ពីមួយថ្ងៃ ទៅមួយថ្ងៃ ការរស់នៅ និងបរិបទសង្គម បានផ្លាស់ប្តូរយ៉ាងលឿន ដែលជំរុញឱ្យការគិតរបស់មនុស្សចាំបាច់ត្រូវតែមានការផ្លាស់ប្តូរឱ្យស្របទៅនឹងស្ថានភាព និងតម្រូវការរបស់សង្គមជាចាំបាច់។ ក្នុងកាលៈទេសៈនេះ បានរុញច្រានឱ្យនិស្សិតកម្ពុជាមួយចំនួន ជាពិសេសស្ត្រីត្រូវទទួលរងសម្ពាធជុំវិញខ្លួនជាច្រើនលើការសម្រេចចិត្តចំពោះអនាគតរបស់ខ្លួន ដូចជាការជម្នះគំនិតអវិជ្ជមានមួយចំនួនរបស់អាណាព្យាបាលដែលបង្ខំឱ្យរៀនលើជំនាញដដែលៗ ការគិតរបស់សង្គមមិនត្រឹមត្រូវ និងកត្តាសុវត្ថិភាពជាដើម។ ដើម្បីដោះស្រាយបញ្ហាទាំងអស់នេះ ពួកគេចាំបាច់ត្រូវតែមានភាពក្លាហាន ក្នុងការសម្រេចចិត្តប្រកបដោយភាពហ្មត់ចត់ និងខ្លាំងក្លា។
កញ្ញា តោ គឹមស៊ី និស្សិតឆ្នើមរបស់កម្ពុជាដែលទទួលបានអាហារូបករណ៍ទៅសិក្សាផ្នែកគណិតវិទ្យានៅសហរដ្ឋអាមេរិក បានលើកឡើងថា យុវតីកម្ពុជាចាំបាច់ត្រូវតែមានភាពក្លាហានក្នុងការសម្រេចចិត្ត និងគិតប្រកបដោយភាពវិជ្ជមាន ចំពោះការសម្រេចចិត្តលើជោគវាសនារបស់ខ្លួន។ ស្ត្រីត្រូវតែហ៊ានសម្រេចចិត្តស្វែងរកការសិក្សាឱ្យបានទូលំទូលាយ ដែលពេលខ្លះមានកម្មវិធីផ្លាស់ប្តូរការសិក្សានៅក្រៅប្រទេស ឬសម្រេចចិត្តក្នុងការដាក់ពាក្យប្រឡងអាហារូបករណ៍ទៅបរទេសជាដើម។
កញ្ញា តោ គឹមស៊ី បាននិយាយថា៖ “នៅពេលដែលខ្ញុំទៅសិក្សានៅសហរដ្ឋអាមេរិកដំបូងលើមុខវិជ្ជាគណិតវិទ្យា នៅក្នុងថ្នាក់មិនសូវមានមនុស្សស្រីនោះទេ ដែលពេលខ្លះវាអាចធ្វើឱ្យខ្ញុំមានការលំបាកខ្លះដែរ តែប្រសិនបើយើងពិតជាស្រឡាញ់មុខវិជ្ជាដែលយើងកំពុងរៀនមែន វានឹងធ្វើឱ្យយើងអភិវឌ្ឍសមត្ថភាពបានលឿន ហើយអាចទទួលបានពិន្ទុខ្ពស់ជាងគេទៀតផង ទោះបីស្ថិតក្នុងកាលៈទេសៈណាក៏ដោយ ហើយចំពោះការរាប់អានមិត្តភ័ក្តិវិញក៏នឹងលែងជាបញ្ហាចោទដែរ។
និស្សិតឆ្នើមដែលទទួលបានពិន្ទុខ្ពស់ជាងគេនៅសាកលវិទ្យាល័យ Manhattan University ខាងលើបានលើកឡើងផងដែរថា យើងត្រូវតែជឿលើសមត្ថភាពរបស់យើង ហើយបន្តព្យាយាមសិក្សាដោយយកចិត្តទុកដាក់ និងជាមួយទឹកចិត្តស្រឡាញ់របស់យើងចំពោះមុខវិជ្ជាដែលយើងចង់រៀនពិតប្រាកដ។ ចំពោះស្ត្រី ជួនកាលនៅពេលដែលយើងសិក្សាលើជំនាញដែលគេមិនសូវរៀន អាចនឹងមានពាក្យខ្លះៗ មកបង្អាក់យើង តែទោះជាយ៉ាងនេះក្តី ប្រសិនបើយើងនៅតែព្យាយាមអភិវឌ្ឃខ្លួនឯងឱ្យច្បាស់ យើងនឹងអាចទទួលបានលទ្ធផលល្អ ហើយនៅពេលនោះគេនឹងឃើញពីសមត្ថភាពពិតប្រាកដរបស់យើង។
