Category: សង្គម និងសេដ្ឋកិច្ច

ផ្លូវជាតិលេខ4 នឹងមានបំពាក់កាមេរ៉ាចាប់រថយន្តបើកលើសល្បឿន
ដោយសង្កេតឃើញថា ផ្លូវជាតិលេខ4 ដែលជាផ្លូវជាតិដ៏សំខាន់មួយក្នុងការដឹកជញ្ជូនទំនិញពីភ្នំពេញឆ្ពោះទៅកំពង់ផែទឹកជ្រៅក្នុងខេត្តព្រះសីហនុ ធនាគារពិភពលោកបានអនុម័តថវិកា ផ្តល់ជាជំនួយដល់កម្ពុជាចំនួន 110លានដុល្លារដើម្បីកែលម្អផ្លូវ-ជាតិមួយនេះឡើងវិញ និងរៀបចំបំពាក់ប្រព័ន្ធផ្សេងៗដួចជាការដាក់កាមេរ៉ាចាប់រថយន្តដែលបើកបរលើសល្បឿនកំណត់ជាដើម។
តាមសេចក្តីប្រកាសព័ត៌មានរបស់ធនាគារពិភពលោកបានឱ្យដឹងថា ការគាំទ្រហិរញ្ញវត្ថុបន្ថែមសម្រាប់គម្រោងគ្រប់គ្រងសម្បត្តិផ្លូវ-ថ្នល់ ជំហានទី2 (RoadAsset Management Project II/RAMP II)នេះនឹងត្រូវបានគេរំពឹងថា នឹងជួយផ្តល់ដល់ការឆ្លើយតបភ្លាមៗ និងប្រកបដោយប្រសិទ្ធភាពក្នុងករណីមានស្ថានភាពបន្ទាន់ ហើយថែមទាំងរៀបចំហេដ្ឋារចនា-សម្ព័ន្ធផ្លូវជាតិ ឱ្យកាន់តែប្រសើរឡើង តាមរយៈការដាក់បង្គោលភ្លើងប្រើពន្លឺព្រះអាទិត្យ រួមទាំងការដាក់កាមេរ៉ាសុវត្ថិភាពក្នុងការទប់ស្កាត់ការបើកបរលើសល្បឿនកំណត់ផងដែរ។
ផ្លូវជាតិលេខ4 ត្រូវគេដឹងថា ជាផ្លូវជាតិតភ្ជាប់រាជធានីភ្នំពេញដោយផ្ទាល់ទៅកំពង់ផែសមុទ្រទឹកជ្រៅរបស់កម្ពុជាតែមួយគត់នៅក្នុងខេត្តព្រះសីហនុ បច្ចុប្បន្នកំពុងរងសម្ពាធចរាចរណ៍យ៉ាងមមាញឹកឆ្លងកាត់តំបន់សេដ្ឋកិច្ចមួយចំនួន និងតំបន់កសិកម្មជាច្រើន ក្នុងនោះរួមមានកសិដ្ឋានខ្នាតធំផងដែរ។ នៅក្រោមជំនួយហិរញ្ញប្បទានបន្ថែមនេះ បណ្តោយផ្លូវចម្ងាយជាង 200គីឡូម៉ែត្រនេះនឹងទទួលបានការបង្កើនគុណភាពឱ្យល្អជាងមុន តាមរយៈការអ៊ុតកៅស៊ូថ្មីពីលើ និងការរៀបចំឡើងវិញនូវចិញ្ចើមសងខាងផ្លូវ ការដាក់លូបង្ហូរទឹក និងការធ្វើស្ពាននៅក្នុងតំបន់ងាយលិចទឹកនៅតាមដងផ្លូវនេះ។
ឯកឧត្តម ផែង សុវិជ្ជានោ រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគម្រោងបានមានប្រសាសន៍ថា៖ “ការអភិវឌ្ឍសេដ្ឋកិច្ចរបស់កម្ពុជាពឹងផ្អែកលើផ្លូវជាតិលេខ4នេះ ដោយសារថាវាជាផ្លូវតែមួយគត់សម្រាប់តភ្ជាប់មជ្ឈមណ្ឌលសេដ្ឋកិច្ចជាមួយកំពង់ផែសមុទ្រទឹកជ្រៅរបស់កម្ពុជា។ ការកែលម្អស្ថានភាពផ្លូវដ៏សំខាន់មួយនេះ នឹងជួយកាត់បន្ថយការចំណាយពេលវេលា និងការចំណាយលើការដឹកជញ្ជូន ដែលអាចជួយធ្វើឱ្យសេដ្ឋកិច្ចរបស់កម្ពុជាកាន់តែមានភាពប្រកួតប្រជែងខ្លាំងឡើងថែមទៀតនៅក្នុងតំបន់”។
ក្រៅពីការរៀបចំគម្រោងបែបច្នៃប្រឌិតដែលធន់នឹងអាកាសធាតុជាងមុន ហិរញ្ញប្បទានបន្ថែមនេះនឹងត្រូវបានយកទៅប្រើប្រាស់ផងដែរ ដើម្បីបង្កើនសមត្ថភាពរបស់ស្ថានីយថ្លឹងរថយន្តបច្ចុប្បន្ន និងជួយកាត់បន្ថយហានិភ័យដែលអាចបណ្តាលមកពីការដឹកទំនិញលើសទម្ងន់អនុញ្ញាត។ សុវត្ថិភាពផ្លូវនឹងត្រូវបានចាត់ទុកជាអាទិភាពចម្បង តាមរយៈការកំណត់សញ្ញាតំបន់ល្បឿនមានកម្រិត ផ្លូវមានសុវត្ថិភាព និងកែលម្អផ្លូវខ្នាតតូចភ្ជាប់ផ្លូវឡើងមកផ្លូវជាតិ ដែលរួមមានទាំងការដំឡើងស្លាកសញ្ញាបង្ហាញផ្លូវ បង្គោលភ្លើងប្រើដោយថាមពលពន្លឺព្រះ-អាទិត្យ និងកាមេរ៉ាចាប់ល្បឿនរបស់អ្នកបើកបរទៀតផង។ កិច្ចសន្យាម៉ៅការផ្អែកលើគុណផលការងារនឹងត្រូវបានយកមកប្រើប្រាស់ ដើម្បីបង្កើនប្រសិទ្ធភាពក្នុងការប្រើប្រាស់ហិរញ្ញប្បទាននេះឱ្យបានដល់កម្រិតអតិបរមា។
