សង្គម និងសេដ្ឋកិច្ច - La Reine Media

Lionel Messi និងក្រុមអាហ្សង់ទីន «វាយសម្រុកដូចព្យុះ» ផ្ដួលប៉ាណាម៉ាបានសម្រេច

(លទ្ធផលបាល់ទាត់អាហ្សង់ទីន – ប៉ាណាម៉ា) – ក្រុមជើងឯក World Cup 2022 បានផ្ដួលក្រុមជម្រើសជាតិប៉ាណាម៉ា ក្នុងនោះ Lionel Messi ក៏ជាអ្នកបានចូលរួមចំណែកក្នុងជ័យជម្នះនេះ។

ព្រឹកថ្ងៃទី 24 មីនា ក្រុមជម្រើសជាតិអាហ្សង់ទីន បានប្រកួតមិត្តភាពជាមួយក្រុមប៉ាណាម៉ា។ ដោយមានកម្លាំង និងជំនាញខ្លាំងជាង Lionel Messi និងមិត្តរួមក្រុមបានបើកការវាយលុកតាំងពីនាទីដំបូង។ នៅនាទីទី 17 Messi ត្រូវឱបក្បាលសោកស្ដាយបន្ទាប់ពីស៊ុតបាល់ពិន័យចំបង្គោលទី។ នាទីក្រោយមក អាហ្សង់ទីននៅតែជាអ្នកគ្រប់គ្រងស្ថានការណ៍ តែមិនអាចបំប៉ើងសំណាញ់របស់ប៉ាណាម៉ា បណ្ដោយឱ្យតង់ទីមួយចប់ក្នុងលទ្ធផល 0-0។

ចូលដល់តង់ទីពីរ ស្ថានការណ៍នៅតែមិនបានផ្លាស់ប្ដូរ។ នាទីទី 50 Messi បានសម្រេចចិត្តទាត់ផ្ដាច់បាល់ពិន័យជ្រុង ប៉ុន្តែអ្នកចាំទីរបស់ប៉ាណាម៉ា សង្គ្រោះទាន់ពេល។ ក្រោយមក អ្នកចាំទីរបស់ប៉ាណាម៉ា Guerra ក៏បានយកឈ្នះជាបន្តបន្ទាប់លើកីឡាករនានារបស់អាហ្សង់ទីនដែលទាត់ផ្ដាច់ជាហូរហែ។

ទោះជាយ៉ាងនេះក៏ដោយ នៅចំពោះមុខការវាយសម្រុងដូចព្យុះរបស់ម្ចាស់ជើងឯក World Cup 2022 អ្នកចាំទី Guerra មិនអាចទប់ទល់បានយូរឡើយ។ នៅនាទីទី 80 Messi ស៊ុតបាល់ពិន័យចំបង្គោលទី តែលើកនេះ Thiago Almada មានមុខទាន់ពេល ហើយក៏ទាត់បញ្ចូលទីបានសម្រេច ជួយឱ្យអាហ្សង់ទីននាំមុខ 1-0។ ប្រហែល 10 នាទីក្រោយមក Messi ក៏រកបានមួយគ្រាប់នៅពេលទាត់បាល់ពិន័យចំគោលដៅបានល្អ ហើយជួយឱ្យអាហ្សង់ទីននាំមុខ 2-0។

https://www.youtube.com/watch?v=4MwYpjlGKhs

លទ្ធផល 2-0 ត្រូវបានរក្សារហូតដល់ចប់ការប្រកួត។ ចុងក្រោយ អាហ្សង់ទីនឈ្នះប៉ាណាម៉ា 2-0 និងបន្តសប្បាយរីករាយក្រោយពីដណ្ដើមបានពានរង្វាន់ជើងឯកបាល់ទាត់ពិភពលោកឆ្នាំ 2022៕

March 24, 2023

បេតុងឆ្លាតវៃពហុមុខងារអាចផលិតអគ្គិសនីដោយស្វ័យប្រវត្ត

(សហរដ្ឋអាម៉េរិក) – ក្រុមវិស្វករនៅសាកលវិទ្យាល័យ Pittsburgh (Pitt) អភិវឌ្ឍបេតុងឆ្លាតវៃស្រាលពហុមុខងារមួយប្រភេទដែលអាចកែសម្រួលលក្ខណៈពិសេសដើម្បីតម្រូវទៅតាមសំណង់នានា និងផលិតអគ្គិសនីដោយខ្លួនឯង។

វត្ថុធាតុដ៏អស្ចារ្យថ្មីនេះត្រូវបានបង្កើតឡើងពីប្រព័ន្ធ auxetic polymer ដែលត្រូវបានបំពេញបន្ថែមនៅខាងក្នុងម៉ាទ្រីសស៊ីម៉ង់ចម្លងចរន្តអគ្គិសនី។ ស៊ីម៉ង់ចម្លងចរន្តអគ្គិសនីដែលត្រូវបានពង្រឹងដោយម្សៅ graphite បង្កើតបានជាអេឡិចត្រូត។ ការជំរុញយន្តការមេកានិកអាចនាំឱ្យមានចរន្តអគ្គិសនីនៅក្នុងចន្លោះនៃបណ្ដាស្រទាប់ខាងក្នុងបេតុង។

