Category: សង្គម និងសេដ្ឋកិច្ច

ល្អាងស្អាតបំផុតលើពិភពលោក 9កន្លែង ត្រូវតែទៅឱ្យបានម្ដង!
សម្រាប់អ្នកទេសចរវិញ មិនថាតែឡើងភ្នំ ឬចុះទឹកនោះទេ ពួកគេអាចទៅបានគ្រប់ទីកន្លែងមិនខ្លាចញញើតអ្វីទាំងអស់រឹតតែជាអ្នកដែលស្រឡាញ់ចូលចិត្តធម្មជាតិដែលស្រស់ស្អាត និងចម្លែកភ្នែកផងនោះ ឡារ៉ែន សូមទាយថា 9ល្អាងធម្មជាតិដែលយើងនឹងនាំយកមកជូនទស្សនានៅពេលនេះ ច្បាស់ជាធ្វើឱ្យបេះដូងរបស់ពួកគេញ័ររញ្ជួយយ៉ាងពិតប្រាកដ។
1. ល្អាងទឹកកក (Ice Cave) ប្រទេស Iceland

ឬឈ្មោះមួយទៀតហៅថា ល្អាងគ្រីស្តាល់ជាល្អាងដែលកើតឡើងនៅក្នុងបឹងទឹកកកទឹកសាប ដែលស្ថិតនៅក្នុងតំបន់ ស្កាហ្វតាហ្វេល (Skaftafell) ជាល្អាងមួយក្នុងចំណោមល្អាងទឹកកក ដែលស្អាតបំផុតក្នុងពិភពលោក និងល្បីឈ្មោះបំផុត។
2. ល្អាង បាទូ (Batu Caves) ប្រទេសម៉ាឡេស៊ី

ល្អាងថ្មកំបោរ បាទូ ស្ថិតនៅប៉ែកខាងជើងនៃទីក្រុងកួឡាឡាំពួ ដែលក្រៅពីជានិមិត្តសញ្ញារបស់រដ្ឋ សាឡាំងង៉រ ហើយនោះ ទីកន្លែងមួយនេះថែមទាំងជាវត្តអារាម និងជាកន្លែងប្រតិបត្តិពិធីខាងសាសនាហ៊ីនឌូ ហើយថែមទាំងបានទទួលការពេញនិយមពីបណ្ដាអ្នកទេសចរទូទាំងពិភពលោកទៀតផង។
3. ល្អាងគ្រីស្តាល់ (Cave of the Crystals) ប្រទេសម៉ិកស៊ិក

ស្ថិតនៅក្នុងខេត្ត ណៃកា ភាគខាងជើងនៃប្រទេសម៉ិកស៊ិក។ នៅខាងក្នុងល្អាង ត្រូវបានគេរកឃើញកំណករ៉ែ យីបសាំ ដ៏ធំអស្ចារ្យ ដែលកើតឡើងពីសារធាតុរ៉ែ ដែលរលាយដោយសារទឹកក្ដៅដែលមកពីបណ្ដុំថ្មស្អិត ម៉ែកម៉ា ដែលនៅខាងក្រោម ជ្រៅទៅក្រោមដីជម្រៅជាង300ម៉ែត្រ។
4. ល្អាងទឹកកក ក្បែរភ្នំភ្លើង (The Mutnovsky) ប្រទេសរុស្ស៊ី

ដោយសារតែល្អាងទឹកកកនេះស្ថិតនៅក្បែរភ្នំភ្លើង Mutnovsky ទើបធ្វើឱ្យកើតមានការផ្ដុំគ្នារបស់ទឹកកកកើតចេញជាក្បូរក្បាច់ និងធ្វើឱ្យទីកន្លែងនេះក្លាយជាល្អាងទឹកកកដែលមើលទៅស្អាតប្លែកភ្នែកបំផុត។
5. ល្អាង Blue Cave ប្រទេស Croatia

ឬមានឈ្មោះមួយទៀតថា Modra Spilja ស្ថិតនៅក្នុងឈូងសមុទ្រ Balun របស់កោះ Bisevo។ ភាពពិសេសរបស់ល្អាងមួយនេះ គឺ បាតុភូតឆ្លុះពន្លឺពណ៌ផ្ទៃមេឃខៀវដែលកើតឡើងក្នុងចន្លោះម៉ោង 11.00 – 12.00 ដោយសារតែពន្លឺព្រះអាទិត្យដែលចាំងចូលមកតាមចន្លោះថ្មកំបោរមករហូតកើតចេញជាពន្លឺពណ៌ផ្ទៃមេឃខៀវឡើងហ្នឹងឯង។
6. ល្អាង សុន ទុង (Son Doong) ល្អាងដែលធំបំផុតក្នុងពិភពលោក

ប្រទេសវៀតណាមស្ថិតនៅក្នុងតំបន់ឧទ្យានជាតិ ហ្វុងយ៉ា-គែបាង ស្រុក បូចាក់ ខេត្ត កួងប៊ីន (Quang Binh) គេល្បីថា ជាល្អាងដែលមានភាពលំបាកបំផុត ព្រោះអ្នកទេសចរដែលទៅទីនោះត្រូវតែចេះស៊ូទ្រាំ អត់ធន់ និងមានភាពក្លាហានហ៊ានប្រថុយប្រថានខ្លាំងទើបអាចចូលទៅទស្សនាបាន។
7. ល្អាង ហ្វ៊ីងហ្កាលស៍ (Fingals Cave)

ប្រទេសស្កត់លែនដ៍ជាល្អាងដែលស្ថិតនៅក្នុងសមុទ្រ លើកោះស្តាហ្វហ្វា ខាងក្រៅឆ្នេរទិសខាងលិចរបស់ប្រទេស ស្កុតលែនដ៍។ កោះនេះមានឈ្មោះល្បីល្បាញរឿងកំណប់បុរាណ ក្នុងល្អាងមានថ្ម បៈសូលរូបរាងបួនជ្រុង មានប្រវែងខាងក្នុង 70ម៉ែត្រ និងផ្នែកខាងមុខល្អាងមានកម្ពស់ស្មើអគារ 6ជាន់ឯណោះ។
8. ល្អាងថ្លើមថ្ម (Cavernas De Marmol)

ប្រទេសឈីលីជាល្អាងដែលកើតឡើងពីចរន្តទឹកហូរដែលច្រោះដាច់រយៈពេលរាប់លានឆ្នាំ រហូតដល់ភ្នំថ្លើមថ្មកើតចេញជាគ្រោងល្អាងថ្លើមថ្មដ៏សែនស្រស់ស្អាតនេះឡើង។ ល្អាងនេះស្ថិតនៅក្នុងតំបន់បឹងទឹកសាប ការេរ៉ា នៅខាងក្នុងល្អាងនោះពេញទៅដោយទឹកថ្លាឈ្វេងស្អាតបរិសុទ្ធ ចាំងឆ្លុះពន្លឺពីផ្ទៃមេឃប៉ះនឹងផ្ទៃទឹករបស់បឹងទឹកសាបដ៏ធំបំផុតលំដាប់លេខពីររបស់ទ្វីបអាមេរិកខាងត្បូង។
9. ល្អាង ផូស្តូតណា (Postojna Cave)

ប្រទេសស្លូវេនៀ (Slovenia) ស្ថិតនៅក្នុងតំបន់ទីប្រជុំជន ផូស្តូតណា ជាល្អាងដែលស្អាតបំផុតក្នុងទ្វីបអឺរ៉ុប មានអាយុចំណាស់ជាង2លានឆ្នាំ និងបើកឱ្យភ្ញៀវទេសចរចូលទស្សនាតាំងពីឆ្នាំ1884 មកម្លេ៉ះ។ នៅខាងក្នុងល្អាងមានទាំងថ្មដុះឡើង និងថ្មដុះធ្លាក់សំយ៉ុង ខ្សែទឹកហូរ អាងទំនប់ទឹក ហើយថែមទាំងមាន ត្រីមនុស្ស (Human Fish) ឬ Olm វត្ថុមានជីវិតខ្នាតតូច មានសម្បុរស្បែកស្រដៀងមនុស្ស តែដងខ្លួនវែងស្រដៀងសត្វពស់ មានដៃ និងជើង ត្រូវបានរកឃើញលើកដំបូងនៅឆ្នាំ1768៕
