Category: សង្គម និងសេដ្ឋកិច្ច

អ្នកនាង ទូច ស្រីល័ក្ខ ចេញមុខអំពាវនាវជួយការលំបាករបស់លោកគ្រូ នូ ស៊ិប
សិល្បករជើងចាស់ដ៏មានទេពកោសល្យ ដែលត្រូវបានអ្នកសិល្បៈជំនាន់ក្រោយ តែងតែហៅថា លោកគ្រូ នូ ស៊ិប ដែលមួយរយៈធំមកនេះ លោកកំពុងតែមានជីវភាពខ្វះខាត លំបាកលំបិន ដោយបច្ចុប្បន្នស្នាក់នៅក្នុងបន្ទប់ជួល ព្រមទាំងមានជំងឺប្រចាំកាយផងនោះ ជានិច្ចកាល លោកគ្រូតែងតែត្រូវបានគេសង្កេតឃើញថា មានសិល្បករ-សិល្បការិនីជាច្រើន បានយកជំនួយផ្សេងៗទៅជួយ ដើម្បីសម្រាលទុក្ខលំបាករបស់លោកគ្រូបានមួយគ្រាៗដែរ និងខណៈពេលថ្មីៗនេះ លោក គ្រូ នូ ស៊ិប ក៏ត្រូវបានអភិបាលខណ្ឌមានជ័យ ផ្តល់ជំនួយជាថវិកាមួយចំនួនដល់លោកគ្រូក្នុងពេលដែលកំពុងលំបាកខ្លាំងដែរ។
ជាក់ស្តែងក្រោយពីបានដឹងបញ្ហាថ្មីៗនេះពីស្ថានភាពទុក្ខលំបាកដ៏កម្សត់របស់លោកគ្រូ នូ ស៊ិប រួចមក អ្នកនាង ទូច ស្រីល័ក្ខ បានចេញបង្ហោះសារសំណូមពរដល់ខាងទូរទស្សន៍ឱ្យជួយផ្តល់ការងារជូនលោក នូ ស៊ិប ក៏ដូចជាសិល្បករជើងចាស់ដទៃទៀតឱ្យបានឡើងសម្ដែងញឹកញាប់ផង ក្នុងនោះអ្នកនាងក៏បានប្រាប់ដែរថា អ្នកនាងនឹងទៅជួបលោក នូ ស៊ិប ដោយផ្ទាល់។ អ្នកនាង ទូច ស្រីល័ក្ខ បានសរសេរសារថា «នាងខ្ញុំគឺជាសិល្បការិនីជំនាន់ក្រោយពិតជាសូមកោតស្ញប់ស្ញែងចំពោះលោកគ្រូ នូ ស៊ិប ដែលជាវីរសិល្បករដ៏ឆ្នើមមួយរូបនៅក្នុងប្រទេសកម្ពុជា ហើយលោកគ្រូ ក៏ជាតារាចម្រៀងម្នាក់ដែលមានទឹកដមសំឡេងស្រទន់ដែលនាងខ្ញុំនៅចាំបានថា នៅក្នុងឆ្នាំ1999 លោកគ្រូបានច្រៀងបទ «ផ្សងជួបស្នេហ៍ពិត »គឺជាបទដែលល្បីបំផុតនៅក្នុងឆ្នាំ1999 ។ នាងខ្ញុំពិតជាចង់ឱ្យរាល់កម្មវិធី concert របស់ស្ថានីយទូរទស្សន៍ទាំងអស់មានកម្មវិធីសិល្បៈបុរាណ និងរួមជាមួយសិល្បៈសម័យ ដើម្បីឱ្យពួកគាត់បានបន្តសាងស្នាដៃរបស់ពួកគាត់ដែលខំប្រឹងថែរក្សាទម្រង់មរតកដើមតទៅទៀត។ បើគាំទ្រសូមជួយ share ទាំងអស់គ្នា កុំឱ្យដល់ពេលដែលបាត់បង់ទៅហើយ ទើបនាំគ្នាមកអង្គុយស្តាយក្រោយនោះ។ នាងខ្ញុំនឹងទៅជួបលោកគ្រូដោយផ្ទាល់ និងនាំយកថវិកាផ្ទាល់ខ្លួនទៅសួរសុខទុក្ខលោកគ្រូតាមលទ្ធភាពរបស់ខ្ញុំ។
គួរបញ្ជាក់ផងដែរថា តារាចម្រៀងជើងចាស់ លោកគ្រូ នូ ស៊ិប មានវ័យ 72ឆ្នាំ ហើយត្រូវបានគេដឹងថា លោកកំពុងធ្លាក់ខ្លួនឈឺ ដោយសារជើងរបស់លោកមានបញ្ហាអស់រយៈពេល 10ឆ្នាំជាងមកហើយ ខណៈពេលកន្លងទៅ មានសិល្បករ-សិល្បការិនី មួយចំនួន ដូចជាលោក អឹម ជីវ៉ា លោក សុះ ម៉ាច និងសិល្បករជាច្រើនទៀត បានទៅសួរសុខទុក្ខលោកគ្រូ ខណៈការជួយចែករំលែកជំនួយនេះ គឺប្រៀបបាននឹងការចេះជួយគ្នាទៅវិញទៅមក នឹងជាគំរូល្អមួយចំពោះមហាជនទូទៅផងដែរ ក្នុងស្មារតីខ្មែរចេះជួយខ្មែរ៕
September 10, 2018
ប្រវត្តិសង្ខេប លោកវេជ្ជបណ្ឌិត ប៊ីត រិចន័រ (Beat Richner) ស្ថាបនិកមន្ទីរពេទ្យគន្ធបុប្ផា
លោកវេជ្ជបណ្ឌិត ប៊ីត រិចន័រ (Beat Richner) កើតនៅថ្ងៃទី13 ខែមីនា ឆ្នាំ1947 – (9 ខែកញ្ញា 2018) ជាជនជាតិ ស្វីស ។ គាត់ជាពេទ្យកុមារ, ជាអ្នកលេងសេឡូ, ជាអ្នកបង្កើត មន្ទីរពេទ្យកុមារ នៅព្រះរាជាណាចក្រកម្ពុជា និងជានាយក នៃមន្ទីរពេទ្យ គន្ធបុប្ផា ផងដែរ ។
បន្ទាប់ពីទទួលបាន បរិញ្ញាបត្រវិជ្ជសាស្រ្ត ក្នុងឆ្នាំ1973 លោកវិជ្ជបណ្ឌិត ប៊ីត រិចន័រ ធ្វើជាអ្នកឯកទេស ថែទាំកុមារ នៅឯមន្ទីរពេទ្យកុមារ នៅស៊ូរិច ។ បន្ទាប់មក លោក រិចន័រ បានធ្វើការអោយ កាកបាទក្រហមស្វីស និងត្រូវបានបញ្ជូន មកប្រទេសកម្ពុជា ជាទីដែលលោកបាន ធ្វើការនៅមន្ទីរពេទ្យ គន្ធបុប្ផា ទីក្រុងភ្នំពេញ ចន្លោះឆ្នាំ1974 និងឆ្នាំ1975 ។
