Category: សង្គម និងសេដ្ឋកិច្ច

រូបភាពប៉ុន្មានសន្លឹករបស់ លោក សាន ផានិត រំឭកអតីតកាលជាក្មេងរើសសំរាម
អតីតតារាចម្រៀងល្បីឈ្មោះកាលពីអំឡុងទសវត្សរ៍ឆ្នាំ90 ដែលមហាជនភាគច្រើនស្គាល់លោកតាមរយៈបទ «ទូរស័ព្ទប្រាប់ផង» និងបទ «ជាប់រវល់» គឺ លោក សាន ផានិត បានបង្ហោះរូបភាពជាច្រើនសន្លឹកដែលធ្វើឱ្យគេមើលឃើញថា លោកមានចេតនាចូលរួមជួយរំលែកទុក្ខលំបាករបស់បងប្អូនអ្នកប្រមូលសំរាមនៅតាមទីសាធារណៈ ដោយទឹកចិត្តសប្បុរសធម៌។
នៅព្រឹកថ្ងៃទី21 ខែមិថុនា ឆ្នាំ2018 នេះ លោកបានរៀបរាប់ និងរំឭកដល់អនុស្សាវរីយ៍កាលមកភ្នំពេញដំបូង ខណៈពេលដែលលោកបានឃើញពីសកម្មភាពរបស់បុរស2នាក់កំពុងដើរប្រមូលសំរាមក្នុងរាជធានីភ្នំពេញ។ លោកបានសរសេរសាររៀបរាប់យ៉ាងក្ដុកក្ដួលនៅហ្វេសប៊ុករបស់ខ្លួនថា «ខ្ញុំដើរទៅសុំពួកគាត់ថត ខ្ញុំឱ្យគាត់ម្នាក់10,000 ៛ ប្អូនអាវក្រហមសួរខ្ញុំថាម៉េចបានបងថតជាមួយខ្ញុំ ខ្ញុំឆ្លើយតបវិញមកពីបងធ្លាប់ជាក្មេងម្នាក់ក្នុងចំណោមពួកប្អូនកាលពីបងមកភ្នំពេញដំបូងឆ្នាំ1989»។
ពិតជារំភើប និងចាក់ដោតអារម្មណ៍ខ្លាំង ពេលឃើញពីសកម្មភាពដ៏គួឱ្យគោរពដែលមិនភ្លេចពីភាពជូរចត់របស់តារាចម្រៀងរូបនេះ និងបានធ្វើមហាជន ជាពិសេសអ្នកគាំទ្រដែលតែងតែស្រឡាញ់គាំទ្ររូបលោក លាន់មាត់សរសើរលោកមិនដាច់ពីមាត់ឡើយ ដ្បិតការធ្វើរឿងដ៏មានអត្ថន័យនេះ មិនមានលក្ខណៈធំដំក៏ពិតមែន តែវាចេញពីទឹកចិត្តពិតៗ។ គួររំឭកដែរថា ម្ចាស់បទ«ទូរស័ព្ទប្រាប់ផង»រូបនេះ មានស្រុកកំណើតកើតនៅស្រុកស្ទឹងត្រង់ ខេត្តកំពង់ចាម ក្នុងនាមជាកូនកសិករ ប៉ុន្តែបានជម្នះឡើងមកភ្នំពេញ ដើម្បីសម្រេចបំណងក្លាយជាតារាចម្រៀងកាលពីឆ្នាំ1989៕
June 21, 2018
ពុទ្ធោ !! ឌីជេ អាលីយ៉ា ធ្លាក់ខ្លួនឈឺខ្លាំងរហូតគ្មានប្រាក់សម្រាកព្យាបាល
តាមរយៈការទម្លាយរូបភាពជាច្រើនរបស់តារាស្រី ឌីជេ អាលីយ៉ា បានឱ្យដឹងថា ខណៈនេះនាងកំពុងធ្លាក់ខ្លួនឈឺខ្លាំងសម្រាកព្យាបាលនៅលើគ្រែមន្ទីរពេទ្យ និងពុំមានសូម្បីប្រាក់ព្យាបាល ដែលបង្កឱ្យអ្នកគាំទ្រមានភាពភ្ញាក់ផ្អើលយ៉ាងខ្លាំង។
បើតាមប្រភពមួយបានបញ្ជាក់ឱ្យដឹងថា តារាស្រីរូបនេះកំពុងសម្រាកព្យាបាលនៅមន្ទីរពេទ្យកាល់ម៉ែត ដោយសារជម្ងឺរលាកទងសួតរ៉ាំរ៉ៃ និងធ្វើទុក្ខរហូតធ្វើឱ្យរូបនាងធ្លាក់ខ្លួនស្គមស្លេកស្លាំងបែបនេះ ស្របពេលដែលរូបនាងនៅតែទន្ទឹងរង់ចាំយុត្តិធម៌ពីច្បាប់។ ខណៈបានធ្លាក់ខ្លួនឈឺធ្ងន់បែបនេះ ប្រភពដដែលបានប្រាប់ថា នាងនៅសម្រាកព្យាបាលតែម្នាក់ឯង ដោយគ្មានញាតិណានៅចាំមើលថែរក្សា និងគ្មានប្រាក់បង់ថ្លៃព្យាបាលឡើយ។
គួរបញ្ជាក់ផងដែរថា អតីតផលិតករភាពយន្ត និងជាអ្នកលក់សម្លៀកបំពាក់ធំមួយរូបនេះ ត្រូវធ្លាក់ខ្លួនឈឺយ៉ាងដុនដាបអស់ប្រាក់ពីខ្លួនសូម្បីតែរកលុយទិញបាយហូបស្ទើរតែគ្មានផង ហើយគ្រឿងសម្អាង និងសម្លៀកបំពាក់ត្រូវម្ចាស់់ផ្ទះជួលរឹបអូសអស់ទៀតផង។ នេះអស់រយៈពេលជាង 2 ឆ្នាំមកហើយដែលឌីជេ អាលីយ៉ា ធ្លាប់ជួបប្រទះរឿងដ៏អាក្រក់ ដោយនាងធ្លាប់ត្រូវបានអតីតសង្សារវាយដំ និងរងនូវភាពអយុត្តិធម៌ ថែមទាំងត្រូវគេរឹបអូបទ្រព្យសម្បត្តិដែលនាងខំប្រឹងរកយ៉ាងលំបាកទៀតផង។ រឿងរ៉ាវទាំងអស់នេះបានធ្វើឱ្យ អាលីយ៉ា រងនូវជំងឺធ្លាក់ទឹកចិត្តធ្ងន់ធ្ងរតែម្ដង៕
June 21, 2018
ការសាងសង់ស្ពានអាកាសថ្មីអាចជួយកាត់បន្ថយការចំណាយរបស់ប្រជាពលរដ្ឋ
ដើម្បីដោះស្រាយបញ្ហាកកស្ទះចរាចរណ៍ជួយកាត់បន្ថយពេលវេលា និងសន្សំសំចៃសេដ្ឋកិច្ចប្រជាពលរដ្ឋ អាជ្ញាធររាជធានីបានគ្រោងសាងសង់ស្ពានអាកាស និងផ្លូវក្រោមដីថ្មីមួយទៀតនៅចំណុចប្រសព្វផ្លូវជាតិលេខ3 និងលេខ4 ត្រង់រង្វង់មូលចោមចៅក្នុងពេលឆាប់ៗនេះ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានឱ្យដឹងថា មកទល់បច្ចុប្បន្នការពិភាក្សារវាងអាជ្ញាធររាជធានី រួមនឹងអ្នកជំនាញពាក់ព័ន្ធផ្សេងៗលើការសាងសង់ស្ពានអាកាស និងផ្លូវក្រោមដីចោមចៅ បានឈានដល់ទីបញ្ចប់ទាំងស្រុងហើយ ទាំងគម្រោងប្លង់សាងសង់ បចេ្ចកទេស និងថវិកាដោយគ្រាន់តែរង់ចាំពេលវេលាមកដល់ដើម្បីរៀបចំពិធីបើកការដ្ឋានសាងសង់តែប៉ុណ្ណោះ។
