សង្គម និងសេដ្ឋកិច្ច - La Reine Media

ឡានហោះល្បឿនជាង 700 គីឡូម៉ែត្រក្នុងមួយម៉ោង ប្រើប្រាស់ម៉ាស៊ីន Rolls-Royce

អ្នករចនាជនជាតិអ៊ីតាលី Pierpaolo Lazzarini បង្ហាញម៉ូដែលឡានហោះ Aircar ដែលអាចក្លាយជាបដិវត្តន៍ក្នុងវិស័យគមនាគមន៍នាពេលអនាគត ដោយវាមានល្បឿនលឿន និងហោះបានឆ្ងាយ។

Aircar ដែលឡានហោះប្រតិកម្មរហ័សនេះមានបណ្ដោយ 6 ម៉ែត្រ អាចដឹកមនុស្សបានបួននាក់។ Aircar ប្រើប្រាស់ម៉ាស៊ីន Rolls-Royce ចំនួនបួនគ្រឿង និងមានទម្ងន់ស្រាលខ្លាំង ដោយសារត្រូវបានផលិតឡើងពីសរសៃកាបូន។ ម៉ាស៊ីននីមួយៗរបស់វាអាចបញ្ជាទិសដៅផ្ដេក និងល្បឿន ព្រមទាំងធានាលំនឹង និងមានកម្រិតបត់បែនខ្ពស់ក្នុងពេលប្ដូរទិស។

https://www.youtube.com/watch?v=hf3ZjUiiFUw

រូបរាងឡានហោះ Aircar ល្បឿនជាង 700 គីឡូម៉ែត្រ/ម៉ោងរបស់ Lazzarini

ឡានហោះនេះអាចហោះហើរក្នុងល្បឿន 750 គីឡូម៉ែត្រ/ម៉ោង និងហោះបានចម្ងាយ 3,200 គីឡូម៉ែត្រ បន្ទាប់ពីចាក់សាំងមួយពេញ។

បច្ចុប្បន្ន Aircar កំពុងស្ថិតក្នុងដំណាក់កាលរចនារូបរាង។ Lazzarini កំពុងរកវិធីធ្វើឱ្យ Aircar ក្លាយជាការពិតនៅក្នុងឆ្នាំ 2024 ដោយការបង្ហាញគំរូពិតដំបូង មុនពេលត្រូវបានដាក់លក់ក្នុងទីផ្សារ។ បើសិនគ្រប់យ៉ាងដំណើរការបានរលូន Aircar អាចត្រូវបានប្រើប្រាស់ជាទូទៅចាប់ពីអំឡុងមួយទសវត្សរ៍ទៀត៕

March 20, 2023

វគ្គផ្ដាច់ព្រ័ត្រ U-20 អាស៊ី 2023៖ គូប្រកួតរបស់អ៊ូសបេគីស្ថាន ប្រកាសថានឹងក្លាយជាជើងឯកបាល់ទាត់ទ្វីបអាស៊ី

ក្រុមបាល់ទាត់ជម្រើសជាតិ U-20 អ៊ីរ៉ាក់ កំពុងមានភាពជឿជាក់ខ្លាំងទៅលើលទ្ធផលល្អនៅវគ្គផ្ដាច់ព្រ័ត្រ U-20 អាស៊ី 2023 បើទោះជាត្រូវប៉ះនឹងក្រុមម្ចាស់ផ្ទះ។

សមត្ថភាពរបស់ U-20 អ៊ីរ៉ាក់ត្រូវបានគេសង្ស័យ បន្ទាប់ពីក្រុមជម្រើសជាតិនេះបានបរាជ័យនៅចំពោះមុខអ៊ូសបេគីស្ថានក្នុងការប្រកួតនៅវគ្គមុន។ ជាងនេះ U-20 អ៊ីរ៉ាក់ដែលបានបន្តដំណើរទៅមុខក៏ព្រោះតែបានឈ្នះឥណ្ឌូណេស៊ីដោយសារមានសន្ទស្សន៍រងខ្ពស់ជាង។ ប៉ុន្តែ ក្រោយមក U-20 អ៊ីរ៉ាក់ក៏បានបង្ហាញកម្លាំងរបស់ខ្លួននៅពេលយកឈ្នះលើអ៊ីរ៉ង់ និងជប៉ុន ហើយបានឡើងដល់វគ្គផ្ដាច់ព្រ័ត្រ។

គ្រូបង្វឹករបស់ក្រុមអ៊ីរ៉ាក់ Emad Mohammed សង្កត់ធ្ងន់ថា ក្រុមរបស់លោកនឹងបន្តអនុវត្ត «វិធីសាស្ត្រទាត់សម្រាប់ការប្រកួតនីមួយៗ» ដែលបានជួយឱ្យពួកគេបានចូលទៅក្បែរតំណែងជើងឯក U-20 អាស៊ី 2023 ជាលើកដំបូងក្រោយពីអតីតខ្សែប្រយុទ្ធ (Emad Mohammed) រូបនេះមកដឹកនាំក្រុមជម្រើសជាតិដែលដណ្ដើមបានជ័យជម្នះនៅពានរង្វាន់ជើងឯក U-19 អាស៊ី ពេល Emad Mohammed នៅជាកីឡាករ។

