Category: សង្គម និងសេដ្ឋកិច្ច

ពេជ្រ ថៃ បង្ហាញវត្តមានជាថ្មី បន្ទាប់ពីបួសសងគុណម៉ែចាស់
កន្លងទៅថ្មីនេះ ម៉ែចាស់ដ៏កម្សត់របស់លោកប្អូន ពេជ្រ ថៃ បានទទួលមរណភាពហើយនៅខេត្តបាត់ដំបង ដោយប្អូនបានទាំងប្រកាសថា នោះជាការបាត់បង់ដ៏ធំមហិមានៅក្នុងជីវិតរបស់លោកប្អូន ដោយសារតែរយៈពេលកន្លងមក ជីដូនមិនខុសពីម្ដាយរបស់លោកប្អូនឡើយនៅពេលដែលឪពុកម្ដាយរបស់លោកប្អូនចេញទៅធ្វើពលករនៅក្នុងប្រទេសថៃ។ លោកប្អូនបានចាកចេញពីរាជធានីភ្នំពេញទៅកំដរជីដូនពេលឈឺធ្ងន់ និងសម្ងំធ្វើបុណ្យនៅទីនោះទាំងអារម្មណ៍ក្ដុកក្ដួល។
ដើម្បីតបស្នងគុណដល់ម៉ែចាស់ តារាចម្រៀងវ័យក្មេងនៅក្នុងទ្រនំរស្មីហង្សមាសរូបនេះ បានបួសជាព្រះសង្ឃ ដើម្បីសាងកុសលផលបុណ្យជូនម្ដាយចាស់ និងតបស្នងគុណដែលម្ដាយចាស់មួយរូបនេះបានចំណាយពេលស្ទើរតែមួយជីវិតមើលថែរក្សា ថ្នាក់ថ្នម ប្រៀនប្រដៅ រហូតដល់ ពេជ្រ ថៃ បានជោគជ័យដូចសព្វថ្ងៃនេះ។
គួរបញ្ជាក់ផងដែរថា ក្រោយបញ្ចប់ការធ្វើបុណ្យ និងបួសសងគុណឱ្យម៉ែចាស់ ចំនួន7 ថ្ងៃ រួចរាល់ហើយ ពេលនេះតារាចម្រៀងវ័យក្មេង ពេជ្រ ថៃ បានសឹក និងត្រលប់ចូលមកបន្តសកម្មភាពជាអ្នកសិល្បៈជាថ្មីម្ដងទៀតហើយ តាមរយៈកម្មវិធីប្រគំតន្ត្រីរបស់ស្ថានីយទូរទស្សន៍រស្មីហង្សមាស ដែលធ្វើឱ្យមហាជនពិតជានឹកតារាចម្រៀងវ័យក្មេងរូបនេះជាខ្លាំង។ ជាមួយគ្នានោះដែរ នៅពេលដែល ពេជ្រ ថៃ បកស្រាយបទ ខ្លុយស្នេហ៍ត្នោតទេ ធ្វើឱ្យមហាជនជាច្រើនកម្សត់តាម ស្ទើរតែស្រក់ភ្នែក។ ដើម្បីឱ្យកាន់តែជាក់ច្បាស់ សូមទស្សនាវីដេអូខាងក្រោមនេះ:
https://www.youtube.com/watch?v=kB91dmI72bM

August 22, 2018
គួរសរសើរ!! មិននឹកស្មាន Rith Omega លើកទឹកចិត្តដល់សិស្សប្រលងបាក់ឌុបដល់ម្លឹង…
នៅលើគណនីហ្វេសប៊ុកផ្លូវការរបស់លោក ឃុន ធារិទ្ធិ ហៅ Rith Omega ត្រូវគេឃើញបង្ហោះពីសកម្មភាពយ៉ាងកម្រ ដែលធ្វើឱ្យអ្នកដឹកនាំសម្ដែងប្រចាំនៅក្នុងផលិតកម្មថោនរូបនេះ ទទួលបាននូវការសរសើរយ៉ាងខ្លាំង ជុំវិញសកម្មភាពដែលលោកបានធ្វើដោយផ្ទាល់ នៅតាមមណ្ឌលប្រលងរបស់សិស្សសាលានៅខេត្តបាត់ដំបង។ គេមើលឃើញលោកឈរចែកទឹកសុទ្ធ និងភេសជ្ជៈប្រចាំហាងឆប់ឆាហ៍របស់លោកនៅបាត់ដំបង ដល់មណ្ឌលប្រលងតែម្ដង និងសរសេរនៅលើហ្វេសប៊ុកថា « សុខចិត្តបោះចោលការងារដោយផ្ទាល់ ដើម្បីលើកទឹកចិត្តដល់អ្នកប្រលង»។
បើតាមវីដេអូ និងរូបភាពដែលបានបង្ហោះ គឺលោក និងក្រុមការងារបានដឹកភេសជ្ជៈទាំងកែវៗ ជាមួយនឹងទឹកសុទ្ធរហូតដល់រាប់រយយួរ ហើយឈរចែកដល់សិស្សនៅតាមមណ្ឌលប្រលងតែម្ដង ដើម្បីចែកជូនដល់អ្នកប្រលងនៅក្នុងតាម មណ្ឌលវិទ្យាល័យសោហឺ មណ្ឌលវិទ្យាល័យព្រះមុន្នីវង្ស និងមណ្ឌលវិទ្យាល័យសម្ដេចឪ ដែលសុទ្ធតែជាមណ្ឌលប្រលងសំខាន់ៗប្រចាំនៅទីរួមខេត្តបាត់ដំបង។ មិនត្រឹមតែបេក្ខជនប្រលងប៉ុណ្ណោះទេ សូម្បីតែក្រុមសមត្ថកិច្ច និងអាណាព្យាបាលមួយចំនួន ក៏ត្រូវគេឃើញថា បានទទួលភេសជ្ជៈ និងទឹកសុទ្ធពីលោក និងក្រុមការងារ ដែលកំពុងឈរចែកជូនដោយផ្ទាល់ផងដែរ។
លោកបានបង្ហោះនៅលើហ្វេសប៊ុកបន្ដថា « សម្រចចិត្តចុះចែកទឹកសុទ្ធជូនដល់បេក្ខជនប្រលងនៅម៉ោងចូលប្រលង និងម៉ោងចេញម្ដងទៀត ខណៈដែលលោកក៏ត្រូវឃើញលើកដាក់ទឹកសុទ្ធ និងភេសជ្ជៈពីមណ្ឌលមួយទៅមណ្ឌលមួយ ដើម្បីឱ្យសិស្សប្រលងនៅក្នុងមណ្ឌលប្រលងទាំង3 បានទទួលភេសជ្ជៈ និងទឹកសុទ្ធមិនគិតថ្លៃ»។ គេឃើញលោក និងក្រុមការងារឈរចែកទឹកសុទ្ធទាំងភ្លៀងនោះផង ក្នុងថ្ងៃប្រលងចុងក្រោយកាលពីពេលរសៀល។
ទង្វើ និងសកម្មភាពរបស់លោក បានធ្វើឱ្យម្នាក់ៗមានការកោតសរសើរយ៉ាងខ្លាំង ជាពិសេសក្នុងពេលដែលលោកត្រូវគេដឹងថារវល់នឹងការងារមុខជំនួញ និងដឹកនាំថតMV សឹងមិនមានពេលសម្រាក ប៉ុន្តែបែរជាបានបង្ហាញមុខក្រឡឺមឈរចែកទឹកសុទ្ធដោយផ្ទាល់ នៅមុខមណ្ឌលប្រលងក្នុងខេត្តបាត់ដំបង ដោយលោកឈរចែករហូតដល់អស់ទឹកសុទ្ធរាប់រយយួរដែលបានបម្រុងទុក។ យ៉ាងណាមិញ មិនទាន់ដឹងថាអ្វីដែលជំរុញឱ្យលោកសម្រេចចិត្តធ្វើសកម្មភាពមួយនេះ យ៉ាងលំបាកដល់ម្លឹងនោះទេ ប៉ុន្តែយោងតាមអ្វីដែលលោកបង្ហោះគឺដើម្បីចូលរួមលើកទឹកចិត្តដល់បេក្ខជនបេក្ខនារីដែលបានចូលរួមប្រលងថ្នាក់បាក់ឌុប ឱ្យកាន់តែមានកម្លាំងចិត្ត៕
August 22, 2018
តើមូលហេតុអ្វីខ្លះដែលធ្វើឱ្យបុគ្គលិកខ្លាំងៗមួយចំនួន ចេញរកស៊ីខ្លួនឯងមិនជោគជ័យ?
