Category: សង្គម និងសេដ្ឋកិច្ច

Justin Biber ឱបថើបគូដណ្ដឹងក្នុងឈុតសម្លៀកបំពាក់សិចស៊ីក្ដៅសាច់
តាមរយៈសារព័ត៌មាន Teenee បានចេញផ្សាយនៅថ្ងៃទី 16 ខែកក្កដា ឆ្នាំ 2018 នេះ បានឱ្យដឹងថា តារាចម្រៀងប្រុស Justin Biber បានបង្ហោះរូបភាពផ្អែមល្ហែមឱបថើបបឺតមាត់គ្នាជាមួយគូដណ្ដឹងរបស់នៅបណ្ដាញទំនាក់ទំនងសង្គម IG នៅក្នុងឈុតសម្លៀកបំពាក់សិចស៊ីក្ដៅសាច់ ដែលទាក់ទាញចិត្តអ្នកគាំទ្ររហូតដល់មានអ្នកចុច Like ដល់ទៅ 6 លាននាក់ ក្នុងរយៈពេល 8 ម៉ោង។
សូមជម្រាបផងដែរថា គូដណ្ដឹងរបស់តារាចម្រៀងប្រុសរូបនេះត្រូវបានគេស្គាល់ថាជាកញ្ញា Haley Baldwin ដែលអ្នកទាំងពីរចាប់ផ្ដើមស្គាល់គ្នាតាំងពីអំឡុងឆ្នាំ 2009 និងបានទំនាក់ទំនងស្នេហាគ្នារយៈពេល 1 ឆ្នាំ ។ គូស្នេហ៍ទាំងពីរនោះ ជាគូស្នេហ៍វ័យក្មេង ការចាប់ផ្ដើមស្នេហាដំបូងរបស់ពួកគេ គេមើលឃើញថាដូចជាភ្លើងចំបើងដែលឆាបឆេះតែមួយឆាវប៉ុណ្ណោះ។ លុះដល់ឆ្នាំ 2015 ពួកគេទាំងពីបានធ្វើការចាប់ផ្ដើមទំនាក់ទំនងស្នេហាសារជាថ្មី និងបានបង្ហោះរូបគូឱ្យមហាជនបានដឹងផងដែរ។ រហូតដល់ឆ្នាំ 2016 អ្នកទាំងពីរ បានចាប់ផ្ដើមបង្ហាញសកម្មភាពផ្អែមល្ហែមខ្លាំងឡើងៗ ដូចជាឱបថើបបឺតមាត់គ្នា និង មានរូបភាពខ្លះទៀត បានពីភាពសិចស៊ីនៅលើគ្រែតែម្ដង រហូតដល់អ្នកគាំទ្រលាន់មាត់ថា « គូស្នេហ៍សិចស៊ីរោលរាល »។
ដើម្បីឱ្យកាន់តែជាក់ច្បាស់បន្ថែម សូមទស្សនារូបភាពទាំងអស់ខាងក្រោមនេះ៖
July 16, 2018
Derma Care គ្លីនិកជំនាញខាងថែរក្សាសម្រស់ និងស្បែក បំពាក់ដោយឧបករណ៍ទំនើប
គ្លីនិក Derma Care ដែលជាគ្លីនិកជំនាញខាងថែរក្សាសម្រស់ និងស្បែក បានបើកដំណើរការនៅក្នុងប្រទេសកម្ពុជាយើងតាំងពីឆ្នាំ2008មកម្ល៉េះ ដោយមានទីតាំងស្ថិតនៅកណ្តាលក្រុងភ្នំពេញ គឺស្ថិតនៅផ្ទះលេខ 161b មហាវិថីព្រះនរោត្តម សង្កាត់បឹងកេងកង 1 ខណ្ឌចំការមនរាជធានីភ្នំពេញ។ ដោយទទួលបានការគាំទ្រពីសំណាក់អតិថិជនក្នុងស្រុក និងក្រៅស្រុកជាច្រើន ជាពិសេសគឺតារាសិល្បៈល្បីៗតែម្តង(អតិថិជនជាង3,000នាក់ និង 30%នៃអតិថិជនសរុប ជាជនបរទេសដែលរស់នៅក្នុងប្រទេសកម្ពុជា)។
គ្លីនិក Derma Care ប្រមូលផ្តុំដោយអ្នកឯកទេសខាងស្បែក ដែលមានបទពិសោធច្បាស់លាស់ និងយូរឆ្នាំ ផ្តល់ជូននូវការពិគ្រោះយោបល់ និងការព្យាបាលយ៉ាងមានប្រសិទ្ធភាពដើម្បីផ្តល់នូវភាពស្រស់ស្អាត និងជួយការពារភាពចាស់ជាងវ័យជូនដល់អតិថិជនគ្រប់ជាតិសាសន៍ ជាមួយនឹងគ្រូពេទ្យឯកទេសពិតប្រាកដ។សេវាកម្មរបស់ គ្លីនិក Derma Care មានដូចជា ៖
– ឡាស៊ែរ បំបាត់ខ្លាញ់ បន្តឹងស្បែក
– ម៉ាស៊ីនសម្រករាង
– ឡាស៊ែរ បំបាក់មុខខ្មូត កាត់ប្រជ្រុយសាច់ដុះ ឫស
– ឡាស៊ែរ បន្តឹងស្បែកមុខ និងប្រហោងមុខ
– លើកបន្តឹងត្របកភ្នែកដោយម៉ាស៊ីនផ្លាស្មា
– ព្យាបាលមុន ដោយពន្លឺ LED
– ឡាស៊ែរ បង្រួមរន្ធរោម និងរន្ធញើស
– បញ្ជូលវីតាមីន ជំនួយស្បែកភ្លឺថ្លា
– ឡាស៊ែរ បំបាត់ជាំមុខ អាចម៍រុយ និងជួយឱ្យស្បែកភ្លឺថ្លា
– រំលាយខ្លាញ់ដោយម៉ាស៊ីន Ultra S
– ម៉ាស៊ីនជួយឱ្យស្បែកមុខក្មេងជាងវ័យ
– ឡាស៊ែរបាញ់លុបស្នាមសាក់
– ស្ប៉ាខ្លួន
– ម៉ាស៊ីនបន្តឹងស្បែកមុខ និងសម្រករាង
– ម៉ាស្សាមុខ
– ម៉ាស្សាព្យាបាលមុខ
– ឡាស៊ែរ បាញ់ជម្រុះរោម
– ថ្នាំចាក់ជំនួយឱ្យស្បែកសភ្លឺថ្លា និងក្មេងជាងវ័យ
– ស៊ីរ៉ូមវីតាមីន ជំនួយសុខភាព និងស្បែក
– ថ្នាំចាក់បំបាត់ភាពជ្រីវជ្រួញ
– ថ្នាំចាក់បំពេញសាច់
– ថ្នាំចាក់ជំនួយសុខភាព និងស្បែក
– វីតាមីនចាក់ជំនួយស្បែកមុខ
– ថ្នាំចាក់បំបាត់សង្វារ
– ថ្នាំចាក់រំលាយខ្លាញ់
– ព្យាបាលសក់ជ្រុះ
– ការចាក់ខ្សែអំបោះ
– សេវាបករោមលើដងខ្លួន និងផ្ទៃមុខជាដើម។
នៅគ្លីនិក Derma Care ក៏មានសេវាកម្មថែរក្សាសម្រស់ ដើម្បីជួយប្រឆាំងនឹងភាពចាស់ជាងវ័យផងដែរ ដោយការប្រឆាំងនឹងភាពចាស់ជាងវ័យនឹងផ្តល់នូវភាពជឿជាក់ដល់លោកអ្នកផ្តល់នូវសុខភាពផ្លូវចិត្តធ្វើឱ្យមានអាយុយឺនយូរព្រោះអាចជួយឱ្យរាងកាយជួសជុលការខូចខាតដែលបណ្តាលមកពីភាពចាស់ និងជួយឱ្យដំណើរការព្យាបាលប្រព្រឹត្តទៅលឿន និងប្រសើរជាងមុន។ ហើយរាល់ការព្រឹក្សា និងវិភាគពីស្ថានភាពស្បែករបស់អតិថិជន គ្លីនិក Derma Care តែងធ្វើការវិភាគឈាមយ៉ាងច្បាស់លាស់ជាមុន ព្រមជាមួយនឹងការព្យាបាល Stemcell, ការព្យាបាលដោយអូហ្សូន, ការព្យាបាលដោយ Colon hydrotherapy, PRP ឬ Stemcell សម្រាប់ការព្យាបាលឆ្អឹង និងសន្លាក់ផងដែរ។ នៅក្នុងគ្លីនិកដ៏ប្រណីតលំដាប់អន្តរជាតិមួយនេះ គឺមានបន្ទប់ពិគ្រោះយោបល់ចំនួន 3ដែលមានភាពធំទូលាយ និងបំពាក់ដោយឧបករណ៍ទំនើបៗនាំចូលពីបរទេស ដើម្បីពិនិត្យស្បែក និងធ្វើការព្យាបាលយ៉ាងត្រឹមត្រូវតាមក្បួនវេជ្ជសាស្រ្តទំនើប ព្រមទាំងបន្ទប់ព្យាបាល និងផ្តល់សេវាកម្មជូនអតិថិជនជាច្រើនទៀត ប្រកបដោយអនាម័យខ្ពស់ និងមានផាសុកភាព។ ហើយម៉ាស៊ីនអេឡិចត្រូនិក និងម៉ាស៊ីនបាញ់ឡាស៊ែររបស់គ្លីនិក Derma Careគឺសុទ្ធសឹងតែជាម៉ាស៊ីនថ្មីបំផុត និងល្អបំផុត ម៉ាក USFDA និងម៉ាក KFDA ដែលជាស្តង់ដាររបស់សហរដ្ឋអាមេរិក អាឡឺម៉ង់ អេស្ប៉ាញ អុីតាលី អុីស្រាអ៊ែល កូរ៉េ និងថៃ ដែលធានាដល់ការព្យាបាលស្បែកប្រកបដោយសុវត្ថិភាព និងទទួលបានប្រសិទ្ភាពដូចបំណងប្រាថ្នា។ គ្លីនិក Derma Care មានក្រុមគ្រូពេទ្យឯកទេសខាងស្បែក និងវេជ្ជបណ្ឌិតដែលមានឯកទេសជំនាញជាជនជាតិខ្មែរ, ថៃ និងកូរ៉េផងដែរ។
