Category: សង្គម និងសេដ្ឋកិច្ច

តារាចម្រៀងស្រី Miley Cyrus និងគូដណ្ដឹងកំពុងឃ្លាតឆ្ងាយពីគ្នា
បើតាមការចេញផ្សាយរបស់សារព័ត៌មាននៅចក្រភពអង់គ្លេស Daily Mail បានឱ្យដឹងថា តារាចម្រៀងស្រីល្បីឈ្មោះនៅសហរដ្ឋអាមេរិក នាង Miley Cyrus និងគូដណ្ដឹងរបស់នាងលោក Liam Hemsworth ត្រូវបានគេបង្ហើបថា ពួកគេកំពុងតែឃ្លាតឆ្ងាយពីគ្នាហើយ បន្ទាប់ពីបានព្យាយាមទ្រាំទ្ររស់នៅជាមួយគ្នាទាំងមានអារម្មណ៍វេទនាផ្លួវចិត្តអស់រយៈពេលជាច្រើនខែរួចមក។
ម្ចាស់បទចម្រៀង «The Wrecking Ball» វ័យ 25ឆ្នាំ និងតារាសម្ដែងប្រុសក្នុងរឿង «Hunger Games star» វ័យ 28 ឆ្នាំ ត្រូវបានគេបង្ហើបឱ្យដឹងទៀតថា អ្នកទាំងពីរមានការឃ្នើសចិត្តនឹងគ្នាក្រោយពេលរៀបការ ដែលអ្នកទាំងពីរមិនទាន់មានបុត្រនៅឡើយ ជាមូលហេតុមួយបណ្ដាលឱ្យពួកគេមិនសូវជាត្រូវរ៉ូវគ្នាប៉ុន្មានឡើយ។ បើតាមប្រភពដែលជិតស្និទ្ធនឹងទំនាក់ទំនងស្នេហារបស់តារាទាំងពីរដួងនេះបានបង្ហើបប្រាប់ឱ្យដឹងថា តារាស្រី Miley Cyrus នាងជាមនុស្សរឹងរូស និងប្រហែលមិនអាចបន្ដទំនាក់ទំនងស្នេហាឱ្យបានយូរអង្វែងនោះទេ។
គួរបញ្ជាក់ផងដែរថា មានអ្នកគាំទ្រជាច្រើននាក់កំពុងសង្កេតតាមដានអំពីទំនាក់ទំនងស្នេហារបស់តារាស្រីរូបនេះ និងគូស្នេហ៍ ដែលនៅពេលបច្ចុប្បន្ននេះ ពួកគេទាំងពីរកំពុងព្យាយាមរស់នៅជាមួយគ្នា ដើម្បីបិទបាំងភ្នែកមហាជន បើទោះបីជាពួកគេត្រូវរងទុក្ខវេទនាផ្លូវចិត្តយ៉ាងណាក៏ដោយ៕
July 23, 2018
Hamilton ឈ្នះការប្រណាំង German GP បើទោះបីមានការព្រមានពីមន្ត្រីរៀបចំការប្រកួតក្ដី
កីឡាករ Lewis Hamilton បានបញ្ជាក់ថា រូបគេ «មិនធ្លាប់ធ្វើការប្រណាំងបែបនេះឡើយ» ក្រោយពីការដណ្តើមបានជ័យជម្នះដ៏មិននឹកស្មានដល់របស់គេក្នុងការប្រណាំងរថយន្ត German Grand Prix ខណៈដែលកីឡាករជាគូប្រជែងរបស់គេ Sebastian Vettel បានធ្លាក់ចេញពីការប្រជែង។
រយៈពេល 3ថ្ងៃ ក្រោយពីការប្រកាសពីការបន្តកុងត្រារយៈពេល 3ឆ្នាំទៀតរបស់គេ ម្ចាស់ការពារតំណែងជើងឯកពិភពលោក 4សម័យកាលរូបនេះ បានប្រើប្រាស់ល្បឿនដ៏អស្ចារ្យសម្រាប់ក្រុម Mercedes ខណៈដែលរូបគេ និងមិត្តរួមក្រុមរបស់គេ Valtteri Bottas ដណ្តើមបានចំណាត់ថ្នាក់លេខ1 និងលេខ2 នៅលើទឹកដីអាល្លឺម៉ង់។
