សង្គម និងសេដ្ឋកិច្ច - La Reine Media

ម៉ៃ សុគន្ធ នៅតែមិនរាថយចំពោះការបញ្ចេញបទ Original Song

បើទោះជាលោក ម៉ៃ សុគន្ធ ត្រូវបានគេមិនចូលចិត្តពីការរិះគន់របស់លោក និងរឿងទើសអី និយាយហ្នឹងក៏ពិតមែន តែលោកនៅតែបន្តចេញបទចម្រៀងជាហូរហែ ដោយមិនខ្វល់ពីការតិះដៀល និងថែមទាំងរំពឹងថា នឹងមានការគាំទ្រច្រើនពីមិត្តអ្នកស្តាប់ទៀតផង។ ថ្មីៗនេះ លោកបានបញ្ចេញបទចម្រៀងថ្មីដែលមានចំណងជើងថា “សន្យាអាចម៍ឆ្កែ” ដែលធ្វើឱ្យមហាជនអ្នកគាំទ្រជាច្រើនងាកមកចាប់អារម្មណ៍ខ្លាំងលើចំណងជើង និងអត្ថន័យនៅក្នុងបទចម្រៀងមួយបទនេះ។

តាមរយៈ Original Song បទ “សន្យាអាចម៍ឆ្កែ” របស់តារាចម្រៀងដែលធ្លាប់តែចេញមុខបង្ហាញពីរិះគន់មិនសំចៃមាត់លើចំណុចអវិជ្ជមានរបស់តារាប្រុស-ស្រី រួមអាជីពមួយចំនួនចំពោះសកម្មភាព ឬចំណុចខ្វះខាតរហូតមកនោះ ខណៈនេះត្រូវបានគេកត់សម្គាល់ឃើញថា កំពុងតែទទួលបានការគាំទ្រ និងចែករំលែកគ្នាយ៉ាងគគ្រឹកគគ្រេងនៅលើបណ្តាញសង្គមដ៏ពេញនិយម។ បើស្តាប់តាមអត្ថន័យនៃបទចម្រៀង Original Song “សន្យាអាចម៍ឆ្កែ” របស់លោក ម៉ៃ សុគន្ធ នេះហើយ វាគឺជាការច្រៀងរៀបរាប់អំពីជីវិតស្នេហារវាងយុវវ័យប្រុស-ស្រីមួយគូ ដែលស្រឡាញ់គ្នាគ្រាដំបូង និងបាននសន្យាស្បថស្បែសច្ចាថា នឹងចូលស្តីដណ្តឹងគ្នាធ្វើជាគូអនាគតរហូតអស់មួយជីវិត។ ប៉ុន្តែក្រោយមកទៀត បន្ទាប់ពីការស្រឡាញ់គ្នាមិនបានប៉ុន្មានឆ្នាំផង ខាងប្រុសបែរជាក្បត់ពាក្យសន្យាប្រែក្រឡាស់សម្តី ទៅមានស្រីផ្សេង រហូតធ្វើឱ្យនារីជាគូស្នេហ៍មានវិបត្តិផ្លូវចិត្តស្ទើរក្អួតឈាមទៅវិញ។

ដើម្បីកុំឱ្យខាតពេលរៀបរាប់យូរ សូមទស្សនាវីដេអូពេញខាងក្រោមនេះ៖

https://www.youtube.com/watch?v=bH42IETunaA

July 19, 2018

ក្មេងស្រីបេះដូងដែក អៀវ “បងប្រុសពិការ” ទៅសាលារៀនរាល់ថ្ងៃ

បើករឿងរ៉ាវជីវិតដ៏សែនរញ្ជួយចិត្តរបស់កុមារី ចូ ទិងសួង វ័យ 9ឆ្នាំ រស់នៅក្នុងមណ្ឌល យូនណាន ប៉ែកខាងត្បូងរបស់ប្រទេសចិន។ នាងមានបងប្រុសម្នាក់គឺ ចូ ទិងហ្វូ អាយុ 12ឆ្នាំ ដែលទោះជាជើងរបស់បងប្រុសពិការទាំងសងខាងតាំងពីកំណើត ធ្វើឱ្យមិនអាចដើរហើរបានដូចក្មេងដទៃមែន តែគេក៏អាចទៅណាមកណាបានគ្រប់ទីកន្លែងដែរ ព្រោះគេមានប្អូនស្រីជាទីស្រឡាញ់។

ជារៀងរាល់ថ្ងៃ ទិងសួងដ៏តូចល្អិតជាអ្នកមើលថែទាំបងប្រុសរបស់នាង។ នាងអៀវបងប្រុសនៅលើខ្នង នាំបងប្រុសដើរទៅសាលារៀនរាល់ថ្ងៃ មិនថាជាថ្ងៃដែលមានភ្លៀងធ្លាក់ ថ្ងៃក្ដៅខ្លាំង ឬព្រិលធ្លាក់ ក៏នាងនៅតែទៅ “ទោះបីបងដើរមិនបានក៏ដោយ ក៏មិនអីដែរ រូបប្អូននឹងធ្វើជាជើងរបស់បង នាំបងទៅ”។

រឿងរ៉ាវសេចក្ដីស្រឡាញ់ និងសម្ព័ន្ធភាពរបស់ពីរនាក់បងប្អូនតូចៗមួយគូនេះ ត្រូវបានលើកយកមកបកស្រាយនៅក្នុងវេបសាយ ដេលី មេល ដោយកាលពីពេលដែល ទិងហ្វូធំឡើង ឪពុកម្ដាយរបស់គេមានកង្វល់យ៉ាងខ្លាំង ព្រោះថា គេមិនអាចដើរទៅរៀនបាន តែ ទិងសួងមិនចង់ឱ្យបងប្រុសត្រូវទុកចោលនៅផ្ទះ ទើបនាងតូចស្ម័គ្រចិត្តអៀវបងប្រុសទៅសាលារៀនដោយខ្លួនឯង និងតាំងពីថ្ងៃនោះមក វាក៏ក្លាយជាកិច្ចការងារប្រចាំថ្ងៃមួយរបស់នាង។