ផលិផលថែរក្សាសម្រស់ស្បែក និងព្យាបាលបញ្ហាស្បែកនៅគ្លីនិក Derma Care មានដូចជា ម៉ាក DrGL គឺជាផលិតផលថែរក្សាស្បែកដ៏ល្បីល្បាញរបស់លោកវេជ្ជបណ្ឌិត Dr.GeorgiaLee ដែលមានការទទួលស្គាល់ និងល្បីល្បាញទូទាំងពិភពលោក ស័ក្តិសមសម្រាប់ប្រភេទស្បែករបស់ប្រជនជននៅក្នុងតំបន់អាស៊ី។ ផលិតផលម៉ាក Face Inc គឺជាផលិតផលដំបូងសម្រាប់ស្បែក និងល្អបំផុតសម្រាប់ថែទាំស្បែក ជួយដោះស្រាយបញ្ហាទូទៅនៃស្បែក ដូចជា ស្បែកកើតមុន បំបាត់ស្នាមជាំ សម្រាប់ស្បែកខ្មៅស្រអាប់ និងស្បែកដែលមានស្នាមជ្រីវជ្រួញ ឱ្យស្រស់ស្អាតផូរផង់ឡើងវិញ។
សម្រាប់ព័ត៌មានបន្ថែមសូមទូរស័ព្ទទៅកាន់លេខ 088 606 8888 / 077 606 888 ឬចូលទៅកាន់ទំព័រFacebook: derma-care skin clinic / Instagram : dermacare.kh។
ទទួលបាននូវសម្រស់ស្បែកដ៏ស្រស់ស្អាតជាទីគាប់ចិត្តជាមួយនឹង គ្លីនិក Derma Care កម្ពុជា៕

July 16, 2018
បារាំង លើកពាន World Cup ជាលើកទី២ ក្រោយផ្តួលក្រូអាស៊ី ចាស់ដៃនៅម៉ូស្គូ
ក្រុមបាល់ទាត់ជម្រើសជាតិបារាំង បានឈ្នះពាន World Cup ជាលើកទី២ តាមរយៈការបញ្ចប់ក្តីសុបិនរបស់ក្រុមជម្រើសជាតិក្រូអាស៊ី នៃការលើកពានជាលើកទី១ តាមរយៈការដណ្តើមបានជ័យជម្នះក្នុងលទ្ធផល ៤-២ កាលពីថ្ងៃអាទិត្យ ក្នុងការប្រកួតមួយក្នុងចំណោមការប្រកួតដ៏រំភើបបំផុតក្នុងវគ្គផ្តាច់ព្រ័ត្រ សម្រាប់រយៈពេលជាច្រើនទសវត្សរ៍កន្លងមកនេះ។
បារាំង បាននាំមុខ ២-១ នៅត្រឹមតង់ទី១ ក្រោយពីការធ្វើឲ្យបាល់ចូលទីខ្លួនឯងពីខ្សែប្រយុទ្ធ Mario Mandzukic និងការស៊ុតបាល់ប៉េណាល់១គ្រាប់ពី Antoine Griezmann ដែលត្រូវបានផ្តល់ឲ្យដោយវីដេអូជំនួយការអាជ្ញាកណ្តាល (VAR) ខណៈដែល Ivan Perisic បានតាមស្មើវិញក្នុងរយៈពេលដ៏ខ្លីសម្រាប់ក្រុមជម្រើសជាតិក្រូអាស៊ី។ គ្រាប់បាល់ស៊ុតបញ្ចូលទីយ៉ាងល្អពីសំណាក់ខ្សែបម្រើ Paul Pogba និងខ្សែប្រយុទ្ធ Kylian Mbappe នៅពាក់កណ្តាលតង់ទី២ បានជួយឲ្យបារាំង ស្ថិតនៅផ្លូវឆ្ពោះទៅកាន់ការលើកពាន Mandzukic បានវាយបក១គ្រាប់ទៀតដោយសារតែការធ្វេសប្រហែសរបស់អ្នកចាំទី Hugo Lloris ដើម្បីបង្កើតឲ្យមានការរន្ធត់ចិត្តក្នុងរយៈពេល២០នាទីចុងក្រោយ។
ទោះបីជាយ៉ាងណា បារាំង បានរារាំងការវាយសម្រុកយ៉ាងល្អរបស់ក្រូអាស៊ី ដើម្បីលើកពាន World Cup ជាលើកទី២ ក្រោយពីការឈ្នះពានជាលើកទី១របស់ពួកគេនៅលើទឹកដីខ្លួនឯងកាលពី២០ឆ្នាំមុន និងមិនបណ្តោយឲ្យមានការខកចិត្តជាលើកទី២កាលពី២ឆ្នាំមុន ដែលនៅពេលនោះពួកគេបានរងបរាជ័យក្នុងព្រឹត្តិការណ៍ Euro វគ្គផ្តាច់ព្រ័ត្រ ក្រោមស្នាដៃក្រុមជម្រើសជាតិព័រទុយហ្គាល់ នៅទីក្រុងប៉ារីស។ ក្រោយពីត្រូវបានលើកបោះចុះឡើងដោយកីឡាកររបស់លោកបន្ទាប់ពីការប្រកួតក្រោមដំណក់ទឹកភ្លៀង លោក Didier Deschamps គ្រូបង្វឹករបស់បារាំង បានឲ្យដឹងថា៖ «ពិតណាស់អស្ចារ្យណាស់។ វាជាក្រុមវ័យក្មេងមួយដែលស្ថិតក្នុងចំណាត់ថ្នាក់កំពូលលលើពិភពលោក។ ម្ចាស់ជើងឯកខ្លះមានវ័យត្រឹមតែ១៩ឆ្នាំប៉ុណ្ណោះ»៕

ប្រភពពី៖ Reuters
July 16, 2018
ឃ្លាំងស្តុក និងឡសម្ងួតស្រូវខ្នាតធំនៅក្នុងខេត្តចំនួន2 ត្រៀមខ្លួនជួយកសិករក្នុងរដូវប្រមូលផល
ឃ្លាំងស្តុក និងឡសម្ងួតស្រូវចំនួន2 ត្រូវបានដាក់សម្ពោធឱ្យប្រើប្រាស់នៅក្នុងខេត្ត2 ផ្សេងគ្នា គឺខេត្តបាត់ដំបង និងខេត្តកំពង់ធំ ដែលឃ្លាំងស្តុកស្រូវ និងឡសម្ងួតទាំង2 នេះនឹងជួយដល់ប្រជាកសិករបានច្រើនក្នុងរដូវប្រមូលផលស្រូវខាងមុខនេះ។
ទី1-ឃ្លាំងស្តុកស្រូវចំនួន 5ម៉ឺនតោន និងឡសម្ងួតស្រូវដែលមានសមត្ថភាពសម្ងួតបាន1,500តោនក្នុងមួយថ្ងៃដែលធំជាងគេនៅក្នុងខេត្តកំពង់ធំ ស្ថិតក្រោមគម្រោងវិនិយោគពិសេសក្នុងទម្រង់ជាបំណុលរបស់រាជរដ្ឋាភិបាលកម្ពុជាជាមួយក្រុមហ៊ុនអេមរុរ៉ាយស៍(ខេមបូឌា) ខូអិលធីឌី តាមរបៀប“សាងសង់ប្រតិបត្តិការ-និងទូទាត់សំណង”(B.O.P.=Build, operate, and pay compensation)ក្នុងតម្លៃសរុបចំនួន 5លានដុល្លារអាមេរិកត្រូវបានដាក់ឱ្យដំណើរការនៅក្នុងខេត្តកំពង់ធំ។
