សង្គម និងសេដ្ឋកិច្ច - La Reine Media

ស្បែកនៅតែស្រស់ស្អាតជាមួយវិធីសាស្ត្រងាយៗក្នុងរដូវភ្លៀងធ្លាក់

នៅក្នុងរដូវវស្សាភ្លៀងធ្លាក់ មេឃត្រជាក់ក៏ពិតមែន ក៏ទម្លាប់នៃការថែរក្សាស្បែកជាប្រចាំថ្ងៃរបស់អ្នក មិនគួរត្រូវបានបំភ្លេចចោលនោះដែរ។ បន្ថែមពីនោះ អ្នកគួរតែយកចិត្តទុកដាក់ឱ្យកាន់តែច្រើនជាងមុនទៀត ដើម្បីឱ្យខែភ្លៀងដ៏អួរអាប់នេះ ស្បែកនៅតែមានភាពស្រស់បំព្រងជាប់ជានិច្ច។ រឿងដែលស្ថិតក្នុងលំដាប់ដំបូងដែលត្រូវចងចាំជានិច្ចនៅក្នុងរដូវភ្លៀងនោះគឺ ធ្វើយ៉ាងណា ការពារស្បែកឱ្យគេចផុតពីភាពសើម ព្រោះភាពសើមនេះហើយជាប្រភពនៃការកើតមានអាការរម៉ាស់រោល កន្ទួល និងស្រែងលើស្បែកជាដើម។ ស្តាប់ទៅវាដូចជាពិបាកបន្តិចហើយក្នុងការដែលមិនឱ្យស្បែកទទឹកនៅក្នុងរដូវភ្លៀងនោះ ប៉ុន្តែការពិតវាមិនពិបាកដូចដែលអ្នកគិតនោះទេ ព្រោះថាខាងក្រោមនេះ ឡារ៉ែន នឹងប្រាប់អ្នកពីវិធីនៃការប្រយុទ្ធប្រឆាំងជាមួយបញ្ហាស្បែកក្នុងរដូវភ្លៀង។

1. សម្អាតស្បែកយ៉ាងតិច3ដងក្នុងមួយថ្ងៃ ដើម្បីកម្ចាត់ចោលនូវជាតិក្អែល និងប្រេងដែលអាចមកបិទរន្ធញើសរបស់អ្នក។

2. ទឹកភ្លៀង និងអាកាសធាតុ ដែលមកជាមួយភ្លៀងដែលធ្លាក់មកអាចនាំយកនូវអ្វីៗដែលមិនល្អមកជា-មួយក៏ថាបាន ដូច្នេះកុំភ្លេចលាបឡេបន្ថែមសំណើម និងការពារស្បែកឱ្យមានសំណើម និងសុខភាពល្អផងណា៎!

3. ប្រើក្រែមការពារកម្តៅថ្ងៃដែលមាន SPF គ្រប់គ្រាន់។ មេឃប្រហែលជាត្រជាក់ ប៉ុន្តែកុំភ្លេចឱ្យសោះថា ភាពត្រជាក់នេះមិនបានបញ្ឈប់អនុភាពនៃកាំរស្មី UV ពីព្រះអាទិត្យនោះទេ។

4. មិនថារដូវកាលណានោះទេ ការដុសខាត់សម្អាតស្បែកជារៀងរាល់ពេល គឺនៅតែត្រូវធ្វើ ប៉ុន្តែធ្វើវាថ្នមៗបានហើយ។

5. រក្សាសំណើមតាមរយៈការទទួលទានទឹកឱ្យបានគ្រប់គ្រាន់។ បើទោះជាអាកាសធាតុត្រជាក់ក៏ដោយ ក៏រាងកាយនៅតែត្រូវការទឹកយ៉ាងចាំបាច់ ដើម្បីការពារស្បែករបស់អ្នកគេចឱ្យផុតពីសភាពស្លេក និងស្ងួត។

6. ការកក់សក់ និងការអប់សក់អាចនឹងត្រូវធ្វើឡើងត្រឹមតែ2ដងប៉ុណ្ណោះក្នុងមួយសប្តាហ៍ ប៉ុន្តែដោយសារតែរដូវភ្លៀងសក់របស់អ្នកអាចនឹងមានញើស ឬសើមញឹកញាប់។ ដូច្នេះការកក់សម្អាត ឬអប់សក់ជាដើមអាចនឹងត្រូវធ្វើឡើងញឹកញាប់ជាងពេលមុន ព្រោះបើមិនដូច្នេះទេភាពសើមដែលនៅជាប់នឹងសក់ ហើយមិនបានសម្អាតនោះ អាចធ្វើឱ្យស្បែកក្បាលងាយនឹងកើតមានអាការរម៉ាស់បាន។

7. រដូវភ្លៀងធ្លាក់មិនអំណោយផលទេចំពោះការប្រើប្រាស់គ្រឿងអលង្ការលម្អកាយមួយចំនួន (ខ្យល់ និងទឹកភ្លៀង អាចធ្វើឱ្យគ្រឿងអលង្ការទាំងនោះខូចទ្រង់ទ្រាយ ឬបាត់បង់សោភណ្ឌភាពរបស់វា ហើយពេលខ្លះវាក៏អាចបង្កជាបញ្ហាដល់ស្បែកថែមទៀតផង។

8. ផលិតម៉ាសបិទមុខដែលផ្សំពីវត្ថុធាតុដើមនៅក្នុងចង្ក្រានបាយរបស់អ្នក។ ម៉ាសធម្មជាតិទាំងនោះនឹងជួយឱ្យស្បែករបស់អ្នកទទួលបាននូវភាពស្រស់ស្អាតតាមបែបធម្មជាតិពិតៗជាមិនខាន៕

July 18, 2018

ក្រុមកីឡាករជ្រូកព្រៃ បង្ហាញវត្តមានសម្ភាសតាមរយៈកញ្ចក់ទូរទស្សន៍នារសៀលថ្ងៃនេះ

តាមរយៈសារព័ត៌មាន Mthai ដែលចេញផ្សាយនៅពេលមុននេះបន្ដិចបានឱ្យដឹងថា នៅថ្ងៃទី18 ខែកក្កដា ឆ្នាំ 2018 នេះនឹងមានការបង្ហាញវត្តមាន និងសម្ភាសក្រុមកីឡាករជ្រូកព្រៃ អាខាដេមី ទាំង 13រូប ជាលើកដំបូងតាមរយៈកញ្ចក់ទូរទស្សន៍ប្រទេសថៃ នាវេលាម៉ោង 6ល្ងាចនេះ ក្នុងកម្មវិធី «เดินหน้าประเทศไทย ( Thailand Moves Forward ) » បន្ទាប់ពីសម្រាកព្យាបាលនៅក្នុងមន្ទីរពេទ្យខេត្ត ឈៀងរ៉ាយ អស់រយៈពេលជាច្រើនថ្ងៃ។

គួរបញ្ជាក់ផងដែរថា ការធ្វើបទសម្ភាសនោះ មានរយៈពេលប្រមាណ 45នាទី ទៅតាមសំណួរដែលអ្នកសារព័ត៌មានថៃ និងអន្ដរជាតិបានគ្រោងទុករួចជាស្រេច ដើម្បីឱ្យប្អូនៗបានដឹង និងត្រៀមខ្លួនជាមុន ព្រោះអ្នកជំនាញបានអះអាងថា បទសម្ភាសអាចមានផលប៉ះពាល់ដល់ផ្លូវចិត្តរបស់ក្មេងៗ។ សំណួររបស់អ្នកសារព័ត៌មានដែលត្រៀមសួរទៅកាន់ក្មេងៗក្រុមជ្រូកព្រៃ រួមមាន ៖

Aljazeera English :

1-ជួយអធិប្បាយបន្ដិចបានទេថា 10ថ្ងៃដំបូង តើហេតុម្ដេចបានអ្នកទាំងអស់គ្នាមានសុវត្ថិភាពទាំងផ្លូវចិត្ត និងកាយ?

