Category: សង្គម និងសេដ្ឋកិច្ច

ទៅលេងទីក្រុងជាប់ឆ្នេរសមុទ្រដ៏ស្រស់ស្អាត Gold Coast ប្រទេសអូស្ត្រាលី
Gold Cost គឺជាទីក្រុងជាប់ឆ្នេរសមុទ្រដ៏ស្រស់ស្អាតដែលមានទីតាំងនៅក្នុងរដ្ឋ Queensland ប្រទេសអូស្ត្រាលី ហើយភ្ញៀវទេសចរ៍ប្រមាណ១០លាននាក់បានមកកម្សាន្តនៅក្នុងទីក្រុងដ៏ទំនើបមួយនេះជារៀងរាល់ឆ្នាំ។ Gold Coast ត្រូវបានគេទទួលស្គាល់ថាជាទីក្រុងមួយដែលសម្បូរទៅដោយឆ្នេរដ៏ស្រស់ស្អាតជាច្រើនស្ទើរចាំមិនអស់។
ប្រសិនបើអ្នកអញ្ជើញទៅកម្សាន្តនៅទីក្រុង Gold Coast អ្នកនឹងទទួលបាននូវទិដ្ឋភាពថ្មីសន្លាង ស្រលះភ្នែក ស្រស់ស្រាយក្នុងអារម្មណ៍ ដោយសារតែទេសភាពដ៏ស្រស់ត្រកាលនៃឆ្នេរសមុទ្រពណ៌ខៀវស្រងាត់ដាច់កន្ទុយភ្នែក និងឆ្នេរខ្សាច់ពណ៌មាសដ៏ស្រស់ស្អាតខ្នាតអន្តរជាតិ។
នៅក្នុងទីក្រុងជាប់ឆ្នេរសមុទ្រនេះ អ្នកក៏អាចទៅកម្សាន្តនៅកន្លែងដ៏គួរឱ្យចាប់អារម្មណ៍ជាច្រើនកន្លែងទៀតដូចជាៈ កោះ Stradbroke ខាងត្បូង, កំពង់ផែ The Spit, ឆ្នេរខ្សាច់ Main, ឆ្នេរស្ថានសួគ៌ Surfers, ឆ្នេរខ្សាច់ដ៏ស្រស់ស្អាត Broad beach, ឆ្នេរ Mermaid, ឆ្នេរ Nobby, ឆ្នេរ Miami, ឆ្នេរ Burleigh, ឧទ្យានជាតិ Burleigh Heads, ឆ្នេរ Tallebudgera, ឆ្នេរ Palm, ឆ្នេរ Currumbin, សាល Tugun, ឆ្នេរ Billnga, ឆ្នេរ Kirra, ទីក្រុងឆ្នេរ Coolangatta, ឆ្នេរ Greenmount, ឆ្នេរ ្Rainbow Bay, តំបន់ថ្មដុះ Snapper Rocks និងឆ្នេរ Froggies ជាដើម។ នៅទីក្រុង Gold Coast ក៏មានឆ្នេរមួយឈ្មោះថា Duranbah ជាឆ្នេរខ្សាច់ដ៏ល្បីល្បាញ ដែលភ្ញៀវទេសចរភាគច្រើនតែងនិយមទៅសម្រាកកាយ និងកម្សាន្តជាមួយ នឹងការជិះទូកក្តោងលេងយ៉ាងសប្បាយរីករាយ ដោយសារនៅទីនោះទាំងទីកន្លែងទាំងផ្ទៃទឹក និងទាំងអាកាសធាតុគឺមានអំណោយផលដល់ការជិះទូកក្តោងលេងជាខ្លាំង។
មិនថាការកម្សាន្តបែបណានោះទេ នៅក្នុងទីក្រុងជាប់ឆ្នេរសមុទ្រដ៏ស្រស់ស្អាតនេះ ពិតជាអាចផ្តល់ឱ្យអ្នកនូវអារម្មណ៍ដ៏ស្រស់ថ្លា និងសប្បាយ រីករាយគ្រប់ពេលវេលា ជាមួយនឹងទីកន្លែងកម្សាន្តដ៏សម្បូរបែប និងកន្លែងសម្រាកកាយដ៏ស្រស់សោភាដូចអ្នកបានទៅដល់ស្ថានសួគ៌ាដ៏ស្រសស្អាតលើសពីការពិពណ៌នាទៅទៀត។ នៅទីនោះអ្នកក៏អាចជ្រើសរើសរបៀបនៃការកម្សាន្តប្រកបដោយភាពសប្បាយរីករាយ ទៅតាមចំណង់ចំណូលចិត្តរបស់អ្នកថែមទៀតផង។ អ្នកក៏អាចទៅទស្សនាការសម្តែងបែបប្រពៃណីរបស់ជនជាតិដើមនៅលើឆ្នេរខ្សាច់ដ៏ស្រស់ស្អាត នៅពេលរាត្រីដ៏សែនមនោរម្យជាមួយគូស្នេហ៍របស់អ្នក ឬជាមួយក្រុមគ្រួសារប្រកបដោយភាពរ៉ូមែនទិកក្រៃលែង ហើយអ្នកអាចដើរលេងតាមឆ្នេរខ្សាច់នាពេលថ្ងៃរៀបលិច ឬថ្ងៃរៀបរះ, ញ៉ាំអាហារប្លែកៗនៅលើកោះ និងអាហារនៅក្នុងតំបន់នីមួយៗនៅក្នុងទីក្រុង Gold Coast, ដើរមើលពីជីវិត និងការរស់នៅរបស់សត្វព្រៃ, ស្ប៉ាខ្លួនបែបធម្មជាតិ ដើម្បីថែរក្សាសម្រស់ និងជួយអ្នកបន្ធូរអារម្មណ៍ពីការនឿយហត់ផ្សេងៗ, ជួលម៉ូតូ ឬរថយន្តជិះលេងជុំវិញទីក្រុង និងការចូលលេងកម្សាន្តជាមួយល្បែងប្លែកៗរបស់ប្រជាជននៅក្នុងតំបន់-ល-។
ការទៅកម្សាន្តនៅក្នុងទីក្រុង Gold Coast ប្រទេសអូស្ត្រាលីគឺពិតជាមិនធ្វើឱ្យអ្នកខកបំណងនោះទេ ដោយសារតែភាពល្អឥតខ្ចោះនៃទេសភាព និងទីកន្លែងកម្សាន្តបែបធម្មជាតិដ៏សម្បូរបែប ផ្តល់នូវជម្រើសជាច្រើនទៅដល់ភ្ញៀវទេសចរជាតិ និងភ្ញៀវទេសចរអន្តរជាតិ ដែលទៅកម្សាន្តនៅលើទីដីជាប់ឆ្នេរសមុទ្រដ៏ល្បីល្បាញមួយនេះ៕
August 18, 2018
ទំនាក់ទំនងជាចំណុចសំខាន់សម្រាប់កសាងភាពជោគជ័យផ្ទាល់ខ្លួន
នៅក្នុងធាតុសំខាន់ៗដែលនាំឱ្យមនុស្សទទួលបានជោគជ័យទាំងការអភិវឌ្ឍសមត្ថភាពផ្ទាល់ខ្លួន ការធ្វើការងារសម្រាប់ស្ថាប័នរដ្ឋ ឬឯកជន និងការធ្វើអាជីវកម្ម ទំនាក់ទំនងជាកូនសោគន្លឹះមួយមិនអាចខ្វះបាន។ នៅពេលដែលមនុស្សកសាងទំនាក់ទំនងបានល្អ នោះគេនឹងអាចក្លាយជាមនុស្សដែលមានមធ្យោបាយច្រើនបំផុតដើម្បីសម្រេចរាល់ការងារទាំងអស់ដែលគេកំពុងធ្វើ។
