Category: សង្គម និងសេដ្ឋកិច្ច

ប្រជាជននៅតំបន់ដាច់ស្រយាលត្រឹម 16%ប៉ុណ្ណោះ ដែលមានទឹកសុវត្ថិភាពហូប
ទឹកជាវត្ថុសំខាន់បំផុតសម្រាប់ការរស់នៅរបស់មនុស្ស ហើយសម្រាប់កម្ពុជាយើង គេមើលឃើញថា ការផ្គត់ផ្គង់ទឹកស្អាតនៅតាមតំបន់ទីប្រជុំជន និងតំបន់ជិតទីប្រជុំជន មានលក្ខណៈល្អប្រសើរច្រើន តែទោះបីជាយ៉ាងនេះក៏ដោយ ក៏បញ្ហាទឹកស្អាតនៅតាមតំបន់ទីជនបទនៅតែជាបញ្ហាប្រឈមនៅឡើយ។
នៅទីជនបទឆ្ងាយៗមួយចំនួនដែលមិនមានអណ្តូងទឹកស្អាតប្រើប្រាស់ ប្រជាជននៅតែប្រើប្រាស់ប្រភពទឹកត្រពាំង បឹង ស្ទឹង នៅឡើយ ខណៈដែលស្ថានភាពនៃសុវត្ថិភាពទឹកនាពេលបច្ចុប្បន្ននេះមានការថយចុះ ព្រោះមានការបំពុលច្រើនពីថង់ប្លាស្ទិក រួមទាំងកាកសំណល់ពីឧស្សាហកម្មជាដើម។
យោងតាមរបាយការណ៍របស់អង្គការ UNICEF បានបង្ហាញថា នៅក្នុងប្រទេសកម្ពុជាមានប្រជាជននៅតាមតំបន់ដាច់ស្រយាលត្រឹមតែ 16% ប៉ុណ្ណោះដែលមានទឹកសុវត្ថិភាពប្រើប្រាស់។ ហេតុនេះសូមឱ្យមានការចូលរួមពីប្រជាជនទូទៅនៅទូទាំងប្រទេសក្នុងការកាត់បន្ថយការចោលសំរាមទៅក្នុងទឹក និងសន្សំសំចៃគ្រប់ដំណក់ទឹកស្អាត៕
August 7, 2018
ខេត្ត 3 មានសក្តានុពលសំខាន់ៗ ដែលរដ្ឋមន្ត្រីពាណិជ្ជកម្មស្នើភាគីចិនជួយវិនិយោគ
រដ្ឋមន្ត្រីក្រសួងពាណិជ្ជកម្មកម្ពុជា ឯកឧត្តម ប៉ាន សូរស័ក្តិ បានស្នើប្រតិភូធុរជនខេត្តហ៊ូណាននៃសាធារណរដ្ឋប្រជាមានិតចិនឱ្យពិចារណាវិនិយោគនៅក្នុងខេត្តចំនួន 3 ដែលមានសក្តានុពលសំខាន់ៗរួមមានខេត្តបាត់ដំបងដែលសម្បូរទៅដោយភោគផលដំណាំ ផលិតផលកសិកម្ម ខេត្តសៀមរាបដែលមានសក្តានុពលទេសចរណ៍ និងខេត្តព្រះសីហនុដែលមានសក្តានុពលវិស័យឧស្សហកម្មសម្រាប់បម្រើទីផ្សារក្នុងប្រទេស និងនាំចេញទៅកាន់ប្រទេសចិន។
ការលើកឡើងរបស់ឯកឧត្តមរដ្ឋមន្ត្រីក្រសួងពាណិជ្ជកម្មបានធ្វើឡើងក្នុងជំនួបការងារកាលពីថ្ងៃទី2 ខែសីហា ឆ្នាំ2018 កន្លងទៅនៅទីស្តីការក្រសួងជាមួយលោក យ៉ាង គ័រពីង(Yang Guoping) ប្រធានក្រុមប្រឹក្សាភិបាលនៃក្រុមហ៊ុន Global Ecological Co., Ltd. របស់ខេត្តហ៊ូណាន ដែលបានដឹកនាំសហការីមកសិក្សាអំពីលទ្ធភាពពង្រីករោងចក្រម៉ាស៊ីនកិនស្រូវ ការកែច្នៃផលិតផលកសិកម្មនៅក្នុងខេត្តបាត់ដំបង និងស្វែងយល់អំពីសក្តានុពលវិនិយោគនៅក្នុងខេត្តសៀមរាប និងខេត្តព្រះសីហនុដែលអាចអភិវឌ្ឍផ្នែកសេដ្ឋកិច្ច និងទេសចរណ៍ ក៏ដូចជាវិស័យផ្សេងទៀតដែរ។
ឯកឧត្តម ប៉ាន សូរស័ក្តិ បានលើកពីចំណុចមួយចំនួន ដែលត្រូវការឱ្យចិនជួយដោះស្រាយនៅក្នុងវិស័យកសិកម្មនេះ ដោយមានប្រសាសន៍ដូច្នេះថា៖ «ការប្រឈមនៃវិស័យស្រូវអង្ករ និងដំណាំសក្តានុពលផ្សេងៗ រួមមាន ស្វាយ មៀន ពោត និងដំឡូងមី ព្រមទាំងនិយាយអំពីអត្ថប្រយោជន៍នៃការសាងសង់ឡសម្ងួតដើម្បីរក្សាទុកកសិផលបានក្នុងរយៈពេលយូរ សំដៅដល់ការអភិវឌ្ឍខ្សែចង្វាក់តម្លៃ និងការផ្គត់ផ្គង់»។
បន្ថែមលើនេះឯកឧត្តមក៏សូមឱ្យភាគីចិនពិចារណាវិនិយោគលើការកែច្នៃផលិតផលកសិកម្មនៅក្នុងខេត្តបាត់ដំបង និងខេត្តសៀមរាបដែលមានសក្តានុពលវិស័យទេសចរណ៍ និងសម្បូរទៅដោយភោគផលដំណាំដែលមានសក្តានុពលសម្រាប់បម្រើទីផ្សារក្នុងប្រទេស និងនាំចេញទៅកាន់ខេត្តហ៊ូណាន ប្រទេសចិនជាដើម។
លើសពីនេះលោករដ្ឋមន្ត្រី ក៏បានលើកឡើងអំពីសក្តានុពលខេត្តព្រះសីហនុដែលជាច្រកសេដ្ឋកិច្ចដ៏សំខាន់របស់កម្ពុជា និងជាខេត្តដែលមានកំពង់ផែទឹកជ្រៅ និងកំពង់ផែពហុបំណង ព្រមទាំងតំបន់សេដ្ឋកិច្ចពិសេស ដែលប្រមូលផ្តុំទៅដោយរោងចក្រតូចធំជាង 100ក្រុមហ៊ុនសម្រាប់បម្រើវិស័យពាណិជ្ជកម្ម និងឧស្សាហកម្ម។