លោកស្រី អុីហ្គូណា ដូប្រាចា នាយិកាគ្រប់គ្រងធនាគារពិភពលោកប្រចាំនៅកម្ពុជា មានប្រសាសន៍ថា៖“ការខ្វះចន្លោះផ្នែកហេដ្ឋារចនាសម្ព័ន្ធជាការ-ប្រឈមដ៏ធំមួយដល់សមត្ថភាពប្រកួតប្រជែង និងការអភិវឌ្ឍវិស័យឯកជន។ គម្រោងដែលនឹងកែលម្អស្ថានភាពផ្លូវជាតិលេខ4នេះនឹងជួយដោះស្រាយភាពប្រឈមទាំងនោះ ហើយវានឹងពង្រីកកាលានុវត្តភាពផ្នែកសេដ្ឋកិច្ចសម្រាប់ពលរដ្ឋកម្ពុជា”។
គួរបញ្ជាក់ថា ហិរញ្ញប្បទានបន្ថែមនេះបានពង្រីកវិសាលភាពរបស់គម្រោង RAMP II ដែលបានអនុម័តកាលពីខែឧសភា ឆ្នាំ2016 ក្នុងគោលដៅកែលម្អផ្លូវជាតិក្នុងខេត្តកំពត ព្រះសីហនុ ត្បូងឃ្មុំ និងខេត្តក្រចេះ។ កញ្ចប់ហិរញ្ញប្បទាននេះនឹងជួយសម្រួលដល់ការឆ្លើយតបភ្លាមៗផងដែរ ក្នុងករណីស្ថានភាពមានវិបត្តិ ឬស្ថានភាពបន្ទាន់ណាមួយដែលចាំបាច់។
មូលនិធិបន្ថែមសម្រាប់គាំទ្រគម្រោងដែលពង្រីករហូតដល់រយៈពេល 8ឆ្នាំកន្លះនេះ បានផ្តល់ហិរញ្ញវត្ថុដោយសមាគមអភិវឌ្ឍន៍អន្តរជាតិ ដែលជាផ្នែកមួយរបស់ក្រុមធនាគារពិភពលោកសម្រាប់ប្រទេសក្រីក្រ។ មូលនិធិនេះជាឥណទានដែលគ្មានការប្រាក់ហើយនឹងត្រូវទូទាត់សងក្នុងរយៈពេល 38ឆ្នាំ រាប់ទាំងដំណាក់កាលអនុគ្រោះរយៈពេល 6ឆ្នាំផងដែរ៕
July 11, 2018
នៅទីបំផុតក្មេងៗក្រុមបាល់ទាត់ជ្រូកព្រៃ បានចេញផុតពីរូងភ្នំទាំងអស់គ្នាដោយសុវត្ថិភាព
តាមរយៈសារព័ត៌មានថៃ Teenee ដែលចេញផ្សាយនៅរសៀលថ្ងៃម្សិលមិញនេះ បានឱ្យដឹងថា បន្ទាប់ពីទន្ទឹងរង់ចាំអស់រយៈពេលរហូតដល់ 18ថ្ងៃ សម្រាប់ប្រតិបត្តិការជួយសង្គ្រោះក្មេងៗនៃក្រុមបាល់ទាត់ជ្រូកព្រៃ និងគ្រូបង្វឹកម្នាក់ រហូតមកដល់ថ្ងៃចុងក្រោយម្សិលមិញនេះ នៅក្នុងដួងចិត្តប្រជាជនថៃ និងមនុស្សទូទាំងពិភពលោក ពិតជាមានសេចក្ដីត្រេកអររីករាយយ៉ាងខ្លាំងចំពោះដំណឹងល្អ ខណៈដែលក្រុមជ្រូកព្រៃទាំង 13នាក់ បានចេញពីរូងភ្នំដោយសុខសុវត្ថិភាពហើយ។
អាចនិយាយបានថា រហូតដល់វិនាទីចុងក្រោយដែលមនុស្សជាច្រើនបានទន្ទឹងរង់ចាំ ការប្រតិបត្តិការក៏ធ្វើបានសម្រេចដូចការគ្រោងទុករបស់លោក ណារ៉ុងស័ក្ដិ មេបញ្ជាការប្រតិបត្តិការជួយសង្គ្រោះពិតមែន។ លោកបានថ្លែងឱ្យដឹងកាលពីថ្ងៃម្សិលមិញថា ការធ្វើប្រតិបត្តិការនៅក្នុងថ្ងៃចុងក្រោយនេះ យើងរំពឹងថា នឹងបញ្ចប់ការជួយសង្គ្រោះដោយការយកក្រុមជ្រូកព្រៃទាំង 5នាក់ដែលនៅសល់នោះចេញមកឱ្យខាងតែបាន ប្រសិនបើអាកាសធាតុនៅតែអំណោយផល និងគ្មានការរំខានពីភ្លៀង។ ប្រតិបត្តិការលើកទី3 នេះ យើងសង្ឃឹមថា នឹងធ្វើឡើងបានឱ្យលឿនជាងថ្ងៃម្សិលមិញ និងម្សិលម្ង៉ៃ ដោយកាលពីថ្ងៃដំបូង យើងចំណាយពេលអស់ 11ម៉ោង និងថ្ងៃទី2 នៃប្រតិបត្តិការ យើងចំណាយពេលតែ 9ម៉ោងប៉ុណ្ណោះ លឿនជាងថ្ងៃដំបូង 2ម៉ោង។ នៅថ្ងៃនេះយើងបានរៀបផែនការថា ត្រូវនាំក្មេងៗក្រុមជ្រូកព្រៃ 4នាក់ចេញមកមុនគេ បន្ទាប់មកគ្រូបង្វឹក និងក្រុមជំនួយការស៊ីល 3នាក់ និងគ្រូពេទ្យ រួមទាំងអស់ 9នាក់ចេញពីក្នុងរូងភ្នំឱ្យបាន ប្រសិនបើគ្មានអ្វីខុសប្លែកទេនោះ។