September 1, 2018
បច្ចេកវិទ្យា 5G របស់ Huawei និង ZTE ត្រូវរដ្ឋាភិបាលអូស្ត្រាលីហាមឃាត់
យោងតាមការចេញផ្សាយរបស់សារព័ត៌មាន Reuters នាថ្មីៗនេះបានឱ្យដឹងថា រដ្ឋាភិបាលអូស្ត្រាលីបានហាមឃាត់ក្រុមហ៊ុនផលិតស្មាតហ្វូនលំដាប់កំពូលរបស់ចិន Huawei ក្នុងការដាក់ឱ្យប្រើប្រាស់ប្រព័ន្ធអីុនធើណិត 5G នៅក្នុងប្រទេសរបស់ខ្លួន ដោយសារតែរដ្ឋាភិបាលមានក្ដីព្រួយបារម្ភទៅលើសន្ដិសុខជាតិ។
Huawei ជាក្រុមហ៊ុនបច្ចេកវិទ្យាដ៏ធំមួយដែលបានវាយលុកទៅលើទីផ្សារបច្ចេកវិទ្យា Wirelessនៅលើពិភពលោកអស់រយៈពេលជាច្រើនឆ្នាំ ជា-ពិសេសគឺនៅលើទឹកដីនៃប្រទេសអូស្ត្រាលី គឺមានរយៈពេល 15ឆ្នាំមកហើយ ប៉ុន្តែនៅពេលនេះបែរជាត្រូវបានរដ្ឋាភិបាលអូស្ត្រាលីហាមឃាត់ទៅវិញ ដែលបណ្ដាលឱ្យ Huawei ត្រូវជួបនឹងវិបត្តិមួយដ៏ធ្ងន់ធ្ងរ។
ជាមួយគ្នានោះផងដែរ សារព័ត៌មាន Reuters ក៏បានបញ្ជាក់បន្ថែមទៀតថា ក្រុមហ៊ុន ZTE ក៏ត្រូវរដ្ឋាភិបាលអូស្រ្តាលីព្រួយបារម្ភពីផ្នែកសន្តិសុខជាតិដូចគ្នា។
បន្ទាប់ពីមានសេចក្ដីប្រកាសហាមឃាត់ការដាក់ដំណើរការប្រព័ន្ធអីុនធើណិត 5G នៅក្នុងប្រទេសអូស្ត្រាលី ក្រុមហ៊ុន Huawei បានចេញសារខកចិត្តមួយនៅលើបណ្ដាញសង្គម Twitter ដោយបានបញ្ជាក់ថា៖ “វាគឺជាការខកចិត្តដ៏ធំបំផុតមួយសម្រាប់អតិថិជនរបស់យើង (អ្នកប្រើប្រាស់ Huawei នៅក្នុងប្រទេសអូស្ត្រាលី)”។ ស្របពេលដែល 5G ជាប្រព័ន្ធអីុនធើណិតចល័តជំនាន់ថ្មី និងចុងក្រោយ ដែលអាចផ្តល់ល្បឿន Download និង Upload កាន់តែអស្ចារ្យ និងប្រសើរជាងមុន។
គួរបញ្ជាក់ផងដែរថា ប្រទេសជាច្រើននៅក្នុងសកលលោក កំពុងត្រៀមខ្លួនដាក់ដំណើរការ 5G នៅមុនឆ្នាំ2020 ខណៈដែល Huawei ក្រុមហ៊ុនផលិតបានត្រៀមខ្លួនរួចជាស្រេចក្នុងការផ្ដល់សេវាកម្មនេះ ជាពិសេសគឺនៅពេលនេះ Huawei គឺជាក្រុមហ៊ុនផលិតស្មាតហ្វូនលំដាប់ទី2 នៅលើពិភពលោកបន្ទាប់ពី Samsung៕
September 1, 2018
ឧទ្យានស្មៅធម្មជាតិដ៏ស្រស់បំព្រង ដែលគូស្នេហ៍មិនគួររំលង !!!
“Pink Muhly‪ Grass” គឺជាសួនផ្កាស្មៅដែលមានចំរុះព័ណ៌លាយលំគ្នា ដែលសម្បូរច្រើនជាងគេគឺព័ណ៌ផ្កាឈូកតែម្ដង។ សួនស្មៅមួយនេះកំពុងបង្អួតខ្លួនទៅកាន់ពិភពលោកបានឃើញ ហើយទាក់ទាញភ្ញៀវទេសចរណ៍ជាច្រើននាក់ឱ្យមកធ្វើដំណើរកម្សាន្ដនៅក្នុងប្រទេសកូរ៉េ នាខែ ធ្នូខាងមុខនេះ។ នៅអំឡុងរដូវស្លឹកឈើជ្រុះ សម្រស់របស់ស្មៅព័ណ៌ផ្កាឈូកកាន់តែស្រស់ស្អាតទ្វេរដង ខណៈដែលត្រូវខ្យល់បកបោក ហាក់បីដូចជាទឹករលកសមុទ្រព័ណ៌ផ្កាឈូកដូច្នឹងដែរ។សម្រាប់អ្នកនិយមថតរូបរូបស៊ែលហ្វី ថតរូប pre-wedding គឺពិតជាទីតាំងដែលមិនធ្វើឱ្យលោកអ្នកខកបំណងឡើយ។ បើទោះបីជាដំណើរកម្សាន្តជាលក្ខណៈគូស្នេហ៍ ក្រុមគ្រួសារ ឬឯកជនភាព ក៏សួនផ្កាស្មៅ “Pink Muhly‪ Grass” រីករាយស្វាមគមន៍លោកអ្នកគ្រប់ពេលវេលា។‬‬
ទីក្រុង Gyeongju គឺជាចំនុចមួយដ៏ពេញនិយមបំផុតទាំងជនជាតិកូរ៉េ និងភ្ញៀវទេសចរណ៍អន្ដរជាតិ បាននាំគ្នាទៅទស្សនាសួនផ្កាស្មៅ Pink Muhly ដែលមានព័ណ៌ផ្កាឈូកខ្ចីស្រស់ត្រកាលដ៏រករកបាននៅក្នុងពិភពលោកយើងនេះ។ នៅទីនោះក៏មានទីលានសម្រាប់មើលផ្ការះព្រោងព្រាតនាពេលរាត្រីផងដែរ ដែលគេឱ្យឈ្មោះថា Cheomseongdae Observatory ហើយព្រមទាំងមានឧទ្យានជាតិ Tumuli Park ដែលធានាឱ្យភ្ញៀវទេសចរណ៍ទាំងអស់មិនចង់ចាកចេញពីទីរមណីយដ្ឋានដ៏ស្រស់សោភានេះឡើយ។ គួរបញ្ជាក់ថា នេះគឺជាទីតាំងមួយដែលបានសាងក្ដីសុបិនដល់មនុស្សជាច្រើន បានសម្រេចក្ដីប៉ងប្រាថ្នាទៀតផងដែរ។
ចំពោះការធ្វើដំណើរ លោកអ្នកអាចធ្វើដំណើរតាមរយៈរថភ្លើងចេញពីទីក្រុង សេអូល ឬធ្វើដំណើរតាមរថភ្លើងរហ័ស KTX ទៅចុះនៅចំណតទីក្រុងក្បែរនោះ ដូចជា ប៊ូសាន ថេនចន អាន់ឃុង រួចបន្ដដំណើរមកទីក្រុង ក្យងជូ នេះតែម្ដង។ ចំពោះតម្លៃសំបុត្រគឺមិនថ្លៃប៉ុន្មាននេះទេ។
