Category: សង្គម និងសេដ្ឋកិច្ច

បន្ទាប់ពីទទួលបានភាពល្បីល្បាញតាមរយៈរឿងភាគបុរាណថៃ « បុព្វេសន្និវាស» កន្លងមក ប្រទេសថៃបានរៀបចំផ្សារបុរាណ និងតំបន់ទេសចរណ៍ប្រវត្តិសាស្ត្រជាច្រើនកន្លែងនៅក្នុងទីក្រុងអយុធ្យា ឱ្យវិលត្រឡប់ទៅកាន់បុរាណកាលវិញ ដែលធ្វើឱ្យភ្ញៀវទេសចរណ៍ជាតិ និងអន្ដរជាតិទទួលបានអារម្មណ៍ដ៏ប្លែកថ្មីសន្លាងមួយផ្សេងទៀត។ នៅក្នុងថ្ងៃនេះ គេហទំព័រឡារ៉ែន សូមនាំអារម្មណ៍របស់ប្រិយមិត្តទាំងអស់គ្នា ធ្វើដំណើរកម្សាន្ដនៅតាមបណ្ដាផ្សារបុរាណនៅក្នុងក្រុង អយុធ្យា ។

1-តាឡាតក្រុងស៊ី (ตลาดกรุงศรี)

ផ្សារបុរាណមួយនេះ ហាក់បីដូចជាផ្សារណាត់ដ៏វែងជាងគេង និងប្លែកត្រង់ថា អ្នកលក់នៅទីនេះតម្រូវឱ្យស្លៀកសម្លៀកបំពាក់បុរាណ និងលក់អាហារប្រចាំតំបន់។ ផ្សារដ៏ធំដំបូងនេះ មានទៅតាំងនៅម្ដុំផ្លូវធំក្រុង អយុធ្យា ដែលចាប់បើកលក់ពីម៉ោង 16:00-22:00 ជារៀងរាល់ថ្ងៃ សុក្រ និងពីម៉ោង 09:00-17:00​ រាល់ថ្ងៃច័ន្ទ-អាទិត្រ។

2-តាឡាតណាមបាងក្រៈចាក់ ( ตลาดน้ำวนบางกะจะ)

នេះជាផ្សារបណ្ដែតទឹកដែលទើបតែបង្កើតថ្មីនៅអំឡុង 2018 នេះ ដែលមានរោងបណ្ដែតទឹកទាំងអស់ 10 ខ្នង សាងឡើងតាមរចនាបទបែបបុរាណថៃនៅក្នុងក្រុងអយុធ្យា និងមានទីតាំងស្ថិតនៅតាមបណ្ដោយមាត់ច្រាំងទន្លេចៅផ្រៈយ៉ា ។ ផ្សារបណ្ដែតទឹកបុរាណនេះ ចាប់បើកពីម៉ោង 09:00-18:00​ ជារៀងរាល់ថ្ងៃសៅរ៍-អាទិត្រ។

3-តាឡាតលុងពូថួត ( ตลาดหลวงปู่ทวดและพุทธอุทยานมหาราช)

ផ្សារ លុងពូថួត ជាផ្សារបណ្ដែតទឹកនៅក្បែរផ្លូវ សាយអេសៀ ( ถนนสายเอเชีย) ជាផ្សារដែលសម្បូរទៅដោយ អាហារ របស់ប្រើប្រាស់ប្រចាំថ្ងៃ គ្រឿងតុបតែងខ្លួនបែបបុរាណ គ្រឿងអលង្ការ គ្រឿងសង្ហារឹម…ល។ អ្វីដែលពិសេសនៃប្រវត្តិផ្សារមួយនេះគឺ ជាផ្សារដែលភ្ញៀវទេសចរអាចមកធ្វើបុណ្យបូជារូបសំណាក់ព្រះតេជគុណ លុងពូថួត ទៅតាមជំនឿប្រជាជនថៃក្នុងតំបន់ក្រុងអយុធ្យានេះ។ ផ្សារបណ្ដែតទឹកនេះ មានបើកលក់ចាប់ពីម៉ោង 10:00-16:00 ជារៀងរាល់ថ្ងៃតែម្ដង។

4-តាឡាតកូងខូង បានសែងសូម ( ตลาดโก้งโค้ง บ้านแสงโสม )

