Category: សង្គម និងសេដ្ឋកិច្ច

តាមរយៈគណនីហ្វេសប៊ុកផ្លូវការរបស់អ្នកនាង ម៉េង កែវពេជ្ជតា បានធ្វើការបង្ហោះវិដេអូមួយដែលអ្នកនាង និងកូនៗបានធ្វើការសម្តែងដើម្បីបង្ហាញវប្បធម៌ខ្មែរនៅលើឆាកអន្តរជាតិនៅឯប្រទេសបារាំង។

វីដេអូដែលមានរយៈប្រមាណជាង 5 នាទី បានស្ដែងឱ្យឃើញថា កូនប្រុសស្រីរបស់រាជនីសំឡេងមាសរូបនេះ ជាអ្នកលេងឧបករណ៍ភ្លេងបុរាណ និងសម័យ ហើយអ្នកនាង ជាអ្នកចម្រៀង ដែលបានលើកយកបទ “បណ្តាំអង្គរ” យកមកបកស្រាយ។ អ្នកនាង ម៉េង កែវពេជ្ជតា រៀបរាប់ថា « នេះជាសមិទ្ធិផលដែលយើងខ្ញុំទទួលបាន​ ។ សូមផ្ញើមោទកភាពនេះជូនដល់បងប្អូនជនរួមឈាមខ្មែរទាំងឡាយ​ ពិសេស​ ក្រុមគ្រួសារសិល្បៈ​ម៉េង​ បទ​ទីមួយ “​បណ្តាំអង្គរ​ “​ ប្រគុំតន្ត្រី​ និងច្រៀងផ្ទាល់​ ដោយអ្នកនាងពេជ្ជតា​ និងកូនទាំងពីរ​។ បទភ្លេង​ និងសម្រួលតន្ត្រី​ :​ លោកសាស្ត្រាចារ្យ​ ​ សេរីវុធ​, ទំនុកច្រៀង​ :​ អ្នកនាង​ ម៉េង​ កែវពេជ្ជតា​ ,ទ្រសោរ​ :​ កុមារា​ ពេជ្ររតនៈ Violin :​ កុមារី​ សង្វាពេជ្រ​ ,Mondoline :​ អ្នកបងធំ​ ម៉េង​កែវពេជ្របុប្ផា ,Piano :​ សាស្ត្រាចារ្យ​ រ៉ុង​ សេរីវណ្ណ, Quitar Bass : លោក​ នីលីណា​ , Clarinet : នី​ ពេជ្រឥន្ទតារា​ , រៀបចំតុបតែងសម្លៀកបំពាក់ដោយ​ សាស្ត្រាចារ្យ​ ម៉េង​ កុសុម៉ា​ និង ច្រៀង​ និងលេងឃឹមដោយ​ អ្នកនាង​ ម៉េង​ កែវពេជ្ជតា »។

អ្នកនាង ម៉េង កែវពេជ្ជតា បានបញ្ជាក់ផងដែរថា ការសម្តែងនេះត្រូវបានប្រារព្ធឡើងនៅសាលមហោស្រព មាត់សមុទ្រ Dieppe Casino ប្រទេសបារាំង នៅពីថ្ងៃទី8 ខែកញ្ញា ឆ្នាំ2018 កន្លងទៅ ដែលមានការចូលរួមពីសំណាក់ភ្ញៀវកិត្តិយសចូលរួមទស្សនាយ៉ាងច្រើនកុះករតែម្ដង៕

អាណាព្យាបាលដែលមានជីវភាពគ្រួសារកម្រិតមធ្យម​លើពិភពលោក​ត្រូវបានគេមើលឃើញ​ថាបានចំណាយពេលវេលាក្នុងការនៅជិតកូន​ច្រើនជាងអាណាព្យាបាលកាលពីជាង 50ឆ្នាំមុន។

យោងតាមការស្រាវជ្រាវ​ពី​ស្ថាប័ន Journal of Marriage and Family ដែលបានធ្វើការដកស្រង់ទិន្នន័យពីប្រទេសធំៗចំនួន11 លើពិភពលោកបានបញ្ជាក់ថា​ ម្តាយនៅក្នុងឆ្នាំ2012 ចំណាយពេលវេលា ​មើលកូនជាមធ្យម​ 104នាទីក្នុងមួយថ្ងៃ ហើយចំនួននេះច្រើនជាង​ឆ្នាំ1965 ទ្វេដងដែលកាលនោះម្តាយមានពេលនៅជាប់ជាមួយកូនជាមធ្យមត្រឹមតែ 54នាទីប៉ុណ្ណោះ។

