Category: សង្គម និងសេដ្ឋកិច្ច

ចូលរួមរំលែកទុក្ខ !! លោកតា ម៉ម ប៊ុតណារាយ កវីនិពន្ធចម្រៀងល្បីៗជូនអធិរាជសំឡេងមាស លោក ស៊ិន ស៊ីសាមុត ទទួលមរណភាព
ពិតជាភ្ញាក់នៅលើបណ្ដាញសង្គមហ្វេសប៊ុក ដែលនៅពេលថ្មីៗនេះ សារព័ត៌មានឡារ៉ែន បានទទួលដំណឹងមកថា កវីនិពន្ធបទចម្រៀងជាច្រើនបទឱ្យអធិរាជចម្រៀងខ្មែរ លោក ស៊ិន ស៊ីសាមុត គឺលោកតា ម៉ម ប៊ុតណារាយ បានទទួលមរណភាព ក្នុងវ័យ85ឆ្នាំ នៅម៉ោង9 ព្រឹក ថ្ងៃទី3ខែកញ្ញា ឆ្នាំ 2018 ។
បើតាមការបង្ហោះសារនៅលើបណ្ដាញសង្គមហ្វេសប៊ុក លោក ម៉ម ប៊ុនណារា ត្រូវជាកូនប្រុសបង្កើតរបស់លោក ម៉ម ប៊ុតណារាយ បានបញ្ជាក់ថា ពិធីបុណ្យសពលោក ម៉ម ប៊ុតណារាយ ត្រូវរៀបចំតម្កល់ ធ្វើបុណ្យនៅព្រះវិហារកាតូលិកផ្សារតូច ផ្លូវជាតិលេខ5 ក្បែរសាលាប៊ែលធី។
គួររំឭកផងដែលថា លោក ម៉ម ប៊ុតណារាយ ត្រូវបានគេស្គាល់ថាជាតន្ត្រីករឆ្នើម និងជាអ្នកសម្រួលតន្ត្រីភ្លេងឱ្យអធិរាជសំឡេងមាស លោក ស៊ិន ស៊ីសាមុត និងជាកវីនិពន្ធចម្រៀងល្បីមួយរូប ដោយមានបទចម្រៀងល្បីៗដូចជា កម្មប្រចាំកាយ, មេត្តារៀមផង, កំពង់ធំជំរំចិត្ត, ស្ទឹងកែវ, បិសាចក្រមុំ និង ជើងមេឃពណ៌ខ្មៅ ជាដើម៕
September 4, 2018
កម្ពុជាកំពុងអភិវឌ្ឍពីប្រទេសខ្វះស្បៀង ក្លាយជាប្រទេសផលិតស្បៀងលើសតម្រូវការ
ប្រទេសកម្ពុជានៅតែចាត់ទុកវិស័យកសិកម្មជាវិស័យស្នូលនៃខឿនសេដ្ឋកិច្ចជាតិ ព្រោះកម្ពុជាជាប្រទេសដែលមានអំណោយផលខាងកសិកម្ម ស្របនឹងទិសដៅគោលនយោបាយឆ្នាំ2014-2018នៃវិស័យកសិកម្ម ដែលត្រូវជំរុញកំណើនផលិតកម្មកសិកម្មឱ្យកើនឡើងក្នុងរង្វង់5% ដែលនឹងបានចូលរួមចំណែកប្រមាណជា24,9% នៃផលិតផលក្នុងស្រុកសរុប(GDP)។ នេះបើតាមការអះអាងរបស់មន្ត្រីជាន់ខ្ពស់នៃក្រសួងកសិកម្ម រុក្ខាប្រមាញ់ និងនេសាទ។
ឯកឧត្តម ទី សុគន្ធ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា កាលពីឆ្នាំ2017កម្ពុជានៅសល់ស្រូវជាង 5.5លានតោន គិតជាអង្ករស្មើនឹងជាង 3.5លានតោនសម្រាប់បម្រើឱ្យការនាំចេញ ដែលជាមោទនភាពមួយរបស់ប្រទេសកម្ពុជាក្នុងការប្រែក្លាយពីប្រទេសដែលខ្វះខាតស្បៀងអាហារ ទៅជាប្រទេសផលិតស្រូវលើសតម្រូវការប្រើប្រាស់ក្នុងស្រុក។ នៅក្នុងវិស័យកសិកម្មនេះផងដែរ ផ្នែកដំណាំបានចូលរួមចំនួន13% ផ្នែកផលិតកម្មសត្វចំនួន2.6%, ផ្នែកជលផល5.5% និងផ្នែកព្រៃឈើ1.6% ។
