Category: សង្គម និងសេដ្ឋកិច្ច

តាមរបាយការណ៍ក្រសួងឧស្សាហកម្ម និងសិប្បកម្ម បានឱ្យដឹងថា បច្ចុប្បន្នប្រជាពលរដ្ឋដែលទទួលបានសេវាផ្គត់ផ្គង់ទឹកស្អាតមានចំនួន 6,747គ្រួសារ ស្មើនឹង53% ហើយក្រសួងរំពឹងថានឹងឡើងដល់ 92% នៅឆ្នាំ2022 និងនៅឆ្នាំ2030 ប្រជាពលរដ្ឋនឹងទទួលបានសេវាផ្គត់ផ្គង់ទឹកស្អាត 100%តែម្ដង។ 

ឯកឧត្តម កិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មបានឱ្យដឹងនៅក្នុងពិធីចុះពិនិត្យទីតាំងស្ថានីយសាងសង់រោងចក្រផលិតទឹកស្អាតនៅស្ថានីយទឹកឈូថា ដោយសារតម្រូវការទឹកមានការកើនឡើងឥតឈប់ឈរ ក្រសួង អង្គភាពរដ្ឋាករទឹក និងមន្ទីរឧស្សាហកម្ម និងសិប្បកម្ម បានខិតខំទំនាក់ទំនង និងធ្វើកិច្ចសហប្រតិបត្តិការជាមួយអង្គការ JICA ដើម្បីស្នើសុំជំនួយឥតសំណងពីរាជរដ្ឋាភិបាលជប៉ុនក្នុងការពង្រីកប្រព័ន្ធផ្គត់ផ្គង់ទឹកស្អាតបន្ថែមទៀត។

ជាលទ្ធផលអង្គភាពរដ្ឋាករទឹកខេត្តកំពតកំពុងអនុវត្តប្រព័ន្ធផ្គត់ផ្គង់ទឹកស្អាតដែលជាជំនួយហិរញ្ញប្បទានឥតសំណងរបស់រាជរដ្ឋាភិបាលជប៉ុន ដោយអនុវត្តការកសាងបានចំនួន98% ហើយ។ ក្នុងនោះមានការសាងសង់ស្ថានីយបូមទឹកឆៅនៅទឹកឈូ មានសមត្ថភាពផលិតបាន 8,250ម៉ែត្រគុបក្នុងមួយថ្ងៃ បំពង់នាំទឹកឆៅពីស្ថានីយទឹកឈូទៅរោងចក្រផលិតទឹកស្អាតមានប្រវែង 5.3គីឡូម៉ែត្រ សាងសង់រោងចក្រផលិតទឹកស្អាតមួយកន្លែងនៅភូមិអូរតូច សង្កាត់អណ្តូងខ្មែរដែលមានសមត្ថភាពផ្គត់ផ្គង់បាន 7,500ម៉ែត្រគុប ក្នុងមួយថ្ងៃ ព្រមទាំងពង្រីកបណ្តាញចែកចាយបានប្រវែង 89.9គ.មដែលអាចផ្គត់ផ្គង់ក្នុងក្រុងកំពតទាំងមូលបាន និងមួយផ្នែកនៃស្រុកទឹកឈូ ដែលមាន 6ឃុំទៀតផង។

ក្នុងការចូលរួមចំណែកលើកកម្ពស់សុខភាពពលរដ្ឋ ក្រសួងបានខិតខំសហការជាមួយដៃគូឯកជន និងភាគីផ្តល់ជំនួយនានាដើម្បីពង្រីកបណ្តាញសេវាទឹកស្អាតនេះ ឱ្យបានដល់ប្រជាពលរដ្ឋនៅតាមតំបន់ដាច់ស្រយាល ឱ្យបាន100%ទូទាំងប្រទេសនៅត្រឹមឆ្នាំ2030៕

ការតែងសេចក្តីអាចជាចំណូលចិត្តសំខាន់មួយសម្រាប់​​សិស្សដែលពូកែ និងចូលចិត្ត​មុខវិជ្ជាភាសា ឬ​វិទ្យាសាស្រ្តសង្គម តែវាអាចជារឿងលំបាក​សម្រាប់អ្នក​មួយចំនួនដែលចូលចិត្តមុខវិជ្ជាវិទ្យាសាស្រ្តពិត ខណៈ​មានអ្នកសិក្សាខ្លះ​ពូកែទាំងមុខវិជ្ជាវិទ្យាសាស្រ្តពិត ហើយពូកែទាំងសរសេរ។