មន្ទីរពេទ្យ គន្ធបុប្ផានេះ ត្រូវបានប្រសិទ្ធិនាម ដើម្បីទុកជាការចងចាំ ដល់ព្រះរាជបុត្រី នៃព្រះបរមរតនកោដ្ឋ សម្តេចព្រះ នរោត្តម សីហនុ ព្រះនាម នរោត្តម គន្ធបុប្ផា ដែលបានសោយទិវង្គត ក្នុងព្រះជន្ម នៅក្មេងវស្សានៅឡើយ (1948-1952) ។
នៅពេលខ្មែរក្រហម បានចូលកាន់កាប់ ប្រទេសកម្ពុជា លោក ប៊ីត រិចន័រ ត្រូវបានបង្ខំអោយ ចាកចេញទៅ ប្រទេសស្វីសវិញ ជាទីដែល លោកបានបន្ត ការងាររបស់លោក នៅទីក្រុងហ៉្សូរ៉ិច ។ ក្នុងដំណើរការ ស្វែងរកអាជីព វេជ្ជសាស្ត្ររបស់គាត់ និងចំណាប់អារម្មណ៍ ខាងតន្ត្រី និងការកម្សាន្ត វេជ្ជ. ប៊ីត រិចន័រ បានអភិវឌ្ឍ ចរិតលក្ខណៈនៃ “Beatocello” ត្លុកកំប្លែងសិល្បៈ ដែលលេងសេឡូ ។ ស្របគ្នាជាមួយ មុខនាទីនេះ លោក ប៊ីត រិចន័រ ក៏បានបោះពុម្ព សៀវភៅកុមារជាច្រើន ដែលផ្អែកលើ “Beatocello” ។
នៅខែធ្នូ ឆ្នាំ1991 ប៊ីត រិចន័រ បានត្រឡប់មកកម្ពុជា និងបានឃើញ ការបំផ្លិចបំផ្លាញ ដែលបានកើតឡើង ជាបន្តបន្ទាប់ ពីការប៉ះទង្គិចគ្នា ដែលជាលទ្ធផល ជម្លោះរវាងខ្មែរក្រហម និងវៀតណាម ។ លោកត្រូវ បានសុំអោយបើក និងសាងសង់ មន្ទីរពេទ្យគន្ធបុប្ផា ឡើងវិញ ដោយ រដ្ឋាភិបាលកម្ពុជា ។ ការបង្កើតមូលនិធិ គន្ធបុប្ផា នៅខែមីនា 1992 លោក ប៊ីត រិចន័រ បានត្រឡប់ មកកម្ពុជាវិញ ដើម្បីចាប់ផ្ដើមការ សាងសង់មន្ទីរពេទ្យ គន្ធបុប្ផា ដែលត្រូវបានបើកទ្វារ នៅខែវិច្ឆិកា 1992 ។
មន្ទីរពេទ្យ គន្ធបុប្ផា មានសាខាចំនួន ៥ ដែលបានបង្កើតឡើង ដោយ លោកវេជ្ជបណ្ឌិត ប៊ីត រិចន័រ ដែលមន្ទីរពេទ្យនេះ ព្យាបាលអ្នកជម្ងឺ ដោយពុំមានការ គិតកម្រៃឡើយ ។ សាខាគន្ធបុប្ផាទី1 និងទី2 ស្ថិតនៅក្នុង រាជធានីភ្នំពេញ និងទី3 ស្ថិតនៅមន្ទីរពេទ្យ ព្រះបាទជ័យវរ្ម័នទី7 ខេត្តសៀមរាប ។ សាខាគន្ធបុប្ផាទី4 ត្រូវបានបើក ដំណើរការនៅខែធ្នូ ឆ្នាំ2005 នៅភ្នំពេញ ហើយបានរួម បញ្ចូលគ្នាជាមួយ មន្ទីរពេទ្យគន្ធបុប្ផាទី 5 ដែលត្រូវបាន ស្ថាបនា រូចរាល់ និងបើកឱ្យដំណើរការ នៅក្នុងខែធ្នូ ឆ្នាំ2007 ។
រហូតមកដល់ឆ្នាំ 2015នេះ មន្ទីរពេទ្យ គន្ធបុប្ផា បានជួយព្យាបាល កូនចៅ ប្រជារាស្ត្រខ្មែរ ជាពិសេសអ្នកក្រីក្រ ដោយមិនគិតថ្លៃ បានប្រមាណជា ខ្ទង់លាន នាក់ហើយ… ហើយជនរួមជាតិខ្មែរ តែងតែបានផ្ដល់ការ គោរពស្រលាញ់ យ៉ាងជ្រាលជ្រៅបំផុត និងចាត់ទុកលោក វេជ្ជបណ្ឌិត ប៊ីត រិចន័រ ជាឪពុកធម៌ដ៍ល្អ របស់កូនចៅ ប្រជារាស្ត្រខ្មែរក្រីក្រ នៅទូទាំងប្រទេស ទៀតផង ៕
https://youtu.be/dNbsvFz4ufY
September 10, 2018
សូមចូលរួមរំលែកទុក្ខ!! មរណភាពរបស់លោក Beat Richner ស្ថាបនិកមន្ទីរពេទ្យគន្ធបុប្ផា
ដំណឹងចុងក្រោយដែលសារព័ត៌មានឡារ៉ែនទទួលបាន ឱ្យដឹងថា រដ្ឋមន្រ្តីក្រសួងសុខាភិបាលលោក ម៉ម ប៊ុនហេង បានប្រាប់អ្នកសារព័ត៌មានថា នៅនាព្រលប់ថ្ងៃទី9 ខែកញ្ញា ឆ្នាំ2018 ថ្មីៗនេះ ស្ថាបនិកមន្ទីរពេទ្យ គន្ធបុប្ផា លោកវេជ្ជបណ្ឌិត ប៊ីត រិចន័រ (Beat Richner) បានទទួលមរណភាពហើយ បន្ទាប់លោកបានធ្លាក់ខ្លួនឈឺរយៈពេលជាយូរមកហើយនោះ។
លោកទទួលមរណភាពនៅវេលាម៉ោង2 និង 45 នាទីព្រឹកថ្ងៃទី9 ខែកញ្ញា ឆ្នាំ2018 ក្នុងជន្មាយុ71ឆ្នាំ នៅប្រទេសស្វីស។ លោករដ្ឋមន្រ្តីក្រសួងសុខាភិបាល សូមចូលរួមរំលែកទុក្ខយ៉ាងក្រៀមក្រំជាទីបំផុត ចំពោះការទទួលមរណភាពរបស់លោក វេជ្ជបណ្ឌិត ប៊ីត រិចន័រ ។ យ៉ាងណាមិញ សារព័ត៌មានឡារ៉ែន ក៏សូមចូលរួមរំលែកទុក្ខយ៉ាងក្រៀមក្រំជាទីបំផុត ចំពោះការទទួលមរណភាពរបស់លោកបិតាស្ថាបនិកគន្ធបុប្ផា ដែលស្ថិតនៅក្នុងបេះដូងរបស់ប្រជាជនកម្ពុជាទាំងអស់៕

September 10, 2018
បញ្ឈប់ទម្លាប់ខាំក្រចកដៃភ្លាម បើមិនចង់ឱ្យកើតបញ្ហាទាំងនេះ