ឯកឧត្តមបន្ដថា៖ «ក្រៅពីផ្នែកដំណាំ ផ្នែកផលិតកម្មសត្វក៏បាននឹងកំពុងដើរតួយ៉ាងសំខាន់ក្នុងការជំរុញកំណើនវិស័យកសិកម្ម និងការកាត់បន្ថយភាពក្រីក្រនៅជនបទផងដែរ។ «នេះគឺដោយសារការចូលរួមពីគម្រោងដៃគូអភិវឌ្ឍន៍ ដែលជាកម្លាំងចលករមួយជួយជំរុញឱ្យវិស័យកសិកម្មសម្រេចទៅបានតាមទិសដៅកំណត់»។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានលើកឡើងដែរថា ខេត្តសៀមរាបក្រៅពីជាតំបន់ទេសចរណ៍ដែលសម្បូរដោយប្រាង្គប្រាសាទជាច្រើន ពិសេសប្រាសាទអង្គរវត្តដែលល្បីល្បាញលើពិភពលោកហើយនោះ ខេត្តនេះក៏មានសក្តានុពលលើវិស័យកសិកម្មផងដែរ។ «បច្ចុប្បន្នខេត្តសៀមរាប មានកសិដ្ឋានដាំដុះបន្លែសរីរាង្គ និងកសិដ្ឋានចិញ្ចឹមសត្វជាច្រើនដែលកំពុងផ្គត់ផ្គង់ដល់សេចក្ដីត្រូវការនៅតាមសណ្ឋាគារ និងប្រជាពលរដ្ឋក្នុងមូលដ្ឋាន»។
គួរកត់សម្គាល់ថា សិក្ខាសាលានេះត្រូវបានគាំទ្រ និងរៀបចំក្រោមកិច្ចសហការរវាងក្រសួងកសិកម្ម រុក្ខាប្រមាញ់ និងនេសាទ និងគំនិតផ្តួចផ្តើមស្តីអំពីកិច្ចសហប្រតិបត្តិការស្បៀង និងកសិកម្មអាស៊ី ហៅកាត់ (អាហ្វាស៊ី-AFACI) នៃរដ្ឋបាលជនបទនៃសាធារណរដ្ឋកូរ៉េ។ ក្នុងគោលបំណងដើម្បីពិនិត្យលើវឌ្ឍនភាពការងារ ចែករំលែកព័ត៌មាន និងចំណេះដឹង និងដើម្បីពង្រឹងភាពជាដៃគូ និងកិច្ចសហប្រតិបត្តិការរវាងប្រទេសជាសមាជិកទាំង14 របស់អាហ្វាស៊ី រួមមានប្រទេសកម្ពុជា សាធារណរដ្ឋកូរ៉េ គីហ្សីស្ថាន បង់ក្លាដេស ប៊ូតាន ហ្វីលីពីន ឥណ្ឌូនេស៊ី នេប៉ាល់ មីយ៉ាន់ម៉ា ម៉ុងហ្គោលី ស្រីលង្កា ថៃ ឡាវ និងវៀតណាម ។
លោកបណ្ឌិត ហ្សឹង ហ្សូលី ប្រធានវិទ្យាស្ថានជាតិវិទ្យាសាស្ត្រសត្វនៃរដ្ឋបាលជនបទនៃសាធារណរដ្ឋកូរ៉េ បានថ្លែងថា៖ «សិក្ខាសាលានាពេលនេះពិតជាផ្តល់ឱកាសក្នុងការចែករំលែកលទ្ធផលការងារ និងពិភាក្សាលើផែនការការងារសម្រាប់ឆ្នាំបន្ទាប់លើគម្រោងចំនួន២ គឺបច្ចេកទេសកសិកម្មសរីរាង្គ និងធនធានហ្សេនេទិកសត្វ»។ លោកថ្លែងថា៖ «អាហ្វាស៊ី ត្រូវបានបង្កើតឡើងនៅឆ្នាំ2009 ក្នុងគោលបំណងកែលម្អផលិតកម្មស្បៀង ពង្រឹងផលិតកម្មកសិកម្មប្រកបដោយនិរន្តរភាព និងជំរុញការផ្លាស់ប្តូរបច្ចេកទេស និងព័ត៌មានរវាងប្រទេសជាសមាជិក ដែលប្រទេសកម្ពុជា គឺជាសមាជិកមួយក្នុងចំណោមសមាជិកដំបូងគេរបស់អាហ្វាស៊ី»៕
September 4, 2018
Watford ធ្វើឱ្យ Spurs ស្រឡាំងកាំង ដើម្បីបន្តការចាប់ផ្តើមយ៉ាងល្អ
ការចាប់ផ្តើមយ៉ាងល្អរបស់ក្រុម Watford នៅរដូវកាលនេះ បានឈានដល់ចំណុចកំពូលថ្មីមួយ ខណៈដែលពួកគេបានកត់ត្រាជ័យជម្នះ៤លើកជាប់ៗគ្នាពីការប្រកួតទាំង៤លើកនៃក្របខ័ណ្ឌ Premier League ក្រោយពីបានកត់ត្រាជ័យជម្នះដ៏មិននឹកស្មានដល់ក្នុងលទ្ធផល ២-១ លើក្រុម Tottenham កាលពីថ្ងៃអាទិត្យ។
