Category: សង្គម និងសេដ្ឋកិច្ច

មិនធម្មតាទេ! មេធំ Facebook មានចំណូលជាមធ្យមជិត 6លានដុល្លារក្នុង 1ថ្ងៃ
ថ្មីៗនេះ សហស្ថាបនិក និងជាមេធំរបស់ Facebook លោក Mark Zuckerberg បានជួបនូវបញ្ហាជាច្រើនរហូតដល់ត្រូវប្រឈមមុខនឹងផ្លូវច្បាប់ទៀតផង បន្ទាប់ពីទិន្នន័យឯកជនរបស់អ្នកប្រើប្រាស់ត្រូវបានលួច និងរំលោភបំពាន។ បើទោះជាយ៉ាងនេះក្ដី ក៏មិនអាចធ្វើឱ្យមហាសេដ្ឋីវ័យក្មេងរូបនេះ បាត់បង់ប្រជាប្រិយភាព និងប្រាក់ចំណូលឡើយ។ តើលោកអ្នកចង់ដឹងទេថា ក្នុងមួយថ្ងៃ Mark Zuckerberg រកចំណូលបានប៉ុន្មាន?។
សារព័ត៌មាន CNBC បានចុះផ្សាយដោយយោងទៅលើទិន្នន័យរបស់ទស្សនាវដ្ដី Forbes ដែលបានឱ្យដឹងថា លោក Mark Zuckerberg មានទ្រពសម្បត្តិតម្លៃ 74ពាន់លានដុល្លារអាមេរិក ហើយបើយោងតាមទិន្នន័យនេះដែរ Forbes បានបញ្ជាក់ថា ក្នុងមួយថ្ងៃលោកអាចទទួលបានចំណូលជាមធ្យមប្រហែល 5.97លានដុល្លារអាមេរិក ខណៈដែលលោក Jeff Bezos ស្ថាបនិកក្រុមហ៊ុនលក់ទំនិញអនឡាញដ៏ធំមួយនៅអាមេរិក Amazon មានទ្រព្យសម្បត្តិ 132ពាន់លានដុល្លារអាមេរិក និងរកចំណូលបានជាមធ្យម 6.8លានដុល្លារអា-មេរិកក្នុងមួយថ្ងៃ។
គួរបញ្ជាក់ផងដែរថា ថ្មីៗនេះ Facebook បានជួបរឿងអាស្រូវបែកធ្លាយទិន្នន័យផ្ទាល់ខ្លួនរបស់អ្នកប្រើប្រាស់ប្រមាណជា 87លាននាក់ រហូតធ្វើឱ្យលោក Mark Zuckerberg មេធំ Facebookត្រូវចេញមុខមកសុំទោសជាសាធារណៈ ជាពិសេសមានបណ្ដាប្រទេសមួយចំនួនថែមទាំងគំរាមបិទ Facebook ចោលទៀតផង៕
June 9, 2018
ការស្រាវជ្រាវបានបង្ហាញថា ក្មេងចំណាយពេលនៅមុខអេក្រង់កុំព្យូទ័រច្រើនម៉ោង
មនុស្សជាច្រើន រួមទាំងអាណាព្យាបាលនៅកម្ពុជាមួយចំនួនផង ប្រហែលជាគិត និងបារម្ភថា កូនៗរបស់គាត់បានចំណាយពេលនៅមុខកញ្ចក់កុំព្យូទ័រកាន់តែច្រើនឡើងៗពីមួយថ្ងៃទៅមួយថ្ងៃ ដែលធ្វើឱ្យកូនៗរបស់គាត់អាចជួបផលប៉ះពាល់ផ្នែកសុខភាព និងមានភាពទន់ខ្សោយសម្រាប់ការប្រកួតប្រជែង ជាមួយមនុស្សជាច្រើនផ្សេងទៀតនៅពេលគេធំឡើង។
ជាស្ថានភាពជាក់ស្តែង មិនមែនមានតែប្រជាជនខ្មែរនោះទេដែលកំពុងស្ថិតក្នុងការបារម្ភខាងលើតាមការស្រាវជ្រាវរបស់វេទិកាសេដ្ឋកិច្ចពិភពលោកបានបង្ហាញឱ្យឃើញថា កុមារជាច្រើននៅលើពិភពលោកកំពុងស្ថិតក្នុងស្ថានភាពស្រដៀងៗគ្នានេះជាពិសេសនៅសហរដ្ឋអាមេរិក។ នៅសហរដ្ឋអាមេរិក បើយោងតាមទិន្នន័យនៃការស្ទង់មតិរបស់ស្ថាប័ន Gallup បានបង្ហាញថា កុមារជាមធ្យមបានចំណាយពេលវេលាច្រើនបំផុតរបស់ពួកគេនៅជាមួយនឹងសកម្មភាពនានាក្នុងកញ្ចក់នៃឧបករណ៍អេឡិចត្រូនិក។
អាណាព្យាបាលជាច្រើនដែលមានកូនអាយុចន្លោះពី2 ដល់10ឆ្នាំ បាននិយាយថា កូនរបស់ពួកគាត់បានចំណាយពេលវេលាប្រមាណជា 18.6ម៉ោងក្នុងការរស់នៅជាមួយនឹងឧបករណ៍អេឡិចត្រូនិកជាប្រចាំក្នុងមួយសប្តាហ៍។
ជាទូទៅ របាយការណ៍នៃការស្ទង់មតិបានបង្ហាញថា កុមារមួយចំនួនធំបានចំណាយពេលវេលាទំនេរប្រមាណជា 4ម៉ោងក្នុងមួយថ្ងៃដោយនៅមួយកន្លែងហើយប្រើប្រាស់បណ្តាញបច្ចេកវិទ្យា ខណៈដែលរបាយការណ៍ដដែលបានបង្ហាញផងដែរថា អាណាព្យាបាលជាច្រើនចង់នាំកូនៗទៅលេងនៅខាងក្រៅដែរ តែពួកគេមានឧបសគ្គមួយចំនួនដូចជាកត្តាអាកាសធាតុ និងកត្តាពេលវេលាជាដើម។
