រដ្ឋាភិបាលកម្ពុជាបានចាប់ផ្តើមកំណត់តម្លៃ និងហេដ្ឋារចនាសម្ព័ន្ធសមស្របមួយសម្រាប់គម្រោងលំនៅឋានផ្តោតលើប្រជាជនមានជីវភាពមធ្យមដែលគម្រោងអភិវឌ្ឍន៍លំនៅឋានតម្លៃសមរម្យនេះនឹងត្រូវអនុញ្ញាតឱ្យសាងសង់លំនៅឋានយ៉ាងតិច 100ឯកតាឡើង និងត្រូវមានទីតាំងចម្ងាយ20គីឡូម៉ែត្រពីរាជធានី-ក្រុង ហើយនឹងត្រូវដាក់លក់ក្នុងតម្លៃចន្លោះពី15,000ដុល្លារ ទៅដល់30,000ដុល្លារអាមេរិក។ នេះបើតាមការឱ្យដឹងពីមន្ត្រីនៃក្រសួងសេដ្ឋកិច្ច និងហិរញ្ញវត្ថុ។
ក្រុមហ៊ុននោះត្រូវតែជានីតិបុគ្គលដែលបានចុះបញ្ជីនៅកម្ពុជាត្រូវមានទីធ្លា និងបរិស្ថានល្អត្រឹមត្រូវ មានទីផ្សារ ឬមជ្ឈមណ្ឌលផ្សេងៗ។ អ្នកអភិវឌ្ឍន៍ត្រូវតែសហការជាមួយគ្រឹះស្ថានហិរញ្ញវត្ថុដើម្បីបង្កើតគម្រោងឥណទានជាមួយនឹងអត្រាការប្រាក់ទាបដើម្បីលើកកម្ពស់លទ្ធភាពចំណាយរបស់គម្រោង។
ក្រោមគោលនយោបាយថ្មីការលើកទឹកចិត្តដល់ …តទៅទំព័រអ្នកអភិវឌ្ឍន៍គម្រោងលំនៅឋានដែលមានតម្លៃសមរម្យ រួមមានការកាត់បន្ថយពន្ធ និងការសម្រួលដល់នីតិវិធីការិយាធិបតេយ្យ ដូចជាការទទួលបានការអនុញ្ញាតសាងសង់ អាជ្ញាប័ណ្ណអាជីវកម្ម និងឯកសារចាំបាច់ផ្សេងទៀត។ រដ្ឋាភិបាលក៏នឹងផ្តល់អត្រាពិសេសសម្រាប់ការបង់ពន្ធលើប្រាក់ចំណូលពន្ធអចលនទ្រព្យ និងអាករលើទំនិញផ្សេងៗទៀត។
លោក រស់ សីលវ៉ា អនុលេខាធិការក្រសួងសេដ្ឋកិច្ច និងហិរញ្ញវត្ថុបានថ្លែងក្នុងសិក្ខាសាលាផ្សព្វផ្សាយស្តីពីការដាក់សំណើគម្រោងអភិវឌ្ឍន៍លំនៅឋានតម្លៃសមរម្យថា ខណៈអ្នកអភិវឌ្ឍន៍ជាច្រើនកំពុងបង្កើតអគារផ្ទះល្វែងខ្ពស់ៗ តែមានមនុស្សតិចតួចប៉ុណ្ណោះកំពុងផ្តោតលើគម្រោងសម្រាប់ផ្នែកក្រីក្រនៅក្នុងសង្គម។ លោកបាននិយាយថាគោលនយោបាយថ្មីមានគោលបំណងជំរុញការវិនិយោគលើលំនៅឋានដែលមានតម្លៃសមរម្យ និងរួមចំណែកដល់ការបង្កើតគម្រោងលំនៅឋានសម្រាប់ផ្នែកមិនសូវមានទ្រព្យសម្បត្តិសង្គម បង្កើនគុណភាពនៃការសាងសង់បង្កើនអត្រាម្ចាស់ផ្ទះ និងលើកកម្ពស់លទ្ធភាពប្រើប្រាស់របស់ប្រជាពលរដ្ឋ។
លោក សំ វង្សី ប្រធានអង្គភាពភាពជាដៃគូរវាងរដ្ឋ និងឯកជនថ្នាក់កណ្តាលនៃក្រសួងសេដ្ឋកិច្ចនិងហិរញ្ញវត្ថុបានមានប្រសាសន៍ឱ្យដឹងថា “ការដាក់ចេញនូវគោលនយោបាយនេះ គឺសំដៅរួមចំណែកទ្រទ្រង់ដល់សកម្មភាពនៃវិស័យសំណង់ និងអចលនទ្រព្យដែលជាចន្ទល់កំណើនសេដ្ឋកិច្ចព្រមទាំងក្លាយជាផ្នែកមួយនៃប្រព័ន្ធសន្ដិសុខសង្គម និងជាឧបករណ៍គោលនយោបាយសម្រាប់គាំទ្រការអនុវត្ដយុទ្ធសាស្ដ្រអភិវឌ្ឍន៍ប្រទេសរយៈពេលវែង”។