«យើងបានរៀបផែនការធ្វើយ៉ាងណាដើម្បីអាចឆ្លងកាត់វគ្គសន្សំពិន្ទុ ហើយក្រោយមក យើងក៏បានរៀបគម្រោងធ្វើយ៉ាងណាដើម្បីអាចឆ្លងផុតវគ្គ ¼។ យើងបានជួបជនជាតិជប៉ុននៅវគ្គពាក់កណ្ដាលផ្ដាច់ព្រ័ត្រ ពួកគេគឺជាក្រុមពិសេស» គ្រូបង្វឹករបស់ក្រុមអ៊ីរ៉ាក់ Emad Mohammed ថ្លែងដូច្នេះ។

ក្រុមបាល់ទាត់ជម្រើសជាតិ U-20 អ៊ូសបេគីស្ថាន ឈ្នះ U-20 អ៊ីរ៉ាក់ 1-0 ក្នុងវគ្គ 1/4 នៅ U-20 អាស៊ី 2023

លោក Emad Mohammed បន្តថា «U-20 អ៊ីរ៉ាក់បានយកឈ្នះដើម្បីបានឡើងដល់វគ្គផ្ដាច់ព្រ័ត្រជាមួយក្រុមម្ចាស់ផ្ទះ។ នេះគឺជាការប្រកួតលើកទីពីររបស់យើងជាមួយនឹងអ៊ូសបេគីស្ថាន ហើយតាំងពីការប្រកួតដំបូង ក្រុមរបស់យើងទាំងមូលបានយល់ច្បាស់អំពីក្រុមបាល់ទាត់មួយនេះ។ U-20 អ៊ីរ៉ាក់មានប្រៀបច្រើនពីការប្រកួតនោះ»។

«គណៈកម្មការគ្រូបង្វឹកនឹងប្រមូលយកទិន្នន័យទាំងអស់ពីការប្រកួតដំបូងរហូតដល់វគ្គផ្ដាច់ព្រ័ត្រ ហើយយើងនឹងកែលំអរាល់កំហុសឆ្គងដែលយើងបានជួបក្នុងការប្រកួតទាំងនោះ» គ្រូបង្វឹករបស់អ៊ីរ៉ាក់អះអាងដូច្នេះ។

វគ្គផ្ដាច់ព្រ័ត្ររបស់ពានរង្វាន់ជើងឯកបាល់ទាត់បុរសអាយុក្រោម 20 ឆ្នាំនៅទ្វីបអាស៊ីឆ្នាំ 2023 រវាងក្រុមជម្រើសជាតិអ៊ូសបេគីស្ថាន និងអ៊ីរ៉ាក់ នឹងត្រូវធ្វើឡើងនៅឯកីឡដ្ឋាន Bunyodkor ក្នុងរដ្ឋធានីតាស្កិន ប្រទេសអ៊ូសបេគីស្ថាន វេលាម៉ោង 21:00 នាទី ថ្ងៃទី 18 មីនា 2023៕

March 18, 2023

ក្រុមជម្រើសជាតិព័រទុយហ្កាល់នៅតែហៅ Ronaldo ឱ្យចូលរួមប្រកួតនៅ Euro 2024! ហេតុអ្វី?

គ្រូបង្វឹក Roberto Martinez លើកតម្កើងបទពិសោធន៍ និងភាពអត់ធ្មត់របស់ Cristiano Ronaldo នៅពេលហៅខ្សែប្រយុទ្ធវ័យ 38 ឆ្នាំនេះ មកកាន់ក្រុមជម្រើសជាតិព័រទុយហ្កាល់ដើម្បីចូលរួមប្រកួតនៅវគ្គជម្រុះ Euro 2024។

«Ronaldo ពិតជាប្រឹងប្រែងដើម្បីក្រុមជម្រើសជាតិ។ គាត់នាំមកនូវបទពិសោធន៍ និងជាកត្តាសំខាន់នៅក្នុងក្រុម» Martinez និយាយដូច្នេះកាលពីថ្ងៃទី 17 មីនា នៅក្នុងសន្និសីទសារព័ត៌មានស្ដីពីការប្រកាសបញ្ជីឈ្មោះកីឡាករ 26 នាក់របស់ក្រុមបាល់ទាត់ជម្រើសជាតិប័រទុយហ្កាល់។ «ខ្ញុំមិនសម្លឹងមើលទៅលើអាយុ ឬផ្នែកដទៃ។ ខ្ញុំគិតថា Ronaldo អាចជួយដល់ក្រុមជម្រើសជាតិតាមរយៈការផ្ទេរបទពិសោធន៍ឱ្យមិត្តរួមក្រុម។ នេះគឺជាជំហានដ៏សំខាន់ យើងចង់បង្កើតឱ្យមានក្រុមប្រកួត និងដណ្ដើមជ័យជម្នះ»។