ក្រោយពីបានដេញតាមពីក្រោយដោយសារតែការធ្វើឲ្យបាល់ចូលទីខ្លួនឯងរបស់កីឡាករ Abdoulaye Doucoure នៅនាទី ទី៥៤ ក្រុម Watford បានធ្វើការវាយបកវិញយ៉ាងល្អ ដើម្បីរកបាន៣ពិន្ទុពេញតាមរយ់ការតែតបាល់បញ្ចូលទីពីសំណាក់កីឡាករ Troy Deeney និង Craig Cathcart។
គ្រប់គ្នានៅតែរង់ចាំមើលថាក្រុមរបស់លោក Javi Gracia នៅតែបន្តស្ថិតក្នុងចំណាត់ថ្នាក់ជាមួយនឹងខ្លាំងរយៈពេលយូរប៉ុណ្ណា ប៉ុន្តែ ជ័យជម្នះនេះ បានបង្ហាញថា បច្ចុប្បន្ន ពួកគេកំពុងតែស្ថិតក្នុងចំណាត់ថ្នាក់ដ៏ខ្ពស់។
ក្រុម Watford បានកត់ត្រាជ័យជម្នះក្នុងការប្រកួតក្របខ័ណ្ឌលីក៤ប្រកួតដំបូងរបស់ពួកគេជាលើកទី១ បើគិតចាប់តាំងពីឆ្នាំ១៩៨៨ និងកំពុងតែមានពិន្ទុស្មើជាមួយក្រុម Liverpool និងក្រុមឈរលេខ២ Chelsea មុននឹងឈានទៅកាន់ការសម្រាកសម្រាប់ការប្រកួតអន្តរជាតិ។
ក្រោយពីបានផ្តួលក្រុម Brighton, Burnley និង Crystal Palace ក្នុងការប្រកួតបើកឆាក៣លើកដំបូងរបស់ខ្លួន នេះគឺជាការទទួលជ័យជម្នះជាលើកទី១របស់ក្រុម Watford នៅពេលប្រកួតជាមួយនឹងក្រុមខ្លាំងទាំង។
គ្រាប់បាល់ស៊ុតបញ្ចូលទី២គ្រាប់ពីសំណាក់ខ្សែប្រយុទ្ធ Romelu Lukaku បានជួយឲ្យលោក Jose Mourinho ដណ្តើមបានជ័យជម្នះដ៏សំខាន់ក្នុងលទ្ធផល ២-០ នៅលើទឹកដីក្រុម Burnley កាលពីថ្ងៃអាទិត្យ បើទោះបីវាបានក្លាយជាថ្ងៃប្រកួតងដ៏ចម្រូងចម្រាស់សម្រាប់ក្រុម Manchester United របស់លោកក៏ដោយ៕
ប្រភពពី៖ Channel News Asia
September 4, 2018
រដ្ឋបាលខេត្ត Guangxi Zhaung របស់ចិនគ្រោងពង្រីកពាណិជ្ជកម្មបន្ថែមជាមួយកម្ពុជា
គណៈប្រតិភូនៃតំបន់ស្វយ័តនៅខេត្ត Guangxi Zhaung ប្រទេសចិន ដឹកនាំដោយ ឯកឧត្តម Ding Xiangqun អនុប្រធាននៃរដ្ឋាភិបាលរបស់តំបន់ស្វយ័តនៃខេត្ត Guangxi Zhaungបានអញ្ជើញមកបំពេញទស្សនកិច្ចនៅប្រទេសកម្ពុជាចាប់ពីថ្ងៃទី27 ដល់ថ្ងៃទី30 ខែសីហា ឆ្នាំ2018។ ការបំពេញទស្សនកិច្ចក្នុងពេលកន្លងមកនេះ ក្នុងគោលបំណងលើកកម្ពស់ការធ្វើពាណិជ្ជកម្ម និងវិនិយោគរវាងប្រទេសកម្ពុជា និងខេត្ត Guangxi Zhaung នៃសាធារណរដ្ឋប្រជាមានិតចិន។