ស្ពានអាកាសចោមចៅនេះពិតជាមានសារៈសំខាន់ណាស់ក្នុងការដោះស្រាយបញ្ហាកកស្ទះចរាចរណ៍ដែលកើតមានជាអន្លើៗនាពេលកន្លងមកក៏ដូចជានាពេលបច្ចុប្បន្នដែរ ដោយសារស្ពាននេះជាចំណុចតភ្ជាប់ផ្លូវសេដ្ឋកិច្ចដ៏សំខាន់សម្រាប់ការដឹកជញ្ជូនតាមផ្លូវជាតិលេខ3 និងផ្លូវជាតិលេខ4 ឆ្ពោះទៅខេត្តដែលមានកំពង់ផែសមុទ្រទឹកជ្រៅនៅកម្ពុជា ដើម្បីបញ្ជូន និងផ្លាស់ប្តូរទំនិញចេញ-ចូលមកក្នុង និងទៅក្រៅប្រទេស។
លោកបានបញ្ជាក់ថា “ពិតជាមានសារៈសំខាន់ណាស់ ព្រោះវាជាផ្លូវដឹកជញ្ជូនទំនិញសំខាន់ជាងគេដែលអាចឱ្យវិនិយោគិន អាជីវករ និងប្រជាពលរដ្ឋទូទៅ ទទួលបានផលចំណេញសម្រាប់សេដ្ឋកិច្ចផ្ទាល់ខ្លួនរបស់ពួកគេ ដែលមិនត្រឹមតែចំណេញពេលវេលាប៉ុណ្ណោះទេ តែថែមទាំងចំណេញថវិកាក្នុងការចំណាយលើសាំងរថយន្ត និងម៉ូតូរបស់បងប្អូនប្រជាពលរដ្ឋទៀតផង។
លោកថា ដោយសារតែបញ្ហាកកស្ទះចរាចរណ៍នេះហើយ ទើបកន្លងមកអាជ្ញាធររាជធានីភ្នំពេញបានដាក់មន្ត្រីជំនាញផ្នែកចរាចរណ៍ឱ្យទៅសម្រួលនៅខ្សែផ្លូវខាងលើជាបន្តបន្ទាប់ ប៉ុន្តែទោះជាដូច្នេះក្ដី ក៏គេនៅតែមិនអាចបញ្ចៀសការកកស្ទះនោះបានដែរ ជាហេតុធ្វើឱ្យសាលារាជធានីភ្នំពេញគ្រោងចំណាយថវិកាត្រៀមសាងសង់ស្ពាននេះឡើងឱ្យបានឆាប់តាមដែលអាចធ្វើទៅបាន។
ក្រៅពីការសាងសង់ស្ពានអាកាសខាងលើហើយ បច្ចុប្បន្នមន្ទីរសាធារណការ និងដឹកជញ្ជូនភ្នំពេញ ក៏បាន និងកំពុងជួសជុលសាងសង់ពង្រីកផ្លូវជាតិលេខ4 ឱ្យមានទំហំកាន់តែធំឡើងៗ ដោយមានការចាក់បេតុង និងក្រាលកៅស៊ូពង្រីកផ្លូវឱ្យកាន់តែទូលាយ សម្រួលដល់ការធ្វើដំណើរទៅមក និងដាក់លូបង្ហូរទឹកចេញកុំឱ្យភ្លៀងលិចផ្លូវដូចឆ្នាំកន្លងទៅទៀត។
គម្រោងនេះត្រូវបានសាទរដោយប្រជាពលរដ្ឋ អាជីវករ អ្នករកស៊ីលើវិស័យដឹកជញ្ជូន រួមទាំងអ្នករត់តាក់ស៊ី អ្នកបើកបរម៉ូតូឌុប ម៉ូតូកង់បីជាដើម ដែលអាចជួយសម្រួលដល់ការធ្វើដំណើរបានលឿន លែងសូវកកស្ទះ លែងលិចទឹក ដែលធ្វើឱ្យពួកគាត់លែងសូវចំណាយលុយច្រើនក្នុងការចាក់សាំងរថយន្ត ឬម៉ូតូដូចកាលពីមុនៗទៀត។
លោក ជា សុធី អ្នករត់ម៉ូតូកង់បីនៅត្រង់ចំណុចអូឌឹមក្នុងខណ្ឌពោធិ៍សែនជ័យ រាជធានីភ្នំពេញបាននិយាយថា លោកតែងដឹកភ្ញៀវចេញចូលតាមផ្លូវជាតិលេខ4 ឆ្លងកាត់រង្វង់មូលចោមចៅជារៀងរាល់ថ្ងៃដើម្បីរកប្រាក់ផ្គត់ផ្គង់គ្រួសារ។
លោកថា កន្លងមកផ្លូវជាតិលេខ4 ចាប់ពីចំណុចកំបូល រហូតដល់រង្វង់មូលចោមចៅនេះ មានការកកស្ទះស្ទើររាល់ថ្ងៃមិនថាពេលព្រឹក ឬពេលល្ងាចនោះទេ ដែលវាជាបញ្ហាធ្វើឱ្យគាត់ជួបការលំបាកយ៉ាងខ្លាំនៅពេលចេញដំណើរដឹកភ្ញៀវម្តងៗ ខាតបង់ទាំងពេលវេលា ខាតទាំងថវិកាក្នុងការចំណាយចាក់សាំងម៉ូតូ។ លើសពីនេះផ្លូវដែលមានជង្ហុកជ្រៅៗ នៅពេលមេឃរាំងខ្លាំង ធូលីហុយទ្រលោម ស្ទើរមើលផ្លូវមិនឃើញ ហើយបើនៅពេលមេឃភ្លៀងខ្លាំងវិញ ទឹកជន់លិចមើលផ្លូវមិនឃើញ ធ្វើឱ្យរថយន្តមិនសូវហ៊ានបើកបរទៅខាងៗដងផ្លូវឡើយ ខ្លាចធ្លាក់លូហើយប្រឹងមកបើកបញ្ច្រៀតចូលកណ្តាលផ្លូវ បង្កការកកស្ទះរាប់ម៉ោងពេលមេឃភ្លៀងម្តង។
តែយ៉ាងណាក៏ដោយ ក្នុងនាមអ្នករស់នៅទីនោះ លោកមានការសប្បាយចិត្តនៅពេលឃើញអាជ្ញាធរចុះជួសជុលផ្លូវជាតិលេខ4ត្រង់ចំណុចខាងលើឡើងវិញ ពិសេសរៀបចំពង្រីកផ្លូវឱ្យកាន់តែធំទូលាយ ថែមទាំងមានគម្រោងសាងសង់ស្ពានអាកាស និងផ្លូវក្រោមដីដែលជាកត្តាបញ្ចៀសការកកស្ទះចរាចរណ៍នេះ ដែលវាជាផ្នែកមួយជួយឱ្យគាត់ចំណេញថវិកាក្នុងការចំណាយលើការចាក់សាំងជាដើម “មិនថាខ្ញុំ មិនថាគេផ្សេងទេ តែកាលណាផ្លូវល្អ ងាយស្រួលធ្វើដំណើរ យើងពិតជារីករាយសប្បាយចិត្តណាស់ ព្រោះជាធម្មតាពេលស្ទះម្តងៗ អ្នកណាមិនធុញ ពិសេសអ្នកជិះម៉ូតូដូចពួកយើង ជួនកាលស្ទះកណ្តាលថ្ងៃក្តៅ តើលំបាកយ៉ាងណា? ជាពិសេសធុំស្អុយក្លិនផ្សែងម៉ូតូ ឡានគ្រប់ប្រភេទដែលជាបញ្ហាបង្កឱ្យប៉ះពាល់ដល់សុខភាពប្រជាពលរដ្ឋទូទៅដែលជិះម៉ូតូដូចពួកយើង ហើយបើសិនបានស្ពាននេះធ្វើហើយ ផ្លូវល្អហើយ យើងនឹងលែងលំបាក លែងចំណាយលុយចាក់សាំងច្រើនទៀត ហើយម៉ូយក៏គេលែងរអ៊ូថាយូរ ថាក្តៅទៀតដែរ។