2-អ្នកជួយសង្គ្រោះបានប្រាប់អ្វីខ្លះ ចំពោះរឿងការនាំចេញពីរូងភ្នំ? តើអ្នកទាំងអស់គ្នាត្រៀមខ្លួនយ៉ាងដូចម្ដេច ចំពោះការធ្វើដំណើរចេញមកយ៉ាងលំបាកលំបិននោះ?

3-តើអ្នកបានរៀនដឹងអ្វីខ្លះពីហេតុការណ៍នេះ?

Nine Network Australia :

1-លោកគ្រូពេទ្យជនជាតិអូស្ដា្រលីមានភាពសំខាន់ប៉ុនណាក្នុងការជួយអ្នកទាំងអស់គ្នាឱ្យចេញមកពីរូងភ្នំ?

2-តើអ្នកធ្វើដូចម្ដេចបើគ្មានទឹក និងអាហារដល់ 10ថ្ងៃ តើហេតុម្ដេចទើបរស់បាន?

BBC News (UK)

1-យើងបានស្ដាប់អ្នកនិយាយភាសាអង់គ្លេសជាមួយអ្នកជ្រមុជទឹកជនជាតិអង់គ្លេស សូមជួយប្រាប់ពីអារម្មណ៍នៅពេលនោះដែលអ្នកបានជួបពួកគាត់គ្រាដំបូងក្នុងរូងភ្នំ?

2-Manchester United បានអញ្ជើញក្រុមជ្រូកព្រៃទៅទស្សនកិច្ច Old Trafford តើអ្នកនឹងទទួលការអញ្ជើញនោះយ៉ាងណាដែរ?

CNN

1-មនុស្សទូទាំងពិភពលោកបានចាប់អារម្មណ៍តាមដានព័ត៌មានបាត់ខ្លួនរបស់ក្រុមអ្នកតាំងពីថ្ងៃដំបូង តើមានអ្វីចង់ប្រាប់ទៅអ្នកតាមដានព័ត៌មានដែរឬទេ?

2-អ្នកបានសិក្សាពីការតាំងសមាធិនៅក្នុងរូងភ្នំ តើវាបានជួយអ្វីខ្លះដល់អ្នក?

សំនួររបស់មហាជន៖

1-ពួកប្អូនត្រៀមខ្លួនដើម្បីមុជទឹកយ៉ាងណាខ្លះ? បានហាត់រៀនហែលទឹកឬទេ?

2-រឿងដំបូងដែលចង់ធ្វើនៅពេលត្រឡប់ទៅដល់ផ្ទះវិញ គឺអ្វី?

3-ពួកប្អូនផ្ដល់កម្លាំងចិត្តដល់គ្នាយ៉ាងម៉េច មុនពេលអ្នកជួយសង្គ្រោះរកឃើញពួកប្អូនៗ?

July 18, 2018

យុទ្ធសាស្ត្រ 3ចំណុចដែលធ្វើឱ្យការលក់អចលនទ្រព្យទទួលបានជោគជ័យ

ការលក់អចលនវត្ថុ គឺស្រដៀងទៅនឹងការលក់ផលិតផលផ្សេងៗនៅលើទីផ្សារដែរ ប៉ុន្តែអ្វីដែលសំខាន់នោះគឺ ការលក់អចលនទ្រព្យមានតម្លៃខ្ពស់ខុសពីទំនិញផ្សេងៗនៅលើទីផ្សារ ការលក់ទំនិញផ្សេងៗមិនទាមទារឱ្យមានជំនាញខ្ពស់នោះទេ ដោយគ្រាន់តែចេះបញ្ចុះបញ្ចូលភ្ញៀវ គឺលក់បានច្រើនហើយ ប៉ុន្តែសម្រាប់ការលក់អចលនទ្រព្យវិញទាមទារឱ្យអ្នកលក់រៀបចំខ្លួនឱ្យស្អាតបាត មានចរិតថ្លៃថ្នូរ ពិសេសត្រូវមានជំនាញ ចំណេះដឹង រួមទាំងការនិយាយស្តី ការបញ្ចេញកាយវិការ គឺធ្វើយ៉ាងណាឱ្យអតិថិជនមានទំនុកចិត្តមកលើខ្លួនទើបអាចលក់បាន។

លោក តូវ ម៉េង ប្រធានផ្នែកលក់អចលនទ្រព្យរបស់ក្រុមហ៊ុនCPL មានប្រសាសន៍ថា បើសិនជាចង់ឱ្យការលក់អចលនទ្រព្យទទួលបានជោគជ័យ គឺត្រូវគិតទៅដល់ចំណុចសំខាន់ៗ3 ក្នុងនោះរួមមាន៖ 1. ទាមទារឱ្យបុគ្គលិកផ្នែកលក់អចលនទ្រព្យ ខំប្រឹងធ្វើការឱ្យអស់ពីសមត្ថភាព និងសក្តានុពលដែលខ្លួនមាន ដែលជាទូទៅប្រធានផ្នែកលក់មួយចំនួន តែងរអ៊ូរទាំថា បុគ្គលិកលក់របស់ខ្លួនធ្វើការមិនអស់ពីសមត្ថភាព បុគ្គលិកធ្វើការកេងពេលវេលា ឬធ្វើការដោយមិនមានការប្រឹងប្រែងជាដើម ប៉ុន្តែតាមពិតទៅប្រធានគ្រប់គ្រងក្រុមហ៊ុន ឬប្រធានផ្នែកលក់ខ្លះ មិនបានបង្កើតរូបមន្ត ដើម្បីធ្វើយ៉ាងណាឱ្យបុគ្គលិករបស់ខ្លួនធ្វើការឱ្យអស់ពីសមត្ថភាពទៅវិញទេ។

សម្រាប់បទពិសោធរបស់លោកផ្ទាល់វិញ ការទទួលបានជោគជ័យលើការលក់អចលនទ្រព្យកន្លងមក គឺលោកបានបង្កើតរូបមន្តចំនួន 3បន្ថែមទៀតរួមមាន ក.ដំណាក់កាលរើសបុគ្គលិកគឺត្រូវរើសឱ្យត្រូវតាមជំនាញ ដែលនេះជាដំណាក់កាលសំខាន់ជាងគេបំផុត មានន័យថាបើយើងរើសបុគ្គលិកបានល្អ ការបំពេញការងារនឹងទទួលបានលទ្ធផលល្អ តែបើរើសបុគ្គលិកមិនបានល្អ ការងារក៏នឹងមិនដំណើរ-ការល្អទៅតាមនោះដែរ។ ការជ្រើសរើសបុគ្គលិកទាមទារឱ្យរើសត្រូវតាមជំនាញ ហើយដាក់ឱ្យចំតួនាទី ឬរើសនៅពេលមានតម្រូវការចាំបាច់ក្នុងបំណងធ្វើការឱ្យចំគោលដៅទើបទទួលបានលទ្ធផលល្អ។ ពេលរើសបានហើយ យើងត្រូវការបំប៉នជំនាញដល់គាត់ ទើបអាចធ្វើការបានលឿន និងទទួលបានលទ្ធផលខ្ពស់។

