Category: សង្គម និងសេដ្ឋកិច្ច

ប្រវត្តិក្រុមហ៊ុន Pass App មុនទទួលបានជោគជ័យ
ត្រឹមតែមួយប៉ប្រិចភ្នែកសោះ រ៉ឺម៉កសណ្ដោងរបស់ខ្មែរដែលប្រជាជនក្នុងរាជធានីភ្នំពេញធ្លាប់ប្រើប្រាស់ក្នុងការធ្វើដំណើរទៅមកកាលពីអំឡុងប៉ុន្មានឆ្នាំមុននោះ ស្ទើរតែបាត់មុខអស់ពីលើទីផ្សារដឹកជញ្ជូនអ្នកដំណើរ និងត្រូវបានជំនួសដោយរ៉ឺម៉កម៉ូតូកង់បីម៉ែត្រ(ហៅថាកង់បីឥណ្ឌា)វិញនាពេលបច្ចុប្បន្ននេះ។
លោក តុប និមល ស្ថាបនិក និងជានាយកប្រតិបត្តិក្រុមហ៊ុន Pass App Technology មានប្រសាសន៍ថា ការណ៍ដែលប្រជាពលរដ្ឋយើងមានទំនោរឈប់ប្រើប្រាស់ម៉ូតូកង់បីខ្មែរហើយងាកមកជិះកង់បីម៉ែត្រ ឬហៅថាកង់បីឥណ្ឌានេះវិញ គឺដោយសារតែកង់បីឥណ្ឌាប្រភេទថ្មីបានផ្តល់ភាពងាយស្រួលខ្លាំងជាងក្នុងការធ្វើដំណើរ។ ងាយស្រួលនៅត្រង់ថា គ្រាន់តែអតិថិជនដោនឡូត App ដាក់នៅក្នុងទូរស័ព្ទដៃរបស់ខ្លួនហើយគាត់អាចកុម្ម៉ង់ហៅជិះតាក់ស៊ីម៉ែត្រ ឬកង់បីម៉ែត្របានគ្រប់ពេលវេលា និងគ្រប់ទីកន្លែងក្នុង រាជធានីភ្នំពេញ ដោយមានកំណត់តម្លៃស្រាប់ មិនចាំបាច់តថ្លៃដូចកង់បីខ្មែរពីមុននោះទេ។ “យើងដឹងទាំងអស់គ្នាហើយថាកាលពីមុន មុននឹងធ្វើដំណើរ លុះត្រាតែយើងទៅឈរចាំបក់ដៃហៅរ៉ឺម៉កម៉ូតូកង់បីនៅតាមដងផ្លូវ ហើយធ្វើការតថ្លៃគ្នារួចទើបសម្រេចថាជិះ ឬមិនជិះជាក្រោយទៅតាមតម្លៃដែលបានតថ្លៃគ្នាហើយ ប៉ុន្តែសម្រាប់កង់បីម៉ែត្រវិញ គ្រាន់តែអតិថិជនកុម្ម៉ង់តាមរយៈAppដែលដោនឡូតទុកនោះ គឺនឹងមានសមាជិកកង់បីម៉ែត្រទៅទទួលដល់ផ្ទះ ទោះជានៅក្នុងបុរី ឬនៅទីកន្លែងផ្សេងណាក៏ដោយ និងមិនចាំបាច់តថ្លៃគ្នានាំតែខាតពេលទៀតផង គឺគិតថ្លៃក្នុង1គីឡូម៉ែត្រត្រឹមតែ 1,200រៀលប៉ុណ្ណោះ។
លោកថា កាលពីប៉ុន្មានឆ្នាំមុនលោកបានបង្កើតក្រុមហ៊ុនដឹកជញ្ជូនអ្នកដំណើរក្នុងរាជធានីភ្នំពេញសាកល្បង ដែលកាលនោះមានរ៉ឺម៉កម៉ូតូកង់3 ត្រឹមតែ 7គ្រឿងប៉ុណ្ណោះ ហើយបានព្យាយាមទៅទទួលដឹកអតិថិជនគ្រប់ទីកន្លែងនៅក្នុងទីក្រុងភ្នំពេញ ដោយគិតថ្លៃ 1,200រៀលប៉ុណ្ណោះក្នុងមួយគីឡូម៉ែត្រ ហើយក៏មានអតិថិជនដឹងតៗគ្នា និងងាកមកប្រើសេវាកម្មនេះកាន់តែច្រើនឡើងៗពីមួយថ្ងៃទៅមួយថ្ងៃ ទើបធ្វើឱ្យក្រុមហ៊ុនលោកសហការជាមួយសមាជិករ៉ឺម៉កម៉ូតូកង់3ខ្មែរ ម៉ូតូកង់3ឥណ្ឌា និងរថយន្តតាក់ស៊ីផ្សេងៗបង្កើតបានជាក្រុមហ៊ុនធំមួយ។
ក្រុមអ្នករត់ម៉ូតូកង់បីមកចុះឈ្មោះនៅក្រុមហ៊ុន Pass App Technology
លោកបញ្ជាក់បន្ថែមថា រហូតមកដល់ខែឧសភា ឆ្នាំ2017 លោកចាប់ផ្តើមបង្កើតក្រុមហ៊ុនថ្មី មួយឈ្មោះថា Pass App Technology ដោយមានសមាជិកដំបូងត្រឹមតែ 100គ្រឿងប៉ុណ្ណោះ ហើយរហូតមកទល់បច្ចុប្បន្ន ទាំងសមាជិកម៉ូតូកង់3ខ្មែរ ម៉ូតូកង់3ឥណ្ឌា និងរថយន្តតាក់ស៊ីសរុបទាំងអស់មានរហូតដល់ទៅ 7,000គ្រឿងឯណោះ។ សមាជិកទាំងនោះភាគច្រើនជាអ្នករត់កង់បី និងតាក់ស៊ីអាជីព ខ្លះទៀតចេញពីអាជីវករ បុគ្គលិកក្រុមហ៊ុនឯកជន និងជាមន្ត្រីរាជការក៏មាន ដោយពួកគាត់បានមកប្រកបរបរដឹកអ្នកដំណើរក្រៅម៉ោង ដើម្បីរកប្រាក់ចំណូលបន្ថែមឱ្យបានកាន់តែច្រើនថែមទៀតសម្រាប់ផ្គត់ផ្គង់ជីវភាពគ្រួសារ។
កត្តាដែលធ្វើឱ្យក្រុមហ៊ុនមានសមាជិកកើនឡើងឆាប់រហ័សនេះ គឺដោយសារតែរបរជាអ្នកបើកកង់បីម៉ែត្រនេះ ក៏អាចរកប្រាក់កម្រៃបានច្រើនគួរសម មិនចាញ់អ្នកធ្វើការក្នុងការិយាល័យប៉ុន្មានឡើយ ដែលជាមធ្យមអ្នកដែលប្រឹងដឹកអតិថិជនអាចរកប្រាក់បានចន្លោះពី8ម៉ឺនរៀល ទៅដល់10ម៉ឺនរៀលក្នុងមួយថ្ងៃ ហើយចំណែកអ្នកដែលមិនសូវប្រឹងអាចបានប្រាក់ចំណូលប្រហែល 6ម៉ឺនរៀលដែរក្នុងមួយថ្ងៃ ដែលកត្តានេះហើយបានធ្វើឱ្យបងប្អូនអ្នករត់កង់បីម៉ែត្របានប្រាប់តៗគ្នាទៅអ្នកដែលស្គាល់ ដូចជាមិត្តភ័ក្តិ បងប្អូន ដើម្បីចូលជាសមាជិករបស់ក្រុមហ៊ុន។ ម្យ៉ាងទៀតដោយសារសេវាកម្មល្អ មិនមានការកាត់ថ្លៃផ្ដេសផ្ដាសនេះហើយបានធ្វើឱ្យអតិថិជនមានការគាំទ្រកាន់តែច្រើនឡើងៗជារៀងរាល់ថ្ងៃដោយពួកគាត់បានប្រាប់តៗគ្នាពីម្នាក់ទៅម្នាក់អំពីតម្លៃ និងសេវាកម្មនេះ។ “ឧទាហរណ៍បើសិនជាគាត់ចង់ជិះរ៉ឺម៉កកង់បីម៉ែត្រ គាត់គ្រាន់តែកុម្ម៉ង់ហៅតាមរយៈ App ហើយទោះជាគាត់ឈរទីណាក៏ដោយក៏ផែនទីនឹងចង្អុលបង្ហាញពីទីតាំងនោះតែម្តង ហើយអ្នកបើករ៉ឺម៉កកង់បីម៉ែត្រ នឹងទូរស័ព្ទទំនាក់ទំនងទៅអតិថិជនដែលអាចមើលគ្នាឃើញទៀតផង។