មនុស្សជាច្រើនមានចម្ងល់ថា ហេតុអ្វីបានជាមនុស្សពូកែៗដែលគេធ្លាប់មើលឃើញថាជាអ្នកដឹកនាំក្រុមហ៊ុនស្តង់ដារធំៗ ឬជាអ្នកពូកែផ្នែកលក់ដែលជួយអាជីវកម្មធំៗឱ្យទទួលបានជោគជ័យ តែបែរជាបរាជ័យក្នុងជំនួញផ្ទាល់ខ្លួននៅពេលពួកគាត់ចេញទៅធ្វើអាជីវកម្មទៅវិញ?។
ស្ថាបនិក និងជាអគ្គនាយកក្រុមហ៊ុន Mekong Properties លោក ថាច ចាន់នី បានលើកឡើងថា មនុស្សពូកែភាគច្រើនដែលធ្វើការឱ្យគេ និងអាចធ្វើឱ្យក្រុមហ៊ុនធំៗដំណើរការបានល្អដោយសារការរួមចំណែករបស់ខ្លួនខណៈបុគ្គលិកខ្លះបានវិវឌ្ឍខ្លួនរហូតក្លាយជាប្រធានផ្នែកលក់ និងជាបុគ្គលសំខាន់ៗក្នុងកម្រិតអ្នកគ្រប់គ្រង តែពេលបើកអាជីវកម្មផ្ទាល់ខ្លួនបែរជាបរាជ័យនោះ គឺដោយសារតែបរិយាកាសនៃអាជីវកម្ម។ លោកថា អ្នកចេញរកស៊ីដំណាលគ្នាជាមួយលោកមួយ-ចំនួនធំបានក្ស័យធន ហើយមានមនុស្សតិចតួចប៉ុណ្ណោះដែលអាចឈរជើងបានក្នុងពិភពអាជីវកម្មជាក់ស្តែង ដែលអ្នកទាំងអស់នោះសុទ្ធតែមាន សមត្ថភាពខ្លាំងៗ។ អ្នកដែលមិនអាចទៅមុខបានភាគច្រើនជាមនុស្ស ដែលមានអំនួតលើសមត្ថភាព តែមិនមានបទពិសោធក្នុងអាជីវកម្មពិត។
លោក ថាច ចាន់នី ស្ថាបនិក និងជាអគ្គនាយកក្រុមហ៊ុន Mekong Properties
លោក ថាច ចាន់នី បាននិយាយថា៖ “មានអ្នកខ្លះកាន់តំណែងជា Sale director ហើយគាត់ស្គាល់បុគ្គលសំខាន់ៗច្រើន បន្ទាប់មកក៏ចេញរកស៊ី តែបានដួលទៅវិញក្នុងរយៈពេលមួយ។ បញ្ហាគឺត្រង់គាត់គិតថា មុខតំណែងរបស់គាត់សំខាន់ គាត់ចេះពីការងារដែលគាត់កំពុងធ្វើអស់ហើយ និងអាចរកស៊ីបានហើយ តែគាត់ភ្លេចគិតថា នៅពីក្រោយភាពជោគជ័យនៃអាជីវកម្មមួយ គេត្រូវការការចូលរួមពីផ្នែកជាច្រើនផ្សេងទៀត”។
សហគ្រិនដដែលបានលើកឡើងផងដែរថា អ្នកធ្វើការងារ គឺជាអ្នកកសាងបណ្តាញ និងមានសមត្ថភាពខ្ពស់ក្នុងពិភពការងារ ដែលមានអ្នកខ្លះបានចាក់ឫសកែវយ៉ាងជ្រៅជាយូរឆ្នាំ រហូតទទួលបានផ្លែផ្កាល្អ។ ក្រោយពេលគាត់ចេញទៅបើកអាជីវកម្មខ្លួនឯង គឺហាក់បីដូចជាគាស់ដើមឈើមួយដែលមានផ្លែផ្កានោះទៅដាក់ដាំនៅទីកន្លែងថ្មី ដែលមានបរិយាកាសថ្មីមួយផ្សេងដែលមិនប្រាកដថា តើដើមឈើនោះអាចទប់ទល់នឹងជីវជាតិដីថ្មីនោះបានកម្រិតណា ហើយអាចបន្តរស់ ឬងាប់នៅរយៈពេលណាមួយឡើយ។ កត្តានេះអាចធ្វើឱ្យគាត់ត្រូវចំណាយពេលវេលាច្រើន ដើម្បីសិក្សាពីបញ្ហាប្រឈមថ្មីៗជាច្រើនផ្សេងទៀតនៅក្នុងអាជីវកម្ម ដើម្បីបន្តអភិវឌ្ឍឱ្យខ្លាំងបំផុតតាមដែលអាចធ្វើទៅបាន បើមិនដូច្នោះទេគាត់នឹងដួលវិញក្នុងពេលណាមួយនៃដំណើរអាជីវកម្មនោះ។ ជាដំណោះស្រាយ អ្នករកស៊ីគួរបើកចិត្តឱ្យទូលាយសិក្សាឱ្យសព្វជ្រុងជ្រោយដោយកុំមោទនភាពខ្លាំងពេក ដើម្បីស្វែងរកបទពិសោធជាក់ស្តែងដែលអាចជួយគាត់ឱ្យរកឃើញវិធីល្អៗជាច្រើន ដែលសមនឹងអាជីវកម្មរបស់គាត់យកទៅអភិវឌ្ឍ ឬដោះស្រាយបញ្ហាប្រឈមនានា។