ចំណែកចំណុចមួយទៀតគឺ ខ.ត្រូវផ្តល់ក្តីសង្ឃឹមទៅដល់បុគ្គលិក បើសិនជាប្រធានក្រុមហ៊ុន ឬប្រធានផ្នែកលក់មិនមានផែនការផ្តល់ក្តីសង្ឃឹមទៅដល់បុគ្គលិក ដូចជាខែក្រោយ ឬឆ្នាំក្រោយបើប្រាក់ខែ ឬតំណែង ឬចំណេះជំនាញរបស់គាត់មិនកើនឡើងទេនោះ បុគ្គលិកនឹងមិនមានក្តីសង្ឃឹមទេ គាត់នឹងធ្វើការរង់ចាំតែថ្ងៃចាកចេញប៉ុណ្ណោះ ប៉ុន្តែបើសិនជាប្រធានក្រុមហ៊ុនឬប្រធានផ្នែកផ្តល់ក្តីសង្ឃឹមឱ្យគាត់ គាត់នឹងប្រឹងប្រែងធ្វើឱ្យបានជោគជ័យដោយក្តីសង្ឃឹម ព្រោះពេលមានក្តីសង្ឃឹមហើយ គាត់នឹងប្រឹងប្រែងឱ្យអស់ពីសមត្ថភាព អស់ពីសក្តានុពលដែលគាត់មានមិនខាន។ ចំណុចមួយទៀតចុងក្រោយគឺ គ.ការបំពេញតម្រូវការជាមូលដ្ឋាន ដែលចំណុចនេះក្នុងនាមយើងជាថ្នាក់ដឹកនាំ ចាំបាច់ត្រូវគិតទៅដល់ការស្នាក់នៅសមរម្យ ការហូបចុកគ្រប់គ្រាន់ ជាចំណុចដែលមនុស្សលើពិភពលោកនេះទទួលស្គាល់ ដូចការលើកឡើងរបស់លោក Abaham Maslow បានលើកឡើងថា បើចង់ឱ្យមនុស្សស្មោះត្រង់ជាមួយយើងនិងធ្វើការជាមួយយើងឱ្យអស់ពីសមត្ថភាពនោះយើងត្រូវតែបំពេញតម្រូវការជាមូលដ្ឋានរបស់គាត់ទៅតាមការប្រឹងប្រែងរបស់បុគ្គលិកម្នាក់ៗ រួមមានតម្រូវការហូបចុកគ្រប់គ្រាន់ មានកន្លែងស្នាក់នៅត្រឹមត្រូវ តាមរយៈការបង្កើតអត្ថប្រយោជន៍ផ្សេងៗដល់គាត់។

ចំណែកចំណុចទី2. ក្នុងនាមជាប្រធាន យើងត្រូវរៀបចំប្រព័ន្ធការងារឱ្យបុគ្គលិកធ្វើការរួមគ្នា ឱ្យចុះសម្រុងជាមួយគ្នាជាធ្លុងមួយ ហើយបើធ្វើការមិនរួមគ្នាទេ ពួកគាត់ធ្វើតែរៀងៗខ្លួន ទោះជាបុគ្គលិកធ្វើការអស់ពីសមត្ថភាពតែគាត់មិនមានការសហការគ្នានោះ ប្រាកដជាមិនទទួលបានលទ្ធផលធំនោះទេ ឧទាហរណ៍ការងារខ្លះត្រូវធ្វើរួចតែមួយថ្ងៃ បែរជាធ្វើមិនរួចទៅវិញ ដោយសារតែមិនបានធ្វើការរួមគ្នា។

រីឯចំណុចទី3.ជាចំណុចសំខាន់ចុងក្រោយដែលម្ចាស់ក្រុមហ៊ុនចង់បាន គឺរើសបុគ្គលិកធ្វើការឱ្យមានប្រសិទ្ធភាព និងលទ្ធផល ជួនកាលគាត់ធ្វើការរួមគ្នាហើយ តែប្រធានមិនបានបង្កើតវិធីសាស្ត្រ យុទ្ធសាស្ត្រ និងចិត្តសាស្ត្រ បង្កើតជាផែនទីបង្ហាញផ្លូវមួយឱ្យបានល្អទេនោះ ព្រោះជួនកាលខំធ្វើការអស់ពីកម្លាំងកាយចិត្ត អស់ពីសមត្ថភាពហើយ ក៏មិនទទួលបានលទ្ធផលល្អតាមការចង់បានរបស់យើងដែរ។ លោកបន្ថែមថា ជួនកាលយើងដាក់ផែន-ការឱ្យគាត់លក់ ដោយកំណត់លក់ឱ្យបាន 1លានដុល្លារក្នុងមួយឆ្នាំ តែយើងមិនបានដាក់វិធីសាស្ត្រ ឬផែនទីបង្ហាញផ្លូវទេនោះ ដូច្នេះជួនកាលដោយសារការបញ្ជារបស់ប្រធាន គាត់ក៏ខំប្រឹងលក់ ដែលរួមមានទាំងការបញ្ចុះបញ្ចូលអតិថិជនផង ទាំងបោកបញ្ឆោតគេផង ជួនកាលលក់បានលុយ 1លានដុល្លារមែន ប៉ុន្តែបានតែម្តងប៉ុណ្ណោះ លើកក្រោយៗទៀតលក់លែងបានដោយសារអតិថិជនអស់ជំនឿ ដែលនេះអាចជាការបង្កើតគុណវិបត្តិសម្រាប់ក្រុមហ៊ុន ឬនាយកដ្ឋានលក់ទៅវិញទេ។

ម្យ៉ាងទៀតបុគ្គលិកមួយចំនួនទៀត ធ្វើការគិតតែគោរពតាមគោលការណ៍ដែលប្រធានដាក់ឱ្យទាំងស្រុង តែលក់មិនបានលទ្ធផល ដែលនេះកើតចេញមកពីកត្តាខ្លួនឯង។ ជួនកាលគាត់គោរពគោលការណ៍របស់ក្រុមហ៊ុនមែន តែគាត់មិនចេះបត់បែន ឬមិនហ៊ានសម្រេចចិត្តទៅតាមតម្រូវការរបស់ភ្ញៀវដែលហៅថា ជំនាញចរចា។ ក្នុងនាមជាបុគ្គលិកលក់ យើងត្រូវចេះសង្កេតពីតម្រូវការរបស់ភ្ញៀវ ហើយត្រូវធ្វើការបត់បែនឱ្យទាន់កាលៈទេសៈ នោះទើបយើងអាចទាក់ទាញទឹកចិត្តភ្ញៀវបាន។

ហើយដើម្បីឱ្យចំណុចធំៗទាំង3 ខាងលើ ទទួលបានជោគជ័យ ប្រធានក្រុមហ៊ុន ឬប្រធានផ្នែកលក់ត្រូវអនុវត្តដំណើរការលក់ទៅតាមដំណាក់កាល ដូចជា ដំណាក់កាលបង្កើត ឬជ្រើសរើសផលិតផលល្អដូច្នោះដែរ មានន័យថា រើសអចលនទ្រព្យដែលល្អ ហើយមុននឹងលក់ត្រូវសិក្សាផលិតផលរបស់យើងឱ្យបានច្បាស់ថា តើអាចលក់បាន ឬលក់មិនបាន ហើយត្រូវរើសផលិតផលណាដែលជាតម្រូវការរបស់អតិថិជន លើសពីនេះកុំភ្លេចបណ្តុះបណ្តាលបុគ្គលិក ឱ្យក្លាយជាអ្នកលក់ពូកែ ដូច្នេះនៅពេលដែលយើងមានបុគ្គលិកពួកែ បុគ្គលិកល្អ ធ្វើផែនការលក់ល្អ មានផលិតផលល្អសម្រាប់លក់នៅក្នុងដៃនោះនឹងវាប្រាកដជាធ្វើឱ្យការលក់ទទួលបានជោគជ័យមិនខាន៕

