សង្គម និងសេដ្ឋកិច្ច - La Reine Media

តេឡេស្កុបវិទ្យុព្រះអាទិត្យធំជាងគេបង្អស់លើពិភពលោកនឹងដំណើរការឆាប់ៗនេះ

(ប្រទេសចិន) – គម្រោងតេឡេស្កុបវិទ្យុព្រះអាទិត្យ Daocheng នៅលើខ្ពង់រាបទីបេ (Tibetan Plateau) ត្រូវបានបង្កើតឡើងពីអង់តែនចំនួន 313 គ្រឿង ដែលរៀបជារាងរង្វង់មូលមានប្រវែង 3.14 គីឡូម៉ែត្រ។

ស្ថិតនៅជាយខ្ពង់រាបទីបី ក្នុងខេត្ត Sichuan តេឡេស្កុបវិទ្យុព្រះអាទិត្យ Daocheng (DSRT) គឺជាប្រព័ន្ធតេឡេស្កុបធំជាងគេបង្អស់ក្នុងចំណោមតេឡេស្កុបប្រភេទនេះនៅលើពិភពលោក។ ប្រព័ន្ធនេះរួមមានអង់តែន Parabol អង្កត់ផ្ចិត 6 ម៉ែត្រចំនួន 313 គ្រឿង ដែលអាចងាករេដូចទៅនឹងផ្កាឈូតរ័ត្ន និងរៀបជារង្វង់មូលដែលមានប្រវែង 3.14 គីឡូម៉ែត្រ ព័ទ្ធជុំវិញប៉មមួយនៅចំកណ្ដាលដែលមានកម្ពស់ 100 ម៉ែត្រ។

តេឡេស្កុប 313 គ្រឿងនេះបង្កើតបានជា «តេឡេស្កុបនិម្មិត» ខ្នាតយក្ស ដំណើរការនៅក្នុងរលកវិទ្យុពី 150 ទៅ 450 megahertz ដើម្បីផ្ដិតយករូបភាពដែលមានសុក្រឹតភាពកម្រិតខ្ពស់ស្ដីពីបាតុភូតនានាដែលកើតឡើងនៅលើព្រះអាទិត្យ។

DSRT ត្រូវបានសាងសង់រួចរាល់កាលពីចុងខែវិច្ឆិកា 2022 ហើយគ្រោងនឹងដំណើរការសាកល្បងចាប់ពីខែមិថុនា 2023។

April 4, 2023

ក្នុងព្រឹត្តិការណ៍កីឡាស៊ីហ្គេមនៅកម្ពុជា ចំនួនក្រុមបាល់ទាត់នារីមានការកើតឡើង

ម្ចាស់ផ្ទះកម្ពុជាបានប្រកាសតួលេខនៃចំនួនក្រុមបាល់ទាត់បុរសជម្រើសជាតិ នារីជម្រើសជាតិ ដែលនឹងចូលរួមប្រកួតនៅស៊ីហ្គេមលើកទី 32 (32nd Southeast Asian Games) ដែលនឹងធ្វើឡើងនៅកម្ពុជាក្នុងខែឧសភាខាងមុខ។

ថ្មីៗនេះ ម្ចាស់ផ្ទះកម្ពុជាបានប្រកាសបញ្ជីឈ្មោះស្ដីពីបណ្ដាក្រុមបាល់ទាត់ជម្រើសជាតិសម្រាប់វិញ្ញាសាបាល់ទាត់បុរស និងនារី នៅក្នុងព្រឹត្តិការណ៍កីឡាអាស៊ីអាគ្នេយ៍ឆ្នាំ 2023 (ស៊ីហ្គេមលើកទី 32)។

ប្រកាសបានឱ្យដឹងថា ក្រុមបាល់ទាត់បុរស U-22 មាន 10 ក្រុម រួមមាន កម្ពុជា ថៃ ឡាវ វៀតណាម ឥណ្ឌូណេស៊ី ម៉ាឡេស៊ី មីយ៉ាន់ម៉ា សិង្ហបុរី ហ្វ៊ីលីពីន ទីម័រខាងកើត។ ចំណែកក្រុមបាល់ទាត់នារីវិញ មាន 9 ក្រុម ដែលរួមមាន កម្ពុជា ថៃ ឡាវ វៀតណាម ឥណ្ឌូណេស៊ី ម៉ាឡេស៊ី មីយ៉ាន់ម៉ា សិង្ហបុរី ហ្វ៊ីលីពីន។ ដូច្នេះ ប្រុយណេពុំមានក្រុមបាល់ទាត់ដែលត្រូវចូលរួម ខណៈដែលទីម័រខាងកើតមានតែក្រុមបុរស។

