Category: សង្គម និងសេដ្ឋកិច្ច

មួយរយៈចុងក្រោយនៃការព្យាយាមបិទបាំងជីវិតឯកជន និងរស់នៅក្នុងស្ថានភាពលំបាកអស់រយៈពេលជាង 10ឆ្នាំមក នៅពេលនេះតារាចម្រៀងប្រុស ចាន់ សម័យ ត្រូវបានសិល្បករ-សិល្បការិនីព្យាយាមស្វែងរកជំនួយសប្បុរសធម៌ដើម្បីជួយព្យាបាលជំងឺរបស់លោក និងទទូចឱ្យលោកវិលមកចូលសិល្បៈវិញ ដោយមានការជ្រោមជ្រែងពីសំណាក់អ្នកដឹកនាំកម្មវិធីទូរទស្សន៍ និងមានការគាំទ្រពីមហាជនផងដែរ។

ដូចប្រិយមិត្តទាំងអស់ដឹងហើយថា ម្ចាស់បទចម្រៀង «មិនស្រឡាញ់អូនមិនបាន» គឺលោក ចាន់ សម័យ ជាតារាចម្រៀង ដ៏ល្បីល្បាញបំផុតក្នុងអំឡុងឆ្នាំ2000 ហើយបទចម្រៀងដែលធ្វើឱ្យលោកល្បីល្បាញខ្លាំងក្នុងស្រទាប់យុវវ័យ និងគ្រប់បណ្ដាវ័យមិនថា ចាស់ឬក្មេង និងដែលបទចម្រៀងទាំងនោះនៅតែស្ថិតក្នុងបេះដូងទស្សនិកជនរហូតមកដល់បច្ចុប្បន្ននេះ មានដូចជា បទ (មិនស្រឡាញ់អូនមិនបាន) (មិនអាចគ្មានអូន) (ស្នេហ៍ក្រោមពន្លឺកាំជ្រួច) និងបទចម្រៀងជាច្រើនទៀត ដែលទាំង 3បទនេះ ស្ថិតនៅក្នុងផលិតកម្ម ព្រះវិហារ ដែលបានដាក់បញ្ចូលទៅក្នុងខ្សែភាពយន្តភាគដ៏ល្បីល្បាញ របស់ចិនតៃវ៉ាន់គឺរឿង (F4) នៅក្នុងឆ្នាំ2001 និង2002។

ដោយឡែកកាលពីពេលថ្មីៗនេះ លោក ចាន់ សម័យ ក្រៅពីមមាញឹកនឹងការងារសិល្បៈហើយ លោកបានបន្ថែមមុខរបរមួយទៀតដើម្បីបង្កើនចំណូលចិញ្ចឹមគ្រួសារ គឺរបរលក់សម្លៀកបំពាក់កីឡាសម្រាប់បំពេញតម្រូវការរបស់អ្នកដែលស្រឡាញ់ និងចូលចិត្តលេងកីឡានាៗ។ គួរបញ្ជាក់ដែរថា ក្រោយពីបានឃើញការខិតខំប្រឹងប្រែងរបស់លោក មហាជនបានលាន់មាត់សរសើរពីការតស៊ូមិនរាថយរបស់តារាចម្រៀង ចាន់ សម័យ ដើម្បីប្រពន្ធ និងជាពិសេសកូនៗទាំង 5នាក់របស់លោក៕

សភាវស្លេកស្លាំង ជាអាការដែលគេប្រទះឃើញនៅលើកុមារតូចៗ បង្ហាញពីភាពខុសប្រក្រតីរបស់រាងកាយដែលស្បែក ឬសាច់ភ្នាសក្នុងរាងកាយមានពណ៌ស្លេក ដែលអាចកើតឡើងបានទូទាំងរាងកាយឬអាចកើតនៅលើតែបរិវេណណាមួយ និងច្រើនតែកើតឡើងនៅលើផ្ទៃមុខ សាច់ភ្នាសក្នុងមាត់ អណ្ដាត និងកែវភ្នែក។ នៅពេលដែលរាងកាយមានបរិមាណគ្រាប់ឈាមក្រហមថយចុះ ឬភាពខាប់របស់ “អេម៉ូគ្លោប៊ីន” ថយចុះនឹងធ្វើឱ្យសុខភាពរបស់កូនមិនរឹងមាំ រួមទាំងមានវិវឌ្ឍនាការខាងផ្នែកផ្សេងៗយឺតយ៉ាវទៀតផង ដូច្នេះលោកឪពុកអ្នកម្ដាយចាំបាច់ត្រូវសិក្សារឿងសភាវកូនស្លេកស្លាំងនេះផង ដើម្បីទុកជាគន្លងក្នុងការការពារ និងព្យាបាលដូចខាងក្រោមនេះ…។

កូនស្លេកស្លាំង ធ្វើម្ដេចឪពុកម្ដាយដឹងបាន?
ការសង្កេតមើលថា តើកូនស្លេកស្លាំងឬទេនោះ អ្នកម្ដាយអាចដឹងបានតាមរយៈការសង្កេតមើលថា កូនមានអាការនឿយដង្ហក់ ឆាប់ហត់ជាងធម្មតា ដកដង្ហើមញាប់ សាច់ស្បែកឡើងស្លេក ឬលឿង ខុសប្រក្រតីពីពណ៌ស្បែកដើម។អាចសង្កេតនៅលើបបូរមាត់ ឬផ្នែកក្នុងត្របកភ្នែកខាងក្រោម និងការមើលនៅលើស្បែកដូចជា លើផ្ទៃមុខអាចនឹងពិបាកសម្គាល់ បើក្មេងមានសម្បុរ-ស តែបើសិនជាត្រូវការចង់ដឹងច្បាស់លាស់ ត្រូវជោះឈាមពិនិត្យមើលពណ៌ និងចំនួនរបស់គ្រាប់ឈាមក្រហម។ បើរកឃើញថា កូនមានអាការទាំងនោះ ឪពុកម្ដាយមិនគួរប្រហែស និងបណ្ដែតបណ្ដោយឡើយ ព្រោះអាការទាំងនោះ បើមិនបានទទួលការព្យាបាលអាចហុចផលអាក្រក់ដល់វិវឌ្ឍនាការរបស់កូនជាច្រើនទៀត។