កីឡាករសញ្ជាតិអង់គ្លេសរូបនេះ បានស្ថិតក្រោមការស៊ើបអង្កេតរបស់មន្ត្រីរៀបចំការប្រកួត សម្រាប់ការប្រើប្រាស់ល្បឿនលឿនពេកក្នុងពេលចាកចេញពីកន្លែងប្តូរកង់ នៅពេលដែលក្រុមការងាររបស់គេបញ្ចប់ការផ្លាស់ប្តូរកង់ ស្របពេលដែលរថយន្តសុវត្ថិភាពបានបង្ហាញខ្លួន។ ក្នុងសេចក្តីប្រកាសនោះ មន្ត្រីរៀបចំការប្រកួតបានបញ្ជាក់ថា វាជាការរំលោភបំពានមួយយ៉ាងច្បាស់ ប៉ុន្តែបានសម្រេចចិត្តចេញត្រឹមតែការស្តីបន្ទោសប៉ុណ្ណោះ។
Hamilton បានចាប់ផ្តើមប្រណាំងដោយស្ថិតលើលេខរៀងទី14 នៅលើទីលាន ក្រោយពីធ្វើមិនបានល្អក្នុងការប្រណាំងជម្រុះ កាលពីថ្ងៃសៅរ៍ ប៉ុន្តែ ការប្រើប្រាស់ល្បឿនដ៏ល្អ បូករួមទាំងការមានទេពកោសល្យដ៏អស្ចារ្យបានជួយឱ្យរូបគេដណ្តើមបានជ័យជម្នះតែម្តង។ Hamilton បានឱ្យដឹងថា៖ «វាពិតជាលំបាកណាស់ពីទីតាំងនោះ និងមិនអាចយកឈ្នះបានឡើយ ប៉ុន្តែ អ្នកត្រូវតែមានការជឿជាក់»៕
ប្រភពពី៖ Channel News Asia
July 23, 2018
Ozil ចាកចេញពីក្រុមជម្រើសជាតិអាល្លឺម៉ង់ ដោយបង្ហោះពីការរើសអើង និងការមិនគោរពគ្នា
ខ្សែបម្រើ Mesut Ozil បានប្រកាសពីការចូលនិវត្តន៍របស់គេពីកីឡាបាល់ទាត់អន្តរជាតិ ជាមួយនឹងការសម្រេចចិត្តភ្លាមៗ ខណៈដែលខ្សែបម្រើរូបនេះបានបង្ហើបពីភាពអយុត្តិធម៌ដែលរូបគេបានទទួល និងការរើសអើងជាតិសាសន៍ជុំវិញកិច្ចប្រជុំរបស់គេជាមួយនឹងប្រធានាធិបតីតួកគីលោក RecepTayyip Erdogan កាលពីខែឧសភា។
Ozil គឺជាសមាជិកម្នាក់របស់ក្រុមជម្រើសជាតិអាល្លឺម៉ង់ ដែលបានធ្លាក់ចេញពីយុទ្ធនាការ World Cup ជុំផ្តាច់ព្រ័ត្រនៅរុស្ស៊ី ត្រឹមវគ្គចែកពូល និងបានរងនូវការរិះគន់យ៉ាងខ្លាំងទៅលើទម្រង់លេងរបស់គេ ក៏ដូចជាការចូលជួបរបស់គេជាមួយនឹងលោក Erdogan ដែលត្រូវបានចោទប្រកាន់ពីបទរំលោភសិទ្ធិមនុស្ស។
ខ្សែបម្រើរបស់ក្លិប Arsenal មានឈាមជ័រជាជនជាតិតួកគី និងបានការពារសកម្មភាពរបស់គេក្នុងសេចក្តីប្រកាសដ៏វែងមួយ ខណៈដែលរូបគេក៏បានវាយប្រហារទៅលើសហព័ន្ធកីឡាបាល់ទាត់អាល្លឺម៉ង់ (DFB) ផងដែរ។ ខ្សែបម្រើរូបនេះបានឱ្យដឹងនៅលើបណ្តាញសង្គម Twitter ថា៖ «សម្រាប់ខ្ញុំ ការថតរូបជាមួយនឹងលោកប្រធានាធិបតី Erdogan មិនមែនជាបញ្ហានយោបាយ ឬការបោះឆ្នោតឡើយ វាគ្រាន់តែជាការបង្ហាញការរគោរពរបស់ខ្ញុំលើប្រទេសនៃក្រុមគ្រួសាររបស់ខ្ញុំប៉ុណ្ណោះ»។
ខ្សែបម្រើរូបនេះបានឱ្យដឹងថា៖ «ខ្ញុំចង់និយាយដោយត្រង់ៗចេញពីបេះដូង ក្រោយពីការពិចារណាយ៉ាងយកចិត្តទុកដាក់ ដោយសារតែហេតុការណ៍កាលពីពេលថ្មីៗនេះ។ ខ្ញុំនឹងមិនលេងឱ្យក្រុមបាល់ទាត់ជម្រើសជាតិអាល្លឺម៉ង់ទៀតឡើយ ស្របពេលដែលខ្ញុំមានអារម្មណ៍ពីការរើសអើងជាតិសាសន៍ និងការមិនគោរពគ្នា»៕