បើធៀបនឹងស៊ីហ្គេមលើកទី 31 ដែលបានធ្វើឡើងនៅវៀតណាមកាលពីឆ្នាំ 2022 ចំនួនក្រុមបាល់ទាត់នារីជម្រើសជាតិដែលចូលរួមនៅស៊ីហ្គេមលើកនេះបានកើនពី 7 ក្រុម ឡើងដល់ 9 ក្រុម ព្រោះការវិលត្រលប់របស់ក្រុមឥណ្ឌូណេស៊ី និងវត្តមានរបស់ក្រុមម៉ាឡេស៊ី។

យោងតាមម្ចាស់ផ្ទះកម្ពុជា ពិធីចាប់លេខចែកពូលសម្រាប់វិញ្ញាសាបាល់ទាត់នឹងត្រូវធ្វើឡើងនៅថ្ងៃទី 05 មេសាខាងមុខ នៅឯពហុកីឡដ្ឋានជាតិមរតកតេជោ។

លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានឱ្យដឹងថា ពិធីចាប់លេខចែកពូលនេះនឹងមានវត្តមានរបស់បណ្ដាទីប្រឹក្សាមកពីសហព័ន្ធកីឡាបាល់ទាត់អាស៊ី ហើយក្រុមនីមួយៗនឹងត្រូវបានដាក់ចូលទៅក្នុងក្រុមដោយយោងទៅលើចំណាត់ថ្នាក់ដែលសម្រេចបាននៅក្នុងស៊ីហ្គេមរដូវកាលមុន។

ស៊ីហ្គេមលើកទី 32 នឹងធ្វើឡើងចាប់ពីថ្ងៃទី 05 ដល់ 17 ឧសភា 2023 នៅកម្ពុជា ក្នុងនោះមានកីឡដ្ឋានក្នុងតំបន់ចំនួន 5 នឹងត្រូវបានប្រើប្រាស់ រួមមានកីឡដ្ឋាននៅ ភ្នំពេញ កំពត ព្រះវិហារ កែប និងសៀមរាប។ ក្នុងនោះ កីឡាបាល់ទាត់នឹងត្រូវប្រកួតមុនគេ ដោយចាប់ផ្ដើមពីថ្ងៃទី 29 មេសា៕

April 4, 2023

ប្រទេសចិនធ្វើតេស្ត «ប្រព័ន្ធបណ្ដែតរថភ្លើង» ប្រើអគ្គិសនីចរន្តធំសីតុណ្ហភាពខ្ពស់

ប្រទេសចិនធ្វើតេស្តដោយជោគជ័យនូវប្រព័ន្ធលើកដែលប្រើអគ្គិសនីចរន្តធំសីតុណ្ហភាពខ្ពស់សម្រាប់រថភ្លើងបណ្ដែតខ្លួន កាលពីថ្ងៃទី 31 មីនា 2023 នៅទីក្រុង Changchun ខេត្ត Jilin។

ប្រព័ន្ធលើកប្រើអគ្គិសនីចរន្តធំសីតុណ្ហភាពខ្ពស់ (high-temperature superconducting electric levitation system) ដំបូងគេបង្អស់ ត្រូវបានធ្វើតេស្តជោគជ័យកាលពីថ្ងៃទី 31 មីនា 2023 នៅពេលរថភ្លើងរត់សាកល្បងលើកំណាត់ផ្លូវប្រវែង 68 ម៉ែត្រ ដែលនេះគឺជាជំហានមួយដ៏ធំរបស់ប្រទេសចិន ក្នុងការអភិវឌ្ឍប្រព័ន្ធបណ្ដែតរថភ្លើងលើអាកាស។

នៅពេលរត់ឆ្លងកាត់ចំណុចបង្កើនល្បឿនប្រវែង 68 ម៉ែត្រ រថភ្លើងនេះមានល្បឿន 50 គីឡូម៉ែត្រ/ម៉ោង និងជោគជ័យឆ្ពោះទៅកាន់ដំណាក់កាលលើកបណ្ដែតដោយប្រើចរន្តអគ្គិសនី។

Yu Qingsong ប្រធានវិទ្យាស្ថានស្រាវជ្រាវរថភ្លើងបណ្ដែតខ្លួន (Maglev) នៃក្រុមហ៊ុនផលិតទូរថភ្លើង Changchun នៅប្រទេសចិន ថ្លែងថា «នេះបញ្ជាក់ថា យើងសម្រេចបានជំហានធំមួយក្នុងដំណាក់កាលដំបូងរបស់កម្មវិធី រួមទាំងការសម្រេចបានជំហាននៅក្នុងការស្រាវជ្រាវបច្ចេកវិទ្យា»។