មិនតែប៉ុណ្ណោះទេ រមណីយដ្ឋានផ្កាស្មៅព័ណ៌ផ្កាឈូកនេះ ក៏មាននៅក្នុងតំបន់កោះដេជូផងដែរ គឺ Daejeo Ecological Park ដែលមានទឹកសមុទ្រ Nakdong ដែលជាទឹកសមុទ្រដ៏វែងជាងគេនៅទីក្រុង ប៊ូសាន និងវែងជាងគេនៅប្រទេសកូរ៉េខាងត្ពូងផងដែរ។ ផ្កាស្មៅនៅក្នុងតំបន់នេះ មានស្រស់ស្អាតខ្លាំងជាងគេនៅក្នុងអំឡុងខែ មេសា ព្រោះថា នៅក្នុងខែនោះគឺស្មៅចេញផ្កា ចេញព័ណ៌បានអាយុកាលវែងបំផុត។ ការធ្វើដំណើរមកកាន់តំបន់នេះ គឺមានភាពងាយស្រួលបំផុត ដោយគ្រាន់តែលោកអ្នកចាកចេញពីស្ថាននីយ៍រថភ្លើង Gangseo-gu Office តាមរយៈផ្លូវខ្សែលេខ1 បន្ទាប់មកបត់តាមបណ្ដាលផ្លូវខាងឆ្វេងដៃ នោះនឹងមកដល់ទីឋានដ៏មនោរម្យមួយនេះហើយ ថែមទាំងតម្លៃសំបុត្រឥតគិតថ្លៃ។
មួយទីតាំងទៀតគឺស្ថិតនៅលើកោះជេជូ ដែលមានដុះនៅក្បែររោងអាហារ Kitchen Oz ក្បែរនឹងឆ្នេរសមុទ្រ Hyeopjae Beach ។ បើលោកអ្នកមិនទាន់បានមើលរូបភាពទេនោះ សាកស្រម៉ៃលមើលថា ស្រស់ស្អាតកម្រិតណា មានទាំងផ្កាស្មៅព័ណ៌ផ្កាឈូក និងទឹកសមុទ្រព័ណ៌ខៀខ្ចីទៀតនោះ។ ដូចដែលបានដឹងហើយថា កោះជេជូ គឺជាកោះស្រស់ស្អាតដាច់នៅក្នុងប្រទេសកូរ៉េ លោកអ្នកគ្រាន់តែហោះហើរពីទីក្រុង សេអ៊ូល ដោយត្រង់គោលដៅមក គឺនឹងចុះសំចតនៅព្រលានយន្ដហោះកោះជេជូតែម្ដង។
មួយកន្លែងចុងក្រោយនេះ ក៏កាន់តែពិសេសថែមទៀតហើយ គឺសូនកម្សាន្ដ Yangju Nari Park។ ទីនេះខុសប្លែកពីទីពោលខាងលើបន្ដិចត្រង់ថា ផ្កាស្មៅមានព័ណ៌ផ្កាឈូកចាស់ ដោយសារតែសណ្ឋានដី។ ព្រោះសួនផ្កាស្មៅដទៃៗ មានព័ណ៌រាងខ្ចីជាងប្ដិច ហើយមានដើមស្មៅវែងៗ។ ក៏ប៉ុន្ដែអ្វីដែលពិសេសចាងនេះទៅទៀតនោះ គឺ នៅក្នុងសួនកម្សាន្ដ Yangju Nari Park មានបណ្ដុំសត្វមេអំបៅរស់នៅច្រើន ដែលទីតាំងផ្សេងៗមិនមាននោះឡើយ។ អ្នកអាចថតរូបលេងនៅតាមតំបន់សួនកម្សាន្ដតូចៗបន្ថែមទៀតដូចជា Globe Amaranth , Kochia និង Whirling Butterflies ជាដើម។ សម្រាប់ការធ្វើដមណើរ គឺលោកអ្នកត្រូវធ្វើដំណើរតាមរថភ្លើងក្រោមដីខ្សែទី 1 ចេញពីស្ថានីយ៍ Seoul station តម្រង់មកស្ថានីយ៍ Yangju បន្ទាប់មកត្រូវចេញដំណើរបន្ដនៅច្រកទី2 នៃចំណតរថភ្លើងដែលមានដាក់ស្លាកបង្ហាញថា ដំណើរទៅកាន់ Haedong Maeul ៕
September 1, 2018
លោកអ៊ិន សុភិន អំពាវនាវឱ្យសិល្បៈករទាំងអស់ដោះស្រាយជម្លោះតាមប្រព័ន្ធច្បាប់ និងបញ្ឈប់ហែកហួរគ្នាតាមបណ្ដាញសង្គម!
ជាមួយនឹងការទទួលស្គាល់ជុំវិញបញ្ហាយឺតយ៉ាវលុយកាក់ជាមួយតារាសម្ដែង លោកអ៊ិន សុភិន ដែលទទួលព្យុះភ្លៀងក្នុងនាមជាម្ចាស់ផលិតកម្មមហាហង្ស និងជាអនុប្រធានសមាគមភាពយន្តកម្ពុជា បានក៏បានចេញមុខអំពាវនាវឱ្យតារាសិល្បៈគិតគូឡើងវិញ ជុំវិញជម្លោះរឿងរ៉ាវដែលបានកើតឡើង ដោយលោកបញ្ជាក់ថានោះជាទង្វើសម្លាប់ទំនុកចិត្ត និងតម្លៃសិល្បៈរបស់ខ្លួនដែលគួរឱ្យតែផ្លាស់ប្ដូរផងដែរ។ លោកទទូចឱ្យតារាដែលជាមនុស្សមហាជនប្រើច្បាប់ដោះស្រាយគ្នា និងយកតុមូលធ្វើជាប្រធានបទ ដើម្បីកុំឱ្យមហាជនច្រើនឡើងៗ មាក់ងាយអ្នកសិល្បៈ និងធ្វើឱ្យប៉ះពាល់ដល់តម្លៃភាពយន្តដែលស្ថិតក្នុងការធ្លាក់ចុះនាពេលចុងក្រោយ។
លោកបានថ្លែងនៅលើហ្វេសប៊ុកជាសាធារណៈថា «នៅប្រទេសកម្ពុជាយើងមានច្បាប់ត្រឹមត្រូវដូចប្រទេសដទៃដែរ ហើយក្នុងការធ្វើអ្វីមួយពាក់ពន្ធ័នឹងពាណិជ្ជកម្មតែងតែមានកុងត្រា ឬកិច្ចសន្យាច្បាស់លាស់ជាមួយគ្នា។ ប្រសិនបើភាគីណាមួយរំលោភលើកិច្ចសន្យា ភាគីដែលត្រូវគេរំលោភលើសេចក្ដីទុកចិត្តអាចរកច្បាប់ឱ្យជួយការពារបាន។ តែពេលនេះក្នុងសង្គមសិល្បៈមានតែរឿង Post (បង្ហោះ)ហែកហួរគ្នាតាម Facebook ដោយមិនយកតាមកិច្ចសន្យាធ្វើឱ្យមហាជនមានការរិះគន់ មកលើវិសយ័សិល្បៈយ៉ាងខ្លាំង នឹងនាំឱ្យបាត់បង់ការគាំទ្រថែមទៀត។ ក្នុងនាមខ្ញុំជាអនុប្រធានសមាគមភាពយន្តកម្ពុជា សូមសំណូមពរមេត្តាដោះស្រាយជំលោះគ្នាដោយសន្តិវិធី និងដោយតាមប្រពន្ធ័ច្បាប់ទើបល្អ ដើម្បីកុំឱ្យមិនប៉ះពាល់ដល់មុខមាត់ស្ថាបនសិល្បៈ។ សូមកុំចង់ចាញ់ឈ្នះគ្នាក្រៅច្បាប់អី ករណីក្រុមហ៊ុនមហាហង្សរបស់ខ្ញុំដូចគ្នា បើរំលោភលើកិច្ចសន្យាសូមមេត្តារត់ទៅរកច្បាប់ចុះ បើក្រុមហ៊ុនធ្វើខុសខ្ញុំនឹងប្រឈមមុខច្បាប់ជាធរមាន សូមអរគុណដោយក្ដីគោរពរាប់អានដ៏ខ្ពង់ខ្ពស់ពីខ្ញុំបាទ»។
