Category: សង្គម និងសេដ្ឋកិច្ច

ឡូយម្ល៉េះ! តារាចម្រៀង វី ឌីណែត ចាក់ក្បាច់រាំ KiKi Challenge យ៉ាងល្វត់ល្វន់
តារាចម្រៀងស្រីវ័យក្មេងសម្លេងធ្ងន់ គឺជាកូនស្រីលោកគ្រូ ហួ ឡាវី គឺកញ្ញា វី ឌីណែត កំពុងតែឆក់បានការចាប់អារម្មណ៍ និងការពេញនិយមខ្លាំងពីសំណាក់មិត្តៗយុវវ័យនាពេលបច្ចុប្បន្ននេះ។ ទន្ទឹមនឹងការទទួលបានប្រជាប្រិយភាពខ្លាំងនេះ កញ្ញា វី ឌីណែត ត្រូវបានគេមើលឃើញថា នាងកំពុងព្យាយាមបង្កើតក្បាច់រាំថ្មីៗប្លែកៗ ដើម្បីទាក់ទាញអារមុ្មណ៍ទស្សនិកជនដែលបានទស្សនាកម្សាន្តឱ្យស្លុងអារម្មណ៍ទៅតាមនាង ក្រៅពីការបញ្ចេញសំឡេងស្រែកស្ទើរបែកអាកាសាហើយនោះ ។
បទ In My Feelings របស់តារាចម្រៀងកាណាដា Drake កំពុងទទួលបានការពេញនិយមខ្លាំងទូទាំងពិភពលោក និងត្រូវបានគេយកទៅរាំ Challenge បង្ហោះល្បីល្បាញពេញបណ្ដាញសង្គម ដោយក្នុងនោះមានទាំងតារាបរទេស និងតារាខ្មែរផងដែរ។ ជាក់ស្ដែងក្រៅពីតារាខ្មែរល្បីៗជាច្រើនដែលបានរាំ KiKi Challenge នេះហើយ ក៏មានតារាចម្រៀងប្រចាំផលិតកម្មរស្មីហង្សមាសម្នាក់ គឺកញ្ញា វី ឌីណែត បានចេញវីដេអូមួយដែលបង្ហាញពីការរាំមិនឱ្យចាញ់គេដែរ។ កញ្ញា វី ឌីណែត បានបង្ហាញក្បាច់រាំ Challenge ដោយទឹកមុខសប្បាយរីករាយតាមចង្វាក់ភ្លេង និងអ្វីដែលសំខាន់នោះ គឺគេមើលឃើញនាងបញ្ចេញសាច់ក្បាលពោះដ៏ស្រឡូន ពត់ពេនយ៉ាងល្វត់ល្វន់តាមចង្វាក់ភ្លេងថែមទៀតផង ដែលធ្វើឱ្យមហាជនលាន់មាត់សរសើរថា កញ្ញាពិតជារាំបានឡូយមិនធម្មតាមែន និងមើលទៅពិតជាសិចស៊ីទៀតផង។
ចង់ដឹងថា ក្បាច់រាំរបស់ វី ឌីណែត សិចស៊ី និងខុសគេយ៉ាងណានោះ សូមទស្សនាវីដេអូខាងក្រោមនេះ:
August 8, 2018
សហគ្រិនវ័យក្មេងខ្មែរចំនួន 3រូបផ្តល់បទពិសោធអាជីវកម្ម
ក្នុងវេទិកាពិព័រណ៍ទេសចរណ៍ដើម្បីផ្សព្វផ្សាយពីផលិតផលទេសចរណ៍ និងចូលរួមជំរុញចលនាទេសចរណ៍ក្នុងស្រុកត្រូវបានសមាគមទីភ្នាក់ងារទេសចរណ៍កម្ពុជា ឬ CATA (The Cambodia Association of Travel Agents) លើកយកការផ្តល់គំនិតស្តីពីអាជីវកម្មរបស់សហគ្រិនល្បីៗ និងជោគជ័យមួយចំនួនមកបង្ហាញជូនដល់អ្នកចូលរួមទស្សនាពិព័រណ៍ ក្នុងប្រធានបទ “ការចាប់ផ្តើមជំនួញផ្ទាល់ខ្លួន” “Business Start Up”។
ក្នុងនោះសហគ្រិនវ័យក្មេងខ្មែរចំនួន 3រូបមានមុខរបរផ្សេងៗគ្នា ក៏ត្រូវបានអញ្ជើញឱ្យផ្តល់គំនិត និងបទពិសោធស្តីពីអាជីវកម្មរបស់ខ្លួនក្នុងប្រធានបទការចាប់ផ្តើមជំនួញផ្ទាល់ខ្លួន “Business Start Up” ដល់អាជីវករដែលមកចូលរួមក្នុងពិព័រណ៍ ក៏ដូចជាអ្នកមកទស្សនាដែលចង់ស្វែងរកបទពិសោធសម្រាប់ពង្រឹង និងជំរុញអាជីវកម្មរបស់ខ្លួនឱ្យកាន់តែទទួលបានទំនុកចិត្ត និងជោគជ័យក្នុងមុខជំនួញបន្ថែមទៀត។
សហគ្រិនវ័យក្មេងដំបូងគេ គឺអ្នកនាង រី ថានី ជាប្រធានគ្រប់គ្រងទូទៅនៅសិប្បកម្ម នរាអង្គរ (Norea Angkor Handicraft) ខេត្តសៀមរាបដែលជាសិប្បកម្មច្នៃម៉ូដចង្កៀងអំពូល ខ្នើយ វាំងននគ្រឿងសង្ហារិម និងគ្រឿងបរិក្ខារមួយចំនួនទៀតដែលផលិតដោយដៃសម្រាប់តុបតែងផ្ទះ សណ្ឋាគារ និងភោជនីយដ្ឋានទាំងបែបបុរាណ និងសម័យ។ អ្នកនាងថានី បានរៀបរាប់ថា ការចំណាកស្រុករបស់ពលរដ្ឋខ្មែរទៅក្រៅប្រទេសច្រើនពុំទទួលបានជំនាញត្រឡប់មកវិញទេ ទើបអ្នកនាងមានគំនិតបើកអាជីវកម្មច្នៃម៉ូដសម្ភារបរិក្ខារដែលរចនាម៉ូដពីសរសៃសូត្រខ្មែរនេះឡើង សម្រាប់ផ្ដល់ការងារនិងជំនាញថ្មីមួយដល់ពលរដ្ឋខ្មែរ។
អ្នកនាង រី ថានី ប្រធានគ្រប់គ្រងទូទៅនៅសិប្បកម្ម នរាអង្គរ