នៅសហរដ្ឋអាមេរិកបានរកឃើញថា កត្តាអាកាសធាតុមិនល្អ បានធ្វើឱ្យកុមារប្រមាណ 36% ត្រូវរស់នៅជាមួយកញ្ចក់ទូរស័ព្ទ ឬអេក្រង់នៃឧបករណ៍អេឡិចត្រូនិកផ្សេងទៀត ខណៈមានចម្លើយប្រមាណ 34%ផ្សេងទៀតបង្ហាញថាបញ្ហាដែលធ្វើឱ្យក្មេងមិនអាចចេញទៅក្រៅបាន គឺមនុស្សធំរវល់ហើយគ្មានអ្នកនាំ និង 33% ផ្សេងទៀតបានបង្ហាញថា ក្មេងហាក់មិនចង់ទៅលេងនៅខាងក្រៅព្រោះក្មេងដទៃសុទ្ធតែលេងនៅក្នុងផ្ទះ ដែលធ្វើឱ្យកន្លែងសាធារណៈមួយចំនួនហាក់ស្ងប់ស្ងាត់ និងមិនសប្បាយ។
មានអាណាព្យាបាលត្រឹមតែ 3% តែប៉ុណ្ណោះដែលបាននិយាយថា ពួកគេចង់ឱ្យកូនៗរបស់ពួកគេលេងជាមួយឧបករណ៍អេឡិចត្រូនិក។ តែបើមើលពីចំនួនក្មេងវិញ គេបានឱ្យដឹងថា កុមារប្រមាណ 58%ពួកគេមិនចង់ចេញទៅលេងនៅខាងក្រៅទេ ព្រោះពួកគេចង់ប្រើប្រាស់ឧបករណ៍អេឡិចត្រូនិក នៅមួយកន្លែង៕
June 9, 2018
ស្នាដៃសិល្បៈតន្ត្រីថ្មីពីក្រុមតារាចម្រៀង TMS
បើគិតតាំងពីដើមឆ្នាំ រហូតមកដល់ពាក់កណ្តាលឆ្នាំ2018នេះ យើងឃើញថាមានទស្សនិកជនមួយចំនួនប្រាកដជាបានស្តាប់ ក៏ដូចជាទស្សនាវីដេអូចម្រៀងថ្មីៗរបស់ក្រុមតារាចម្រៀងប្រចាំ TMS ដោយមានការចាក់ផ្សាយតាមរយៈកញ្ចក់ទូរទស្សន៍ CBS ហើយតារាចម្រៀងទាំងអស់ក៏បានចេញសម្តែងតាមការប្រគំតន្ត្រីជាបន្តបន្ទាប់រួចមកហើយផងដែរ។ ដោយមានការជួយជ្រោមជ្រែងពីសំណាក់អ្នកនាង យុគ ចិន្តា ដែលជានាយកប្រតិបត្តិរបស់ TMS និងលោក Dennis Garcia Arce ដែលជាប្រធានផ្នែកតន្ត្រីរបស់ TMS បានខិតខំប្រមូលផ្តុំសិល្បករ និងសិល្បការិនីជាច្រើនមកជ្រកក្រោមដំបូលតែមួយ ដើម្បីហ្វឹកហាត់ និងដុសខាត់ទេពកោសល្យរបស់ពួកគេឱ្យកាន់តែប្រសើរឡើងមួយកម្រិតទៀត។ ចង់ដឹងថា តើតារាចម្រៀងប្រចាំ TMS មានបទចម្រៀងថ្មីៗ និងសកម្មភាពអ្វីខ្លះ តាំងពីចាប់ផ្តើមរហូតមកទល់ពាក់កណ្តាលឆ្នាំ2018នេះ? ដូច្នេះសូមបន្តការអានព័ត៌មានលម្អិតនៅបន្ទាត់ខាងក្រោមទាំងអស់គ្នា៖
1. សេម : តារាចម្រៀងដែលមានភាពរ៉ូមែនទិក និងតែងតែទាក់យកបេះដូងរបស់ទស្សនិកជនទាំងអស់រូបនេះ បានចេញនូវវីដេអូចម្រៀងនិពន្ធថ្មី ក្រោមចំណងជើងថា “ត្រចៀកស្រាល” និងបទ “សុំឱកាស” ដែលស្ថិតនៅក្រោមការគ្រប់គ្រង និងផលិតដោយ TMS។ ក្រៅពីនេះ លោក សេម ក៏បានចូលរួមសម្តែងនៅក្នុងខ្សែភាពយន្តមួយចំនួន ដែលភាពយន្តទាំងនោះក៏ត្រូវបានចាក់បញ្ចាំងនៅតាមរោងភាពយន្តនានាទូទាំងប្រទេសផងដែរ។
2. វណ្ណដា : តារាចម្រៀង R&B និង Hip-hop ម្នាក់ដែលកំពុងតែទទួលបានការគាំទ្រពីសំណាក់យុវវ័យនាពេលបច្ចុប្បន្ននេះ និងទើបតែបានចេញនូវវីដេអូចម្រៀងជាផ្លូវការក្រោមចំណងជើងថា “Start & Stop” ដែលបទនេះ បានទទួលនូវសន្ទុះគាំទ្រយ៉ាងខ្លាំង ដោយសារតែទឹកដមសំនៀងនៃការច្រៀង អត្ថន័យ ក៏ដូចជារូបភាពកាយវិការនៅក្នុងវីដេអូចម្រៀងដែលមានន័យជ្រាលជ្រៅធ្វើឱ្យចាក់ដោតដល់បេះដូងយុវវ័យ។
3. នាង ប្រាក់សុគន្ធ : តារាចម្រៀងដែលប្រិយមិត្តទាំងអស់គ្នាពិតជាបានស្គាល់ច្បាស់តាមរយៈសំឡេងដ៏ស្រទន់របស់គាត់។ សុគន្ធ ក៏បានចេញនូវវីដេអូចម្រៀងជាលើកដំបូងរបស់ខ្លួន ដែលស្ថិតនៅក្រោមការគ្រប់គ្រង និងផលិតរបស់ក្រុមហ៊ុន TMS ផងដែរនោះគឺបទ “ខូចចិត្តស្ងាត់ៗ”។ បទនេះដែរ ក៏ត្រូវបានចែករំលែក និងទទួលបានការគាំទ្រយ៉ាងច្រើនតាមរយៈបណ្តាញសង្គមនានាផងដែរ។