បេតុងដែលត្រូវបានបង្កើតឡើងដោយក្រុមអ្នកស្រាវជ្រាវរបស់ Amir Alavi ជំនួយការសាស្ត្រាចារ្យវិស្វកម្មសំណង់ស៊ីវិល និងបរិស្ថាននៅ Pitt មិនអាចផលិតអគ្គិសនីច្រើនគ្រប់គ្រាន់ដើម្បីបញ្ចូលទៅក្នុងបណ្ដាញអគ្គិសនី ប៉ុន្តែអាចប្រើប្រាស់ដើម្បីតាមដានការខូចខាតផ្នែកខាងក្នុងរបស់សំណង់បេតុង។ លទ្ធផលនៃការស្រាវជ្រាវនេះត្រូវបានចុះផ្សាយលើទស្សនាវដ្ដី Advanced Materials និងត្រូវបានដកស្រង់ និងរាយការណ៍កាលពីថ្ងៃទី 22 មីនាដោយគេហទំព័រ New Atlas។

ក្រុមអ្នកស្រាវជ្រាវសង្ឃឹមថា ប្រភេទបេតុងពហុមុខងារថ្មីនេះអាចនឹងត្រូវបានប្រើប្រាស់ទូលំទូលាយនៅក្នុងហេដ្ឋារចនាសម្ព័ន្ធនានា។ វត្ថុធាតុនេះក៏អាចផ្ដល់អគ្គិសនីដល់ឈីបដែលភ្ជាប់ក្នុងផ្លូវល្បឿនលឿនដើម្បីជួយដល់ប្រព័ន្ធបើកបរស្វ័យប្រវត្តរបស់រថយន្ត នាពេលអនាគត។ ប៉ុន្តែ បច្ចុប្បន្នក្រុមអ្នកវិទ្យាសាស្ត្រកំពុងរកវិធីដើម្បីបន្តអភិវឌ្ឍបេតុងនេះឱ្យដល់ចំណុចដែលពួកគេចង់បាន៕

March 24, 2023

ក្រុមហ៊ុនចិនចាប់ផ្ដើមផលិតរថយន្តអគ្គិសនីលំដាប់ប្រណិត Aion Hyper SSR

បណ្ដារូបភាពដែលត្រូវបានលួចថតកាលពីពេលថ្មីៗនេះបង្ហាញថា កំពូលរថយន្តអគ្គិសនី Aion Hyper SSR ដំបូងរបស់ចិន កំពុងស្ថិតក្នុងរោងចក្ររបស់ក្រុមហ៊ុនផលិតរថយន្ត Guangzhou Automobile (GAC)។

Aion Hyper SSR គឺជារថយន្តអគ្គិសនីលំដាប់ប្រណិតដែលត្រូវបានផលិតទ្រង់ទ្រាយធំដំបូងរបស់ក្រុមហ៊ុនចិន។ យោងតាមទំព័រ IT Home រថយន្ត Aion Hyper SSR ត្រូវបានផលិតឡើងបែបសិប្បកម្ម ព្រោះមិនប្រើប្រាស់រ៉ូបូតនៅពេលដំឡើង។ រថយន្តនេះមាន 6 ពណ៌គឺ ទឹកក្រូច ប្រាក់ ខៀវ បៃតង និងលឿង។ GAC ឱ្យដឹងថា ការប្រគល់ Aion Hyper SSR ដល់អតិថិជននឹងធ្វើឡើងចាប់ពីខែតុលា 2023។

Aion Hyper SSR បច្ចុប្បន្នទទួលការបញ្ជាទិញនៅប្រទេសចិនក្នុងតម្លៃ 187,000 ដុល្លារអាម៉េរិកសម្រាប់កំណែស្ដង់ដា ខណៈកំណែខ្ពស់ជាងនេះមានតម្លៃ 244,000 ដុល្លារ។

រថយន្ត Aion Hyper SSR ត្រូវបានបង្ហាញតាំងពីខែកញ្ញា 2022 ហើយត្រូវបាន GAC ហៅថា «រថយន្តប្រណិតដំបូងរបស់ប្រទេសចិន ព្រោះត្រូវបានរចនា អភិវឌ្ឍ និងផលិត 100% ដោយជនជាតិចិននៅប្រទេសចិន»៕

March 23, 2023

«ព្រះនាងទេពមច្ឆា» ត្រូវអ្នកលេងបណ្ដាញសង្គម «សម្លុត» រឿងសម្បុរស្បែក

ការណ៍ដែល Disney ប្រកាសបង្ហាញតារាសម្ដែងស្បែកខ្មៅ Halle Bailey តើជាតួអង្គព្រះនាង Ariel ក្នុងភាពយន្តរឿង ព្រះនាងទេពមច្ឆា កំណែ live-action (ភាពយន្តសម្ដែងដោយមនុស្ស) ទទួលបានប្រតិកម្មមិនល្អពីអ្នកលេងបណ្ដាញសង្គមនៅលើពិភពលោក។