ម្ចាស់សិប្បកម្មវ័យ 29ឆ្នាំរូបនេះបានបញ្ជាក់ដូច្នេះថា៖ “ការផ្គត់ផ្គង់ក្នុងស្រុកភាគច្រើនក្នុងសណ្ឋាគារលំដាប់ផ្កាយប្រាំ ដោយឱ្យគេទទួលស្គាល់នូវផលិតផលរបស់យើងសិន ឱ្យគេយល់ពីផលិតផលខ្មែរ ទើបយើងធ្វើទៅតាមតម្រូវការ។ ម្យ៉ាងទៀតគឺចង់កាត់បន្ថយផលិតផលនាំចូល ដែលទី1 ប្រឈមការបែកបាក់ ទី2 កាត់បន្ថយចំណាយការលើការនាំចូល។ ដោយឡែកទៀតនោះ គឺចង់ឱ្យអតិថិជនទទួលស្គាល់ពីគុណភាពរបស់ខ្មែរថា អាចធ្វើបាន ព្រោះពីមុនច្រើនតែបរទេសជាអ្នកដឹកនាំបង្រៀនខ្មែរ ទើបយើងបង្កើតសិប្បកម្មនេះជាស្នាដៃខ្មែរ ផ្តួចផ្តើមនូវការប្រកួតប្រជែង បង្កើតផលិតផលឱ្យខ្មែរគាំទ្រ”។
បច្ចុប្បន្នសិប្បកម្ម នរាអង្គរ នេះមានបុគ្គលិក 30នាក់ សុទ្ធតែមានគំនិតច្នៃប្រឌិតខ្ពស់ដែលផ្គត់ផ្គង់ផលិតផលរបស់ខ្លួន និងដោយសារតែមានការគាំទ្រពីអតិថិជនក្នុងស្រុក និងបរទេសទើបធ្វើឱ្យម្ចាស់សិប្បកម្មវ័យក្មេងទទួលបានពានរង្វាន់សហគ្រិនឆ្នើមឆ្នាំ2018។
អ្នកនាង ថានី ឱ្យដឹងថា ទម្រាំឈរជើងបានមកទល់សព្វថ្ងៃនេះ អាជីវកម្ម នរាអង្គរ បានហែលឆ្លងក្ដីបរាជ័យក្នុងការរកស៊ីមិនក្រោម 10ដងឡើយ ហើយពេលដើរមកដល់ចំណុចនេះ នាងលែងមានគំនិតចុះចាញ់ដូចមុនទៀតហើយ តែថែមទាំងមានចិត្តតស៊ូទ្វេដងទៅទៀត ពីព្រោះបទពិសោធនៃការដួលហើយក្រោកឈរឡើងវិញនេះ គឺអាស្រ័យដោយការស្រឡាញ់ និងជឿជាក់លើអាជីវកម្មរបស់យើងជាមួយនឹងទិសដៅច្បាស់លាស់នោះទើបអាចងើបឡើងបាន និងបន្តដំណើរទៅមុខទៀតរហូតមកដល់បច្ចុប្បន្ន។
សហគ្រិនវ័យក្មេងទី2 មានអាយុត្រឹមតែ 27ឆ្នាំប៉ុណ្ណោះ គឺលោក ជា ឡង់ដា ជាស្ថាបនិក និងជាប្រធានក្រុមហ៊ុន“Bookmebus” និងក្លាយជាសហគ្រិនជោគជ័យម្នាក់ដែលមានបុគ្គលិក 17នាក់ ក្នុងនោះមានបរទេស 2នាក់ផងដែរ។ ដោយផ្តើមចេញពីការរង់ចាំរថយន្តត្រូវដ៏យូរក្នុងពេលធ្វើដំណើរទៅស្រុកម្តងៗ ធ្វើឱ្យសហគ្រិនរូបនេះយកបញ្ហានេះមកបង្កើតជាឱកាស គឺឱកាសបើកអាជីវកម្មផ្ទាល់ខ្លួន ជាក្រុមហ៊ុនទទួលកក់សំបុត្ររថយន្តក្រុង និងទូកតាមអនឡាញដែលបានបើកដំណើរការតាំងពីឆ្នាំ2015 មក។
លោក ជា ឡង់ដា ស្ថាបនិក និងជាប្រធានក្រុមហ៊ុន Bookmebus
លោក ឡង់ដា បានឱ្យដឹងថា៖ “ដោយសារតែការរង់ចាំធ្វើឱ្យខាតពេលវេលា យើងក៏ប្រើបច្ចេកវិទ្យាមានប្រព័ន្ធគ្រប់គ្រងត្រឹមត្រូវ ដោយយកព័ត៌មានមកដាក់ក្នុង online ពីទិសដៅ និងការចេញដំណើរច្បាស់លាស់ ធ្វើឱ្យក្រុមហ៊ុនដឹកអ្នកដំណើរជាង 40ក្រុមហ៊ុនបានបំពាក់បច្ចេកវិទ្យានេះ និងក្រុមហ៊ុនដឹកជញ្ជូនតាមទូក ហើយយើងគ្រោងបង្កើតសេវាកក់សំបុត្រយន្តហោះបន្ថែមទៀតផងដែរនាពេលខាងមុខ។ លោកថា ប្រាក់ចំណេញរបស់ក្រុមហ៊ុន គឺបានមកពីប្រាក់កម្រៃជើងសា (លុយកុំមីស្យុង)។ យើងក៏មានចំណែកជួយទាក់ទាញភ្ញៀវទេសចរមកស្រុកខ្មែរឱ្យមានការកើនឡើងជារៀងរាល់ឆ្នាំដែរ ព្រោះថាសំបុត្រធ្វើដំណើរ ទោះទិញមុន1ឆ្នាំ ក៏អាចលក់យកលុយពីភ្ញៀវបានដែរ”។
លោកបន្តថា ការទិញសំបុត្រតាមអនឡាញនេះ អតិថិជនមិនចាំបាច់មកទិញសំបុត្រដល់ក្រុមហ៊ុនទេ គឺគ្រាន់តែមានទូរស័ព្ទទំនើប និងកុំព្យូទ័រដែលអាចដំណើរការអុីនធើណិតបានជាការស្រេច។តាមរយៈWing, Smart Luy, Visa Card ឬប្រព័ន្ធដទៃទៀតពួកគេអាចពិនិត្យមើលជើងចេញដំណើរពេលវេលា និងបង់លុយលើវេបសាយ ឬអាចវេរលុយតាមអុីន-ធើណិតបាន។
លោក ឡង់ដា ធ្លាប់ត្រូវបានកម្មវិធីរបស់មហាសេដ្ឋីចិន Jack Ma ជ្រើសរើសយកទៅចូលរួមវគ្គបណ្តុះបណ្តាល eFounders នៅប្រទេសចិនដើម្បីស្វែងយល់ពីមូលដ្ឋានពាណិជ្ជកម្មអេឡិចត្រូនិក ប្រព័ន្ធបច្ចេកវិទ្យាដែលប្រែប្រួល និងមានឥទ្ធិពលនៅចិន ព្រមទាំងយល់ដឹងស៊ីជម្រៅអំពីគំនិតច្នៃប្រឌិតផ្នែកពាណិជ្ជកម្មអេឡិចត្រូនិកពីប្រទេសចិន និងជុំវិញពិភពលោកទៀតផង។