មានទីតាំងស្ថិតនៅក្នុងស្រុក បាងប្រៈអ៊ីន ក្រុងច័ន្ទ ខេត្ត អយុធ្យា ជាផ្សារលក់នៅលើដីបែបបុរាណ និងវ័យចំណាស់ជាងគេ ដែលឆ្លុះបញ្ចាំងអំពីតថភាពរបស់ជនជាតិថៃនាសម័យបុរាណកាល។ ផ្សារចំណាស់នេះ មានលក់អាហារបុរាណថៃ និងអាហារហ្លួង ដែលទទួលបានការពោលសរសើរពីរស់ជាតិឈ្ងុយឆ្ងាញ់ពិសា។ ក៏មានបើកលក់ជារៀងរាល់ថ្ងៃព្រហស្បត្តិ៍-អាទិត្រ ចាប់ពីម៉ោង 10.00-16.00 នាទី។

5-តាឡាតណាមអយោថៈយ៉ា ( ตลาดน้ำอโยธยา)

មានទីតាំងនៅក្នុងក្រុងអយុធ្យា ជាផ្សារបុរាណមួយទៀតដែលបង្ហាញអំពីសិល្បៈវប្បធម៌ថៃបុរាណដល់ភ្ញៀវទេសចរមកកម្សាន្ដនៅទីនេះ។ បណ្ដែតទឹកនេះ ភាគច្រើនសម្បូរលក់សម្លៀកបំពាក់បុរាណថៃ និងគ្រឿងអនុស្សាវរីយ៍ ព្រមទាំងអាហារថៃគ្រប់ប្រភេទផងដែរ និងបើកលក់រាល់ថ្ងៃ ពីម៉ោង 09:00-19:00 ។

6-តាឡាតណាមធុងបួឈុន ( ตลาดน้ำทุ่งบัวชม )

មិនខុសគ្នាប៉ុន្មានទេ ជាផ្សារដែលលក់នូវគ្រឿងវត្ថុបុរាណសម្រាប់ទាំងលម្អគេហដ្ឋាន គ្រឿងសិល្បៈ វត្ថុអនុស្សាវរីយ៍ សម្លៀកបំពាក់ និងសម្ភារៈសម្រាប់បូជា..ជាដើម។ ផ្សារបណ្ដែតទឹកនេះមានទីតាំងនៅក្នុងស្រុក បាងណយ ក្រុងអយុធ្យា និងបើកលក់ជារឿងរាល់ថ្ងៃ ពីម៉ោង 09:00-20:00៕

ពិតជាភ្ញាក់ផ្អើលមែនទែន ដោយហេតុតែស្រឡាញ់ប្រពៃណីវប្បធម៌ខ្មែរ និងបង្ហាញឱ្យជូនពីសមត្ថភាពបកស្រាយចម្រៀងភាសាខ្មែរ កញ្ញា សង់​ឌ្រី​ន Kanha Sandrine បានវិលត្រឡប់មកវិញជាថ្មីម្ដងទៀតតាមរយៈវីដេអូចម្រៀងបែបប្រពៃភ្លេងការគឺបទ « ម្លប់ដូង » ក្នុងឈុតសម្លៀកបំពាក់កូនក្រមុំខ្មែរ។

គួរំឭកដែរថា ពលរដ្ឋ​ខ្មែរ​អ្នក​និយម​ប្រើប្រាស់​ហ្វេ​ស​ប៊ុ​ក អាច​ធ្លាប់​ឃើញ​ឃ្លី​ប​វីដេអូ​ចម្រៀង​របស់​ស្ត្រី​បរទេស​ស្បែ​កស សក់ទង់ដែង ស្លៀក​សម្លៀកបំពាក់​ប្រពៃណី​ខ្មែរ ហើយ​ច្រៀង​ជា​ភាសា​ខ្មែរ​ គឺ​កញ្ញា សង់​ឌ្រី​ន Kanha Sandrine ដែលជា​ជនជាតិ​កាណាដា ដែល​រស់នៅក្នុង​ខេត្ត​និយាយ​ភាសា​បារាំង ម៉ុងរ៉េអាល់​ ជាច្រើនរួចមកហើយ។ នាងមិន​ត្រឹមតែ​ច្រៀង​បទ​ចម្រៀង​ខ្មែរ​នា​ទស្សវត្សរ៍​1960 និង​70ទេ នារីវ័យ​ជាង​22 ឆ្នាំរូបនេះ​ក៏​ច្រៀង​បទ​ចម្រៀង​បរទេស​ល្បីៗ ដែល​ត្រូវបាន​បកប្រែ​មកជា​ភាសា​ខ្មែរផង​ដែរ​។