ប្រភពពី៖ The Guardian
July 23, 2018
ធនាគារជាតិ មិនលើកទឹកចិត្តឱ្យប្រើប្រាស់ភ្នាក់ងារសន្តិសុខប្រដាប់អាវុធ
យោងតាមលិខិតរបស់ធនាគារជាតិនៃកម្ពុជាដែលផ្ញើទៅកាន់ម្ចាស់គ្រឹះស្ថានហិរញ្ញវត្ថុ និងធនាគារទាំងអស់នៅថ្ងៃទី20 កក្កដា ឆ្នាំ2018 បានបញ្ជាក់ថា ធនាគារជាតិមិនលើកទឹកចិត្តឱ្យគ្រឹះស្ថានហិរញ្ញវត្ថុ និងធានាគារ ប្រើប្រាស់ភ្នាក់ងារសន្តិសុខប្រដាប់អាវុធនៅខាងក្នុង ឬក្បែរបរិវេណទីស្នាក់ការរបស់ខ្លួនឡើយនៅពេលដែលកម្ពុជាកំពុងមានសន្តិភាពពេញលេញ និងការអភិវឌ្ឍគ្រប់វិស័យដូចសព្វថ្ងៃ។
សេចក្តីណែនាំនោះ បានបញ្ជាក់ទៀតថា ក្នុងគោលបំណងចូលរួមចំណែកក្នុងការរក្សា និងការពារសន្តិសុខសណ្តាប់ធ្នាប់សាធារណៈ ធនាគារជាតិនៃកម្ពុជាមិនលើកទឹកចិត្តឱ្យគ្រឹះស្ថានហិរញ្ញវត្ថុ និងធនាគារទាំងអស់ ប្រើប្រាស់ភ្នាក់ងារសន្តិសុខប្រដាប់អាវុធឡើយ។ ប៉ុន្តែក្នុងករណីចាំបាច់ គ្រឹះស្ថានធនាគារ និងហិរញ្ញវត្ថុត្រូវស្នើសុំកិច្ចសហការ និងការអនុញ្ញាតពីអាជ្ញាធរមានសមត្ថកិច្ចពាក់ព័ន្ធ ក្នុងការប្រើប្រាស់ភ្នាក់ងារសន្តិសុខប្រដាប់អាវុធ ផ្អែកតាមច្បាប់ និងបទប្បញ្ញត្តិជាធរមាន។
តាមលិខិតដដែលនេះបានបញ្ជាក់ថា កន្លងមកធនាគារជាតិនៃកម្ពុជាបានពិនិត្យឃើញថា គ្រឹះស្ថានមួយចំនួន កំពុងប្រើប្រាស់ភ្នាក់ងារសន្តិសុខប្រដាប់អាវុធការពារនៅខាងក្នុង ឬក្បែរបរិវេណទីស្នាក់ការរបស់ខ្លួនដែលអាចបង្កហានិភ័យជាយថាហេតុដល់អាយុជីវិតប្រជាជន និងសណ្តាប់ធ្នាប់សាធារណៈ។ អាស្រ័យហេតុនេះ ធនាគារជាតិតម្រូវឱ្យគ្រឹះស្ថានទាំងនោះ សុំការអនុញ្ញាតពីអាជ្ញាធរពាក់ព័ន្ធជាបន្ទាន់ ព្រមទាំងរាយការណ៍ទៅអគ្គនាយកដ្ឋានត្រួតពិនិត្យនៃធនាគារជាតិ ឱ្យបានមុនថ្ងៃទី24 ខែកក្កដា ឆ្នាំ2018 អំពីបញ្ជីឈ្មោះភ្នាក់ងារសន្តិសុខ និងចំនួនអាវុធ៕
ខាងក្រោមនេះ គឺជាលិខិតដែលធនាគារជាតិនៃកម្ពុជា ផ្ញើទៅកាន់ម្ចាស់គ្រឹះស្ថានហិរញ្ញវត្ថុ និងធនាគារ ទាំងអស់៖
July 21, 2018
Everton ខិតកាន់តែកៀកក្នុងការនាំយក Richarlison ពី Watford ក្នុងតម្លៃខ្លួន 50លានផោន
ក្លិបទូកក្តោង Everton កំពុងស្ថិតយ៉ាងប្រកៀកក្នុងការចុះហត្ថលេខាជាមួយនឹងខ្សែប្រយុទ្ធប្រេស៊ីល Richarlison ពីក្លិប Watford ក្នុងការផ្ទេរមួយដែលអាចនឹងមានតម្លៃខ្លួនដល់ទៅ 50លានផោន (ស្មើនឹង65,66លានដុល្លារអាមេរិក)។