រៀងរាល់ព្រឹកមុនទៅសាលា ទិងសួងតែងភ្ញាក់ឡើងមកមើលថែទាំបងប្រុស លប់មុខ និងលាងដៃជើងឱ្យបងប្រុស ជួយគាត់ស្លៀកពាក់តុបតែងខ្លួន និងបន្ទាប់ពីនោះក៏ អ៊ឹប! លើកបងប្រុសដាក់លើខ្នងអៀវ នាំដើរទៅសាលារៀន។ រៀងរាល់ថ្ងៃវាប្រៀបដូចជាការផ្សងព្រេងនឹងគ្រោះថ្នាក់ដែរ ទិងសួងត្រូវប្រយ័ត្នប្រយែងនៅពេលនាំបងប្រុសឆ្លងថ្នល់ និងថែមទាំងត្រូវឡើងជណ្ដើរជាច្រើនកាំទៀតទម្រាំនឹងដល់គោលដៅ និងមិនថាធាតុអាកាសអាក្រក់ប៉ុនណាឡើយ នាងតូច និងបងប្រុសមិនដែលទៅដល់សាលាយឺតម៉ោងម្ដងណាឡើយ។

បងប្អូនពីរនាក់ត្រកូល ចូ រៀននៅសាលារៀនរបស់រដ្ឋក្នុងតំបន់ ហេ ជឺ កួ ពួកគេរៀនថ្នាក់ជាមួយគ្នា ទើបបាននៅជាមួយគ្នាជាប់រហូត។ នៅពេលចេញពីរៀន ទិងសួងក៏នឹងធ្វើដូចកាលពីពេលព្រឹកដែរ គឺអៀវបងប្រុសរបស់នាងត្រឡប់ទៅផ្ទះវិញ។ បន្ទាប់ពីនោះ ទាំងពីរនាក់បងប្អូនក៏នឹងធ្វើកិច្ចការផ្ទះ និងរំឭកមេរៀនជាមួយគ្នា ដែលនៅពេលធ្វើរួចហើយ ទិងសួងមិនបានចេញទៅរត់លេង ឬគេងលក់សម្រាកឡើយ នាងតូចនៅធ្វើការងារផ្ទះបន្តទៀត។

មនុស្សជាច្រើនអាចនឹងនឹកឆ្ងល់ថា តើឪពុកម្ដាយរបស់ពួកគេទៅណា? ហេតុម្ដេចមិននាំកូនទៅសាលារៀន? និងហេតុអីបានបណ្ដោយឱ្យអ្វីៗគ្រប់យ៉ាងធ្លាក់មកលើរូបកូនស្រីដ៏តូចមួយ ដែលមានអាយុត្រឹមតែ 9ឆ្នាំនេះទៅវិញ?។ ចម្លើយក៏គឺ ឪពុកម្ដាយរបស់ពួកគេទាំងពីរ ក៏ជាជនពិការដូចគ្នាដែរ ធ្វើឱ្យទិងសួងក្លាយជាកម្លាំងសំខាន់របស់គ្រួសារ។ នាងធ្វើកិច្ចការគ្រប់យ៉ាង តាមដែលនាងអាចធ្វើបាន តាំងពីស្រោចទឹកបន្លែ ដាក់បាយជ្រូក លាងចាន និងធ្វើម្ហូបអាហារឱ្យគ្រួសារបរិភោគ។

ចំណែក លីវយ៉ាន គ្រូនៅឯសាលា បានបង្ហើបឱ្យដឹងថា ខាងសាលាបានដឹងអំពីរឿងរ៉ាវក្ដីលំបាករបស់ពីរនាក់បងប្អូននេះហើយ និងបានស្នើថា នឹងរៀបចំរកបន្ទប់ស្នាក់នៅជិតៗសាលារៀនឱ្យពួកគេទាំងពីរ ដើម្បីកុំឱ្យពិបាកត្រូវទៅមករៀងរាល់ថ្ងៃបែបនេះ និងរីករាយបញ្ចុះថ្លៃចំណាយក្នុងការសិក្សាឱ្យទាំងពីរនាក់ទៀតផង ហើយបន្ទប់ស្នាក់នៅនោះស្ថិតនៅមិនឆ្ងាយពីសាលាប៉ុន្មានឡើយ ត្រឹមតែប្រមាណជា 500ម៉ែត្រប៉ុណ្ណោះ ដែលធ្វើឱ្យទិងសួងនៅតែត្រូវអៀវបងប្រុសរបស់នាងទៅរៀនដូចមុនដដែល។

“ខ្ញុំគ្មានថ្ងៃទុកគាត់ចោលឱ្យនៅតែម្នាក់ឯងជាដាច់ខាត ខ្ញុំនឹងនៅតែធ្វើខ្លួនជាឈើច្រត់ឱ្យគាត់រហូតតទៅ” នាងតូច ទិងសួង អះអាងយ៉ាងម៉ឺងម៉ាត់៕

សូមទស្សនាឃ្លិបវីដេអូ

https://www.youtube.com/watch?v=7m7ok3Z6G_M

July 19, 2018

អ្នកដឹកនាំសម្ដែង រិទ្ធ អូមេហ្កា បញ្ចេញអារម្មណ៍ពិតចំពោះភាពលះបង់របស់តារាស្រី ស៊ូ ស៊ីរីកា

ក្រោយពេលទម្លាយសកម្មភាពក្រៅឆាកសម្ដែងរបស់តារាចម្រៀងស្រីល្បីឈ្មោះក្នុងផលិតកម្ម ថោន គឺកញ្ញា ស៊ូ ស៊ីរីកា ដែលមានភាពលះបង់ខ្ពស់ក្នុងការសម្ដែងវីដេអូបទចម្រៀង «ឧបសគ្គស្នេហ៍» ដែលជាការបកស្រាយរបស់លោក ហាក់ និងក្រោមការដឹកនាំសម្ដែងរបស់ផលិតករល្បីឈ្មោះប្រចាំផលិតកម្មថោន លោក រិទ្ធ អូមេហ្គា(Rith Omega) ខណៈនេះពិតជាទទួលបានការចាប់អារម្មណ៍យ៉ាងខ្លាំងពីសំណាក់មហាជនអ្នកគាំទ្រមែន បើទោះបីជាសាច់រឿងទាំងមូលមិនទាន់បានលាតត្រដាងនៅឡើយក្ដី តែយ៉ាងណាមិញ តារាឯកស្រី ស៊ូ ស៊ីរីកា ពិតជាទទួលបានការសរសើរពីសំណាក់អ្នកដឹកនាំសម្ដែងផ្ទាល់ រួមទាំងក្រុមការងារទាំងអស់ចំពោះភាពអត់ធ្មត់របស់នាងទម្រាំបានថតមួយបទនោះចប់។