គួរតែបញ្ជាក់ផងដែរថា លោក តុប និមល បានបញ្ចប់បាក់ឌុបក្នុងឆ្នាំ2001 នៅវិទ្យាល័យព្រះសីហនុ ខេត្តកំពង់ចាម ក្រោយពីចប់បាក់ឌុប លោកក៏បានបន្តការសិក្សាថ្នាក់បរិញ្ញាបត្រផ្នែកព័ត៌មានវិទ្យានៅសាកលវិទ្យាល័យភ្នំពេញ។ ក្រោយពេលចប់ លោកក៏បានចេញធ្វើការនៅតាមក្រុមហ៊ុនឯកជន តែដោយគិតថា ការធ្វើការងារឱ្យគេបានត្រឹមតែផ្គត់ផ្គង់ខ្លួនឯង មិនបានជួយអ្វីច្រើនដល់គ្រួសារនោះ លោកក៏បានចេញរកស៊ីខ្លួនឯងដោយការបើកក្រុមហ៊ុនចំនួន 2លើក ប៉ុន្តែការរកស៊ីដំបូងៗនោះ ដោយសារតែមិនទាន់មានបទពិសោធគ្រប់គ្រាន់ និងកង្វះទុនផងនោះ បានធ្វើឱ្យក្រុមហ៊ុនផ្អាកដំណើរការទៅវិញ។ ប៉ុន្តែយ៉ាងណាការបរាជ័យ គឺជាបទពិសោធដ៏ល្អសម្រាប់ឱ្យលោកឈានឆ្ពោះទៅរកភាពជោគជ័យនាថ្ងៃអនាគត ដូចជាក្រុមហ៊ុន Pass App Technology ដែលលោកបានបើកចុងក្រោយនេះឯង និងដែលបច្ចុប្បន្នកំពុងមានការគាំទ្រយ៉ាងខ្លាំងពីអតិថិជន។
ចំពោះសំនួរដែលសួរថា បើសិនជាមានក្រុមហ៊ុនបរទេសចូលមកផ្តល់សេវាកម្មដូចគ្នានេះកាន់តែច្រើនឡើងៗដូច្នេះ(មានគូប្រជែងច្រើនឡើង) តើក្រុមហ៊ុនរបស់លោកមានការបារម្ភដែរឬទេ?។
ត្រង់ចំណុចនេះលោកបានឆ្លើយថា មិនមានការព្រួយបារម្ភទេ ព្រោះជាធម្មតាការធ្វើអាជីវកម្មអ្វីក៏ដោយ គឺតែងតែមានការប្រកួតប្រជែងដោយចៀសមិនរួចឡើយ សំខាន់គឺក្រុមហ៊ុនយើងផ្តល់សេវាកម្មល្អ គុណភាពល្អទៅដល់អតិថិជន ប្រាកដជាអតិថិជនមានការគាំទ្រកាន់តែច្រើនឡើងៗថែមទៀតមិនខាន ហើយទម្លាប់ប្រជាជនខ្មែរមានទំនោរប្រើសេវាកម្មរបស់ប្រជាជនខ្លួនឯង ជាជាងសេវាកម្មបរទេស៕
June 12, 2018
«ជីដូន កាកី មកវិញហើយ ហាហា!» និងក្បាច់រាំដ៏ក្ដៅសាច់!!
នៅពេលថ្មីៗនេះតារាសម្ដែងស្រីសិចស៊ី ជីដូន កាកី ហៅ ស្រី ម៉ុច បានបង្ហោះវីដេអូខ្លីមួយបង្ហាញពីក្បាច់រាំស៊ិចស៊ី ស៊ីអារម្មណ៍យ៉ាងស្រៀវស្រើបនៅក្នុងក្លិបកម្សាន្តមួយកន្លែង និងជាពិសេស ស្រីម៉ុច បានស្លៀកឈុតគួរឱ្យព្រឺព្រួច ដោយបានបញ្ចេញដើមទ្រូងដើម្បីឱ្យកាន់តែដុតកាមាអារម្មណ៍អ្នកគាំទ្រខ្លាំងឡើងថែមទៀត។
នៅក្នុងវីដេអូនោះគេមើលឃើញថា តារាស្រីរូបនេះបើទោះបីជាបានចាកឆ្ងាយពីពិភពសិល្បៈរយៈពេលយូរហើយយ៉ាងណាក៏ដោយ ក៏រូបនាងនៅតែទទួលបានការចាប់អារម្មណ៍ពីសំណាក់មហាជន(ប្រុសៗ)ដដែល ហើយបានបង្ហាញពីសកម្មភាពជីវិតឯកជនរបស់នាងនៅលើបណ្ដាញសង្គមហ្វេសប៊ុកទៀតផង។ តែអ្វីដែលគួរឱ្យកត់សម្គាល់ខ្លាំងជាងនោះទៅទៀត គឺនាងមិនដែលបោះបង់ចោលភាពសិចស៊ីដោយការបញ្ចេញដើមទ្រូងរបស់នាងឡើយ ថ្វីបើបច្ចុប្បន្ននេះនាងមានបុត្រទៅហើយក្ដី។ នាងបានសរសេរនៅពីលើវីដេអូដ៏ស៊ីអារម្មណ៍នោះថា «កាកី មកវិញហើយ ហាហា!»។
ដើម្បីឱ្យកាន់តែជាក់ច្បាស់ថា តើតារាស្រីរូបនេះមានភាពសិចស៊ីរញ្ជួយអារម្មណ៍ជាមួយក្បាច់រាំដល់កម្រិតណានោះ សូមប្រិយមិត្តទាំងអស់គ្នាអញ្ជើញទស្សនាវីដេអូខាងក្រោមនេះ៖
June 12, 2018
រិទ្ធ អូមេហ្កា ទទូចឱ្យម្ចាស់គណនីក្លែងក្លាយចេញមកតតាំងគ្នានៅមុខច្បាប់
បន្ទាប់ពីអ្នកដឹកនាំសម្ដែងនៅក្នុងផលិតកម្មថោន លោក រិទ្ធ អូមេហ្កា បានធ្វើការរិះគន់ចំពោះបទចម្រៀង និងការដឹកនាំសម្ដែងរបស់ផលិតកម្ម សាស្តា ដែលបានបង្ហាញពីរូបភាពរោលរាលក្ដៅសាច់នៅលើគ្រែក្នុងបទចម្រៀងដែលលោកមើលឃើញថា មិនសមរម្យ និងបង្កភាពអសីលធម៌នៅក្នុងសង្គមនោះ ភ្លាមៗស្រាប់តែមានគណនីហ្វេសប៊ុកក្លែងក្លាយមួយចូលមកទម្លាយរឿង អ្នកដឹកនាំសម្ដែងប្រុសរូបនេះទាមទារគេងជាមួយតារាស្រី ប្រសិនបើតារាស្រីនោះចង់ល្បីក្នុងបទចម្រៀងរបស់លោក។ គណនីនោះមានឈ្មោះថា «ចាំណាស់មនុស្សដែលធ្វើឱ្យខ្ញុំឈឺចាប់» បានបង្ហោះថា ទាមទារគេងជាមួយតារាស្រីៗ បើតារាម្នាក់នោះចង់ល្បីក្នុងស្នាដៃរបស់លោកនោះ គឺដោយសារតែលោកចេញមុខរិះគន់MVបទចម្រៀងក្នុងផលិតកម្មមួយ ដែលបានផលិតសាច់រឿងស្រៀវស្រើបក្ដៅសាច់ ដែលលោកគិតថា មានសាច់រឿងប្រាសចាសនឹងវប្បធម៌ប្រពៃណីខ្មែរ។