នៅ World Cup 2022 Ronaldo ទាត់ក្នុងនាមជាកីឡាករជម្រើសដំបូងក្នុងវគ្គសន្សំពិន្ទុ ប៉ុន្តែត្រូវគ្រូបង្វឹកដាក់ឱ្យនៅជាកីឡាករបម្រុងវិញនៅក្នុងពីរប្រកួតនៃវគ្គជម្រុះផ្ទាល់ (knock-out) ជាទីដែលព័រទុយហ្កាល់ចាញ់ម៉ារ៉ុកក្នុងវគ្គ ¼។ ក្រោយការប្រកួតនេះ CR7 យំ និងមិនបាននិយាយដល់លទ្ធភាពបន្តរួមដំណើរជាមួយក្រុមជម្រើសជាតិព័រទុយហ្កាល់។

Martinez បានចូលរួមទស្សនាការប្រកួតមិត្តភាពរវាងក្រុម Saudi All Star XI (ក្លឹបរបស់ Ronaldo) និង PSG កាលពីព្រលប់ថ្ងៃទី 19 មករា។ ក្រោយការប្រកួតនេះ លោក Martinez និង Ronaldo ត្រូវបានគេជឿថា បានពិភាក្សាគ្នាអំពីអនាគតរបស់ CR7 នៅក្នុងក្រុមជម្រើសជាតិព័រទុយហ្កាល់។ ចាប់តាំងពីបានទៅទាត់ឱ្យក្លឹប Al Nassr របស់អារ៉ាប៊ីសាអូឌីត បន្ទាប់ពី World Cup 2022 កំពូលកីឡាករ Ronaldo ស៊ុតបញ្ចូលទីបាន 8 គ្រាប់នៅក្នុង 9 ប្រកួត។

បញ្ជីឈ្មោះនៃក្រុមបាល់ទាត់ជម្រើសជាតិព័រទុយហ្កាល់មានកីឡាករជាច្រើនរូបដែលធ្លាប់បានចូលរួមប្រកួតនៅ World Cup 2022 រួមមាន Joao Cancelo, Ruben Dias, Bernardo Silva, Bruno Fernandes, Joao Felix និង Rafael Leao ជាដើម។ កីឡាករ Goncalo Ramos ដែលរកបាន hat-trick (បីគ្រាប់ក្នុងមួយប្រកួត) ក្នុងការប្រកួតឈ្នះស្វ៊ីស 6-1 នៅវគ្គ 1/8 របស់ World Cup 2022 ក៏មានវត្តមានក្នុងបញ្ជីនេះ។

និយាយអំពីលោក Martinez វិញ មុនពេលមកដឹកនាំក្រុមព័រទុយហ្កាល់ លោកធ្លាប់ជាគ្រូបង្វឹករបស់ក្រុមជម្រើសជាតិបែសហ្ស៊ិកចាប់ពីឆ្នាំ 2016 ដល់ 2022។ សមិត្ថផលល្អបំផុតរបស់លោកសម្រាប់បែលហ្ស៊ិកគឺមេដាយសំរឹទ្ធ World Cup 2018 និងចំណាត់ថ្នាក់លេខមួយក្នុងបញ្ជីរបស់ FIFA ចាប់ពីខែតុលា 2018 ដល់ខែកុម្ភៈ 2022។ គ្រូបង្វឹកវ័យ 49 រូបនេះបានលាលែងពីតំណែងនៅពេលបែលហ្ស៊ិកត្រូវបានជម្រុះចេញពីវគ្គសន្សំពិន្ទុរបស់ World Cup 2022៕

March 18, 2023

ស្ដេចកម្ទេចសំណាញ់ទី AFF Cup 2022 ត្រូវបានដកពីក្រុមជម្រើសជាតិថៃ

គ្រូបង្វឹក Mano Polking ថ្មីៗនេះបានជ្រើសរើសកីឡាករសម្រាប់ក្រុមជម្រើសជាតិថៃដើម្បីត្រៀមសម្រាប់ការប្រកួតក្នុងរដូវ FIFA Days នៅខែមីនានេះ។ អ្វីដែលគួរឱ្យចាប់អារម្មណ៍គឺថា គ្រូបង្វឹកជនជាតិអាល្លឺម៉ង់ដើមកំណើតប្រេស៊ីលរូបនេះបានដកហូតកីឡាករជាច្រើននាក់ដែលធ្លាប់ជាជើងឯក AFF Cup 2022។

ក្រុមបាល់ទាត់ជម្រើសជាតិថៃ បានសម្រេចជ្រើសរើសកីឡាករចំនួន 25 នាក់ដើម្បីត្រៀមខ្លួនទៅចូលរួមការប្រកួតមិត្តភាពអន្តរជាតិដែលនឹងធ្វើឡើងនៅក្នុងខែមីនានេះ ក្នុងនោះ គ្រួបង្វឹក Mano Polking បានជ្រើសយកកីឡាករដែលធ្លាប់ចូលរួម AFF Cup 2022 ត្រឹមតែ 9 នាក់ប៉ុណ្ណោះ។

ចំណែកកីឡាករបង្គោលចំនួនពីររូបរបស់ក្រុមជម្រើសជាតិថៃ គឺខ្សែប្រយុទ្ធ Teerasil Dangda និងខ្សែបម្រើ Sarach Yuyen សុទ្ធតែមិនត្រូវបានជ្រើសរើស។ Teerasil Dangda គឺជាស្ដេចកម្ទេចសំណាញ់ទីរបស់ AFF Cup 2022។