លោក ឡង់ដា ឱ្យដឹងថា ការធ្វើអាជីវកម្មមិនថាចាប់ផ្តើម 1ឆ្នាំ ឬដំណើរការ 5ឆ្នាំមកហើយក៏ដោយ ក៏នៅតែប្រឈមនឹងផលលំបាកដែរ ពីព្រោះយើងចង់បានលុយពីគេ ត្រូវធ្វើម៉េចឱ្យគេទិញផលិតផលយើង ហើយថែមទាំងមានការប្រកួតប្រជែងខ្លាំងទៀតផង ដូច្នេះយើងត្រូវមានការផ្លាស់ប្តូរ បើមិនផ្លាស់ប្តូរទៅតាមស្ថានភាពនៃការវិវឌ្ឍរបស់សង្គមទេ យើងនឹងជួបផលវិបាកមិនខាន ពីព្រោះការបើកអាជីវកម្ម មួយថ្ងៃៗត្រូវគិតធ្វើម៉េចឱ្យរីកចម្រើន ឱ្យរីកលូតលាស់ និងជោគជ័យ? តែបើយើងស្រឡាញ់អាជីវកម្មរបស់យើង យើងនឹងមានកម្លាំងចិត្តធ្វើ នោះគឺពិតជាជោគជ័យហើយ។
សហគ្រិនវ័យក្មេងទី3 លោក ទិត្យ សុធារ៉ា នៃអាជីវកម្ម Business Noir-Coffee បង្កើតឡើងនៅឆ្នាំ2013 ជាស្នាដៃកូនខ្មែរដែលចង់បង្ហាញដល់បរទេសថា ខ្មែរក៏អាចធ្វើបាន ដោយមាន 3សាខានៅខេត្តសៀមរាប។ ការចាប់ផ្តើមរបស់ស្ថាបនិកនិងជាម្ចាស់អាជីវកម្ម Noir-Coffee នេះបានផ្តើមចេញពីការធ្វើការឱ្យគេរយៈពេល 12ឆ្នាំ ទើបមានគោលបំណងច្បាស់លាស់ថា ចង់រកស៊ីខ្លួនឯង និងមានការជំរុញពីមិត្តភ័ក្តិដែលនាំឱ្យមានក្តីសង្ឃឹមថា ពិតជាអាចរកស៊ីបានហើយ។
លោក ទិត្យ សុធារ៉ា ម្ចាស់ហាងកាហ្វេ Noir-Coffee
សហគ្រិនដែលមានវ័យ 29ឆ្នាំរូបនេះបានបញ្ជាក់ថា៖ មូលហេតុដែលហាងរបស់លោកដាក់ឈ្មោះ Noir-Coffee ដោយសារតែលោកស្រឡាញ់ពណ៌ខ្មៅ ធ្វើឱ្យទីតាំងក៏រចនាពណ៌ខ្មៅដែរ តែទីតាំងទាំង3 រចនាខុសៗគ្នា ដោយច្នៃប្រឌិតបែបខ្មែរ ខាងមុខហាងក៏ដាក់ស្លាកសញ្ញាហាង Noir-Coffee ដោយភា្ជប់អក្សរ “ណ” សម្គាល់ថាម្ចាស់អាជីវកម្មជាខ្មែរដែរ។
លោក សុធារ៉ា បានបញ្ជាក់បន្ថែមថា កត្តាប្រឈមបញ្ហា និងផលលំបាក គឺតែងតែមាននៅក្នុងការចាប់ផ្តើមអាជីវកម្ម ព្រោះថា បើយើងធ្វើការងារឱ្យគេយើងគិតតែ1ទេ តែបើរកស៊ីខ្លួនឯងវិញ គិតដល់10ឯណោះ។ មកដល់ពេលនេះយើងមិនទាន់ហៅថាជោគជ័យទេ តែអាចចូលក្នុងទីផ្សារបាន ដោយសារតែការប្រកួតប្រជែងតែងតែមាន ដូច្នេះយើងត្រូវចេះផ្លាស់ប្តូរ និងធ្វើអ្វីដែលថ្មី ពោលត្រូវតែធ្វើឱ្យបានមុនគេ បន្ថែមនូវអ្វីដែលជាតម្រូវការរបស់អតិថិជន នូវអ្វីដែលថ្មី ប្លែក ដោយ update ឱ្យបានមុនគូប្រកួតប្រជែងជានិច្ច។
សរុបមក សម្រាប់ដំណើរការអាជីវកម្មដំបូងបំផុត អ្វីដែលពួកគាត់មាននោះ គឺគំនិត និងជំនឿចិត្តលើអ្វីដែលខ្លួនកំពុងធ្វើ ចំណែកដើមទុន និងជំនាញ ម្ចាស់អាជីវកម្មម្នាក់ៗអាចរក និងរៀនបន្ថែមបាន ឬអាចជួលអ្នកដទៃធ្វើក៏បានដែរ សំខាន់ត្រង់ថា តើអ្នកចង់បង្កើតអ្វី ឬចង់ផ្តល់អ្វីទៅឱ្យអ្នកដទៃតាមរយៈគំនិតរបស់អ្នកផ្ទាល់ហ្នឹងឯង៕
August 8, 2018
ក្រសួងកសិកម្ម និង (IFAD) បន្ថែមប្រាក់ជាង 15លានដុល្លារសម្រាប់ជួយកសិកររងគ្រោះ
ក្រសួងកសិកម្ម រុក្ខាប្រមាញ់ និងនេសាទ និងអង្គការមូលនិធិអន្តរជាតិសម្រាប់អភិវឌ្ឍន៍កសិកម្មអាយហ្វេត(International Fund for Agricultural Development ហៅកាត់ថា IFAD)បានសហការគ្នាបង្កើនថវិកាប្រមាណជាង 15លានដុល្លារអាមេរិកបន្ថែមទៀតនៅក្នុងវិស័យកសិកម្ម ពិសេសគឺជួយដល់ប្រជាកសិករដែលរងគ្រោះ។