ទី2-ឃ្លាំងស្តុកស្រូវដែលអាចស្តុកស្រូវបាន20ម៉ឺនតោន និងឡសម្ងួតដែលមានសមត្ថភាពសម្ងួតស្រូវបាន 3ពាន់តោនក្នុង1ថ្ងៃ ដែលជាឃ្លាំងស្តុកស្រូវ និងឡសម្ងួតខ្នាតធំជាងគេនៅកម្ពុជាស្ថិតក្រោមគម្រោងវិនិយោគពិសេសក្នុងទម្រង់ជាបំណុលរបស់រាជរដ្ឋាភិបាលកម្ពុជាជាមួយក្រុមហ៊ុនធនាគារស្រូវ (កម្ពុជា) ភីអិលស៊ី តាមរបៀប“សាងសង់-ប្រតិបត្តិការ-និងទូទាត់សំណង” (B.O.P) ក្នុងតម្លៃសរុបចំនួន 15លានដុល្លារអាមេរិកត្រូវបានដាក់ឱ្យដំណើរការនៅក្នុងខេត្តបាត់ដំបង។
លោក រស់ សីលវ៉ា អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានថ្លែងថា៖ “ឃ្លាំងស្តុកស្រូវរបស់ក្រុមហ៊ុន អេមរុរ៉ាយស៍ (ខេមបូឌា) ខូអិលធីឌី គឺជាសមិទ្ធផលថ្មីរបស់រាជរដ្ឋាភិបាលសម្រាប់ជាមជ្ឈមណ្ឌលប្រមូលទិញស្រូវ និងកិនកែច្នៃស្រូវ-អង្ករដែលមានលទ្ធភាពប្រមូលទិញស្រូវមួយភាគធំនៅក្នុងតំបន់ខេត្តកំពង់ធំ និងខេត្តព្រះវិហារ ពិតជារួមចំណែកយ៉ាងមានប្រសិទ្ធភាពដើម្បីដោះស្រាយបញ្ហាកង្វល់របស់កសិករ ជាពិសេសការធ្លាក់ចុះនៃតម្លៃស្រូវដោយគ្មានហេតុផល”។
លោកបន្តថា យន្តការអន្តរាគមន៍របស់រាជរដ្ឋាភិបាលដែលបានដាក់ចេញជាបន្តបន្ទាប់តាមរយៈធនាគារអភិវឌ្ឍន៍ជនបទ ជាប្រតិបត្តិការអនុវត្តគម្រោងឃ្លាំងស្តុក និងឡសម្ងួតស្រូវដែលនឹងបង្កើនការប្រមូលទិញស្រូវក្នុងបរិមាណច្រើន និងងាយស្រួលក្នុងការគ្រប់គ្រងស្តុកស្រូវនៅក្នុងតំបន់សំខាន់ៗ និងធ្វើឱ្យតម្លៃស្រូវរបស់កសិករល្អប្រសើរឡើងទៀតផង ជាពិសេសតម្លៃស្រូវសែនក្រអូបបានកើនឡើងដល់ប្រមាណ 1,200រៀល/គីឡូក្រាមនារដូវប្រមូលផលឆ្នាំ2017-2018 បើធៀបនឹងអំឡុងពេលដូចគ្នាកាលពីឆ្នាំមុនដែលបានប្រមាណតែ 900រៀល/គីឡូក្រាមប៉ុណ្ណោះ។
លោក កៅ ថាច អគ្គនាយកនៃធនាគារអភិវឌ្ឍន៍ជនបទ RDB(Rulral Development Bank of Cambodia)បានបញ្ជាក់ថា ដោយមានការគាំទ្រពីរាជរដ្ឋាភិបាល និងក្រសួងសេដ្ឋកិច្ច និងហិរញ្ញវត្ថុ តាមរយៈធនាគារអភិវឌ្ឍន៍ជនបទ បានធ្វើការទម្លាក់ឥណទានជាបន្តបន្ទាប់ដល់ក្រុមហ៊ុនប្រមូលទិញស្រូវ និងរោងម៉ាស៊ីនកិនស្រូវដើម្បីធ្វើការទិញស្រូវពីបងប្អូនប្រជាកសិករតាមតម្លៃទីផ្សារ ហើយតាមរយៈយន្តការនេះបានធ្វើឱ្យទីផ្សារស្រូវ និងតម្លៃស្រូវរបស់បងប្អូនមានស្ថិរភាព និងមានតម្លៃតាមស្តង់ដារឡើងវិញ។ ទន្ទឹមនេះ ដើម្បីដោះស្រាយលើបញ្ហាឃ្លាំងស្តុកស្រូវ និងឡសម្ងួតស្រូវខ្នាតធំ រាជរដ្ឋាភិបាលបានដាក់ចេញនូវយន្តការអន្តរាគមន៍ពិសេសក្នុងទម្រង់ជាបំណុល ដោយអនុញ្ញាតឱ្យវិស័យឯកជនទទួលគម្រោងធ្វើប្រតិបត្តិការសាងសង់ឃ្លាំងស្តុកស្រូវ និងឡសម្ងួតស្រូវ ដែលមានសមត្ថភាពគ្រប់គ្រាន់ក្នុងការស្រូបយកស្រូវរបស់បងប្អូននៅក្នុងតំបន់។
លោកសុង សារ៉ន អគ្គនាយកក្រុមហ៊ុនអេមរុរ៉ាយស៍បានថ្លែងប្រាប់ឡារ៉ែនថា ការដែលឃ្លាំងស្តុក និងឡសម្ងួតស្រូវនៅខេត្តកំពង់ធំមានទំហំតូចជាងឡសម្ងួត និងឃ្លាំងស្តុកនៅខេត្តបាត់ដំបងនោះ គឺទី1-ដោយសាររដ្ឋាភិបាលកំណត់តំបន់ គឺនៅតំបន់នេះការប្រមូលផលពីកសិករនឹងគ្រប់គ្រាន់សម្រាប់ទំហំឃ្លាំង និងឡសម្ងួតដែលបានដាក់ឱ្យប្រើប្រាស់នេះ។ ដូច្នេះយើងជាក្រុមហ៊ុនឯកជន ត្រូវអនុវត្តទៅតាមគម្រោងថវិការបស់រដ្ឋាភិបាល។ ទោះជាមានទំហំតូចជាងឡ និងឃ្លាំងនៅបាត់ដំបងមែន តែឡ និងឃ្លាំងនៅកំពង់ធំរបស់អេមរុរ៉ាយស៍នេះជាប់លេខរៀងទី2 ដែរ។
លោក សារ៉ន បានបន្តថា ការទទួលបានសមិទ្ធផលនេះ អេមរុរ៉ាយស៍មានក្តីរីករាយច្រើន៖ ទី1-ដោយសារឡ និងឃ្លាំងនេះមានបំពាក់បច្ចេកវិទ្យាទំនើបចុងក្រោយដែលមានលក្ខណៈស្វ័យប្រវត្តិ សូម្បីតែទូរស័ព្ទស្មាតក៏អាចចុចបញ្ជាបានដែរ។ ទី2-ការដែលឡសម្ងួតមានលក្ខណៈទំនើប គឺជួយកាត់បន្ថយថ្លៃដើមដោយមិនប្រើពលកម្មមនុស្សច្រើន។ ទី3-ជាការជួយរក និងបង្កើតទីផ្សារឱ្យកសិករមិនចាំបាច់ឱ្យគាត់ទៅលក់ដល់ប្រទេសថៃ ឬវៀតណាមទេ គឺយើងមានទីផ្សារនៅក្បែរគាត់។ ទី4-យើងបង្កើតក្រុមសហគមន៍ផលិត(មានជាង 50សហគមន៍)ដែលគាត់ផលិត រួចលក់ឱ្យឡសម្ងួតយើងដែលបច្ចុប្បន្នមាន 1ម៉ឺនគ្រួសារ និងគ្រោងបង្កើនឱ្យបាន10ម៉ឺនគ្រួសារ ដែលអាចផ្គត់ផ្គង់ការផលិតស្រូវមកឡសម្ងួតចំនួន 20ម៉ឺនតោនក្នុង1ឆ្នាំ(ដែលមួយឆ្នាំយើងអាចប្រមូលផលបាន 3ដង)។
ដោយឡែកឃ្លាំងស្តុកស្រូវទំហំ 200,000តោន និងឡសម្ងួតដែលមានសមត្ថភាពសម្ងួតស្រូវ3000តោនក្នុង1ថ្ងៃ ដែលជាឃ្លាំងស្តុកស្រូវ និងឡសម្ងួតខ្នាតធំជាងគេនៅកម្ពុជាដែលមានតម្លៃសរុបចំនួន 15លានដុល្លារអាមេរិកដែលមានលទ្ធភាពប្រមូលទិញស្រូវមួយភាគធំនៅតំបន់ភាគខាងលិចនៃប្រទេសក៏បានប្រកាសដាក់ឱ្យដំណើរការជាផ្លូវការដែរ ដោយលោក ជូ គឹមឡេង រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។