ជាការឆ្លើយតបទៅនឹងសំណើទាំងនេះ ភាគីចិនបានសន្យាថានឹងនាំយកព័ត៌មានដែលលោកទទួលបានទាំងនេះទៅជម្រាបជូនលោកអភិបាលខេត្តហ៊ូណាន ដែលនឹងអញ្ជើញមកបំពេញទស្សនកិច្ចផ្លូវការនៅកម្ពុជានាខែវិច្ឆិកាខាងមុខ ព្រមទាំងផ្សព្វផ្សាយបន្តជូនសមាគមធុរជន និងវិនិយោគិនក្នុងប្រទេសចិន និងក្នុងខេត្តហ៊ូណាន ដើម្បីចូលមកបណ្តាក់ទុនកាន់តែច្រើននៅកម្ពុជា សំដៅបង្កើតឱកាសការងារជូនប្រជាជន និងចូលរួមជំរុញកំណើនសេដ្ឋកិច្ចរបស់កម្ពុជាឱ្យរីកចម្រើនទៅមុខ៕
August 7, 2018
កែប្រែទម្លាប់គ្មានអនាម័យប្រចាំថ្ងៃ ដើម្បីសុខភាពល្អ
ទម្លាប់នៃការធ្វើអនាម័យរាងកាយជាប្រចាំថ្ងៃ គឺជារឿងដ៏ល្អបំផុតដែលមនុស្សគ្រប់រូបគួរតែធ្វើ ក៏ប៉ុន្តែទម្លាប់មួយចំនួនក៏អាចបង្កឱ្យមានគ្រោះថ្នាក់ដល់សុខភាពវិញផងដែរ ប្រសិនបើអ្នកអនុវត្តមិនបានត្រឹមត្រូវ។ បើតាមអ្នកជំនាញសុខភាពពិភពលោកបានប្រាប់ឱ្យដឹងថា ក្រៅពីទម្លាប់ធ្វើអនាម័យខ្លួនប្រាណ មនុស្សជាច្រើនក៏ជាប់នូវទម្លាប់ខ្ជិល និងគ្មានអនាម័យប្រចាំថ្ងៃដែលមើលរំលង ហើយអាចបណ្តោលឱ្យគ្រោះថ្នាក់ដល់សុខភាព បើអ្នកមិនព្រមផ្លាស់ប្តូរ។
1. ទម្លាប់ខ្ជិលលាងដៃពេលចេញពីបន្ទប់ទឹក ឬបង្អន់
ការលាងសម្អាតដៃ គឺជាមធ្យាបាយមួយដែលមានប្រសិទ្ធភាពបំផុតក្នុងការការពារខ្លួនឯង និងអ្នកដទៃកុំឱ្យឆ្លងមេរោគ។ ប៉ុន្តែមនុស្សមួយចំនួនមិនបានលាងសម្អាតដៃត្រឹមត្រូវនោះទេ ដែលជាហេតុនាំឱ្យមានការឆ្លងមេរោគផ្សេងៗ។ សូមលាងសម្អាតដៃជាមួយនឹងសាប៊ូឱ្យបានញឹកញាប់ ពេលចេញពីបង្គន់នៅផ្ទះ ឬបង្គន់តាមទីសាធារណ:។
2. ទម្លាប់លាងមុខញឹកញាប់
ការលាងសម្អាតផ្ទៃមុខ គឺជាមធ្យាបាយដ៏ល្អក្នុងការកម្ចាត់បាក់តេរី និងកោសិកាងាប់ៗនៅលើស្បែក ធ្វើឱ្យស្បែករបស់អ្នកស្រស់ថ្លាឡើង។ ក៏ប៉ុន្តែការលាងផ្ទៃមុខច្រើនហួសប្រមាណ អាចធ្វើឱ្យស្បែករលាក ដោយសារតែការបាត់បង់ជាតិខ្លាញ់នៅលើស្បែក។
3. ទម្លាប់ខ្ជិលងូតទឹកក្រោយពេលហាត់ប្រាណ
នៅពេលធ្វើលំហាត់ប្រាណ រាងកាយរបស់អ្នកនឹងបែកញើសច្រើន ដែលជាឱកាសមួយនៃពពួកបាក់តេរីតោងនៅជាប់នឹងស្បែក។ ប្រសិនបើអ្នកមិនបានងូតទឹកនោះទេ គឺជាកំហុសដ៏ធំមួយ ព្រោះអ្នកអាចកើតមានបញ្ហាធំុក្លិនខ្លួន កន្ទួលរមាស់ និងបញ្ហាស្បែកឡើងមុនលើស្បែកជាមិនខាន។ ប៉ុន្តែ ក្រោយពេលធ្វើលំហាត់ប្រាណ អ្នកត្រូវរងចាំរយ:ពេល15នាទី ឬចាំឱ្យញើសស្ងួតជាមុនសិន ទើបងូតទឹកបាន។
4. ទម្លាប់ប្រើដៃខ្ទប់មាត់នៅពេលកណ្តាស់
ការខ្ទប់នៅពេលក្អក ឬកណ្តាស់ ដើម្បីទប់ស្តាត់កុំឱ្យសាយភាយទឹកមាត់ដាក់អ្នកដទៃ គឺជាសុជីវធម៌មួយដ៏ល្អបំផុត។ ប៉ុន្តែ អ្នកមិនត្រូវប្រើដៃខ្ទប់នោះឡើយ ព្រោះអ្នកមិនអាចលាងសម្អាតដៃគ្រប់ពេលនោះទេ ដូច្នេះមេរោគវានឹងវិលមករករាងកាយរបស់អ្នកវិញជាមិនខាន។ យកល្អ អ្នកត្រូវមានកូនកន្សែង ឬក្រដាសអនាម័យនៅជាប់តាមខ្លួន ដើម្បីប្រើប្រាស់នៅពេលមានបញ្ហាកណ្តាស់ ឬក្អក។
5. ទម្លាប់ប្រើច្រាស់ដុសធ្មេញសើម
ការប្រើប្រាស់ច្រាស់ដុសធ្មេញសើមមិនមែនជារឿងល្អសម្រាប់សុខភាពនោះទេ ព្រោះសំណើម គឺជាទីជំរកដ៏ល្អបំផុតសម្រាប់ពពួកបាក់តេរីក្នុងការបង្កាត់ពូជ ហើយបាក់តេរីទាំងនេះនឹងចូលទៅក្នុងមាត់ ដែលបង្កឱ្យមានបញ្ហាធ្មេញ និងអញ្ចាញធ្មេញ។ វិធីដ៏ល្អបំផុត អ្នកត្រូវទុកច្រាលដុសធ្មេញ នៅកន្លែងដែលមានខ្យល់អាកាសចេញចូលបានល្អ ដើម្បីឱ្យច្រាស់ស្ងួត ហើយរៀងរាល់រយ:ពេលពី3ទៅ6ខែ គួរតែដូរច្រាស់ថ្មីចេញម្តង។
6. ទម្លាប់ប្រើសំឡីត្បាល់ត្រចៀក