ក្នុងជំនួបជាមួយប្រតិភូចិន ឯកឧត្តម ជា ចាន់តូ អគ្គទេសាភិបាលនៃធនាគារជាតិនៃកម្ពុជា បានបង្ហាញពីស្ថានភាពសេដ្ឋកិច្ច និងការអភិវឌ្ឍរីកចម្រើនរបស់ប្រទេសកម្ពុជា និងទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសទាំង2។ នៅប្រទេសកម្ពុជាវិនិយោគិនចិនជាច្រើនបានមកវិនិយោគលើវិស័យសំខាន់ៗមួយចំនួនដូចជា វិស័យកាត់ដេរ សំណង់ កសិកម្ម ក៏ដូចជាវិស័យធនាគារ និងហិរញ្ញវត្ថុដែលសព្វថ្ងៃមានធនាគារចិនចំនួន2 កំពុងធ្វើប្រតិបត្តិការនៅប្រទេសកម្ពុជា គឺធនាគារ អាយ ស៊ី ប៊ី ស៊ី និងធនាគារចិនសាខាភ្នំពេញ។
ឯកឧត្តម Ding Xiangqun អនុប្រធាននៃរដ្ឋាភិបាលរបស់តំបន់ស្វយ័តនៃខេត្ត Guangxi Zhaung ក៏បានមានប្រសាសន៍ថា ក្នុងរយៈពេលប៉ុន្មានឆ្នាំចុងក្រោយនេះ ប្រទេសកម្ពុជាមានការអភិវឌ្ឍរីកចម្រើនគួរឱ្យកត់សម្គាល់។ ការវិនិយោគរបស់វិនិយោគិនចិននៅប្រទេសកម្ពុជា ក៏មានការកើនឡើងគួរឱ្យកត់សម្គាល់ផងដែរទាំងទំហំ និងប្រតិបត្តិការ។ បើគិតត្រឹមឆ្នាំ2017 ការនាំចេញពីខេត្ត GuangXiZhaung មកកម្ពុជា មានប្រមាណ 69,3លានដុល្លារអាមេរិក ហើយមានសហគ្រាសធំៗចំនួន28 បានមកវិនិយោគនៅប្រទេសកម្ពុជា ដែលមានទឹកប្រាក់សរុបប្រមាណ 1ប៊ីលានដុល្លារអាមេរិក។
រីឯប្រតិបត្តិការឆ្លងដែនរវាងប្រាក់រៀល និងប្រាក់យន់ក៏មានការអភិវឌ្ឍរីកចម្រើនផងដែរ បន្ទាប់ពីបានសម្ពោធដាក់ឱ្យដំណើរការដោះដូររវាងប្រាក់រៀល និងប្រាក់យន់ក្នុងទីផ្សារអន្តរធនាគារនៅតំបន់ស្វយ័ត Guangxi Zhaung ប្រទេសចិនកាលពីខែកញ្ញា ឆ្នាំ2017កន្លងមក។ ដោយសារខេត្ត GuangXiZhaung ជាចំណុចកណ្តាលសម្រាប់តភ្ជាប់រវាងប្រទេសចិន និងប្រទេសតំបន់អាស៊ាន រដ្ឋបាលតំបន់ស្វយ័តនៃខេត្តនេះបាន និងកំពុងដើរតួនាទីស្នូលក្នុងការពង្រីកកិច្ចសហប្រតិបត្តិការរវាងប្រទេសចិន និងតំបន់អាស៊ាន។
នៅក្នុងជំនួបនេះ ឯកឧត្តម Ding Xiangqun បានសំណូមពរបន្តពង្រឹងទំនាក់ទំនង និងកិច្ចសហប្រតិបត្តិការលើគ្រប់វិស័យ ដើម្បីជំរុញការអភិវឌ្ឍឱ្យកាន់តែប្រសើរឡើងស្របតាមយុទ្ធសាស្ត្រ ខ្សែក្រវាត់មួយ-ផ្លូវមួយ៕
September 4, 2018
តារាវ័យក្មេងជប៉ុន Ikee ជាប់ជាអត្តពលិកឆ្នើមបំផុតប្រចាំ Asian Games
ក្រោយពីព្រឹត្តិការណ៍កីឡា Asian Games ត្រូវបានបិទបញ្ចប់ជាស្ថាពរកាលពីយប់ថ្ងៃអាទិត្យ កីឡាការិនីហែលទឹករបស់ជប៉ុន Rikako Ikee ដែលបានក្លាយជាស្ត្រីដំបូងគេក្នុងការឈ្នះមេដាយមាស៦ក្នុងយុទ្ធនាការកីឡាអាស៊ីតែមួយនោះ ត្រូវបានបោះឆ្នោតឲ្យជាប់ជាអត្តពលិកឆ្នើមបំផុតប្រចាំយុទ្ធនាការ។