ល្បឿនដំណើរការរបស់រថភ្លើងបណ្ដែតខ្លួន (maglev) អាចឡើងដល់ 600 គីឡូម៉ែត្រ/ម៉ោង

ការសាកល្បងថ្មីនេះជួយបញ្ជាក់ឱ្យបានពេញលេញនូវបច្ចេកវិទ្យាស្នូល ដែលរួមមាន មេដែកមានចរន្តចម្លងខ្ពស់ និងកម្លាំងអូសសមកាលកម្មលើផ្លូវត្រង់ ការផ្ដល់ថាមពលប្រតិកម្ម និងធ្វើឱ្យចុះត្រជាក់ក្នុងសីតុណ្ហភាពទាប បង្កើតបានជាមូលដ្ឋានដ៏រឹងមាំដើម្បីជំរុញប្រព័ន្ធដឹកជញ្ជូនដោយកម្លាំងបណ្ដែតដែលប្រើអគ្គិសនីចរន្តធំ។

ល្បឿនដំណើរការរបស់រថភ្លើងបណ្ដែតខ្លួន (maglev) អាចឡើងដល់ 600 គីឡូម៉ែត្រ/ម៉ោង។ រថភ្លើងប្រភេទនេះមានសុវត្ថិភាព ឆ្លាតវៃ ផាសុកភាព និងអាចសម្របខ្លួនបានល្អទៅនឹងបរិស្ថាន។ នេះបើតាម លោក Yu Qingsong។

April 4, 2023

ស្រឡាងប្រើប្រាស់អ៊ីដ្រូសែនរាវដំបូងគេលើពិភពលោកត្រូវបានដាក់ឱ្យដំណើរការ

ក្រុមហ៊ុន Norled កាលពីថ្ងៃទី 31 មីនា ប្រកាសថា អាជ្ញាធរគ្រប់គ្រងដែនសមុទ្រន័រវែសផ្ដល់អាជ្ញាប័ណ្ណឱ្យ MF Hydra ដែលជាស្រឡាងដំណើរការដោយថាមពលអ៊ីដ្រូសែនរាវដំបូងគេបង្អស់លើពិភពលោក។

ក្រុមហ៊ុនន័រវែស Norled បានសាកល្បងដំណើរការប្រព័ន្ធនៅលើស្រឡាង MF Hydra ចាប់តាំងពីដើមឆ្នាំនេះ។ MF Hydra នឹងធ្វើសកម្មភាពនៅក្នុងប្រទេសន័រវែស នៅលើតំបន់សមុទ្ររវាង Hjelmeland, Skipavik និង Nesvik។ ស្រឡាងដែលមានបណ្ដោយ 82.4 ម៉ែត្រ និងត្រូវបានដាក់បណ្ដែតទឹកកាលពីឆ្នាំ 2021 អាចដឹកអ្នកដំណើរបាន 300 នាក់ និងយានជំនិះបាន 80 គ្រឿង។ វាអាចធ្វើដំណើរក្នុងល្បឿន 16.7 គីឡូម៉ែត្រ/ម៉ោង ដោយប្រើប្រាស់ថ្មផ្ទុកឥន្ធនៈពីរដុំកម្លាំង 200 kW រួមនឹងម៉ាស៊ីនផលិតអគ្គិសនី 440 kW និងម៉ាស៊ីនរុញច្រាន Shottel ពីរគ្រឿង។

ស្រឡាងនេះអាចផ្ទុកអ៊ីដ្រូសែនបាន 80 ម៉ែត្រគុប ជួយឱ្យវាកាត់បន្ថយការបំភាយកាបូនប្រចាំឆ្នាំឡើងដល់ 95%។ ស្រឡាងខាងលើនេះគឺជាសមិទ្ធផលកើតឡើងពីកិច្ចសហការរវាង Norled និងដៃគូបរទេស។ បណ្ដាប្រព័ន្ធអ៊ីដ្រូសែននៅលើស្រឡាងនេះត្រូវបានផ្គត់ផ្គង់ដោយក្រុមហ៊ុនអាល្លឺម៉ង់ Linde Engineering។ ចំណែកក្រុមហ៊ុនដាណឺម៉ាក Ballard វិញ គឺជាអ្នកផលិតថ្មផ្ទុកអ៊ីដ្រូសែនដើម្បីបង្កើតជាថាមពល។ ដោយឡែក ដំណើរការដំឡើងឧបករណ៍នានា ក៏ដូចជាការបង្ហើយកិច្ចការចុងក្រោយរបស់ស្រឡាងនេះ ត្រូវបានធ្វើឡើងដោយក្រុមហ៊ុន SEAM និង Westcon របស់ន័រវែស។

បច្ចុប្បន្នមានតែ Norled និងវិស័យឧស្សាហកម្មអវកាសប៉ុណ្ណោះដែលប្រើប្រាស់អ៊ីដ្រូសែនរាវធ្វើជាឥន្ធនៈ។ ដូច្នេះ រឿងដែល MF Hydra ត្រូវបានដាក់ឱ្យដំណើរការគឺជាជំហានសំខាន់មួយសម្រាប់វិស័យដឹកជញ្ជូនផ្លូវសមុទ្រ។

