សង្គម និងសេដ្ឋកិច្ច - La Reine Media

ប្រទេសចិនដាក់បណ្ដែតទឹកកប៉ាល់ដើរដោយអ៊ីដ្រូសែន-លីចូម

កប៉ាល់សេវាកម្មដំបូងរបស់ប្រទេសចិនដែលដំណើរការដោយថ្មផ្ទុកថាមពលអ៊ីដ្រសែន-លីចូម 500 kW កាលពីថ្ងៃទី 20 មីនា ត្រូវបានដាក់ឱ្យដំណើរការនៅទីក្រុង Zhongshan ខេត្ត Guangdong។

ជលយានដែលត្រូវបានហៅថា កប៉ាល់ Three Gorges hydrogen ship No.1 នេះ ប្រើប្រាស់ប្រព័ន្ធថ្មផ្ទុកឥន្ធនៈអ៊ីដ្រូសែន និងថ្មផ្ទុកអគ្គិសនីលីចូមផលិតក្នុងស្រុក។ វាគឺជាជំហានថ្មី និងសំខាន់មួយទៀតសម្រាប់វិស័យសាងសង់កប៉ាល់ដើរដោយថាមពលថ្មីរបស់ប្រទេសចិន ជាការបើកផ្លូវឱ្យមានការប្រើប្រាស់បច្ចេកវិទ្យាអ៊ីដ្រូសែនសម្រាប់កប៉ាល់ក្នុងស្រុក។

ដោយមានកម្លាំង 500 kW កប៉ាល់នេះអាចធ្វើដំណើរបាន 200 គីឡូម៉ែត្រ និងល្បឿន 28 គីឡូម៉ែត្រ/ម៉ោង។ កប៉ាល់នេះសមស្របសម្រាប់ការរក្សាភាពស្អាតនៃបរិស្ថាន ដោយវាប្រើប្រាស់ថាមពលតិច និងមិនសូវមានសំឡេងរំខានដូចកប៉ាល់ដំណើរការដោយប្រេងម៉ាស៊ូត និងប្រេងសាំង។

កប៉ាល់ Three Gorges hydrogen ship No.1 នឹងត្រូវបានប្រើប្រាស់ដើម្បីដឹកជញ្ជូន ល្បាត និងបំពេញភារកិច្ចបន្ទាន់នៅក្នុងតំបន់បឹងស្តុកទឹក Three Gorges (Sanxia)។

ក្រុមហ៊ុនសាងសង់កប៉ាល់រដ្ឋចិន (CSSC) និងក្រុមហ៊ុនអគ្គិសនីចិន Yangtze Power គឺជាអ្នកសាងសង់កប៉ាល់នេះ នៅក្រោមការគ្រប់គ្រងរបស់ក្រុមហ៊ុន Chana Three Gorges (CTG) និងបានចាប់ផ្ដើមការសាងសង់កាលពីខែឧសភា 2022។

ប្រទេសចិនកំពុងមានវឌ្ឍនភាពយ៉ាងខ្លាំងក្លា និងឆាប់រហ័ស ទាក់ទងនឹងការសាងសង់កប៉ាល់ដែលប្រើប្រាស់ថាមពលអ៊ីដ្រូសែន។ ទីផ្សារថ្មផ្ទុកថាមពលអ៊ីដ្រូសែនក្នុងស្រុកត្រូវបានព្យាករថាអាចសម្រេចបានជាង 10 ពាន់លានយុន ប្រហែលនឹង 1.45 ពាន់លានដុល្លារអាម៉េរិក។ នេះក៏ព្រោះតែប្រទេសចិនមានគោលនយោបាយជំរុញ លើកទឹកចិត្តដល់ការផលិត និងប្រើប្រាស់កប៉ាល់ដើរដោយថាមពលកកើតឡើងវិញ ក្នុងបំណងកាត់បន្ថយការបំភាយកាបូនដែលជាឧស្ម័នធ្វើឱ្យផែនដីឡើងកម្ដៅ៕