នៅលើវេទិកានានា ទស្សនិកជនយល់ថា ផលិតកម្មភាពយន្តមិនគោរពគោលការណ៍ និងបានបំផ្លាញនិមិត្តរូបរបស់ព្រះនាង Ariel នៅក្នុងខ្សែភាពយន្តជីវចលឆ្នាំ 1989។ Hashtag #notmyariel (មិនមែនជា Ariel របស់ខ្ញុំ) បានក្លាយជាពាក្យពេញនិយមនៅលើបណ្ដាញសង្គមនានា។

Trailer របស់ភាពយន្តនេះត្រូវបានគេចុច dislike (មិនចូលចិត្ត) ចំនួន 1.5 លានលើក អមនឹងការបញ្ចេញមតិមិនល្អជាច្រើនសំដៅលើពណ៌សម្បុរស្បែករបស់តួអង្គ ធ្វើឱ្យ YouTube ត្រូវបង្ខំចិត្តលាក់ dislike និងបិទមុខងារបញ្ចេញមតិ។

តួអង្គព្រះនាង Ariel ក្នុងភាពយន្តឆ្នាំ 2023

យោងទៅលើប្រការអ្វីខ្លះបានជាមានទស្សនិកជនយ៉ាងច្រើនប្រតិកម្មមិនល្អទៅនឹងភាពយន្តដែលមិនទាន់ចាក់បញ្ចាំងមួយនេះ?

«ព្រះនាងទេពមច្ឆាគឺជារឿងព្រេងដែលនិពន្ធដោយជនជាតិដាណឺម៉ាក ដូច្នេះព្រះនាង Ariel ត្រូវតែជាមនុស្សមានសម្បុរស្បែកពណ៌ស» នេះគឺជាមូលហេតុមួយក្នុងចំណោមមូលហេតុជាច្រើនដែលត្រូវបានអ្នករិះគន់លើកយកមកអះអាង។ អ្នកខ្លះក៏និយាយថា វាជារឿងដែលក្បត់នឹងយុវវ័យរបស់មនុស្សមួយចំនួនដែលបានទស្សនាភាពយន្តជីវចលនេះកាលពីអំឡុងក្រោយឆ្នាំ 1989។ ជាងនេះ អ្នកខ្លះក៏ថា អ្នករស់នៅក្នុងតំបន់ទឹកជ្រៅនឹងមិនមានសម្បុរស្បែកខ្មៅ។

តួអង្គព្រះនាង Ariel ក្នុងភាពយន្តឆ្នាំ 1989

ទោះជាយ៉ាងណាក៏ដោយ មានមតិមួយចំនួនយល់ថា នេះគ្រាន់តែជាភាពយន្ត និងជាការប្រឌិតឡើងប៉ុណ្ណោះ មិនគួរមានការរិះគន់ទៅលើពណ៌សម្បុរស្បែកនោះឡើយ៕

March 23, 2023

រ៉ុក្កែតបោះពុម្ព 3D ដំបូងគេលើពិភពលោក បាញ់សាកល្បង «ជិតបានជោគជ័យ»

រ៉ុក្កែត Terran 1 របស់ក្រុមហ៊ុនអាម៉េរិក Relativity Space ហោះឡើងពីមូលដ្ឋានទ័ពអវកាស Cape Canaveral រដ្ឋ Florida កាលពីម៉ោង 07 និង 25 នាទី ថ្ងៃទី 23 មីនា (ម៉ោងនៅកម្ពុជា)។

បេសកកម្មដំបូងរបស់ Terran 1 មានឈ្មោះថា «Good Luck, Have Fun» (GLHF)។ រ៉ុក្កែតនេះ ដំបូងឡើយដំណើរការល្អ។ កំណាត់ ឬជាន់ទីមួយ និងទីពីរបានផ្ដាច់ចេញដោយជោគជ័យ។ ក៏ប៉ុន្តែ បន្ទាប់ពីហោះឡើងបានប្រហែល 3 នាទី បញ្ហាក៏បានកើតឡើង ធ្វើឱ្យជាន់លើគេបង្អស់មិនអាចហោះដល់គន្លងគោចរដូចការគ្រោងទុក។

Relativity Space ត្រូវបានបង្កើតឡើងកាលពីឆ្នាំ 2016 ក្នុងបំណងនាំយកទំនិញឡើងទៅកាន់គោលដៅនៅទីអវកាសដោយប្រើប្រាស់រ៉ុក្កែត Terran 1។ រ៉ុក្កែតនេះមានកម្ពស់ 33 ម៉ែត្រ អាចដឹកទំនិញបាន 1,250 គីឡូក្រាមឡើងទៅកាន់គន្លងគោចរកម្រិតទាបរបស់ផែនដី (LEO)។ ក្រុមហ៊ុននេះកំពុងផ្ដល់សេវាកម្មក្នុងតម្លៃ 12 លានដុល្លារអាម៉េរិកសម្រាប់ការបាញ់បង្ហោះ Terran 1 មួយជើង។

