Category: សង្គម និងសេដ្ឋកិច្ច

ទីក្រុងប៉ារីស អបអរយ៉ាងខ្លាំងក្លា ក្រោយបារាំងផ្តួលបែលហ្ស៊ិក ដើម្បីទៅវគ្គផ្តាច់ព្រ័ត្រ
ចម្រៀងជាតិរបស់ប្រទេសបារាំងដែលមានចំណងជើងថា La Marseillaise ការស្រែកបន្ទរគ្នាឡើងថា «យើងទៅដល់វគ្គផ្តាច់ព្រ័ត្រហើយ!!» និងសំឡេងស៊ីហ្វ្លេរថយន្ត និងកាំជ្រួច បានបន្លឺឡើងយា់ងកងរំពងទូទាំងទីក្រុងប៉ារីស កាលពីថ្ងៃអង្គារ ខណៈដែលប្រជាជនក្នុងរដ្ឋធានីនេះបានអបអរសម្រាប់ការធ្វើដំណើររបស់ក្រុមជម្រើសជាតិបារាំងឆ្ពោះទៅកាន់វគ្គផ្តាច់ព្រ័ត្រនៃ World Cup។
អ្នកគាំទ្រដ៏ច្រើនកុះករប្រមាណ 20,000នាក់ បានប្រមូលផ្តុំគ្នាដើម្បីទស្សនាការប្រកួតរបស់ក្រុមលោក Dider Deschamps ក្នុងពេលពួកគេផ្តួលក្រុមជម្រើសជាតិបែលហ្ស៊ិក ក្នុងលទ្ធផល 1-០ ក្នុងវគ្គពាក់កណ្តាលផ្តាច់ព្រ័ត្រ នៅទីក្រុង Saint Petersburg នៅលើផ្ទាំងសំពត់សដ៏ធំមួយនៅឯ Hotel de Ville ក្នុងទីក្រុងប៉ារីស។
ដោយសារតែទស្សនីយភាពនៃការប្រកួតត្រូវបានបិទបាំងដោយហ្វូងមនុស្សដ៏ច្រើនកុះករនេះ អ្នកខ្លះបានឡើងលើដើមឈើនានា លើរថយន្ត ឬក៏លើធុងសំរាម ដើម្បីមើលការប្រកួតផ្សាយផ្ទាល់ឱ្យបានច្បាស់។ គ្រាប់បាល់កាត់សេចក្តីរបស់ខ្សែការពារ Samuel Umtiti នៅនាទីទី51 បានបង្កើតឱ្យមានការអបអរយ៉ាងខ្លាំង ខណៈដែលអ្នកគាំទ្រភាគច្រើនបានឱប និងថើបគ្នា និងរាំរែកយ៉ាងរីករាយ។ លោក Didier Deschampsគ្រូបង្វឹកនៃក្រុមជម្រើសជាតិបារាំង បានឱ្យដឹងថា៖ «យើងបានបង្ហាញពីឥរិយាបថ និងស្មារតី។ វាពិតជាលំបាកណាស់សម្រាប់យើងនៅរាត្រីនេះ។ យើងបានធ្វើការងារយ៉ាងលំបាកលើតំបន់ការពារ យើងត្រូវតែដណ្តើមយកការមានប្រៀបបន្តិចលើការវាយបករហ័ស ប៉ុន្តែ សូមអបអរសាទរដល់កីឡាករ និងបុគ្គលិករបស់ខ្ញុំ»។
ក្រុមជម្រើសជាតិបារាំង នឹងត្រូវប៉ះជាមួយនឹងក្រុមជម្រើសជាតិអង់គ្លេស ឬក្រូអាស៊ីក្នុងទីក្រុងម៉ូស្គូ នៅថ្ងៃអាទិត្យនេះ ខណៈដែលបារាំងសម្លឹងរកការលើកពាននេះជាលើកទី2 ក្រោយពីបានឈ្នះនៅលើទឹកដីខ្លួនឯងម្ដងរួចមកហើយកាលពីឆ្នាំ1998៕
ប្រភពពី៖ Channel News Asia
July 11, 2018
ធនាគារជាតិនៃកម្ពុជា និងធនាគារកូរ៉េ សហការគ្នាលើការស្រាវជ្រាវសម្រាប់ការវិភាគគំរូម៉ាក្រូសេដ្ឋកិច្ច
ពិធីចុះហត្ថលេខាលើកិច្ចព្រមព្រៀងរវាងធនាគារជាតិនៃកម្ពុជា (NBC) និងធនាគារកូរ៉េ(BOK) ត្រូវបានរៀបចំឡើងក្រោមការប្រកាសស្តីពីកិច្ចសិក្សារួមគ្នាលើការស្រាវជ្រាវឱ្យបានស៊ីជម្រៅក្នុងគោលបំណងបង្កើនជំនាញវិភាគ និងសិក្សាអំពីទំនាក់ទំនងម៉ាក្រូសេដ្ឋកិច្ច និងហិរញ្ញវត្ថុជាមួយនឹងការអនុវត្តគំរូសេដ្ឋកិច្ច ដើម្បីជំរុញកិច្ចសហប្រតិបត្តិការ និងពង្រឹងការយល់ដឹងគ្នាទៅវិញទៅមករវាងធនាគារកណ្តាលកម្ពុជា និងធនាគារកណ្តាលនៃប្រទេសកូរ៉េ។
លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា មានប្រសាសន៍ថា នេះគឺជាកិច្ចសហការ BOK-KPP ទី3 នេះធ្វើឡើងក្រោយពីមានផ្លែផ្កាក្នុងរយៈពេល 2ឆ្នាំចុងក្រោយ។ កម្មវិធីទី1 នៅឆ្នាំ2016 គឺជាគំរូសម្រាប់ការវិភាគម៉ាក្រូសេដ្ឋកិច្ច និងការព្យាករអំពីអតិផរណានៅក្នុងប្រទេសកម្ពុជា និងទី2 គឺការវិភាគជាក់ស្តែងលើទំនាក់ទំនងរវាងអត្រាប្តូរប្រាក់ និងអតិផរណានៅក្នុងសេដ្ឋកិច្ចកម្ពុជា។
ប្រតិបត្តិការទី3 នេះស្ថិតក្រោមគម្រោងកម្មវិធី BOK-KPP (the Bank of Korea-Knowledge Part-nership Program)ភាពជាដៃគូនៃចំណេះដឹងរបស់ធនាគារកូរ៉េឆ្ពោះទៅរកកិច្ចសហការជិតស្និទ្ធរវាងអ្នកស្រាវជ្រាវមកពីសាកលវិទ្យាល័យ BOK និងសាកលវិទ្យាល័យយ៉ុនសី(Yonsei)ដើម្បីគាំទ្រដល់ការអភិវឌ្ឍប្រព័ន្ធហិរញ្ញវត្ថុ និងសេដ្ឋកិច្ចនៅក្នុងប្រទេសកម្ពុជា។
លោកជំទាវបានបញ្ជាក់ថា ការស្រាវជ្រាវរួមគ្នាទាំង2 នេះបានរួមចំណែកក្នុងការបង្កើតគោលនយោបាយរូបិយវត្ថុដើម្បីសម្រេចបាននូវស្ថិរភាពតម្លៃ ស្ថិរភាពហិរញ្ញវត្ថុ ក៏ដូចជាជំនាញស្រាវជ្រាវដែលបច្ចុប្បន្នកំពុងខ្វះខាត និងកំណើនសេដ្ឋកិច្ចប្រកបដោយចីរភាព។ ការបន្តរបស់ BOK-KPP ជាមួយធនាគារជាតិនៃកម្ពុជាពិតជាជួយបង្កើនសមត្ថភាពបុគ្គលិកក្នុងការធ្វើគំរូសម្រាប់ទំនាក់ទំនងម៉ាក្រូហិរញ្ញវត្ថុ និងសិក្សាពីការរីកចម្រើនពីម៉ាក្រូសេដ្ឋកិច្ចទៅវិស័យហិរញ្ញវត្ថុ និងផ្ទុយមកវិញ។
លោក Seung hee Lee អគ្គនាយករងនៃអគ្គនាយកដ្ឋានកិច្ចការអន្តរជាតិនៃធនាគារកូរ៉េបានមានប្រសាសន៍ថា៖ «ឆ្នាំនេះយើងបានសម្រេចចិត្តផ្តោតលើទំនាក់ទំនងរវាងវិស័យហិរញ្ញវត្ថុ និងវិស័យពិតប្រាកដជាពិសេសលើវិស័យសំខាន់ៗចំនួន4 រួមមានវិស័យកាត់ដេរ សំណង់ កសិកម្ម និងទេសចរណ៍»។
ទោះជាយ៉ាងណាក៏ដោយលោក Lee បានមានប្រសាសន៍ថា ការរកឃើញនៃការស្រាវជ្រាវនេះនឹងមានប្រយោជន៍ក្នុងការសម្រេចបាននូវការអភិវឌ្ឍទីផ្សារហិរញ្ញវត្ថុដ៏រឹងមាំ និងកំណើនសេដ្ឋកិច្ចប្រកបដោយចីរភាពនៃសេដ្ឋកិច្ចកម្ពុជា។
លោកស្រី ជា សិរី អគ្គនាយិកានៃអគ្គនាយកដ្ឋានបច្ចេកទេសធនាគារជាតិនៃកម្ពុជាបានប្រាប់អ្នកយកព័ត៌មានថា៖ «ប្រទេសកម្ពុជា គឺជាសេដ្ឋកិច្ចប្រើប្រាស់ប្រាក់ដុល្លារខ្ពស់ ហើយរហូតមកដល់ពេលនេះការប្រែប្រួលនៃអត្រាអតិផរណាមានឥទ្ធិពលខ្លាំងដោយអត្រាការប្រាក់» ដូច្នេះភាគីទាំងពីរនឹងស្រាវជ្រាវចាប់ពីថ្ងៃចុះហត្ថលេខានេះតទៅ ដោយរំពឹងថានឹងបញ្ចប់ ហើយចេញរបាយការណ៍ការរកឃើញនៅខែធ្នូ ឆ្នាំ2018នេះ៕
July 11, 2018
កម្ពុជាចាប់ផ្ដើមជំរុញឧស្សាហកម្មដំឡូងមីទៅកាន់ទីផ្សារពិភពលោក
រដ្ឋាភិបាលកម្ពុជា បានចាប់ផ្តើមជាផ្លូវការនូវយុទ្ធសាស្ត្រថ្មីរបស់ខ្លួនសម្រាប់ឧស្សាហកម្មដំឡូងមីក្នុងគោលបំណងធ្វើឱ្យកម្ពុជាក្លាយជាអ្នកផ្គត់ផ្គង់ផលិតផលដំឡូងមី ដែលអាចទុកចិត្តបានដល់ទីផ្សារពិភពលោកតាមរយៈគោលនយោបាយជាតិសម្រាប់ឧស្សាហកម្មដំឡូងមី។ នេះបើតាមការឱ្យដឹងពីមន្ត្រីជាន់ខ្ពស់នៃក្រសួងពាណិជ្ជកម្ម។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងនៅក្នុងពិធីប្រកាសគោលនយោបាយជាតិសម្រាប់ឧស្សាហកម្មដំឡូងមីកាលពីថ្ងៃទី10 ម្សិលមិញ នៅទីស្ដីការក្រសួងក្នុងរាជធានីភ្នំពេញថា យុទ្ធសាស្ត្រថ្មីនេះគ្របដណ្ដប់ 5ឆ្នាំ ចាប់ពីឆ្នាំ2018 ដល់ឆ្នាំ2022 ហើយមានគោលបំណងធ្វើឱ្យប្រទេសកម្ពុជាក្លាយទៅជាប្រភពសម្រាប់ឧស្សាហកម្មកែច្នៃដំឡូងមី។ គោលនយោបាយថ្មីនេះនឹងជួយផ្លាស់ប្តូរវិស័យដំឡូងមី ពីកសិកម្មចិញ្ចឹមជីវិត ទៅជាផលិតកម្មសម្រាប់ពាណិជ្ជកម្មព្រមជាមួយការផ្តល់អាទិភាពដល់ការកែលម្អស្តង់ដារជីវភាពសម្រាប់កសិករ។