គួរបញ្ជាក់ផងដែរថា ប្រតិបត្តិការទី 3 នៅថ្ងៃចុងក្រោយ បានសម្រេចដូចផែនការដែលបានគ្រោងទុក ដោយបាននាំអ្នកទាំង 5នាក់ដែលនៅសល់ចេញពីរូងភ្នំចេញមកបានសម្រេចដោយសុវត្ថិភាពហើយ។ នៅវេលាម៉ោង17 និង55នាទី ជ្រូកព្រៃទី9 ត្រូវបានបញ្ជូនទៅមន្ទីរពេទ្យឈៀងរ៉ាយ និងវេលាម៉ោង18 និង20នាទី ជ្រូកព្រៃទី10 -11 និង12 ត្រូវបានបញ្ជូនដល់ដៃក្រុមគ្រូពេទ្យបឋមសង្រ្គោះ និងត្រៀមបញ្ជូនទៅមន្ទីរពេទ្យឈៀងរ៉ាយជាបន្ត។ ជាចុងក្រោយ នៅវេលាម៉ោង18 និង22 នាទីបន្ទាប់ គ្រូបង្វឹកត្រូវបានក្រុមជួយសង្គ្រោះនាំចេញពីរូងភ្នំថាំលួង មកដល់ខាងក្រៅដោយសុវត្ថិភាព។
សូមជម្រាបបន្ថែមថា ក្រុមជ្រូកព្រៃទាំង 13នាក់ ខណៈនេះកំពុងសម្រាកព្យាបាល និងតាមដានសុខភាពនៅក្នុងមន្ទីរពេទ្យរយៈពេល 7ថ្ងៃ ទើបគ្រូពេទ្យអនុញ្ញាតឱ្យត្រឡប់ទៅផ្ទះបាន៕
July 11, 2018
ក្ដៅៗ!! ក្មេងជ្រូកព្រៃទី 9 នឹងទី10 ចេញពីរូងភ្នំហើយ
តាមរយៈសារព័ត៌មាន Khaosod ដែលចេញផ្សាយមុននេះបន្ដិច បានឱ្យដឹងថា អ្នកសារព័ត៌មានថៃបានរាយការណ៍មកថា ក្មេងៗក្រុមជ្រូកព្រៃទី 9 និង ទី 10 បានចេញផុតមកដល់មាត់រូងភ្នំថាំលួង នៅវេលាម៉ោង 16 និង 12 នាទី និង 16 និង 33 នាទី ជាបន្ដបន្ទាប់តាមលំដាប់លំដោយ ។
នៅវេលាម៉ោង 16 និង 12 នាទី មន្ដ្រីជួយសង្គ្រោះបាននាំក្មេងជ្រូកព្រៃទី 9 ចេញមកមាត់រូងភ្នំបានដោយសុវត្ថិភាព និងបញ្ជូនទៅកាន់មន្ទីរពេទ្យភ្លាមៗ។ បន្ទាប់មក នៅវេលាម៉ោង 16 និង 33 នាទីក្រោយ ស្រាប់តែទទួលដំណឹងថា ក្មេងជ្រូកព្រៃទី 10 បានចេញមកដល់មាត់រូងភ្នំថាំលួង និងបញ្ជូនទៅមន្ទីរពេទ្យភ្លាមៗ។
យ៉ាងណាមិញ គួរបញ្ជាក់ដែរថា ក្រុមជ្រូកព្រៃទី 11-13 កំពុងធ្វើដំណើរមកជាបន្ដបន្ទាប់ តាមផែនការដែលគ្រោងទុកឱ្យមានការជួយសង្គ្រោះ បានចេញដល់មាត់រូងភ្នំយ៉ាងរហ័សបំផុត៕
July 10, 2018
ក្រុមហ៊ុនវៀតណាម គ្រោងសាងសង់រោងចក្រផលិតដែកនៅខេត្តព្រះសីហនុ
ដោយមើលឃើញពីតម្រូវការក្នុងវិស័យសំណង់នៅកម្ពុជា ក្រុមហ៊ុនអន្តរជាតិមួយមកពីប្រទេសវៀតណាមគ្រោងបោះទុនវិនិយោគប្រមាណជា 500លានដុល្លារសាងសង់រោងចក្រផលិតដែកនៅខេត្តព្រះសីហនុនៅពេលឆាប់ៗខាងមុខ។
សម្រាប់ការឆ្លើយតបចំពោះគម្រោងនេះ អភិបាលខេត្តព្រះសីហនុ ឯកឧត្តម យន្ត មីន បានមានប្រសាសន៍ថា ក្រុមហ៊ុនមកពីវៀតណាមដែលចាប់អារម្មណ៍បណ្តាក់ទុននៅក្នុងខេត្តនេះ គួរតែស្វែងរកទីតាំងដីនៅតំបន់ស្រុកស្ទឹងហាវ ព្រោះអនាគតទីនោះក៏មានកំពង់ផែទឹកជ្រៅ និងមានដីប្រហែល 200ហិកតាអាចឆ្លើយតបនឹងតម្រូវការសម្រាប់ការវិនិយោគធ្វើរោងចក្រនេះបាន។ ឯកឧត្តមបន្តថាកតា្ដសំខាន់ដែលធ្វើឱ្យអ្នកវិនិយោគបរទេសបន្ដចាប់អារម្មណ៍ស្វែងរកឱកាសដាក់ទុនវិយោគរកស៊ីនៅខេត្ដនេះគឺកត្តាសន្ដិភាព ច្បាប់ការពារអ្នកវិនិយោគ និងសក្តានុពលធម្មជាតិរបស់ខេត្ដព្រះសីហនុ។ លោកបញ្ជាក់ថា2ឆ្នាំចុងក្រោយនេះខេត្តព្រះសីហនុ បានក្លាយទៅជាគោលដៅយ៉ាងសំខាន់មួយរបស់អ្នកវិនិយោគមកពីតំបន់ផ្សេងៗនិងមកពីបរទេស ហើយសព្វថ្ងៃការណ៍នេះបាននិងកំពុងធ្វើឱ្យខេត្តព្រះសីហនុមានការអភិវឌ្ឍយ៉ាងលឿនទៅមុខ ដោយបានផ្តល់ការងារដល់ប្រជាពលរដ្ឋក្នុងខេត្តកាន់តែច្រើនឡើង។
ឯកឧត្តម យន្ត មីន អភិបាលខេត្តព្រះសីហនុ