ជាធម្មតា អ្នកតែងតែមានទម្លាប់ប្រើប្រាស់សំឡីត្បាល់ត្រចៀក ដើម្បីសម្អាតកាកសំណល់ផ្សេងៗចេញពីរន្ធត្រចៀក។ ក៏ប៉ុន្តែបើអ្នករុកសំឡីចូលទៅក្នុងកាន់តែខ្លាំង វានឹងរុញច្រានអាចម៍ត្រចៀកចូលកាន់តែជ្រៅដែរ ដូច្នេះប្រសិនបើមានអាចម៍ត្រចៀកច្រើន គួរតែទៅជួបជាមួយគ្រូពេទ្យ ដើម្បីរកដំណោះស្រាយបញ្ហានេះ៕
August 7, 2018
ញាក់សាច់ !! រ៉ាប៊ី និងអាតី បញ្ចេញក្បាច់រាំបទថ្មី « លុយ លុយ លុយ»
អតីតពិធីការិនីប៉ុស្តិ៍ហង្សមាស ផាន វីរ៉ាទី ហៅរ៉ាប៊ី ដែលក្លាយទៅជាតារាចម្រៀងផលិតកម្មថោន នោះ ពេលនេះមានទីផ្សារចម្រៀងលេចធ្លោគ្រាន់បើ ឈរលេខ2 នៅថោន បន្ទាប់ពីមាស សុខសោភា ទៀតផង ហើយថែមទាំងមានព័ត៌មានថា ថ្មីៗនេះ ស្រីស្អាតរូបនេះបានធ្វើឱ្យលោកថៅកែថោន ពេញចិត្តស្តូក បន្ទាប់ពីនាងធ្វើឱ្យជោគជ័យខ្លាំងតាមរយៈបទ « មាន់ស្រែ » ដែលមិនត្រឹមតែក្នុងប្រទេសប៉ុន្នោះទេ ប៉ុន្តែក៏ត្រូវប្រជាជនក្នុងបណ្តាលប្រទេសជិតខាងខ្មែរ យកទៅរាំតាមទៀតផង។
ជាក់ស្តែង គ្រាន់តែត្រលប់មកពីបំពេញការងារនៅឯបរទេសភ្លាម កញ្ញា រ៉ាប៊ី មិនសម្ងំលាក់ខ្លួនពេលយូរទេ ក៏បានបញ្ចេញនៅបទថ្មី ដែលមានចំណងជើងថា « លុយ លុយ លុយ» ដែលមានចង្វាក់ភ្លេងពិរោះ និងមានក្បាច់រាំឡូយខ្លាំងទៀតផង ហើយមើលទៅគឺមិនចាញ់បទ “មាន់ស្រែ” ប៉ុន្មានដែរ។ ក្រោយបានមើលភ្លាម អ្នកទស្សនាពិតជាចង់មើល MV បទថ្មីរបស់ កញ្ញា រ៉ាប៊ី ថាតើប្លែកជាង បទ “មាន់ស្រែ” យ៉ាងណាខ្លាំង។
កុំឱ្យរង់ចាំយូរតោះរាំលេងកម្សាន្ត បទថ្មី « លុយ លុយ លុយ» ច្រៀងដោយ តារាចម្រៀងប្រចាំផលិតកម្មថោន កញ្ញា រ៉ាប៊ី ទាំងអស់គ្នា ទាំងបទភ្លេង និងទស្សនីយភាពក្បាច់រាំ ភ្លឺច្បាស់ត្រជាក់ភ្នែក ជាពិសេសមួយបទនេះ នឹងធ្វើឱ្យទស្សនិកជនប្លែកភ្នែក និងបានរីករាយ ឡើងរាំលេងកម្សាន្ត តាមចង្វាក់ភ្លេង ខាងក្រោមនេះ៖
August 7, 2018
សូមផ្អាកលេង Facebook ហើយងាកមក ប្រើវាឱ្យត្រឹមត្រូវបើមិនចង់ធ្លាក់បាក់ឌុប
នៅក្នុងសម័យបច្ចេកវិទ្យានេះ សិស្សស្ទើរតែ100% មានប្រើប្រាស់ទូរស័ព្ទទំនើប និងបណ្តាញសង្គម ដែលវាអាចផ្តល់ទាំងគុណសម្បត្តិ និងគុណវិបត្តិដល់ពួកគេយ៉ាងច្រើន។ មានសិស្សមិនតិចទេដែលបានជ្រុលខ្លួនលេងបណ្តាញសង្គមច្រើនហួសហេតុរហូតដល់ធ្វើឱ្យការសិក្សារបស់ខ្លួនត្រូវធ្លាក់ចុះ ឬចំណាយពេលវេលាច្រើនហួសក្នុងការប្រើប្រាស់ Facebook ហើយទើបភ្ញាក់ខ្លួនពេលជិតប្រឡង ហេតុនេះដើម្បីស្តារស្ថានការណ៍មុនពេលប្រឡងនេះ ពួកគេអាចកែប្រែស្ថានការណ៍អាក្រក់បានខ្លះ ដោយការបង្វែទិសដៅពីការប្រើប្រាស់បណ្តាញសង្គមបែបអវិជ្ជមានមកប្រើដើម្បីជួយដល់ការសិក្សាវិញ។
ស្របពេលជាមួយគ្នានេះ ក្រសួងអប់រំ យុវជន និងកីឡា រួមទាំងអ្នកអប់រំជាច្រើនបានចែករំលែកឯកសារយ៉ាងទូលំទូលាយតាមបណ្តាញបច្ចេកវិទ្យាដោយប្រភពព័ត៌មានសំខាន់ៗទាំងអស់នោះសុទ្ធតែចំណុចប្រកបដោយគុណតម្លៃសម្រាប់ការត្រៀមប្រឡង។ លើសពីនេះទៅទៀត ក្រសួងអប់រំ ក៏បានដាក់ចេញនូវកម្មវិធីធ្វើតេស្តសាកល្បងសមត្ថភាពដោយខ្លួនឯងផ្ទាល់តាមបណ្តាញបច្ចេកវិទ្យា និងសៀវភៅជំនួយដល់សិស្សស្ទើរជារៀងរាល់ថ្ងៃនៅក្នុងទំព័រ Facebook ផ្លូវការរបស់ក្រសួង ដែលសិស្សអាចទាញយកទៅប្រើប្រាស់បាន។ ម្យ៉ាងវិញទៀត មានអ្នកអប់រំជាច្រើនក៏បានដាក់បញ្ចូលនូវវិញ្ញាសាប្រឡង ឬឯកសារដែលធ្លាប់ប្រឡងពីឆ្នាំមុនៗ ជាមួយនឹងការពន្យល់សម្រាប់ជួយដល់សិស្សដើម្បីស្វែងយល់មុនពេលប្រឡង។
