សង្គម និងសេដ្ឋកិច្ច - La Reine Media

ទីតាំងមាត់ច្រាំងជិតផ្សាររាត្រីនឹងក្លាយជាមជ្ឈមណ្ឌលពាណិជ្ជកម្មមិនចាញ់សិង្ហបុរី

តំបន់មាត់ទន្លេជិតផ្សាររាត្រីដែលបច្ចុប្បន្នជាកម្មសិទ្ធិរបស់កំពង់ផែស្វយ័តរាជធានីភ្នំពេញ ដែលមានឃ្លាំងសំណង់ និងអគារចាស់ៗសម្រាប់ស្តុកទំនិញនឹងក្លាយទៅជាតំបន់ដែលមានសំណង់អគារពាណិជ្ជកម្មចម្រុះខ្ពស់ៗល្អផ្តាច់គេក្នុងរាជធានីភ្នំពេញ និងមិនចាញ់អគារពាណិជ្ជកម្មខ្ពស់ៗនៅជាប់មាត់សមុទ្រក្នុងប្រទេសសិង្ហបុរីនោះទេ ខណៈដែលនិន្នាការសំណង់នៅកម្ពុជា ជាពិសេសក្នុងទីក្រុងភ្នំពេញ និងបរិមណ្ឌលនៅតែបន្តរីកលូតលាស់ឥតឈប់ឈរ។

មជ្ឈមណ្ឌលពាណិជ្ជកម្មចម្រុះនេះនឹងសាងសង់នៅពេលឆាប់ៗដោយក្រុមហ៊ុន ចៀន ឈឹង ថៃ គ្រុបជាបុត្រសម្ព័ន្ធរបស់ក្រុមហ៊ុន Yuetai Group ដែលជាក្រុមហ៊ុនលំដាប់យក្សរបស់ចិននៅលើដីដែលជាអតីតកំពង់ផែស្វយ័តភ្នំពេញ បន្ទាប់ពីបានចុះហត្ថលេខាលើកិច្ចសន្យាស្ដីពីការជួលដីរបស់កំពង់ផែស្វយ័តភ្នំពេញ ចាប់ពីគល់ស្ពានជ្រោយចង្វារមកដល់ផ្សាររាត្រី ដើម្បីអភិវឌ្ឍជា “មជ្ឈមណ្ឌលពាណិជ្ជកម្មចម្រុះ The City Gate” ដែលមានតម្លៃជាង16ពាន់លានដុល្លារសហរដ្ឋអាមេរិក។

តាមសេចក្ដីប្រកាសព័ត៌មានរបស់កំពង់ផែស្វយ័តភ្នំពេញបានបញ្ជាក់ថា កិច្ចសន្យានេះត្រូវបានចុះហត្ថលេខាកាលពីថ្ងៃទី29 ខែមិថុនា ឆ្នាំ2018 ដែលមានកំណត់ក្នុងអនុក្រឹត្យលេខ32 អនក្រ.បក ចុះថ្ងៃទី9 ខែមីនា ឆ្នាំ2018 ស្ដីពីការធ្វើអនុបយោគទីតាំងដីបណ្ដោយទន្លេសាបពីស្ពានជ្រោយចង្វារមកដល់ផ្សាររាត្រី។

គម្រោងអភិវឌ្ឍន៍ជា “មជ្ឈមណ្ឌលពាណិជ្ជកម្មចម្រុះ The City Gate” នេះ រួមមាន ទី1.ជាអគារបណ្ដុំការិយាល័យពាណិជ្ជកម្ម។ ទី2.ជាអគារមជ្ឈមណ្ឌលសិល្បៈ។ ទី3.ទីធ្លាសម្ដែងវប្បធម៌សិល្បៈ។ ទី4.ទីធ្លាសម្រាប់បាញ់ទឹក។ ទី5.ទីធ្លាសម្រាប់រាំរបាំទឹក និងផ្សារអណ្ដែតទឹក។ ទី6.សួនកំពង់ផែ។ ទី7.ទីធ្លាកម្សាន្ដ និងសួនច្បារសាធារណៈ។ ទី8.មជ្ឈមណ្ឌលទេសចរណ៍។ ទី9.រាជធានីភ្នំពេញដ៏ឆ្លាតវៃ។ ទី10.ការិយាល័យបច្ចេកវិទ្យា។ ទី11.អគារស្នាក់នៅរួមបែបវប្បធម៌។ ទី12.អគារស្នាក់នៅរួមបែបច្នៃប្រឌិតទំនើប និងសណ្ឋាគារលំដាប់ផ្កាយប្រាំ និងទី13.សាលតាំងពិព័រណ៍ មជ្ឈមណ្ឌលបេតិកភណ្ឌអរូបីនិងសិប្បកម្ម និងវិចិត្រសាលបែបវប្បធម៌ព្រះពុទ្ធសាសនា និងសកម្មភាពផ្សេងៗទៀត។

កិច្ចសន្យាជួលនេះមានរយៈពេល 50ឆ្នាំ ដោយគិតចាប់ពីថ្ងៃទី29 ខែមិថុនា ឆ្នាំ2018 រហូតដល់ថ្ងៃទី28 ខែមិថុនា ឆ្នាំ2068។ ប្រាក់ឈ្នូលលើការ-ជួលដីនេះ គឺជាការបង់ប្រាក់ឈ្នួលផ្ដាច់តែម្ដងចំនួន 16.5លានដុល្លារអាមេរិកសម្រាប់រយៈពេល 50ឆ្នាំ រួមបញ្ចូលទាំងអាករលើតម្លៃបន្ថែម (VAT) ចំនួន10% រួចជាស្រេច។ ដើម្បីកែប្រែកំពង់ផែស្វយ័តនេះទៅជាមួយនឹងគម្រោងអភិវឌ្ឍន៍ “មជ្ឈមណ្ឌលពាណិជ្ជកម្មចម្រុះ The City Gate” នេះ កំពង់ផែស្វយ័តភ្នំពេញនៅតែបន្ដរក្សាមុខងារប្រតិបត្តិការរបស់ទីតាំងជួលខាងលើជាចំណតផែលើកដាក់ទំនិញចេញចូលក្នុងប្រទេសដដែល។