ងាកមកឧកញ៉ាវ័យក្មេង ចិត្រ សិរីសុភ័ក្ត្រ ដែលជាម្ចាស់ក្រុមហ៊ុន Luxury Smile & MONSNE កាហ្វេ បានលើកឡើងថា ការធ្វើអាជីវកម្មជោគជ័យចាំបាច់ត្រូវមានភាពបត់បែន និងចេះគ្រប់គ្រងបុគ្គលិកឱ្យបានល្អ បើមិនដូច្នេះទេយើងអាចនឹងខាតបង់បានគ្រប់ពេល។ បុគ្គលិកជាទ្រព្យសម្បត្តិសំខាន់សម្រាប់ក្រុមហ៊ុន ហើយដើម្បីដឹកនាំបុគ្គលិកឱ្យបានល្អ លុះត្រាតែអ្នកដឹកនាំចេះយកបេះដូងបុគ្គលិកឱ្យបាន។ ទោះជាយ៉ាងនេះក្តី ការយកបេះដូងបុគ្គលិកមកបាន មិនមែនជារឿងងាយនោះទេ វាទាមទារឱ្យមានការពន្យល់ណែនាំ និងលើកទឹកចិត្តច្រើនបំផុត ដើម្បីឱ្យបុគ្គលិកបើកចិត្តទទួលយកក្តីស្រឡាញ់ពីអ្នកគ្រប់គ្រង។ ប្រសិនបើអ្នកគ្រប់គ្រងព្យាយាមបង្ហាញក្តីស្រឡាញ់ទៅថ្នាក់ក្រោម តែបុគ្គលិកមិនបើកចិត្តដើម្បីទទួលយកក្តីស្រឡាញ់នោះ យើងនៅតែមិនអាចធ្វើការងារបានល្អជាមួយគ្នាដដែល ហើយអាជីវកម្មអាចប្រឈមបញ្ហាច្រើន ព្រោះមានរឿងជាច្រើនដែលមិនយល់ពីគ្នាដែលមិនអាចធ្វើឱ្យសេវាកម្មមានគុណភាពល្អបាន។
លោកឧកញ៉ា ចិត្រ សិរីសុភ័ក្ត្រ
លោកឧកញ៉ា ចិត្រ សិរីសុភ័ក្រ្ត បាននិយាយថា៖ “ដើម្បីដឹកនាំការងារបានល្អ លុះត្រាតែយើងចេះសម្របខ្លួនជាមួយនឹងបរិយាកាសនៃការងារជាមួយគាត់បានល្អ ហើយយល់ច្បាស់ពីតម្រូវការជាក់ស្តែងរបស់សមាជិកផ្ទាល់ក្នុងក្រុមហ៊ុនមិនមែនអនុវត្តតែតាមទ្រឹស្តីដែលធ្លាប់ដឹងពីខាងក្រៅមកនោះទេ”។
លោកឧកញ៉ា ចិត្រ សិរីសុភ័ក្ត្រ បានលើកឡើងផងដែរថា លោកធ្លាប់សិក្សានៅសហរដ្ឋអាមេរិកតែចំណេះដឹងទាំងអស់នោះ ពេលខ្លះមិនអាចប្រើប្រាស់បាននៅកម្ពុជាទាំងស្រុងនោះទេសម្រាប់ការគ្រប់គ្រងបុគ្គលិក និងអាជីវកម្ម។ ដើម្បីអនុវត្តការដឹកនាំអាជីវកម្មបានល្អលុះត្រាតែសិក្សាបន្ថែមពីតម្រូវការរបស់ប្រជាជនខ្មែរ វប្បធម៌នៃការធ្វើការងារ និងរៀបចំវិធីសាស្ត្រជាច្រើនផ្សេងទៀតដើម្បីជំរុញទឹកចិត្ត និងឆន្ទៈរបស់ពួកគាត់ឱ្យបានច្រើន ទើបអាចឱ្យការងារអនុវត្តបានទៅដោយរលូន និងឈរជើងបានយូរ។ លោកថា មនុស្សម្នាក់ៗមិនដូចគ្នាទេ ហេតុនេះទាល់តែព្យាយាមឱ្យបានច្រើនពីការដឹកនាំខាងក្នុងខ្លួនឯងរបស់អ្នកដឹកនាំផង និងចិត្តសាស្ត្ររបស់បុគ្គលិកឱ្យល្អផងទើបអាចដំណើរការអាជីវកម្មបានល្អ៕
August 21, 2018
ដាំដើមប៉ាស្យុងលើដី1ហិកតា ប្រមូលផលក្នុង1ថ្ងៃបាន150 – 200Kg
ក្រូចវល្លិ៍ ឬភាសាដែលគេនិយមហៅថា ផ្លែប៉ាស្យុង(Passion) មានដើមកំណើតនៅទ្វីបអឺរ៉ុបដែលហូរចូលមកដល់ប្រទេសកម្ពុជាកាលពីប៉ុន្មានឆ្នាំចុងក្រោយនេះ បាន និងកំពុងមានការគាំទ្រខ្លាំងពីអតិថិជននៅលើទីផ្សារកម្ពុជា ដោយសារវាមានអត្ថប្រយោជន៍ខ្លាំងចំពោះសុខភាព ពិសេសជាអាហារផ្តល់ថាមពលដល់មនុស្សភ្លាមៗក្រោយពេលទទួលទានរួច។
អ្នកស្រី ឃឹម រ៉ាឌី ជាម្ចាស់កសិដ្ឋានដាំដើមប៉ាស្យុង់ដ៏ធំមួយឈ្មោះថា (Happy Dragon Farm) ឬកសិដ្ឋាននាគសប្បាយ នៅក្នុងភូមិត្បែង ឃុំត្បែង ស្រុកបន្ទាយស្រី ខេត្តសៀមរាបបានមានប្រសាសន៍ក្នុងទឹកមុខរីករាយថា តាមពិតទៅគ្រួសារលោកស្រីភាគច្រើនរៀនជំនាញសុខាភិបាល “វិជ្ជាពេទ្យ‟ តែដោយយល់ឃើញពីអត្ថប្រយោជន៍នៃបន្លែផ្លែឈើចំពោះសុខភាពទើបពួកគាត់ខិតខំឆ្លៀតពេលរៀបចំកសិដ្ឋានដាំដំណាំហូបផ្លែតាមរបៀបធម្មជាតិនេះឡើង ដោយដំបូងឡើយគ្រាន់តែជាកសិដ្ឋានតូចមួយទុកសម្រាប់ទទួលទានជាលក្ខណៈគ្រួសារប៉ុណ្ណោះ ប៉ុន្តែដោយសារមានតម្រូវការទីផ្សារ មិនថាតែប្រជាជនខ្មែរ ឬជនបរទសដែលកំពុងរស់នៅប្រទេសកម្ពុជានោះទេ ពួកគេបាននាំគ្នាមកកុម្ម៉ង់ទិញកាន់តែច្រើនឡើងៗ ទើបធ្វើឱ្យគ្រួសារគាត់ពង្រីកកសិដ្ឋានឱ្យកាន់តែធំឡើងៗសម្រាប់ដាំផ្លែឈើប្រភេទនេះនៅលើដីរាប់សិបហិកតានៅខេត្តសៀមរាបចាប់តាំងពីឆ្នាំ2013មកតែម្ដង។