Richarlison បានចុះហត្ថលេខារយៈពេល 5ឆ្នាំជាមួយនឹង Watford កាលពីខែសីហា ឆ្នាំ2017 ក្រោយពីបានផ្ទេរមកពីក្លិប Fluminense សម្រាប់តម្លៃខ្លួន11.5លានផោន បន្ទាប់ពីបានបង្ហាញពីទម្រង់លេងយ៉ាងល្អក្នុងព្រឹត្តិការណ៍ Under-20 World Cup។ លោក Marco Silva គ្រូបង្វឹករបស់ក្រុម Everton គឺជាសមាជិកនៃផ្នែកចាត់ការទូទៅរបស់ក្លិប Watford ដែលបាននាំយក Richarlison ទៅកាន់កីឡដ្ឋាន Vicarage Road។ ខ្សែប្រយុទ្ធវ័យ 21ឆ្នាំរូបនេះ បានស៊ុតបាល់បញ្ចូលទី 5គ្រាប់ក្នុងការបង្ហាញខ្លួន 12លើកដំបូងរបស់គេក្នុងក្របខ័ណ្ឌ Premier League នៅមុនពេលទម្រង់លេងរបស់គេបានធ្លាក់ចុះវិញ។
តម្លៃខ្លួនជាកំណត់ត្រានៃការទិញចូលកីឡាកររបស់ Everton គឺ Gylfi Sigurdsson ដែលបានផ្ទេរមកពីក្លិប Swansea កាលពីខែសីហា ឆ្នាំ2017 ក្នុងតម្លៃខ្លួន 45លានផោន។ Richarlison មិនបានរកគ្រាប់បាល់បញ្ចូលទីសោះចាប់តាំងពីខែវិច្ឆិកា ប៉ុន្តែ លោក Silva មានបំណងចង់នាំយករូបគេទៅកាន់កីឡដ្ឋាន Goodison Park ចាប់តាំងពីលោកបានចូលជំនួសកន្លែងរបស់លោក Sam Allardyce កាលពីថ្ងៃទី31 ខែឧសភា។
ការពិភាក្សាផ្សេងៗជុំវិញការផ្ទេរនេះបានបន្ត បើទោះបី Everton មិនមានទំនាក់ទំនងល្អជាមួយនឹងក្លិប Watford ចាប់តាំងពីមិនអាចនាំយកលោក Silva ដែលកាលនោះកំពុងដឹកនាំនៅកីឡដ្ឋាន Vicarage Road ទៅកាន់កីឡដ្ឋាន Goodison Park ក្រោយពីការចាកចេញរបស់លោក Ronald Koeman កាលពីខែតុលា ឆ្នាំ2017 ក៏ដោយ៕
ប្រភពពី៖ BBC
July 21, 2018
ផ្ទុះអាងបំពង់ចំហាយទឹកនៅកណ្ដាលទីក្រុង ញូវយ៉ក ( មានវីដេអូ )
ដោយយោងតាមសារព័ត៌មាន China Xinhua News ដែលចេញផ្សាយមុននេះបន្ដិចបានឱ្យដឹងថា កើតមានហេតុការណ៍ផ្ទុះអាងបំពង់ចំហាយទឹក នៅកណ្ដាលទីក្រុង ញូវយ៉ក សហរដ្ឋអាមេរិក ខណៈដែលផ្សែងបានបំភាយឡើងយ៉ាងខ្ពស់ទៅលើអាកាស បណ្ដាលឱ្យប្រជាជនដែលរស់នៅម្ដុំនោះមានភាពភ្ញាក់ផ្អើលជាខ្លាំង។
ហេតុការណ៍នេះបានកើតឡើងនៅថ្ងៃទី 19 ខែកក្កដា ឆ្នាំ 2018 នាវេលាម៉ោង 6 .40 នាទី ម៉ោងនៃសហរដ្ឋអាមេរិក (ត្រូវពេលព្រឹកថ្ងៃនេះក្នុងស្រុកខ្មែរ ) ដែលបានកើតឡើងនៅម្ដុំផ្លូវ Fifth Avenue និងផ្លូវ 21Street ដែលមិនឆ្ងាយពីអគារ Flatiron Building ប៉ុន្មាននោះទេ។ គួរបញ្ជាក់ផងដែរថា ហេតុការណ៍រន្ធត់នេះ ពុំមានអ្នករបួស និងស្លាប់ឡើយ។ ដើម្បីឱ្យកាន់តែជាក់ច្បាស់ សូមទស្សនាវីដេអូខាងក្រោមនេះ ៖
