Category: សង្គម និងសេដ្ឋកិច្ច

លោក Klopp សរសើរភាពឆ្លាតវៃរបស់ Neymar ខណៈ Salah ត្រៀមបង្ហាញថ្វីជើង
លោក Jurgen Klopp អ្នកចាត់ការទូទៅរបស់ក្រុម Liverpool បានការពារការសម្តែងនៅលើទីលានរបស់ Neymar ក្នុងព្រឹត្តិការណ៍ World Cup និងជឿជាក់ថា វានឹងមិនអាចទៅរួចឡើយក្នុងការមើលស្រាលតារាឆ្នើមអន្តរជាតិប្រេស៊ីលរូបនេះ នៅពេលដែលក្រុម Paris Saint-Germain នឹងធ្វើដំណើរទៅកាន់កីឡដ្ឋាន Anfield ក្នុងក្របខ័ណ្ឌ Champions League នៅរាត្រីនេះ។
លោក Klopp បានបញ្ជាក់ថា Neymar មិនមានភាពរឹងប៉ឹងទាំងស្រុងឡើយកាលនៅប្រទេសរុស្ស៊ី ក្រោយពីបានបាក់ឆ្អឹងត្រង់ប្រអប់ជើងរបស់គេកាលពីខែកុម្ភៈ ដែលបានបង្ខំឱ្យរូបគេត្រូវសម្រាកអស់រយៈពេលដ៏យូរមុនយុទ្ធនាការ World Cup។
ប៉ុន្តែ ទោះបីជាយ៉ាងណា កីឡាករមានតម្លៃខ្លួនខ្ពស់ជាងគេបំផុតរបស់ពិភពលោករូបនេះ បានទទួលនូវការកោតសរសើរសម្រាប់ទម្រង់លេងរបស់គេ និងបានក្លាយជាតួកំប្លែងសម្រាប់ការសម្តែងការរងរបួសជ្រុលហួសហេតុរបស់គេ ខណៈដែលប្រេស៊ីល បានធ្លាក់ចេញត្រឹមវគ្គ 8ក្រុមចុងក្រោយក្រោមស្នាដៃក្រុមជម្រើសជាតិបែលហ្ស៊ិក។
Mohamed Salah បានបង្ហាញពីទម្រង់លេងល្អប្រសើរជាងតារាឆ្នើម Neymar និងKylianMbappe ក្នុងការប្រកួតក្របខ័ណ្ឌ Champions League កាលពីរដូវកាលមុន ប៉ុន្តែខ្សែប្រយុទ្ធឆ្នើមទាំង2 របស់ក្រុម Paris Saint-Germain នេះនឹងធ្វើដំណើរទៅកាន់កីឡដ្ឋាន Anfield នៅរាត្រីនេះ ដោយសម្លឹងរកការស្តារមុខមាត់នានា ស្របពេលដែលខ្សែប្រយុទ្ធអន្តរជាតិអេហ្ស៊ីប Salah កំពុងតែព្យាយាមរកទម្រង់លេងដ៏ល្អឥតខ្ចោះរបស់គេក្នុងយុទ្ធនាការទី1 ជាមួយ Liverpool។ កាលពីខែឧសភា Salah បានបង្កើតឱ្យមានការចាប់អារម្មណ៍ផ្សេងៗ ខណៈដែលគ្រាប់បាល់សរុបចំនួន 44គ្រាប់របស់គេបានជួយឱ្យក្រុម Liverpool ឈានទៅដល់វគ្គផ្តាច់ព្រ័ត្រនៃក្របខ័ណ្ឌ Champions League និងបានជួយឱ្យពួកគេឈ្នះសិទ្ធិទៅលេងក្នុងយុទ្ធនាការនៃរដូវកាលនេះ។
ហេតុនេះ Salah នឹងសម្លឹងរកការបង្ហាញថ្វីជើងរបស់គេម្តងទៀត ក្នុងការប្រកួត1 ក្នុងចំណោមការប្រកួតដ៏រំភើបបំផុតនៃក្របខ័ណ្ឌ Champions League។ ការប្រកួតនេះនឹងចាប់ផ្តើមនៅម៉ោង2 ទៀបភ្លឺ៕
ប្រភពពី៖ Sport24
September 18, 2018
ចិញ្ចឹមមេជ្រូក 1ក្បាលអាចបង្កើតកូនលក់បាន 1,000ដុល្លារក្នុងមួយឆ្នាំ
ការចិញ្ចឹមជ្រូកយកកូនលក់ជារបរគួបផ្សំមួយទៀតបន្ទាប់ពីការធ្វើស្រែចម្ការ ឬការងារចម្បងផ្សេងទៀត ដែលជួយឱ្យគ្រួសារកសិករអាចរកចំណូលបន្ថែមបានច្រើនគួរសម និងជួយឱ្យជីវភាពរស់នៅរបស់គាត់កាន់តែប្រសើរឡើងពីមួយឆ្នាំទៅមួយឆ្នាំទៀតផង។
លោក អឿន សុខរ៉ា ជាគ្រូបង្រៀនមុខវិជ្ជាភូមិវិទ្យានៅវិទ្យាល័យមោងឫស្សី បានមានប្រសាសន៍ថា លោកមិនមែនមានការងារត្រឹមតែជាគ្រូបង្រៀនប៉ុណ្ណោះទេ ប៉ុន្តែលោកថែមទាំងមានដីធ្វើស្រែចំនួន2ហិកតាដូចកសិករក្នុងភូមិផ្សេងៗទៀតដែរ ប៉ុន្តែរបរទាំង 2នេះគ្រាន់តែរកចំណូលសម្រាប់ដោះស្រាយជីវភាពប្រចាំថ្ងៃប៉ុណ្ណោះ ហើយដើម្បីឱ្យមានប្រាក់ចំណូលបន្ថែមទៀតសម្រាប់ទិញសម្ភារទាន់សម័យប្រើប្រាស់នឹងគេ លោកបានឆ្លៀតពេលចិញ្ចឹមមេជ្រូកយកកូនលក់ ដែលធ្វើឱ្យអាចរកចំណូលបានច្រើនគូរសមថែមទៀត ធ្វើឱ្យលោកអាចមានលទ្ធភាពទិញដីធ្វើផ្ទះនៅ ទិញគោយន្តធ្វើស្រែ ក្លាយជាគ្រួសារមានជីវភាពល្អប្រសើរមួយនៅក្នុងភូមិម្រះព្រៅ ឃុំជ្រៃ ស្រុកមោងឫស្សី ខេត្តបាត់ដំបង។
លោក អឿន សុខរ៉ា កំពុងលាយចំណីជ្រូក