លោក នឹម ឈុន្នី ស្ថាបនិកស្ថាប័នបណ្តុះបណ្តាល Anakot Asia Academy បានលើកឡើងថា ក្រោយពេលលោកបញ្ចប់ការសិក្សានៅបរទេសពាក្យសម្តីមួយឃ្លាដែលលោកគ្រូរបស់លោកបាននិយាយ ហើយបង្កើតជាការចងចាំល្អជាងគេ គឺ“ទំនាក់ទំនងគឺជាជីវិត ហើយជីវិតគឺទំនាក់ទំនង”។ ហេតុនេះទំនាក់ទំនងសំខាន់ខ្លាំងណាស់សម្រាប់បុគ្គលម្នាក់ៗ ព្រោះបើគ្មានទំនាក់ទំនងនោះទេមនុស្សនឹងមិនអាចរីកចម្រើនបានឡើយ ព្រោះមនុស្សត្រូវការពឹងពាក់គ្នា ហើយក៏ត្រូវការជួយគ្នាទៅវិញទៅមកដើម្បីសម្រេចគោលដៅជាវិជ្ជមានទាំងអស់គ្នា។ លោកថា ដើម្បីឱ្យទំនាក់ទំនងធ្វើទៅបានល្អលុះត្រាតែមានចំណុចសំខាន់2យ៉ាងគឺ ពូកែស្តាប់ និងទំនុកចិត្ត។
លោក នឹម ឈុន្នី ស្ថាបនិកស្ថាប័នបណ្តុះបណ្តាល Anakot Asia Academy
លោក នឹម ឈុន្នី បាននិយាយថា៖ “មនុស្សដែលពូកែទំនាក់ទំនងគឺជាមនុស្សដែលពូកែស្តាប់បំផុត ព្រោះក្រោយពេលដែលគេបានយល់ពីរឿងរ៉ាវទាំងអស់ពាក់ព័ន្ធនឹងបញ្ហាដែលគេត្រូវទាក់ទងហើយ គឺគេអាចបង្កើតដំណោះស្រាយបានយ៉ាងល្អ និងអាចក្លាយជាមនុស្សដែលគេចូលចិត្តទៀផង”។
អ្នកអប់រំផ្នែកផ្លូវចិត្តខាងលើបានលើកឡើងថាចំណុចសំខាន់មួយផ្សេងទៀតសម្រាប់ទំនាក់ទំនងគឺ ទំនុកចិត្ត។ មិនថាការធ្វើការងារក៏ដោយ ទំនាក់ទំនងស្នេហា ឬគ្រួសារក៏ដោយ បើគ្មានការទុកចិត្តគ្នាទេ ប្រាកដណាស់មិនអាចធ្វើដំណើររួមគ្នា ឬបង្កើតទំនាក់ទំនងល្អជាមួយគ្នាបាននោះទេ ហេតុនេះមុននឹងមានទំនាក់ទំនងល្អលុះត្រាតែយើងកសាងខ្លួនឯងឱ្យក្លាយជាមនុស្សដែលគួរទុកចិត្តបានជាមុនសិន។
លោកបញ្ជាក់ផងដែរថា អគារធំមួយអាចសាងសង់បន្តទៅមុខទៀតបានលុះត្រាតែមានគ្រឹះរឹងមាំជាមុនសិន ហេតុនេះមុននឹងបន្តអភិវឌ្ឍទំនាក់ទំនងឱ្យបានល្អលុះត្រាតែយើងម្នាក់ៗកសាងឈ្មោះឱ្យល្អ និយាយតែអ្វីដែលជាការពិត ហើយមានភាពហ្មត់ចត់ក្នុងការធ្វើការងារជាមួយមនុស្សដទៃ។
ស្របជាមួយនឹងបញ្ហានេះដែរ ព្រះតេជគុណ គូ សុភាព សាស្រ្តាចារ្យនៃសាកលវិទ្យាល័យបញ្ញាសាស្រ្តកម្ពុជាបានមានសង្ឃដីកាថា មនុស្សដែលមានភាពច្បាស់លាស់ ម៉ាត់ណាម៉ាត់ហ្នឹង និងជាមនុស្សដែលអាចជឿទុកចិត្តបាន ភាគច្រើនជាមនុស្សដែលទទួលបានជោគជ័យក្នុងជីវិត។ ព្រះតេជគុណក៏បានលើកជាឧទាហរណ៍ជាក់ស្តែងផងដែរពីការងើបឡើងវិញរបស់អ្នកជំនួញម្នាក់ដែលបានខាតបង់ទ្រព្យសម្បត្តិស្ទើរអស់ពីខ្លួនដោយសារតែការឆេះឃ្លាំងទំនិញរបស់គាត់។ តែអ្វីដែលជាលក្ខណៈពិសេសរបស់ឈ្មូញនោះគឺជាមនុស្សដែលបានបង្កើតកេរ្តិ៍ឈ្មោះល្អក្នុងការធ្វើអាជីវកម្មរបស់ខ្លួនដែលគាត់អាចធ្វើឱ្យដៃគូអាជីវកម្មរបស់គាត់ទុកចិត្តគាត់បាន ហើយនៅតែបន្តផ្តល់លុយឱ្យគាត់ខ្ចីរាប់ម៉ឺនដុល្លារដោយមិនបារម្ភច្រើន រហូតធ្វើឱ្យគាត់អាចស្តារឡើងវិញនូវស្ថានការណ៍អាក្រក់សម្រាប់ជីវិតគាត់បាន។
ព្រះតេជគុណ គូ សុភាព សាស្រ្តាចារ្យនៃសាកលវិទ្យាល័យបញ្ញាសាស្រ្តកម្ពុជា
ព្រះតេជគុណ គូ សុភាព បានមានសង្ឃដីកាថា៖ “ឈ្មួញម្នាក់ដែលអាចស្តារទំនាក់ទំនងល្អក្នុងការរកស៊ីបាននោះគឺដោយសារតែគាត់ជាមនុស្សច្បាស់លាស់ មានភាពប្រាកដនិយម បើគាត់ថាត្រូវសងលុយថ្ងៃណាគឺគាត់ត្រូវតែសងនៅថ្ងៃនោះហើយទំនិញដែលគាត់ប្រគល់ជូនចំនួនប៉ុន្មានគឺគាត់ប្រគល់ជូនគ្មានបាត់ឡើយសូម្បីតែបន្តិចបន្តួចក៏ដោយ។ ហេតុនេះគាត់នៅតែអាចក្លាយជាមនុស្សដែលមានគេគាំទ្រជុំវិញខ្លួនដដែលបើទោះបីជាស្ថិតក្នុងកាលៈទេសៈណាក៏ដោយ”។
ព្រះតេជគុណ គូ សុភាព បានបន្ថែមទៀតថា ហេតុនេះបើចង់ឱ្យក្លាយខ្លួនជាមនុស្សដែលមានទំនាក់ទំនងល្អជាមួយមនុស្សជុំវិញខ្លួន ចាំបាច់ត្រូវតែគោរពគោលការណ៍សំខាន់ៗមួយចំនួនគឺមុននឹងនិយាយស្តី ឬមុននឹងបង្ហាញអ្វីមួយជាសាធារណៈត្រូវគិតគូរឱ្យបានល្អិតល្អន់ជាមុនសិនថា សាររបស់យើងនោះប៉ះពាល់ដល់អ្នកដទៃ ឬធ្វើឱ្យគេឈឺចាប់ និងបញ្ហាដែរទេ។ បន្ទាប់មកទៀតត្រូវនិយាយអ្វីដែលមនុស្សគ្រប់គ្នារីកចម្រើន ព្រោះអ្នករាល់គ្នានឹងរីករាយជាមួយអ្វីដែលយើងបានចែករំលែក ហើយរក្សាបាននូវទំនាក់ទំនងប្រកបដោយភាពវិជ្ជមាន ដែលអាចធ្វើឱ្យយើងបន្តដំណើរនៃការរស់នៅបានយ៉ាងប្រសើរ តាមរយៈការទទួលសេចក្តីគោរពស្រឡាញ់ពីមនុស្សជុំវិញខ្លួន។ ទីបំផុតយើងនឹងអាចក្លាយជាមនុស្សដែលគេគ្រប់គ្នាចំណាំថាឱ្យតែសេពគប់ជាមួយយើងគឺអាចទទួលបានភាពរីកចម្រើន ហើយពេលនោះស្ថានភាពនៃការរស់នៅនឹងកាន់តែប្រសើរឡើង ព្រោះមនុស្សល្អៗនឹងស្ថិតនៅជុំវិញខ្លួនយើងច្រើនឡើងៗ៕