កូនស្លេកស្លាំង មានមូលហេតុមកពីអ្វី?
បញ្ហារោគស្លេកស្លាំងអាចកើតឡើងដោយសារច្រើនមូលហេតុ ដោយអាចបណ្ដាលមកពីការដែលរាងកាយខ្វះសារធាតុអាហារប្រភេទខ្លះ ដូចជាខ្វះសារធាតុដែក ប្រូតេអីុន អាស៊ីតហ្វូលិក និងវីតាមីន B12 ដែលជាសារធាតុសំខាន់ក្នុងការផលិតឈាម។ ការខ្វះសារធាតុទាំងនេះនឹងធ្វើឱ្យក្មេងស្លេកស្លាំងបាន និងការប្រសូតមុនកំណត់ ការមានព្រូន ឬមានសភាវខាងពូជអម្បូរប្រភេទម្យ៉ាងក៏ជាមូលហេតុដែលធ្វើឱ្យក្មេងកើតជំងឺស្លេកស្លាំង។ ភាគច្រើនជំងឺស្លេកស្លាំង ច្រើនបណ្ដាលមកពីការខ្វះសារធាតុដែក ឬអាចហៅម្យ៉ាងទៀតថា “ជំងឺឈាមស្លេក”។

កូនស្លេកស្លាំង តើត្រូវព្យាបាលឬទេ?
បើឪពុកម្ដាយរកឃើញថា កូនកើតជំងឺស្លេកស្លាំង ឬមានអាការប្រថុយនឹងការកើតជំងឺស្លេកស្លាំង ឪពុកម្ដាយមិនគួរប្រហែសឡើយ ត្រូវប្រញាប់នាំកូនទៅជួបគ្រូពេទ្យដើម្បីពិនិត្យ និងព្យាបាល ព្រោះអាការរបស់ជំងឺស្លេកស្លាំងនេះបើមិនបានទទួលការព្យាបាលទេនោះ អាចហុចផលអាក្រក់ដល់វិវឌ្ឍនាការរបស់កូនជាច្រើនទៀត ដូចជាអាចបណ្ដាលឱ្យខួរក្បាលធ្វើការយឺតយ៉ាវ ដោយសារតែបានទទួលអុកស៊ីហែ្ស៊នពីគ្រាប់ឈាមក្រហមតិចតួច បណ្ដាលឱ្យមានអារម្មណ៍មិនស្វាហាប់ ស្ពឹកស្រពន់ អាចហុចផលឱ្យកូនរៀនយល់ដឹងយឺតជាងក្មេងក្នុងវ័យដូចគ្នា ដោយសារតែសភាវស្លេកស្លាំងធ្វើឱ្យកូនមិនឃ្លានចំណីអាហារ ញ៉ាំបានតិច ធ្វើឱ្យរាងកាយកាន់តែខ្វះសារធាតុអាហារ ហុចផលប៉ះពាល់ដល់សុខភាពធ្វើឱ្យសុខភាពរបស់កូនមិនរឹងមាំងាយឈឺថ្កាត់ និងថែមទាំងធ្វើឱ្យកូនមានការចម្រើនធំធាត់យឺតទៀតផង។

កូនស្លេកស្លាំង តើត្រូវចិញ្ចឹម និងមើលថែទាំយ៉ាងណា?
ការមើលថែទាំ ពេលកូនមានសភាវស្លេកស្លាំង ឪពុកម្ដាយអាចធ្វើបាន គឺប្រតិបត្តិតាមពាក្យណែនាំរបស់គ្រូពេទ្យ ឱ្យកូនញ៉ាំថ្នាំយ៉ាងត្រឹមត្រូវតាមវេជ្ជបញ្ជា មើលថែទាំលើរឿងអនាម័យរបស់កូនដើម្បីកាត់បន្ថយឱកាសឆ្លងមេរោគផ្សេងទៀត។ គួរឱ្យកូនញ៉ាំអាហារដែលមានប្រយោជន៍គ្រប់5ប្រភេទក្រុមឱ្យបានរាល់ថ្ងៃដើម្បីឱ្យកូនបានទទួលសារធាតុអាហារគ្រប់ចំនួន ដើម្បីឱ្យរាងកាយកូនបានរឹងមាំ និងដែលសំខាន់មួយទៀត គឺ​ត្រូវនាំកូនទៅជួបគ្រូពេទ្យតាមការណាត់ និងប្រញាប់ទៅជួបមុនណាត់នៅពេលដែលអាការផ្សេងៗកាន់តែអាក្រក់ឡើង ឬមានអាការមិនប្រក្រតីណាមួយខុសពីមុន។

សភាវស្លេកស្លាំងលើកុមារតូចជារឿងគួរឱ្យខ្លាច តែក៏អាចការពារបានយ៉ាងងាយដែរ ដោយចាប់ផ្ដើមពីការឱ្យញ៉ាំអាហារឱ្យបានគ្រប់ 5ប្រភេទក្រុម ទាំងបាយ ស៊ុតក្រហម សាច់សត្វ បន្លែផ្លែឈើ និងអាហារដែលមានសារធាតុដែកដែលមាននៅក្នុងសាច់ក្រហម ស៊ុតក្រហម គ្រឿងក្នុងសត្វ ថ្លើមជ្រូក ឈាមជ្រូក គ្រាប់ធញ្ញជាតិបន្លែស្លឹកបៃតង និងទឹកដោះជាដើម។ ចំពោះទារកទើបនឹងកើតបានទទួលសារធាតុអាហារពីទឹកដោះម្ដាយ អ្នកម្ដាយអាចបង្កើនបានដោយការញ៉ាំអាហារដែលមានសារធាតុដែកខ្ពស់។ ត្រឹមតែប៉ុណ្ណឹង អ្នកម្ដាយក៏អាចការពារកូនតូចពីសភាវខ្លួនប្រាណស្លេកស្លាំងបានហើយ៕

“ការស្រែកយំ” គឺជារឿងធម្មតារបស់ទារកទើបនឹងកើត ដោយសារតែសភាពជុំវិញខ្លួនដែលមកប៉ះពាល់ប្រព័ន្ធប្រសាទការដឹងតូចៗទាំង5 របស់កូនដែលមានដូចជា ត្រចៀក ភ្នែកច្រមុះ អណ្ដាត និងរាងកាយ។ អ្វីដែលប៉ះពាល់ទាំងនេះ មានផលចំពោះអារម្មណ៍របស់កូន ធ្វើឱ្យគេកើតមានអារម្មណ៍មិនសប្បាយកាយ ឬមានអារម្មណ៍មិនសប្បាយចិត្ត ហើយព្រោះកូនតូចមិនទាន់អាចប្រាប់ពីអារម្មណ៍របស់ខ្លួនឱ្យឪពុកម្ដាយដឹងតាមរយៈពាក្យសំដីបាន ដូច្នេះទើបវិធីតែមួយគត់ដែលគេអាចទំនាក់ទំនងជាមួយឪពុកម្ដាយបានក៏គឺ “ការស្រែកយំ” ហ្នឹងឯង។ ការយល់ដឹងពីមូលហេតុដែលធ្វើឱ្យកូនតូចស្រែកយំ នឹងធ្វើឱ្យឪពុកម្ដាយថ្មោងថ្មីយល់ដឹងអំពីកូនតូច និងអាចតបស្នងតម្រូវការរបស់កូនបានយ៉ាងមានសេចក្ដីសុខ។

