មិនចាំបាច់តែមានជើងហោះហើរត្រង់ផ្ទាល់(Direct flight) ឬមិនផ្ទាល់នោះទេ សំខាន់ឱ្យតែមានកិច្ចព្រមព្រៀងលើការ-តភ្ជាប់ផ្លូវអាកាសនៃក្រុមហ៊ុនណាមួយនោះ យើងនឹងទទួលបានលំហូរចូលនៃអ្នកដំណើរដែលនឹងនាំមកនូវប្រាក់ចំណូល និងជួយជំរុញកំណើនសេដ្ឋកិច្ចរបស់ប្រទេសជាតិ។ នេះបើតាមអ្នកនាំពាក្យលេខាធិការដ្ឋានអាកាសចរស៊ីវិលកម្ពុជា លោក ស៊ិន ចាន់សេរីវុត្ថា ដែលបានប្រាប់សារព័ត៌មាន ឡារ៉ែនតាមទូរស័ព្ទ។
លោក ស៊ិន ចាន់សេរីវុត្ថា អ្នកនាំពាក្យលេខាធិការដ្ឋានអាកាសចរស៊ីវិលបានថ្លែងថា ដូច្នេះពាក់ព័ន្ធនឹងគម្រោងថាប្រទេសកម្ពុជានឹងមានការតភ្ជាប់ផ្លូវអាកាសដោយផ្ទាល់ជាមួយប្រទេសឥណ្ឌូនេស៊ីដែលជាប្រទេសសេដ្ឋកិច្ចធំបំផុតរបស់អាស៊ាននឹងចាប់ផ្តើមដំណើរការនៅដើមឆ្នាំ2019ខាងមុខ។ក្រសួងនេះបានស្នើសុំឯកអគ្គរដ្ឋទូតឥណ្ឌូនេស៊ីសម្រាប់ជើងហោះហើរត្រង់រវាងកម្ពុជា និងឥណ្ឌូនេស៊ីហើយពួកគេបានយល់ព្រមធ្វើកិច្ចចរចាដើម្បីឯកភាពលើកាលបរិច្ឆេទនៃការចាប់ផ្តើមបង្កើតជើងហោះហើរផ្ទាល់ក្នុងឆ្នាំ2019 ដែលនឹងប្រតិបត្តិការដោយក្រុមហ៊ុន Lion Air Group។
ព័ត៌មាននេះ យោងតាមសេចក្តីប្រកាសនៅលើវេបសាយរបស់ក្រសួងទេសចរណ៍ដែលបានឱ្យដឹងថា កាលវិភាគសម្រាប់ការបង្កើតជើងហោះហើរថ្មីដែលនឹងត្រូវដំណើរការដោយក្រុមហ៊ុនអាកាសចរណ៍ឥណ្ឌូនេស៊ី Lion Air ត្រូវបានព្រមព្រៀងគ្នាក្នុងកិច្ចប្រជុំរវាងលោក ថោង ខុន រដ្ឋមន្ត្រីទេសចរណ៍កម្ពុជា និងឯកអគ្គរដ្ឋទូតឥណ្ឌូនេស៊ីប្រចាំនៅកម្ពុជា លោក Sudirman Haseng។
ទោះជាយ៉ាងណា អ្នកនាំពាក្យរបស់លេខាធិការដ្ឋានអាកាសចរស៊ីវិលបានបញ្ជាក់ថា ជាការពិតក្រុមហ៊ុននេះមានសក្តានុពលធំ និងមានបុត្រសម្ព័ន្ធនៅប្រទេសថៃ និងម៉ាឡេស៊ី។ ប្រសិនបើមានការសម្រេចភា្ជប់ផ្លូវអាកាសជាផ្លូវការជាមួយក្រុមហ៊ុនអាកាសចរណ៍ឥណ្ឌូនេស៊ីមួយនេះមែន យើងនឹងមានជើងហោះហើរដំបូងៗត្រឹមតែ 3ជើងប៉ុណ្ណោះក្នុង1សប្តាហ៍ ពីព្រោះក្រុមហ៊ុនអាកាសចរណ៍ឥណ្ឌូនេស៊ីកំពុងតែសិក្សាផ្លូវហោះហើរថ្មីនៅឡើយ។