ប្រភពព័ត៌មានក្រៅផ្លូវការមួយបានឱ្យដឹងថា ស្ពាននេះអាចនឹងសាងសង់ក្នុងពេលឆាប់ៗ នេះ ដោយអាចនឹងដំណើរការបុកគ្រឹះនៅមុនពេលបោះឆ្នោតជាតិឆ្នាំ2018។ សូមជម្រាបថា នៅរាជធានីភ្នំពេញស្ពានអាកាសត្រូវបានសាងសង់ឡើងជាបន្តបន្ទាប់ ក្នុងនោះ1.ស្ពានអាកាសក្បាលថ្នល់ 2.ស្ពានអាកាសស្ទឹងមានជ័យ 3.ស្ពានអាកាស 7មករា(ពេទ្យលោកសង្ឃ) 4.ស្ពានអាកាស និងផ្លូវក្រោមដី 5មករា(ស្ពានតិចណូ) 5.ស្ពានអាកាសផ្សារដីហុយ 6.ស្ពានអាកាស និងផ្លូវក្រោមដីចោមចៅ និងបន្ទាប់ពីស្ពាននេះ អាជ្ញាធររាជធានីនឹងសាងសង់ស្ពានទី7 មួយទៀត គឺស្ពានអាកាសក្បាលថ្នល់2 ត្រង់ចំណុចច្រមុះជ្រូកកាត់ពីផ្លូវព្រះមុនីវង្សក្នុងសង្កាត់បឹងត្របែកឆ្ពោះទៅមហាវិថីសម្ដេចតេជោហ៊ុន សែន (ផ្លូវ60ម៉ែត្រ) ក្នុងសង្កាត់ចាក់អង្រែ ខណ្ឌមានជ័យ៕
June 21, 2018
កុំឱ្យខកខាន ! ទៅទស្សនារឿង «ហ្លួងព្រះស្ដេចកន» បានដោយឥតគិតថ្លៃ
ចាប់ពីម៉ោង 4រសៀល រហូតដល់ម៉ោង 9យប់ ថ្ងៃទី 22-23 និង24 ខែមិថុនា ឆ្នាំ2018នេះ នៅបរិវេណសួនច្បារនៃវាលព្រះមេរុមានរៀបចំកម្មវិធីពិសេស ដោយមានការសហការជាមួយទូរទស្សន៍ PNN ក្រុមការងារកម្មវិធីត្បាញក្រមា 1,000 ម៉ែត្រមានកិត្តិយសនាំជូនដល់ពុកម៉ែបងប្អូនទាំងអស់នូវការបញ្ចាំងកុនប្រវត្តិសាស្ត្ររឿង «ហ្លួងព្រះស្ដេចកន» និងកម្មវិធីជំនួបជាមួយតារា និងល្បែងកម្សាន្តជាច្រើនទៀតផង។
រយៈពេល 3ថ្ងៃនៃការបើកឱ្យទស្សនាដោយសេរីនូវរឿងប្រវត្តិសាស្ត្រ «ហ្លួងព្រះស្តេចកន» នេះ ក្រុមកាងារនៃស្ថានីយទូរទស្សន៍ PNN ក៏បានរៀបចំនូវការលេងហ្គេមកម្សាន្តសប្បាយៗដើម្បីទទួលបានវត្ថុអនុស្សាវរីយ៍ជាច្រើនផងដែរ ជាពិសេសនៅថ្ងៃទី22 ខែមិថុនា លោកអ្នកនឹងបានជួបផ្ទាល់ជាមួយតួឯកប្រុស និងតួឯកស្រីក្នុងរឿង «ហ្លូងព្រះស្តេចកន» គឺលោក រស់ សោភ័ណ្ឌ និងកញ្ញា ឈុំ វត្តី។
គួរបញ្ជាក់ផងដែរថា ការចាក់ផ្សាយឡើងវិញនូវភាពយន្ដខ្នាតធំដ៏អស្ចារ្យដែលដកស្រង់ពីប្រវត្តិសាស្ត្រខ្មែរមួយនេះ គឺជាការចូលរួមចំណែកក្នុងការលើកស្ទូយ និងគាំទ្រដល់ព្រឹត្តិការណ៍ដ៏ធំមួយក្នុងប្រទេសកម្ពុជា គឺព្រឹត្តិការណ៍បំបែកឯតទគ្គកម្មក្រមាវែងជាងគេលើពិភពលោក។ ដូច្នោះហើយ ប្រសិនបើពុកម៉ែបងប្អូនជនជាតិខ្មែរ មិនទាន់បានទស្សនារឿងដ៏ល្អឯកមួយនេះ អាចអញ្ជើញទៅទស្សនាបានដោយឥតគិតថ្លៃ៕
June 21, 2018
សេដ្ឋកិច្ចជាតិផ្លាស់ប្តូរកាន់តែទំនើប ពីប្រទេសពឹងផ្អែកលើវិស័យកសិកម្ម ទៅជាប្រទេសពឹងផ្អែកលើវិស័យឧស្សាហកម្ម
បច្ចុប្បន្ននេះ រចនាសម្ព័ន្ធនៃសេដ្ឋកិច្ចជាតិកាន់តែមានទំនើបកម្ម និងបានផ្លាស់ប្តូរពីប្រទេសពឹងផ្អែកលើវិស័យកសិកម្ម ទៅជាប្រទេសពឹងផ្អែកលើវិស័យឧស្សាហកម្មដែលនេះ គឺជាដំណើរនៃការកសាងជាតិរយៈពេលជិតពីរទសវត្សរ៍ចុងក្រោយនេះ ដែលកម្ពុជាសម្រេចបាននូវសេដ្ឋកិច្ចខ្ពស់ប្រមាណ7.7% បើគិតពីឆ្នាំ2000 ដល់ឆ្នាំ2017។ នេះបើតាមការថ្លែងរបស់លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ នៅមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC)។
លោកបានបញ្ជាក់់ថា ប្រការនេះបានធ្វើឱ្យទំហំនៃផលិតផលក្នុងស្រុកសរុប (ផ.ស.ស) GDP គិតតាមថ្លៃបច្ចុប្បន្ន មានការកើនឡើងប្រមាណ 6ដង។ ពោលគឺ ពីប្រមាណតែជាង 3ប៊ីលានដុល្លារអាមេរិក ក្នុងឆ្នាំ2000 ឡើងដល់ប្រមាណជាង 24ប៊ីលានដុល្លារអាមេរិកក្នុងឆ្នាំ2018។