4. ស៊ីរ៉ា : ម្ចាស់បទ “ច្រណែនគេមិនមែនជាខ្ញុំ” បានចេញនូវវីដេអូចម្រៀងថ្មីរបស់ខ្លួនសម្រាប់ឆ្នាំ2018នេះ ដែលបទចម្រៀងនោះមានចំណងជើងថា “ដឹងថាស្រឡាញ់តែខ្វល់ពីអូនខ្លះផង” ដើម្បីជូនទៅដល់ប្រិយមិត្តរបស់នាង។ ស៊ីរ៉ា ក៏បានបន្តទៀតថា ខ្លួនកំពុងតែថតបទចម្រៀងថ្មី ដែលជាចង្វាក់ Pop Rock ដើម្បីត្រៀមចេញជាបន្តបន្ទាប់ផងដែរ។
5. អ្នកនាង ហង្ស សុជាតា : តារាចម្រៀងម្នាក់ដែលស្ថិតនៅក្នុងបេះដូងទស្សនិកជនជាយូរមកហើយនោះ ក៏បានចេញនូវវីដេអូចម្រៀងបទ “ស្អប់មនុស្សដែលធ្វើឱ្យអ្នកខូចចិត្ត” សម្រាប់ជាចំណីអារម្មណ៍ដល់ទស្សនិកជនរបស់ខ្លួន។ អ្នកនាងបានសន្យាថានឹងខិតខំនាំយកនូវអ្វីដែលថ្មីៗ និងប្លែកៗ ក៏ដូចជាបទចម្រៀងពីរោះៗ សម្រាប់ជាកាដូជូនទៅដល់ទស្សនិកជន ដែលតែងតែគាំទ្រអ្នកនាងកន្លងមកនេះ។
6. Vartey Ganiva : តារាចម្រៀងស្រីដែលនាងត្រូវបានសារព័ត៌មានបរទេសចុះផ្សាយថាជា “Cambodia’s Queen of Punk” បានចេញនូវវីដេអូចម្រៀងលើកដំបូងរបស់ខ្លួនក្រោមចំណងជើងថា “ស្អែកយើងបែកគ្នា” ដែលបទនេះរៀបរាប់ពីនារីទន់ខ្សោយម្នាក់ដែលមានភាពក្លាហានក្រោកឈរឡើងសុំបែកផ្លូវសេ្នហា ដែលពោរពេញទៅដោយការកុហកបោកប្រាស់។ Vartey ក៏នឹងមានបទចម្រៀងចង្វាក់ Punk និងបទចម្រៀងមនោសញ្ចេតនាថ្មីៗ សម្រាប់ចែកជូនទៅដល់ទស្សនិកជននាពេលឆាប់ៗខាងមុខនេះផងដែរ។
7. MC Bull : កន្លងទៅថ្មីៗនេះ MC Bull ក៏បានចេញនូវវីដេអូថ្មី សម្រាប់រាំលេងក្នុងឱកាសបុណ្យចូលឆ្នាំប្រពៃណីជាតិខ្មែរ តាមរយៈបទ “រាំតន្ទ្រំជើង”។ MC Bull បានបង្ហើបថា លោកកំពុងតែនិពន្ធ និងថតបទចម្រៀងថ្មីៗ ដើម្បីបំពេញនូវតម្រូវការទីផ្សារ និងអ្នកគាំទ្ររូបលោក ដែលត្រៀមចេញនាពេលឆាប់ៗខាងមុខនេះ។
8. ផាយ៉ត : ដែលគ្រប់គ្នាស្គាល់ថា ជាតារាចម្រៀងដែលមានប្រជាប្រិយ និងមានភាពក្រមិចក្រមើមនោះ លើកនេះលោកបានចេញនូវវីដេអូចម្រៀងថ្មីក្រោមចំណងជើងថា“រឿងអូន និងបង” ដែលជាបទចម្រៀងបែបមនោសញ្ចេតនាវិញម្តង។ លោកបន្តទៀតថាបទចម្រៀងថ្មីៗរបស់លោកដែលស្ថិតនៅក្រោមការគ្រប់គ្រងផលិតរបស់ក្រុមហ៊ុន TMS កំពុងតែរៀបចំ និងត្រៀមចេញជាបន្តបន្ទាប់ ដើម្បីកំដរអារម្មណ៍ទស្សនិកជន។
9. Ting Tong : សមាជិកថ្មីរបស់ TMS រូបនេះបានប្រាប់ថាវីដេអូចម្រៀងរបស់លោក ដែលមានចំណងជើងថា “ចាំចម្លើយ” ទើបតែចេញជាផ្លូវការថ្មីៗកន្លងមកនេះ។ លោក Ting Tong បង្ហើបថា ខ្លួនមានភាពកក់ក្តៅ និងមានទំនុកចិត្តក្នុងការចូលជាសមាជិករបស់ TMS ក៏ដូចជាការផលិតចម្រៀងថ្មីៗជាបន្តបន្ទាប់ទៀត។ អ្វីដែលពិសេសជាងនេះទៅទៀតនោះ Ting Tong ត្រូវបានអញ្ជើញជាតំណាងឱ្យប្រទេសកម្ពុជាចូលរួមក្នុងការប្រកួតចម្រៀងអន្តរជាតិមួយនាពេលខាងមុខនេះថែមទៀតផង។
វត្តមាន ក៏ដូចជាសកម្មភាពរបស់តារាចម្រៀង TMS មិនទាន់អស់នោះទេ! ក្រៅពីចេញនូវបទចម្រៀងថ្មីៗ ពួកគាត់ក៏បានចូលរួមក្នុងកម្មវិធីជាច្រើន ដូចជា កម្មវិធីសម្ពោធរឿង កិច្ចសម្ភាសន៍ និងកម្មវិធីធំៗមួយចំនួនទៀត។ ក្រោមការគ្រប់គ្រងផលិតរបស់ TMS នឹងព្យាយាមនាំយកនូវព្រឹត្តិការណ៍ប្លែកៗ ព្រមជាមួយបទចម្រៀងនិពន្ធថ្មី មកជូនទស្សនិកជន និងអ្នកគាំទ្រគ្រប់ស្រទាប់វណ្ណៈ។ កុំភ្លេច! រងចាំតាមដានសកម្មភាពតារារបស់ក្រុមហ៊ុន TMS ទាំងអស់គ្នាណា៎!
