Category: សង្គម និងសេដ្ឋកិច្ច

ស្ថាប័នធំ2 ផ្ដល់អនុសាសន៍ដល់គ្រឹះស្ថានធនាគារ និងមីក្រូហិរញ្ញវត្ថុជួយដល់អ្នករងគ្រោះទឹកជំនន់
ដើម្បីសម្រួលដល់ការប្រឈមផ្នែកហិរញ្ញវត្ថុដែលអាចកើតមានពីគ្រោះទឹកជំនន់ ក្រសួងសេដ្ឋកិច្ច និងហិរញ្ញវត្ថុ និងធនាគារជាតិនៃកម្ពុជាបានអំពាវនាវ ដោយការផ្ដល់អនុសាសន៍ដល់គ្រឹះស្ថានធនាគារ និងមីក្រូហិរញ្ញវត្ថុឱ្យជួយសម្រួលដល់អតិថិជនដែលរងផលប៉ះពាល់ជាក់ស្ដែងពីគ្រោះទឹកជំនន់។ នេះបើយោងតាមការអំពាវនាវដែលបានធ្វើឡើងតាមរយៈសេចក្តីថ្លែងការណ៍រួមមួយចុះថ្ងៃទី24 ខែសីហា 2018។
ក្នុងសេចក្តីថ្លែងការណ៍នោះបានបញ្ជាក់ថា រាជរដ្ឋាភិបាលបានសង្កេតឃើញថា នៅតាមបណ្តាខេត្តមួយចំនួននៃព្រះរាជាណាចក្រកម្ពុជាបានទទួលរងគ្រោះដោយទឹកជំនន់ដែលអាចធ្វើឱ្យប៉ះពាល់ដល់ហេដ្ឋារចនាសម្ព័ន្ធទូទៅ ជាពិសេសផលរបរកសិកម្មរបស់ប្រជាកសិករ។ ហេតុដូច្នេះហើយទើបក្រសួងសេដ្ឋកិច្ច និងធនាគារជាតិធ្វើការអំពាវនាវ និងលើកទឹកចិត្តចំពោះគ្រឹះស្ថានធនាគារ និងមីក្រូហិរញ្ញវត្ថុឱ្យជួយសម្រួលដល់ប្រជាកសិករនូវចំណុចមួយចំនួនដូចខាងក្រោម៖
1-បន្ដផ្ដល់ឥណទានដោយប្រុងប្រយ័ត្ន និងមានយន្តការទន់ភ្លន់ចំពោះអតិថិជនដែលរងផលប៉ះពាល់ពីគ្រោះទឹកជំនន់ជាក់ស្ដែង ដើម្បីរក្សាស្ថិរភាព និងភាពរឹងមាំរបស់វិស័យហិរញ្ញវត្ថុ។
2-បន្ដពិនិត្យ និងវាយតម្លៃលទ្ធភាពសងត្រឡប់របស់ប្រជាកសិករដែលបានរងផលប៉ះពាល់ពីគ្រោះទឹកជំនន់សម្រាប់ជាមូលដ្ឋានក្នុងការបន្ធូបន្ថយរយៈពេលសង បន្ថយអត្រាការប្រាក់ ឬមិនយកការប្រាក់ក្នុងរយៈពេលណាមួយ និងមិនត្រូវរឹបអូសទ្រព្យសម្បត្តិរបស់ប្រជាកសិករ ព្រមទាំងផ្ដល់ដំណោះស្រាយសមស្របផ្សេង។
3-បន្ដតាមដានស្ថានភាព និងផលប៉ះពាល់នៃគ្រោះទឹកជំនន់លើប្រជាកសិករ និងផ្ដល់ការគាំទ្រចាំបាច់ស្របតាមកាលៈទេសៈជាក់ស្ដែង។
យោងសេចក្តីថ្លែងការណ៍នេះក្រសួងសេដ្ឋកិច្ច និងធនាគារជាតិនៃកម្ពុជាសង្ឃឹម និងជឿជាក់ថាគ្រឹះស្ថានធនាគារ និងមីក្រូហិរញ្ញវត្ថុ អាជ្ញាធរមូលដ្ឋាន និងដៃគូពាក់ព័ន្ធទាំងអស់នឹងចូលរួមសហការ ក្នុងការជួយសម្រាលទុក្ខលំបាក និងសម្រាលសម្ពាធហិរញ្ញវត្ថុរបស់ប្រជាកសិករដែលបានទទួលរងផលប៉ះពាល់ពីគ្រោះទឹកជំនន់ជាក់ស្តែង៕
August 28, 2018
ទំនិញថៃគាំទ្រពីកម្ពុជា និងភ្ញៀវទេសចរ ជំរុញឱ្យមានពិព័រណ៍ពាណិជ្ជកម្មថៃនៅខេត្តសៀមរាប
ស្របពេលទំនិញថៃដែលនាំចូលមកប្រទេសកម្ពុជាទទួលបានគាំទ្រពីអតិថិជនម្ចាស់ស្រុកយ៉ាងធំធេង និងថែមទាំងមានតម្រូវការក្នុងទីផ្សារទេសចរណ៍ផងដែរនោះ ស្ថានតំណាងពាណិជ្ជកម្មប្រចាំស្ថានឯកអគ្គរាជទូតថៃនៅរាជធានីភ្នំពេញ បានរៀបចំពិព័រណ៍ពាណិជ្ជកម្មថៃ Mini Thailand Week 2018នៅខេត្តសៀមរាបចាប់ពីថ្ងៃទី30 ខែសីហា ដល់ថ្ងៃទី2 ខែកញ្ញា ឆ្នាំ2018 នៅផ្សារ ផាមកុងតឺន័រ ជិតអង្គរឃ្យូងយូ ចាប់ពីម៉ោង10ព្រឹក ដល់ម៉ោង10យប់ ដែលនៅក្នុងពិព័រណ៍នេះនឹងមានការដាក់បង្ហាញ ទំនិញថៃច្រើនប្រភេទជាទំនិញមានគុណភាពល្អ និងស្វែងរកតំណាងចែកចាយនៅកម្ពុជាផងដែរ។