លោកបានបញ្ជាក់ថា គ្រួសារលោកបានចិញ្ចឹមមេជ្រូកយកកូនលក់នេះតាំងពីឆ្នាំ2009មកម៉្លេះ ដែលរបរនេះលោកចេះតៗគ្នាពីអ្នកចិញ្ចឹមក្នុងភូមិ ដោយកាលពីដំបូងលោកចិញ្ចឹមមេជ្រូកចំនួន 4ក្បាល ដែលធ្វើឱ្យអាចរកចំណូលបានប្រមាណជា4,000ដុល្លារដែរក្នុងមួយឆ្នាំៗ ហើយគិតៗទៅជ្រូកមេមួយក្បាលជាមធ្យមអាចជួយរកចំណូលឱ្យម្ចាស់បានចំនួន 1,000ដុល្លារក្នុងមួយឆ្នាំ។ លោកថា ជាទូទៅរយៈពេល 5ខែ មេជ្រូកនឹងកើតកូនម្តងបានចំនួនពី12 ទៅ15ក្បាល ហើយនៅពេលកូនជ្រូកអាយុបាន30 ទៅ35ថ្ងៃ វានឹងមានទម្ងន់ប្រហែល8-10គីឡូក្រាមក្នុងមួយក្បាល ដែលយើងអាចចាប់លក់បានក្នុងតម្លៃចន្លោះពី20 ទៅ25ម៉ឺនរៀលក្នុងមួយក្បាល អាស្រ័យទៅលើហាងឆេងទីផ្សារឡើងថ្លៃ ឬចុះថ្លៃសម្រាប់កសិករដែលទិញយកទៅចិញ្ចឹមយកសាច់លក់បន្តទៀត។
ទោះយ៉ាងណា ការចិញ្ចឹមជ្រូកមេយកកូនលក់នេះទាមទារឱ្យយើងមានការយកចិត្តទុកដាក់ និងមានការថែទាំខ្លាំងទៅលើការផ្តល់ចំណីអាហារ ការថែរក្សាអនាម័យការថែរក្សាសុខភាពជ្រូក និងយល់ដឹងពីវិធីសាស្ត្រចាក់ថ្នាំបង្ការ ថ្នាំព្យាបាល ឬវ៉ាក់សាំងការពារជំងឺផ្សេងៗទៀតផងដែរ។ ឧទាហរណ៍ មួយសប្តាហ៍នៅមុនពេលមេជ្រូកបង្កើតកូន គេត្រូវចាក់ថ្នាំទម្លាក់សត្វល្អិតចោលម្តង ហើយត្រូវផ្តល់ចំណីណាដែលជំនួយកម្លាំងដើម្បីឱ្យមេជ្រូកមានកម្លាំងបង្កើតកូន និងមានទឹកដោះច្រើនឱ្យកូនបៅ។ លុះដល់ដំណាក់កាលកើតកូន គេត្រូវចាក់ថ្នាំឱ្យស្បូនជ្រូកបើកជាជំនួយឱ្យវាកើតកូនបានលឿន និងមានសុខភាពល្អផងដែរ ដែលថ្នាំជំនួយក្នុងការបង្កើតកូននេះ គេត្រូវចាក់ឱ្យវាបន្ទាប់ពីវាកើតបានកូនមួយមុនគេ។ ជាមួយគ្នានេះគេត្រូវចាក់ថ្នាំផ្សះការពារមេរោគឆ្លងផងដែរ។ ពេលចាក់ថ្នាំរួច គេត្រូវបង្កាត់ភ្នក់ភ្លើងនៅក្បែវា ឬដាក់អំពូលភ្លើងកម្ដៅ ហើយបើគ្មានអំពូលភ្លើងទេ គេត្រូវក្រាលចំបើង ឬរកក្រណាត់ចាស់ៗយកមកក្រាលឱ្យមេជ្រូកដេក ដើម្បីឱ្យមានភាពកក់ក្តៅ បង្ការខ្លាចក្រែងជ្រូកកើតជំងឺផ្តាសាយ និងជំងឺផ្សេងៗទៀត។
បន្ទាប់ពីវាកើតកូនអស់ កសិករត្រូវកាត់ធ្មេញកូនជ្រូកទាំងនោះចោល ដើម្បីកុំឱ្យវាខាំគ្នា ឬខាំដោះមេវានៅពេលបៅ ព្រោះពេលណាវាខាំដោះមេវាហើម មេវានឹងលែងឱ្យបៅមិនខាន។ ដំណាក់កាលបន្ទាប់ គេត្រូវកាត់កន្ទុយកូនជ្រូកទាំងនោះចោលទៀត ព្រោះថាកន្ទុយវាត្រូវបានអ្នកជំនាញរកឃើញថា មានញាណពិសេសធ្វើឱ្យកូនជ្រូកឆាប់ភ្ញាក់ដឹងខ្លួន ដេកមិនបានយូរនៅពេលឮសម្លេងអ្វីមួយ ដែលជាហេតុធ្វើឱ្យកូនជ្រូកមិនសូវធំធាត់ល្អ ឬធំធាត់យឺត ឬក្រធំនាំឱ្យយើងខាតចំណី និងពេលវេលាក្នុងការចិញ្ចឹមវា ប៉ុន្តែកុំភ្លេចចាក់ថ្នាំផ្សះឱ្យវាផងពេលកាត់ធ្មេញ និងកាត់កន្ទុយវារួច ដោយត្រូវយកថ្នាំក្រហមមកលាបកន្ទុយ និងផ្ចិត វាដើម្បីឱ្យឆាប់ជាសះពីមុខរបួស។
កូនជ្រូកកំពុងបៅ
ក្រៅពីវិធីសាស្ត្រខាងលើ កសិករត្រូវលាងសម្អាតទ្រុងជាប្រចាំ តែមិនត្រូវលាងកូនជ្រូកនោះទេ ព្រោះថាកូនជ្រូកនៅតូច ស្បែកវានៅស្តើងដែលងាយកើតជំងឺខ្លាំងណាស់ពេលអាកាសធាតុក្តៅ ហើយបើយើងយកកូនជ្រូកមកលាង វាអាចនឹងឈឺ ដោយសារវាមិនទាន់សុំានឹងអាកាសធាតុក្តៅ ហើយត្រជាក់ភ្លាមប៉ុន្តែបើសិនជាខ្លួនកូនជ្រូកប្រឡាក់លាមកវាច្រើន យើងអាចលាងសម្អាតវាបាន ដោយយកសាប៊ូម្សៅដុសលាងសម្អាតតាមធម្មតា ប៉ុន្តែពេលលាងរួច ត្រូវយកក្រណាត់មកជូតឱ្យស្អាត រួចសឹមលែងវាចូលទ្រុងវិញ។ រហូតដល់កូនជ្រូកអាយុបាន 15ថ្ងៃ គេអាចលាងសម្អាត និងងូតទឹកឱ្យកូនជ្រូកបានហើយ និងក្រៅពីថែររក្សាអនាម័យហើយ គេត្រូវគិតរឿងចំណីឱ្យវាផងដែរក្នុងអំឡុងពេលនេះ។ ក្នុងដំណាក់កាលទើបកើតដំបូង គេមិនបាច់ដាក់ចំណីឱ្យវាស៊ីទេ ព្រោះវាចេះបៅដោះមេតែមួយមុខគត់ រហូតដល់កូនជ្រូកមានអាយុបាន 1សប្តាហ៍ ទៅ10ថ្ងៃ ទើបគេដាក់ចំណីឱ្យវាស៊ីតិចៗជាដំបូងដោយលាយជាមួយចេកទុំ។ តាមពិតទៅ ដំបូងៗកូនជ្រូកមិនចេះស៊ីចំណីទេ តែវាចេះស៊ីចេកទុំ លុះស៊ីបានមួយរយៈខ្លី ទើបវាសុំានឹងចំណី ហើយចេះស៊ីដោយខ្លួនឯង។ រហូតដល់កូនជ្រូកអាយុបាន 20ថ្ងៃទើបវាលែងបៅ និងងាកមកស៊ីចំណីវិញម្ដង។ កូនជ្រូក10ក្បាលជាមធ្យមវាស៊ីចំណីអស់ 30គីឡូក្រាមក្នុងរយៈពេល 10ថ្ងៃ រហូតដល់អាយុបាន 35ថ្ងៃកូនជ្រូកនឹងមានទម្ងន់ចន្លោះពី 8 ទៅ10គីឡូក្រាមក្នុងមួយក្បាល ពេលនោះយើងអាចចាប់លក់បានហើយ។