ខេត្ដព្រះសីហនុ ពិតជាទីតាំងស័ក្តិសមក្នុងការដាក់ទុនវិនិយោគលើវិស័យឧស្សាហកម្ម វាយនភណ្ឌ ឧស្សាហកម្ម ទេសចរណ៍ សំណង់ និងអចលនទ្រព្យជាដើម។ល។ ម្យ៉ាងវិញទៀត អ្វីដែលសំខាន់បំផុតនោះ គឺប្រទេសកម្ពុជាមានសុខសន្ដិភាពពេញលេញ ក្នុងនោះខេត្ដព្រះសីហនុក៏ធានាបាននូវសន្ដិសុខសុវត្ថិភាពខ្ពស់ដែរ ជាមួយនិងធនធានធម្មជាតិដ៏សម្បូរបែប ផ្ទៃដីនៅទំនេរធំទូលាយ រួមទាំងកោះល្អៗចំនួន 32កោះ ជាពិសេសនោះ គឹប្រព័ន្ធគមនាគមន៍សម្បូរបែប។ ខេត្ដព្រះសីហនុ ត្រូវបានរាជរដ្ឋាភិបាលកម្ពុជាចាត់ទុកជាប៉ូលសេដ្ឋកិច្ចមួយក្នុងចំណោមប៉ូលសេដ្ឋកិច្ចទាំង3 (រាជធានីភ្នំពេញ ខេត្ដសៀមរាប និងខេត្ដព្រះសីហនុ) ដោយប្រកាសប្រែក្លាយខេត្ដនេះទៅជាតំបន់សេដ្ឋកិច្ចពិសេសគំរូពហុបំណងតែមួយគត់ក្នុងប្រទេសកម្ពុជា។
កត្តាដែលជំរុញឱ្យវិនិយោគិនបរទេសចូលមកបណ្តាក់ទុន លើវិស័យឧស្សាហកម្មជាបន្តបន្ទាប់នោះ គឺដោយសារខេត្តព្រះសីហនុជាខេត្តមួយក្នុងចំណោមខេត្តចំនួន3 នៅក្នុងប្រទេសកម្ពុជាដែលមានព្រលានយន្តហោះអន្តរជាតិដឹកអ្នកដំណើរតាមផ្លូវអាកាស មានកំពង់ផែទឹកជ្រៅដែលអាចដឹកទំនិញធុនធ្ងន់ឆ្លងកាត់ពីប្រទេសមួយទៅប្រទេសមួយតាមផ្លូវទឹក មានតំបន់សេដ្ឋកិច្ចពិសេសធំជាងគេ ដែលអាចសាងសង់រោងចក្រសហគ្រាសបានយ៉ាងច្រើន មានផ្លូវរថភ្លើងក្នុងការដឹកទំនិញចូលមកទីក្រុងភ្នំពេញ ហើយអ្វីដែលពិសេសនោះ គឺរដ្ឋាភិ-បាលគ្រោងនឹងសាងសង់ផ្លូវល្បឿនលឿនពីទីក្រុងភ្នំពេញទៅខេត្តព្រះសីហនុ ដែលមានចម្ងាយតិចជាង200គីឡូម៉ែត្រនាពេលឆាប់ៗនេះទៀតផង ក្នុងគោលបំណងផ្តល់ភាពងាយស្រួល ចំណេញពេលវេលាក្នុងការធ្វើដំណើរ ឬដឹកជញ្ជូនទំនិញផ្សេង៕
July 10, 2018
ប្រជាជនកម្ពុជាចូលចិត្តបង្កើតអាជីវកម្មដោយខ្លួនឯង
បច្ចុប្បន្នយើងសង្កេតឃើញថា ការបង្កើតអាជីវកម្មខ្នាតតូច និងមធ្យមមានភាពផុសផុលគួរឱ្យកត់-សម្គាល់ ដែលអាជីវកម្មមួយចំនួនបង្កើតឡើងតាមៗគ្នា ជាហេតុនាំឱ្យមានការប្រកួតប្រជែងយ៉ាងខ្លាំងនៅលើទីផ្សារ។ ម្ចាស់អាជីវកម្មខ្លះមិនសូវបានគិត និងវិភាគពីហានិភ័យជាច្រើនដែលអាចនឹងកើតឡើងបន្ទាប់ពីបើកដំណើរការ ហើយមិនបានប៉ុន្មានក៏បិទទៅវិញ។
អ្នកជំនាញសេដ្ឋកិច្ចបានពន្យល់អំពីអ្វីដែលហៅថា សហគ្រិនភាព ឬភាពជាម្ចាស់នៃសហគ្រាសដែលការធ្វើខ្លួនជាម្ចាស់នៃសហគ្រាសនេះ សហគ្រិនត្រូវមានចំណេះដឹងលើការគ្រប់គ្រងទាំងផ្នែកធនធានមនុស្ស និងផ្នែកហិរញ្ញវត្ថុ រួមទាំងការចេះសម្លឹងមើលទីផ្សារផងដែរ ទើបអាជីវកម្មរបស់ខ្លួនអាចទទួលបានជោគជ័យ ឬ(Sustainable Growth) ការធ្វើឱ្យមានកំណើនប្រកបដោយចីរភាពសម្រាប់អាជីវកម្ម។
ឯកឧត្តម វង្សី វិស្សុតរដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា កម្ពុជានៅតែស្វាគមន៍ការវិនិយោគផ្ទាល់ពីបរទេស តែយើងក៏ចង់ឃើញវិនិយោគិនខ្មែរងើបឡើងកាន់តែច្រើននៅក្នុងបរិយាកាសប្រកួតប្រជែងមួយប្រកបដោយការស្មើភាព និងយុត្តិធម៌រវាងអ្នកក្នុងស្រុក និងអ្នកក្រៅស្រុកដែរ។
ឯកឧត្តម វង្សី វិស្សុតរបានគូសបញ្ជាក់ទៀតថា កន្លងមករាជរដ្ឋាភិបាលបានជួយទ្រទ្រង់ច្រើនដល់សហគ្រាសធុនតូច និងមធ្យម ដោយក្នុងនោះ ទី1. បានជួយកាត់បន្ថយថ្លៃដើមក្នុងការធ្វើធុរកិច្ចតាមរយៈការកាត់បន្ថយថ្លៃដឹកជញ្ជូន និងកាត់បន្ថយថ្លៃអគ្គិសនី ព្រមទាំងបានបង្កើតមូលនិធិបណ្តុះបណ្តាលសម្រាប់ជួយដល់សហគ្រិនដែលខ្វះជំនាញនៅពេលចាប់ផ្តើមដំបូងជាដើម។ ទី2.ខាងផ្នែកយុត្តិកម្ម និងបានជួយសម្រួលដល់កិច្ចការពាណិជ្ជកម្ម ការអនុគ្រោះពន្ធ និងការបន្ធូរបន្ថយពន្ធ ព្រមទាំងជួយរៀបចំបញ្ជីស្នាមគណនេយ្យឱ្យកាន់តែសាមញ្ញដើម្បីបង្កលក្ខណៈឱ្យសហគ្រាសធុនតូច និងមធ្យមបានចូលទៅក្នុងវិស័យផ្លូវការ។ និងទី3. ជួយផ្នែកហិរញ្ញប្បទានតាមរយៈការបង្កើតធនាគារ SME ក្នុងពេលឆាប់ៗខាងមុខនេះ។ ក្រៅពីនេះយើងក៏នឹងកសាងនូវប្រព័ន្ធអេកូឡូស៊ីមួយដែលកាន់តែអនុគ្រោះថែមទៀតដើម្បីលើកកម្ពស់បរិយាកាសប្រកួតប្រជែងដែលធានាដល់ការលូតលាស់នៃសហគ្រិនតាមរយៈក្របខ័ណ្ឌច្បាប់ចាំបាច់មួយចំនួន ដូចជាច្បាប់ក្ស័យធន ច្បាប់ប្រកួតប្រជែង និងការការពារកម្មសិទ្ធិបញ្ញាជាដើម។