លោក ជីរ៉ាវុឍ សុវណ្ណាអាត តំណាងអគ្គទីប្រឹក្សាពាណិជ្ជកម្ម ប្រចាំស្ថានឯកអគ្គរាជទូតថៃបានថ្លែងក្នុងសន្និសីទកាសែតថា គោលបំណងនៃការរៀបចំពិព័រណ៍នៅពេលនេះ គឺដើម្បីផ្សព្វផ្សាយផលិតផលរបស់ថៃ ដែលជាផលិតផលគុណភាពល្អ តម្លៃសមរម្យ និងដើម្បីជាការអរគុណដល់អតិថិជនដែលគាំទ្រទំនិញថៃឱ្យមានឱកាសទិញទំនិញពីម្ចាស់រោងចក្រដោយផ្ទាល់ក្នុងតម្លៃសមរម្យ។
ទំនិញដែលលក់ក្នុងពិព័រណ៍នេះភាគច្រើន គឺមិនទាន់មានលក់នៅក្នុងប្រទេសកម្ពុជានោះទេ គឺជាទំនិញថ្មី ដែលចេញពីរោងចក្រដោយផ្ទាល់ និងមានទំនិញតិចតួចប៉ុណ្ណោះដែលកំពុងលក់លើទីផ្សារកម្ពុជា។
លោកបន្តថា ម្ចាស់ទំនិញទាំងអស់ក្នុងពិព័រណ៍នេះក៏ចង់ស្វែងរកដៃគូ និងតំណាងចែកចាយនៅប្រទេសកម្ពុជាផងដែរ ហើយម្យ៉ាងទៀតពួកគេចង់ផ្សព្វផ្សាយដល់អតិថិជននូវទំនិញថ្មីៗដែលមានគុណភាពល្អ ហើយទំនិញដែលមិនមានគុណភាពនឹងមិនត្រូវបានអនុញ្ញាតឱ្យលក់លើទីផ្សារកម្ពុជានោះទេ ដូច្នេះទំនិញថៃដែលនាំចូលមកកម្ពុជាត្រូវតែមានគុណភាពល្អដូចគ្នានឹងទំនិញដែលនាំចេញទៅបណ្តាប្រទេសផ្សេងៗទៀតដែរ។
សូមបញ្ជាក់ថា ការរៀបចំពិធីតាំងពិព័រណ៍លើកនេះ មានក្រុមហ៊ុនចូលរួមទាំងអស់ចំនួន 68ក្រុមហ៊ុន មានស្តង់សរុបចំនួន 87ស្តង់ ក្នុងនោះក្រុមហ៊ុនទាំងនោះនឹងនាំយកទំនិញជាច្រើនប្រភេទមកដាក់បង្ហាញ និងលក់ដូចជា ចំណីអាហារ និងភេសជ្ជៈ សម្លៀកបំពាក់ និងគ្រឿងវាយនភណ្ឌ គ្រឿងសម្អាង និងទំនិញសុខភាព សម្ផស្ស សម្ភារប្រើប្រាស់ក្នុងផ្ទះ និងសម្ភារផ្ទះបាយ វត្ថុអនុស្សាវរីយ៍ និងតុបតែងផ្ទះ សម្ភារធ្វើពីស្បែក និងស្បែកជើង សម្ភារតុបតែងផ្ទះ ទំនិញ OTOP របស់ប្រទេសថៃ និងទំនិញផ្សេងៗជាច្រើនទៀត៕
August 28, 2018
ក្រសួងបញ្ចេញទឹកប្រាក់ 2លានដុល្លារអភិវឌ្ឍវិស័យដំឡូងមីកម្ពុជា
ដើម្បីអភិវឌ្ឍវិស័យដំឡូងមីនៅកម្ពុជាឱ្យកាន់តែមានភាពរីកចម្រើនឡើង ក្រសួងពាណិជ្ជកម្មបានសហការជាមួយក្រុមហ៊ុន Green Leader Holding Group និងអង្គការ UNDP បញ្ចេញទឹកប្រាក់សរុបចំនួន 2លានដុល្លារ សម្រាប់ការអភិវឌ្ឍរយៈពេល 3ឆ្នាំ 5ខែ គិតចាប់ពីខែសីហា ឆ្នាំ2018 ដល់ឆ្នាំ2021។
ទឹកប្រាក់ទាំងនេះរួមមាន 1.2លានដុល្លារជាទឹកប្រាក់បញ្ចេញដោយក្រសួងពាណិជ្ជកម្មកម្ពុជាផ្ទាល់ ទឹកប្រាក់ចំនួន 0.5លានដុល្លារបញ្ចេញពីក្រុមហ៊ុន Green Leader Holding Group និង0.3 លានដុល្លារពីអង្គការ UNDP។