លោកអះអាងថា តារាសម្ដែងច្រើនណាស់មិនមែនត្រឹមតែលោកហង្ស សម្បើមស័ក្ដនោះទេ ដែលខាងផលិតកម្មរបស់លោកឈានដល់ការប្ដឹងផ្ដល់ដល់មេធាវី ដើម្បីឱ្យតារាទាំងនោះផ្ដល់ពេលវេលាមកសម្ដែងឱ្យចប់សាច់រឿង បន្ទាប់ពីតារាទាំងនោះក្រឡុកពេលវេលាផលិតករ ហើយធ្វើឱ្យការផលិតប្រឈមនឹងបញ្ហាផលិតភាពយន្តមិនទាន់សម្រាប់រោងកុន និងសម្រាប់ដាក់លើទូរទស្សន៍ តែលោកមិនដែលបើកបង្ហាញឯកសារបណ្ដឹងនោះមុនពេលមានការវាយប្រហារពីសំណាក់លោក ហង្ស សម្បើមស័ក្ដ នោះទេ ដោយសារតែលោកយល់ថាជម្លោះតារាៗ ក៏ដូចជាផលិតករបើបែកទៅក្រៅ នឹងមានអ្នកមើលងាយតារាខ្មែរខ្លាំងឡើង។ លោកថានៅពេលតារាសិល្បៈសំបូរជម្លោះកើតឡើង អ្នកគាំទ្រមួយចំនួននឹងមានគំនិតស្អប់ដល់ស្នាដៃសិល្បៈរបស់ជាតិឯង ជាពិសេសគឺស្អប់ដល់ភាពយន្តខ្លួនឯងតែម្ដង ព្រោះតែមិនចង់គាំទ្រតារាខ្មែរ និងស្នាដៃខ្លួនឯង ទាំងនោះហើយដែលលោកយល់ថាជាការប៉ះពាល់ ហើយបើភាពយន្តខ្មែរកាន់តែបាត់ទំនុកចិត្ត ផលិតករសម្រេចចិត្តបិទទ្វារព្រោះតែរឿងឈឺក្បាលនឹងតួសម្ដែងផង គឺតារាសម្ដែងនោះទេ ដែលមានបញ្ហា។ លោកនិយាយថាអ្វីៗសុទ្ធតែមានកុងត្រា ចុះហេតុអ្វីតារាដែលមានបញ្ហាចាំបាច់បង្ហោះ ចាំបាច់បង្កជម្លោះ មិនយកច្បាប់មកប្រើ? ជាមួយគ្នានោះ លោកក៏បានបង្ហើបថា ហេតុផលដែលផលិតកម្មរបស់លោកយឺតយ៉ាវលុយតួ មិនមែនជាកំហុសរបស់ខ្លួននោះទេ ប៉ុន្តែបណ្ដាលមកពីមហាហង្សផលិតក្នុងមួយឆ្នាំៗច្រើនរឿង ហើយបណ្ដាទូរទស្សន៍មួយចំនួនក៏យឺតយ៉ាវលុយកាក់យូរៗដូចគ្នាប៉ុណ្ណោះ។ យ៉ាងណាមិញ លោកថាខ្លួនពិបាកលុយជាមួយក្រុមការងារ និងតួសម្ដែង តែសម្រាប់បុគ្គលណាដែលក្រឡុកម៉ោងពេល និងបង្កការលំបាកប៉ុណ្ណោះ។
មិនខុសគ្នាដែរ គេឃើញបណ្ដាផលិតករ និងតារារៀមច្បងកាន់តែបានទទូចអោយតារាសិល្បៈ ជាពិសេសគឺតារាជំនាន់ក្រោយ ចេះលើកបញ្ហាយកមកដាក់តុមូល ដោយកុំអាងអីចុះផ្សាយ ឬបង្ហោះហែកហួរ ដែលករណីទាំងនោះសុទ្ធតែធ្វើអោយវិស័យភាពយន្តខ្មែរ និងវិស័យសិល្បៈបាត់បង់ទំនុកចិត្ត ដែលទង្វើបែបនេះ មិនមែនស្លាប់តែក្រុមផលិតករដែលតារាៗបញ្ចេញសាច់ដុំដាក់តែម្នាក់ទេ ប៉ុន្តែគឺជាការជះឥទ្ធិពលកាន់តែខ្លាំងធ្វើឱ្យមហាជនលែងចង់គាំទ្រសិល្បៈរបស់ខ្លួន ហើយអ្នកដួលសន្លប់មុនគេ គឺវិស័យភាពយន្ត ដែលខ្សោយការគាំទ្រច្រើនទៅៗនាពេលនេះ៕

September 1, 2018
កូនខ្មែរជំនាន់ក្រោយ ស្ទើរតែមិនស្គាល់ « ល្ខោនអាប៉េ » ព្រោះល្បីថាជិតរលត់ហើយ !
មានមនុស្សតិចណាស់ដែលស្គាល់ល្ខោនអាប៉េ ព្រោះទម្រង់សិល្បៈបុរាណមួយប្រភេទនេះ ស្ទើរបាត់បង់ទៅហើយ ពោលគឺនៅត្រឹមសល់តែឈ្មោះប៉ុណ្ណោះ។ សិល្បករបុរាណខ្លះ ចាត់ទុកថា ល្ខោនអាប៉េ គឺជាសែស្រឡាយនៃល្ខោនយីកេ ដែលឈុតឆាកសម្ដែងស្ដែងនូវភាពក្រមិចប្រមើមរបស់តួអង្គ ឬយើងអាចហៅថា តួត្លុក។ មកដល់ពេលបច្ចុចប្បន្ននេះក្ដី ក៏គេពុំសូវឃើញមានការសម្ដែងទម្រង់សិល្បៈមួយប្រភេទនេះដែរ។
បើតាមប្រភពអត្ថបទដកស្រង់ពីសៀវភៅទស្សនីយភាពខ្មែរ បានឱ្យដឹងថា អាប៉េគឺជាឈ្មោះល្ខោនច្រៀងរាំបែបបុរាណមួយនៅប្រទេសកម្ពុជា ប៉ុន្តែរហូតមកដល់សព្វថ្ងៃនេះ សិល្បៈប្រភេទនេះស្ទើរសល់តែឈ្មោះប៉ុណ្ណោះ ព្រោះអាក់ខានលែងបានសម្តែងតាំងពីយូរយារណាស់មកហើយផង និងម្យ៉ាងទៀតកាលពីទម្រង់សិល្បៈនេះនៅមានសកម្មភាពសម្តែងនៅឡើយនោះ ក៏មិនសូវបានសម្តែងច្រើនប៉ុន្មានផង… គឺសម្តែងតែក្នុងតំបន់ ខ្លះៗប៉ុណ្ណោះ ជាហេតុបណ្តាលឱ្យមានអ្នកស្គាល់ ឬចេះចាំអំពីទម្រង់សិល្បៈនេះតិច ។
ប៉ុន្មានឆ្នាំក្រោយពេលរបបប្រល័យពូជសាសន៍ ប៉ុល ពត ដែលបានរំលាយវប្បធម៌ជាតិជាផេះផង់ធូលី ដួលរលំទៅនៅឆ្នាំ1979នោះ ក្នុងបំណងធ្វើឱ្យរស់ឡើងវិញនូវគ្រប់ទម្រង់សិល្បៈនៅក្នុងប្រទេសកម្ពុជា អ្នកស្រាវជ្រាវមួយក្រុមនៃនាយកដ្ឋានសិល្បៈរបស់ក្រសួងឃោសនាការវប្បធម៌ និងព័ត៌មាន បានសាកល្បងប្រមូលគ្រូ និងសិល្បករ ចាស់ៗ ដែលសេសសល់ពីការកាប់សម្លាប់ មកពិភាក្សាគ្នា ដើម្បីរំលឹកឡើងវិញ រួចបង្ហាញទម្រង់សិល្បៈទាំងនេះ ទៅតាមការចេះចាំរបស់ខ្លួន ។
ចំពោះទម្រង់សិល្បៈអាប៉េនេះ យើងសង្កេតឃើញមានមតិពីរខុសគ្នា គឺបង្ហាញទម្រង់សិល្បៈល្ខោនពីរបែបខុសគ្នា ប៉ុន្តែទាមទារឈ្មោះថា ជាសិល្បៈអាប៉េដូចគ្នា ៖