សម្រាប់ការប្រឡងមធ្យមសិក្សាទុតិយភូមិជារៀងរាល់ឆ្នាំ តែងសេចក្តីត្រូវបានគេដាក់បញ្ចូលទៅក្នុងមុខវិជ្ជាភាសាខ្មែរសម្រាប់​គ្រប់​បេក្ខជនប្រឡងទាំងអស់មិនថា អ្នកប្រឡងវិទ្យាសាស្រ្តសង្គម ឬផ្នែកវិទ្យាសាស្រ្តពិតនោះទេ ខុសគ្នាតែលើ​កម្រិតពិន្ទុតែប៉ុណ្ណោះ។ ហេតុនេះ​មានសិស្សមួយចំនួន​ហាក់មានការព្រួយបារម្ភ ខណៈ​អ្នកខ្លះទៀត​បន់ស្រន់ឱ្យ​ប្រធានតែងសេចក្តីដូចអ្វីដែលខ្លួនបានទន្ទេញ ឬបានអានទៅវិញ។

មានសិស្សជាច្រើន​សប្បាយចិត្តនៅពេលដែល​ប្រធានតែងសេចក្តី​ចេញមកដូចអ្វីដែលគេធ្លាប់អានបេះបិទ តែតាមពិតរឿងនេះមិនប្រាកដថាល្អនោះទេប្រសិន​បើគេព្យាយាម​សរសេរតាមការចងចាំពីអត្ថបទដែលគេសរសេរស្រាប់ៗ ឬមិនមានគំនិតបង្កើតថ្មីល្អៗនោះ។ លើសពីនេះទៅទៀត វាជំរុញឱ្យ​គាត់​ក្លាយជាមនុស្សដែលមានការភ័យខ្លាច ហើយបាត់បង់ជំនឿជាក់លើខ្លួនឯង ដោយសារតែ​គាត់​ផ្តោតខ្លាំងពេកលើអត្ថបទដែលគេធ្លាប់សរសេរ ហើយមិន​ព្រមពឹងលើសមត្ថភាពរបស់ខ្លួនឯងផ្ទាល់។

ខាងក្រោមនេះជាវិធីមួយចំនួន​សម្រាប់​ជំនួយដល់ការសរសេរតែងសេចក្តី ដែលវាអាចជាគំនិតខ្លះៗសម្រាប់ពិចារណា។ បើទោះបីជាវាមិនមែនជាវិធានដែលធានាថាអនុវត្តហើយអាច​សរសេរបានល្អទាំងស្រុងក៏ដោយ តែវាអាច​ជាផ្នែកមួយសម្រាប់អនុវត្តដោយប្រើប្រាស់សមត្ថភាពខ្លួនឯងផ្ទាល់ ហើយមិនចាំបាច់លួចចម្លង ឬ​ធ្វើអ្វីឱ្យខុសពី​ច្បាប់ប្រឡង។

1.សង្ខេបអក្សរសិល្ប៍ និងអត្ថបទសំខាន់ៗទាំងអស់ក្នុង​កម្មវិធីអប់រំ

ការសង្ខេប​រឿងអក្សរសិល្ប៍​ទាំងអស់​ដោយចាប់ផ្តើមពីការរាប់ចំណងជើងរឿងធំៗដូចជា រាមកេរ្តិ៍​ ព្រះអាទិត្យថ្មីរះលើផែនដីចាស់ ទុំទាវ គូលីកំណែន និងរឿងជាច្រើនផ្សេងទៀត រហូតដល់រឿងតូចៗមួយចំនួន​ទៀតដែលភាគច្រើនជារឿងព្រេងនិទានខ្មែរ ជា​ចំណុចសំខាន់មួយក្នុងការ​ទាញយកតម្លៃអប់រំនៃសាច់រឿង។