យោងតាមសេចក្តីប្រកាសរួមរបស់ស្ថាប័នទាំង3 ខាងលើបានដឹងថា ការអភិវឌ្ឍវិស័យដំឡូងមី គឺដើម្បីធ្វើឱ្យក្លាយជាកម្លាំងចលករជួយដល់កំណើនសេដ្ឋកិច្ច និងកាត់បន្ថយភាពក្រីក្រនៅកម្ពុជា។ ដំឡូងមី គឺដំណាំជាកសិ-ឧស្សាហកម្មដែលមានសក្តានុពល និងមានតម្លៃ ដោយសារដំណាំនេះងាយស្រួលក្នុងការដាំដុះនៅក្នុងដីមិនសូវមានជីវជាតិ និងដាំដុះក្នុងលក្ខខណ្ឌអាកាសធាតុមិនអំណោយផល តម្រូវការកម្លាំងពលកម្មតិច និងមិនតម្រូវឱ្យមានដើមទុនច្រើនឡើយសម្រាប់កសិករខ្នាតតូចនៅកម្ពុជា ខណៈដែលវាមានផលិតភាពខ្ពស់ដែលអាចធ្វើឱ្យកាន់តែមានភាពប្រកួតប្រជែង សម្រាប់ចំណីអាហារមនុស្ស ចំណីសត្វ រួមជាមួយដំណាំឧស្សាហកម្មច្រើនប្រភេទទៀតដែលមានដូចជាដំណាំពោតជាដើម។
ចំពោះលទ្ធផល គេរំពឹងថា កម្ពុជានឹងបង្កើនការរីកចម្រើនរបស់កសិករផលិតដំឡូងមីខ្នាតតូច តាមរយៈការបង្កើនផលចំណេញឱ្យបានច្រើនដោយតភ្ជាប់ទៅជាកសិ-ពាណិជ្ជកម្មទីផ្សារ៕
August 28, 2018
ខ្វាន់ ឧស្សាមៈនី កំពុងបង្ហាញទំនាក់ទំនងស្នេហ៍ថ្មីជាមួយព្រះអង្គម្ចាស់រូបសង្ហាវ័យក្មេង
តាមរយៈសារព័ត៌មាន Tvpool ដែលទើបតែចេញផ្សាយមុននេះបន្ដិចបានឱ្យដឹងថា តារាឯកស្រីល្បីឈ្មោះប្រចាំស្ថានីយទូរទស្សន៍ប៉ុស្ដិ៍លេខ7 គឺនាង ខ្វាន់ ឧស្សាមៈនី ដែលទើបតែបែកបាក់ស្នេហាចែកផ្លូវគ្នាជាមួយតារាសម្ដែងប្រុស ហ្កហ្វ ភីតឆាយ៉ា និតិផៃសាកុន កាលពីពេលថ្មីៗនោះ នាងបានបង្ហាញទំនាក់ទំនងស្នេហ៍ថ្មីជាមួយទាយាទម្ចាស់សណ្ឋាគារលំដាប់ខ្ពស់ Renaissance Bangkok Ratchaprasong Hotel គឺ ព្រះអង្គម្ចាស់រូបសង្ហាវ័យក្មេង ព្រះនាម សៈរុស័ក្ដ ផានុផាន់ ( ศรุศักดิ์ ภาณุพันธ์ ) ឬនាមហៅក្រៅ ផេត គ្រីត។
បើតាមការបញ្ជាក់របស់សារព័ត៌មានដដែលនេះបានបន្ថែមថា ព្រះអង្គម្ចាស់វ័យក្មេងរូបនេះធ្លាប់ជាអតីតគូស្នេហ៍របស់បវរកញ្ញា គ្រីន អាប់សៈដាផន តែបានបែកគ្នាអស់រយៈពេលយូរក្រែលដែរមកហើយ និងបានចាប់អារម្មណ៍លើតារាឯកស្រី ខ្វាន់ ឧស្សាមៈនី ជាយូរមកហើយក្នុងនាមជាអ្នកគាំទ្រ។ តែនៅពេលនេះ តារាស្រី ខ្វាន់ ឧស្សាមៈនី បានបើកភ្លើងខៀវឱ្យព្រះអង្គម្ចាស់យ៉ាងពេញទំហឹងតែម្ដង។
សូមទស្សនារូបភាព គូស្នេហ៍ថ្មីរបស់តារាស្រី ខ្វាន់ ឧស្សាមៈនី ខាងក្រោមនេះ៖
August 28, 2018
នុន វរៈនុត តាំងចិត្តផ្គាប់ផ្គន់ម្ដាយក្មេក និងចងចិត្តស្វាមី
តាមរយៈសារព័ត៌មានថៃ Tvpool ដែលទើបចេញផ្សាយនាពេលថ្មីៗនេះ បានឱ្យដឹងថា នៅពេលនេះតំណែងកូនប្រសារស្រីដែលល្អបំផុត បានធ្លាក់មកលើតារាស្រីមុខស្រទន់ នុន វរៈនុត ហើយ!។ ព្រោះថា ថ្មីៗនេះនាងបានបង្ហាញរូបភាពផ្អែមល្ហែម និងស្និទ្ធស្នាលខ្លាំងបំផុតជាមួយក្រុមគ្រួសារខាងស្វាមី ហើយជាពិសេសទៀតនេះគឺ កាយវិការផ្គាប់ផ្គន់យកចិត្តយកថ្លើមម្ដាយក្មេកយ៉ាងខ្លាំងទៀតផង។ រឿងនេះពិតជាមិនធម្មតាឡើយ ដោយសារតែកន្លងមកតារាឯកស្រីល្បីឈ្មោះរូបនេះ មិនដែលបង្ហាញពីភាពល្អូកល្អិនដល់ថ្នាក់ហ្នឹងឡើយ ឬមួយក៏នាងមានគម្រោងការពិសេសអ្វីម៉្យាងទេដឹង?
