ូម សម្រាប់ស្រោចពីលើសាច់ឆ្អឹងជំនីជ្រូក។ ជាចុងក្រោយ យកសាច់ឆ្អឹងជំនីជ្រូកដុតនោះមករៀបនៅលើចានជាមួយបន្លែដូចរូបភាពដែលបានបង្ហាញជូននៅលើទំព័រនេះ និងស្រោចដោយទឹកដុតសាច់ឆ្អឹងជំនីជ្រូកពីលើជាការស្រេច៕
June 4, 2018
ធនាគារពិភពលោក៖ “កំណើនសេដ្ឋកិច្ចខ្ពស់នៅកម្ពុជា នៅតែបន្តកើតមាន”
ធនាគារពិភពលោក (World Bank) បានចេញរបាយការណ៍ព្យាករថ្មីមួយឱ្យដឹងថា កំណើនសេដ្ឋកិច្ចខ្ពស់របស់កម្ពុជានឹងនៅតែបន្តរក្សាភាពស្វាហាប់ទៅមុខ ហើយត្រូវបានព្យាករទុកថានឹងកើនល្បឿនបន្តិចរហូតដល់ទៅ 6.9ភាគរយ ក្នុងឆ្នាំ2018ដោយសារតែការស្ទុះងើបឡើងវិញក្នុងវិស័យនាំចេញវាយនភ័ណ្ឌ និងសម្លៀកបំពាក់ អមដោយការងើបឡើងរបស់វិស័យទេសចរណ៍ និងកសិកម្មផងដែរ។
យោងតាមរបាយការណ៍បច្ចុប្បន្នភាពសេដ្ឋកិច្ចកម្ពុជា ( Cambodia Economic Update ) ដែលត្រូវបានសម្ពោធនៅខែឧសភា ឆ្នាំ2018នេះបង្ហាញថា ការចំណាយកាន់តែច្រើនឡើងរបស់រដ្ឋាភិបាល និងលក្ខខណ្ឌសេដ្ឋកិច្ចពិភពលោកមានអំណោយផល ក្នុងនោះរួមមានតម្រូវការយ៉ាងស្វាហាប់នៅក្នុងបណ្តាសេដ្ឋកិច្ចប្រទេសជឿនលឿនផង សុទ្ធតែជាកត្តាដែលត្រូវបានគេរំពឹងទុកថាជាមូលដ្ឋានទ្រទ្រង់ធ្វើឱ្យកម្ពុជាបន្តទទួលបានកំណើនសេដ្ឋកិច្ចខ្ពស់។
ប៉ុន្តែយ៉ាងណាក៏ដោយ ហានិភ័យក៏នៅតែបន្តមានដែរ ដែលក្នុងនោះរួមមានការបាត់បង់បន្តិចម្តងៗនូវភាពប្រកួតប្រជែងក្នុងការនាំចេញដោយសារតែការកើនឡើងយ៉ាងរហ័សនូវបៀវត្សរ៍របស់កម្មករ ពំនូនគរនៃភាពងាយរងគ្រោះដែលមានមកជាយូរមកហើយនៅក្នុងកំណើននៃវិស័យអចលនទ្រព្យ និងសំណង់ ភាពមិនច្បាស់លាស់ដែលអាចកើតមានជុំវិញការបោះឆ្នោត ភាពញ័ររញ្ជួយម្តងម្កាលបណ្តាលមកពីការគាំពារនិយម និងភាពតានតឹងខ្លាំងឡើងនៅក្នុងវិវាទពាណិជ្ជកម្មរវាងប្រទេសដែលមានជំនួញធំៗក្នុងពិភពលោក។
លោកស្រី អុិនហ្គូណា ដូប្រាចា នាយិកាគ្រប់គ្រងធនាគារពិភពលោកប្រចាំប្រទេសកម្ពុជា
លោកស្រី អុិនហ្គូណា ដូប្រាចា នាយិកាគ្រប់គ្រងធនាគារពិភពលោកប្រចាំប្រទេសកម្ពុជាបានមានប្រសាសន៍ថា “ដើម្បីរក្សាឱ្យបានកំណើនសេដ្ឋកិច្ចរឹងមាំ ប្រទេសកម្ពុជាសំខាន់ណាស់ ត្រូវវិនិយោគថែមទៀតទៅលើវិស័យអប់រំ និងបណ្តុះបណ្តាលជំនាញហើយស្របពេលគ្នានោះដែរ ត្រូវប្រឹងរកដំណោះស្រាយដល់ឧបសគ្គនានាដែលធុរកិច្ចធុនតូច និងមធ្យមកំពុងជួបប្រទះ។ ការវិនិយោគទៅលើមនុស្សជាជម្រើសដ៏ប្រសើរបំផុតសម្រាប់ឈានទៅកាន់អនាគតមួយកាន់តែចម្រុងចម្រើន។