ឯកឧត្តម វង្សី វិស្សុត ក៏បានលើកឡើងផងដែរថា នៅក្នុងក្របខ័ណ្ឌនៃមូលនិធិលើកកម្ពស់សហគ្រិនភាពដែលជាគំនិតផ្តួចផ្តើមថ្មីរបស់រាជរដ្ឋាភិបាលនេះ នឹងជួយលើកកម្ពស់សហគ្រិនភាពតាមរយៈការជួយកសាងសមត្ថភាព និងការផ្តល់សេវាប្រឹក្សាយោបល់ រួមទាំងការបង្កើតបណ្តាញទំនាក់ទំនងទាំងសម្រាប់ការស្វែងរកប្រភពហិរញ្ញប្បទានពីធនាគារ និងទាំងទទួលបានចំណេះដឹងជំនាញបច្ចេកវិទ្យាចំណេះធ្វើពិសោធ និងគំនិតថ្មី។ ចំពោះការគ្រប់គ្រងមូលនិធិគាំទ្រនេះក៏នឹងមានការចូលរួមពីវិស័យឯកជនផងដែរ ពីព្រោះថា សហគ្រិនភាពគឺជាដំណើរនៃការរៀបចំអាជីវកម្ម និងជាកិច្ចការមួយដែលមានការប្រឈមខ្ពស់នឹងហានិភ័យនៃការបរាជ័យផងដែរ។ ប្រទេសកម្ពុជានៅត្រូវការឧកញ៉ាជាច្រើនរូបថែមទៀត ឬក៏សហគ្រិនចំណានៗជាច្រើនទៀតដើម្បីជួយឱ្យប្រទេសជាតិឈានឡើងជាប្រទេសមានចំណូលមធ្យមកម្រិតខ្ពស់នៅឆ្នាំ2030 និងជា
ប្រទេសមានចំណូលខ្ពស់នៅឆ្នាំ2050។ នេះបើតាមការលើកឡើងរបស់ឯកឧត្តម វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានថ្លែងនៅក្នុងសិក្ខាសាលាពិគ្រោះយោបល់ស្តីពី “ការលើកកម្ពស់សហគ្រិនភាពនៅកម្ពុជា”។
លោកបណ្ឌិត ចាប សុថារិទ្ធ អ្នកស្រាវជ្រាវសេដ្ឋកិច្ចបានពន្យល់បន្ថែមថា ការណ៍នេះសំដៅទៅលើក្រុមហ៊ុនទាំងឡាយណាដែលបានឈរជើងនឹងក្នុងទីផ្សារ និងមានលទ្ធភាពបន្ថែមទៀតក្នុងការអភិវឌ្ឍក្រុមហ៊ុននោះឱ្យរីកចម្រើនលើសមួយកម្រិតទៀត។ ដូច្នេះដើម្បីធានាក្នុងការអភិវឌ្ឍអាជីវកម្មប្រកបដោយស្ថិរភាពនោះ សហគ្រិនក៏ត្រូវស្គាល់ និងយល់ពីតម្រូវការទីផ្សារឱ្យបានច្បាស់ និងធ្វើយ៉ាងណាដើរឱ្យបានមុនគូប្រកួតប្រជែងផងដែរ។
លោកបន្តថា កម្ពុជាមានសហគ្រិនច្រើនជាងគេ បើប្រៀបធៀបនឹងបណ្ដាប្រទេសផ្សេងទៀតនៅក្នុងតំបន់ ដោយសារប្រជាពលរដ្ឋកម្ពុជាចូលចិត្តបង្កើតអាជីវកម្មដោយខ្លួនឯង ប៉ុន្ដែអាជីវកម្មទាំងនោះនៅតូចៗនៅឡើយ ដូច្នេះពួកគេគួរតែយល់ដឹងបន្ថែមពីសហគ្រិនភាពដើម្បីអាចវាយលុកចូលទីផ្សារបាន។ “លក្ខណសម្បត្តិរបស់សហគ្រិនទូទៅគឺត្រូវមានភាពក្លាហានក្នុងការ take risks ឬក៏ប្រថុយប្រថានព្រោះយើងមានក្ដីស្រមៃ ប៉ុន្ដែបើយើងអត់ហ៊ានប្រថុយដើម្បីទៅបង្កើត ឬធ្វើវាឡើង យើងនឹងអត់បានជោគជ័យមកវិញទេ ហើយក៏ត្រូវមានគំនិតច្នៃប្រឌិត និងមាន flexibility ការចេះបត់បែន ប៉ុន្ដែមិនមែនបត់បែនទៅរកផ្លូវអាក្រក់នោះទេ យើងបត់បែនទៅតាមស្ថានភាពរបស់សង្គម ហើយនិងស្ថានភាពរបស់ business (អាជីវកម្ម)”៕
July 10, 2018
Twitter សម្រេចបិទជាង 70លានគណនី ដើម្បីបន្ថយការចែករំលែកព័ត៌មានមិនពិត
បណ្ដាញទំនាក់ទំនងសង្គមរបស់អាមេរិក Twitter បានសម្រេចបិទគណនីអ្នកប្រើប្រាស់ជាបណ្ដោះអាសន្នប្រមានជាង 1លាននាក់ក្នុងមួយថ្ងៃ កាលពីថ្មីៗដែលសរុបទាំងអស់មានជាង 70លានគណនីហើយដែលត្រូវបានបិទ។