គួររំឭកថា សំណង់លំនៅឋានសរុបក្នុងឆ្នាំ2017 មានចំនួន 2.291គម្រោង មានផ្ទៃក្រឡាសរុបចំនួន 5.565.191ម៉ែត្រការ៉េ មានទុនវិនិយោគសរុបចំនួន 2.230.654.719 ដុល្លារអាមេរិក។ ក្នុងនោះគម្រោងអគារខ្ពស់ចាប់ពី 5ជាន់ឡើងទៅនៅរាជធានីភ្នំពេញឆ្នាំ2017 មានចំនួន 188គម្រោងបានសាងសង់រួច និងកំពុងសាងសង់បន្ត។

តាមរបាយការណ៍ក្រសួងដែនដី នគរូបនីយកម្ម និងសំណង់ឱ្យដឹងថា រយៈពេល 6ខែឆ្នាំ2018 ទាំងក្រសួង និងរាជធានី-ខេត្តបានផ្ដល់លិខិតអនុញ្ញាតសាងសង់បានចំនួន 1.643គម្រោង មានផ្ទៃក្រឡាសំណង់សុរប 5.352.422 ម៉ែត្រការ៉េ មានតម្លៃប៉ាន់ស្មាន 2.153.211,118ដុល្លារសហរដ្ឋអាមេរិក។ ទុនវិនិយោគរបស់វិស័យឯកជនមកពីបរទេស គឺមានចំនួន 8ប្រទេស មានចំនួន 21គម្រោងមានផ្ទៃក្រឡាសំណង់សរុប 928.267 ម៉ែត្រការ៉េមានតម្លៃប៉ាន់ស្មានទុនវិនិយោគ 394.332.300ដុល្លារអាមេរិក៕

August 1, 2018

កាន់តែធំ កាន់រពឹស…កូនភ្លោះរបស់ម៉ាក់ Chompoo Araya តែគួរឱ្យស្រឡាញ់ណាស់

តាមរយៈសារព័ត៌មាន Teenee នៅពេលថ្មីៗនេះបានចេញផ្សាយថា ស្ថិតក្រោមការមើលថែយ៉ាងដិតដល់របស់មនុស្សនៅក្នុងផ្ទះ កូនប្រុសភ្លោះទាំង2 របស់តារាស្រី Chompoo Araya កំពុងធំលូតលាស់យ៉ាងមានសុខភាពល្អពីមួយថ្ងៃទៅមួយថ្ងៃ។

ដោយផ្អែកលើការបង្ហោះរូបភាពពីសំណាក់តារាស្រីវ័យ 37ឆ្នាំរូបនេះ គេសង្កេតឃើញថា អូនតូច Thunder( ណង សាយហ្វា ) និង Storm ( ណង ផាយុ ) កាន់តែធំ កាន់តែគួរឱ្យក្នាញ់ និងមានហ្វ៊ែនៗអ្នកគាំទ្រស្រឡាញ់ចូលចិត្តយ៉ាងច្រើននៅលើបណ្តាញសង្គម។

នៅក្នុងនោះផងដែរ មានមតិភាគច្រើនបាននិយាយទៀតថា Thunder និង Storm នៅពេលដែលធំបែបនេះ មានមុខមាត់កាត់ទៅរកលោក Nott WitsarutRungsisingpipat ដែលជាប៉ាប៉ា ខ្លាំងជាងម៉ាក់ៗរបស់ពួកគេ។ គួរំឭកផងដែរថា កន្លងទៅថ្មីនេះៗ កូនភ្លោះរបស់តារាស្រីរូបនេះ បានទទួលតម្លៃខ្លួនក្នុងការថតស្ពតពាណិជ្ជកម្មដល់ទៅជាង 48ម៉ឺនដុល្លារសហរដ្ឋអាមេរិក។ នេះគឺជារឿងដែលធ្វើឱ្យមហាជនចាប់អារម្មណ៍ និងកោតសរសើរចំពោះក្រុមគ្រួសាររបស់តារាសម្ដែងស្រីរូបនេះយ៉ាងខ្លាំង ព្រោះបច្ចុប្បន្នកាន់តែមានប្រជាប្រិយភាព និងល្បីល្បាញខ្លាំងឡើង ជាពិសេសគឺ កូនភ្លោះរបស់នាងតែម្ដង៕

#fruitoftheday 🍒
A post shared by Araya Alberta Hargate (@chomismaterialgirl) on Jul 30, 2018 at 3:15am PDT

August 1, 2018

សាលារាជធានីភ្នំពេញបង្កើតគម្រោងធ្វើឡដុតសំរាម នៅសហគមន៍អណ្តូង

សាលារាជធានីភ្នំពេញបានបង្កើតឡដុតសំរាមមួយកន្លែងនៅឯសហគមន៍អណ្តូង ស្ថិតនៅក្នុងសង្កាត់គោករកា ខណ្ឌព្រែកព្នៅ ក្នុងបំណងកាត់បន្ថយការបំពុលខ្យល់អាកាសពីសំរាម និងដោះស្រាយបញ្ហាកាកសំណល់ដែលប្រជាពលរដ្ឋរស់ក្នុងសហគមន៍បានយកមកចាក់ចោលដែលនាំមកនូវផលប៉ះពាល់យ៉ាងខ្លាំងដល់បរិស្ថាន។

ឯកឧត្តម ឃួង ស្រេង អភិបាលរាជធានីភ្នំពេញដែលបានធ្វើជាអធិបតីក្នុងពិធីនេះបានមានប្រសាសន៍ថា ឡដុតសំរាមនេះនឹងធ្វើឱ្យប្រសើរឡើងនូវរបៀបដែលទីក្រុងដោះស្រាយលើបញ្ហាកាកសំណល់ និងការបំពុលបរិយាកាស។ «ការបង្កើតឱ្យមានឡដុតសំរាមនៅក្នុងសហគមន៍អណ្តូងនេះ គឺរដ្ឋបាលរាជធានីភ្នំពេញបានគិតគូរជាយូរមកហើយ អំពីសុខភាពរបស់ប្រជាពលរដ្ឋក្នុងតំបន់ ដោយសារតែប្រជាពលរដ្ឋដែលរស់នៅក្នុងសហគមន៍នេះ (សហគមន៍អណ្តូង)ភាគច្រើន ជាប្រជាពលរដ្ឋចំណាកស្រុក ដែលមករស់នៅផ្ដុំគ្នាច្រើន»។