ក្ដៅស្លឹកត្រចៀកភ្លែតតែម្ដង! លោក រិទ្ធ អូមេហ្កា ក៏បានបង្ហោះសារតបតវិញថា «ម្ចាស់ Account នេះ ខ្ញុំនឹងឱ្យគេធ្វើការស្រាវជ្រាវរកប្រភព អ្នកណាជាម្ចាស់Account នេះ អ្នកឯងកំពុងនិយាយបង្ខូចកេរ្តិ៍ឈ្មោះខ្ញុំហើយ ហ៊ានមកនិយាយចំពោះមុខច្បាប់ទេ? ខ្ញុំនិយាយ ព្រោះខ្ញុំទើសដោយសារអ្នកនាំសម្តែងអត់ខួរ បែរជានិយាយថាខ្ញុំដាក់កំហិតឱ្យតួស្រីដេកជាមួយខ្ញុំ? តាំងពីខ្ញុំធ្វើការនេះ3ឆ្នាំហើយ ខ្ញុំមិនដែលធ្វើរឿងថោកទាបបែបនេះទេ តួដែលខ្ញុំដឹក ហើយហៅថតអាចហៅមកសួរបាន ហើយមួយទៀត តួស្រីក្នុងផលិតកម្មសាស្តាដែលខ្ញុំបានរិះគន់ អាចហៅមកសួរបាន ស្គាល់ខ្ញុំទេ? អ្នកឯងហ៊ានចេញមកនិយាយតទល់គ្នានៅប៉ុស្តិ៍ប៉ូលីស ចំពោះមុខច្បាប់អត់? បទខ្ញុំផលិតមួយៗមិនដែលមានឈុតឱបថើបគ្នា កខ្វក់បែបនេះទេ អាចឆែកមើលបាន!!!! ។ បញ្ចាក់ : គ្មានអ្នកផ្សេងណាថតអត់ខួរបែបនេះទេ? អ្នកឯងស្គាល់ខ្ញុំឱ្យច្បាស់ លេងខុសមនុស្សហើយ»។
លោក រិទ្ធ បានបង្ហោះសារឆ្លើយតបនឹងការបង្ខូចឈ្មោះនោះ ដោយបញ្ជាក់យ៉ាងក្ដែងៗជាសាធារណៈថា ខ្ញុំប្រឡូកក្នុងការងារនេះ(ដឹកនាំសម្ដែង)ជាង3ឆ្នាំហើយ ខ្ញុំមិនដែលបានយកឈ្មោះជា Director ទៅដាក់កំហិតដោះដូរក្នុងការហៅគេថតទេ។ ដោយសារបុគ្គលម្នាក់ប្រើ Account Facebook fake មកនិយាយលាបពណ៍បង្ខូចឈ្មោះខ្ញុំ បន្ទាប់ពីខ្ញុំរិះគន់ទៅលើផលិតកម្មមួយ ដែលផលិតចម្រៀងSex។ អាចហៅតួដែលខ្ញុំធ្លាប់ហៅថតបានល្បីក្នុងបទខ្ញុំ តើមានអ្នកណាដែលខ្ញុំបានប៉ះពាល់ខ្លួនប្រាណខ្លះ? ខ្ញុំហៅតួថតសំដៅលើសមត្ថភាព នឹងត្រេមុខស៊ីនឹងសាច់រឿងខ្ញុំសសេរឡើង និយាយបែបនេះគឺប៉ះពាល់កិត្តិយសខ្ញុំ ការងារខ្ញុំ នឹងគ្រួសារខ្ញុំខ្លាំងណាស់។ ខ្ញុំធ្វើការមួយនេះដោយបេះដូង នឹងការស្រឡាញ់ អ្នកដែលបានស្គាល់ខ្ញុំ នឹងការងារខ្ញុំ បានដឹងហើយថាខ្ញុំយ៉ាងណា? សូមកុំព្យាយាមលាបពណ៍ខ្ញុំអី!!! សូមជួយShare រកយុត្តិធម៌ឱ្យខ្ញុំផង។ រាល់តួដែលខ្ញុំជ្រើសរើសយកមកសម្តែងក្នុងបទខ្ញុំ ខ្ញុំពឹងលើសមត្ថភាពតួសម្តែង នឹងត្រេមុខតួ ខ្ញុំមិនដែលប្រើតួខ្សែ ឬចង់បានប្រយោជន៍ពីតួសម្តែងមកវិញដោះដូរនឹងការហៅថតទេ ព្រោះខ្ញុំស្រឡាញ់ស្នាដៃខ្ញុំ ខ្ញុំមិនប្រើតួដែលមិនត្រូវនឹងសាច់រឿងខ្ញុំទេ ទោះគ្នាឯងសុំថតក៏ដោយ សូមជួយរកយុត្តិធម៍ចំពោះអ្វីដែលខ្ញុំកសាងកន្លងមកផង។ អ្នកដែលនិយាយបង្ខូចឈ្មោះខ្ញុំបែបនេះ កុំប្រើAcc Fake! និយាយតទល់គ្នា និងអាចហៅតួស្រីណាដែលខ្ញុំបានប៉ះពាល់មក? តែបើវាមិនមែនជាការពិត អ្នកឯងត្រៀមខ្លួនប្រឈមមុខនឹងផ្លូវច្បាប់ចុះ!!! ហ៊ានទេ?។
មកទល់ពេលនេះ មិនទាន់ដឹងថាអ្នកដែលប្រើគណនីហ្វេសប៊ុកក្លែងក្លាយវាយប្រហារចំពោះរូបលោក ជាអ្នកណានៅឡើយទេ ប៉ុន្តែលោកថាខ្លួនមានវិធីស៊ើបដឹងថាជាអ្នកណា ជាពិសេសដោយសារតែម្ចាស់គណនីនោះបានបញ្ចេញប្រតិកម្មបន្ទាប់ពីលោករិះគន់ការផលិតបទចម្រៀងរបស់ផលិតកម្មមួយ៕
June 12, 2018
បែលហ្ស៊ិក ជួបការភិតភ័យ ខណៈ Hazard របួសក្នុងពេលលត់កូស្តារីកាយ៉ាងដំណំ
ក្រុមបាល់ទាត់ជម្រើសជាតិបែលហ្ស៊ិក កាលពីថ្ងៃចន្ទ កំពុងតែបារម្ភជុំវិញភាពរឹងមាំរបស់តារាឆ្នើម Eden Hazard ក្រោយពីខ្សែបម្រើប្រយុទ្ធរបស់ក្លិប Chelsea រូបនេះ បានរងរបួស និងត្រូវប្តូរចេញក្នុងពេលពួកគេបានយកឈ្នះលើក្រុមបាល់ទាត់ជម្រើសជាតិកូស្តារីកា ក្នុងលទ្ធផល 4-1។
Hazard បានដើរចេញពីទីលានប្រកួតទាំងមានរបួស និងដើរសំដៅទៅកាន់ច្រកចេញនៅនាទីទី70 ក្រោយពីបានរងការប្រជែងដណ្តើមបាល់ចំភ្លៅរបស់គេ។ ប្រធានក្រុមជម្រើសជាតិបែលហ្ស៊ិករូបនេះ មិនបានត្រូវការជំនួយពីក្រុមគ្រូពេទ្យក្នុងពេលចេញពីទីលានឡើយ ប៉ុន្តែការប្តូរចេញរបស់គេនឹងក្លាយជាកង្វល់មួយសម្រាប់លោក Roberto Martinez អ្នកចាត់ការទូទៅនៃក្រុមជម្រើសជាតិបែលហ្ស៊ិក ដែលកំពុងតែបារម្ភរួចជាស្រេចហើយថា ខ្សែការពារ Vincent Kompany នឹងមិនរឹងមាំគ្រប់គ្រាន់ដើម្បីចូលលេងក្នុងយុទ្ធនាការ World Cup នៅរដូវក្តៅនេះឡើយ តែក្រោយមក មិត្តរួមក្រុមរបស់គេបានលុបចោលការព្រួយបារម្ភផ្សេងៗទាក់ទងនឹងការតារាឆ្នើមរបស់ក្លិប Chelsea រូបនេះ។ Lukaku បានឱ្យដឹងបន្ទាប់ពីការប្រកួតនេះថា៖ «ខ្ញុំមិនបារម្ភខ្លាំងអំពី Eden ឡើយ។ រូបគេជាមនុស្សរឹងមាំ។ រូបគេមានបញ្ហារាល់តែលើក ប៉ុន្តែគេអាចជម្នះលើបញ្ហានោះបានយ៉ាងឆាប់រហ័ស»។