March 22, 2023

គ្រូបង្វឹកក្រុមអាហ្សង់ទីនបង្ហើបពីរឿងអនាគតរបស់ Lionel Messi

គ្រូបង្វឹក Lionel Scaloni បានបង្ហើបព័ត៌មានខ្លះៗស្ដីពីអនាគតរបស់ Lionel Messi នៅក្នុងសន្និសីទសារព័ត៌មានមុនការប្រកួតមិត្តភាពអន្តរជាតិរវាងប៉ាណាម៉ា និង គូរ៉ាកាវ (Curacao)។

ថ្មីៗនេះ គ្រូបង្វឹក Lionel Scaloni បន្តរម្លឹកដល់អនាគតរបស់ Messi នៅក្នុងក្រុមជម្រើសជាតិអាហ្សង់ទីន បន្ទាប់ពីដណ្ដើមបានជើងឯក World Cup 2022 នៅកាតា។ ក្នុងសន្និសីទសារព័ត៌មានមុនការប្រកួតរវាង ប៉ាណាម៉ា និងគូរ៉ាកាវ គ្រូបង្វឹកវ័យ 44 ឆ្នាំបានឱ្យដឹងថា «Messi ប្រាកដជាតែងតែនៅទីនេះ និងរហូតដល់គាត់ចង់ចាកចេញដោយខ្លួនឯង។ ប្រាកដណាស់ Messi នឹងបន្តនៅជាមួយពួកយើង»។

«គាត់មានក្ដីសុខពេលបាននៅលើវាលស្មៅ និងក្នុងពណ៌អាវរបស់ប្រទេសជាតិ។ ប្រការនោះនឹងល្អបំផុតសម្រាប់ពួកយើង ហើយបើផ្ទុយពីនេះ ខ្ញុំនឹងព្យាយាមបញ្ចុះបញ្ចូលគាត់»។

Messi និងក្រុមជម្រើសជាតិអាហ្សង់ទីន បានជួបជុំគ្នាជាផ្លូវការនៅដើមសប្ដាហ៍នេះដើម្បីត្រៀមខ្លួនសម្រាប់ការប្រកួតមិត្តភាពអន្តរជាតិពីរប្រកួត។

Messi ទទួលបានការអបអរស្វាគមន៍យ៉ាងកក់ក្ដៅពីអ្នកគាំទ្រនៅពេលគាត់ត្រលប់ទៅដល់ប្រទេសអាហ្សង់ទីន

ក្រុមអាហ្សង់ទីននឹងប៉ះក្រុមប៉ាណាម៉ានៅម៉ោង 07 ព្រឹក ថ្ងៃទី 24 មីនា (ម៉ោងនៅកម្ពុជា)។ បួនថ្ងៃក្រោយមក ពួកគេនឹងប្រកួតជាមួយគូរ៉ាកាវនៅកីឡដ្ឋាន Madre de Ciudades របស់អាហ្សង់ទីន៕

March 22, 2023

ក្រុមហ៊ុនផលិតរថយន្ត Ford បញ្ចេញរថយន្ត Explorer កំណែអគ្គិសនី

ក្រុមហ៊ុន Ford បានបង្ហើបឱ្យដឹងអំពី Ford Explorer ដែលដំណើរដោយអគ្គិសនីទាំងស្រុង ហើយវាគឺជាម៉ូដែលរថយន្តអគ្គិសនីទីបីរបស់ក្រុមហ៊ុននេះ។

រថយន្តដែលត្រូវបានផលិតនៅប្រទេសអាល្លឺម៉ង់នេះត្រូវបានអធិប្បាយថាជារថយន្តដែលមានការរួមផ្សំរវាង «បច្ចេកទេសអាល្លឺម៉ង់ និងស្ទីលអាម៉េរិក»។

Ford ប្រកាសថា Explorer បញ្ចូលថាមពលថ្មក្នុងល្បឿនពី 10 ដល់ 80% ក្នុងរយៈពេល 25 នាទី នៅពេលប្រើឆ្នាំងសាករហ័ស DC។ រថយន្តនេះនឹងអាចប្រើប្រាស់ស្ថានីយបញ្ចូលថាមពលអគ្គិសនីចំនួន 500,000 កន្លែងនៅអឺរ៉ុប ចាប់ពីឆ្នាំក្រោយ។