July 21, 2018
Cristiano Ronaldo ប្រកាសលក់ភូមិគ្រិះដ៏ធំស្កឹមស្កៃក្នុងតម្លៃ 4.8 លានដុល្លារសហរដ្ឋអាមេរិក
តាមរយៈសារព័ត៌មាន Sanook ដែលចេញផ្សាយនៅពេលមុននេះបន្ដិច បានឱ្យដឹងថា បន្ទាប់ពីសម្រេចចិត្តចុះកិច្ចកុងត្រារយៈពេល 4 ឆ្នាំជាមួយ Juventus ជាក្រុមលំដាប់ប្រចាំ កាល់សូ Serie A ប្រទេសអ៊ីតាលី និងជាការបិទទំព័រ 9 ឆ្នាំក្នុងព័ណ៌អាវ Real Madrid នោះ នៅទីបំផុតកីឡាករ Cristiano Ronaldo ដែលជាអាយដលក្រុមជម្រើសជាតិព័រទុយហ្គាល់ បានប្រកាសលក់ភូមិគ្រិះដ៏ធំស្កឹមស្កៃក្នុងតម្លៃ 4.8 លានដុល្លារសហរដ្ឋអាមេរិក ។
នៅក្នុងភូមិគ្រិះមួយនេះ មានបន្ទប់គេងចំនួន 7 បន្ទប់ទឹកចំនួន 8 ដូចដែលកីឡាកររូបនេះបានបង្ហោះនៅលើបណ្ដាញសង្គមអ៊ីនស្ដាក្រាម ដែលមានអ្នកតាមដានលោកដល់ទៅ 136 លាននាក់។ គួរបញ្ជាក់ដែរថា នៅផ្នែកខាងក្រៅមានកន្លែងហាត់ប្រាណផ្ទាល់ខ្លួនដ៏ធំដូចវិមានមួយ មានតារាងបាល់ទាត់ធំមួយ អាងហែលទឹកដ៏ប្រណីត និងមានកន្លែងងូតទឹកយ៉ាងមានផាសុខភាពតែម្ដង។ ក្រៅពីនោះ ក៏មានការរចនាម៉ូដបន្ទប់ និងទីតាំងផ្សេងៗទៀត ស្របតាមចំណង់ចំណូលចិត្តអ្នកស្រឡាញ់កីឡាបាល់ទាត់ផងដែរ។
ដើម្បីឱ្យកាន់តែជាក់ច្បាស់ សូមទស្សនារូបភាពនៅក្នុងភូមិគ្រិះដ៏ធំស្កឹមស្កៃរបស់លោក Cristiano Ronaldo ខាងក្រោមនេះ៖
July 21, 2018
តារាស្រី ផេន ខេក ត្រូវបានតែងតាំងជាអ្នកនាំពាក្យកងទ័ពជើងទឹក
តាមរយៈគេហទំព័រ Tvpool នៅថ្ងៃទី21 ខែកក្កដា ឆ្នាំ 2018 នេះ បានឱ្យដឹងថា ពិតជាធម្មតាមែន ដែលតារាស្រីលំដាប់ជួរនាង ខេមនីច ចាមិកន ឬមានឈ្មោះក្នុងសិល្បៈ ផេន ខេក ត្រូវបានជ្រើសតាំងពិសេសជាអ្នកនាំពាក្យរបស់កងទ័ពជើងទឹក ដើម្បីឱ្យប្រតិបត្តិការព័ត៌មានរបស់អង្គភាពកងទ័ពជើងទឹក និងមានប្រសិទ្ធភាពបំផុត។
សូមជម្រាបផងដែរថា ក្រោយពីបានធ្វើការតែងតាំងហើយ តារាស្រី ផេនខេក ត្រូវបំពេញតួនាទីដូចនេះ ៖
1-ទំនាក់ទំនងសាធារណៈ ជាមួយព័ត៌មានរបស់អង្គភាពកងទ័ពជើងទឹក នៅក្នុងនាមជាអ្នកនាំពាក្យដែលបានប្រគល់ជូន។
2-ចូលរួមជាពិធីការិនី និងកិច្ចការងារផ្សេងៗ របស់អង្គភាពកងទ័ពជើងទឹក ដូចដែលអង្គភាពបានប្រគល់ជូន។
3-ផ្ដល់ព័ត៌មាន និងពាក្យណែនាំជាប្រយោជន៍ដល់ការប្រតិបត្តិការព័ត៌មានរបស់កងទ័ពជើងទឹក។
4-ប្រតិបត្តិតួនាទីផ្សេងៗ តាមដែលអង្គភាពបានប្រគល់ជូន ដោយអ្នកនាំពាក្យរបស់ទ័ពជើងទឹក និងផ្លាស់ប្ដូរតំណែងវិញ នៅពេលដែលអង្គភាពកងទ័ពជើងទឹកមានបញ្ជាការប្រែប្រួល។