កូនឃ្លាន
បើកូនតូចរបស់អ្នកម្ដាយបៅទឹកដោះបានតិច និងច្រើនតែភ្ញាក់ឡើងយំក្រោយពីបៅទឹកដោះបានត្រឹមតែមួយម៉ោងរួចមកនោះ អាចមានមូលហេតុមកពីការដែលកូនតូចបៅទឹកដោះខុសវិធី ដែលការបៅទឹកដោះខុសវិធីនេះអាចកើតឡើងបានទាំងលើក្មេងដែលបៅទឹកដោះពីដប និងក្មេងដែលបៅទឹកដោះម្ដាយ ធ្វើឱ្យកូនបឺតយកខ្យល់ចូលទៅច្រើន និងមានអារម្មណ៍តឹងណែន។ បើអ្នកម្ដាយសង្កេតឃើញថា កូនតូចច្រើនតែស្រែកយំរករឿងគ្រប់ពេលដែលដាក់ឱ្យគេងផ្ងារ និងយំមិនព្រមគេង អាចបណ្ដាលមកពីអាការតឹងណែនក្នុងពោះ អ្នកម្ដាយគួរលើកកូនមកពឱ្យទ្រោបលើស្មា ព្រមទាំងអង្អែលខ្នងថ្នមៗ កូនអាចនឹងភើចេញមក ហើយនឹងមានអារម្មណ៍ស្រួលខ្លួនឡើងវិញ។

កូនឯកា
ទារកត្រូវការសេចក្ដីស្រឡាញ់ ភាពកក់ក្ដៅតាមរយៈការប៉ះពាល់ដ៏ទន់ភ្លន់របស់ឪពុក និងម្ដាយជាប់ជានិច្ច។ មិនថាកូនតូចរបស់លោកអ្នកមានអាយុប៉ុន្មាន ក៏គេនៅតែត្រូវការសេចក្ដីស្រឡាញ់ ភាពកក់ក្ដៅតាមរយៈការឱបថើបរបស់ឪពុកម្ដាយជានិច្ច។ ការបីព ឬឱបថើប ជាការប៉ះពាល់ខាងរាងកាយដែលធ្វើឱ្យកូនមានអារម្មណ៍កក់ក្ដៅក្នុងចិត្ត និងមានសេចក្ដីសុខ។​ ពេលខ្លះត្រឹមតែលោកអ្នកលើកកូនតូចបី ព ឱបនៅក្នុងរង្វង់ដៃ ក៏គេអាចបាត់យំភ្លាម សឹងតែលោកអ្នកមិនចាំបាច់ត្រូវលួងលោមដោយពាក្យសំដីផង។

កូនមិនស្រួលខ្លួន
នៅពេលកូនឈឺថ្កាត់ កូនច្រើនតែយំរករឿងបើអ្នកម្ដាយសាកល្បងប៉ះខ្លួនកូន ក៏អាចនឹងមានអារម្មណ៍ដឹងបានថា កូនក្ដៅខ្លួនខុសប្រក្រតី និងអាចមានអាការហូរទឹកសំបោរ ក្អក និងក្អួតចង្អោររួមជាមួយផង។ អ្នកម្ដាយគួរវាស់សីតុណ្ហភាពខ្លួនកូន ដើម្បីពិនិត្យមើលថា តើកម្ដៅខ្លួនកូនស្ថិតក្នុងកម្រិតប៉ុន្មានអង្សា? បើចាប់ពី37អង្សាឡើងទៅ បានន័យថា កូនតូចមានអាការគ្រុនក្ដៅខ្លួនហើយ ចូរប្រញាប់នាំកូនទៅមន្ទីរពេទ្យភ្លាម។

កូនដុះធ្មេញហើយ
ជាប្រក្រតី ទារកនឹងមានធ្មេញមួយគូដំបូងនៅពេលអាយុបាន 6ខែ។ មុននឹងធ្មេញរបស់កូនដុះឡើង ច្រើនតែមានទឹកមាត់ហៀរចេញមកច្រើន មិនចង់បៅទឹកដោះ ឬញ៉ាំអាហារ យំរករឿង មានអារម្មណ៍រមាស់អញ្ចាញធ្មេញ ចូលចិត្តយកដៃលូកចូលមាត់។ល។ អ្នកម្ដាយអាចជួយបន្ថយអាការរមាស់អញ្ចាញធ្មេញរបស់កូនបាន ដោយការឱ្យកូនខាំដុំនំប៉័ងទន់ៗបាន។

កន្ទប ឬខោទឹកនោមកូនសើមខ្លាំង
នៅពេលក្រណាត់កន្ទប ឬខោទឹកនោមកូនសើមខ្លាំង កូនអាចនឹងមានអារម្មណ៍ថាសើមខ្លួន មិនស្រួលស្បែក ជួនកាលអាចធ្វើឱ្យកើតកន្ទួលរមាស់ទៀតផង ទើបកូនតូចស្រែកយំរករឿង។ ការប្រើម្សៅលាបសម្រាប់ទារកក្រោយការផ្លាស់ក្រណាត់កន្ទបថ្មីគ្រប់ពេល អាចជួយការពារការកើតកន្ទួលរមាស់បានយ៉ាងងាយ ដូច្នេះអ្នកម្ដាយត្រូវចេះជ្រើសរើសប្រើម្សៅសម្រាប់ទារកដែលបរិសុទ្ធល្អ មិនលាយពណ៌ មិនលាយសារធាតុគីមី ការពារសំណើម ដែលអាចធ្វើឱ្យមានសារធាតុគីមីនៅសេសសល់នៅលើស្បែកដ៏ស្ដើងខ្ចីរបស់កូនបាន៕

នៅពេលថ្មីៗនេះ តារាចម្រៀងស្រីនៅក្នុងទ្រនំថោនកញ្ញា ស៊ូ ស៊ីរិកា បានរៀបរាប់រឿងរ៉ាវដ៏ក្ដៅគគុកមួយប្រាប់ដល់មហាជនទាំងឡាយបានជ្រាប តាមរយៈធ្វើការ Live Video នៅលើហ្វេសប៊ុកផ្ទាល់ខ្លួន។ នាងបានរៀបរាប់ថា មានតារាស្រីរួមទ្រនំជាមួយនឹងនាង ដែលនាងមិនបានបញ្ចេញឈ្មោះចំៗនោះបានព្យាយាមបំបិទផ្លូវសិល្បៈរបស់នាង និងព្យាយាមនិយាយបង្កាច់បង្ខូចកេរ្ដិ៍ឈ្មោះរបស់នាង។