បើតាមប្រភពមិត្តភ័ក្ដិជិតស្និទ្ធនឹងលោក តត ពិទិនុន ដែលជាគូស្នេហ៍ នុន វរៈនុត បានបង្ហើបឱ្យដឹងថា អ្នកទាំងពីរបានបណ្ដើរគ្នាចូលរួមក្នុងកម្មវិធីអាពាហ៍ពិពាហ៍មិត្តភ័ក្ដិជាច្រើនគូមកហើយ តែពុំធ្លាប់ប្រាប់ និងគិតពីថ្ងៃរៀបការរបស់ពួកគេឡើយ។ ទំនាក់ទំនង និងសម្ព័ន្ធភាពរបស់ពួកគេស្អិតល្មួតខ្លាំងណាស់ ដល់ថ្នាក់នៅថ្ងៃខួបកំណើតរបស់ម្ដាយលោក តត ក៏គេបានឃើញអ្នកនាង នុន វរៈនុត ទៅចូលរួម និងលើកអាហារជូនម្ដាយក្មេកផងដែរ។
គួរបញ្ជាក់ដែរថា រូបភាពដែលបានបង្ហោះនៅលើបណ្ដាញសង្គមអ៊ីនស្ដាក្រាមរបស់ នុន វរៈនុត បានបញ្ជាក់បានថា នាងពិតជាមានទំនាក់ទំនងល្អជាមួយក្រុមគ្រួសាររបស់ស្វាមីមែន មិនតែប៉ុណ្ណោះគេមើលឃើញថា នាងពិតជាយកចិត្តទុកដាក់ខ្លាំងចំពោះក្រុមគ្រួសារស្វាមី និងស្វាមីផ្ទាល់មែនទែន៕
សូមអញ្ជើញទស្សនារូបភាពខាងក្រោមនេះ៖
August 28, 2018
Son បន្តមានសង្ឃឹមថា កូរ៉េនឹងទៅជួបវៀតណាម ក្នុងវគ្គ1/2នៃ Asian Games
ខ្សែប្រយុទ្ធ Son Heung-min របស់ក្លិប Tottenham បានជួយឱ្យក្រុមបាល់ទាត់ជម្រើសជាតិកូរ៉េខាងត្បូង ឈានទៅជួបក្រុមបាល់ទាត់ជម្រើសជាតិវៀតណាម ក្នុងវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ Asian Gamesក្រោយពីក្រុមម្ចាស់ការពារតំណែងជើងឯកមួយនេះ បានផ្តួលក្រុមជម្រើសជាតិអ៊ូសបេគីស្ថាន ក្នុងលទ្ធផល 4-3 នៅនាទីបន្ថែម 15នាទី 2ដង កាលពីថ្ងៃចន្ទ។
ដោយឡែក ក្រុមអាយុក្រោម 23ឆ្នាំរបស់វៀតណាម បានបន្តបង្កើតការភ្ញាក់ផ្អើលក្នុងព្រឹត្តិការណ៍កីឡាប្រចាំទ្វីបមួយនេះ តាមរយៈការផ្តួលក្រុមជម្រើសជាតិស៊ីរី នៅនាទីបន្ថែម 15នាទី 2ដងដូចគ្នា ក្នុងលទ្ធផល 1-។ ក្រុមទាំង2 នឹងត្រូវជួបគ្នាក្នុងវគ្គ1/2ផ្តាច់ព្រ័ត្រ នៅថ្ងៃពុធ ទី29 ខែសីហា ដើម្បីប្រជែងយកកៅអីទៅកាន់វគ្គផ្តាច់ព្រ័ត្រ។
Son ដែលជាតារាឆ្នើមក្នុងព្រឹត្តិការណ៍ World Cup កំពុងតែស្ថិតក្នុងប្រទេសឥណ្ឌូនេស៊ី ដើម្បីប្រជែងយកមេដាយមាស ដែលនឹងធ្វើឱ្យរូបគេរួចផុតពីការបំពេញកាតព្វកិច្ចយោធា ហើយរូបគេបានជួយឱ្យមិត្តរួមក្រុមរបស់គេ Hwang Ui-jo រកបាន 2គ្រាប់ នៅមុនពេលកីឡាករ Hwang Hee-chan បានស៊ុតបាល់ប៉េណាល់ទី 1គ្រាប់ទៀតដើម្បីជួយឱ្យកូរ៉េខាងត្បូងបានឆ្លងទៅវគ្គបន្ត។
ប្រធាននៃក្រុមជម្រើសជាតិកូរ៉េខាងត្បូងរូបនេះ បានប្រកាសថា រូបគេត្រូវបានគេរំពឹងទុកថានឹងស៊ុតបាល់ប៉េណាល់ទីមួយគ្រាប់នោះ ប៉ុន្តែកីឡាករបម្រុង Hwang Hee-chan បានទាមទារបាល់នោះ ហើយ Son មិនហ៊ានមើលការស៊ុតបាល់នោះឡើយ។
ខ្សែប្រយុទ្ធរូបនេះបានប្រាប់អ្នកយកព័ត៌មានថា៖ «Hee-chan បាននិយាយថា រូបគេចង់ស៊ុតបាល់ប៉េណាល់ទី និងមានការជឿជាក់។ ខ្ញុំក៏បានប្រាប់រូបគេឱ្យស៊ុតបាល់ពិន័យនោះ។ ខ្ញុំមិនបានមើលពីកន្លែងរូបគេបានដាក់បាល់ឡើយ ប៉ុន្តែបន្ទាប់ពីនោះមក ខ្ញុំពិតជាមានមោទនភាពចំពោះរូបគេមែន»៕