គួរបញ្ជាក់ផងដែរថា ការទទួលតំណែងថ្មីរបស់តារាសម្ដែងស្រីរូបនេះ អាចនិយាយបានថា ជាមោទនភាពមួយយ៉ាងធំធេង ព្រោះនាងមិនត្រឹមតែមានរូបសម្បត្តិស្រស់សោភាតែមួយប៉ុណ្ណោះទេ នាងមានទាំងទេពកោសល្យ ខ្នះខ្នែងការងារសប្បុរធម៌ និងមានពហុជំនាញក្នុងការធ្វើកិច្ចការផ្សេងៗទៀត៕
July 21, 2018
គុណប្រយោជន៍នៃសម្បកការ៉ុត 10ចំណុច ដែលមិនគួរមើលរំលង
ដូចដែលប្រិយមិត្តអ្នកអានទស្សនាវដ្តី ឡារ៉ែន ទាំងអស់បានដឹងហើយថា ការ៉ុតជាមើមបន្លែដែលមានគុណភាពខ្ពស់ដល់រាងកាយ ដូច្នេះប្រិយមិត្តទាំងអស់គួរដឹងថា តើវាផ្ដល់ប្រយោជន៍អ្វីខ្លះដល់សុខភាពរាងកាយ? យ៉ាងមិញ មើមការ៉ុត ក៏មានប្រយោជន៍ ដើម្បីសុខភាពរបស់ស្ដ្រី ប្រសិនបើស្ដ្រីដែលចង់មានរូបស្រស់ស្អាត និងមានសុខភាពល្អគួរកុំខកខានពិសាការ៉ុត ព្រោះវាផ្ដល់នូវប្រយោជន៍ដល់រាងកាយសម្បើមណាស់។ ម្យ៉ាងទៀតសូមកុំបោះចោលសម្បកការ៉ុតឱ្យសោះ ព្រោះថាវាសម្បូរទៅដោយប្រូតេអ៊ីន វីតាមីន និងធាតុរ៉ែជាច្រើនដែលនៅគ្របពីលើសាច់ការ៉ុត ហើយម្យ៉ាងវិញទៀត សម្បកការ៉ុតសម្បូរទៅដោយវីតាមីន C ច្រើនជាងសាច់រហូតដល់ទៅ6ដងឯណោះ។ ខាងក្រោមនេះជាការបង្ហាញពីអត្ថប្រយោជន៍របស់ការ៉ុតចំពោះសុខភាពរបស់ស្ត្រី ៖
1. ជួយសុខភាពស្ដ្រីតាំងគភ៌
ការ៉ុត ជាអាហារសមប្រកបសម្រាប់ស្ដ្រីដែលកំពុងពពោះ ព្រោះវាជួយទ្រទ្រង់សុខភាពទាំងម្ដាយ និងទារកក្នុងផ្ទៃបាន រួមទាំងកាត់បន្ថយស្ថានភាពខុសប្រក្រតី ដែលកើតទៅលើទារកផងដែរ។ លើសពីនេះ ការ៉ុត ក៏ជួយឱ្យម្ដាយមានទឹកដោះគ្រាប់គ្រាន់ដែរ។
2. កាត់បន្ថយការកើតមហារីកសុដន់
សារធាតុពុលដែលទទួលបានពីអាហារ និងជាតិពុលនៅជុំវិញខ្លួន អាចបង្កឱ្យកើតជំងឺមហារីក វានឹងទៅបំផ្លាញកោសិកានៅក្នុងរាងកាយ។ ប្រសិនបើអ្នកទទួលទានការ៉ុតជាប្រចាំ នឹងជួយឱ្យរាងកាយទទួលបានសារធាតុប្រឆាំងនឹងជាតិពុល ជួយកាត់បន្ថយការកើតជំងឺមហារីកសុដន់យ៉ាងមានប្រសិទ្ធភាព។
3. កម្ចាត់ជាតិពុល
ការបាត់បង់កោសិកានានាក្នុងខ្លួនសុទ្ធសឹងតែកើតឡើងពីសារធាតុពុលទៅបំផ្លាញដល់កោសិកាក្នុងរាងកាយ។ បើអ្នកមិនចង់ឱ្យខ្លួនប្រាណទ្រុឌទ្រោម ឬចាស់ទៅតាមអាយុទេ គួរទទួលទានការ៉ុត ឬទឹកការ៉ុតជាប្រចាំ ដើម្បីជួយឱ្យសុខភាពមាំមួនល្អ និងក្មេងជាងវ័យ។
4. ជួយបង្កើនសារធាតុដែលចាំបាច់ក្នុងពេលមានរដូវ