April 3, 2023

ព្រោះតែដូច Lionel Messi ពេក អ្នកគាំទ្រម្នាក់ក៏ប្រែជាមានជីវភាពធូរធារ

Leonardo Gorri ដែលជាអ្នកបើកបររថយន្តដឹកទំនិញម្នាក់នៅអាហ្សង់ទីន កំពុងបង្កការចាប់អារម្មណ៍លើបណ្ដាញសង្គម និង «មានតម្លៃខ្ពស់» ព្រោះតែមានរូបរាងមុខមាត់ដូចទៅនឹងកំពូលតារាបាល់ទាត់ Lionel Messi។

Leonardo មានកូនបួននាក់ និងចិញ្ចឹមគ្រួសារដោយមុខរបរបើករថយន្តដឹកទំនិញ។ ប៉ុន្តែកាលពីប៉ុន្មានឆ្នាំមុន ជីវិត និងគ្រួសាររបស់ Leonardo Gorri ចាប់ផ្ដើមមានការផ្លាស់ប្ដូរច្រើន ព្រោះតែគាត់មានមុខមាត់ រូបរាងដូចទៅនឹង Messi។ Leonardo Gorri ប្រាប់ទំព័រ Clarin ថា អតិថិជនជាច្រើនបានសុំថតរូបសែលហ្វ៊ីជាមួយគាត់។

ប៉ុន្តែគ្រប់យ៉ាងបានផ្លាស់ប្ដូរខ្លាំងនៅក្នុងឆ្នាំ 2021។ កាលណោះ ភរិយារបស់ Leonardo Gorri បានថតសកម្មភាពគាត់ធ្វើត្រាប់តាម Messi ហើយបង្ហោះលើបណ្ដាញសង្គម ជាទីដែល Leonardo Gorri ទទួលបានចំណាប់អារម្មណ៍ខ្លាំងលើគណនីឈ្មោះ «ខ្ញុំមិនមែនជា Messi»។

ចាប់ពីពេលនោះមក លោក Leonardo Gorri ក៏បង្ហោះរូបថត និងវីដេអូផ្សេងៗជាបន្តបន្ទាប់ និងប្រែជាល្បីឈ្មោះកាន់តែខ្លាំង។

ដោយសារតែមានមុខមាត់ដូច Messi លោក Leonardo Gorri ក៏មានឱកាសចូលរួមទស្សនាការប្រកួតមួយចំនួនរបស់ក្រុមជម្រើសជាតិអាហ្សង់ទីន។ «Messi ក្លែងក្លាយ» ក៏ធ្លាប់ទទួលបានការចុះហត្ថលេខាលើអាវយឺតពី «Messi ពិត» ផងដែរ។ Leonardo Gorri និយាយថា នេះគឺជាមួយក្នុងចំណោម «វត្ថុមានតម្លៃបំផុត» សម្រាប់គាត់។

ព្រោះតែមានមុខមាត់ និងរូបរាងដូច Lionel Messi និងសមត្ថភាពសម្ដែង លោក Leonardo Gorri ក៏ទទួលបានការអញ្ជើញឱ្យសហការពីបណ្ដាក្រុមហ៊ុនរៀបចំព្រឹត្តិការណ៍ ក៏ដូចជាផលិតកម្មភាពយន្តនៅអាហ្សង់ទីន៕

April 3, 2023

AI Midjourney នៅពីក្រោយរូបភាពដ៏គួរឱ្យភ្ញាក់ផ្អើលទាំងនេះ

Midjourney ត្រូវបានគេស្គាល់ច្រើននៅក្នុងចំណោមកម្មវិធីបញ្ញានិម្មិត (AI) ប៉ុន្តែកំពុងក្លាយជាទីចាប់អារម្មណ៍នៅពេលជួយបង្កើតរូបភាពដូចពិតៗជាបន្តបន្ទាប់ដ៏គួរឱ្យភ្ញាក់ផ្អើល។

ទន្ទឹមនឹង ChatGPT របស់ OpenAI គេឃើញមាន Midjourney ក៏កំពុងបង្កការភ្ញាក់ផ្អើលខ្លាំងនៅក្នុងវិស័យបញ្ញានិម្មិត (AI) ព្រោះសារតែវាមានសមត្ថភាពបង្កើតរូបភាពដូចមែនទែន ដោយគ្រាន់តែត្រូវការសំណេរអធិប្បាយខ្លី។