លោក រិទ្ធ អូមេហ្គា បានប្រាប់សារព័ត៌មានឡារ៉ែនថា អាចនិយាយថា មិនមានការសម្ដែងបទណា សុទ្ធតែពិបាកសម្រាប់តារាចម្រៀងកញ្ញា ស៊ូ ស៊ីរីកា ដូចបទ «ឧបសគ្គស្នេហ៍» ដែលលោកសម្ងំដឹកឱ្យនាងនោះទេ ព្រោះនៅក្នុងបទនេះ លោកតម្រូវឱ្យនាងលោតទឹកក្នុងកម្ពស់12ម៉ែត្រ ហើយលង់ និងឈ្លក់ទឹកមែនទែន និងកុំតែបានការជួយសង្គ្រោះពីក្រុមការងារទាន់ពេល កុំអីប្រហែលជាអាចប៉ះពាល់ដល់អាយុជីវិតនាងមែនទែនទៀតផង។ លោកបន្ដថា មួយរឿងនេះ ចំណាយពេលថតដល់ទៅ 4ថ្ងៃពេញ ដោយក្នុងមួយថ្ងៃត្រូវថតដល់ម៉ោង 4ភ្លឺ ព្រោះតែលោកចង់បានសាច់រឿងមួយ ដែលមានច្រើនប្លង់ ទាំងប្លង់យប់ផង ថ្ងៃផង ហើយស៊ូ ស៊ីរីកា គឺជាតួអង្គដែលប្រឈមការលំបាកពេញមួយសាច់រឿងដែលលោកប្រឹងប្រែងសរសេរឡើងនេះ។

លោក រិទ្ធ បានចាត់ទុកថា ការសម្ដែងមួយបទនេះ គឺនាងលះបង់បានល្អហួសពីការរំពឹងទុក ជាពិសេសត្រង់ចំណុចលោតទឹក និងឈ្លក់ទឹកមែនទែន ហើយនៅតែថតចុះឡើងៗ ទម្រាំតែបានត្រូវប្លង់ល្អទៀត។ ក្នុងនោះ នាងក៏ត្រូវថតហាលក្ដៅរាល់ថ្ងៃ ដល់ថ្នាក់របកស្បែក ដូចគេបកស្បែកទាំងផ្ទាំងៗផងដែរ ប៉ុន្តែនាងនៅតែតស៊ូរហូតទាល់តែចប់។

គួរបញ្ជាក់ផងដែរថា មួយបទ «ឧបសគ្គស្នេហ៍» នេះ ទាំងអ្នកដឹកនាំសម្ដែង ក្រុមការងារ និងតារាចម្រៀងបានរំពឹងទុកថា ជោគជ័យខ្លាំងសម្រាប់ការគាំទ្រ ដោយសារតែអត្ថន័យសាច់រឿង ទេពកោសល្យសម្ដែង ការដាក់មនោសញ្ចេតនាចូលតួមិនធម្មតាឡើយ។ កញ្ញា ស៊ូ ស៊ីរីកា វិញក៏បាននិយាយថា ដើម្បីតម្រូវតាមសាច់រឿងដែលអ្នកដឹកនាំចង់បាន ទើបនាងតស៊ូសម្ដែងមួយបទនេះ ហើយការលះបង់របស់នាងនៅក្នុងបទចម្រៀងល្បីមួយនេះ គឺជាក្ដីស្រឡាញ់ពេញចិត្តខ្លាំងបំផុតចំពោះភាពតស៊ូក្នុងវិថីសិល្បៈ។ នាងក៏រំពឹងដូចគ្នាដែរថា ការប្រឹងប្រែងរបស់ខ្លួននឹងទទួលជោគជ័យនៅពេល MV ទាំងមូលត្រូវបានចេញបង្ហោះជាផ្លូវការ៕

July 19, 2018

ដាំប្រទាលកន្ទុយក្រពើតិចតួចនៅផ្ទះ អាចរកចំណូលបានពី6-8ម៉ឺនរៀលក្នុងមួយថ្ងៃ

ប្រទាលកន្ទុយក្រពើ គឺជាប្រភេទដំណាំដែលងាយស្រួលដាំ ហើយអាចយកទៅច្នៃធ្វើជាថ្នាំព្យាបាលជំងឺផ្សេងៗ និងមិនត្រឹមតែយកទៅធ្វើជាឱសថបុរាណដ៏ស័ក្តិសិទ្ធិនោះទេ ថែមទាំងអាចយកទៅកែច្នៃធ្វើជាភេសជ្ជៈ ទទួលបានការពេញនិយមពីអតិថិជនទៀតផង។

កសិករឈ្មោះ គង់ ថុល រស់នៅភូមិកូនជ្រែ ឃុំព្រែកអំបិល ស្រុកស្អាង បានប្រាប់ថា ដើមឡើយប្រទាលកន្ទុយក្រពើ ភាគច្រើនគេដាំនៅក្នុងរបងផ្ទះ ដោយអ្នកភូមិដាំមួយគុម្ព ពីរគុម្ពប៉ុណ្ណោះ គឺទុកសម្រាប់ធ្វើជាឱសថកែរោគផ្សេងៗតាមបែបចាស់-បុរាណ ដូចជាប្រើសម្រាប់បន្ថយកម្ដៅក្នុងខ្លួន ព្យាបាលក្រពះ ពោះវៀនជាដើម។ ដោយសារបច្ចុប្បន្នមានតម្រូវការនៅលើទីផ្សារ ទើបអ្នកភូមិរបស់គាត់ចាប់ផ្ដើមនាំគ្នាដាំច្រើនឡើងៗ ដោយមួយគ្រួសារៗមានពី4 ទៅ10រងនៅក្បែរៗផ្ទះ ហើយក៏មិនបានដាំជាចម្ការធំៗរាប់សិបហិកតាដូចដំណាំផ្សេងៗឡើយព្រោះតម្រូវការមានកំណត់ ប៉ុន្តែប្រសិនបើមានក្រុមហ៊ុនសហគ្រាសណាកុម្ម៉ង់ទិញមានកុងត្រាត្រឹមត្រូវនោះ ពួកគាត់នឹងខំប្រឹងដាំឱ្យបានច្រើន។