នាងចេះនិយាយ​ភាសា​ខ្មែរ​បាន​បន្តិចបន្តួច ពីព្រោះ​នាងមាន​មិត្ត​ជិតស្និទ្ធ​ម្នាក់​គឺ​លោក តូ​នី កែវ ដែល​បាន​បង្រៀន​នាង។ លោក តូ​នី កែវ គឺជា​ជនជាតិខ្មែរ ហើយ​បច្ចុប្បន្ន​លោក​រស់នៅ​ប្រទេស​កាណាដា​។ លោក​បាន​បង្រៀន​រូបនាងច្រៀង​ភាសា​ខ្មែរ ពីព្រោះ​លោក​ចង់​ច្រៀង​ចម្រៀង​រួមគ្នា​ជាមួយ​នាង​។ មុនដំបូង គេមើលឃើញនាង​​​ច្រៀង​បទ Price Tag ដែល​បានទទួល​ការគាំទ្រ​យ៉ាងខ្លាំង​។ នាងត្រូវបានទទួលបាន​ការគាំទ្រ​ពី​ពលរដ្ឋ​ខ្មែរ ហើយ​វា​បាន​លើកទឹកចិត្តដល់រូបនាង​ឱ្យ​ហាត់​ច្រៀង​ចម្រៀង​ខ្មែរ​ផ្សេងទៀត​។

ជាក់ស្តែងថ្មីនេះ នាងបានបកស្រាយបទចម្រៀងភ្លេងការ ជាភាសាខ្មែរ បានយ៉ាងពិរោះរណ្ដំចិត្ត បើចង់ដឹងថាបែបណាសូមទស្សនាវីដេអូខាងក្រោមនេះ៖

កាលពីប៉ុន្មានម៉ោងមុននេះ រាជ្ជនីចិត្តធម៌ ដេននី ក្វាន់ បង្កភាពភ្ញាក់ផ្អើលពេញបណ្ដាញសង្គមហ្វេសប៊ុកយ៉ាងខ្លាំង ដោយនាងបានប្រកាសតាមរយៈការ Live Video លក់ផលិតផលថែរក្សាសម្ផស្សរបស់ខ្លួនថា នាងកំពុងតាំងគភ៌មួយខែជាងមកហើយ ជាមួយនឹងគូស្នេហ៍មាឌធំដែលអ្នកជំនួញលក់រថយន្ដ ទាំងដែលខ្លួនមិនទាន់រៀបការ ក្រាបក្បាលដល់កន្ទេលផងនោះ។

ពិតជាភ្ញាក់ផ្អើលណាស់ ខណៈ ដេននី ក្វាន់ បានធ្វើការនូវ Live Video ហើយថែមទាំងនិយាយលាតត្រដាងថា ខ្លួនមានផ្ទៃពោះជាងមួយខែបែបនេះ។ ទន្ទឹមនឹងនេះដែរ ក្នុងនោះក៏មានការសាកសួរ អំពីការរៀបការ កញ្ញា ដេននី ក្វាន់ បាននិយាយថា នាងមិនទាន់គិតគូរដល់រឿងរៀបការនៅឡើយទេ ប៉ុន្តែចង់រកស៊ីមានបានជាងហ្នឹងសិន បើទោះបីជាមានការរិះគន់ថា នាងមានផ្ទៃពោះមុនពេលរៀបការក្ដី ក៏នាងមិនខ្វល់ដែរ។ នាងបន្តថា រៀបការគឺនៅតែរៀបការហើយ គ្រាន់តែចង់រកស៊ីឱ្យមានបានជាងនេះសិន។