ប្រភពពី៖ Asian Games
August 28, 2018
លោក Mourinho ទាមទារឱ្យមានការគោរពគ្នា ក្រោយពីចាញ់ក្រោមស្នាដៃក្រុម Spurs
លោក Jose Mourinho បានទាមទារឱ្យមានការ «គោរព» ចំពោះការឈ្នះពានរង្វាន់ក្របខ័ណ្ឌ Premier League ទាំង3 របស់លោក ក្រោយពីការរងបរាជ័យក្នុងលទ្ធផល 3-0 ក្រោមស្នាដៃក្រុម Tottenham កាលពីថ្ងៃចន្ទ។
ក្រុម Tottenham បាននិយាយពីការបង្ហាញទម្រង់លេងរបស់ក្រុម Man United តាមរយៈការបញ្ជាក់ថា ពួកគេគួរតែអាចមានគ្រាប់បាល់នាំមុខ 3-០ តាំងពីតង់ទី1 និងបានបញ្ជាក់ថា ចៅក្រមដ៏ល្អបំផុត គឺអ្នកគាំទ្រដែលទះដៃសាទរក្នុងពេលបញ្ចប់ការប្រកួត។ ប៉ុន្តែ អ្នកគាំទ្រភាគច្រើន ហាក់មិនបានសម្តែងនូវការរីករាយឡើយ នៅមុនពេលបញ្ចប់ការប្រកួត។
ពេលចោទសួរទាក់ទងនឹងការប្រកួតនេះ លោក Mourinho ស្ទើរតែទប់កំហឹងមិនបានទៅហើយ។ គ្រូបង្វឹករូបនេះបានឱ្យដឹងថា៖ «ខ្ញុំនឹងធ្វើសកម្មភាពដូចគ្នា ក្រោយពីការចាញ់ 3-០ ខ្ញុំនឹងចំណាយពេល 2ម៉ោងពីទីនេះ នៅចំកណ្តាលទីក្រុង Manchester ពីព្រោះវាជាកន្លែងដែលខ្ញុំរស់នៅ ហើយខ្ញុំដឹងថា បន្ទាប់ពីការប្រកួត វានឹងចំណាយពេល 2ម៉ោង ហេតុនេះ ខ្ញុំនឹងចំណាយពេល 2ម៉ោងដូចគ្នា ខ្ញុំនឹងរក្សាការព្យាយាមនេះជានិច្ច»។
ការរងបរាជ័យ 2លើកជាប់ៗគ្នា នឹងផ្តល់សម្ពាធបន្ថែមទៀតលើគ្រូបង្វឹកសញ្ជាតិព័រទុយហ្គាល់រូបនេះ ខណៈដែល Man United បច្ចុប្បន្នកំពុងដេញតាមពីក្រោយក្រុម Spurs, Liverpool និង Chelsea ដល់ទៅ 6ពិន្ទុ និងដេញតាមពីក្រោយក្រុមម្ចាស់ការពារតំណែងជើងឯក Manchester City 4ពិន្ទុ ក្រោយពីការប្រកួត 3លើកក្នុងរដូវកាលថ្មីនេះ។
ក្នុងសន្និសីទសារព័ត៌មានមួយបន្ទាប់ពីការប្រកួត លោក Mourinho បាននិយាយទាំងខឹងសម្បាទៅកាន់អ្នកយកព័ត៌មានថា៖ «ខ្ញុំតែម្នាក់ឯងបានឈ្នះពានក្របខ័ណ្ឌ Premier League ច្រើនជាងអ្នកចាត់ការទូទៅ 19នាក់ផ្សេងទៀត។ ខ្ញុំបានឈ្នះ 3លើក តែពួកគេទាំងអស់គ្នាឈ្នះម្នាក់ៗតែ ២លើកប៉ុណ្ណោះ។ សូមគោរពផងគ្នា»៕
ប្រភពពី៖ The Guardian
August 28, 2018
តារាស្រី ឈុំភូ អារីយ៉ា ដឹកនាំក្រុមតារាថៃល្បីៗទៅបង្ហាញម៉ូដនៅទីក្រុងប៉ារីស
តាមរយៈសារព័ត៌មាន Teenee របស់ថៃទើបចេញផ្សាយមុននេះបន្ដិចបានឱ្យដឹងថា នេះអាចនិយាយបានថា ជាការងារលំដាប់ថ្នាក់អន្ដរជាតិដែលកំពូលតារាសម្ដែងប្រចាំប្រទេសថៃបានចូលរួមជាច្រើននាក់ នៅក្នុងកម្មវិធី L’Officiel Fashion Destination Paris ដោយមានការអញ្ជើញ និងស្វាគមន៍ដោយទស្សនាវដ្ដីបង្ហាញម៉ូដដ៏ល្បីប្រចាំទីក្រុងប៉ារីស ប្រទេសបារាំងគឺ L’Officiel និងដឹកនាំក្រុមដោយតារាស្រី ឈុំភូ អារីយ៉ា ដែលជាតារាតំណាងរបស់ទស្សនាវដ្ដី L’Officiel Thailand ។