អ្នកស្រី ឃឹម រ៉ាឌី ម្ចាស់កសិដ្ឋាន Happy Dragon Farm
ទឹកមុខពោរពេញដោយក្តីសង្ឃឹម អ្នកស្រី ឃឹម រ៉ាឌីបន្តថា កន្លងមកអ្នកស្រីដាំតែប្រភេទផ្លែឈើក្នុងស្រុក ដែលមានដូចជា ផ្លែស្រការនាគ ឬផ្លែល្មុត សេដាប៉ុណ្ណោះ ប៉ុន្តែបន្ទាប់ពីបានទៅទស្សនកិច្ចសិក្សា និងបានចូលរៀនបច្ចេកទេសវគ្គខ្លីផ្នែកដាំដុះនៅសហរដ្ឋអាមេរិកក្នុងរយៈពេលខ្លីរួចមក គ្រួសាររបស់អ្នកស្រីក៏ចាប់ផ្តើមដាំដើមឈើប្រភេទនេះ បន្ថែមលើដំណាំហូបផ្លែដទៃទៀត ដោយធ្វើពិសោធសាកល្បងដាំដុះជាលើកដំបូង។ ប៉ុន្តែក្រោយពីដាំបានរយៈពេលប្រមាណជា 3ទៅ4ខែ ដោយបានដាក់ទ្រើងឱ្យវាវារតោងឡើងតាមលក្ខណៈបច្ចេកទេសដូចផ្លែឈើមួយចំនួនទៀតមក ផ្លែឈើនេះក៏ចាប់ផ្តើមចេញផ្កា-ផ្លែ និងឱ្យផលបន្តិចម្តងៗ ហើយមិនយូរប៉ុន្មានផង យើងអាចប្រមូលផលបានក្នុង1ហិកតា ក្នុង1ថ្ងៃ ចាប់ពី150 រហូតដល់ 200គីឡូក្រាមក៏មាន។
អ្នកស្រីបន្តថា ចំពោះបច្ចេកទេសដាំដុះឱ្យទទួលបានផលច្រើន ការដាំដុះត្រូវការការថែទាំជាខ្លាំង ដោយយើងត្រូវដកស្មៅ ជ្រំដី ដាក់ជី ប៉ុន្តែដើម្បីអត្ថប្រយោជន៏សុខភាពសម្រាប់មនុស្ស គេមិនត្រូវប្រើជីគីមីឡើយ។ បន្ទាប់មកត្រូវចេះថែទាំ កាត់មែកចាស់ៗចោល ទុកឱ្យមែកថ្មីលាស់ឡើងបន្ត ទើបវាមានផ្លែ-ផ្កាបន្តទៀត។ បើយើងចេះថែទាំបានល្អ ចេះបង្កាត់ពូជញីពូជឈ្មោលនោះ ផ្លែឈើនេះអាចផ្តល់ផលបានច្រើន ហើយអាចរស់បានរយៈពេលយូរឆ្នាំដូចផ្លែឈើដទៃទៀតដែរ។
បន្ទាប់ពីប៉ាស្យុងឱ្យផល ផ្លែឈើប្រភេទនេះត្រូវបានអតិថិជនមកទទួលទិញដល់កសិដ្ឋាននៅក្នុងខេត្តសៀមរាបនោះតែម្តង ហើយបាននាំយកមកលក់នៅផ្សារកសិដ្ឋានធម្មជាតិនាគសប្បាយ(Happy Dragon Farm) នៅផ្លូវលេខ63 សង្កាត់បឹងកេងកង ក្រុងភ្នំពេញ ដែលមានអតិថិជនមកទិញយកទៅលក់បន្ត និងលក់ឱ្យអតិថិជនមួយចំនួនទៀត។ ពួកគាត់ទទួលទិញជាប្រចាំសម្រាប់ហូបជាលក្ខណៈគ្រួសារជារៀងរាល់ថ្ងៃ ដែលអតិថិជនទាំងនោះយល់ថា វាមានអត្ថប្រយោជន៏ចំពោះសុខភាពជាខ្លាំង។
ផ្លែប៉ាស្យុងដែលដាក់លក់
បើតាមការស្រាវជ្រាវផ្នែកវេជ្ជសាស្ត្របានឱ្យដឹងថា ផ្លែនេះវាមានអត្ថប្រយោជន៍សម្រាប់មនុស្សចាស់ដែលមានរាងកាយ និងកោសិកាចុះទន់ខ្សោយអាចទទួលទានផ្លែឈើនេះជាប្រចាំក្នុង1ថ្ងៃ1-2ផ្លែវាអាចជួយបង្កើនកម្លាំងថាមពលឱ្យល្អប្រសើរឡើង ហើយអ្នកដែលសម្រានមិនសូវលក់ ពេលពិសារួចហើយ និងមានអាររម្មណ៍ល្អប្រសើរឡើងបន្តិចម្តងៗ លើសពីនេះទៀត វាថែមទាំងមានសមត្ថភាពក្នុងការការពារជំងឺផ្តាសាយ បង្កើនការចងចាំ និងជួយកាត់បន្ថយចង្កោមរោគសញ្ញាហឺតបានមួយកម្រិតទៀតផង។
អ្នកស្រី ឃឹម រ៉ាឌី បញ្ជាក់ថា បច្ចុប្បន្នផ្លែប៉ាស្យុងរបស់គ្រួសារអ្នកស្រី មិនត្រូវបានដាក់លក់នៅលើទីផ្សារក្នុងស្រុក ឬទីផ្សារទំនើបឡើយ ដោយសារតែផ្គត់-ផ្គង់មិនគ្រប់ ដោយបច្ចុប្បន្នមានដាក់លក់តែនៅកសិដ្ឋាននាគសប្បាយប៉ុណ្ណោះ និងអាចផ្គត់ផ្គង់ផ្លែប៉ាស្យុងសម្រាប់ម៉ូយប្រចាំក្នុង1គីឡូក្រាមតម្លៃ 3-4ដុល្លារ អាស្រ័យទៅតាមការប្រមូលបានតិច ឬច្រើន៕
August 21, 2018
ខណ្ឌណាខ្លះដែលដីមានតម្លៃថ្លៃជាងគេក្នុងរាជធានីភ្នំពេញ?