លោក រដ្ឋលេខាធិការបានលើកទឹកចិត្តដល់វិស័យឯកជនឱ្យពង្រីកឃ្លាំងស្តុក និងឡសម្ងួតស្រូវឱ្យបានកាន់តែធំ និងមានលក្ខណៈស្តង់ដារក្នុងការរក្សាទុកស្រូវ-អង្ករឱ្យមានគុណភាពល្អ សំដៅធានាបាននូវស្ថិរភាពថ្លៃស្រូវ-អង្ករសម្រាប់បងប្អូនប្រជាកសិករ និងបម្រុងទុកស្រូវ-អង្ករគ្រប់គ្រាន់សម្រាប់បម្រើឱ្យការនាំចេញប្រកបដោយនិរន្តរភាពស្របតាមគោលនយោបាយរបស់រាជរដ្ឋាភិបាលក្នុងការនាំអង្ករចេញ1លានតោន។
យោងទៅលើសមិទ្ធផលទាំង2 នេះ ប្រជាកសិករក្នុងតំបន់នឹងធានារក្សាបាននូវតម្លៃស្រូវតាមទីផ្សារសម្រាប់រយៈពេលវែង និងដោះស្រាយបញ្ហាកង្វល់លើការខូចខាតស្រូវរបស់បងប្អូនបានទៀតផងហើយក្នុងនោះរួមទាំងការកាត់បន្ថយថ្លៃដើមផលិត និងតម្លៃដឹកជញ្ជូនរបស់កសិករមកកាន់ទីផ្សារទៀតផង៕
July 14, 2018
វិធីមើលថែទាំស្បែកក្នុងរដូវភ្លៀង
មួយរយៈនេះធាតុអាកាសងងឹតស្រទុំ ថ្ងៃខ្លះមានទាំងភ្លៀងធ្លាក់មកខ្លាំងទៀតផង ព្រះអាទិត្យមិនសូវជាបង្ហាញខ្លួនឱ្យឃើញដូចពេលរដូវក្តៅប៉ុន្មានទេ នារីៗជាច្រើននាំគ្នារអ៊ូរទាំពីភាពសើមប៉ប៉ិកប៉ប៉ាក់របស់ស្បែក និងបញ្ហាស្បែកដែលកើតឡើង ដូច្នេះថ្ងៃនេះ ឡារ៉ែន មានគន្លឹះល្អៗក្នុងការមើលថែទាំស្បែកស្អាតៗរបស់អ្នកក្នុងរដូវភ្លៀងបែបនេះមកជម្រាបជូនដូចខាងក្រោម៖
ធាតុអាកាសដែលអុកមម៉ុកងងឹតស្រទុំបែបនេះ មនុស្សជាច្រើនតែងយល់ច្រឡំថា មិនចាំបាច់ប្រើគ្រីមការពារកម្តៅថ្ងៃទេ ព្រោះមិនសូវមានពន្លឺថ្ងៃក្តៅខ្លាំងប៉ុន្មានឡើយ ថែមទាំងខ្លាចថា ស្បែកនឹងឡើងស្អិតប៉ប៉ិកប៉ប៉ាក់ទៀតផង តែការពិតវិញ ទោះជាគ្មានពន្លឺព្រះអាទិត្យមែន តែនៅក្នុងអំឡុងពេលថ្ងៃ ក៏នៅតែមានកាំរស្មី UV ដែលយើងមើលមិនឃើញចូលមកបំផ្លាញស្រ-ទាប់ស្បែកខាងក្នុង ដែលនាំឱ្យមានបញ្ហាស្លាកស្នាមមុនអាយុដែរ និងរួមទាំងកាំរស្មី UV ដែលចេញមកពីឧបករណ៍អគ្គិសនីទាំងឡាយដូចជាកុំព្យូទ័រ និងអំពូលភ្លើងជាដើម ដូច្នេះបើអ្នកធ្វេសប្រហែសមិនលាបគ្រីមការពារពន្លឺថ្ងៃនៅថ្ងៃណាមួយនោះ វាដូចជាការបើកឱកាសឱ្យកាំរស្មី UV ចូលមកដុតបំផ្លាញស្បែកដូច្នោះដែរ។ ឡារ៉ែន សូមណែនាំថា គួរជ្រើសរើសប្រើគ្រីមការពារពន្លឺថ្ងៃណាដែលអាចការពារបានទាំងកាំរស្មី UVA, UVB និងអនុមូលឥស្សរៈរៀងរាល់ពេលព្រឹកដោយជ្រើសរើសយករូបមន្តការពារទឹក មិនស្អិតប៉ប៉ិកប៉ប៉ាក់ស្បែកដែលនាំឱ្យរំខានចិត្ត។
ចំណែកនារីៗដែលត្រូវតុបតែងមុខទៅធ្វើការរៀងរាល់ថ្ងៃវិញ យើងសូមណែនាំថា គួរជ្រើស-រើសប្រើម្សៅ មេកអាប់ដែលមានរូបមន្តការពារទឹក ជាពិសេសបរិវេណកែវភ្នែក មិនដូច្នេះទេអាចនឹងបានក្លាយទៅជាភ្នែកខ្លាឃ្មុំភែនដាមិនខានហើយនៅពេលល្ងាចត្រូវលាងគ្រឿងសម្អាងឱ្យស្អាតហ្មត់ចត់ផង ព្រោះនៅក្នុងរដូវភ្លៀងងាយនឹងកើតមុនណាស់។ សម្អាតដោយឃ្លីនស៊ីងលាងគ្រឿងសម្អាង និងជ្រើសរើសប្រើហ្វូមលាងមុខណាដែលមិនធ្វើឱ្យស្បែកមុខស្ងួតក្រៀម។ បន្ទាប់ពីលាងសម្អាតផ្ទៃមុខហើយ អ្នកគួរជូតសម្អាតដោយថូននើរ៍ ដើម្បីសម្រួលសភាពស្បែកដែលអាចជ្រើសរើសប្រើបែបរូបមន្តកម្ចាត់សារធាតុពុលដែលនៅសេសសល់នៅលើផ្ទៃមុខ (Detoxifying Toner) ដើម្បីឱ្យស្បែកសម្រួលតុល្យភាព និងកម្ចាត់សារធាតុអនុមូលឥស្សរៈ ដើម្បីភាពស្រស់បស់ និងកាត់បន្ថយការកើតមុនពីកាកសំណល់ដែលនៅសេសសល់លើផ្ទៃមុខ និងបញ្ចប់ដោយការលាបគ្រីមថែបំប៉នស្បែកនៅពេលយប់ឱ្យនៅតែស្រស់ស្អាតសម្រាប់ព្រឹកថ្ងៃស្អែក។
ក្រៅពីនេះ មិនត្រូវបណ្តែតបណ្តោយក្នុងការមើលថែទាំសុខភាពរាងកាយ ដើម្បីឱ្យស្បែកស្អាតចេញមកពីខាងក្នុង ដោយការគេងសម្រាកឱ្យបានគ្រប់គ្រាន់ បរិភោគអាហារដែលមានគុណប្រយោជន៍ ដោយអាចទទួលទានវីតាមីន និងសារធាតុអំបិលរ៉ែ រួមទាំងការហាត់ប្រាណជាប់ជាប្រចាំ ហើយដែលសំខាន់នោះគឺគួរទទួលទានទឹកស្អាតក្នុងមួយថ្ងៃឱ្យបាន8-10កែវ ដោយក្រេបតិចៗជាប់រហូតពេញមួយថ្ងៃ ដើម្បីរក្សាភាពស្រស់បស់របស់ស្បែក៕
July 13, 2018
វត្ថុតុបតែងផ្ទះបង្កើនជោគលាភ បន្ថែមសេចក្ដីសុខក្នុងគ្រួសារ
និយាយពីការរៀបចំតុបតែងផ្ទះមកច្រើនលេខហើយ ថ្ងៃនេះ ឡារ៉ែន សូមនិយាយអំពីវត្ថុសិរីមង្គលក្នុងការយកមកដាក់តាំងលម្អនៅក្នុងផ្ទះ ដើម្បីបង្កើនសេចក្ដីសុខ បន្ថែមលាភសំណាងឱ្យក្រុមគ្រួសារចម្រុងចម្រើនរុងរឿងវិញម្ដង។
ការជ្រើសរើសវត្ថុតុបតែងលម្អផ្ទះ ជាទូទៅច្រើនតែជ្រើសរើសតាមការនិយមចូលចិត្ត និងឡៃហ្វ៍ស្តាយល៍របស់បុគ្គលម្នាក់ៗ ឬអ្នកខ្លះអាចនឹងជ្រើសរើសតាមស្តាយល៍របស់ផ្ទះ ដើម្បីឱ្យវត្ថុតុបតែងលម្អ និងផ្ទះមើលទៅស៊ីគ្នា ខណៈពេលជាមួយគ្នា អ្នកខ្លះក៏ជ្រើសរើសក្នុងការតុប-តែងដោយការរកវត្ថុសិរីមង្គលមកដាក់តាំង ដើម្បីបង្កើនទ្រព្យ បង្កើនបារមី ទាំងតាមជំនឿដែលជឿតៗគ្នាមក និងតាមជំនឿតាមសាស្រ្តាហុង-ស៊ុយ។ អត្ថបទខាងក្រោមនេះ ឡារ៉ែន សូមណែ-នាំមិត្តអ្នកអានទៅស្គាល់វត្ថុតុបតែងផ្ទះ ដែលមិនត្រឹមតែផ្ដល់នូវភាពស្រស់ស្អាតប៉ុណ្ណោះទេតែនៅមានអត្ថន័យល្អទៀតផង ដោយវត្ថុនីមួយៗបានទទួលនូវការនិយមយកមកដាក់តាំងលម្អផ្ទះជាយូរមកហើយ ដូច្នេះតើវត្ថុតុបតែងលម្អទាំងនោះមានអត្ថន័យអ្វីបង្កប់ខ្លះនោះ សូមអានជាបន្ត។