លោក វិស្សុត បានថ្លែងថា ប្រាក់ចំណូលរបស់ប្រជាជនម្នាក់ធៀបនឹង ផ.ស.ស(GDP) បានកើនឡើងប្រមាណ 5ដង ពោលគឺ ពីប្រមាណតែ 288ដុល្លារក្នុងឆ្នាំ2000 ឡើងដល់ 1,563ដុល្លារក្នុងឆ្នាំ2018 ដែលធ្វើឱ្យប្រទេសកម្ពុជាបានក្លាយជាប្រទេសចំណូលមធ្យមកម្រិតទាបនៅឆ្នាំ2015កន្លងទៅ។ ក្រៅពីការសម្រេចបាននូវកំណើនសេដ្ឋកិច្ចខ្ពស់ហើយ កម្ពុជាក៏មានស្ថិរភាពម៉ាក្រូសេដ្ឋកិច្ចដ៏ល្អប្រសើរផងដែរ។ ជាក់ស្តែង អត្រាអតិផរណាមានកម្រិតទាប គឺក្នុងរង្វង់ 3.0% និងអត្រាប្តូរប្រាក់ក្នុងកម្រិត4,037រៀល/ដុល្លារ ដែលធ្វើឱ្យមានកំណើននៃចំណូលពិតរបស់ប្រជាពលរដ្ឋ។
លោកបានបន្តថា ទំហំពាណិជ្ជកម្មក៏មានការកើនឡើងពីប្រមាណតែជាង 3ប៊ីលានដុល្លារក្នុងឆ្នាំ2000 ឡើងដល់ប្រមាណជាង 28ប៊ីលានដុល្លារក្នុងឆ្នាំ2018 ក្នុងខណៈដែលដំណើរការនៃការធ្វើពិពិធកម្មក្នុងការនាំចេញ ទាំងលើមុខទំនិញ និងទាំងទីផ្សារនាំចេញកាន់តែមានសម្ទុះល្អជាលំដាប់។
ទុនបម្រុងអន្តរជាតិក៏មានកើនឡើងជាបន្តបន្ទាប់គួរឱ្យកត់សម្គាល់ផងដែរ ក្នុងខណៈដែលប្រាក់បញ្ញើធនាគារនៅបន្តរក្សាទំហំធៀបនឹងផ.ស.ស (GDP)ដែលឆ្លុះបញ្ចំងឱ្យឃើញពីការកើនឡើងនូវទំនុកចិត្តលើវិស័យធនាគារ។
លោក វង្សី វិស្សុតបានពន្យល់ដូច្នេះថា សេដ្ឋកិច្ចកម្ពុជាបន្តរក្សាកំណើនខ្ពស់ ប៉ុន្តែតម្រូវឱ្យមានការពន្លឿនលើការកែទម្រង់រចនាសម្ព័ន្ធ។ បើយើងមើលពីរចនាសម្ព័ន្ធសេដ្ឋកិច្ច ឃើញថាវិស័យកសិកម្មនៅឆ្នាំ2000 មាននៅក្នុងចំណែកនៃផ.ស.សដល់ទៅ 36% ឥឡូវនៅសល់តែ 23%ប៉ុណ្ណោះ។ តែយើងមានកំណើនលើវិស័យឧស្សាហកម្មដែលពីមុនមានតែ 23%នៃផ.ស.ស ឥឡូវកើនដល់ 31% គឺមិនទាន់ដល់រយៈពេលរំពឹងទុកឆ្នាំ2025ផង ត្រឹមតែឆ្នាំ2017ប៉ុណ្ណោះ សេដ្ឋកិច្ចយើងអាចសម្រេចបាន។
លោកបានបញ្ជាក់ថា៖ “នេះបញ្ជាក់ថា ប្រទេសយើងលែងពឹងទៅលើវិស័យកសិកម្មហើយ គឺពឹងទៅលើឧស្សាហកម្មច្រើនជាង។ មានន័យថា វិស័យកសិកម្មជាវិស័យដែលមានផលិតភាពទាប ព្រោះយើងឃើញថា ចំណែកកសិកម្មក្នុងសេដ្ឋកិច្ចនៃ GDP មាន23% តែប្រើប្រាស់កម្លាំងពលកម្មដល់ទៅ42%។ រីឯវិស័យឧស្សាហកម្មវិញ មាន31%នៃផ.ស.ស កម្លាំងពលកម្មត្រឹមតែ 25% តែមានផលិតភាពខ្ពស់។ ប្រទេសយើងកាលណាវិស័យឧស្សាហកម្មកាន់តែរីកចម្រើនខ្លាំង ផលិតភាពយើងកាន់តែខ្ពស់ធ្វើឱ្យសេដ្ឋកិច្ចកាន់តែល្អ។ លោកបន្តថា៖ “ចំពោះសេដ្ឋកិច្ចកម្ពុជាបន្តរក្សាកំណើនខ្ពស់7% ទ្រទ្រង់មកដល់សព្វថ្ងៃក៏ដោយសារតែវិស័យឧស្សាហកម្មដឹកមុខដែរ។ ចំណែកវិស័យកសិកម្មពិតមែនតែរួមតូចក្នុងចំណែកនៃសេដ្ឋកិច្ចមែន តែទំហំនៃកិច្ចអភិវឌ្ឍធំ ព្រោះតែវិស័យឧស្សាហកម្មកើនលឿនជាង ហើយផលិតភាពវាក៏ខ្ពស់ជាងដែរ ទើបយើងឃើញវិស័យកសិកម្មមានល្បឿនយឺតដូច្នេះ។
លោកបណ្ឌិត ចាប សុថារិទ្ធ សេដ្ឋវិទូ និងជាក្រុមប្រឹក្សាភិបាលនៃវិទ្យាស្ថានសហប្រតិបត្តិការអន្តរជាតិ និងសន្តិភាព(CICP)បានបញ្ជាក់ប្រាប់តាមទូរស័ព្ទថា៖ “តាមពិតទៅ ទោះជាប្រទេសយើងមានលក្ខខណ្ឌអំណោយផលទៅខាងឧស្សាហកម្មច្រើនទៅថ្ងៃអនាគតក៏ដោយ ក៏យើងមិនអាចចោលវិស័យកសិកម្មបានដែរ ព្រោះវាជាស្នូលនៃការអភិវឌ្ឍសេដ្ឋកិច្ចដែលយើងមិនអាចបោះបង់ចោលបានទេ។ ទោះបីជាកាលពីជាង 10ឆ្នាំមុនវិស័យកសិកម្មមាននៅក្នុងចំណែកនៃផ.ស.សដល់ទៅ 36%ឥឡូវនៅសល់តែ 23%ក៏ដោយ។ ចំពោះវិស័យកសិកម្មដែលយើងឃើញថា មានចំណែកក្នុងផ.ស.សតូចនោះ តែបើគិតពីទំហំវិញ គឺមានទំហំធំ គ្រាន់តែវាមានកំណើនយឺតដូច្នេះយើងត្រូវធ្វើការអភិវឌ្ឍវិស័យចម្រុះផ្សេងៗទៀតផងដែរ។
លោកបណ្ឌិតបានបញ្ជាក់ថា តែយើងក៏ទទួលស្គាល់ថា មានកំណើនទៅលើវិស័យ2 មែន គឺសេវាកម្ម និងឧស្សាហកម្មដែលកំណើននេះជានិន្នាការសកល។ តែការកើនឡើងជានិន្នាការសកលវាមិនមានអ្វីប្លែកទេពីព្រោះគ្រប់ប្រទេសលើសកលលោកក៏គេធ្វើការអភិវឌ្ឍប្រទេសដូច្នេះដែរ ហើយនេះជារឿងត្រឹមត្រូវដោយសារតែគេមិនអាចពឹងផ្អែកលើវិស័យកសិកម្មតែមួយមុខបានទេ។