ការអញ្ជើញកំពូលតារាសម្ដែងថៃចូលរួមនៅក្នុងកម្មវិធីលំដាប់អន្តរជាតិមួយនេះ គេសង្កេតឃើញមានតារាសិល្បៈល្បីៗដូចជា នាង ទែវ ណៈថៈផន , នាង មីន សាលីតា , នាង ផេត រីហ្សៀហ្កូត , នាយ កត ជិរ៉ាយុ , នាង ផ្លយ ត្រ៊ីឆៈដា , នាយ កហ្វ , នាង យ៉ាយ៉ា និងតារាល្បីៗជាច្រើនដួងទៀត។ នៅក្នុងកម្មវិធីលំដាប់ខ្ពស់នេះ តារាស្រី ឈុំភូ អារីយ៉ា ក៏បានចូលរួមបង្ហាញម៉ូដ និងបង្ហាញការសម្ដែងពិសេសជាមួយតារាដទៃទៀតផងដែរ។
ចង់ដឹងថា ក្នុងកម្មវិធីលំដាប់ពិភពលោកមួយនេះ តើតារាថៃទាំងនោះមានឈុតបង្ហាញម៉ូដប្លែកៗយ៉ាងណាខ្លះនោះ សូមទស្សនារូបភាពទាំងអស់ខាងក្រោមនេះ៖
August 28, 2018
ស្ថាប័នចំនួន2 រួមគ្នាអភិវឌ្ឍវិស័យសូត្រ
រាជបណ្ឌិត្យសភាកម្ពុជា ឬRAC (the Royal Academy of Cambodia ) និងសាកលវិទ្យាល័យភូមិន្ទភ្នំពេញ ឬRUPP(Royal Univercity ofPhnomPenh)បាន និងកំពុងធ្វើកិច្ចសហប្រតិបត្តិការដាច់ដោយឡែកពីគ្នា តែមានទិសដៅក្នុងការអភិវឌ្ឍវិស័យសូត្រក្នុងស្រុកតែមួយ ដើម្បីពង្រីកចង្វាក់ផលិតកម្ម និងជំរុញការធ្វើពាណិជ្ជកម្មសំដៅលើកកម្ពស់វិស័យឧស្សាហកម្មសូត្រចូលរួមក្នុងការអភិវឌ្ឍសេដ្ឋកិច្ច។
រាជបណ្ឌិត្យសភាកម្ពុជា (RAC)និងសាកលវិទ្យាល័យកសិកម្មចិនខាងត្បូង (SCAU) The South China Agricultural University នឹងចាប់ផ្តើមសហការក្នុងការស្រាវជ្រាវ និងបណ្តុះបណ្តាលកសិករ ដើម្បីបង្កើនវិស័យសិប្បកម្មក្នុងតំបន់ ដែលជាដំបូងគោលដៅនៃកិច្ចសហការនេះគឺដើម្បីព្រាងឯកសារមួយដែលមានព័ត៌មានទូលំទូលាយអំពីឧស្សាហកម្មសរីរាង្គសូត្រក្នុងស្រុក។
បណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានមានប្រសាសន៍ថា រាជបណ្ឌិត្យសភាកម្ពុជានឹងធ្វើការជាមួយមជ្ឈមណ្ឌលបណ្តុះបណ្តាលសេវាកម្មចិញ្ចឹមសត្វសម្រាប់ភូមិភាគអាស៊ីប៉ាស៊ីហ្វិករបស់ RSTCAP (Regional Sericulture Training Centre for Asia-Pacific)។ “គោលដៅរបស់យើង គឺប្រើប្រាស់បច្ចេកវិទ្យានិងវិទ្យាសាស្ត្រកែលម្អវិធីសាស្ត្របុរាណ ដើម្បីផលិតសូត្រ នឹងរៀបចំចងក្រងឯកសារស្រាវជ្រាវនានាអំពីផលិតកម្មសូត្រ សម្រាប់ផ្តល់ជាធាតុចូលដល់ក្រសួងស្ថាប័នដែលពាក់ព័ន្ធ អ្នកសិក្សា ជាពិសេសប្រជាកសិករខ្មែរទូទៅ‟។
បណ្ឌិតសភាចារ្យ សុខ ទូច
លោកបណ្ឌិតបានឱ្យដឹងថា៖ “យើងនឹងបញ្ចូលទ្រឹស្តី និងការអនុវត្តក្នុងឯកសារមួយដែលនឹងត្រូវប្រើប្រាស់ដោយមន្ត្រីរដ្ឋាភិបាល និងកសិករ‟។ នៅលើផ្ទៃដីប្រហែល1,000ហិកតានៅក្នុងឧទ្យានតេជោសែនឫស្សីត្រពាំង ខេត្តព្រះវិហារនឹងត្រូវបានបម្រុងទុកសម្រាប់ RSTCAP-SCAU ដើម្បីធ្វើការស្រាវជ្រាវ និងធ្វើសិក្ខាសាលាសម្រាប់កសិករកម្ពុជា។ យើងក៏នឹងផ្តល់ការបណ្តុះបណ្តាល និងការគាំទ្រផ្នែកបច្ចេកទេសដល់កសិករ ហើយយើងនឹងជួយឱ្យពួកគេរកទីផ្សារសម្រាប់ផលិតផលរបស់ពួកគេ ព្រោះនេះ មិនមែនត្រឹមតែផ្តល់នូវអត្ថប្រយោជន៍ជូនដល់ស្ថាប័ន និងកសិករទូទៅប៉ុណ្ណោះទេ តែក៏ដើម្បីប្រជាពលរដ្ឋដែលរស់នៅតំបន់ជុំវិញកសិដ្ឋានចិញ្ចឹមកូននាងផងដែរ។