យ៉ាងណាក៏ដោយ កន្លងមកដោយសារជ្រូករស់នាំចូលពីក្រៅប្រទេសច្រើនពេក បានធ្វើឱ្យជ្រូករស់ក្នុងស្រុកធ្លាក់ថ្លៃ នាំឱ្យកសិករជាច្រើនក្នុងភូមិឃុំខាងលើ បោះបង់ចោលរបរចិញ្ចឹមជ្រូកនេះ ហើយអ្នកភូមិបានអំពាវនាវឱ្យមន្ត្រីពាក់ព័ន្ធកំណត់ចំនួនជ្រូកនាំចូលឱ្យបានច្បាស់លាស់មុននឹងនាំចូលមកលក់លើទីផ្សារកម្ពុជា ដោយទុកលទ្ធភាពឱ្យជ្រូកកសិករខ្មែរអាចលក់បានថ្លៃខ្ពស់នៅលើទីផ្សារខ្លួនឯងផង៕
September 18, 2018
កំណើនប្រជាជនក្នុងទីក្រុង ធ្វើឱ្យដីឡូត៍នៅជាយក្រុងឡើងថ្លៃ
តម្លៃដីនៅក្នុងតំបន់សំខាន់ៗមួយចំនួនក្នុងរាជធានីភ្នំពេញបានស្ថិតនៅទ្រឹងក្នុងឆមាសទី1 ឆ្នាំ2018 ដោយសារតម្លៃដីក្នុងសង្កាត់មួយចំនួនបានឈានដល់កម្រិតខ្ពស់រួចស្រេចទៅហើយ និងដីដែលតម្លៃមានការកើនឡើងខ្លាំងគួរឱ្យកត់សម្គាល់នោះ គឺដីស្ថិតនៅតំបន់ជាយក្រុង។ នេះបើតាមរបាយការណ៍ស្រាវជ្រាវស្តីពីតម្លៃដីធ្លីនៅក្នុងរាជធានីភ្នំពេញរបស់ក្រុមហ៊ុនអចលនទ្រព្យ។
លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL បានពន្យល់ថា ការឡើងថ្លៃរបស់ដីធ្លីសម្រាប់ទីក្រុងសំខាន់ៗ មានភ្នំពេញ បន្ទាប់មកគឺសៀមរាប និងព្រះសីហនុដែលយើងមើលឃើញថាកំពុងឡើងថ្លៃខ្លាំង។ ការឡើងថ្លៃរបស់ដីធ្លីនេះ មិនមែនយើងចេះតែថា តំបន់នេះឡើងថ្លៃ ឬតំបន់នោះចុះថ្លៃនោះទេគឺការឡើងថ្លៃវាអាចមានកម្រិតរបស់វា ព្រោះវាមានលក្ខណៈមួយដែលអាចឱ្យខាងវិស័យឯកជនទទួលបានព័ត៌មានគ្រប់ជ្រុងជ្រោយអំពីតម្លៃ។
លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL
លោកឧកញ៉ាបានបញ្ជាក់ថា ចំពោះព័ត៌មានអំពីតម្លៃដី ពេលខ្លះក៏យើងទទួលបានតាមរយៈ Media ដែរ។ ឥឡូវនេះដើម្បីឱ្យកាន់តែច្បាស់លាស់នោះ គឺយើងកំពុងគ្រប់គ្រងនូវអ្វីដែលជាព័ត៌មានដីធ្លីឱ្យច្បាស់លាស់ថា តើតំបន់ណាឡើងថ្លៃ តំបន់ណានៅទ្រឹង និងតំបន់ណាតម្លៃធ្លាក់ចុះវិញ ដូច្នេះយើងកំពុងតែធ្វើការងារហ្នឹងហើយ ដើម្បីងាយស្រួលក្តាប់បាននូវព័ត៌មាននៃតម្លៃដី។
ចំពោះអ្វីដែលអ្នកវិភាគនិយាយថា តម្លៃដីនៅថេរនោះ លោកឧកញ៉ាយល់ថា៖ “យោបល់របស់អ្នកជំនាញគឺមិនខុសទេ ព្រោះតម្លៃដីនៅកន្លែងណាដែលឡើងដល់កម្រិតរបស់វាហើយ វានឹងមិនឡើងទៀតទេ ប៉ុន្តែដីនៅជាយក្រុងរបស់យើង វានៅមានតម្លៃទាបនៅឡើយ បើឡើងត្រឹមតែ 20ដុល្លារ ទៅ40ដុល្លារអី មិនទាន់ហៅថាឡើងទេ គឺនៅតម្លៃទាបនៅឡើយ។ នៅតំបន់ជាយក្រុងមានការពុះដីឡូត៍លក់ដោយមិនមានការគោរពតាមប្លង់មេនោះទេដូច្នេះយើងនឹងមិនទទួលបានទីប្រជុំជនមួយដែលអាចទាក់ទាញភ្ញៀវអន្តរជាតិបានឡើយ ដោយសារតែគ្មានសណ្ដាប់ធ្នាប់ និងមិនធ្វើតាមប្លង់មេ(Master plan)។
សម្រាប់មូលហេតុនៃកំណើនការពុះដីឡូត៍លក់នៅតំបន់ជាយក្រុងនេះ លោកអគ្គនាយកក្រុមហ៊ុនអចលនទ្រព្យរូបនេះបានលើកឡើងថា “ដោយសារកំណើនប្រជាជនក្នុងទីក្រុងមានការកើនឡើង ធ្វើឱ្យតម្លៃដីក្នុងទីក្រុងឡើងថ្លៃ ហើយពលរដ្ឋភាគច្រើនមិនមានលទ្ធភាពទិញផ្ទះក្នុងតម្លៃថ្លៃ ទើបងាកទៅសម្លឹងមើលដីនៅជាយក្រុងវិញ កត្តាមួយនេះហើយដែលធ្វើឱ្យដីឡូត៍ដាក់លក់នៅតាមតំបន់ជាយក្រុងមានតម្រូវការខ្លាំង។ ដីឡូត៍ភាគច្រើន គេអភិវឌ្ឍនៅតំបន់ជាយក្រុងដែលស្ថិតនៅមិនឆ្ងាយពេកទេ មានរោងចក្រច្រើន និងជាទីប្រជុំជនដែលមានប្រជាជនរស់នៅច្រើនជាដើម‟។
លោកឧកញ៉ា ចេង ខេង បានលើកឡើងថា ស្ថានភាពពុះដីឡូត៍លក់មានចំនួនច្រើនហួស អាចបណ្តាលឱ្យវិស័យនេះមានភាពអនាធិបតេយ្យ។ ការពុះដីឡូត៍លក់ទោះជាទទួលបានលុយច្រើនក៏ពិតមែន លក់ដាច់ក៏ពិតមែន ប៉ុន្តែបើយើងគិតដល់អនាគត វាមិនជាអស្ចារ្យអីទេ ព្រោះការពុះដីឡូត៍លក់នេះ គ្មានអ្នកទទួលខុសត្រូវចំពោះការកសាងហេដ្ឋារចនាសម្ព័ន្ធថ្មីទាំងនោះឡើយ។