ចំណែកចម្ងាយផ្លូវដែល Explorer អាចបរបាន នឹងត្រូវបានប្រកាសនាពេលខាងមុខ ហើយអតិថិជនអាចបញ្ជាទិញជាមុនចាប់ពីចុងឆ្នាំនេះ (សម្រាប់តំបន់អឺរ៉ុប)។ Ford Explorer មានពីរកំណែគឺ Explorer និង Explorer Premium។ តាមការគ្រោងទុក វានឹងមានតម្លៃក្រោម 73,000 ដុល្លារអាម៉េរិក។

ក្រុមហ៊ុន Ford កន្លងមកបានសន្យាថា នឹងលក់តែរថយន្តអគ្គិសនីប៉ុណ្ណោះនៅតំបន់អឺរ៉ុប ចាប់ពីឆ្នាំ 2030 ដើម្បីចូលរួមកាត់បន្ថយការបំភាយឧស្ម័នផ្ទះកញ្ចក់នៅទូទាំងសកលលោក៕

March 22, 2023

AI បំប្លែងសំណេរទៅជាវីដេអូដោយប្រើពេលប៉ុន្មានវិនាទីប៉ុណ្ណោះ

Runway បានបង្ហាញឧបករណ៍ AI មួយដែលមានសមត្ថភាពកែប្រែសំណេរអត្ថបទឱ្យទៅជាវីដេអូ ដោយស៊ីពេលយ៉ាងខ្លីស្ទើរតែមិនគួរឱ្យជឿ។

កាលពីថ្ងៃទី 20 មីនា Runway ដែលជាក្រុមហ៊ុន AI (បញ្ញាសិប្បនិម្មិត) មួយនៅសហរដ្ឋអាម៉េរិក បានបង្ហាញឧបករណ៍ Gen-2 អនុញ្ញាតឱ្យបង្កើតវីដេអូពីរូបថតធម្មតា ឬពីអត្ថបទជាសំណេរ។ ឧទាហរណ៍ នៅពេលអ្នកបញ្ចូលឃ្លា «ឆ្មាមួយក្បាលដើរក្រោមភ្លៀង» AI នឹងបង្កើតវីដេអូមួយមានរយៈពេលបីវិនាទីទាក់ទងនឹងអត្ថន័យក្នុងសំណេរនេះ។

Runway ចាប់កំណើតតាំងពីឆ្នាំ 2018 គឺជាក្រុមហ៊ុនបច្ចេកវិទ្យាល្បីឈ្មោះមួយស្ដីពីបញ្ញាសិប្បនិម្មិត មិនចាញ់ OpenAI ប៉ុន្មានឡើយ និងមានបុគ្គលិកធ្វើការជាង 40 នាក់។ ក្រុមហ៊ុននេះកំពុងផ្ដល់សេវាកម្មវ៉ែបសៃ ដែលជួយឱ្យអ្នកប្រើប្រាស់កែលំអវីដេអូរហ័ស ដូចជាការបន្ថែមបាតុភូត និងលុបរូបភាពខាងក្រោយជាដើម។

កាលពីឆ្នាំ 2019 Runway បានបង្ហាញកម្មវិធីកែវីដេអូដែលមានឈ្មោះថា Gen-1។ ឧបករណ៍នេះផ្ដោតទៅលើការកែប្រែវីដេអូ ការបញ្ចូលទិដ្ឋភាព 3D ជាដើមដោយប្រើប្រាស់ AI។ Gen-2 នៅតែយោងទៅលើ Gen-1 ប៉ុន្តែផ្ដោតសំខាន់ទៅលើការបង្កើតវីដេអូពីអត្ថបទសំណេរ រូបថត ឬសំណេរបូករូបថត។ ក៏ប៉ុន្តែភាពច្បាស់របស់វីដេអូដែលត្រូវបានបង្កើតឡើងដោយ AI ទាំងនេះមិនទាន់ល្អនៅឡើយ ហើយវាក៏មិនទាន់មានសំឡេងផងដែរ។