ជាមួយគ្នានោះ ឯកឧត្តម ឃួង ស្រេង ក៏បានជំរុញឱ្យអភិបាលខណ្ឌសែនសុខ និងមន្ត្រីជំនាញពាក់ព័ន្ធរៀបចំដោះស្រាយលំនៅឋានដែលរងផលប៉ះពាល់ពីការស្ថាបនាឡដុតសំរាមនេះឱ្យពួកគាត់បានទៅរស់នៅក្នុងកន្លែងរៀបរយ។

លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ ឱ្យដឹងថា នឹងជំរុញឱ្យមន្ត្រីជំនាញពន្លឿនការដ្ឋានស្ថាបនាផ្លូវ និងដាក់លូជូនប្រជាពលរដ្ឋក្នុងសហគមន៍នោះឱ្យបានលឿនដើម្បីបំពេញនូវហេដ្ឋារចនាសម្ព័ន្ធដើម្បីប្រើប្រាស់ជាប្រយោជន៍រួម។

អភិបាលខណ្ឌព្រែកព្នៅលោក សុខ សម្បតិ្ត បាននិយាយថា ឡភ្លើងជាប្រភេទទីមួយនៅក្នុងទីក្រុង ហើយនឹងត្រូវប្រើធ្វើជាការសាកល្បងគម្រោងដែលទាក់ទងនឹងការបំពុលធំ។ «វាមានសមត្ថភាពដុតសំរាមបានចំនួន 5តោនក្នុងមួយថ្ងៃ ប៉ុន្តែវានឹងគ្របដណ្តប់តែលើភូមិចំនួន2 ប៉ុណ្ណោះ»។

លោកបានមានប្រសាសន៍ថា៖ «វាមិនអាចទ្រទ្រង់សង្កាត់គោករកាទាំងមូលបានទេ ប៉ុន្តែវាអាចយកទៅប្រើជាគំរូនៅសង្កាត់ដទៃទៀតបាន»។ លោកបានបញ្ជាក់ថា៖ «វាល្អ ពីព្រោះនៅពេលវាត្រូវបានប្រើ វានឹងមិនបញ្ចេញផ្សែងចូលក្នុងបរិយាកាសនោះទេ។ វាជួយកាត់បន្ថយការចំណាយ ហើយវានឹងជួយធានាឱ្យសហគមន៍រក្សាភាពស្អាតស្អំបានទៀតផង»។

សូមបញ្ជាក់ថា ប្រជាពលរដ្ឋដែលកំពុងរស់នៅក្នុងសហគមន៍ខាងលើ ត្រូវបានអាជ្ញាធររាជធានីភ្នំពេញបញ្ជូនមកពីសហគមន៍មិនរៀបរយ ប៊ុលឌិញ សម្បុកចាប ដីក្រហម និងបុរីកីឡា តាំងពីអំឡុងឆ្នាំ2016 រហូតមកដល់បច្ចុប្បន្ន សហគមន៍ទាំងនោះទទួលបានការអភិវឌ្ឍរីកចម្រើន ទាំងផ្លូវ បណ្ដាញទឹក- ភ្លើង លូ និងហេដ្ឋារចនាសម្ព័ន្ធចាំបាច់ផ្សេងទៀតជាច្រើន៕

August 1, 2018

នាវាដឹកជញ្ជូនអ្នកដំណើរសាធារណៈ ព្រែកព្នៅ-តាខ្មៅសម្ពោធជាផ្លូវការហើយ!!!

ស្របពេលដែលទឹកជំនន់កំពុងហក់ឡើងខ្លាំង ក្រសួងសាធារណការ និងដឹកជញ្ជូនបានដាក់សម្ពោធនាវាដឹកជញ្ជូនអ្នកដំណើរសាធារណៈ ព្រែកព្នៅ-ភ្នំពេញ-តាខ្មៅ ឱ្យប្រើប្រាស់ជាផ្លូវការហើយនៅថ្ងៃទី1 ខែសីហានេះ។

ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនមានប្រសាសន៍ថា ការបង្កើតឱ្យមានសេវានេះមានគោលបំណងដើម្បីពង្រីកវិស័យដឹកជញ្ជូនឱ្យមានច្រើនជម្រើស ពន្លឿនការដឹកជញ្ជូន កាត់បន្ថយការកកស្ទះចរាចរណ៍ កាត់បន្ថយគ្រោះថ្នាក់ចរាចរណ៍ អភិវឌ្ឍខឿនសេដ្ឋកិច្ចជាតិ និងប្រើឱ្យអស់លទ្ធភាព និងសក្ដានុពលនៃទន្លេនៅក្នុងប្រទេស។

ឯកឧត្ដមទេសរដ្ឋមន្ត្រីបានគូសបញ្ជាក់ផងដែរថា នាវាដឹកជញ្ជូនអ្នកដំណើរសាធារណៈ ព្រែកព្នៅ-ភ្នំពេញ-តាខ្មៅ ត្រូវឆ្លងកាត់ចំណតនាវា ចំនួន5 រួមមាន៖ ចំណតឫស្សីកែវ ចំណតផ្សារចាស់ ចំណតចតុមុខ ចំណតច្បារអំពៅ និងចំណតក្រុងតាខ្មៅ។

សូមបញ្ជាក់ជូនថា បច្ចុប្បន្នមាននាវាចំនួន 4គ្រឿងបាន និងកំពុងប្រតិបត្តិការ ដែលនាវានីមួយៗអាចផ្ទុកអ្នកដំណើរចន្លោះពី 54នាក់ ទៅ60នាក់ បើកបរក្នុងល្បឿន 40គីឡូម៉ែត្រ ចាប់ពីម៉ោង 5:30នាទីព្រឹក ដល់ម៉ោង 6:30នាទីល្ងាច ជារៀងរាល់ថ្ងៃពីចំណតដើមដល់ចំណតចុងប្រើរយៈពេលតិចជាង 1ម៉ោង។

គួររំឭកផងដែរថា៖ ចាប់តាំងពីដាក់ឱ្យប្រតិបត្តិការជាបណ្ដោះអាសន្នកាលពីថ្ងៃទី6 ខែមេសា ឆ្នាំ2018 រហូតដល់ថ្ងៃទី23 ខែកក្កដា ឆ្នាំ2018 មានអ្នកប្រើប្រាស់សេវានេះចំនួន 30,647នាក់ គិតជាមធ្យមានអ្នកដំណើរ 200នាក់ក្នុង1ថ្ងៃ លើសពីនេះទៀត អ្នកប្រើប្រាស់សេវានេះ ទាំងជាតិ និងអន្តរជាតិបានសម្តែងសេចក្តីសាទរចំពោះសមិទ្ធផលដ៏ថ្មីសន្លាងមួយនេះរបស់ប្រទេសជាតិ៕