ក្រុមជម្រើសជាតិបែលហ្ស៊ិក ស្ថិតក្នុងពូល G នៃយុទ្ធនាការ World Cup រួមជាមួយនឹងក្រុមជម្រើសជាតិអង់គ្លេស ប៉ាណាម៉ា និងទុយនេស៊ី៕
ប្រភពពី៖ The Telegraph
June 12, 2018
ការប្រកួតជុំទី1នៃ Carabao Cup នឹងត្រូវចាប់ឆ្នោតនៅវៀតណាម
វៀតណាម នឹងធ្វើជាម្ចាស់ផ្ទះការចាប់ឆ្នោតសម្រាប់ការប្រកួតជុំទី1 នៃយុទ្ធនាការពាន Carabao Cup នៅរដូវកាលក្រោយ។ នេះបើយោងតាមការប្រកាសរបស់ក្របខ័ណ្ឌលីកអង់គ្លេសហៅកាត់ថា EFL។
វាជារយៈពេល 2ឆ្នាំជាប់ៗគ្នាដែលការចាប់ឆ្នោតនេះ ត្រូវបានរៀបចំឡើងនៅបរទេស ក្រោយពីការចាប់ឆ្នោតឆ្នាំ2017 សម្រាប់ការប្រកួតជុំទី1នៃពាន Carabao Cup ត្រូវបានរៀបចំឡើងនៅទីក្រុងបាងកក។ កំហុសបច្ចេកទេសបានកើតឡើងក្នុងការចាប់ឆ្នោតកាលពីឆ្នាំមុន ប៉ុន្តែមិនបានរារាំងមិនឱ្យ EFL បញ្ជូនលោក Steve McManaman, Louis Saha និងលោក Dennis Wise ទៅកាន់ទីក្រុងហូជីមិញ ដើម្បីរៀបចំការចាប់ឆ្នោតនៅថ្ងៃសុក្រនេះឡើយ។ គណៈកម្មាធិការរៀបចំការប្រកួតសង្ឃឹមថា ការចាប់ឆ្នោតនាពេលខាងមុខនេះ នឹងមានភាពល្អប្រសើរជាងការចាប់ឆ្នោតលើកទី1 ក្នុងប្រទេសថៃ ដែលត្រូវបានរំខានដោយសារតែបញ្ហាបច្ចេកទេស។ រូបភាពហ្គ្រាហ្វិកនៅលើអេក្រង់ដ៏ធំ បានបង្ហាញថា ក្លិប Charlton ត្រូវលេង 2លើក ហើយក្លិបផ្សេងទៀត ត្រូវបានចាប់គូខុសជាមួយនឹងគូប្រកួតផ្សេងទៀត នៅមុនពេលបញ្ហានេះត្រូវបានកែតម្រូវ។
ក្លិបអង់គ្លេសចំនួន 70ក្រុមនឹងបង្ហាញខ្លួនក្នុងការចាប់ឆ្នោតនេះ មុននឹងត្រូវលេងក្នុងសប្តាហ៍ដែលនឹងចាប់ផ្តើមនៅថ្ងៃទី13 ខែសីហា។ Manchester City គឺជាម្ចាស់ការពារតំណែងជើងឯក ក្រោយពីបានផ្តួលក្រុម Arsenal ក្នុងវគ្គផ្តាច់ព្រ័ត្រ នាកីឡដ្ឋាន Wembley កាលពីខែកុម្ភៈ៕
ប្រភពពី៖ Sky Sports
June 12, 2018
ភ្នាក់ងារអចលនវត្ថុគ្មាន អាជ្ញាប័ណ្ណនឹងមិនទទួលបានកម្រៃជើងសា
បច្ចុប្បន្នមានអ្នករកស៊ីក្នុងវិស័យអចលនទ្រព្យជាច្រើនបានធ្វើជាភ្នាក់ងារអចលនវត្ថុដោយគ្មានអាជ្ញាប័ណ្ណ និងជំនាញវិជ្ជាជីវៈត្រឹមត្រូវធ្វើឱ្យទីផ្សារនេះជះឥទ្ធិពលមិនល្អដល់ក្រុមហ៊ុនស្របច្បាប់មួយចំនួន ព្រមទាំងអតិថិជនជាអ្នកទិញទៀតផង ហេតុនេះដើម្បីដោះស្រាយបញ្ហាចំពោះមុខ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) នឹងបើកវគ្គបណ្តុះបណ្តាលមួយនៅពាក់កណ្ដាលខែមិថុនានេះ។ នេះបើតាមការថ្លែងនៅក្នុងកិច្ចប្រជុំប្រចាំត្រីមាសរបស់លោកបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា។
ទោះបីជាយ៉ាងណា សម្រាប់ពេលបច្ចុប្បន្ននេះគ្រប់គ្នានៅតែអាចធ្វើជាឈ្មួញកណ្តាល ឬជាភ្នាក់ងារទិញ-លក់អចលនទ្រព្យបាន បើទោះជាគ្មានអាជ្ញាប័ណ្ណក៏ដោយ។ ប៉ុន្តែសម្រាប់ពេលអនាគតឆាប់ៗខាងមុខ ប្រសិនបើគ្មានអាជ្ញាប័ណ្ណទេ ភ្នាក់ងារអាចប្រឈមនឹងការមិនទទួលបានកម្រៃជើងសា។
លោកបណ្ឌិត គីម ហ៊ាង បានឱ្យដឹងថា បច្ចុប្បន្ននេះនរណាៗក៏អាចគួកជេរដីបានដែរ។ ពេលលក់បាន យកលុយដាក់ហោប៉ៅ គ្មានបង់ពន្ធអ្វី 1រៀលហើយអត់មានអាជ្ញាប័ណ្ណទៀត។ តែនៅពេលឆាប់ៗខាងមុខនេះ រឿងនេះនឹងត្រូវបញ្ចប់ហើយ។ នេះមិនមែនជាការព្រមានទេ ប៉ុន្តែយើងត្រូវធ្វើទៅតាមច្បាប់ព្រោះប្រទេសគេរីកចម្រើន គឺគេធ្វើទៅតាមច្បាប់ ប្រទេសយើងក៏ត្រូវតែធ្វើទៅតាមច្បាប់ដែរ។
លោកបានបញ្ជាក់ថា៖ “អ្នកណាដែលចង់ធ្វើជាអ្នកគួកជេរដីធ្លី ជាភ្នាក់ងារអចលនវត្ថុ ទី1 ត្រូវតែរៀនពេលរៀនហើយត្រូវប្រឡងយកសញ្ញាបត្រ (certificate)មានវិញ្ញាបនបត្រហើយ ត្រូវប្រឡងយកអាជ្ញាប័ណ្ណ ពេលមានអាជ្ញាប័ណ្ណហើយ ត្រូវជ្រកក្រោមស្លាកក្រុមហ៊ុនដីធ្លីស្របច្បាប់ណាមួយ។ ពេលមានលក្ខខណ្ឌគ្រប់ហើយ ទើបអ្នកនោះអាចលក់ និងមានសិទ្ធិយកកម្រៃជើងសា (កុំមីស្យុង) បាន។ ពេលឱ្យកុំមីស្យុងនេះគេត្រូវមើលលេខកូដសម្គាល់យើងជាភ្នាក់ងារអចលនវត្ថុលេខប៉ុន្មាន? បើជាភ្នាក់ងារអចលនវត្ថុស្របច្បាប់ទើបទទួលបានកម្រៃជើងសាត្រឹមត្រូវ។