July 18, 2018

ឪពុកម្តាយគួរយល់ពីវិធីដែលធ្វើឱ្យក្មេងជំនាន់ក្រោយខ្លាំងជាងខ្លួន

បញ្ហាប្រឈមនាពេលបច្ចុប្បននេះមានឪពុកម្តាយវ័យក្មេងជាច្រើនដែលបានបង្កើតគ្រួសារ តែមិនទាន់មានចំណេះដឹងគ្រប់គ្រាន់ក្នុងការធ្វើជាអាណាព្យាបាលដែលមានសមត្ថភាពតម្រង់ទិសដល់កូន ដែលកត្តានេះអាចប៉ះពាល់ដល់អនាគតរបស់កូន និងវាក៏ឆ្លុះបញ្ចាំងពីអនាគតរបស់សង្គមផងដែរ ព្រោះកុមារជាអ្នកបន្តវេនរបស់សង្គមលើគ្រប់វិស័យ។

លោក ថៃ វណ្ណថា នាយកក្រុមហ៊ុន @Home Photography បានលើកឡើងនៅក្នុងកម្មវិធី Ignite Phnom Penh ថា អាណាព្យាបាលមួយចំនួនមិនទាន់យល់ពីអ្វីដែលក្មេងត្រូវការពិតប្រាកដនោះទេ ជាក់ស្តែងយើងឃើញមានអាណាព្យាបាលខ្លះបានផ្តល់ឧបករណ៍អេឡិចត្រូនិកដល់កូនដើម្បីឱ្យពួកគេរវល់ជាមួយនឹងការលេងឧបករណ៍ទាំងអស់នោះ ហើយគាត់មានពេលទំនេរសម្រាប់ការងារផ្ទាល់ខ្លួន។ ចំណុចនេះជារឿងមិនត្រឹមត្រូវ ព្រោះកុមារជាវ័យដែលកំពុងចង់ចេះចង់ដឹងបំផុត។ ផ្ទុយមកវិញ កុមារតែងតែចង់ឱ្យមនុស្សធំ ជាពិសេសឪពុកម្តាយនៅជិតគេឱ្យបានច្រើនដើម្បីលើកទឹកចិត្ត បណ្តុះគំនិត និងបង្កើតភាពរីករាយប្រកបដោយភាពវិជ្ជមានដល់ពួកគេ។

លោក ថៃ វណ្ណថា បាននិយាយថា៖ “កុមារជាវ័យដែលចង់ចេះចង់ដឹង និងសួរច្រើនបំផុត ហេតុនេះប្រសិនបើយើងចង់ឱ្យគាត់ក្លាយជាអ្នកវិទ្យាសាស្ត្រ វាជាពេលល្អដែលយើងអាចនិយាយរឿងវិទ្យាសាស្ត្រដល់គេដើម្បីបណ្តុះគ្រាប់ពូជនៃគំនិតដល់កូនតូចៗឱ្យក្លាយជាអ្នកដែលមានសមត្ថភាព និងខិតខំប្រឹងប្រែងនៅថ្ងៃអនាគត”។

បើតាមលោក វណ្ណថា កុមារត្រូវការការរៀនសូត្រពីគ្រប់ទីកន្លែង មិនមែនគ្រាន់តែរៀនពីសាលានោះទេ។ កុមារត្រូវការរៀនពីការសង្កេត រៀនពីការស្តាប់ រៀនពីការលើកទឹកចិត្ត និងជំរុញពីមនុស្សនៅជុំវិញខ្លួន។ សូមកុំឱ្យពេលវេលាដឹកមុខកុមារដោយការបណ្តោយឱ្យពួកគេលេងឧបករណ៍អេឡិចត្រូនិកដែលបង្កភាពអវិជ្ជមានដល់ពួកគេ។

ក្រោយពេលដែលកុមារធំឡើងលោកវណ្ណថាលើកឡើងថា អាណាព្យាបាលចាំបាច់ត្រូវតម្រង់ទិស និងជំរុញលើកទឹកចិត្តគេដោយផ្ទាល់ និងជំរុញគេឱ្យចូលរួមការងារស្ម័គ្រចិត្ត ការងារក្រុមហ៊ុន ឬការងារសំខាន់ៗមួយចំនួនទៀត ដើម្បីផ្តល់ឱកាសឱ្យគេទទួលបាននូវបទពិសោធជីវិតល្អ។ អ្វីដែលពួកគេចង់បានគឺចំណេះដឹង មិនមែនលុយកាក់នោះទេ ហេតុនេះអាណាព្យាបាលត្រូវតែឈរនៅក្បែរដើម្បីធ្វើជាមិត្តភ័ក្តិពួកគេ និងនៅចាំជួយលើកទឹកចិត្តពួកគេនៅពេលដែលគេមានកំហុសឆ្គង ឬត្រូវការជំនួយ។

បន្ទាប់ពីឆ្លងផុតសាលា បើទោះបីជាយើងមានលទ្ធភាពខ្ពស់ ឬក្មេងនោះជាកូនអ្នកមានក៏ដោយ អ្វីដែលអាណាព្យាបាលត្រូវធ្វើ មិនមែនពាំងកូនមួយជីវិតទេ តែត្រូវបណ្តោយឱ្យគេរៀនឆ្លងកាត់ការលំបាក និងបង្កើនភាពរឹងមាំដោយខ្លួនឯង។ មិនថាការងារសាលា ការងារឯកជនរបស់ខ្លួនគេ ឬការងារក្រុមហ៊ុននោះទេ យើងត្រូវតែជំរុញឱ្យគេចូលរួមធ្វើ និងទទួលខុសត្រូវដោយខ្លួនឯង តែស្ថិតក្នុងស្ថានភាពជាធម្មតាទេ មនុស្សណាក៏មានកំហុសដែរ ហើយពេលខ្លះកំហុសលើកដំបូងជាកំហុសល្អ ដែលកូនៗអាចរៀនពីបទពិសោធជីវិត។

លោក ថៃ វណ្ណថា បាននិយាយថា៖ “កំហុសដំបូង គឺជាកំហុសល្អ កុំឱ្យតែកំហុសដែលកើតឡើងដោយការខ្ជិល និងកំហុសដដែលទើបជារឿងអាក្រក់។ ហេតុនេះយើងត្រូវប្រាប់គាត់ពីកន្លែងត្រូវ និងបង្រៀនឱ្យកូនទទួលស្គាល់ការពិតថា មួយណាជាកំហុសល្អ និងមួយណាជាកំហុសអាក្រក់”។

ប្រធានក្រុមហ៊ុនផ្នែកសេវាកម្មថតរូបខាងលើបានលើកឡើងផងដែរថា ដើម្បីបណ្តុះបណ្តាលកូនៗឱ្យមានសមត្ថភាពខ្លាំងជាងពួកយើងជំនាន់នេះ យើងត្រូវអនុវត្តនូវជំហានចំនួន3 គឺជំរុញកូនៗឱ្យរៀនដោយការសង្កេត រៀនដោយការអនុវត្ត និងរៀនដោយការទទួលខុសត្រូវ៕