លោករដ្ឋមន្ត្រីបានមានប្រសាសន៍ថា៖ «គោលនយោបាយនេះនឹងជួយដល់រោងចក្រកែច្នៃសកម្មនិងទាក់ទាញការវិនិយោគដើម្បីផលិតផលិតផលដំឡូងមីដែលមានតម្លៃបន្ថែមដើម្បីផ្គត់ផ្គង់ទីផ្សារចម្រុះ។ ជាងនេះទៀត ក៏នឹងជួយលើកកម្ពស់ការប្រើប្រាស់ផលិតផលដំឡូងមី និងសំណល់ពីចំណីសត្វនិងជី ជាសម្ភារដែលមានតម្លៃថោកសម្រាប់កសិករខ្មែរ។ ផលិតកម្មពាណិជ្ជកម្ម ក៏នឹងជួយបង្កើនសមត្ថភាពដល់កសិករទាំងអស់ដើម្បីបង្កើនប្រាក់ចំណូលក្នុងបរិបទនៃការប្រែប្រួលតម្លៃ ការប្រើប្រាស់ដីធ្លីប្រកបដោយនិរន្តរភាព និងកសិកម្មដែលឆ្លាតវៃតាមអាកាសធាតុ»។
អ្នកសេដ្ឋកិច្ច អង្គការកម្មវិធីអភិវឌ្ឍន៍សហប្រជាជាតិនៅកម្ពុជា(UNDP) លោក Richard Marshall បានថ្លែងថា អង្គការយូអិនឌីភីបានធ្វើការជាមួយរដ្ឋាភិបាលកម្ពុជាដើម្បីធ្វើសេចក្តីព្រាងគោលនយោបាយអភិវឌ្ឍន៍វិស័យដំឡូងមី។ គោលបំណង គឺធ្វើឱ្យកម្ពុជាបង្កើនខ្សែចង្វាក់តម្លៃដោយកែលម្អគុណភាពផលិតកម្មដំឡូងមី និងបង្កើនភាពជឿជាក់។ គោលនយោបាយនេះមានបំណងផ្លាស់ប្តូរដំឡូងមីទៅជាដំណាំផ្ដល់ផលចំណេញដល់កសិករខ្នាតតូច និងជាប្រភពនៃការអភិវឌ្ឍឧស្សាហកម្មសម្រាប់កម្ពុជា។
លោកបានមានប្រសាសន៍ថា ដើម្បីចាប់ផ្តើមដំណើរការផ្លាស់ប្តូរនេះ ការធ្វើពាណិជ្ជកម្មនៃផលិតកម្មដំឡូងមី និងការអភិវឌ្ឍកសិ-ពាណិជ្ជកម្មគួរតែត្រូវបានធ្វើឡើងក្នុងពេលដំណាលគ្នាដើម្បីលើកកម្ពស់ដំណាំនៅតាមតំបន់ផ្សេងទៀតក្នុងពិភពលោក” ។
ជារួម គោលនយោបាយនេះនឹងលើកទឹកចិត្តដល់ការវិនិយោគបន្ថែមទៀត ហើយវានឹងជំរុញតម្លៃដំឡូងមី និងបង្កើនជីវភាពរស់នៅរបស់កសិករ ខណៈដែលប្រទេសកម្ពុជាមានកសិករប្រហែល90,000គ្រួសារដែលផលិតដំឡូងមី។
បច្ចុប្បន្ននេះក្រសួងពាណិជ្ជកម្ម បាននិងកំពុងប្រឹងប្រែងជំរុញការនាំចេញផលិតផលដំឡូងមីទៅកាន់ប្រទេសចិនដោយសារតែប្រទេសទាំង2 បានចុះហត្ថលេខាលើពិធីសារស្តីពីប្រព័ន្ធអនុគ្រោះពន្ធ និងលក្ខខណ្ឌតម្រូវផ្នែកភូតគាមអនាម័យ និងអនាម័យ ហើយបាននិងកំពុងសិក្សាពីលទ្ធភាពកែច្នៃដំឡូងមីនិងធ្វើពិពិធកម្មទីផ្សារនាំចេញ។
នៅក្នុងប្រទេសកម្ពុជា ដំឡូងមីត្រូវបានដាំដុះក្នុងខេត្តចំនួន13 នៅលើផ្ទៃដីជាង 570,000ហិកតា និងផ្តល់ទិន្នផលប្រមាណ 13លានតោនក្នុងមួយឆ្នាំ។ កាលពីឆ្នាំ2017 កម្ពុជាបានក្លាយជាប្រទេសដែលឈរនៅលំដាប់លេខរៀងទី8 ក្នុងចំណោមប្រទេសផលិតដំឡូងមីធំៗទាំង១០នៅលើពិភពលោក៕
July 11, 2018
លោក Southgate សង្ឃឹមថា អង់គ្លេស នឹងគេចផុតពីការភិតភ័យក្នុងវគ្គ 1/2 ផ្តាច់ព្រ័ត្រ