August 1, 2018

ភ្ញៀវទេសចរអន្តរជាតិកើនឡើង 13%ក្នុងឆមាសទី1ឆ្នាំនេះ

ភ្ញៀវទេសចរអន្តរជាតិចំនួនប្រហែល 3លាននាក់បានមកធ្វើទស្សនកិច្ចនៅកម្ពុជាក្នុងអំឡុងពាក់កណ្តាលនៃឆ្នាំ2018 នេះ ពោលគឺកើនឡើង 13%។ នេះបើយោងតាមរបាយការណ៍របស់ក្រសួងទេសចរណ៍។

របាយការណ៍ដែលបានចេញផ្សាយដោយក្រសួងទេសចរណ៍បានបញ្ជាក់ថា ការព្យាកររំពឹងថាប្រទេសកម្ពុជានឹងទទួលបានភ្ញៀវទេសចរបរទេសចំនួន 6,2លាននាក់ក្នុងឆ្នាំ2018 ដែលនឹងកើនឡើងដល់12%។ នៅឆ្នាំ2020 ក្រសួងរំពឹងថានឹងមានចំនួនភ្ញៀវទេសចរ 7លាននាក់ដែលនឹងនាំមកនូវចំណូល 5ពាន់លានដុល្លារអាមេរិក និងបង្កើតឱកាសការងារដោយផ្ទាល់ 1លាននាក់ និង15លាននាក់នៅត្រឹមឆ្នាំ2030 ដោយនាំមកនូវចំណូលសរុប 10ពាន់លានបង្កើតនូវឱកាសការងារប្រមាណ2លាននាក់។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានបញ្ជាក់ឱ្យដឹងថា បច្ចុប្បន្នវិស័យទេសចរណ៍រួមចំណែក 13% នៃផលិតផលក្នុងស្រុកសរុប GDP ។ លោកបន្តថា៖ «រដ្ឋាភិបាលបន្តអភិវឌ្ឍប្រទេសជាគោលដៅទេសចរណ៍ស្អាត និងបរិស្ថាន ដោយផ្តោតលើនិរន្តរភាព និងការទទួលខុសត្រូវ។ ជាទិសដៅទេសចរណ៍ដ៏ល្បីល្បាញដែលទាក់ទាញភ្ញៀវទេសចរជាតិ និងអន្តរជាតិរាប់លាននាក់ជារៀងរាល់ឆ្នាំដោយមានសន្តិភាព និងសុវត្ថិភាពសម្រាប់ភ្ញៀវទេសចរកម្ពុជា»។

ឯកឧត្តមរដ្ឋមន្ត្រីក្រសួងទេសចរណ៍ ក៏បានបញ្ជាក់នៅក្នុងពិព័រណ៍ទេសចរណ៍ថ្មីៗនេះថាទេសចរណ៍ក្នុងស្រុកកំពុងកើនឡើងផងដែរ ដោយចំនួនប្រជាជនកម្ពុជាជ្រើសរើសការធ្វើដំណើរទេសចរណ៍ក្នុងប្រទេសកម្ពុជាកើនឡើង 6%។ ចំនួននៃការកើនឡើងនៃអ្នកទេសចរមានតួនាទីសំខាន់ក្នុងការជួយរដ្ឋាភិបាលឱ្យសម្រេចបានទិសដៅទេសចរណ៍របស់ខ្លួន។ «ខ្ញុំជឿថាតាមរយៈពិព័រណ៍នេះ ជាលើកដំបូងនៅកម្ពុជាយើងនឹងខិតកាន់តែកៀកដល់គោលដៅរបស់យើងក្នុងចំណោមទេសចរក្នុងស្រុកចំនួន11លាននាក់ត្រឹមឆ្នាំ2018 និង19លាននាក់ក្នុងឆ្នាំ2025»។

លោកស្រី ឆាយ ស៊ីវលីន ប្រធានសមាគមភ្នាក់ងារទេសចរណ៍កម្ពុជា (CATA) បាននិយាយថាភាពជោគជ័យរបស់វិស័យនេះគឺអាស្រ័យលើសមត្ថភាពរបស់រដ្ឋាភិបាលក្នុងការអភិវឌ្ឍ និងរក្សាទំនាក់ទំនងល្អជាមួយរដ្ឋាភិបាលបរទេស។ «មានសក្តានុពលជាច្រើនហើយដើម្បីធានាថា យើងធ្វើឱ្យបានច្រើនបំផុតយើងត្រូវធ្វើពិពិធកម្ម និងពង្រីកការផ្តល់ជូនរបស់យើងព្រមទាំងបង្កើនគុណភាពនៃសេវាកម្មដែលយើងផ្តល់ជូនភ្ញៀវទេសចរ»។

ឯកឧត្តម ថោង ខុន ក៏បានថ្លែងនៅក្នុងពិធីតែងតាំងរូបឯកឧត្តមជា «សមាជិកនៃបណ្ឌិតសភាទេសចរណ៍អឺរ៉ុប»(31-07-18)ដោយបានគូសបញ្ជាក់ថា វិស័យទេសចរណ៍ត្រូវបានចាត់ទុកជាមាសបៃតងចូលរួមទ្រទ្រង់កំណើនសេដ្ឋកិច្ច និងសង្គមបង្កើតការងារ កាត់បន្ថយភាពក្រីក្ររបស់ប្រជាជន និងចូលរួមទ្រទ្រង់ដល់ការធ្វើសមាហរណកម្មតំបន់។ ជាក់ស្តែងឆ្នាំ2017 វិស័យទេសចរណ៍នាំមកនូវប្រាក់ចំណូល 3,638លានដុល្លារអាមេរិកចាក់បញ្ចូលក្នុងសេដ្ឋកិច្ចជាតិ និងបង្កើតការងារដោយផ្ទាល់ដល់ពលរដ្ឋប្រមាណជាង 62ម៉ឺននាក់៕

August 1, 2018

វិស័យឧស្សាហកម្ម ផ្តល់ការងារជូនពលរដ្ឋខ្មែរចំនួនជាង 1លាននាក់

វិស័យឧស្សាហកម្មបន្តដើរតួនាទីជាប្រភពដ៏ចម្បងនៃកំណើនសេដ្ឋកិច្ចកម្ពុជា និងបានបង្កើតការងារជូនប្រជាពលរដ្ឋប្រមាណជាង 1លាននាក់មកទល់ត្រឹមឆមាសទី1 ឆ្នាំ2018នេះ។ នេះបើយោងតាមរបាយការណ៍ក្រសួងឧស្សាហកម្ម និងសិប្បកម្ម។