បច្ចុប្បន្នគេសង្កេតឃើញថា សំណង់លំនៅឋាន និងអគារខ្ពស់ៗបានកើនឡើងយ៉ាងខ្លាំងពីមួយឆ្នាំទៅមួយឆ្នាំក្នុងភូមិសាស្ត្ររាជធានីភ្នំពេញដែលធ្វើឱ្យតម្លៃដីធ្លីមានការកើនឡើងខ្ពស់កប់ពពកក្នុងរយៈពេលប៉ុន្មានឆ្នាំចុងក្រោយនេះ។
យោងតាមរបាយការណ៍ស្រាវជ្រាវរបស់ក្រុមហ៊ុន Key Real Estate បានបង្ហាញថា នៅឆមាសទី1 ឆ្នាំ2018នេះ ដីធ្លីនៅក្នុងខណ្ឌចំនួន3 ដែលមានតម្លៃដីខ្ពស់ជាងគេក្នុងរាជធានីភ្នំពេញមានដូចជា1.ខណ្ឌដូនពេញ ជាមជ្ឈមណ្ឌលពាណិជ្ជកម្មដែលដីមានតម្លៃថ្លៃបំផុត ដោយដីលំនៅឋានត្រូវបានលក់ក្នុងតម្លៃ 3,500ដុល្លារក្នុងម៉ែត្រការ៉េ និងដីសម្រាប់ធ្វើពាណិជ្ជកម្មមានតម្លៃជាមធ្យមគឺ 6,100ដុល្លារក្នុងមួយម៉ែត្រការ៉េ។ ក្នុងនោះសង្កាត់ផ្សារថ្មី1 ផ្សារថ្មី2 និងផ្សារថ្មី3 ក្នុងខណ្ឌដូនពេញដែលជាដីពាណិជ្ជកម្មមានតម្លៃថ្លៃបំផុតដែលអាចលក់បានដល់ទៅ 9,000ដុល្លារក្នុងមួយម៉ែត្រការ៉េ រីឯដីលំនៅឋានក្នុងសង្កាត់ផ្សារចាស់វិញមានតម្លៃ 4,000ដុល្លារក្នុងម៉ែត្រការ៉េ។
លោក សន សៀប ស្ថាបនិក និងជានាយកប្រតិបត្តិរបស់ក្រុមហ៊ុន Key Real Estate បានពន្យល់ថា ហេតុផលសំខាន់បំផុតដែលនាំឱ្យដីក្នុងខណ្ឌនេះមានតម្លៃថ្លៃជាងគេនោះ គឺទីផ្សារអចលនទ្រព្យដែលមានភាពចាស់ទុំ វាជាតំបន់អភិវឌ្ឍន៍ដែលចាស់ជាងគេ ហើយមានទីផ្សារធំៗ និងគោលដៅទេសចរណ៍ដ៏ពេញនិយម ដូចជាព្រះបរមរាជវាំង និងតំបន់មាត់ទន្លេផងដែរនៅក្នុងតំបន់នោះ។
លោក សន សៀប ស្ថាបនិក និងជានាយកប្រតិបត្តិរបស់ក្រុមហ៊ុន Key Real Estate
បន្ទាប់ពីខណ្ឌដូនពេញ គឺខណ្ឌ7មករា ជាមជ្ឈមណ្ឌលពាណិជ្ជកម្មមួយទៀតដែលដីមានតម្លៃថ្លៃបំផុតលំដាប់លេខ2 នៅរាជធានីភ្នំពេញ គឺដីសម្រាប់សង់លំនៅឋានក្នុងតំបន់នេះត្រូវបានលក់ក្នុងតម្លៃ 3,300ដុល្លារក្នុងមួយម៉ែត្រការ៉េ ខណៈពេលដែលដីពាណិជ្ជកម្មមានតម្លៃ 5,400ដុល្លារក្នុងម៉ែត្រការ៉េ។ តំបន់ដែលដីមានតម្លៃថ្លៃជាងគេនៅក្នុងខណ្ឌមួយនេះ មានដូចជាសង្កាត់អូរឫស្សី1,2,3 និង4 គឺជាដីពាណិជ្ជកម្មដែលមានតម្លៃ 6,000ដុល្លារក្នុង 1ម៉ែត្រការ៉េ និងសង្កាត់បឹងព្រលិត ដីមានតម្លៃប្រមាណជា4,000ដុល្លារក្នុងមួយម៉ែត្រការ៉េ។
បន្ទាប់ពីខណ្ឌទាំង2 ខាងលើ ខណ្ឌចំការមនជាប់ចំណាត់ថ្នាក់លេខ3 ជាខណ្ឌដែលដីមានតម្លៃថ្លៃមធ្យមគឺ 3,000ដុល្លារក្នុង1ម៉ែត្រការ៉េសម្រាប់ដីលំនៅឋាន និងដីពាណិជ្ជកម្មមានតម្លៃ 5,100ដុល្លារក្នុង1ម៉ែត្រការ៉េ។
លោក ហ៊ឹម សីហា នាយកផ្នែកស្រាវជ្រាវអចលនទ្រព្យនៃក្រុមហ៊ុន VTrust Appraisal មានប្រសាសន៍ថា ចំណែកឯដីដែលនៅមានតម្លៃទាបនៅឡើយ គឺជាដីដែលនៅជាយៗក្រុង មានដូចជាដីនៅខណ្ឌព្រែកព្នៅខណ្ឌសែនសុខ ខណ្ឌដង្កោ ខណ្ឌពោធិ៍សែនជ័យ និងខណ្ឌមានជ័យ ជាទីតាំងជាយក្រុងព័ទ្ធជុំវិញរាជធានីភ្នំពេញដែលកន្លែងខ្លះដីមានតម្លៃក្រោម 100ដុល្លារ និងខ្លះទៀតត្រឹមតែ 20-30ដុល្លារក្នុងម៉ែត្រការ៉េក៏មាន។ លោកថា ដីដែលមានតម្លៃចន្លោះពី 20-30ដុល្លារក្នុងមួយម៉ែត្រការ៉េនេះ ជាប្រភេទដីស្រែប្រាំងដែលនៅមិនទាន់មានសំណង់ផ្ទះល្វែងទៅដល់ ពោលគឺជាដីដែលមានពលរដ្ឋជាម្ចាស់ស្រុករស់នៅតកូនតចៅបន្តគ្នារហូតមកទល់បច្ចុប្បន្ន។
លោក ហ៊ឹម សីហា នាយកផ្នែកស្រាវជ្រាវអចលនទ្រព្យនៃក្រុមហ៊ុន VTrust Appraisal
យ៉ាងណាក៏ដោយ ដីនៅតំបន់ជាយក្រុងតាមបណ្តោយក្រវាត់ក្រុងទី3 ចាប់ពីស្ពានព្រែកព្នៅឆ្លងកាត់តាមភ្នំប្រសិទ្ធិ៍ កាត់លើផ្លូវលេខ51ឆ្ពោះមកខេត្តកណ្តាល ហើយបញ្ចប់នៅត្រឹមកំពង់ផែស្រុកកៀនស្វាយជិតផ្លូវជាតិលេខ1 កំពុងមានសម្ទុះកើនឡើងខ្លាំង ដោយសារគម្រោងវិនិយោគសំណង់ផ្សេងៗបានទៅបោះទីតាំងនៅទីនោះ ដែលធ្វើឱ្យតម្លៃដីបាន និងកំពុងឡើងថ្លៃខ្លាំងដែរ ចន្លោះពី 100ដុល្លារទៅដល់ 200ដុល្លារ ហើយសម្រាប់ដីជាយក្រុងដែលមានសក្តានុពលខ្លាំងផ្នែកពាណិជ្ជកម្ម អាចឡើងថ្លៃជិតដល់ 300ដុល្លារក្នុងមួយម៉ែត្រការ៉េ។