តាមរយៈវីដេអូជាងមួយម៉ោងនោះ កញ្ញា ស៊ូ ស៊ីរីកា បានរៀបរាប់ទាំងកំហឹងខ្លាំងទៅលើតារារួមផលិតកម្មជាមួយគ្នា ដែលនាងអះអាងថា តារារូបនោះតែងតែបិទផ្លូវការងាររបស់នាងមករហូត ដោយបានប្រាប់ទៅអ្នករៀបចំកម្មវិធីនានាថា មិនស្គាល់លេខរបស់នាង ហើយថានាងជាកូនអ្នកមាន ដូច្នោះហើយលោកយាយរបស់នាងបានហាម មិនឱ្យនាងចេញច្រៀងឡើយ។ មិនត្រឹមតែប៉ុណ្ណោះ ថែមទាំងនិយាយអាក្រក់ពីនាងថា នាងជាមនុស្សឫកធំ និងស៊ីតម្លៃខ្លួនថ្លៃខ្ទង់ពាន់ៗឯណោះ។ នេះបើតាមសម្ដីរបស់កញ្ញា ស៊ូ ស៊ីរិកា ដែលនិយាយនៅក្នុងវីដេអូ។

តារាចម្រៀងស្រីក្នុងផលិតកម្មថោន រូបនេះបានបញ្ជាក់ថា នាងបានអត់ទ្រាំចំពោះទង្វើរបស់តារាចម្រៀងរូបនោះជាយូរណាស់មកហើយ ទើបនៅពេលនេះនាងដាច់ចិត្តចេញមកនិយាយជាសាធារណៈតែម្ដងទៅ តែនាងនៅតែទុកកិត្តិយសឱ្យដោយការមិនបញ្ចេញឈ្មោះតារាម្នាក់នោះចំៗឡើយ។ នាងថា រូបនាងផ្ទាល់គឺទទួលគ្រប់កម្មវិធីតន្រ្តី និង Event ទាំងអស់ ព្រោះនាងចូលសិល្បៈនេះ គឺមានគោលបំណងចង់រកចំណូលផ្ដត់ផ្គង់ជីវភាពខ្លួន និងគ្រួសារ ហើយមួយវិញទៀតគឺនាងស្រឡាញ់សិល្បៈតាំងពីតូចមក។

យ៉ាងណាមិញ មួយរយៈមុន តារាស្រី ស៊ីរិកា ធ្លាប់បានប្រកាសថា ខ្លួនបម្រុងនឹងចាកចេញពីសិល្បៈទៅហើយ តែក្រោយមកក៏បែរជាស្ងាត់ទៅវិញ និងនៅពេលនេះស្រាប់តែមានរឿងភ្ញាក់ផ្អើលខ្លាំងកើតឡើង នៅពេលដែលនាងបន្ដដំណើរនៅលើវិថីសិល្បៈតទៅទៀត តែបែរជាមានរឿងកាច់កុងគ្នាយ៉ាងអាក្រក់បែបនេះទៅវិញ។ ដើម្បីឱ្យច្បាស់បន្ថែមទៀត សូមប្រិយមិត្តទាំងអស់ ទស្សនា និងស្ដាប់ការរៀបរាប់របស់ ស៊ូ ស៊ីរិកា ខាងក្រោមនេះ៖

កុមារតូចជាមនុស្សដែលពូកែឆ្ងល់ ចូលចិត្តគិត និង​ច្បាស់លាស់បំផុត ព្រោះអ្វីក៏ដោយ​បើមនុស្សធំឱ្យគេធ្វើ កុមារនឹងធ្វើតាម​ទាំងស្រុង និងល្អឥតខ្ចោះ ហេតុនេះ​ការនិយាយជាមួយក្មេងមិនច្បាស់លាស់អាចបណ្តាលឱ្យមានបញ្ហា។

លោក​ជំទាវ ទន់ សាអ៊ីម បានលើកឡើងថាកុមារជាមនុស្សដែលច្បាស់លាស់បំផុត នៅពេលគេអានរឿងអ្វីមួយដែលមានលក្ខណៈមិនច្បាស់លាស់គេចាប់ផ្តើម​កត់សម្គាល់ដឹងភ្លាម។ ជាឧទាហរណ៍ នៅពេលកុមារអានរឿងណាមួយដែលមើលទៅ​មិនសមហេតុផល ឬមិនអស់សេចក្តីគេចាប់ផ្តើមបន្ថែមសេចក្តីសាច់រឿងនេះដោយខ្លួនឯង។ ហេតុនេះមនុស្សធំត្រូវតែប្រុងប្រយ័ត្នចំពោះការសន្ទនាជាមួយក្មេង និងជាពិសេសទៅទៀតនោះគឺការសន្យាជាមួយពូកគេក្នុងការធ្វើអ្វីមួយជាមួយពួកគេ ព្រោះថាគេតែងចងចាំ​ និងចាំមើលថា យើងបានធើ្វតាមការសន្យារបស់យើងទេ។

លោកជំទាវ ទន់ សាអ៊ីម បានមានប្រសាសន៍ថា៖ “​ទន្ទឹមនឹង​ភាពជក់ចិត្តនៅក្នុងសាច់រឿងកុមារ​អាចធ្វើបានអ្វីដែលសំខាន់គឺត្រូវតែមានភាពច្បាស់លាស់ ហ្មត់ចត់​ និងអស់សេចក្តី​ ប្រសិនបើមិនអស់សេចក្តីទេ ក្មេងនឹងបន្តឆ្ងល់មិនឈប់ ហើយក៏បង្កើតជាបញ្ហាសម្រាប់ពួកគេ”។

អ្នកជំនាញ​ខាងអប់រំ​ខាងលើបានលើកឡើងផងដែរថា ការទំនាក់ទំនងជាមួយក្មេង​ក៏ចាំបាច់ត្រូវតែ​មានភាពច្បាស់លាស់បំផុត ព្រោះក្មេងជាវ័យដែល​មិនសូវមានមូលដ្ឋាន​ព័ត៌មានសម្រាប់ការពិចារណាច្រើននោះទេ ប្រសិនបើគេធ្លាប់ដឹងរឿងណាមួយថា​ជាការពិតហើយ គេនឹងកំណត់យក​វាទុកក្នុងចិត្តជាក់ជាមិនខាន។ ហេតុនេះ​អ្នក​អប់រំ​កុមារត្រូវតែ​គិតឱ្យបានសព្វជ្រុងជ្រោយ ពីភាពសមហេតុផល​ និងមាន​ភាពប្រាកដនិយម (logic) ហើយបើប្រាប់រឿងណាមួយដល់ក្មេង​គឺត្រូវធ្វើឱ្យចប់ចុងចប់ដើម ដើម្បីបង្ហាញពីហេតុ និងផលច្បាស់លាស់ដល់ពួកគេ។ ក្រោយពេលគេយល់ហេតុផល​នៃរឿងនីមួយៗហើយ ទើបយើងអាចឈានទៅបង្ហាញរឿងថ្មីមួយទៀត​ដើម្បីកុំឱ្យគេមានភាពច្របូកច្របល់។