លោកបានអះអាងថា ជើងហោះហើរដំបូងៗត្រឹម3ជើងក្នុង1សប្តាហ៍នេះ មិនមានអ្វីជាបញ្ហាទេ នេះអាស្រ័យលើកត្តាទីផ្សារ។ “ជាគោលការណ៍ រដ្ឋាភិបាលទាំងពីរបានយល់ព្រមឱ្យមានការហោះហើរ-ហើយ ប៉ុន្តែការបើកផ្លូវហោះហើរនេះ មុននឹងអាចក្លាយជាការពិត ក្រុមហ៊ុនត្រូវធ្វើការស្រាវជ្រាវទីផ្សារ និងត្រូវប្រាកដថា មានតម្រូវការគ្រប់គ្រាន់ជាមុនសិន”។
លោកបានថ្លែងទៀតថា បើនិយាយពីការបើកការតភ្ជាប់តាមផ្លូវច្បាប់ គឺមានហើយ តែគាត់មានជម្រើស2 គឺទី1 គាត់ហោះហើរដោយផ្ទាល់។ ទី2 គាត់ហោះហើរដោយក្រុមហ៊ុនបុត្រសម្ព័ន្ធរបស់គាត់នៅម៉ាឡេស៊ី ឬនៅប្រទេសថៃ ហើយរឿងនេះមិនអាចជាការបង្ខំបានទេ ព្រោះអ្វីៗស្ថិតនៅក្នុងការពិចារណានៅឡើយ។ “ដូច្នេះយើងបានបើកចំហតាមបែបបទច្បាប់នៃការតភា្ជប់ប្រតិបត្តិការហោះហើររវាងឥណ្ឌូនេស៊ី និងកម្ពុជា នៅសល់តែការពិចារណារបស់គាត់ប៉ុណ្ណោះ យើងកំពុងរង់ចាំស្ដាប់ពីក្រុមហ៊ុនអាកាសចរណ៍នោះវិញថា តើគាត់សម្រេចយកការហោះហើរដោយផ្ទាល់ ឬដោយបែបណា?”។
លោក ស៊ិន ចាន់សេរីវុត្ថា បានបន្ថែមថា “ខ្ញុំជឿជាក់ថានឹងមានលទ្ធភាពខ្ពស់ណាស់ដែលយើងនឹងបង្កើតជើងហោះហើរនេះក្នុងពេលឆាប់ៗនេះ ពីព្រោះរដ្ឋាភិបាលទាំងពីរចាប់អារម្មណ៍យ៉ាងខ្លាំងលើការទទួលបានការហោះហើរថ្មីនេះ” ទោះបីជាមិនទាន់មានការវិវឌ្ឍអ្វីថ្មី ឬលទ្ធផលអ្វីក៏ដោយ។
ដោយឡែក ដូចគ្នានឹងក្រុមហ៊ុនឥណ្ឌូនេស៊ីដែរបណ្តាញផ្លូវអាកាសដោយផ្ទាល់ជាមួយទីក្រុងឌូបៃនៃអារ៉ាប់អេមីរ៉ាត និងរាជធានីភ្នំពេញ ក៏បានត្រៀមខ្លួនរួចរាល់ហើយដែរដោយគ្រោងនឹងបង្កើតជើងហោះហើរត្រង់តែម្ដង ទោះបីជាមិនទាន់មានកាលបរិច្ឆេទពិតប្រាកដក៏ដោយ។ Emirates មានវត្តមាននៅក្នុងព្រះរាជាណាចក្រកម្ពុជាចាប់តាំងពីថ្ងៃទី1 ខែកក្កដា ឆ្នាំមុនដោយមានផ្លូវតភ្ជាប់ទីក្រុង Dubai និងរាជធានីភ្នំពេញតាមរយៈទីក្រុងយ៉ាងហ្គោនប្រទេសមីយ៉ាន់ម៉ា។
លោក Abdulla Adnan អ្នកគ្រប់គ្រងក្រុមហ៊ុនអេមីរេតស៍នៅកម្ពុជាបាននិយាយក្នុងពិធីរំឭកខួប1ឆ្នាំរបស់ក្រុមហ៊ុនថា “យើងចង់ឱ្យមានការហោះហើរត្រង់ឱ្យបានឆាប់ តាមដែលអាចធ្វើទៅបាន។ តែយើងមិនទាន់អាចផ្តល់កាលបរិច្ឆេទច្បាស់លាស់បានទេ ព្រោះវាត្រូវការពេលវេលាដើម្បីបង្កើតផ្លូវថ្មី វាមិនមែនជាអ្វីដែលអាចធ្វើបានត្រឹមតែមួយយប់នោះទេ”។
