Category: សង្គម និងសេដ្ឋកិច្ច

7 ខែដើមឆ្នាំ តួលេខចំណូលពន្ធនៅបន្តកំណើន
អគ្គនាយកដ្ឋានពន្ធដារដែលមានតួនាទីស្នូលក្នុងការប្រមូលចំណូលពន្ធ-អាករគ្រប់ប្រភេទ ក្នុងរយៈពេល 7ខែដើមឆ្នាំនេះប្រមូលចំណូលពន្ធបានចំនួនជាង 1ពាន់លានដុល្លារ (1,356.36) ឬស្មើនឹងជាង70% នៃផែនការដែលកំណត់ដោយច្បាប់។ នេះបើតាមរបាយការណ៍កិច្ចប្រជុំបូកសរុបលទ្ធផលការងារប្រចាំខែរបស់អគ្គនាយកដ្ឋានពន្ធដារ។
ឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធដារថ្លែងឱ្យដឹងថា លទ្ធផលក្នុងការប្រមូលចំណូលពន្ធរបស់អគ្គនាយកដ្ឋានពន្ធដារទទួលបានចំណូលពន្ធ-អាករគ្រប់ប្រភេទតាមប្រព័ន្ធគ្រប់គ្រងទិន្នន័យចំណូលអនឡាញ (Online) ក្នុងខែកក្កដាកន្លងទៅនេះមានចំនួនជាង 689ពាន់លានរៀលស្មើប្រមាណជាង 172លានដុល្លារ កើនឡើងចំនួន 186ពាន់លានរៀល ឬប្រមាណជាង ៤៦លានដុល្លារអាមេរិក ស្មើនឹងជាង 37% បើធៀបរយៈពេលដូចគ្នានៃចំណូលក្នុងខែកក្កដា កាលពីឆ្នាំ2017។
យោងតាមការបញ្ជាក់របស់ឯកឧត្តម គង់ វិបុល ចំណូលដែលទទួលបានក្នុងរយៈពេល 7ខែ ដើមឆ្នាំ2018 អគ្គនាយកដ្ឋានពន្ធដារប្រមូលចំណូលពន្ធ-អាករបានចំនួនជាង 5ពាន់លានរៀល(5,425.56ពាន់លានរៀល)ឬប្រមាណជាង 1ពាន់លានដុល្លារ(1,356.36លានដុល្លារ)ឬស្មើនឹងជាង70%នៃផែនការ ។
ក្នុងនោះ បើធៀបទៅនឹងរយៈពេល 7ខែដើមឆ្នាំ2017 ឃើញថា ការប្រមូលចំណូលពន្ធ-អាករគ្រប់ប្រភេទក្នុង7ខែ ឆ្នាំ2018នេះ បានកើនឡើងចំនួនជាង 700ពាន់លានរៀល (7,085.6ពាន់លានរៀល) ឬប្រមាណជិត 180លានដុល្លារ (177,14លានដុល្លារ) ឬស្មើនឹងជាង15%។
ឯកឧត្តមបានបន្តថាកំណើនចំណូលពន្ធក្នុងខែកក្កដានេះ បានឆ្លុះបញ្ចាំងថា សាធារណជន និងអ្នកវិនិយោគជាតិ និងអន្តរជាតិមានជំនឿទុកចិត្តលើរាជរដ្ឋាភិបាលយ៉ាងមុតមាំ៕
August 14, 2018
កម្ពុជានឹងទទួលបានកម្ចីជាង 30លានដុល្លា ពី ADB សម្រាប់ពង្រឹងគម្រោងម៉ាស៊ីនកិនស្រូវ
ក្នុងគោលដៅពង្រឹង និងពង្រីករោងម៉ាស៊ីនកិនស្រូវនៅកម្ពុជាឱ្យកាន់តែមានភាពទូលំទូលាយ សម្រាប់ផលិតអង្ករឱ្យបានកាន់តែច្រើន ធនាគារអភិវឌ្ឍន៍អាស៊ីហៅកាត់ថា ADB គ្រោងនឹងផ្តល់កម្ចីរហូតដល់ជាង 3លានដុល្លាទៅកាន់ម្ចាស់រោងម៉ាស៊ីនកិនស្រូវនីមួយៗក្នុងចំណោមរោងម៉ាស៊ីនកិនស្រូវធំៗទាំង10 នៅកម្ពុជា។
ប្រកាសផ្តល់ប្រាក់កម្ចីរបស់ធនាគារអភិវឌ្ឍន៍អាស៊ីទៅដល់ម្ចាស់រោងមាស៊ីនកិនស្រូវនៅកម្ពុជា បានធ្វើឡើងនៅក្នុងជំនួបជាមួយលោក មូលសារិទ្ធីអគ្គលេខាធិការសហព័ន្ធស្រូវអង្ករកម្ពុជា និងលោកUng Malar តំណាងស្ថាប័នស្រាវជ្រាវ និងអភិវឌ្ឍន៍(SBK)ដើម្បីពិភាក្សាគម្រោងស្តីពីការអភិវឌ្ឍវិស័យស្រូវអង្ករ (Rice Sector Development Program) ក្រោមប្រភពទុនពីធនាគារអភិវឌ្ឍន៍អាស៊ី។