អ្នកស្រីបានបន្តថា ប្រទាលកន្ទុយក្រពើ ចាប់ពីដាំរហូតដល់ 8ខែគឺអាចកាត់លក់បានហើយ និងមិនពិបាកថែទាំអ្វីឡើយ គ្រាន់តែស្រោចទឹក និងដាក់ជីលាមកគោតែប៉ុណ្ណោះ ហើយក៏មិនចាំបាច់ប្រើជីគីមី ឬថ្នាំសម្លាប់សត្វល្អិតអ្វីដែរ ព្រោះគ្មានសត្វល្អិតណាមកបំផ្លាញនោះទេ ចំណែកឯតម្លៃវិញក៏មិនសូវជាឡើង-ចុះប៉ុន្មានដែរ ហើយឈ្មួញតែងចុះមកទិញដល់ផ្ទះតែម្តង ដោយក្នុង1គុម្ពបានតម្លៃពី 3,000រៀល ទៅ4,000រៀលដែរ និងអាចកាត់វិលជុំបានរាល់ថ្ងៃ ដែល1ថ្ងៃៗអាចកាត់បានប្រមាណពី20ទៅ30គុម្ពដែរ។ឈ្មួញកណ្តាលម្នាក់ឈ្មោះ យ៉េងឡេងហេង នៅភូមិព្រះប្រសប់ ឃុំព្រះប្រសប់ ស្រុកខ្សាច់កណ្តាល ខេត្តកណ្តាលបានឱ្យដឹងថា លោកបានប្រកបរបរទិញ-លក់ប្រទាលកន្ទុយក្រពើ ដើម្បីយកទៅធ្វើភេសជ្ជៈ អស់រយៈពេលជាង 6ឆ្នាំមកហើយ ហើយតែងមកទិញនៅពីអ្នកភូមិកូនជ្រែ ឃុំព្រែកអំបិល ស្រុកស្អាង ខេត្តកណ្តាលនេះជាប្រចាំ។

លោកបានបន្តថា ជារៀងរាល់ថ្ងៃលោកតែងមកទិញប្រទាលកន្ទុយក្រពើនៅទីនេះ យកទៅបោះដុំឱ្យម៉ូយនៅផ្សារស្ទឹងមានជ័យ ខណ្ឌមានជ័យ រាជធានីភ្នំពេញ និងយកទៅកែច្នៃធ្វើទឹកប្រទាលកន្ទុយក្រពើលក់ខ្លួនឯងផងដែរ និងក្នុង1ថ្ងៃអាចលក់បានប្រមាណជាង 200ដបដែរ និងលក់បាន 2,000រៀលក្នុងមួយដប ហើយទឹកប្រទាលនេះមានគុណប្រយោជន៍ច្រើនណាស់ គឺជួយបញ្ចុះកម្ដៅក្នុងខ្លួន ធ្វើឱ្យស្បែកមានសំណើមស្រស់ថ្លា និងថែមទាំងជួយព្យាបាលជំងឺក្រពះ ពោះវៀនបានយ៉ាងស័ក្តិសិទ្ធិទៀតផង។

មេឃុំព្រែកអំបិល លោក ឃុត ខុន បានមានប្រសាសន៍ថា ប្រជាពលរដ្ឋភូមិកូនជ្រែនេះ ប្រមាណជាង 30ភាគរយបានដាំប្រទាលកន្ទុយក្រពើនៅក្បែរៗលំនៅឋាន ហើយពេលលក់មិនចាំបាច់កាត់យកទៅលក់នៅផ្សារទេ គឺមានម៉ូយគេមកកាត់ដល់ផ្ទះស្រេចតែម្ដង ឯចំណូលដែលបានពីការលក់ប្រទាលកន្ទុយក្រពើនេះ បានជួយឱ្យអ្នកភូមិមានជីវភាពកាន់តែល្អប្រសើរឡើងទៀតផង៕

July 19, 2018

ពិភពលោកកំពុងចាប់អារម្មណ៍ដាំដើមឈើឡើងវិញដោយប្រើបច្ចេកវិទ្យា

ការប្រើប្រាស់ធនធានធម្មជាតិ ជាពិសេសព្រៃឈើនៅលើពិភពលោកបានក្លាយជាចំណុចគួរឱ្យព្រួយបារម្ភមួយរបស់មនុស្សជាតិ ព្រោះបើតាមទិន្នន័យដែលចេញដោយវេទិកាសេដ្ឋកិច្ចពិភពលោកបានបង្ហាញថា ជាមធ្យមយើងប្រើ-ប្រាស់ដើមឈើអស់ប្រមាណ 15ពាន់លានដើមក្នុងមួយឆ្នាំ ខណៈការដាំឡើងវិញមានចំនួនត្រឹមតែ9ពាន់លានដើមប៉ុណ្ណោះក្នុងមួយឆ្នាំ។ ផ្អែកតាមទិន្នន័យនេះ យើងឃើញថាពិភពលោកបានបាត់បង់ដើមឈើជាង 6ពាន់លានដើមក្នុងមួយឆ្នាំៗ ដែលចំនួននេះជាកត្តាសំខាន់មួយចាំបាច់ត្រូវយកចិត្តទុកដាក់។

កត្តាដែលនាំឱ្យមានការដាំដើមឈើឡើងវិញយឺតនេះ ត្រូវបានគេឃើញថា វាបណ្តាលមកពីបញ្ហាតម្លៃចំណាយនៃការដាំ និងថែទាំ រួមទាំងកត្តាប្រឈមមួយចំនួនទៀត។ ហេតុនេះហើយទើបអ្នកវិទ្យាសាស្ត្រនៅគ្រប់ប្រទេសលើពិភពលោកបានខិតខំប្រឹងប្រែងស្រាវជ្រាវ រុករក គ្រប់មធ្យោបាយដើម្បីធ្វើយ៉ាងណាបំពេញដីទំនេរដែលនៅសល់លើពិភពលោក ដោយការដាំដើមឈើឡើងវិញ ជាមួយនឹងការចំណាយទាប តែបានផលច្រើន។

ជាដំណោះស្រាយក្រុមហ៊ុន BioCarbon Engineering របស់អង់គ្លេស បានបង្កើត Drone ប្រភេទថ្មីដើម្បីដាំដើមឈើឡើងវិញ ក្នុងតម្លៃធូរថ្លៃ ឆាប់រហ័ស និងទទួលបានផលខ្ពស់។ Drone ប្រភេទថ្មីនេះអាចដាំដើមឈើនៅគ្រប់កន្លែងទាំងអស់ រួមទាំងកន្លែងដែលមនុស្សពិបាកទៅដល់។