1-តាមមតិរបស់អ្នកគ្រូ ចាស់ៗខាងព្រះបរមរាជវាំង មានអ្នកគ្រូជា ខាន់ អ្នកគ្រូឯម ឆាយ ជាដើម ដែលសុទ្ធតែជាគ្រូរបាំក្បាច់បុរាណដ៏ ចំណានៗ ហើយដែលធ្លាប់រស់ និងសិក្សារៀនសូត្ររបាំព្រះរាជទ្រព្យនេះ នៅក្នុងព្រះបរមរាជវាំងតាំងពី តូចៗមកនោះ បានមានប្រសាសន៍ថាៈ
-អាប៉េ គឺជាខ្នែងដ៏តូចមួយរបស់របាំព្រះរាជទ្រព្យ ដែលគេនិយមហៅឈ្មោះថា អាប៉េ ឬយីកេសាសន៍ (យីកេសម្តែងរឿងបរទេស) ? ទម្រង់ល្ខោននេះ ជាទម្រង់ល្ខោនច្រៀងរាំ និងមាននិយាយផង ដែលអ្នកសម្តែងសុទ្ធតែ ស្រីៗ ដោយយកក្បាច់របាំបុរាណ (របាំព្រះរាជទ្រព្យ) ជាបាត ប៉ុន្តែមិនមែនក្បាច់នួន (ទន់ភ្លន់) ទេ តែច្រើនតែឡកក្រមិចក្រមើម… សម្តែងរឿងបរទេស ខ្លីៗ ដូចជារឿងចិន ចាម ជ្វា អារ៉ាប់ ឥណ្ឌា ភូមា… ដែលជាទូទៅ គឺជារឿងកំប្លុកកំប្លែង ដើម្បីកម្សាន្តសើចលេងសប្បាយប៉ុណ្ណោះ។ ឯបទភ្លេង និងចម្រៀងវិញ ក៏ភាគច្រើនមានចង្វាក់ញាប់រន្ថើន ញាក់ៗ សម្រាប់ជំរុញកាយវិការឡកក្រមិចក្រមើម ព្រមដោយពាក្យបន្ទរចម្រុះជាតិសាសន៍ ពោលគឺមានពាក្យជាភាសាខ្មែរខ្លះផង និងជាភាសាបរទេសខ្លះចម្រុះគ្នា ។
របៀបដូចបានពោលខាងលើនេះ យើងខ្ញុំជាអ្នកកត់ត្រាក៏ធ្លាប់បានឃើញខ្លះដែរ កាលពីប៉ុន្មានឆ្នាំមុនពេលដែលសង្គ្រាមស៊ីវិល ឆ្នាំ1970 បានផ្ទុះឡើង ។ ដោយកាលណោះ ឃុន មាឃ (ព្រះម្នាងម្នាក់នៃហ្លួងស៊ីសុវត្ថិ មុនីវង្ស) ដែលជាគ្រូរបាំធំ និងល្បីល្បាញបំផុតក្នុងព្រះបរមរាជវាំងក្រុងភ្នំពេញនេះ លោកបានសម្តែងបង្ហាញ ក្នុងឱកាសនោះ ។
ឯឧបករណ៍តន្ត្រីជូនសិល្បៈអាប៉េនេះវិញ ឃើញមានកូនស្គរយីកេ តូចៗ ជាមេចង្វាក់ មានរនាតឯក និងឧបករណ៍តន្ត្រី ផ្សេងៗទៀតខ្លះផង។ វង់តន្ត្រីប្រភេទនេះ ឃើញស្រដៀងគ្នានឹងវង់តន្ត្រីមួយវង់ដែលយើងធ្លាប់បានឃើញនៅខេត្តកេឡាន់តាន់ ប្រទេសម៉ាឡេស៊ី ក្នុងឆ្នាំ1969 ។
2-តាមមតិគ្រូក្រៅវាំង មានអ្នកគ្រូ ម៉ែ ម៉ឺន ដែលជាសិល្បការិនីលើឆាកដ៏ល្បីល្បាញ និងជាតារាភាពយន្តដ៏មានប្រជាប្រិយភាពផង បានពោលថា អាប៉េ គឺជាប្រភេទល្ខោននៅជនបទ ជាទម្រង់ល្ខោនច្រៀងរាំ និងនិយាយផង ដែលអ្នកសម្តែង សុទ្ធតែប្រុសទាំងអស់ សូម្បីតែតួអង្គស្រី ក៏ត្រូវយកសិល្បករមកតែងតួជាស្រីផងដែរ ហើយសម្តែងតែរឿងដែលមានលក្ខណៈកំប្លុកកំប្លែងសម្រាប់បង្កើតបរិយាកាសសើចលេងសប្បាយ ។
ឯឧបករណ៍តន្ត្រីវិញ ឃើញដូចតន្ត្រីនៃវង់សិល្បៈអាយ៉ៃ មានទ្រ ឃឹម ខ្លុយ ស្គរដៃ ហើយមានថែមទ្រអ៊ូធំមួយ ធ្វើពីប៉ោតប្រេងកាតថែមទៀតផង ។ ដើម្បីបញ្ជាក់ឱ្យឃើញជាក់ស្តែងតាមមតិទី2នេះ អ្នកគ្រូម៉ែ ម៉ឺន បានដំឡើងរឿងមួយដោយយកសិល្បករផ្នែកអាយ៉ៃ នៃនាយកដ្ឋានសិល្បៈមកសម្តែងជូនទស្សនិកជនក្នុងរយៈកាលនោះផង ។ តាមការសង្កេតរបៀបសម្តែងនេះ ឃើញមានលក្ខណៈដូចគ្នាបេះបិទទៅនឹងការសម្តែងអាយ៉ៃរឿងដែរ ។ សូមបញ្ជាក់ថា នេះយើងមិនបាននិយាយដល់មតិទី3 ដែលយកទម្រង់សិល្បៈយីកេសុទ្ធសាធ ដោយគ្រាន់តែមានតួត្លុក កាន់ឧបករណ៍ «ក្រាប់» បន្ថែមសម្រាប់ឡក… ហើយប្រកាសថា អាប៉េ ដែរផងនោះទេ ។
និយាយជារួមមកដល់សព្វថ្ងៃនេះហើយ យើងមិនទាន់មានមតិស្របគ្នាថា តើអាប៉េគឺជាទម្រង់ណាមួយ ក្នុងរូបភាពល្ខោនទាំងពីរដូចបានអធិប្បាយខាងលើនេះ ? ហើយសិល្បៈអាប៉េនេះមានប្រភពមកពីណា ? កើតមាននៅពេលណា ? នៅប្រទេសកម្ពុជាយើងនេះទេ ៕
September 1, 2018
វិចិត្រករជនជាតិបារាំង Jeremie KC ចេញវីដេអូល្ខោនខោលជារបស់ខ្មែរ
ដោយមើលឃើញថា មួយរយៈចុងក្រោយថ្មីៗនេះ មានការចាប់អារម្មណ៍ខ្លាំងពីបញ្ហារឿង ល្ខោនខោលខ្មែរ ដែលមានអ្នកលេងបណ្ដាញសង្គមហ្វេសប៊ុកនៅកម្ពុជាជាច្រើននាក់ បានធ្វើការបង្ហោះ និងចែករំលែក ក្នុងការស្នើរសុំឱ្យអង្គការ យូណេស្កូ ពិចារណាចំពោះល្ខោនខោលជាសម្បត្តិមនុស្សជាតិខ្មែរ។
ជាមួយគ្នានេះផងដែរ កាលពីប៉ុន្មានម៉ោងមុននេះ ជនបរទេសស្បែកសម្នាក់ ឈ្មោះ Jeremie KC បានចេញវីដេអូមួយនិយាយខ្មែរបានយ៉ាងច្បាស់ល្អ ដោយលោកបាននិយាយថា អំពាវនាវអោយកូនខ្មែរទាំងអស់ជួយ គាំទ្រល្ខោនខោល ហើយលោកបានបញ្ជាក់ថា ល្ខោនខោលគឺជារបស់ខ្មែរពិតៗ។ គួររំឭកផងដែរថា លោក Jeremie ជាជនជាតិបារាំងដែលប្រិយមិត្តស្គាល់ថាជាវិចិត្រករ KC Khmer Cartoon នៅលើបណ្ដាញសង្គមហ្វេសប៊ុក ហើយក៏ធ្លាប់មានបទខ្មែរផ្ទាល់ខ្លួនដែរគឺបទមានចំណងជើងថា «ខ្ញុំស្រលាញ់កម្ពុជា» ឬ “I Love Cambodia” ដែលត្រូវបានផលិតដោយលោក អ៊ែររាជ។