1. តុក្កតាឆ្មាបក់ដៃ
ម៉ានេគិ នេកុ ឬឆ្មាបក់ដៃ រូបចម្លាក់ឆ្មាតុក្កតាមុខមាត់គួរឱ្យស្រឡាញ់ គឺជារឿងតំណាលបុ-រាណរបស់វត្ត Gotokuji ក្នុងប្រទេសជប៉ុន។ ជនជាតិជប៉ុនជឿថា ឆ្មាគឺជាសត្វនាំលាភសំណាងជួយទាក់ទាញអតិថិជន និងភាពមានបាន។ ជំនឿដែលថានេះ មានឥទ្ធិពលលើមនុស្សម្នាទូទាំងពិភពលោក អ្នកទេសចរដែលមានឱកាសបានទៅលេងប្រទេសជប៉ុននិយមទិញឆ្មាបក់ដៃនេះមកដាក់តាំងលម្អផ្ទះដើម្បីបង្កើនលាភសំណាង និងបារមី។ក្រៅពីរូបចម្លាក់ឆ្មាហើយ ពណ៌ និងលក្ខណៈអាកប្បកិរិយារបស់ឆ្មាបក់ដៃនៅបានប្រាប់អំពីអត្ថន័យដែលផ្សេងៗពីគ្នាទៀតផង ដូចជា ឆ្មាបក់ដៃពណ៌សនឹងនាំមកនូវសេចក្ដីសុខ ឆ្មាបក់ដៃពណ៌ខ្មៅនឹងជួយការពារការឈឺថ្កាត់ ពណ៌បៃតង និងខៀវនឹងនាំមកនូវភាពជោគជ័យលើការងារ ពណ៌ក្រហមនឹងជួយការពាររឿងអាក្រក់ចង្រៃ ពណ៌មាសនឹងនាំមកនូវភាពមានបាន និងស្ថិតស្ថេរ ពណ៌ផ្កាឈូកជួយទាក់ទាញសេចក្ដីស្រឡាញ់ឱ្យចូលមកក្បែរខ្លួន។ អ្នកណាដែលចង់បង្កើនផ្នែកណាមួយដល់ជីវិត សាកល្បងរកឆ្មាបក់ដៃតាមពណ៌នីមួយៗមកដាក់តាំងលម្អផ្ទះបាន។
2. រូបតុក្កតាក្រុមគ្រួសារ
ផ្ទះដែលកក់ក្ដៅ ជាផ្ទះដែលមានសមាជិកក្នុងក្រុមគ្រួសាររស់នៅជួបជុំគ្នា តែសម្រាប់អ្នកនៅលីវដែលចាំបាច់ត្រូវបែកគ្រួសារ និងរស់នៅក្នុងផ្ទះតែម្នាក់ឯង បើត្រូវការគូជីវិត ឬចង់ចាប់ផ្ដើមកសាងគ្រួសារថ្មីនោះ “តុក្កតាក្រុមគ្រួសារ” គឺជាវត្ថុតុបតែងផ្ទះដែលនឹងជួយជំរុញឱ្យឆាប់បានលែងនៅលីវ ព្រោះការដាក់តាំងវត្ថុតុបតែងលម្អ ដែលបង្ហាញពីអត្ថន័យទៅដល់ក្រុមគ្រួសារនឹងធ្វើឱ្យមានអារម្មណ៍កក់ក្ដៅក្នុងចិត្ត បង្ហាញពីភាពត្រៀមរួចជាស្រេចក្នុងការមានគ្រួសារ។ ថាមពលទាំងអស់នេះនឹងជំរុញឱ្យកាន់តែឆាប់បានជួបគូជីវិតខ្លាំងឡើង។ ចំណែកផ្ទះណាដែលមានក្រុមគ្រួសាររស់នៅជួបជុំគ្នាស្រាប់ហើយ រូបចម្លាក់ក្រុមគ្រួសារនៅមានន័យពីសាមគ្គីភាព និងក្ដីស្រឡាញ់យ៉ាងស្អិតល្មួតទៀតផង។
3 សត្វកុកពណ៌ផ្កាឈូក (Flamingo)
សត្វកុកពណ៌ផ្កាឈូក ជាសត្វសិរីមង្គលដែលមានអត្ថន័យល្អស្មើនឹងសត្វនាគ និងសត្វតោដែរ ជាយានជំនិះរបស់អាទិទេពនៃភាពគង់វង្ស។ ជនជាតិចិនជឿថា បើមានរូបភាព ឬរូបចម្លាក់សត្វកុកពណ៌ផ្កាឈូកនៅក្នុងផ្ទះ នឹងជួយបង្កើនឱ្យសុខភាពរឹងប៉ឹង អ្នករស់នៅក្នុងផ្ទះអាយុវែង និងអត្ថន័យមួយទៀតគឺ មានភាពចម្រើនរុងរឿង ឬព្រេងវាសនា មុខនាទីការងារទៅមុខល្អរលូន និងបង្កើនការរៀនសូត្រឱ្យល្អ។ នៅពេលចង់ជូនពរឱ្យនរណាម្នាក់មានសុខភាពអាយុយឺនយូរ គេច្រើនតែយករូបភាព ឬរូបចម្លាក់សត្វកុកពណ៌ផ្កាឈូកទៅជូនជាវត្ថុអនុស្សាវរីយ៍។
4. ត្រីមួយគូ
ទីណាខ្វះសេចក្ដីស្រឡាញ់ និងគ្មានភាពសាមគ្គី ក៏ពិបាកនឹងមានសេចក្ដីសុខបានណាស់ដូច្នេះហើយទើបបើចង់បង្កើនជោគលាភសំណាង និងសេចក្ដីសុខ ត្រូវសាងសេចក្ដីស្រឡាញ់ និងសាមគ្គីភាពជាមុនសិន។ ការរៀបចំហុងស៊ុយផ្ទះបែបចិន គេនិយមប្រើប្រើសត្វត្រីជាវត្ថុជួយបង្កើនរឿងរបស់សម្ព័ន្ធភាពក្នុងក្រុមគ្រួសារ ជាថាមពលវិជ្ជមានឱ្យសមាជិកក្នុងក្រុមគ្រួសារស្រឡាញ់ចូលចិត្តគ្នាជាធ្លុងមួយ រស់នៅរួមគ្នាយ៉ាងស្រុះស្រួលដូចត្រីដែលតែងតែអាស្រ័យនៅជាគូៗ ជាហ្វូងៗ ឆ្លុះបញ្ចាំងឱ្យឃើញពីសេចក្ដីស្រឡាញ់ដែលត្រីទាំងពីរក្បាលមានចំពោះគ្នា និងឆ្លុះបញ្ចាំងឱ្យឃើញនូវគុណតម្លៃរបស់សម្ព័ន្ធភាពរបស់មនុស្សនៅក្នុងក្រុមគ្រួសារហ្នឹងឯង៕
July 13, 2018
បទវិភាគ៖ ស៊ើបចេញពីសាកសពវិស្វករក្រដាសស្លាប់ក្រោមបាតបឹង 7ឆ្នាំ 7អាថ៌កំបាំង
រកឃើញគ្រោងឆ្អឹងរបស់បុរសវិស្វករក្រុមហ៊ុនក្រដាសល្បីឈ្មោះដែលខាងសាច់ញាតិបានប្ដឹងប៉ូលិសថា បាត់ខ្លួនសូន្យឈឹងជាង 7ឆ្នាំនៅក្នុងរថយន្តដែលលិចនៅក្នុងបាតបឹង “ណងណាមខាវ” ដែលមានជម្រៅជាង 5ម៉ែត្រ នៅក្នុងខេត្តចន្ទប៊ុរី ដែលដំណាក់កាលដំបូង ប៉ូលិសបានប្រទះឃើញដបថ្នាំសម្លាប់សត្វល្អិតនៅក្នងរថយន្ត រហូតធ្វើឱ្យអ្នកពាក់ព័ន្ធទាំងឡាយសន្និដ្ឋានអំពីមូលហេតុនៃការស្លាប់នេះថា ប្រហែលបណ្ដាលពីការធ្វើអត្ថឃាត។
1 . បើកឡានទម្លាក់ចូលទៅក្នុងបាតបឹងដែលមានទឹកជម្រៅជាង 5ម៉ែត្រ។
2 . រយៈពេល 7ឆ្នាំទើបមានមនុស្សប្រទះឃើញ។
3 . សភាពសាកសព នៅសល់តែឆ្អឹង។
4 . ដំណាក់កាលដំបូង រកឃើញមានដបថ្នាំសម្លាប់សត្វល្អិតនៅក្នុងរថយន្ត។
5 . មន្ត្រីប៉ូលិសសន្និដ្ឋានដំណាក់កាលដំបូងថា ជនរងគ្រោះចេតនាធ្វើអត្ថឃាត។
តែអ្វីដែលពិសេសបំផុតនោះគឺ…តើបំណែកឆ្អឹងដែលនៅសេសសល់ រួមទាំងដបថ្នាំសម្លាប់សត្វល្អិតដែលប្រទះឃើញ នឹងនាំឆ្ពោះទៅការស្វែងរកមូលហេតុនៃការស្លាប់ដែលពិតប្រាកដបានដែរឬទេ?