លោក Ung Malar បានមានប្រសាសន៍ថា កន្លងមកគម្រោងនេះបានសិក្សាទៅលើខេត្តចំនួន3 រួមមានខេត្តព្រៃវែង ខេត្តកំពង់ធំ និងខេត្តបាត់ដំបង ហើយផ្តោតលើភូមិចំនួន 90(ក្នុងមួយខេត្ត30ភូមិ) និងមានប្រព័ន្ធស្រោចស្រពដែលអាចគ្របដណ្តប់លើផ្ទៃដីបានរហូតដល់ 10,300ហិកតា ដោយបានសហការជាមួយក្រសួងមួយចំនួនដើម្បីអនុវត្តគម្រោងជួយដល់វិស័យស្រូវអង្ករកម្ពុជា ក្នុងនោះទី1. ក្រសួងកសិកម្ម រុក្ខាប្រមាញ់ និងនេសាទត្រូវរៀបចំធ្វើផែនការក្សេត្របរិស្ថានដើម្បីកំណត់ថា តើតំបន់ណាត្រូវជាមួយដំណាំប្រភេទអ្វីជាដើម។
ទី2. ក្រសួងដែនដីនគរូបនីយកម្ម និងសំណង់ត្រូវរៀបចំធ្វើផែនការអភិវឌ្ឍឃុំដើម្បីកំណត់ថាតំបន់ណាសម្រាប់ធ្វើកសិកម្ម តំបន់ណាសម្រាប់ជាលំនៅឋានជាដើម។ ពិសេសគម្រោងខាងលើនេះ ខាង ADB គ្រោងនឹងផ្តល់កម្ចីរហូតដល់ជាង 3លានដុល្លារទៅកាន់រោងម៉ាស៊ីននីមួយៗ ក្នុងចំណោមរោងម៉ាស៊ីនធំៗទាំង 10 ដែលគាត់បានសិក្សាកន្លងមក។
កម្មករកំពុងចាក់ស្រូវ
សេចក្តីប្រកាសព័ត៌មានរបស់ ADB បានឱ្យដឹងថា គោលបំណងនៃជំនួបនេះ គឺដើម្បីទទួលបានព័ត៌មានអំពីបច្ចុប្បន្នភាពរបស់វិស័យស្រូវអង្ករកម្ពុជា ដោយក្នុងឱកាសនោះដែរលោក មូល សារិទ្ធី ក៏បានជម្រាបជូនអំពីការរីកចម្រើននៃវិស័យស្រូវអង្ករកម្ពុជា និងការងារមួយចំនួនទៀត ដែលទាមទារឱ្យគ្រប់ភាគីពាក់ព័ន្ធបន្តចូលរួមឱ្យកាន់តែច្រើន។ ពិសេសការជួយពិនិត្យលទ្ធភាពក្នុងការផ្តល់កម្ចីដែលមានអត្រាការប្រាក់ទាប ដល់រោងម៉ាស៊ីន និងដល់សហគមន៍កសិកម្ម ព្រោះកន្លងមកខាងសហគមន៍កសិកម្មនៅមានការខ្វះខាតដើមទុនច្រើនជាពិសេសដើមទុនសម្រាប់ការចាប់ផ្តើមធ្វើទំនើបកម្ម កសិកម្មបានដោយខ្លួនឯង។
គូរបញ្ជាក់ថា រយៈពេល 6ខែ គិតចាប់ពីខែមករា ដល់ខែមិថុនាក្នុងឆ្នាំ2018 នេះ ការនាំចេញអង្កររបស់កម្ពុជាទៅកាន់ទីផ្សារអន្តរជាតិមានចំនួន 271,537តោន។ ចំនួននេះបានថយចុះ 5.9% បើធៀបនឹងការនាំចេញអង្ករក្នុងរយៈពេលដូចគ្នានេះកាលពីឆ្នាំ2017 ដែលមានចំនួន 288,562តោន ដោយកត្តានេះបណ្តាលមកពីតម្រូវការអង្ករក្រៅប្រទេសបានធ្លាក់ចុះជាងឆ្នាំមុន៕
August 13, 2018
ស្រីលាភ បង្ហាញរូបក្រុមគ្រួសារជាមួយនាយក្រឹមយ៉ាងកក់ក្ដៅ
តារាកំប្លែងជើងចាស់លោក អ៊ូ បុណ្ណារ៉ាត់ ហៅនាយក្រឹម បានក្លាយជាឪពុករបស់កូនភ្លោះស្រី ដែលទើបនឹងកើត ក្រោមចំណងស្នេហាលួចលាក់។