ជាដំណាក់កាលដំបូង Drone នឹងធ្វើការស្គែនទៅលើសណ្ឋានដីដើម្បីបង្កើតផែនទីជារូបភាព 3D បន្ទាប់មកវានឹងបង្ហាញលទ្ធផលនៃការគណនាពីចំនួនគ្រាប់រុក្ខជាតិដែលត្រូវប្រើប្រាស់ដើម្បីដាំលើផ្ទៃដីទាំងអស់នោះ។ Drone ទាំងនេះអាចធ្វើការដាំដុះបានរហូតដល់ទៅ 100,000ដើមក្នុងមួយថ្ងៃ ហើយប្រសិនបើគេប្រើវាជាក្រុមយើងអាចនឹងដាំដើមឈើបានរហូតដល់ទៅ 1ពាន់លានដើមក្នុងមួយឆ្នាំ។

ប្រព័ន្ធនៃការដាំដើមឈើថ្មីនេះ ត្រូវបានគេប៉ាន់ស្មានថាអាចនឹងបណ្តុះដើមឈើបានលឿនជាងវិធីសាស្ត្រធម្មតាដល់ទៅ 10ដង និងចំណាយតិចជាងការដាំដុះដោយដៃចំនួន 20%។ មូលហេតុដែលនាំឱ្យមានភាពចំណេញនេះ គឺមកពីវាមិនត្រូវការពេលវេលាយូរក្នុងការដាំនោះទេ ព្រោះវាជាគ្រឿងម៉ាស៊ីនដែលមិនដើរលើដី ឬចាំបាច់ទាល់-តែមានផ្លូវទើបចូលទៅដាំបាននោះទេ។ Drone នឹងហោះលើផ្ទៃដីដើម្បីព្រោះគ្រាប់រុក្ខជាតិជាមួយនឹងបច្ចេកវិទ្យាទំនើបចុងក្រោយបំផុត។

អ្នកជំនាញបានធ្វើការសាកល្បង Drone ប្រភេទនេះនៅលើកន្លែងជាច្រើន ហើយពួកគេក៏ធ្លាប់បានសាកល្បងដាំដើមឈើឡើងវិញ នៅតំបន់សំខាន់ៗក្នុងប្រទេសអូស្ត្រាលីថែមទៀតផង។ លើសពីនេះទៅទៀត វាក៏នឹងក្លាយជាឧបករណ៍យ៉ាងសំខាន់ក្នុងការជួយដល់វិស័យកសិកម្ម ដែលកំពុងត្រូវការជំនួយជាចាំបាច់ពីបច្ចេកវិទ្យាដែលមានផលប៉ះពាល់តិចបំផុត៕

July 19, 2018

គ្រូ អេក ប្រាប់មូលហេតុពិត ដែលនាំក្មេងៗក្រុមជ្រូកព្រៃចូលរូងភ្នំថាំលួង

តាមរយៈសារព័ត៌មាន Mthai បានចេញផ្សាយនៅពេលថ្មីៗនេះ បានឱ្យដឹងថា ក្រុមកីឡាករជ្រូកព្រៃ អាខាដេមី ទាំង 13នាក់ បានបង្ហាញវត្តមាន និងផ្ដល់បទសម្ភាសជាលើកដំបូងបន្ទាប់ពីបានចេញពីរូងភ្នំថាំលួង តាមរយៈកញ្ចក់ទូរទស្សន៍ថៃនាវេលាម៉ោង 6ល្ងាចថ្ងៃម្សិលមិញនេះ ដែលមានការចូលរួមពីសំណាក់ អាណាព្យាបាល អង្គភាពស៊ីល គ្រូពេទ្យមន្ទីរពេទ្យខេត្តឈៀងរ៉ាយ និងអ្នកសារព័ត៌មានថៃ និងអន្ដរជាតិជាច្រើនរូប។

នៅក្នុងនោះដែរ លោកគ្រូបង្វឹក អេក បានរៀបរាប់ប្រាប់អ្នកសារព័ត៌មានពីមូលហេតុនៃការធ្វើដំណើរចូលទៅក្នុងរូងភ្នំថាំលួងថា មុនពេលនោះបន្ដិច ពួកយើងបានពិភាក្សាគ្នានៅក្នុងក្រុមរបស់យើងបន្ទាប់ពីបេសកកម្មធាក់កង់នៅបរិវេណជើងភ្នំរួចហើយថា នឹងចូលទៅលេងក្នុងរូងភ្នំថាំលួងជាមួយគ្នាជាលក្ខណៈផ្ទាល់ខ្លួន។ គ្រូបង្វឹកធ្លាប់ចូលទៅរួចមកហើយជាមួយប្អូនៗខ្លះនៅក្នុងក្រុម។ បន្ទាប់ពីបានបញ្ចប់ការប្រកួតបាល់ ពួកយើងក៏នាំគ្នាធ្វើដំណើរចូលទៅក្នុងរូងភ្នំភ្លាមៗតែម្ដង ដោយបានបញ្ជាក់ប្រាប់គ្រប់គ្នាទុកជាមុនថា នឹងត្រូវចេញពីរូងភ្នំមកវិញនៅវេលាម៉ោង 17គត់(5ល្ងាច)។ ដោយសារតែត្រូវជូនប្អូន តៃតាន់ ទៅរៀនកួរឱ្យទាន់ពេលវេលាវិញ។

គ្រូបង្វឹកបាននិយាយពីអំឡុងពេលជាប់នៅក្នុងរូងភ្នំថា នៅពេលដើរត្រឡប់មកវិញ ក៏ប្រទះឃើញទឹកជន់ចូលមកបិទច្រកចេញ-ចូលយ៉ាងជ្រៅ ពេលនោះគ្រប់គ្នាបានព្យាយាមផ្ដល់កម្លាំងចិត្តគ្នាទៅវិញទៅមក និងព្យាយាមតាំងស្មារតី និងសតិអារម្មណ៍យ៉ាងខ្លាំង។ បន្ទាប់មកក៏ព្យាយាមកាយខ្សាច់ជាចង្អូរដើម្បីឱ្យទឹកស្រកចេញ ក៏ប៉ុន្ដែទឹកមិនស្រកចុះសោះ ទើបពួកយើងនាំគ្នាស្វែងរកកន្លែងសម្រាក ដោយរំពឹងថា ថ្ងៃស្អែកទឹកនឹងស្រកអស់ទៅវិញ។ សូមបញ្ជាក់ថា គ្រប់គ្នាសុទ្ធតែអាចហែលទឹកបានទាំងអស់គ្នា គ្រាន់តែមានអ្នកខ្លះមិនសូវចំណាប់ប៉ុណ្ណោះ។