ថ្ងៃនេះ គេហទំព័រ ឡារ៉ែន សូមនាំយកបទវិភាគរបស់អ្នកជំនាញការថៃខាងផ្នែកស៊ើបអង្កេតតាមរយៈសាកសពមកវិភាគយ៉ាងស៊ីជម្រៅថា តើអ្វីគឺជារឿងដែលគួរបកស្រាយឱ្យបានច្បាស់ មុននឹងសរុបបញ្ចប់រឿងក្ដីដែលបានប្រើពេលវេលាតាមរកយូររហូតដល់ទៅ 7ឆ្នាំទម្រាំនឹងរកឃើញសាកសពបុរសរងគ្រោះដែលបាត់ខ្លួនសូន្យឈឹងយ៉ាងគ្មានដំណឹងនេះ!។
យើងនាំគ្នាទៅដេញតាមដំណើររឿង និងហេតុការណ៍ម្ដងមួយជំហានៗតាមដែលប្រភពព័ត៌មានអ្នកជំនាញការផ្នែក ស៊ើបអង្កេតតាមរយៈសាកសពទាំងអស់គ្នាដូចតទៅ…។
ចំណុចដំបូងៈ ការដែលរថយន្តរបស់ជនរងគ្រោះធ្លាក់ចូលទៅនៅក្នុងបាតបឹងដែលមានទឹកជ្រៅបែបនោះបាន ក្នុងអំឡុងពេលដែលកើតហេតុថ្មីៗ កាលពី 7ឆ្នាំមុននោះ វាត្រូវតែមាននៅសល់ស្នាមកង់រថយន្តបង្ហាញឱ្យឃើញខ្លះៗមិនខាន ជាពិសេសបំផុតសភាពនៅកន្លែងកើតហេតុជាដើម។ ក្រៅពីនេះរថយន្តដែលធ្លាក់ចូលទៅក្នុងទឹកថ្មីៗ អំឡុងពេលដំបូងៗ វានឹងបង្ហាញឡើងនូវកំណកប្រេងម៉ាស៊ីនដែលអណ្តែតឡើងមកលើផ្ទៃទឹក ដែលតាមដែលបានដឹងមក ចំណុចកើតហេតុនោះស្ថិតនៅក្បែរស្ថាប័នរាជការមួយទៀតផង។
សំណួរដែលសំខាន់គឺ…តើវាអត់មាននរណាម្នាក់សង្កេតឃើញសោះតែម្ដងឬ?
ខ្នាតមនុស្សយើងដើរលុយវាលស្មៅចូលទៅ វានៅមានបន្សល់ស្នាមផ្លូវដើរដែលអាចសង្កេតឃើញបាន ចុះករណីនេះ រថយន្តមួយគ្រឿងទាំងមូល?!? ហេតុអីក៏…។
ក្រៅពីនេះ តើជម្រៅទឹកនៅក្នុងបឹងនៅមានកម្ពស់ស្មើរហូត ឬមានការប្រែប្រួលដែរឬទេ ក្នុងអំឡុងរយៈពេល 7ឆ្នាំកន្លងមក? តើវាមិនមានអំឡុងពេលណាមួយសោះតែម្ដងឬ ដែលកម្ពស់ទឹកក្នុងបឹងមិនស្រកចុះដល់កម្រិតទាបបំផុតរហូតសង្កេតឃើញរថយន្តដែលលិចនោះ? ជាពិសេសក្នុងរដូវក្ដៅហួតហែង?!។
ខណៈពេលជាមួយគ្នា តើវាគួរដែរឬទេ ដែលត្រូវតែមានការធ្វើត្រាប់ហេតុការណ៍នៃថ្ងៃដែលរថយន្តធ្លាក់ចូលទៅក្នុងទឹកបឹងនោះសាឡើងវិញ ដើម្បីពិនិត្យមើលពីល្បឿនរបស់រថយន្តក្នុងថ្ងៃកើតហេតុនោះថា តើវារត់ចុះទៅដោយល្បឿនប៉ុន្មាន? ព្រោះល្បឿនរបស់រថយន្ត ជាអ្វីដែលអាចបញ្ជាក់បានថា តើវាជាឧប្បត្តិហេតុគ្រោះថ្នាក់ ឬចេតនាធ្វើអត្ថឃាត?
ចំណុចទី2 : DNA ពីឆ្អឹងដែលប្រទះឃើញនៅក្នុងរថយន្ត ដើម្បីបញ្ជាក់ពីតួបុគ្គល។ សួរថា តើត្រួតពិនិត្យបានឬទេ? តាមទ្រឹស្ដីគឺ ពិនិត្យបាន! តែភាពលំបាក ឬស្រួល វាអាស្រ័យលើភាពរលួយស្អុយរបស់ឆ្អឹង។ បើសិនបណ្ដូលឆ្អឹងផ្នែកខាងក្នុងនៅល្អ ការពិនិត្យ DNA វានឹងបង្ហាញឡើង។ នៅពេលបានលទ្ធផលហើយ សឹមទៅតាមរកលក្ខណៈបុគ្គលមកប្រៀបធៀបតាមរយៈមនុស្សក្នុងក្រុមគ្រួសារដើម្បីអះអាងថា ពិតជាអ្នកស្លាប់នោះមែន!។
ចំណុចទី3 : នៅពេលមើលឃើញថា កញ្ចក់រថយន្តបានបើកចំហចោល សំណួរដែលគួរតែកើតមានតាមមកនោះគឺ តើវាអាចទៅរួចដែរឬទេថា កម្ទេច ឬបំណែករបស់សាកសពមួយចំនួន វាគួរតែអណ្ដែតឡើងមកមុនហ្នឹងដែរឬទេ? ព្រោះសាកសពពេលដែលវាស្អុយរលួយពេញទំហឹង វានឹងហើម ហើយមានសម្ពាធរុញឡើងខ្លាំង។
ចំណុចទី4 : ឆ្អឹងដែលនៅសេសសល់នោះ តើមានច្រើនគ្រប់គ្រាន់សម្រាប់តភ្ជាប់ទៅដល់មូលហេតុនៃការស្លាប់បានឬទេ? ដូចជា បើត្រូវបាញ់សម្លាប់ ត្រូវចាក់សម្លាប់ ស្លាកស្នាមដែលប្រទះឃើញនៅក្នុងគ្រោងឆ្អឹងនោះ វានឹងបញ្ជាក់ប្រាប់បាន តែបើសិនជាការស្លាប់ដែលមិនពាក់ព័ន្ធនឹងការធ្វើឱ្យបាក់ឆ្អឹង…ដូចជា ផឹកថ្នាំសម្លាប់សត្វល្អិតធ្វើអត្ថឃាត ត្រូវច្របាច់ក ត្រូវរឹតក ឬត្រូវខ្សែភ្លើងឆក់-ល- បែបនេះ…ទើបឆ្អឹងដែលប្រទះឃើញ វាមិនអាចផ្ដល់ចម្លើយអំពីមូលហេតុនៃការស្លាប់ដែលពិតប្រាកដបានឡើយ។
ចំណុចទី5 : ការរកឃើញដបថ្នាំសម្លាប់សត្វល្អិតនៅក្នុងរថយន្តដែលកើតហេតុ ចំពោះការយល់ឃើញផ្ទាល់ខ្លួន វាគ្រាន់តែជាហេតុផលបន្ទាប់បន្សំមួយប៉ុណ្ណោះ ព្រោះវាអាចគ្រាន់តែជាវត្ថុមួយដែលប្រទះឃើញនៅក្នុងរថយន្តទូទៅ តែបើសិនជាសួរថា តើវាជាចំណុចដែលធ្វើឱ្យអាចអះអាងពីមូលហេតុនៃការស្លាប់បានឬទេនោះ? ជាផ្ទាល់ខ្លួនយល់ឃើញថា ដូចជាមិនអាចទេ!។
នោះដោយសារតែ…ការផឹកថ្នាំពុលសម្លាប់ខ្លួន វាស្លាប់ដោយសារថ្នាំពុលបញ្ចេញឥទ្ធិពលឆាប់រហ័ស ធ្វើឱ្យប្រព័ន្ធបេះដូងលែងធ្វើការ ថ្លើមគាំង ប្រព័ន្ធដង្ហើមលែងធ្វើការ ដូច្នេះការពិសោធចំពោះរឿងនេះ ត្រូវតែពិនិត្យមើលអវយវៈខាងក្នុងទាំងអស់នោះ តែក្នុងករណីនេះ អវយវៈដែលអាចបញ្ជាក់ប្រាប់បាននោះ វាលែងមាននៅសល់អស់ទៅហើយ!។
ចំណុចទី6 : ឆ្អឹងដែលប្រទះឃើញទាំងនោះ វាលិចនៅក្នុងទឹកអស់រយៈពេលយូរមកហើយ បើអ្នកស្លាប់នោះផឹកថ្នាំសម្លាប់សត្វល្អិតមែន ថ្នាំសម្លាប់សត្វល្អិតនោះ វាសាបរលាបទៅជាមួយទឹកអស់ហើយ ប្រហែលជាគ្មាននៅសល់ប្រឡាក់ប្រឡូសនៅក្នុងឆ្អឹងទៀតយ៉ាងពិតប្រាកដ។
វាមិនដូចការត្រូវគេលួចដាក់ថ្នាំពុលសម្លាប់ ដូចជាការឱ្យផឹក ឬហូបសារធាតុលោហៈធ្ងន់ ដូចជាសារធាតុសម្លាប់សត្វកណ្ដុរចូលទៅក្នុងរយៈពេលយូរ 5 ទៅ10ឆ្នាំនោះទេ បែបនោះយើងអាចពិនិត្យរកឃើញបាន ព្រោះវានឹងទៅប្រមូលសន្សំនៅតាមធ្មេញ ឬឆ្អឹងរបស់អ្នកស្លាប់។
ចំណុចសំខាន់មួយទៀតដែលចង់លើកជាសំណួរដែរនោះគឺ (ចំណុចទី7) នៅពេលដែលបើសិនជាជនរងគ្រោះសម្រេចចិត្តផឹកថ្នាំសម្លាប់ខ្លួនហើយនោះ ហេតុអីចាំបាច់នៅត្រូវបើកឡានទម្លាក់ចូលទៅក្នុងទឹកទៀតធ្វើអី…?!