កីឡាការិនីដ៏ស្រស់សោភាវ័យ១៨ឆ្នាំរូបនេះ បានឲ្យដឹងថា៖ «ខ្ញុំនៅតែមិនទាន់ឈ្នះជើងឯកពិភពលោកនៅឡើយទេ ហេតុនេះ នោះគឺជាគោលដៅបន្ទាប់របស់ខ្ញុំ»។ ជាមួយនឹងការឈ្នះពានកិត្តិយសនេះ Ikee ក៏ទទួលបានប្រាក់រង្វាន់លើកទឹកចិត្តចំនួន៥ម៉ឺនដុល្លារផងដែរ។
ស្របពេលជាមួយគ្នានេះ ចិន បានបញ្ចប់ដោយឈរលេខ១នៅលើតារាងមេដាយរបស់ព្រឹត្តិការណ៍កីឡាអាស៊ី ជាលើកទី១ជាប់ៗគ្នា បើគិតចាប់តាំងពីបានគ្រប់គ្រងលើតារាងមេដាយមាសក្នុងទីក្រុង New Delhi កាលពីឆ្នាំ១៩៨២ ជាមួយនឹងការឈ្នះមេដាយមាសរុបនៅឥណ្ឌូនេស៊ី ចំនួន១៣។
បច្ចុប្បន្ន ពួកគេនឹងសម្លឹងរកការរក្សាភាពខ្លាំងរបស់ខ្លួន តាមរយៈការសម្រេចនូវសមិទ្ធផលដ៏អស្ចារ្យរបស់ខ្លួនក្នុងព្រឹត្តិការណ៍កីឡាអូឡាំពិក ឆ្នាំ២០២០ នៅទីក្រុងតូក្យូ ដែលជាទីក្រុងម្ចាស់អាណានិគមក្នុងសម័យសង្គ្រាមរបស់របស់ខ្លួន។
ដោយឡែក ជប៉ុន ដែលបានឈ្នះមេដាយមាសទី៤៦៥របស់ខ្លួនរបស់កីឡា Asian Games ក្នុងការប្រកួតលើវិញ្ញាសាកីឡាទ្រីយ៉ាត្លុងជាក្រុមចម្រុះនោះ បានស្ថិតក្នុងចំណាត់ថ្នាក់លេខ២ជាមួយនឹងការឈ្នះមេដាយមាសសរុប៧៥ ស្របពេលដែលកូរ៉េខាងត្បូង បានឈ្នះមេដាយមាស៤៩ ហើយម្ចាស់ផ្ទះឥណ្ឌូនេស៊ី បានបញ្ចប់ដោយឈ្នះមេដាយមាស៣១៕
ប្រភពពី៖ Channel News Asia
September 4, 2018
ក្នុងឱកាសគម្រប់ខួបកូនប្រុស លោក ឡេង ណាវ៉ាត្រា បរិច្ចាគ 10 ម៉ឺនដុល្លារកសាងផ្លូវជូនប្រជាពលរដ្ឋ
នៅថ្ងៃ3 ខែ កញ្ញា មុននេះ គេបានដឹងថា ម្ចាស់ផលិតកម្ម Galaxy ដែលបានវិវត្តន៍ខ្លួនក្លាយជាឧកញ៉ាវ័យក្មេងក្រោយជោគជ័យក្នុងជំនួញដីធ្លី លោក ឡេង ណាវ៉ាត្រា បានបរិច្ចាគថរិកាប្រមាណជា10 ម៉ឺនដុល្លារ ជាថវិកាទាំងស្រុងរបស់លោកផ្ទាល់ ក្នុងការកសាងផ្លូវក្នុងសង្កាត់ចោមចៅ និងចុះមើលករដ្ឋានផ្ទាល់ ស្របពេលថ្ងៃគម្រប់ខួបកំណើតរបស់កូនប្រុសលោកតែម្ដង។
នេះជាការសកម្មភាពជួយដល់សង្គមមួយថ្មីបន្ទាប់ពីលោកបានក្លាយជាអ្នកមានបាន បន្ទាប់ពីលោកត្រូវគេស្គាល់យ៉ាងខ្លាំងក្នុងសកម្មភាពបរិច្ចាគទានដល់ជនទុរគត និងបានជួយថវិកាជូនដល់មន្ទីរពេទ្យគន្ធបុប្ផា ច្រើនលើករួចមកហើយ។
ប្រភពដែលបានចែកចាយព័ត៌មានចុះសាងសង់ផ្លូវរបស់លោកបានធ្វើការបង្ហោះថា គឺជារឿងប្រពៃណាស់ ដែលអតីតារាចម្រៀងហើយបានក្លាយជាបុគ្គលជោគជ័យក្នុងសង្គមមួយនេះ បានចំណាយលុយផ្ទាល់ខ្លួន និងបានទាំងចុះទៅមើលការចាក់បេតុងដោយផ្ទាល់ទៀត ដើម្បីឱ្យផ្លូវមួយខ្សែដែលលោកប្រកាសថា នេះជាការបរិច្ចាគទឹកចិត្តសប្បុរស ដែលជាកាដូជូនកូនប្រុសនាថ្ងៃកំណើត។