ចំពោះយុទ្ធសាស្ត្ររំលែកសមាជិកក្រុមជ្រូកព្រៃ ដើម្បីជម្លៀសចេញពីរូងភ្នំមកក្រៅនោះ គ្រូបង្វឹកបានប្រាប់ថា លោកបានពិភាក្សាជាមួយអង្គភាពស៊ីល និងលោកគ្រូពេទ្យ ដោយបានសង្កេតមើលថា គ្រប់គ្នាមានសុខភាពរាងកាយ និងផ្លូវចិត្តល្អ ទើបជ្រើសរើសឱ្យអ្នកដែលមានផ្ទះនៅឆ្ងាយ បានចេញមកមុន និងតាមការស្ម័គ្រចិត្តរបស់ប្អូនៗខ្លួនឯងផង។ គួរបញ្ជាក់ដែរថា គ្រូបង្វឹក និងក្មេងៗក្រុមជ្រូកព្រៃ បានសម្ដែងអារម្មណ៍សោកស្ដាយយ៉ាងខ្លាំងចំពោះវីរភាពនៃការលះបង់ក្នុងការជួយសង្គ្រោះពួកគេរបស់លោក សាម៉ាន គុណាន់ ឬឈ្មោះហៅក្រៅ ចា សែម ជាអ្នកវាយប្រហារក្រោមផ្ទៃទឹកស្ម័គ្រចិត្ត ជំនាន់ទី 30 មានអាយុ 38 ឆ្នាំផងដែរ។ បន្ទាប់បានចាកចេញពីមន្ទីរពេទ្យ អ្នកទាំង 13នាក់ នឹងទៅគោរពវិញ្ញាណក្ខន្ធលោក សាម៉ាន គុណាន់ ដោយការដឹងគុណ និងអាល័យគ្រាចុងក្រោយ៕

July 19, 2018

Hamilton សម្លឹងរកការបង្អាក់ការអបអររបស់ Vettel នៅ Hockenheim ថ្ងៃអាទិត្យ

ក្នុងរយៈពេលតិចជាង 2សប្តាហ៍ ក្រោយពីជួបភាពជូរចត់បន្ទាប់ពីការប្រណាំងរថយន្តក្នុងព្រឹត្តិការណ៍ British Grand Prix នោះ កីឡាករ Lewis Hamilton នឹងសម្លឹងរកការផ្តល់ការខកចិត្តដល់កីឡាករ Sebastian Vettel នៅទីក្រុង Hockenheim ថ្ងៃអាទិត្យ ចុងសប្តាហ៍នេះ ខណៈដែលកីឡាករអាល្លឺម៉ង់រូបនេះ បានបំបាក់ការអបអររបស់ Hamilton រួចជាស្រេចនៅលើទីលាន Silverstone។

ស្របពេលដែលព្រឹត្តិការណ៍នៃការប្រណាំងរថយន្ត Formula One ពិភពលោក ឆ្ពោះទៅកាន់ពាក់កណ្តាលរដូវកាលរបស់ខ្លួន ហើយការប្រជែងដណ្តើមជ័យជម្នះកាន់តែមានភាពក្តៅគគុក ស្របពេលដែល Vettel ដែលកំពុងតែមានពិន្ទុនាំមុខលើតារាងពិន្ទុរួម មានឱកាសមួយនេះ ក្នុងការផ្តល់នូវការរីករាយមួយផ្សេងទៀតសម្រាប់ក្រុម Ferrari ខណៈដែលក្រុម Mercedes របស់កីឡាករ Hamilton ក៏សម្លឹងរកការស្តារមុខមាត់ត្រឡប់មកវិញផងដែរ។

Vettel កំពុងតែនាំមុខពីលើ Hamilton ចំនួន 8ពិន្ទុ ក្រោយពីការទទួលជ័យជម្នះរបស់គេនៅលើទឹកដីនៃចក្រភពអង់គ្លេស ហើយនិងស្រេកឃ្លានក្នុងការដណ្តើមយកជ័យជម្នះ 1ផ្សេងទៀតពីក្រុមគ្រួសារ មិត្តភ័ក្តិ និងអ្នកគាំទ្ររបស់គេ ដើម្បីធានាថា រូបគេនឹងមានពិន្ទុនាំមុខដាច់ក្នុងពេលសម្រាកនារដូវក្តៅ។ ជាមួយគ្នានេះ វាក៏នឹងផ្តល់នូវការពេញចិត្តដល់លោក Maurizio Arrivabene ប្រធានក្រុម Ferrari ផងដែរ ក្រោយពីការប្រណាំងនៅអង់គ្លេស ដើម្បីបង្ហាញថា Mercedes គួរតែមានការខ្មាស់អៀនចំពោះក្រុម Ferrari៕

ប្រភពពី៖ Sport.yahoo.com

July 19, 2018

Liverpool នឹងបំពេញការផ្ទេរអ្នកចាំទី Alisson ក្នុងតម្លៃខ្លួនខ្ពស់បំផុត

អ្នកចាំទីអន្តរជាតិប្រេស៊ីល Alisson ត្រូវបានរំពឹងទុកថា នឹងចុះហត្ថលេខាជាមួយនឹងក្លិប Liverpool លើកុងត្រារយៈពេល 5ឆ្នាំ ក្នុងតម្លៃខ្លួន 75លានអឺរ៉ូ (ស្មើនឹង 87.3លានដុល្លារអាមេរិក) ដែលជាតម្លៃខ្លួនជាប់កំណត់ត្រាពិភពលោកសម្រាប់អ្នកចាំទីរូបនេះ។ នេះបើយោងតាមការចេញផ្សាយរបស់បណ្តាញសារព័ត៌មាននានាកាលពីថ្ងៃពុធ។

អ្នកចាំទីវ័យ 25ឆ្នាំរូបនេះបច្ចុប្បន្នកំពុងលេងឱ្យក្លិប Roma ក្នុងប្រទេសអ៊ីតាលី នឹងកាត់បន្ថយថ្ងៃសម្រាកវិស្សមកាលរបស់ខ្លួន ដើម្បីទទួលការពិនិត្យសុខភាព នៅទីក្រុង Merseyside ក្រោយពីត្រូវបានអនុញ្ញាតឱ្យធ្វើការពិភាក្សាដោយផ្ទាល់ជាមួយនឹងក្លិប Liverpool។ កាសែត Liverpool Echo បានចេញផ្សាយថា៖ «ការប្រកាសជាផ្លូវការមួយ ប្រហែលជានឹងត្រូវធ្វើឡើងក្នុងរយៈពេលពី 24ម៉ោង ទៅ 48ម៉ោងទៀត»។