របាយការណ៍បង្ហាញថា វិស័យនេះគាំទ្រដោយកំណើនរឹងមាំ នៃវិស័យសំណង់ កាត់ដេរសម្លៀកបំពាក់ និងស្បែកជើង និងការកើនឡើងជាលំដាប់នៃវិស័យកម្មន្តសាលមិនមែនកាត់ដេរ ជាពិសេសគ្រឿងបន្លាស់យានយន្ត ទោចក្រយាន និងបរិក្ខារអគ្គិសនី ដែលអំណោយផលពីកត្តាខាងក្រៅ និងខាងក្នុង។

កត្តាខាងក្រៅ គឺភាពប្រសើរឡើងនៃស្ថានភាពសេដ្ឋកិច្ចពិភពលោក ជាពិសេសប្រទេសគោលដៅនាំចេញចម្បងៗ ដូចជាសហរដ្ឋអាមេរិក អឺរ៉ុប កាណាដា និងជប៉ុន ដែលបានជំរុញកំណើនតម្រូវការនាំចេញ និងការវិនិយោគក្នុងស្រុក។ ទន្ទឹមនេះកត្តាខាងក្នុងមានដូចជា ស្ថិរភាពនយោបាយ និងម៉ាក្រូសេដ្ឋកិច្ច ការរីកចម្រើនសមត្ថភាពជំនាញ ការពង្រីកបណ្តាញអគ្គិសនីនិងគមនាគមន៍ ទីតាំងភូមិសាស្ត្រ និងការលើកទឹកចិត្តអនុគ្រោះពន្ធរបស់រាជរដ្ឋាភិបាលសម្រាប់អ្នកវិនិយោគ។

ការនាំចេញសម្លៀកបំពាក់កាត់ដេរ និងស្បែកជើងមានកំណើន 11.1% នៅឆមាសទី1 ឆ្នាំ2018 ខ្ពស់ជាងឆមាសទី1ឆ្នាំមុន 6.9%។ ការនាំចេញផលិតផលកម្មន្តសាលមិនមែនកាត់ដេរ សម្រេចបានកំណើនខ្ពស់គួរឱ្យកត់សម្គាល់ ក្នុងកម្រិតបរិមាណ 2.3ដង ធៀបនឹងរយៈពេលដូចគ្នាកាលពីឆ្នាំមុន ដោយសារការពង្រីកការវិនិយោគដែលមានស្រាប់ និងការវិនិយោគថ្មីៗ ព្រមទាំងបរិយាកាសធុរកិច្ចល្អប្រសើរ សម្រាប់វិស័យទាំងនេះ។

ឧស្សាហកម្មបម្រើក្នុងស្រុក ជាពិសេសឧស្សាហកម្មកែច្នៃចំណីអាហារ មានកំណើនខ្ពស់ប្រមាណជា 26%។ ការបើករោងចក្រថ្មីនៅក្នុងវិស័យឧស្សាហកម្មត្រូវបានប៉ាន់ប្រមាណថា នឹងមាន 73រោងចក្រកើនឡើង 58.7% ធៀបនឹងឆមាសទី1ឆ្នាំមុន៕

August 1, 2018

ចង់បានសំណង់មានគុណភាពស្តង់ដារអន្តរជាតិ ជ្រើសរើសយក LBL

LBLConstruction គឺជាក្រុមហ៊ុនសាងសង់សំណង់ដ៏ធំមួយនៅកម្ពុជាដែលបង្កើតឡើងដោយអ្នកជំនាញជាតិ និងអន្តរជាតិតាំងពីឆ្នាំ1991មក ហើយក៏មានអតិថិជនជាច្រើនបានមកទទួលយកសេវាកម្មសាងសង់ពីក្រុមហ៊ុនខាងលើ ដោយការសាងសង់បានផ្តោតសំខាន់ទៅលើគុណភាព និងសោភណភាពដែលមានលក្ខណៈស្តង់ដារលំដាប់អន្តរជាតិ។

លោក Jerome Luciani-Khao អនុប្រធានគ្រប់គ្រងក្រុមហ៊ុន LBL Construction មានប្រសាសន៍ថា ក្រុមហ៊ុនលោកបានបង្កើតឡើងដោយអ្នកជំនាញវិស្វកម្ម និងស្ថាបត្យកម្មជនជាតិបារាំងចាប់តាំងពីឆ្នាំ1991នៅក្នុងប្រទេសកម្ពុជា ហើយទទួលបានការគាំទ្រពីអតិថិជនក្នុងការសាងសង់ គម្រោងសំណង់ប្រណីតធំៗលំដាប់ថ្នាក់អន្តរជាតិចំនួនជាង 300ក្រុមហ៊ុនរហូតមកទល់បច្ចុប្បន្ន។

គម្រោងសំណង់ធំៗ និងប្រណីតទាំងនោះ រួមមានសណ្ឋាគារ Amansara ‘La villa Princiere អគារសហគមន៍អឺរ៉ុបប្រចាំនៅកម្ពុជា(European Union Compound), សាលាភ្នំពេញអន្តរជាតិ(ISPP),គម្រោងសាងសង់ព្រលានយន្តហោះខេត្តព្រះសីហនុ (Sihanouk International Airport) ព្រលានយន្តហោះខេត្តសៀមរាប(Siem Reap Airport)ស្នាក់ការកណ្តាលក្រុមហ៊ុនតូយ៉ូតា(Toyota headquarters), ហាងកាហ្វេ STARBUCKS’,ធនាគារសហពាណិជ្ជក.អ(UCB Head office), សណ្ឋាគារសុខា (SOKHA Hotel & Resort), La Residence d’Angkor ខេត្តសៀមរាប និងមជ្ឈមណ្ឌល Hongkong Land ,សណ្ឋាគារ ឡឺ រ៉ូយ៉ាល់ (Raffles Hotel & Resorts)“ជួសជុលឡើងវិញ” ជាដើម។ ហើយបច្ចុប្បន្ន ក្រុមអ្នកជំនាញរបស់ក្រុមហ៊ុនកំពុងបន្តការសាងសង់អាហារដ្ឋានលំដាប់ថ្នាក់អន្តរជាតិនៅក្នុងអាកាសយានដ្ឋានភ្នំពេញអន្តរជាតិ (Cambodia Airport) និងគម្រោងអគារក្រុមហ៊ុនធំៗ និងសណ្ឋាគារប្រណីតៗ រួមនឹងអគារស្នាក់នៅ និងបំពេញការងាររបស់បុគ្គលិកស្ថានទូតបរទេសប្រចាំនៅកម្ពុជាទៀតផង។