នៅក្នុងបណ្តាញសង្គមហ្វេសប៊ុកផេចក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ការបង្កើនប្រាក់បន្ថែមនេះគឺបន្ទាប់ពីបានសង្កេតឃើញថា កម្មវិធីនេះបាន និងកំពុងដំណើរការល្អ និងកំពុងទទួលបានលទ្ធផលជាផ្លែផ្កា ដោយថវិកានេះគឺសម្រាប់អនុវត្តនៅក្នុងខេត្តគោលដៅចំនួន 11ក្នុងគោលដៅកាត់បន្ថយភាពក្រីក្រ និងបង្កើនភាពធន់របស់ដំណាំកសិកម្មតាមរយៈកម្មវិធីច្នៃប្រឌិតថ្មី ភាពធន់ទៅនឹងការប្រែប្រួលអាកាសធាតុ និងពង្រីក (The Agriculture Services Program for Innovation, Resilience and Extension = ASPIRE) ។
IFAD ធ្លាប់បានចំណាយប្រាក់សរុប 52.4លានដុល្លារអាមេរិករួចមកហើយសម្រាប់អនុវត្តនៅក្នុងខេត្តគោលដៅចំនួន11 ក្នុងនោះរួមមាន ខេត្តព្រះវិហារ ក្រចេះ ស្ទឹងត្រែង ព្រៃវែង ស្វាយរៀង កណ្តាល តាកែវ កំពត កំពង់ឆ្នាំង ពោធិ៍សាត់ និងបាត់ដំបង រយៈពេល7ឆ្នាំ គិតចាប់ពីឆ្នាំ2015 ដល់ឆ្នាំ2022។ ទាក់ទិននឹងការងារខាងលើនេះ នៅព្រឹកថ្ងៃទី6 ខែសីហា ឆ្នាំ2018កន្លងទៅនេះ នៅទីស្តីការក្រសួងកសិកម្មបានរៀបចំពិធីចែកទោចក្រយានយន្ត និងកុំព្យូទ័របន្ទះ ជូនភ្នាក់ងារផ្សព្វផ្សាយកសិកម្មនៃកម្មវិធី ASPIRE ។
ការផ្តល់យានជំនិះ និងឧបករណ៍ទាំងនេះក្នុងគោលបំណងលើកកម្ពស់ និងធ្វើឱ្យកាន់តែប្រសើរឡើងនូវការផ្តល់សេវាកម្មកសិកម្មដែលឆ្លើយតបនឹងតម្រូវការកសិករខ្នាតតូចដែលមានទំហំផលិតកម្មតូចចំនួន 120ពាន់គ្រួសារក៏ដូចជាជួយកសិករដែលមានទំហំផលិតកម្មតូច ក្រីក្រ និងងាយរងគ្រោះដែលអាចធ្វើធុរកិច្ចកសិកម្ម និងទទួលបានប្រាក់ចំណូលខ្ពស់។
ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានមានប្រសាសន៍ណែនាំដល់ភាគីពាក់ព័ន្ធទាំងអស់ឱ្យបន្តយកចិត្តទុកដាក់ពង្រីកចំណះដឹង ភាពឆ្លាតវៃ ភាពឆ្នៃប្រឌិត និងភាពទទួលខុសត្រូវខ្ពស់សម្រាប់បន្តដើរតួនាទីជាគ្រូ និងដៃគូដ៏មានសមត្ថភាព និងប្រសិទ្ធភាពដល់ប្រជាកសិករ ធ្វើយ៉ាងណាឱ្យប្រជាកសិករមានភាពរឹងប៉ឹង និងមានភាពម្ចាស់ការដើម្បីបន្តអនុវត្តកម្មវិធីនេះនៅពេលដែលកម្មវិធីនេះត្រូវបានបញ្ចប់ដូចពាក្យថា ទូកទៅ កំពង់នៅ។
ឯកឧត្តម ក៏បានស្នើឱ្យភាគីពាក់ព័ន្ធទាំងអស់ត្រូវសហការជាមួយអគ្គនាយកដ្ឋានកសិកម្ម សាលាជាតិកសិកម្ម និងសាលាកសិកម្មដទៃទៀតដើម្បីផ្លាស់ប្តូរបទពិសោធ ក៏ដូចជាស្រាវជ្រាវបច្ចេកទេសនិងបច្ចេកវិទ្យាថ្មីទំនើបសម្រាប់ប្រជាកសិករ រួមចំណែកកាត់បន្ថយកម្លាំងពលកម្ម បង្កើនផលិតភាព គុណភាព និងប្រាក់ចំណូល។ ធ្វើយ៉ាងណាដើរឱ្យទាន់កំណើនសេដ្ឋកិច្ចជាតិ ស្របតាមចក្ខុវិស័យរបស់រាជរដ្ឋាភិបាលក្នុងការប្រែក្លាយប្រទេសទៅជាប្រទេសមានចំណូលមធ្យមកម្រិតខ្ពស់នាឆ្នាំ2030។
សូមបញ្ជាក់ថា ពិធីចែកទោចក្រយានយន្ត និងកុំព្យូទ័របន្ទះខាងលើនេះ គឺជាថវិកាជំនួយរបស់រាជរដ្ឋាភិបាលកម្ពុជាដែលចែកជូនទៅខេត្តគោលដៅចំនួន11 ដែលមានទោចក្រយានយន្តសរុបចំនួន178គ្រឿង និងកុំព្យូទ័របន្ទះសរុបចំនួន៥៦០គ្រឿង៕
August 8, 2018
ឥណ្ឌាមើលឃើញឱកាសវិនិយោគអចលនទ្រព្យនៅកម្ពុជា
ក្រៅពីវិនិយោគិនចិន និងជប៉ុនហើយនោះ ពេលនេះវិនិយោគិនឥណ្ឌាក៏បានបង្ហាញពីចំណាប់អារម្មណ៍ការវិនិយោគលើវិស័យអចលនទ្រព្យនៅកម្ពុជាដែរ នេះជាការលើកឡើងរបស់ឯកអគ្គរដ្ឋទូតឥណ្ឌា ប្រចាំនៅប្រទេសកម្ពុជា។
លោកជំទាវ Manika Jain ឯកអគ្គរដ្ឋទូតឥណ្ឌាប្រចាំប្រទេសកម្ពុជាបានបញ្ជាក់ថា បច្ចុប្បន្នវិនិយោគគិនឥណ្ឌាកំពុងមានការចាប់អារម្មណ៍យ៉ាងខ្លាំងក្នុងការបណ្ដាក់ទុននៅកម្ពុជា ដោយសារមើលឃើញពីឱកាសដែលកម្ពុជានឹងនៅតែបន្តរីកចម្រើនខ្លាំងក្នុងវិស័យនេះ។ លោកជំទាវបន្តថា បច្ចុប្បន្នភាពនៃការវិនិយោគនៅកម្ពុជាកំពុងមានសក្តានុពល ដែលធ្វើឱ្យវិនិយោគិនឥណ្ឌាមួយចំនួនមានការចាប់អាម្មណ៍មកបណ្ដាក់ទុននៅកម្ពុជាលើវិស័យដីធ្លី សំណង់ វាយនភណ្ឌ ស្រូវអង្ករ ដែក និងវិស័យផ្សេងៗទៀត។