អ្នកជំនាញសេដ្ឋកិច្ចមួយរូបធ្លាប់បានអត្ថាធិប្បាយអំពីតម្រូវការដី និងកំណើនប្រជាជននៅឆ្នាំ2030ថា ទីក្រុងភ្នំពេញនឹងត្រូវការដីសង់លំនៅដ្ឋានរហូតដល់3,600ហិកតា។ ក្នុងមួយឆ្នាំប្រជាជនក្នុងទីក្រុងភ្នំពេញត្រូវការផ្ទះចំនួន 2ម៉ឺនខ្នង ពោលគឺត្រូវការដី300ហិកតាក្នុង1ឆ្នាំ ដើម្បីសង់លំនៅឋានដោយបូករួមទាំងសួនច្បារ សាលារៀន និងផ្លូវថ្នល់ជាដើមផង នេះមិនទាន់គិតពីដីសម្រាប់សង់រោងចក្រ និងឃ្លាំងនៅឡើយទេ។
យោងតាមតម្រូវការខាងលើ យើងអាចធ្វើផែនការក្នុងការវិនិយោគដីធ្លីសម្រាប់រយៈពេលវែងដើម្បីចាប់យកឱកាសពីតម្រូវការទាំងនេះ។ សម្រាប់រដ្ឋាភិបាលគួរមានផែនការមេសម្រាប់អភិវឌ្ឍទីក្រុងក្នុងរយៈពេល 100ឆ្នាំទៅមុខទៀត។ ទីក្រុងភ្នំពេញសព្វថ្ងៃត្រូវការការអភិវឌ្ឍ ពង្រីក និងកសាងទីក្រុងរណប បុរី ខុនដូ និងសំណង់អចលនទ្រព្យទំនើបៗជាច្រើនទៀត ទើបអាចឆ្លើយតបសមស្របទៅនឹងតម្រូវការនៃកំណើនប្រជាជននាពេលបច្ចុប្បន្ន និងអនាគតបាន។
គួររំឭកដែរថា ឯកសារប្លង់មេដែលមានឈ្មោះថា“ការប្រើប្រាស់ដីនៅរាជធានីភ្នំពេញសម្រាប់ឆ្នាំ2035‟ គឺជាបណ្ដុំឯកសារចំនួន 330ទំព័រជាភាសាបារាំងដែលត្រូវបានផ្តល់មូលនិធិឱ្យដោយស្ថានទូតបារាំង ហើយមានឈ្មោះជាភាសាបារាំងថា Livre Blanc ត្រូវបានសង្ខេបទៅជាឯកសារជាភាសាខ្មែរត្រឹមតែ35ទំព័រនិងបានផ្សព្វផ្សាយជាសាធារណៈកាលពីឆ្នាំ2015កន្លងមក៕
September 18, 2018
ធ្លាប់តែឃើញក្នុងបណ្ដាញសង្គមមែនទេ?? តោះទៅលេងសួនកម្សាន្ដ «ស្លឹកឈូកយក្ស» នៅប្រទេសថៃ
ម្ចាស់សួនកម្សាន្ដ «ស្លឹកឈូកយក្ស» ឬមានឈ្មោះជាផ្លូវការថា «បួអៈម៉នរ៉ាត់ ( บัวอมรรัตน์ )» បានបង្ហើបប្រាប់ថា ក្នុងមួយថ្ងៃៗមានភ្ញៀវទេសចរមកថតរូបកម្សាន្ដនៅក្នុងសួននេះជាច្រើននាក់ ហើយមានអ្នកខ្លះឈរ ឬអង្គុយនៅក្នុងស្លឹកឈូកយក្សនេះទៀតផង ដោយសារតែវាមានបន្ទះក្រដាសមិនជក់ទឹកសម្រាប់ទ្រាប់អង្គុយ ការពារប្រឡាក់ ឬសើមគូទ។
លោក ថាំមៈរ៉ុង ស៊ិរិផាត់ថៈណា មានវ័យ 55ឆ្នាំ បានបង្កើតសួនកម្សាន្ដនេះឡើងនៅឆ្នាំ2016 ដែលមានទីតាំងស្ថិតនៅក្នុងភូមិទី10 ម្ដុំវត្តច័ន្ទ ស្រុកសងឃ្វែ ខេត្តភិសៈនុលោក។ លោកបានរៀបរាប់ថា ភ្ញៀវទេសចរដែលមកកាន់ទីនេះ មិនត្រឹមតែចាប់អារម្មណ៍ចំពោះទេសភាពដ៏ស្រស់ត្រកាលនោះទេ ប៉ុន្ដែពួកគេចាប់អារម្មណ៍ខ្លាំងចំពោះបច្ចេកទេសដាំ និងថែទាំ ដើម ស្លឹក និងផ្កាឈូកយក្សដែលមិនងាយខូច និងរក្សាស្លឹកមិនឱ្យសត្វល្អិតស៊ីបានទៀតផង។ លោកបន្ដថា នៅទីនេះ មានបង្រៀនបច្ចេកទេស ព្រមទាំងលក់កូនឈូកឱ្យអតិថិជនដែលមកកម្សាន្ដក្នុងតម្លៃជាកញ្ចប់ 500បាត មិនបូកបញ្ចូលជាមួយតម្លៃជីធម្មជាតិឡើយ។
គួរបញ្ជាក់ផងដែរថា ដើមឈូកយក្សនេះអាចធំលូតលាស់ពេញទំហឹងមានប្រវែង 2ម៉ែត្រ ហើយលាតត្រដាងស្លឹកបាន 2,20 ម៉ែត្រ និងអាចទ្រទម្ងន់បានដល់ទៅ 100គីឡូក្រាម ។ ភ្ញៀវទេសចរដែលចូលមកកម្សាន្ដនៅទីនោះត្រូវចំណាយថ្លៃទិញសំបុត្រក្នុងម្នាក់ 10បាត ហើយប្រសិនបើចង់អង្គុយ ឬឈរថតរូបនៅលើស្លឹកឈូកនោះ ត្រូវចំណាយ 100បាតបន្ថែមទៀត។
តោះ! នៅចាំអីទៀត ទៅទស្សនាទាំងអស់គ្នា…
September 17, 2018
កម្ពុជាចាប់ផ្តើមជំរុញការអភិវឌ្ឍទីក្រុងរបស់ខ្លួនឱ្យក្លាយជាទីក្រុងឆ្លាតវៃ
រាជរដ្ឋាភិបាលកម្ពុជាចាប់ផ្តើមជំរុញការអភិវឌ្ឍទីក្រុងនានាឱ្យទៅជាទីក្រុងឆ្លាតវៃ ដើម្បីធ្វើឱ្យទីក្រុងរបស់កម្ពុជាកាន់តែមានភាពរស់រវើក ទាន់សម័យ ហើយរស់នៅប្រកបដោយផាសុកភាព។ គំនិតផ្តួចផ្តើមរបស់ទីក្រុងវៃឆ្លាតនឹងធ្វើឱ្យទីក្រុងកាន់តែមានសុវត្ថិភាព ប្រសិទ្ធភាព និងនិរន្តរភាពអមជាមួយបរិស្ថានល្អសម្រាប់អ្នកដែលរស់នៅក្នុងទីក្រុង។ នេះបើតាមការលើកឡើងរបស់មន្ដ្រីរដ្ឋាភិបាល។