ស្របជាមួយគ្នានេះដែរ ក៏មានទិន្នន័យមួយចំនួនទៀតបង្ហាញផងដែរថា ចំពោះឪពុកវិញ បើទោះបីជា​មានការកើនឡើងនូវពេលវេលាដែលនៅជាប់ជាមួយកូន​ក្តីតែចំនួននៅតែតិចជាងម្តាយ។ តាមទិន្នន័យបង្ហាញថា​ជាមធ្យម​ឪពុកនៅក្នុងឆ្នាំ1965 បានចំណាយពេលវេលានៅជាប់ជាមួយកូន ប្រមាណ16នាទីប៉ុណ្ណោះក្នុងមួយថ្ងៃ ហើយបានកើនឡើងមក​ដល់ប្រមាណជា 59នាទីនៅឆ្នាំ2012។

​ស្ថិតក្នុង​របត់នៃ​គេសង្កេតឃើញថា​ទោះជាចំនួននៃពេលវេលារបស់ម្តាយឪពុកនៅជាមួយកូនផ្ទាល់​ច្រើន​ជាងមុនក្តី តែ​វានៅតែជាគម្លាតមួយ​សម្រាប់​ឪពុកម្តាយនៅក្នុងពិភពលោក។ ក្រៅពីនេះគេក៏បានមើលឃើញផងដែរពីការកើនឡើងនូវ​អ្នកម្តាយដែលទទួលបានការសិក្សាររហូតដល់បញ្ចប់មហាវិទ្យាល័យ ត្រូវទទួល​នូវការងារជាច្រើន និងមានពេលតិចជាងម្តាយដែលធ្វើការងារធម្មតា។ របាយការណ៍បានបញ្ជាក់ថា នៅឆ្នាំ1965 ទាំងម្តាយដែលបានបញ្ចប់ការសិក្សាកម្រិតមហាវិទ្យាល័យ​ និងម្តាយដែលមិនទទួលបានការសិក្សាដល់មហាវិទ្យាល័យ មានពេលវេលា​មើលថែកូនស្មើគ្នា។ តែ​នៅឆ្នាំ2012 ម្តាយដែល​បានបញ្ចប់ការសិក្សាខ្ពស់ស្ទើរតែទាំងអស់លើកលែងតែម្តាយក្នុង​ប្រទេសបារាំង បានទុកកូន​នៅ​មជ្ឈមណ្ឌលមើលថែក្មេង​ច្រើនម៉ោងជាងមុន 30នាទីក្នុងមួយថ្ងៃ៕

ថ្មីៗនេះ ពិតជាប្លែកភ្នែកខ្លាំងណាស់ ខណៈដែលតារាសម្ដែងប្រុសកំពុងទទួលបានការនិយមស្រឡាញ់ពេញចិត្តពីអ្នកគាំទ្រ គឺលោក ខាត់ វ៉ៃហាំង បានសម្ញែងរាងដ៏សង្ហាគ្រងឈុតល្ខោនខោលខ្មែរ រួមមានឈុតហនុមាន និងអសុរា ហើយកាន់តែធ្វើឱ្យគ្រប់គ្នាភ្ញាក់ផ្អើលខ្លាំងទៅទៀត នៅពេលដែលលោកដើរបង្ហាញរាងនៅក្នុងបរិវេណផ្សារទំនើប អ៊ីអន 2 សែនសុខ។

ជាក់ស្ដែងបើតាមរយៈគណនីហ្វេសប៊ុករបស់លោកផ្ទាល់បានរៀបរាប់ឱ្យដឹងថា «ថតទ្រង់គ្រឿងល្ខោនខោល ដោយក្រុមសិល្បៈយុវជនល្ខោនខោលជំនាន់ថ្មី ស្អាត»។ យ៉ាងណាមិញ គេក៏មើលឃើញមានការចែករំលែកបន្ដពីនាដករល្ខោនខោល ហង់ ភូមិរា និងបានពោលសរសើរថា «ថតទ្រងគ្រឿងល្ខោនខោល ដោយក្រុមសិល្បៈយុវជនល្ខោនខោលជំនាន់ថ្មី ស្អាត»។ ក្នុងនោះគេឃើញមានអ្នកគាំទ្រលាន់មាត់សរសើរថា ពិតជាស្រស់សង្ហា ស័ក្តិសមជាបុរសខ្មែរតែម្ដង។

តោះ! កុំឱ្យខាតពេលយូរ ទស្សនារូបភាពខាងក្រោមតែម្ដង៖

នៅក្នុងយុគសម័យបច្ចេកវិទ្យានេះ អាណាព្យាបាលបានចំណាយពេលវេលា​កាន់តែតិចទៅៗក្នុងការនៅជាមួយកូន ហើយជំនួសមកវិញនូវឧបករណ៍អេឡិចត្រូនិក។ ពេលខ្លះ​កូនតូចៗស្ថិតនៅជាមួយឪពុកម្តាយពិតប្រាកដមិនដល់ 3ម៉ោង​ផងក្នុងមួយថ្ងៃ តែបានរស់នៅក្នុងពិភពបច្ចេកវិទ្យា​ដល់ទៅជាង 5ម៉ោង ឬលើសពីនេះទៀតក៏មាន។ ចំណុចទាំងអស់នេះត្រូវបាន គេរកឃើញថាធ្វើឱ្យប៉ះពាល់​ដល់កុមារទាំងផ្លូវកាយ និងផ្លូវចិត្តដែលអាចប៉ះពាល់ដល់ការរីកលូតលាស់នៃបញ្ញារបស់ក្មេងតូច។