គួររំឭកផងដែរថា កាលពីប៉ុន្មានខែមុន ស្នេហាលួចលាក់ដែលនាយក្រឹមតែងតែបដិសេធជាមួយបណ្ដាញសារព័ត៌មាននានាកន្លងមក បានដឹងដល់ភរិយាដើមរបស់លោក ដែលកាលនោះបានធ្វើឱ្យអ្នកស្រី និងកូនប្រុសឆួលចុងច្រមុះយ៉ាងខ្លាំង រហូតដល់មានប្រតិកម្មថា នឹងដាក់ពាក្យប្ដឹងតារាកំប្លែង ស្រីលាភ ហៅនាងព្រលិត នោះទៀតផង។ យ៉ាងណាក៏ដោយ ជុំវិញកំណើតកូនភ្លោះស្រីក្រៅខាន់ស្លារបស់នាយក្រឹម និងតារាកំប្លែងកូនក្រុមរបស់ខ្លួន គឺអ្នកនាងស្រីលាភនោះ នៅមិនអាចសុំការបកស្រាយផ្ទាល់ពីតារាសិល្បៈមួយគូដែលបានផ្តល់កំណើតកូនភ្លោះថ្មីៗនេះបានទេ ខណៈនាយក្រឹម ដែលចាប់តាំងពីល្បីថា ស្រីលាភមានកូនជាមួយខ្លួនហើយនោះ លោកក៏មិនសប្បាយចិត្តនឹងព័ត៌មានដែលផ្សព្វផ្សាយអំពីរឿងនេះដែរ។
កន្លងមកអ្នកនាងព្រលិតតែងបង្ហាញរូបភាពជាលក្ខណៈក្រុមគ្រួសារជាមួយលោក អ៊ូ បុណ្ណារ៉ាត់ តែថ្មីៗនេះស្រាប់តែអ្នកនាងបានបង្ហោះរូបភាពជាច្រើនសន្លឹកនៅលើហ្វេសប៊ុក ខណៈដើរលេងកម្សាន្ដរួមគ្នាជាលក្ខណៈគ្រួសារជាមួយកូនៗ និងនាយក្រឹមយ៉ាងសប្បាយរីករាយជាមួយស្នាមញញឹមដ៏មានសុភមង្គលជាទីបំផុត។ សូមជម្រាបថា អ្នកទាំងពីរបានដាក់ឈ្មោះកូនភ្លោះរបស់ពួកគេថា អេលលីណា និងអេលលីសា។ អ្វីដែលគួរឱ្យចាប់អារម្មណ៍នោះ គឺនៅត្រង់ថា ចាប់តាំងពីទទួលដំណឹងថា មានកូនភ្លោះក្នុងផ្ទៃមក នាងស្រីលាភបានសម្ងំលាក់ខ្លួនបាត់មុខឈឹងពីវិស័យសិល្បៈ សូម្បីតែការដើរហើរតាមទីសាធារណៈ ក៏កម្រនឹងឃើញដែរ ពិសេសការទៅណាមកណាជាមួយនាយក្រឹម គឺមិនដែលសោះតែម្តង។ តែនៅពេលនេះ ហាក់បីដូចជាអ្នកនាងកំពុងតែចង់លាតត្រដាង និងបើកចំហអំពីទំនាក់ទំនងស្នេហាជាមួយនាយក្រឹមម្ដងទៀតហើយ។
បើទោះជាគេដឹងច្បាស់ថា រវាងនាយក្រឹម និងអ្នកនាងលាភមានទំនាក់ទំនងស្នេហា និងរស់នៅជាគូស្នេហ៍នឹងគ្នារហូតដល់មានកូនភ្លោះស្រីទៅហើយក្តី ប៉ុន្តែបើនិយាយពីគម្រោងរៀបការវិញ គឺហាក់គ្មានពន្លឺទាល់តែសោះ ខណៈដែលភរិយាដើមនាយក្រឹមវិញនៅតែមានកំហឹងមិនទាន់រលត់នៅឡើយ៕
August 13, 2018
ឆ្នេរទឹកក្តៅដ៏ស្រស់សោភារនៅ New Zealand
អ្នកប្រហែលជាមិនចង់ជឿទេ នៅពេលដែលមានមនុស្សនិយាយថា អ្នកអាចទៅងូតទឹកក្តៅនៅតាមតំបន់ឆ្នេរសមុទ្រនោះ។ ស្តាប់ទៅវាដូចជាចម្លែកបន្តិចប៉ុន្តែការពិតនោះគឺវាពិតជាមានឆ្នេរសមុទ្របែបនេះមែន ដែលស្ថិតនៅក្នុងប្រទេស New Zealand។
ឆ្នេរទឹកក្តៅនេះមានទីតាំងស្ថិតនៅភាគខាងកើតនៃឆ្នេរ Coromandel Peninsula ចម្ងាយប្រមាណជា175គីឡូម៉ែត្រពីទីក្រុង Auckand ប្រទេស New Zealand។ ឆ្នេរទឹកក្តៅនេះគឺមានទឹកក្តៅផុសចេញពីក្រោមដីមក ធ្វើឱ្យទឹកនៅម្តុំនោះមានសីតុណ្ហភាពក្តៅឧណ្ហៗគ្រប់រដូវកាល។
ឆ្នេរទឹកក្តៅស្ថិតនៅក្នុងប្រទេស ណេឹ ឍលោនាដ នេះគឺជាកន្លែងទេសចរណ៍ដ៏មានប្រជាប្រិយភាពបំផុតនៅលើពិភពលោក ដែលជារៀងរាល់ឆ្នាំកន្លែងទេសចរណ៍មួយកន្លែងនេះ អាចទាក់ទាញភ្ញៀវទេសចរណ៍ពីគ្រប់ទិសទីនៃពិភពលោករហូតដល់ទៅជាង១៣០ពាន់នាក់ឯណោះ។