ចូរក្រឡេកមកមើលទម្លាប់អាក្រក់របស់អ្នកនិយមខាំក្រចកដៃ។ តើអ្នកដឹងទេថា ក្រចក ជាកន្លែងជ្រកនៃបាក់តេរីជាច្រើនប្រភេទដែលអ្នកមិនអាចមើលឃើញនឹងភ្នែកទទេបាន។ នៅពេលក្រចកដៃមិនស្អាត មិនមានអនាម័យ ងាយប្រឡាក់ប្រលូកជាមួយវត្ថុកខ្វក់ ឬងាយចាប់កាន់វត្ថុនានានោះខណៈដែលអ្នកខាំក្រចកដៃលេង អាចធ្វើឱ្យឆ្លងបាក់តេរីចូលទៅក្នុងមាត់ និងស្បែកបាន ប្រសិនបើមានការដាច់រលាត់ស្បែក។ ការខាំក្រចកដៃមានផលប៉ះពាល់អាក្រក់ចំពោះសុខភាពរបស់អ្នកយ៉ាងខ្លាំង។ ចូរមកមើលផលប៉ះពាល់ដែលកើតឡើងចំពោះសុខភាពដូចខាងក្រោមនេះ។
1. ផលប៉ះពាល់លើស្បែកក្រចក
ទម្លាប់ខាំក្រចកក៏អាចបង្កទៅជាដំបៅបានដែរ ប្រសិនបើអ្នកខាំវាជាញឹកញាប់ជាពិសេសគឺនៅពេលអ្នកខាំរហូតដល់ដាច់សាច់ជុំវិញក្រចក។ នៅពេលអ្នកខាំក្រចក ពពួកបាក់តេរី និងមេរោគតូចៗដទៃទៀត នឹងចូលទៅក្នុងសាច់ក្រចកខាងក្នុងតាមកន្លែងដែលដាច់រលាត់ពីការខាំ បណ្ដាលឱ្យហើម ឈឺចាប់ និងឈានទៅបង្កជាខ្ទុះផងក៏មាន។ នៅពេលស្ថានភាពធ្ងន់ធ្ងរ ទាល់តែវះកាត់បង្ហូរខ្ទុះនោះចេញ ទើបជាសះស្បើយឡើងវិញ។
2. ផលប៉ះពាល់ដល់មាត់
ជំងឺដុះឫសសាច់លើម្រាមដៃ ដែលខ្មែរយើងនិយមហៅថាដុះផ្លែសាច់ បង្កឡើងដោយវីរុសម្យ៉ាងឈ្មោះថា Papillomavirus (HPV) បណ្ដាលមកពីការខាំក្រចកជាប្រចាំ។ការខាំក្រចកដៃមិនត្រឹមតែបង្កជាជំងឺនៅលើម្រាមដៃប៉ុណ្ណោះទេ វាថែមទាំងអាចរីករាលដាលឆ្លងទៅមាត់ បង្កជាជំងឺពងបែកមាត់ថែមទៀតផង។ ជាទូទៅ អ្នកមានជំងឺពងបែកមាត់ តែងគិតថាបណ្ដាលមកពីក្ដៅក្នុង តែធាតុពិតវាបង្កមកពីមេរោគឆ្លងនេះឯង។
3. ផលប៉ះពាល់ដល់ធ្មេញ
ការខាំក្រចកមិនត្រឹមតែអាចបង្កជាជំងឺប៉ុណ្ណោះទេ ប៉ុន្តែវាថែមទាំងបង្កើតជាបញ្ហាដល់ធ្មេញរបស់អ្នកទៀតផង។ ពេលខាំក្រចកញឹកញាប់ ធ្មេញរបស់អ្នកនឹងរំកិលខុសទីតាំង ខូចរូបរាង ឬលែងស្មើជួរជាដើម។ ការខាំក្រចក ធ្វើឱ្យធ្មេញខាងលើ និងខាងក្រោមប៉ះគ្នាញឹកញាប់ និងកកិតគ្នា បណ្ដាលឱ្យសឹករិចរិលហើយចុះខ្សោយប្រសិនបើអ្នកនៅតែមានទម្លាប់ខាំក្រចកញឹកញាប់។
4. ការចម្លងបាក់តេរីបង្ករោគ
ក្រចកដៃ គឺជាកន្លែងដែលប៉ះពាល់ដោយផ្ទាល់ជាមួយមេរោគ និងជាជម្រករបស់មេរោគជាច្រើនប្រភេទ។ នៅពេលអ្នកខាំក្រចក មេរោគទាំងនោះនឹងឆ្លងចូលទៅក្នុងខ្លួនតាមរយៈមាត់ ដែលអាចបង្កជាជំងឺផ្សេងៗ។ ក្រចកមានភាពកខ្វក់ជាងម្រាមដៃដល់ទៅ2ដងឯណោះ ព្រោះវាមានគន្លិកគន្លាក់ច្រើន ដែលជាទីតាំងអាចមេរោគរស់នៅយ៉ាងសុខស្រួល និងពិបាកក្នុងការសម្អាត។
ក្រៅពីនេះ ការខាំក្រចកក៏អាចបង្កផលប៉ះពាល់មួយចំនួនទៀតដូចជា ធ្វើឱ្យអ្នកមានភាពសោកសៅ មានអារម្មណ៍ថាឯកាផ្ដាច់ខ្លួនពីអ្នកដទៃ និងបាត់អស់ភាពរីករាយក្នុងជីវិត។ លើសពីនេះ ការសិក្សាដែលចុះផ្សាយលើគេហទំព័រ Mercola បានបង្ហាញផងដែរថា ការខាំក្រចកថែមទាំងធ្វើឱ្យសុខភាពចុះខ្សោយទៀតផង។ ទាំងនេះគឺជាហេតុផលចម្បង ដែលអ្នកគួរបញ្ឈប់ទម្លាប់អាក្រក់នេះ ព្រោះវានឹងបង្កផលប៉ះពាល់នៅថ្ងៃណាមួយ ប្រសិនបើនៅតែបន្តធ្វើវា៕
September 7, 2018
ប្រទេសអភិវឌ្ឍន៍ចាប់ផ្តើមកែប្រែទីក្រុងឧស្សាហកម្ម ទៅជាតំបន់បៃតង
ពិភពលោកបានឆ្លងកាត់ការធ្វើបដិវត្តន៍ និងវិវឌ្ឍជាច្រើនដំណាក់កាលពីយុគសម័យមួយទៅយុគសម័យមួយរហូតដល់តំបន់ស្ទើរតែទាំងអស់រួមទាំងប្រទេសក្រីក្រផង ក្លាយជាវាលឧស្សាហកម្មទំនើបដើម្បីផ្គត់ផ្គង់ដល់តម្រូវការរបស់មនុស្សទូទាំងពិភពលោក។
ពីដំណាក់កាលមួយទៅដំណាក់កាលមួយការរស់នៅរបស់មនុស្សកាន់តែមានភាពងាយស្រួល តែផលប៉ះពាល់លើធម្មជាតិបានកើតឡើងយ៉ាងឆាប់រហ័ស ស្របពេលដែលតំបន់ព្រៃជាច្រើនបានក្លាយជាវាលកសិកម្មកែច្នៃតំបន់លំនៅឋាន ឬរោងចក្រដែលគាំទ្រដល់ចង្វាក់ផលិតកម្មរបស់ឧស្សាហកម្មធំៗជាដើម។ ធនធានធម្មជាតិជាច្រើនផ្នែកផ្សេងទៀតក៏ត្រូវបានបាត់បង់ដែលធ្វើឱ្យប្រទេសធំៗបង្ខំចិត្តជំរុញឱ្យមានការអភិវឌ្ឍលើការដាំដើមឈើឡើងវិញ និងរៀបចំកិច្ចប្រជុំសំខាន់ៗដើម្បីកាត់បន្ថយការប្រែប្រួលអាកាសធាតុ និងផលប៉ះពាល់អវិជ្ជមានចំពោះធម្មជាតិ។