យោងតាមប្រព័ន្ធទិន្នន័យស្ដីពីហិរញ្ញប្បទានសហប្រតិបត្តិការដែលបានកែសម្រួលឱ្យស្របតាម អាទិភាពនៃគោលនយោបាយអភិវឌ្ឍន៍វិស័យឧស្សាហកម្ម ធនធាន 144លានដុល្លារស្មើនឹង13%នៃហិរញ្ញប្បទានសរុបក្នុងឆ្នាំ2017 ត្រូវបានផ្តល់សម្រាប់គាំទ្រគោលនយោបាយអភិវឌ្ឍន៍វិស័យឧស្សាហកម្ម។សម្រាប់រយៈពេល5ឆ្នាំ (ឆ្នាំ2014-2018) ហិរញ្ញប្បទានសហប្រតិបត្តិការដែលបានគាំទ្រគោលនយោបាយអភិវឌ្ឍន៍វិស័យឧស្សាហកម្មបានកើនដល់ 697លានដុល្លារ គិតជាមធ្យម 139លានដុល្លារក្នុងមួយឆ្នាំ៕
June 21, 2018
ដំណាំ ជីរវ៉ាន់ស៊ុយ
ជីរវ៉ាន់ស៊ុយ ឬឈ្មោះវិទ្យាសាស្រ្តហៅថា Coriandrum sativa Linn ជាបន្លែមានដើមឈរត្រង់ទៅលើ មានអាយុប្រមាណជា40-60ថ្ងៃ អាចដាំបានលើគ្រប់សភាពដី ហើយនឹងដាំបានល្អនៅលើដីដែលធូរមានចរន្តទឹកហូរចេញចូលបានល្អ មានសំណើមសមល្មម និងអាចដាំបានពេញមួយឆ្នាំ តែនឹងលូតលាស់ធំធាត់បានល្អបំផុតនៅក្នុងអំឡុងខែរងា ដោយពូជជីរវ៉ាន់ស៊ុយដែលកសិករនិយមនាំគ្នាដាំជាទូទៅគឺ ពូជសាំងហ្គាពួរ ពូជសាំងហ្គាពួរគ្រាប់ខ្មៅ និងពូជតៃវ៉ាន់។ បន្លែជីរវ៉ាន់ស៊ុយគេអាចប្រើប្រាស់បានគ្រប់ផ្នែក ទាំងស្លឹក ដើម គល់ និងឫស ដែលប្រើប្រាស់ធ្វើជាគ្រឿងផ្សំរបស់ម្ហូបអាហារបានច្រើនយ៉ាង ប្រៀបដូចជាគ្រឿងទេស និងបន្លែដែលប្រើសម្រាប់បន្ថែមក្លិន ជួយបង្កើនក្លិនឈ្ងុយ និងរសជាតិម្ហូបអាហារឱ្យរឹតតែឈ្ងុយឆ្ងាញ់ឡើងថែមទៀត។
ការដាំដុះ
• ការត្រៀមដី : សម្រាប់ជីរវ៉ាន់ស៊ុយ គឺជាដំណាំបន្លែដែលមានប្រព័ន្ធចាក់ឫសខ្លីរាក់ ដូច្នេះហើយទើបដីដែលស័ក្តិសមនឹងការដាំដុះជីរវ៉ាន់ស៊ុយនេះត្រូវតែជាដីដែលមានសភាពធូរមិនណែនស្អិត ដោយការដាំដុះត្រូវចាប់ផ្ដើមពីការភ្ជួរដាស់ដីឱ្យបានជ្រៅប្រមាណ15-20សង់ទីម៉ែត្រ ហើយត្រូវហាលដីឱ្យឆ្អិនប្រមាណជា5-7ថ្ងៃ។ បន្ទាប់ពីនោះទើបដាក់ជីកំប៉ុស ឬជីលាមកគោក្នុងអត្រា2តោនក្នុងទំហំដី 50ម៉ែត្រ x 50 ម៉ែត្រ(កន្លះហិកតា) ហើយរាស់ច្របល់ឱ្យចូលគ្នាសព្វ និងបំបែកដីឱ្យម៉ដ្ឋ ដើម្បីងាយស្រួលក្នុងការដាក់ដាំ។
• វិធីដាំ : ចាប់ផ្ដើមពីការត្រៀមកូនដោយការនាំយកគ្រាប់ពូជមកដំល្មមៗតែបែក បន្ទាប់មកក៏ដាក់ត្រាំក្នុងទឹកទុកចោល1យប់។ ឯការដាក់ដាំវិញ គឺមុននឹងដាក់ដាំត្រូវស្រោចទឹកឱ្យសព្វលើដី (ឬរង) រួចយកគ្រាប់ពូជជីរវ៉ាន់ស៊ុយដែលត្រាំទឹក1យប់ហើយនោះមកព្រោះឱ្យសព្វលើដី (ឬរង) ដែលត្រូវដាំ បន្ទាប់ពីនោះក៏គ្របពីលើដោយចំបើងស្ងួត និងស្រោចទឹកពីលើម្ដងទៀតដោយចំបើងនឹងជួយរក្សាសំណើមនៅក្នុងដីជួយឱ្យដំណាំធំលូតលាស់បានល្អ។
វិធីថែរក្សា និងមើលថែទាំ
• ការស្រោចទឹក : គួរស្រោចទឹករាល់ពេលព្រឹក-ល្ងាចឱ្យបានជាប់លាប់ និងគ្រប់គ្រាន់ តែកុំឱ្យច្រើនជ្រុលពេករហូតដល់បែកភក់ ព្រោះដំណាំជីរវ៉ាន់ស៊ុយមិនចូលចិត្តទឹកច្រើនឡើយបើច្រើនជ្រុលពេកនឹងធ្វើឱ្យរលួយគល់។
• ការដាក់ជី : ចូរឧស្សាហ៍ដាក់ជីលាមកគោ ឬជីសរីរាង្គរៀងរាល់7ថ្ងៃម្ដង ដោយរោយពីលើស្ដើងៗ ព្រមជាមួយបាញ់ទឹកថ្នាំសរីរាង្គ1វែកសម្ល លាយជាមួយទឹកធម្មតា10លិត្រ និងបាញ់ដាក់រៀងរាល់7ថ្ងៃម្ដងព្រមគ្នា ឬជ្រើសរើសដាក់ជីគីមីរូបមន្ត 25-7-7 ក្នុងអត្រា20-30គីឡូក្រាមលើទំហំដី 50ម៉ x 50ម៉ រួមជាមួយផងក៏បាន។
• ការការពារ និងកម្ចាត់សត្រូវដំណាំ : រោគ និងសត្វល្អិតសត្រូវរបស់ដំណាំជីរវ៉ាន់ស៊ុយគឺពពួកសត្វល្អិតស៊ីស្លឹក និងរោគក្រាស៊ីស្លឹក។ តាំងពីរយៈដំបូងដែលសត្រូវដំណាំចូលមក រហូតដល់រយៈកាលឆ្លងរាលដាល ចូរប្រើថ្នាំឱសថបុរាណ ដូចជា សម្បកដើមស្ដៅ មើមម្ដេង គល់ស្លឹកគ្រៃ មួយមុខមួយផ្នែកផ្សំចូលគ្នា ហើយត្រាំទឹកទុកចោល1យប់ រួចត្រងយកតែទឹកចំនួន1លិត្រមកលាយជាមួយទឹកចំនួន18លិត្រ រួចយកទៅបាញ់ ឬស្រោចលើដំណាំរៀងរាល់7ថ្ងៃម្ដង។
វិធីប្រមូលផល
នៅពេលដំណាំជីរវ៉ាន់ស៊ុយមានអាយុប្រមាណ40-50ថ្ងៃ រាប់ចាប់ពីថ្ងៃដាក់ដាំមក អ្នកអាចប្រមូលផលបានហើយ ដូច្នេះអ្នកគួរប្រមូលផល ដោយការដកទាំងឫស ក្នុងខណៈដែលវាមិនទាន់ចេញផ្កា និងរក្សាទុកក្នុងកន្លែងដែលមិនមានពន្លឺថ្ងៃ និងស្ងួតល្អ៕

June 21, 2018
ត្រូវតុបតែងចង្ក្រានបាយនៅក្នុងផ្ទះដូចម្តេច ដើម្បីការពារក្លិនម្ហូបអាហារភាយស្អុយពេញផ្ទះ?