អនាគត ឧបករណ៍នេះនឹងត្រូវបានកែសម្រួលដើម្បីជួយដល់ស្ថាបត្យករ វិចិត្រករ និងផលិតករភាពយន្តប្រែក្លាយគំនិតឱ្យទៅជាវីដេអូបានលឿន និងការចំណាយទាប។

ទោះជាយ៉ាងណាក៏ដោយ មនុស្សមួយចំនួនមានការព្រួយបារម្ភអំពីផលវិបាកដែលបង្កើតឡើងដោយបញ្ញាសិប្បនិម្មិតនេះ ក្នុងនោះមានមតិជាច្រើនយល់ថា Gen-2 អាចត្រូវបានក្រុមមនុស្សទុច្ចរិតប្រើប្រាស់ដូចទៅនឹង Deepfake ដោយពួកគេអាចបង្កើតវីដេអូក្លែងក្លាយដើម្បីផ្សព្វផ្សាយព័ត៌មានមិនពិតក្នុងបំណងឆបោក។ល។

បច្ចុប្បន្ន Gen-2 មានការកំណត់សិទ្ធិចូលប្រើប្រាស់ ដោយតម្រូវឱ្យចុះឈ្មោះ និងរង់ចាំ។ យោងតាមក្រុមហ៊ុន Runway សិទ្ធិចូលប្រើប្រាស់នឹងត្រូវបានពង្រីកបន្ថែមនាប៉ុន្មានសប្ដាហ៍ខាងមុខ៕

March 22, 2023

Griezmann រងរបួសផ្លូវចិត្តនៅពេល Mbappe ក្លាយជាប្រធានក្រុមជម្រើសជាតិបារាំង

ខ្សែប្រយុទ្ធ Antoine Griezmann ពិចារណាអំពីការចាកចេញពីក្រុមបាល់ទាត់ជម្រើសជាតិបារាំង បន្ទាប់ពីគ្រូបង្វឹក Didier Deschamps ប្រគល់តួនាទីជាប្រធានក្រុមទៅឱ្យ Kylian Mbappe។

«Griezmann អន់ចិត្ត និងឈឺចិត្ត ពេលគ្រូបង្វឹក Deschamps រំលងចោលគាត់ និងប្រគល់តួនាទីប្រធានក្រុមឱ្យ Kylian Mbappe» ទំព័រ Le Figaro រាយការណ៍ដូច្នេះកាលពីថ្ងៃទី 21 មីនា។ «Griezmann កំពុងពិចារណាលើអនាគតនៅក្នុងក្រុមជម្រើសជាតិបារាំង»។

យោងតាមទំព័រ L’Équipe គ្រូបង្វឹក Deschamps ជ្រើសយកខ្សែប្រយុទ្ធ Kylian Mbappe ឱ្យធ្វើជាប្រធានក្រុមជម្រើសជាតិបារាំង ជំនួសអ្នកចាំទី Hugo Lloris ដែលបានចាកចេញក្រោយ World Cup 2022។ ការសម្រេចចិត្តចុងក្រោយអាចនឹងត្រូវបានប្រកាសក្នុងថ្ងៃទី 23 មីនា។ កាលពីថ្ងៃទី 20 មីនា Deschamps បញ្ជាក់ថា ការជ្រើសរើសរបស់លោកគឺដើម្បីផលប្រយោជន៍រួមរបស់ក្រុមទាំងមូល។

បើទោះជាមានព័ត៌មានពី Le Figaro ខ្សែប្រយុទ្ធ Griezmann នៅតែបង្ហាញភាពសប្បាយរីករាយពេលឡើងទៅប្រកួតឱ្យក្រុមជម្រើសជាតិ។ កីឡាកររបស់ក្លឹប Atletico Madrid ទើបតែឈានចូលដល់វ័យ 32 កាលពីថ្ងៃទី 21 មីនា។

ក្រុមបារាំងចាប់ផ្ដើមចូលប្រកួតក្នុងវគ្គជម្រុះ Euro 2024 ដោយការប៉ះនឹងក្រុមហូឡង់នៅថ្ងៃទី 24 មីនាខាងមុខ។ បីថ្ងៃក្រោយការប្រកួតនោះ Griezmann និងមិត្តរួមក្រុមបារាំងនឹងត្រូវជួបក្រុមអៀរឡង់។ ពូល B ដែលមានបារាំង ក៏នៅមានពីរក្រុមទៀតគឺ ក្រិក និងហ្ស៊ីប្រាល់តា៕