អ្នកជំនាញអប់រំ​នានាសុទ្ធតែ​យល់ឃើញថាការអប់រំ​កុមារតូច ជាមូលដ្ឋានគ្រឹះយ៉ាងសំខាន់ក្នុងការជំរុញ​ប្រជាជនសកម្ម និង​ការអភិវឌ្ឍសង្គមប្រកបដោយ​និរន្តភាពនៅថ្ងៃអនាគត ហើយការកសាងស្ថានភាពវិជ្ជមានទាំងឡាយគឺចាប់ផ្តើមពីការកសាងសមត្ថភាពធនធានមនុស្សពីតូចៗនេះតែម្តង។ហេតុនេះហើយទើបបណ្តាប្រទេសអភិវឌ្ឍនានាចាប់អារម្មណ៍ខ្លាំង និងមានការប្រុងប្រយ័ត្នខ្ពស់បំផុត​ជាមួយនឹងការអប់រំ​កុមារតូច ដែលផ្សារភ្ជាប់ទាំង​គ្រឹះស្ថានអប់រំ និង​អាណាព្យាបាលដែលស្ថិតនៅជាមួយពួកគេដោយផ្ទាល់នៅក្នុងផ្ទះ។

ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ដើម្បីឱ្យមានការផ្លាស់ប្តូរ​ទម្លាប់ និងដោះស្រាយបញ្ហាសំខាន់ៗក្នុងការរស់នៅលុះត្រាតែយើងមានការអប់រំល្អដល់កុមារតូចៗ ព្រោះនៅពេលកុមារទទួលបានការអប់រំល្អ គេនឹងមានទម្លាប់នៃការរស់នៅល្អពី​ក្នុងដែល​អាចរុញច្រានឱ្យសង្គមទាំងមូលមាន​ស្ថានភាពល្អប្រសើរ។ តែទោះបីជាយ៉ាងនេះក្តីដើម្បីឱ្យកុមារ​ទទួលបានការអប់រំល្អពិតប្រាកដ ជាពិសេស​ទម្លាប់នៃការរស់នៅ និងជំនាញទន់នានាលុះត្រាតែមានការសហការល្អ និងមានការចូលរួមពីអាណាព្យាបាល​គ្រប់រូប​ ស្របពេលដែលស្ថាប័នអប់រំ​កំពុង​ជំរុញឱ្យមានគុណភាពកាន់តែខ្លាំង។

ឯកឧត្តម ហង់ ជួនណារ៉ុន បានមានប្រសាសន៍ថា៖“​កុមាររៀននៅក្នុងសាលាតែប៉ុន្មានម៉ោងប៉ុណ្ណោះតែកុមាររស់នៅជាមួយអាណាព្យាបាល​ជាច្រើនម៉ោងក្នុងមួយថ្ងៃៗ ហេតុនេះការចូលរួម​ចំណែកក្នុងការអប់រំពីអាណាព្យាបាលគឺជារឿងសំខាន់”។

ជាក់ស្តែង កម្ពុជាមានកត្តាប្រឈមមួយចំនួន​ត្រង់អាណាព្យាបាល​ហាក់មិនសូវបានគិតគូរច្រើនពីជំនាញ​ភាពជាអាណាព្យាបាល (parenting skills) ដែលបញ្ហានេះបណ្តាលឱ្យ​ប៉ះពាល់ដល់ការអភិវឌ្ឍ​សមត្ថភាពក្មេងតូច ព្រោះនៅពេលដែលអាណាព្យាបាល​ជូនកូនទៅសាលារៀន​ មានន័យថាក្មេងបានទទួល​ការអប់រំមួយផ្នែកធំ តែក្រោយពេលកុមារមកផ្ទះវិញ ហើយឃើញ​សកម្មភាព ឬទទួលយកបរិស្ថានមិនល្អ គេនឹង​មានការប្រែប្រួលជាអ-វិជ្ជមានមកវិញដែរ។ ហេតុនេះអាណាព្យាបាល​ចាំបាច់ត្រូវយកចិត្តទុកដាក់ និងផ្តល់តម្លៃសំខាន់លើការ​អប់រំ​កុមារតូចៗនៅគ្រប់ទីកន្លែង ដោយចំណេះដឹង​ពីភាពជាអាណាព្យាបាល​ ដើម្បី​ផ្តល់ឱ្យកុមារនូវ​ប្រភពចំណេះដឹងតាមកម្រិត​ដែលកូនៗអាចយល់ដឹងបាន និងដឹងពីចំណុចគួរចៀសវាងក្នុងនាមជាអានាព្យាបាលរបស់ក្មេងតូចៗ៕

ក្រសួងកសិកម្ម​បានប្រកាស​ជំ​រុញឱ្យ​ប្រជាកសិករ​ដែល​ប្រកប​របរ​ចិញ្ចឹមសត្វ​ជា​លក្ខណៈ​គ្រួសារ​ឱ្យកែប្រែ​ទម្លាប់​ទៅ​ចិញ្ចឹមសត្វ​បែប​លក្ខណៈ​ពាណិជ្ជកម្ម ជា​លក្ខណៈ​កសិដ្ឋាន​ខ្នាតតូច ឬ​មធ្យម​វិញ ដើម្បី​ឆ្លើយតប​ទៅនឹង​តម្រូវការ​ហូបចុក​រប​ស់​ប្រជាពលរដ្ឋ​ប្រកបដោយ​គុណភាព និង​សុវត្ថិភាព​ហើយ​អាច​ឈានទៅ​កាត់បន្ថយ​ការនាំ​ចូល​សាច់សត្វ​គ្រប់​ប្រភេទ​ពី​បរទេស។