ស្ដាប់សំណួរនេះហើយ ចង់និយាយថា ត្រឹមតែផឹកថ្នាំពុលនោះ វាស្លាប់បាត់ទៅហើយ ចាំបាច់ទៅបើកឡានទម្លាក់ចូលទឹកធ្វើអីទៀត ដូច្នេះវាដូចជាមិនសូវមានហេតុមានផលត្រឹមត្រូវប៉ុន្មានសោះ?!
ដូច្នេះ តើវានឹងមានភាពអាចទៅរួចឬទេដែលថា ការដែលរថយន្តធ្លាក់ចូលទៅក្នុងទឹកបែបនោះ វាអាចកើតឡើងព្រោះតែកើតឧប្បត្តិហេតុអ្វីមួយ ឬអាចមានអ្នកណាដែលមិនមែនជាអ្នកស្លាប់នោះ ធ្វើឱ្យរថយន្តធ្លាក់ចូលទៅក្នុងទឹកឬយ៉ាងណា?!
នេះនៅមិនទាន់រាប់…ពីរឿងដែលគួរឱ្យចម្លែកចិត្តមួយប្រការទៀតគឺ…អូខេ! នៅពេលបើសិនជាមានចេតនាចង់បើកឡានទម្លាក់ចូលទៅក្នុងទឹកបឹងដើម្បីសម្លាប់ខ្លួនហើយនោះ តើចាំបាច់បើកកញ្ចក់ឡានចោលធ្វើអី?!
ហេតុអីបានជាអ្នកស្លាប់នោះគិតអ្វីដែលវាស្មគស្មាញដល់ថ្នាក់ហ្នឹង? និយាយមែនទែនទៅ បើសិនអ្នកស្លាប់នោះគិតថាចង់ធ្វើអត្ថឃាតហើយនោះ ជំនួសឱ្យការប្រុងផឹកថ្នាំសម្លាប់សត្វល្អិត ហើយបើកឡានបោះពួយទម្លាក់ចូលទឹក មកជាលោតទឹកសម្លាប់ខ្លួនវិញ វាមិនងាយស្រួលជាង និងមិនស្មុគស្មាញច្រើនផងទេឬ?
ដូច្នេះតើនេះ វាជាអាថ៌កំបាំងលើអាថ៌កំបាំងដែរឬទេ? និងដូច្នេះ ទោះជាធ្វើអត្ថឃាត អំពើឃាតកម្ម ឬឧប្បត្តិហេតុក្ដី ក៏មិនគួរប្រញាប់សរុបបញ្ចប់រឿងក្ដីលឿនពេកនោះទេ…៕
ប្រែសម្រួលដោយ ទិទីតំតាតូ
July 13, 2018
អង់គ្លេស សម្លឹងរកការបញ្ចប់ World Cup ទាំងភាពរីករាយ ពេលប៉ះ បែលហ្ស៊ិក ថ្ងៃសៅរ៍
លោក Gareth Southgate អ្នកចាត់ការទូទៅរបស់ក្រុមបាល់ទាត់ជម្រើសជាតិអង់គ្លេស បានទទួលស្គាល់ថា ការប្រកួតនៅថ្ងៃសៅរ៍នេះ ជាមួយនឹងក្រុមជម្រើសជាតិបែលហ្ស៊ីក នឹងផ្តល់នូវឱកាសក្នុងការបញ្ចប់ក្នុងយុទ្ធនាការនេះ ដោយជ័យជម្នះបើទោះបី ការប្រកួតដណ្តើមចំណាត់ថ្នាក់លេខ3 ក្នុង World Cup គឺជាការប្រកួតមួយដែលមិនមានក្រុមណាចង់លេងក៏ដោយ។
ការរងបរាជ័យយ៉ាងខកចិត្តក្នុងលទ្ធផល 2-1 ក្រោមស្នាដៃក្រុមជម្រើសជាតិក្រូអាស៊ី ក្រោយពីនាទីបន្ថែម 15នាទី 2ដង បានរារាំងមិនឲ្យអង់គ្លេស ធ្វើដំណើរទៅប្រជែងដណ្តើមពាន World Cup ជាលើកទី2 ដោយត្រូវធ្វើការប្រកួត មួយនឹងក្រុមបែលហ្ស៊ិក ដើម្បីដណ្តើមលេខ3 ជំនួសវិញ។
ក្រុមបែលហ្ស៊ិករបស់លោក Roberto Martinez ដែលបានរងបរាជ័យក្រោមស្នាដៃក្រុមជម្រើសជាតិបារាំង 1-0 ក្នុងវគ្គ4 ក្រុមចុងក្រោយនោះ បានបញ្ចប់ដោយឈរលេខ1 ក្នុងពូល G ពីលើក្រុមអង់គ្លេស ក្រោយពីគ្រាប់បាល់បញ្ចូលទីយ៉ាងល្អរបស់ខ្សែប្រយុទ្ធ Adnan Januzaj បានកាត់សេចក្តី ក្នុងការប្រកួតនៅទីក្រុង Kaliningrad។
ក្នុងការប្រកួតនោះ គ្រូបង្វឹកទាំង2 បានផ្លាស់ប្តូរកីឡាករជាច្រើនក្នុងជម្រើសទាំង 11នាក់ដំបូងរបស់លោក ហើយការផ្លាស់ប្តូរដូចគ្នានេះ អាចនឹងធ្វើឡើងម្តងទៀតក្នុងទីក្រុង Saint Petersburg ស្របពេលកីឡាករបម្រុងជាច្រើនអាចនឹងចូលលេងក្នុងជម្រើសដំបូង។
លោក Southgate ដែលក្រុមរបស់លោកបានទទួលការកោតសរសើរចំពោះការសាមគ្គីភាពរបស់ពួកគេក្នុងនាមជាប្រទេសមួយនោះ បានឲ្យដឹងថា៖ «រឿងដ៏ស្មោះត្រង់បំផុតនោះគឺថា វាមិនមែនជាការប្រកួតមួយដែលក្រុមណាមួយចង់លេងឡើយ»។ ការប្រកួតនេះនឹងចាប់ផ្តើមនៅម៉ោង 9យប់៕
ប្រភពពី៖ Sport24
July 13, 2018
CL ឆ្លើយតបរឿងមិនបន្ដកុងត្រាជាមួយក្រុមហ៊ុន YG
តាមរយៈសារព័ត៌មាន Teenee នៅព្រឹកថ្ងៃសុក្រ ទី 13 ខែកក្កដា ឆ្នាំ 2018 នេះ បានឱ្យដឹងថា មានដំណឹងលេចឮជាច្រើនដែលពាក់ព័ន្ធជាមួយតារាចម្រៀងស្រី CL នៅក្នុងការវិចវង្វឹចចេញពីទ្រនំ YG Entertainmen ដោយមានការសង្ស័យថា នាងមិននឹងបន្ដកុងត្រាជាមួយក្រុមហ៊ុននោះទៀតឡើង។
កាលពីថ្ងៃទី 11 ខែកក្កដា ឆ្នាំ 2018 អ្នកគាំទ្រនាងជាច្រើនបានបង្ហោះសារនិយាយទៅកាន់នាងថា « សូមមេត្តាកុំចាកចេញពី YG Entertainmen អីណា៎ ខ្ញុំស្រឡាញ់អ្នក ម្ចាស់ក្សត្រីយ៍ @chaelincl BLACKJACK និង YG យើងនៅរង់ចាំគាំទ្រអ្នកហូត។ ថែរក្សាសុខភាពផងណា »។