គួររំលឹកដែរថា ឯកឧត្តមទេសរដ្ឋមន្ត្រី ជា សុផារ៉ា ធ្លាប់បានមានប្រសាសន៍អំពីការជ្រើសរើសវិនិយោគលើវិស័យអចលនទ្រព្យនេះថា បើសិនជាជ្រើសរើសដីនៅតំបន់ជាប់ក្រុងគឺថ្លៃបន្ដិច តែបើជ្រើសរើសនៅតំបន់ឆ្ងាយពីក្រុងបន្ដិចមានតម្លៃថោកជាង ដូចជានៅតាមបណ្ដោយផ្លូវជាតិលេខ3 លេខ4 លេខ5 និងលេខ6 ជាដើម ម្យ៉ាងនៅតំបន់ជាយក្រុងក៏អាចចៀសវាងការកកស្ទះចរាចរណ៍បាន និងមានបរិស្ថានល្អទៀតផង៕
August 8, 2018
ក្រុម Force India នឹងរួចផុតពីការជាប់ពិន័យរដ្ឋបាល ក្រោយការកាន់កាប់របស់ម្ចាស់ថ្មី
ក្រុម Force India ក្នុងការប្រណាំងរថយន្ត Formula One នឹងត្រូវរួចផុតពីការជាប់ពិន័យផ្នែករដ្ឋបាល ក្រោយពីបានប្រកាសកាលពីថ្ងៃអង្គារ ពីការកាន់កាប់មួយដោយក្រុមមនុស្សបណ្តាក់ទុនមួយក្រុមដែលត្រូវបានដឹកនាំដោយមហាសេដ្ឋីសញ្ជាតិកាណាដា លោក Lawrence Stroll។
ក្រុមប្រណាំងរថយន្តរបស់ឥណ្ឌាដែលមានមូលដ្ឋានក្នុងទីក្រុង Silverstone ប្រទេសអង់គ្លេសមួយនេះ ត្រូវបានដាក់ឱ្យស្ថិតក្នុងការជាប់ពិន័យរដ្ឋបាលកាលពីខែមុន ប៉ុន្តែបានបញ្ជាក់ថា អនាគតរបស់ក្រុមនេះ ត្រូវបានធ្វើឱ្យមានសុវត្ថិភាពដោយក្រុមហ៊ុនបណ្តាក់ទុនថ្មីនេះ។
លោក Stroll គឺជាឪពុករបស់កីឡាករ Lance ដែលបើករថយន្តឱ្យក្រុម Williams។ ក្រុមហ៊ុនបណ្តាក់ទុនមួយនេះ មិនបានបង្ហាញពីសេចក្តីលម្អិតផ្នែកហិរញ្ញវត្ថុនៃការព្រមព្រៀងគ្នានេះឡើយ ប៉ុន្តែបានបញ្ជាក់យ៉ាងច្បាស់ថា ខ្លួននឹងធ្វើឱ្យការងារចំនួន 405កន្លែងមានសុវត្ថិភាពក្នុងក្រុមនេះ។
ម្ចាស់ថ្មីមួយនេះបានឱ្យដឹងក្នុងសេចក្តីថ្លែងការណ៍មួយថា៖ «ការព្រមព្រៀងគ្នានេះនឹងធានាសុវត្ថិភាពចំពោះអនាគតរបស់ក្រុម Force India ក្នុងការប្រណាំងរថយន្ត Formula One ហើយនិងអនុញ្ញាតឱ្យអ្នកបើកបររបស់យើងចូលរួមប្រកួតប្រកបដោយភាពជឿជាក់»។
ខណៈដែលត្រូវបានស្ថាបនិក និងស្ថិតក្រោមសហកម្មសិទ្ធិរបស់អាជីវករសញ្ជាតិឥណ្ឌាលោក Vijay Mallya ក្រុមនេះ ត្រូវបានបញ្ចូលក្នុងការពិន័យផ្នែករដ្ឋបាលនៅអង់គ្លេស កាលពីថ្ងៃទី27 ខែកក្កដា កន្លងទៅ៕
ប្រភពពី៖ Channel News Asia
August 8, 2018
អង្គរវត្តទទួលពានរង្វាន់ “សំណង់ប្រវត្តិសាស្រ្តអស្ចារ្យបំផុត” លើពិភពលោក
ជារៀងរាល់ឆ្នាំកេរ្តិ៍ឈ្មោះនៃប្រាសាទអង្គរវត្ត បានផ្សព្វផ្សាយទៅកាន់មនុស្សគ្រប់ទីកន្លែងលើពិភពលោក និងធ្លាប់ជាប់ជាគោលដៅទេសចរណ៍លេខ1លើពិភពលោក ដែលធ្វើឱ្យភ្ញៀវទេសចរជាច្រើនលាននាក់បានសម្រុកចូលមកទស្សនាច្រើនឡើងៗពីមួយឆ្នាំទៅមួយឆ្នាំ។
សំណង់ស្ថាបត្យកម្មប្រកបដោយគុណតម្លៃ និងអច្ឆរិយភាពនេះត្រូវបានភ្នាក់ងារប្រឹក្សាយោបល់លើការធ្វើដំណើរ (Trip Advisor) គ្រោងរៀបចំកម្មវិធីប្រគល់ពានរង្វាន់ចំណាត់ថ្នាក់លេខ1 ផ្នែកសំណង់ប្រវត្តិសាស្រ្តអស្ចារ្យបំផុតលើពិភពលោក នៅថ្ងៃទី9 ខែសីហា ឆ្នាំ2018 ខាងមុខនេះ។
ប្រធាននាយកដ្ឋានទីផ្សារទេសចរណ៍ក្រៅប្រទេស លោក ឡោ ធួរ៉ា បានលើកឡើងថា ការជ្រើសរើសយកប្រាសាទអង្គវត្តឱ្យជាប់ចំណាត់ថ្នាក់លេខ1 ជាគោលដៅទេសចរណ៍ល្អជាងគេលើពិភពលោកនេះ គឺដោយសារតែ Trip Advisor បានដាក់គោលដៅទេសចរណ៍ល្បីៗចំនួនជាង 700កន្លែងឱ្យភ្ញៀវទេសចរជ្រើសរើស និងបោះឆ្នោត។ ជាលទ្ធផលប្រាសាទអង្គរវត្តជាកន្លែងដែលទទួលបានសំឡេងគាំទ្រច្រើនបំផុត ក្នុងចំណោមសំណង់ប្រវត្តិសាស្រ្តល្បីៗក្នុងពិភពលោកចំនួន 25កន្លែងក្នុងឆ្នាំ2018នេះ។