រ៉ុក្កែត Terran 1 របស់ក្រុមហ៊ុនអាម៉េរិក Relativity Space ហោះឡើងពីមូលដ្ឋានទ័ពអវកាស Cape Canaveral រដ្ឋ Florida កាលពីម៉ោង 07 និង 25 នាទី ថ្ងៃទី 23 មីនា

ក៏ប៉ុន្តែ ក្នុងបេសកកម្ម GLHF រ៉ុក្កែត Terran 1 មិនមានផ្ទុកទំនិញនោះទេ ដោយវាគ្រាន់តែដឹកចិញ្ចៀនមួយវង់ដែលគេបោះពុម្ព 3D។ រ៉ុក្កែតនេះមានម៉ាស៊ីន Aeon-1 ចំនួន 9 គ្រឿងនៅជាន់ក្រោមបង្អស់៕

March 23, 2023

ពានរង្វាន់ជើងឯកបាល់ទាត់បារាំង 2023 នឹងធ្វើឡើងនៅប្រទេសថៃ

ស្ថាប័នគ្រប់គ្រងបណ្ដាពានរង្វាន់បាល់ទាត់អាជីពបារាំង LFP (Ligue de Football Professionnel) សម្រេចចិត្តជ្រើសរើសទឹកដីថៃធ្វើជាកន្លែងសម្រាប់បើកការប្រកួតរដូវកាល 2023-2024 របស់ពានរង្វាន់ជើងឯកបាល់ទាត់បារាំង (Trophée des Champions)។

ការប្រកួតដណ្ដើមពានរង្វាន់ជើងឯកបាល់ទាត់បារាំង 2023 គ្រោងនឹងធ្វើឡើងនៅថ្ងៃទី 05 សីហា 2023 រវាងក្រុមម្ចាស់ជើងឯក Ligue 1 និងម្ចាស់ជើងឯកពានរង្វាន់បាល់ទាត់បារាំងរដូវកាល 2022-2023។ បច្ចុប្បន្ន ក្លឹប PSG កំពុងនាំមុខពូល Ligue 1 ដោយរកបាន 66 ពិន្ទុ ក្រោយពីបានចូលរួម 28 ប្រកួត ច្រើនជាងក្រុមលេខពីរ Mareille 7 ពិន្ទុ។ បើទោះជានៅសល់ដប់ជុំទៀត ប៉ុន្តែ PSG ត្រូវបានគេមើលឃើញថា ទំនងនឹងក្លាយជាម្ចាស់ជើងឯកពានរង្វាន់ Trophée des champions 2023។

ពេលនោះ ទស្សនិកជននៅប្រទេសថៃ ក៏ដូចជានៅអាស៊ីអាគ្នេយ៍មានឱកាសបានទស្សនាការប្រកួតដែលមានវត្តមានរបស់កំពូលតារាបាល់ទាត់ល្បីៗ មានជាអាទិ៍ Kylian Mbappe, Neymar រួមទាំង Messi ផងដែរ បើសិន M10 ពន្យារសុពលភាពនៃកិច្ចព្រមព្រៀងជាមួយក្លឹប PGS ដែលនឹងត្រូវបញ្ចប់នៅរដូវក្ដៅនេះ។

ពានរង្វាន់ជើងឯកបាល់ទាត់បារាំង 2023 នឹងស្វែងរកម្ចាស់ជើងឯកនៅថ្ងៃទី 29 មេសា 2023។ ពានរង្វាន់នេះបានចូលដល់វគ្គពាក់កណ្ដាលផ្ដាច់ព្រ័ត្រដោយមានការប្រកួតពីរគូគឺ Nantes – Lyon និង Annecy – Toulouse។

PSG បានក្លាយជាជើងឯក Trophée des Champions 2022 ពេលបានផ្ដួល Nantes ដោយលទ្ធផល 4-0

យោងតាមទំព័រ L’Équipe ដើមឡើយស្ថាប័ន LFP ចង់នាំយកការប្រកួតដណ្ដើមពានរង្វាន់ជើងឯកបាល់ទាត់បារាំង 2023 ទៅធ្វើនៅ Miami សហរដ្ឋអាម៉េរិក ប៉ុន្តែក្រោយមកក៏សម្រេចចិត្តជ្រើសរើសទឹកដីមួយនៅអាស៊ី។ បន្ទាប់មក LFP ក៏បន្តគិតដល់ប្រទេសជប៉ុនជាគោលដៅសម្រាប់ការប្រកួតនេះ ប៉ុន្តែចុងក្រោយក៏សម្រេចចិត្តប្រគល់ឱកាសនេះទៅឱ្យប្រទេសថៃ។

ពានរង្វាន់ជើងឯកបាល់ទាត់បារាំង (Trophée des Champions) ត្រូវបានបង្កើតឡើងកាលពីឆ្នាំ 1949 និងធ្លាប់បានធ្វើឡើង 48 លើក។ PSG ដណ្ដើមបានពានរង្វាន់នេះចំនួន 11 លើក ដែលច្រើនជាងគេបង្អស់ ក្នុងនោះពួកគេបានក្លាយជាជើងឯក 8 ឆ្នាំបន្តបន្ទាប់ ចាប់ពី 2013 ដល់ 2020។ ក្លឹបបាល់ទាត់ប៉ារីសត្រូវ Lille ដណ្ដើមបានតំណែងនេះនៅឆ្នាំ 2021 ក្នុងលទ្ធផល 0-1 តែក៏យកមកវិញបាននៅឆ្នាំ 2022 ពេលបានផ្ដួល Nantes 4-0។