លោក ហ៊ឹម សីហា បានបញ្ជាក់ថា ដោយសារនិន្នាការតម្លៃដីចេះតែកើនឡើងដូច្នេះ បានធ្វើឱ្យទីប្រជុំជននៅតំបន់ជាយក្រុងមួយចំនួន ដូចជាតំបន់ជ្រោយចង្វារដែលស្ថិតលើផ្លូវជាតិលេខ6A ដីក្នុងក្រុងតាខ្មៅលើចំណុចតភ្ជាប់ពីភ្នំពេញទៅខេត្តកណ្តាល និងដីក្នុងតំបន់មួយចំនួនទៀតនឹងក្លាយជាអនុតំបន់ក្រុងភ្នំពេញដែលមានមនុស្សរស់នៅច្រើនហើយនោះតម្លៃដីក៏កំពុងកើនឡើងខ្លាំង មិនចាញ់ដីក្នុងទីក្រុងភ្នំពេញប៉ុន្មានឡើយ។
គួរបញ្ជាក់ថា តម្លៃដីធ្លីដែលអាចឡើងខ្ពស់ ឫចុះទាបនោះ គឺអាស្រ័យលើទីតាំង និងចម្ងាយផ្លូវពីរមណីយដ្ឋានវត្តភ្នំដែលជាចំណុចកណ្ដាលនៃរាជធានីភ្នំពេញ។ ឧទាហរណ៍តាមបណ្តោយផ្លូវធំដីទំនេរចម្ងាយប្រមាណ5គីឡូម៉ែត្រពីវត្តភ្នំ អាចមានតម្លៃ 4500ដុល្លារក្នុង1ម៉ែត្រការ៉េ ហើយប្រសិនបើចម្ងាយប្រហែល25គីឡូម៉ែត្រពីចំណុចកណ្តាលរាជធានីភ្នំពេញ តម្លៃដីអាចត្រឹមតែ 10 ទៅ50ដុល្លារប៉ុណ្ណោះក្នុង 1ម៉ែត្រការ៉េ៕
August 21, 2018
កក្រើករោងភាពយន្ត ពេល ឱក សុគន្ធកញ្ញា ប៉ះកូនប្រុសទាំង2 របស់លោក ព្រាប សុវត្ថិ
កាលពីរាត្រីថ្ងៃម្សិលមិញ អ្នកគាំទ្រជាច្រើនបាននាំគ្នាសម្រុកមកកាន់រោងភាពយន្ដ Major Cineplex by Smart នៅទីតាំងសែនសុខ ដើម្បីរង់ចាំទស្សនាការសម្ដែងដ៏អស្ចារ្យមិនធ្លាប់មានពីមុនមក ពីសំណាក់កំពូលតារាចម្រៀងស្រីប្រចាំផលិតកម្មរស្មីហង្សមាស គឺកញ្ញា ឱក សុគន្ធកញ្ញា ដែលត្រូវមកប៉ះគ្នាជាលើកដំបូងលើឆាកតន្ត្រីក្នុងរោងភាពយន្តជាមួយកូនប្រុសទាំង2 របស់កំពូលតារាចម្រៀង ព្រាប សុវត្ថិ គឺលោក សុវត្ថិ មុន្នីវណ្ណ និង សុវត្ថិ សិរីវុឌ្ឍ ដែលបង្កឱ្យអ្នកគាំទ្រពុះកញ្ជ្រោល ញាប់ញ័របេះដូង ស្រែកហ៊ោកញ្ច្រៀវស្ទើរតែបែករោងកុនទាំងមូល។
ឱក សុគន្ធកញ្ញា បានប្រាប់អ្នកសារព័ត៌មានឡារ៉ែនថា នាងជាអ្នកគាំទ្រម្នាក់របស់រោងភាពយន្តដ៏ធំ និងទំនើបមួយនេះ តែអ្វីដែលកាន់តែរំភើបទៅទៀតនោះគឺ បុគ្គលិកក្នុងរោងកុនទាំងមូលបានប្រាប់នាងថា «ខ្ញុំក៏ជាហ្វ៊ែនរបស់បងកញ្ញាដែរ!» ដូច្នេះទើបគ្រប់គ្នាពុំបានចាត់ទុកនាងជាអតិថិជននោះទេ តែបែរជាយកចិត្តទុកដាក់ និងស្នើសុំឱ្យធ្វើជាភ្ញៀវពិសេសវិញ ពោលគឺ ជាអាយដលក្នុងដួងចិត្តរបស់ពួកគេ។ ឱក សុគន្ធកញ្ញា បានប្រាប់ទៀតថា នាងចូលចិត្តមើលកុនណាស់ រាល់ពេលដែលមានកុនចេញមកថ្មី និងចាក់បញ្ចាំង នាងមិនដែលរំលងឡើយ សូម្បីតែរឿងតុក្កតាក៏ដោយ។
កាន់តែពិសេសជាងនេះទៅទៀតនោះ តារាស្រីរូបនេះបានតុបតែងខ្លួនយ៉ាងប្លែកភ្នែក ដោយការបង្ហាញដើមទ្រូងដ៏មូលក្លំ ដែលធ្វើឱ្យមហាជនមើលនាងមិនដាក់ភ្នែកសោះ។ នៅក្នុងថ្ងៃសម្ពោធរោងកុនថ្មីសន្លាង និងមានផាសុកភាពមួយនេះ កំពូលតារាចម្រៀងស្រី ឱក សុគន្ធកញ្ញា និង លោក សុវត្ថិ មុន្នីវណ្ណ ព្រមទាំង សុវត្ថិ សិរីវុឌ្ឍ បានចូលរួមថតរូបជាមួយអ្នកគាំទ្រទាំងអស់ និងបង្កភាពស្និទ្ធស្នាលជាមួយអ្នកគាំទ្រយ៉ាងកក់ក្ដៅបំផុត រហូតដល់ម្នាក់ៗមិនចង់ត្រឡប់ទៅផ្ទះវិញឡើយ។ ចង់ដឹងថា តារាចម្រៀងទាំង3 មកពីទ្រនំរស្មីហង្សមាសបានបង្ហាញភាពអស្ចារ្យបែបណា សូមទស្សនារូបភាពទាំងអស់ខាងក្រោមនេះ ៖

August 21, 2018
លោក Hodgson រិះគន់លើការផ្តល់បាល់ប៉េណាល់ទី ក្រោយ Liverpool ផ្តួល Crystal Palace
លោក Roy Hodgson បានបញ្ជាក់ថា លោក «នឹងមិនទទួលយក» បាល់ប៉េណាល់ទី ដែលបានធ្វើឱ្យក្រុម Liverpool ដណ្តើមបានជ័យជម្នះនៅពេលប្រកួតជាមួយនឹងក្រុម Crystal Palace កាលពីថ្ងៃចន្ទឡើយ។