លោក ឡោ ធួរ៉ា បានមានប្រសាសន៍ថា៖ «ការរៀបចំកម្មវិធីអបអរសាទរ និងពិធីប្រគល់ពានរង្វាន់ចំណាត់ថ្នាក់លេខ1 ដល់ប្រាសាទអង្គរវត្តកម្ពុជានេះ គឺដើម្បីរួមចំណែកបង្កើនការទាក់ទាញភ្ញៀវទេសចរជាតិ-អន្ដរជាតិ និងបង្ហាញពីមុខមាត់របស់កម្ពុជា ជាពិសេសនឹងធ្វើឱ្យអង្គរវត្ដក្លាយទៅជាគោលដៅទេសចរណ៍ ដ៏ល្បីល្បាញឱ្យភ្ញៀវទេសចរចូលមកទស្សនាកាន់តែច្រើនថែមទៀតនាពេលអនាគត»។
តាមការបញ្ជាក់របស់អាជ្ញាធរជាតិអប្សរាបានឱ្យដឹងថា អង្គរវត្ដត្រូវបានភ្ញៀវទេសចរលើពិភពលោកបោះឆ្នោតគាំទ្រ និងទទួលបានចំណាត់លេខ1ជាច្រើនឆ្នាំជាប់ៗគ្នាតាមរយៈគេហទំព័រដ៏ល្បីល្បាញផ្សេងៗគ្នា ដោយកាលពីឆ្នាំ2014 អង្គរបានជាប់ចំណាត់ថ្នាក់លេខ1 នៅលើគេហទំព័រ ArchaeoMadness ដែលបានជ្រើសយកតំបន់បុរាណវិទ្យា និងប្រវត្តិសាស្រ្តទាំងអស់លើពិភពលោកមកប្រៀបធៀបគ្នា។
នៅដើមឆ្នាំ2015 ប្រាសាទអង្គរវត្តទទួលបានចំណាត់ថ្នាក់លេខ1 ម្តងទៀត នៅលើគេហទំព័រអន្តរជាតិមួយ ដែលជាគេហទំព័រផ្សព្វផ្សាយពីតំបន់ទេសចរណ៍ល្បីៗលើពិភពលោក នោះគឺគេហទំព័រTripAdvisor។ នៅឆ្នាំ2016 អង្គរបានបន្តជាប់លេខ1បន្ថែមទៀត នៅលើគេហទំព័ររបស់ក្រុមហ៊ុន Lonely Planet ដែលជាគេហទំព័រផ្សព្វផ្សាយ និងជាប្រភពព័ត៌មានទេសចរណ៍ដ៏ល្បីមួយលើពិភពលោក។ ចំណែកឯឆ្នាំ2017 និងឆ្នាំ2018នេះ TripAdvisorបានបន្តផ្តល់ចំណាត់ថ្នាក់លេខ1 ដល់ប្រាសាទអង្គរវត្តរបស់កម្ពុជាក្នុងឋានៈជាសំណង់ដ៏មានសារៈសំខាន់ផ្នែកប្រវត្តិសាស្ត្រអស្ចារ្យបំផុតក្នុងលោក៕
August 8, 2018
Chelsea យល់ព្រមលើតម្លៃខ្លួន 71.6លានផោន ដើម្បីទិញ Kepa ពីក្លិប Bilbao
ក្លិបតោខៀវ Chelsea បានយល់ព្រមចំណាយប្រាក់ក្នុងតម្លៃខ្លួនជាកំណត់ត្រាពិភពលោកចំនួន 71.6លានផោន (ស្មើនឹង 91.6លានដុល្លារអាមេរិក) ដើម្បីនាំយកអ្នកចាំទី KepaArrizabalaga ពីក្លិប Athletic Bilbao ដើម្បីមកជំនួសកន្លែងរបស់កីឡាករ Thibaut Courtois។
ស្របពេលដែល Courtois ព្យាយាមបង្ខំឱ្យមានការផ្ទេរមួយទៅកាន់ក្លិប Real Madrid ក្លិប Chelsea បានចាត់វិធានការតាមរយៈការចំណាយប្រាក់ទិញរំលាយកិច្ចសន្យារបស់ Kepaនៅឯក្លិប Athletic Bilbao នៅមុនពេលថ្ងៃបិទទីផ្សារដោះដូរកីឡាកររបស់ក្របខ័ណ្ឌ Premier League នៅថ្ងៃព្រហស្បតិ៍ ស្អែកនេះ។
ក្លិប Bilbao បានត្រៀមខ្លួនរួចរាល់ក្នុងការបាត់បង់អ្នកចាំទីវ័យ 23ឆ្នាំរូបនេះ ដែលបានធ្វើដំណើរទៅកាន់ទីក្រុងម៉ាឌ្រីដ ជាមួយនឹងភ្នាក់ងាររបស់គេ នៅមុនពេលធ្វើដំណើរទៅកាន់ទីក្រុងឡុងដ៍ នៅព្រឹកថ្ងៃពុធនេះ ក្រោយពី Bilbao ប៊ិះតែលក់ Kepa ទៅឱ្យក្លិប Real ក្នុងតម្លៃខ្លួន២០លានអឺរ៉ូទៅហើយ កាលពីខែមករា។
តាមរយៈការបំពេញការផ្ទេរនេះ ក្លិប Chelsea នឹងបំបែកកំណត់ត្រានៃតម្លៃខ្លួន 66.9លានផោន (ស្មើនឹង 86.6លានដុល្លារអាមេរិក) ដែលក្លិប Liverpool បានចំណាយទៅឱ្យក្លិប Roma ដើម្បីទិញយកអ្នកចាំទីអន្តរជាតិប្រេស៊ីល Alisson កាលពីខែមុន។
Kepa ត្រូវបានរំពឹងទុកថា នឹងត្រូវពិនិត្យសុខភាពនៅថ្ងៃពុធនេះ ហើយអាចនឹងបង្ហាញខ្លួនជាលើកទី1 របស់គេក្នុងការប្រកួតក្របខ័ណ្ឌ Premier League នៅថ្ងៃសៅរ៍នេះ នៅលើទឹកដីក្រុម Huddersfield។
Kepa បានចំណាយពេល 2រដូវកាលមុន ក្នុងក្រុមជម្រើសទី1 របស់ Bilbao ដោយបានបង្ហាញខ្លួនក្នុងក្របខ័ណ្ឌ La Liga ចំនួន 53លើក៕
ប្រភពពី៖ The Telegraph