August 18, 2018
និន្នាការនៃការទូទាត់សាច់ប្រាក់តាមប្រព័ន្ធ QR Code កំពុងកើនឡើង
ស្របពេលដែលវិស័យបច្ចេកវិទ្យាកំពុងរីកចម្រើនខ្លាំង បានធ្វើឱ្យការទូទាត់សាច់ប្រាក់តាមប្រព័ន្ធ QR Code ក៏កំពុងមានការរីកចម្រើនខ្លាំងនៅលើទីផ្សារក្នុងប្រទេសកម្ពុជាដែរនារយៈពេលប៉ុន្មានឆ្នាំចុងក្រោយនេះ។
លោកស្រី សូ ផនណារី នាយិការងប្រតិបត្តិនៃធនាគារអេស៊ីលីដា មានប្រសាសន៍ថា ចាប់តាំងពីធនាគារអេស៊ីលីដាបានដាក់ឱ្យប្រើប្រព័ន្ធ QR Code រយៈពេលប្រមាណជា 1ឆ្នាំរហូតមកទល់បច្ចុប្បន្ន មានអតិថិជនប្រមាណជាង 60ម៉ឺននាក់បាន និងកំពុងប្រើប្រាស់ប្រព័ន្ធបច្ចេកវិទ្យាខាងលើក្នុងការទូទាត់សាច់ប្រាក់ទិញទំនិញ ឬផ្ញើប្រាក់ទៅកាន់ដៃគូពាណិជ្ជកម្មផ្សេង។ លោកស្រីអះអាងថា កត្តាដែលធ្វើឱ្យអតិថិជនងាកមកប្រើប្រាស់ប្រព័ន្ធខាងលើមានចំនួនកាន់តែច្រើននេះ គឺដោយសារក្រុមអ្នកបច្ចេកវិទ្យារបស់ធនាគារបានរៀបចំឱ្យមានភាពងាយស្រួលសម្រាប់ដាក់ឱ្យអតិថិជនប្រើប្រាស់ប្រព័ន្ធខាងលើប្រកបដោយសុវត្ថិភាព។ “Application នៃប្រព័ន្ធ QR Code ដែលមានឈ្មោះថា “អេស៊ីលីដាទាន់ចិត្ត‟ ត្រូវបានផលិតដោយក្រុម IT ក្នុងធនាគារដែលបានរៀបចំ Function ឱ្យអតិថិជនមានភាពងាយស្រួលក្នុងការចាត់ចែងសាច់ប្រាក់បានគ្រប់ពេលគ្រប់វេលា និងទូទាត់បានលឿន”។
លោកស្រីបន្តថា អតិថិជនដែលប្រើប្រព័ន្ធនេះមានភាពងាយស្រួលក្នុងការតភ្ជាប់ប្រព័ន្ធ QR Code ទៅលេខគណនីដែលមាននៅក្នុងធនាគារ ងាយស្រួលក្នុងការផ្ទេរប្រាក់ទៅក្នុងគណនីធនាគារ ឬគណនីរបស់ដៃគូអាជីវកម្មផ្សេងៗទៀត។ លើសពីនេះវាផ្តល់ភាពងាយស្រួលក្នុងការទូទាត់ទំនិញ ការទិញកាតទូរស័ព្ទ សម្រួលដល់ការបង់ថ្លៃទឹកភ្លើង ឬអាចផ្ញើប្រាក់ទៅកាន់គណនីអេស៊ីលីដាទាន់ចិត្តរបស់មិត្តភ័ក្តិសម្រាប់ចងដៃការ ឬចូលបុណ្យផ្សេងៗក៏បាន។
តែយ៉ាងណាក៏ដោយ លោកស្រីអំពាវនាវដល់អតិថិជនឱ្យមានការប្រុងប្រយ័ត្នចំពោះការផ្ទេរប្រាក់ ដោយមុននឹងផ្ទេរត្រូវពិនិត្យមើលលេខកូដ និងពិនិត្យឈ្មោះអ្នកដែលត្រូវផ្ញើឱ្យៗបានច្បាស់ ព្រោះថាជូនកាលអាចច្រឡំលេខកូដ និងអាចចូលទៅកាន់គណនីអ្នកផ្សេង ដែលនាំឱ្យមានការលំបាកក្នុងការ-អន្តរាគមន៍ឱ្យភាគីដែលយើងផ្ញើច្រឡំឱ្យគេនោះផ្ញើត្រឡប់មកវិញ។ តែលោកស្រីបានបញ្ជាក់ថា បើជួបករណីនេះសូមទំនាក់ទំនងមកការិយាល័យអេស៊ីលីដាជាបន្ទាន់ ដើម្បីបង្កកប្រាក់នោះកុំឱ្យគេដកយកទៅប្រើប្រាស់បាន ហើយសឹមអន្តរាគមន៍ទាក់ទងតាមក្រោយ។ ជាមួយនឹងកំណើនអតិថិជនកើនឡើងយ៉ាងឆាប់រហ័សនេះ ធនាគារអេស៊ីលីដាបានដាក់ផែនការនៅដំណាច់ឆ្នាំ2018 នឹងមានអតិថិជនកើនឡើងដល់ 80ម៉ឺននាក់ដែលនឹងបន្តការប្រើប្រាស់ប្រព័ន្ធ QR Code របស់ធនាគារអេស៊ីលីដា ដោយសារមានការបញ្ចុះតម្លៃនៅតាមហាងលក់ទំនិញផ្សេងៗជាច្រើន។
លោកបណ្ឌិត ឡាយ សុខហេង សាស្ត្រាចារ្យសេដ្ឋកិច្ចនៃសាកលវិទ្យាល័យភូមិន្ទភ្នំពេញ ដែលបានស្រាវជ្រាវលើបច្ចេកវិទ្យាហិរញ្ញវត្ថុ (Fintech) មានប្រសាសន៍ថា កត្តាដែលនាំឱ្យប្រជាជនកម្ពុជាងាកទៅប្រើប្រាស់ប្រព័ន្ធ QR Code នេះ ដោយសារកត្តាតម្រូវការស្របពេលដែលជីវភាពរបស់ពលរដ្ឋខ្មែរកាន់តែមានភាពប្រសើរឡើង។ លោកថា ប្រព័ន្ធនេះផ្តល់ភាពងាយស្រួល មិនចាំបាច់ឱ្យពួកគាត់ដាក់ប្រាក់សុទ្ធតាមខ្លួននាំឱ្យមានហានិភ័យលើការបាត់បង់ ឬអំពើចោរកម្មផ្សេងៗ ពោលគ្រាន់តែគាត់មានទូរស័ព្ទស្មាតហ្វូន ហើយបង្កើតគណនីជាមួយក្រុមហ៊ុនណាមួយ នោះគាត់អាចទូទាត់សាច់ប្រាក់បានគ្រប់ពេលវេលារាល់ពេលទិញទំនិញតាមផ្សារដោយមានការបញ្ចុះតម្លៃជាភាគរយជាការ-លើកទឹកចិត្តទៀតផង។
លោកថា ម្យ៉ាងទៀត គឺកត្តាផ្គត់ផ្គង់ និយតករដែលជាធនាគារកណ្តាលបានលើកទឹកចិត្តដល់ក្រុមហ៊ុនវិនិយោគផ្សេងៗអាចប្រើប្រាស់ប្រព័ន្ធបច្ចេកវិទ្យាថ្មីបានគ្រប់ប្រភេទ ប៉ុន្តែស្ថិតក្រោមការគ្រប់គ្រងដោយNBC។ លោកបញ្ជាក់ថា “អ៊ីចឹងហើយបានជាក្រុមហ៊ុនវិនិយោគថ្មីៗបាននាំយកបច្ចេកវិទ្យានេះមកប្រើ ដើម្បីឱ្យមានភាពងាយស្រួល និងមានលក្ខណៈទាន់សម័យ ហើយបច្ចុប្បន្នប្រជាពលរដ្ឋខ្មែរមិនថានៅទីក្រុង ឬជនបទនោះទេ ភាគច្រើនមានទូរស័ព្ទស្មាតហ្វូនប្រើគ្រប់ៗគ្នា ដែលងាយស្រួលក្នុងការប្រើប្រព័ន្ធទូទាត់សាច់ប្រាក់តាម QR Codeនេះ‟។