លោកអ្នកអាចស្វែងរកតារាជាច្រើនទៀតប្រចាំនៅ TMS ក៏ដូចជា CBS ដែលមានទេពកោសល្យ និងប្រកបដោយវិជ្ជាជីវៈ សម្រាប់ការថតខ្សែភាពយន្ត ថត Spot ពាណិជ្ជកម្ម បើកសម្ពោធផ្សេងៗ ឬជាអ្នកតំណាងឱ្យម៉ាកផលិតផលជាដើម។ ប្រិយមិត្តទាំងអស់ អាចទស្សនានូវវីដេអូបទចម្រៀងថ្មីៗរបស់ក្រុមតារាចម្រៀង TMS បានតាមរយៈ Facebook Page: TMS Cambodia និង YouTube Channel: CTN Official Channel៕
June 9, 2018
តើកាល់ស្យូម មានប្រយោជន៍យ៉ាងណាខ្លះជាមួយស្រ្តីមានគភ៌?
មានសារធាតុអាហារជាច្រើនដែលចាំបាច់ និងមានប្រយោជន៍យ៉ាងខ្លាំងចំពោះសុខភាពរាងកាយរបស់ស្រ្តីដែលកំពុងតាំងគភ៌។ ការពិតទៅ ការទទួលទានអាហារដែលល្អ និងមានប្រយោជន៍តាំងពីមុនពេលតាំងគភ៌ ក៏រឹតតែមានផលល្អចំពោះសុខភាពច្រើនដែរ ព្រោះការដែលរាងកាយបានទទួលសារធាតុអាហារល្អៗ ច្បាស់ជាហុចផលល្អដល់សុខភាពទាំងម្ដាយ និងទារកក្នុងគភ៌មិនខាន តែនៅមានរឿងមួយទៀតដែលមានផលយ៉ាងច្រើនដល់ការចម្រើនធំធាត់របស់រាងកាយ នោះគឺការបានទទួលទានអាហារដែលសម្បូរទៅដោយសារធាតុកាល់ស្យូម ព្រោះកាល់ស្យូមនឹងជួយសាងបន្ថែមលើផ្នែកដែលសឹករេចរឹល រួមទាំងជួយសាងបណ្ដុំឆ្អឹង និងធ្មេញឱ្យមានការរីកចម្រើនធំធាត់យ៉ាងរឹងមាំ។
កាល់ស្យូមមានប្រយោជន៍ចំពោះសុខភាព និងជាសារធាតុរ៉ែដែលចាំបាច់ត្រូវមានច្រើនបំផុតក្នុងរាងកាយ កាល់ស្យូមភាគច្រើនស្ថិតនៅក្នុងឆ្អឹង និងធ្មេញ កាល់ស្យូមមានភាពចាំបាច់ដល់ការធ្វើការងាររបស់ប្រព័ន្ធប្រសាទ ការបង្រួញខ្លួនរបស់សាច់ដុំ-ល- ក្រៅពីនេះកាល់ស្យូមនៅមានប្រយោជន៍ដល់ការបង្កកខ្លួនរបស់ឈាមនៅពេលកើតមានស្នាមរបួសលើរាងកាយទៀតផង។
កាល់ស្យូម និងស្រ្តីមានគភ៌
ប្រហែលជាបានដឹងរួចហើយថា នៅលើ
ស្រ្តីដែលកំពុងតាំងគភ៌ ការបានទទួលកាល់-ស្យូមគ្រប់គ្រាន់តាមតម្រូវការរបស់រាងកាយ នឹងជួយធ្វើឱ្យកម្មវិធីការធ្វើការងាររបស់គ្រប់ប្រព័ន្ធក្នុងរាងកាយដំណើរការទៅយ៉ាងល្អពេញលេញ ព្រោះមកដល់អំឡុងពេលមួយរបស់ការតាំងគភ៌ កាល់ស្យូមនឹងត្រូវបឺតយកទៅប្រើប្រាស់ក្នុងការសាងសាច់ សាងតួខ្លួន សាងឆ្អឹង និងធ្មេញរបស់ទារកក្នុងគភ៌ ដូច្នេះហើយទើប យើងបានឃើញថា ស្ត្រីដែលមានគភ៌ច្រើនតែមានអាការពុកធ្មេញកើតឡើង រួមទាំងរោគឆ្អឹងពុកផងដែរ ដោយសារតែកង្វះជាតិកាល់ស្យូមហ្នឹងឯង។ ដូច្នេះក្នុងមួយថ្ងៃៗនៃការទទួលទានអាហារ ស្រ្តីមានគភ៌គួរតែសង្កត់ធ្ងន់លើអាហារដែលមានជាតិកាល់ស្យូមរួមជាមួយផង ព្រោះវានឹងជួយឱ្យបរិមាណកាល់ស្យូមក្នុងរាងកាយមានគ្រប់គ្រាន់នឹងតម្រូវការរបស់ទាំងម្ដាយ និងកូនរបស់អ្នកផងដែរ។
ស្រ្តីមានគភ៌ និងការខ្វះជាតិកាល់ស្យូម
 ការធ្វើការងាររបស់សាច់ដុំ ប្រព័ន្ធប្រសាទ កម្មវិធីមេតាបូលីហ្ស៊ឹមរបស់កោសិកា នឹងធ្វើការខុសប្រក្រតី។
 ឆ្អឹងនឹងស្ដើង និងផុយស្រួយ។
 ចំពោះស្រ្តីមានគភ៌ដែលមានការខ្វះជាតិកាល់ស្យូមគ្រប់ពេលវេលា និងខ្វះក្នុងរយៈពេល យូរជាប់ៗគ្នា រឿងដែលនឹងកើតឡើងនោះគឺ នឹងធ្វើឱ្យកើតអាការសឹកពុកឆ្អឹងជានិរន្តរ៍។
 លុះដល់អំឡុងពេលមួយរបស់វ័យ នៅ លើស្រ្តីមានគភ៌ ឬអ្នកដែលខ្វះជាតិកាល់ស្យូម នឹងធ្វើឱ្យកម្ពស់ថយចុះ។
 ភាពរឹងមាំ ឬកម្លាំងពលំក្នុងការប្រឹងប្រសូតបុត្រនឹងថយចុះ ឬនៅលើស្រ្តីមួយចំនួនគ្មានកម្លាំងប្រឹងសោះតែម្ដង។
ប្រភពអាហារដែលសម្បូរជាតិកាល់ស្យូម