លោក Gareth Southgate គ្រូបង្វឹកនៃក្រុមបាល់ទាត់ជម្រើសជាតិអង់គ្លេស បានបញ្ជាក់ថា ក្រុមដែលគ្មានបទពិសោធរបស់លោក ត្រូវតែសម្លឹងរកការបង្ហាញពីទម្រង់លេងក្នុង «កម្រិតជាធម្មតា» របស់ពួកគេ បើទោះបីត្រូវមានសម្ពាធសម្រាប់ការលេងក្នុងព្រឹត្តិការណ៍ World Cup វគ្គពាក់កណ្តាលផ្តាច់ព្រ័ត្រនេះក៏ដោយ។
ក្រុមជម្រើសជាតិអង់គ្លេស នឹងត្រូវប៉ះជាមួយនឹងក្រុមជម្រើសជាតិក្រូអាស៊ី ក្នុងទីក្រុងម៉ូស្គូ នៅរាត្រីនេះ ក្រោយពីបានឈានទៅវគ្គ 4ក្រុមចុងក្រោយនៃយុទ្ធនាការដ៏ធំមួយនេះជាលើកដំបូង ចាប់តាំងពីព្រឹត្តិការណ៍ Euro ឆ្នាំ1996 ដែលនៅពេលនោះលោក Southgate បានស៊ុតបាល់ប៉េណាល់ទីកាត់សេចក្តីមិនចូលទី បណ្ដាលឱ្យចាញ់ក្រុមជម្រើសជាតិអាល្លឺម៉ង់។
បច្ចុប្បន្ន គ្រូបង្វឹករូបនេះកំពុងតែព្យាយាមលុបចោលការធ្វេសប្រហែសផ្សេងៗ ខណៈដែលក្រុមប្រជុំដោយកីឡាករវ័យក្មេងរបស់លោកកំពុងត្រៀមប្រជែងកៅអីទៅវគ្គបន្តដើម្បីឈ្នះពាន World Cup ដូចកាលពីឆ្នាំ1966 នៅលើទឹកដីខ្លួនឯង។ លោក Southgate បានប្រាប់អ្នកយកព័ត៌មានកាលពីថ្ងៃអង្គារថា រឿងដ៏សំខាន់បំផុត គឺការក្សា និងធ្វើឱ្យអ្វីៗស្ថិតនៅជាធម្មតាតាមដែលអាចធ្វើបាន។ យើងបានស្ថិតក្នុងអារម្មណ៍ស្ងប់ក្នុងជំរំរបស់យើង ដោយត្រៀមលក្ខណៈដូចគ្នា។ ការត្រៀមលក្ខណៈរបស់យើងសម្រាប់ការប្រកួតនេះ ស្ថិតនៅជាធម្មតា។ ខ្ញុំគិតថា វាពិតជាសំខាន់ណាស់ក្នុងការមានភាពរឹងមាំក្នុងការប្រកួតនេះ»។
ជាមួយគ្នានេះ ខ្សែការពារអន្តរជាតិក្រូអាស៊ី DejanLovren ជឿជាក់ថា ក្រុមរបស់គេ កំពុងតែត្រៀមលក្ខណៈរួចរាល់ក្នុងការដណ្តើមយកឱកាសដ៏ល្អមួយក្នុងជីវិត នៅពេលដែលពួកគេប៉ះជាមួយនឹងក្រុមបាល់ទាត់ជម្រើសជាតិអង់គ្លេស។ មានកង្វល់ជាច្រើនថា ការអស់កម្លាំងអាចនឹងក្លាយជាកត្តាគួរឱ្យបារម្ភមួយសម្រាប់ក្រុមរបស់លោក Zlatko Dalic ដោយសារតែពួកគេត្រូវបង្ខំចិត្តលេងពន្យារការប្រកួតរយៈពេល120នាទី និងការស៊ុតបាល់ប៉េណាល់ទី ទាំងក្នុងពេលប្រកួតជាមួយនឹងក្រុមម្ចាស់ផ្ទះ និងក្រុមជម្រើសជាតិដាណឺម៉ាក ក្នុងការប្រកួត 2ជុំចុងក្រោយ។ ប៉ុន្តែ ទោះបីជាយ៉ាងណា ខ្សែការពារកណ្តាល Lovren របស់ក្លិប Liverpool បានច្រានចោលចំពោះការបារម្ភបែបនេះ។ ការប្រកួតនេះនឹងចាប់ផ្តើមនៅម៉ោង 1រំលងអធ្រាត្រ៕
ប្រភពពី៖ Channel News Asia
July 11, 2018
សូមចូលរួមសោកស្តាយ ប៉ុន្មាននាទីមុននេះអ្នកស្លាប់នៅជប៉ុនកើនឡើងដល់ 179នាក់ហើយ
សេចក្តីរាយការណ៍ពីអ្នកនាំពាក្យរបស់រដ្ឋាភិបាលជប៉ុន ដកស្រង់ដោយសារព័ត៌មាន AFP បានបញ្ជាក់ថាអ្នកស្លាប់នៅជប៉ុនបានកើនឡើងដល់ 179នាក់ហើយ នៅក្នុងគ្រោះទឹកជំនន់នៅប្រទេសជប៉ុន។
ក្រុមអ្នកជំនាញកំពុងតែខិតខំប្រឹងប្រែងរុករកអ្នកបាត់ខ្លួនបន្តនៅក្រោមគំនរបែកបាក់ និងអ្នកខ្លះទៀតត្រូវបានគេជឿថាកប់ក្នុងគំនរភក់។
ដើម្បីដោះស្រាយបញ្ហានេះ ក្រុមអ្នកជួយសង្គ្រោះបានចេញប្រតិបត្តិការដោយប្រើគ្រឿងចក្រ និងឧទ្ធម្ភាគចក្រ នៅគ្រប់ទីកន្លែងនៅក្នុងតំបន់មួយចំនួនដូចជា ខេត្តហ៊ីរ៉ូស៊ីម៉ា អូកាយ៉ា អ៊ីហ៊ីមី ក្យូតូ យ៉ាម៉ាហ្គូជី ហ្វូគូកា ខាហ្គូស៊ីម៉ា ក្យូហ្គោ ស្សីហ្គា ជីហ្វូ កូជី និងសាហ្គា។