ឯកឧត្តម សេន សុវណ្ណ អគ្គនាយក​នៃអគ្គនាយកដ្ឋានសុខភាព​ស​ត្វនិង​ផលិតកម្ម​សត្វ​នៃ​ក្រសួងកសិកម្ម​បាន​ប្រាប់​ឡា​រ៉ែ​ន​ពាណិជ្ជ​ថា ក្រសួងកសិកម្មជាពិសេស​អគ្គនាយកដ្ឋាន​សុខភាព​សត្វ និង​ផលិតកម្ម​សត្វ​បានដាក់​ផែនការ​ជំរុញ​ប្រជាកសិករ​ឱ្យ​ចិញ្ចឹមសត្វ​ជា​លក្ខណៈ​កសិដ្ឋាន​ខ្នាតតូច ឬ​មធ្យម​ដើម្បី​ធានា​ឱ្យ​ផលិតកម្ម​សាច់សត្វ​មានគុណ​ភាព និង​សុវត្ថិភាព​សម្រាប់​អ្នក​បរិភោគ។

ឯកឧត្តម​បានឱ្យដឹង​ដែរ​ថា៖ “ដោយសារតែ​ការចិញ្ចឹម​សត្វ​របស់​យើង ពុំទាន់​មាន​ក្ខ​ណៈ​ស្តង់ដារដូច្នេះហើយ​ទើប​យើង​ធ្វើ​ការជំរុញឱ្យ​កសិករ​ចិញ្ចឹមសត្វ​ជា​លក្ខណៈ​អាជីវកម្ម​បែប​ជា​កសិដ្ឋាន​ឱ្យមាន​ស្តង់ដារ ដោយ​ក្រសួង​មាន​ផែនការ​ផ្សារភ្ជាប់​រវាង​កសិករ និង​ក្រុមហ៊ុន​ឯកជន​ដើម្បី​ចុះកិច្ចសន្យា​ទិញ និង​លក់​នៅពេល​កសិករ​ប្រមូល​ផល​បាន‟។

ឯកឧត្តម​បញ្ជាក់ថា គម្រោង​ជំរុញ​ឱ្យ​កសិករ​បង្កើន​ផលិតភាព​នៃ​ការចិញ្ចឹម​សត្វ​ឱ្យ​ក្លាយជា​មុខរបរ​នេះ គឺ​ដោយសារ​យើង​ដឹងថា​ស្រុក​យើង​មាន​តម្រូវការ​សាច់សត្វ​ច្រើនណាស់ ហើយ​យើង​ចង់ឱ្យមាន​ការផ្គត់ផ្គង់​ក្នុង​លក្ខណៈ​ជា​សន្តិសុខ​ស្បៀង​ផងដែរ។ ការជំរុញ​ការចិញ្ចឹម​សត្វ​ជា​លក្ខណៈ​អាជីវ​កម្មនេះ ធ្វើឡើង ខណៈដែល​តម្រូវការ​សាច់​សត្វ​ត្រូវបាន​នាំចូល​ច្រើន ដែលមាន​ដូចជា សាច់មាន់ ជ្រូក និង​គោ…ចំណែក​សាច់គោ​ដែល​នាំចូល​ពី​អូស្ត្រាលី​វិញ​មានតម្លៃ​ថ្លៃ ហើយ​យើង​បាន​ផ្អាក​មួយរយៈ​ហើយ។

សូមបញ្ជាក់ថា ចំពោះ​សាច់សត្វ សព្វថ្ងៃ​គឺ តម្រូវការ​បាន​កើនឡើង​រហូតដល់​ជាង 30ម៉ឺន​តោន ក្នុងមួយឆ្នាំៗសម្រាប់​ផ្គត់ផ្គង់​ការហូបចុក​របស់​ប្រជាពលរដ្ឋ និង​ភ្ញៀវទេសចរ រីឯ​សាច់សត្វ​ចិញ្ចឹម​ក្នុងស្រុក​អាច​ផ្គត់ផ្គង់​ប្រជាពលរដ្ឋ​ក្នុងស្រុក ចំណែក​ការ​បម្រើឱ្យ​វិស័យ​ទេសចរណ៍ និង​អ្នកមាន​ជីវភាពខ្ពស់ៗនៅតែមាន​តម្រូវការ​ច្រើន គឺជា​សាច់សត្វ​ដែលមាន​គុណភាព និង​សុវត្ថិភាព។

បច្ចុប្បន្ន​ការចិញ្ចឹម​សត្វ​ជា​លក្ខណៈ​អាជីវកម្ម​បែប​កសិដ្ឋាន​មាននៅ​ស្ទើរ​គ្រប់​ខេត្ត-ក្រុង​ក្នុងប្រទេស​កម្ពុជា ដូចជា​នៅ​ខេត្តព្រៃវែង ស្វាយរៀង តាកែវ កំពតពោធិ៍សាត់ បាត់ដំបង បន្ទាយមានជ័យ​យើង​ពុំទាន់​បាន​ចុះបញ្ជី​ជា​កសិដ្ឋាន​ទេ តែ​យើង​លើកទឹកចិត្ត​ និង​រៀបចំ​បញ្ជី​ជា​សហគមន៍។ សម្រាប់​ខេត្ត​មួយចំនួន​មាន ខេត្តព្រៃវែង ស្វាយរៀង​មាន​ទម្រង់​ជា​កសិដ្ឋាន​ហើយ តែ​យើង​មិនទាន់​តម្រូវឱ្យ​គាត់​ចុះបញ្ជី​ជា​កសិដ្ឋាន​ទេ ពីព្រោះ​មិនទាន់មាន​លក្ខណៈ​ស្តង់ដារ​នៅឡើយ ហើយ​ក្រសួង​ក៏​មិនទាន់​តម្រូវឱ្យ​ស្តង់ដារ​ដែរ ដោយសារ​យើង​ទើបតែ​ចាប់ផ្តើម តែ​ក្រសួង​បាន​ចុះទៅ​មើល​ជាប្រចាំ និង​ធ្វើការ​បែងចែក​ការចិញ្ចឹម​សត្វ​ជា​លក្ខណៈ​គ្រួសារ និង​បែប​កសិដ្ឋាន​រួចហើយ។ មានន័យថា យើង​មាន​ទម្រង់​ជា​កសិដ្ឋាន​ហើយ គ្រាន់តែ​មិនទាន់​ចុះបញ្ជី​ជា​ផ្លូវការ​ប៉ុណ្ណោះ។