August 8, 2018
Tiger, Rory និងអតីតម្ចាស់ជើងឯកជាច្រើន ត្រៀមប្រជែងគ្នាក្នុង PGA
កីឡាករវាយកូនគោល Tiger Woods, Rory McIlroy និងអតីតម្ចាស់ជើងឯកពានរង្វាន់ធំៗចំនួន 29នាក់ផ្សេងទៀត បានចាប់ផ្តើមត្រៀមលក្ខណៈរបស់ខ្លួនក្នុងការចាប់ដៃគូប្រកួតដ៏គួរឲ្យចាប់អារម្មណ៍ ខណៈដែលការប្រកួតបែបហ្វឹកហាត់នានា បានចាប់ផ្តើមកាលពីថ្ងៃចន្ទ សម្រាប់ព្រឹត្តិការណ៍ PGA Championship លើកទី100។
កីឡាករកំពូលៗចំនួន 98នាក់ក្នុងចំណោមកីឡាករមានចំណាត់ថ្នាក់កំពូលទាំង100 របស់ពិភពលោក នឹងត្រូវប្រមូលផ្តុំគ្នានៅលើទីលាន Bellerive Country Club សម្រាប់ការប្រកួតដណ្តើមពានរង្វាន់ធំចុងក្រោយគេនៅឆ្នាំនេះ ដែលនឹងចាប់ផ្តើមប្រកួតនៅថ្ងៃព្រហស្បតិ៍។
Woods ម្ចាស់ជើងឯកពានរង្វាន់ធំ 14សម័យកាល នឹងព្យាយាមបញ្ចប់ការមិនស្គាល់ឈ្នះសោះរបស់ខ្លួនរយៈពេល 10ឆ្នាំក្រោយនេះ បន្ទាប់ពីការវះកាត់ឆ្អឹងខ្នងរបស់គេ ស្របពេលដែលម្ចាស់ជើងឯកពានរង្វាន់ធំ 3សម័យកាល Jordan Spieth នឹងព្យាយាមបំពេញការឈ្នះពានរង្វាន់ធំៗទាំងអស់ក្នុងអាជីពរបស់គេ។ កីឡាករកំពុងតែមានទម្រង់លេងល្អ McIlroy ម្ចាស់ជើងឯកពានរង្វាន់ធំ 4សម័យកាល និងជាម្ចាស់ជើងឯករង Open Championship រួមជាមួយនឹងម្ចាស់ជើងឯកពាន Master គឺ Patrick Reed, កីឡាករ Brooks Koepka ម្ចាស់ជើងឯក US Open 2សម័យកាល និង Francesco Molinari ដែលជាម្ចាស់ការពារតំណែងជើងឯក Open Championship សុទ្ធសឹងស្ថិតក្នុងចំណោមកីឡាករខ្លាំងៗដែលត្រូវចាប់អារម្មណ៍សម្រាប់យុទ្ធនាការធំចុងក្រោយគេក្នុងឆ្នាំ2018នេះ។
កីឡាករ Koepka បានឲ្យដឹងថា៖ «ខ្ញុំចូលចិត្តការរៀបចំរបស់ព្រឹត្តិការណ៍ PGA។ វាពិតជាលំបាកណាស់ និងជាការប្រជែងដ៏ស្វិតស្វាញមួយ»៕
ប្រភពពី៖ sports.yahoo.com
August 8, 2018
ការពិនិត្យសុខភាពដោយការបូមឈាម ត្រូវតមទឹក និងអាហារ មុនពេលបូម តើត្រូវដែរឬទេ?
ការណាត់ពិនិត្យសុខភាព ធ្វើតេស្ដឈាមស្វែងរករោគជំងឺផ្សេងៗ ម្នាក់ៗតែងតែនិយាយថា ត្រូវអត់អាហារ និងទឹក ដើម្បីឱ្យលិទ្ធផលតេស្ដឈាមមានប្រសិទ្ធភាព។ មនុស្សពេញវ័យគ្រប់រូប គួរតែទៅពិនិត្យសុខភាពឱ្យបានជាប់ជាប្រចាំ ទោះជាលោកអ្នកមានអារម្មណ៍ថា មានសុខភាពល្អក៏ដោយ។ គោលបំណងនៃការពិនិត្យសុខភាពជាប្រចាំនេះ គឺធ្វើឡើងដើម្បីស្វែងរកជំងឺផ្សេងៗ វាយតម្លៃការប្រឈមមុខនឹងជំងឺនាពេលអនាគត ណែនាំឱ្យចេះរបៀបថែទាំសុខភាពឱ្យបានល្អផ្តល់ការចាក់វ៉ាក់សាំងបង្ការ ឱ្យបានត្រឹមត្រូវតាមការកំណត់ ជួយឱ្យគ្រូពេទ្យធ្វើរោគវិនិច្ឆ័យបានឆាប់រហ័ស និងច្បាស់លាស់ ហើយទទួលបានទិន្នន័យនៃការពិនិត្យសុខភាពជាប្រចាំ។ ដូច្នេះហើយ តើការធ្វើតេស្ដឈាម គួរតែតមអាហារដូចមនុស្សគ្រប់គ្នាថា ដែរឬទេ? ទស្សនាវដ្តី ឡារ៉ែន សូមជម្រាបជូនប្រិយមិត្តអ្នកអានឱ្យបានជ្រាបដូចខាងក្រោម។
ការធ្វើតេស្ដឈាមរកជំងឺប្រភេទខាងក្រោមនេះ ត្រូវតមអាហារ និងទឹករយៈពេលលើសពី6ម៉ោង
• ពិនិត្យកម្រិតជាតិស្ករនៅក្នុងឈាមដូចជា តេស្ដទឹកនោមផ្អែម (លើកលែងតែការត្រួតពិនិត្យកម្រិតជាតិស្ករសមល្មម ឬអេម៉ូក្លូបិនអេដវិនស៊ី (HbA1c) ដែលអាចធ្វើតេស្ដឈាមបានដោយមិនចាំបាច់តមអាហារ និងទឹក)។
• ពិនិត្យរកជាតិខ្លាញ់ កូលេសស្ត្រូរ៉ល។
ការធ្វើតេស្ដឈាមរកជំងឺប្រភេទខាងក្រោមនេះ ដែលមិនចាំបាច់តមអាហារ និងទឹក
• ពិនិត្យកំហាប់ឈាម (ឈាមស ឈាមក្រហម អេម៉ូក្លូប៊ីន…)
• ពិនិត្យបរិមាណក្លាកេត (កោសិកាឈាម)