ក្រៅពីនេះ បញ្ជីខាងលើក៏មានឈ្មោះ Chanathip Songkransin បើទោះ «Messi ថៃ» រូបនេះហាក់មិនមានសកម្មភាពលេចធ្លោនៅជប៉ុន។ Chanathip Songkransin បច្ចុប្បន្នទាត់ឱ្យក្លឹប Kawasaki Frontale របស់ជប៉ុន និងជាកីឡាកររបស់ក្រុមជម្រើសជាតិរបស់ថៃ។

Theerathon Bunmathan (លេខ 3) នៅតែជាប្រធានក្រុមរបស់ដំរីប្រយុទ្ធរបស់ថៃ

គ្រូបង្វឹក Poking ឱ្យដឹងថា «…ខ្ញុំតែងតែចង់ជ្រើសរើសកីឡាករល្អបំផុត មិនត្រឹមតែដោយសារកេរ្តិ៍ឈ្មោះ ឬសមត្ថភាពនោះទេ តែគឺយោងទៅលើស្ថានភាពកម្លាំងកាយរបស់ពួកគេ»។

យោងតាមកាលបរិច្ឆេទ ក្រុមជម្រើសជាតិថៃនឹងប៉ះក្រុមរបស់ស៊ីរី ដែលជាក្រុមជាប់ចំណាត់ថ្នាក់លេខ 90 លើពិភពលោក នៅថ្ងៃសៅរ៍ ទី 25 មីនាលើទីលានរបស់កីឡដ្ឋាន Shabab Al Ahli (ឌូបៃ, អេមីរ៉ាតអារ៉ាប់រួម-UAE)។ ក្រោយមកក្រុមថៃនឹងត្រូវប្រកួតជាមួយក្រុមម្ចាស់ផ្ទះរបស់ UAE ក្នុងកីឡដ្ឋាន Al Nahyan (អាប៊ុយដាប៊ី) នៅថ្ងៃទី 28 មីនា 2023៕

March 17, 2023

ប៉ូលិសអង់គ្លេសជិះសេះដេញតាមពិន័យអ្នកបំពានច្បាប់ចរាចរណ៍

មន្ត្រីប៉ូលិសជិះសេះដេញតាមរថយន្ត និងប្រាប់ឱ្យឈប់ បន្ទាប់ពីបានឃើញម្ចាស់រថយន្តបើកបរបណ្ដើរនិយាយទូរស័ព្ទបណ្ដើរ រួចក៏បានពិន័យ និងដកពិន្ទុប័ណ្ណបើកបរ។

កាលពីថ្ងៃទី 16 មីនា ទំព័រ Guardian ដកស្រង់វីដេអូពីទំព័របណ្ដាញសង្គមរបស់ក្រុមប៉ូលិសចរាចរណ៍ Avon និង Somerset (RPU) បង្ហាញថា មន្ត្រីប៉ូលិសពីររូបជិះសេះដេញតាមរថយន្តមួយគ្រឿង ក្រោយពីមើលឃើញថា ម្ចាស់ឡាននិយាយទូរស័ព្ទពេលកំពុងបើកបរ។ RPU ឱ្យដឹងថា វីដេអូនេះត្រូវបានថតដោយកាម៉េរិកដែលបំពាក់លើខ្លួនប៉ូលិស និងកាម៉េរិកសុវត្ថិភាពចរាចរណ៍កាលពីថ្ងៃទី 07 មីនា។

«លោកដឹងហើយថា មិនត្រូវប្រើប្រាស់ទូរស័ព្ទក្នុងពេលបើកបរ» ស្ត្រីជាមន្ត្រីប៉ូលិសល្បាតនិយាយនៅពេលឡានឈប់លើដងផ្លូវមួយនៅក្នុងទីរួមស្រុក Tauton, Somerset។

អ្នកបើកបរត្រូវបានប៉ូលិសធ្វើកំណត់ហេតុ និងពិន័យជាប្រាក់ 200 ផោន (242 ដុល្លារអាម៉េរិក) ទន្ទឹមនឹងការដក 6 ពិន្ទុនៅលើប័ណ្ណបើកបរ។ RPU ឱ្យដឹងថា ចាប់ពីដើមឆ្នាំ 2021 មកដល់បច្ចុប្បន្ន តំបន់ Avon និង Somerset មានគ្រោះថ្នាក់ចរាចរណ៍ជាង 4,500 ករណី។

ចាប់ពីខែមីនា 2022 ការប្រើប្រាស់ទូរស័ព្ទចល័ត កុំព្យូទ័រ ឬឧបករណ៍ទាំងឡាយណាដែលអាចផ្ញើ និងទទួលទិន្នន័យ ពេលកំពុងបើកបររថយន្ត ឬម៉ូតូនៅប្រទេសអង់គ្លេស សុទ្ធតែត្រូវបានចាត់ទុកថាខុសច្បាប់។

អ្នកដែលល្មើសនឹងច្បាប់ខាងលើអាចត្រូវបានពិន័យជាប្រាក់ឡើងដល់ 1,000 ផោន ទន្ទឹមនឹងការដក 6 ពិន្ទុ ឬត្រូវដកហូតប័ណ្ណបើកបរ៕

March 17, 2023

រំលងចោល Mbappe ក្លឹប Real Madrid នឹងទិញខ្សែប្រយុទ្ធដទៃដ៏គួរឱ្យភ្ញាក់ផ្អើល?