គួរបញ្ជាក់ផងដែរថា ស្របការលាតត្រដាងការពិតរបស់ខ្លួនបែបនេះ មានមហាជនជាច្រើនបានធ្វើការរិះគន់ចំពោះទង្វើរបស់នាង ព្រោះគេមើលឃើញថា មិនសមស្របតាមប្រពៃណីទំនៀមទំលាប់ខ្មែរ ក៏ប៉ុន្ដែមានមតិមួយចំនួនទៀតយល់ឃើញថា សម័យនេះហើយរកស៊ីឱ្យមានបានជារឿងសំខាន់ជាង៕

ត្រឡប់មកវិញសាជាថ្មីម្ដងទៀតជាមួយដំណើរកម្សាន្ដនៅក្នុងប្រទេសថៃ ( យើងទៅមិនឆ្ងាយទេ និងចំណាយពេលត្រឹមមួយថ្ងៃ ងាយស្រួលសម្រាប់អ្នកដែលសម្រាកពីការងារនាថ្ងៃចុងសបា្ដហ៍ )។ យកពេលសម្រាកមួយថ្ងៃ ដើរកម្សាន្ដនៅជិតៗទីក្រុង បាងកក។ ថ្ងៃនេះ យើងសូមនាំដំណើរលោកអ្នកទៅកាន់ទៅក្រុង ឈុនប៊ុរី ត្រឹមរយៈពេលមួយថ្ងៃ តែហាក់បីដូចបានដើរកម្សាន្ដនៅប្រទេសជប៉ុន និងចិនដូច្នោះដែរ។

បើយើងធ្វើដំណើរចេញពីទីក្រុងបាងកក នៅវេលាម៉ោង 7ព្រឹកនោះ យើងនឹងដល់ទៅក្រុងឈុនប៊ុរី ដោយប្រើពេលវេលាត្រឹមតែ 1ម៉ោងកន្លះប៉ុណ្ណោះនឹងមកដល់ផ្លូវធំដំបូងគេគឺ ក្រេនខេនយ៉ន ស៊ិរិ ឈុនប៊ុរី ( แกรนด์แคนยอน คีรี ชลบุรี ) ដែលត្រូវចំណាយថ្លៃរថយន្ដឈ្នួលអស់ 20បាត(អូហូ ពិតជាអស់តិចមែន ប្រហែលជា 2,500រៀល)។ ចេញដំណើរពីចំណតឡាន 100ម៉ែត្រ លោកអ្នកនឹងបានឃើញទេសភាពដ៏ស្រស់ត្រកាល ដែលអាចឈរមើលពីលើស្ពានបាននោះ លោកអ្នកនឹងឃើញអាងទឹកថ្មដែលមានទំហំធំដល់ទៅ 100រ៉ៃ និងមានជម្រៅទឹក 30ម៉ែត្រ។ លោកអ្នកច្បាស់ជាជាប់ចិត្តនឹងទេសភាពនេះមិនខាន(ដូចរូបខាងក្រោម)។

យើងសូមណែនាំកន្លែងឈប់សម្រាកពេលព្រឹកនៅទីក្រុងឈុនប៊ុរី ដោយធ្វើដំណើរបន្ដប្រមាណជា 10គីឡូម៉ែត្រទៀត​ពីចំណតឡានក្រុង នោះយើងមកដល់ហាងកាហ្វេមួយដែលមានការរៀបចំស្ទីលបែបហាងនៅប្រទេសអង់គ្លេស មានឈ្មោះថា We coffee & cuisine។ នៅហាងនេះ មានការតុងតែងគ្រឿងម៉ាស៊ីនឆុងកាហ្វេទាំងសម័យទំនើប និងបុរាណ ក៏ដូចជាមានគ្រឿងសម្ភារផ្ទះបាយបុរាណរបស់ជនជាតិអង់គ្លេសផងដែរ។ ទាំងកាហ្វេ នំ និងអាហារនៅក្នុងហាងនេះ យើងអាចឱ្យពិន្ទុ 10/10 ពេញតែម្ដង ព្រោះពិតជាមានរសជាតិឆ្ងាញ់ពិសា ហើយភ្ញៀវដែលមកកាន់ហាងនេះ តែងតែនិយមភ្លក្សនូវរសជាតិ Latte /Matcha Latte ក្ដៅ + Strawberry Shortcake…។