ឆ្នាំ 2009 ពានរង្វាន់ជើងឯកបាល់ទាត់បារាំង ត្រូវបានធ្វើឡើងនៅបរទេសជាលើកដំបូង ដោយបានរៀបចំការប្រកួតនៅប្រទេសកាណាដា ជាទឹកដីដែលក្លឹប Bordeaux បានក្លាយជាជើងឯក នៅពេលឈ្នះ Guingamp 2-0។ ក្រោយមក Trophée des Champions ក៏ត្រូវបានធ្វើឡើងនៅទុយនេស៊ី ម៉ារ៉ុក សហរដ្ឋអាម៉េរិក ហ្កាបុង ចិន អូទ្រីស និងអ៊ីស្រាអែល៕

March 23, 2023

តារាចម្រៀងនិម្មិត Hatsune Miku រកប្រាក់ចំណូលបានរាប់សិបលានដុល្លារអាម៉េរិក/ឆ្នាំ

Hatsune Miku ដែលជាតារាចម្រៀងនិម្មិតលំដាប់កំពូលរបស់ពិភពលោក ធ្លាប់បើកឆាកប្រគំតន្ត្រីរបស់ Lady Gaga និងធ្វើជាតារាម៉ូដែលឱ្យ Louis Vuitton រកប្រាក់ចំណូលបានជាង 35 លានដុល្លារអាម៉េរិកជារៀងរាល់ឆ្នាំ។

ទំព័របណ្ដាញសង្គមរបស់ Hatsune Miku កាលពីថ្ងៃទី 17 មីនា 2023 បានប្រកាសថា នាងនឹងប្រារព្ធកម្មវិធីប្រគំតន្ត្រីតាមអនឡាញនៅរដូវស្លឹកឈើជ្រុះឆ្នាំនេះ ក្នុងនោះក៏នឹងមានបទ Imaginary Love Story រួមនឹងផលិតករចម្រៀងជនជាតិអាម៉េរិក Synthion។

ទំព័រ Asagei អះអាងថា ក្នុងរយៈពេល 16 ឆ្នាំក្រោយការបង្ហាញខ្លួន Hatsune Miku «នៅតែជាក្មេងស្រីជំទង់ដដែល» និងនៅមានភាពទាក់ទាញដូចថ្ងៃដំបូង។ មិនមែនជាតារាចម្រៀងនិម្មិតដំបូងគេ ប៉ុន្តែ Miku គឺជាឈ្មោះដែលលេចធ្លោជាងគេ។ នាងគឺជាផលិតផលបច្ចេកវិទ្យារបស់ Crypton Future Media ដែលត្រូវបានបង្កើតឡើងកាលពីឆ្នាំ 2007។ Hatsune Miku ត្រូវបានប្រឌិតឡើងជាក្មេងស្រីជំទង់អាយុ 16 ឆ្នាំ មានកម្ពស់ 1.58 ម៉ែត្រ និងទម្ងន់ 42 គីឡូក្រាម ព្រមទាំងមានភ្នែកមូលៗ និងមានសក់ពណ៌ខៀវខ្ចីវែងអន្លាយ។ សំឡេងច្រៀងរបស់នាងត្រូវបានក្រុមហ៊ុនអភិវឌ្ឍឡើយដោយយោងទៅតាមសំឡេងរបស់តារាចម្រៀង Saki Fujita រួមផ្សំជាមួយនឹងកម្មវិធីសំឡេង Vocaldoid។

Hatsune Miku ទទួលបានការសាទរយ៉ាងខ្លាំង និងមានវត្តមាននៅក្នុងបណ្ដាភាពយន្តជីវចល និងជួយឱ្យក្រុមហ៊ុនផលិតរបស់លេងនានារកប្រាក់ចំណូលបានច្រើនជាងមុន។ យោងតាម Itmedia គិតត្រឹមថ្ងៃទី 12 កញ្ញា 2007 Miku រកចំណូលបាន 57.5 លានយេន (439,784 ដុល្លារអាម៉េរិក) និងបានក្លាយជាតារាចម្រៀងនិម្មិតដែលមានតម្លៃខ្លួនខ្ពស់ជាងគេលើលោកនាសម័យនោះ។ ចាប់ពីខែសីហា 2008 ដល់ខែមីនា 2012 Hatsune Miku រកបានជាង 10 ពាន់លាន (10,000,000,000) យេន (120 លានដុល្លារអាម៉េរិក ឆ្នាំ 2012) នេះបើតាមវិទ្យាស្ថានស្រាវជ្រាវ Nomura។