ដោយមើលឃើញពីភាពរីកចម្រើននៃវិស័យអចលនទ្រព្យកម្ពុជាដែលបានជំរុញសន្ទស្សន៍នៃការទិញ-លក់ដីធ្លី និងលំនៅឋានពីសំណាក់ប្រជាជនទាំងក្នុងស្រុក និងក្រៅស្រុក ក្រសួងសេដ្ឋកិច្ច និងហិរញ្ញវត្ថុកាលពីពេលថ្មីៗនេះបានចេញប្រកាសមួយដែលតម្រូវឱ្យអ្នករកស៊ីក្នុងវិស័យនេះត្រូវតែមានសញ្ញាបត្រជំនាញវិជ្ជាជីវៈច្បាស់លាស់ ទើបពួកគេអាចទទួលបានអាជ្ញាប័ណ្ណពីក្រសួងសម្រាប់ប្រកបវិជ្ជាជីវៈនេះ។ ហេតុនេះទើបសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាកំពុងសហការជាមួយសាកលវិទ្យាល័យសេដ្ឋកិច្ច និងហិរញ្ញវត្ថុដើម្បីបង្កើត និងរៀបចំវគ្គបណ្តុះបណ្តាលវិជ្ជាជីវៈមួយឡើងសម្រាប់ក្រុមហ៊ុន និងភ្នាក់ងារអចលនវត្ថុដែលចង់ប្រកបអាជីវកម្ម/រកស៊ីក្នុងវិស័យអចលនទ្រព្យដោយភាពស្របច្បាប់នៅកម្ពុជា។
លោក ឃាង ពុទ្ធី អគ្គនាយកក្រុមហ៊ុនអចលនទ្រព្យស្លឹករឹតបានថ្លែងថា៖ “ពេលណាមានធនធានមនុស្សច្រើនក្នុងវិស័យនេះនឹងធ្វើឱ្យការអភិវឌ្ឍក្នុងវិស័យនេះកាន់តែមានភាពល្អប្រសើរ និងធានាបាននូវទំនុកចិត្តពីអ្នកវិនិយោគ។ ការបើកសាលា ឬវគ្គបណ្តុះបណ្តាលវិជ្ជាជីវៈក្នុងវិស័យនេះច្រើន គឺជាការណ៍ដែលគួរតែធ្វើ មិនថាអ្នកណាបើកនោះទេ ព្រោះបើយើងបង្កើតសាលាបានច្រើនយើងនឹងបណ្តុះបណ្តាលធនធានមនុស្សបានច្រើនដែលវានឹងជួយដល់វិស័យនេះបានកាន់តែល្អប្រសើរដែរ។
ចំពោះកម្មវិធីសិក្សាវិញ សម្រាប់ជំហានដំបូង ដើម្បីក្លាយជាភ្នាក់ងារលក់អចលនទ្រព្យនឹងត្រូវសិក្សារយៈពេល 75ម៉ោង រីឯភ្នាក់ងារវាយតម្លៃអចលនទ្រព្យវិញនឹងត្រូវសិក្សារយៈពេល 100ម៉ោង។ ហើយសមាគមជាអ្នករៀបចំកម្មវិធីសិក្សា និងចាត់ចែងបញ្ជូនគ្រូជំនាញ ទាំងគ្រូខ្មែរ និងជនបរទេសសម្រាប់វគ្គសិក្សាទាំងមូល។ ជំហានបន្ទាប់ (អាចក្នុងរយៈពេល2 ឬ3ឆ្នាំខាងមុខ) នឹងត្រូវរៀបចំកម្មវិធីសិក្សាជាថ្នាក់បរិញ្ញាបត្ររង និងបរិញ្ញាបត្រទៅតាមលក្ខខណ្ឌតម្រូវថែមទៀត។
បើតាមលោកប្រធានសមាគមឱ្យដឹង គឺសាលាមានស្រាប់ហើយ នៅតែបញ្ជូនគ្រូ និងបង្កើតកម្មវិធីឱ្យគាត់ប៉ុណ្ណោះ “សមាគមនឹងបើកវគ្គបណ្ដុះបណ្ដាលរយៈពេល 75ម៉ោងមួយ ដើម្បីអូសទាញអ្នកមិនទាន់មានអាជ្ញាប័ណ្ណឱ្យបានរៀនសូត្រត្រឹមត្រូវដើម្បីទទួលបានអាជ្ញាប័ណ្ណស្របច្បាប់ ថ្ងៃក្រោយនរណាដែលចង់បានកុំមីស្យុង ទាល់តែទៅរៀនយកវិញ្ញាបនបត្រសិន ទើបអាចធ្វើការយកកុំមីស្យុងបាន។ តែការរៀន 75ម៉ោងមិនគ្រប់ទេ ត្រូវប្រឡងឱ្យជាប់ទៀតហើយត្រូវយកវិញ្ញាបនបត្រទៅសុំអាជ្ញាប័ណ្ណនៅក្រសួង និងទៅធ្វើការនៅក្រុមហ៊ុនស្របច្បាប់ណាមួយផងដែរ។
គណៈអធិបតីក្នុងកិច្ចប្រជុំសមាជិកទូទៅប្រចាំត្រីមាសទី1 ឆ្នាំ2018
អគ្គនាយិកាក្រុមហ៊ុន AMATAK Property service Co, Ltd លោកស្រី តាំង ហួរ បានថ្លែងឱ្យដឹងតាមទូរស័ព្ទថា កម្មវិធីនេះពិតជាអាចទៅមុខបាន ពីព្រោះកម្មវិធីនេះក៏មានការគាំទ្រពីក្រសួងសេដ្ឋកិច្ចនិងហិរញ្ញវត្ថុផងដែរ។ កម្មវិធីនេះល្អ ព្រោះវានឹងជួយដល់ភ្នាក់ងារអចលនវត្ថុឱ្យមានការយល់ដឹងពីការងារទាក់ទងអចលនទ្រព្យ ដូចជាប្រភេទដី វាមានប្រភេទខុសគ្នា និងគេហដ្ឋាន រួមទាំងអចលនទ្រព្យផ្សេងៗទៀត ព្រោះវាមានតម្លៃទីផ្សារក៏ខុសគ្នាដែរ។
លោកស្រី តាំង ហួរ បានបញ្ជាក់ដឹងដែរថា៖ “អត្ថប្រយោជន៍នៃការបណ្តុះបណ្តាលនេះ គឺដើម្បីឱ្យយើងធ្វើអ្វីមួយមានភាពច្បាស់លាស់ ពេលគាត់មានជំនាញវិជ្ជាជីវៈច្បាស់លាស់ មានអាជ្ញាប័ណ្ណស្របច្បាប់ គាត់ពិតជាមានការយល់ដឹងពីទីផ្សារដែលអាចចៀសវាងនូវការបោកប្រាស់ ការក្លែងបន្លំដែលកន្លងមកធ្លាប់មានកើតឡើងនូវភាពមិនច្បាស់លាស់ពីភ្នាក់ងារមួយចំនួនដែលពុំមានអាជ្ញាប័ណ្ណ អ្នកខ្លះពុំស្គាល់ទាំង shop house ថាយ៉ាងម៉េចផងក្នុងវិស័យអចលនទ្រព្យ។ ជាហេតុនាំឱ្យប៉ះពាល់ដល់វិស័យនេះ។ ដូច្នេះយើងនឹងធ្វើឱ្យអ្វីដែលជាភាពមិនច្បាស់លាស់ និងមិនស្របច្បាប់ទាំងនោះ មានភាពរលូន និងប្រសើរឡើងជាងមុន។
លោកស្រីបានឱ្យដឹងថា ការចូលរៀនតម្រូវឱ្យបង់ប្រាក់ តែមិនច្រើនទេសម្រាប់ចំណេះដឹងដើម្បីបម្រើឱ្យក្រុមហ៊ុនយើង ព្រោះដើម្បីជំរុញដល់ការអភិវឌ្ឍវិស័យអចលនទ្រព្យប្រកបដោយចីរភាពយើងទាមទារឱ្យមានធនធានមនុស្សជាមូលដ្ឋានគ្រឹះ និងការប្រកួតប្រជែងដោយភាពស្របច្បាប់ជាមួយនឹងវិជ្ជាជីវៈត្រឹមត្រូវ។