រដ្ឋមន្ត្រីនៃក្រសួងអប់រំ យុវជន និងកីឡា ឯកឧត្តម ហង់ ជួនណារ៉ុន បានលើកឡើងថាកាលពីមុនយើងចងក្រងឯកសារ ឬស្រាវជ្រាវតាមបែបបុរាណដែលធ្វើឱ្យមានការពិបាកស្វែងរក តែបច្ចុប្បន្ននេះបច្ចេកវិទ្យាមានការរីកចម្រើន ហេតុនេះស្ថាប័នអប់រំក៏បានប្រើប្រាស់បច្ចេកវិទ្យាដើម្បីជួយសម្រួលដល់ការសិក្សារបស់សិស្សឱ្យកាន់តែមានភាពងាយស្រួលក្នុងការស្វែងរកឯកសារ និងយល់កាន់តែច្បាស់ពីការអនុវត្តជាក់ស្តែង។ ហេតុនេះយុវជនកម្ពុជាគួរបង្វែរពេលប្រើប្រាស់បណ្តាញ សង្គមដើម្បីជំនួយដល់ការសិក្សា ព្រោះការសិក្សាតាមបច្ចេកវិទ្យាអាចធ្វើឱ្យសិស្សចំណេញពេលវេលាច្រើនណាស់។ តាមរយៈបច្ចេកវិទ្យាសិស្សមិនចាំបាច់អង្គុយរៀនជាមួយគ្រូគ្រប់ពេលនោះទេ ហើយសិស្សក៏អាចទាញយកឯកសារបានងាយស្រួល ដោយមិនចំណាយលុយ និងមានភាពទូលំទូលាយថែមទៀតផង។
អតីតសិស្សនិទ្ទេស A យុវជន ហេង គីមហុង បានលើកឡើងថា សិស្សគួរបង្វែរពេលលេងបណ្តាញសង្គម មកប្រើប្រាស់វាឱ្យមានប្រសិទ្ធភាពដើម្បីជាជំនួយដល់ការសិក្សាវិញ ព្រោះប្រសិនបើយើងមិនចេះប្រើប្រាស់បណ្តាញសង្គម វានឹងក្លាយជាគ្រឿងរំខានខ្លាំងដល់ការសិក្សា និងថែមទាំងធ្វើឱ្យយើងខាតបង់ពេលវេលាច្រើនឥតប្រយោជន៍ថែមទៀតផង។ ផ្ទុយមកវិញ ប្រសិនបើយើងចេះប្រើប្រាស់បណ្តាញសង្គមត្រឹមត្រូវ យើងនឹងចំណេញពេលវេលាច្រើន ហើយថែមទាំងអាចរកឃើញគន្លឹះល្អៗជាច្រើនដែលអាចដោះស្រាយចម្ងល់ដែលយើងធ្លាប់មានបានយ៉ាងល្អទៀតផង។
យុវជន ហេង គីមហុង បាននិយាយថា៖ “ការសិក្សា ជាពិសេសផ្នែកវិទ្យាសាស្រ្តពិត ចាំបាច់ត្រូវការយល់ឱ្យកាន់តែច្បាស់ពីហេតុផល និងឫសគល់សំខាន់ៗនៃមេរៀន មុននឹងអាចយករូបមន្តមកប្រើប្រាស់បាន ហើយជាធម្មតានៅក្នុងការសិក្សានៅសាលាយើងមិនសូវបានអនុវត្ត ឬពិសោធជាក់ស្តែងនោះទេ ហេតុនេះប្រសិនបើយើងចេះប្រើប្រាស់បណ្តាញសង្គមឱ្យត្រឹមត្រូវ យើងនឹងអាចស្វែងរកប្រភពវីដេអូដែលមានការពន្យល់លម្អិតបានយ៉ាងលឿន និងមានប្រសិទ្ធភាព”។
អតីតសិស្សពូកែខាងលើបានលើកឡើងផងដែរថា ម្យ៉ាងវិញទៀត ដោយសារតែបច្ចុប្បន្ននេះយុវជនជាច្រើនចេះភាសាអង់គ្លេស វាកាន់តែមានភាពងាយស្រួលថែមទៀតក្នុងការស្រាវជ្រាវ។ នៅពេលដែលយើងមើលមេរៀន ឬមិនយល់ត្រង់ចំណុចណានោះ ពីមុនយើងចាំបាច់ត្រូវរកគ្រូ ឬសិស្សច្បងដើម្បីសួរ ហើយប្រសិនបើគ្មានពួកគេទេនោះ យើងនឹងមិនអាចរៀនទៅមុខនោះទេ។ តែឥឡូវនេះមិនដូចពីមុននោះទេ រាល់ពេលដែលយើងឆ្ងល់នៅកន្លែងណាមួយ ហើយត្រូវការពន្យល់ យើងអាចស្រាវជ្រាវរកសេចក្តីពន្យល់បានយ៉ាងលម្អិតពីមេរៀននីមួយៗ។ នៅពេលដែលបច្ចេកវិទ្យាដើរលឿន ការសិក្សាក៏កាន់តែងាយស្រួល និងសម្បូរបែបដូចគ្នា តែគួរឱ្យស្តាយ ដោយសារតែមានសិស្សជាច្រើនមិនព្រមធ្វើវាឱ្យមានប្រយោជន៍៕
August 7, 2018
ព្រាប សុវត្ថិ ប្រាប់អតិថិជនប្រយ័ត្នចាញ់បោកគម្រោងក្លែងក្លាយដែលមិនមែនជារបស់លោក
ពិតជាកក្រើកវិស័យអចលនទ្រព្យនៅក្នុងប្រទេសកម្ពុជា បន្ទាប់ពីកំពូលតារាចម្រៀងល្បីល្បាញនៅក្នុងប្រទេសកម្ពុជា លោក ព្រាប សុវត្ថិ ស្រាប់តែបានប្រកាសចាប់ដៃជាមួយឧកញ៉ាវ័យក្មេង លោក ឡេង ណាវ៉ាតត្រា ដែលត្រូវគេស្គាល់ថា ជាអ្នកជំនួញវ័យក្មេង ដែលជោគជ័យលើវិស័យអចលនទ្រព្យទាំងលើជំនួញពុះដីឡូតិ៍លក់ និងសង់បុរីនោះ។ អ្នកទាំងពីរបានប្រកាសដាក់ទុនរួមគ្នាជាង5លានដុល្លារ ធ្វើជំនួញពុះដីលក់លើទំហំដីជាង13ហិកតានៅម្ដុំផ្សារព្រៃទទឹង លើផ្លូវជាតិលេខ3 ។