ដើម្បី​កែប្រែ​ទម្លាប់​របស់​កសិករ ក្រសួង​បាន​ត្រៀម​មន្ត្រី​ជំនាញ​ចុះ​ផ្តល់​បច្ចេកទេស​ពី​លក្ខណៈ​ចិញ្ចឹម ការថែទាំ ការផ្តល់​វ៉ាក់សាំង​ការពារ​ជម្ងឺ បច្ចេកទេស​ផលិត​ចំណី​សត្វ និង​ការជ្រើសរើស​ប្រភេទ​ពូជ​សត្វ​ចិញ្ចឹម​ជាដើម ដើម្បីឱ្យ​កសិករ​ចិញ្ចឹម​ទៅ​ទទួលបាន​ជោគជ័យ។ ម្យ៉ាងទៀត​ការប្រើ​ថ្នាំ​វ៉ាក់សាំង​ការពារ​ជំងឺ​សត្វ​គ្រប់​ប្រភេទ​វិញ ខាង​នាយកដ្ឋាន​មានគ្រប់គ្រាន់​ក្នុងការ​ផ្គត់ផ្គង់ រឹតតែ​ប្រសើរ​ទៅទៀត​នោះ កសិករ​បច្ចុប្បន្ន​ក៏​គាត់​យល់ដឹង​ពី​បញ្ហា​ការពារ​នេះ​សព្វគ្រប់​ដែរ និង​កសិករ​មួយចំនួន​គាត់​ថែមទាំង​បានទទួល​ងារ​ជា​កសិករ​គំរូ​ទៀតផង ហើយ​កសិករ​ខ្លះទៀត​ក៏មាន​លទ្ធភាព​អាច​គ្រប់គ្រង​កសិដ្ឋានរ​បស់​គាត់​បាន​ផងដែរ។ នេះ​បើតាម​ការអះអាង​របស់​ឯកឧត្តម សេន សុវណ្ណ។

ឯកឧត្តម​សង្ឃឹមថា គម្រោង​នេះ​នឹង​ទទួលបាន​ជោគជ័យ ព្រោះ​ការជំរុញ​របស់​ក្រសួង​បានធ្វើឱ្យ​កសិករ​មួយចំនួន​ទទួលបាន​ស្នាដៃ​ជា​កសិករ​គំរូទើប​ក្រសួង​ប្រកាស​ជំរុញ​ឱ្យ​ពួកគាត់​កែប្រែ​ទម្លាប់​ការចិញ្ចឹម​សត្វ​ពី​លក្ខណៈ​គ្រួសារ​មកជា​លក្ខណៈ​កសិដ្ឋាន​សម្រាប់​អាជីវកម្ម។ ជា​ជំហាន​បន្តទៅទៀត យើង​អាច​នឹង​នាំចេញ​ដោយ​ត្រូវការ​ការធ្វើ​វិនិយោគ​បែប​កែច្នៃ​ដោយ​ជំរុញ​លើកទឹកចិត្ត​ឱ្យ​វិស័យ​ឯកជន​ចូលរួម​វិនិយោគ​បន្ថែមទៀត​ទៅលើ​ការកែច្នៃ​សម្រាប់​ផ្គត់ផ្គង់​តម្រូវការ​ក្នុងស្រុក​ផង និង​នាំចេញ​ផង តែ​ទាំងអស់នេះ​សុទ្ធតែជា​ការងារ​របស់​វិស័យ​ឯកជន​ដែល​មិនទាន់មាន​ខាង​ណា​ជួយ​នៅឡើយ​ទេ។

កាលពី​ឆ្នាំមុន​ប្រទេស​កម្ពុជា​បាន​នាំចេញ​សត្វ​គោ និង​ក្របី​ជាង 100.000 ក្បាល​ដែល​ភាគច្រើន​ជា​គោ​នាំ​ចេញទៅ​ប្រទេស​វៀតណាម និង​ផលិតផល​អនុផល​សត្វ​ផងដែរ។ ឯកឧត្តម សេន សុវណ្ណ បាន​មានប្រសាសន៍ថា មានតែ​ក្រុមហ៊ុន​ចំនួន3 ប៉ុណ្ណោះ​ដែល​បាន​ចូលរួម​ក្នុង​ពាណិជ្ជកម្ម​ប្រភេទ​នេះ។ សត្វ​គោ និង​ក្របី​ចំនួន 3.2 លាន​ក្បាល​កំពុង​ត្រូវបាន​ចិញ្ចឹម​ដោយ​កសិករ​នៅ​ទូទាំងប្រទេស។

យោងតាម​របាយការណ៍ ក្រសួងកសិកម្ម​មាន​គ​ម្រោ​ង និង​កម្មវិធី​ក្នុងការ​ជំរុញ​កំណើន​វិស័យ​កសិកម្ម​ប្រកបដោយ​ចីរភាព និង​បរិ​យា​ប័ន្ន អនុវិស័យ​ជលផល និង​អនុវិស័យ​ផលិតកម្ម​សត្វ ដោយបាន​បង្កើត​ការចិញ្ចឹម​មាន់(គំរូ​បង្ហាញ)ចំនួន 111កន្លែង​ដែល​បាន​សាយភាយ​ដល់​ជាង1,300គ្រួសារ​បន្ថែម​ស្មើនឹង​មាន់​ជាង 5ម៉ឺន​ក្បាល ព្រមទាំង​បង្កើត​កន្លែង​ចិញ្ចឹម​ជ្រូក(គំរូ​បង្ហាញ)បាន 100កន្លែង និង​បាន​សាយភាយ​ដល់​ជាង 400គ្រួសារ​បន្ថែម​ស្មើនឹង​ជ្រូក 360ក្បាល។

កម្មវិធី​អភិវឌ្ឍន៍​កសិកម្ម​និរន្តរភាព និង​កម្មវិធី​អនុវិស័យ​ជលផល និង​ផលិតកម្ម​សត្វ​ដែល​ទទួល​ជា​ជំនួយឥតសំណង​ដោយ​សហភាព​អឺរ៉ុប​ចំនួន 26លាន​អឺរ៉ូ គឺជា​កម្មវិធី​រយៈពេល 5ឆ្នាំ គឺ​ពី​ឆ្នាំ2013 ដល់​ឆ្នាំ2018 ដែល​ជំរុញឱ្យមាន​កំណើនសេដ្ឋកិច្ច​សង្គម​ប្រកបដោយ​ចីរភាព។ គម្រោង​នេះ​ក៏បាន​ផ្តោតលើ​ការដាំ​ស្មៅ​បង្ហាញ​សម្រាប់​ចំណី​សត្វ​ផងដែរដោយ​បង្កើតបាន​ចំនួន 200កន្លែង​ដល់​ជាង 420គ្រួសារ​ស្មើនឹង​ជាង 9ពាន់​ហិកតា។ ជាងនេះទៅទៀតគម្រោង​ដដែល​នេះ​បានធ្វើ​ការកែលម្អ​អនាម័យ​សត្តឃាតដ្ឋាន​បាន 155កន្លែង ការចាក់​ថ្នាំ​វ៉ាក់សាំង​បង្ការ​ជំងឺ​សត្វ ធ្វើ​ជីវ​សុវត្ថិភាព ត្រួតពិនិត្យ​សុវត្ថិភាព​សត្វ និង​សាច់ ការ​បង្កាត់​ពូជ​គោ និង​ជ្រូក​សិប្បនិម្មិត។