យោងតាមការចេញផ្សាយរបស់សារព័ត៌មានវ៉ាស៊ីនតោនប៉ុស្ដិ៍ បានឱ្យដឹងថា មូលហេតុដែលបណ្ដាញសង្គម Twitter ធ្វើការបិទគណនីទាំងនោះ ដើម្បីកាត់បន្ថយនៃលំហូរព័ត៌មានមិនពិតនៅលើបណ្ដាញសង្គម Twitter។
ទីភ្នាក់ងារព័ត៌មាន Reuters បានចេញផ្សាយថា ក្នុងរយៈពេល 2ខែ គឺខែឧសភា និងមិថុនា ក្រុមហ៊ុន Twitter បានបិទគណនីជាង 70លាន ដោយគណនីត្រូវបានខាងក្រុមការងារ Twitter រកឃើញថា បានបង្ហោះ និងចែករំលែកព័ត៌មានមិនពិត ប៉ុន្តែគណនីទាំងនោះ អាចនឹងបើកឱ្យប្រើប្រាស់វិញនៅពេលដែលមានការតវ៉ា ឬប្ដឹងទាមទារពីសំណាក់អ្នកប្រើប្រាស់ដែលមានហេតុផលសមរម្យ។
មិនមែនមានតែ Twitter ទេ ដែលធ្វើបែបនេះ សូម្បីតែបណ្ដាញសង្គម Facebook ក៏បានអនុវត្តវិធីដូចគ្នានេះដែរ ប៉ុន្តែខាងក្រុមហ៊ុន Facebook មិនទាន់ប្រកាសឱ្យដឹងជាផ្លូវការ ហើយមូលហេតុដែលបណ្ដាញសង្គមទាំងនេះ ធ្វើការទប់ស្កាត់ការចែករំលែកព័ត៌មានមិនពិត គឺដោយសារតែទីភ្នាក់ងារសន្តិសុខជាតិអាមេរិករកឃើញថា ការផ្សព្វផ្សាយព័ត៌មានមិនពិតកំពុងតែសាយភាយខ្លាំងនៅលើបណ្ដាញសង្គម ដែលជាហេតុបង្កឱ្យមានចលាចល។
គួរបញ្ជាក់ផងដែរថា ថ្មីៗនេះក្រសួងមហាផ្ទៃ ក្រសួងប្រៃសណីយ៍ និងទូរគមនាគមន៍ និងក្រសួងព័ត៌មានរបស់កម្ពុជា បានចេញសេចក្តីប្រកាសព័ត៌មានរួមគ្នាមួយ ក្នុងគោលដៅប្រឆាំង និងទប់ស្កាត់ រាល់ការផ្សព្វផ្សាយ ឬចែករំលែកខ្លឹមសារព័ត៌មាន ឬសារជាអក្សរ សំឡេង រូបភាព វីដេអូ ឬក្នុងទម្រង់ផ្សេងៗ ដែលមានចេតនាបង្កជាចលាចលបណ្ដាលឱ្យអន្តរាយដល់វិស័យការពារជាតិ សន្តិសុខជាតិ ទំនាក់ទំនងជាមួយប្រទេសដទៃ សេដ្ឋកិច្ចជាតិ សណ្ដាប់ធ្នាប់សាធារណៈ ការរើសអើង និងវប្បធម៌ ប្រពៃណីជាតិ៕
July 10, 2018
Mark Zuckerberg ពោលសរសើរក្រុមអ្នកជំនាញជួយសង្គ្រោះក្មេងៗនៅក្នុងរូងភ្នំថាំលួង
តាមរយៈសារព័ត៌មាន Teenee ដែលចេញផ្សាយមុននេះបន្ដិច បានឱ្យដឹងថា នៅទីបំផុតបន្ទាប់ពីទំព័រហ្វេសប៊ុក Thai NavySEALបានបង្ហោះសារថា បាននាំក្រុមជ្រូកព្រៃបាន 8នាក់ចេញពីរូងភ្នំថាំលួងក្នុងរយៈពេល 2ថ្ងៃដោយសុវត្ថិភាព និងសម្រេចភារកិច្ចផ្សេងទៀតបានយ៉ាងរលូនរួចមក តាមរយៈហេតុការណ៍នេះបានធ្វើឱ្យបិតាហ្វេសប៊ុកលោក Mark Zuckerberg ចូលមកបញ្ចេញមតិ និងសម្ដែងក្ដីរីករាយចំពោះក្រុមជួយសង្គ្រោះក្មេងៗកីឡាករបាល់ទាត់ ក្រុមជ្រូកព្រៃ នេះដែរ។
លោក Mark Zuckerberg បាននិយាយថា «ពីអ្នកទាំងគ្នានៅលើបណ្ដាញសង្គមហ្វេសប៊ុក ខ្ញុំសូមចូលសម្ដែងក្ដីត្រេកអរ និងស្ងើចសរសើរចំពោះភាពក្លាហានរបស់ក្រុមជួយសង្គ្រោះយ៉ាងអស្ចារ្យ ដែលសម្រេចបាននូវការនាំក្រុមជ្រូកព្រៃ 8នាក់ចេញពីរូងភ្នំប្រកបដោយសុវត្ថិភាព។ សូមឱ្យសំណាងល្អ ចំពោះដំណើរការប្រតិបត្តិការរបស់អ្នកទាំងអស់គ្នា ដែលនៅសល់ក្មេងៗកីឡាករ 4រូប និងគ្រូបង្វឹកមួយរូបទៀត សូមឱ្យបានចាកចេញមកទាំងអស់គ្នាដោយសុខសុវត្ថិភាព»។
សូមជម្រាបបន្ថែមថា ខណៈនេះគ្រូពេទ្យនៅក្នុងមន្ទីរពេទ្យធំក្នុងខេត្តឈៀងរ៉ាយ បានអនុញ្ញាតឱ្យអាណាព្យាបាលរបស់ក្មេងៗក្រុមជ្រូកព្រៃ បានឃើញមុខកូនៗឆ្លងកាត់តាមផ្ទាំងកញ្ចក់សិន នៅមិនទាន់បានបើកឱ្យចូលទៅកាន់គ្រែសម្រាកព្យាបាលនៅឡើយទេ៕
July 10, 2018
ក្ដៅៗ!! ប្រតិបត្តិការជួយសង្គ្រោះ «ក្រុមជ្រូកព្រៃទាំង 5នាក់» ឈុតចុងក្រោយចាប់ផ្ដើមហើយ!