អ្វីដែលធ្វើឱ្យឆ្នេរទឹកក្តៅនេះក្លាយទៅជាទីដ៏គួរឱ្យចាប់អារម្មណ៍នោះមិនមែនមានតែទឹកក្តៅនោះទេ គឺនៅទីនោះតែងតែមានភ្ញៀវទេសចរជាច្រើនចូលចិត្តទៅស្ប៉ាខ្លួននៅលើវាលខ្សាច់ ដែលមានអាកាសធាតុក្តៅពេញមួយឆ្នាំនេះជារៀងរាល់ថ្ងៃ។ ភ្ញៀវទេសចរដែលបានទៅកម្សាន្តនៅទីនោះ តែងតែបង្កើតកន្លែងសម្រាប់ស្ប៉ាខ្លួនឯង ដោយកាយដីខ្សាច់ឱ្យទឹកក្តៅឧណ្ហៗផុសចេញមករួចគេងសំដិលខ្លួនលេងនៅទីនោះតែម្តង។
ទេសភាពនៅតាមបណ្តោយឆ្នេរខ្សាច់ទឹកក្តៅនេះ ពិតជាមានភាពស្រស់ស្អាតគួរជាទីទាក់ទាញ ហើយកន្លែងទេសចរណ៍បែបធម្មជាតិមួយកន្លែងនេះគឺជាជម្រើសដ៏ល្អបំផុតសម្រាប់ការសម្រាកកាយនារដូវរងា និងការមកលំហែកាយបែបគូសង្សារដ៏ផ្អែមល្ហែម ឬជាលក្ខណៈគ្រួសារ ដើម្បីទទួលបាននូវការសម្រាកកាយដ៏ល្អ និងជួយឱ្យសុខភាពរបស់អ្នកមានភាពល្អប្រសើរជាងមុនថែមទៀតផង ជាមួយនឹងអនុភាពនៃទឹកក្តៅ ដែលផុសចេញពីស្រទាប់ដីខ្សាច់នៅឆ្នេរទឹកក្តៅ ប្រទេស New Zealand នេះ។
ដូច្នេះប្រិយមិត្តអ្នកអានទស្សនាវដ្តី ឡារ៉ែន ក៏អាចសាកល្បងទៅគេងស្ប៉ាខ្លួននៅក្នុងទឹកក្តៅឧណ្ហៗនេះបានដែរ នៅក្នុងរដូវរងាខាងមុខនេះ ដើម្បីទទួលយកនូវបទពិសោធថ្មីក្នុងជីវិត និងអាចទទួលបាននូវសុខភាពល្អថែមទៀតផង៕

August 13, 2018
ប្រទេសអារ៉ាប់មានអ្វីគួរឱ្យចាប់អារម្មណ៍?
ទីក្រុងដែលមានការរីកលូតលាស់ខ្លាំងខាងអគារដ៏ស្គឹមស្គៃ លឿនបំផុតនៅក្នុងចំណោមទីក្រុងទាំងអស់នៅលើពិភពលោក គឺទីក្រុងឌូបៃប្រទេសអារ៉ាប់នេះឯង។ ក្នុងមួយរយៈពេលដ៏ខ្លី ទីក្រុងឌូបៃ បានគ្របដណ្តប់ទៅដោយអគារខ្ពស់ៗមានរូបរាងដ៏អស្ចារ្យ និងគួរឱ្យទាក់ទាញបំផុត ហើយអគារទាំងនោះបានផុសឡើងជាបន្តបន្ទាប់ដូចអគារដែលជប់ឡើងពីវេទមន្តអ៊ីចឹង គឺលើសពីការគិតរបស់ពិភពលោកទៅទៀត។
ទីក្រុងមួយនេះបានក្លាយទៅជាតំបន់ទេសចរណ៍ដ៏គួរឱ្យទាក់ទាញនៅលើពិភពលោក ហើយជារៀងរាល់ឆ្នាំទីក្រុងឌូបៃ បានទាក់ទាញភ្ញៀវទេសចរណ៍ជាតិ និងអន្តរជាតិជាច្រើនមកពីគ្រប់តំបន់ និងគ្រប់ប្រទេសនៅលើពិភពលោកឱ្យមកកម្សាន្ត និងទស្សនាទិដ្ឋភាព និងភាពឡូយឆាយនៃទីក្រុងដ៏ចំណាស់មួយនេះ ដោយសារតែទីក្រុងនេះសម្បូរទៅដោយអគារដ៏ទំនើប និងខ្ពស់ត្រដែតត្រដឹមលំដាប់ពិភពលោក រួមទាំងទីកន្លែងកម្សាន្តបែបប្រពៃណីដ៏ស្រស់សោភា និងទីកន្លែងកម្សាន្តដ៏សម្បូរបែបប្លែកៗលំដាប់ពិភពលោកថែមទៀតផង។
មិនថាជាដំណើរកម្សាន្តរយៈពេលខ្លី ឬរយៈពេលវែងនោះទេ ការមកកម្សាន្តនៅទីក្រុងឌូបៃដ៏ទំនើបនេះ បានធ្វើឱ្យភ្ញៀវទេសចរទាំងអស់ដែលមកដល់ទីនេះ ទទួលបាននូវបទពិសោធន៍នៃដំណើរកម្សាន្តដ៏សែនរីករាយបំផុត ដែលពួកគេមិនអាចរកបាននៅទីក្រុង ឬប្រទេសផ្សេងទៀតនោះទេ។