ការទិញយកតារាបាល់ទាត់ Kylian Mbappe គឺមិនមែនជារឿងងាយស្រួលឡើយសម្រាប់ Real Madrid ហើយពួកគេក៏គិតដល់គោលដៅផ្សេងដែលមានប្រសិទ្ធភាពជាងនេះ។

ក្នុងបណ្ដារដូវកាលទិញដូរកីឡាករបាល់ទាត់កន្លងទៅ Kylian Mbappe តែងតែជាគោលដៅសំខាន់ និងលេចធ្លោរបស់ Real Madrid ហើយមានពេលខ្លះ ក្លឹបនេះវិះនឹងទទួលបានហត្ថលេខារបស់កំពូលខ្សែប្រយុទ្ធបារាំង ។ ប៉ុន្តែ ចុងក្រោយ Mbappe ក៏ជ្រើសរើស PSG កាលពីឆ្នាំ 2022។

ទោះជាបានបរាជ័យ Real Madrid ក៏មិនដែលបោះបង់គោលដៅមួយនេះឡើយ ពិសេសគឺនៅពេលមានដំណឹងថា Mbappe មិនសប្បាយចិត្ត និងចង់ចាកចេញពី PSG។ ក៏ប៉ុន្តែ តម្លៃខ្លួនខ្ពស់របស់ Mbappe បូករួមនឹងការប្រឹងប្រែងចងជើងកីឡាកររបស់ក្លឹប PSG ធ្វើឱ្យ Real ត្រូវងាកទៅរកគោលដៅផ្សេង ក្នុងគ្រាដែលក្លឹបនេះត្រូវការខ្សែប្រយុទ្ធមកជំនួស Karim Benzema ដែលមានអាយុកាន់តែច្រើន។

យោងតាមប្រភពព័ត៌មានរបស់ទំព័រ Fichajes ក្លឹប Real Madrid កំពុងយកចិត្តទុកដាក់លើ Romelu Lukaku។ គ្រូបង្វឹក Carlo Ancelotti ត្រូវបានគេជឿថា កំពុងពិនិត្យលទ្ធភាពទិញកំពូលថ្វីជើងជនជាតិបែលហ្ស៊ិករូបនេះ ដើម្បីបន្ថែមកម្លាំងឱ្យ Benzema។

បច្ចុប្បន្ន កីឡាករ Lukaku កំពុងទាត់ឱ្យ Inter Milan ក្នុងទម្រុងឱ្យខ្ចីពី Chelsea។ មុននោះ ខ្សែប្រយុទ្ធវ័យ 29 ឆ្នាំរូបនេះ បានចាកចេញពី Inter Milan ទៅកាន់ Chelsea ក្នុងតម្លៃខ្លួន 115 លានអឺរ៉ូ។ ក៏ប៉ុន្តែ ឆ្លងកាត់ការប្រកូនមួយរដូវកាល Chelsea ក៏បន្តលក់ Lukaku ឱ្យ Inter Milan ក្នុងទម្រង់ឱ្យខ្ចី។

ថ្មីៗនេះទៀត ប្រធានក្លឹប Inter Milan ក៏បានប្រកាសថា នឹងសងកីឡាករ Lukaku ទៅឱ្យក្លឹប Chelsea វិញ ក្រោយរដូវកាល 2022/2023 បានបញ្ចប់។

ដោយសារតែបញ្ហាខាងលើនេះហើយ ទើបលទ្ធភាពនៃការទិញយក Lukaku ពី Inter Milan ឬពី Chelsea របស់ Real Madrid អាចកើតឡើង៕

March 17, 2023

ប្រទេសចិនបង្ហាញ «រថយន្តអគ្គិសនីឆ្លាតវៃដឹកទំនិញធុនធ្ងន់» ជាលើកដំបូង

ប្រទេសចិនមានផែនការធ្វើឱ្យផ្លូវគោកលែងមានការបំភាយឧស្ម័នកាបូន ដោយការជំរុញការប្រើប្រាស់យានយន្តអគ្គិសនី។

រថយន្តឆ្លាតវៃដឹកទំនិញធុនធ្ងន់ដំណើរការដោយអគ្គិសនីដំបូងគេរបស់ប្រទេសចិន ដែលអភិវឌ្ឍដោយក្រុមហ៊ុនរថភ្លើង CRRC ត្រូវបានបើកបរចេញពីរោងចក្រនៅទីក្រុង Datong ខេត្ត Shanxi។ នេះបើតាមសារព័ត៌មានចិន Xinhua ចុះផ្សាយកាលពីថ្ងៃទី 16 មីនា 2023។