អ្វីដែលធ្វើឱ្យក្រុមហ៊ុនមានការគាំទ្រខ្លាំងពីអតិថិជនសម្រាប់សាងសង់គម្រោងធំៗចំនួនជាង 300ក្រុមហ៊ុនខាងលើ គឺដោយសារក្រុមហ៊ុនមានអ្នកជំនាញផ្នែកវិស្វករសំណង់ និងស្ថាបត្យកម្មជាតិ និងអន្តរជាតិជាច្រើននាក់ធ្វើការរួមជាមួយគ្នា ហើយពួកគេសុទ្ធតែបានឆ្លងកាត់ការសិក្សាពីសាលាជំនាញក្នុង និងក្រៅប្រទេស មានបទពិសោធយូរឆ្នាំ ដោយមិនធ្វើឱ្យអតិថិជនខកបំណងនោះឡើយ។

លោកបញ្ជាក់ថា “យើងមិនធ្វើឱ្យអតិថិជនខកបំណងឡើយយើងមានអ្នកជំនាញសាងសង់ច្បាស់លាស់ ពួកគេមានភាពប៉ិនប្រសប់ពោល គឺសុទ្ធតែជាវិស្វករ និងស្ថាបត្យករមានជំនាញច្បាស់លាស់ មានបទពិសោធយូរឆ្នាំ ហើយពិសេសក្រុមហ៊ុនមានការធានា និងទទួលខុសត្រូវច្បាស់លាស់ទាំងសេវាកម្ម គុណភាព សោភណភាព បរិដ្ឋាន ពិសេសបញ្ចប់គម្រោងសាងសង់តាមពេលវេលាកំណត់របស់អតិថិជន។

ក្រៅពីនេះ ក្រុមហ៊ុនតែងផ្តល់ការប្រឹក្សាជាមួយអតិថិជន ចាប់ពីដំណាក់កាលចុះកិច្ចសន្យាសាងសង់លើកដំបូង រហូតដល់ការសាងសង់បញ្ចប់ជាស្ថាពរ ដើម្បីឱ្យអតិថិជនមានជម្រើសច្រើនក្នុងការកែលម្អទៅតាមការចង់បានរបស់ខ្លួន។ លើសពីនេះប្រធានគ្រប់គ្រងក្រុមហ៊ុនតែងនៅជាប់ជាមួយបុគ្គលិកគ្រប់ជាន់ថ្នាក់ តាំងពីថ្នាក់ស្ថាបត្យករ រហូតដល់បុគ្គលិក-កម្មករប្រើកម្លាំងសុទ្ធសាធ ដើម្បីជួយពិនិត្យឱ្យប្រាកដថា សំណង់នោះពិតជាមានគុណភាពស្តង់ដារ ទៅតាមការចង់បានរបស់អតិថិជន 100% មិនឱ្យខកបំណងឡើយ។

កេរ្តិ៍ឈ្មោះរបស់ក្រុមហ៊ុនមានភាពល្អឥតខ្ចោះក្នុងការសាងសង់សំណង់គ្រប់ប្រភេទ ដែលត្រូវបានគេទទួលស្គាល់ថា ជាក្រុមហ៊ុននាំមុខគេមួយនៅលើទីផ្សារសំណង់កម្ពុជា ក៏ដូចជានៅលើទីផ្សារអាស៊ានទាំងមូលដែរ។ បច្ចុប្បន្ន LBL មានបុគ្គលិកជាអ្នកជំនាញក្នុងស្រុក និងក្រៅស្រុកសរុបប្រមាណ 300នាក់ មានដូចជាវិស្វករ អ្នកគ្រប់គ្រងគម្រោង និងស្ថាបត្យករនិងមានបុគ្គលិក-កម្មករបំពេញការងារពលកម្មផ្សេងៗប្រមាណជា 2,000នាក់បន្ថែមទៀតសម្រាប់រង់ចាំជួយឱ្យគម្រោងសាងសង់បញ្ចប់ជាស្ថាពរតាមកាលកំណត់ ឬអាចនឹងបញ្ចប់មុនពេលកំណត់ទៀតផង។

ចាប់តាំងពីដំណាក់កាលដំបូង ក្រុមហ៊ុន LBL តែងប្រកាន់ខ្ជាប់នូវគុណតម្លៃលើចំណុចសំខាន់ៗចំនួន3 គឺ1.ការគោរព សុវត្ថិភាព និងភាពបត់បែនរបស់អតិថិជន។ 2.ជាមួយនឹងបទពិសោធរយៈពេល 27ឆ្នាំនៃជំនាញ និងសេវាកម្មសាងសង់លំដាប់ស្តង់ដារអន្តរជាតិដែលដើរតួនាទីយ៉ាងសំខាន់ក្នុងទីផ្សារសំណង់ដ៏ល្អឥតខ្ចោះមួយនៅក្នុងសតវត្សរ៍ចុងក្រោយនិង 3.គុណតម្លៃ គឺស្ថិតនៅដំណាក់កាលឈានមុនគេនៅក្នុងទស្សនវិស័យ និងក្រមសីលធម៌ការងាររបស់ក្រុមហ៊ុន។

លើសពីនេះក្រុមហ៊ុនមានអ្នកជំនាញដែលអាចជួយសន្សំសំចៃថវិកាសាងសង់ ចៀសវាងការចំណាយថ្លៃដើមខ្ជះខ្ជាយ និងជួយបញ្ចប់គម្រោងដោយជោគជ័យទៅតាមកិច្ចសន្យាដែលបានកំណត់។

យោងតាមភាពល្បីឈ្មោះបោះសំឡេងនៅលើគម្រោងសាងសង់ចាប់តាំងពីឆ្នាំ1991រហូតមកទល់ឆ្នាំ2018នេះ LBL Construction បាន និងតែងខិតខំអភិវឌ្ឍខ្លួនឱ្យកាន់តែប្រសើរឡើងថែមទៀត ដើម្បីបំពេញតម្រូវការរបស់អតិថិជនលើផ្នែកសេវាកម្មសាងសង់ និងគុណភាពកម្រិតកំពូលនៅក្នុងទីផ្សារសំណង់នៅកម្ពុជាក៏ដូចជាគម្រោងសាងសង់សំណង់ក្នុងតំបន់អាស៊ីផងដែរ។