លោកអាជ្ញាកណ្តាល Michael Oliver បានចង្អុលទៅចំណុចពិន័យ 11ម៉ែត្រ នៅជិតបញ្ចប់តង់ទី១ ក្រោយពីបានកាត់សេចក្តីថា ខ្សែការពារ Mamadou Sakho របស់ក្រុម Crystal Palace បានប្រព្រឹត្តកំហុសទៅលើតារាឆ្នើម Mohamed Salah របស់ក្រុមភ្ញៀវ។
រូបភាពវីដេអូផ្សាយឡើងវិញ បានបង្ហាញពីការប៉ះទង្គិចគ្នារវាងកីឡាករទាំង2 នៅមុនពេលខ្សែបម្រើស្លាបអន្តរជាតិអេហ្ស៊ីប Salah ដួល ដែលនាំឱ្យខ្សែបម្រើ James Milner ស៊ុតបាល់បំប៉ោងសំណាញ់ទីយ៉ាងល្អក្នុងពេលក្រុមខ្លួនទទួលជ័យជម្នះ 2-០ នាកីឡដ្ឋាន Selhurst Park កាលពីថ្ងៃចន្ទ។
ប៉ុន្តែ ទោះបីជាយ៉ាងណា Salah ត្រូវបានចោទប្រកាន់ថា ធ្វើពុតជាដួលក្នុងប្រអប់គ្រោះថ្នាក់ នៅចុងតង់ទី1។ លោក Gary Neville អតីតខ្សែការពាររបស់ក្លិប Manchester United និងកំពុងតែធ្វើការឱ្យទូរទស្សន៍ Sky Sports បានអះអាងថា វាជាការធ្វើពុតជាដួលយ៉ាងពិតប្រាកដ ដោយបាននិយាយថា៖ «មនុស្សជាច្រើននឹងមិនចូលចិត្តលើករណីនេះឡើយ។ ប្រសិនបើវាប្រឆាំងនឹងអ្នក អ្នកនឹងគិតថា វាជារឿងធម្មតា។ វាជាការដួលហួសពីការពិត ដែលយើងបានឃើញកីឡាករជាច្រើនធ្លាប់បានធ្វើ»។
ដើម្បីបន្ថែមទៅលើភាពសោកសៅរបស់ក្រុម Crystal Palace កីឡាករ Aaron Wan-Bissaka ត្រូវបានផ្តល់ការពិន័យកាតក្រហមបណ្តេញចេញក្នុងតង់ទី2 សម្រាប់ការទាញឱ្យ Salah ដួល ខណៈដែលរូបគេកំពុងតែបណ្តើរបាល់ដាច់តែឯង។
លោក Hodgson គ្រូបង្វឹករបស់ Crystal Palace បានឱ្យដឹងថា៖ «វាជាមិនមែនជាបាល់ប៉េណាល់ទីឡើយ… ខ្ញុំបានស្ថិតនៅជាមួយនឹងកីឡាបាល់ទាត់ជាយូរមកហើយ។ ប្រសិនបើវាជាបាល់ប៉េណាល់ទី ការប្រកួតនោះមានលក្ខណៈខុសពីគេហើយ»៕
ប្រភពពី៖ Liverpool Echo
August 21, 2018
អស្ចារ្យ!! សោភា ទេពី បញ្ចេញសមត្ថភាពថ្មីធ្វើឱ្យមហាជនចំហមាត់គ្រប់គ្នា
ថ្មីៗនេះគេសម្គាល់ឃើញ អតីតបេក្ខនារីលេចធ្លោក្នុងកម្មវិធី Cambodian Idol រដូវកាលទី3 កញ្ញា សោភា ទេពី ហាក់បីដូចជាបោះជំហាននៅក្នុងវិថីសិល្បៈកាន់តែវែងឆ្ងាយទៅហើយ ពោលគឺនាងកំពុងតែមានសម្ទុះទីផ្សារសិល្បៈខ្លាំងជាងតារារួមជំនាន់ និងអតីតមិត្តរួមការប្រឡងក្នុងកម្មវិធីកំពូលនោះជាមួយគ្នា។ តារាស្រីរូបនេះបានព្យាយាមរិះរកអ្វីដែលថ្មីប្លែកសម្រាប់ចាប់យកអារម្មណ៍មហាជនឱ្យកាន់តែស្គាល់រូបនាងខ្លាំងឡើងៗ ទាំងការតុបតែងខ្លួន និងប្ដូរស្តាយល៍ច្រៀងបែបយុវវ័យ ជាពិសេស គឺស្តាយល៍រ៉េប ដែលនាងមិនធ្លាប់បានបង្ហាញពីមុនមក។
ភាពភ្ញាក់ផ្អើលដែលអ្នកគាំទ្រកំពុងបានឃើញក្នុងបណ្ដាញសង្គមហ្វេសប៊ុក និងយូធូបនោះ គឺបទចម្រៀង «I Know Who I Am» ដែលជាស្តាយល៍រ៉េបដ៏ថ្មីសន្លាងរបស់នាង ដែលធ្វើឱ្យមហាជនមិននឹកសរសើរពីស្តាយល៍បញ្ចេញតុងសំឡេងច្រៀងជាភាសាអង់គ្លេស ចំពោះទឹកដមសំឡេង និងបច្ចេកទេសរ៉េបរបស់នាងក្នុងបទចម្រៀងទាំងមូលមិនបាន។ តាមរយៈបទចម្រៀងប្លែកត្រចៀកមួយនេះ សោភា ទេពី ទទួលបានការចាប់អារម្មណ៍មិនធម្មតាឡើយ ដោយសារតែមានអ្នកចូលទៅស្ដាប់បទចម្រៀងរបស់នាង និងចែកចាយបន្តក្រោយការបង្ហោះភ្លាមៗ។
សោភា ទេពី រំពឹងទុកយ៉ាងខ្លាំងថា បទរ៉េប «I Know Who I Am» នេះនឹងជួយឱ្យនាងកាន់តែឈានឡើងក្នុងវិស័យសិល្បៈចម្រៀង ខណៈដែលនាងបានត្រៀមបញ្ចេញក្បាច់រាំប្លែកៗជាមួយក្រុមរាំ នៅពេលឡើងឆាកដោយផ្ទាល់ទៀតផង។ នាងបានបង្ហើបថា បើនិយាយពីផលិតកម្មចង់បាននាងឱ្យស៊ីញ៉េកុងត្រាជាមួយនោះមានច្រើនណាស់ ប៉ុន្តែមកពីនាងមិនចង់ហក់ចូលក្នុងផលិតកម្មណាដែលនាងយល់ថាពិបាកជួយឱ្យនាងល្បីល្បាញ និងពិបាករំពឹងពីទីផ្សារ ទើបនាងសម្រេចចិត្តនៅជាតារាឯករាជ្យសិន ហើយផលិតបទចម្រៀងល្អៗដោយខ្លួនឯងវិញ ដើម្បីចៀសពីការស៊ីញ៉េកុងត្រារួចហើយ ស្រាប់តែកប់ឈ្មោះបាត់ឈឹង៕