ដោយសារតែប្រព័ន្ធនេះទើបចូលមកដល់ទីផ្សារប្រទេសកម្ពុជានាអំឡុងពេលថ្មីៗនេះ ទើបតម្រូវឱ្យមានការចំណាយពេលវេលាសិក្សាឱ្យបានច្រើនក្នុងការប្រើប្រាស់ប្រព័ន្ធនេះដោយសុវត្ថិភាព។ ប៉ុន្តែយ៉ាងណានោះ មកទល់បច្ចុប្បន្ននេះមិនទាន់មានព័ត៌មានអំពីការលួចបន្លំសាច់ប្រាក់តាមទូរស័ព្ទដៃនៅឡើយទេ តែទោះយ៉ាងណាវាទាមទារឱ្យមានការប្រុងប្រយ័ត្នលើលេខកូដសម្ងាត់នៅលើទូរស័ព្ទដៃរបស់ខ្លួន ហើយចៀសវាងកុំទុកទូរស័ព្ទចោល នាំឱ្យមានការលួចប្រើ ឬវេរលុយក្រៅផ្លូវការដោយមិនដឹងខ្លួន។
ធនាគារជាតិនៃកម្ពុជាបាននិងកំពុងពិនិត្យមើល និងវាយតម្លៃប្រព័ន្ធផាត់ទាត់ជាតិ និងប្រព័ន្ធសេវាទូទាត់រហ័សធៀបជាមួយគោលការណ៍របស់ហេដ្ឋារចនាសម្ព័ន្ធទីផ្សារហិរញ្ញវត្ថុ(PFMI) ដើម្បីពង្រឹង និងកែលម្អប្រព័ន្ធផាត់ទាត់ឱ្យកាន់តែមានប្រសិទ្ធភាពថែមទៀត។ ស្ថិតក្នុងដំណាក់កាលដំបូង ធនាគារជាតិនៃកម្ពុជាបានបង្កើតក្រុមការងារវាយតម្លៃដែលមានសមាជិកមកពីនាយកដ្ឋានប្រព័ន្ធទូទាត់សងប្រាក់ នាយកដ្ឋានពត៌មានវិទ្យា និងនាយកដ្ឋានប្រតិបត្តិការ។
គួរបញ្ជាក់ថា បច្ចុប្បន្ននេះកម្ពុជាបាននិងកំពុងប្រើប្រាស់នូវសេវាកម្មទូទាត់សាច់ប្រាក់តាមប្រព័ន្ធប្រតិបត្តិសាច់ប្រាក់ថ្មីនេះមានដូចជា WingPay, Pi Pay, AEON Wallet និងអេស៊ីលីដាទាន់ចិត្ត៕
August 18, 2018
អ្នកនាង សឿ សុធារ៉ា ប្រកាសលក់សម្លៀកបំពាក់មួយទឹក ដើម្បីជួយមន្ទីរពេទ្យគន្ធបុប្ផា និងបងប្អូនរងគ្រោះទឹកជំនន់
តារាសម្ដែងស្រីដែលធ្លាប់មានកេរ្តិ៍ឈ្មោះល្បាញល្បីក្នុងពិភពសិល្បៈខ្មែរ អ្នកនាង សឿ សុធារ៉ា ថ្មីៗនេះត្រូវបានគេមើលឃើញថា អ្នកនាងមិនសូវមានសកម្មភាពសិល្បៈដូចមុនទេ នោះហាក់បីដូចជាអ្នកនាង បានលាឈប់ពីសិល្បៈទៅហើយ។ តែយ៉ាងណាមិញ រាល់ព័ត៌មានដែលទាក់ទងនឹងជីវភាពឯកជនរបស់អ្នកនាង និងក្រុមគ្រួសារ មហាជនលោកនៅតែបន្ដតាមដានពីសកម្មភាពរបស់អ្នកនាងដដែល។ ថ្មីៗនេះទៀតសោត តាមរយៈគណនីបុរសម្នាក់ ដែលមានភាពស្និតស្នាលនឹងក្រុមគ្រួរសាររបស់អ្នកនាង បានទម្លាយថា អ្នកនាង សឿ សុធារ៉ា គ្រោងធ្វើការ Live Video លក់សម្លៀកបំពាក់មួយទឹក ដើម្បីជួយមន្ទីរពេទ្យគន្ធបុប្ផា និងបងប្អូនរងគ្រោះទឹកជំនន់យ៉ាងធ្ងន់ធ្ងរនៅតាមបណ្ដាខេត្តក្នុងព្រះរាជាណាចក្រកម្ពុជា។
ប្រភពពីគណនីហ្វេសប៊ុកនោះបានរៀបរាប់ថា « ជំរាបសួរមិត្តភក្តិបងប្អូនទាំងអស់គ្នានៅក្នុងបណ្តាញសង្គមហ្វេសបុក នៅថ្ងៃសៅរ៍-អាទិត្យនេះចាប់ពីម៉ោង3រសៀលទៅ ខ្ញុំជាបងមួយបងស្រី សឿ សុធារ៉ា ចាប់ផ្តើម live video លក់សំលៀកបំពាក់មួយទឹករបស់គាត់ ហើយថវិកាដែលបានមកពីការលក់សំលៀកបំពាក់របស់ពួកខ្ញុំនឹងយកទៅ បរិច្ចាគជូនទៅដល់មន្ទីរពេទ្យគន្ធបុប្ផា នឹង បងប្អូនដែលកំពុងតែជួបប្រទះគ្រោះទឹកជំនន់។ សូមកុំភ្លេចជួយទិញផងណា រាល់ការទិញសំលៀកបំពាក់របស់ខ្ញុំ ទិញអាវចំនួនបីថែមជូនក្រែម1ដើម ទិញអាវប្រាំថែមជូនចំនួន2ដើម ទិញដប់អាវថែមជូនដបទឹកមួយនឹងក្រែមចំនួន5ដើម ទិញសំលៀកបំពាក់យើងខ្ញុំក៏ដូចចូលរួមការងារសង្គមផងដែរ ជាពិសេសជួយដល់ មន្ទីរពេទ្យគន្ធបុប្ផាតែម្តង អ្នករង់គ្រោះព្រោះទឹកជំនន់ផងដែរសូមអរគុណ ជួយចែករំលែកផងណាបាទ» ។
គួររំឭកដែរថា សឿ សុធារ៉ា បានបាត់បង់ការងារសិល្បៈទាំងស្រុងទៅហើយ នៅរយៈពេលចុងក្រោយនេះ បើទោះជានាងបានទម្លាក់ខ្លួនមុននេះ ដោយប្រកាសថា ទទួលសម្តែងជាតួយ៉ាងណាក៏ព្រម។ ប៉ុន្តែ បណ្តាផលិតករមួយចំនួន ក្រៅពីនិយាយដូចគ្នាថា ពិបាកទាក់ទងនោះ ពួកគេហាក់បំភ្លេចសុធារ៉ា ចង្កោមថតភាពយន្តទៅហើយ។ សឿ សុធារ៉ា និងប្តីសាពូន មីដាដា ដែលបាត់បង់ប្រាក់ចំណូលពីសិល្បៈទាំងស្រុងដូចគ្នា ហើយងាកមកសម្រុកយកកូនទាំងពីរឱ្យទាល់តែបាន ដែលកូនស្រីទី1 ឈ្មោះសាពូន ដារ៉ាពិមាន សព្វថ្ងៃមានអាយុ 6ឆ្នាំជាង និងកូនប្រុសទី 2 មានឈ្មោះ សាពូន ដារ៉ាបុរស មានអាយុប្រមាណ6-7 ខែហើយ ៕
August 18, 2018
ចាប់ផ្តើមអាជីវកម្មដំបូងមានចំណុចប្រុងប្រយ័ត្នអ្វីខ្លះ?