ការតែងសេចក្តី​ពេលខ្លះគេកំណត់ប្រធាន​បទដោយដកស្រង់​យក​តម្លៃអប់រំនៃសាច់រឿងនីមួយៗ មកដាក់ឱ្យបកស្រាយ ឬពិភាក្សា ហេតុនេះ​កត្តាប្រឈមដែលអ្នកសរសេរភាគច្រើនជួប គឺមិនដឹងច្បាស់ពីសាច់រឿងនោះ។ ហេតុនេះ​ដើម្បី​​បង្កើនភាពកក់ក្តៅសម្រាប់​ការត្រៀមតែងសេចក្តី យើងមិនចាំបាច់​ត្រូវ​អានរឿងរាប់រយទំព័រឡើងវិញនោះទេ តែយើងអាចធ្វើការសង្ខេប​តម្លៃអប់រំ ឬស្វែងរកឯកសារដែលមានការសង្ខេបខ្លីៗស្រាប់មកអានឱ្យយល់សម្រាប់ជាគំនិតក្នុងការសរសេរជាការស្រេច។

ក្រៅពីនេះ ការសង្ខេបរឿងអក្សរសិល្ប៍ទៅជា​ផ្នែកខ្លីៗនេះធ្វើឱ្យយើងងាយចាំ​ ចំណាយពេលវេលាតិច តែអាចទទួលគំនិតសម្រាប់​លើកជាឧទាហរណ៍ក្នុងសេចក្តីពន្យល់​បាន ព្រោះការតែងសេចក្តីត្រូវការ​លើកឧទាហរណ៍ជាក់ស្តែងពីក្នុង​អក្សរសិល្ប៍ ប្រវត្តិសាស្រ្ត និងសង្គមជាក់ស្តែង។

2.គូស​គំនូសព្រៀងពីលំហូរនៃគំនិត (Mind maps)

រាល់ការសរសេរតែងសេចក្តី ចាំបាច់ត្រូវតែចេះលេងពាក្យឱ្យពីរោះស្តាប់ មានលំដាប់លំដោយ ហើយគោរពទៅតាម​ទម្រង់​នៃការសរសេរ ហេតុនេះមានពេលខ្លះ​អ្នកសរសេរ​អាច​ភ្លេចចំណុចសំខាន់ៗ​ខ្លះ​នៅពេលដែលដាក់ប៊ិចដល់ក្រដាសប្រឡង។

ដើម្បីធានាថា​លំហូរនៃគំនិតរបស់យើងអាចធ្វើបានល្អ ហើយត្រូវទម្រង់​នៃការតែងសេចក្តីទៀតនោះ អ្នកសរសេរគួរ​រៀបចំ​បែងចែកគំនិតព្រាងប្រមាណ 5នាទី ឬ10នាទី មុនពេល​សរសេរ។

ដំណាក់កាលនេះ អ្នកសរសេរ​ត្រូវអានប្រធានឱ្យ​បានច្រើនដងច្រើនសា ដើម្បីធានាថាការបកស្រាយមិនខុសអត្ថន័យសំខាន់។ បន្ទាប់ពីយល់អត្ថន័យហើយ​គាត់អាច​កំណត់ជាផ្នែកថា អ្វីខ្លះដែលត្រូវយកមកសរសេរនៅផ្តើមសេចក្តី ហើយ​អ្វីខ្លះដែលត្រូវយកមកបកស្រាយ​ក្នុងតួសេចក្តី។ លើសពីនេះទៅទៀត ចំណុចដែល​ត្រូវយកចិត្តទុកដាក់ គឺអំណះអំណាង​គាំទ្រ ឬឧទាហរណ៍​ដែលត្រូវបញ្ចូល​ក្នុង​ការពន្យល់​ថា តើ​ត្រូវដាក់ចំណុចណាមុន បន្ទាប់មក​គួរបញ្ចូលរឿងអ្វីខ្លះបន្ថែមទៀត មុននឹងទាញចូលបទពិសោធប្រវតិ្តសាស្រ្ត និងស្ថានភាពជាក់ស្តែងនៃការរស់នៅ រហូតឈានដល់ការបង្កើតជាអត្ថបទដែលគ្រប់ជ្រុងជ្រោយ៕