លោកឧកញ៉ា ចេង ខេង ប្រធានក្រុមប្រឹក្សាភិបាល CVEA បានថ្លែងថា ដោយសារកម្ពុជាមិនទាន់មានច្បាប់កំណត់ពីជំនាញអ្នករកស៊ីដីធ្លីដូចបណ្ដាប្រទេសជាច្រើនលើពិភពលោក ទើបអ្នកគ្មានអាជ្ញាប័ណ្ណអាចចូលមកប្រកួតប្រជែងជាមួយអ្នកមានអាជ្ញាប័ណ្ណបាន។ “អ្នករកស៊ីគ្មានអាជ្ញាប័ណ្ណបានបង្កហានិភ័យច្រើនណាស់ក្នុងវិស័យនេះ ហេតុនេះអ្នកមានបំណងចង់ជួល-ទិញ-លក់គួរស្វែងរកការពិគ្រោះយោបល់ជាមួយក្រុមហ៊ុនអចលនវត្ថុដែលមានអាជ្ញាប័ណ្ណត្រឹមត្រូវ។ ការធ្វើការជាមួយអ្នករកស៊ីដែលមានអាជ្ញាប័ណ្ណ និងមានជំនាញច្បាស់លាស់នឹងធ្វើឱ្យពួកគាត់អាចកាត់បន្ថយហានិភ័យ និងអាចស្វែងរកផលចំណេញក្នុងវិស័យនេះបាន”៕
សមាជិកចូលរួមក្នុងកិច្ចប្រជុំសមាជិកទូទៅប្រចាំត្រីមាសទី1 ឆ្នាំ2018
June 11, 2018
នៅពេលកូនតូចឈានចូលខែទី11
លក្ខណៈរបស់កូនតូច
• ធ្មេញរបស់កូនតូច
ក្មេងខ្លះដែលធ្មេញដុះឡើងខាងមុខ 2គ្រាប់លើ និង2គ្រាប់ក្រោមហើយ រយៈពេលនេះនឹងមានធ្មេញដុះឡើងខាងៗ 2គ្រាប់លើទៀត ក្លាយជាធ្មេញលើ4គ្រាប់ តែក្មេងខ្លះធ្មេញលើ 2គ្រាប់កណ្ដាលនៅមិនទាន់ដុះឡើង ធ្វើឱ្យមានប្រឡោះនៅកណ្ដាល។ តែយ៉ាងណាក៏ដោយ នៅទីបំផុតធ្មេញ 2គ្រាប់កណ្ដាលក៏នឹងដុះឡើង ហើយក្មេងនឹងមានធ្មេញលើ ធ្មេញក្រោមមួយយ៉ាងៗ 4គ្រាប់។
• ពេលវេលាគេងរបស់កូន
ពេលវេលាគេងរបស់ក្មេងម្នាក់ៗខុសពីគ្នា។ វ័យនេះមានក្មេងចំនួនដ៏ច្រើនដែលធ្លាប់គេងពេលថ្ងៃ 2ដង ហើយនឹងបន្ថយបន្តិចម្ដងៗមកនៅសល់ត្រឹមតែមួយដង។ ក្មេងខ្លះគេងម្ដងៗកន្លះម៉ោង តែគេងញឹកញាប់មួយថ្ងៃ 3 – 4ដងក៏មាន។ ពេលភ្ញាក់ព្រឹកឡើងក៏ខុសគ្នាដែរ ក្មេងខ្លះបើកភ្នែកឡើងពេលម៉ោង6ព្រឹក លុះបានមឹមៗហើយក៏លក់បន្តដល់ម៉ោង 8 – 9ព្រឹក។ ក្មេងខ្លះគេងរហូតតាំងពីម៉ោង10យប់ដល់ម៉ោង8ព្រឹក។ ក្មេងអាចភ្ញាក់មកនោម ហើយលក់បន្តពេលបានបៅទឹកដោះហើយ តែក្មេងខ្លះគេងលក់ស្រួលទោះខោ ឬកន្ទបសើម រហូតផ្លាស់ឱ្យក៏មិនភ្ញាក់ដែរ។
• ដល់ពេលញ៉ាំអាហារបន្ថែម
អាហារក្នុងវ័យនេះ ខុសគ្នាទៅតាមស្ថាន-ភាពជុំវិញខ្លួន និងតម្រូវការរបស់ក្មេង មិនមានការកំណត់ច្បាស់ៗថា ក្មេងក្នុងវ័យនេះត្រូវតែញ៉ាំបាយប៉ុន្មានកូនចាន ទឹកដោះគោប៉ុន្មានដបនោះទេ តារាងបញ្ជីអាហារបន្ថែមគ្រាន់តែជាការណែនាំសម្រាប់អ្នកម្ដាយប៉ុណ្ណោះ។ បើកូនមិនញ៉ាំអាហារដូចដែលបានណែនាំ តែកូននៅរឹង-ប៉ឹងមាំមួនល្អ ទម្ងន់ខ្លួនកើនឡើងជាមធ្យមក្នុងមួយថ្ងៃពី 5 – 10ក្រាម អ្នកម្ដាយក៏មិនចាំបាច់កង្វល់ឡើយ។ កូនក្នុងវ័យនេះគឺញ៉ាំអាហារបន្ថែម 2ពេល និងម្ហូបគួរសង្កត់ធ្ងន់លើស៊ុត សាច់ត្រី ឬសាច់សត្វកិនម៉ដ្ឋ ដើម្បីកុំឱ្យខ្វះប្រូតេអុីនពីសត្វ។ កូនវ័យនេះនៅឱ្យបៅទឹកដោះក្នុងមួយថ្ងៃមិនតិចជាង 500 cc(កន្លះលិត្រ) អ្វីដែលសំខាន់បំផុតក្នុងការឱ្យញ៉ាំអាហារគឺ “កុំបង្ខំ” គួរឱ្យកូនញ៉ាំយ៉ាងមានសេចក្ដីសុខ និងបន្ថែមបរិមាណសន្សឹមៗតាមតម្រូវការរបស់កូន មិនមែនថា អាយុកើនឡើង ត្រូវតែបន្ថែមអាហារឱ្យប៉ុននេះប៉ុននោះតាមក្នុងតារាងបញ្ជីឡើយ។
• រឿងដែលត្រូវហាម
ឪពុកម្ដាយគួរបន្ទោសកូនពេលកូនធ្វើអ្វីដែលមិនល្អ ដូចជា កូនគប់នំប៉័ងដែលកាន់នៅក្នុងដៃទៅដី ឪពុកម្ដាយគួរធ្វើឱ្យកូនដឹងថា ធ្វើបែបហ្នឹងមិនល្អទេ។ លើកដំបូងគួរបន្ទោសដោយទឹកមុខនិងពាក្យសម្ដីថា “ធ្វើអុីចឹងអត់បានទេ” បើកូនធ្វើហាក់ដូចជាចង់ធ្វើទៀត ត្រូវស្រែកដាស់តឿនជាមុនថា “អត់បានទេណា៎”។ ដល់ពេលកូនយល់ពីអ្វីដែលម្ដាយហាម ហើយឈប់គប់នំប៉័ងលេង ម្ដាយត្រូវសរសើរថា “ល្អណាស់”។ សម្រាប់កូនតូចៗ អ្វីល្អ ឬមិនល្អមើលតាមរយៈទឹកមុខម្ដាយថា តើញញឹម ឬធ្វើមុខមាំ។ អ្នកម្ដាយខ្លះមិនបន្ទោស ព្រោះគិតថាទោះជាបន្ទោសទៅ ក៏កូនមិនដឹងរឿងអីដែរ។ ទោះជាកូននៅមិនទាន់ដឹងថា អ្វីល្អ អ្វីមិនល្អក៏ដោយ តែក៏កូនមានភាពឆាប់ដឹងពីអារម្មណ៍របស់ម្ដាយដែរ តែការធ្វើមុខមាំបន្ទោស សំឡេងបន្ទោសដើម្បីហាមកូនត្រូវយូរៗធ្វើម្ដងទើបបានផលល្អ និងជ្រើសរើសបន្ទោសតែក្នុងរឿងដែលគ្រោះថ្នាក់ប៉ុណ្ណោះ ហើយមិនគួរប្រើវិធីវាយទះតប់ ឬធ្វើឱ្យកូនឈឺសាច់ពេលធ្វើខុសនោះឡើយ។
• ពេលកូនមានរបួស
បើកូនរអិលដួល ធ្លាក់ពីទីខ្ពស់ បោកក្បាលមានរបួស ចូរយកបង់រុំរបួសមកសង្កត់ពីលើស្នាម-របួស ហើយនាំទៅរកពេទ្យ។ បើមានរបួសរលាត់ដាច់ ឬមានឈាមហូរចេញមកសើមៗ ចូរលាងមុខរបួសនឹងសាប៊ូ ប្រើអាល់កុលជូតជុំវិញ ហើយប្រើថ្នាំក្រហមលាបលើមុខរបួស មិនបាច់បិទដោយបង់បិទរបួសទេ។