នៅក្នុងទីក្រុងឌូបៃ កន្លែងកម្សាន្តដែលទទួលបាននូវប្រជាប្រិយភាពបំផុតនោះគឺ សមុទ្រខ្សាច់ដ៏ធំល្វឹងល្វើយមើលដាច់កន្ទុយភ្នែក ដែលនៅទីនោះភ្ញៀវទេសចរទាំងអស់អាចធ្វើដំណើរកម្សាន្តបែបដំណើរផ្សងព្រេង ដូចជាជិះសត្វអូដ្ឋលេងនៅលើវាលខ្សាច់, ជិះស្គីលើវាលខ្សាច់, ជិះរថយន្តប្រដេញគ្នាលេងនៅលើវាលខ្សាច់, បោះជំរុំនៅលើវាលខ្សាច់, ទស្សនារបាំ ពលេលយ របស់ជនជាតិអារ៉ាប់ និងទទួលទាន ពពឈ បែបអារ៉ាប់នៅលើវាលខ្សាច់ជាដើម។
ប្រសិនបើភ្ញៀវទេចរទាំងអស់មាន ភាពហត់នឿយជាមួយនឹងការកម្សាន្តនៅលើវាលខ្សាច់ ពួកគេក៏អាចផ្លាស់ប្តូរបរិយាកាសនៃដំណើរកម្សាន្តរបស់ពួកគេមកកម្សាន្តនៅលើកោះ Palm Islands វិញក៏បាន។
កោះដើមត្នោត (Palm Islands) គឺជាកោះមួយដ៏ស្រស់ស្អាត ដែលកសាងឡើងមានរូបរាងស្រដៀងគ្នាទៅនឹងដើមត្នោត ហើយភ្ជាប់គ្នាពីកន្លែងមួយទៅកន្លែងមួយដោយផ្លូវទឹកដ៏ខ្វាត់ខ្វែង ហើយភ្ញៀវទេសចរទាំងអស់ក៏ទទួលបាននូវអារម្មណ៍សម្រាក និងភាពរីករាយប្លែកតាមរយៈការធ្វើដំណើរតាមទូកឈើតូចៗនៅលើកោះដើមត្នោតនេះផងដែរ។
ក្រៅពីដំណើរកម្សាន្តតាមសមុទ្រខ្សាច់ និងកោះដើមត្នោត ភ្ញៀវទេសចរទាំងអស់ក៏តែងនិយមទៅកម្សាន្ត និងទិញទំនិញគ្រប់ប្រភេទនៅ Dubai Mall ដែលជាហាងលក់ទំនិញធំជាងគេនៅលើពិភពលោក។ នៅទីនោះ គឺមានលក់គ្រប់មុខទំនិញទាំងអស់ ដែលភ្ញៀវទេសចរត្រូវការ មិនថាជាសម្លៀកបំពាក់, គ្រឿងលម្អកាយ, គ្រឿងសម្អាង, គ្រឿងសង្ហារិម, គ្រឿងតាំងលម្អគេហដ្ឋាន, របស់អនុស្សាវរីយ៍តូចធំ, គ្រឿងអេឡិកត្រូនិច, ឬរបស់ប្រើប្រាស់ជារៀងរាល់ថ្ងៃនោះទេ។
ហើយអ្វីដែលកាន់តែពិសេសជាងនេះទៅទៀតនោះគឺនៅពេលដែលភ្ញៀវទេសចរទាំងអស់ទៅដល់ទីក្រុងឌូបៃពួកគេក៏អាចរីករាយជាមួយនឹងការស្នាក់នៅក្នុងសណ្ឋាគារលំដាប់ផ្កាយ៧ ដ៏ល្បីល្បាញ និងស្រស់ស្អាតបំផុតនៅលើពិភពលោកផងដែរ គឺសណ្ឋាគារ Burj Al Arab៕
August 13, 2018
អ្នកនាង ស្រីម៉ុច បញ្ចេញសារពន្លះអ្នករិះគន់
កន្លងមកថ្មីៗនេះ ការស្លៀកពាក់របស់អតីតតារាសម្តែងជាប់ងារ ជីដូនកាកី គឺអ្នកនាង ស្រីម៉ុច បានធ្វើឱ្យកក្រើកព័ត៌មានក្នុងស្រុកខ្មែរ ដោយសារតែការស្លៀកពាក់ដ៏ស៊ីចស៊ីហួសហេតុរបស់អ្នកនាងពេលចូលរួមក្នុងកម្មវិធីរបស់ហាងកែសម្ផស្សមួយ ជាហេតុធ្វើឱ្យមហាជនក៏ដូចជាអ្នកសិល្បៈរួមអាជីពបាននាំគ្នាបញ្ចេញប្រតិកម្មរិះគន់កប់ៗមាត់ទៅលើរូបអ្នកនាង ប៉ុន្តែអ្នកនាងមិនធ្លាប់បានតបតខ្លាំងៗទៅវិញជុំវិញបញ្ហានេះឡើយ។