ក្រសួងពាណិជ្ជកម្មកម្ពុជាកំពុងស្វែងរកជំនួយរបស់ជប៉ុនដើម្បីកែលម្អផលិតផលដែលផលិតដោយសហគ្រាសខ្នាតតូច និងមធ្យមនៅក្នុងព្រះរាជាណាចក្រកម្ពុជា និងបានស្នើសុំឱ្យពួកគេពង្រឹងកិច្ចសហប្រតិបត្តិការជាមួយកម្ពុជា ដើម្បីបង្កើនគុណភាពផលិតផលក្នុងស្រុកឱ្យមានគុណភាពស្តង់ដារបស់ជប៉ុន ដែលអាចយកទៅប្រើប្រាស់ក្នុងតម្រូវការក្នុងស្រុក ឬត្រូវបាននាំចេញទៅប្រទេសជប៉ុន។ នេះបើតាមការឱ្យដឹងក្រោយពីជំនួបមួយរបស់លោករដ្ឋមន្ត្រីក្រសួងពាណិជ្ជកម្មកម្ពុជាជាមួយលោក Miyao Masahiroប្រធានអង្គការពាណិជ្ជកម្មក្រៅប្រទេសជប៉ុន(Jetro) )Japan External Trade Organization។

លោក ប៉ាន សូរស័ក្តិ បានមានប្រសាសន៍ថា ៖«ប្រទេសកម្ពុជាត្រូវការវិនិយោគិនជប៉ុនដើម្បីសហការជាមួយសហគ្រាសធុនតូច និងមធ្យមក្នុងស្រុកក្នុងការអភិវឌ្ឍខ្សែចង្វាក់តម្លៃផលិតផលមួយចំនួនឱ្យមានគុណភាពខ្ពស់ និងស្តង់ដារបែបជប៉ុនសំដៅឆ្លើយតបតម្រូវការទីផ្សារក្នុងស្រុកដែលអាចត្រូវបានដាក់លក់នៅផ្សារទំនើបអ៊ីអន និងនាំចេញទៅកាន់ទីផ្សារជប៉ុន»។

ជាការឆ្លើយតបទៅនឹងសំណើរបស់លោករដ្ឋមន្ត្រី លោកMasahiro បានសន្យាថានឹងលើកកម្ពស់ឱកាសអាជីវកម្មនៅក្នុងប្រទេសកម្ពុជានៅក្នុងប្រទេសកំណើតរបស់ខ្លួន និងជំរុញឱ្យក្រុមហ៊ុនជប៉ុនវិនិយោគក្នុងវិស័យSMEកម្ពុជា។ លោកក៏បានសន្យាខិតខំផ្សព្វផ្សាយអំពីឱកាស និងសក្តានុពលវិនិយោគរបស់ប្រទេសកម្ពុជាដល់សហគមន៍ធុរកិច្ចនៅក្នុងប្រទេសជប៉ុនដើម្បីកៀងគរវិនិយោគិនជប៉ុនឱ្យចូលមកបណ្តាក់ទុនកាន់តែច្រើនលើវិស័យSME និងវិស័យអាទិភាពផ្សេងៗរបស់កម្ពុជាសំដៅរួមចំណែកជាមួយរាជរដ្ឋាភិបាលកម្ពុជាក្នុងការកាត់បន្ថយភាពក្រីក្រ និងជំរុញកំណើនសេដ្ឋកិច្ចជាតិ។

ការនាំចេញរបស់កម្ពុជាទៅកាន់ប្រទេសជប៉ុនបានកើនឡើងក្នុងអំឡុងពេល3ខែដំបូងនៃឆ្នាំ2018 ដោយឈានដល់ 390លានដុល្លារកើនឡើង15ភាគរយ បើប្រៀបធៀបទៅនឹងឆ្នាំមុន។ យោងតាមតួលេខពីក្រុមហ៊ុន Jetro ការនាំចូលពីជប៉ុនបានធ្លាក់ចុះ1,7%មកនៅត្រឹម87,3លានដុល្លារដោយបង្កើនឱនភាពពាណិជ្ជកម្មជាមួយប្រទេសជប៉ុន។