មិនយូរប៉ុន្មាន តារាស្រី CL ក៏បានឆ្លើយតបថា “មានមនុស្សតំណាង YG ជាច្រើនកំពុងឆ្ងល់ពេលនេះ។ ដូចដែលអ្នកគ្រប់ឃើញ ខ្ញុំស្រឡាញ់អ្នកទាំងអស់គ្នា។ អរគុណសម្រាប់គ្រប់គ្នា ដែលតែងតែផ្តល់ការគាំទ្រខ្ញុំ” ។ ទោះជាមានការឆ្លើយតបបែបនេះក្តីក៏យើងនៅមិនទាន់ដឹងថា តារាចម្រៀងស្រីរូបនេះ នឹងសម្រេចចិត្តចាកចេញពី YG Entertainment ឬយ៉ាងណានោះទេ? ខណៈដែលបទថ្មីរបស់ CL ហាក់ដូចជាស្ងប់ស្ងាត់ មិនទាន់ចេញផ្សាយនៅឡើយ៕

July 13, 2018
ដាំដើមស្រកានាគងាយស្រួលថែទាំ និងមានអតិថិជនគាំទ្រច្រើននៅលើទីផ្សារ
ស្រកានាគជាប្រភេទដំណាំហូបផ្លែដែលកសិករចាប់ផ្តើមដាំដុះកាន់តែច្រើនឡើងៗនៅក្នុងប្រទេសកម្ពុជា ដោយសារដំណាំប្រភេទនេះកសិករងាយស្រួលថែទាំ ផ្តល់ផលយូរឆ្នាំ និងមានការគាំទ្រនៅលើទីផ្សារ។
លោក ឈិន ហុកថៃ កសិករដាំដើមស្រកានាគនៅក្នុងភូមិអូរបេង ឃុំមេសជ្រៃ ស្រុកស្ទឹងត្រង់ ខេត្តកំពង់ចាម មានប្រសាសន៍ថា លោកទើបតែចាប់ផ្តើមដាំស្រកានាគនៅលើផ្ទៃដីប្រមាណជា1ហិកតាក្នុងរយៈពេល 2ឆ្នាំមុននេះប៉ុណ្ណោះប៉ុន្តែស្រកានាគចាប់ផ្តើមឱ្យផលជាបណ្តើរៗហើយ ដោយក្នុងមួយគុម្ពអាចបេះផ្លែបានចំនួន 5គីឡូក្នុងរយៈពេលមួយឆ្នាំ “ស្រកា-នាគឱ្យផលតាំងពីមួយឆ្នាំដំបូងមកម៉្លេះប៉ុន្តែដំបូងឡើង វាឱ្យផលតិចតួចប៉ុណ្ណោះរហូតដល់ឆ្នាំទី2 ទើបវាចេញផ្លែច្រើនទៅៗលុះដល់់អាយុ 3ឆ្នាំ វាចាប់ផ្តើមឱ្យផ្លែពេញលេញតែម្ដង ដោយក្នុងមួយគុម្ពៗគេអាចប្រមូលផលបានចំនួន 20គីឡូក្រាម ឬលើសហ្នឹងទៅទៀតក្នុងមួយឆ្នាំ”។
ស្រកានាគផ្តល់ផលទាំងរដូវប្រាំង និងរដូវវស្សា ប៉ុន្តែវានឹងផ្លែច្រើននៅពេលដែលមានភ្លៀងធ្លាក់ខ្លាំង គឺចាប់ពីខែឧសភា រហូតដល់ខែតុលា ទើបវាចាប់ផ្តើមធ្លាក់ទិន្នផលចុះទៅវិញបន្តិចម្តងៗ ហើយបើកសិករនៅតែបន្តស្រោចទឹក វាក៏នៅតែផ្តល់ផលបន្តទៀត គ្រាន់តែមានចំនួនតិចតួចប៉ុណ្ណោះ។ លោកបន្តថា ក្រោយពីប្រមូលផលហើយ ផ្លែស្រកានាគខ្មែរមានម៉ូយមកទទួលទិញជាប្រចាំដល់ចម្ការតែម្តង ដោយក្នុងមួយគីឡូក្រាមបោះដុំបានតម្លៃ4,000រៀល ទៅ5,000រៀល ហើយគេយកទៅបោះដុំបន្តនៅលើទីផ្សារក្នុងតម្លៃ7,000រៀល ទៅ8,000រៀល និងម៉ូយយកទៅលក់រាយបន្តទៀតមួយគីឡូតម្លៃ10,000រៀល ទៅ12,000រៀល តាមតូចតាមធំ “ការលក់បានថ្លៃ ហើយមានម៉ូយទិញច្រើននេះ ដោយសារស្រកានាគខ្មែរដាំដុះតាមរបៀបធម្មជាតិមិនប្រើថ្នាំគីមី ហើយរសជាតិរបស់វាផ្អែមឆ្ងាញ់ ខុសពីស្រកានាគនាំចូលពីក្រៅប្រទេស ដូចជាស្រកានាគនាំមកពីវៀតណាម ឬថៃ”។
សម្រាប់បច្ចេកទេសដាំដុះ កសិករខាងលើបានផ្តល់មតិយោបល់ចែករំលែកថា មុននឹងដាំកសិករអាចភ្ជួរដីឱ្យងាប់ស្មៅជាមុនសិនក៏បាន ឬមិនបាច់ភ្ជួរដីជាមុនក៏បាន ដោយគ្រាន់តែដាំបង្គោលចម្ងាយពីគ្នា 3ម៉ែត្រ 4ជ្រុងស្មើៗគ្នាពីមួយគុម្ពទៅមួយគុម្ព ពេលដាំបង្គោលរួចហើយគេចាប់ផ្តើមជ្រំដីជុំវិញបង្គោលនោះ រួចកាច់ដើមស្រកានាគមកដោតដាំចំនួន 3 ទៅ4ដើមក្នុងមួយគុម្ព។ លុះដាំរួច កសិករត្រូវដាក់ជីបំប៉នកូនដើមស្រកានាគជាលើកដំបូង ហើយស្រោចទឹកដើម្បីឱ្យកូនស្រកានាគលូតលាស់បានល្អ នៅពេលស្រកានាគលូតលាស់ចាប់ឫសតោងបង្គោលឡើងហើយ គេអាចស្រោចទឹកក៏បាន ឬមិនបាច់ស្រោចទឹកក៏បាន ព្រោះថា ដើមស្រកានាគនេះធន់នឹងកម្តៅ និងមិនសូវត្រូវការទឹកនោះទេ ទោះជារដូវប្រាំងខ្លាំងក៏ដោយ តែវាក៏ចាញ់ទឹកដែរ ពិសេសគេមិនដែលដាំនៅលើដីដែលជាវាលបាតទំនាបទេ ព្រោះអាចនឹងមានដក់ទឹកពេលភ្លៀងធ្លាក់ខ្លាំង ធ្វើឱ្យដើមស្រកានាគរលួយងាប់ដើមអស់។
ស្រកានាគផ្តល់ផលយូរឆ្នាំចន្លោះពី15 ទៅ20ឆ្នាំ រស់បានយូរដូចដើមដំបងយក្សដែរ ប៉ុន្តែទុកយូរឆ្នាំពេកវានឹងដុះស៊ុបទ្រុបឡើងខ្លាំង ដែលពេលនោះគេត្រូវកាប់ឆ្ការរំលាយចោលដើម្បីរៀបចំការដាំដុះសាជាថ្មីឡើងវិញ។
ដោយសារឃើញពីតម្រូវការទីផ្សារផ្លែស្រកានាគធម្មជាតិនេះកើនឡើងខ្លាំងទើបកសិករនៅក្នុងឃុំមេសជ្រៃ ចាប់ផ្តើមដាំដើមស្រកានាគនេះកាន់តែច្រើនឡើងៗ និងដោយសារតែទីតាំងខាងលើជាប្រភេទដីក្រហមមានជីវជាតិខ្លាំង ដូច្នេះមិនបាច់ប្រើជី ក៏វាផ្តល់ផលអាចបេះផ្លែលក់ រកចំណូលបន្ថែមសម្រាប់ផ្គត់ផ្គង់ជីវភាពក្នុងគ្រួសារឱ្យកាន់តែប្រសើរឡើងៗបានដែរ៕
July 13, 2018