Midjourney បង្ហាញខ្លួនក្នុងឆ្នាំ 2021 ប៉ុន្តែបានលេចធ្លោឡើងតាំងពីពាក់កណ្ដាលឆ្នាំកន្លង នៅពេលវាអនុញ្ញាតឱ្យបង្កើតរូបភាពដូចពិត។ Midjourney ត្រូវបានវាយតម្លៃថាជាឧទាហរណ៍ដ៏ច្បាស់មួយបង្ហាញអំពីការរីកចម្រើនយ៉ាងឆាប់រហ័សរបស់បញ្ញានិម្មិត។ ក្នុងមួយឆ្នាំកន្លះ AI នេះមានអ្នកប្រើប្រាស់ជាង 13 លាននាក់។ Midjourney ធ្លាប់អនុញ្ញាតឱ្យប្រើប្រាស់ដោយមិនគិតថ្លៃ ប៉ុន្តែបច្ចុប្បន្នវាយកថ្លៃពី 10 ទៅ 30 ដុល្លារសម្រាប់បណ្ដាកញ្ចប់ពីកម្រិតមូលដ្ឋានដល់កម្រិតខ្ពស់។

ក្រុមហ៊ុនគ្រប់គ្រង Midjourney មានបុគ្គលិកជាង 30 នាក់ប៉ុណ្ណោះដែលធ្វើការងារខាងគ្រប់គ្រង ដឹកនាំ ក្នុងនោះមានដូចជា CEO David Holz, ទីប្រឹក្សាបួននាក់, ក្រុមស្រាវជ្រាវ និងបច្ចេកទេសមានគ្នា 8 នាក់ រួមនឹងពីរនាក់ទៀតនៅក្នុងផ្នែកច្បាប់ និងហិរញ្ញវត្ថុ។ តួលេខនេះតិចជាងឆ្ងាយធៀបនឹងរាប់រយនាក់របស់ OpenAI ឬរាប់ពាន់នាក់ក្នុងផ្នែក AI របស់ Microsoft, Google។

ថ្វីបើ Midjourney មានភាពអស្ចារ្យ ប៉ុន្តែឧបករណ៍នេះបង្កឱ្យមានភាពចម្រូងចម្រាសច្រើនដោយសារតែមានអ្នកខ្លះប្រើប្រាស់វាក្នុងគោលបំណងទាញប្រយោជន៍ពីនយោបាយ ហើយវាក៏ធ្លាប់ត្រូវសហគមន៍វិចិត្រករប្រតិកម្មនៅពេលវាជួយឱ្យជាងគំនូរមួយរូបដណ្ដើមបានពានរង្វាន់នៅក្នុងពិព័រណ៍គំនូរនៅរដ្ឋ Colorado សហរដ្ឋអាម៉េរិកកាលពីឆ្នាំ 2022។

រូបភាព «សម្ដេចសង្ឃ Francis ពាក់អាវធំពណ៌សលេងម៉ូដ» ក៏ជាស្នាដៃរបស់បញ្ញានិម្មិត (AI) Midjourney

កាលពីខែមុន AI នេះបានបង្កើតរូបភាពស្ដីពីអតីតប្រធានាធិបតីអាម៉េរិក Donald Trump ត្រូវបានចាប់ខ្លួន និងសម្ដេចសង្ឃ Francis ពាក់អាវធំពណ៌សលេងម៉ូដ។ Washington Post បានផ្សាយថា មនុស្សជាច្រើនជឿថា រូបភាពទាំងនេះគឺជាការពិត នៅពេលពួកគេបានឃើញនៅលើបណ្ដាញសង្គម៕

April 3, 2023

រថយន្តអគ្គិសនីខ្នាតតូច Seagull របស់ BYD នឹងមានតម្លៃទាបខ្លាំង?

ក្រុមហ៊ុនចិន BYD កំពុងផ្ដោតទៅលើរថយន្តអគ្គិសនីខ្នាតតូចរបស់ខ្លួន ដោយសង្ឃឹមថានឹងអាចគ្រប់គ្រងទីផ្សាររថយន្តអគ្គិសនីខ្នាតតូចតម្លៃទាប និងដណ្ដើមតំណែងលេខមួយរបស់រថយន្ត Hongguang Mini។

ក្រុមហ៊ុនផលិតរថយន្តអគ្គិសនីចិន BYD បានចែករំលែករូបភាពស្ដីពីម៉ូដែលរថយន្តថ្មីរបស់ខ្លួនដែលមានឈ្មោះថា Seagull នៅលើទំព័របណ្ដាញសង្គម Wechat ប៉ុន្តែមិនទាន់បង្ហើបព័ត៌មានលំអិត បើទោះវាមានវត្តមានក្នុងបញ្ជីទទួលស្គាល់រថយន្តនៅប្រទេសចិនតាំងពីខែមករា 2023 និងលក្ខណៈបច្ចេកទេសសំខាន់ៗត្រូវបានគេដឹងនាពេលកន្លង។