ធ្វើដំណើរប្រមាណ 20គីឡូម៉ែត្រទៀតក៏មកដល់ស្ថានីយរថភ្លើង ដែលយើងនឹងនាំអារម្មណ៍លោកអ្នកទៅទស្សនាទឹកជ្រោះមួយកន្លែងដែលមានទាំងត្រីហែលប្រឡែងលេងជាមួយមនុស្ស និងសត្វព្រៃផងដែរ ទីនោះមានឈ្មោះថា «ណាមតុក ឆាន់តាថេន ( น้ำตกชันตาเถร)ឬហៅជាភាសាខ្មែរយើងថា ទឹកធ្លាក់ ឆាន់តាថេន »។ លោកអ្នកត្រូវចំណាយប្រាក់ទិញសំបុត្រចូលកម្សាន្ដអស់ 100បាត តែសម្រាប់ជនជាតិថៃអស់ 20បាត  ហើយធ្វើដំណើរពីច្រកចូលទៅកាន់ទឹកជ្រោះក្នុងរយៈចម្ងាយ 300ម៉ែត្រ។ ទឹកជ្រោះនៅទីនេះមាន 6ដំណាក់ ហើយដំណាក់នីមួយៗត្រូវធ្វើដំណើរឡើងទៅប្រមាណ 1 គីឡូម៉ែត្រ។

ក្រោយកម្សាន្ដទឹកយ៉ាងសប្បាយរីករាយហើយ យើងសូមណែនាំលោកអ្នកពីកន្លែងកម្សាន្ដ ញ៉ាំអាហារ និងទិញអីវ៉ាន់ នៅក្នុងផ្សារ «J-Park ស្រ៊ីរ៉ាឆា ศรีราชา » ដែលមើលទៅប្លែកអារម្មណ៍ ហាក់បីដូចជាអ្នកកំពុងស្ថិតនៅក្នុងប្រទេសជប៉ុនអីចឹងដែរ។ នៅទីនេះ មានអាហារឆ្ងាញ់ៗតម្លៃសមរម្យ និងជាពិសេសមានកន្លែងថតរូបស្អាតៗ ដែលរំលេចនូវទេសភាពដូចប្រទេសជប៉ុនគួរឱ្យប្លែកអារម្មណ៍មែនទែន។ ផ្សារនេះមានទីតាំងស្ថិតនៅជិតម្ដុំផ្លូវធំ Motor Way ដែលជាផ្លូវបំបែកទៅកាន់ទីក្រុងឆ្នេរសមុទ្រ ប៉ាតាយ៉ា។

អ្នកណាថាខេត្តឈុនប៊ុរី មិនមានឆ្នេរសមុទ្រ?  ឥឡូវតោះ ទៅលេងឆ្នេរសមុទ្រ «បាងសែន (บางแสน) » ដែលធ្វើដំណើរមិនឆ្ងាយពីផ្សារនេះប៉ុន្មានទេ ប្រមាណជា 15នាទីតែប៉ុណ្ណោះ។ ឆ្នេរខ្សាច់ បាងសែន មានសម្បុរពណ៌ក្រម៉ៅដូចខ្សាច់ទន្លេ ឬរីឯសមុទ្រវិញក៏មិនសូវជាពណ៌ខៀវប៉ុន្មានដែរ តែខ្យល់ជំនោរមាត់សមុទ្រវិញ ពិតជាបរិសុទ្ធ និងស្រស់ស្រាយអារម្មណ៍ខ្លាំងមែនទែន។ លោកអ្នកអាចជួបជុំគ្រួសារញ៉ាំអាហារសមុទ្រនៅទីនេះយ៉ាងសប្បាយរីករាយនាពេលរាត្រី ឬអង្គុយមើលថ្ងៃលិច ហើយសឹមត្រឡប់មកកាន់ទីក្រុងបាងកកវិញក៏បានផងដែរ៕

ភាពសប្បាយរីករាយនៅក្នុងថ្ងៃឈប់សម្រាករបស់មនុស្សម្នាក់ៗគឺមិនដូចគ្នានោះទេ ​អ្នកខ្លះចង់នៅផ្ទះជួបជុំជាមួយក្រុមគ្រួសារក្នុងពេលសម្រាកពីការងារ ខណៈពេលដែលអ្នកខ្លះទៀតចូលចិត្តការធ្វើដំណើរកម្សាន្តនៅតាមរមណីយដ្ឋានក្នុងស្រុក។