July 18, 2018

វិនិយោគិនខេត្តសៀងហៃ នឹងមកវិនិយោគវិស័យថាមពលនៅកម្ពុជា

ក្នុងទិសដៅលើកកម្ពស់វិស័យថាមពលនៅកម្ពុជា ក្រុមអ្នកវិនិយោគខេត្តសៀងហៃ ប្រទេសចិនគ្រោងចូលមកបោះទុនដំឡើងរោងចក្រផលិតថាមពលអគ្គិសនីដើរដោយធ្យូងថ្ម និងប្រព័ន្ធផ្កាយរណបនៅក្នុងប្រទេសកម្ពុជា ដើម្បីផ្គត់ផ្គង់តម្រូវការ និងចូលរួមអភិវឌ្ឍវិស័យនេះឱ្យកាន់តែប្រសើរឡើង។

លោក លាំង សាន (Liang Shan) អនុប្រធានក្រុមហ៊ុន Shanghai Electronic Communication Technology Co., Ltd បានលើកឡើងថា ក្រុមហ៊ុនរបស់លោកមានឯកទេសខាងដំឡើងរោងចក្រថាមពលអគ្គិសនីធ្យូងថ្មជាមួយបច្ចេកវិទ្យាទំនើបមិនប៉ះពាល់ដល់បរិស្ថានដោយលក្ខណៈពិសេសនៃប្រព័ន្ធបច្ចេកវិទ្យាផ្កាយរណបដែលអាចចាប់រូបភាព និងបញ្ជូនទិន្នន័យឆ្លងកាត់ទ្វីបនិងប្រទេសជាច្រើនក្នុងពិភពលោក។ តំណាងក្រុមហ៊ុនទាំង2 បានស្នើសុំក្រសួងពាណិជ្ជកម្ម ជួយគាំទ្រគម្រោងវិនិយោគនេះ ដើម្បីបង្កើនទំហំវិនិយោគរវាងខេត្តសៀងហៃ និងប្រទេសកម្ពុជា។

ឯកឧត្តម ប៉ាន សូរស័ក្តិ រដ្ឋមន្ត្រីពាណិជ្ជកម្មបានសម្តែងការគាំទ្រខ្លាំងចំពោះគម្រោងការវិនិយោគខាងលើ និងបានសន្យាជួយសម្របសម្រួលគម្រោងទាំងនេះឱ្យលេចរូបរាងឡើងនាពេលអនាគត។ ឯកឧត្តមរដ្ឋមន្ត្រីក៏បានស្នើទៅកាន់តំណាងក្រុមហ៊ុនខាងលើ ធ្វើការសិក្សាអំពីលក្ខណៈភូមិសាស្ត្រនៃប្រទេសកម្ពុជា និងសក្តានុពលអតិថិជនឱ្យបានច្បាស់ ដើម្បីរៀបចំសំណើវិនិយោគផ្លូវការ ដាក់ជូនរាជរដ្ឋាភិបាលកម្ពុជា៕

July 18, 2018

ផ្ទុះការសង្ស័យ!! G-Devith បញ្ចេញបទល្បីកប់ តែមិនមែននៅក្នុងទ្រនំហង្សមាស

នៅពេលថ្មីៗនេះ តារាចម្រៀងប្រុសនៅក្នុងផលិតកម្មរស្មីហង្សមាស គឺលោក G-Devith បានបញ្ចេញបទចម្រៀងថ្មីរបស់ខ្លួនទាំងនៅលើបណ្ដាញសង្គមហ្វេសប៊ុក និងយូធូប ដែលបទនោះមានចំណងជើងថា «BODY» ដែលមានការសម្ដែងដោយរូបលោកផ្ទាល់ជាមួយនឹងកញ្ញា ទេព បូព្រឹក្ស។ អ្វីដែលកាន់តែធ្វើឱ្យមានភាពទាក់ទាញបំផុតរបស់បទចម្រៀងនេះគឺការបកស្រាយជាភាសាខ្មែរ និងជាភាសាថៃ ដែលមាន Version 2 ដាច់ដោយឡែកផ្សេងគ្នា ជាប្រភេទ Original Song។

គួរកត់សម្គាល់ដែរថា បទចម្រៀងដ៏ថ្មីសន្លាងមួយបទនេះ មិនត្រឹមតែមានភាពល្បីល្បាញនៅក្នុងស្រុកតែប៉ុណ្ណោះទេ តែក៏ទទួលបានការគាំទ្រនៅក្នុងប្រទេសថៃដូចគ្នាផងដែរ រហូតដល់មានអ្នកគាំទ្រជនជាតិថៃបានចូលមកសរសើរ និងគាំទ្រ G-Devith យ៉ាងពេញទំហឹងទៀតផង។ ទន្ទឹមនឹងការគាំទ្រយ៉ាងភ្លូកទឹកភ្លូកដីបែបនេះ ក៏នៅមានផ្ទុះការសង្ស័យពីសំណាក់មហាជនដែលបានបង្ហើបថា «ហេតុអ្វីបទចម្រៀងល្បីមួយបទនេះមិនមែននៅក្នុងផលិតកម្មរស្មីហង្សមាស តែបែរជាបទ Original Song នៅក្នុងគណនីយូធូបផ្ទាល់របស់លោកទៅវិញ?»។

ស្របពេលជោគជ័យយ៉ាងខ្លាំងរបស់តារាចម្រៀង G-Devith បច្ចុប្បន្ននេះគេមើលឃើញថា លោកមានភាពមមាញឹកច្រើន ចំពោះការគ្រប់ការងារសិល្បៈ និងជំនួញរួមគ្នាជាមួយកញ្ញា ទេព បូព្រឹក្ស ក្នុងការបើកហាងផលិតផលគ្រឿងសម្អាងសម្រាប់បុរសនារីពីរោងចក្រនៅប្រទេស សាំងហ្គាពួរផ្ទាល់(Cosmetic)ឈ្មោះ ទេព បូព្រឹក្ស ជាអក្សរកាត់ ” XTBP” និងមានសម្លៀកបំពាក់ និងមួកផងដែរ ហើយហាងពួកគេមានឈ្មោះ Dit-Way Shop ដែលបានចំណាយទឹកប្រាក់សរុប 14ម៉ឺនដុល្លារអាមេរិក ដោយហ៊ុនគ្នាម្នាក់ 50%៕

July 18, 2018

សាលារាជធានីភ្នំពេញ ផលិតវីដេអូជំរុញឱ្យប្រជាជនជិះរថយន្តក្រុង ដើម្បីកាត់បន្ថយការកកស្ទះចរាចរណ៍

ភ្នំពេញ៖ សេវាដឹកជញ្ជូនសាធារណៈ បានក្លាយជាផ្នែកមួយនៃជីវិតរបស់ប្រជាជន ក្នុងប្រទេសអភិវឌ្ឍន៍នានា ហើយវាក៏ជាផ្នែកមួយដែលអាចរុញច្រានឱ្យសង្គមមានការអភិវឌ្ឍបានលឿនថែមទៀតផង។

នៅពេលដែលមនុស្សម្នាក់ៗកាត់បន្ថយការប្រើប្រាស់មធ្យោបាយផ្ទាល់ខ្លួន ហើយងាកមកធ្វើដំណើរតាមបណ្តាញដឹកជញ្ជូនសាធារណៈ នោះពួកគេនឹងអាចចំណេញថវិកាក្នុងការធ្វើដំណើរ ចំណេញពេលវេលាដើម្បីធ្វើការងារ ឬអានសៀវភៅ មិនទើសចិត្ត ឬខាតថវិកាចំណាយលើសាំងនៅពេលស្ទះចរាចរណ៍ និងអាចសម្រាកបានយ៉ាងល្អដែលអាចធ្វើឱ្យពួកគេសន្សំថាមពលបានយ៉ាងមានប្រសិទ្ធភាពដើម្បីធ្វើការងារប្រចាំថ្ងៃ។ នៅប្រទេសអភិវឌ្ឍន៍ធំៗ សេវាសាធារណៈ ដូចជារថយន្តក្រុង និងរថភ្លើងជាដើមបានជួយសម្រួលយ៉ាងច្រើនដល់ការរស់នៅរបស់ប្រជាជនគ្រប់ស្រទាប់វណ្ណៈ មិនថាអ្នកដែលមានចំណូលតិច ចំណូលមធ្យម ឬបុគ្គលសំខាន់ៗក្នុងសង្គមនោះទេ។