ដើម្បីផ្ដល់ទំនុកចិត្តដល់អតិថិជនដែលជាអ្នកគាំទ្ររបស់លោកផ្ទាល់ និងជៀសវាងការបោកបញ្ឆោតពីជនខិលខូចបានយករូបថតរបស់លោកទៅចុះផ្សព្វផ្សាយដោយពុំមានការអនុញាត្តិ ទាំងដែលមិនមែនជាគម្រោងរបស់លោកនោះ កំពូលតារាចម្រៀងរូបនេះ បានសរសេរបញ្ជាក់នៅលើហ្វេសប៊ុករបស់លោកថា « ជំរាបសួរអ៊ុំប្រុសអ៊ុំស្រីពូមីង នឹងបងប្អូនយុវ័យទាំងអស់ ខ្ញុំបាទ ព្រាប សុវត្ថិ សូមថ្លែងអំណរ អរគុណយ៉ាងជ្រាវជ្រៅ ដែលបានគាំទ្រនឹងស្រលាញ់ខ្ញុំបាទកន្លងមកនៅក្នុងវិស័យសិល្បៈ ដោយនាពេលថ្មីៗនេះខ្ញុំបាទបានបង្កើតវិស័យអចលនទ្រព្យ ដើម្បីជាតម្រូវការនៃការស្រលាញ់ និងមានទំនុកទុកចិត្ត។
សូមជំរាបថា៖ គម្រោងខ្ញុំបាទមុនៗ បានលក់ដាច់អស់ហើយ ។ ដើម្បីឱ្យកាន់តែមានភាពជឿជាក់ និងទទួលបានព័ត៍មានកាន់តែច្បាស់លាស់ ហើយមិនយល់ច្រទ្បំនោះ ព្រោះថាមានបណ្តាញសង្គម (Pages) មួយចំនួននៅក្នុង Facebook និងបណ្តាព័ត៍មានមួយចំនួន ដែលបានយករូបថតនឹងសកម្មភាពរបស់ខ្ញុំបាទ ទៅចុះផ្សព្វផ្សាយដោយពុំមានការអនុញាត្តិ! ដែលមិនមែនជាគម្រោង របស់ខ្ញុំ ។ (សូមប្រុងប្រយ័ត្ន)
សូមបញ្ជាក់ម្តងទៀតថាៈ Page ដែល Post លក់បោកបញ្ឆោតតាមរយៈយករូបភាពនានា! ក្រុមការងាររបស់ខ្ញុកំពុងស្រាវជ្រាវនឹងរៀបចំឯកសារតាមនិតិវិធី ច្បាប់ ។ ថ្មីៗនេះ ខ្ញុំបាទកំពុងរៀបចំគម្រោងល្អៗ ពិសេសនោះគឺ គម្រោង (ព្រាប សុវត្ថិ នឹងទ្បេង ណាវ៉ាត្រា) ដែលជាទីតាំង ដ៏ល្អសម្រាប់ការជ្រើសរើសរបស់អតិថិជនរបស់យើង ដែលប្រកបទៅដោយភាពជឿជាក់។ (ប្រសិនបើគ្មានទីតាំងណាល្អ ដាច់ខាតខ្ញុំមិនជ្រើសរើសសម្រាប់អតិថិជនខ្ញុំឡើយ) »៕
August 7, 2018
អគារពាណិជ្ជកម្មភ្លោះលំដាប់អន្តរជាតិ ត្រូវបានសាងសង់នៅខេត្តព្រះសីហនុ
ដោយមើលឃើញសក្តានុពលពាណិជ្ជកម្មក្នុងខេត្តព្រះសីហនុដែលជាខេត្តជាប់មាត់សមុទ្ររបស់ប្រទេសកម្ពុជា ក្រុមវិនិយោគិនបរទេសបានចូលមកបណ្តាក់ទុនយ៉ាងច្រើនជាបន្តបន្ទាប់នៅមួយរយៈចុងក្រោយនេះ។ ឧទាហរណ៍ អគារពាណិជ្ជកម្មភ្លោះលំដាប់អន្តរជាតិដ៏ធំមួយបានចាប់ផ្តើមសាងសង់ឡើងហើយនៅក្នុងខែសីហា ឆ្នាំ2018នេះ។
លោក ឈីវ គួរស៊ីញ ប្រធានប្រតិបត្តិក្រុមប្រឹក្សាភិបាលក្រុមហ៊ុនអចលនទ្រព្យដ៏ធំមួយមកពីប្រទេសចិនដែលគ្រប់គ្រងលើគម្រោងមួយនេះបានមានប្រសាសន៍ថា ដោយមើលឃើញសក្តានុពលសេដ្ឋកិច្ច និងពាណិជ្ជកម្ម របស់ខេត្តជាប់មាត់សមុទ្ររបស់ប្រទេសកម្ពុជា ក្រុមហ៊ុនបានសម្រេចបោះទុនវិនិយោគក្នុងទឹកប្រាក់រាប់លានដុល្លារសាងសង់អគារពាណិជ្ជកម្មពហុមុខងារ លំដាប់ថ្នាក់អន្តរជាតិនៅដើមខែសីហា ឆ្នាំ2018នេះ ដែលវាជាចំណែកមួយជួយឱ្យសរសៃឈាមសេដ្ឋកិច្ចរបស់ខេត្តជាប់មាត់សមុទ្រមួយនេះមានភាពរស់រវើក និងរឹងមាំខ្លាំងថែមមួយកម្រិតឡើងទៀត ដោយអគារទាំងនេះធ្វើឡើងក្នុងបំណងបម្រើឱ្យវិស័យពាណិជ្ជកម្មទូទៅ និងជាពិសេសរង់ចាំទទួលភ្ញៀវទេសចរចិនដែលនឹងមកស្នាក់នៅ និងកម្សាន្តប្រទេសកម្ពុជាចំនួនប្រមាណជា2លាននាក់នាឆ្នាំ2020ខាងមុខ។
លោកបន្ដថា ទីក្រុងព្រះសីហនុបានផ្លាស់ប្តូរមុខមាត់ថ្មីតាមរយៈការអភិវឌ្ឍទៅជាទីក្រុងអន្ដរជាតិដែលមានឆ្នេរខ្សាច់ដ៏ស្រស់ស្អាត សណ្ឋាគារលំដាប់ផ្កាយ5 មជ្ឈមណ្ឌលទិញទំនិញ តំបន់កម្សាន្តលំដាប់កំពូល និងភោជនីយដ្ឋានល្បីៗមកប្រមូលផ្តុំនៅទីក្រុងមួយនេះដែលធ្វើឱ្យទីក្រុងនេះក្លាយជាគោលដៅទេសចរណ៍ដ៏ពេញនិយមនៅតំបន់អាស៊ីអាគ្នេយ៍។
លោកបានបន្តទៀតថា គម្រោងសាងសង់អគារពហុមុខងារនេះមានឈ្មោះ ព្រីនស៍ ធាន ស៊ី វ៉ាន នឹងស្ថិតនៅលើទំហំផ្ទៃដីសរុបជាង 3ហិកតា រចនាដោយក្រុមហ៊ុនអន្តរជាតិលំដាប់កំពូល ដោយគម្រោងពហុមុខងារនេះរួមមាន សណ្ឋាគារលំដាប់ផ្កាយ5 និងផ្កាយ6 សណ្ឋាគារប៊ូទិក អាផាតមិន និងមជ្ឈមណ្ឌលពាណិជ្ជកម្មជាដើម ដែលនឹងមានផ្តល់ជូននូវសេវាកម្មលំនៅឋាន និងពាណិជ្ជកម្មលំដាប់ថ្នាក់អន្តរជាតិ។