ការ៉ុត ជាអាហារជួយបង្កើតសារធាតុផ្សេងៗក្នុងពេលមានរដូវ ព្រោះវាសម្បូរដោយសារធាតុច្រើនយ៉ាង ទាំងជាតិដែកវីតាមីន A និង Beta-Carotene ដែលស្ដ្រីបាត់បង់ច្រើនខុសប្រក្រតីក្នុងពេលមានរដូវ។
5. ការពារស្បែកពីកាំរស្មី UV
កាំរស្មី UV ចាត់ទុកថាជាអ្នកបំផ្លាញស្បែកខ្លាំងបំផុត និងជំរុញឱ្យកើត
មានជំងឺមហារីកស្បែក។ ដូច្នេះចំ-
ពោះអាហារធម្មជាតិដូចជា ការ៉ុត ដែលមានវីតាមីន A ច្រើនក៏អាចការពារស្បែករបស់អ្នកបានយ៉ាងល្អ។
6. ជំរុញ និងសម្រួលប្រព័ន្ធរំលាយអាហារ
ចំពោះស្ដ្រីដែលគិតចង់សម្រកទម្ងន់
សូមកុំភ្លេចទទួលទានការ៉ុត ព្រោះវាជួយបង្កើនដល់ការងារនៃប្រព័ន្ធរំលាយអាហារ អាចដុតបំផ្លាញថាមពលអាហារក្នុងខ្លួនបានច្រើន។
7. ការពារការកើតមុន
សារធាតុអាហារនៅក្នុងការ៉ុត មិនត្រឹមតែជួយទ្រទ្រង់ស្បែកឱ្យភ្លឺថ្លាប៉ុណ្ណោះទេ ប៉ុន្ដែក៏អាចកាត់បន្ថយការកើតមុនបានយ៉ាងល្អផងដែរ។ ក្រៅពីនេះ ប្រសិនបើទទួលទានទឹកការ៉ុតលាយជាមួយទឹកឃ្មុំ ក៏ជួយព្យាបាលមុន និងទប់ស្កាត់មិនឱ្យកើតមុនបានផងដែរ ។
8. ថែរក្សាសុខភាព និងមានសម្រស់សក់រលើបរលោង
នៅក្នុងការ៉ុតមានវីតាមីន A និង Beta-
Carotene ជួយទ្រទ្រង់ដល់សរសៃ-
សក់ រួមទាំងធ្វើឱ្យរលើបរលោង។ លើសពីនេះ វីតាមីន C ដែលមាននៅក្នុងការ៉ុតអាចជួយឱ្យសក់រឹងមាំ និងស្រស់ស្រាយជាងមុន។
9. ជួយឱ្យភ្នែកកាន់តែមើលឃើញច្បាស់
បើចង់ឱ្យភ្នែកមានភាពស្រស់ស្រាយភ្លឺច្បាស់ និងមានសុខភាពល្អ ការ៉ុតជាជម្រើសដ៏ល្អចំពោះសុខភាពភ្នែក ព្រោះវាសម្បូរដោយវីតាមីន A និង Beta-Carotene ជួយការពារមិនឱ្យភ្នែកស្រវាំង។
10. ការពារស្បែកជ្រួញ
នៅពេលអ្នកមានអាយុច្រើន ស្បែកក៏ជ្រីវជ្រួញ ប៉ុន្ដែបើមិនចង់ឱ្យចាស់ខូចទៅតាមអាយុនោះទេ អ្នកគួរទទួលទានការ៉ុត ព្រោះការ៉ុតសម្បូរដោយសារធាតុប្រឆាំងនឹងជាតិពុលក្នុងរាងកាយ បើកាន់តែទទួលទានច្រើននឹងធ្វើឱ្យអ្នកមានសម្រស់ក្មេងជាងវ័យមិនខាន៕
July 20, 2018
គិតដល់6ចំណុចមុនទទួលទានទឹកអំពៅ ដើម្បីរក្សាទម្ងន់
ទឹកអំពៅ គឺជាផលិតផលដែលបានមកពីការកៀបសាច់ដើមអំពៅឱ្យចេញជាទឹក ដែលជាផលិតផលធម្មជាតិមានសារធាតុស្ករធម្មជាតិដល់ទៅ15% ហើយវាក៏សម្បូរទៅដោយសារធាតុរ៉ែ និងវីតាមីនផ្សេងៗជាច្រើនទៀត។ ក្នុងទឹកអំពៅមានសារធាតុកាល់ស្យូម និងប៉ូតាស្យូមកម្រិតខ្ពស់បំផុត ហើយក្រៅពីនេះ ក៏មានសារធាតុដែក និងវីតាមីន A, C, B1, B2, B3 , B5, B6 និងសារធាតុប្រឆាំងរ៉ាឌីកាល់សេរីផងដែរ។ បើតាមការបញ្ជាក់របស់អ្នកជំនាញសុខភាពបានប្រាប់ឱ្យដឹងថា ទឹកអំពៅ ជួយព្យាបាល និងការពាររោគជំងឺផ្សេងៗមួយចំនួនទៀត និងមិនធ្វើឱ្យធាត់ផងដែរ។ ដើម្បីស្រាយចម្ងល់អំពីបញ្ហាទទួលទានទឹកអំពៅហើយឡើងទម្ងន់ ថ្ងៃនេះទស្សនាវដ្ដីឡារ៉ែន សូមណែនាំប្រិយមិត្តអ្នកអានទាំងអស់ មកយល់ដឹងអំពីការថែរក្សាសុខភាព និងសម្រស់ជាមួយទឹកអំពៅដូចខាងក្រោមនេះ៖