ឯកឧត្ដម ភឿង សោភ័ណ អគ្គលេខាធិការក្រុមប្រឹក្សាភិបាលស្ថាបត្យករកម្ពុជាបានមានប្រសាសន៍ថាចាប់ពីពេលនេះទៅ ក្រុមស្ថាបត្យករ វិស្វករ និងរាល់ក្រុមហ៊ុនសំណង់ទាំងអស់មុននឹងធ្វើការសាងសង់ត្រូវគិតពីគោលការណ៍ទីក្រុងឆ្លាតវៃជាមុនសិនដើម្បីឱ្យស្របតាមទស្សនៈវិស័យរបស់រាជរដ្ឋាភិបាល។ ការជំរុញឱ្យអ្នកសាងសង់នានាគិតគូរពីគោលការណ៍ទីក្រុងឆ្លាតវៃនេះ គឺស្របពេលដែលវិស័យសំណង់កំពុងមានសម្ទុះរីកដុះដាលយ៉ាងច្រើន ដូចជា អគារពាណិជ្ជកម្មខ្ពស់ៗ សំណង់លំនៅឋានប្រណីត អគារខុនដូ និងបណ្តាផ្សារទំនើបដែលបម្រើដល់ការរស់នៅរបស់ប្រជាពលរដ្ឋបែបស៊ីវិល័យ។
ឯកឧត្ដមបានបន្ដថា៖ « រាជរដ្ឋាភិបាលកម្ពុជាបានខិតខំប្រឹងប្រែងក្នុងការអនុវត្តគោលគំនិតច្នៃប្រឌិត ការរចនា និងការរៀបចំបែបទីក្រុងបៃតងដើម្បីជាប្រយោជន៍ដល់ការរស់នៅរបស់ប្រជាពលរដ្ឋប្រកបដោយភាពសុខដុម»។
សូមបញ្ជាក់ថា ដើម្បីឈានទៅសម្រេចបាននូវគោលដៅអភិវឌ្ឍន៍ទីក្រុងឆ្លាតវៃនេះ ចាំបាច់ត្រូវមានការពាក់ព័ន្ធច្រើនណាស់ក្នុងវិស័យសំណង់ ដូចជារាល់សម្ភារសំណង់នានាត្រូវតែផលិតធានាថាមានគុណភាពល្អប្រើប្រាស់បច្ចេកវិទ្យាទំនើបស្របតាមស្តង់ដារហើយគិតគូរពីបញ្ហាបរិស្ថានជាចម្បងដើម្បីធានាឱ្យសំណង់អគារមានគុណភាពប្រើប្រាស់បានយូរអង្វែង រួមទាំងឆ្លើយតបទៅនឹងគោលការណ៍ទីក្រុងវៃឆ្លាតរបស់រាជរដ្ឋាភិបាលផងដែរ។
ទីក្រុងចំនួន3 របស់ប្រទេសកម្ពុជា រួមមានរាជធានីភ្នំពេញ សៀមរាប និងខេត្តបាត់ដំបងត្រូវបានជ្រើសរើសជាបណ្តាញទីក្រុងឆ្លាតអាស៊ាន (Smart City)បន្ទាប់ពីមេដឹកនាំទាំងអស់នៃប្រទេសជាសមាជិកបានឯកភាពលើគំនិតផ្តួចផ្តើមឱ្យមានទីក្រុងឆ្លាតវៃដែលស្នើដោយនាយករដ្ឋមន្ត្រីសិង្ហបុរីលោកLee Hsien Loong នៅក្នុងអំឡុងពេលកិច្ចប្រជុំកំពូលអាស៊ានលើកទី32៕
September 17, 2018
ផ្អែកលើមូលដ្ឋានសំខាន់ចំនួន4 ធ្វើឱ្យសេដ្ឋកិច្ចកម្ពុជាមានកំណើនខ្ពស់
មូលដ្ឋានសំខាន់ៗចំនួន4 បាននាំឱ្យស្ថានភាពសេដ្ឋកិច្ចនៃប្រទេសកម្ពុជាសម្រេចបាននូវស្ថិរភាពម៉ាក្រូសេដ្ឋកិច្ចយ៉ាងរឹងមាំក្នុងរយៈពេលជាងពីរទសវត្សរ៍ចុងក្រោយនេះ។ នេះបើតាមការលើកឡើងរបស់អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក្នុងជំនួបជាមួយគណៈប្រតិភូធនាគារអភិវឌ្ឍន៍អាស៊ី (ADB) ដឹកនាំដោយលោក ម៉ាបុប អាមេដ (Mr. Mahbub Ahmed)។
ក្នុងជំនួបជាមួយនាយកប្រតិបត្តិជំនួសប្រចាំធនាគារអភិវឌ្ឍន៍អាស៊ី (ADB Alternate Executive Director) ដែលបានមកបំពេញទស្សនកិច្ចនៅកម្ពុជានាថ្ងៃទី13 ខែកញ្ញា ឆ្នាំ2018 ឯកឧត្ដមអគ្គបណ្ឌិតសភាចារ្យ បានលើកឡើងថា កម្ពុជាសម្រេចបានស្ថិរភាពម៉ាក្រូសេដ្ឋកិច្ច និងកំណើនសេដ្ឋកិច្ចខ្ពស់ជាមធ្យមក្នុងកម្រិត 7.7% ក្នុងមួយឆ្នាំ ហើយសេដ្ឋកិច្ចកម្ពុជាត្រូវបានរំពឹងថា នឹងបន្តកំណើនរឹងមាំក្នុងរង្វង់អត្រា7,2 ក្នុងឆ្នាំ2018នេះ ។
ឯកឧត្ដមអគ្គបណ្ឌិតបានបន្តថា កត្តានេះហើយដែលធ្វើឱ្យផលិតផលក្នុងស្រុកសរុបសម្រាប់ប្រជាជនម្នាក់ៗកើនឡើងជាង 7ដង ប្រមាណជាង 200ដុល្លារអាមេរិកក្នុងឆ្នាំ1992 មកប្រមាណជិត1,500ដុល្លារអាមេរិកនៅឆ្នាំ2018នេះ ចំណែកឯអត្រានៃភាពក្រីក្របានធ្លាក់ចុះពីប្រមាណ50% ក្នុងឆ្នាំ1992 មកនៅត្រឹមរង្វង់13.5% ក្នុងឆ្នាំ2014 ទោះបីត្រូវជួបប្រទះបញ្ហាប្រឈម និងហានិភ័យពីខាងក្រៅមួយចំនួនក៏ដោយ។
ឯកឧត្ដមអគ្គបណ្ឌិតសភាចារ្យក៏បានបញ្ជាក់ដែរថា មូលដ្ឋានសំខាន់មួយចំនួន4 ដែលនាំឱ្យស្ថានភាពសេដ្ឋកិច្ចនៃប្រទេសកម្ពុជាសម្រេចបាននូវស្ថិរភាពម៉ាក្រូសេដ្ឋកិច្ចយ៉ាងរឹងមាំនោះគឺ ៖
1- ការធានាបាននូវសុខសន្តិភាព ស្ថិរភាពនយោបាយ និងការបង្កើតបរិយាកាសអំណោចផល សម្រាប់ការអភិវឌ្ឍ។
2- គោលនយោបាយ និងកម្មវិធីអភិវឌ្ឍច្បាស់លាស់ ប្រកបដោយសង្គតិភាព និងការដាក់ចេញនូវវិធានការកែទម្រង់មុតស្រួច ព្រមទាំងការពង្រឹង និងលើកកម្ពស់សមត្ថភាពស្ថាប័នសាធារណៈ។
3- ការអភិវឌ្ឍប្រកបដោយចីរភាព ដែលផ្តោតលើការអភិវឌ្ឍធនធានមនុស្ស និងការគាំពារសង្គម។
4- ការធ្វើពិពិធកម្មសេដ្ឋកិច្ច តាមរយៈការពង្រឹងហេដ្ឋារចនាសម្ព័ន្ធ រូបវន្តទាំងទីក្រុង និងជនបទ។