នៅពេលថ្មីៗនេះ សាលារាជធានីភ្នំពេញ បានចេញវីដេអូអប់រំមួយដែលលើកទឹកចិត្តឱ្យប្រជាជនជិះរថយន្តក្រុងសាធារណៈ ដើម្បីធ្វើជាមធ្យោបាយធ្វើដំណើរ។ ក្នុងវីដេអូនោះក៏បង្ហាញពីគុណសម្បត្តិជាច្រើនសម្រាប់ការជិះរថយន្តក្រុង វិធីសាស្ត្រទូទាត់សាច់ប្រាក់ និងវិធីសាស្ត្រចុងប៊ូតុងដើម្បីស្នើសុំឈប់យ៉ាងងាយស្រួលដើម្បីជាជំនួយដល់ប្រជាជនដែលមិនធ្លាប់ប្រើប្រាស់សេវារថយន្តក្រុងងាយធ្វើដំណើរដោយមិនបារម្ភ។

ខាងក្រោមនេះជាវីដេអូដែលសាលារាជធានីភ្នំពេញបានចេញកាលពីព្រឹកមិញនេះ៖

July 18, 2018

អាជីវកម្មជោគជ័យភាគច្រើនជាកន្លែងប្រមូលផ្តុំនូវបុគ្គលិកដែលស្រឡាញ់ការងារ

ដើម្បីឱ្យអាជីវកម្មមួយដំណើរការប្រកបដោយភាពជោគជ័យ មានកត្តារួមផ្សំជាច្រើនដែលក្នុងនោះធនធានមនុស្សគឺជាផ្នែកមួយយ៉ាងសំខាន់ដែលសម្រេចដល់វាសនារបស់ក្រុមហ៊ុនទាំងមូល។ ការគ្រប់គ្រងបុគ្គលិកជាចំណុចមួយដែលម្ចាស់អាជីវកម្មជាច្រើនកំពុងយកចិត្តទុកដាក់ ហើយចង់ឱ្យធនធានមនុស្សនៅក្នុងក្រុមហ៊ុនរបស់ខ្លួនអាចធ្វើការងារប្រកបដោយសក្តានុពលពិតប្រាកដដើម្បីធ្វើដំណើររួមគ្នាឆ្ពោះទៅរកភាពជោគជ័យ និងឈរជើងបានយូរនៅក្នុងពិភពអាជីវកម្ម។

លោកជំទាវ ញឹក ដានី ប្រធានក្រុមហ៊ុន McMillanwoods បានលើកឡើងថា ជនជាតិជប៉ុនតែងតែនិយាយថាបុគ្គលិកគឺជាទ្រព្យសម្បត្តិរបស់ក្រុមហ៊ុន ហេតុនេះប្រសិនបើបុគ្គលិកយល់ពីតួនាទីរបស់ខ្លួនបានល្អ និងយល់ពីគោលដៅរួមរបស់ក្រុមហ៊ុនច្បាស់នោះស្ថាប័ននឹងមានការអភិវឌ្ឍខ្លាំង ព្រោះម្នាក់ៗសុទ្ធតែជាចំណែកដែលរុញអាជីវកម្មឱ្យជោគជ័យប្រកបដោយថាមពល តែប្រសិនបើបុគ្គលិកម្នាក់ៗមិនគិតថាខ្លួនជាចំណែកមួយរបស់ក្រុមហ៊ុនទេ គាត់នឹងធ្វើការងារឱ្យតែរួចពីដៃ ហើយពេលខ្លះថែមទាំងបង្កបញ្ហាថែមទៀតផង។ ចំណុចដែលម្ចាស់អាជីវកម្មភាគច្រើនត្រូវការគឺ បុគ្គលិកដែលមានភាពស្មោះត្រង់ចំពោះខ្លួនឯង និងស្មោះត្រង់ជាមួយក្រុមហ៊ុន។

លោកជំទាវ ញឹក ដានី បាននិយាយថា៖ “ក្រុមហ៊ុននីមួយៗត្រូវការបុគ្គលិកចេះស្រឡាញ់ការងារដែលខ្លួនធ្វើពិតប្រាកដ ព្រោះនៅពេលដែលគាត់ចូលធ្វើការងារដោយពេញចិត្ត និងស្រឡាញ់ការងាររបស់គាត់ គាត់នឹងអនុវត្តការងារប្រកបដោយភាពហ្មត់ចត់ ហើយរីករាយក្នុងការអភិវឌ្ឍគ្រប់ដំណាក់កាល”។

ម្ចាស់អាជីវកម្មខាងលើបានលើកឡើងផងដែរថា ក្រុមហ៊ុនដែលមានបុគ្គលិកភាគច្រើនជាអ្នកធ្វើការងារដោយគ្មានបំណង និងគោលដៅពិតប្រាកដហើយចូលធ្វើការងារដើម្បីតែប្រាក់ខែ គាត់នឹងមិនអាចបង្កើតក្តីស្រឡាញ់បានទេសម្រាប់ការងារផ្ទាល់ខ្លួន និងក្រុមហ៊ុនទាំងមូល។ ម្យ៉ាងវិញទៀត គាត់ក៏មិនអាចរួមចំណែកល្អដែលអាចរុញឱ្យក្រុមហ៊ុនមានផលចំណេញច្រើនដែរ ដែលពេលខ្លះវាធ្វើឱ្យគាត់មានការអន់ចិត្តនៅពេលដែលគាត់មិនត្រូវបានដំឡើងប្រាក់ខែ ឬតួនាទី នៅពេលដែលគាត់ធ្វើការងារយូរ។ លោកជំទាវបញ្ជាក់ផងដែរថា គ្មានម្ចាស់អាជីវកម្មណាមិនចង់ឱ្យបុគ្គលិករបស់ខ្លួនទទួលបានប្រាក់ខែច្រើននោះទេ តែគាត់ក៏ចាំបាច់ត្រូវថ្លឹងថ្លែងផងដែរពីផលតបស្នងដែលខ្លួនបានធ្វើចំពោះក្រុមហ៊ុន។ ហេតុនេះប្រសិនបើចង់អភិវឌ្ឍខ្លួនឯងឱ្យបានល្អនៅក្នុងស្ថាប័ន ទទួលបានការឡើងតំណែង និងការទុកចិត្តពីម្ចាស់អាជីវកម្ម បុគ្គលិកម្នាក់ៗគួរស្វែងរកការងារដែលខ្លួនស្រឡាញ់ពិតប្រាកដ ហើយធ្វើវាឱ្យអស់ពីចិត្តដោយរីករាយជាមួយគ្នា យើងនឹងក្លាយជាចំណែកយ៉ាងសំខាន់នៃភាពរីកចម្រើនរបស់ក្រុមហ៊ុន ហើយពេលនោះអ្នកដឹកនាំប្រាកដជាមើលឃើញពីការខិតខំប្រឹងប្រែងរបស់យើងមិនខាន។