ប្រភពអាហារដែលមានជាតិកាល់ស្យូម មានច្រើនប្រភេទណាស់ មិនថាតែកាល់ស្យូមដែលមាននៅក្នុងទឹកដោះដែលស្រ្តីមានគភ៌គួរតែទទួលទានជាមធ្យម 1-2កែវក្នុងមួយថ្ងៃ ព្រោះស្រ្តីមានគភ៌ត្រូវការកាល់ស្យូមច្រើនក្នុងមួយថ្ងៃៗដល់ទៅ 1,200មីល្លីក្រាមឯណោះ ដូច្នេះហើយទើបចាំបាច់ត្រូវបានទទួលពីអាហារដែលមានជាតិកាល់ស្យូមខ្ពស់។ សម្រាប់អាហារផ្សេងទៀតដែលជាប្រភពដ៏ល្អរបស់កាល់ស្យូមដែរនោះ មានដូចជាត្រីចង្វាមូល ត្រីតូចៗដែលញ៉ាំបានទាំងឆ្អឹង បន្លែស្លឹកបៃតង ដូចជាបន្លែ ខាត់ណា ប្រូខូលី គ្រាប់ល្ង ឬតៅហ៊ូដុំ ជាដើម។ល៕
June 8, 2018
ជិតប្រឡងបាក់ឌុប ក្រសួងផ្តល់ឯកសារជំនួយស្មារតីដល់សិស្សថ្នាក់ទី12
ក្រោយពេលកំណែទម្រង់វិស័យអប់រំ ការប្រឡងមធ្យមសិក្សាទុតិយភូមិចាប់ផ្តើមមានសភាពតឹងរ៉ឹងឡើង ហើយចំណុចវិជ្ជមានជាច្រើនក្នុងវិស័យអប់រំ ក៏កើតមានឡើងទន្ទឹមគ្នានឹងការជំរុញឱ្យសិស្សមានការខិតខំប្រឹងប្រែងរៀនសូត្រកាន់តែខ្លាំងឡើងដើម្បីប្រឡងឱ្យជាប់នូវដំណាក់កាលដ៏សំខាន់នេះ។
ជារៀងរាល់ឆ្នាំ ក្រសួងអប់រំ យុវជន និងកីឡាបានព្យាយាមគ្រប់លទ្ធភាពដើម្បីទប់ស្កាត់ការលេចធ្លាយវិញ្ញាសាប្រឡង ភាពមិនប្រក្រតីក្នុងពេលប្រឡង និងការប្រព្រឹត្តអំពើពុករលួយក្នុងការប្រឡងជាដើម។ ស្របពេលជាមួយគ្នានេះដែរ ក្រសួងក៏បានបង្កើតកម្មវិធីជំរុញចំណេះដឹងកាន់តែច្រើនដល់សិស្សនៅតាមបណ្តាខេត្តឆ្ងាយៗឱ្យមានសមត្ថភាពស្មើនឹងសិស្សនៅទីប្រជុំជនតាមរយៈការបណ្តុះបណ្តាលគ្រូ ជំរុញឱ្យមានសាលាធនធានសិក្សាដើម្បីជំរុញឱ្យមានបច្ចេកវិទ្យាទំនើប និងឧបករណ៍ពិសោធន៍នៅតាមបណ្តាខេត្ត រួមទាំងការផ្សព្វផ្សាយឯកសារសំខាន់ៗនៅតាមបណ្តាញបច្ចេកវិទ្យាជាដើមទៀតផង។
នៅមុនឱកាសប្រឡងមធ្យមសិក្សាទុតិយភូមិនេះ ក្រសួងអប់រំបានដាក់ឱ្យសិស្សទាញយកឯកសារដោយឥតគិតថ្លៃនៅក្នុងគេហទំព័រផ្លូវការរបស់ខ្លួន ដោយក្នុងនោះមានមេរៀនសង្ខេប និងលំហាត់គំរូ លើមុខវិជ្ជាគណិតវិទ្យា រូបវិទ្យា គីមីវិទ្យា ជីវវិទ្យានិងប្រវត្តិវិទ្យា។ បើទោះបីជាឯកសារទាំងអស់នេះគ្រាន់តែជាជំនួយដល់សិស្សានុសិស្ស ហើយមិនមែនជាឯកសារពេញលេញសម្រាប់កម្មវិធីសិក្សាថ្នាក់ទី12ទាំងមូលក្តី តែជាទូទៅគេសង្កេតឃើញថា សិស្សអាចប្រើប្រាស់វាជាប្រភពយ៉ាងសំខាន់ក្នុងការអនុវត្តលំហាត់សម្រាប់ត្រៀមប្រឡងបានយ៉ាងល្អ។ ឯកសារទាំងអស់នេះ ក៏ជាចំណុចមូលដ្ឋានដែលអាចធ្វើឱ្យសិស្សប្រើប្រាស់សម្រាប់វាស់ស្ទង់ពីសមត្ថភាពរបស់ខ្លួនមុនពេលប្រឡងផងដែរ។
ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ជានិច្ចកាលក្រសួងបានព្យាយាមផ្តល់ឯកសារសំខាន់ៗដល់សិស្សតាមរយៈទំព័រហ្វេសប៊ុកផ្លូវការ គេហទំព័រ និងប្រភពជាច្រើនទៀតដើម្បីឱ្យពួកគេអាចទាញយកឯកសារសង្ខេបទាំងអស់នោះបានយ៉ាងងាយស្រួល ដោយមិនចាំបាច់ចំណាយប្រាក់។ ម្យ៉ាងវិញទៀត យើងក៏បានជំរុញឱ្យមានក្លិបសិក្សានៅតាមសាលានានាដើម្បីធ្វើឱ្យយ៉ាងណាឱ្យសិស្សអាចមានលទ្ធភាពពង្រឹងសមត្ថភាពខ្លួនឯងបានយ៉ាងល្អ ស្របពេលដែលក្រសួងក៏បានបង្ហាញវីដេអូបង្រៀននូវមេរៀនសំខាន់ៗយ៉ាងទូលំទូលាយដល់សិស្សានុសិស្សនៅកម្ពុជា។