លោក សៀង ថៃ អ្នកនាំពាក្យក្រសួងពាណិជ្ជកម្មបានប្រាប់កាសែតឡារ៉ែនតាមទូរស័ព្ទថា ក្នុងគោលបំណងជាសំខាន់នៃជំនួបជាមួយភាគីជប៉ុន(Jetro)នោះ គឺកម្ពុជាចង់ឱ្យលោកMasahiroជាតំណាងថ្មីបន្តការងារក្នុងស្ថានភាពសហការគ្នាក្នុងសភាពដដែល ដោយក្រសួងបានសន្យា ពង្រឹងកិច្ចសហប្រតិបត្តិការ ដោយបន្តផ្តល់ការគាំទ្រគ្រប់បែបយ៉ាងជូនវិនិយោគិនជប៉ុនដែលមានបំណងបណ្តាក់ទុនធ្វើពាណិជ្ជកម្ម និងនៅតែបន្តជួយសម្រួលវិនិយោគិនជប៉ុនក្នុងការចុះបញ្ជីក្រុមហ៊ុន និងការពង្រីកធុរកិច្ច និងវិនិយោគរវាងកម្ពុជាជប៉ុន នៅក្នុងប្រទេសកម្ពុជា។

លោកបានបន្តថា៖«ជាពិសេសក្នុងការដែលឱ្យជប៉ុនជួយក្នុងវិស័យSMEគឺជំរុញក្នុងការលើកកម្ពស់ស្តង់ដារផលិតកម្មតាមមធ្យោបាយណាក៏ដោយ ដែលមានគុណភាពខ្ពស់ និងស្តង់ដារបែបជប៉ុនសំដៅឆ្លើយតបតម្រូវការទីផ្សារក្នុងស្រុកផង និងអាចនាំចេញទៅកាន់ទីផ្សារក្រៅស្រុកផងដែរ​»។ ការនាំចេញទៅកាន់ទីផ្សារក្រៅស្រុកបានច្រើនជាការទទួលខុសត្រូវរបស់ក្រសួងពាណិជ្ជកម្ម ព្រោះការដែលនាំចេញផលិតផលបានកាន់តែច្រើន ជាចរន្តនៃលំហូរទំនិញនៃភាគីទាំងពីរនាំមកនូវកំណើនសេដ្ឋកិច្ចសម្រាប់ប្រទេស។

យោងតាមក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ជាមួយនឹងគម្រោងដែលបានចុះបញ្ជីជាង130គម្រោងដែលបានវិនិយោគនៅក្នុងវិស័យធនាគារវិស័យអចលនទ្រព្យវិស័យឧស្សាហកម្មសេវាកម្មនិងហេដ្ឋារចនាសម្ព័ន្ធក្នុងវិស័យជាច្រើនមុខផ្សេងទៀត។ ការវិនិយោគរបស់ជប៉ុននៅក្នុងព្រះរាជាណាចក្រកម្ពុជាមានតម្លៃ1,6 ប៊ីលានដុល្លារនៅក្នុងឆ្នាំ2017៕

ក្លាយជា​អ្នកជំនាញម្នាក់នៅក្នុងស្ថាប័ន​អន្តរជាតិសំខាន់ៗ​ជា​ក្តីស្រមៃធំមួយរបស់​យុវជន​កម្ពុជា​មួយចំនួន​ដែលកំពុងសិក្សា ឬធ្វើការងារ​លើវិស័យ​សង្គម​នៅកម្ពុជា។

នាពេលនេះឱកាសល្អបានមកដល់ហើយសម្រាប់អ្នកចង់បម្រើការងារជា​មន្ត្រីជំនាញវ័យក្មេង​បម្រើការងារនៅ​លេខាធិការដ្ឋាន​អង្គការសហប្រជាជាតិតាមរយៈកម្មវិធី (Young Professionals Programme-YPP)។ ក្នុងនោះយុវជនកម្ពុជា​ក៏អាចមានសិទ្ធិក្នុងការចូលរួមប្រកួតប្រជែងជាមួយនឹងបណ្តាប្រទេសនានានៅលើពិភពលោកផងដែរ។

ជាលក្ខខណ្ឌ​សម្រាប់បេក្ខជនប្រឡងគឺចាំបាច់ជាបេក្ខជន​នៃប្រទេសដែលជាសមាជិកនៃអង្គការសហប្រជាជាតិ មានសញ្ញាបត្រ​បរិញ្ញាបត្រ ឬសញ្ញាបត្រ​មានតម្លៃស្មើដែលទាក់ទងនឹងការងារស្នើសុំ។ បេក្ខជនចាំបាច់ត្រូវមានអាយុតិចជាង 32ឆ្នាំ ឬជាអ្នកកើតនៅក្រោយថ្ងៃទី1 ខែមេសា ឆ្នាំ1986 និងមានសមត្ថភាពក្នុងការប្រើប្រាស់ភាសាអង់គ្លេស និងបារាំងច្បាស់លាស់។