នៅក្នុងគ្រោះថ្នាក់នេះបានកាត់ផ្តាច់ផ្លូវធ្វើដំណើរ ចរន្តអគ្គិសនីយ និងប្រព័ន្ធទឹកស្អាតដល់មនុស្សរាប់លាននាក់នៅក្នុងប្រទេសជប៉ុន និងមនុស្សជាច្រើននាក់ផ្សេងទៀតកំពុងត្រូវបានជម្លៀសទៅកន្លែងមានសុវត្ថិភាព៕
July 11, 2018
កងរាជអាវុធហត្ថជូនដំណឹងអំពីការចល័តកម្លាំង សូមប្រជាពលរដ្ឋកុំភ្ញាក់ផ្អើល
កងរាជអាវុធហត្ថលើផ្ទៃប្រទេស បានចេញសេចក្តីប្រកាសថា អង្គភាពនឹងធ្វើការចល័តកម្លាំងកងរាជអាវុធហត្ថពីទីក្រុងភ្នំពេញ ទៅខេត្តស្វាយរៀង។ ការចល័តកងកម្លាំងនេះ គឺធ្វើឡើងដើម្បីរំឭកខួបអនុស្សាវរីយ៍លើកទី25 នៃទិវាកងរាជអាវុធហត្ថកម្ពុជា (14 កក្កដា 1993 – 14 កក្កដា 2018)។
នៅថ្ងៃទី12 ខែកក្កដា ស្អែកនេះនឹងមានកម្លាំងកងរាជអាវុធហត្ថប្រមាណ 800នាក់ត្រូវចល័តពីសាលាកងរាជអាវុធហត្ថកំបូល និងមជ្ឈមណ្ឌលហ្វឹកហ្វឺនភ្នំជុំរាយ ទៅកាន់ខេត្តស្វាយរៀងនៅពេលយប់ ហើយនឹងត្រឡប់មកវិញនៅថ្ងៃទី14 ខែកក្កដា ឆ្នាំ2018។ អាស្រ័យហេតុនេះសូមសាធារណជនកុំមានការភ្ញាក់ផ្អើល និងព្រួយបារម្ភពីការចល័តកងកម្លាំងនេះ៕

July 11, 2018
NHK បញ្ជាក់កាលពី2ម៉ោងមុននេះថាចំនួនអ្នកស្លាប់នៅជប៉ុនកើនឡើងដល់ 162នាក់ហើយ
តាមសេចក្តីរាយការណ៍របស់ទូរទស្សន៍ជាតិជប៉ុន (NHK) បញ្ជាក់ថាចំនួនអ្នកស្លាប់ដោយសារគ្រោះទឹកជំនន់បានកើនឡើងដល់ 162នាក់ហើយ នៅភាគខាងលិចនៃប្រទេស។
ស្របពេលនេះដែរ អាជ្ញាធរបានបញ្ជាក់ថា ខណៈពេលនេះអ្នកបាត់ខ្លួនមានចំនួន 56នាក់ ហើយសេចក្តីរាយការណ៍បានបញ្ជាក់ថានៅខេត្តហ៊ីរ៉ូស៊ីម៉ា គឺជាតំបន់ដែលរងការវាយលុកដោយកម្លាំងទឹកច្រើនជាងគេ។
អ្នកគ្រប់គ្រងតំបន់នៃភាគខាងលិចប្រទេសជប៉ុន បានលើកឡើងថា មកដល់ត្រឹមម៉ោង 10:30នាទីព្រឹកថ្ងៃពុធនេះ មានមនុស្សប្រមាណ 7,200នាក់គឺកំពុងស្ថិងក្នុងជំរកសុវត្ថិភាព នៃមជ្ឈមណ្ឌលសម្រាប់ជនរងគ្រោះនៅក្នុងខេត្តចំនួនទាំង 15៕

July 11, 2018
ប៉ែន ចំរុង នឹកកូនស្រី រហូតដល់ស៊ែរព័ត៌មានទាក់ទងនឹងកូនស្រីខ្លួន
ចាប់ពីក្រោយពេលដែល លោក ប៉ែន ចំរ៉ុង និងអ្នកនាង ភិន សុដាលីស បានលែងលះគ្នាដាច់ស្រេចរួចមក គេកត់សម្គាល់ឃើញថា លោក ប៉ែន ចំរ៉ុង ព្យាយាមកប់ចោលនូវរឿងរ៉ាវអតីតកាលរបស់ខ្លួន ដោយមិនមានដំណឹងលេចឮថានឹកនាដល់កូនស្រីរបស់ខ្លួនដែលស្ថិតក្រោមការបីបាច់ថែរក្សាពីសំណាក់ អ្នកនាង ភិន សុដាលីស និងលោក អិន សុភិន ជាជីតាសោះឡើយ។
ប៉ុន្តែនៅពេលថ្មីនេះៗ គេបានមើលឃើញលោកធ្វើការចែករំលែកព័ត៌មានទាក់ទងនឹងកូនស្រីរបស់លោកជាមួយនឹងអ្នកនាង ភិន សុដាលីស ដែលព័ត៌មាននោះមានចំណងជើងថា “ក្រោយឃើញវីដេអូនេះ កូនស្រី ភិន សុដាលីស ធ្វើឱ្យទស្សនិកជនឃ្នាន់ខ្នាញ់មិនស្ទើរ…” ដែលក្នុងព័ត៌មាននេះក៏មានបង្ហាញពីរូបភាពស្អាតៗរបស់កូនស្រីរបស់លោកផងដែរ។ ក្នុងនោះអ្នកគាំទ្រជាច្រើន បានសាកសួរទៅលោកត្រង់ៗថា តើមាននឹកកូនអត់? ប៉ុន្តែលោកមិនបានឆ្លើយតបថាយ៉ាងណាឡើយ។ បើទោះជាមិនឆ្លើយតបនឹងសំនួររបស់ប្រិយមិត្តដែលបានចោទសួរនោះក៏ពិតមែន តែនេះជាលើកទីមួយហើយដែលរូបលោកបានចែកចាយព័ត៌មានទាក់ទងនឹងកូនស្រីរបស់លោក ដែលអាចបញ្ជាក់បានថា រូបលោកពិតជាចង់ឃើញ និងមានការនឹករឭកកូនស្រីម្នាក់នេះខ្លាំងណាស់។