• ពិនិត្យភាពរឹងមាំនៃគ្រាប់ឈាម
• ពិនិត្យរកមេរោគអេដស៍
• ពិនិត្យរករោគថ្លើម និងតម្រងនោម
• ពិនិត្យក្រពេញទីរ៉ូអីុដ
• ពិនិត្យរកក្រុមឈាម
• ការបរិច្ចាគឈាម
ក៏ប៉ុន្ដែនៅមានការពិនិត្យសុខភាពដែលមិនចាំបាច់បូមឈាម ដែលត្រូវតមអាហារ និងទឹកដូចជា៖
• ការត្រួតពិនិត្យមើលអេកូប្រអប់ពោះ ត្រូវតមអាហារ ដើម្បីឱ្យបានមើលឃើញកាន់តែច្បាស់នៅក្នុងប្រអប់ពោះ។
• ការឆ្លុះអេកូក្រពះ និងពោះវៀន
• ការពិនិត្យតាមរយៈ X-ray កុំព្យូទ័រ ឬ CT Scan ដែលត្រូវចាក់សារធាតុជំនួយក្នុងការថតចូលក្នុងសរសៃឈាម ឱ្យតមទឹកតមអាហារក្រែងលោក្នុងករណីថា អ្នកជំងឺប្រតិកម្មចាញ់សារធាតុគីមីដែលបានចាក់ចូលទៅ និងបានធ្វើការប្រើបំពង់អុកស៊ីហែ្ស៊នជួយដកដង្ហើមទាន់ពេលវេលា។
នៅក្នុងករណីត្រូវពិនិត្យទឹកនោមផ្អែម ខណៈពេលកំពុងតាំងគភ៌នៅឡើយ ៖
• ការឆ្លុះ Screening តម្រូវឱ្យទទួលទានស្ករស 50ក្រាម និងបូមឈាមបន្ទាប់ពីទទួលទានរួចរយៈពេល1ម៉ោង ដោយមិនចាំបាច់តមអាហារ។
• ការពិនិត្យវិនិច្ឆ័យរោគ ចាំបាច់ត្រូវតមអាហារតមទឹកជាមុនសិន ព្រោះពេលបូមឈាមក្រោយការតម ក៏នឹងឱ្យទទួលទានស្ករ 100ក្រាមហើយបូមឈាមក្រោយទទួលទានរួចក្នុងអំឡុងពេល1-3ម៉ោង។ ក្នុងអំឡុងពេលរង់ចាំការបូមឈាម ត្រូវឱ្យអង្គុយស្ងៀម ហាមដើរទៅណាមកណា មិនដូច្នោះនឹងធ្វើឱ្យមិនឃើញលិទ្ធផល។
យ៉ាងណាមិញ នៅមានព័ត៌មានលម្អិតពីការត្រូវតមអាហារ តមទឹកមុនពេលពិនិត្យឈាមជាច្រើនទៀត ដែលយើងខ្ញុំសូមណែនាំឱ្យអញ្ជើញទៅរកគ្រូពេទ្យ ដើម្បីប្រឹក្សាយោបល់ឱ្យកាន់តែច្បាស់លាស់បន្ថែមទៀត៕
August 7, 2018
បង្គាស្រស់កោះកុង
“បង្គាស្រស់កោះកុង” ជាមុខម្ហូបដ៏ពេញនិយមប្រចាំភោជនីយដ្ឋាន ក្តាមប្រៃ ដែលអាចទទួលទានជុំគ្នាយ៉ាងរីករាយជាមួយនឹងទឹកត្រីកោះកុងដែលមានរសជាតិហឹរ និងមុតឆ្ងាញ់តែម្តង។ ជួបជាមួយនឹងមេចុងភៅធំ គឺលោក ផង់ ផានី្ន លោកបានប្រាប់ពី គ្រឿងផ្សំ និងរបៀបធ្វើមុខម្ហូបមួយមុខនេះដូចតទៅ។
គ្រឿងផ្សំ ទឹកត្រីកោះកុង
• ខ្ទឹមស
• ខ្ទឹមក្រហម
• ម្ទេសស្រស់
• ទឹកត្រី
• អំបិល
• ស្ករស
• ទឹកខ្មេះ
• ទឹក-សធម្មតា
វិធីធ្វើ ទឹកត្រីកោះកុង
ដំបូងត្រូវដាក់ឆ្នាំងដាំទឹក-សធម្មតាឱ្យពុះរួចសឹមចាក់ទឹកត្រី ស្ករស និងអំបិលបន្តិចចូល រំងាស់រហូតដល់រីងទឹកបន្តិច ទើបដាក់ទឹកខ្មេះចូលរំងាស់ជាមួយគ្នា ដើម្បីឱ្យទទួលបានរសជាតិជូរ ប្រៃ និងផ្អែម។ បន្ទាប់មក ត្រូវយកខ្ទឹមស ខ្ទឹមក្រហម និងម្ទេសស្រស់មកបុកឱ្យម៉ដ្ឋ រួចដាក់ចូលទៅក្នុងឆ្នាំងទឹកត្រី ដែលកំពុងរំងាស់នៅលើចង្ក្រាន ហើយកូរចូលគ្នាឱ្យសព្វ និងភ្លក្សរសជាតិឱ្យត្រូវតាមចំណង់ចំណូលចិត្តជាការស្រេច។
គ្រឿងផ្សំ បង្គាស្រស់កោះកុង
• បង្គាស្រស់ 2ខាំ
• ម្រះ
• ទឹកកក
• ទឹកត្រីកោះកុង
វិធីធ្វើ បង្គាស្រស់កោះកុង
របៀបរៀបចំមុខម្ហូបមួយនេះគឺមានភាពងាយស្រួលខ្លាំងណាស់ ដោយលោកអ្នកគ្រាន់តែយកបង្គាស្រស់នោះទៅបកសម្បកចេញ លាងទឹកឱ្យស្អាតល្អ និងវះយកអាចម៍ចេញពីខ្នងរបស់វាឱ្យអស់ ទុកឱ្យស្រស់ទឹក។ ចំណែកម្រះ ត្រូវពុះយកគ្រាប់ចេញ រួចលាងទឹកសម្អាតឱ្យបានស្អាត និងចិតជាបន្ទះស្តើងៗ ហើយយកចានស្អាតមួយមកក្រាលដោយដុំទឹកកក រួចដាក់បន្ទះផ្លែម្រះ និងតម្រៀបបង្គាស្រស់ ដែលបានលាងសម្អាតស្អាតនោះពីលើជាការស្រេច ដោយលោកអ្នកត្រូវក្លាស្សេវាឱ្យត្រជាក់ល្អ រួចទុកទទួលទានជាមួយនឹងទឹកត្រីកោះកុង ដែលមានរសជាតិហឹរ ជូរ ប្រៃ និងផ្អែមយ៉ាងរីករាយជាមួយនឹងមិត្តភក្តិ ឬក្រុមគ្រួសារបាត់ទៅហើយ៕
August 7, 2018