ការធ្វើអាជីវកម្ម ជារឿងសំខាន់សម្រាប់បុគ្គលម្នាក់ៗដែលមានក្តីស្រមៃ និងក្តីសង្ឃឹមចង់ធ្វើជំនួញ តែពេលខ្លះវាក៏បានក្លាយជាបទពិសោធដ៏ឈឺចាប់ ដែលបង្កើតជារបួសស្នាមយូរអង្វែងរបស់ពួកគេផងដែរប្រសិនបើអាជីវកម្មខាតបង់ ឬបិទទៅវិញដោយសារបញ្ហាណាមួយនោះ។ គួរពិចារណាថាតើត្រូវធ្វើការឱ្យគេសិន ឬចាប់ផ្តើមធ្វើជំនួញនៅក្នុងវ័យក្មេងដែលមានទុនតិចតួច?
លោកស្រី សំ លីណា អគ្គនាយិកាក្រុមហ៊ុន Ellesse បានលើកឡើងថា លោកស្រីធ្លាប់ធ្វើអាជីវកម្មតាំងពីនៅវ័យក្មេង ដោយធ្លាប់ដាក់ទូរស័ព្ទសាធារណៈ ធ្លាប់បង្រៀនគេតាមផ្ទះ និងរកស៊ីតិចតួចផ្សេងទៀត។ លោកស្រីបានសម្រេចចិត្តថាធ្វើការវិនិយោគដោយចាប់ផ្តើមពីការយកខ្លួនឯងធ្វើជាដើមទុន គឺខិតខំប្រឹងប្រែងគ្រប់លទ្ធភាពលើការកសាងសមត្ថភាព ក្នុងការស្វែងរកគន្លឹះសម្រាប់ដោះស្រាយបញ្ហាជាក់ស្តែងក្នុងអាជីវកម្ម។
លោកស្រី សំ លីណា អគ្គនាយិកាក្រុមហ៊ុន Ellesse
លោកស្រី សំ លីណា បាននិយាយថា៖ “មុននឹងធ្វើអាជីវកម្មយើងចាំបាច់ត្រូវស្វែងរកសក្តានុពលរបស់ខ្លួនឱ្យឃើញជាមុនសិន ព្រោះមនុស្សម្នាក់ៗសុទ្ធតែមានសក្តានុពលរៀងៗខ្លួន ហេតុនេះបើយើងមានការច្នៃប្រឌិត ឬជំនាញណាមួយសម្រាប់ធ្វើអាជីវកម្ម នោះខ្លួនយើងអាចនឹងជាដើមទុនសំខាន់សម្រាប់ធ្វើវា‟។
សហគ្រិនខាងលើបានលើកឡើងផងដែរថាយុវជនយើងបច្ចុប្បន្នដែលកំពុងសិក្សានៅមហាវិទ្យាល័យតែងតែស្រមៃថាចង់ធ្វើជំនួញ ចង់ជោគជ័យ និងចង់បានរឿងល្អៗជាច្រើនទៀត តែជាក់ស្តែងនៅពេលដែលសួរគាត់ឱ្យពិតប្រាកដថាគាត់ចង់ធ្វើអ្វីឱ្យច្បាស់ ហើយបានសម្រួចសមត្ថភាពអ្វីខ្លះដើម្បីធ្វើអាជីវកម្មនោះ គាត់អាចនឹងមានការរារែក ឬមិនមានភាពច្បាស់លាស់។ ហេតុនេះបើមិនចង់ឱ្យខកចិត្តក្នុងរឿងអាជីវកម្មត្រូវតែធ្វើយ៉ាងណាអភិវឌ្ឍខ្លួនឱ្យមានជំនាញ ឬសមត្ថភាពពិតប្រាកដដើម្បីដោះស្រាយបញ្ហានានាជាមុនសិន។ ចំណុចសំខាន់មួយទៀតគឺត្រូវចេះចំណាយឱ្យត្រូវខ្ទង់ ព្រោះសម្រាប់អ្នករកស៊ីថ្មីថ្មោងពេលខ្លះគាត់គិតថាក្រុមហ៊ុនគាត់តូច គាត់មិនហ៊ានចំណាយលុយច្រើនដើម្បីជួលបុគ្គលិកខ្លាំងៗនោះទេ ហើយគាត់សុខចិត្តអង្កន់លុយនោះទៅជួលបុគ្គលិកដែលធ្វើការងារមិនកើតជាច្រើន ដោយភ្លេចថាការចំណាយលុយជួលមនុស្សខ្លាំងគឺជាការវិនិយោគ មិនមែនជាការចំណាយខ្ជះខ្ជាយនោះទេ។ ប្រសិនបើអ្នករកស៊ីចំណាយមិនត្រឹមត្រូវ នោះអាជីវកម្មអាចនឹងមានបន្ទុកច្រើន ហើយងាយខាតបង់។
លោកស្រីបានបញ្ជាក់ផងដែរថា ចំណុចសំខាន់មួយទៀតដែលត្រូវដឹងគឺ ត្រូវហ៊ានវិនិយោគលើការអភិវឌ្ឍខ្លួនឯងជាប្រចាំ។ កុំខ្លាចនឹងរៀនសូត្របន្ថែមនូវអ្វីដែលចំណេញសម្រាប់អាជីវកម្ម ហើយកុំស្តាយ ព្រោះពេលខ្លះយើងស្តាយលុយក្នុងការរៀនសូត្រមួយវគ្គរាប់រយដុល្លារ តែភ្លេចគិតថា ប្រសិនបើយើងមិនរៀន ហើយអាជីវកម្មយើងដួលគឺខាតបង់អស់ច្រើនជាងនេះទៅទៀត។
បង្ហាញលើចំណុចនេះដែរលោក ឃួន សុភ័ទ្ធ អគ្គនាយកក្រុមហ៊ុន Marakot Technology បានលើកឡើងថា មុននឹងចាប់ផ្តើមអាជីវកម្មលោកមានបទពិសោធ 15ឆ្នាំក្នុងការងារហិរញ្ញវត្ថុ និងបច្ចេកវិទ្យា។ ហើយក្រុមហ៊ុនលោកជាក្រុមហ៊ុនបច្ចេកវិទ្យាដែលផ្តល់កម្មវិធីសម្រាប់គ្រឹះស្ថានហិរញ្ញវត្ថុ ហេតុនេះអាជីវកម្មនេះគឺត្រូវនឹងជំនាញដែលលោកមានហើយលោកក៏បានពិចារណាច្បាស់លាស់ពីទីផ្សារ និងលំហូរសាច់ប្រាក់ច្បាស់លាស់ជាមុនដើម្បីបង្ការបញ្ហា។ លោកថា ការរកស៊ីគឺដូចជាការដាំបាយដូច្នោះដែរ បើយើងមានឆ្នាំងធំពេក មានអង្ករច្រើនពេក ហើយអុសរបស់យើងតិច នោះយើងមិនអាចដាំបាយឱ្យឆ្អិនបាននោះទេ។ ការដាក់លុយវិនិយោគគឺដូចជាការដាក់អុសដាំបាយដែរ ប្រសិនបើឆ្នាំងធំហួស អង្ករច្រើនហួស យើងដាក់លុយទៅប៉ុន្មានក៏មិនគ្រប់ដែរ ទីបំផុតយើងអាចខាតបង់ទាំងលុយកាក់ច្រើន ហើយថែមទាំងបាត់បង់អាជីវកម្មនោះថែមទៀតផង។