ស្របពេលជាមួយគ្នានេះដែរ កញ្ញា គង់ ដាលីន និស្សិតដែលទទួលបានជយលាភីជាច្រើនលើការផលិតភាពយន្តខ្លី និងថតរូបបានលើកឡើងថា មនុស្សម្នាក់ៗសុទ្ធតែមានក្តីស្រឡាញ់រៀងៗខ្លួន តែពួកគេត្រូវប្រឈមជាមួយនឹងឧបសគ្គជាច្រើននៅលើផ្លូវឆ្ពោះទៅកាន់ភាពថ្កុំថ្កើងសម្រាប់ខ្លួនឯងនោះ។ ជាធម្មតាឪពុកម្តាយទាំងអស់សុទ្ធតែស្រឡាញ់កូន តែការសម្រេចចិត្តរបស់គាត់មិនប្រាកដថាត្រូវជាមួយនឹងក្តីស្រឡាញ់របស់កូនទាំងស្រុងនោះទេ ហេតុនេះគឺ ទាមទារឱ្យយើងខ្លួនឯងត្រូវមានភាពក្លាហានហ៊ានសម្រេចចិត្តដើម្បីសម្រេចក្តីស្រមៃរបស់ខ្លួន។
សម្រាប់កញ្ញា នៅពេលប្រឡងចប់ថ្នាក់ទី12 អាណាព្យាបាលចង់ឱ្យកញ្ញាសិក្សាជំនាញពេទ្យ តែកញ្ញាផ្ទាល់ មើលឃើញខ្លួនឯងថា ជាមនុស្សខ្លាចឈាម និងស្រឡាញ់មុខវិជ្ជាភាសាខ្មែរច្រើនជាងវិទ្យាសាស្ត្រពិត ហេតុនេះប្រសិនបើសិក្សាតាមអាណាព្យាបាលគាត់នឹងរៀនមិនពូកែ ហើយថែមទាំងខាតបង់ពេលវេលាច្រើន។ ស្ថិតក្នុងស្ថានភាពនេះ គាត់ព្យាយាមបន្តិចម្តងៗក្នុងការបង្ហាញពីចំណូលចិត្តពិតប្រាកដរបស់ខ្លួនឱ្យអាណាព្យាបាលឃើញ ហើយជំរុញខ្លួនឯងឱ្យខំកាន់តែខ្លាំងដើម្បីប្រើប្រាស់សមត្ថភាពដែលខ្លួនមានពីកំណើតឱ្យចេញជាលទ្ធផលល្អ។
កញ្ញា គង់ ដាលីន បាននិយាយថា៖ “ដើម្បីដោះស្រាយបញ្ហា ខ្ញុំមិនព្យាយាមជំទាស់ភ្លាមៗនោះទេ តែខ្ញុំត្រូវខំប្រឹងប្រែងប្រើប្រាស់សមត្ថភាពដើម្បីប្រកួត និងចូលធ្វើការងារជាច្រើនពាក់ព័ន្ធនឹងការផលិតវីដេអូ និងកម្មវិធីព័ត៌មានមួយចំនួនរហូតទទួលបានលទ្ធផលល្អ។ បន្តិចម្តងៗ ខ្ញុំព្យាយាមពន្យល់ពីចំណុចខ្លាំងរបស់ខ្ញុំឱ្យប៉ាម៉ាក់ឃើញ រហូតគាត់យល់ថាខ្ញុំសមនឹងមុខវិជ្ជាដែលខ្ញុំស្រឡាញ់ និងអនុញ្ញាតឱ្យខ្ញុំសិក្សាលើជំនាញនោះ។
កញ្ញា ដាលីន បានលើកឡើងផងដែរថា យុវជនត្រូវហ៊ានសម្រេចចិត្ត និងខិតខំប្រឹងប្រែងដើម្បីស្វែងរកអ្វីដែលខ្លួនស្រឡាញ់ពិតប្រាកដដើម្បីអភិវឌ្ឍខ្លួនឱ្យខ្លាំង ហើយសិក្សា ឬធ្វើការងារប្រកបដោយថាមពលវិជ្ជមាន។ នៅពេលដែលយើងរកឃើញអ្វីដែលយើងស្រឡាញ់ពិតប្រាកដហើយ យើងនឹងអាចធ្វើវាដោយរីករាយ ហើយពេលនោះយើងនឹងអាចស្វែងរកឃើញនូវចំណូលចិត្តជាច្រើនផ្សេងទៀតដែលមាននៅក្នុងខ្លួន ដែលផ្តល់ឱកាសឱ្យយើងអាចធ្វើរឿងរ៉ាវដែលមានប្រយោជន៍ជាច្រើនសម្រាប់សម្រេចក្តីស្រមៃផ្ទាល់ខ្លួន។
ចាប់ផ្តើមពីរកឱ្យឃើញនូវអ្វីដែលយើងស្រឡាញ់ឱ្យប្រាកដហើយ វានឹងក្លាយជាមូលដ្ឋានក្នុងការបណ្តុះសេចក្តីក្លាហាន ក្នុងការធ្វើការងារនោះដោយមិនរារែក ដែលធ្វើឱ្យការរស់នៅក៏មានសេចក្តីសុខក្នុងចិត្ត ហើយការងារ ឬការសិក្សាក៏ទទួលបានលទ្ធផលល្អជាងគេផងដែរ៕