កាលពីលេខមុន (លេខ 120) អ្នកបានដឹងរួចហើយពីការរៀបចំផ្ទះបាយដែលមានទំហំតូចឱ្យមានភាពងាយស្រួលក្នុងការប្រើប្រាស់ និងទូលាយសប្បាយឡើង ហើយលេខនេះយើងនឹងនិយាយបន្តទៀតអំពីវិធីធ្វើយ៉ាងណាកុំឱ្យក្លិនអាហារដែលអ្នកចម្អិននៅក្នុងផ្ទះបាយដ៏តូចនោះ ជះសាយភាយពេញក្នុងផ្ទះ។
មានផ្ទះជាច្រើនដែលនិយមតុបតែងម៉ូដបន្ទប់ផ្ទះបាយបែបបរទេស ដោយសារតែមានរូបបែបស្អាត ទំនើប និងមិនស្មុគស្មាញច្រើន តែក៏មានចំណុចខ្សោយមួយដែរ គឺផ្ទះបាយបែបបរទេសជាបន្ទប់ដែលស្ថិតនៅក្នុងផ្ទះ នៅពេលយកម៉ូដហ្នឹងមកប្រើនៅក្នុងប្រទេសយើង អាចនឹងមិនសូវជាងាយស្រួលសម្រាប់ការចម្អិនអាហារប្រភេទខ្លះ ព្រោះម្ហូបអាហារខ្មែរយើងភាគច្រើនត្រូវប្រើគ្រឿងគ្រៅដែលមានក្លិនខ្លាំងៗ ឬមិនទេក៏ប្រភេទឆា ចៀនដោយភ្លើងខ្លាំងៗ ធ្វើឱ្យមានក្លិនជះសាយភាយពេញក្នុងផ្ទះ និងដំណក់ប្រេង ឬខ្លាញ់អាចនឹងខ្ទាតប្រឡាក់នៅតាមជញ្ជាំង ឬវាំងននបាន នៅពេលទុកយូរៗទៅធ្វើឱ្យកខ្វក់មិនគួរឱ្យបេតីឡើយ។
ខាងក្រោមនេះគឺជាគន្លឹះងាយៗក្នុងការការពារបញ្ហាក្លិនម្ហូបអាហារជះសាយភាយពេញក្នុងផ្ទះ រួមទាំងភាពកខ្វក់ដែលកើតពីកំណកខ្លាញ់ ឬប្រេង និងកម្ទេចអាហារផងដែរ។
1. បំពាក់កង្ហារបឺតផ្សែង
កង្ហារបឺតផ្សែង អាចមិនបានជួយបំបាត់ក្លិនអាហារបានប៉ុន្មានក៏ពិតមែន តែយ៉ាងហោចណាស់ក៏ជួយបឺតផ្សែងពីការចម្អិនអាហារមិនឱ្យហុយចូលពេញក្នុងផ្ទះបានដែរ និងនៅអាចជួយការពារបញ្ហាស្នាមខ្លាញ់ ឬប្រេងទៅប្រឡាក់ជាប់តាមជញ្ជាំង និងគ្រឿងសង្ហារិមបានក្នុងកម្រិតណាមួយដែរ ព្រោះជាធម្មតា ផ្សែងដែលកើតពីការចម្អិនម្ហូបអាហារ ច្រើនតែមានលម្អងខ្លាញ់ ឬប្រេងនៅជាមួយជានិច្ច។
2. ចៀសវាងពីមុខម្ហូបឆា ឬចៀនដែលប្រើភ្លើងខ្លាំងៗ
ដូចជា ឆាត្រកួនប្រេងខ្យង ឬចៀនសាច់មាន់ ជាដើម ព្រោះប្រេង ឬខ្លាញ់ច្រើនតែខ្ទាតពេញទីនោះពេលចម្អិន និងផ្សែងតែងតែមានច្រើន ហេតុនេះកង្ហារបឺតផ្សែងអាចជួយអ្វីមិនបានច្រើនប៉ុន្មានទេ ដូច្នេះវិធីដែលល្អ បើសិនជាត្រូវការចង់ទទួលទានមុខម្ហូបប្រភេទឆា ឬចៀនបំពងដែលត្រូវប្រើភ្លើងខ្លាំងៗនោះ គួរទិញខ្ទះអគ្គិសនីមកប្រើ ដោយយកទៅដោតភ្លើងប្រើនៅខាងក្រៅផ្ទះវិញប្រសើរជាង ដើម្បីខ្យល់អាកាសនឹងបានបក់ផាត់ផ្សែង និងក្លិនទៅឆ្ងាយចំណែកនៅក្នុងផ្ទះគួរធ្វើតែមុខម្ហូបប្រភេទចំហុយស្ងោរ ញាំវិញប្រសើរជាង។
3. គួរបើកមាត់បង្អួចឱ្យខ្យល់អាកាសចេញចូលល្អពេលចម្អិនអាហារ
ទោះជាមុខម្ហូបដែលមិនសូវជាមានក្លិនខ្លាំង ឬមិនចាំបាច់ប្រើភ្លើងខ្លាំងក៏ដោយ តែក្លិនម្ហូបអាហារក៏នៅតែមានចៀសមិនរួចដែរ ដូច្នេះទើបគួរបើកចំហមាត់បង្អួច ឬបន្ទះព្រឹលបង្អួច ហើយនិងទ្វារផងដែរ ដើម្បីឱ្យខ្យល់អាកាសបក់ចេញចូល ហើយដែលសំខាន់គឺ មិនគួរបើកម៉ាស៊ីនត្រជាក់ពេលធ្វើម្ហូបអាហារជាដាច់ខាត ព្រោះក្លិននឹងនៅដិតជាប់នឹងសម្ភារផ្សេងៗបានយ៉ាងងាយ។
4. កុំបំពាក់វាំងនននៅជិតកន្លែងធ្វើម្ហូប
អាហារព្រោះទាំងផ្សែង ទាំងក្លិនអាហារ នឹងអណ្ដែតទៅដិតស្អិតជាប់បានស្រួលណាស់ ហើយបើគ្មានការថែទាំសម្អាតផងនោះនឹងអាប់កខ្វក់រហូតបញ្ចេញក្លិនមិនល្អក្នុងរយៈពេលយូរទៀតផង៕

June 21, 2018
អ៊ុយរូហ្គាយ និងរុស្ស៊ី ទៅវគ្គ១៦ ខណៈព័រទុយហ្គាល់ និងអេស្ប៉ាញ ឈ្នះទាំងព្រលឹងចុងសក់
ក្រុមបាល់ទាត់ជម្រើសជាតិអ៊ុយរូហ្គាយ បានឈ្នះកៅអីរបស់ខ្លួនទៅវគ្គ 16ក្រុមចុងក្រោយ ខណៈដែលនៅសល់ 1ប្រកួតទៀតក្នុងពូល A ក្រោយពីពួកគេបានផ្តួលក្រុមបាល់ទាត់ជម្រើសជាតិអារ៉ាប៊ីសាអ៊ូឌីត ក្នុងលទ្ធផល 1-០ ក្នុងការប្រកួតកាលពីថ្ងៃពុធ។