តែដោយឡែក ដោយសារតែមានអ្នកចូល Comment អំពីភាពសិចស៊ី និងជិវិតឯកជនរបស់អ្នកនាង សុខ ស្រីម៉ុច ខ្លាំងៗពេក ទើបធ្វើឱ្យនាងបង្ហោះសារមួយឃ្លាដែលហាក់ដូចជាការឆ្លើយតបមួយយ៉ាងឈឺៗទៅកាន់អ្នករិះគន់បែបជាន់ពន្លិចថា «Damn so enjoying with my life life without jealousy or harm anyone . បញ្ជាក់ ( ជេរ whatever u want ប៉ុន្តែកុំយកឈ្មោះតារាមកអាងដើម្បីយកលេសជេរខ្ញុំ។ ខ្ញុំឈប់ពីតារានេះតាំងពី 10ឆ្នាំមុនមកម្ល៉េះ) ហើយបើសិនជាមានតារាណាម្នាក់គាត់ស្រឡាញ់ការស្លៀកពាក់អ៊ីចឹង ក៏មិនត្រូវជេរបញ្ចោគេដែរ សូមឱ្យមានសុជីវធម៌បន្តិច កុំកាត់ទោសគេដោយការស្លៀកពាក់ ( don’t judge the book by cover )»។
គួរបញ្ជាក់ផងដែរថា អ្នកនាង សុខ ស្រីម៉ុច បានប្រាប់អ្នកសារព័ត៌មានកន្លងមកថា បច្ចុប្បន្ននេះនាងមានវ័យ 40ឆ្នាំហើយ និងបានឈប់ពីសិល្បៈជាយូរណាស់មកហើយដែរ ដោយសារតែអ្នកនាងមានកូនប្រុសស្រីចំនួន 3នាក់ ព្រមទាំងត្រូវការពេលវេលាជាច្រើនសម្រាប់មើលថែទាំក្រុមគ្រួសារ ដែលសឺងតែគ្មានពេលវេលាច្រើនសម្រាប់ខ្លួនឯងផង។ ដូច្នោះហើយ ទើបអ្នកនាងសម្រេចចិត្តឈប់ពីសិល្បៈតែម្ដង ហើយអ្នកនាងបានបញ្ជាក់បន្ថែមទៀតថា អ្នកនាង ជាមនុស្សស្រីម្នាក់ដែលស្រឡាញ់ខ្លួនប្រាណខ្លាំងបំផុត ទើបអ្នកនាងព្យាយាមថែរក្សាសម្ផស្ស ដែលជាហេតុធ្វើឱ្យនាងមានសម្រស់ក្មេងជាងវ័យបែបនេះ៕
August 13, 2018
យូ ឌីស្កូ វិលមកកម្ពុជាវិញហើយ ក្រោយការវះកាត់ជោគជ័យ
អស់រយៈពេលជាច្រើនខែហើយដែលលោក យូ ឌីស្កូ បានទៅសម្រាកព្យាបាលជំងឺនៅឯប្រទេសឥណ្ឌា ដោយសារតែលោកកើតជំងឺក្រលៀន ទឹកនោមប្រៃ និងកម្រិតឈាមសឡើងខ្ពស់ ដែលតម្រូវឱ្យរូបលោកត្រូវវះកាត់ប្តូរក្រលៀនថ្មី ដែលត្រូវចំណាយប្រាក់ខ្ទង់ម៉ឺនដុល្លារ ហើយអ្នកនាង ទូច ស្រីល័ក្ខណ៍ បានចេញមុខស្វែងរកជំនួយពីសំណាក់សប្បុរសជន ដែលមានទឹកចិត្តសន្ដាស ស្រឡាញ់ អាណិត ដើម្បីជួយឧបត្ថម្ភរូបលោក រហូតដល់ថ្ងៃវិលត្រឡប់មកកាន់ប្រទេសកម្ពុជាវិញ អ្នកនាង ទូច ស្រីល័ក្ខណ៍ ក៏បានទៅរង់ចាំទទួលលោកនៅមុខច្រកចេញនៃអាកាសយានដ្ឋានអន្ដរជាតិ ភ្នំពេញ ផងដែរ។
នេះពិតជាដំណឹងដ៏ល្អមួយ ដោយសារតែពេលនេះគឺលោក យូ ឌីស្កូ បានវិលមកដល់ទឹកដីកំណើតវិញហើយ។ នេះបើយោងតាមការបង្ហោះសាររបស់តារាពហុជំនាញ ទូច ស្រីល័ក្ខណ៍ ជាតារាមួយរូបដែលចេញមុខខំព្យាយាមអស់ពីកម្លាំងកាយ-ចិត្តដើម្បីជួយជីវិតរបស់លោក យូ ឌីស្កូ ក្នុងនោះអ្នកនាងបានបង្ហោះសារប្រកបដោយក្តីរំភើបថា «ខ្ញុំចង់ប្រាប់ថា ទង្វើរបស់ខ្ញុំ គឺចេញពីបេះដូងរបស់ខ្ញុំ មនុស្សដែលធ្លាប់រួមទុក្ខ និងរួមសុខសប្បាយចិត្តប៉ុនណា? ពេលដែលឃើញវត្តមានរបស់គាត់ត្រឡប់មកវិញ? ពិតគិត ពិតបារម្ភ គ្រប់ពេល កុំខឹង នេះជាអារម្មណ៍ពិត»។
ក្រោយពីទទួលបានដំណឹងនេះ មហាជនបានចូលរួមអបអរលោក យូ ឌីស្កូ ដែលបានត្រឡប់មកដល់ស្រុកកំណើតវិញ និងមានសុខភាពល្អប្រសើរ ក្រោយពីធ្វើការវះកាត់ហើយ។ សូមទស្សនាទិដ្ឋភាពពេលដែលអ្នកនាង ទូច ស្រីល័ក្ខ បានជួប លោក យូ ឌីស្កូ ពេលត្រឡប់មកដល់ប្រទេសកំណើតវិញ ខាងក្រោមនេះ៖