លោក ម៉ាបុប អាមេដ បានបញ្ជាក់តបថា កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា បានបង្ហាញនូវជោគជ័យដ៏ធំធេងរបស់កម្ពុជាក្នុងការបន្តរក្សា និងជំរុញកំណើនសេដ្ឋកិច្ចប្រកបដោយចីរភាព រក្សាបាននូវសមធម៌សង្គមល្អប្រសើរ និងកាត់បន្ថយភាពក្រីក្រ និងជាពិសេស គឺរាជរដ្ឋាភិបាលកម្ពុជា មានគោលនយោបាយត្រឹមត្រូវ ច្បាស់លាស់ ក្នុងការអភិវឌ្ឍប្រទេសជាតិ៕
September 17, 2018
Jack Ma សម្លឹងឃើញអាហ្វ្រិក ជាតំបន់វិនិយោគសេដ្ឋកិច្ចឌីជីថល
ប្រធានាធីបតីអាហ្វ្រិកខាងត្បូង លោក Cyril Ramaphosa បាននិយាយថា រដ្ឋាភិបាលរបស់លោក នឹងធ្វើការជាមួយក្រុមហ៊ុនលក់ទំនិញតាមអនឡាញដ៏ធំរបស់ចិន Alibaba ជាពិសេសគឺលោក Jack Ma ក្នុងការរុញច្រានវិស័យបច្ចេកវិទ្យាតាម-រយៈការអភិវឌ្ឍលើសេដ្ឋកិច្ចឌីជីថលនៅក្នុងតំបន់អាហ្រ្វិក។
ថ្មីៗនេះ ប្រធានាធីបតីអាហ្វ្រិកខាងត្បូង លោក Cyril Ramaphosa បានដឹកនាំគណៈប្រតិភូរដ្ឋមន្ត្រី និងមន្ត្រីជាច្រើនរូបទៅធ្វើទស្សនកិច្ចនៅក្រុមហ៊ុនបច្ចេកវិទ្យាយក្សរបស់ចិន Alibaba នេះ។ នៅក្នុងដំណើរទស្សនកិច្ចនោះ លោកប្រធានាធិបតី បានស្នើសុំឱ្យស្ថាបនិករបស់ក្រុមហ៊ុន Alibaba គឺលោកមហាសេដ្ឋី Jack Ma ចូលរួមជួយអភិវឌ្ឍវិស័យបច្ចេកវិទ្យាតាមរយៈការអភិវឌ្ឍលើសេដ្ឋកិច្ចឌីជីថលនៅក្នុងតំបន់អាហ្រ្វិក។
ប្រធានាធិបតីលោក Ramaphosa បានបង្ហាញជំហរ និងឆន្ទៈរបស់លោកថា លោកចង់អញ្ជើញ Jack Ma ទៅកាន់អាហ្វ្រិកខាងត្បូងដើម្បីជួយជ្រោមជ្រែងប្រទេសរបស់លោកក្នុងការបង្កើតមជ្ឈមណ្ឌលហ្វឹកហាត់លើវិស័យពាណិជ្ជកម្មអេឡិចត្រូនិក ដែលនេះគឺជាការគិតទុករបស់លោកជាយូរណាស់មកហើយ ដោយសារតែនៅពេលដែលលោកបានប្រកាសរឿងនេះទៅកាន់ទីសាធារណៈ អ្នកគ្រប់គ្នាពិតជាមានភាពសប្បាយរីករាយ និងរំភើបចិត្តក្នុងការបង្កើតមជ្ឈមណ្ឌលបណ្ដុះបណ្ដាលយុវវ័យ ពិសេសសម្រាប់យុវនារីនៅអាហ្វ្រិកតែម្ដង។
លោក Jack Ma ដែលជាស្ថាបនិកដ៏មហិមានៃក្រុមហ៊ុន Alibaba បាននិយាយថា ហេដ្ឋារចនាសម្ព័ន្ធអាហ្វ្រិកសព្វថ្ងៃនេះ មិនទាន់ល្អឥតខ្ចោះ នៅឡើយទេ ហើយក៏មិនទាន់អាចនិយាយបានថា ល្អនោះដែរ ប៉ុន្តែនេះគឺជាឱកាសដ៏ល្អមួយ។ ដូច្នេះ នេះគឺជាអ្វីដែលពួកគេជឿជាក់ ពីព្រោះនោះគឺអ្នកមានឱកាសដើម្បីចូលទៅជួយស្ដារហេដ្ឋារចនាសម្ព័ន្ធលើវិស័យសេដ្ឋកិច្ចឌីជីថល។ ពួកគេមានទំនុកចិត្តចំពោះទ្វីបអាហ្វ្រិក ពួកគេគិតថា សហគ្រិនមជ្ឈិមវ័យ និងអ្វីៗទាំងអស់ សុទ្ធតែត្រូវធ្វើ ពួកគេគួរតែចាប់ផ្តើមធ្វើឥឡូវនេះតែម្ដង។
គួរបញ្ជាក់ផងដែរថា កំពូលមហាសេដ្ឋីចិន លោក Ma បានទៅលេងប្រទេសអាហ្រ្វិកកាលពីខែមុនកន្លងទៅ។ អ្នកបង្កើតក្រុមហ៊ុន Alibaba រូបនេះ បានលើកឡើងថា ទ្វីបអាហ្រ្វិក គឺជាទឹកដីដែលសម្បូរទៅដោយឱកាស និងក្ដីសង្ឃឹម៕
September 17, 2018
ជំនាញភាពជាអាណាព្យាបាល (parenting skill) សំខាន់ខ្លាំងសម្រាប់ការអភិវឌ្ឍកុមារ
បើនិយាយពីការអប់រំមួយម៉ាត់ មិនមែនសំដៅតែលើការបណ្តុះបណ្តាលកូនក្មេងនោះទេ តែវាចាំបាច់មានការចូលរួមពីអាណាព្យាបាលផងដែរ ព្រោះកុមារមិនអាចអភិវឌ្ឍសមត្ថភាពបានល្អនោះទេ ប្រសិនបើពួកគេរៀនពីមេរៀនល្អៗនៅសាលា ហើយត្រូវទាញទៅមិនល្អវិញនៅពេលពួកគេចូលមករស់នៅក្នុងគ្រួសារជាក់ស្តែង។
នៅកម្ពុជា បញ្ហាយុវជនមានភាពបាក់ស្បាត ឬមិនមានសមត្ថភាពគ្រប់គ្រាន់ក្នុងការសម្រេចចិត្ត គឺដោយសារតែពួកគេមួយចំនួនធំ រស់នៅក្នុងពិភពគ្រួសារ និងសហគមន៍ ដែលរឹតត្បិតដល់សេរី-ភាពនៃការសម្រេចចិត្តរបស់ពួកគេ។ កុមារត្រូវបានគេកំណត់ថា ឱ្យត្រូវតែដើរតាមអ្វីដែលមនុស្សធំកំណត់ ហើយពួកគេមិនមានលទ្ធភាពគ្រប់គ្រាន់ក្នុងការបញ្ចេញមតិ ឬបង្ហាញពីអ្វីដែលគេចង់បាននោះទេ ព្រោះទម្លាប់របស់សង្គមយើងឱ្យតែកុមារបញ្ចេញមតិយោបល់តវ៉ា ឬនិយាយអំពីអ្វីដែលចង់បានគឺគេហៅថាជាការតមាត់ ឬជាសកម្មភាព ហាមឃាត់។ ក្រៅពីការកំណត់បន្ទាត់សម្រាប់កុមារ ហើយនោះ ពួកគេមួយចំនួនក៏បានទទួលការអប់រំបែបតឹងរ៉ឹងពីអាណាព្យាបាលដែលធ្វើឱ្យពួកគេបាក់ស្បាត និងងាយរងគ្រោះដោយអំពើហិង្សានៅក្នុងការរស់នៅនៅពេលដែលពួកគេធំឡើង និងបន្តទៅអ្នកជំនាន់ក្រោយបន្តទៀត។