ដោយសារបញ្ហាទាំងអស់នេះ ប្រទេសអភិវឌ្ឍន៍ដែលមានចំណូលខ្ពស់លើពិភពលោក រួមទាំងតំបន់ដែលមានការរីកលូតលាស់ខ្លាំង ចាប់ផ្តើមងាកមកកែប្រែទីក្រុងរបស់ខ្លួនឱ្យក្លាយជាតំបន់បៃតង បើទោះបីជាផលប៉ះពាល់មិនអាចគ្រប់គ្រងបានទាំងស្រុងក៏ដោយ។ ភាពបៃតងនៅដំណាក់កាលនេះ មិនមែនគិតត្រឹមតែការដាំដើមឈើ ឬបង្កើតពណ៌បៃតងនៅក្នុងទីក្រុងនោះទេ តែក៏ជាការជំរុញឱ្យមានគោលនយោបាយ និងផែនការក្នុងការគ្រប់គ្រងកាកសំណល់ប្លាស្ទិកឱ្យបានល្អការកែច្នៃឡើងវិញនូវសម្ភារប្រើប្រាស់សម្រាប់ប្រជាជន ការសាងសង់សំណង់លំនៅឋាន និងអគារដោយប្រើបច្ចេកវិទ្យាដើម្បីកាត់បន្ថយការប្រើប្រាស់អគ្គិសនី និងការគ្រប់គ្រងប្រព័ន្ធដឹកជញ្ជូនជាដើម។
ប្រទេសធំៗចាប់ផ្តើមលើកទឹកចិត្តឱ្យប្រជាជនរបស់ខ្លួនសន្សំសំចៃការប្រើប្រាស់ចរន្តអគ្គិសនីរួមទាំងថាមពលនានាដើម្បីរក្សាលំនឹងនៃបរិយាកាសនៅក្នុងទីក្រុង។ ជាក់ស្តែងប្រទេសបារាំង ជប៉ុន និងប្រទេសអភិវឌ្ឍន៍ជាច្រើនផ្សេងទៀត លើកទឹកចិត្តឱ្យប្រជាជនជិះរថភ្លើង ឬសេវាដឹកជញ្ជូនសាធារណៈដើម្បីកាត់បន្ថយការប្រើប្រាស់យានយន្តផ្ទាល់ខ្លួន។ ប្រទេសចិនរៀបចំគោលនយោបាយចំណាយថវិកាដល់ប្រជាជនដែលបានដាំដើមឈើក្នុងតំបន់ដែលពួកគេរស់នៅដើម្បីលើកទឹកចិត្តដល់ការរក្សាបរិស្ថាន និងកាត់បន្ថយភាពក្រីក្រស្របពេលដែលប្រទេសនៅអឺរ៉ុបមួយចំនួនថែមទាំងបានផ្តល់ប្រាក់ដល់អ្នកជិះកង់ទៀតផង។
ស្របពេលជាមួយគ្នានេះ គម្រោងស្ថាបត្យកម្មថ្មីៗភាគច្រើនត្រូវបានគេកែច្នៃឱ្យមានពន្លឺព្រះអាទិត្យជំនួសអំពូលភ្លើង ហើយប្រព័ន្ធសន្សំសំចៃជាច្រើនផ្សេងទៀតត្រូវបានគេយកមកប្រើជំនួសឧបករណ៍ចាស់ៗដែលស៊ីភ្លើងខ្លាំង។ ក្រៅពីនេះសំណង់អគារប្រណីតដែលត្រូវបានគេសាងសង់ក្នុងយុគសម័យបច្ចេកវិទ្យាព័ត៌មាននេះ ភាគច្រើនត្រូវបានគេរចនាឱ្យមានពណ៌បៃតង ដោយការប្រើប្រាស់ដើមឈើជាគ្រឿងលម្អ និងជាការរួមចំណែកជួយដល់បរិស្ថានផងដែរ។
យោងតាមរបាយការណ៍ដែលដកស្រង់ដោយវេទិកាសេដ្ឋកិច្ចពិភពលោក បានបង្ហាញថា ទីក្រុងឡុងដ៍ជាកន្លែងដែលមានដើមឈើដល់ទៅ 8លានដើមស្របពេលដែលទីក្រុងមួយនេះនៅតែបន្តដាំដើមឈើបន្ថែមទៀត បើទោះបីជាគម្រោងនេះចំណាយថវិកាជាតិអស់យ៉ាងច្រើនសន្ធឹកសន្ធាប់ក៏ដោយ។
ទីក្រុងដែលសម្បូរទៅដោយបច្ចេកវិទ្យា និងធម្មជាតិមួយនេះបានប្រើប្រាស់ដើមឈើរាប់ម៉ឺនដើមដើម្បីបង្កើតតំបន់ទំនេរឱ្យក្លាយជាឧទ្យានសាធារណៈសម្រាប់ប្រជាជនសម្រាកកម្សាន្ត។
លោកអភិបាលក្រុង Sadiq Khan បានបញ្ជាក់ថាការដាំដើមឈើបន្ថែមត្រូវចំណាយថវិកាប្រមាណ1.9លានដុល្លារសម្រាប់អភិវឌ្ឍតំបន់ព្រៃឈើនៅទីក្រុងឡុងដ៍។ គម្រោងមួយនេះនឹងធ្វើឱ្យមនុស្សចាប់ផ្តើមស្រឡាញ់បរិស្ថានកាន់តែខ្លាំង ហើយរួមគ្នារក្សាតំបន់បៃតង ដើម្បីជំរុញគុណភាពជីវិតឱ្យកាន់តែប្រសើរឡើង។
អ្នកជំនាញបរិស្ថានបានលើកឡើងថា មនុស្សរស់នៅទីក្រុងនឹងងាកមករកធម្មជាតិកាន់តែច្រើនឡើង ហើយពួកគេអាចនឹងជំរុញឱ្យមានស្ថានភាពវិជ្ជមាន បើទោះបីជាមានសញ្ញាណជាច្រើនបញ្ជាក់ថាសកម្មភាពរបស់មនុស្សកំពុងធ្វើឱ្យប៉ះពាល់ដល់ធម្មជាតិក៏ដោយ៕
September 7, 2018
Nadal និង Djokovic ត្រូវការឈ្នះ 1លើកទៀត ដើម្បីជួបគ្នាក្នុងវគ្គផ្តាច់ព្រ័ត្រ
ម្ចាស់ការពារតំណែងជើងឯក US Open គឺ Rafael Nadal និងម្ចាស់ជើងឯក 2សម័យកាល Novak Djokovic ត្រូវការជ័យជម្នះត្រឹមតែ 1លើកទៀតប៉ុណ្ណោះ ដើម្បីទៅជួបគ្នានៅវគ្គផ្តាច់ព្រ័ត្រ ខណៈដែលកីឡាករទាំង2 សុទ្ធសឹងត្រូវបានរំពឹងទុកថា នឹងឆ្លងផុតវគ្គពាក់កណ្តាលផ្តាច់ព្រ័ត្រនៅថ្ងៃសុក្រនេះ។