លោក គង់ វិចិត្រា ស្ថាបនិកស្ថាប័នLeading Asia Academy បានលើកឡើងថាស្ថាប័នដែលទទួលបានជោគជ័យជារួមគឺជាកន្លែងដែលអាចប្រមូលផ្តុំមនុស្សដែលមានឆន្ទៈ និងក្តីស្រឡាញ់រួមគ្នាដើម្បីធ្វើការងារសម្រេចលើជោគវាសនារួមមួយ។ ហេតុនេះនៅពេលដែលស្ថាប័នរើសបានបុគ្គលប្រភេទនេះមកធ្វើការ គាត់នឹងឃើញថាផ្នែកដែលគាត់ធ្វើគឺពោរពេញដោយភាពច្នៃប្រឌិត ព្រោះគាត់រីករាយជាមួយនឹងអ្វីដែលគាត់កំពុងធ្វើ និងរំភើបជាមួយលទ្ធផលដែលរីកដុះដាលឡើងជារៀងរាល់ថ្ងៃ។ តែបញ្ហាប្រឈមមួយចំនួនដែលស្ថាប័នមិនអាចស្វែងរកមនុស្សប្រភេទនេះបាន ឬរកបានហើយតែបែរជាមិនអាចអភិវឌ្ឍបានល្អ អាចមកពីកត្តាមួយចំនួនដូចជាការផ្តល់ឱកាសនៅមានកម្រិត បរិស្ថានជុំវិញបុគ្គលិកដែលមានទម្លាប់មិនល្អ គឺជាកត្តារំខានមួយចំនួនទៀតដែលគួរយកចិត្តទុកដាក់។

លោក គង់ វិចិត្រា បាននិយាយថា៖ “មានបុគ្គលិកមួយចំនួនបានដាក់ពាក្យធ្វើការងារដោយគិតថាគាត់អាចធ្វើអ្វីដែលខ្លួនស្រឡាញ់ តែក្រោយពេលដែលគាត់ទទួលការងារនោះហើយ គាត់បានធ្វើការងារនៅក្នុងក្រុមមួយដែលមានភាពអវិជ្ជមាន ហេតុនេះគាត់ក៏បែរជាបណ្តោយឱ្យខ្លួនឯងផ្តេកផ្តួលជាមួយនឹងភាពមិនច្បាស់លាស់ហើយក៏មានអារម្មណ៍ថានឿយណាយជាមួយនឹងការងារនោះក៏មាន”។

អ្នកជំនាញបណ្តុះបណ្តាលខាងលើបានលើកឡើងថា ម្ចាស់អាជីវកម្មគួរតែគិតគូរពីបរិស្ថាននៃការធ្វើការងារដើម្បីបង្កើតលក្ខណៈស្វាហាប់ និងមានការលើកទឹកចិត្តឱ្យបានល្អ ដើម្បីជំរុញឱ្យបុគ្គលិកម្នាក់ៗមានភាពសប្បាយរីករាយជាមួយនឹងជំនាញអ្វីដែលខ្លួនកំពុងធ្វើ។ ម្យ៉ាងវិញទៀត នៅពេលដែលម្ចាស់អាជីវកម្មរកឃើញពីអ្វីដែលបុគ្គលិកខ្លាំងពិតប្រាកដហើយ យើងអាចផ្តល់ឱកាសឱ្យគាត់ដើម្បីសាកល្បងនូវអ្វីដែលជាទេពកោសល្យរបស់គាត់។ ការអនុវត្តបែបនេះអាចជំរុញឱ្យស្ថាប័នរើសបានអ្នកខ្លាំងលើផ្នែកផ្សេងៗគ្នា ដែលអាចរួមគ្នាសម្រេចជោគជ័យអាជីវកម្ម និងបន្តទម្លាប់បណ្តុះបណ្តាលបន្តគ្នាទៅកាន់អ្នកដែលចូលក្រោយៗទៀតឱ្យមានក្តីស្រឡាញ់ និងភាពច្នៃប្រឌិតខ្ពស់នៅក្នុងការងារ៕

July 18, 2018

6ខែដើមឆ្នាំ2018 ការនាំចេញអង្ករកម្ពុជា ថយចុះ 5.9ភាគរយ ធៀបឆ្នាំ2017

របាយការណ៍ស្ដីអំពីស្ថានភាពនៃការនាំចេញអង្កររបស់កម្ពុជារបស់លេខាធិការដ្ឋានច្រកចេញចូលតែមួយបានបង្ហាញថា រយៈពេល 6ខែ គិតចាប់ពីខែមករា ដល់ខែមិថុនា ក្នុងឆ្នាំ2018 ការនាំចេញអង្កររបស់កម្ពុជាទៅកាន់ទីផ្សារអន្តរជាតិ មានចំនួន 271.537 តោន។ ចំនួននេះបានថយចុះ 5.9ភាគរយ បើធៀបនឹងការនាំចេញអង្ករក្នុងរយៈពេលដូចគ្នានេះនៅឆ្នាំ2017 ដែលមានចំនួន 288.562តោន។បញ្ហានេះគឺដោយសារតែតម្រូវការក្រៅស្រុកបានថយចុះ។

របាយការណ៍ដដែលនោះបានឱ្យដឹងដែរថា ក្នុងចំណោមប្រទេសទាំង56 ដែលទទួលទិញអង្ករពីកម្ពុជា ក្នុងនោះគេសង្កេតឃើញថា ប្រទេសចិនបានកាត់បន្ថយការទិញអង្ករពីកម្ពុជាយ៉ាងច្រើន គឺកាត់បន្ថយពីជាង 1ម៉ឺនតោនក្នុងខែឧសភា មកនៅត្រឹមជាង 500តោន នៅក្នុងខែមិថុនា។ ដោយឡែកបណ្តាប្រទេសផ្សេងទៀត រួមមានសហភាពអឺរ៉ុប និងប្រទេសជាសមាជិកអាស៊ាននៅបន្តទិញអង្ករពីកម្ពុជាក្នុងបរិមាណប្រហាក់ប្រហែលគ្នា ដែលកន្លងមកទីផ្សារនាំចូលអង្ករពីកម្ពុជាច្រើនជាងគេគឺ ប្រទេសចិនបាននាំចូល 6ម៉ឺនតោន ប្រទេសបារាំងជិត 4ម៉ឺនតោន ប្រទេសម៉ាឡេស៊ីជាង 2ម៉ឺនតោន។

ចំពោះក្រុមហ៊ុនដែលនាំចេញអង្ករពីកម្ពុជាច្រើនជាងគេ គឺក្រុមហ៊ុនបៃតងរបស់ឧកញ៉ា ភូ ពុយបាននាំចេញចំនួនជាង 2.3ម៉ឺនតោន លេខ2 គឺក្រុមហ៊ុន City Rice នាំចេញបាន 2.1ម៉ឺនតោន និងលេខ3ក្រុមហ៊ុនខ្មែរហ្វូដរបស់ឧកញ៉ា គឹមសាវុធ។ គិតជាសរុបក្រុមហ៊ុនដែលនាំអង្ករកម្ពុជាចេញទៅក្រៅប្រទេសមានចំនួន 68ក្រុមហ៊ុន។

របាយការណ៍ដដែលក៏បានបង្ហាញពីប្រភេទអង្ករដែលកម្ពុជាបាននាំចេញក្នុងរយៈពេល 6ខែក្នុងឆ្នាំ2018 នេះដែរ គឺប្រភេទអង្ករក្រអូបច្រើនជាងគេ ដែលមានចំនួនដល់ទៅ 199.658តោន និងអង្ករសគ្រាប់វែងចំនួន 54.637តោន។ ក្នុងនោះអង្ករកម្ពុជាត្រូវបាននាំចេញទៅកាន់ទីផ្សារគោលដៅច្រើនជាងគេនៅសហភាពអឺរ៉ុប(26ប្រទេស)ចំនួន 137.353តោន និងទៅប្រទេសជាសមាជិកអាស៊ាន(ម៉ាឡេស៊ីប្រ៊ុយណេ សិង្ហបុរី និងវៀតណាម)មានចំនួន 29.375តោន ព្រមទាំងគោលដៅនៅផ្សេងៗទៀតចំនួន 26ប្រទេស មានចំនួន 104.809តោន។