សម្រាប់ការអភិវឌ្ឍលំនៅឋានតម្លៃសមរម្យនេះ កម្មវិធីអភិវឌ្ឍន៍អង្គការសហប្រជាជាតិ (UNDP) កំពុងគាំទ្រគម្រោងលំនៅឋានរបស់តំបន់សេដ្ឋកិច្ចពិសេសភ្នំពេញ (PPSEZ) ដែលនឹងសាងសង់លំនៅឋានតម្លៃសមរម្យរាប់ពាន់ខ្នងសម្រាប់កម្មករដែលមានប្រាក់ចំណូលទាប។
ស្របទៅនឹងការដាក់ចេញនូវកម្មវិធីជាតិនេះគេឃើញមានគម្រោងដែលគាំទ្រដោយ UNDP ស្ថិតលើដំណាក់កាលរចនាស្ថាបត្យកម្មនឹងមានការសាងសង់លំនៅឋានចំនួន 3,136ខ្នងនៅលើដីទំហំ7ហិកតានៅក្នុងតំបន់សេដ្ឋកិច្ចពិសេសភ្នំពេញ។ មានទីតាំងស្ថិតនៅជាយក្រុងភ្នំពេញតាមបណ្តោយផ្លូវជាតិលេខ4 មានផ្ទៃដី 357ហិកតា។ មានរោងចក្រជាង 80ទីតាំង នៅក្នុងនោះមានកម្មករ 17,000នាក់ ភាគច្រើននៃពួកគេជាកម្មកររោងចក្រ។ ការរចនាប្លង់ស្ថាបត្យកម្មនេះនឹងត្រូវបញ្ចប់នៅខែសីហាខាងមុខ ហើយបើគ្មានការប្រែប្រួលអ្វីទេនោះ ការបើកការដ្ឋានសាងសង់របស់ខ្លួននឹងធ្វើឡើងនៅក្នុងខែវិច្ឆិកា ចុងឆ្នាំ2018។
ការគាំទ្ររបស់យូអិនឌីភីចំពោះគម្រោងលំនៅឋាន គឺជាផ្នែកមួយនៃកិច្ចខិតខំប្រឹងប្រែងធំជាងមុនដើម្បីជួយដល់តំបន់សេដ្ឋកិច្ចពិសេសទាំងអស់នៅក្នុងប្រទេសដែលមាននិរន្តរភាពក្នុងរយៈពេលវែង។ បច្ចុប្បន្ននេះមានតំបន់សេដ្ឋកិច្ចពិសេសចំនួន 33កន្លែងនៅទូទាំងប្រទេសកម្ពុជា។ វិស័យអភិវឌ្ឍន៍ទាំងនេះមានសារៈសំខាន់ចំពោះការកើនឡើងនៃសេដ្ឋកិច្ចកម្ពុជា។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថានិន្នាការនៃវិស័យអចលនទ្រព្យ និងសំណង់នៅកម្ពុជាបានបង្ហាញថា ចំនួនប្រជាជនរបស់កម្ពុជាត្រូវបានគេរំពឹងថានឹងកើនឡើងពី15 ទៅ19លាននាក់។ នៅចន្លោះពេលនេះរហូតដល់ឆ្នាំ2030 នឹងមានចំនួនប្រជាជនកើនឡើងពី4 ទៅ7លាននាក់ដែលនឹងធ្វើឱ្យមានតម្រូវការលំនៅឋានថ្មីប្រមាណជា800.000ខ្នងបន្ថែមលើចំនួនលំនៅឋានបច្ចុប្បន្ន។ កាលពីឆ្នាំ2017 វិស័យអចលនទ្រព្យមានការកើនឡើងជាមួយនឹងការអនុម័តចំនួន 3.418គម្រោងហើយវិស័យសំណង់បានកើនឡើង22% ពីមួយឆ្នាំទៅមួយឆ្នាំ (មានទឹកប្រាក់រហូតដល់ទៅ 6.8ពាន់លានដុល្លារ)ក្នុងនោះ 82%ជាគម្រោងលំនៅឋាន។ តាមរយៈការធ្វើសន្ទស្សន៍នៅចន្លោះឆ្នាំ2015 និង2030 កម្ពុជានឹងត្រូវការសាងសង់ផ្ទះថ្មីប្រហែល 50.000ខ្នងក្នុងមួយឆ្នាំដើម្បីឆ្លើយតបនឹងតម្រូវការលំនៅឋានដែលជាលទ្ធផលនៃការធ្វើនគរូបនីយកម្មយ៉ាងឆាប់រហ័សរបស់ប្រទេស។