កីឡាករវាយកូនបាល់មានចំណាត់ថ្នាក់លេខ1 ក្នុងពិភពលោក Nadal នឹងត្រូវប៉ះជាមួយនឹងកីឡាករអាហ្សង់ទីន Juan Martin del Potro ស្របពេលដែលកីឡាករ Novak Djokovic ត្រូវជួបជាមួយនឹងកីឡាករជប៉ុន Kei Nishikori ដើម្បីប្រជែងឆ្ពោះទៅកាន់វគ្គផ្តាច់ព្រ័ត្រជាលើកទី7 នៅលើទីលាន Flushing Meadows។
Nadal ដែលបានគេចផុតពីការបរាជ័យក្នុងការប្រកួតជាមួយនឹងកីឡាករអូទ្រីស Dominic Thiem ដើម្បីឈានមកកាន់វគ្គ 4នាក់ចុងក្រោយនេះ មានកំណត់ត្រាឈ្នះដល់ទៅ 11លើក ចាញ់ 5លើក នៅពេលប្រកួតជាមួយនឹង Del Potro ខណៈដែលការចាញ់លើកចុងក្រោយរបស់គេបានកើតឡើងក្នុងវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍កីឡាអូឡាំពិក ឆ្នាំ2016។
កីឡាករសញ្ជាតិអេស្ប៉ាញដែលបានផ្តួល Del Potro នៅឆ្នាំនេះក្នុងព្រឹត្តិការណ៍ French Open វគ្គពាក់កណ្តាលផ្តាច់ព្រ័ត្រ និងWimbledon វគ្គ 8នាក់ចុងក្រោយរូបនេះ ហាក់មិនបានធ្លាក់ចុះទម្រង់លេងរបស់ខ្លួនសោះឡើយ។ Nadal ដែលបានឈ្នះពាន US Open 3លើកនោះបានឱ្យដឹងថា៖ «គាត់ (Del Potro) ជាកីឡាករដ៏អស្ចារ្យម្នាក់ ប៉ុន្តែការប្រជែងក្នុងពេលប្រកួតជាមួយនឹងរូបគេនៅលើទីលានរឹង ពិតជាស្វិតស្វាញសម្រាប់ខ្ញុំជាងការលេងនៅលើទីលានពណ៌ក្រហម»៕
ប្រភពពី៖ Channel News Asia
September 7, 2018
Isco ស្វាគមន៍ការហាមមិនឱ្យប្រើទូរស័ព្ទរបស់លោក Luis Enrique ក្នុងក្រុមអេស្ប៉ាញ
ខ្សែបម្រើអន្តរជាតិអេស្ប៉ាញ Isco បានបញ្ជាក់ថា រូបគេស្វាគមន៍បម្រាមរបស់លោកគ្រូបង្វឹក Luis Enrique លើការប្រើទូរស័ព្ទដៃ អំឡុងពេលនៃការញ៉ាំអាហាររបស់ក្រុម និងបានគាំទ្រគំនិតផ្នែកកីឡាបាល់ទាត់របស់គ្រូបង្វឹកថ្មីរូបនេះ និងការធ្វើលំហាត់ប្រាណរបស់ក្រុម។
Isco បានប្រាប់សន្និសីទសារព័ត៌មានកាលពីថ្ងៃព្រហស្បតិ៍ថា៖ «វាតែងតែជារឿងដ៏ល្អក្នុងការមានវិន័យបន្តិច ការមិនមានទូរស័ព្ទនៅឯកន្លែងញ៉ាំអាហារ គឺជាគំនិតដ៏ល្អមួយចំពោះខ្ញុំ ដោយសារតែនៅសម័យនេះ យើងធ្វើការផ្តោតអារម្មណ៍ជារឿយៗទៅលើការនិយាយទូរស័ព្ទ ជាងការនិយាយជាមួយមិត្តរួមក្រុមរបស់យើង»។
ក្រុមជម្រើសជាតិអេស្ប៉ាញ នឹងត្រូវធ្វើការប្រកួតជាលើកទី1 របស់ពួកគេក្រោមការដឹកនាំរបស់អតីតគ្រូបង្វឹករបស់ក្លិប Barcelona រូបនេះ នៅថ្ងៃសៅរ៍ នៅលើទឹកដីក្រុមជម្រើសជាតិអង់គ្លេស ក្នុងការប្រកួតបើកឆាកនៃយុទ្ធនាការ UEFA Nations League នៅមុនពេលធ្វើជាម្ចាស់ផ្ទះទទួលក្រុមជម្រើសជាតិក្រូអាស៊ី នៅថ្ងៃអង្គារ។
ការប្រកួតចុងក្រោយរបស់ពួកគេគឺការធ្លាក់ចេញដ៏មិននឹកស្មានដល់ពីយុទ្ធនាការ World Cup ក្រោមស្នាដៃក្រុមជម្រើសជាតិរុស្ស៊ី ដោយសារតែការស៊ុតបាល់ប៉េណាល់ទី ក្រោយពីបានបញ្ចប់ត្រឹមលទ្ធផលស្មើ 1-1 ក្នុងវគ្គ 16ក្រុមចុងក្រោយ។
អ្នកគាំទ្រ និងអ្នកអធិប្បាយជាច្រើន មានការសង្ស័យទៅលើការតែងតាំងលោក Luis Enrique ដើម្បីជំនួសកន្លែងរបស់លោក JulenLopetegui ដោយសារតែការមានទំនាក់ទំនងមិនសូវល្អរបស់លោកជាមួយនឹងបណ្តាញសារព័ត៌មាន និងការប្រេះស្រាំផ្នែកទំនាក់ទំនងជាមួយនឹងក្លិប Real Madrid កាលពីពេលមុន។ ទោះបីជាយ៉ាងណា ខ្សែបម្រើ Isco របស់ Real Madrid បានបញ្ជាក់ថា ក្រុមអេស្ប៉ាញ បានសម្របខ្លួនទៅនឹងវិធីសាស្ត្រហ្វឹកហាត់របស់គ្រូបង្វឹករូបនេះ ក៏ដូចជាគំនិតដ៏ចម្លែកនៅក្រៅដីទីលានរបស់លោកដែរ៕
ប្រភពពី៖ Channel News Asia
September 7, 2018
តម្រូវការចេកអំបូងលឿង ធ្វើឱ្យកសិករម្នាក់កាក់កបនឹងរបរបណ្ដុះកូនចេកលក់