លោក ឃួន សុភ័ទ្ធ អគ្គនាយកក្រុមហ៊ុន Marakot Technology
លោក ឃួន សុភ័ទ្ធ បាននិយាយថា៖ “ការធ្វើអាជីវកម្មដំបូងឡើយគឺត្រូវគិតគូរឱ្យបានល្អិតល្អន់បំផុត និងត្រូវចេះប្រមាណខ្លួន។ ប្រសិនបើយើងចាប់ផ្តើមដំបូង គួរស្វែងរកអាជីវកម្មណាដែលចំណាយល្មមតាមទុនដែលយើងមាន ហើយបើលក់ផលិតផលក៏អាចស្វែងរកផលិតផលណាដែលមិនចេះហួសកាលបរិច្ឆេទដើម្បីកុំឱ្យខាតបង់នៅពេលដែលយើងមិនទាន់លក់ដាច់ច្រើន ព្រោះពេលខ្លះអាជីវកម្មថ្មីគឺអាចត្រូវការពេលវេលា ហេតុនេះបើវាខាតបង់ក៏អាចខាតបង់ត្រឹមកម្រិតដែលអាចទទួលយកបាន”។
សហគ្រិនខាងលើបានលើកឡើងផងដែរថា អ្នកខ្លះបើកអាជីវកម្ម តែខ្លួនឯងបែរជាទៅធ្វើការងារឱ្យគេទៅវិញ ពេលខ្លះការធ្វើបែបនេះធ្វើឱ្យយើងខាតបង់ ព្រោះថាប្រសិនបើមិនមានពេលវេលាគ្រប់គ្រាន់ដើម្បីមើលលើអាជីវកម្មខ្លួនឯងទេនោះ វានឹងពិបាកអភិវឌ្ឍទៅមុខណាស់។ នៅពេលដែលយើងរវល់ធ្វើការងារឱ្យគេមិនមានពេលគ្រប់គ្រាន់ដើម្បីដោះស្រាយបញ្ហាអតិថិជនរបស់ខ្លួន យើងអាចនឹងលក់មុខខ្លួនឯង ហើយខាតបង់ធ្ងន់ធ្ងរ ហើយការងារដែលធ្វើឱ្យគេក៏គ្មានគុណភាពដែរ៕
August 18, 2018
យូ ឌីស្កូ បញ្ជាក់ពីអាការ និងការចំណាយថ្លៃថ្នាំអស់មួយជិវិត
ក្រោយពេលធ្លាក់ខ្លួនធ្ងន់ធ្ងរ រហូតប្រកាសស្វែងរកជំនួយ ពីសប្បុរសជន ដើម្បីចេញទៅសង្គ្រោះជីវិត នៅក្រៅប្រទេស ដោយសារជំងឺក្រលៀន និងទឹកនោមប្រៃនោះ តារាសម្តែងលោក យូ ឌីស្កូ ទីបំផុតក៏ទទួលបានការជួយស្រោចស្រង់ជីវិត តាមរយៈការជួយឧបត្ថម្ភ ពីទស្សនិកជនទាំងក្នុង និងក្រៅក្រទេស។ ជាមួយគ្នានេះ លោក យូ ឌីស្កូ បានបង្ហើបឱ្យពីស្ថានភាពអាការនាពេលបច្ចុប្បន្ន និងការចំណាយលើសេវាព្យាបាលនៅក្នុងប្រទេសឥណ្ឌា ដែលក្នុងនោះគ្រូពេទ្យ ក៏តម្រូវឱ្យរូបលោក ត្រូវលេបថ្នាំអស់មួយជីវិតទៀតផង។
ជាក់ស្តែង ក្រោយពេលបានធូបន្តិចហើយ លោក យូ ឌីស្កូ កាលពីម្សិលមិញបានបង្ហាញមុខជាលើដំបូងក្នុងកិច្ចសំភាសន៍ជាមួយលោក ហេង ឡុង ដើម្បីប្រាប់នៅរឿងរ៉ាវនាៗទាក់ទងនឹងជីវិតរបស់លោក នៅពេលនេះ និងថ្ងៃអនាគត។ ក្នុងវីដេអូ លោក បានបញ្ជាក់ថា ពេលនេះគឺលោកមានអាការធូស្រាលហើយ ក្រោយការវះកាត់ប្តូក្រលៀនបានជោគជ័យ 100ភាគរយ នៅប្រទេសឥណ្ឌា។ យ៉ាងណាពេលនេះ ត្រូវសម្រាកនៅផ្ទះឱ្យបានច្រើន ទៅណាមកណាត្រូវពាក់ម៉ាស់ជាប់ ដើម្បីការពារការឆ្លងជំងឺពីអ្នកមនុស្សដទៃ និងតមអាហារ ហើយត្រូវលេបថ្នាំរហូតអស់រយៈមួយជីវិត។ ចំពោះថ្នាំសង្កូវត្រូវចំណាយយ៉ាងតិច 300 ដុល្លាក្នុងមួយខែ ហើយខណៈនេះគឺលោកអាចនឹងច្រៀងបាន ប៉ុន្តែមិនអាចដកម៉ាសបានឡើយ។
គួរបញ្ជាក់ដែរថា បើតាមការលើកឡើងរបស់សាមីខ្លួន លោកយូ ឌីស្កូ បានឱ្យដឹងថា ក្រោយពេលដែលទទួលបានការវះកាត់ ដោយជោគជ័យ ជីវិតរបស់លោកពេលនេះប្រៀបបាន នឹងមនុស្សដែលមានជីវិតពីរ ឬអាចនិយាយបានថា ជាការប្រទានជីវិតថ្មីអ៊ីចឹងដែរ។ លោក យូ ឌីស្កូ បានបញ្ជាក់ថា ចំពោះការចំណាយលើការព្យាបាល និងវះកាត់ប្តូរក្រលៀន នៅប្រទេសឥណ្ឌានេះ គឺត្រូវចំណាយថវិកាអស់រហូត5ម៉ឺនដុល្លារ ដែលថវិកាទាំងនេះ ជាលុយដែលបានមកពីការបរិច្ចាគ របស់សប្បុរសជននានា៕
August 18, 2018
ស្ងាត់ៗ !! អ្នកស្រី អម្ពរ ទេវី បានវិលត្រឡប់មកកម្ពុជាម្ដងទៀតហើយ
ប៉ុន្មានម៉ោងមុននេះបន្ដិច តាមរយៈបណ្ដាញសង្គមហ្វេសប៊ុកបានឱ្យដឹងថា អតីតតារាសម្តែងជើងចាស់ល្បីឈ្មោះអ្នកស្រី អម្ពរ ទេវី បានត្រឡប់មកកម្ពុជាជាថ្មីម្ដង ដើម្បីចូលរួមសម្តែងភាពយន្តភាគថ្មីមួយគឺរឿង« ម្ចាស់ក្រោលដំរី”» ដែលអ្នកស្រីរំពឹងទុកថានឹងទទួលបានការគាំទ្រខ្លាំងចំពោះរូបអ្នកស្រី។ ដោយឡែក ទន្ទឹមនឹងការបង្ហាញវត្តមានជាលើកទី 2 នៅក្នុងទឹកដីកំណើត គេសង្កេតឃើញថា អ្នកគាំទ្ររបស់អ្នកស្រី អម្ពរ ទេវី រួមទាំងបណ្ដាអ្នកសារព័ត៌មាន បានទៅរង់ចាំទទួលអ្នកនាងដោយផ្ទាល់នៅក្នុងបរិវេណព្រលានយន្ដហោះអន្ដរជាតិភ្នំពេញ។