ប្រភពឯកសារសំខាន់ដែលក្រសួងផ្តល់ជូនទាំងអស់នេះ ជាប្រភេទឯកសារ PDF ដែលអនុញ្ញាតឱ្យសិស្សអាចទាញយកដើម្បីបោះពុម្ពប្រើប្រាស់ដោយខ្លួនឯង។ ហើយក្នុងឯកសារទាំងអស់នោះគឺជាឯកសារដែលមានគណៈកម្មការរៀបចំយ៉ាងច្បាស់លាស់ និងមានគណៈកម្មការត្រួតពិនិត្យយ៉ាងល្អិតល្អន់ មុននឹងអនុញ្ញាតឱ្យប្រើប្រាស់ ដើម្បីធានាថា វាពិតជាមានអត្ថប្រយោជន៍សម្រាប់ការសិក្សាដល់សិស្សទូទៅនៅកម្ពុជាប្រាកដមែន។
ប្រភពឯកសារខ្លះ ដូចជាឯកសារប្រវត្តិវិទ្យាជាដើម គឺអាចធ្វើឱ្យសិស្សមានសមត្ថភាពក្នុងការវិភាគ ស្វែងយល់ និងវាយតម្លៃ ដោយទាញយកបទពិសោធពីប្រវត្តិសាស្ត្រសម្រាប់ជាចំណេះដឹងសម្រាប់ការរស់នៅជាក់ស្តែងក្នុងសង្គម ហើយថែមទាំងធ្វើឱ្យសិស្សមានភាពងាយស្រួលក្នុងការប្រើប្រាស់ទៀតផង ព្រោះវាជាប្រភេទមេរៀនខ្លីៗដែលសង្ខេបដោយអ្នកជំនាញ។
ចំពោះមុខវិជ្ជាវិទ្យាសាស្ត្រពិតវិញគឺ ភាគច្រើនជាប្រភេទលំហាត់អនុវត្តន៍ដើម្បីពង្រឹងចំណេះដឹង និងដោះស្រាយលំហាត់ ដោយការទាញយកនិយមន័យច្បាប់ និងរូបមន្តយកមកប្រើប្រាស់។ ម្យ៉ាងវិញទៀត វាក៏ជួយឱ្យសិស្សមានភាពងាយស្រួលក្នុងការសិក្សា និងចងចាំមេរៀនថែមទៀតផង ព្រោះលំហាត់ដែលបានដាក់ចេញនោះ ភាគច្រើនត្រូវបានរៀបចំដោយមានលំដាប់លំដោយត្រឹមត្រូវ ជាមួយនឹងវិធីប្លែកៗទៀតផង៕
June 8, 2018
ជីជី រំភើបចិត្តខណៈរបរថ្មីមួយទៀតលេចជារូបរាងពេញលេញដូចក្ដីស្រម៉ៃ
តាមរយៈបណ្ដាញទំនាក់ទំនងសង្គមហ្វេសប៊ុកនៅថ្ងៃទី 8 ខែ មិថុនា ឆ្នាំ 2018 នេះ គេមើលឃើញថា កញ្ញា ជីជី ក្រៅពីអាជីពជាពិធីការិនី និងតារាសម្ដែងដ៏មានប្រជាប្រិយភាពហើយនោះ ថ្មីៗនេះ នាងបានបន្ថែមមុខរបរក្នុងដៃមិនខុសពីតារាមួយចំនួនដែរគឺហាងអាហារ «I’m Spicy Soup» បន្ទាប់ពីតារាស្រីរូបនេះ បានបើកសាកល្បងអស់រយៈពេលច្រើនថ្ងៃ ដើម្បីភក្សរសជាតិអាហារមុនពេលបើកសម្ពោធជាផ្លូវការផងដែរ។
តារាស្រីសាច់សខ្ចីរូបនេះ បានបញ្ជាក់ថា « មិនធ្លាប់រំពឹងទុក ថាមានហាងស៊ុបហិរនេះ ដោយសារជាអាហារដែលចេះធ្វើ ហើយចូលចិត្តញាំជាប្រចាំ។ គម្រោងត្រឹមតែលក់តាម online លេងៗ ជាមួយបងស្រី ហើយផ្តើមពី3តុ ខាងមុខ ហាងខោអាវ ក្រោយមក ភ្ញៀវច្រើន ក៏សំរេចចិត្ត យកហាងខោអាវមកធ្វើជាហាងស៊ុប វិញ ដោយគ្មានការព្រៀងទុក។ ឥលូវនេះ ក្លាយជាហាងស៊ុបពេញរូបរាងកន្លែងធំជាងមុន។ អរគុណ អតិថិជនដែលតែងតែគាំទ្រ និង អរគុណ បងៗ មិត្តភក្តិ ដែលចូលរួមកាលពីម្សិលមិញនេះ»។
សូមជម្រាបផងដែរថា ការបើកសម្ពោធហាងថ្មីមួយនេះរបស់តារាស្រីរូបនេះ និងបងស្រីនាង គេឃើញមានការអញ្ជើញតារាសិល្បៈល្បីៗមកចូលរួម ដែលធ្វើឱ្យកម្មវិធីរបស់កញ្ញា កាន់តែមានភាពសប្បាយរីករាយទ្វេដង និងបានសម្ដែងក្ដីអបអរដល់ ជីជី មានទាំងបាច់ផ្កាចំរុះព័ណ៌ផងដែរ៕
June 8, 2018
ច្បាស់ហើយ !! ម្ដាយក្មេកលោកព្រាប សុវត្ថិ ទទួលស្គាល់ សាត រស្មី ជាចៅប្រសាហើយ
ថ្មីៗនេះ មានការចាប់អារម្មណ៍យ៉ាងខ្លាំងចំពោះតារាសម្តែងសាច់សខ្ចីអ្នកម៉េម៉ាយ សាត រស្មី បានធ្វើឱ្យមហាជនមានការភ្ញាក់ផ្អើល បន្ទាប់ពីមានការបែកធ្លាយរូបភាពថតរួមគ្នាជាមួយក្រុមគ្រួសារលោក ព្រាប សុវត្ថិ ព័ត៌មាននេះបានធ្វើឱ្យទស្សនិកជន មានការងឿងឆ្ងល់យ៉ាងខ្លាំង ពីទំនាក់ទំនងមួយនេះ។
យ៉ាងមិញ នៅលើបណ្ដាញទំនាក់ទំនងសង្គមហ្វេសប៊ុក គេមើលឃើញថា ម្តាយក្មេងរបស់កំពូលតារាចម្រៀង ព្រាប សុវត្ថិ បានបង្ហោះរូបភាព និងធ្វើការប្រកាសក្តែងៗលើបណ្តាញសង្គម ដើម្បីស្រាយចម្ងល់ដ៏រសើបមួយនេះ ដោយបាននិយាយថា«សាត រស្មី គឺជាអនាគតចៅប្រសារបស់ខ្ញុំ » ដែលធ្វើអោយទស្សនិកជនមានការស្រឡាំងកាំងតែម្តង។ គួរបញ្ជាក់ដែរថា កញ្ញា សាត រស្មី មានទំនាក់ទំនងស្នេហានឹងក្មួយប្រុសសង្ហាលោកព្រាប សុវត្ថិ គឺមានរយៈពេលយូរហើយដែរ គ្រាន់តែអ្នកទាំង2មិនបានបង្ហាញជាសាធារណៈតែប៉ុណ្ណោះ។