គម្រោងនេះក៏មានរួមបញ្ចូលនូវផ្សារទំនើប សាលពិព័រណ៍ សាលសន្និសីទអន្តរជាតិ លំនៅឋាន សេវាកម្ម ពាណិជ្ជកម្ម ភោជនីយដ្ឋាន អាងហែលទឹកទំនើប ក្លិបទូកល្បឿនលឿន-ល-ជាពិសេសគម្រោងនេះក៏មានចំណតរថយន្តដ៏ទំនើប និងធំទូលាយទំហំ 25,000ម៉ែត្រការ៉េផងដែរ។
ពាក់ព័ន្ធនឹងករណីនេះ លោកឧកញ៉ានួន រិទ្ធី អគ្គនាយកក្រុមហ៊ុនផ្តល់សេវាអចលនទ្រព្យ (KFA)បានមានប្រសាសន៍ថា ខេត្តព្រះសីហនុជាខេត្តជាប់មាត់សមុទ្រ និងជាប៉ូលសេដ្ឋកិច្ចដ៏ធំមួយរបស់កម្ពុជាដែលស័ក្តិសមនឹងទទួលបានការវិនិយោគលើគ្រប់វិស័យពីសំណាក់វិនិយោគិនទាំងក្នុង និងក្រៅប្រទេស។ខេត្តដ៏ល្អស្អាតមួយនេះមានសក្តានុពលដោយសារតែមានមាត់សមុទ្រ មានភាពអំណោយផលពីធម្មជាតិ ផ្តល់នូវសោភណភាព និងទេសភាពស្រស់ស្អាតសម្រាប់ការរស់នៅជាទីមនោរម្យ មានហេដ្ឋារចនាសម្ព័ន្ឋផ្លូវដឹកជញ្ជូនជាច្រើន ដូចជាផ្លូវរថយន្តល្បឿនលឿនដែលមានរយៈចម្ងាយខ្លីជាងផ្លូវជាតិលេខ4 មានផ្លូវដែក និងផ្លូវអាកាស និងផ្លូវសមុទ្រពិសេសមានកំពង់ផែទឹកជ្រៅ អំណោយផលនៅក្នុងការដឹកជញ្ជូនទំនិញចូលមកក្នុង និងចេញទៅក្រៅប្រទេស។
ក្រៅពីស្ថិរភាពសេដ្ឋកិច្ច និងនយោបាយហើយ រដ្ឋាភិបាលបានលើកទឹកចិត្តដល់វិនិយោគិនបរទេសឱ្យចូលមកបណ្តាក់ទុនរកស៊ីនៅកម្ពុជាកាន់តែច្រើនដោយអនុញ្ញាតឱ្យវិនិយោគិនបរទេសអាចបើកក្រុមហ៊ុនដោយផ្ទាល់ មានសិទ្ធិកាន់កាប់ភាគហ៊ុន100% និងមានការសម្រួលការបង់ពន្ធ ជាដើម ដែលធ្វើឱ្យអ្នកវិនិយោគទៅបណ្តាក់ទុនរកស៊ីលើគ្រប់វិស័យនៅតំបន់នោះមានទាំងវិស័យទេសចរណ៍រោងចក្រឧស្សាហកម្ម វិស័យអចលនទ្រព្យ និងសំណង់ជាដើម ដើម្បីក្លាយជាចំណែកមួយជួយលើកកម្ពស់សេដ្ឋកិច្ចខេត្ត និងសេដ្ឋកិច្ចជាតិកម្ពុជាឱ្យកាន់តែប្រសើរឡើងថែមមួយកម្រិតទៀត៕
August 7, 2018
ការនាំចេញផលិតផលសម្លៀកបំពាក់ និងស្បែកជើងកើនឡើង 9.3% ក្នុងឆមាសទី1
យោងតាមក្រសួងពាណិជ្ជកម្មបានឱ្យដឹងថាការនាំចេញរបស់វិស័យកាត់ដេរនៅក្នុងប្រទេសកម្ពុជាមានតម្លៃ 3.7 ពាន់លានដុល្លារក្នុងរយៈពេល 6ខែដំបូងនៃឆ្នាំនេះ បានកើនឡើង 9.3%។ លទ្ធផលដ៏រឹងមាំនៃវិស័យនេះក៏បានកើនឡើងផងដែរនៅក្នុងអំឡុងពេលដ៏រសើបមួយសម្រាប់ប្រទេសកម្ពុជាដោយប្រទេសមួយនេះបានប្រារព្ធការស្ទង់មតិតាមរយៈការបោះឆ្នោតថ្នាក់ជាតិនីតិកាលទី 6 របស់ខ្លួន។
កំណើននៃសកម្មភាពនាំចេញផលិតផលសម្លៀកបំពាក់ និងស្បែកជើងបានកើនឡើងយ៉ាងរឹងមាំក្នុងអំឡុងឆមាសទី 1 នៃឆ្នាំនេះ បើទោះបីជាមានការព្រមានថ្មីៗពីសហភាពអឺរ៉ុប និងសហរដ្ឋអាមេរិកដែលជាដៃគូពាណិជ្ជកម្មដ៏សំខាន់របស់កម្ពុជាថាពួកគេអាចនឹងលុបចោលពាណិជ្ជកម្មដែលពេញចិត្តនៅកម្ពុជា ប្រសិនបើស្ថានភាពសិទ្ធិមនុស្សនៅកម្ពុជាមិនត្រូវបានកែលម្អ។
យោងតាមតួលេខពីក្រសួងនេះបានឱ្យដឹងថា ការដឹកជញ្ជូនវាយនភណ្ឌទៅកាន់ប្លុកអឺរ៉ុបបានកើនឡើង 10.66% ដែលមានតម្លៃសរុបជាង 1.6 ពាន់លានដុល្លារ ខណៈសហរដ្ឋអាមេរិកវិញបានកើនឡើង 10.73 ភាគរយ និងមានតម្លៃ 858លានដុល្លារ។ ទីផ្សារទាំង2 នេះរួមចំណែក 72%លើការនាំចេញសរុបរបស់កម្ពុជា។
ការនាំចេញទៅកាន់ប្រទេសកាណាដាបានកើនឡើងជាង 9% ដែលមានតម្លៃ 324លានដុល្លារខណៈការនាំចេញទៅកាន់ពិភពលោកបានកើនឡើង 10.10% និងមានតម្លៃ 850លានដុល្លារ។
លោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា (GMAC) បាននិយាយថា ការអនុវត្តជារួមលើវិស័យនេះមានលក្ខណៈគួរឱ្យចាប់អារម្មណ៍ ជាពិសេសបានគិតគូរថា ការបោះឆ្នោតថ្នាក់ជាតិបានធ្វើឱ្យមានការព្រួយបារម្ភដល់វិនិយោគិនជាច្រើន។ សហភាពអឺរ៉ុប និងសហរដ្ឋអាមេរិកនឹងបន្តក្លាយជាទីផ្សារដ៏សំខាន់បំផុតរបស់យើង ដែលត្រូវមានទំនុកចិត្តថាទំនាក់ទំនងរវាងប្រទេសយើងនឹងប្រសើរឡើងតាមរយៈការយល់ដឹង និងការគោរពគ្នាទៅវិញទៅមក។
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់សារព័ត៌មាន ឡារ៉ែនថា៖ “ដូចយើងបានដឹងហើយថា កម្ពុជាយើងធ្វើពាណិជ្ជកម្មជាអន្តរជាតិ ដូច្នេះទីផ្សារកម្ពុជាមានច្រើនយើងបានបើកទូលាយគ្រប់ប្រទេសក្នុងការនាំចេញមានច្រើនទិសដៅ ប៉ុន្តែការងារដែលលេចឮព័ត៌មានមកថា នឹងបិទការនាំចេញពាណិជ្ជកម្មដោយសហគមន៍អឺរ៉ុបនោះ នៅមិនទាន់ឃើញមានទេ គឺនៅមានរបាយការណ៍ទៅមកនៅឡើយ តែយ៉ាងណា ក៏យើងនៅមានច្រកដទៃទៀតដែរ ព្រោះយើងធ្វើពាណិជ្ជកម្មដោយទូលំទូលាយមិនធ្វើតែចំពោះនរណាម្នាក់ឡើយ”។
លោក ស៊ាង ថៃ អ្នកនាំពាក្យក្រសួងពាណិជ្ជកម្ម
លោកថ្លែងថា ចំនួនលើកទឹកចិត្តក្នុងកំណើននាំចេញ គឺជាលទ្ធផលនៃសន្តិភាព និងស្ថិរភាពនៅក្នុងប្រទេស។ ស្ថិរភាព និងសណ្តាប់ធ្នាប់សាធារណៈមានសារៈសំខាន់សម្រាប់សកម្មភាពធុរកិច្ច និងការវិនិយោគ។ នេះជាប្រភេទបរិស្ថានពាណិជ្ជកម្មដែលប្រទេសយើងត្រូវការដើម្បីធានាឱ្យមានការអភិវឌ្ឍបន្ថែមទៀត មិនត្រឹមតែសម្រាប់វិស័យដែលផ្ដោតលើការនាំចេញទេ ប៉ុន្តែសម្រាប់សេដ្ឋកិច្ចទាំងមូល។
យោងតាមរបាយការណ៍របស់អគ្គនាយកដ្ឋានសេវានាំចេញ-នាំចូលនៃក្រសួងពាណិជ្ជកម្ម បានឱ្យដឹងថា ក្នុងរយៈពេល 6ខែ នៃឆ្នាំ2018 នេះ ការនាំទំនិញចេញពីកម្ពុជា រួមមាន៖ វាយនភណ្ឌ សម្លៀកបំពាក់ ស្បែកជើង និងអង្ករជាដើម។ល។ រួមទាំងការបញ្ជាទិញរបស់ម៉ាកល្បីៗទូទាំងពិភពលោកដូចជាម៉ាក អាឌីដាស (Adidas) និងអេច្ឆ អេន អឹម (H&M)ជាដើម នៅតែបន្តកើតមាន ដែលបង្ហាញថាទាំងការបញ្ជាទិញ ក៏ដូចជាការនាំចេញរបស់កម្ពុជានឹងនៅតែល្អប្រសើរ ដោយសារប្រទេសកម្ពុជារក្សាបានកំណើនសេដ្ឋកិច្ចដ៏រឹងមាំ ពិសេសស្ថានភាពនយោបាយស្ថិតក្នុងភាពប្រក្រតី ក្រោយការបោះឆ្នោតត្រូវបានបញ្ចប់។
កាលពីពេលថ្មីៗនេះ ធនាគារជាតិនៃកម្ពុជាបានចេញផ្សាយការព្យាករសេដ្ឋកិច្ចចុងក្រោយរបស់ខ្លួន ដោយបានដាក់កំណើនសេដ្ឋកិច្ចរបស់ប្រទេសកម្ពុជាសម្រាប់ឆ្នាំនេះចំនួន 7% ដែលគាំទ្រដោយវិស័យឧស្សាហកម្មកាត់ដេរ ទេសចរណ៍ និងសំណង់។ “តាមទស្សនវិស័យ ម៉ាក្រូសេដ្ឋកិច្ចរបស់ប្រទេសនេះមានភាពរឹងមាំ ដោយការនាំចេញសម្លៀកបំពាក់ គឺជាផ្នែកមួយដ៏សំខាន់ក្នុងការជំរុញកំណើនជាតិ”។
កម្មករ-កម្មការិនីកំពុងធ្វើការក្នុងរោងចក្រផលិតស្បែកជើងមួយកន្លែង
សូមបញ្ជាក់ថា សហភាពអឺរ៉ុបបាននិយាយថាខ្លួននឹងលុបចោលគម្រោងអ្វីគ្រប់យ៉ាងដែលមិនមែនជាអាវុធ(EBA= the Everything But Arms scheme)ដែលអនុញ្ញាតឱ្យកម្ពុជានាំចេញទៅទីផ្សារអឺរ៉ុប និងកូតាដោយឥតគិតថ្លៃ ប្រសិនបើស្ថានភាពសិទ្ធិមនុស្សនៅក្នុងប្រទេសមិនមានភាពប្រសើរឡើង។
សហភាពអឺរ៉ុប គឺជាគោលដៅនាំចេញនាំមុខគេរបស់កម្ពុជាដែលមានចំនួន 40%នៃការនាំចេញសរុប។ ទាំងអស់នេះបានកើនឡើងយ៉ាងខ្លាំងក្នុងប៉ុន្មានឆ្នាំថ្មីៗនេះ ដោយកើនឡើង 227% ចន្លោះពីឆ្នាំ2011 និងឆ្នាំ2016 និងឈានដល់ 5ពាន់លានដុល្លារគិតជាតម្លៃកាលពីឆ្នាំទៅមិញ។ បច្ចុប្បន្នកម្ពុជាស្ថិតនៅលំដាប់ទី2 ក្នុងចំណោមអ្នកទទួលផលពី EBA ទាក់ទងនឹងបរិមាណជួញដូរ៕
August 7, 2018
ហ៊ិន ច័ន្ទនីរ័ត្ន បង្ហាញក្បាច់រាំ Kiki Challenge ឡើងឡូយកប់ !!