ចំពោះរបាយការណ៍អង្ករដែលកម្ពុជាបាននាំចេញប្រចាំខែក្នុងឆ្នាំ2018 របស់លេខាធិការដ្ឋានច្រកចេញចូលតែមួយដែលបានបំពេញបែបបទនាំចេញអង្ករបានបង្ហាញថា នៅខែមករា ការនាំចេញអង្ករកម្ពុជាមានចំនួន 62.623តោន។ ខែកុម្ភៈមានចំនួន 47.809តោន។ ខែមីនា មានចំនួន 50.683តោន។ ខែមេសា មានចំនួន36.239តោន។ ខែឧសភា មានចំនួន 42.865តោន និងខែមិថុនា មានចំនួន31.318តោន។

ស្ថានភាពនៃការនាំចេញអង្កររបស់កម្ពុជាក៏ត្រូវបានក្រសួងកសិកម្ម រុក្ខា ប្រមាញ់ និងនេសាទប្រកាសឱ្យដឹងដែរថា នៅឆ្នាំ2013 កម្ពុជានាំចេញអង្ករទៅក្រៅប្រទេសបានចំនួន 378.856តោន។ ឆ្នាំ2014 ចំនួន 387.061តោន។ ឆ្នាំ2015 ចំនួន 538.396តោន។ ឆ្នាំ2016 ចំនួន 542.144តោន។ ឆ្នាំ2017 មានចំនួន 635.679តោន៕

July 18, 2018

ពាណិជ្ជកម្មតាមផ្លូវអាកាសមានកំណើនប្រមាណជាង10% ជារៀងរាល់ឆ្នាំ

យោងតាមតួលេខរបស់លេខាធិការដ្ឋានអាកាសចរស៊ីវិលបានបង្ហាញថា ចំនួនភ្ញៀវជាតិ និងអន្តរជាតិ ដែលធ្វើដំណើរតាមយន្តហោះជាតិ និងអន្តរជាតិមកកាន់ប្រទេសកម្ពុជាក្នុងឆមាសទី1 ឆ្នាំ2018នេះ មានចំនួនជាង 5លាន 1សែននាក់ កើនឡើង24% បើប្រៀបធៀបនឹងរយៈពេលដូចគ្នាកាលពីឆ្នាំ2017។ នេះបើតាមការឱ្យដឹងពីលោកស៊ិន ចាន់សេរីវុត្ថា រដ្ឋលេខាធិការដ្ឋានអាកាសចរស៊ីវិលកម្ពុជា។

លោកបញ្ជាក់ថា៖ «តួលេខខាងលើនេះ គឺរាប់បញ្ចូលចំនួនភ្ញៀវដែលធ្វើដំណើរតាមព្រលានយន្តហោះទាំង3 របស់កម្ពុជា គឺព្រលានយន្តហោះអន្តរជាតិភ្នំពេញ មានចំនួន 2លាន 6សែននាក់ ព្រលានយន្តហោះខេត្តសៀមរាប ចំនួន 2លាន 3សែននាក់ និងក្រៅពីនោះគឺឆ្លងកាត់ព្រលានយន្តហោះខេត្តព្រះសីហនុប្រមាណ 2សែននាក់»។

លោកបានឱ្យដឹងថា ចំនួនភ្ញៀវដែលធ្វើដំណើរតាមព្រលានយន្តហោះទាំង3 របស់កម្ពុជាប្រសិនបើមិនមានព្រឹត្តិការណ៍ធំៗដូចជាជំងឺ សារ(SAR) និងបាតុកម្មផ្សេងៗទេនោះ ជើងហោះហើរនឹងនៅតែមានជាប្រចាំដដែល ជាពិសេសជើងហោះហើរក្នុងស្រុក ដូចជាក្រុមហ៊ុនអាកាសចរណ៍កម្ពុជាអ៊ែរវេយ៍(Cambodia Airways) ដែលទើបចាប់ផ្តើមប្រតិបត្តិការដឹកអ្នកដំណើររបស់ខ្លួននោះ មិនទាន់អាចចាត់ទុកថា ជាការបង្កើនចំនួនភ្ញៀវអ្នកធ្វើដំណើរនៅឡើយទេ ព្រោះគ្រាន់តែមានផ្លូវហោះហើរថ្មីនៅក្នុងស្រុកនៅឡើយ ទាល់តែក្រុមហ៊ុនគាត់បើកការហោះហើរជាអន្តរជាតិទើបអាចហៅថា ជាការទទួលបានភ្ញៀវថ្មីៗមក នោះទើបអាចចាត់ទុកថាមានកំណើនភ្ញៀវទេសចរ។

លោកបញ្ជាក់បន្ថែមថា តែរដូវនេះជារដូវខ្សត់ភ្ញៀវ ដែលគេហៅថា Low season គឺចំនួនភ្ញៀវមានការថយចុះជាធម្មតា ប៉ុន្តែកំណើនពាណិជ្ជកម្មតាមផ្លូវអាកាសនៅតែមានដដែល គឺប្រមាណជាជាង10% ជារៀងរាល់ឆ្នាំ។

លោកបណ្ឌិត គុណ ញឹម ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានគយនិងរដ្ឋាករកម្ពុជាបានអះអាងថា កំណើនពាណិជ្ជកម្មតាមផ្លូវអាកាសបានឆ្លុះបញ្ចាំងពីកំណើនសេដ្ឋកិច្ចការអភិវឌ្ឍ និងសន្តិភាពរបស់កម្ពុជាដែលបានផ្តល់នូវទំនុកចិត្តដល់វិនិយោគិនទាំងក្នុង និងក្រៅស្រុកក្នុងការបន្តបោះទុនវិនិយោគជាបន្តបន្ទាប់ និងមិនចាំបាច់តែមានជើងហោះហើរត្រង់ផ្ទាល់(Direct flight)ឬមិនផ្ទាល់នោះទេ សំខាន់ឱ្យតែមានកិច្ចព្រមព្រៀងនៃការតភ្ជាប់ផ្លូវអាកាសរបស់ក្រុមហ៊ុនណាមួយហើយនោះ យើងនឹងទទួលបានលំហូរចូលនៃអ្នកដំណើរដែលនឹងនាំមកនូវកំណើនសេដ្ឋកិច្ចនៃប្រទេសជាតិ។

អគ្គនាយកក្រុមហ៊ុនអាកាសយានដ្ឋានកម្ពុជា លោក Eric DELOBEL បានថ្លែងថា កិច្ចសហការរបស់រដ្ឋបាលគយដែលបាន និងកំពុងផ្តល់សេវាកម្មនៅក្នុងអាកាសយានដ្ឋានទាំង3 (ភ្នំពេញ សៀមរាបនិងព្រះសីហនុ) បានផ្តល់នូវកិច្ចសម្រួលពាណិជ្ជកម្មដែលអាចឆ្លើយតបបានទាន់ពេលវេលានឹងកំណើនទំហំពាណិជ្ជកម្មដែលគ្របដណ្តប់ប្រមាណ40% នៃសកម្មភាពរបស់អាកាសយានដ្ឋានទាំងមូលក្នុង2017កន្លងមក៕

July 18, 2018

Category: សង្គម និងសេដ្ឋកិច្ច