សាស្ត្រាចារ្យ លីវ ជី ភីង (Dr. Liu Ji Ping)នាយកស្តីទីនៃមជ្ឈមណ្ឌល RSTCAP បានថ្លែងថាការកាត់បន្ថយភាពក្រីក្រតាមរយៈការធ្វើចម្ការដង្កូវនាង។ ឧស្សាហកម្មសូត្រដើរតួនាទីយ៉ាងសកម្មក្នុងការអភិវឌ្ឍសេដ្ឋកិច្ចកម្ពុជា។ “សូត្រដើមមានតម្លៃសេដ្ឋកិច្ចខ្ពស់ ហើយមានន័យថា ប្រាក់ចំណូលបន្ថែមសម្រាប់សហគមន៍ជនក្រីក្រជាច្រើន”។
លោកមានប្រសាសន៍បន្ថែមថា សូត្រលើកកម្ពស់ការអភិវឌ្ឍរួមនៃវិស័យកសិកម្មក៏ដូចជាឧស្សាហកម្មធុនស្រាលក្នុងស្រុក និងជួយពង្រីកពាណិជ្ជកម្ម។ ប្រទេសកម្ពុជា គឺជាប្រទេសដែលមានប្រពៃណីមួយដែលមានដីច្រើន និងមានកម្លាំងពលកម្មដ៏ធំ ជំហានដំបូង គឺអប់រំ និងបណ្តុះបណ្តាលកម្លាំងពលកម្ម។ “ក្រោមកិច្ចសហប្រតិបត្តិការនេះ យើងនឹងផ្តល់ការបណ្តុះបណ្តាល ក៏ដូចជាកសាងកសិដ្ឋានធ្វើការផ្គត់ផ្គង់ដង្កូវនាង ដើមម៉ៃស្លុង និងគាំទ្រដល់ទិដ្ឋភាពផ្សេងទៀតនៃដំណើរការ” ។
ប្រធានរាជបណ្ឌិត្យសភាកម្ពុជា ក៏បានអះអាងដែរថា៖ “រាជបណ្ឌិត្យសភាកម្ពុជា សុខចិត្តខាតបង់ ប្រសិនបើពេលសិក្សាស្រាវជ្រាវដំណើរការមិនល្អ តែមិនអាចឱ្យប្រជាពលរដ្ឋ ត្រូវបរាជ័យលើវិស័យផលិតកម្មសូត្រនេះទេ”។ សរសៃសូត្រ មានសារៈសំខាន់ និងបានចាក់ឫសយ៉ាងជ្រៅនៅក្នុងប្រពៃណីទំនៀមទម្លាប់ខ្មែរ។ សរសៃសូត្របានក្លាយជាចំណែកមួយក្នុងការលើកតម្លៃសម្លៀកបំពាក់ប្រពៃណីរបស់ខ្មែរ”។
លោកបណ្ឌិតមានប្រសាសន៍ថា “នៅពេលគេនិយាយអំពីសរសៃសូត្រ គឺធ្វើឱ្យយើងនឹកឃើញភ្លាមពីសម្លៀកបំពាក់ដែលផលិតពីសរសៃសូត្រហើយប្រភេទសម្លៀកបំពាក់ធ្វើពីសរសៃសូត្រ ត្រូវបានចាត់ទុកជាប្រភេទសម្លៀកបំពាក់ប្រណីត និងមានតម្លៃថ្លៃ”។
ដោយឡែកមជ្ឈមណ្ឌលស្រាវជ្រាវដង្កូវនាងផលិតសូត្រខ្មែរដំបូងនៅកម្ពុជា គ្រោងនឹងបញ្ចប់ជាស្ថាពរក្នុងពេលឆាប់ៗនេះ។ គម្រោងនេះ បានសាងសង់នៅក្នុងបរិវេណសាកលវិទ្យាល័យភូមិន្ទភ្នំពេញ ក្រោមជំនួយរបស់រដ្ឋាភិបាលជប៉ុនប្រមាណ 9ម៉ឺនដុល្លារ ដែលបច្ចុប្បន្នបានសាងសង់រួចប្រមាណជា 85%ហើយ។
លោកបណ្ឌិត ម៉ី កល្យាណ ជាអ្នកដឹកនាំគម្រោង និងជាប្រធានក្រុមប្រឹក្សាភិបាលសាកលវិទ្យាល័យ-ភូមិន្ទភ្នំពេញ លើកឡើងថា ការបង្កើតមជ្ឈមណ្ឌលស្រាវជ្រាវនេះនឹងជួយលើកស្ទួយជីវភាពកសិករ ជាពិសេសស្ត្រីខ្មែរដែលកំពុងប្រកបរបរត្បាញសូត្រ ម្យ៉ាងទៀតដោយសារប្រទេសធំៗធ្លាប់ផលិតសូត្រ ដូចជា ជប៉ុន កូរ៉េ ចិន និង ថៃ ជាដើម គេលែងធ្វើ ហើយងាកទៅរកផលិតកម្មផ្សេងដែលចំណេញច្រើនជាងព្រោះតម្លៃពលកម្មខ្ពស់។ វាជាឱកាសសម្រាប់ខ្មែរយើង ដែលត្រូវតែធ្វើឧស្សាហកម្មនេះឱ្យបាន ព្រោះយើងនៅមានតម្លៃពលកម្មទាប។