អ្នកមានបទពិសោធក្នុងវិស័យកសិកម្ម ផ្នែកដំណាំហូបផ្លែ និងបណ្ដុះពូជដំណាំផ្សេងៗទៀតជាច្រើនមុខដើម្បីផ្គត់ផ្គង់ឱ្យចម្ការនានានៅក្នុងស្រុក បានងាកមកផ្សាំបណ្តុះកូនចេកអំបូងលឿងសម្រាប់លក់ជូនអតិថិជន ខណៈទីផ្សារវិស័យកសិកម្មទំនើបកំពុងមានសម្ទុះកើនឡើងគួរឱ្យកត់សម្គាល់ ឧទាហរណ៍ដូចជាចេកអំបូងលឿងដែលជាផ្លែឈើកំពុងមានតម្រូវការនាំចូលទៅប្រទេសចិនបន្ទាប់ពីមានការចុះហត្ថលេខាលើកិច្ចព្រមព្រៀងនាំចេញរួចមក។
នៅពេលមានតម្រូវការពីក្រុមហ៊ុនចិនដែលមកវិនិយោគបង្កើតកសិដ្ឋានដាំដើមចេកអំបូងលឿងមួយរយៈពេលចុងក្រោយនេះធ្វើឱ្យកូនចេកអំបូងលឿងជិតកន្លះម៉ឺនដើមត្រូវបានលក់ចេញជារៀងរាល់ខែ ដែលមានខែខ្លះលក់ចេញបានលើសពីចំនួននេះទៅទៀត។ នេះបើតាមការប្រាប់អ្នកយកព័ត៌មាននៃកាសែតឡារ៉ែនពាណិជ្ជតាមទូរស័ព្ទពីសំណាក់លោក គួន ឌឿន ជាកសិករនៅស្រុកភ្នំព្រឹក ខេត្តបាត់ដំបង។
ចេកអំបូងលឿងមានប្រភពមកពីប្រទេសឥណ្ឌាត្រូវបានគេបង្កាត់ពូជចែកចាយទៅកាន់ប្រទេសក្នុងតំបន់អាស៊ីអាគ្នេយ៍ រួមមានដូចជាប្រទេសចិនតៃវ៉ាន់ ថៃ វៀតណាម ហ្វ៊ីលីពីន និងកម្ពុជាជាដើម។ នៅកម្ពុជាក្រៅពីកសិដ្ឋានធំ3(ខេត្តរតនគីរី ក្រចេះ កំពត) ដែលបានដាំចេកអំបូងលឿងលើផ្ទៃដីរាប់រយហិកតាហើយនោះ នៅមានកសិករនៅខេត្តកណ្ដាលកំពង់ស្ពឺ កោះកុង ប៉ៃលិន និងខេត្តបាត់ដំបងក៏កំពុងចាប់ផ្ដើមដាំដុះ និងប្រមូលផលផ្គត់ផ្គង់ទីផ្សារក្នុងស្រុកដែរ។ ប៉ុន្តែដំណាំចេកប្រភេទនេះមានតិចតួចនៅឡើយ មិនអាចឆ្លើយតបនឹងតម្រូវការទីផ្សារបានឡើយ ពិសេសការនាំចេញទៅក្រៅប្រទេសខណៈពូជចេកជាច្រើនត្រូវបានកសិករខ្មែរទិញពីប្រទេសថៃមកដាំ តាំងពីឆ្នាំ2015។
លោក គួន ឌឿន បានប្រាប់ឱ្យដឹងថា ក្រោយពីលោកនាំចូលពូជចេកប្រភេទថ្មីមួយនេះពីប្រទេសថៃ លោកកត់សម្គាល់ឃើញថា កសិករក្នុងស្រុកចាប់ផ្តើមសម្លឹងមើលដំណាំប្រភេទថ្មីនេះ និងហ៊ានសាកល្បងដាំ ក៏ដូចជាប្រឹងប្រែងរៀនពីបច្ចេកទេសដាំដុះថ្មីៗផងដែរ ទើបលោកសម្រេចចិត្តចាប់ផ្តើមបណ្តុះកូនចេកប្រភេទថ្មីនេះដោយខ្លួនឯង ខណៈពេលដែលមានក្រុមហ៊ុនចិនមករកទិញកូនចេកយកទៅដាំនៅកសិដ្ឋានរបស់គេ ពេលនោះហើយទើបលោកអាចលក់បានក្នុង 1ខែពី4ពាន់ ទៅ5ពាន់ដើមឯណោះក្នុងតម្លៃ4ពាន់រៀល 1ដើម ខែខ្លះអាចកើនដល់ជាង 6ពាន់ដើមទៀតផង។
កសិកររូបនេះបន្តថា សម្រាប់ដំណាំកូនចេកប្រភេទថ្មីដែលលោកលក់ដាច់ខ្លាំងជារៀងរាល់ខែនេះ អ្នកដាំអាចលក់ផ្លែវាក្នុងតម្លៃខ្ពស់ចាប់ពី 5ពាន់រៀលរហូតដល់ 7ពាន់រៀលក្នុង 1ស្និត ឬលើសពីនេះនៅលើទីផ្សារក្នុងស្រុក ព្រោះវាមានលក្ខណៈពិសេសដាច់ពីគេត្រង់ថា រសជាតិរបស់វាឆ្ងាញ់ ក្រអូបឈ្ងុយ និងផ្អែមជាងចេកប្រភេទដទៃ ហើយអាចលក់បានក្នុងចំនួនច្រើនបើធ្វើការនាំចេញទៅក្រៅប្រទេស។ ចេកអំបូងលឿងបានក្លាយជាដំណាំដែលទទួលបានការចាប់អារម្មណ៍ខ្លាំងក្នុងការដាំដុះ ព្រោះថាដំណាំមួយនេះហុចផលឱ្យលឿន គឺក្រោយពេលដាំត្រឹមតែ8ខែប៉ុណ្ណោះ អាចផ្តល់ផលបានពេញមួយឆ្នាំ និងមានសក្តានុពលទីផ្សារខ្ពស់ និងមានតម្លៃថ្លៃជាងចេកដទៃ។
ចំណែកបច្ចេកទេសនៃការដាំដុះវិញ អ្នកមានបទពិសោធរូបនេះបានឱ្យដឹងថា ក្នុងមួយហិកតាគេអាចបណ្ដុះកូនចេកអំបូងលឿងបានជាង 2,000កូនឯណោះ ហើយអ្នកដាំត្រូវចំណាយលើការរៀបប្រព័ន្ធទឹក និងត្រូវមានការមើលថែទាំយ៉ាងដិតដល់ ដែលអាចនឹងចំណាយច្រើនជាង2,000ដុល្លារ។ សរុបមកក្នុងការដាំចេកអំបូងលឿងយកកូនលក់នេះ ចាប់ពីពេលដាក់ដាំរហូតដល់ពេលប្រមូលផល លោកត្រូវចំណាយខ្ទង់ 5,000ដុល្លារ សម្រាប់ចម្ការថ្មី តែអាចទាញចំណូលមកវិញបានខ្ទង់ពាន់ដុល្លារក្នុងមួយខែ ប្រសិនបើម្ចាស់ចម្ការដាំចំនួនខ្ទង់ពាន់ដើមឡើងទៅដែរ។ កសិកររូបនោះបានបន្ថែមថា សម្រាប់ដំណាំមួយនេះ មានតម្រូវការថែទាំជាពិសេសលើ 3ចំណុចធំៗ ក្នុងនោះរួមមាន ទី1 ការថែទាំ ទី2 ការរៀបចំ និងទី3 ការដឹកជញ្ជូនដែលតម្រូវឱ្យម្ចាស់ចម្ការមានបច្ចេកទេសច្បាស់លាស់ និងស្របតាមស្តង់ដារ ទើបគេទទួលទិញ និងហ៊ានឱ្យតម្លៃថ្លៃ។