លោកឡេង ណាវ៉ាត្រា បានប្រាប់អ្នកសារព័ត៌មានឡារ៉ែនថា ហេតុផលដែលលោកសម្រេចចិត្តចំណាយថវិកាដ៏ច្រើន សង់ផ្លូវមួយខ្សែជូនដល់អ្នកភូមិក្នុងសង្កាត់ចោមចៅ គឺដោយសារតែលោកមានបំណងអបអរដល់កំណើតកូនប្រុស និងដោយសារតែលោកក៏ទទួលបានសំណូមពរពីសំណាក់អ្នករស់នៅក្នុងនៅតាមបណ្ដោយផ្លូវនោះ ថ្ងូរថាពិបាកធ្វើដំណើរជាពិសេសនៅពេលធ្លាក់ដក់ទឹកម្ដងៗ។ លោកថាខ្លួនមិនមានអ្វីចងដៃដល់កូនប្រុសឱ្យច្រើននោះទេ ទើបសម្រេចចិត្តធ្វើសេចក្ដីល្អមួយ ដោយការចំណាយលុយសង់ផ្លូវទុកជូនអ្នកភូមិបានធ្វើដំណើរ ដើម្បីសន្សំកុសលចងដៃដល់កូនប្រុសដែលជាដំណក់ឈាមរបស់ខ្លួន។
ចុងក្រោយ លោកបានបញ្ជាក់បន្ថែមថា ខ្លួននឹងរក្សាទុកនូវសេចក្ដីល្អក្នុងពេលមានបាន ដោយរំពឹងតែម្យ៉ាងថាអំពើរល្អទាំងនោះ នឹងជួយឱ្យលោកកាន់តែជោគជ័យក្នុងអាជីព និងជួយធ្វើឱ្យកូនប្រុសរបស់លោកក្លាយជាក្មេងមានសំណាង និងអាចជំនួសដៃជើងលោកបាននៅពេលដឹងក្ដី៕
September 4, 2018
ខេមរៈ សិរីមន្ត បង្ហាញមុខកូនស្រីដ៏គួរឱ្យស្រឡាញ់
តារាចម្រៀងប្រុសមានឈ្មោះបោះសំឡេងក្នុងស្រទាប់សិល្បៈ និងជាតារាជួរមុខមួយរូប គឺលោក ខេមរៈ សិរីមន្ត មួយរយៈចុងក្រោយមកនេះ ត្រូវបានគេសង្កេតឃើញថា ជីវិតឯកជនរបស់លោក ហាក់ឈប់បិទបាំងទៀតហើយ។ ការកត់សម្គាល់បែបនេះ បន្ទាប់ពីកាលពីមួយរយៈមុន លោកបានបញ្ចេញមុខ ភរិយាក្នុងឱកាសចូលរួមកិច្ចការងារសង្គម។ យ៉ាងណាមិញ មហាជនមានការចាប់អារម្មណ៍ខ្លាំង បន្ទាប់ពីចូលដើមខែកញ្ញាភ្លាម តារាប្រុសរូបនេះ បានបញ្ចេញមុខកូនស្រីជាទីស្រឡាញ់ ជាលើកដំបូង។
ហើយនៅពេលនេះ លោក ខេមរៈ សិរីមន្ត ហាក់បីដូចមិនខ្លាចធ្លាក់ប្រជាប្រិយភាពដូចមុនទៀតហើយ និងកាន់តែធ្វើឱ្យមហាជនចាប់អារម្មណ៍ជាខ្លាំងចំពោះជីវិតឯកជនរបស់លោក។ តាមរយៈការបង្ហាញវត្តមានកូនស្រីលើកដំបូង ក្នុងបណ្តាញសង្គមហ្វេសប៊ុកនេះ គឺត្រូវបានបន្ទាប់ពីតារាប្រុសល្បីឈ្មោះ ខេមរៈ សិរីមន្ត ជូនកូនស្រីទៅសាសាររៀន ដោយបង្ហោះរូបភាពមួយសន្លឹក ភ្ជាប់ជាមួយនឹងសារថា «ជូនសំណព្វចិត្តទៅរៀនថ្ងៃដំបូង»។
គួរកត់សម្គាល់ដែរថា មហាជនជាច្រើនបានសរសើរថា លោក ខេមរៈ សិរីមន្ត ឯភរិយាក៏ស្រស់ស្អាត ចំណែកកូនវិញមិនធម្មតា ស្អាតតាំងពីក្មេងទៅហើយ ធំឡើងប្រាកដជាកាន់តែស្អាតទៀត៕
September 3, 2018
ដេននី ក្វាន់ និងបងប្អូនស្រី សម្ញែងភាពសិចស៊ីក្នុងអាងទឹក