របាយការណ៍នេះបានធ្វើការកត់សម្គាល់ថា ប្រទេសកម្ពុជាអាចធ្វើឱ្យកំណើនសេដ្ឋកិច្ចកាន់តែមានភាពចម្រុះជាងមុន និងបង្កើតការងារបានកាន់តែច្រើនថែមទៀត តាមរយៈការកាត់បន្ថយចំណាយរបស់ក្រុមហ៊ុនទៅលើដំណើរការបំពេញបែបបទបង្កើតក្រុមហ៊ុន ទៅលើផ្នែកប្រតិបត្តិការ និងទៅលើការធ្វើហិរញ្ញប្បទាន។ របាយការណ៍នេះក៏បានផ្តល់ផងដែរនូវអនុសាសន៍ឱ្យប្រទេសកម្ពុជាធ្វើការតាមឃ្លាំមើលឱ្យបានដិតដល់ទៅលើដំណើរស្ទុះឡើងនៅក្នុងវិស័យសំណង់ និងអចលនទ្រព្យ ដោយរៀបចំឱ្យមានគោលនយោបាយប្រុងប្រយ័ត្នជាលក្ខណៈម៉ាក្រូ ដែលនឹងជួយបន្ថយវិសាលភាពរបស់សកម្មភាពដែលកេងយកចំណេញនៅក្នុងវិស័យទាំងនេះ។
ចំណែកការមកដល់របស់ភ្ញៀវទេសចរបានកើនដល់ទៅ 11.8ភាគរយ នៅក្នុងឆ្នាំ2017 ប្រៀបទៅនឹងកំណើន 5ភាគរយនៅក្នុងឆ្នាំ2016 ដោយសារលទ្ធផលនៃកិច្ចខិតខំរបស់អាជ្ញាធររដ្ឋាភិបាលក្នុងការធ្វើឱ្យមានការហោះហើរកាន់តែច្រើនមកពីក្នុងតំបន់ រួមទាំងពីប្រទេសចិនផងដែរ ដែលជាទីផ្សារសំខាន់មួយសម្រាប់វិស័យទេសចរណ៍។ វិស័យកសិកម្មក៏មានការស្ទុះឡើងដែរ ជាមួយនឹងការពង្រីកផ្ទៃដីធ្វើស្រូវ និងចម្ការកៅស៊ូ និងការងើបឡើងវិញបន្តិចម្តងៗរបស់តម្លៃកសិផល។
លោកបណ្ឌិត ម៉ី កល្យាណ ប្រធានក្រុមប្រឹក្សាភិបាលវិទ្យាស្ថានសិក្សាដើម្បីការអភិវឌ្ឍបានមានប្រសាសន៍ឱ្យដឹងថា សេដ្ឋកិច្ចកម្ពុជាត្រូវពឹងផ្អែកលើកត្តាពីរយ៉ាង គឺកត្តាខាងក្រៅ និងកត្តាខាងក្នុង ដែលជាមូលដ្ឋានចាំបាច់មិនអាចខ្វះបាន។ កត្តាខាងក្រៅគឺត្រូវពឹងផ្អែកលើការនាំចេញ ដែលជាមូលដ្ឋានសំខាន់ក្នុងការអភិវឌ្ឍសេដ្ឋកិច្ចរបស់ខ្លួន និងពង្រីកសក្តានុពលសេដ្ឋកិច្ចរបស់ប្រទេស។ ចំណែកកត្តាខាងក្នុង គឺជាកត្តាមិនអាចខ្វះបានដែលកម្ពុជាត្រូវពឹងផ្អែកលើមូលដ្ឋានខ្លួនឯង តាមរយៈការពង្រឹងធនធានមនុស្ស និងបច្ចេកទេស ដើម្បីពង្រឹងនូវធនធានមនុស្សតាមរយៈការប្រើប្រាស់ជំនាញ ហើយទទួលបានចំណូលកាន់តែច្រើនសម្រាប់ប្រជាជន។
គួរបញ្ជាក់ថា រដ្ឋាភិបាលកម្ពុជាបានដាក់ចេញនូវគោលនយោបាយអភិវឌ្ឍន៍វិស័យឧស្សាហកម្មឆ្នាំ2015-2025 ដើម្បីពង្រឹងមូលដ្ឋាន និងពង្រីកសក្តានុពលសេដ្ឋកិច្ចរបស់ខ្លួនដោយផ្លាស់ប្តូរនិន្នាការពីកម្លាំងពលកម្មសុទ្ធសាធ ទៅប្រើប្រាស់កម្លាំងពលកម្មជំនាញទើបធ្វើឱ្យសេដ្ឋកិច្ចជាតិ និងសេដ្ឋកិច្ចប្រជាជនកម្ពុជាមានការរីកចម្រើនកាន់តែមានល្បឿនខ្លាំងឡើង៕
June 4, 2018