រថយន្តដឹកទំនិញឆ្លាតវៃនេះប្រើប្រាស់ថាមពលអគ្គិសនីពីថ្ម ឬដោយការភ្ជាប់ជាមួយនឹងបណ្ដាញអគ្គិសនីតាមរយៈខ្សែភ្លើងនៅពីលើ។ គុណសម្បត្តិធំបំផុតរបស់រថយន្តនេះគឺអាចបញ្ចូលថាមពលអគ្គិសនីក្នុងពេលធ្វើដំណើរ។ ជាងនេះ វាក៏អាចផលិតថាមពលអគ្គិសនីតាមរយៈការចាប់ហ្វ្រាំងក្នុងពេលបើកបរផងដែរ។

CRRC បានឱ្យដឹងថា រថយន្តអគ្គិសនីដឹកទំនិញធុនធ្ងន់ឆ្លាតវៃនេះអាចត្រូវបានប្រើប្រាស់ក្នុងការដឹកជញ្ជូនផ្លូវឆ្ងាយ ហើយក្នុងអនាគត វាក៏អាចនឹងមានមុខងារបើកបរស្វ័យប្រវត្តទៀតផង។

វីដេអូបង្ហាញអំពី «រថយន្តអគ្គិសនីឆ្លាតវៃដឹកទំនិញធុនធ្ងន់» របស់ចិន

ដើម្បីចូលរួមកាត់បន្ថយការបំភាយឧស្ម័នកាបូន ដែលជាឧស្ម័នធ្វើឱ្យផែនដីឡើងកម្ដៅ ប្រទេចចិនកំពុងផ្ដោតលើការរកដំណោះស្រាយក្នុងវិស័យដឹកជញ្ជូនតាមផ្លូវគោក។

អង្គការថាមពលអន្តរជាតិ (IEA) ឱ្យដឹងថា ការដឹកជញ្ជូនបំភាយឧស្ម័ន 26% នៅទូទាំងសកលលោក និងពន្យាករថា អគ្គិសនីភាវូបនីយកម្មនឹងក្លាយជានិន្នាការអភិវឌ្ឍក្នុងពេលអនាគត ហើយថា ដល់ឆ្នាំ 2050 រថយន្តដឹកទំនិញធុនធ្ងន់ប្រមាណ 36% នឹងដំណើរការដោយអគ្គិសនី។

យោងតាមការពិសោធ រថយន្តដឹកទំនិញដើរដោយអគ្គិសនី សន្សំសំចៃថាមពលបានច្រើនជាងពីរដងធៀបនឹងរថយន្តប្រើម៉ាស៊ីនម៉ាស៊ូត៕

March 17, 2023

10 គ្រូសារដែលមានទ្រព្យសម្បត្តិច្រើនជាងគេបង្អស់នៅទ្វីបអាស៊ី

គ្រួសារ Ambani នៅប្រទេសឥណ្ឌា បានក្លាយជាអ្នកមានជាងគេនៅទ្វីបអាស៊ីជាលើកទីបួន ដោយមានទ្រព្យសរុបច្រើនជាង 79 ពាន់លានដុល្លារអាម៉េរិក។

យោងតាមស្ថិតិរបស់ទំព័រ Bloomberg Billionaires Index ទ្រព្យសម្បត្តិរបស់ 20 គ្រួសារដែលមានជាងគេនៅអាស៊ីក្នុងឆ្នាំនេះបានថយចុះ 17.7 ពាន់លានដុល្លារ ធៀបនឹងឆ្នាំកន្លង មកនៅត្រឹម 478.1 ពាន់លានដុល្លារ។ មូលហេតុសំខាន់ដែលនាំឱ្យមានការថយចុះនេះគឺដោយសារទ្រព្យរបស់ 5 គ្រួសារនៅឥណ្ឌា បានថយចុះសរុប 17.1 ពាន់លានដុល្លារអាម៉េរិក។

ឆ្នាំនេះ គ្រូសារលោក Mukesh Ambani ឈរលើកំពូលតារាងចំណាត់ថ្នាក់ជាលើកទីបួន។ បន្ទាប់មកគឺគ្រួសារ Hartono និងគ្រួសារ Kwok។

ខាងក្រោមនេះគឺជាគ្រួសារទាំង 10 មានជាងគេបង្អស់នៅទ្វីបអាស៊ីក្នុងឆ្នាំ 2023 ៖

10- Lee

លោក Jay Y. Lee ប្រធានក្រុមហ៊ុន Samsung Electronics

ក្រុមហ៊ុន៖ Samsung
ទីស្នាក់ការកណ្ដាល៖ កូរ៉េខាងត្បូង
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 18.5 ពាន់លានដុល្លារអាម៉េរិក

9- Tsai

លោក Daniel Tsai កូនប្រុសរបស់ Tsai Wan-tsai គ្រប់គ្រងក្រុមហ៊ុន Fubon Financial

ក្រុមហ៊ុន៖ Cathay Financial, Fubon Financial
ទីស្នាក់ការកណ្ដាល៖ កោះតៃវ៉ាន់
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 21.4 ពាន់លានដុល្លារអាម៉េរិក