ប៉ុន្តែលោក ឌឿន បានថ្លែងពីក្តីព្រួយបារម្ភអំពីការថែទាំដំណាំកូនចេកអំបូងលឿងនេះថា មិនអាចអត់បានឡើយនូវបច្ចេកទេសដាំដុះច្បាស់លាស់របៀបថែទាំកូនចេកឱ្យត្រូវតាមទំហំស្តង់ដារ ក៏ដូចជាការរៀបចំ រហូតដល់ការដឹកជញ្ជូនចេញផងដែរ ដែលបញ្ហាទាំងអស់នេះ ជាអ្វីដែលកសិករយើងមិនអាចបំពេញបាន ដោយសារតែកូនចេកអំបូងមានភាពខុសគ្នាពីដំណាំដទៃទៀត។ កូនចេកអំបូងលឿងចូលចិត្តដីបៀមទឹក និងដីស្មៅ ហើយដីបែបណាក៏អាចដាំបានដែរ តែប្រភេទដីដែលល្អបំផុតសម្រាប់កូនចេកនេះ គឺដីក្រហម និងដីល្បាប់នៅតាមវាលទំនាបដែលអាចស្រូបជីជាតិទៅចិញ្ចឹមដើមបាន៕
September 7, 2018
ភ្ញាក់ផ្អើលខ្លាំង!! តារាសម្ដែង ណាក់ ស្រីណា បង្ហោះសារសុំទោសលោក អ៊ិន សុភិន ជាសាធារណៈ
មានការភ្ញាក់ផ្អើលខ្លាំងណាស់ ដែលប៉ុន្មាននាទីមុននេះ តារាសម្ដែង និងជាពិធីការិនី កញ្ញា ណាក់ ស្រីណា ដែលកាលពីពេលមុនបានផ្ទុះជម្លោះយ៉ាងក្ដៅគគុកជាមួយផលិតកម្មមហាហង្សដោយសារតែនាងបង្ហោះសារម្ដងជាពីរដង វាយប្រហារផលិតកម្មនេះ និងលោក អ៊ិន សុភិន ជាម្ចាស់ផលិតកម្ម រហូតធ្វើឱ្យមានការភ្ញាក់ផ្អើលដល់ស្រទាប់មហាជន តែនៅទីបំផុតស្ថានការណ៍ដែលបានកើតឡើងទាំងអស់នោះត្រូវបានបញ្ចប់ទៅវិញដោយការសូមទោសរបស់តារាស្រីរូបស្អាតម្នាក់នេះ។
ណាក់ ស្រីណា ត្រូវបានគេឃើញថា បានបង្ហោះសារសុំទោសជាសាធារណៈចំពោះលោក អ៊ិន សុភិន ដោយបានបញ្ជាក់ថា អ្វីដែលនាងបានបង្ហោះកន្លងមក គឺជាការយល់ច្រឡំទាំងអស់។ ដើម្បីឱ្យកាន់តែជាក់ច្បាស់ សូមអានសារខាងក្រោមនេះតែម្ដង។
September 7, 2018
វិស័យអចលនទ្រព្យខេត្តកណ្តាលកំពុងមានសម្ទុះខ្លាំង
វិស័យអចលនទ្រព្យខេត្តកណ្តាលកំពុងមានសម្ទុះឡើងខ្លាំងគួរឱ្យកត់សម្គាល់នៅរយៈពេលប៉ុន្មានឆ្នាំចុងក្រោយនេះដោយសារភូមិសាស្ត្រដីរបស់ខេត្តមួយនេះមានទីតាំងព័ទ្ធជុំវិញរាជធានីភ្នំពេញដែលជាទីប្រជុំជនធំជាងគេបង្អស់ក្នុងប្រទេសកម្ពុជា។
លោក លឹម ច័ន្ទសុភី ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តកណ្តាលមានប្រសាសន៍ថា ស្របពេលដែលវិស័យអចលនទ្រព្យក្នុងរាជធានីភ្នំពេញមានសម្ទុះកើនឡើងខ្លាំងស្ទើរដល់ចំណុចកំពូលហើយនោះ បានធ្វើឱ្យវិស័យមួយនេះកំពុងហៀរឆ្ពោះទៅខេត្តកណ្តាលតាមរយៈផ្លូវ60 តភ្ជាប់ពីរាជធានីភ្នំពេញមកក្រុងតាខ្មៅ ខេត្តកណ្តាល ហើយមិនថាភាគខាងត្បូង ភាគខាងកើត និងភាគខាងជើងរបស់ខេត្តមួយនេះទេ គឺសុទ្ធតែកំពុងត្រូវប៉ាន់ទាំងអស់។
លោកមានប្រសាសន៍ថា តម្លៃដីដែលឡើងថ្លៃជាងគេស្ថិតក្នុងក្រុងតាខ្មៅកាត់តាមផ្លូវ21B ឆ្ពោះទៅស្រុកស្អាងតែម្តងដោយសារតែរដ្ឋបាលខេត្តបានប្រជុំសម្រេចជាគោលការណ៍កាត់ដីក្នុងឃុំចំនួន4មានដូចជាឃុំស្វាយរលំ ឃុំសិត្បូ ឃុំរកាខ្ពស់ និងឃុំកោះអន្លុងចិនចូលក្នុងភូមិសាស្ត្រទឹកដីក្រុងតាខ្មៅដោយទទួលបានគោលការណ៍ឯកភាពពីក្រសួងរៀបចំដែនដី នគរូបនីយកម្ម និងសំណង់រួចរាល់ហើយ រង់ចាំតែការប្រកាសជាផ្លូវការពីក្រសួងមហាផ្ទៃនៅពេលឆាប់ៗខាងមុខនេះប៉ុណ្ណោះ។ ប្លង់គោលនេះបានរៀបចំជាយុទ្ធសាស្ត្រសម្រាប់ក្រុងតាខ្មៅ និងប្លង់គោលប្រើប្រាស់ដីក្នុងស្រុកកោះធំ-ជ្រៃធំនៅឆមាសទី1 ឆ្នាំ2018 គឺត្រៀមអនុម័តសម្រេចលើប្លង់គោលប្រើប្រាស់ឆ្នាំ2030 របស់គណៈកម្មាធិការរៀបចំដែនដី នគរូបនីយកម្ម និងសំណង់ថ្នាក់ជាតិ។