ការផ្ទេរនេះនឹងធ្វើឱ្យក្លិបយក្សនៅ Anfield មួយនេះចំណាយប្រាក់ 75លានអឺរ៉ូ ដើម្បីបំបែកកំណត់ត្រានៃការផ្ទេរនៅអង់គ្លេស ដែលត្រូវបានចំណាយដោយក្លិប Manchester City សម្រាប់ការទិញយកអ្នកចាំទី Ederson ពីក្លិប Benficaកាលពីរដូវកាលមុន។ ក្លិប Liverpool សង្ឃឹមថា នឹងចុះហត្ថលេខាជាមួយនឹងអ្នកចាំទីថ្មីម្នាក់ដើម្បីជំនួសកន្លែងរបស់ Loris Karius ក្រោយពីការបង្ហាញពីទម្រង់លេងមិនបានល្អរបស់គេក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ។

Chelsea ក៏ត្រៀមលក្ខណៈរួចរាល់ផងដែរក្នុងការផ្ទេរ Alisson ប្រសិនបើអ្នកចាំទី Thibaut Courtois ចាកចេញ ប៉ុន្តែក្លិប Liverpool បានបញ្ចេញសកម្មភាពយ៉ាងរហ័សជាងក្នុងការនាំយកអ្នកចាំទីដែលជាគោលដៅទី1 របស់ពួកគេ។ ក្លិប Chelsea មិនបានដាក់សំណើអ្វីឡើយ។ សូមបញ្ជាក់ថា Alisson បានផ្ទេរមកពីក្លិប Internacional ទៅកាន់ក្លិប Roma កាលពីឆ្នាំ២០១៦ ក្នុងតម្លៃខ្លួនតែ 7.5លានអឺរ៉ូប៉ុណ្ណោះ៕

ប្រភពពី៖ Channel News Asia

July 19, 2018

ធនាគារជាតិៈ អត្រាកំណើននាំឱ្យសេដ្ឋកិច្ចកម្ពុជាមានភាពរឹងមាំ

ធនាគារជាតិនៃកម្ពុជា (NBC) បានដំឡើងការព្យាករពីកំណើនសេដ្ឋកិច្ចរបស់ខ្លួនសម្រាប់ឆ្នាំ2018 នេះដល់7% ធៀបនឹងការព្យាករកាលពីខែមករាត្រឹមតែ 6,9%។ ក្នុងរបាយការណ៍ប្រចាំឆមាសទី1 ធនាគារជាតិបានឱ្យដឹងថា ភាពរឹងមាំនៃសេដ្ឋកិច្ចនេះត្រូវបានគាំទ្រដោយវិស័យទេសចរណ៍ 12,5% កំណើននាំចេញ 11,6% និងកំណើនក្នុងវិស័យសំណង់ 11,5% នៅឆមាសទី1ឆ្នាំនេះ។ នេះបើយោងតាមរបាយការណ៍ធនាគារជាតិនៃកម្ពុជា។

លោក ជា ចាន់តូ ទេសាភិបាលធនាគារជាតិនៃកម្ពុជាបានមានប្រសាសន៍ថា៖ «សេដ្ឋកិច្ចកម្ពុជាបានបន្តរីកចម្រើនប្រកបដោយភាពជឿជាក់ ជាពិសេសក្នុងវិស័យនាំចេញ និងទេសចរណ៍ជាមួយនឹងកំណើនរឹងមាំនៃវិស័យសំណង់ និងការបន្តងើបឡើងនៃវិស័យកសិកម្មជាសញ្ញាវិជ្ជមានមួយ ដែលធ្វើឱ្យកំណើនសេដ្ឋកិច្ចក្នុងឆ្នាំ2018 អាចរក្សាបានល្បឿនខ្ពស់ និងរឹងមាំ»។ ឯកឧត្តម ថ្លែងថាតួលេខនេះមានភាពវិជ្ជមាន និងបង្ហាញថា ប្រទេសកម្ពុជាមានកំណើនយ៉ាងច្រើនក្នុងឆមាសទី1 ឆ្នាំ2018។

របាយការណ៍ប្រចាំឆមាសទី1 នេះបានឱ្យដឹងទៀតថា ទុនបម្រុងរូបិយប័ណ្ណអន្តរជាតិបានកើនឡើងដល់ 9.1ពាន់លានដុល្លារ ដែលអាចធានាដល់ការនាំចូលទំនិញ និងសេវាប្រមាណ 6ខែដែលជាកម្រិតខ្ពស់សម្រាប់ប្រទេសកំពុងអភិវឌ្ឍន៍ដែលជាទូទៅមានកម្រិតតែ 3ខែហើយរំពឹងថា នឹងកើនឡើងដល់ប្រមាណ 10ពាន់លានដុល្លារនៅដំណាច់ឆ្នាំ2018 ដែលអាចធានាបាននូវការនាំចូលទំនិញ និងសេវាកម្មសម្រាប់រយៈពេល 6ខែខាងមុខ និងពង្រឹងទំនុកចិត្តវិនិយោគិនលើភាពរឹងមាំនៃសេដ្ឋកិច្ចកម្ពុជា។

ស្ថានភាពម៉ាក្រូសេដ្ឋកិច្ចបន្តមានស្ថិរភាពដែលរួមចំណែកចម្បងដោយការបន្តរក្សាបាននូវស្ថិរភាពថ្លៃ និងតម្លៃប្រាក់រៀល រំពឹងថាស្ថិតក្នុងអត្រាដែលអាចគ្រប់គ្រងបាន 3%សម្រាប់រយៈពេលពេញមួយឆ្នាំ ខណៈដែលអតិផរណានៅឆមាសទី1នឹងបានថយចុះមកត្រឹម 2,6%។ នេះបើយោងតាមរបាយការណ៍របស់ធនាគារជាតិ។

របាយការណ៍នេះឱ្យដឹងថា៖ «ក្នុងករណីដែលមូលធននឹងហូរត្រឡប់ទៅអាមេរិកវិញ នោះប្រាក់ដុល្លារអាចនឹងឡើងថ្លៃដែលបញ្ហានេះនឹងដាក់សម្ពាធលើភាពប្រកួតប្រជែងការនាំចេញរបស់កម្ពុជា ដោយសារកម្ពុជាមានកម្រិតដុល្លារូបនីយកម្មខ្ពស់»។