8- Pao/Woo

ក្រុមហ៊ុន៖ BW Group, Wheelock
ទីស្នាក់ការកណ្ដាល៖ ហុងកុង (ប្រទេសចិន)
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 22.6 ពាន់លានដុល្លារអាម៉េរិក

7- Cheng

លោក Henry Cheng ប្រធានក្រុមហ៊ុន New World Development

ក្រុមហ៊ុន៖ New World Development, Chow Tai Fook
ទីស្នាក់ការកណ្ដាល៖ ហុងកុង (ប្រទេសចិន)
ជំនាន់អ្នកគ្រប់គ្រងក្រុមហ៊ុន៖ 4
ទ្រព្យ៖ 25.9 ពាន់លានដុល្លារអាម៉េរិក

6- Yoovidhya

លោក Saravoot Yoovidhya នាយកប្រតិបត្តិរបស់ TCP Group

ក្រុមហ៊ុន៖ TCP Group
ទីស្នាក់ការកណ្ដាល៖ ប្រទេសថៃ
ជំនាន់អ្នកគ្រប់គ្រងក្រុមហ៊ុន៖ 2
ទ្រព្យ៖ 27.4 ពាន់លានដុល្លារអាម៉េរិក

5- Chearavanont

ក្រុមហ៊ុន៖ Charoen Pokphand Group
ទីស្នាក់ការកណ្ដាល៖ ប្រទេសថៃ
ជំនាន់អ្នកគ្រប់គ្រងក្រុមហ៊ុន៖ 4
ទ្រព្យ៖ 28.2 ពាន់លានដុល្លារអាម៉េរិក

4- Mistry

ក្រុមហ៊ុន៖ Shapoorji Pallonji Group
ទីស្នាក់ការកណ្ដាល៖ ឥណ្ឌា
ជំនាន់អ្នកគ្រប់គ្រងក្រុមហ៊ុន៖ 5
ទ្រព្យ៖ 28.4 ពាន់លានដុល្លារអាម៉េរិក

3- Kwok

ក្រុមហ៊ុន៖ Sun Hung Kai Properties
ទីស្នាក់ការកណ្ដាល៖ ហុងកុង (ប្រទេសចិន)
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 34.8 ពាន់លានដុល្លារអាម៉េរិក

2- Hartono

ក្រុមហ៊ុន៖ Djarum, Bank Central Asia
ទីស្នាក់ការកណ្ដាល៖ ឥណ្ឌូណេស៊ី
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 38.8 ពាន់លានដុល្លារអាម៉េរិក

1-Ambani

លោក Mukesh Ambani (ឆ្វេង) និងលោក Anil Ambani

ក្រុមហ៊ុន៖ Reliance Industries
ទីស្នាក់ការកណ្ដាល៖ ឥណ្ឌា
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 79.3 ពាន់លានដុល្លារអាម៉េរិក

March 17, 2023

បាល់ទាត់នៅ Europa League ៖ 8 ក្រុមចុងក្រោយដែលឡើងដល់វគ្គ ¼

ក្រោយការប៉ះគ្នាប្រកបដោយភាពទាក់ទាញនៅក្នុងការប្រកួតនានានៅជើងទីពីរវគ្គ 1/8 ក្នុងរដូវកាលនេះ Europa League ក៏កំណត់បាន 8 ក្រុមចុងក្រោយដែលនឹងត្រូវប្រកួតនៅវគ្គ ¼ ក្នុងនោះក៏មាន Man United។

វេលាទៀបភ្លឺថ្ងៃទី 17 មីនា (វេលានៅកម្ពុជា) ការប្រកួតចុងក្រោយនានាក្នុងក្របខណ្ឌជើងទីពីរនៅ Europa League 2022/2023 ត្រូវបានធ្វើឡើងជាមួយនឹងការរំភើបរីករាយ និងទុក្ខសោកលាយឡំគ្នាសម្រាប់តំណាងពីរក្រុមរបស់អង់គ្លេស។

ក្នុងការប្រកួតរវាង Real Betis (អេស្ប៉ាញ) និង Man United (អង់គ្លេស) គេឃើញថា រហូតដល់នាទីទី 50 របស់តង់ទីពីរ ទើប Man United រកបានមួយគ្រាប់ ហើយក៏ជាគ្រាប់បាល់ដែលបញ្ចប់ក្ដីសង្ឃឹមរបស់ក្រុមតំណាងអេស្ប៉ាញ ដោយលទ្ធផល 1-0។

ជារួម ក្រុមរបស់គ្រូបង្វឹក Erik ten Hag បានយកឈ្នះលើគូប្រជែងសរុប 5-1 បន្ទាប់ពីការប្រកួតពីរលើក ដូច្នេះ Man United ក៏បានឡើងទៅវគ្គ ¼ នៅ Europa League។

ចំណែកការប្រកួតរវាង Arsenal (អង់គ្លេស) និង Sporting Lisbon (ព័រទុយហ្កាល់) វិញ Arsenal អស់ឱកាសបន្តដំណើរនៅ Europa League ក្នុងរដូវកាលនេះ ដោយបានទទួលបរាជ័យក្នុងលទ្ធផលសរុប 3-3 (ចាញ់ 3-5 ក្នុងការប្រកួតស៊ុតប៉េណាំងទី)។