បើតាមប្រភពមួយបានបង្ហើបប្រាប់ថា អ្នកស្រី អម្ពរ ទេវី បានមកដល់ស្រុកកំណើតកាលពីម្សិលមិញ ដើម្បីចូលរួមបន្ដសម្តែងនៅក្នុងរឿងភាគខ្នាតធំឱ្យស្ថានីយ៍ទូរទស្សន៍មួយ តែដោយមិនចង់ឱ្យមានការភ្ញាក់ផ្អើលទើបអ្នកស្រីមកស្ងាត់ៗបន្ទាប់ពីថតរឿងចប់ អ្នកស្រីនឹងឡើងយន្តហោះចេញទៅ អាមេរិក ភ្លាម ។ ម្យ៉ាងវិញទៀតអ្នកស្រី អម្ពរ ទេវី មិនចូលចិត្តភាពអ៊ូរអរឡើយ ។ អ្នកស្រី អម្ពរ ទេវី មកលើកនេះតែម្នាក់ឯងប៉ុណ្ណោះ ហើយអ្នកស្រីមិនស្នាក់នៅស្រុកខ្មែរយូរដូចមុនពេលមុនឡើយ ដោយសារប្រញាប់ត្រឡប់ទៅបំពេញការងារនៅ អាមេរិក វិញ ពីព្រោះអ្នកស្រីសុំច្បាប់គេបានរយៈពេលខ្លីប៉ុណ្ណោះ ។
គួរបញ្ជាក់ផងដែរថា ក្រៅពីអ្នកនាង អម្ពរ ទេវី ក៏មានការចូលរួមសម្តែងពីសំណាក់ដៃគូដ៏សក្តិសមរបស់ អ្នកនាងគឺលោក ទេព រិនដារ៉ូ ។ សម្រាប់តួឯកគឺលោក អ៊ុន សិទ្ធា និង ស្រីស្អាត ឆុំ វត្តី ។ ក្រៅពីនេះក៏មានការចូលរួមសម្តែងពីសំណាក់តារាល្បីៗជាច្រើនដែលមានដូចជាលោក ជា សំណាង និង នាងអ៊ីត ជាដើម ៕
August 18, 2018
ត្រជាក់ភ្នែកជាមួយបឹងព្រលិតដ៏ស្រស់ត្រកាលនៅខេត្តឧដនថានី ប្រទេសថៃ
គេហទំព័រឡារ៉ែន សូមនាំអារម្មណ៍ប្រិយមិត្តទាំងអស់ទៅកម្សាន្ដនៅរមណីយដ្ឋាន «បឹងព្រលិត» ដែលមានទីតាំងស្ថិតនៅក្នុងស្រុកគុមផៈវ៉ាពី ខេត្តឧដនថានី ក្នុងបរិវេណបឹងណងថាន ជាបឹងធម្មជាតិដ៏ធំជាងគេនៅក្នុងខេត្តមួយនេះ ដែលរួមមានធនធានធម្មជាតិជាច្រើនដូចជា ត្រីទឹកសាប សត្វស្លាបគ្រប់ប្រភេទ និងរុក្ខវារីដ៏ល្អស្រស់ត្រកាល។
តំបន់ទេសចរណ៍ធម្មជាតិច្នៃប្រឌិតដ៏ស្រស់ស្អាតមួយនេះ បានបង្កើតឡើងក្នុងអំឡុងខែធ្នូ ឆ្នាំ2016 ដែលសម្បូរទៅដោយមានផ្កាព្រលិតពណ៌ក្រហមខ្ចីដែលរីកស្គុះស្គាយពេញផ្ទៃបឹង ធ្វើឱ្យភ្ញៀវទេសចរមើលឃើញប្រៀបដូចជាសមុទ្រព័ណ៌ក្រហមខ្ចីក្នុងអំឡុងខែធ្នូ រហូតដល់ខែកុម្ភៈ លុះដល់ខែមិនា បរិមាណផ្កាព្រលិតត្រូវបានថយចុះវិញ។
ជារៀងរាល់ឆ្នាំ ប្រជាជនថៃបាននាំកូនចៅទៅកម្សាន្ដ ស្រូបយកខ្យល់ធម្មជាតិ និងចូលរួមកម្មវិធីបុណ្យផ្សេងៗជារៀងរាល់ឆ្នាំ។ នៅក្នុងមានរួមមានកម្មវិធីជាច្រើនដូចជា ការសម្ដែងរបស់សិស្សសាលា ការប្រកួតគូរគំនូរធម្មជាតិ និងរូបថតទេសភាពបឹងព្រលិត ការប្រកួតបវរកញ្ញាបឹងព្រលិត ការប្រកួតចម្រៀងស្រុកស្រែប្រុស-ស្រី ការប្រកួតតន្ត្រីកណ្ដាលបឹង ការប្រកួតរបាំ និងការប្រកួតស្នាដៃផលិតចំណីអាហារប្រចាំតំបន់ ភូមិមួយផលិតផលថ្មីទៀតផង។

ចំពោះការចូលទស្សនាតំបន់កម្សាន្ដបែបធម្មជាតិមួយនេះ លោកអ្នកត្រូវចំណាយប្រាក់ 40បាតទាំងភ្ញៀវជាតិ និងអន្ដរជាតិ ដើម្បីទុកជាការជួយឧបត្ថម្ភផ្នែកអនាម័យ និងសម្អាតបរិស្ថានតំបន់ទេសចរណ៍មួយនេះ។ ប្រសិនបើលោកអ្នកចង់ជិះទូកកម្សាន្ដ ថតរូបលេងនៅកណ្ដាលបឹង ត្រូវចំណាយបន្ថែម 150បាតសម្រាប់ទូកមួយដែលអាចជិះបានពី 2 – 3នាក់ និង 600បាតសម្រាប់ទូកដែលអាចផ្ទុកមនុស្សបាន 6-10នាក់ ហើយការជិះទូកជិះកម្សាន្ដនេះត្រូវបានកំណត់ត្រឹមរយៈពេលតែ 1ម៉ោង ឬអាចបន្ថែមបាន 30នាទីទៀត។
គួរបញ្ជាក់ផងដែរថា ចំពោះពេលវេលាដែលផ្កាព្រលិតចាប់ផ្ដើមរីកបង្អួតសម្រស់គឺ ចាប់ពីម៉ោង 6ព្រឹក ដល់ម៉ោង11ថ្ងៃត្រង់តែប៉ុណ្ណោះ លុះដល់ពេលរាងរសៀលបន្ដិច ផ្កាទាំងនោះនឹងចាប់ផ្ដើមរួមក្រពុំវិញ។ បើតាមការបញ្ជាក់របស់គេហទំព័រ Kapookបានឱ្យដឹងថា ក្នុងមួយថ្ងៃៗតំបន់ទេសចរណ៍ច្នៃប្រឌិតមួយនេះអាចរកចំណូលបានដល់ទៅរាប់លានបាតឯណោះ។ លោកអ្នកអាចទទួលទានអាហារថៃគ្រប់ប្រភេទនៅទីនោះ ឬយកអាហារទៅពិសាដោយខ្លួនឯងក៏បាន។ អ៊ីចឹង នៅចាំអីទៀត តោះទៅទស្សនាទាំងអស់គ្នា…៕