• កូនធាត់លើសកម្រិត
មានទ្រឹស្ដីមួយនិយាយថា ចំនួនកោសិកាខ្លាញ់ក្រោមស្បែកនឹងត្រូវសាងឡើងក្នុងរយៈពេលមួយឆ្នាំដំបូង បើក្មេងណាធាត់ជ្រុលពេកមុនអាយុ1ឆ្នាំ ច្រើនតែនឹងក្លាយជាក្មេងងាយធាត់រហូតមួយជីវិត។ គួរថ្លឹងទម្ងន់កូនរៀងរាល់10ថ្ងៃម្ដង ទម្ងន់ខ្លួនកើនឡើងជាង200ក្រាម បានន័យថា ធាត់លឿនពេកហើយ ត្រូវគ្រប់គ្រងអាហារ ដូចជា បន្ថយអាហារពពួកម្សៅ ដូចជា បាយនំប៉័ង តែម្ហូបអាចនៅឱ្យញ៉ាំប៉ុនពីមុនបាន។
• នៅពេលកូនថ្នឹកប្រើដៃឆ្វេង
អ្នកម្ដាយអាចសង្កេតឃើញថា នៅពេលកូនលេងរបស់លេង ហុចដៃមកទទួលនំដែលគេឱ្យពេលកាន់ស្លាបព្រា កូនតែងលើកដៃឆ្វេងឡើងមុនជានិច្ច ដែលនេះគឺជារឿងប្រក្រតីរបស់ក្មេងមិនមែនដោយសារតែប្រើដៃឆ្វេងច្រើន ទើបធ្វើឱ្យថ្នឹកដៃឆ្វេងនោះទេ។ អ្នកម្ដាយមិនគួរព្យាយាមឱ្យកូនឈប់ប្រើដៃឆ្វេង ហើយប្រើដៃស្ដាំម្ដងវិញឡើយ ព្រោះការថ្នឹកប្រើដៃឆ្វេង ឬស្ដាំវាជាលក្ខណៈដោយឡែករបស់ក្មេង មិនមែនជារឿងអាក្រក់នោះទេ។ មិនគួរស្ដីបន្ទោសកូន តែគួរបណ្ដោយឱ្យកូនប្រើដៃខាងដែលថ្នឹកនោះទៅ បើចង់ឱ្យហាត់សរសេរអក្សរដោយដៃស្ដាំ ចាំឱ្យហាត់ពេលកូនចូលសាលារៀនហើយក៏បាន។ ដូច្នេះមិនថាកូននឹងប្រើដៃខាងណាក៏ដោយ អ្នកម្ដាយគួរឱ្យកូនបានប្រើយ៉ាងពេញលេញ ទើបជាការគាំទ្រឱ្យកូនកើតមានភាពចង់ធ្វើអ្វីៗក៏ធ្វើដោយខ្លួនឯងបានល្អតទៅទៀត។
វិវឌ្ឍនាការរបស់កូន
** រាងកាយ
• ប្រើដៃរុញខ្លួនឱ្យក្រោកឡើងមក និងឱនខ្លួនចុះពេលកំពុងឈរបាន។
• អង្គុយចោងហោងបានកាន់តែថ្នឹកខ្លាំងឡើង។
• ចាប់ខ្មៅដៃគូសវាសទៅមកបាន។
• ក្មេងខ្លះអាចទាញស្រោមជើងចេញពីជើងបានដោយខ្លួនឯង។
• ចេះប្រើដៃទាំងពីរធ្វើអ្វីៗមិនដូចគ្នាបានហើយ ដូចជា ដៃម្ខាងកាន់របស់លេងមួយដៃម្ខាងទៀតលេងរបស់លេង ឬគប់របស់លេងមួយទៀតបាន។
** សង្គមជុំវិញខ្លួន
• ស្គាល់អត្ថន័យរបស់ពាក្យថា “ទេ”។
• កាន់តែពូកែបដិសេធអ្វីដែលខ្លួនឯងមិនត្រូវការខ្លាំងឡើង។
• ចេះធ្វើត្រាប់សំឡេងបានកាន់តែពូកែឡើងដូចជា និយាយពាក្យថា “ម៉ាក់ៗ” ឬ “តោះៗ” ជាដើម។
• ចេះស្ដាប់ពាក្យបញ្ជាច្រើនឡើង និងចេះបញ្ឈប់ទង្វើរបស់ខ្លួនឯងបាន។
** លេងជាមួយកូនឱ្យបានញឹកញាប់
• កូនវ័យនេះចេះប្រើដៃបានថ្នឹកហើយ គួរលេងបោះបាល់ ហើយឱ្យកូនរត់តាមទៅយកបាល់មកវិញ ឬរកខ្មៅដៃពណ៌ឱ្យកាន់ និងសាកល្បងចាប់ដៃកូនគូសអូស ផាត់ពណ៌លើក្រដាស។
• កូនច្រើនតែចូលចិត្តលេងជាមួយរបស់របរប្រើប្រាស់ក្នុងផ្ទះខ្លាំងជាងរបស់លេងដែលទិញមកឱ្យ ក្មេងខ្លះចូលចិត្តមើលរូបភាព ជាពិសេសសៀវភៅដែលមានរូបភាពធំៗស្រួលមើល។
• បើកូនចាប់ផ្ដើមហាត់ដើរ ចូររកពេលនាំកូនទៅដើរនៅក្នុងបរិវេណសួនច្បារសាធារណៈផង៕
June 11, 2018
លោក ប៊ុត សីហា ត្រូវបានផលិតកម្មធំសម្លឹងឃើញហើយ…
អតីតតារាចម្រៀងនៅក្នុងផលិតកម្មរស្មីហង្សមាស និងម្ចាស់ជយលាភីកម្មវិធីប្រឡងចម្រៀង The Voice Cambodia រដូវកាលទី1 លោក ប៊ុត សីហា ត្រូវបានប្រភពច្បាស់ការណ៍មួយបានទម្លាយឱ្យដឹងថា ខណៈនេះតារាចម្រៀងប្រុសសំឡេងខ្ពស់រូបនេះ ត្រូវបានផលិតកម្មក្នុងស្រុកធំមួយកំពុងតែចាប់អារម្មណ៍ និងផ្ដល់ឱកាសដល់រូបលោកឱ្យចូលច្រៀងហើយ។
ដោយសារតែមានរឿងអាស្រូវពាក់ព័ន្ធជាមួយគ្រឿងញៀនកាលពីប៉ុន្មានខែមុននោះ ធ្វើឱ្យលោក ប៊ុត សីហា ត្រូវបាត់បង់ការងារនៅក្នុងសិល្បៈអស់មួយចំនួនធំ និងថែមទាំងរបូតឱកាសទៅកើបប្រាក់នៅលើទឹកដីប្រទេសមហាអំណាច គឺសហរដ្ឋអាមេរិកទៀតផង។ មិនតែប៉ុណ្ណោះ លោក សីហា នៅត្រូវបានខាងផលិតកម្មហង្សមាសប្រកាសប្រាប់មហាជនជាអ្នកគាំទ្រផលិតកម្មថា បើទោះបីជា សីហា កែខ្លួនល្អឡើងវិញយ៉ាងណាក៏ដោយ ក៏ខាងផលិតកម្មមិនអាចទទួលយករូបលោកឱ្យចូលច្រៀងវិញបានដែរ។ រឿងអាស្រូវទាំងអស់នេះបានធ្វើឱ្យតារាចម្រៀងរូបនេះភ្ញាក់រឭកខ្លួន និងកែប្រែកំហុសឆ្គង ហើយងាកមកចូលរួមជាមួយការងារសង្គមវិញម្ដង ដោយមួយរយៈចុងក្រោយនេះគេសង្កេតឃើញ លោក ប៊ុត សីហា បានធ្វើការចែករំលែកសេចក្តីស្រឡាញ់ទៅដល់កុមារៗនៅតាមសហគមន៍ ឬមណ្ឌលកុមារកំព្រានានាជាច្រើន។