គួររំឭកផងដែរថា កន្លងមកនៅក្នុងបទសម្ភាសន៍ជាមួយអ្នកសារព័ត៌មាន នាកាលសម្ពោធរឿងរបស់ផលិតកម្ម LD តារាស្រីរូបនេះធ្លាប់បានបង្ហើបថា «សម្រាប់រឿងអាស្រូវនោះ និយាយរួមខ្ញុំអត់ខ្វល់ផង ព្រោះរឿងនោះ មិនមែនជារឿងឥឡូវ តាំងពី10ឆ្នាំមុន ហើយក៏ខ្ជិលខ្វល់ព្រោះ រឿងអត់ប្រយោជន៍ ។ មកទល់នឹងពេលនេះ ខ្ញុំបានរកអ្នកស្អំបេះដូង បានជាង1ឆ្នាំ ហើយគេដឹងរឿងនេះដែរ គេអត់ប្រកាន់នោះទេ» ។ នេះបានសបញ្ជាក់ឱ្យដឹងថា ការបង្កាត់ភ្លើងស្នេហ៍ជាមួយបុរសក្មួយប្រុសសង្ហាលោកព្រាប សុវត្ថិ គឺកើតឡើងពីចិត្តនឹងចិត្ត ហើយអ្នកគាំទ្ររំពឹងថា នាងនឹងមានដំណឹងល្អចូលរោងការឆាប់ៗនេះ៕
June 8, 2018
លោក Southgat ឈឺក្បាលលើការជ្រើសរើសក្រុមអង់គ្លេស ក្រោយផ្តួលកូស្តារីកា
លោក Gareth Southgate បានទទួលស្គាល់ថា លោក «មានការសម្រេចចិត្តដ៏លំបាក» ជាច្រើនដែលត្រូវធ្វើ ជុំវិញកាជ្រើសរើសទាំង 11នាក់ដំបូងរបស់លោកសម្រាប់ការប្រកួតបើកឆាកក្នុងពូលរបស់ក្រុមបាល់ទាត់ជម្រើសជាតិអង់គ្លេសក្នុងយុទ្ធនាការ World Cup ជាមួយនឹងក្រុមជម្រើសជាតិទុយនីស៊ី ក្នុងរយៈពេល 10ថ្ងៃទៀត ក្រោយពីក្រុមដែលមានការផ្លាស់ប្តូរកីឡាករច្រើនរបស់លោក បានបង្ហាញពីទម្រង់លេងដ៏គួរឱ្យទាក់ទាញនៅពេលប្រកួតជាមួយនឹងក្រុមកូស្តារីកា។
ខ្សែប្រយុទ្ធ Marcus Rashford និងខ្សែបម្រើ Ruben Loftus-Cheek បានបង្ហាញពីទម្រង់លេងដ៏គួរឱ្យទាក់ទាញក្នុងពេលយកឈ្នះលើក្រុមបាល់ទាត់ជម្រើសជាតិកូស្តារីកា ក្នុងលទ្ធផល 2-០ ក្នុងទីក្រុង Leeds កាលពីថ្ងៃព្រហស្បតិ៍ ដើម្បីផ្តល់ឱ្យអ្នកចាត់ការទូទៅរូបនេះមានហេតុផលជាច្រើនដែលត្រូវពិចារណា នៅមុនពេលការធ្វើដំណើររបស់ក្រុមអង់គ្លេសទៅកាន់យុទ្ធនាការ World Cup នៅថ្ងៃអង្គារសប្តាហ៍ក្រោយ។
លោក Southgate បានឱ្យដឹងថា៖ «ពិតណាស់ វាកាន់តែលំបាក។ មានការសម្រេចចិត្តធំៗជាច្រើនដែលត្រូវធ្វើ ប៉ុន្តែ ស្ថិតក្នុងវិធីដ៏ល្អមួយ។ ប្រសិនបើខ្ញុំគិតថា ខ្ញុំមិនមាននរណាម្នាក់ក្នុងការលេងក្នុងទីតាំងនេះ ឬក្នុងទីតាំងនោះ វានឹងក្លាយជាស្ថានភាពដ៏លំបាក។ យើងបានស្នើឱ្យកីឡាករផ្តល់ឱ្យយើងនូវការប្រជែងគ្នាសម្រាប់កៅអីផ្សេងៗ ហើយពួកគេធ្វើបាន។ យើងត្រូវការជម្រើសជាច្រើន»។
គ្រូបង្វឹករូបនេះបានប្រាប់បន្ថែមទៀតថា៖ «អ្វីដែលបានធ្វើឱ្យខ្ញុំរីករាយនោះគឺថា Marcus Rashford បានរីករាយនឹងកីឡាបាល់ទាត់របស់គេនៅរាត្រីនេះ។ រូបគេលេងបានយ៉ាងល្អ ជាមួយនឹងភាពមុតស្រួចយ៉ាងពិតប្រាកដ»៕
ប្រភពពី៖ The Guardian
June 8, 2018
Liverpool ចង់បំពេញការផ្ទេរ Fekir ពីក្លិប Lyon មុនយុទ្ធនាការ World Cup
ក្រុមហង្សក្រហម Liverpool កំពុងតែជំរុញឱ្យមានការផ្ទេរមួយត្រូវបំពេញជាផ្លូវការដើម្បីចុះហត្ថលេខាជាមួយនឹងខ្សែបម្រើ Nabil Fekir ដែលមកពីក្លិប Lyon នៅមុនពេលរូបគេធ្វើដំណើរទៅកាន់យុទ្ធនាការ World Cup ជាមួយនឹងក្រុមបាល់ទាត់ជម្រើសជាតិបារាំង។ នេះបើយោងតាមប្រភពព័ត៌មាននានារបស់ Sky Sports។