មកដល់បច្ចុប្បន្ន តារាចម្រៀងនិម្មិត Hatsune Miku មានចម្រៀងជាង 100,000 បទនៅក្នុងដៃ ក្នុងនោះមានតាំងពីចង្វាក់ ប៉ប់ និង EDM។ល។ Hatsune Miku ធ្វើសកម្មភាពជាច្រើនក្នុងវិស័យសិល្បៈ រួមមាន ច្រៀងលើឆាកតន្ត្រីអនឡាញ ច្រៀងលើឆាកផ្ទាល់ លក់ថាសចម្រៀង និងធ្វើជាតំណាងផលិតផលជាដើម។ នាងក៏ចូលរួមក្នុងវិស័យបង្ហាញម៉ូដសម្លៀកបំពាក់ផងដែរ។

យោងតាម Paper នាង Hatsune Miku មានអ្នកគាំទ្ររាប់សិបលាននាក់នៅទូទាំងពិភពលោក និងរកចំណូលបានប្រហែល 35.35 លានដុល្លារជារៀងរាល់ឆ្នាំ ស្មើនឹងប្រាក់ចំណូលរបស់កំពូលតារាចម្រៀងមួយចំនួននៅប្រទេសចិន៕

March 23, 2023

ក្រុមហ៊ុនរថយន្តអគ្គិសនីចិន Neta នាំចេញ 3,600 គ្រឿងទៅកាន់ទីផ្សារថៃ

ក្រុមហ៊ុនផលិតរថយន្តអគ្គិសនីចិន Neta Automobile កំពុងនាំចេញរថយន្តអគ្គិសនីរាប់ពាន់គ្រឿងទៅកាន់ទីផ្សារថៃ នៅក្នុងការប្រឹងប្រែងវាយលុកតំបន់អាស៊ីអាគ្នេយ៍។

នៅថ្ងៃទី 21 មីនា រថយន្តអគ្គិសនី Neta V ចំនួន 3,600 គ្រឿង ត្រូវបានដឹកជញ្ជូនពីកំពង់ផែ Nansha របស់ប្រទេសចិន ទៅកាន់ប្រទេសថៃ។ នេះគឺជាទំនិញនាំចេញធំបំផុតសម្រាប់ក្រុមហ៊ុនផលិតរថយន្តមួយដែលបានបង្កើតឡើងនៅប្រទេសចិន។

ក្រុមហ៊ុន Neta ឱ្យដឹងថា រថយន្ត Neta V ជាង 2,000 គ្រឿងត្រូវបានលក់នៅប្រទេសថៃ និងឈរលំដាប់ទីពីរក្នុងចំណោមម៉ូដែលរថយន្តអគ្គិសនីដែលបានចុះឈ្មោះផ្លាកលេខក្នុងពីរខែជាប់ៗគ្នានៅប្រទេសនេះ។

Neta បានបង្ហាញរថយន្តអគ្គិសនី Neta V ចង្កូតស្ដាំនៅប្រទេសថៃ កាលពីថ្ងៃទី 24 សីហា 2022 ហើយនេះគឺជាម៉ូដែលដំបូងរបស់ពួកគេដែលត្រូវបានដាក់លក់ក្នុងទីផ្សារឡានចង្កូតស្ដាំមួយនេះ។

ក្រុមហ៊ុននេះបានឱ្យដឹងថា ពួកគេមានហាងលក់រថយន្តដែលទទួលបានសិទ្ធិចែកចាយចំនួន 30 នៅទូទាំងប្រទេសថៃ គិតត្រឹមចុងឆ្នាំ 2022។ រថយន្តអគ្គិសនីរបស់ Neta ពីរម៉ូដែលគឺ Neta U និង Neta V មានវត្តមានច្រើននៅអាស៊ីអាគ្នេយ៍ អាស៊ីខាងត្បូង និងមជ្ឈិមបូព៌ា។ ក្រុមហ៊ុន Neta ក៏មានការិយាល័យតំណាងមួយនៅអឺរ៉ុបផងដែរ។

នេះគឺជាទំនិញនាំចេញធំបំផុតសម្រាប់ក្រុមហ៊ុនផលិតរថយន្តមួយដែលបានបង្កើតឡើងនៅប្រទេសចិន

កាលពីថ្ងៃទី 10 មីនា Neta បានសម្ពោធបើកការដ្ឋានសាងសង់រោងចក្រមួយនៅប្រទេសថៃ ដើម្បីផលិតរថយន្តអគ្គិសនីសម្រាប់ការនាំចេញទៅកាន់បណ្ដាប្រទេសនៅអាស៊ីអាគ្នេយ៍។ តាមគម្រោង រោងចក្រនេះនឹងចាប់ផ្ដើមការផលិតនៅដើមឆ្នាំ 2024 ហើយគ្រោងនឹងផលិតបាន 20,000 គ្រឿងជារៀងរាល់ឆ្នាំ៕

March 23, 2023

Ronaldo ជិតមានឱកាសបំបែកកំណត់ត្រាស្ដីពីចំនួនប្រកួតលក្ខណៈអន្តរជាតិ

(ព័រទុយហ្កាល់) – Cristiano Ronaldo នឹងក្ដោបក្ដាប់តំណែងកីឡាករដែលប្រកួតលក្ខណៈអន្តរជាតិបានច្រើនជាងគេបំផុត បើសិនទាត់ឱ្យព័រទុយហ្កាល់ក្នុងប្រកួតដំបូងនៅវគ្គជម្រុះ Euro 2024 នាថ្ងៃនេះ។