រាជនីចិត្តធម៌កញ្ញា ដេននី ក្វាន់ គឺជាតារាសម្តែងមួយរូបដែលស្រស់ស្អាតមិនចាញ់តារាបរទេស និយមលេងខ្លួនបែបសិចស៊ី និងចូលចិត្តបង្អួតសំភារៈប្រើប្រាស់នានា ដូចជាផ្ទះ លុយ ឡាន ជាដើម នៅក្នុងបណ្តាញសង្គម។ ថ្វីបើកញ្ញា ដេននី ក្វាន់ មើលទៅហាក់ដូចជារៀងសម្ញែងបន្តិចមែន ប៉ុន្តែកញ្ញា កន្លងមកក៏បានចូលរួមយ៉ាងសកម្មក្នុងការងារសង្គម និងជួយមនុស្សទីទាល់ក្រជាច្រើនផងដែរ។
អ្វីដែលគួរឱ្យកត់សម្គាល់ បងប្អូនរបស់ កញ្ញា ដេននី ក្វាន់ ទាំងអស់គឺសុទ្ធតែមានរូបសម្រស់ស្រស់សោភា ហើយនិយមលេខខ្លួនសិចស៊ី បង្ហាញរាងកាយដ៏ទាក់ទាញរបស់ពួកគេ ប្រកបដោយទំនុកចិត្ត ហើយកាលពីពេលថ្មីៗនេះ កញ្ញា ដេននី ក្វាន់ និងបងប្អូនរបស់កញ្ញា2នាក់ទៀត បាន live វីដេអូ កំពុងទៅហែលទឹកនៅកន្លែងកំសាន្តមួយ ដោយពួកគេបានស្លៀកឈុតហែលទឹក មើលទៅគឺពិតជាស្រស់ស្អាតខ្លាំងណាស់។ ប៉ុន្តែ ខណៈកំពុង Live នោះ ស្រាប់តែ កញ្ញា ដេននី ក្វាន់ និងបងប្អូនរបស់កញ្ញា2នាក់ បានផ្ទុះកំហឹងជាមួយនឹងអ្នកចូល បញ្ចេញមតិ ក្នុងវីដេអូរបស់ពួកគេ។ ចង់ដឹងថាបែបណានោះ សូមទស្សនាវីដេអូខាងក្រោមនេះ៖
September 3, 2018
ពេជ្រ ថៃ បញ្ចេញសមត្ថភាពនិពន្ធចម្រៀង « ព្រះគុណម៉ែចាស់ »
ក្រោយបាត់បង់ម៉ែចាស់ជាទីស្រលាញ់ ដែលខំមើលថែខ្លួនអស់ពេលជាច្រើនឆ្នាំ តារាចម្រៀងវ័យក្មេង ពេជ្រ ថៃ បានបួសសងគុណម្ដាយចាស់អស់រយៈពេលខ្លី និងបានសឹក ហើយត្រឡប់ចូលសិល្បៈជាធម្មតាវិញ ដើម្បីរកប្រាក់ចំណូលបន្ទាប់ពីការសិក្សារបស់ខ្លួន។ ជាក់ស្តែងនៅថ្មីនេះ ប្រិយមិត្តជាច្រើនប្រាកដជាបានជ្រាបហើយថា តារាវ័យក្មេងរូបនេះបានបញ្ចេញសមត្ថភាព តែងកំណាព្យដែលនិយាយរៀបរាប់ពីដំណើរដើមទង នៃការរស់នៅក្រោមការចិញ្ចឹមបីបាច់របស់ម្ដាយចាស់។ មិនត្រឹមតែប៉ុណ្ណោះទេ មហាជនជាច្រើនសរសើរ ដល់ប្អូនប្រុសគ្រប់គ្នាតែម្តង ចំពោះភាពកត្តញូដែលខ្លូនមានចំពោះលោកយាយ និងក្រុមគ្រួសារ ។
យ៉ាងណាមិញ លោកយាយបានទទួលមរណភាពអស់រយៈប្រមាណជិត 2 ខែហើយ តែតារាវ័យក្មេងរូបនេះក៏ត្រៀមចេញចម្រៀងរំលឹកទៅដល់ម៉ែចាស់ ដែលបង្ហាញពីអារម្មណ៍នឹកអាល័យដល់អ្នកមានគុណធំ ដោយចម្រៀងនោះក្រោមការនិពន្ធស្នាដៃ ចេញពីគំនិតខ្លួនឯងផ្ទាល់ និងជាមួយនឹងឪពុកជាទីស្រលាញ់ផងដែរ។ នៅក្នុងនោះដែរ គ្រាន់តែឃើញអត្ថន័យបទចម្រៀង ដោយមិនទាន់បានស្តាប់ផង ក៏មានអារម្មណ៍ថាក្តុកក្តួល និងអាណិតដល់រូបប្អូនជាខ្លាំង ដែលបានតែងតែមិនភ្លេចដល់អ្នកមានគុណបែបនេះ។
ដើម្បីឱ្យកាន់តែជាក់ច្បាស់ សូមរូបភាពខាងក្រោមនេះ ៖

September 3, 2018
ខាត់ សុឃីម ប្រតិម្មចំពោះគណនីហ្វេសប៊ុកថៃក្លែងក្លាយ ដែលបានបង្ហោះសារបែបនេះ….