បេក្ខជន​ចាំបាច់ដាក់ពាក្យ​តាម​ Online ក្នុងគេហទំព័រ https://careers.un.org/yppចាប់ពីខែឧសភា ដល់​ចុងខែកក្កដា ឆ្នាំ2018៕

ធនាគារអភិវឌ្ឍន៍អាស៊ី(ADB) Asian Development Bankបានអនុម័តប្រាក់កម្ចីចំនួន 90លានដុល្លារកាលពីថ្ងៃពុធ ដើម្បីជួយដល់ប្រទេសកម្ពុជា​ក្នុង​ការ​លើកកម្ពស់ ពង្រឹង​ភាព​ធន់​នឹង​អាកាសធាតុ​និង​ធ្វើ​ទំនើប​កម្មវិស័យ​កសិកម្ម​ដោយ​ប្រើប្រាស់​បច្ចេកវិទ្យា​ទំនើប​។

តាម​សេចក្ដី​ប្រកាស​ព័ត៌មាន​របស់​ធនាគារអភិវឌ្ឍន៍អាស៊ី ​គម្រោង​ខ្សែ​ចង្វា​ក់​ផលិតកម្ម​កសិ-ពាណិជ្ជកម្ម​ដែល​មាន​លក្ខណៈ​អំណោយផល​ដល់​អាកាសធាតុ ​ហើយក៏​ទទួល​បាន​ជំនួយ​ពី​កម្ចី​បន្ថែមចំនួន 10លាន​ដុល្លារ ​និង​ជំនួយ​ឥត​សំណង​ចំនួន ​30លាន​ដុល្លារ​ពី​មូលនិធិ​អាកាសធាតុ​បៃតង​(GCF) Green Climate Fund ដែលគម្រោង​ទាំងនេះ​នឹង​ត្រូវ​គ្រប់គ្រង​ដោយ​ADB​។ វាក៏ជាគម្រោងទីមួយដែលត្រូវបានអនុវត្តបន្ទាប់ពីការអនុម័តយុទ្ធសាស្រ្តសម្រាប់ការលើកកម្ពស់ខ្សែចង្វាក់តម្លៃដែលមានមូលដ្ឋានលើកសិ-ឧស្សាហកម្មដែលមានសុវត្ថិភាព និងបរិស្ថានដែលងាយស្រួលក្នុងផែនការសកម្មភាពមហាអនុតំបន់ទន្លេមេគង្គ (GMS) Greater Mekong Subregion និងផែនការសៀមរាបឆ្នាំ2018 – 2022 ។

គម្រោងនេះត្រូវបានគេរំពឹងថា នឹងធ្វើឱ្យប្រសើរឡើងនូវកិច្ចសហប្រតិបត្តិការ និងពាណិជ្ជកម្មក្នុងតំបន់ក្នុងមហាអនុតំបន់ទន្លេមេគង្គខណៈពេលដែលការគូសបញ្ជាក់ពីគុណតម្លៃបន្ថែមរបស់ធនាគារអភិវឌ្ឍន៍អាស៊ីជាពិសេសនៅក្នុងការបញ្ចូលបច្ចេកវិទ្យាទំនើបនៅក្នុងគម្រោងអភិវឌ្ឍន៍នៅក្នុងតំបន់អាស៊ីនិងប៉ាស៊ីហ្វិក។

លោក Srinivasan Ancha អ្នកឯកទេសខាងការប្រែប្រួលអាកាសធាតុរបស់ADB ប្រចាំនៅអាស៊ីអាគ្នេយ៍បានមានប្រសាសន៍ថា «វិស័យកសិកម្មដើរតួយ៉ាងសំខាន់ក្នុងសេដ្ឋកិច្ចរបស់ប្រទេសកម្ពុជា ប៉ុន្តែវិស័យនេះពឹងផ្អែកយ៉ាងធំធេងលើការចិញ្ចឹមជីវិត។ ការគាំទ្ររបស់ធនាគារអភិវឌ្ឍន៍អាស៊ី និងមូល​និធិសកលនឹងជួយដល់វិស័យកសិកម្មរបស់ប្រទេសកម្ពុជាឆ្ពោះទៅរកការអនុវត្តទំនើបៗជាងមុន និងការទ្រទ្រង់ដល់អាកាសធាតុ និងរួមចំណែកដល់កំណើនសេដ្ឋកិច្ចរបស់ប្រទេសកម្ពុជា»។