ក្រោយការប្រកួតនានាក្នុងវគ្គ 1/8 ពានរង្វាន់ Europa League បានរកឃើញ 8 ក្រុមចុងក្រោយដែលត្រូវឡើងទៅវគ្គ ¼។ 8 ក្រុមចុងក្រោយនេះរួមមាន Man United, Sporting Lisbon, Sevilla, Feyenoord, Juventus, Leverkusen, Roma, Union St.Gilloise។

យោងតាមសហព័ន្ធបាល់ទាត់អឺរ៉ុប (UEFA) ក្រោយចប់វគ្គ 1/8 នៅ Europa League ពិធីចាប់ឆ្នោតសម្រាប់វគ្គ ¼ នឹងត្រូវបានធ្វើនៅថ្ងៃទី 17 មីនា 2023 នេះ៕

March 17, 2023

ក្រុមហ៊ុនអាម៉េរិកធ្វើតេស្តឡានហោះអគ្គិសនី ល្បឿន 225 គីឡូម៉ែត្រ/ម៉ោង

ក្រុមហ៊ុនអាកាសចរណ៍ Doroni Aerospace ដែលមានទីស្នាក់ការនៅ Miami បានធ្វើការសាកល្បងលើការហោះឡើង និងចុះចតដោយជោគជ័យលើកដំបូងចំពោះឡានហោះគំរូ Doroni H1។

បន្ទាប់ពីត្រូវបានបង្ហាញជាលើកដំបូងក្នុងទម្រង់ concept កាលពីឆ្នាំ 2019 និងចាប់ផ្ដើមអភិវឌ្ឍជាទម្រង់គំរូតាំងពីដើមឆ្នាំ 2022 ឡានហោះ Doroni H1 អាចហោះឡើង និងចុះចតដោយត្រង់ និងប្រើប្រាស់អគ្គិសនី (eVTOL)។ ដោយសារមានរូបរាងតូចល្មម ឡានហោះនេះអាចចតក្នុងកន្លែងដាក់ឡានរបស់គ្រួសារ។ Doroni H1 មានបណ្ដោយ 7 ម៉ែត្រ, ទទឹង 4.5 ម៉ែត្រ, កម្ពស់ 1.7 ម៉ែត្រ និងអាចហោះក្នុងល្បឿន 225 គីឡូម៉ែត្រ/ម៉ោង។

ថ្មីៗនេះ ក្រុមហ៊ុនខាងលើបានធ្វើការសាកល្បងហោះឡើង និងចុះចតចំពោះ Doroni H1 និងបានទទួលជោគជ័យ នេះបើតាម TMZ ចុះផ្សាយកាលពីថ្ងៃទី 14 មីនា។ នេះគឺជាជំហានដំបូងដើម្បីឱ្យក្រុមហ៊ុនបន្តធ្វើតេស្តទ្រង់ទ្រាយធំនាប៉ុន្មានខែខាងមុខ។

Doroni H1 ត្រូវបានអភិវឌ្ឍឡើងដើម្បីអាចហោះហើរជាបន្តបន្ទាប់បានជិត 100 គីឡូម៉ែត្រ។ ដោយប្រើប្រាស់មុខងារបញ្ចូលអគ្គិសនីរហ័ស ឡានហោះនេះស៊ីពេលប្រហែលតែជាង 20 នាទីប៉ុណ្ណោះគឺមានថាមពល 80%។ ក្រោយពីបានចុះចត អ្នកប្រើប្រាស់អាចបើកបរឡានហោះនេះចូលទៅក្នុងហ្ការ៉ាសធម្មតាដើម្បីបញ្ចូលអគ្គិសនី។

អាជ្ញាធរគ្រប់គ្រងអាកាសចរណ៍អាម៉េរិកបានទទួលស្គាល់ថា Doroni H1 គឺជាឡានហោះគំរូបែបកីឡាធុនស្រាល។ Doroni H1 មានកៅអីចំនួនពីរ និងអាចផ្ទុកទម្ងន់បាន 227 គីឡូក្រាម។ គ្រប់គ្នាដែលមានប័ណ្ណបើកបរសមស្រប និងបានបញ្ចប់វគ្គហ្វឹកហ្វឺន 20 ម៉ោងរបស់ Doroni Aerospace សុទ្ធតែអាចបើកបរឡានហោះនេះបាន។

ដើមឡើយ តម្លៃលក់រាយរបស់ Doroni H1 គឺត្រឹមតែ 195,000 ដុល្លារអាម៉េរិក ប៉ុន្តែតម្លៃនេះបច្ចុប្បន្នបានឡើងដល់ 350,000 ដុល្លារ ដោយសារវត្ថុធាតុដើមឡើងថ្លៃខ្ពស់។

Doroni Aerospace ឱ្យដឹងថា ទទួលបានការបញ្ជាទិញជាង 230 គ្រឿង និងបានបញ្ជាក់ថា Doroni H1 នឹងមានវត្តមានក្នុងទីផ្សារចាប់ពីឆ្នាំ 2025៕

March 16, 2023

Category: សង្គម និងសេដ្ឋកិច្ច