1. មិនមានជាតិខ្លាញ់
ទឹកអំពៅ ពុំមានសារធាតុខ្លាញ់ឡើយហើយថែមទាំងមានរសជាតិផ្អែមពីធម្ម-ជាតិទៀតផង។ ដូច្នេះ អ្នកមិនចាំបាច់បន្ថែមស្ករចូលទៅក្នុងវា និងមិនត្រូវព្រួយបារម្ភអំពីការស្រូបជាតិខ្លាញ់ច្រើនហួសប្រមាណនៅក្នុងរាង-កាយ ខណៈអ្នកទទួលទានទឹកអំពៅនោះទេ។
2. មានផ្ទុកសារធាតុអាហារកាកសរសៃ
ទឹកអំពៅមានផ្ទុកសារធាតុអាហារកាកសរសៃហ្វាយប៊ឺរខ្ពស់ ហេតុដូច្នេះហើយទើបវា ជាភេសជ្ជៈដ៏ល្អឥតខ្ចោះសម្រាប់អ្នក ដែលចង់សម្រកទម្ងន់។ ទឹកអំពៅស្រស់មានផ្ទុកកាកសរសៃហ្វាយប៊ឺរ 13ក្រាមក្នុងមួយកែវ។
3. ផ្ដល់កម្លាំង និងថាមពលដល់សារពាង្គកាយ
ប្រសិនបើអ្នកមានអារម្មណ៍ថាអស់កម្លាំង នឿយហត់ ល្ហិតល្ហៃ ទន់ដៃជើង គប្បីទទួលទានទឹកអំពៅមួយកែវ អាចធ្វើឱ្យអ្នកមានកម្លាំងឡើងវិញភ្លាមៗ។ គុណប្រយោជន៍របស់វាមិនត្រឹមតែអាចជួយអ្នកឱ្យមានកម្លាំងធ្វើសកម្មភាពការងារប្រចាំថ្ងៃរបស់ខ្លួនដោយរីករាយប៉ុណ្ណោះទេ ប៉ុន្តែថែមទាំងផ្តល់ឱ្យអ្នកនូវថាមពលក្នុងពេលហាត់ប្រាណទៀតផង។
4. ប្រឆាំងការរលាក និងអុកស៊ីតកម្ម
ការរលាក គឺជាមូលហេតុ ដែលធ្វើឱ្យមនុស្សភាគច្រើនមិនអាចសម្រកទម្ងន់បានឆាប់រហ័ស។ ទឹកអំពៅសម្បូរទៅដោយសារធាតុប្រឆាំងនឹងអុកស៊ីតកម្មឈ្មោះថា Polyphenols ដែលមានប្រសិទ្ធភាពប្រឆាំងនឹងការរលាកនៅក្នុងរាងកាយ។
5. កម្ចាត់កូឡេស្តេរ៉ូលក្នុងសរសៃឈាម
បរិមាណកូលេស្តេរ៉ូលអាក្រក់មាននៅក្នុងឈាម នាំឱ្យឡើងទម្ងន់មិនគួរឱ្យពេញចិត្ដ។ ទឹកអំពៅ ពុំមានផ្ទុកកូលេស្តេរ៉ូលទេហើយថែមទាំងអាចកម្ចាត់កូឡេស្តេរ៉ូលអាក្រក់នៅក្នុងឈាមបានទៀតផង ដែលធ្វើឱ្យអ្នកព្រួយបារម្ភកើតមានជំងឺបេះដូង ឬលើសឈាមទៀតផង។
6. ការពារសុខភាពពោះវៀន
ប្រព័ន្ធរំលាយអាហារ មានសុខភាពល្អមានការផ្សារភ្ជាប់ជាមួយនឹងការសម្រកទម្ងន់។ ទឹកអំពៅត្រូវបានណែនាំដោយគេហទំព័រសុខភាពពិភពលោក ដែលបានណែនាំអ្នកជំងឺឱ្យថែរក្សាចលនាពោះវៀន កាត់បន្ថយការទល់លាមក ព្យាបាលជាតិអាស៊ីត រួមទាំងការរលាកក្រពះ។ ហេតុនេះវាលើកកម្ពស់ប្រព័ន្ធរំលាយអាហារឱ្យមានសុខភាពល្អ តែមិនស័ក្ដិសមចំពោះអ្នកជំងឺទឹកនោមផ្អែមឡើយ៕
July 20, 2018