តាមរយៈសារព័ត៌មាន Thairath ដែលចេញផ្សាយកាលពីប៉ុន្មាននាទីមុននេះបន្ដិច បានឱ្យដឹងថា នៅវេលាម៉ោង10 និង 08នាទីព្រឹកមិញនេះ ប្រតិបត្តិការលើកទី3 ដើម្បីជួយសង្គ្រោះក្រុមជ្រូកព្រៃឈុតចុងក្រោយ ដែលកំពុងជាប់នៅក្នុងរូងភ្នំថាំលួងទាំង 5នាក់នោះបានចាប់ផ្ដើមហើយ។
លោក ណារ៉ុងស័ក្ដិ មេបញ្ជាការប្រតិបត្តិការជួយសង្គ្រោះ បានគូសបញ្ជាក់ពីគម្រោងប្រតិបត្តិការលើកទី3 នេះថា ក្រុមអ្នកជួយសង្គ្រោះស្ម័គ្រចិត្ត 19នាក់ បានចាប់ផ្ដើមដើរចូលទៅក្នុងរូងភ្នំថាំលួង ដោយក្រុមអ្នកមុជទឹកបានដើរចូលទៅមុនគេបង្អស់។ លោកបានបន្ដទៀតថា ការធ្វើប្រតិបត្តិការនៅក្នុងថ្ងៃនេះ យើងរំពឹងថា នឹងបញ្ចប់ការជួយសង្គ្រោះដោយការយកក្រុមជ្រូកព្រៃទាំង 5នាក់ដែលនៅសល់នោះចេញមកឱ្យខាងតែបាន ប្រសិនបើអាកាសធាតុនៅតែអំណោយផល និងគ្មានការរំខានពីភ្លៀង។ ប្រតិបត្តិការលើកទី3 នេះ យើងសង្ឃឹមថា នឹងធ្វើឡើងបានឱ្យលឿនជាងថ្ងៃម្សិលមិញ និងម្សិលម្ង៉ៃ ដោយកាលពីថ្ងៃដំបូង យើងចំណាយពេលអស់ 11ម៉ោង និងថ្ងៃទី2នៃប្រតិបត្តិការ យើងចំណាយពេលតែ 9ម៉ោងប៉ុណ្ណោះ លឿនជាងថ្ងៃដំបូង 2ម៉ោង។ នៅថ្ងៃនេះយើងបានរៀបផែនការថា ត្រូវនាំក្មេងៗក្រុមជ្រូកព្រៃ 4នាក់ចេញមកមុនគេ បន្ទាប់មកគ្រូបង្វឹក និងក្រុមជំនួយការស៊ីល 3នាក់ និងគ្រូពេទ្យ រួមទាំងអស់ 9នាក់ចេញពីក្នុងរូងភ្នំឱ្យបាន ប្រសិនបើគ្មានអ្វីខុសប្លែកទេនោះ។ នេះបើតាមការបញ្ជាក់របស់លោក ណារ៉ុងស័ក្ដិ។
គួរបញ្ជាក់ផងដែរ ក្មេងៗក្រុមជ្រូកព្រៃ 4នាក់ដែលនាំចេញមកបានកាលពីថ្ងៃម្សិលមិញនេះ មានសុខភាពរឹងមាំល្អ ក៏ប៉ុន្ដែ មានប្អូនខ្លះមានអាការស្គមខ្លាំង និងមានការត្រួតពិនិត្យបេះដូងនៅក្នុងបន្ទប់សង្គ្រោះរយៈពេល 24ម៉ោង ដើម្បីតាមដានសភាពរាងកាយជាបន្ដ។ គេរំពឹងទុកថា រយៈពេល 48ម៉ោងទៅមុខទៀត ប្រសិនបើគ្មានប្រទះឃើញមានមេរោគដែលបង្កគ្រោះថ្នាក់ទេនោះ ពួកគេនឹងត្រូវអនុញ្ញាតឱ្យអាណាព្យាបាលបានចូលសួរសុខទុក្ខដោយមានផ្ទាំងកញ្ចក់ឃាំងកណ្ដាលរយៈពេល 2 ម៉ោង និងត្រូវស្គែនសម្លាប់មេរោគជាមុនសិន មុនពេលចូលជួបមុខគ្នា។ ហើយប្រមាណជា 7ថ្ងៃទៀត បើគ្មានអ្វីគួរឱ្យបារម្ភទេនោះ គ្រូពេទ្យនឹងអនុញ្ញាតឱ្យក្មេងៗ ត្រឡប់ទៅផ្ទះបាន៕
July 10, 2018
ឡសម្ងួតស្រូវធំជាងគេនៅខេត្តកំពង់ស្ពឺ ត្រូវបានដាក់ឱ្យប្រើប្រាស់
ឃ្លាំងស្តុក និងឡសម្ងួតស្រូវធំជាងគេនៅខេត្តកំពង់ស្ពឺ ដែលមានសមត្ថភាពស្តុកស្រូវបាន 5ម៉ឺនតោន និងឡដែលអាចសម្ងួតស្រូវបានចំនួន 1,500តោនក្នុងមួយថ្ងៃ ត្រូវបានដាក់សម្ពោធឱ្យប្រើប្រាស់ជាផ្លូវការកាលពីម្សិលមិញ។
ឯកឩត្តម កៅ ថាច អគ្គនាយកធនាគារអភិវឌ្ឍន៍ជនបទបានលើកឡើងថា កន្លងមកដោយមើលឃើញពីបញ្ហាតម្លៃស្រូវនៅលើទីផ្សារមានការធ្លាក់ចុះដោយមិនសមហេតុផល ជាពិសេសកាលពីឆ្នាំ2016 ដែលនៅពេលនោះរាជរដ្ឋាភិបាលបានរិះរកដំណោះស្រាយបន្ទាន់ដើម្បីធ្វើយ៉ាងណាឱ្យតម្លៃស្រូវរបស់កសិករមានស្ថិរភាពឡើងវិញ។