លោកបណ្ឌិត ម៉ី កល្យាណ
លោកបណ្ឌិត ថ្លែងប្រាប់អ្នកសារព័ត៌មានថាគម្រោងសាងសង់បានទទួលជំនួយធំពីរដ្ឋាភិបាលជប៉ុន ប៉ុន្តែក្នុងនោះក៏មានការចំណាយពីសាកលវិទ្យាល័យផងដែរ។ យើងរំពឹងថា មជ្ឈមណ្ឌលនេះនឹងមានចំណែកចូលរួមអភិវឌ្ឍសហគមន៍មូលដ្ឋានព្រោះយើងមានធនធានមនុស្សគ្រប់គ្រាន់សម្រាប់ការងារក្នុងខ្សែចង្វាក់ផលិតកម្មសូត្រនេះ យើងមានផ្ទៃដីដាំដើមមនប្រមាណ 11ហិកតានៅខេត្តកំពង់ស្ពឺ និងមានរោងសម្រាប់ចិញ្ចឹមដង្កូវនាងដែលទើបចាប់ផ្តើមដំណើរការ តែអ្វីដែលសំខាន់ទៀតនោះ គឺយើងត្រូវការការចូលរួមពីសហគមន៍មូលដ្ឋានផងដែរ។
សូមបញ្ជាក់ថា វិស័យសូត្ររបស់កម្ពុជាស្ទើរតែផុតជីវិតទៅហើយ ដោយសារតែវាត្រូវបានគេទុកចោលមិនអភិវឌ្ឍ ហើយមានតែកសិករតិចតួចប៉ុណ្ណោះដែលនៅតែបន្តកិច្ចការដាំដុះមកសម្រាប់សិប្បកម្មជាលក្ខណៈគ្រួសារ។ ជាមួយគ្នានេះកម្ពុជាបាននាំចូលសូត្រយ៉ាងហោចណាស់ 400តោនក្នុងមួយឆ្នាំដែលមានតម្លៃប្រមាណ 30លានដុល្លារ៕
August 27, 2018
អស្ចារ្យ !! ដើរព្រៃនិងទស្សនាពពកវិលនៅលើភ្នំ « ផាហ៊ិនគូប»
« ផាហ៊ិនគូប» ជាឈ្មោះរមណីយដ្ឋានធម្មជាតិមួយកន្លែងនៃប្រទេសថៃដែលមានឈ្មោះល្បី ក្នុងការទស្សនាពពកវិលពីលើកំពូលភ្នំចខ្ពស់កប់អាកាស។ កន្លែងនៅមានទីតាំងស្ថិតនៅក្នុង ភូមិ ឆៈម៉ាំ ស្រុកមៈខាម ខេត្តចាន់ថៈប៊ុរី ដែលជាទីឋានដ៏ប្រណិត និងគួរឱ្យទាក់ទាញបំផុតសម្រាប់អ្នកនិយមដើរព្រៃ អ្នកស្រាវជ្រាវរុក្ខជាតិឱសថ អ្នករ៉ុកចូលក្នុងភ្នំ ផលិតករភាពយន្ដ និងកំពូលអ្នកប្រមាញ់រូបភាពក្នុងព្រៃ …ជាដើម។
រមណីយដ្ឋានធម្មជាតិមួយនេះ ត្រូវបានកំណត់ចំនួនមនុស្សក្នុងការចូលកម្សាន្ដ ដោយសារតែ ជាតំបន់ដែលមានភាពអាថ៌កំបាំងរបស់ព្រៃឈើ និងជាពិសេសត្រូវតែមានអ្នកនាំផ្លូវចូលទៅកាន់ព្រៃជ្រៅផងដែរ ដើម្បីឱ្យឡើងទៅដល់កំពូលភ្នំពពកវិល និងទស្សនាដុំងថ្មអណ្ដែតនៅលើកំពូលភ្នំ។ ក្នុងភាពងាយស្រួលសម្រាប់ភ្ញៀវទេសចរណ៍ក្នុងការមកកម្សាន្ដ ធ្វើការបោះតង់ និងដុតភ្នូកភ្លើង ក្រុមការងារអនុរក្សព្រៃឈើ និងមគ្គុទ្ទេសព្រៃឈើ ជាអ្នកសម្របសម្រួលដំណើរ និងអីវ៉ាន់របស់ភ្ញៀវ ដើម្បីផ្ដល់សុខសុវត្ថិភាព។
ភ្នំ « ផាហ៊ិនគូប» មានកំពស់ប្រមាណ 7-8 គីឡូម៉ែត្រ លោកអ្នកត្រូវចំណាយពេលពី 5-6 ម៉ោងក្នុងការឡើងភ្នំទៅកាន់កំពូលភ្នំដោយថ្មើរជើង ហើយក៏ត្រូវសម្រាកនៅក្នុងទីនោះមួយយប់តែម្ដង។ នាពេលរាត្រី ពួកគេអាចទស្សនាកាឡាក់ស៊ី រាប់សែនរាប់លាន បានអណ្ដែតនៅលើផ្ទៃមេឃ ព្រមទាំងធ្វើការផ្ដិតយករូបភាពបានច្បាស់ៗផងដែរ។ ក្រៅពី ថ្មអណ្ដែត និងពពកវិលហើយ លោកអ្នកក៏អាចហែលទឹកកម្សាន្ដយ៉ាងត្រជាក់បានទៀតផង ព្រោះថា នៅទីនេះមានទឹកជ្រោះ ច្រើនដំណាក់ បើសរុបទៅមិនតិចជាង 5 ជាន់នោះទេ។
នៅចាំអីទៀត តោះមកទស្សនាទាំងអស់គ្នា៖

August 27, 2018