កំណើនប្រាក់ឈ្នួលអប្បបរមាក្នុងវិស័យកាត់ដេរដែលមានកម្រិតខ្ពស់ជាងប្រទេសមួយចំនួនក្នុងតំបន់ និងនិន្នាការអនុវត្តគោលនយោបាយគាំពារនិយម និងលទ្ធភាពឈានដល់សង្គ្រាមពាណិជ្ជកម្មក៏អាចបង្កផលប៉ះពាល់ដល់ការនាំចេញរបស់កម្ពុជាផងដែរ។ ទោះជាយ៉ាងណាសេដ្ឋកិច្ចកម្ពុជាអាចប្រឈមហានិភ័យមួយចំនួនផងដែរពីបរិយាកាសហិរញ្ញវត្ថុ និងស្ថានភាពសេដ្ឋកិច្ចពិភពលោក។

យោងតាមធនាគារអភិវឌ្ឍន៍អាស៊ី (ADB) អត្រាកំណើនរបស់កម្ពុជាត្រូវបានប៉ាន់ប្រមាណថាមាន7% សម្រាប់ឆ្នាំ2018 និងឆ្នាំ2019។ អត្រាអតិផរណានឹងត្រូវបានគេរក្សានៅត្រឹម 3.2% នៅក្នុងឆ្នាំ 2018 និង3.5% នៅឆ្នាំ2019។ អត្រាកំណើនGDP ក្នុងមនុស្សម្នាក់ៗត្រូវបានព្យាករថា នឹងមាន 6.6 ភាគរយនៅក្នុងឆ្នាំ2018 ប៉ុន្តែធ្លាក់ចុះបន្តិចទៅ 2.6ភាគរយនៅឆ្នាំ2019៕

July 18, 2018

ឆមាសទី1ឆ្នាំនេះ ប្រាក់ចំណូលពន្ធគយកើនឡើងចំនួន 27.8ភាគរយ

យោងតាមសេចក្តីថ្លែងការណ៍របស់អគ្គនាយកដ្ឋានគយ និងរដ្ឋាករ (GDCE = The General Department of Customs and Excise)បានឱ្យដឹងថា នាយកដ្ឋានបានប្រមូលប្រាក់ចំនួន 1.2 ពាន់លានដុល្លារក្នុងរយៈពេល 6ខែដំបូងនៃឆ្នាំនេះ។

ការកើនឡើងប្រាក់ចំណូល គឺដោយសារតែការប្រមូលពន្ធគយពីការនាំចូលយានយន្តដែលបានកើនឡើង 40,5% ថាមពល និងប្រេងដែលបានកើនឡើង 10,5% និងសម្ភារសំណង់ដែលបានកើនឡើង 26,6%។

ឯកឧត្តម គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករបានមានប្រសាសន៍ថាកំណើនយ៉ាងឆាប់រហ័សនៃប្រាក់ចំណូលបានឆ្លុះបញ្ចាំងពីការអភិវឌ្ឍសេដ្ឋកិច្ចរបស់ប្រទេសជាតិ និងស្ថិរភាពនយោបាយ។ ការរីកចម្រើនគួរឱ្យកត់សម្គាល់នៃពាណិជ្ជកម្មអន្ដរជាតិក៏នាំឱ្យមានការកើនឡើងនូវចំណូលពន្ធនេះដែរ។ លោកបញ្ជាក់ថា៖ «កត្តាសំខាន់ដែលគាំទ្រការកើនឡើងនេះ គឺស្ថិរភាពនយោបាយរបស់ប្រទេសដែលធានាដល់កំណើនពាណិជ្ជកម្ម ការវិនិយោគ ការផលិត និងការប្រើប្រាស់»។

ឯកឧត្តមបានលើកឡើងថាក្នុងឆមាសទី1 ឆ្នាំ2018នេះ ចំណូលសរុបដែលប្រមូលដោយអគ្គនាយកដ្ឋានគយ និងរដ្ឋាករកម្ពុជា មានប្រមាណ 4.736ប៊ីលានរៀល ឬប្រមាណជា1,172លានដុល្លារអាមេរិក។ តួលេខចំណូលនេះត្រូវជាប្រមាណ 56.7%នៃផែនការដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ2018។ បើធៀបនឹងឆមាសទី1 ឆ្នាំ2017 ចំណូលនេះកើនឡើងប្រមាណ27.8% ដែលក្នុងនោះចំណូលពីមុខទំនិញយានយន្តមានកំណើន40.5% មុខទំនិញប្រេង និងថាមពលកើនឡើង 10.5% គ្រឿងសំណង់កើនឡើង 26.6% និងមុខទំនិញចម្រុះផ្សេងទៀតមានកំណើន 27%។

ឯកឧត្តមបានឱ្យដឹងដែរថា ប្រភេទពន្ធ និងអាករសំខាន់ៗដែលប្រមូលបានដោយគយ មានពន្ធគយ(ពន្ធនាំចូល) អាករពិសេស និងអាករលើតម្លៃបន្ថែម(VAT)។ នៅក្នុងឆមាសទី1 ឆ្នាំ2018នេះ បើប្រៀបធៀបនឹងឆមាសទី1 ឆ្នាំ2017 លទ្ធផលចំណូលតាមប្រភេទពន្ធមានការប្រែប្រួលដូចតទៅ៖ ពន្ធគយមានកំណើនជិត 16% អាករពិសេសមានកំណើន 39.4% ហើយVAT មានកំណើន 27%។

សេចក្តីថ្លែងការណ៍ក៏បាននិយាយផងដែរថា ការនាំចូលបានកើនឡើង 17% ខណៈដែលការនាំចេញបានកើនឡើង 7%។ ការប្រមូលពន្ធគយបានកើនឡើង13% សម្រាប់ការនាំចេញសម្លៀកបំពាក់និង 53%សម្រាប់ការនាំចេញអង្ករ និងស្រូវ។

កាលពីឆ្នាំមុន GDCE បានប្រមូលប្រាក់ចំណូលពន្ធចំនួន 1.9 ពាន់លានដុល្លារ។ ប្រាក់ចំណូលរបស់ GDCE កើនឡើង 28 %៕

July 18, 2018

Category: សង្គម និងសេដ្ឋកិច្ច