August 13, 2018
ស្ងាត់ៗ! តារាចម្រៀង យក់ ដួងតារា សម្រេចចិត្តបួសជាព្រះសង្ឃ
តារាចម្រៀងកន្ទ្រឹម និងមានទេពកោសល្យពហុជំនាញខាងផ្នែកសិល្បៈបុរាណខ្មែរ គឺលោក យក់ ដួងតារា បានធ្វើឱ្យទស្សនិកជនមានការភ្ញាក់ផ្អើលជាខ្លាំង ខណៈដែលបានស្ងប់ស្ងាត់ពីការចេញបទចម្រៀង ហើយបែរជាសម្រេចចិត្តសាងផ្នួសបួសជាព្រះសង្ឃ ដើម្បីតបស្នងសងគុណដល់អ្នកម្ដាយទៅវិញ។
បើយោងតាមគណនីហ្វេសប៊ុករបស់តារាចម្រៀងប្រុសនៅក្នុងផលិតកម្មរស្មីហង្សមាសរូបនេះបានបង្ហោះនូវរូបភាពជាច្រើនសន្លឹកដែលមានខ្លឹមសារថា «លះកាត់សេចក្តីអាក្រក់ទាំងឡាយ ថ្វាយខ្លួនក្នុងវិស័យព្រះពុទ្ធសាសនា បួសសងគុណមាតាបិតា ជាតួនាទីរបស់កូនប្រុសគ្រប់ៗរូប។ សូមអនុមោទនា នូវកងការមហាកុសលដែលកើតចេញអំពីសេចក្តីជ្រះថ្លានេះ ឱ្យបានដល់ញាតិសន្ដានរបស់អស់លោកអ្នក កុំបីអាក់ខានឡើយ សាធុ សាធុ…»។
ជាការកត់សម្គាល់ មួយរយៈចុងក្រោយនេះគេសង្កេតឃើញថា នៅក្នុងវិស័យព្រះពុទ្ធសាសនាហាក់មានភាពរង្គោះរង្គើ និងច្របូកច្របល់ ខណៈដែលកាលពីពេលថ្មីៗកន្លងទៅ មានការកក្រើកពេញបណ្ដាញសង្គមហ្វេសប៊ុក ពាក់ព័ន្ធនឹងរឿងព្រះសង្ឃដែលឆាន់ពោតស្ងោរជាមួយនឹងនារីម្នាក់ ដោយបានប្រព្រឹត្តអំពើកាមគុណនៅក្នុងវត្តអារាមតែម្ដង ហើយថែមទាំងបង្ហោះវីដេអូចូលបណ្ដាញសង្គមហ្វេសប៊ុក បង្កការចាប់អារម្មណ៍ជាខ្លាំងពីអ្នកនិយមបណ្ដាញហ្វេសប៊ុកទៀតផង។ ជាមួយនឹងសកម្មភាពមួយនេះ បានធ្វើឱ្យវិស័យពុទ្ធសាសនា ហាក់មានការធ្លាក់ចុះសទ្ធាយ៉ាងគួរឱ្យកត់សម្គាល់។
តែដោយឡែក សម្រាប់លោក យក់ ដួងតារា វិញ ក្រៅពីគោលបំណងសាងផ្នួសបួសជូនមាតាបិតាហើយ លោកថែមទាំងសុខចិត្តបោះបង់ចោលការងារសិល្បៈដែលខំតស៊ូជាយូរមកហើយ រួចងាកមកលើកតម្កើងវិស័យព្រះពុទ្ធសាសនាវិញម្ដង៕
August 13, 2018
Nadal ផ្តួល Tsitsipas ដើម្បីឈ្នះពាន Toronto Masters
កីឡាករវាយកូនបាល់ Rafael Nadal បានរារាំងការវាយសម្រុកនៅជិតបញ្ចប់ការប្រកួតពីសំណាក់កីឡាករ StefanosTsitsipas ដើម្បីកត់ត្រាជ័យជម្នះក្នុងលទ្ធផល 6-2 និង7-6 (7/4) ក្នុងការប្រកួតវគ្គផ្តាច់ព្រ័ត្រនៃព្រឹត្តិការណ៍ Toronto Masters កាលពីថ្ងៃអាទិត្យ។
ការដណ្តើមបានជ័យជម្នះក្នុងរយៈពេល1ម៉ោង និង45នាទី បានជួយឱ្យកីឡាករសញ្ជាតិអេស្ប៉ាញវ័យ 32ឆ្នាំរូបនេះ ឈ្នះពានជាលើកទី33 របស់គេក្នុងកម្រិតកំពូលរបស់កម្មវិធី Masters ខណៈដែលរូបគេបានឈ្នះពានអាជីពជាលើកទី80 និងបានកត់ត្រាជ័យជម្នះក្នុងការប្រកួតជាលើកទី40 របស់គេនៅរដូវកាលនេះ។