August 21, 2018
បទនិពន្ធថ្មីរបស់អ្នកនាង ទូច ស្រីល័ក្ខ ធ្វើឱ្យអ្នកគាំទ្រស្រងេះស្រងោចនឹកដល់អ្នកមានគុណ
មួយរយៈចុងក្រោយនេះ តារាសម្ដែង និងច្រៀង ទូច ស្រីល័ក្ខ បានសាងប្រជាប្រិយភាពយ៉ាងច្រើនតាមរយៈបណ្ដាញសង្គមហ្វេសប៊ុក ដោយតារាស្រីរូបនេះបានបង្ហាញពីសកម្មភាពសប្បុរសធម៌ ការផលិតបទចម្រៀង Original Song ការបង្ហាញវីដេអូអប់រំ ជាពិសេសទៅទៀតនោះ គឺបានបង្ហាញពីការយកចិត្តទុកដាក់ចំពោះទុក្ខលំបាករបស់សិល្បករមួយចំនួន និងក៏មិនខុសពីសព្វមួយដងដែរ អ្នកនាង ទូច ស្រីល័ក្ខ តែងនិយមចូលចិត្តធ្វើអ្វីដែលប្លែកៗ និងបង្កភាពសប្បាយរីករាយជូនអ្នកគាំទ្របានទស្សនាកម្សាន្ដ។
ថ្មីៗនេះ អ្នកនាង និងក្រុមការងារ បានបង្ហាញស្នាដៃនិពន្ធបទចម្រៀងថ្មីមួយទៀត ដែលបានដាស់អារម្មណ៍មហាជនឱ្យនឹករឭកដល់គុណមាតាបិតា ដែលស្របពេលជិតដល់រដូវបុណ្យភ្ជុំទៀតផងនោះ កាន់តែធ្វើឱ្យមហាជនលោកនឹកដល់ផ្ទះសំបែងនៅឯស្រុកកំណើត។
តាមរយៈគណនីហ្វេសប៊ុកប៉ុន្មានម៉ោងមុននេះ អ្នកនាង ទូច ស្រីល័ក្ខ និងក្រុមការងាររបស់អ្នកនាងបានបញ្ចេញស្នាដៃបទចម្រៀងដែលរៀបរាប់ពីការឃ្លាតឆ្ងាយពីអ្នកមានគុណដើម្បីមកធ្វើការចិញ្ចឹមជីវិត ហើយអ្នកនាងបានសរសេរសារថា៖ «អ្នកដែលធ្វើការឆ្ងាយពីឪពុកម្តាយ សួរថា ពេលពួកគាត់ឈឺម្តងៗ តើគាត់រងាយ៉ាងណា? អ្នកដែលបែកពីក្រុមគ្រួសារនឹងយល់ពីអារម្មណ៍មួយនេះ(ម្ចាស់ជីវិតកូនអ៊ើយ) នេះជាស្នាដៃទី2 របស់ក្រុមកម្សត់ស្រីល័ក្ខសម្រាប់ឱកាសបុណ្យភ្ជុំបិណ្ឌខាងមុខនេះ like&share ជាកម្លាំងចិត្ត»។
ចង់ដឹងថា តើបទចម្រៀងនោះមានអត្ថរស និងអត្ថន័យយ៉ាងណា សូមទស្សនាវីដេអូខាងក្រោម៖
August 21, 2018
អត្តពលិកជប៉ុនទាំង 4រូប ចេញមុខសុំទោសចំពោះការទិញសេវាផ្លូវភេទក្នុង Asian Games
កីឡាករបាល់បោះ 4រូបរបស់ជប៉ុន កាលពីថ្ងៃចន្ទ បានចេញមុខសុំអភ័យទោសចំពោះការធ្វើឱ្យប្រទេសរបស់ខ្លួនទទួលរងនូវ «ភាពអាម៉ាស» ក្រោយពីពួកគេត្រូវបានបណ្តេញចេញពីព្រឹត្តិការណ៍កីឡាអាស៊ី ឬ Asian Games សម្រាប់ការទិញស្ត្រីពេស្យាដើម្បីរួមភេទ។
គណៈកម្មាធិការអូឡាំពិករបស់ជប៉ុន (JOC) ត្រូវបានធ្វើឱ្យធ្លាក់ចូលក្នុងរឿងអាស្រូវ ក្រោយពីកីឡាករទាំង 4រូបនោះ ត្រូវបានគេឃើញស្ថិតក្នុងតំបន់ភ្លើងពណ៌ក្រហមក្នុងរដ្ឋធានីហ្សាការតា របស់ប្រទេសឥណ្ឌូនេស៊ី ទាំងស្ថិតក្នុងសម្លៀកបំពាក់របស់ក្រុមជម្រើសជាតិកាលពីសប្តាហ៍មុន។
ការបណ្តេញកីឡាករ Yuya Nagayoshi, Takuya Hashimoto, Takuma Sato និង Keita Imamura នឹងក្លាយជារឿងដ៏អាម៉ាសមុខសម្រាប់ជប៉ុន ដែលនឹងធ្វើជាម្ចាស់ផ្ទះក្នុងព្រឹត្តិការណ៍អូឡាំពិករយៈពេល 2ឆ្នាំទៀត។ ក្រោយពីកីឡាករទាំង 4រូប បានវិលទៅកាន់ទីក្រុងតូក្យូវិញ កាលពីថ្ងៃចន្ទ Sato បានប្រាប់សន្និសីទសារព័ត៌មានមួយថា៖ «ខ្ញុំពិតជាត្រូវសុំការអភ័យទោសសម្រាប់ទង្វើមិនយកចិត្តទុកដាក់របស់យើង ដែលបានផ្តល់ភាពអាម៉ាសមិនត្រឹមតែដល់អ្នកគាំទ្រកីឡាបាល់បោះប៉ុណ្ណោះទេ ប៉ុន្តែក៏សម្រាប់រាល់ប្រជាជនជប៉ុនផងដែរ»។
ឯ Nagayoshi ដែលស្ថិតក្នុងសម្លៀកបំពាក់អាវធំពណ៌ខ្មៅ និងក្រវាត់ក បានបញ្ជាក់ថា រូបគេ «មិនអាចគិតពីការលេង» កីឡាបាល់បោះម្តងទៀតឡើយ។
លោក Yuko Mitsuya ប្រធានសហព័ន្ធកីឡាបាល់បោះរបស់ជប៉ុន បានបញ្ជាក់ថា ខ្លួននឹងរង់ចាំរបាយការណ៍ពីគណៈកម្មាធិការមេធាវីពិសេសជាមុនសិន មុននឹងដាក់ទណ្ឌកម្មដល់កីឡាករទាំង 4រូបជាផ្លូវការ៕
ប្រភពពី៖ Channel News Asia
August 21, 2018