ខ្សែប្រយុទ្ធ Luis Suarez បានរកគ្រាប់បាល់ឈ្នះនោះ ក្នុងការបង្ហាញខ្លួនជាអន្តរជាតិជាលើកទី1០០របស់គេក្នុងទីក្រុង Rostov-on-Don។ ក្រុមរបស់អាមេរិកខាងត្បូងមួយនេះនឹងត្រូវជួបក្រុមម្ចាស់ផ្ទះក្នុងការប្រកួតជុំចុងក្រោយនៃពូល A របស់ពួកគេ នាថ្ងៃទី25 ខែមិថុនា ដើម្បីប្រជែងដណ្តើមចំណាត់ថ្នាក់លេខ1 ក្នុងពូល ស្របពេលដែលក្រុមបាល់ទាត់ជម្រើសជាតិអេហ្ស៊ីប និងអារ៉ាប៊ីសាអ៊ូឌីត ត្រូវបានកាត់ចេញ ក្រោយពីក្រុមទាំង2 សុទ្ធតែបរាជ័យទាំង 2លើកដូចគ្នា។ រុស្ស៊ី និងអ៊ុយរូហ្គាយ នឹងត្រូវជួបក្រុមមួយក្នុងចំណោមក្រុមឈរលើកំពូលតារាងនៃពូល B ក្នុងវគ្គ 16ក្រុមចុងក្រោយ អាចជាអេស្ប៉ាញ ព័រទុយហ្គាល់ ឬអ៊ីរ៉ង់។ស្របពេលជាមួយគ្នានេះ លោក Fernando Hierro គ្រូបង្វឹកនៃក្រុមបាល់ទាត់ជម្រើសជាតិអេស្ប៉ាញ បានទទួលស្គាល់ថា ក្រុមរបស់លោកបានស្ថិតនៅលើខ្សែពួរ នៅមុនពេលគ្រាប់បាល់នាំសំណាងរបស់ខ្សែប្រយុទ្ធ Diego Costa បានជួយឱ្យពួកគេកត់ត្រាជ័យជម្នះជាលើកទី1របស់ពួកគេក្នុងយុទ្ធនាការ World Cup កាលពីថ្ងៃពុធ ខណៈដែលក្រុមជម្រើសជាតិអ៊ីរ៉ង់ ស្ទើរតែបានបង្កើតភាពអស្ចារ្យមួយបានទៅហើយ។ ដោយឡែក ក្នុងការប្រកួតពូល B ដូចគ្នានេះ រយៈពេល 5ថ្ងៃ ក្រោយពីការរកបានគ្រាប់បាល់ 3គ្រាប់របស់ Ronaldo ដែលបានជួយសង្គ្រោះក្រុមព័រទុយហ្គាល់ នៅពេលបញ្ចប់ក្នុងលទ្ធផលស្មើ 3-3 ជាមួយនឹងក្រុមជម្រើសជាតិអេស្ប៉ាញ កាលពីថ្ងៃបើកឆាកនោះ គ្រាប់បាល់តែតបញ្ចូលទីនៅនាទីទី4 របស់ Cristiano Ronaldo បានជួយឱ្យក្រុមខ្លួនទទួលជ័យជម្នះ 1-០ លើក្រុមជម្រើសជាតិម៉ារ៉ុក ក្នុងការប្រកួតពូល B នាទីក្រុងម៉ូស្គូតែម្តង៕
ប្រភពពី៖ Channel News Asia
June 21, 2018
ក្រសួងនឹងមានវិធានការហៅតារាសម្តែង និងអ្នកដឹកនាំសម្ដែង ទៅដុសក្អែលរឿងថតបទចម្រៀងស្រើបស្រាល?
មុននេះបន្ដិចមានការចាប់អារម្មណ៍យ៉ាងខ្លាំងចំពោះការលើកឡើងរបស់លោក អាចារ្យធំ ដែលប្រិយមិត្តអ្នកគាំទ្រជាច្រើនស្គាល់ថា លោកជាមនុស្សម្នាក់ដែលខិតខំលើកស្ទួយវិស័យវប្បធម៌បុរាណខ្មែរ។ លោកបានលើកជាសំណួរឡើងថា៖ « ពេលចេញMV បទហ្នឹងមានឆ្លងក្រសួងទេ?» ដែលសំណួរនេះត្រូវបានគេយល់ឃើញថា ជាការចោទសួរទៅកាន់អ្នកដឹកនាំខាងចម្រៀង និងផលិតកម្មសាស្ដា ដែលបានបញ្ចេញ MVបទចម្រៀង «ស្រីមុខលុយ» ដែលបានបង្ហាញពីសកម្មភាពសិចស៊ីរោលរាលក្ដៅសាច់នៅក្នុង MVបទចម្រៀងនោះ។
កន្លងមកមានតែការចេញផ្សាយជាព័ត៌មានវាយប្រហាតាមរយៈរូបភាពនៃពាក្យសម្ដីរិះគន់ ទៅលើតួសម្ដែងនៅក្នុងបទចម្រៀងនេះ និងអ្នកដឹកនាំសម្ដែងតែប៉ុណ្ណោះ។ ដោយឡែក នៅមិនទាន់ឃើញមានការរិះគន់ណាមួយទៅខាងផលិតកម្មនៅឡើយទេ។ ដោយផ្អែកទៅលើគណនីរបស់អាចារ្យធំ លោកលើកឡើងថា ឈុតក្រៅឆាករបស់បទចម្រៀង “ស្រីមុខលុយ” ដែលបង្ហាញពីរូបភាពស្រើបស្រាលខ្លាំងទទួលបានការរិះគន់មិនសំចៃមាត់ពីសំណាក់មហាជនជាច្រើនកន្លងមក។ ដំណឹងចុងក្រោយបានលើកឡើងថា ក្រសួងត្រៀមអញ្ជើញទាំងសិល្បករ និងផលិតករនៃបទចម្រៀងមួយនេះមកធ្វើការអប់រំណែនាំឱ្យបញ្ចប់ការសម្តែងបទចម្រៀងបែបស្រើបស្រាលនោះ។
រូបភាពនៃឈុតឆាកស្រើបស្រាលពីបទចម្រៀង ”ស្រីមុខលុយ” សម្តែងដោយកញ្ញា វ៉ាន់ វលក្ខណ៍ និងដឹកនាំសម្តែងដោយក្រុមផលិតករនៃផលិតកម្ម សាស្តាបានធ្វើឱ្យលេចចេញនូវការរិះគន់ខ្លាំង រហូតមហាជនខ្លះប្រដូចទៅនឹងការថតកុនសិច ព្រោះតែឈុតឆាកជាច្រើនបង្ហាញពីការឱបថើប លូកស្ទាប ស្ទើរគ្មានសល់កន្លែងណាមួយលើរាងកាយ។ កន្លងមកផលិតករប្រចាំផលិតកម្មថោន លោក រិទ្ធ អូមេហ្គា ក៏ធ្លាប់បានរិះគន់ខ្លាំងលើបទចម្រៀងមួយនេះថា ជាបទចម្រៀងដែលមានតែឱបថើបគ្នាលើគ្រែ ក្នុងបន្ទប់ទឹកបែបនេះ? ។ លោកថា ”គិតថាធ្វើអ៊ីចឹងទៅល្បីមែន? ការក្បត់វាអាចមានច្រើនរូបភាពមិនចាំបាច់តែ…គ្នាបានគេហៅក្បត់ទេ? ចង់ឃើញមុខអ្នកដឹកនាំសម្តែងហ្នឹង មុខម៉េចបានខួរក្បាលគិតចេញតែរឿងអ៊ីចឹង? ខ្ញុំនិយាយព្រោះខ្ញុំទើស ហើយក្នុងនាមខ្ញុំជាអ្នកផលិតមួយរូបដែរខ្ញុំខ្មាសគេជំនួស។ គ្មានអ្វីថ្មី បែរជានាំរឿងថោកដល់វិស័យសិល្បៈ មិនបានលើកស្ទួយ មកជាន់ពន្លិច យកសិល្បៈជាឈ្នាន់ធ្វើរឿងថោកទាប ។ សុំទោស បើខ្ញុំនិយាយខុស តែខ្ញុំវាទើសភ្នែកពេក ក្រសួងវប្បធម៌គួរចាត់វិធានការលើអ្នកដឹកនាំសម្តែង ឬផលិតកម្មនេះ»។