អង្គការ UNICEF បានបញ្ជាក់ថា មនុស្សម្នាក់ក្នុងចំណោម 3នាក់​នៃអ្នកប្រើប្រាស់​អីុនធើណិតលើពិភពលោក គឺកុមារ​ ហេតុនេះវាអាចធ្វើឱ្យពួកគេទទួលផលប៉ះពាល់ជាច្រើននៅពេលដែលពួកគេប្រើប្រាស់ដោយគ្មានការគ្រប់គ្រងត្រឹមត្រូវ។ ចំនួនកុមារ​ប្រើប្រាស់បច្ចេកវិទ្យាបានកើនឡើងយ៉ាងគំហុក ខណៈអាណាព្យាបាល​ស្ទើរតែទាំងអស់ ទាំងក្នុងប្រទេសអភិវឌ្ឍន៍ និងប្រទេសក្រីក្រ រវល់កាន់តែខ្លាំងជាមួយនឹងការធ្វើការងារ និងមុខរបរអាជីវកម្ម​ ស្របពេលដែលតម្លៃនៃ​ឧបករណ៍អេឡិចត្រូនិក​មានការថយចុះ ហើយមនុស្សស្ទើរគ្រប់គ្នាអាចប្រើប្រាស់វាបាន។

គេហទំព័រអប់រំ​ដ៏ល្បីល្បាញ​ Education world បានបញ្ជាក់ថា​ សម្រាប់កុមារតូចត្រូវសម្រាកច្រើនជាង 10ម៉ោង ខណៈមនុស្សជំទង់ត្រូវសម្រាក​ឱ្យបាន 8ម៉ោងក្នុងមួយថ្ងៃ។ ការសម្រាកមិនគ្រប់គ្រាន់​អាចធ្វើឱ្យកុមាររងផលប៉ះពាល់ជាច្រើនដូចជាការរីកលូតលាស់មិនបាន​ល្អផ្នែករាងកាយ ការប្រឈមនឹងជំងឺធាត់ បញ្ហាផ្លូវចិត្តមិនល្អ ធុញថប់ច្រើន ឆេវឆាវ និងអាចប៉ះពាល់ដល់ភាពឆ្លាតវៃ​របស់កុមារទៀតផង។

ថ្វីដ្បិតតែ Game ឬគេហទំព័រមួយចំនួន​ជំរុញឱ្យ​ផលចែកខាងបញ្ញា (IQ) របស់កុមារកើនឡើងមែន តែ​ការប្រើប្រាស់បច្ចេកវិទ្យាច្រើនជ្រុលអាចបណ្តាលឱ្យប៉ះពាល់ដល់កុមារយ៉ាងខ្លាំង។ គេហទំព័រខាងលើបានបញ្ជាក់ថា កុមារបច្ចុប្បន្នប្រឈមនឹងបញ្ហាសម្រាកមិនគ្រប់គ្រាន់ ព្រោះ​ហេតុផលមួយចំនួនដូចជា ទី1 បញ្ហាពន្លឺនៃ Smart Phone ឬ Tablet អាចធ្វើឱ្យកុមារ​មិនចង់សម្រាក​ និងខ្លះទៀតគេងមិនលក់ហើយ​ បន្តនៅជាមួយវារហូតដល់យប់ជ្រៅ។ បញ្ហានេះធ្វើឱ្យ​ក្មេងៗទម្លាប់ងើបយឺតហើយមានអារម្មណ៍មិនល្អនៅពេលពួកគេទៅសាលា។ ចំណុចទី2 គឺកុមារតូចអាចនឹងនឿយហត់ខ្លាំងជ្រុល ខ្វះការសម្រាកផ្នែកអារម្មណ៍ និងខួរក្បាល ព្រោះការនៅជាមួយឧបករណ៍អេឡិចត្រូនិកច្រើនជ្រុល បើទោះបីជាមើលទៅឃើញពួកគេកំពុងលេងសប្បាយក៏ដោយ តែពួកគេក៏កំពុងប្រើប្រាស់ខួរក្បាលយ៉ាងច្របូកច្របល់​ជាមួយវាដែរ។ ហេតុនេះវាអាចបង្កគ្រោះថ្នាក់ធ្ងន់ធ្ងរដល់កុមារប្រសិនបើអាណាព្យាបា​ល​មិនបានយកចិត្តទុកដាក់ឱ្យបានដិតដល់​ចំពោះក្មេងទេនោះ។