ចង់ដឹងថា បុរសជនជាតិបារាំងរូបនេះ បង្ហាញកាយវិកាយ និងអារម្មណ៍ស្រឡាញ់ល្ខោនខោលខ្មែរ ដល់កម្រិតណានោះ សូមទស្សនាវីដេអូខាក្រោម:
September 1, 2018
លោកតា ចេក កំពុងសង្គ្រោះបន្ទាន់នៅមន្ទីពេទ្យកាល់ម៉ែត្រ
នៅមុននេះបន្តិច ថ្ងៃទី1 ខែកញ្ញា ឆ្នាំ2018 សារព័ត៌មានឡារ៉ែន ទទួលបានដំណឹងមកថា តារាសិល្បៈកំប្លែងជើងចាស់ លោកតា ចេក ដែលមហាជនធ្លាប់បានចាប់អារម្មណ៍ និងជួយជាសកម្មភាពសប្បុរសធម៌ចំពោះរូបលោកកន្លងមក ខណៈនេះកំពុងត្រូវក្រុមគ្រួសារដឹកតាមរ៉ឺម៉កកង់បី ដើម្បីបញ្ជូនទៅមន្ទីរពេទ្យកាល់ម៉ែត ដើម្បីសង្គ្រោះបន្ទាន់ និងកំពុងខ្វះថវិកាក្នុងជីវភាពគ្រួសារ។
នៅលើបណ្ដាញទំនាក់ទំនសង្គមមុននេះ ក្រុមគ្រួសារជូនគាត់មកមន្ទីរពេទ្យ និងបានបង្ហោះឱ្យដឹងថា លោក តាចេក គាត់មានអាការអស់កម្លាំង ចេះតែវិលមុខ ហើយក្អួតចង្អោរញឹកញាប់ ស្ទើរងើបពីកន្ទេលមិនរួច ប្រហែលកន្លះខែមកហើយ ស្រាប់តែវេលាព្រឹកមិញនេះ ក្រុមគ្រួសារឃើញអាការគាត់មិនសូវស្រួល ទើបដឹកបានគាត់តាមកង់បី មកសង្គ្រោះនៅមន្ទីពេទ្យកាល់ម៉ែត្រតែម្ដង។
គួរបញ្ជាក់ដែរថា បើបងប្អូនមានបំណងជួយគាត់ ដោយទឹកចិត្តសប្បុរសធម៌ ក្នុងការព្យាបាលនោះ បងប្អូនអាចអញ្ជើញទៅជួយគាត់ដោយផ្ទាល់ ដោយគាត់ស្នាក់នៅបន្ទប់ផ្នែកខាងមុខ អគារសង្គ្រោះបន្ទាន់៕
September 1, 2018
វីតាមីន7ប្រភេទ ជួយឱ្យសម្រស់កាន់តែស្រស់ស្អាត
ផ្ទៃមុខស្រស់ស្អាតតែម្យ៉ាងមិនគ្រប់គ្រាន់ទេតែស្បែកក៏ត្រូវតែស្អាតដូចគ្នាដែរ ហើយមានវិធីច្រើនណាស់ ដើម្បីឱ្យស្បែកស្អាត ដែលក្នុងនោះមានទាំងការថែសម្រស់តាមរយៈការប្រើប្រាស់ផលិតផល ការជំនួយស្បែកតាមបែបធម្មជាតិដូចជា ការខាត់ ឬការទទួលទានជាដើម។ លេខនេះ ឡារ៉ែន សូមណែនាំអ្នកឱ្យងាកមកថែរក្សាសម្រស់តាមរយៈការដាក់បញ្ចូលវីតាមីនវិញម្តងហើយវីតាមីនទាំង7មុខនោះមានដូចជា៖
1. វីតាមីន A : និយាយដល់វីតាមីន A ធ្វើឱ្យគិតដល់ភាពភ្លឺថ្លានៃភ្នែក ប៉ុន្តែអ្នកដឹងទេថាក្រៅពីភ្នែកហើយនោះវាក៏ជួយថែរក្សាស្បែកផងដែរ។ បើអ្នកជាមនុស្សម្នាក់ក្នុងចំណោមអ្នកផ្សេងទៀតដែលមានស្បែកស្ងួតនោះ វីតាមីន A ពិតជាក្លាយជាមិត្តដែលយល់ចិត្តអ្នកបំផុតក្នុងការជួយកម្ចាត់សភាពស្បែកស្ងួត ជួយស្តារ និងជួសជុលជាលិកាស្បែកធ្វើឱ្យស្បែករលោងមានសំណើម និងស្រស់ស្រាយ។
2. វីតាមីន B Complex : មិនថាវាជា វីតាមីន B1, B2, B3, B5, B6, B7, B9, ឬជា B12 នោះទេគឺសុទ្ធតែមានគុណប្រយោជន៍សម្រាប់សម្រស់ និងសុខភាពរបស់យើងគ្រប់គ្នា។ ស្បែក សក់ ក្រចក ឈាម ភ្នែក… សុទ្ធតែទទួលបានប្រយោជន៍ជាច្រើនពីវីតាមីនទាំងប៉ុន្មានខាងលើនេះ។ អាហារដែលសម្បូរទៅដោយប្រភពវីតាមីន B ទាំងអស់នេះ ដូចជាបន្លែស្លឹកបៃតង រុក្ខជាតិពពួកសណ្តែក និងគ្រាប់សណ្តែកផ្សេងៗ សាច់សត្វ ត្រី ផលិតផលធ្វើពីទឹកដោះគោ ធញ្ញជាតិ ចេក ស៊ុត ស្រូវ និងស្រូវអូត ហើយវីតាមីន B ប្រភេទខ្លះរាងកាយអាចផលិតបានដោយខ្លួនឯង។
3. វីតាមីន C និង E : មានបញ្ហាស្បែកជ្រួញព្រោះត្រូវកម្តៅថ្ងៃខ្លាំងមែនទេ? អីុចឹង សូមជ្រើសយកវីតាមីន C និង E ចុះ ព្រោះវាមាននាទីជួយកែបញ្ហាស្បែកជ្រីវជ្រួញដែលជាមូលហេតុនាំឱ្យអ្នកចាស់ជាងវ័យ ជួយការពារស្បែកពីកម្តៅថ្ងៃ បន្ថយស្នាមរលាករោលពីកាំរស្មី UVB។
4. វីតាមីន K : សម្រាប់អ្នកដែលមានបញ្ហារង្វង់ភ្នែកខ្មៅ គួរទទួលយកវីតាមីន K មកធ្វើជាគ្រូពេទ្យព្យាបាលព្រោះវាមានចំណែកជួយការពារកុំឱ្យឈាមកកស្ទះ ធ្វើឱ្យអ្នកអាចកាត់បន្ថយស្នាមខ្មៅ និងស្នាមជាំ ប៉ុន្តែមិនចាំបាច់ដាក់បញ្ចូលទៅក្នុងរាងកាយច្រើនពេកនោះទេ ព្រោះការពិតទៅពោះវៀនតូចរបស់អ្នកក៏អាចបង្កើតវីតាមីន K ដោយខ្លួនឯងបាន ដោយអ្នកគ្រាន់តែបន្ថែមត្រឹមតែ100មីក្រូក្រាមក្នុងមួយថ្ងៃ តាមរយៈអាហារពពួកបន្លែស្លឹកបៃតង(ជាពិសេសស្ពៃប្រ៊ូខូលី និងផ្ទី) ប្រេងសណ្តែកសៀង កាហេ្វ សាច់សត្វ ទឹកដោះគោ គឺចាត់ទុកថាគ្រប់គ្រាន់ទៅហើយ។