គួរបញ្ជាក់ផងដែរថា មកទល់ពេលនេះពិធីករល្បីឈ្មោះរូបនេះ កំពុងសាងស្នេហាថ្មីមួយទៀតស្រេចទៅហើយ ដែលកាលពីប៉ុន្មានខែមុននេះ លោកត្រូវបានគេទម្លាយឃ្លីបវីដេអូមួយជាមួយនារីវ័យក្មេងម្នាក់ដែលបានកាន់នំខួបកំណើតមួយ និង ហៅ ប៉ែន ចំរ៉ុង ថា ប្ដីពេញៗមាត់ដោយគ្មានលាក់លៀមទៀតផង ចំណែកលោក ប៉ែន ចំរ៉ុង វិញបានឱបស្មា និងផ្តល់ស្នាមថើបដល់នារីម្នាក់នោះយ៉ាងផ្អែមល្អែម ព្រមជាមួយពាក្យថា “ឈប់គិតច្រើនថា ប្តីមានស្រី កុំរករឿងប្តីទៀតណា” នៅចុងបញ្ចប់នៃឃ្លីបវីដេអូមួយនោះទៀតផង៕
July 11, 2018
ស្មារតី និងឆន្ទៈជាចំណុចសំខាន់បំផុតដើម្បីអភិវឌ្ឍស្ថាប័ន និងសង្គម
ពីមួយជំហានទៅមួយជំហាន កម្ពុជាបានព្យាយាមអភិវឌ្ឍខ្លួនពីប្រទេសដែលមានចំណូលទាបទៅជាប្រទេសដែលមានចំណូលមធ្យមកម្រិតទាប និងដាក់គោលដៅដើម្បីពង្រីកសមត្ថភាពឱ្យក្លាយជាប្រទេសដែលមានចំណូលមធ្យមកម្រិតខ្ពស់។ ដើម្បីសម្រេចបាននូវផែនការសកម្មទាំងអស់នោះ អ្នកជំនាញមើលឃើញថាចាំបាច់ត្រូវមានការចូលរួមយ៉ាងច្រើនពីប្រជាជនគ្រប់វ័យដើម្បីអភិវឌ្ឍផ្នែកផ្សេងៗដោយរាប់បញ្ចូលទាំងការរស់នៅប្រចាំថ្ងៃផងដែរ។
ឯកឧត្តម វង្សី វិសុទ្ធ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ឯកឧត្តម វង្សី វិសុទ្ធ បានលើកឡើងនៅក្នុងកម្មវិធី The Talk ថា កម្ពុជាត្រូវការជំរុញការអប់រំឱ្យកាន់តែខ្លាំងដើម្បីបណ្តុះបណ្តាលធនធានមនុស្សទាំងសមត្ថភាពវិជ្ជាជីវៈ និងការកសាងចរិតលក្ខណៈល្អ តាមរយៈការបណ្តុះបណ្តាលឆន្ទៈ ការដោះស្រាយបញ្ហា និងស្មារតីខ្ពស់។ កម្ពុជាត្រូវការអ្នកបន្តវេនទៅដឹកនាំលើគ្រប់វិស័យទាំងស្ថាប័នឯកជន ស្ថាប័នរដ្ឋ ឬសង្គមទាំងមូល ព្រោះពាក្យថាអ្នកដឹកនាំមិនសំដៅតែលើនាយករដ្ឋមន្ត្រីនោះទេ តែសំដៅលើអ្នកដែលមានសមត្ថភាពដឹកនាំលើគ្រប់ផ្នែកគ្រប់វិស័យទាំងអស់។ គុណសម្បត្តិសំខាន់របស់អ្នកដឹកនាំនៅថ្ងៃអនាគត គឺមិនមែនទាល់តែចេះហិ-រញ្ញវត្ថុ ចេះសេដ្ឋកិច្ច ឬចេះវិស្វកម្មនោះទេ តែការងារជាក់ស្តែងគឺត្រូវមានស្មារតី និងឆន្ទៈខ្ពស់ក្នុងការ-គ្រប់គ្រងការងារជាក់ស្តែង ការទំនាក់ទំនង ដំណោះស្រាយបញ្ហា និងសមត្ថភាពក្នុងដឹកនាំមនុស្សឱ្យរួមគ្នាដោះស្រាយបញ្ហាទៅតាមជំនាញរៀងៗខ្លួន។
ឯកឧត្តម វង្សី វិសុទ្ធ មានប្រសាសន៍ថា៖ “ការអប់រំបណ្តុះបណ្តាលដែលនាំឱ្យយុវជនមានភាព-រឹងមាំផ្នែកស្មារតី និងឆន្ទៈ ជាគោលការណ៍ជំរុញឱ្យមានភាពជោគជ័យក្នុងជីវិត ដែលវាអាចជំរុញឱ្យមានជោគជ័យក្នុងស្ថាប័នដែលយើងធ្វើការងារ និងសង្គមរបស់យើងទាំងមូល”។