សម្រាប់អតិថិជនដែលមានគម្រោងសាងសង់ អាចមកពិភាក្សាជាមួយអ្នកជំនាញក្រុមហ៊ុនដែលមានស្ថាបត្យករប្រមាណ 17នាក់ និងវិស្វករចំនួន 70នាក់ ដែលអាចប្រឹក្សារាល់គម្រោងនានា ទាំងការរចនា និងការសាងសង់បានដោយងាយស្រួល៕

August 1, 2018

តារាសម្តែង ឈិន សារ៉ាត់ សម្រក់ទឹកភ្នែកអាណិតកុមារារងគ្រោះថ្នាក់ចរាចរណ៍រហូតត្រូវពេទ្យកាត់ជើង

ដូចដែលប្រិយមិត្តបានស្គាល់ហើយថា លោក ឈិន សារ៉ាត់ ជាតារាសម្ដែងមានឈ្មោះល្បីមួយរូបក្នុងប្រទេសកម្ពុជា ខណៈនេះលោកបានសម្តែងអារម្មណ៍ក្តុកក្តួលបំផុត រហូតនិយាយអួលដើមក សម្រក់ទឹកភ្នែកនៅពេលបានឃើញកុមារាម្នាក់រងគ្រោះថ្នាក់ចរាចរណ៍ និងតែមួយប៉ប្រិចភ្នែកប៉ុណ្ណោះជើងមួយចំហៀងរបស់គេ ក៏ត្រូវលោកគ្រូពេទ្យសម្រេចកាត់ចេញដើម្បីសង្រ្គោះជីវិត យ៉ាងនឹកស្មានមិនដល់។ លោក សារ៉ាត់ នឹកសោកស្តាយ និងអាណិតអាសូរកុមារាកម្សត់នោះខ្លាំងណាស់ ទើបខំប្រឹងប្រែងស្វះស្វែងរកជំនួយសប្បុរសធម៌ជួយដល់កុមាររងគ្រោះ និងក្រុមគ្រួសាររបស់គេដែលកំពុងខ្វះខាត។

តារាសម្ដែងប្រុសរូបនេះ បានប្រាប់ឱ្យដឹងថា ខ្លួនមានក្ដីតក់ស្លុតខ្លាំងមែនទែន នៅពេលឃើញកុមារាដ៍ស្រស់ស្អាតធ្លាប់តែមានរាងកាយមាំទាំពេញលក្ខណៈ បែរជាមកជួបគ្រោះអកុសល រងគ្រោះថ្នាក់រហូតត្រូវពេទ្យកាត់ជើងម្ខាង។ ក្រោយឃើញពេទ្យសម្រេចធ្វើបែបនេះហើយ និងបានឃើញក្មួយប្រុសលើកដៃសំពះសុំឱ្យគេជួយផងនោះ កាន់តែធ្វើឱ្យលោកនឹកស្រណោះខ្លាំង រហូតដល់ស្រក់ទឹកភ្នែកនិយាយទាំងអួលដើមកថា គិតមើលទៅដូចជាសុបិន្តអាក្រក់អ៊ីចឹង ធ្លាប់តែដើរបាន ជិះកង់ទៅរៀន រត់លេងកើត តែឥឡូវបែរជាមកបាត់ជើងម្ខាង សួរថា តើមានអារម្មណ៍ហេងហាង និងទទួលយកម្តេចនឹងកើតទៅ?។ ដូចនេះមានតែម្នាក់ៗខំលើកទឹកចិត្តក្មួយឱ្យច្រើន ព្រោះគ្នាគ្មានអ្វីក្រៅពីយំ ហើយឈឺចាប់ជាមួយមុខមាត់ស្លូតបូតដ៏គួរឱ្យអាណិតនោះទេ។ ឃើញដូច្នេះហើយ ទើបមិត្តសិល្បករមួយចំនួន និងសប្បុរសជននានាបានរួមគ្នារៃអង្គាសប្រាក់តាមសទ្ធាចូលតាមរយៈលោកជាទឹកចិត្តដើម្បីជួយដល់កុមារាកម្សត់នោះ លោកសូមអរគុណ។ តាមរយៈរូបភាពនេះលោកសូមអំពាវនាវដល់បងប្អូនទាំងអស់ គប្បីគោរពច្បាប់ចរាចរណ៍ទាំងអស់គ្នា ចៀសវាងការជួបគ្រោះថ្នាក់ដែលនឹងធ្វើឱ្យមានវិបត្តិទៅថ្ងៃក្រោយ និងបើកបរដោយការយោគយល់គ្នា និងមានសីលធម៌ល្អជាសំខាន់។

សូមជម្រាបបន្ថែមថា ក្មេងប្រុសកម្សត់នោះមានវ័យ 8ឆ្នាំត្រូវបានឡានធុនធ្ងន់បើកកិនពីលើជើង បណ្តាលឱ្យរងរបួសធ្ងន់ រហូតត្រូវខាងមន្ទីរពេទ្យសម្រេចកាត់ជើងដែលត្រូវរបួសនោះចេញដើម្បីសង្រ្គោះជីវិតរបស់ប្អូន ហើយពេលនេះប្អូនកំពុងតែទទួលការសង្គ្រោះបន្ទាន់នៅឯមន្ទីរពេទ្យមួយក្នុងប្រទេសវៀតណាម។ ដោយសារតែក្រុមគ្រួសាររបស់ប្អូនមានជីវភាពខ្វះខាត មិនមានថវិកាគ្រប់គ្រាន់ក្នុងការព្យាបាលរបួសដ៏ធ្ងន់ធ្ងររបស់ប្អូន ធ្វើឱ្យមហាជនជាច្រើនមិនអាចមើលនឹងភ្នែកបាន ក៏នាំគ្នាជួយស្វះស្វែងរកការឧបត្ថម្ភពីសប្បុរសជននានាជាបន្តបន្ទាប់។ បើទោះជាមានការជួយឧបត្ថម្ភ ពីសប្បុរសជននានាហើយក្ដី ប៉ុន្តែការចំណាយផ្សេងៗក៏នៅតែត្រូវការបន្ថែមនៅឡើយ ព្រោះនៅពេលនេះប្អូនប្រុស លី ហេង កំពុងស្ថិតនៅក្នុងបន្ទប់សង្គ្រោះបន្ទាន់នៅឡើយ។ ប្អូនប្រុសបានរៀបរាប់ក្នុងវីដេអូថា រូបគេមានការឈឺចាប់ខ្លាំងណាស់ សូមក្តីអាណិតមេត្តាជួយផង ព្រោះគ្រួសាររបស់គេនៅខ្វះខាតថវិកាដើម្បីបន្តការព្យាបាល៕