ពិធីការិនី និងតារាសម្ដែង កញ្ញា ហ៊ិន ច័ន្ទនីរ័ត្ន ដែលមានប្រិយមិត្តជាច្រើនបាន ស្គាល់ថាជា តារាស្រីដែលមាន សម្លេងពិរោះ ព្រមទាំងមានសម្រស់ស្រស់ស្អាតដូចតារាកូនកាត់ ។ ដោយអាជីពជាអ្នកសិល្បៈ មានភាពជោគជ័យ ធ្វើឱ្យកញ្ញា មាន ភាពល្បីល្បាញក្នុងពេលបច្ចុប្បន្ន។ យ៉ាងណាមិញ គេសង្កេតឃើញថាកញ្ញា ហ៊ិន ច័ន្ទនីរ័ត្ន មានសន្ទុះក្នុងទីផ្សារសិល្បៈខ្លាំងមែនទែនមិនថាការ សម្ដែងខ្សែភាពយន្ដ ការថតស្ពតផ្សាយពាណិជ្ជកម្មផលិតផលធំផ្សេងៗ ជាច្រើនទៀត។
ដោយឡែក នៅពីពេលថ្មីៗនេះ បទ KiKi (KeKe) ឬ In My Feelings របស់តារាចម្រៀង Drake ដ៏ពិរោះ និងមានចង្វាក់រាំឡូយ កំពុងមានភាពពេញនិយមនៅលើបណ្ដាញសង្គម បានទាក់ទាញចិត្តតារាស្រីចរិតស្រគត់ស្រគំ ហ៊ិន ច័ន្ទនីរ័ត្ន ទ្រាំមិនបានក៏បង្ហាញក្បាច់រាំបែប Challenge សប្បាយៗជាមួយបទនេះផងដែរ ធ្វើឱ្យមហាជនសរសើរថាកញ្ញាពិតជារាំបានឡូយមិនធម្មតាមែន។ នាងក៏បានបង្ហោះវីដេអូនេះនៅលើបណ្ដាញអ៊ីនស្ដាក្រាមរបស់នាង ដែលមានអ្នកគាំទ្រដល់ទៅ 124 ពាន់នាក់ឯណោះ។
ចង់ដឹងថា កញ្ញា ហ៊ិន ច័ន្ទនីរ័ត្ន បង្ហាញក្បាច់រាំបែបណា សូមទស្សនាវីដេអូខាងក្រោមនេះ:
#kikidoyoulovemechallenge 😜 my break time #forfun
A post shared by Hinchanniroth🇰🇭 (@hin_channiroth) on Aug 5, 2018 at 2:44am PDT
August 7, 2018
សូមរំលែកទុក្ខ !! ម៉ែចាស់របស់ ពេជ្រ ថៃ បានទទួលមរណភាពហើយ
កុមារា ពេជ្រ ថៃ មានអាយុត្រឹមតែអាយុ13ឆ្នាំ ប៉ុន្តែបានក្លាយទៅជាតារាចម្រៀងទាំងវ័យក្មេងក្នុងផលិតកម្មរស្មីហង្សមាស បន្ទាប់ពីប្រលងជាប់ក្លាយជាម្ចាស់ជ័យលាភីក្នុង កម្មវិធី The Voice Kids Cambodia 2017។ សព្វថ្ងៃ កុមារា ពេជ្រ ថៃ កំពុងតែទទួលបានការចាប់អារម្មណ៍កាន់តែខ្លាំងជាមុន ព្រោះតែរូបគេមានចរិតរស់រាយ កំប្លែង ស្គាល់ចាស់ស្គាល់ទុំ ជាហេតុធ្វើឱ្យរូបគេទៅណាមកណាទទួលបានការស្រលាញ់ រាប់អានពី សិល្បះករ សិល្បះការនីជាច្រើនរូបផងដែរ។
ប៉ុន្តែកាលពីពេលថ្មីៗនេះ ប្អូនប្រុស ពេជ្រ ថៃ បានជាប់ទុក្ខជាទំងន់ ដោយសារតែម៉ែចាស់ (លោកយាយ) ជាទីស្រលាញ់ ដែលខំចិញ្ចឹមបីបាច់ថែរក្សា ពេជ្រ ថៃ តាំងពីតូច បានលាចាកលោកទៅចោល ពេជ្រ ថៃហើយ។ ក្នុងនោះផងដែរ ពេជ្រ ថៃ ក៏បានបង្ហោះនៅលើបណ្តាញសង្គមឱ្យដឹងផងដែរថា “ម៉ែចាស់របស់ខ្ញុំបានទទួលមរណៈភាពហើយ សូមឱ្យម៉ែចាស់ទៅកាន់សុគតិភព ហើយចៅប្រាថ្នាជាតិណាណាសូមឱ្យក្លាយជាចៅលោកយាយជានិច្ច”។
ទើបតែតែងកំណាព្យជូនជីដូប៉ុន្មានថ្ងៃមុនសោះ ស្រាប់តែត្រូវឃ្លានពីជីដូនដែលបានមើលថែខ្លួនទាំងពីតូចពបាត់ទៅហើយ។ ចុងក្រោយក៏សូមចូលរួមរំលែកទុក្ខ និងសូមឱ្យដួងវិញាណក្ខន្ធលោកយាយទៅកាន់សុគតិភព កុំបី ឃ្លៀងឃ្លាតឡើយ៕
August 7, 2018