អ្នកជំនាញខាងលើបានបង្ហាញផងដែរថាប្រទេសជប៉ុនជាប្រទេសដែលទទួលបានជោគជ័យបំផុតក្នុងការកសាងជាតិ ព្រោះប្រជាជនម្នាក់ៗជាមនុស្សដែលមានគុណធម៌ មានសមត្ថភាព និងស្មារតីទទួលខុសត្រូវខ្ពស់។ ដើម្បីសម្រេចជោគជ័យនេះជប៉ុន ជំរុញប្រជាជនឱ្យទទួលបានចំណេះដឹងទាំងផ្នែករឹង និងទន់ដើម្បីបណ្តុះបណ្តាលសមត្ថភាពក្នុងការគិតពិចារណា លុបបំបាត់ភាពអាត្មានិយម និងឆន្ទៈក្នុងការចូលរួមបានយ៉ាងល្អប្រសើរ។ ចំពោះកម្ពុជាយើងនាពេលបច្ចុប្បន្ន យើងក៏បានជំរុញ និងបង្កើនថវិកាជាតិយ៉ាងច្រើនលើវិស័យអប់រំ ព្រោះដំណាក់កាលនេះជាដំណាក់កាលដែលសង្គមត្រូវការធនធានមនុស្សបំផុត។
ឯកឧត្តមបានលើកឡើងថា ការអប់រំ (education) ខុសពីការរៀន (learning) ព្រោះការអប់រំមិនមែនគ្រាន់តែផ្តោតលើការសិក្សាអក្សរសិល្ប៍ គណិតវិទ្យា ឬមុខវិជ្ជាសង្គមមួយចំនួននោះទេ តែចាំបាច់ត្រូវតែមានប្រព័ន្ធក្នុងការបណ្តុះបណ្តាលមនុស្សឱ្យមានទស្សនៈ មានការយល់ឃើញ និងមានសមត្ថភាពក្នុងការសម្រេចចិត្តខ្ពស់។ ដើម្បីជោគជ័យលើការអប់រំបានគឺត្រូវជំរុញឱ្យមានការអភិវឌ្ឍខ្លាំងលើធាតុសំខាន់3 គឺការអប់រំបណ្តុះបណ្តាល ទី2សុខាភិបាល និងទី3គឺប្រព័ន្ធគាំពារសង្គម ព្រោះនៅពេលដែលយើងបានបណ្តុះបណ្តាលជំនាញដល់មនុស្សហើយ សុខភាពមិនល្អក៏គាត់មិនអាចប្រើប្រាស់សមត្ថភាពក្នុងការអភិវឌ្ឍសង្គមបានល្អដែរ ហើយបន្ថែមពីនេះទៀតប្រសិនបើគាត់មានបញ្ហាប្រឈមដែលលើសពីសុខាភិបាល ដូចជាហានិភ័យការងារមួយចំនួន យើងចាំបាច់ត្រូវមានប្រព័ន្ធការពារសង្គម ដើម្បីបង្កើនភាពកក់ក្តៅដល់គាត់។ នៅពេលនោះប្រជាជននឹងចាប់ផ្តើមព្យាយាមស្វែងយល់ច្រើន ហើយប្រើប្រាស់សមត្ថភាពក្នុងការគិតពិចារណាដើម្បីចូលរួមចំណែកល្អលើការអភិវឌ្ឍសង្គមឱ្យឆ្ពោះទៅរកគោលដៅល្អប្រសើរឡើង ដែលអាចនាំឱ្យសេដ្ឋកិច្ចក៏មានកំណើនល្អផងដែរ។
លោក រិន រ៉ាវុធ សាស្ត្រាចារ្យផ្នែកពាណិជ្ជកម្ម
សាស្ត្រាចារ្យផ្នែកពាណិជ្ជកម្ម លោក រិន រ៉ាវុធ បានលើកឡើងថា ការបណ្តុះបណ្តាលធនធានមនុស្សឱ្យមានសីលធម៌ និងការចូលរួម គឺជាគុណសម្បត្តិយ៉ាងសំខាន់មួយរបស់ប្រទេសអភិវឌ្ឍន៍នានានៅលើពិភពលោក ព្រោះការអភិវឌ្ឍ មិនប្រាកដថាត្រូវការតែអ្នកជំនាញតែមួយមុខនោះទេ តែចាំបាច់ត្រូវការប្រជាជន ឬសមាជិកនៃសង្គមប្រកបដោយការទទួលខុសត្រូវ។ នៅពេលដែលយើងមានអ្នកជំនាញ តែគាត់មិនមានវិន័យល្អក្នុងការធ្វើការងារ យើងនឹងមិនអាចប្រកួតប្រជែងបានល្អនៅក្នុងតំបន់នោះទេ ព្រោះការងារដែលកើតចេញពីមនុស្សដែលមិនសូវមានឆន្ទៈខ្ពស់ក្នុងការធ្វើការ ឬការទទួលខុសត្រូវអាចនឹងមិនទទួលបានលទ្ធផលល្អនោះទេ ហើយពេលខ្លះថែមទាំងធ្វើឱ្យមានភាពខ្ជះខ្ជាយលើធនធានថែមទៀតផង។
លោក រិន រ៉ាវុធ បាននិយាយថា៖ “ធនធានមនុស្សដែលរាប់ថាជាអ្នកមានគុណភាពពិតប្រាកដលុះត្រាតែគាត់មានទាំងសមត្ថភាពវិជ្ជាជីវៈ និងមានទាំងការទទួលខុសត្រូវខ្ពស់ចំពោះសកម្មភាព ដើម្បីសម្រេចផែនការរួមរបស់ស្ថាប័ន។ លើសពីនេះទៅទៀត ប្រសិនបើមនុស្សម្នាក់ៗយល់ពីកាតព្វកិច្ចរបស់ខ្លួន ហើយអនុវត្តដោយសីលធម៌ខ្ពស់ គាត់នឹងមិនសូវមានផលប៉ះពាល់ដល់អ្នកដទៃនោះទេ តែថែមទាំងអាចជួយមនុស្សជាច្រើនឱ្យរីកចម្រើនបានយ៉ាងល្អជាមួយគ្នាថែមទៀតផង”។