លោក ជេ​ត ភិរម្យ អនុប្រធាន​សមាគម​អ្នក​ចិញ្ចឹមសត្វ​កម្ពុជា​បានឱ្យ​ឡា​រ៉ែ​ន​ពាណិជ្ជ​ដឹងថា​សមាគម​គាំទ្រ​នូវ​ការជំរុញ​នេះ ហើយ​ការជួយជ្រោមជ្រែង​របស់​រាជរដ្ឋាភិបាល​ក្នុងការ​កែប្រែ​ទម្លាប់​កសិករ​ឱ្យ​ចិញ្ចឹមសត្វ​ជា​លក្ខណៈ​អាជីវ​កម្មនេះ នឹង​ជួយ​ធ្វើឱ្យ​កសិករ​កាន់​តែមាន​ជីវភាព​ល្អប្រសើរ និង​អាច​ដោះស្រាយ​បញ្ហា ចៀស​ពី​ការ​ប្រឈម​ក្នុងការ​ប្រកួតប្រជែង​ជាមួយ​សាច់សត្វ​នាំចូល​ពី​ប្រទេសជិតខាង​ទៀតផង។

តាម​ការ​ព្យាករ​របស់​ក្រសួងកសិកម្ម រុក្ខាប្រមាញ់ និង​នេសាទ​បានឱ្យដឹងថា នៅ​ឆ្នាំ2019ខាងមុខនេះ កម្ពុជា​អាចមាន​តម្រូវការ​សត្វ​សាច់​រហូត​ដល់​ជាង 35ម៉ឺន​តោន​ក្នុង​មួយឆ្នាំ ដែល​ការជំរុញ​ផលិតកម្ម​សាច់សត្វ​នេះ​នឹង​ឈានទៅ​កាត់បន្ថយ​តម្រូវការ​នាំចូល​ប្រភេទ​សាច់សត្វ​មួយចំនួន​ពី​បរទេស​បាន៕

បើទោះបីជាលោក ខេមរៈ សិរីមន្ត តារាចម្រៀងល្បីឈ្មោះប្រចាំផលិតកម្មហង្សមាសបានគំរាមចាត់វិធានការក្ដៅចំពោះលោក ម៉ៃ សុគន្ធ ដោយថានឹងដាក់ពាក្យបណ្ដឹងពីបទញុះញង់មានជាអាទិ៍ និងធ្វើឱ្យប៉ះពាល់ដល់សិទ្ធិ និងផលប្រយោជន៍បុគ្គលក៏ដោយ ក៏នៅពេលនេះកំពូលតារាទើសប្រចាំសិល្បៈខ្មែររូបនោះនៅតែមិនមានការខ្លាចញញើត និងរួញរាក្នុងការបញ្ចេញពាក្យរិះគន់ទៅលើលោក ខេមរៈ សិរីមន្ត នៅលើបណ្ដាញសង្គមហ្វេសប៊ុកដដែល។

ថ្មីៗនេះលោក ខេមរៈ សិរីមន្ត និងតារាចម្រៀងល្បីឈ្មោះនៅប្រទេសថៃលោក ទិក ឈីរ៉ូ បានបញ្ចេញបទចម្រៀងរួមគ្នា មានចំណងជើងថា «Sad Man» ដែលកំពុងទទួលបានការគាំទ្រ និងចាប់អារម្មណ៍ច្រើនពីសំណាក់អ្នកគាំទ្រខ្មែរ-ថៃ។ លោក ម៉ៃ សុគន្ធ ក៏បានចេញវីដេអូ និងសាររិះគន់ជាថ្មីម្ដងទៀតទៅលើលោក សិរីមន្ត និងតារាចម្រៀងថៃម្ដងទៀតដែរថា «ឆ្ងល់? សួរតាមត្រង់ ហេតុអីអត់ព្រមឱ្យចាស្ទីនកូពី កាន់ឧបករណ៍តន្រ្តីអ៊ីចឹងហ្ន៎ ឬមួយគាត់​អត់ចេះ ឬគាត់លាក់គំនួច?។ ជ្រុលតែសហការគ្នាហើយ គួរណាស់តែឱ្យប៉ារ៉ូលដំបូង ខ្មែរច្រៀងមុន (មូលហេតុ ព្រោះគាត់ជាម្ចាស់ផ្ទះ ទោះហៅភ្ញៀវទៅពិសាបាយ ក៏ទុកកិត្តិយសចាប់ម្ហូបជូនភ្ញៀវមុនដែរ)»។

បើតាមរយៈការនិយាយរិះគន់ និងលេងទឹកមុខនៅក្នុងវីដេអូរបស់លោក ម៉ៃ សុគន្ធ គេមើលឃើញថា បុរសរូបនេះត្រូវបានមហាជនប្រើពាក្យសម្ដីអសុរោះ ជេរប្រមាថរូបលោកយ៉ាងខ្លាំងៗ ក្នុងការដែលលោកចេះដឹងរឿងគេច្រើនជ្រុលបែបនេះ ហើយមានអ្នកគាំទ្រលោក ខេមរៈ សិរីមន្ត ជាច្រើនទៀតបានបញ្ចេញមតិថា ចង់ឃើញចំណាត់ការរបស់លោក ខេមរៈ សិរីមន្ត ចំពោះម៉ៃ សុគន្ធ ក្នុងពេលឆាប់ៗនេះតែម្ដង។ គួររំឭកដែរថា តារាចម្រៀងប្រុសហង្សមាសខាងលើ បានរៀបចំពាក្យបណ្ដឹង និងប្រកាសនៅលើហ្វេសប៊ុករបស់ខ្លួនថា «មេធាវីរបស់ខ្ញុំបានរៀបចំសំណុំបែបបទរួចអស់ហើយ បទល្មើស និងភ័ស្តុតាងមានគ្រប់គ្រាន់អស់ហើយ បទចោទ បទញុះញង់មាន​ជា​អាទិ៍ បទធ្វើឱ្យប៉ះពាល់សិទ្ធិ និងផលប្រយោជន៍បុគ្គល។ ខ្ញុំមិនដែលគិតចង់មានបញ្ហាជាមួយបុគ្គលម្នាក់ហ្នឹងឡើយ តែគាត់ចង់បានបែបនេះ ដូច្នេះទទួលយកអ្វីដែលខ្លួនបានសាងបទល្មើសនេះចុះ»៕