រថយន្តអគ្គិសនីខ្នាតតូច BYD Seagull មានបណ្ដោយ 3,780 មិល្លីម៉ែត្រ, ទទឹង 1,715 មិល្លីម៉ែត្រ និងកម្ពស់ 1,540 មិល្លីម៉ែត្រ។ បច្ចុប្បន្ន រថយន្តតូចបំផុតរបស់ BYD ដែលកំពុងត្រូវបានដាក់លក់ក្នុងទីផ្សារ មានទំហំ 4,125 មិល្លីម៉ែត្រ x 1.770 មិល្លីម៉ែត្រ x 1.570 មិល្លីម៉ែត្រ។

រថយន្តអគ្គិសនី BYD Seagull ត្រូវបានបំពាក់ម៉ូទ័រអគ្គិសនីតែមួយគត់ដែលមានកម្លាំង 55 kW និងមានល្បឿនអតិបរមា 130 គីឡូម៉ែត្រ/ម៉ោង។ រថយន្តនេះមានកំណែថ្ម 30 kWh និង 38 kWh ធ្វើដំណើរបានចម្ងាយ 305 គីឡូម៉ែត្រ និង 405 គីឡូម៉ែត្រ។

ដើមខែនេះ បណ្ដារូបភាពដែលត្រូវបានគេចែករំលែកតៗគ្នាលើបណ្ដាញសង្គមបង្ហាញថា BYD Seagull នឹងមានតម្លៃចាប់ពី 9,550 ដុល្លារអាម៉េរិក ហើយថានឹងត្រូវបង្ហាញខ្លួននៅថ្ងៃទី 18 មេសា 2023។ ក៏ប៉ុន្តែ ក្រោយមក BYD បានចេញមុខហៅព័ត៌មានខាងលើថាជារឿងមិនពិត និងនិយាយថា តម្លៃប្រហាក់ប្រហែលសម្រាប់ Seagull គឺ 11,600 ដល់ 14,510 ដុល្លារអាម៉េរិក៕

April 3, 2023

កំពូលតារាចម្រៀង Taylor Swift នឹងក្លាយជាមហាសេដ្ឋិនីឆាប់ៗនេះ

Taylor Swift ត្រូវបានគេព្យាករថា អាចក្លាយជាមហាសេដ្ឋិនីបន្ទាប់ពីព្រឹត្តិការណ៍ទេសចរណ៍ចម្រៀងថ្មីបំផុតរបស់នាងបញ្ចប់នៅក្នុងខែកញ្ញាខាងមុខ។

កំពូលតារាចម្រៀងរូបនេះកំពុងសម្ដែងក្នុងព្រឹត្តិការណ៍ខនសឺត The Eras Tour ដែលមានរយៈពេល 52 ថ្ងៃនៅជុំវិញពិភពលោក។ រាត្រីខនសឺតនៅទីក្រុង Glendale រដ្ឋ Arizona កាលពីថ្ងៃទី 17 មីនា មានទស្សនិកជនប្រមាណ 69,000 នាក់ចូលមើល។ តួលេខនេះជួយឱ្យ Taylor Swift ក្លាយជាតារាចម្រៀងស្រីដែលមានទស្សនិកជនចូលរួមខនសឺតថ្ងៃដំបូងច្រើនជាងគេនៅសហរដ្ឋអាម៉េរិក។ Taylor Swift ច្រៀង 44 បទក្នុងរយៈពេលបីម៉ោង ក្នុងនោះ មួយវគ្គៗសុទ្ធតែមានការរៀបចំយ៉ាងអស្ចារ្យ។

ទំព័រ Billboard អធិប្បាយថា តម្រូវការចូលទស្សនាខនសឺត Eras Tour គឺច្រើនមិនធ្លាប់មាន ធ្វើឱ្យគេហទំព័រលក់សំបុត្រត្រូវជួបបញ្ហានៅពេលមានអ្នកចូលទិញច្រើនហួស។ តម្លៃសំបុត្រទាបបំផុតគឺ 289 ដុល្លារ និងថ្លៃបំផុតគឺ 485 ដុល្លារ (មិនទាន់គិតពន្ធ)។

យោងតាម Forbes សាស្ត្រាចារ្យ David Herlinhy មកពីសាកលវិទ្យាល័យ Northeastern បានគណនាឃើញថា Taylor Swift អាចរកប្រាក់ចំណូលបានប្រហែល 620 លានដុល្លារពីព្រឹត្តិការណ៍ខនសឺតខាងលើ និងក្លាយជាតារាចម្រៀងដែលមានទ្រព្យច្រើនជាង 1,000 លានដុល្លារ បន្ទាប់ពី Rihanna។ ចំណែក Billboard វិញ យល់ថា Taylor Swift នឹងរកបានប្រហែល 591 លានដុល្លារ ខណៈដែលប្រាក់ចំណេញត្រូវចែករំលែកឱ្យគេហទំព័រលក់សំបុត្រប្រមាណ 12.9 លានដុល្លារ។