បើសិនជាមិត្តអ្នកអានទាំងអស់មានពេលវេលាសម្រាកច្រើនថ្ងៃ អ្នកគួរតែលៃពេលវេលាខ្លះៗក្នុងការនាំក្រុមគ្រួសាររបស់អ្នក
ចេញទៅកម្សាន្ត នៅតាមរមណីយដ្ឋានជិតឆ្ងាយក្នុងស្រុកខ្មែរ ដើម្បីបន្ថូរអារម្មណ៍ស្មុគស្មាញពីការងារ និងដើម្បីប្តូរបរិយាកាសនៅក្នុងក្រុមគ្រួសាររបស់អ្នកផង។

ឡារ៉ែន សូមណែនាំអំពីរមណីយដ្ឋាននៅក្នុងខេត្តបន្ទាយមានជ័យទុកជាចំណងដៃសម្រាប់ថ្ងៃឈប់សម្រាក ជូនដល់ប្រិយមិត្តអ្នកអានទស្សនាវដ្តី ឡារ៉ែន ទាំអស់ដូចតទៅ។

ខេត្តបន្ទាយមានជ័យគឺជាខេត្តមួយ ដែលប្រជាជនខ្មែរយើងមិនសូវជាចាប់អារម្មណ៍ប៉ុន្មានទេ បើនិយាយអំពីដំណើរកម្សាន្តទៅកាន់ទីរួមខេត្តមួយនេះ តែមិនមានន័យថាខេត្តបន្ទាយមានជ័យមិនមានអ្វីល្អស្អាតសម្រាប់ភ្ញៀវទេសចរក្នុងស្រុក និងក្រៅស្រុកមកទស្សនា និងសម្រាកកម្សាន្តនាចុង សប្តាហ៍​ ឬថ្ងៃឈប់សម្រាកផ្សេងៗនោះទេ ដូច្នេះបើចង់ដឹងថាមានអ្វីខ្លះដែលពិសេសនៅក្នុងទឹកដីខេត្តបន្ទាយ
មានជ័យនោះ សូមអានអត្ថបទខាង ក្រោមជាបន្តទៀត ដើម្បីទទួលបាននូវសេចក្តីលម្អិតទាំងអស់គ្នា។

នៅក្នុងខេត្តបន្ទាយមានជ័យអ្នកអាចទៅកម្សាន្តនៅតាមរមណីយដ្ឋានជាច្រើនកន្លែង រាប់បញ្ចួលទាំងការដើរកម្សាន្តតាមបែបធម្មជាតិ និងបែបវប្បធម៌។ អ្នកក៏អាចទៅទស្សនានៅតាមបណ្តាប្រាង្គប្រាសាទនានានៅក្នុងខេត្តបន្ទាយមានជ័យមានដូចជា ប្រាសាទបន្ទាយឆ្មា ប្រាសាទបន្ទាយនាង ប្រាសាទបន្ទាយទ័ពជាដើម។ ក្រៅពីនេះ អ្នកក៏អាចឈាងទៅលេងនៅរមណីយដ្ឋានបែបធម្មជាតិ និងបែបវប្បធម៌ មួយកន្លែងទៀត ដែលមានឈ្មោះថាល្អាងភ្នំតួច។ ល្អាងភ្នំតូច ស្ថិតនៅក្នុងស្រុកសេរីសោភ័ណ។ រមណីយដ្ឋានមួយកន្លែងនេះជារមណីយដ្ឋាន ដែលមានធម្មជាតិស្រស់បំព្រងលាយឡំដោយទេសភាពនៃភ្នំតូចធំ និងផ្ទាំងថ្មធំៗជាច្រើនគួរឱ្យត្រជាក់ភ្នែកក្រៃលែង។