សាស្ត្រាចារ្យខាងលើបានលើកឡើងផងដែរថា ការគោរពគ្នា និងឆន្ទៈក្នុងការយោគយល់ ឬចេះក្រែងចិត្តគ្នា ក៏ជាផ្នែកយ៉ាងសំខាន់មួយដែលគួរបណ្តុះបណ្តាលមនុស្សគ្រប់គ្នា ព្រោះនៅពេលដែលមនុស្សមានគុណសម្បត្តិទាំងអស់នេះ គាត់នឹងអាចកាត់បន្ថយជម្លោះបានយ៉ាងល្អ។ នៅពេលដែលមនុស្សមានសមត្ថភាពខ្លាំង តែមិនខ្វល់ពីអ្នកដទៃគាត់អាចនឹងក្លាយជាចំណុចគ្រោះថ្នាក់ទៅវិញទេសម្រាប់ស្ថាប័ន ព្រោះគាត់នឹងប្រើប្រាស់សមត្ថភាពរបស់គាត់ដើម្បីសម្រេចគោលដៅដោយបង្កផលប៉ះពាល់ច្រើន ឬធ្វើឱ្យមានការខាតបង់សម្រាប់មនុស្សផ្សេងទៀត។ ហេតុនេះ ការបណ្តុះបណ្តាលសីលធម៌ និងវិន័យជាវិជ្ជមាន គួរធ្វើស្របគ្នាជាមួយនឹងការបណ្តុះបណ្តាលលើគ្រប់
ជំនាញដែលកំពុងត្រូវការក្នុងទីផ្សារការងារ៕
July 11, 2018
តារាសម្ដែង បេប៊ី រៀបរាប់ពីរឿងចម្លែកមួយ ខណៈគ្រងឈុតព្រះនាង ឥន្រ្ទទេវី
តារាសម្ដែងកញ្ញា បេប៊ី មួយរយៈចុងក្រោយនេះកំពុងទទួលបានការចាប់អារម្មណ៍យ៉ាងខ្លាំងពីសំណាក់អ្នកលេងបណ្ដាញសង្គមហ្វេសប៊ុក ស្របពេលដែលនាងបង្ហាញឈុតព្រះនាង ឥន្រ្ទទេវី ដែលមើលទៅស័ក្ដិសមបំផុត រួមទាំងសម្រស់ និងការតុបតែងមុខរបស់នាងដែលប្រៀបដូចជារូបគំនូរដែលផុសឡើងមកដូច្នោះដែរ។
កញ្ញា បេប៊ី បានបញ្ជាក់ប្រាប់ថា ពិតជាមានកិត្ដិយស និងមោទនភាពណាស់សម្រាប់រូបនាងក្នុងនាមជាតារាសម្ដែងមួយរូបដែលបានគ្រងព្រះពស្រ្តារបស់ព្រះនាងឥន្រ្ទទេវី ដែលជាក្សត្រីមួយអង្គពោរពេញដោយបញ្ញាញាណ។ នាងបានបន្ដថា ជាមួយនឹងក្ដីរីករាយនេះ ស្រាប់តែមានហេតុចម្លែកមួយកើតឡើងចំពោះរូបនាង នៅពេលដែលនាងកំពុងគ្រងឈុតបុរាណមួយនោះ នាងមានអារម្មណ៍ដូចជាឈឺក្បាលចង់ក្អួតភ្លាមៗតែម្ដង។ នាងបន្តថា ពីមុនមកនាងតែងតែបានឮថា មុនពេលគ្រងសម្លៀកបំពាក់សម័យបុរាណ ឬព្រះពស្រ្តារបស់អង្គក្សត្រណាមួយ ត្រូវតែមានការបន់ស្រន់ និងអុជធូបសុំ ជាមុនសិន ទើបគ្រងទៅបានសុខសប្បាយ គ្មានបញ្ហាអ្វីកើតឡើង ហើយនាងក៏បានអនុវត្ដទៅតាមនោះរួចរាល់អស់ហើយដែរ ប៉ុន្ដែក្រោយពីគ្រងសំលៀកបំពាក់នោះបានតែមួយភ្លែត ស្រាប់តែធ្វើឱ្យនាងវិលមុខ ឈឺក្បាលតែម្ដង។
បេប៊ី បានបញ្ជាក់ថា «ក្រោយពីកើតអាការនេះភ្លាម ម៉ាក់ក៏បានឱ្យខ្ញុំអុចធូបសុំទៅដល់បុព្វបុរសម្ដងទៀត។ គ្រាន់តែបានបន់ស្រន់ហើយភ្លាម អាការនោះក៏បាត់ដូចគេបេះចេញតែម្ដង។ ខ្ញុំសឹងតែមិនជឿថា មានហេតុការណ៍បែបនេះកើតឡើងចំពោះខ្ញុំឡើយ»។
ទោះបីជាយ៉ាងណា តារាសម្ដែងរូបនេះបានលើកឡើងថា នាងពិតជាមានអារម្មណ៍ថា ខ្លួនអស្ចារ្យខ្លាំងណាស់ជាមួយការគ្រងសំលៀកបំពាក់មួយឈុតនោះ ដោយសារតែចាប់តាំងពីចូលសិល្បៈអស់ជាច្រើនឆ្នាំ និងសម្ដែងអស់ជាច្រើនរឿងមកនាងមិនធ្លាប់បានគ្រងបុរាណបែបនេះឡើយ។ គួរបញ្ជាក់ថា តារាសម្ដែងរូបនេះក៏ទទួលបានពានរង្វាន់មាស សម្រាប់ឈុតបុរាណពីគណៈកម្មការរៀបចំកម្មវិធី ខួប 2ឆ្នាំរបស់គ្រួសារតារាកម្ពុជា ដោយមានការចូលរួមពីឯកឧត្ដមខៀវ កាញារិទ្ធ និងផលិតករ អ្នកនិពន្ធ និងតារាជាច្រើនរូបផងដែរ៕
July 11, 2018