5. រ៉ែធាតុទង់ដែង និងស័ង្កសី : សម្រាប់អ្នកដែលខ្លាចភាពជ្រីវជ្រួញគួរតែបានទទួលសារធាតុដូចជា ទង់ដែង និងស័ង្កសី។ វាមានចំណែកជួយឱ្យស្បែកតឹងណែន ដោយសារតែសារធាតុទង់ដែងមានចំណែកជួយក្នុងការបង្កើតសរសៃទឹកប្រូតេអីុន ក្នុងពេលដែលសារធាតុស័ង្កសីជួយជួសជុលសរសៃទឹកប្រូតេអីុនដែលសឹករេចរិល កាត់បន្ថយការផលិតជាតិខ្លាញ់ និងកាត់បន្ថយការកើតមុន ជួយពង្រឹងការលូតលាស់របស់កោសិកា និងព្យាបាលមុនទៀតផង។
6. Q10 : ជាខូអង់ហ្ស៊ីមដ៏សំខាន់ក្នុងការធ្វើជាសារធាតុទប់ស្កាត់រ៉ាឌីកាល់សេរី ឬជួយការពាររ៉ាឌីកាល់សេរីដែលកើតពីកាំរស្មី UV ធ្វើឱ្យស្បែករបស់អ្នកភ្លឺថ្លា បង្អង់ភាពចាស់។ អាហារដែលជាប្រភពQ10នេះគឺ ត្រីសមុទ្រទឹកជ្រៅ ប្រេងសណ្តែក ស៊ុត ត្រីសាឌីន ត្រីស្បៃកាសណ្តែកសៀង សាច់គោ ថ្លើម និងបេះដូង។
7. អាស៊ីដអាល់ហ្វាឡៃប៉ូអុីក : រាប់ថាជាសារធាតុទប់ស្កាត់រ៉ាឌីកាល់សេរីកម្រិតកំពូលតែម្តង មិនតែប៉ុណ្ណោះថែមទាំងមានចំណែកជួយក្នុងការបង្កើនប្រសិទ្ធភាពដំណើរការរបស់សារធាតុទប់ស្កាត់រ៉ាឌីកាល់សេរីផ្សេងៗដូចជា វីតាមីន C វីតាមីន E គ្លុយតាថៃអូន ឬ Q 10 ប៉ុន្តែគុណសម្បតិ្តរបស់អាស៊ីដអាល់ហ្វាឡៃប៉ូអីុកនោះអាចរលាយបានទាំងក្នុងទឹក និងខ្លាញ់ ហើយថែមទាំងអាចជ្រាបឆ្លងកាត់ភ្នាស់ស្រោមកោសិកាចូលទៅបានជ្រៅដល់កម្រិតជាភាពខុសគ្នាពីសារធាតុទប់ស្កាត់រ៉ាឌីកាល់សេរីផ្សេងៗ ដែលធ្វើឱ្យអាស៊ីដអាល់ហ្វាឡៃប៉ូអីុកច្រើនតែត្រូវបានគេនាំយកមកប្រើដើម្បីបំពេញជំនួស។ ប្រភពអាហារដែលសម្បូរទៅដោយអាស៊ីដអាល់ហ្វាឡៃប៉ូអីុក មានដូចជា សាច់ក្រហម និងគ្រឿងក្នុង។ ចំណែកក្នុងបន្លែវិញមានខ្លះៗដែរ ប៉ុន្តែមិនច្រើនណាស់ណាទេ ដូចជា ដំឡូងបារាំង ការ៉ុត និងផ្ទីជាដើម។
ចាប់ផ្តើុមងាកមករកវីតាមីនទាំង7មុខនេះពីពេលនេះតទៅ គឺមានន័យថា អ្នកកំពុងជួយឱ្យរូបសម្រស់របស់អ្នកកាន់តែស្រស់ស្អាតឡើងហើយ៕
August 31, 2018
អាចារ្យធំ គ្រាន់តែបង្ហាញក្រដាសប្រាក់រៀលមានរូបរបាំខ្មែរ
នៅដើមឆ្នាំ 2019 ខាងមុខនេះ អង្គការសហប្រជាជាតិ យូណេស្កូ និងធ្វើការប្រកាស់ជាផ្លូវការ អំពីម្ចាស់ពិតប្រាកដនៃ ល្ខោនខោល ឬ ល្ខោនពាក់របាំងមុខ ជារបស់ខ្មែរ ឬក៏របស់ថៃ ខណៈពេលដែលប្រជាពលរដ្ឋខ្មែរ កំពុងរួមគ្នាធ្វើការស៊ែរអំពី ល្ខោនខោល ពេញបណ្តាញសង្គម ដូចជា ហ្វេសប៊ុក និង ធ្វីតតឺ ជាដើម ដើម្បីឱ្យពិភពលោកកាន់តែជ្រៀបច្បាស់ថា ល្ខោនខោល ជារបស់ខ្មែរពិត។
ដូច្នោះហើយបានជាប៉ុន្មានថ្ងៃនេះប្រធានបទរឿងល្ខោនខោលបានក្លាយប្រធានបទដ៏ក្តៅកគុក ដែលធ្វើអោយប្រជាពលរដ្ឋខ្មែរ ជាពិសេសយុវជន និងតារាជួរមុខជាច្រើនបាននាំគ្នា បង្ហាញការតវ៉ា ព្រោះថាល្ខោនខោលជារបស់ខ្មែរយើងតាំងពីបុរាណកាលមក។
ជាក់ស្តែងអាចារ្យធំ ដែលតែងតែលើកស្ទួយវប្បធម៌ជាតិខ្មែរមានប្រតិកម្មភ្លាមៗ ខណៈដែលថៃបានយករូបភាពល្ខោនខូនទៅដាក់លើក្រដាសប្រាក់ 500បាតរបស់ខ្លួន គ្រាន់ជាគំនូរតែប៉ុណ្ណោះ ចំណែកក្រដាសប្រាក់របស់ខ្មែរយើង មានលើកក្រដាសប្រាក់ 500រៀលទាំងពីជំនាន់មុន ហើយមានរូបភាពយ៉ាងច្បាស់ មិនដូចថៃគ្រាន់តែគូសនៅលើក្រដាសប្រាក់ ហើយអួតថាជារបស់ខ្លួន។
ក្នុងនោះអាចារ្យធំ បានរៀបរាប់ទៀតថា« យើងក៏មានដែរយូរហើយ មិនមែនមានតែ សៀម ទេ ហើយក្រដាសប្រាក់របស់យើងជារូបឯកសារយកមកបោះពុម្ពលើក្រដាសប្រាក់តែម្តង! ចំណែករូបរបស់សៀម គឺជារូបគូរសុទ្ធសាធ គ្មានតម្លៃនោះទេ»៕
August 31, 2018
ការវិនិយោគលើកុមារតូចអាយុក្រោម 6ឆ្នាំ ពិតជាចំណេញខ្លាំងសម្រាប់ថ្ងៃអនាគត
ការអប់រំ និងអភិវឌ្ឍលើកុមារតូចជាចំណុចអាទិភាពមិនអាចខ្វះបានសម្រាប់ជីវិតកូនៗជាទីស្រឡាញ់របស់អាណាព្យាបាលគ្រប់រូប ព្រោះកាលណាកុមារទទួលបានការបណ្តុះបណ្តាលល្អទាំងផ្នែកផ្លូវចិត្ត ផ្លូវកាយ និងចំណេះដឹងនោះ កុមារនឹងមានថាមពលខ្លាំងក្លាដើម្បីក្លាយជាមនុស្សរឹងមាំអាចសម្រេចគោលដៅបានល្អនៅថ្ងៃអនាគត។ តែជាទូទៅ អាណាព្យាបាលមួយចំនួនហាក់មើលរំលងដំណាក់កាលនេះ ដោយការសន្សំលុយទុកសម្រាប់ពួកគេធំឡើងទៅវិញ។