March 22, 2023

Mercedes-Benz វិនិយោគរាប់ពាន់លានដុល្លារលើការផលិតឡានអគ្គិសនី

ទស្សនាវដ្ដី Automobilwoche រាយការណ៍ថា ក្រុមហ៊ុន Mersedes-Benz នឹងវិនិយោគរាប់ពាន់លានដុល្លារអាម៉េរិកដើម្បីធ្វើទំនើបកម្មបណ្ដារោងចក្ររបស់ពួកគេនៅប្រទេសចិន អាល្លឺម៉ង់ និងហុងគ្រីនាពេលខាងមុខ ក្នុងបំណងត្រៀមខ្លួនដើម្បីផ្លាស់ប្ដូរទៅរករថយន្តអគ្គិសនី និងកាត់បន្ថយការបំភាយឧស្ម័ន។

សហភាពអឺរ៉ុបបានកំណត់គោលដៅកាត់បន្ថយឧស្ម័នផ្ទះកញ្ចក់ឱ្យបានពាក់កណ្ដាលសម្រាប់រថយន្តដឹកភ្ញៀវត្រឹមចុងទសវត្សរ៍នេះ និងកំពុងស្វែងរកកិច្ចព្រមព្រៀងស្ដីពីកាលបរិច្ឆេទចុងក្រោយគឺនៅឆ្នាំ 2035 ដើម្បីបញ្ចប់ការលក់រថយន្តដើរដោយឥន្ធនៈផូស៊ីល។

ក្រុមហ៊ុន Mercedes បានឱ្យដឹងថា ពួកគេនឹងលក់តែរថយន្តអគ្គិសនីចាប់ពីចុងទសវត្សរ៍នេះ នៅពេលលក្ខខណ្ឌទីផ្សារអនុញ្ញាត។ ប្រធានផ្នែកផលិត Joerg Burzer របស់ Mercedes បាននិយាយថា «យើងកំពុងវិនិយោគប្រាក់ឡើងដល់រាប់ពាន់លានដុល្លារសម្រាប់រោងចក្រនីមួយៗក្នុងពេលខាងមុខ»។ លោកបន្តថា ខ្ទង់ប្រាក់វិនិយោគនេះនឹងប្រើប្រាស់នៅក្នុងបណ្ដារោងចក្រនៅរដ្ឋធានីរបស់ប្រទេសចិន ទីក្រុង Rastatt របស់អាល្លឺម៉ង់ និង Kecskemet របស់ហុងគ្រី។

Automobilwoche ក៏បានរាយការណ៍ថា Mercedes ក៏កំពុងពិនិត្យលទ្ធភាពពង្រីករោងចក្រផលិតរថយន្តអគ្គិសនីនៅសហរដ្ឋអាម៉េរិក ជាទីដែលក្រុមហ៊ុននេះនឹងទទួលបានអត្ថប្រយោជន៍ច្រើនពីគោលនយោបាយឧបត្ថម្ភរបស់រដ្ឋាភិបាលទៅតាមច្បាប់កាត់បន្ថយអតិផរណាដែលបង្កើតឡើងកាលពីឆ្នាំមុន៕

March 21, 2023

ក្រសួងណែនាំដល់ក្រុមហ៊ុនទេសចរណ៍ ដាក់បង្ហាញតម្លៃសេវាកម្មជូនអតិថិជន

នាទីរសៀលថ្ងៃទី 21 មីនា 2023 ក្រសួងទេសចរណ៍បានប្រកាសសារាចរណែនាំមួយដែលតម្រូវឱ្យគ្រប់អាជីវកម្មសេវាកម្មទេសចរណ៍ រៀបចំដាក់បង្ហាញតម្លៃលើបញ្ជីរាយនាមសេវាកម្ម ដើម្បីផ្ដល់ភាពងាយស្រួលដល់ទេសចរក្នុងការសម្រេចចិត្ត។