ប្រភពពីមន្ត្រីក្រុមប្រឹក្សាភិបាលវិន័យនៃក្រសួងវប្បធម៌ និងវិចិត្រសិល្បៈបានលើកឡើងថា សំណើរបស់ក្រុមការងារបានធ្វើរួចរាល់ហើយ គឺនៅតែការសម្រេចចុងក្រោយរបស់រដ្ឋមន្ត្រីប៉ុណ្ណោះ។ ប្រភពបញ្ជាក់ថា ប្រសិនបើសំណើនេះទទួលបានការឯកភាពនោះ ទាំងសិល្បករ ទាំងផលិតករនឹងត្រូវអញ្ជើញឱ្យមកទទួលយកការណែនាំពីមន្ត្រីក្រសួងដើម្បីបញ្ចប់ការផលិតវីដេអូបែបស្រើបស្រាលដែលនាំឱ្យប៉ះពាល់ធ្ងន់ធ្ងរដល់សេចក្តីថ្លៃថ្នូរ និងវប្បធម៌ប្រពៃណី និងប្រាសចាកពីសីលធម៌នៃការផលិតបែបសិល្បៈ។ ប្រភពដដែលបានលើកឡើងទៀតថា ការព្រមាននេះក៏ជាគំរូដើម្បីអប់រំដល់សិល្បករ និងផលិតករដទៃទៀតផងដែរ ប៉ុន្តែមិនមានការដាក់បម្រាមផ្អាកដល់សកម្មភាពផលិត ឬការសម្តែងរបស់តារាសម្តែងដូចករណីកញ្ញា ដេននី ក្វាន់កន្លងមកនោះទេ»។
យ៉ាងណាមិញ លោកអាចារ្យធំ បានបញ្ជាក់ចម្លើយដែរថា «ក្រសួងនឹងកោះហៅតារាសម្តែង និងអ្នកដឹកនាំសម្ដែងបទ ”ស្រីមុខលុយ” ទៅដុសក្អែលពីរឿងថតបទចម្រៀងស្រើបស្រាល»។ ចំពោះបញ្ហានេះ តើប្រិយមិត្តទាំងអស់យល់ឃើញបែបណាដែរ?៕
June 20, 2018
វិធីថែរក្សាស្បែកនៅពេលយប់ដ៏មានប្រសិទ្ធភាព
ជាការពិតណាស់ការថែរក្សាស្បែករបស់មនុស្សម្នាក់ៗគឺត្រូវធ្វើឡើងអាស្រ័យទៅលើប្រភេទនៃស្បែករបស់អ្នកផ្ទាល់ ប៉ុន្តែទោះជាយ៉ាងណាក្តីអ្នកក៏គួរតែដឹងពីគ្រឹះនៃការថែរក្សាស្បែកជាមុនសិន មុននឹងឈានចូលទៅដល់ការថែរក្សាស្បែកទៅតាមប្រភេទស្បែកដែលអ្នកមាន។ មិនថាពេលថ្ងៃ ឬពេលយប់នោះទេ ការថែរក្សាស្បែកឱ្យបានត្រឹមត្រូវគឺជាទម្លាប់ដ៏ចាំបាច់ ដែលអ្នកត្រូវតែអនុវត្ត ដើម្បីដណ្តើមយកភាពស្រស់ស្អាត ហើយទម្លាប់ប្រចាំថ្ងៃនេះគឺមិនត្រូវការចំណាយពេលច្រើនជាង10នាទីនោះទេ។ ដូច្នេះសូមតាមដានជាមួយនឹងជំហានសំខាន់ៗនៃការថែរក្សាស្បែកទៅតាមដំណាក់កាលធំៗទាំង3 គឺ ការសម្អាត ការលាបឡេ (Toner) និងការផ្តល់សំណើម (Moisturize)។
1. ការលាងសម្អាត : លុបលាងមុខរបស់អ្នកឱ្យបានស្អាតមុនពេលចូលគេង ជាពិសេសប្រសិនបើអ្នកតែងតែតុបតែងមុខជាមួយគ្រឿងសម្អាងផ្សេងៗទៀតនោះ គឺរឹតតែមិនអាចមើលរំលងបញ្ហានេះបានឡើយ។ ធូលី មេរោគ និងកម្ទេច ដែលនៅសេសសល់លើផ្ទៃមុខ គឺជាមូលហេតុចម្បងដែលបណ្តាលឱ្យមុខកើតមុន។
2. Toner : សំដៅទៅលើឡេ ឬទឹកសម្អាតស្បែក ដែលគេច្រើនតែយកមកប្រើលើផ្ទៃមុខ ដើម្បីបង្រួមរន្ធញើសជាដើម។ ការលាប Toner នៅលើផ្ទៃមុខជួយរក្សាតុល្យភាពនៃកម្រិត pH និងការពារស្បែក។ បន្ទាប់ពីសម្អាតផ្ទៃមុខរួច អ្នកត្រូវលាប Toner ទៅលើមុខ ដើម្បីឱ្យវាចូលទៅជួយបង្រួមរន្ធញើស បន្តឹងស្បែកមុខ និងការពារស្បែកមុខពីមេរោគផ្សេងៗ ដែលអ្នកមិនអាចមើលឃើញពេលអ្នកកំពុងគេង។
3. Moisturize : នេះគឺជាការរៀបរាប់អំពីការផ្តល់សំណើមដល់ស្បែក ហើយសំណើមនៅពេលនេះគឺយើងចង់សំដៅលើជាតិទឹក។ ទឹកគឺជាគ្រឿងផ្សំដ៏អាថ៌កំបាំងបំផុតសម្រាប់ឱ្យស្បែកមានសំណើម និងស្រស់ស្រាយ។ នៅពេលដែលស្បែករបស់អ្នកមានសំណើមគ្រប់គ្រាន់នោះ វានឹងមានភាពទន់រលោងជាក់ជាមិនខាន ដូច្នេះអ្នកគួរទទួលទានទឹកឱ្យបានច្រើន។ ក្រៅពីទឹកអ្នកក៏អាចជ្រើសរើសប្រើផលិតផលផ្តល់សំណើម ឬឱសថធម្មជាតិមួយចំនួនដូចជា ប្រទាលកន្ទុយក្រពើជាដើម ដើម្បីផ្តល់នូវសំណើមឱ្យស្បែករបស់អ្នកផងដែរ។
ជាចុងក្រោយ ឡារ៉ែន ចង់ឱ្យអ្នកចងចាំនូវចំណុចមួយទៀតគឺ មុនចូលគេងអ្នកត្រូវធ្វើឱ្យខ្លួនឯងមានអារម្មណ៍រីករាយ ព្រោះថាភាពរីករាយនេះហើយដែលជាវិធីនាំអ្នកទៅកាន់ភាពស្រស់-ស្រាយ គេងលក់បានស្កប់ស្កល់ ជួយថែរក្សាសម្រស់ឱ្យនៅក្មេងជាងវ័យ៕
June 20, 2018