នៅពេលកុមារមិនទទួលបានការគាំពារបែបវិជ្ជមាន វាអាចនឹងផ្តល់វិបត្តិមួយចំនួនសម្រាប់សង្គម ព្រោះយុវជនដែលធំឡើងពីស្ថានភាពអវិជ្ជមាន អាចនឹងមិនសូវហ៊ានសម្រេចចិត្តលើវាសនាខ្លួនឯងនោះទេ ហើយតែងតែបារម្ភពីការស្តីបន្ទោស ឬទណ្ឌកម្មជាដើម។ ម្យ៉ាងវិញទៀត កត្តាទាំងអស់នេះអាចជាបញ្ហាប្រឈមមួយដែលធ្វើឱ្យយុវជននាសម័យថ្មីមិនសូវមាននាវានុវត្តន៍ថ្មីៗ ដែលទាមទារឱ្យមានការបណ្តុះបណ្តាលខ្លាំងក្លាបន្ថែម។ តែជាទូទៅ អាណាព្យាបាលទាំងឡាយគួរយកចិត្តទុកដាក់ខ្លាំងពីជំនាញភាពជាអាណាព្យាបាល (Parenting Skill) ដែលជាកត្តាសំខាន់ក្នុងការជំរុញកូនៗឱ្យក្លាយជាមនុស្សខ្លាំងនៅថ្ងៃអនាគត។
លោក គង់ សំនៀង ប្រធាននាយកប្រតិបត្តិការនៃក្រុមហ៊ុនវ៉េស្ទឡាញន៍ អេឌ្យូខេសិន គ្រុប បានលើកឡើងថា ទន្ទឹមនឹងកូនតូចៗទទួលបានការសិក្សាល្អពីប្រព័ន្ធអប់រំដែលមានគុណភាព អាណាព្យាបាលក៏ចាំបាច់ត្រូវយល់ដឹងផងដែរពីវិធីក្នុងការអប់រំកូនដើម្បីជំរុញពួកគេឱ្យក្លាយជាមនុស្សខ្លាំងនៅថ្ងៃអនាគត។ ប្រសិនបើអាណាព្យាបាលយល់ដឹងខ្ពស់ពីវិធីសាស្រ្តក្នុងការអប់រំកូននៅក្នុងផ្ទះ យល់ពីតម្រូវការជាក់ស្តែងរបស់កុមារ ហើយចេះលើកទឹកចិត្តពួកគេឱ្យមានការខិតខំប្រឹងប្រែង នោះកុមារនឹងអាចអភិវឌ្ឍខ្លួនក្នុងស្ថានភាពវិជ្ជមាន ដែលធ្វើឱ្យពួកគេអាចក្លាយជាមនុស្សមានភាពច្នៃប្រឌិតខ្ពស់ និងអត្តចរិតល្អនៅថ្ងៃអនាគត។
លោក គង់ សំនៀង ប្រធាននាយកប្រតិបត្តិការនៃក្រុមហ៊ុនវ៉េស្ទឡាញន៍ អេឌ្យូខេសិន គ្រុប
លោក គង់ សំនៀង បាននិយាយថា៖ “ប្រសិនបើកូនតូចៗ កំពុងខិតខំប្រឹងរៀន តែអាណាព្យាបាលគាត់មានបញ្ហាច្រើន មានវិបត្តិឈ្លោះទាស់ទែងគ្នាមានអំពើហិង្សា និងមានគំរូមិនល្អ នោះក្មេងក៏មិនអាចរៀនពូកែបានដែរ”។
អាណាព្យាបាលចាំបាច់ត្រូវតែដឹងពីតួនាទីរបស់ខ្លួនក្នុងការបណ្តុះបណ្តាលកុមារ ព្រោះក្មេងៗនៅសាលាក្នុងរយៈពេលខ្លី តែរស់នៅជាមួយអាណាព្យាបាលក្នុងរយៈពេលវែង ហេតុនេះប្រសិនបើអាណាព្យាបាលមានចំណេះដឹងក្នុងការគ្រប់គ្រងក្មេងបានល្អ នោះមានន័យថា ការអប់រំកុមារក៏មានលក្ខណៈពេញលេញ ឆ្លើយតបឱ្យគ្នាបានល្អផងដែរ។ អាណាព្យាបាលជាច្រើនចង់ឱ្យកូនក្លាយជាមនុស្សល្អ តែពេលខ្លះទង្វើរបស់គាត់អាចប៉ះពាល់ដល់ការគិតរបស់ក្មេងដោយមិនដឹងខ្លួន ហេតុនេះអ្វីដែលអាចធ្វើបានគឺកាត់បន្ថយទម្លាប់អវិជ្ជមានដែលធ្លាប់ទទួលបានពីអាណាព្យាបាលជំនាន់មុន ហើយស្វែងយល់ពីវិធីល្អៗដើម្បីជំរុញក្មេងៗជំនាន់ក្រោយឱ្យកាន់តែមានសក្តានុពលវិជ្ជមាន។
អាណាព្យាបាលជាច្រើននៅកម្ពុជាមិនសូវផ្តល់ឱកាសឱ្យកូនក្នុងការសម្រេចចិត្តខ្លួនឯងនោះទេ តែគាត់ចូលចិត្តសម្រេចចិត្តជំនួសកូនតូច ព្រោះគាត់តែងតែគិតថា កូនរបស់គាត់នៅក្មេងជានិច្ច។ ចំណុចនេះពេលខ្លះបានផ្តល់ផលវិជ្ជមានដល់ក្មេងដោយទទួលបានការថ្នាក់ថ្នម និងទំនុកបម្រុងជាប់ជានិច្ចតាំងពីតូចដល់ធំ តែវាក៏ផ្តល់គុណវិបត្តិច្រើនផងដែរនៅពេលអាណាព្យាបាលនៅតែព្យាយាមក្តោបក្តាប់សិទ្ធិក្នុងការសម្រេចចិត្តរបស់កូនលើគ្រប់រឿងទាំងអស់ ដែលធ្វើឱ្យគេបាត់បង់សេរីភាពក្នុងការគិត។ ក្រៅពីនេះ យុវជនជាច្រើនហាក់ព្យាយាមដើរក្នុងផ្លូវអវិជ្ជមានដើម្បីគេចចេញពីគំនាបអប់រំក្នុងគ្រួសារដែលអាណាព្យាបាលមិនបានយល់ដឹងពីវិធីសាស្ត្រប្រឹក្សាជាមួយកូន និងវិធីសាស្រ្តជំរុញកូនឱ្យមានភាពក្លាហាន និងសម្រេចចិត្តឱ្យបានត្រឹមត្រូវ៕
September 17, 2018
វិចិត្រករ ប៉ោយ ឈុនលី ទម្លាយប្រវត្តិកម្សត់ និងមហិច្ឆតា និងការតស៊ូ តាមរយៈវីដេអូខ្លីចាក់ដោតបេះដូងអ្នកទស្សនា!!