វិស័យកសិកម្មរបស់កម្ពុជាដែលផលិតផលិតកម្មកែច្នៃ ដឹកជញ្ជូន និងធ្វើពាណិជ្ជកម្មកសិផល – មានប្រហែល33,7% នៃផលិតផលក្នុងស្រុកសរុប។ ទោះជាយ៉ាងណាក៏ដោយចង្វាក់តម្លៃកសិផលនៅក្នុងប្រទេសនៅតែមានភាពបែកបាក់ជាទូទៅ និងមិនមានការអភិវឌ្ឍដោយសារតែហេដ្ឋារចនាសម្ព័ន្ធមិនគ្រប់គ្រាន់ បរិយាកាសគោលនយោបាយទន់ខ្សោយសម្រាប់កសិ-ពាណិជ្ជកម្ម និងកិច្ចខិតខំប្រឹងប្រែងសម្របសម្រួលអាកាសធាតុមិនគ្រប់គ្រាន់ និងការសម្របសម្រួលជាពិសេសក្នុងការដោះស្រាយភាពងាយរងគ្រោះរបស់វិស័យនេះចំពោះទឹកជំនន់ និងគ្រោះរាំងស្ងួត។

លោក វេង សាខុន រដ្ឋមន្រ្តីក្រសួងកសិកម្ម កាលពីខែមីនាធ្លាប់បានស្នើសុំឱ្យធនាគារអភិវឌ្ឍន៍អា​ស៊ីពិចារណាពីកម្មវិធីថ្មីៗដើម្បីជួយដល់វិស័យកសិកម្មនៅកម្ពុជាជាមួយនឹងគម្រោងតំបន់ និងគម្រោងបម្រែបម្រួលអាកាសធាតុ ទើបមន្រ្តីធនាគារអភិវឌ្ឍន៍អាស៊ីក៏បានរៀបចំគម្រោងថ្មីៗនេះឡើងដើម្បីបន្តជួយវិស័យកសិកម្មកម្ពុជាដោយអនុវត្តចាប់ពីឆ្នាំ2019 ដល់ឆ្នាំ2021។

លោក Jiangfeng ប្រធានបរិស្ថានធនធានធម្មជាតិ និងផ្នែកកសិកម្មសម្រាប់ADB នៅអាស៊ីអាគ្នេយ៍បានមានប្រសាសន៍ថា៖ «ដោយសារតែប្រទេសកម្ពុជាកំពុងដើរទៅមុខក្នុងការប្រកួតប្រជែងក្នុងជំនួញកសិកម្ម ធនាគារអភិវឌ្ឍន៍អាស៊ីកំពុងស្ថិតនៅដំណាក់កាលពិគ្រោះយោបល់ហើយចង់ដឹងពីកម្មវិធីកម្ពុជាដែលកម្មវិធីADB អាចជួយក្នុងគម្រោង2019-2021»។

លោកថ្លែងថា ធនាគារកំពុងពិនិត្យមើលថា អ្វីទៅជាការគាំទ្រក្នុងការឆ្លើយតបទៅនឹងការប្រមូលផលនៅតាមតំបន់នីមួយៗនៅក្នុងប្រទេសកម្ពុជា ពីព្រោះADBបានរកឃើញថា វិស័យកសិកម្ម ការអភិ​វឌ្ឍជនបទ និងការគ្រប់គ្រងធនធានធម្មជាតិនៅកម្ពុជាគឺជាអាទិភាពក្នុងការជំរុញកំណើនសេដ្ឋកិច្ច៕

ក្រុម​បាល់​ទាត់​ជម្រើស​ជាតិ​បែល​ហ្ស៊ិក បាន​រក​គ្រាប់​បាល់​​បំ​ប៉ោង​សំណាញ់​ទី​នៅ​ដើម​តង់ ហើយ​បន្ទាប់​មក បាន​រា​រាំង​ការ​វាយ​បក​នៅ​ជិត​បញ្ចប់​ការ​ប្រកួត​របស់​ប្រេស៊ីល ដើម្បី​​ធ្វើ​ឱ្យក្រុមម្ចាស់​ជើង​ឯក​​5​សម័យ​កាលមួយនេះ ធ្លាក់​ចេញ​ពី​យុទ្ធ​​នា​ការ World Cup ក្នុង​វគ្គ​ 8​ក្រុម​ចុងក្រោយ តាម​រយៈ​ការ​ដណ្តើម​បាន​ជ័យ​ជម្នះ 2-1 ក្នុង​ការ​ប្រកួត​ដ៏រំភើប​មួយ​កាល​ពី​ថ្ងៃ​សុក្រ​។