បើអ្នកបានទៅកម្សាន្តនៅរមណីយដ្ឋានល្អាងភ្នំតូចនេះ ចំពេលដែលប្រជាជននៅក្នុងតំបន់នេះធ្វើការប្រណាំងទូកលេងវិញនោះ អ្នកនឹងទទួលបាននូវទស្សនីយភាពប្លែក និងអាចរសាយអស់ទុក្ខកង្វល់ទាំងអំបាលម៉ានរបស់អ្នក ដោយសារតែភាពសប្បាយរីករាយ និងស្នាមញញឹមដ៏រួសរាយរាកទាក់របស់ប្រជាជននៅក្នុងតំបន់នោះផ្តល់ឱ្យអ្នក។ ប្រសិនបើមានពេលវេលាគ្រប់គ្រាន់ អ្នកអាចទៅមើលសត្វក្រៀលក្រហមទាំងហ្វូងៗ ខ្លះហោះហើរពេញផ្ទៃមេឃលាយឡំដោយពណ៌ដ៏ស្រស់ត្រកាលនៃធម្មជាតិនៅជុំវិញនោះ ឯខ្លះទៀតកំពុងប្រលែងគ្នាលេងតាមមែកឈើ និងមានខ្លះទៀតកំពុងចាប់ត្រីជាអាហារយ៉ាងខ្ញៀវខ្ញារនៅក្នុងអាងត្រពាំងថ្ម។ ពេលវេលាដ៏ល្អបំផុតក្នុងការទៅទស្សនាហ្វូងសត្វក្រៀលក្រហមយ៉ាងច្រើននេះ ហើយដើម្បីទៅដល់ទីនោះ អ្នកត្រូវធ្វើដំណើរតាមទូក
ដែលធ្វើឱ្យអ្នកទទួលអារម្មណ៍ថានេះជាពេលវេលាសម្រាកដ៏ពិតប្រាកដរបស់អ្នក។

កន្លែងកម្សាន្តនៅខេត្តបន្ទាយមានជ័យមិនទាន់បញ្ចប់ត្រឹមនេះនោះទេ អ្នកអាចទៅកម្សាន្តតាមបែបផ្សងព្រេងនៅតាមជម្រាលភ្នំ និងឡើងភ្នំជាដើម ដូចជាភ្នំបាក់, ភ្នំជញ្ជាំង, ភ្នំឈុនឈៀង និងភ្នំស្វាយ-ល-។ ហើយអ្នកក៏អាចហួសទៅទស្សនានៅកន្លែងស្មូនឆ្នាំង និងកន្លែងត្បាញសូត្រជាដើម ដើម្បីទទួលបាននូវភាពស្រស់ស្រាយសប្បាយចិត្តនៅក្នុងដំណើរកម្សាន្តនាថ្ងៃឈប់សម្រាករបស់អ្នក និងក្រុមគ្រួសារ៕

ឡារ៉ែន សូមណែនាំកន្លែងដើរកម្សាន្តល្បីៗនៅក្នុងប្រទេសជិតខាងរបស់យើងដូចជា ប្រទេស​ថៃ ប្រទេសវៀតណាម និងឡាវជាដើម។

1. ប្រទេសថៃ

បើមិត្តអ្នកអានចង់ទៅលេងនៅប្រទេសថៃ កុំភ្លេចទៅងូតទឹកសមុទ្រនៅហួហ៊ីន (Hua Hin) ព្រោះទីនោះគឺជាទឹកដីដ៏ស្រស់សោភារបស់ប្រទេស ថៃ ហើយក៏ជាឋានសួគ៌សម្រាប់អ្នកទេសចរជាតិ និងអន្តរជាតិដែរ។ ហួហ៊ីន ជាតំបន់ទេសចរណ៍បែបធម្មជាតិ ដែលស្ថិតនៅក្នុងខេត្ត ប្រាក់ជួបគីរីខាន (Prachap Khiri Khan) នៅទីនោះអ្នកអាចរកឃើញនូវភាពរីករាយថ្មីៗ ដែលអ្នកមិនធ្លាប់ជួបពីមុនមកដូចជា Resort ដ៏ស្រស់សោភាអណ្តែតពីលើផ្ទៃទឹកសមុទ្រអាកាសធាតុដ៏ល្អ និងខ្យល់បរិសុទ្ធពីសមុទ្រធំល្វឹងល្វើយ រីករាយជាមួយនឹងការជិះសេះលេងតាមឆ្នេរសមុទ្រ បង្ហោះខ្លែង ជិះម៉ូតូទឹក ជិះស្គីលើទឹក ជិះទូកវែង និងការភ្លក់រសជាតិអាហារប្លែកៗជាដើម។ ក្រៅពីនេះ អ្នកអាចបង្ហួសទៅលេងព្រះបរមរាជវាំង ប្រាសាទចំណាស់ៗ ស្ថានីយរថភ្លើង ជិះដំរី និងសួនសត្វជាដើម តាមរយៈការជួលរថយន្តតាក់ស៊ី ឡានក្រុង ទូក រថភ្លើង ឬយន្តហោះក៏បាន។