August 17, 2018
តារាចម្រៀងថៃ ទិក ឈិរ៉ូ ប្រកាសប្រគំតន្ត្រីខ្នាតយក្សចុងក្រោយរួមគ្នាជាមួយលោក ខេមរៈ សិរីមន្ដ
តាមរយៈសារព័ត៌មាន Thairath បានចេញផ្សាយនៅពេលថ្មីៗនេះ ដែលដឹងថា បន្ទាប់ពីបានផ្អាកការងារសិល្បៈអស់រយៈពេលជិត 32ឆ្នាំ ការត្រឡប់មកវិញរបស់លោក ទិក ឈិរ៉ូ នៅពេល កាន់តែបង្កភាពភ្ញាក់ផ្អើលកាន់តែខ្លាំងជាងមុនថែមទៀត។ បិតាចម្រៀងប៉បដ៏ល្បីនៅក្នុងប្រទេសថៃរូបនេះ បានប្រកាសរៀបចំការប្រគំតន្ត្រីខ្នាតយក្សនៅក្នុងប្រទេសថៃ ជាមួយនឹងកំពូលតារាចម្រៀងកម្ពុជា លោក ខេមរៈ សិរីមន្ដ ស្របពេលដែលខ្លួនបានចេញអាប់ប៊ុមចម្រៀងរួមគ្នាមានចំណងជើងថា « Sad Man »។
លោក ទិក ឈិរ៉ូ បានបញ្ជាក់ថា ការត្រឡប់មកប្រគំតន្ត្រីខា្នតធំនៅគ្រានេះ គឺជាពេលវេលាចុងក្រោយហើយ ដែលលោកធ្វើការជួបជុំ និងរៀបចំការប្រគំតន្ត្រីរបស់ខ្លួនបែបនេះ។ លោកថា ចំពោះភាពសហការជាមួយកំពូលតារាចម្រៀងកម្ពុជា ខេមរៈ សិរីមន្ដ គឺជាឱកាសថ្មីមួយដែលបានសាងប្រវត្តិសាស្ត្រក្នុងវិស័យសិល្បៈថៃ-កម្ពុជា។ គួររំឭកដែរថា តារាចម្រៀងសំឡេងធ្ងន់ លោក ខេមរៈ សិរីមន្ត បានចាប់ដៃគូបង្កើតអាល់ប៊ុមចម្រៀងរួមគ្នា ជាមួយនឹងតារាចម្រៀងថៃ លោក ទិក ឈិរ៉ូ ដោយបានធ្វើសន្និសីទកាសែត នៅទីក្រុងបាងកក ប្រទេសថៃ កន្លងរួចមកហើយ នៅរង់ចាំតែថ្ងៃនៃការប្រគំតន្ត្រីខ្នាតធំដែលគ្រោងរៀបចំនៅពេលឆាប់ៗខាងមុនេះទេ។
ដើម្បីឱ្យកាន់តែជាក់ច្បាស់បន្ថែម សូមទស្សនាវីដេអូខាងក្រោមនេះ ៖
August 17, 2018
កីឡាករហែលទឹក 5នាក់ដែលគួរឱ្យចាប់អារម្មណ៍បំផុតក្នុង Asian Games
កីឡាករ 5នាក់ដែលអាចនឹងបង្កើតឱ្យមានចំណាប់អារម្មណ៍ខ្លាំងក្នុងវិញ្ញាសាហែលទឹក ដែលនឹងចាប់ផ្តើមនៅថ្ងៃអាទិត្យនេះនាទីក្រុងហ្សាការតា ប្រទេសឥណ្ឌូនេស៊ី រួមមាន៖
កីឡាករ Sun Yang របស់ចិន
កីឡាករហែលទឹកដ៏ឆ្នើមរូបនេះបានឈ្នះមេដាយមាសអូឡាំពិក 3គ្រឿងលើវិញ្ញាសាហែលសេរី(Free style) និងក្រោយពីចាញ់ក្នុងការប្រកួតហែលចម្ងាយ 400ម៉ែត្រនៅទីក្រុង Rio កាលពី 2ឆ្នាំមុននោះ រូបគេដណ្តើមបានជ័យជម្នះក្នុងការប្រកួតហែលសេរីចម្ងាយ 200ម៉ែត្រ។
កីឡាករជប៉ុន Kosuke Hagino
កីឡាករដ៏ឆ្នើមរូបនេះ បានទទួលជ័យជម្នះក្នុងការប្រកួតហែលចម្រុះក្បាច់ឯកត្តជនចម្ងាយ 400ម៉ែត្រ និងបានឈ្នះមេដាយប្រាក់ ដោយបញ្ចប់ក្នុងចំណាត់ថ្នាក់លេខ2 បន្ទាប់ពីតារាឆ្នើមអាមេរិក Michael Phelps លើវិញ្ញាសាហែលចម្ងាយ 200ម៉ែត្រ។
កីឡាការិនីជប៉ុន Rikako Ikee
ជាមួយនឹងទឹកមុខប្រកបដោយស្នាមញញឹម Ikee គឺជាតារាឆ្នើមថ្មី 1រូបសម្រាប់ប្រទេសរបស់នាង។ កីឡាការិនីវ័យ 18ឆ្នាំរូបនេះបានឈ្នះមេដាយមាសក្នុងព្រឹត្តិការណ៍ Pan Pacific លើវិញ្ញាសាហែលបែបមេអំបៅចម្ងាយ 100ម៉ែត្រ ហើយនាងក៏បានឈ្នះមេដាយប្រាក់ក្នុងការប្រកួតហែលបែបសេរី ចម្ងាយ 200ម៉ែត្រផងដែរ។
កីឡាករសិង្ហបុរី Joseph Schooling
ក្រោយពីបានបង្កើតភាពអស្ចារ្យតាមរយៈការឈ្នះមេដាយមាសក្នុងវិញ្ញាសាហែលបែបមេអំបៅ ចម្ងាយ100ម៉ែត្រ ក្នុងព្រឹត្តិការណ៍ Asian Games កាលពីឆ្នាំ2014 រួចមក Schooling បានយកឈ្នះកីឡាករ Phelps ក្នុងព្រឹត្តិការណ៍អូឡាំពិកក្នុងទីក្រុង Rio លើវិញ្ញាសាដូចគ្នានេះ។
កីឡាករកាហ្សាក់ស្ថាន Dmitriy Balandin
ក្រោយពីទទួលបានជ័យជម្នះក្នុងការប្រកួតហែលទឹកបែបកង្កែបក្នុងព្រឹត្តិការណ៍ Asian Games ឆ្នាំ2014 កីឡាករ Balandin បានក្លាយម្ចាស់ជើងឯកអូឡាំពិកលើកីឡាហែលទឹកដំបូងគេរបស់កាហ្សាក់ស្ថាន នៅពេលរូបគេបានឈ្នះមេដាយមាសក្នុងវិញ្ញាសាហែលចម្ងាយ 200ម៉ែត្រ កាលពី 2ឆ្នាំមុន៕
ប្រភពពី៖ Channel News Asia
August 17, 2018