អ្នកជំនាញផ្នែក​បច្ចេកវិទ្យានៃ​វិទ្យាស្ថានសិក្សាពីចម្ងាយ កញ្ញា សៀក ឡេង បានលើកឡើងថា កុមារដែលនៅជាមួយបច្ចេកវិទ្យាច្រើនជ្រុល អាចប្រឈមជាមួយនឹងបញ្ហា​មិនសូវរហ័សរហួន ហើយ​បាត់បង់ការទំនាក់ទំនងល្អជាមួយនឹង​មនុស្សធំ។ បញ្ហាទាំងអស់នេះក៏អាចធ្វើឱ្យគេប៉ះពាល់ដល់អនាគតផងដែរ។ ហេតុនេះប្រសិនបើអាណាព្យាបាល​មិនចង់ឱ្យកូន​តូចក្លាយជាមនុស្សញៀន​នឹងឧបករណ៍អេឡិចត្រូនិក ចាំបាច់ត្រូវតែរកវិធីដើម្បីបង្កើនភាពជិតស្និទ្ធជាមួយកូន ដោយការនាំពួកគេឱ្យលេងរបស់ពិតៗ មិនមែន​លេងល្បែងតាម​ឧបករណ៍អេឡិចត្រូនិកនោះទេ៕ ​

គែន គឺជាប្រភេទឧបករណ៍តន្ត្រីគ្រឿងផ្លុំ ធ្វើពីបំពង់ឫស្សីតូចៗជាច្រើនដើម និងមានប្រវត្តិដ៏យូរលង់ណាស់មកហើយនៅប្រទេសយើង។ ដោយសារយើងសង្កេតឃើញថា គែន ក៏មានប្រើប្រាស់នៅតាមប្រទេសជិតខាងមួយចំនួនដែរនោះ ទើបបណ្ដាលឱ្យកូនខ្មែរមួយចំនួនមិនបានស្គាល់ពីភាពខុសគ្នា រវាងគែនខ្មែរ គែនឡាវ និងគែនថៃថា តើមានភាពខុសគ្នាខាងបំពង់សំឡេងយ៉ាងណាខ្លះ។

បើតាមការបញ្ជាក់របស់អ្នកគ្រូ ដូរីវណ្ណ និងក្រុមការងារឯកទេសភ្លេងបុរាណខ្មែរថា អ្នកគ្រូនឹងរៀបចំសិក្ខាសាលាផ្លាស់ប្ដូរមួយជាមួយសិល្បករគែនមកពីប្រទេសឡាវ។ សិក្ខាសាលានេះចាប់ផ្តើមនៅថ្ងៃទី13 ខែកញ្ញា ឆ្នាំ2018 វេលាម៉ោង9: 30នាទី ដល់ម៉ោង11ព្រឹក នៅឆាកសម្ដែងសិល្បៈខ្មែរអតមៈសារមន្ទីរជាតិ ភ្នំពេញ។ នៅក្នុងកម្មវិធីសិក្ខាសាលានេះផងដែរ ក៏មានបទបង្ហាញអំពីគែនខ្មែរ និងឡាវ ដែលមានប្រវត្តិយូរលង់ តែដោយឡែកនៅក្នុងប្រទេសកម្ពុជា គេសង្កេតឃើញពុំសូវមានអ្នកចេះផ្លុំគែនដូចកាលពីបុរាណកាលឡើយ។ នាបច្ចុប្បន្ន គេឃើញមានតែបងប្អូនខ្មែរមួយចំនួនតូចនាខេត្តស្ទឹងត្រែង ឧត្តរមានជ័យ និងព្រឹទ្ធាចារ្យមួយចំនួនប៉ុណ្ណោះដែលចេះផ្លុំគែនខ្មែរ។

សូមជម្រាបថា អ្នកគ្រូក៏បានអំពាវនាវឱ្យកូនខ្មែរគ្រប់រូបចូលរួមស្វែងយល់អំពីឧបករណ៍ភ្លេងខ្មែរមួយនេះ ដែលស្ទើតែបាត់បង់ទៅហើយ ដោយសារគ្មានអ្នកចេះផ្លុំ និងចង់ឱ្យយុវវជនបានចូលរួមចំណែកក្នុងការថែរក្សាគែនខ្មែរជាថ្មីឡើងវិញ ព្រោះនេះជាមរតកដូនតាខ្មែរមួយដែលបានបន្សល់ទុក។

ដើម្បីកាន់តែជ្រាបច្បាស់ សូមទស្សនាវីដេអូពន្យល់ពីឧបករណ៍តន្ត្រីគ្រឿងផ្លុំ គែនខ្មែរ ខាងក្រោមនេះ ៖