បច្ចុប្បន្ន Taylor Swift មានទ្រព្យសុទ្ធ 570 លានដុល្លារអាម៉េរក ច្រើនជាង Britney Spears (70 លានដុល្លារ), Ariana Grande (240 លានដុល្លារ) និង Adele (220 លានដុល្លារ)។

Taylor Swift កើតឆ្នាំ 1989 និងចាប់ផ្ដើមច្រៀងជាអាជីពតាំងពីអាយុ 15 ឆ្នាំ។ នាងត្រូវបានវាយតម្លៃថា ជាម្នាក់ក្នុងចំណោមតារាចម្រៀងដែលជោគជ័យជាងគេក្នុងរយៈពេលជាងដប់ឆ្នាំមកនេះ ដោយលក់ចម្រៀងបាន 50 លានអាល់ប៊ុម រួមនឹងថាសចម្រៀងប្រមាណ 150 លានថាសនៅទូទាំងសកលលោក។ ក្នុងអាជីព Taylor Swift ទទួលបានពានរង្វាន់ Grammy ចំនួនដប់, ពាន AMA ចំនួន 29។ ឆ្នាំ 2019 AMA បានផ្ដល់កិត្តិយសជូន Taylor Swift ថាជា «តារាចម្រៀងរបស់ទសវត្សរ៍ឆ្នាំ 2010»។ Taylor Swift ក៏ទទួលបានពានរង្វាន់ «និមិត្តរូបសកល» នៅ Brit Award 2021 ផងដែរ៕

April 3, 2023

ក្រុមបាល់ទាត់ជម្រើសជាតិកម្ពុជានឹងមានគ្រូបង្វឹកជាជនជាតិអាហ្សង់ទីន នៅក្រោយស៊ីហ្គេមលើកទី 32

កាលពីថ្ងៃទី 02 មេសា សហព័ន្ធកីឡាបាល់ទាត់កម្ពុជា (FFC) បានប្រកាសជាផ្លូវការនូវកិច្ចព្រមព្រៀងបួនឆ្នាំ ចាប់ពីឆ្នាំ 2023 ជាមួយនឹងគ្រូបង្វឹកជនជាតិអាហ្សង់ទីន លោក Felix Dalmas។

នេះមិនមែនជាលើកដំបូងឡើយដែលលោក Felix Dalmas ដឹកនាំក្រុមបាល់ទាត់ជម្រើសជាតិកម្ពុជា ហើយគោលដៅលើកនេះរបស់លោក Felix Dalmas និង FFC គឺវគ្គជម្រុះ FIFA World Cup 2026។

«ខ្ញុំរីករាយណាស់នៅពេលមានឱកាសត្រលប់មកកម្ពុជាដើម្បីធ្វើការ ហើយសង្ឃឹមថា គ្រប់គ្នាក៏មានអារម្មណ៍បែបនេះ។ យើងនឹងធ្វើការជាមួយគ្នា ដើម្បីអភិវឌ្ឍវិស័យបាល់ទាត់របស់កម្ពុជា…។ សង្ឃឹមថា គ្រប់គ្នានឹងគាំទ្រដល់ U-22 កម្ពុជានៅរដូវស៊ីហ្គេមខាងមុខ» លោក Felix Dalmas ថ្លែងដូច្នេះនៅក្នុងពិធីប្រកាសរបស់ FFC។

លោក Felix Dalmas ធ្លាប់ដឹកនាំក្រុមបាល់ទាត់កម្ពុជាកាលពីឆ្នាំ 2018 ដែលពេលនោះលោកដឹកនាំក្រុម U-23 កម្ពុជា ទៅចូលរួមស៊ីហ្គេម ក្រោមការប្រឹក្សាយោបល់ពីចម្ងាយរបស់ប្រធានបច្ចេកទេសដែលកាលណោះគឺអតីតកីឡាករជម្រើសជាតិជប៉ុន Keisuke Honda។

លោក Felix Dalmas ដែលជាអតីតខ្សែប្រយុទ្ធកើតឆ្នាំ 1988 មកពីអាហ្សង់ទីន បានធ្វើការជាមួយសហព័ន្ធកីឡាបាល់ទាត់កម្ពុជារហូតដល់ខែមីនា 2021។ លោកធ្លាប់ដឹកនាំក្រុមកម្ពុជាឡើងដល់វគ្គពាក់កណ្ដាលផ្ដាច់ព្រ័ត្រនៅស៊ីហ្គេមលើកទី 30 នៅហ្វ៊ីលីពីន។ ក្រោយមក លោក Felix Dalmas ក៏មិនបានដឹកនាំក្រុមជម្រើសជាតិណាទាំងអស់រហូតដល់មានកិច្ចព្រមព្រៀងថ្មីនេះ។