សារាចរណែនាំរបស់ក្រសួងទេសចរណ៍ មានចំណុចត្រូវអនុវត្តមួយចំនួន ដូចខាងក្រោម៖

1). គ្រប់អាជីវកម្មសេវាកម្មទេសចរណ៍ទាំងអស់ ត្រូវរៀបចំឱ្យមានជាបញ្ជីរាយនាមសេវាកម្ម ដោយមានភ្ជាប់ជាមួយតម្លៃ (ដូចមានបញ្ជាក់ក្នុងប្រកាសលេខ ០៥២ ប្រក.ចុះថ្ងៃទី២៣ ខែមីនា ឆ្នាំ២០១៧ ស្ដីពីកាតព្វកិច្ចបង្កើតប្រើប្រាស់ និងបិទផ្សាយបញ្ជីរាយនាមសេវាកម្មទេសចរណ៍) ក្រោមទម្រង់ដូចតទៅ៖

– ត្រូវសរសេរជាភាសាខ្មែរនៅខាងមុខ ឬនៅពីលើ និងភាសាអង់គ្លេស នៅបន្ទាប់ ឬបន្ទាត់ខាងក្រោម និងភាសាបរទេសទីបីនៅបន្ទាប់ទៀត អាស្រ័យតាមស្ថានភាពជាក់ស្ដែងនៃអតិថិជនរបស់អាជីវកម្ម។

– ប្រភេទនៃសេវាកម្មទេសចរណ៍នីមួយៗ គួរមានបង្ហាញជារូបភាព ឬការបរិយាយសេវាកម្ម។

– ត្រូវមានដាក់តាំងបង្ហាញនៅបរិវេណខាងមុខទីតាំងអាជីវកម្ម ឬកន្លែងងាយមើលឃើញ ។

– ត្រូវមានបញ្ជាក់ពីសេវាកម្មដែលភ្ជាប់ជាមួយ និងព័ត៌មានផ្សេងៗបន្ថែមទៀត ដែលចាំបាច់សម្រាប់ជាមូលដ្ឋានពិចារណាជ្រើសរើសដោយភ្ញៀវ។

– ត្រូវមានបញ្ជាក់តម្លៃឱ្យបានជាក់លាក់ និងការប្រើប្រាស់តម្លៃតាមជម្រើសបន្ថែមផ្សេងៗដែលមាន។

– ត្រូវផ្ដល់ជូនភ្ញៀវទេសចរមុនពេលពួកគេសម្រេចចិត្តប្រើប្រាស់ ឬទទួលយកសេវាកម្មទេសចរណ៍។

2). ចំពោះសេវាកម្មម្ហូបអាហារ តូបលក់ម្ហូបអាហារ តូបលក់អាហារចល័ត ដែលប្រកបអាជីវកម្មជាលក្ខណៈតូចតាច ឬការគ្រប់គ្រងលក្ខណៈគ្រួសារ ក៏ត្រូវអនុវត្តតាមការណែនាំដូចបានបញ្ជាក់ជូនខាងលើ ឬយ៉ាងហោចត្រូវមានដាក់តាំងបង្ហាញជារូបភាព ឬទម្រង់ងាយស្រួលផ្សេងៗ អំពីម្ហូបអាហារ ដែលមានជូនភ្ញៀវពិសាដោយមានបញ្ជាក់តម្លៃជាក់លាក់។

3). ការដាក់ឈ្មោះសេវាកម្ម និងឈ្មោះមុខម្ហូបនីមួយៗ ត្រូវគោរពតាមអត្តសញ្ញាណជាតិ សាសនា វប្បធម៌ ប្រពៃណី និងទនៀមទម្លាប់ខ្មែរ។

4). ចំពោះអាជីវកម្មសេវាកម្មទេសចរណ៍ ដែលពុំអនុវត្តតាមការណែនាំ គឺជាកម្មវត្ថុនៃការដកហូតអាជ្ញាបណ្ណ ទេសចរណ៍ ស្របតាមបទដ្ឋានគតិយុត្តជាធរមាន។