នៅថ្មីៗនេះ នៅលើបណ្ដាញសង្គមហ្វេសប៊ុកកំពុងមានការភ្ញាក់ផ្អើលជាខ្លាំង ខណៈបានទស្សនាអំពីប្រវត្តិកម្សត់របស់ វិចិត្រករ ប៉ោយ ឈុនលី ដែលមានដើមកំណើតមកពីខេត្ត បាត់ដំបង។ វីដេអូខ្លីមានរយៈពេលប្រមាណជាង 6នាទីនេះ បានបង្ហាញពីមហិច្ឆតា និងការតស៊ូចាកចេញពីភាពក្រីក្រ ដោយការប្រឹងប្រែងស្វែងរកការសិក្សា។ នៅក្នុងនោះ លោកបានបញ្ជាក់ថា លោកមានបំណងធំមួយ គឺចង់ក្លាយជាវិចិត្រករល្បីឈ្មោះទូទាំងពិភពលោក។
លោក ប៉ោយ ឈុនលី បានរៀបរាប់ថា មានតែការសិក្សាទេទើបធ្វើឱ្យលោករួចផុតពីភាពក្រីក្រ និងជួយផ្គត់ផ្គង់ដល់ក្រុមគ្រួសារបាន។ លោកបានសម្រេចចិត្តរៀនខាងគំនូរ និងខិតខំសិក្សាភាសាអង់គ្លេសបន្ថែម។ ជាការពិតណាស់ សព្វថ្ងៃនេះ លោក ប៉ោយ ឈុនលី មិនមែនត្រឹមតែជាវិចិត្រករគូររូបម្នាក់ប៉ុណ្ណោះទេ តែលោកបានវិវឌ្ឍខ្លួនជាអ្នកគូរគំនូរជីវចល ដែលឈ្នះការប្រកួតទៀតផង។ វិចិត្រកររូបនេះបានសរសេរលើហ្វេសប៊ុកថា «ហេតុអ្វីគេមាន ចុះហេតុអ្វីយើងក្រ? នេះហើយជាជីវិតរបស់ខ្ញុំ អរគុណអង្គការហ្វារពន្លឺសិល្ប: អរគុណលោកគ្រូទាំងអស់ ជាពិសេសលោកគ្រូ ស្វាយ សារ៉េត អរគុណពុកម៉ែបង្កើត និងពុកម៉ែចិញ្ចឹមរបស់ខ្ញុំ Gerard Pivaut និងគ្រួសាររបស់គាត់ អរគុណដល់អ្នកជុំវិញខ្លួនខ្ញុំទាំងអស់ដែលតែងតែគាំទ្រខ្ញុំរហូតមក ទោះផ្ទាល់ និងពីចំងាយក្ដី»។
ចង់ដឹងថា តើវីដេអូខ្លីបង្ហាញពីភាពតស៊ូរបស់វិចិត្រករ ប៉ោយ ឈុនលី ចាក់ដោតបេះដូងអ្នកទស្សនាដល់កម្រិតណានោះ សូមទស្សនាវីដេអូខាងក្រោមនេះ ៖

September 17, 2018
បេក្ខនារី អ៊ុំឆេង យុត្តិការ ទាំងស្អាត ទាំងសំឡេងពីរោះ កំពុងលេចធ្លោក្នុងកម្មវីធី The Voice Kids Cambodia
កម្មវិធីប្រឡងចម្រៀងកុមារលំដាប់ថ្នាក់ពិភពលោក The Voice Kids Cambodia បានចាប់ផ្តើមរដូវកាលទី2 ហើយថ្ងៃនេះក៏ជាវគ្គ The Blind Audition សប្តាហ៍ទី5 ដែលមានការចូលរួមពីបេក្ខជនដែលមានសមត្ថភាពសំឡេងពីរោះៗមិនធម្មតាឡើយ។
នៅក្នុងសប្តាហ៍ទី5 នៃវគ្គ Blind Audition នេះ គេមើលឃើញបេក្ខនារី អ៊ុំឆេង យុត្តិការ វ័យ 14ឆ្នាំម្នាក់ ដែលមានសំឡេងពីរោះរណ្ដំ ហើយនាងមកពីខេត្តរតនគិរី ដែលបានលើកយកបទ «មាននឹកអូនទេបង» មកបកស្រាយប្រឡងក្នុងកម្មវិធី រហូតធ្វើឱ្យគ្រូបង្វឹកទាំង 3រូប រូបសម្រេចគោះប៊ូតុងជ្រើសរើសប្អូនស្រីទៅកាន់វគ្គបន្តទៀត។ ជាមួយនឹងទេពកោសល្យពីកំណើត បូករួមទាំងការហ្វឹកហាត់ច្រៀងដ៏ល្អ ប្អូនស្រីបានបញ្ចេញសមត្ថភាពដ៏អស្ចារ្យនៅលើឆាក ក្នុងការបកស្រាយបទចម្រៀងជាមួយគ្រូបង្វឹក សួស វីសា តាមរយៈបទ «កំដរខ្ញុំបន្ដិចបានទេ»។ អ្វីដែលពិសេសក្រៅពីមានសំឡេងពីរោះនោះ គឺប្អូនស្រីមានរូបសម្រស់ស្រស់ស្អាត Cute សុភាពរាបសា រួសរាយគួរឱ្យស្រឡាញ់ទៀតផង។
គួរបញ្ជាក់ផងដែរ បន្ទាប់ពីគ្រូបង្វឹកធ្វើការប្រូម៉ូតពីសមត្ថភាពបង្រៀនកូនក្រុមរបស់ខ្លួនដើម្បីទាក់ទាញយករូបនាងតូច អ៊ុំឆេង យុត្តិការ មកធ្វើជាកូនក្រុមហើយនោះ នៅទីបំផុតនាងតូចរូបនោះ ក៏សម្រេចចិត្តជ្រើសយកគ្រូបង្វឹក សួស វីសា។ តោះ! កុំឱ្យខាតពេលវេលាយូរ សូមអញ្ជើញប្រិយមិត្តទៅតាមដានទស្សនាវីដេអូនោះទាំងអស់គ្នា៖
September 17, 2018