រដ្ឋលេខាធិការក្រសួងអប់រំ យុវជន និងកីឡា លោកជំទាវ គឹម សេដ្ឋានី បានលើកឡើងថាកុមារតូចសំដៅលើកុមារទើបនឹងកើតរហូតដល់អាយុ 6ឆ្នាំ។ វ័យនេះជាវ័យដែលមានការរីកលូតលាស់ផ្នែកខួរក្បាលឆាប់រហ័សជាងមនុស្សធំដល់ទៅ 2ដងហេតុនេះអាណាព្យាបាលចាំបាច់ត្រូវយកចិត្តទុកដាក់ឱ្យបានខ្លាំងក្លាបំផុតទាំងផ្នែកអាហារសុខភាពការអប់រំ និងការគាំពារពីគ្រោះថ្នាក់នៃអំពើហិង្សា។ លោកជំទាវបានបន្ថែមថា តាមការស្រាវជ្រាវបញ្ជាក់ថា ប្រសិនបើយើងវិនិយោគលើកុមារតូច 1ដុល្លារ នៅថ្ងៃនេះ នៅពេលគេធំពេញវ័យនឹងអាចទទួលបានប្រាក់ចូលសង្គមចន្លោះពី 7ដុល្លារ ដល់14ដុល្លារវិញ អាស្រ័យលើសេដ្ឋកិច្ចសង្គមដែលពួកគេរស់នៅ។ ហេតុនេះការវិនិយោគលើកុមារតូចច្រើន អាចនឹងទទួលបានផលតបស្នងច្រើនជាងវ័យផ្សេងទៀត។
លោកជំទាវ គឹម សេដ្ឋានី បាននិយាយថា៖ “ការអប់រំកុមារតូចវ័យមុនអាយុ 6ឆ្នាំ អាចជួយឱ្យកុមារចាប់ផ្តើមមានភាពរឹងមាំ និងមានបំណិនជីវិតល្អមុនពេលពួកគេចូលសិក្សាថ្នាក់ទី1។ បើក្មេងទទួលបានការអប់រំពីឪពុកម្តាយ និងមត្តេយ្យសិក្សាបានល្អ គេនឹងមិនរត់ចោលសាលានោះទេនៅពេលពួកគេចូលរៀនថ្នាក់បឋមសិក្សា ខុសពីកុមារខ្លះដែលលំបាករៀនខ្លាំងពេករហូតចង់រត់ចោលសាលាក៏មាន”។
លោកជំទាវរដ្ឋលេខាធិការបានលើកឡើងផងដែរថា ការអប់រំកុមារតូចក៏អាចជួយដល់អាណាព្យាបាលច្រើនផងដែរជាពិសេសអ្នកម្តាយ។ កាលពីមុន កូនតូចៗត្រូវតែនៅជាប់ជាមួយនឹងម្តាយដែលធ្វើឱ្យគាត់បាត់បង់ឱកាសក្នុងការស្វែងរកចំណូល សម្រាប់អ្នកធ្វើការងារ និងអាជីវកម្មមួយចំនួន។ ហេតុនេះនៅពេលគាត់ផ្តល់ឱកាសដល់កុមារតូចក្នុងការអប់រំត្រឹមត្រូវ ម្តាយអាចនឹងមានពេលដើម្បីរួមចំណែកជាមួយស្វាមីគាត់ក្នុងការបង្កើនចំណូលសម្រាប់គ្រួសារបន្ថែមទៀត។ លោកជំទាវបញ្ជាក់ផងដែរថា កាលពី 10ឆ្នាំមុនប្រជាជនយើងមិនសូវយកចិត្តទុកដាក់លើការអប់រំកុមារតូចនោះទេ គឺវិនិយោគច្រើនលើកុមារដែលចូលរៀនចាប់ពីថ្នាក់ទី1ឡើងទៅ តែក្រោយពេលគេសិក្សាយូរទៅទើបមើលឃើញពីចំណុចខ្វះចន្លោះច្រើនដែលទាមទារឱ្យមានការខិតខំប្រឹងប្រែងខ្លាំងដើម្បីក្លាយជាធនធានមនុស្សមានសក្តានុពល។ អាណាព្យាបាលគួរផ្តល់ការវិនិយោគច្រើនលើកុមារតូច ដើម្បីផ្តល់មូលដ្ឋានគ្រឹះរឹងមាំសម្រាប់ពួកគេ កុំចាំសន្សំលុយផ្គត់ផ្គង់តែនៅពេលពួកគេធំឡើង។ នៅពេលកុមារតូចមានមូលដ្ឋានគ្រឹះរឹងមាំទាំងផ្នែកបញ្ញាស្មារតី និងរាងកាយ ពួកគេនឹងមានភាពឈ្លាសវៃ ហើយមានសមត្ថភាពខ្លាំងជាងក្មេងដែលមិនទទួលបានការបណ្តុះបណ្តាលនៅមត្តេយ្យសិក្សា។
លោកស្រី គឹម សុជាតា នាយិកាសាលាអន្តរជាតិសាស្តាបានលើកឡើងថា កុមារតូចជាវ័យសំខាន់បំផុត ព្រោះវ័យនេះជាវ័យចាប់ផ្តើមអ្វីគ្រប់យ៉ាងសម្រាប់អនាគតពួកគេ។ នៅពេលពួកគេមានការចាប់ផ្តើមល្អ ធំឡើងគេក៏នឹងមានភាពងាយស្រួលក្នុងការអភិវឌ្ឍសមត្ថភាពផងដែរ តែប្រសិនបើពួកគេមានសុខភាពមិនល្អ នោះខួរក្បាលក៏នឹងមិនអាចរីកលូតលាស់បានល្អ ដែលអាចធ្វើឱ្យគេក្លាយជាមនុស្សពិបាកអប់រំនៅថ្ងៃក្រោយ ឬក្លាយជាមនុស្សទន់ខ្សោយជាដើម។ ហេតុនេះអាណាព្យាបាលគួរវិនិយោគលើការអប់រំ កូនតូចឱ្យបានច្រើន ល្អជាងការព្យាយាមព្យាបាល និងជួសជុលបញ្ហានៅពេលគេធំទៅហើយនោះ។
លោកស្រី គឹម សុជាតា បាននិយាយថា៖ “មនុស្សជាច្រើន គិតថាកុមារតូចៗមិនទាន់យល់ពីអ្វីដែលមនុស្សធំបង្រៀននោះទេ តែតាមពិតកុមារចាប់ផ្តើមទទួលចំណេះដឹងតាំងពីវ័យតូចៗបំផុតហេតុនេះការថែទាំសុខភាព និងបង្រៀនដោយអ្នកជំនាញ អាចជំរុញពួកគេឱ្យក្លាយជាមនុស្សមានទម្លាប់ល្អ និងក្លាយជាមនុស្សមានភាពទទួលខុសត្រូវជាដើម”។
លោកស្រី គឹម សុជាតា បានលើកឡើងថាកុមារវ័យចាប់ពី 2-3ឆ្នាំទៅ ជាវ័យដែលកំពុងរីកលូតលាស់ខ្លាំង និងជាវ័យដែលត្រូវប្រុងប្រយ័ត្ន ហេតុនេះដើម្បីធានាថា ពួកគេអាចក្លាយជាមនុស្សល្អបាននៅថ្ងៃអនាគត អាណាព្យាបាលក៏ចាំបាច់ត្រូវសិក្សាផងដែរពីជំនាញក្នុងភាពជាអាណាព្យាបាល ដើម្បីជួយអប់រំពួកគេទាំងនៅសាលា និងនៅក្នុងគ្រួសារឱ្យទទួលបានភាពកក់ក្តៅ ហើយកាត់បន្ថយផលអវិជ្ជមាននានាដែលកើតលើកុមារ។ នៅពេលកុមាររស់នៅក្នុងបរិស្ថានល្អប្រសើរ គេនឹងអាចអភិវឌ្ឍបានយ៉ាងប្រសើរដើម្បីក្លាយជាមនុស្សល្អម្នាក់ និងបង្កើតមោទនភាពសម្រាប់អាណាព្យាបាល៕
August 31, 2018