លោក Felix Dalmas (ស្ដាំ) និងលោក Keisuke Honda កាលពីឆ្នាំ 2019

ក្នុងពេលដ៏ខ្លីខាងមុខ គ្រូបង្វឹក Keisuke Honda នឹងដឹកនាំក្រុមបាល់ទាត់ជម្រើសជាតិកម្ពុជា ចូលប្រកួតនៅស៊ីហ្គេមលើកទី 32 ដែលកម្ពុជាធ្វើជាម្ចាស់ផ្ទះ។ នេះគឺជាឱកាសល្អបំផុតដើម្បីឱ្យអ្នកយុទ្ធសាស្ត្រជនជាតិជប៉ុនរូបនេះ និយាយពាក្យថា «លា» ក្នុងក្ដីរីករាយជាមួយអ្នកគាំទ្រនៅកម្ពុជា៕

April 3, 2023

ក្រុមបាល់ទះបុរសកម្ពុជា «ខូចចិត្ត» មុនស៊ីហ្គេម តែដាក់គោលដៅយកមេដាយមាសទីពីររាប់ពីឆ្នាំ 1965

បរាជ័យនៅចំពោះមុខក្រុមម្ចាស់ផ្ទះម៉ាឡេស៊ីក្នុងការប្រកួតដំបូងនៅពានរង្វាន់បាល់ទះ Tri Nation Cup 2023 គឺជារឿងដ៏គួរឱ្យសោកស្ដាយសម្រាប់ក្រុមជម្រើសជាតិកម្ពុជា ប៉ុន្តែការសោកស្ដាយជាងនេះគឺការចាញ់នៅក្នុងវគ្គផ្ដាច់ព្រ័ត្រ។

ដើម្បីត្រៀមខ្លួនឱ្យបានល្អសម្រាប់ចូលរួមព្រឹត្តិការណ៍កីឡាអាស៊ីអាគ្នេយ៍លើកទី 32 (ស៊ីហ្គេម 32 ឬ 32nd SEA Games ឬ 32nd Southeast Asian Games) ដែលនឹងធ្វើឡើងក្នុងខែឧសភា 2023 នៅកម្ពុជា ភាគីខាងម៉ាឡេស៊ីបានប្រារព្ធព្រឹត្តិការណ៍ប្រកួតបាត់ទះមិត្តភាពអន្តរជាតិដែលមានឈ្មោះថា Malaysia Tri Nation Invitational Friendly 2023។

ក្រោយការប្រកួតបានបួនថ្ងៃ ក្រុមម្ចាស់ផ្ទះម៉ាឡេស៊ីក្រុម A បានលើកពានជើងឯក ខណៈក្រុមកម្ពុជាជាប់លេខពីរ បន្ទាប់មកគឺក្រុមសិង្ហបុរី និងម៉ាឡេស៊ីក្រុម B។

ក្រុមបាល់ទះកម្ពុជាចាញ់ក្រុមម៉ាឡេស៊ី (ដែលជាក្រុមឈរបាតតារាងចំណាត់ថ្នាក់នៅស៊ីហ្គេម 31) នៅក្នុងវគ្គសន្សំពិន្ទុ និងវគ្គផ្ដាច់ព្រ័ត្រ។

ក៏ប៉ុន្តែ ក្រុមកម្ពុជាខាងលើគ្រាន់តែជាក្រុមដែលគ្រូបង្វឹកជនជាតិចិន Jun Li និងជំនួយការរបស់លោកមកពីគុយបា យកមកធ្វើការសាកល្បងកម្លាំងប៉ុណ្ណោះ។ ចំណែកសមាសភាពរបស់ក្រុមផ្លូវការនៅតែត្រូវបានរក្សាការណ៍សម្ងាត់ដើម្បីត្រៀមសម្រាប់ស៊ីហ្គេម 32។

នៅស៊ីហ្គេមដែលកម្ពុជាធ្វើជាម្ចាស់ផ្ទះនេះ កម្ពុជាដាក់គោលដៅខ្ពស់បំផុតគឺមេដាយមាសប្រវត្តិសាស្ត្រ។ កម្ពុជាធ្លាប់ដណ្ដើមបានមេដាយមាសកាលពីឆ្នាំ 1965 មុនពេលឈ្មោះស៊ីហ្គេមបង្ហាញវត្តមានចាប់ពីឆ្នាំ 1977។ ក្នុងព្រឹត្តិការណ៍កីឡានៅអាស៊ីអាគ្នេយ៍កាលណោះដែលត្រូវបានហៅថា ព្រឹត្តិការណ៍កីឡាឧបទ្វីបអាស៊ីអាគ្នេយ៍ (Southeast Asian Peninsular – SEAP Games) ក្រុមបាល់ទះជម្រើសជាតិកម្ពុជា បានឈ្នះក្រុមថៃ 3-0 នៅវគ្គផ្ដាច់ព្រ័ត្រ៕

April 3, 2023

Category: សង្គម និងសេដ្ឋកិច្ច