ប្រភពដដែលបានបង្ហើបប្រាប់ទៀតថា ទោះបីជាពេលនេះត្រូវបានផលិតកម្មហង្សមាសបោះបង់ចោល និងត្រូវបាត់បង់ឱកាសការងារច្រៀងនៅតាមកម្មវិធីប្រគំតន្ត្រីនានាក៏ពិតមែន ប៉ុន្តែតារាប្រុសរូបនេះក៏ត្រូវបានផលិតកម្មថោនសម្លឹងឃើញ និងត្រៀមចុះកិច្ចសន្យាជាមួយផងដែរ គ្រាន់តែមិនទាន់ដល់ពេលប៉ុណ្ណោះ។ ប្រភពដដែលបានបន្ថែមថា មូលហេតុដែលភាគីថោនមិនទាន់បញ្ចេញព័ត៌មាន ឬទទួលយកតារាចម្រៀងប្រុសរូបនេះជាផ្លូវការនោះ គឺទុកពេលឱ្យលោក ប៊ុត សីហា ចេញមុខលើការងារសង្គមឱ្យបានច្រើនតាមរយៈសកម្មភាពមនុស្សធម៌មួយចំនួន ក្នុងន័យលុបលាងកំហុសរបស់ខ្លួនឱ្យអស់សិន ទើបប្រកាសទទួលយកពេញសិទ្ធិតែម្តង។
ដើម្បីបញ្ជាក់ឱ្យបានច្បាស់លើបញ្ហាពាក់ព័ន្ធនឹងការសម្រេចចុះកិច្ចសន្យារវាងលោក សីហា ជាមួយផលិតកម្មថោននេះ សារព័ត៌មាន ឡារ៉ែននឹងព្យាយាមទាក់ទងទៅអ្នកគ្រប់គ្រងផលិតកម្មថោន ដើម្បីសុំការអះអាងបន្ថែមទៀតឱ្យកាន់តែជាក់ច្បាស់ ដើម្បីជម្រាបជូនប្រិយមិត្តទស្សនិកជនបន្ថែមទៀតនៅពេលក្រោយ៕
June 11, 2018
ភាពខុសប្លែករវាងទឹកដោះម្ដាយ និងម្សៅទឹកដោះគោ
ថ្ងៃនេះ អ្នកគ្រូ ឆវី សូមនាំមកជូននូវរឿងរ៉ាវរបស់ “ទឹកដោះម្ដាយ” ដែលមិនមែនជារឿងឆ្ងាយពីខ្លួនអ្នកឡើយ ព្រោះអ្នកគ្រប់គ្នាប្រហែលជាសុទ្ធតែធ្លាប់បៅទឹកដោះម្ដាយរួចមកហើយសឹងតែទាំងអស់គ្នា ហើយទោះជាពេលនេះអ្នកនៅមិនទាន់មានបុត្រក៏ដោយ តែនាពេលអនាគត វាក៏មិនប្រាកដដែរជួនកាលអ្នកអាចនឹងបានឃើញមុខកូនតូចរបស់អ្នកក៏ថាបានដែរ ដូច្នេះវាមិនមែនជារឿងអីខុសទាស់ឡើយ បើសិនជាអ្នកបានដឹងពីរឿងទាំងអស់នេះទុកជាមុននោះ មែនទេស្រីៗយើង?
ហេតុផលដែលអ្នកម្ដាយមួយចំនួននិយមឱ្យកូនបៅទឹកដោះគោ (ម្សៅទឹកដោះគោ) ព្រោះតែគិតថា ក្រៅពីវាងាយស្រួលហើយ ម្សៅទឹកដោះគោ ក៏ជាទឹកដោះដូចគ្នាដែរ ហេងស៊យថ្លៃជាងទៀតផង ដូច្នេះបញ្ជាក់ថា វាត្រូវតែមានគុណប្រយោជន៍លំដាប់លេខ1មិនខាន។ ដោយសារដូច្នេះហើយ ទើបថ្ងៃនេះ អ្នកគ្រូ ឆវី នឹងនាំយកព័ត៌មានលម្អិតមកប្រៀបធៀបឱ្យទាំងអស់គ្នាបានឃើញច្បាស់ៗតែម្ដងអំពីភាពខុសប្លែកគ្នារវាងទឹកដោះម្ដាយ និងម្សៅទឹកដោះគោ។
ភាពខុសប្លែកគ្នារវាងទឹកដោះម្ដាយ និងម្សៅទឹកដោះគោ
ចំណាំ
មកដល់ត្រង់នេះ អ្នកម្ដាយជាច្រើននាក់ប្រហែលជាដឹងខ្លះៗហើយថា តើទឹកដោះម្ដាយល្អប៉ុនណា មែនទេអ្នកម្ដាយដែលកំពុងបំបៅដោះកូនទាំងឡាយ?
June 11, 2018
ទូច ស្រីល័ក្ខ សំណូមពរឱ្យបងប្អូនខ្មែរចេះបែងចែកសំរាម និងអាណិតដល់ទឹកចិត្តបងៗអ្នកប្រមូលសំរាមផង
ប៉ុន្មានម៉ោងមុននេះបន្ដិច តារាសម្ដែង និងច្រៀង ទូច ស្រីល័ក្ខ បានបង្ហោះរូបភាព និងវីដេអូនៅក្នុងគណនីរបស់ខ្លួន ដែលស្ដែងឱ្យឃើញពីទម្លាប់ល្អនៃការបែកចែកសំរាម និងអនាម័យផ្ទាល់ខ្លួនចំពោះការចាត់ចែងសំរាមយ៉ាងត្រឹមត្រូវ។ នៅក្នុងវីដេអូនោះផងដែរ តារាស្រីរូបនេះក៏បានលើកឡើងផងដែរពីទុក្ខលំបាកមួយចំនួនដែលបងៗជាអ្នកប្រមូលសំរាមជួបប្រទះ មានការលំបាក និងនឿយហត់ជាខ្លាំងនៅក្នុងការប្រមូលសំរាម ដែលមិនមានការបែងចែកតាមប្រភេទ និងជាសំរាមដែលមិនបានចងដាក់ក្នុងថង់ត្រឹមត្រូវ ធ្វើឱ្យមានរាយប៉ាយខ្ចាត់ខ្ចាយពេញដងផ្លូវជាដើម។
អ្នកនាង ទូច ស្រីល័ក្ខ បានធ្វើវីដេអូរក្សាអនាម័យសំរាម និងបរិស្ថាននេះឡើងក្នុងគោលបំណងល្អមួយសម្រាប់ឱ្យបងប្អូនអ្នកគាំទ្រទាំងអស់បានចូលរួមយ៉ាងសកម្មក្នុងការថែរក្សាអនាម័យសំរាម។ អ្នកនាងនិយាយថា «ពេលខ្លះយើងថា យើងពិបាក ចុះយើងទាំងអស់គ្នាមានគិតថា បងៗខាងផ្នែកអនាម័យគាត់ហត់ជាងយើងប៉ុន្មានដង? ពេលខ្លះរើសសំរាមនិងហូបបាយក៏នៅហ្នឹង( កន្លែងប្រមូលសំរាមតែមួយ)។ សង្ឃឹមថាបងប្អូនមើលហើយ និងអនុវត្តជួយថែរក្សាទាំងអស់គ្នា ដើម្បីងាយស្រួលដល់បងៗខាងផ្នែកអនាម័យ។ បើគាំទ្រសូម like&shearដើម្បីឱ្យបងប្អូនយើងបានទទួលដំណឹងនេះ»។
ជាការពិតណាស់ ដើម្បីថែរក្សាសោភណភាពទីក្រុងស្អាត ដែលគ្មានសំរាមប៉ើងហោះហុយ រាយប៉ាយតាមផ្លូវ និងគ្មានគំនរសំរាមច្រើនកន្លែងនោះ គឺត្រូវចាប់ផ្ដើមការថែរក្សាអនាម័យសំរាមចេញពីខ្លួនយើងផ្ទាល់ ដោយការបែកចែងសំរាមចេញជាបីផ្នែកផ្សេងដូចជា សំរាមដប សំរាមដុតឆេះ និងសំរាមកាកសំណល់ ដាក់នៅក្នុងថង់ដាច់ដោយឡែកពីគ្នា។
ចង់ដឹងថា តារាស្រីរូបនេះ មានការបែងចែកសំរាមបែបណាខ្លះនោះ សូមទស្សនាវីដេអូខាងក្រោមនេះ៖
June 11, 2018