Ronaldo លេងឱ្យក្រុមជម្រើសជាតិព័រទុយហ្កាល់បាន 196 ប្រកួត។ ខ្សែប្រយុទ្ធវ័យ 38 ឆ្នាំរូបនេះ និងកីឡាករជម្រើសជាតិកូវ៉ែត Badr Al-Mutawa គឺជាកីឡាករដែលបានប្រកួតលក្ខណៈអន្តរជាតិច្រើនជាងគេបំផុត។ បើសិនជាបានចូលរួមលេងក្នុងការប្រកួតរវាងព័រទុយហ្កាល់ និង លិចតិនស្តាញ (Liechtenstein) នៅថ្ងៃទី 23 មីនានេះ Ronaldo នឹងបំបែកកំណត់ត្រាស្ដីពី «កីឡាករប្រកួតលក្ខណៈអន្តរជាតិបានច្រើនជាងគេបំផុត»។

ការប៉ះនឹងលិចតិនស្តាញក៏ជាការប្រកួតដំបូងរបស់ព័រទុយហ្កាល់នៅវគ្គជម្រុះ Euro 2024។ បីថ្ងៃក្រោយមកទៀត ក្នុងជើងទីពីរ ព័រទុយហ្កាល់នឹងធ្វើជាភ្ញៀវនៅលើវាលស្មៅរបស់គូប្រកួតលំដាប់ «ល្អិត» មួយផ្សេងទៀត គឺ លុចសំបួ។

Ronaldo បង្ហាញខ្លួនក្នុងក្រុមជម្រើសជាតិកាលពីអាយុ 18 ឆ្នាំ នៅពេលចូលទាត់ជំនួស Luis Figo ក្នុងការប្រកួតមិត្តភាពជាមួយក្រុមរបស់កាហ្សាក់ស្ថាន។ ក្នុងការប្រកួតលើកទី 8 ដែលប៉ះនឹងក្រិក Ronaldo ស៊ុតបញ្ចូលទីជាលើកដំបូងសម្រាប់ការប្រកួតលក្ខណៈអន្តរជាតិ។

កាលពីខែកញ្ញា 2022 បន្ទាប់ពីស៊ុតបញ្ចូលទីរបស់អៀរឡង់បានពីរគ្រាប់ Ronaldo ក៏បានយកឈ្នះលើ Ali Daei ដើម្បីក្លាយជាកីឡាករដែលទាត់បញ្ចូលទីបានច្រើនជាងគេបំផុតលើឆាកអន្តរជាតិ។ CR7 កំពុងកាន់កាប់ 118 គ្រាប់សម្រាប់ក្រុមជម្រើសជាតិ ច្រើនជាងឆ្ងាយធៀបនឹង 109 គ្រាប់របស់ Ali Daei អតីតខ្សែប្រយុទ្ធរបស់អ៊ីរ៉ាក់។

Al-Mutawa បង្កើតបានកំណត់ត្រា 196 ប្រកួតលក្ខណៈអន្តរជាតិនៅក្នុងការប្រកួតដែលកូវ៉ែតចាញ់ហ្ស៊កដានី 0-3 នៅវគ្គជម្រុះ Asian Cup 2023 កាលពីខែមិថុនា 2022។ ខ្សែប្រយុទ្ធវ័យ 37 ឆ្នាំរូបនេះ រកបាន 56 គ្រាប់ជូនក្រុមជម្រើសជាតិកូវ៉ែត។

ត្រលប់មកកាន់រឿង Ronaldo វិញ គ្រូបង្វឹក Roberto Martinez របស់ព័រទុយហ្កាល់ នៅតែចាត់ទុក Ronaldo ថាជាផ្នែកមួយនៃគម្រោងឆ្ពោះទៅកាន់ Euro 2024 និង World Cup 2026។ ប្រការនេះមានន័យថា CR7 មានឱកាសបំបែកកំណត់ត្រាខាងលើ។ កាលពីថ្ងៃទី 20 មីនា 2023 Ronaldo ក៏បានត្រលប់ទៅកាន់ក្រុមជម្រើសជាតិព័រទុយហ្កាល់ហើយដែរ៕

March 23, 2023

Ronaldo ទទួលបានពានរង្វាន់បន្ថែមទៀតនៅ Saudi League

(អារ៉ាប៊ីសាអូឌីត) – ការស៊ុតបាល់ពិន័យរបស់ Cristiano Rolando ពីចំណុច 30 ម៉ែត្រ ចូលទី Abaha ត្រូវបានជ្រើសរើសជាគ្រាប់បាល់ស្អាតបំផុតនៅវគ្គ 21 របស់ពានរង្វាន់បាល់ទាត់ Saudi League កាលពីថ្ងៃទី 21 មីនា 2023។