ក្នុងអំឡុងពេលនៃកម្មវិធីប្រគល់ពាន អ្នកគាំទ្រសញ្ជាតិក្រិកជាច្រើននាក់បានស្រែកច្រៀងចម្រៀងរីករាយថ្ងៃកំណើត ដើម្បីផ្ញើទៅដល់វីរបុរសថ្មីក្នុងកីឡាវាយកូនបាល់របស់ពួកគេ។ Nadalបានឱ្យដឹងថា៖ «ចូលរួមរីករាយថ្ងៃកំណើតរបស់ Stefanos។ អ្នកពិតជាធ្វើបានល្អណាស់ អ្នកមានអនាគតដ៏អស្ចារ្យមួយ។
វាមានរយៈពេលជិត 10ឆ្នាំហើយ ចាប់តាំងពីខ្ញុំបានលេងក្នុងទីក្រុង Toronto ជាលើកចុងក្រោយ»។ Nadal បានបន្ថែមទៀតថា៖ «ខ្ញុំពិតជានឹកអ្នកណាស់ ខ្ញុំនឹងព្យាយាមមកទីនេះឱ្យបានកាន់តែញឹកញាប់ឡើង។ ពាននេះពិតជាមានន័យណាស់»។
Tsitsipas បានរងបរាជ័យនៅចំថ្ងៃខួបកំណើតគម្រប់វ័យ 20ឆ្នាំរបស់គេ នៅសប្តាហ៍ចុងក្រោយនៃការបញ្ចប់ការប្រកួតកីឡាវាយកូនបាល់ដ៏ល្អបំផុតក្នុងអាជីពរបស់គេ ខណៈដែលរូបគេបានផ្តួលគូប្រជែងខ្លាំងជាប់ៗគ្នា ដើម្បីឈានទៅវគ្គផ្តាច់ព្រ័ត្រ៕
ប្រភពពី៖ Channel News Asia
August 13, 2018
Lewandowski ជួយ Bayern សងសឹក Frankfurt
ការរកគ្រាប់បាល់បញ្ចូលទី 3គ្រាប់យ៉ាងល្អរបស់ខ្សែប្រយុទ្ធ Robert Lewandowski បានជួយឱ្យក្រុម Bayern Munich កត់ត្រាជ័យជម្នះយ៉ាងកក់ក្តៅក្នុងលទ្ធផល 5-០ លើក្រុម Eintracht Frankfurt ក្នុងការប្រកួតដណ្តើមពានអាល្លឺម៉ង់ Supercup កាលពីថ្ងៃអាទិត្យ ដើម្បីជួយឱ្យអតីតគ្រូបង្វឹករបស់ក្រុម Frankfurt លោក Niko Kovac បំពេញនូវការចាប់ផ្តើមប្រកបដោយការចងចាំមួយក្នុងនាមជាគ្រូបង្វឹករបស់ Bayern។
លោក Kovac បានវិលទៅកាន់ទឹកដីក្រុម Frankfurt វិញសម្រាប់ការប្រកួតជាលើកទី1 របស់លោកក្នុងនាមជាគ្រូបង្វឹករបស់ក្រុមម្ចាស់ជើងឯកអាល្លឺម៉ង់ Bayern ក្រោយពីបានបញ្ចប់កិច្ចសន្យារយៈពេល 2ឆ្នាំប្រកបដោយភាពជោគជ័យក្នុងក្លិប Frankfurt ដែលក្នុងនោះរាប់បញ្ចូលទាំងការយកឈ្នះលើក្រុម Bayern ក្នុងការប្រកួតដណ្តើមពាន German Cup វគ្គផ្តាច់ព្រ័ត្រ កាលពីរដូវកាលមុនផងដែរ។
ប៉ុន្តែ វាមិនមានភាពភ្ញាក់ផ្អើលផ្សេងទៀតឡើយកាលពីថ្ងៃអាទិត្យ ខណៈដែលក្រុម Bayern បានបំពេញការសងសឹកសម្រាប់ការចាញ់របស់ពួកគេកាលពីការប្រកួតពាន German Cup ខណៈដែល Lewandowski បានបំបែកតំបន់ការពាររបស់ក្រុម Frankfurt ទៅជាបំណែកអស់។
លោក Kovac បានប្រាប់កាសែត ZDF ថា៖ «វាពិតជាការបង្ហាញពីទម្រង់លេងដ៏ល្អនៅថ្ងៃនេះ យើងបានស៊ុតបាល់បញ្ចូលទីក្នុងពេលវេលាប្រកួតយ៉ាងត្រឹមត្រូវ។ ពិតណាស់ ខ្ញុំមានអារម្មណ៍អាណិតអាសូខ្លះដល់អតីតកីឡាករ និងក្លិបរបស់ខ្ញុំ ប៉ុន្តែខ្ញុំគិតថា វានឹងក្លាយជាហេតុផលដ៏ល្អសម្រាប់ក្រុម Frankfurt»។
គ្រូបង្វឹករូបនេះបានបន្ថែមទៀតថា៖ «ខ្ញុំពិតជាមានសុទិដ្ឋិនិយមណាស់សម្រាប់រដូវកាលនេះ។ ខ្ញុំមានក្រុមដ៏អស្ចារ្យ និងមានភាពខ្លាំងមួយ»៕
ប្រភពពី៖ Channel News Asia
August 13, 2018