August 1, 2018

ស្ពានដ៏អស្ចារ្យនៅវៀតណាម នាំលោកអ្នកទៅកាន់ពិភពរឿង «Lord Of The Rings»

ាតមរយៈគេហទំព័រ Boredpanda បានឱ្យដឹងថា ស្ពានមួយខ្សែដែលស្ថិតនៅក្រៅទីក្រុង Da Nang ក្នុងប្រទេសវៀតណាម កំពុងតែទាក់ទាញភ្ញៀវទេសចរជាច្រើន ដោយសារតែការរចនាដ៏ស្រស់ស្អាត និងអស្ចារ្យរបស់ខ្លួន។ ស្ពានដ៏អស្ចារ្យមួយនេះត្រូវបានគេឱ្យឈ្មោះថា Golden Bridge ដែលមានកម្ពស់ 1,400ម៉ែត្រលើកម្ពស់ទឹកសមុទ្រ នៅលើជ្រលងភ្នំ Ba Na មើលឃើញនូវទេសភាពដ៏ស្រស់ស្អាតនៃទីជនបទ។

ផ្លូវដើរនៅលើស្ពានពណ៌មាសនេះ មានអមដោយផ្កា Lobelia Chrysanthemums ដែលមានពណ៌ស្វាយស្រស់បំព្រង និងមានប្រវែងជិត 150ម៉ែត្រ ជាមួយនឹងការរចនារូបរាងកោងយ៉ាងឆើតឆាយ ដោយការរចនាស្ពាននេះគឺជាស្នាដៃរបស់ក្រុមហ៊ុនមួយឈ្មោះថា TA Landscape Architecture។

សូមជម្រាបផងដែរថា អ្វីដែលកាន់តែអស្ចារ្យ និងធ្វើឱ្យគ្រប់គ្នាចាប់អារម្មណ៍ខ្លាំងនោះគឺ ដៃយក្សមួយគូដែលទ្រពីក្រោមស្ពាន។ «ដៃយក្សមួយគូនោះមើលទៅហាក់បីដូចជាថ្ម ប៉ុន្តែតាមពិតវាគឺជាដែកថែប និងសំឡីកែវ (fiberglass) ដែលស្រោបពីលើ» នេះបើតាមការបញ្ជាក់របស់វិស្វករ។ វាត្រូវបានសាងសង់ឡើងដោយចំណាយពេលជិត 1ឆ្នាំ ខណៈរចនាសម្ព័ន្ធនេះគឺជាផ្នែកមួយនៃការវិនិយោគ ដែលមានទំហំទឹកប្រាក់ 2ពាន់លានដុល្លារ ដើម្បីនាំយកភ្ញៀវទេសចរ 1,5លាននាក់ជារៀងរាល់ឆ្នាំ។

យ៉ាងណាមិញ ទាំងទេសភាពពីលើកំពូលភ្នំ និងទម្រដៃយក្សដ៏សែនធំនោះ ហាក់បីដូចជាកំពុងនាំអារម្មណ៍ភ្ញៀវទេសចរជាច្រើនទៅកាន់ពិភពក្នុងរឿងបុរាណ «Lord Of The Rings» អីចឹងដែរ។ ដើម្បីឱ្យកាន់តែជាក់ច្បាស់ សូមទស្សនារូបភាព និងវីដេអូខាងក្រោមនេះ ៖

https://youtu.be/bqsILQ8ZyL4

August 1, 2018

Higuain នឹងចូលរួមជាមួយក្លិប AC Milan ក្នុងលក្ខខណ្ឌខ្ចីជើងពី Juventus

ខ្សែប្រយុទ្ធអន្តរជាតិអាហ្សង់ទីន Gonzalo Higuain ត្រូវបានរំពឹងទុកថា នឹងផ្ទេរទៅកាន់ក្លិប AC Milan ក្នុងកិច្ចសន្យារយៈពេល 1រដូវកាលពេញពីក្លិបដែលលេងក្នុងក្របខ័ណ្ឌ Serie A ដូចគ្នាគឺ Juventus ក្រោយពីការចូលរួមរបស់តារាឆ្នើម Cristiano Ronaldo កាលពីដើមខែនេះជាមួយនឹងក្លិបសេះបង្កង់មួយនេះ។

ក្លិប AC Milan នឹងចំណាយប្រាក់ 18លានអឺរ៉ូ (ស្មើនឹង 21លានដុល្លារអាមេរិក) សម្រាប់ការខ្ចីជើងនេះ ជាមួយនឹងជម្រើសទិញយកដាច់ក្នុងតម្លៃខ្លួន 36លានអឺរ៉ូ នៅពេលចុងរដូវកាលខាងមុខនេះ។ ក្លិប Chelsea របស់ក្របខ័ណ្ឌ Premier League បានចាប់អារម្មណ៍ទៅលើ Higuain វ័យ 30ឆ្នាំ ប៉ុន្តែខ្សែប្រយុទ្ធអន្តរជាតិអាហ្សង់ទីនរូបនេះ ហាក់ដូចជាត្រូវតែបន្តនៅក្នុងក្របខ័ណ្ឌ Serie A។

Higuain បានផ្ទេរទៅកាន់ក្លិប Juventus កាលពីឆ្នាំ2016 សម្រាប់តម្លៃខ្លួន 90លានអឺរ៉ូ និងបានស៊ុតបាល់បញ្ចូលទី 40គ្រាប់ក្នុងការប្រកួតក្របខ័ណ្ឌ Serie A 76លើក។ ប៉ុន្តែ ការទិញយក Ronaldo ដ៏មិននឹកស្មានដល់ពីក្លិប Real Madrid មានន័យថា រូបគេគឺជាជំនួសលើសទៅនឹងតម្រូវការក្នុងក្រុមរបស់លោក Max Allegri៕

ប្រភពពី៖ BBC

August 1, 2018

Category: សង្គម និងសេដ្ឋកិច្ច