គ្រាប់បាល់ខាងលើរបស់ CR7 ទទួលបានសំឡេងឆ្នោតគាំទ្រ 54.6% នៅលើគេហទំព័ររបស់ Saudi League ខ្ពស់ជាងគេបង្អស់នៅក្នុងតារាងជ្រើសរើស។ ខ្សែបម្រើ Igor Coronado (Al Ittihad) ឈរលំដាប់លេខពីរដោយទទួលបានសំឡេងគាំទ្រ 30% ខណៈដែលគ្រាប់បាល់របស់ Salem Al-Dawsari (Al Hilal) ទទួលបាន 15.4% ត្រូវជាប់លេខបី។

នេះគឺជាគ្រាប់បាល់ទី 9 របស់ Ronaldo ក្រោយ 8 ប្រកួតនៅ Saudi League និងជាគ្រាប់បាល់ទីពីរដែលជួយឱ្យ CR7 ទទួលបានពានរង្វាន់គ្រាប់បាល់ស្អាតបំផុតនៅវគ្គដំបូង។ លើកដំបូងដែល CR7 ធ្វើបានដូច្នេះគឺនៅគ្រាប់បាល់ដែលជួយឱ្យ Al Nassr នាំមុខ Damac 2-0 នៅវគ្គ 18 កាលពីព្រលប់ថ្ងៃទី 25 កុម្ភៈ ដោយទទួលបានសំឡេងគាំទ្រ 78% នៅក្នុងការបោះឆ្នោតជ្រើសរើស។

គ្រាប់បាល់ទី 9 របស់ Ronaldo កាលពីព្រលប់ថ្ងៃទី 18 មីនា បានជួយឱ្យ Al Nassr ស្មើ Abha 1-1 មុនពេលខ្សែប្រយុទ្ធ Anderson Talisca ស៊ុតចូលមួយគ្រាប់ ជួយឱ្យ Al Nassr ឈ្នះ 2-1។

ចាប់តាំងពីបានមកលេងឱ្យ Al Nassr កំពូលតារាបាល់ទាត់ព័រទុយហ្កាល់បានទទួលពានរង្វាន់បុគ្គលជាច្រើន មានដូចជា «កីឡាករឆ្នើមបំផុត» នៅវគ្គ 16 និង 18 រួមនឹងប្រចាំខែកុម្ភៈ នៅ Saudi League។ Ronaldo ក៏ត្រូវបានសហព័ន្ធបាល់ទាត់អាស៊ី (AFC) ជ្រើសរើសជាកីឡាករឆ្នើមបំផុតក្នុងខែកុម្ភៈប្រចាំតំបន់អាស៊ីខាងលិច កាលពីថ្ងៃទី 06 មីនា។ សហព័ន្ធបាល់ទាត់ពិភពលោក (FIFA) ក៏ធ្លាប់បានសរសើរ Ronaldo ថា «អាយុគ្រាន់តែជាតួលេខ» បន្ទាប់ពីកីឡាករវ័យ 38 ឆ្នាំរូបនេះស៊ុតបញ្ចូលទីជាបន្តបន្ទាប់ឱ្យក្លឹប Al Nassr។

បច្ចុប្បន្ន CR7 កំពុងឈរលំដាប់ទី 6 ក្នុងបញ្ជីចំណាត់ថ្នាក់កីឡាករដែលរកបានគ្រាប់បាល់ច្រើនជាងគេនៅ Saudi League តិចជាងលំដាប់លេខមួយរបស់ Hamdallah (ក្លឹប Al-Ittihad) ចំនួន 6 គ្រាប់។ រដូវកាលនេះនៅសល់ 9 វគ្គទៀត ដូច្នេះ Ronaldo នៅមានឱកាសនាំមុខគេនាពេលខាងមុខ។ CR7 ធ្លាប់បានក្លាយជាស្ដេចកម្ទេចទីនៅ លីគកំពូលអង់គ្លេស (English Premier League) រដូវកាល 2007-2008, La Liga 2010-2011, 2013-2014, 2014-2015, និង Serie A 2020-2021។ ក្រៅពីនេះ គាត់ក៏កាន់កាប់កំណត់ត្រាស្ដេចកម្ទេច ទី Champions League ចំនួន 7 លើកផងដែរ។

https://www.youtube.com/watch?v=C7ZCBNdoh1M

គ្រាប់បាល់ទី 9 របស់ Ronaldo កាលពីព្រលប់ថ្ងៃទី 18 មីនា បានជួយឱ្យ Al Nassr ស្មើ Abha 1-1 មុនពេលខ្សែប្រយុទ្ធ Anderson Talisca ស៊ុតចូលមួយគ្រាប់ ជួយឱ្យ Al Nassr ឈ្នះ 2-1

នៅក្នុងការប្រកួតបន្ទាប់ ក្លឹប Al Nassr របស់ Ronaldo នឹងធ្វើជាភ្ញៀវនៅឯកីឡដ្ឋានរបស់ក្រុមបាតពូល Al Adalah នាព្រលប់ថ្ងៃទី 04 មេសា ក្នុងវគ្គ 21 របស់ Saudi League៕

March 22, 2023

Category: សង្គម និងសេដ្ឋកិច្ច