March 21, 2023

តម្លៃលក់រាយប្រេងឥន្ធនៈថ្មី ដែលត្រូវអនុវត្តចាប់ពីថ្ងៃទី 21 ដល់ថ្ងៃទី 31 ខែមីនា 2023

យោងតាមប្រកាសស្ដីពីតម្លៃលក់រាយប្រេងឥន្ធនៈថ្មី ដែលត្រូវអនុវត្តចាប់ពីថ្ងៃទី 21 ដល់ថ្ងៃទី 31 ខែមីនា 2023 របស់ក្រសួងពាណិជ្ជកម្ម សាំងធម្មតានឹងត្រូវលក់ 4,200 រៀល/លីត្រ (ចុះ ១០០ រៀល) និងប្រេងម៉ាស៊ូតត្រូវលក់ 4,050 រៀល/លីត្រ ធ្លាក់ថ្លៃ ២០០ រៀល ធៀបនឹងរយៈពេលកន្លង។

March 21, 2023

មួយគ្រាប់ទៀតប៉ុណ្ណោះ Messi នឹងធ្វើឱ្យគ្រប់គ្នាស្រែកជាថ្មីថា «អស្ចារ្យ»

Lionel Messi អាចបំបែកកំណត់ត្រាបច្ចុប្បន្នរបស់ខ្លួនមួយទៀត បើសិនទាត់បញ្ចូលទីបានមួយគ្រាប់នៅក្នុងការប្រកួតមិត្តភាពអន្តរជាតិ រវាងអាហ្សង់ទីន និងប៉ាណាម៉ានាពេលខាងមុខនៅក្នុងក្របខណ្ឌ FIFA Day។

នៅក្នុងការប្រកួតមិត្តភាពអន្តរជាតិក្នុងក្របខណ្ឌ FIFA Day ដែលជិតមកដល់ ក្រុមជម្រើសជាតិអាហ្សង់ទីននឹងត្រូវប៉ះក្រុមប៉ាណាម៉ា ដែលខ្សោយជាងគ្រប់ផ្នែក ហើយនេះនឹងជាឧបសគ្គងាយស្រួលបំផុតចំពោះ Albiceleste (ក្រុមបាល់ទាត់ជម្រើសជាតិអាហ្សង់ទីន)។ Messi ក៏បានត្រលប់ទៅកាន់អាហ្សង់ទីនរួចហើយដើម្បីត្រៀមខ្លួនសម្រាប់ការប្រកួតនេះ។

មួយរយៈពេលខ្លីចុងក្រោយនេះ ស្ថានភាពរបស់ El Pulga នៅក្លឹប PSG កំពុងតែជួបបញ្ហាមួយចំនួន ក្នុងនោះមានតាំងពីកិច្ចព្រមព្រៀងរវាង M10 និង PSG រហូតដល់រឿងអ្នកគាំទ្របង្ហាញប្រតិកម្មមិនល្អចំពោះកំពូលតារាបាល់ទាត់រូបនេះ។

ក៏ប៉ុន្តែ នៅក្នុងការប្រកួតមិត្តភាពអន្តរជាតិនាពេលខាងមុខ កំណត់ត្រាថ្មីកំពុងតែរង់ចាំ Messi ហើយនេះគឺជាឱកាសល្អដើម្បីឱ្យ M10 ស្ដារស្ថានការណ៍ឡើងវិញ។ ជាក់ស្ដែង Messi មានវ័យ 35 ឆ្នាំ រកបាន 701 គ្រាប់ក្នុងក្របខណ្ឌថ្នាក់ក្លឹប និង 98 គ្រាប់នៅថ្នាក់ជម្រើសជាតិ។ ដូច្នេះ នៅខ្វះតែមួយគ្រាប់ទៀតប៉ុណ្ណោះ Messi នឹងមាន 800 គ្រាប់ក្នុងដៃ។

ប៉ាណាម៉ា បច្ចុប្បន្នត្រូវបានគេវាយតម្លៃយ៉ាងទាបស្ដីពីសមត្ថភាពគ្រប់ផ្នែក បើធៀបនឹងអាហ្សង់ទីន។ យ៉ាងនេះហើយទើបគ្រប់គ្នាអាចព្យាករបានថា គ្រាប់បាល់ទី 800 របស់ Messi នឹងមិនមានឧបសគ្គអ្វីមករារាំងបានឡើយ។