លោកអះអាងថា នៅពេលមានគម្រោងកាត់ឃុំខាងលើចូលក្នុងភូមិសាស្ត្រក្រុងតាខ្មៅរួចបានធ្វើឱ្យការទិញដីពុះឡូត៍លក់កាន់តែមានសកម្មភាពមមាញឹកឡើងៗ ហើយការសាងសង់សំណង់ក្នុងក្រុងតាខ្មៅក៏មានការកើនឡើងដែរ ពិសេសសំណង់លំនៅឋានសម្រាប់អ្នកមានប្រាក់ចំណូលទាបស្ថិតក្នុងឃុំរកាខ្ពស់បានចាក់ដីខ្សាច់បំពេញរួចរាល់ និងបាន និងកំពុងចាប់ផ្តើមសាងសង់ជាបណ្តើរៗហើយ។ ហើយលោកបានបន្តថា តម្លៃដីនៅក្នុងឃុំទាំង4នេះនឹងកើនឡើងខ្លាំងថែមទៀត ខណៈវិស័យសំណង់ក៏កំពុងហូរចូលទៅចាក់គ្រឹះនៅទីតាំងនោះជាបណ្តើរៗដែរនៅរយៈពេលចុងក្រោយនេះ។
លោក លឹម ច័ន្ទសុភី ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តកណ្តាល
មិនថាតែភាគខាងត្បូងក្រុងតាខ្មៅនោះទេ សូម្បីនៅក្នុងភាគខាងកើតដូចជាស្រុកកៀនស្វាយ ស្រុកល្វាឯមក៏តម្លៃដីមានសម្ទុះកើនឡើងដែរ ខណៈរដ្ឋាភិបាលបាន និងកំពុងសាងសង់ផ្លូវក្រវាត់ក្រុងទី3 តភ្ជាប់ទៅផ្លូវជាតិលេខ1 ត្រង់ចំណុចកំពង់ផែដឹកទំនិញតាមផ្លូវទឹកនៅស្រុកកៀនស្វាយ ដែលនេះជាចលករជំរុញឱ្យដីនៅក្នុងស្រុកកៀនស្វាយមានសម្ទុះកើនឡើងខ្លាំងដែរ ហើយសំណង់លំនៅឋានតូចធំ និងបុរីទំនើបៗក៏កំពុងបែមុខឆ្ពោះទៅស្រុកកៀនស្វាយផងដែរ។ ជាមួយគ្នានេះដែរ នៅពេលដែលរដ្ឋាភិបាលរៀបចំគម្រោងសាងសង់ស្ពានតភ្ជាប់ពីតំបន់ជ្រោយចង្វារឆ្ពោះទៅតំបន់ស្វាយជ្រុំ សាងសង់ស្ពានពីកំពង់ចម្លងមុខសណ្ឋាគារណាហ្គាឆ្ពោះទៅកំពង់ដអរិយក្សត្រ និងស្ពានតភ្ជាប់ពីផ្លូវជាតិលេខ1កំពង់ចម្លងក្តីតាកុយឆ្ពោះទៅកាន់ឃុំសារិកាកែវ ក្នុងស្រុកល្វាឯម បានធ្វើឱ្យស្ពានទាំង 3ខ្សែនេះទៅជួបប្រសព្វគ្នានៅក្នុងស្រុកល្វាឯម ខេត្តកណ្តាលតែមួយ ធ្វើឱ្យតម្លៃដីនៅទីនោះមានសម្ទុះឡើងខ្លាំង ហើយគម្រោងសាងសង់លំនៅឋានលក់នៅតំបន់អរិយក្សត្រ តំបន់ស្វាយជ្រុំរបស់ក្រុមហ៊ុនសាងសង់សំណង់លំនៅឋានលក់បានចូលទៅវិនិយោគជាបន្តបន្ទាប់ដែរ និងថ្មីៗនេះមានក្រុមហ៊ុនសាងសង់លំនៅឋានមួយទៀតទើបតែដាក់ពាក្យស្នើសុំសាងសង់លំនៅឋានលក់នៅទីនោះដែរ។ ចំណែកមន្ទីររៀបចំដែនដីខេត្តក៏បានរៀបចំប្លង់គោលអភិវឌ្ឍន៍ហេដ្ឋារចនាសម្ព័ន្ធផ្សេងៗនៅក្នុងភូមិសាស្ត្រស្រុកល្វាឯមផងដែរ ដើម្បីត្រៀមទុកជាមុន មុនពេលដែលរដ្ឋាភិបាលសាងសង់ស្ពានអភិវឌ្ឍន៍ទៅដល់ទីនោះ។
ងាកទៅទិសខាងលិច និងទិសខាងជើងវិញ ដូចជាតំបន់ភ្នំប្រសិទ្ធិ៍ជាដើម សកម្មភាពពុះដីឡូត៍លក់ក៏កំពុងរីកដុះដាល និងមានសកម្មភាពខ្លាំងហើយដីនៅតាមផ្លូវជាតិលេខ3 ចាប់ពីចំណុចស្ពានកំពង់ទួល ឬស្ពានទំនប់7មករា ឆ្ពោះទៅផ្សារព្រៃទទឹងក្បែរផ្លូវរថភ្លើង ហួសទៅមុខប្រមាណជាង10គីឡូ-ម៉ែត្រទៀត ក៏សកម្មភាពពុះដីឡូត៍កំពុងមមាញឹកដែរ ខណៈដែលរដ្ឋាភិបាលប្រកាសសាងសង់ផ្លូវជាតិលេខ3 ឡើងវិញ ចាប់ពីរង្វង់មូលចោមចៅឆ្ពោះទៅកំពង់ផែទឹកជ្រៅនៅសមុទ្រក្នុងខេត្តកំពត។
យោងតាមរបាយការណ៍របស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកណ្តាលបានបង្ហាញថា នៅឆមាសទី1 ឆ្នាំ2018នេះ មន្ទីរទទួលបានសំណើសុំសាងសង់លំនៅឋានសម្រាប់លក់កម្រិតថ្នាក់ខេត្ត និងក្រសួង ចំនួន 55ច្បាប់ និងបានបញ្ជូនទៅក្រសួងរួចរាល់ហើយដែលមានផ្ទៃដីសរុបចំនួន 879,981.05ម៉ែត្រក្រឡា និងមានទុនវិនិយោគសរុបចំនួន 241,361,000.ដុល្លារ។ ក្នុងនោះមន្ទីរទទួលបានសំណើសាងសង់កម្រិតថ្នាក់ខេត្តចំនួន 22ច្បាប់ដែលមានផ្ទៃដីសរុបចំនួន 27,913.71ម៉ែត្រក្រឡា មានទុនវិនិយោគសរុបចំនួន 7,143,358.80ដុល្លារ និងសមត្ថកិច្ចក្រសួងចំនួន 33ច្បាប់ដែលមានផ្ទៃក្រឡាសរុប 852,067.34ម៉ែត្រក្រឡាដែលមានទុនវិនិយោគ 234,217,642.00ដុល្លារដែលធៀបរយៈពេលដូចគ្នាក្នុងឆ្នាំ2017 មានចំនួន48ច្បាប់ និងមានទំហំដីសរុបចំនួន 312,036.70ម៉ែត្រក្រឡា កើនឡើងប្រមាណជា1.82ដង៕
September 7, 2018