នៅពេលថ្មីៗនេះ មានភាពភ្ញាក់ផ្អើលជាយ៉ាងខ្លាំងនៅលើបណ្ដាញសង្គមហ្វេសប៊ុក ដែលគេមើលឃើញអ្នកលេងបណ្ដាញសង្គមហ្វេសប៊ុក និងធ្វីតធើរនៅកម្ពុជាបានបង្ហោះពីសកម្មភាពស្នើសុំឱ្យខាងអង្គការ យូណេស្កូ ពិចារណាចំពោះល្ខោនខោល ដោយមានបង្ហោះរូបល្ខោនខោលជាច្រើនសន្លឹកពាសពេញបណ្ដាញសង្គម។ តារាល្បីៗនៅក្នុងប្រទេសកម្ពុជា ចូលរួមជួយចែករំលែក អំពីល្ខោនខោលខ្មែរឱ្យបានច្រើន ដើម្បីចូលរួមផ្សព្វផ្សាយដល់ពិភពលោក និងបណ្តាប្រទេសផ្សេងៗ ពិសេស គឺអង្គការយូណេស្តូឱ្យទទួលស្គាល់ និងកាត់សេចក្តីថា ល្ខោនខោល ពិតជារបស់ខ្មែរ។
តែយ៉ាងណាមិញ ប្រធានបទក្ដៅមួយនេះ បានកក្រើកដល់ប្រទេសថៃដូចគ្នា រហូតដល់មានគណនីហ្វេសប៊ុករបស់ថៃ មានឈ្មោះ « จตุมงคล เวชวัชระอมรินทร์ » បានបង្ហោះថា « ប្រទេសកម្ពុជា គឺជាប្រទេសប្រច័ណ្ឌ។ ស្ថិតនៅក្រោមការអភិវឌ្ឍ កង្វះការអប់រំ វាជាប្រទេសក្រីក្រ បំផុតនៅក្នុងអាស៊ាន »។ បើតាមការបញ្ជាក់នៅលើ comment របស់អ្នកលេងបណ្ដាញសង្គម បានឱ្យដឹងនេះ គណនីហ្វេសប៊ុកខាងលើនេះ ជាគណនីក្លែងក្លាយ ដែលបានបង្កើតឡើងក្នុងគោលបំណងបង្កភាពជ្រួលច្របល់នៅលើបណ្ដាញសង្គមតែប៉ុណ្ណោះ។
តែជាមួយគ្នានោះដែរ តារាសម្ដែង ច្រៀងបុរាណ និងសម័យអ្នកនាង ខាត់ សុឃីម បានធ្វើការប្រតិម្មចំពោះសាររបស់គណនីថៃ ដែលបានបង្ហោះពាក្យដៀមដាមដល់ប្រទេសកម្ពុជា អ្នកនាងលើកឡើងថា « អរគុណដល់ញាតិជិតខាងដែររំលឹកដល់ខ្ញុំថា ប្រទេសខ្ញុំកំពុងខ្វះខាតច្រើន ពិតប្រទេសខ្ញុំជួបសង្រ្គាមជាបន្តបន្ទាប់ រាប់ឆ្នាំទើបតែងើបរួចមកបាន ប្រទេសខ្ញុំក្រទ្រព្យតែប្រទេសខ្ញុំមិនក្រចារឹក ប្រជាជនជាតិខ្ញុំ មិនលួចវប្បធម៌ របាំ ឫ សិល្បៈរបស់អ្នកណាមកធ្វើជារបស់ខ្លួនទេ ព្រោះដូនតាជាតិខ្ញុំបន្សល់ទុក វប្បធម៌ អរិយធម៌ឱ្យច្រើនណាស់ តែមានញាតិជិតខាងដូចអ្នកឯងនេះមកលួយយកទៅបែបធ្វើជា វប្បធម៌ខ្លួន យ៉ាងណាក៏ល្ខោនខោលដិតដាមជាប់បេះប្រជាជនខ្មែរហើយ ទោះអ្នកលួចបានឫមិនបានយ៉ាងណាក្តី ក៏ខ្ញុំនៅប្រកាន់ភ្ចាប់ថា ” សិល្បៈល្ខោនខោលជាទ្រព្យរបស់ខ្មែរដែរដូនតាទុកឱ្យ ” » ។
តារាពហុជំនាញរូបនេះ បានបន្ដទៀតថា ពាក្យច្រណែនគួរទុកប្រើលើពូជសាសន៍អ្នកវិញទើបត្រូវ គេមិនមែនប្រើលើម្ចាស់របស់ទេ ផ្ញើទៅញាតិជិតខាងប្រទេសផង សូមអភ័យទោសបើប៉ះពាល់អារម្មណ៍ងអ្នកណាម្នាក់ បញ្ជក់ តែមិនមែនសុំទោសពូជសាសន៍លួចចំលងនោះទេ #ល្ខោនខោលជារបស់ល្ខោនខ្មែរ ។
គួរបញ្ជាក់ផងដែរថា ជុំវិញបញ្ហាការលើកឡើងរបស់តារាសិល្បៈកររូបនេះបានលើកឡើង នៅក្នុងនោះមានមហាជនជាច្រើនអ្នកបានគាំទ្រចំពោះសម្ដីរបស់អ្នកនាង និងបានធ្វើការចែករំលែកបន្ដយ៉ាងភ្លូកទឹកភ្លូកដីតែម្ដង។ ចុះចំពោះប្រិយមិត្តអ្នកអានទាំងអស់គ្នាវិញ យល់យ៉ាងណាដែរ ? ៕
September 3, 2018