ឯកឧត្តម បន្តថា ភ្លាមៗប្រមុខរាជរដ្ឋាភិបាលបានទម្លាក់កញ្ចប់ឥណទានពិសេសបន្ទាន់មួយតាមរយៈធនាគារអភិវឌ្ឍន៍ជនបទដើម្បីផ្ដល់ជូនដល់បណ្តារោងម៉ាស៊ីនទាំងឡាយណាដែលមានតម្រូវការឥណទានក្នុងការប្រមូលទិញស្រូវក្នុងតម្លៃទីផ្សារ។
ទន្ទឹមនេះជាដំណោះស្រាយយូរអង្វែង រាជរដ្ឋាភិបាលបានទម្លាក់នូវឥណទានពិសេសបន្ថែមមកធនាគារអភិវឌ្ឍន៍ជនបទ ដើម្បីធ្វើជាប្រតិបត្តិករអនុវត្តគម្រោងផ្តល់ឥណទានជូនក្រុមហ៊ុនឯកជនឱ្យធ្វើការសាងសង់ឃ្លាំងស្តុកស្រូវ និងឡសម្ងួតស្រូវ ដែលក្នុងនោះមាននៅខេត្តបាត់ដំបងមានលទ្ធភាពស្តុកស្រូវបានចំនួន 2សែនតោន និងមានលទ្ធភាពសម្ងួត 3,000តោនក្នុងមួយថ្ងៃ និងនៅ 3តំបន់ផ្សេងទៀត រួមមានខេត្តកំពង់ធំ តាកែវ និងព្រៃវែង ហើយតំបន់នីមួយៗមានសមត្ថភាពស្តុកស្រូវបានចំនួន 5ម៉ឺនតោន និងឡដែលមានសមត្ថភាពសម្ងួតស្រូវបានចំនួន 1,500តោនក្នុងមួយថ្ងៃ។
បន្ទាប់ពីយន្តការនេះបានដាក់ចេញមក តម្លៃស្រូវរបស់បងប្អូនប្រជាពលរដ្ឋបានស្ទុះងើបឡើងវិញពីចន្លោះ 1,150រៀល ទៅ1,200រៀលក្នុងមួយគីឡូក្រាមក្នុងពេលបច្ចុប្បន្ននេះ។
គួរបញ្ជាក់ថា ឃ្លាំងស្តុក និងឡសម្ងួតដែលធំជាងគេនៅក្នុងខេត្តកំពង់ស្ពឺនេះ ស្ថិតក្រោមគម្រោងវិនិយោគពិសេសក្នុងទម្រង់ជាបំណុលរបស់រាជរដ្ឋាភិបាលនៃកម្ពុជា ជាមួយក្រុមហ៊ុនខ្មែរហ្វូត គ្រុប ភីអិលស៊ី តាមរបៀប “សាងសង់-ប្រតិបត្តិការ-និងទូទាត់សំណង” (B.O.P.) ក្នុងតម្លៃសរុបចំនួន 5លានដុល្លារអាមេរិក៕
July 10, 2018
កំពូលតារាចម្រៀងរ៉ុក Liam Gallagher ច្រៀងលើកទឹកចិត្តដល់ក្មេងៗក្រុមជ្រូកព្រៃកុំឱ្យភ័យខ្លាច
តាមរយៈគេហទំព័រកម្សាន្ដ sanook ដែលបានបង្ហោះនៅពេលមុននេះបន្ដិចបានឱ្យដឹងថា កំពូលតារាចម្រៀងរ៉ុកជនជាតិអង់គ្លេស និងជាអ្នកនិពន្ធបទចម្រៀងដ៏ល្បីល្បាញលោក Liam Gallagher បានបង្ហោះទំនុកច្រៀងបទ «Stop Crying Your Heart Out» អមជាមួយបទចម្រៀងដែលលោកបានបកស្រាយដោយផ្ទាល់ អធិដ្ឋានជាកម្លាំងចិត្តសម្រាប់ក្មេងៗក្រុមជ្រូព្រៃ ដែលកំពុងជាប់នៅក្នុងរូងភ្នំ ថាំលួង ខេត្តឈៀងរ៉ាយ ប្រទេសថៃ កុំឱ្យមានការភ័យខ្លាចឱ្យសោះ។
ដោយផ្អែកលើគណនីធ្វីតធើររបស់កំពូលតារាចម្រៀងរូបនេះ បានសរសេរសារថា «Any words to Thai Kids trapped in cave RKID ?» មានន័យ តើមានពាក្យអ្វីនិយាយទៅកាន់ក្មេងៗជនជាតិថៃ ដែលកំពុងជាប់នៅក្នុងរូងភ្នំខ្លះទេ?។ លោកបន្ដឆ្លើយថា “Hold up hold on don’t be scared” មានន័យថា “អត់ធ្មត់សិនទៅ កុំភ័យខ្លាច” ។
គួរបញ្ជាក់ផងដែរថា បទចម្រៀង “Stop Crying Your Heart Out” ជាបទដែលល្បីបំផុតនៅអំឡុងឆ្នាំ2002 ដែលនិពន្ធដោយលោក និងបងប្រុសរបស់លោកដែលមានឈ្មោះ Noel Gallagher ដែលជាម្ចាស់បទដើម និងបានបញ្ចេញលក់នៅក្នុងអាល់ប៊ុមចម្រៀង «Heathen Chemistry»៕
July 10, 2018