នៅពេលគ្រាប់បាល់បានកើនដល់ 800 គ្រាប់ Lionel Messi ត្រូវជាប់ចំណាត់ថ្នាក់លេខបីក្នុងបញ្ជីចំណាត់ថ្នាក់កីឡាករ 10 នាក់ដែលស៊ុតបញ្ចូលទីបានច្រើនជាងគេនៅក្នុងអាជីព។ បច្ចុប្បន្ន ក្នុងបញ្ជីចំណាត់ថ្នាក់នេះ កីឡាករដែលឈរនៅលើគេបង្អស់គឺកំពូលកីឡាកររបស់ព័រទុយហ្កាល់ Cristiano Ronaldo ដោយរកបាន 828 គ្រាប់ និងលេខពីរគឺ 805 គ្រាប់របស់អតីតកំពូលកីឡាកររបស់ប្រទេសអូទ្រីស Josef Bican ខណៈដែលលេខបីបានទៅលើ Lionel Messi ដោយរកបាន 799 គ្រាប់៕

March 21, 2023

មិត្តស្រីរបស់មហាសេដ្ឋី Jeff Bezos ចំណាយពីរលានដុល្លារដើម្បីផលិតភាពយន្ត

ពិធីការិនី Lauren Sanchez ចំណាយប្រាក់ពីរលានដុល្លារសម្រាប់ការផលិតភាពយន្តដំបូងរបស់ខ្លួន និងអញ្ជើញកូនស្រីរបស់មិត្តប្រុស (មហាសេដ្ឋី Jeff Bezos) មកចូលរួមសម្ដែង។

យោងតាម Insider កាលពីថ្ងៃទី 20 មីនា Sanchez ទើបតែបានចាប់ផ្ដើមផលិតភាពយន្តរឿង The Golden Door តាមរយៈផលិតកម្ម Adventure & Fellowship របស់អ្នកស្រី។ MC រូបនេះចំណាយប្រាក់ផ្ទាល់ខ្លួនប្រហែលពីរលានដុល្លារ អញ្ជើញ Daniella Kertesz និង Megalyn Echikunwoke មកសម្ដែងជាតួអង្គសំខាន់។ កូនស្រីរបស់ Jeff Bezos ធ្វើជាសិស្សហាត់ការ និងសម្ដែងជាតួអង្គមួយក្នុងភាពយន្តនេះ។ គម្រោងនេះត្រូវ ថតប្រហែល 20 ថ្ងៃនៅ Topanga រដ្ឋ California។

Lauren Sanchez កើតឆ្នាំ 1969 នៅសហរដ្ឋអាម៉េរិក។ អ្នកស្រីគឺជាតារាសម្ដែង ពិធីការិនី និងជាម្ចាស់ផលិតកម្មភាពយន្ត។ អ្នកស្រីបានឆ្លងកាត់អាពាហ៍ពិពាហ៍ពីរលើក និងមានកូនបីនាក់។ មុនពេលបានរួមរស់ជាមួយលោក Bezos អ្នកស្រី Lauren ធ្លាប់ជាភរិយារបស់ Patrick Whitesell ដែលជាអ្នកមានមួយរូបក្នុងវិស័យសិល្បៈកំសាន្ត។

លោក Bezos និងអ្នកស្រី Lauren បានទាក់ទងគ្នាចាប់ពីឆ្នាំ 2018 និងត្រូវបានគេជឿថា បានភ្ជាប់ពាក្យកាលពីខែធ្នូ 2019។ អ្នកស្រី Lauren ធ្លាប់ត្រូវបានគេចាត់ទុកថាជា «មនុស្សទីបី» ដែលបានបណ្ដាលឱ្យលោក Bezos និងអ្នកស្រី MacKenzie Scott ត្រូវលែងលះគ្នា។

March 21, 2023

Category: សង្គម និងសេដ្ឋកិច្ច