វាមិនទាន់មានការផ្ទេរមួយកើតឡើងរវាងក្លិបដែលទាក់ទងទាំង2 ឡើយ ប៉ុន្តែ Liverpool ត្រូវបានរំពឹងទុកថា នឹងព្យាយាមបំពេញការព្រមព្រៀងគ្នាមួយនៅមុនពេលថ្ងៃសៅរ៍នេះ ជាមួយនឹងតម្លៃខ្លួន 60លានអឺរ៉ូ (ស្មើនឹង 71លានដុល្លារអាមេរិក)។ Fekir ដែលអាចលេងទាំងក្នុងតំបន់បម្រើ និងប្រយុទ្ធនោះ នឹងត្រូវបំពេញកន្លែងទំនេរមួយដែលត្រូវបានចាកចេញដោយខ្សែបម្រើដ៏មានឥទ្ធិពល Philippe Coutinho ទៅកាន់ក្លិប Barcelona កាលពីខែមករា។ ខ្សែបម្រើវ័យ 24ឆ្នាំរូបនេះ គឺជាសមាជិកម្នាក់នៃក្រុមបាល់ទាត់ជម្រើសជាតិបារាំង សម្រាប់យុទ្ធនាការ World Cup នាពេលខាងមុខនេះ។
Liverpool ពិតជាចង់បំពេញការផ្ទេរមួយនេះ នៅមុនពេល Fekir ធ្វើដំណើរទៅកាន់ប្រទេសរុស្ស៊ី ក្រោយពីការប្រកួតកម្តៅសាច់ដុំជាលើកចុងក្រោយរបស់ក្រុមជម្រើសជាតិបារាំង ជាមួយនឹងក្រុមជម្រើសជាតិសហរដ្ឋអាមេរិក នៅថ្ងៃសៅរ៍នេះ។ Fekir បានស៊ុតបាល់បញ្ចូលទី 24គ្រាប់នៅរដូវកាលនេះ ដើម្បីជួយឱ្យក្រុម Lyon ឈ្នះសិទ្ធិទៅប្រកួតក្របខ័ណ្ឌ Champions League តាមរយៈការបញ្ចប់ក្នុងចំណាត់ថ្នាក់លេខ3 នៅលើតារាងក្របខ័ណ្ឌ Ligue 1៕
ប្រភពពី៖ Sky Sports
June 8, 2018
គ្រាន់តែ ឌុច សុភា បង្ហាញខ្លួននៅក្នុងរឿងភាគថ្មីភ្លាម អ្នកគាំទ្រអន្ទះសាចង់តាមដានតែម្ដង
គ្រាន់តែឃើញការបង្ហាញវត្តមានជាថ្មីរបស់តារាសម្ដែង ឌុច សុភា តាមរយៈរឿងភាគថ្មីរបស់ស្ថានីយទូរទស្សន៍ហង្សមាសភ្លាម បានបង្កឱ្យមានការភ្ញាក់ផ្អើលជាខ្លាំងភ្លេតតែម្ដង។ បើតាមការទម្លាយវីដេអូ Trailer នៅលើផេករស្មីហង្សមាស រឿងភាគចំណងជើងថា «ផ្កាថ្ម» គេសង្កេតឃើញមានតារាសម្ដែងល្បីៗជាច្រើនដួងបានចូលរួមសម្ដែងនៅក្នុងរឿងភាគល្អមួយនេះ ជាពិសេសមានវត្តមានសម្ដែងដោយអ្នកនាង ឌុច សោភា ផងដែរ។
នៅចាំបានថា ការបាត់មុខពីការសម្ដែងខារ៉ាអូខេ និងភាពយន្ដអស់រយៈពេល 3 ឆ្នាំមកនេះ អ្នកនាង ឌុច សុភា ក៏ហាក់បីដូចជាបាត់មុខពីពិភពសិល្បៈខ្មែរដូចគ្នាដែរ ដោយគេសង្កេតឃើញថា អ្នកនាងមិនមានសម្ដែងរឿង ឬវីដេអូចម្រៀង MV ណាមួយឡើយ។ គួបញ្ជាក់ផងដែរថា បទចម្រៀងដែលតារាស្រីរូបនេះបានសម្ដែងចុងក្រោយគេមុនពេលបាត់មុខនោះ គឺបទ “Call មកបង ម្ដេចសុំលេខគេ” របស់ផលិតកម្មរស្មីហង្សមាស កាលពីឆ្នាំ 2014 ដែលជាច្រៀងដោយលោក ព្រាប សុវត្ថិ ហើយក៏ជាបទដែលនិពន្ធទំនុកច្រៀងដោយលោក សុខ ចាន់ផល ផងដែរ។
តែដោយឡែក នៅពេលបានឃើញអ្នកនាង ឌុច សុភា បង្ហាញវត្តមានថ្មីសន្លាង និងទេពកោសល្យសម្ដែងរឿងជាថ្មីម្ដងទៀតនោះ បានធ្វើឱ្យអ្នកគាំទ្រអន្ទះសា និងអត់ទ្រាំរង់ចាំទស្សនារឿង «ផ្កាថ្ម» នៅមិនសុខបក់មិនល្ហើយ។ អ្នកគាំទ្រភាគច្រើនលាន់មាត់ថា `« រង់ចាំការសម្ដែងរបស់ ឌុច សុភា យូរណាស់ហើយ។ មើលហើយមើលទៀត អត់ទ្រាំលែងបាន ព្រោះថាវាល្អមើលពេក អគុណហង្សមាសដែលផលិតរឿងដែលល្អល្អបែបនេះហើយជួយលើកស្ទួយវប្បធម៌ខ្មែរទៀតទ្រាំទ្ររហូត »។
អូហូ!! គ្រាន់តែ Trailer ទាក់ទាញកម្រិតនេះទៅហើយ ចុះទម្រាំដល់ថ្ងៃបញ្ចាំងទៀត មិនដឹងភ្លូកទឹកភ្លូកដីចាំទស្សនាប៉ុនណានោះទេ..។ សូមប្រិយមិត្តទាំងអស់កុំខកខានទស្សនារឿង «ផ្កាថ្ម» ដែលសម្ដែងដោយតារាស្រី ឌុច សុភា ឱ្យសោះ ធានាថា នាងបញ្ចេញទេពកោសល្យសម្ដែងគ្រប់រសជាតិតែម្ដង៕
https://www.youtube.com/watch?v=s1rIb1xFOCA
June 8, 2018