លោកបានពន្យល់ថា ផែនការក្នុងការបង្កើតជើងហោះហើរត្រង់រវាងរដ្ឋធានីនៃសហភាពអឺរ៉ុប និងកម្ពុជា គឺផ្អែកទៅលើកំណើនសេដ្ឋកិច្ចដ៏ធំធេង និងសក្តានុពលក្នុងវិស័យអាកាសចរណ៍។ “យើងបានចូលមកប្រទេសកម្ពុជាកាលពីឆ្នាំមុន ដោយសារតែការអនុវត្តសេដ្ឋកិច្ចដ៏រឹងមាំដែលប្រទេសនេះធ្លាប់មានក្នុងរយៈពេល 2ទសវត្សរ៍មកហើយ។ ឥឡូវនេះយើងមានមោទនភាពដែលបានរួមចំណែកដល់កំណើនសេដ្ឋកិច្ចកម្ពុជា”។
លោក ស៊ិន ចាន់សេរីវុត្ថា បានបញ្ជាក់ថា ទាំងក្រុមហ៊ុនឥណ្ឌូនេស៊ី ទាំងក្រុមហ៊ុន Emirates កំពុងតែសិក្សាលើជើងហោះហើរ “ខ្ញុំយល់ថា ការមានជើងហោះហើរដោយផ្ទាល់ ឬមានជើងហោះហើរមិនផ្ទាល់(Transit) វាមិនសំខាន់ទេ ព្រោះក្រុមហ៊ុនដឹកជញ្ជូនផ្លូវអាកាសតែងមានកិច្ចព្រមព្រៀងជាមួយប្រទេសដែលខ្លួនមានជើងហោះហើរឆ្លងកាត់ ព្រោះត្រូវចុះសំចត ឬទទួលភ្ញៀវបន្ថែម ដែលនេះជាកត្តាទីផ្សារតែប៉ុណ្ណោះ។ សំខាន់ឱ្យតែមានតម្រូវការនៃជើងហោះហើរ យើងនឹងទទួលបានភ្ញៀវទេសចរ យើងនឹងទទួលបានកម្រៃ មានទីផ្សារដែលជាកត្តាចូលរួមក្នុងកំណើនសេដ្ឋកិច្ចរបស់យើង។
នៅក្នុងប្រទេសកម្ពុជា នៅក្នុងការហោះហើរ ក្រុមហ៊ុនអេមីរេតស៍បានប្រើប្រាស់យន្តហោះប្រភេទ Boeing 777-300ER ដែលមានបំពាក់នូវការរៀបចំរចនាសម្ព័ន្ធធុរកិច្ច និងសេដ្ឋកិច្ចសម្រាប់អ្នកដំណើរតាមរយៈភាពធំទូលាយ ទំនើប និងទាន់សម័យមានអ្នកដំណើរជាង77.000នាក់ហើយដែលបានហោះហើរជាមួយក្រុមហ៊ុនអេមីរេតស៍ចាប់តាំងពីក្រុមហ៊ុនបានចូលទីផ្សារកម្ពុជា។
មុនពេលចាប់ផ្ដើមដំណើរការដឹកអ្នកដំណើរនៅឆ្នាំ2017 ក្រុមហ៊ុនអាកាសចរណ៍មួយនេះបានបើកដំណើរការសេវាដឹកជញ្ជូនទំនិញរួចទៅហើយកាលពីឆ្នាំ2016។ Emirates Sky Cargo បានចាប់ផ្តើមប្រតិបត្តិការនៅខែមេសា ឆ្នាំ2016 ហើយបានដឹកជញ្ជូនទំនិញជាង 11.000តោន ដោយរាប់ទាំងការនាំចេញ និងនាំចូលនៅក្នុង និងក្រៅប្រទេសផងដែរ៕