2. ប្រទេសវៀតណាម

ដាឡាត់គឺជាទីក្រុងដ៏រ៉ូមែនទិក និងពោរពេញដោយសន្តិភាព ស្ថិតនៅក្នុងតំបន់ ឡាងប៊ែង (Langbiang) ប្រទេសវៀតណាម។ នៅទឹកដី ដាឡាត់មានកន្លែងទេសចរណ៍ដ៏ទាក់ទាញជាច្រើនដូចជា ស្ថានីយ៍រថភ្លើង ផ្ទះសំណាក់ហាងង៉ា (Hang Nga) និងកន្លែងកម្សាន្ត Crazy house ដែលភាគច្រើនជាស្នាដៃតាមបែបបារាំង។ ទីក្រុងដាឡាត់ក៏អាចហៅថាជាទីក្រុងផ្កាផងដែរ ព្រោះវាជាទីកន្លែងដ៏ល្អបំផុតក្នុងការដាំផ្កា ហើយទីក្រុងនេះក៏ជាកន្លែងប្រជុំទៅដោយផ្កាចម្រុះពណ៌ ចម្រុះប្រភេទ និងជាកន្លែងប្រកួតសម្រស់ផ្កាជារៀងរាល់៤ឆ្នាំម្តងថែមទៀតផង។ ដាឡាត់ក៏នៅមានទីតាំងស្រស់ស្អាតជាច្រើនទៀតដូចជា បឹងសួនហ្វង (Xuan Houng) បឹងទុក្ខព្រួយ ជ្រលងស្នេហ៍ ភ្នំឡាងប៊ែង (Lang Biang) ទឹកធ្លាក់ប្រេន (Prenn) និងទឹកធ្លាក់ផុងហ្គ័រ (Pongour) ដែលជាទឹកធ្លាក់ធំជាងគេនៅក្នុងប្រទេសវៀតណាម។

3. ប្រទេសឡាវ

តំបន់ដែលអ្នកអាចចាត់ទុកថាជាទឹកដីស្រស់បំព្រង សម្បូរទៅដោយធនធានធម្មជាតិ ប្រវត្តិសាស្ត្រ និងវប្បធម៌ ស្ថិតនៅក្នុងទីក្រុង ហ្លួងប្រាបាង (Luang prabang) ប្រទេសឡាវ។ បើអ្នកជាមនុស្សម្នាក់ដែលចូលចិត្តធម្មជាតិ ធានាថាទីក្រុងមួយនេះពិតជាទីកន្លែងកម្សាន្ត ដែលត្រូវចិត្តអ្នកបំផុត។ ទីក្រុងហ្លួងប្រាបាង មិនមានអគារទំនើបៗទេ គឺមានតែផ្ទះដែលសង់តាមស្ថាបត្យកម្មបារាំង និងឥណ្ឌូចិន រួមជាមួយដងផ្លូវ ដែលមានភាពស្ងប់ស្ងាត់អមទៅដោយហាងកាហ្វេតាមដងផ្លូវជាច្រើន។ អ្នកទៅទស្សនានៅទីនោះមិនដែលរំលងទឹកជ្រោះ កួងស៊ី (Kuang Si) នោះទេ ព្រោះវាជាទីតាំងដ៏ទាក់ទាញបំផុតនៅក្នុងទឹកដី ហ្លួងប្រាបាង នេះ។ ទឹកជ្រោះដ៏ត្រជាក់ស្រេប អមជាមួយនឹងធម្មជាតិដ៏ស្រស់បំព្រង និងស្នាមញញឹមយ៉ាងផ្អែមល្ហែមរបស់ប្រជាជននៅកួងស៊ី ធ្វើឱ្យដំណើរកម្សាន្តរបស់អ្នកកាន់តែមានន័យថែមទៀត៕