ជ័យ​ជម្នះ​នេះ នឹង​ធ្វើ​ឱ្យ​ក្រុម​ជម្រើស​ជាតិ​ទៅ​ប៉ះ​ក្រុម​នៅ​អឺ​រ៉ុប​ដូច​គ្នា​​គឺ បារាំង ដែល​បាន​ទម្លាក់​ក្រុម​ជម្រើស​ជាតិ​អ៊ុយ​រូ​ហ្គាយ ក្នុង​លទ្ធផល 2-០ ក្នុង​ការ​ប្រកួត​គូ​ទី​1​នា​​ថ្ងៃ​ដដែលនោះ​។ ការ​ធ្វើ​ឱ្យបាល់​ចូល​ទី​​ខ្លួន​ឯង​ 1​គ្រាប់​ពី​កីឡាករ Fernandinho និង​គ្រាប់​បាល់​​​បញ្ចូល​ទី​យ៉ាងល្អ​របស់​ខ្សែ​បម្រើ Kevin De Bruyne បាន​ជួយ​ឱ្យ​ក្រុម​ជម្រើស​ជាតិ​​បែល​ហ្ស៊ិក ឡើងទៅ​ប៉ះក្រុម​ជិត​ខាង​ បា​រាំង ក្នុង​ទីក្រុង St Petersburg នៅ​ថ្ងៃ​អង្គារ​ខាង​មុខនេះ​​។ ប្រេស៊ីល នឹង​ធ្លាក់​ចេញ​​ត្រឹម​វគ្គ​ 8ក្រុម​ចុងក្រោយ​ជា​លើក​ទី​3 ក្នុង​យុទ្ធ​នា​ការ World​ Cup 4លើក​ចុងក្រោយ បើ​ទោះ​បី​មាន​ការ​ខិត​ខំ​ព្យា​យាម​យ៉ាង​ខ្លាំង​ក្លា​​ពី​សំណាក់​ខ្សែ​ប្រយុទ្ធ Neymar ដែល​​បាន​ដើរ​តាម​ផ្លូវ​របស់ Lionel Messi របស់​អា​ហ្សង់ទីន និង​Cristiano Ronaldo របស់​ព័រ​ទុយ​ហ្គាល់ ក្នុងការ​ធ្លាក់​ចេញពី​យុទ្ធ​នាការ​នេះ​។

លោក Roberto Martinez គ្រូបង្វឹក​នៃក្រុម​ជម្រើស​ជាតិ​បែលហ្ស៊ិក បាន​ឱ្យ​ដឹង​ថា៖ «ខ្ញុំ​គិត​ថា ខ្ញុំ​គឺ​ជា​អ្នក​មានមោទ​ន​ភាព​បំផុត​នៅ​លើ​ផែន​ដី​ក្នុង​ពេល​នេះ​។ សម្រាប់​ខ្ញុំ​ ប្រេស៊ីល គឺ​ជា​ក្រុម​ខ្លាំង​បំផុត​ក្នុង​យុទ្ធ​នាការ​នេះ ហើយ​ពីត​ណាស់ ជា​ក្រុម​ផ្តល់​គ្រោះថ្នាក់​បំផុត​​សម្រាប់​ការ​លេង​ដោយ​បើក​ចំហ​​។ យើង​ត្រូវ​តែ​ការ​ពារ​​ឱ្យល្អ​រហូត​ដល់​ ​90​នាទី​។ ប៉ុន្តែ ខ្ញុំ​មាន​អារម្មណ៍​ថា ទម្រង់​លេង​របស់​យើង​ស័ក្តិ​សម​ក្នុង​ការ​ទទួល​បាន​ឱកាស​​ទៅ​វគ្គ​បន្ត​»​៕

ប្រភព​ពី៖ Reuters