“វាជាគំនិតផ្តួចផ្តើមដោយផ្ទាល់របស់រដ្ឋាភិបាលកម្ពុជា ដែលគោលនយោបាយនេះគឺមានគោលដៅសង្គមផង និងសេដ្ឋកិច្ចផង សំដៅធ្វើឱ្យប្រជាជនទូទាំងប្រទេសមានលំនៅឋានសមរម្យអាចរស់នៅបានប្រកបដោយសុខុមាលភាព សុវត្ថិភាព និងសេចក្តីថ្លៃថ្នូរ”។ នេះបើតាមប្រសាសន៍របស់ឯកឧត្តម វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។
លោកបន្តថា មិនតែប៉ុណ្ណោះគោលនយោបាយនេះក៏នឹងផ្តល់ឱកាសដល់យុវជនដែលទើបរៀបការហើយថ្មោងថ្មី រួមទាំងពលករចំណាកស្រុកមកស្វែងរកការងារនៅតាមទីក្រុង និងអ្នកចង់មករស់នៅក្នុងទីក្រុង តែមិនទាន់មានផ្ទះ ឬចង់បានផ្ទះលើកទី1អាចមានលទ្ធភាពទទួលបាននូវការផ្គត់ផ្គង់លំនៅឋានដែលមានតម្លៃសមរម្យ រួមទាំងលទ្ធភាពក្នុងការទទួលបានកម្ចីដែលមានការប្រាក់សមរម្យសម្រាប់ទិញលំនៅឋានទៀតផង។
គួរជម្រាបផងដែរថា បច្ចុប្បន្នមានគម្រោងអភិវឌ្ឍន៍លំនៅឋានតម្លៃសមរម្យ 3ទីតាំងដែលមានតម្លៃចាប់ពីជាង 2ម៉ឺនដុល្លារអាមេរិកឡើងបានគាំទ្រនិងជ្រោមជ្រែងដោយក្រសួងរៀបចំដែនដី នគរូបនីយកម្ម និងសំណង់។ គម្រោងទាំងនោះមានដូចជា គម្រោងអភិវឌ្ឍន៍ដោយក្រុមហ៊ុន WorldBridge Land ស្ថិតនៅភូមិទួលក្រសាំង ឃុំរកាខ្ពស់ ស្រុកស្អាង ខេត្តកណ្តាល មានចម្ងាយ 8គីឡូម៉ែត្រពីក្រុងតាខ្មៅ គម្រោងអភិវឌ្ឍន៍ដោយក្រុមហ៊ុន B & BM Development ស្ថិតតាមផ្លូវជាតិលេខ5 មានចម្ងាយប្រមាណជា 22គីឡូម៉ែត្រពីក្រុងភ្នំពេញ និងគម្រោងទី3 ជាប្រភេទលំនៅឋានបែបខុនដូស្ថិតក្នុងសង្កាត់ទឹកថ្លា អភិវឌ្ឍដោយក្រុមហ៊ុនជប៉ុនអារ៉ាខាវ៉ា(Arakawa)។
លោក ច្រឹក សុខនីម អគ្គនាយកក្រុមហ៊ុន century21 mekong បានប្រាប់ឡារ៉ែនតាមទូរស័ព្ទថា គម្រោងអភិវឌ្ឍន៍លំនៅឋានតម្លៃសមរម្យដែលជាគោលការណ៍របស់រដ្ឋាភិបាលនោះ វាមិនមានផលប៉ះពាល់អ្វីដល់វិស័យអចលនទ្រព្យនោះទេផ្ទុយទៅវិញវាជាការជួយសម្រាលបន្ទុកដល់ប្រជា-ពលរដ្ឋក្រីក្រមួយចំនួនដែលមានជីវភាពលំបាក ឱ្យគាត់អាចមានលទ្ធភាពទិញនៅបាន។ លោកបានបន្តថាជាធម្មតាគម្រោងអស់ហ្នឹងមានរួចទៅហើយតែមិនសូវមានការគាំទ្រ តែឥឡូវទើបមានការគាំទ្រជាផ្លូវការពីរដ្ឋាភិបាលដែលគម្រោងនេះនឹងជួយដល់ប្រជាជនយើង ខ្ញុំយល់ថា វាជាសញ្ញាវិជ្ជមានមួយសម្រាប់ប្រជាជនផ្ទាល់ និងមន្ត្រីរាជការដែលគាត់អាចមានលទ្ធភាពទិញអចលនទ្រព្យដើម្បីរស់នៅបាន៕
